སྤྱི་དོན་བསྡུས་ཏེ་བསྟན་པ།
རྒྱུད་སྡེའི་དགོངས་པ་སོ་སོ་དང་སྦྱར་ཏེ་ལྷ་སྒོམ་ཚུལ།
གཉིས་པ་དངོས་གཞིའི་རིམ་པ་ལ། སྤྱི་དོན་བསྡུས་ཏེ་བསྟན་པ་དང་། གཞུང་དོན་རྒྱས་པར་བཤད་པའོ། །དང་པོ་ལའང་རྒྱུད་སྡེའི་དགོངས་པ་སོ་སོ་དང་སྦྱར་ཏེ་དང་། སྐྱེ་གནས་བཞིའི་བག་ཆགས་སྦྱོང་ཚུལ་དང་སྦྱར་ཏེ་དང་། དབང་པོའི་རིམ་པ་དང་སྦྱར་ཏེ་ལྷ་སྒོམ་ཚུལ་རྣམས་ལས། དང་པོ་ནི་རྒྱུད་ལས། རྫོགས་པའི་རིམ་པ་འདོད་པ་ཡི། །རྣལ་འབྱོར་ཐབས་ལྡན་རྣམས་ཀྱིས་ནི། །བསྐྱེད་པའི་རིམ་པ་རྨིང་ནས་བརྩིག །ཞེས་དང་། གསང་བདག་ཞལ་ལུང་ལས། མདོར་ན་མ་དག་པའི་སྣང་བ་དག་པའི་སྣང་བར་བསྒྱུར་ཏེ། དཀྱིལ་འཁོར་གྱི་འཁོར་ལོ་བསྒོམ་པ་ནི་བསྐྱེད་རིམ་དེ་བདེ་སྟོང་གི་ཡེ་ཤེས་སུ་རྟོགས་པར་བྱ་བའི་ཕྱིར་མཚན་བཅས་རྩ་རླུང་ཐིག་ལེ་དང་། མཚན་མེད་དེ་ཁོ་ན་ཉིད་ཀྱི་ཏིང་ངེ་འཛིན་སྒོམ་པ་ནི་རྫོགས་རིམ་སྟེ། ཞེས་གསུངས་ཤིང་། སྔ་མ་བསྐྱེད་རིམ་ལ་ཡང་། ཡུལ་སྣང་བདེན་མེད་དུ་ཤེས་པ་སྒྱུ་མའི་བསྐྱེད་རིམ། ལྷུན་གྲུབ་སྣང་སྟོང་དུ་ཤར་བ་ཟབ་མོའི་བསྐྱེད་རིམ་ལྷ་སྐུ་ཕྱག་རྒྱ་དང་བཅས་པ་སྤྲུལ་པའི་བསྐྱེད་རིམ་རྣམས་ལས། འདིར་ཕྱི་མ་ལྟར་བཤད་པ་ལ། མཚན་ཉིད་ནི་དེ་གང་ཞིག ཞུ་བདེ་དང་མཚུངས་ལྡན་དུ་གྱུར་པ་བཅོས་ཤིང་བརྟགས་པ་ལས་བྱུང་བའི་ལྷ་སྐུ་སྣང་སྟོང་བསྐྱེད་རིམ་གྱི་མཚན་ཉིད། དེ་ཡང་ཁྱད་ཆོས་བཞི་ལྡན་ཏེ། ཀུན་དགའ་སྙིང་པོས། ཆོ་གའི་ཁྱད་པར་རྒྱུད་ལས་གསུངས་པའི་བསྐྱེད་ཆོག་ཚང་བ། རང་འབྲས་ཀྱི་ཁྱད་པར་སྔགས་ཀྱི་མཐུ་སྐྱེད་ནུས་པ། ངོ་བོའི་ཁྱད་པར་ཞུ་བདེ་དང་སྟོང་ཉིད་ཀྱི་རང་བཞིན། བྱེད་ལས་ཀྱི་ཁྱད་པར་དག་རྫོགས་སྨིན་གསུམ་ཚང་བའོ། །ཞེས་གསུངས་ཤིང་དེ་ཡང་ཕྱི་རྒྱུད་སྡེ་གསུམ་ལྟར་ན། སེམས་ཉིད་ངལ་གསོ་ལས། བྱ་བས་རང་ཉིད་དམན་ལ་ལྷ་ཉིད་མཆོག །རྗེ་ཁོལ་ཚུལ་དུ་སྒྲུབ་པས་དངོས་གྲུབ་ལེན། །སྤྱོད་པས་ལྷ་དང་རང་ཉིད་མཉམ་པར་བ ལྟ། །རང་ཉིད་དམ་ཚིག་མདུན་དུ་ཡེ་ཤེས་ལྷ། །གྲོགས་པོའི་ཚུལ་གྱིས་དངོས་གྲུབ་ལེན་པ་ནི། །རྣལ་འབྱོརདངོས་གཞིར་གཉིས་སུ་མེད་པ་ལ། །སྦྱོར་རྗེས་ལྷ་ནི་དགུག་གཤེགས་གཉིས་སུ་བྱེད། །ཆུ་ལ་ཆུ་བཞག་གཉིས་མེད་དངོས་གྲུབ་ལེན། །ཞེས་པ་ལྟར། དེ་ལ་བྱ་རྒྱུད་ཙམ་པོ་རྣམས་སུ་རང་ཉིད་ལྷར་བསྐྱེད་པ་མེད་ཀྱང་ཁྱད་པར་བ་རྣམས་སུ་ལྷ་ཡེ་ཤེས་པ་རྒྱལ་པོ་ལྟར་བྱས་ཏེ། རང་དམ་ཚིག་པ་འབངས་ཀྱི་ཚུལ་གྱིས་གཙང་སྦྲ་སོགས་ཕྱིའི་བྱ་བ་གཙོ་བོར་གྱུར་པས་དངོས་གྲུབ་ལེན་པར་འདོད་དེ། རིགས་ཐམས་ཅད་པའི་དངོས་གྲུབ་ལེན་པའི་རྒྱུད་ལས། རྗེ་དཔོན་རྒྱལ་པོའི་སྐུར་བལྟས་ལ། །རང་ཉིད་བྲན་གྱི་འདུ་ཤེས་ཀྱིས། །སྔགས་བསྒྲུབ་དངོས་གྲུབ་སྙིང་པོ་ནི། །བླ་ན་མེད་པའི་མཆོག་ཏུ་བླངས། ཞེས་སོ། །སྤྱོད་པའི་རྒྱུད་དུ་ནི། ལྟ་བ་ཡོ་ག་ལྟར་དང་སྤྱོད་པ་ཀྲཱྀ་ཡ་ལྟར་ཆ་མཉམ་པའི་སྒོ་ནས། རང་དམ་ཚིག་སེམས་དཔར་བསྐྱེད་པའི་མདུན་དུ། ལྷ་ཡེ་ཤེས་སེམས་དཔའ་སྤུན་ནམ་གྲོགས་པོའི་ཚུལ་དུ་བསྐྱེད་ནས་དངོས་གྲུབ་ལེན་ཏེ། རིགས་གསུམ་སྤྱིའི་རྒྱུད་ལས། སྤུན་ནམ་གྲོགས་པོའི་ཚུལ་ཙམ་དུ། །དངོས་གྲུབ་དམ་པ་བླངས་བར་བྱ། ཞེས་སོ། རྣལ་འབྱོར་གྱི་རྒྱུད་དུ་ནི། བདག་ལྷར་བསྒོམ་པ་ལ་ཡེ་ཤེས་པ་དགུག་བསྟིམ་གྱིས་གཉིས་སུ་མེད་པར་བྱས་ཏེ། མཆོད་བསྟོད་བཟླས་པ་སོགས་ཀྱི་མཐར་དངོས་གྲུབ་བླངས་ནས་གཤེགས་སུ་གསོལ་བ་སྟེ། རྡོ་རྗེ་འབྱུང་བ་ལས། གཉིས་སུ་མེད་པའི་ཆོས་དབྱིངས་དང་། བླ་མེད་དངོས་གྲུབ་དམ་པ་བླངས། ཞེས་སོ། །ནང་རྒྱུད་གསུམ་གྱི་སྒོམ་ཚུལ་ནི། སེམས་ཉིད་ངལ་གསོ་ལས། མ་ཧཱས་རླུང་དང་བསྐྱེད་རིམ་ཐབས་གཙོ་ལ། །ཨ་ནུས་ཁམས་དང་རྫོགས་རིམ་ཤེས་རབ་གཙོ། །ཨ་ཏིས་ཐམས་ཅད་གཉིས་མེད་ཡེ་ཤེས་གཙོ། །ཀུན་ཀྱང་ཆོས་ཀུན་ཡེ་ནས་མཉམ་པ་ཉིད། །ཡིན་པར་ཤེས་པའི་ཚུལ་གྱིས་ཉམས་སུ་ལེན། ཞེས་གསུངས་པས། མ་ཧཱ་ཡོ་གར་ཏིང་འཛིན་གསུམ་ལ་བརྟེན་ནས་དཀྱིལ་འཁོར་རིམ་གྱིས་བསྐྱེད་པ་གཙོ་བོར་བྱེད་པའི་སྒོ་ནས་ལྷ་རྟོག་དབྱེར་མེད་དུ་སྒོམ་པའོ། །ཨ་ནུ་ཡོ་གར་ཆོས་ཐམས་ཅད་དཀྱིལ་འཁོར་རྣམ་གསུམ་དབྱེར་མེད་པའི་རང་བཞིན་རྩ་བ་བྱང་ཆུབ་སེམས་ཀྱི་དཀྱིལ་འཁོར་ཡེ་ནས་སངས་རྒྱས་པ་ཀུན་ཏུ་བཟང་པོའི་རོལ་པ་མ་འགགས་པའི་རྩལ་ལྷ་སྐུར་འཆར་བར་འདོད་དེ། བང་མཛོད་འཕྲུལ་སྡེ་ལས། རྫོགས་པ་ཨ་ནུ་ཡོ་ག་ནི། །ཕུང་པོ་ཁམས་དང་སྐྱེ་མཆེད་རྣམས། །ལྷ་དང་ལྷ་མོའི་དཀྱིལ་འཁོར་དུ། །མ་བསྐྱེད་རྫོགས་པའི་ཚུལ་དུ་འདོད། ཅེས་དང་། ཨ་ནུ་ཡོ་གའི་ཐེག་པ་ནི། །སྙིང་པོ་ཙམ་ཞིག་བརྗོད་བྱས་ནས། །མ་བསྐྱེད་རྫོགས་པའི་ལྷ་རུ་བསྒོམ། ཞེས་དང་། ཀུན་འདུས་ལས། ཀུན་བཟང་རྫོགས་ཆེན་ཡེ་ནས་བརྡལ་བ་ལ། །ཕྱི་ནང་གསང་བ་བཀོད་པའི་དཀྱིལ་འཁོར་ནི། ཞེས་གསུངས་པ་ལྟར་རོ། །ཨ་ཏི་ཡོ་གར་ནི། སྣང་བ་ཡབ། སྟོང་པ་ཡུམ། རིག་པ་སྲས་སུ་གསུངས་པ་ལྟར། ཀ་དག་ཁྲེགས་ཆོད་ཀྱི་དབྱིངས་ནས་ལྷུན་གྲུབ་ཐོད་རྒལ་གྱི་སྣང་ཆ་རིག་རྩལ་ལྷ་སྐུའི་ཚོམ་བུ་རྟེན་འབྱུང་མ་འགགས་པ་རང་ཤར་བའི་ཚུལ་གྱིས། ཡོངས་གྲུབ་དག་མཉམ་ཆེན་པོའི་ལྷའི་གསལ་སྣང་ལ་སེམས་འཛིན་པ་སྟེ། མན་ངག་སྙིང་ཐིག་གི་ལུགས་ཀྱི་མངོན་རྟོགས་ཕལ་ཆེར་བཞིན་ནོ། །ཡང་བཀའ་བརྒྱད་རྣམ་བཤད་ལས། མ་ཧཱ་ཡོ་གས་སྣང་སྲིད་ལྷ་ཡི་དཀྱིལ་འཁོར་དུ་བསྒོམ། །ཨ་ནུ་ཡོ་ག་ལྟར་ན་དེ་དག་ཐམས་ཅད་ནང་རྡོ་རྗེ་ལུས་ཀྱི་དཀྱིལ་འཁོར་ལ་ཚང་བར་རྫོགས། ཨ་ཏི་ཡོ་གས་ཐམས་ཅད་སེམས་ཀྱི་དཀྱིལ་འཁོར་དུ་རྫོགས་པའོ་གསུངས། སྔགས་ཕྱི་ནང་གི་ཁྱད་པར་གཞན་ཡང་