ལྷ་མོ་འོད་ཟེར་ཅན་མའི་རིག་གཏད།
༄། ། སྒྲོལ་མ་མི་མཐུན་ཀུན་སེལ་གྱི་ལས་ཚོགས་ལས༔ ལྷ་མོ་འོད་ཟེར་ཅན་མའི་རིག་གཏད་ནི༔
ཁབ་འོད་ཟེར་ཅན་དུ་གསལ་བ་གཏད་ལ༔ ཧཱུྃ༔ མ་རིག་རྩད་གཅོད་རྡོ་རྗེའི་ཁབ༔ འཕགས་མའི་གཟུངས་ཀྱིས་བྱིན་རླབས་པ༔ སྐལ་ལྡན་ཁྱོད་ལ་གཏད་པ་ཡིས༔ མི་མཐུན་རྐྱེན་ཀུན་བརླག་པར་ཤོག༔ རྩ་སྔགས་དང་༔ ཀརྨ་ཨ་བྷི་ཥིཉྩ་ཧཱུྃ༔ སྐུད་པ་ལས་བྱེད་མཁའ་འགྲོར་གསལ་བ་གཏད་ལ༔ ཧཱུྃ༔ གཡེངས་པ་འཆིང་བྱེད་སྐུད་པ་འདི༔ ལས་བྱེད་མཁའ་འགྲོས་བྱིན་རླབས་ཏེ༔ སྐལ་ལྡན་ཁྱོད་ལ་གཏད་པ་ཡིས༔ སྒོ་གསུམ་རྡོ་རྗེ་གསུམ་འགྲུབ་ཤོག༔ རྩ་སྔགས་དང་༔ ཀརྨ་ཨ་བྷི་ཥིཉྩ་ཧཱུྃ༔ རྡོ་རྗེའི་ཕྱག་རྒྱ་གཉན་པོ་འདི་ཆོངས་ཤིག༔ སྤྱོད་ཅིག༔ འཕགས་མ་ལུས་དང་གྲིབ་མ་བཞིན་དུ་འགྲོགས་པར་འགྱུར་རོ༔ སྤྲོ་ན་སྲུང་བ་ལ་མདུད་པ་གཏད༔ བཟློག་པ་ལ་ཐལ་རྡེབ་བྱ༔ བསད་པ་ལ་འགུགས་བསྟིམ་སྒྲོལ་སྟོབས་ཀྱང་གཞུང་བཞིན་བྱ༔ ཟབ་རྒྱ༔ ༄།། སྒྲོལ་མ་མི་མཐུན་ཀུན་སེལ་གྱི་ལས་ཚོགས་ལས༔ སེངྒེའི་གདོང་ཅན་མའི་རིག་གཏད་ནི༔
གྲི་གུག་མཁའ་འགྲོ་འབུམ་སྡེར་དམིགས་ལ༔ བྃ༔ བདག་རྟོག་གཅོད་བྱེད་རྡོ་རྗེའི་གྲི་གུག་ནི༔ གནས་གསུམ་མཁའ་འགྲོ་འབུམ་སྡེའི་ཕྱག་མཚན་ཏེ༔ སྐལ་ལྡན་སྐྱེས་བུ་ཁྱོད་ལ་གཏད་པ་ཡི༔ ཕྱི་ནང་གསང་བའི་བགེགས་ཚོགས་གཞོམ་པར་ཤོག༔ བཛྲ་ཀརྟ་རི་ཨ་བྷི་ཥིཉྩ་ཧཱུྃ༔ ཐོད་པ་བདུད་རྩིའི་གང་བ་གཏད་ལ༔ བྃ༔ གསང་གསུམ་ཡེ་ཤེས་གཅིག་འདུས་བདུད་རྩིའི་རྒྱུན༔ བདེ་སྐྱོང་ཐོད་པར་གཏམ་པ་ཁྱོད་ལ་གཏད༔ འཇིག་རྟེན་འཇིག་རྟེན་ལས་འདས་དངོས་གྲུབ་ཀུན༔ ཐབས་ཆེན་བདེ་མྱུར་ལམ་ནས་ཐོབ་པར་ཤོག༔མ་ཧཱ་སཱུ་ཁ་སིདྡྷི་ཀརྨ་ཨ་བྷི་་ཥིཉྩ་ཧཱུྃ༔ རྡོ་རྗེའི་ཕྱག་རྒྱ་གཉན་པོ་འདི་ཆོངས་ཤིག༔ སྤྱོད་ཅིག༔ འཕགས་མ་ལུས་དང་གྲིབ་མ་བཞིན་དུ་འགྲོགས་པར་འགྱུར་རོ༔ སྤྲོ་ན་ཟོར་འཕེན་གདབ་ལས་སོགས༔ མངོན་སྤྱོད་བཟློག་པའི་བཀའ་གཏད་བྱ༔ དངོས་གྲུབ་བསྐུལ་ཞིང་ཚོགས་མཆོད་སོགས༔ བསོད་ནམས་དཔུང་བསྐྱེད་བཀྲ་ཤིས་བྱ༔ ཟབ་རྒྱ༔