ཡིག་མེད་ཨུ་པ་དེ་ཤ་ལས་ལྗགས་བྱིན་རླབས་ཡེ་ཤེས་རབ་འབར།
༈ ཡིག་མེད་ཨུ་པ་དེ་ཤ་ལསཿ ལྗགས་བྱིན་རླབས་ཡེ་ཤེས་རབ་འབར་བཞུགས་སོཿ
ཨོཾ་ཨཱཿཧཱུྂཿ སྟོང་པའི་ངང་ལས་རང་ཉིད་གསུང་དབང་ཕྱུགཿ པདྨ་གར་དབང་དམར་པོ་ཌཱ་དྲིལ་ཐོགསཿ ཞི་འཛུམ་ལོངས་སྐུའི་ཆས་ཅན་དཀྱིལ་ཀྲུང་བཞུགསཿ ལྕེ་དབང་རྡོ་རྗེའི་རལ་གྲི་མེ་འབར་གསལཿ རྩེ་མོར་ཟླ་བར་ཨོཾ་དཀར་དབྱངས་གཡས་འཁོརཿ རྐེད་པར་ཉི་མར་ཨཱཿདམར་གསལ་བྱེད་གཡོནཿ རྩ་བར་རྡོ་རྗེར་ཧཱུྂཿསྔོན་རྟེན་སྙིང་གཡསཿ འཁོར་བས་འོད་ཀྱིས་འཕགས་མཆོད་འགྲོ་སྒྲིབ་སྦྱང་ཿ རྒྱལ་ཀུན་གསུང་གི་བྱིན་རླབས་ལྕེ་ལ་བསྡུསཿ ཐོག་མེད་བསག་པའི་ངག་གི་སྒྲིབ་པ་དགཿ ངག་མནན་དམ་གྲིབ་ནད་གདོན་མ་ལུས་སེལཿ ངག་གི་དབང་ཕྱུག་ཆེ་བའི་ང་རྒྱལ་བསྐྱེདཿ ཨོཾ་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ལན་བདུན། ཀ་ཁ་ག་གྷ་ང་ཿ ཙ་ཚ་ཛ་ཛྷ་ཉཿ ཊ་ཋ་ཌ་ཌྷ་ཎ། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ལན་བདུན། ཨོཾ་ཡེ་དྷརྨཱ་ཧེ་ཏུ་པྲ་བྷ་བཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཡ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་ཝཱ་དཱི་མ་ཧཱ་ཤྲ་མ་ཎ་སྭཱཧཱཿ ལན་བདུན། ཨོཾ་ཧྲཱི་པདྨ་ནིརྟི་ཤྭ་ར་ཧཱུྂཿ ལན་བདུན། བླ་མ་རྒྱལ་བ་སྲས་བཅས་བདེན་པའི་མཐུསཿ རྡོ་རྗེའི་གསུང་གི་དངོས་གྲུབ་ཐོབ་པར་ཤོགཿ འདི་ཡིས་ངག་གིས་སྒྲིབ་པ་དགཿ མཐུ་མནན་དམ་གྲིབ་ནད་གདོན་ཀྱིསཿ བསྐྱེད་པའི་ལྐུག་དིག་ལ་སོགས་ཞིཿ སྔགས་ཀྱི་ཆད་ལྷག་སྐྱོན་ཀུན་སེལཿ གང་བཟླས་གྲངས་མེད་འཕེལ་བ་དང་ཿ སྔགས་ནུས་འབར་ཞིང་བདེན་ཚིག་འགྲུབཿ གཞན་དོན་འབྱུང་བཞིར་བྱིན་རླབས་ཀྱང་ཿ ལྕེ་ལས་ཡི་གེ་སྤྲོས་པས་ཆོགཿ རྩོད་པ་བྱེད་དང་སྲུང་འཁོར་སྒོམཿ ཀུན་ལ་འདི་ཡི་དམིགས་པས་ཆོགཿ ས་མ་ཡཿ རྡོ་རྗེ་ཚེ་དབང་ནོར་བུར་ཡེ་ཤེས་མཁའ་འགྲོས་གནང་བའི་མན་ངག་ཡང་དག་པའོཿ
༈ ཀཿཐོག་རིག་འཛིན་ཆེན་པོའི་ལུགས་ཀྱི་ལྗགས་བྱིན་རླབས་ཀྱི་དམིགས་པ་ནི། རང་ཉིད་སྐད་ཅིག་ལ་ལྷར་གསལ་བ་ཡིན། སྔོན་འགྲོ་གཏོང་སྐབས་སོགས་ཐོག་མའི་ལས་ཅན་ཡིན་ཚེ་མོས་བསྒོམ་ཙམ་བྱས་པས་འཐུས། པདྨ་གར་དབང་གི་རྒྱན་ཆ་ལུགས་དཔའ་བོ་རྡོ་རྗེ་ཆོས་དང་འདྲ། ལྕེ་ཤེས་རབ་རལ་གྲི་མེ་འབར་གྱི་རྩེ་མཆུའི་ཕྱོགས་དང་རྩ་་བ་རྡོ་རྗེ་ཕྱེད་པའི་ཡུ་བ་མིད་པའི་ཕྱོགས་སུ་འཁོར། རལ་གྲིའི་རྩེ་མོར་ཟླ་བར་ཨོཾ་ལ་དབྱངས་ཡིག་དཀར་པོ་གཡས་སུ་འཁོར། རྐེད་པར་ཉི་མར་ཨཱཿཡིག་དམར་པོའི་མཐར་གསལ་བྱེད་གཡོན་དུ་འཁོར། རལ་གྲིའི་རྩ་བ་རྡོ་རྗེའི་ཡུ་བའི་ལྟེ་བར་ཧཱུྂཿསྔོན་གྱི་མཐར་རྟེན་འབྲེལ་སྙིང་པོ་གཡས་སུ་འཁོར། དེའི་འོད་ཀྱིས་ཉན་ཐོས་རང་རྒྱལ་བྱང་ཆུབ་སེམས་དཔའ་རིག་པ་འཛིན་པ། དུས་གསུམ་སངས་རྒྱས་ཐམས་ཅད་མཆོད། ཡང་འོད་འཕྲོས་པས་རིགས་དྲུག་སོ་སོའི་ལས་དང་སྡུག་བསྔལ་སྤྱི་དང་བྱེ་ཕྲག་ངག་གི་སྒྲིབ་པ་དག རྒྱལ་བ་སྲས་བཅས་ཀུན་གྱི་གསུང་གི་བྱིན་རླབས་འོད་ཟེར་དཀར་དམར་དམར་མཐིང་ཀ་དང་ཁྱད་པར་ཞལ་ལས་བྱུང་བའི་འོད་དམར་གྱི་རྣམ་པས་ལྕེ་ལ་བསྡུས། བདག་གཞན་ཀུན་གྱིས་ཐོག་མེད་བསག་པའི་ངག་གི་སྒྲིབ་པ་དག ངག་མནན་དམ་གྲིབ་ནད་གདོན་མ་ལུས་སེལ། རང་ཉིད་ངག་གི་དབང་ཕྱུག་ཆེ་བའི་ལྷའི་ང་རྒྱལ་བསྐྱེད། སྔགས་རྣམས་ལན་བདུན་རེ་བཟླ། དབྱངས་གསལ་སོ་སོ་འམ་ཆབ་གཅིག་ཏུ་བཟླ་བ་སོགས་རང་་གི་འདོད་པ་དང་བསྟུན། འདི་ལྟར་བཟླས་པས་ཐོག་མེད་ནས་བསག་པའི་ངག་གི་སྒྲིབ་པ་རྫུན་དང༌། ཕྲ་མ། ཚིག་རྩུབ། ངག་འཆལ་སོགས་བྱང་ཤིང་གང་བཟླས་པའི་མཚན་གཟུངས་གསུང་རབ་སོགས་གྲངས་མེད་པར་འགྱུར། གང་བཤད་པ་གཞན་ལ་ཕན་ཞིང་ཀུན་གྱིས་ངག་ལ་ཉན། བདེན་པ་བརྗོད་པའང་སྟོབས་ལྡན་དུ་འགྱུར། ངག་གི་བདེན་ཚིག་གྲུབ། མཐར་རྒྱལ་བ་ཐམས་ཅད་ཀྱི་གསུང་གི་ཡེ་ཤེས་ཐོབ་ཅིང་པདྨ་གར་དབང་དང་ངོ་བོ་དབྱེར་མེད་དུ་སངས་རྒྱས་པར་འགྱུར་རོ། །གཞན་ལ་རྩོད་པ་བྱེད་ཚེ་ཐུན་མོང་བ་ནི། རལ་གྲིའི་རེརྩེ་ནས་མེ་ཡི་ཞགས་པ་འཕྲོས་ཏེ་གཞན་གིས་ལྕེ་བཅིང་ཞིང་ཚལ་བར་ཚིག་པར་བསམ། ཐུན་མིན་ནི་ཡི་གེ་གསུམ་ལས་འོད་ལྕགས་ཀྱུ་ལྟ་བུ་འཕྲོས་ཏེ་དམིགས་བྱའི་ལྕེ་དབང་ཨ་ཡིག་དང་རྣམ་ཤེས་ནྲྀ་ཡིག་དྲངས་ཤིང་རང་གི་ལྕེ་སྟེང་གི་ཡི་གེ་གསུམ་ལ་བསྟིམ། རལ་གྲི་གྲངས་མེད་པ་ཁབ་ལྟ་བུ་མང་པོས་ཁོའི་ལྕེ་མནན་ཅིང་གཟིར་བར་བསམ། གཞན་ཕན་ཆེད་དུ་འབྱུང་བཞི་སྟེ་ས་ཆུ་མེ་སོགས་ལ་སྔགས་བྱེད་ན་ཡི་གེ་གསུམ་ཀྱི་འོད་ཀྱིས་རྒྱལ་བ་རྣམས་ཀྱི་བྱིན་རླབས་ཡི་གེ་གསུམ་གྱི་རྣམས་པར་སྤྱན་དྲངས་ཤིང་ཁ་ཆར་བབས་པ་བཞིན་དེ་དག་ལ་ཐིམ། རང་གི་ལྕགས་རྩེ་ལས་མེ་འོད་ཚ་ཚ་འཕྲོས་ཏེ་སྒྲུབ་ཆུ་སོགས་ནུས་ལྡན་དུ་བྱས། གདོན་བགེགས་ལ་ཁྲོ་ཆུང༌། ནད་ལ་སྨན་བླ། གྲིབ་ལ་ཕྱག་རྡོར། རྒྱལ་གདོན་ལ་གུར་དྲག་སོགས་རང་གི་གཉེན་པོ་སྟོབས་ཀྱི་ལྷ་སྤྲོས་ཏེ་དམིགས་བྱའི་གནས་དང་དབྱེར་མེད་དུ་གྱུར་བར་བསམ་ལ་སྟོང་ཉིད་ཀྱི་ངང་དུ་མཉམ་པར་འཇོག་གོ། །སརྦ་མངྒ་ལཾ།