གསུར་མཆོད་བདུད་རྩིའི་སྤྲིན་ཕུང་།
༄༅། །གསུར་མཆོད་བདུད་རྩིའི་སྤྲིན་ཕུང་བཞུགས་སོ། །
དང་པོ་ཚིག་བདུན་སྤྱན་འདྲེན་ནམ་ཐོད་ཕྲེང་རྩལ་གྱི་སྔགས་ཀྱིས་ལྷ་འདྲེ་གདོན་བགེགས་ཀྱི་གཉེན་པོ་སྟོབས་ཀྱི་ལྷ་ཁྱད་པར་དུ་འཕགས་པ་སྐྱབས་གནས་ཀུན་འདུས་ཨོ་རྒྱན་ཆེན་པོ་སྤྱན་དྲངས་ལ། །
གུ་རུ་པདྨ་ཐོད་ཕྲེང་རྩལ་གྱི་སྔགས། ༀ་ཨཱ་ཧཱུྃ། བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨ། ཧྲཱི་མ་ཧ་རི་ནི་ས་ར་ཙ་ཧྲཱི་ཡ་ཙིཏྟ་ཧྲཱིཾ་ཧྲཱིཾ་ཛ་ཛ༔ སྐྱབས་སེམས་ནི། སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་ཏུ་བདག་སྐྱབས་མཆི། །རང་གཞན་དོན་ནི་རབ་བསྒྲུབ་ཕྱིར༎བྱང་ཆུབ་སེམས་ནི་བསྐྱེད་པར་བགྱི༎ལན་གསུམ། རྡོ་རྗེ་གསུམ་གྱི་སྔགས། ༀ་ཨཱ་ཧཱུྃ། ལན་བརྒྱ་རྩ་བརྗོད། ཤུགས་ལྡན་འོད་ཀྱི་སྔགས་ནི། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ༀ་སམྦྷ་ར་སམྦྷ་ར་ཧཱུྃ། མཆོད་སྦྱིན་གྱི་མཚན་བཞི་ནི། བདེ་གཤེགས་པ་རྒྱལ་བ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག་འཚལ་ལོ། །དེ་བཞིན་གཤེགས་པ་སྐུ་འབྱམས་ཀླས་ལ་ཕྱག་འཚལ་ལོ། །དེ་བཞིན་གཤེགས་པ་འཇིགས་པ་ཐམས་ཅད་དང་ཡོངས་སུ་བྲལ་བའི་ལྷ་ལ་ཕྱག་འཚལ་ལོ། །ཞེས་འབྲུ་གསུམ་སཾ་བྷ་ར་མཚན་བཞིས་གསུར་རྫས་སམ་གཏོར་མ་བྱིན་བྱིན་གྱིས་བརླབས། ཨོཾ་ཨཱཿཧཱུཾ་ཧོ། ཏིང་འཛིན་སྔགས་དང་ཕྱག་རྒྱས་བྱིན་རླབས་པའི། །ཟག་མེད་འདོད་ཡོན་ལྔ་ལྡན་གསུར་མཆོད་འདི། །བླ་མ་དཀོན་མཆོག་སྲི་ཞུའི་མགྲོན་རྣམས་མཆོད། ། །ཚོགས་གཉིས་རྫོགས་ཤིང་སྒྲིབ་གཉིས་དག་པར་མཛོད། །ཆོས་སྐྱོང་ནོར་ལྷ་ཡོན་ཏན་མགྲོན་རྣམས་མཆོད། །འདོད་དོན་ཀུན་འགྲུབ་ཚེ་ནོར་སྙན་གྲགས་སྐྱེད། །ཕ་མ་རིགས་དྲུག་སྙིང་རྗེའི་མགྲོན་ལ་སྦྱིན། །སྡུག་བསྔལ་ཀུན་ཞི་དྲིན་ལན་ལོན་གྱུར་ཅིག །གསོན་བདུད་བགེག་རིགས་ལན་ཆགས་མགྲོན་ལ་བསྔོ། །ཚེ་ནོར་སྲོག་གི་བུ་ལོན་འཁོར་གྱུར་ཅིག །གསུར་འདི་མཐོང་ཐོས་དྲན་རེག་འགྲོ་ཀུན་ལ། །སྙིང་རྗེ་སྐྱེས་ཤིང་ཆོས་དབྱིངས་ཀློང་གྲོལ་ཤོག ༈ ཧོ། ཁྱེར་ཅིག་ཁྱེར་ཅིག་ཁྱེར་ཅིག་སྟོབས་ལྡན་རྣམས། །སྲེད་དང་ཆགས་དང་ཞེན་པ་དང་། །དྲན་དང་གཟུང་དང་བསམ་དང་རེག །གློད་དང་ཞི་དང་གྲོལ་བར་མཛོད༎ ཨ་ཨ༔ ཞེས་བརྗོད། གྲངས་གསོག་ན་འབྲུ་གསུམ་དང་སམ་བྷ་རའི་སྔགས་ནས་བཟུང་ཨ་ཨ་བར་འདོན། མཐར༌། ཆོས་ཀྱི་སྦྱིན་པ་ནི། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །སྐར་བ་རབ་རིམ་མར་མེ་དང་། །སྒྱུ་མ་ཟིལ་བ་ཆུ་བུར་དང་། །རྨི་ལམ་གློག་དང་སྤྲིན་ལྟ་བུ། །འདུས་བྱས་ཆོས་རྣམས་དེ་ལྟར་བལྟ། །རྒྱལ་བ་མཆོད་པས་མཉེས་གྱུར་ཅིག །དམ་ཅན་ཐུགས་དམ་སྐོང་གྱུར་ཅིག །རིགས་དྲུག་འདོད་པ་ཚིམས་གྱུར་ཅིག །ལན་ཆགས་ཤ་འཁོན་སྦྱོངས་གྱུར་ཅིག །ཚོགས་གཉིས་ཡོངས་སུ་རྫོགས་གྱུར་ཅིག །སྒྲིབ་གཉིས་བག་ཆགས་དག་གྱུར་ཅིག །དམ་པ་སྐུ་གཉིས་ཐོབ་གྱུར་ཅིག ། གཤེགས་གསོལ་ནི། བཛྲ་མུས་མགྲོན་གཤེགས། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང་། །བསོད་ནམས་ཡེ་ཤེས་ལས་བྱུང་པའི། །དམ་པ་སྐུ་གཉིས་ཐོབ་པར་ཤོག ། ན་མོ་རཏྣ་ཏྲ་ཡཱ་ཡ། ཏདྱཱ་ཐ། པཉྕེ་ཏྲ་ཡ་ཨ་ཝ་བྷོ་དྷ་ན་ཡེ་སྭཱཧཱ། །སོགས་སྨོན་ལམ་འགྲུབ་པའི་གཟུངས་ཀྱིས་རྒྱས་གདབ་པར་བྱའོ། །ཅེས་གླུད་དང་གཏོར་མ་བསྔོ། དེ་ལྟར་བསྔོས་པ་ཚོགས་རྫོགས་པ་དང༌། སྒྲིབ་པ་དག་པ། ལན་ཆགས་བྱིང་བ། འཁོན་པ་ཞི་བ། འཆི་བ་བསླུ་བ། བར་དོའི་སེམས་ཅན་ལ་ཕན་པ་རྒྱ་ཆེར་འབྱུང་ངོ༌། ཞེས་གསུར་དང་འཆི་བསླུ་སོགས་གང་ཡང་ལ་ཁ་བསྒྱུར་ཆོག་པ་འདི་༧རྒྱལ་བའི་དབང་པོའི་ཀརྨ་པ་བཅུ་གསུམ་པ་ཆེན་པོ་ཐུགས་བྲེལ་ཆེ་སྐབས་སྟབས་བདེ་ཞིག་དགོངས་བཞེད་བཞིན་རྫོགས་པ་ཆེན་པོའི་རྒྱུད་ཀྱི་དགོངས་པ་མན་ངག་གིས་བརྒྱན་པ་རང་བཟོའི་དྲི་མས་མ་གོས་པ་ཡིན་ནོ། །ཇོ་བོ་རྗེས། སོ་སོའི་སྐྱེ་བོའི་གསུང་ཚིག་སྦྱོར་ལེགས་ཀྱང་སྙིང་པོ་མེད་ཚུལ་གསུངས་པ་དང༌། མཆོད་སྦྱིན་གྱི་ལས་ལ་མ་བཀག་ཀྱང་། མཆོག་འདོད་པ་ལ་ས་སྐྱ་པཎ་ཆེན་གྱིས། རང་བཟོའི་ཆོ་གར་འགྱུར་མི་སྲིད། །ཆོ་ག་སངས་རྒྱས་སྤྱོད་ཡུལ་ཡིན། །ཅེས་པ་ལྟར་སངས་རྒྱས་དང་བྱང་ཆུབ་སེམས་དཔའ་བདེན་ཚིག་གྲུབ་པ་འི་གསུང་ལ་མ་བརྟེན་པར། རང་བཟོས་ཆོ་ག་ནི་ཕན་ལས་གནོད་པ་ཆེ་བར་འགྱུར་བས་ཤེས་པར་བྱའོ། །ཅེས་རིག་འཛིན་ཚེ་དབང་ནོར་བུས་འོག་མིན་དཔལ་གྱི་མཚུར་ཕུར་སྦྱར་བ་བཀྲ་ཤིས་པར་གྱུར་ཅིག །