དགོངས་འདུས་ལས། ཕྱི་པ་ལ་ལྷ་ཕོ་རྐྱང་མོ་རྐྱང་རྫོགས་རིམ་ཡིག་འབྲུའམ་ཐིག་ལེ། ནང་པ་ལ་ལྷ་ཡབ་ཡུམ་རྫོགས་རིམ་ཕྱག་རྒྱ། རྒྱན་ཡང་ཕྱི་པའི་ལྷ་ལ་རིན་པོ་ཆེའི་རྩེ་ཕྲན་ཡོད། ནང་པ་ལ་རུས་རྒྱན་ཡོད། ཕྱི་པ་ལ་དཀར་གསུམ་མཆོད། ནང་པ་ལ་ཤ་ལྔ་བདུད་རྩི་ལྔ་མཆོད། ཕྱི་པ་ལ་རིན་པོ་ཆེའི་སྣོད། ནང་པ་ལ་ཀ་པཱ་ལ། ཕྱི་ནང་ཐུན་མོང་དུ་གཏོར་མ། སྦྱིན་སྲེག རབ་གནས། ཚ་ཚ། བུམ་སྒྲུབ་རྣམས་འདྲའོ། ཞེས་དང་། རྒྱུད་འགྲེལ་ལས། འཁོར་བའི་ཆོས་ཉི་ཤུ་ལ་ཐབས་ཀྱིས་ཟིན་ནས་སྤྱོད་ནུས་པ་ནི་སྔགས་ནང་པ་ཞེས་གསུངས་སོ། །འཁོར་བའི་ཆོས་ཉི་ཤུ་ནི། སྤྱད་བྱ་ལྔ། མི་སྤང་ལྔ། དང་བླང་ལྔ། འདོད་ཡོན་ལྔ་སྟེ་ཉི་ཤུ་པོ་ཡིན་པར་ལམ་རིམ་འགྲེལ་བ་འགྲོ་བློའི་མུན་སེལ་ལས་གསུངས་སོ། །
སྐྱེ་གནས་བཞིའི་བག་ཆགས་སྦྱོང་ཚུལ་དང་སྦྱར་ཏེ་ལྷ་སྒོམ་ཚུལ།
གཉིས་པ་ནི། འཁོར་བའི་ཆོས་སྣ་ཚོགས་པར་སྣང་བ་འདི་དག་སྲིད་པར་སྐྱེ་བ་བླངས་པ་ལ་བརྟེན་ནས་འཆར་བའི་ཕྱིར། འཁོར་བའི་ཆོས་ཀྱི་གཙོ་བོ་ནི་སྐྱེ་གནས་བཞི་ཡིན་པས། དེའི་བག་ཆགས་སྦྱོང་བ་དང་སྒོ་བསྟུན་ནས་བསྐྱེད་རིམ་སྒོམ་ཚུལ་བཞིར་གསུངས་ཏེ། རྒྱུད་ལས། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་ཅན་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་བཞིའོ། །ཞེས་པ་ལྟར་བཞི་ལས། སྒོང་སྐྱེས་སྦྱོང་བ་རྒྱས་པ་ཆེན་པོའི་བསྐྱེད་རིམ་ལ། སྤྱིར་རྒྱུད་སྡེ་དང་སྒྲུབ་སྡེའི་ལུགས་འདྲ་མིན་མང་དུ་གསུངས་ནའང་། འདིར་སྒྲུབ་སྡེ་བཀའ་བརྒྱད་ཀྱི་ལུགས་ལྟར་བསྡུས་ཙམ་ནི། སྒོ་ང་ལས་སྐྱེ་བ་རྣམས་ལན་གཉིས་སུ་སྐྱེ་བ་ལྟར། སྐྱབས་སེམས་སྔོན་དུ་འགྲོ་བས་རང་སྐད་ཅིག་གིས་གཙོ་བོ་ཡབ་ཡུམ་དུ་བསྐྱེད་ནས་མདུན་མཁར་དཀྱིལ་འཁོར་གྱི་ལྷ་སྤྱན་དྲངས་ཏེ་མཆོད་བསྟོད་གསོལ་གདབ་རྒྱུན་བཤགས་རྣམས་ཀྱི་མཐར་བསྡུ་རིམ་གྱི་སྟོང་པའི་ངང་ལ་དར་ཅིག་མཉམ་པར་འཇོག་པ་ནི། ཁྱད་པར་གྱི་ཆོས་བསྡུས་པའི་ཚུལ་དང་། དེ་ནས་རྒྱས་པའི་ཚུལ་བདག་སྲས་དང་གཞན་སྲས་ལྟར་བསྐྱེད་པ་སྟེ། བཀའ་བརྒྱད་ལས། བདག་གི་སྲས་སུ་གཞན་བྱ་བ་ལ་ལྔ། ས་བོན་ལས་ནི་གཙོ་བོ་ཡབ་ཡུམ་བསྐྱེད་པ་དང་། །ཕྱོགས་བཅུའི་བདེ་གཤེགས་བཀུགས་ནས་ཡུམ་གྱི་མཁར་བསྟིམ་དང་། །སེམས་ཅན་བཀུགས་ནས་སྒྲིབ་པ་སྦྱོང་བ་དང་། །འཁོར་འདས་གཉིས་སུ་མེད་ལ་ཆེ་བ་བསྐྱེད་པ་དང་། ། མཁའ་ནས་བཏོན་ཏེ་གདན་ལ་འགོད་པའོ། །གཞན་གྱི་སྲས་སུ་བདག་བྱ་བ་ལ་བརྒྱད། གཙོ་བོ་ཡབ་ཡུམ་འོད་ཞུ་ས་བོན་གྱུར་པ་དང་། །དེ་ལས་འབྲས་བུའི་རྡོ་རྗེ་འཛིན་པའི་སྐུར་བཞེངས་པ་ཡབ་ཡུམ་སྐྱེ་མཆེད་རྫོགས་པ་དང་། །ཡབ་གྱི་རྟོག་པ་ཡི་གེར་གྱུར་པ་དང་། །ཡུམ་ལས་འོད་འཕྲོས་ལྷ་ལ་ཡབ་ལས་ཐུགས་རྗེའི་དཀྱིལ་འཁོར་འཕྲོ་བར་གསོལ་གདབ་དང་། །དཀྱིལ་འཁོར་ཀུན་ཀྱང་རང་བསྟིམ་ནས་གཉིས་མེད་ཀྱི་ང་རྒྱལ་བཟུང་བ་དང་། །སྙོམ་པར་ཞུགས་ནས་མཁའ་རུ་དཀྱིལ་འཁོར་བསྐྱེད། །རྟོག་པ་ཞེ་གཉིས་རིག་པ་གནས་པ་དང་འཕྲོ་བ་ཡེ་ནས་ལྷའི་རང་བཞིན་ཡིན་པས་རྟོག་པ་ཆེ་ལོང་ཙམ་དཔེར་བརྗོད་པ་སྟེ། དངོས་ཀྱི་གྲངས་ངེས་མེད་ཅེས་འཇིགས་གླིང་གསུངས་སོ། ལྷར་གསལ་ཕྱིར་འདོན་དང་། །ཕྱག་རྒྱ་བཞི་ཡིས་བཅིང་དང་རྒྱས་གདབ་བོ། ཞེས་པས་བདག་གཞི་དུས་ཀྱི་དེ་བཞིན་གཤེགས་པ་ཡིན་པས་བདག་གི་སྲས་སུ་དེ་བཞིན་གཤེགས་པ་བྱ་བ་དང་། །དེ་བཞིན་གཤེགས་པའི་རིགས་མི་ནུབ་པར་བྱ་བའི་ཕྱིར་གཞན་གྱི་སྲས་སུ་བདག་བྱ་བ་ཡིན་ཞེས་རོང་ཟོམ་ཆེན་པོས་བཞེད་དོ། །འདི་དག་བསྒོམ་ཚེ་གོ་རིམ་མེད་པར་གསུངས་སོ། །ཡང་རྡོ་བྲག་རིག་འཛིན་རྗེའི་བཀའ་བརྒྱད་རྣམ་བཤད་ལས། ཡུམ་གྱི་མཁའ་གསང་དུ་བྱང་སེམས་དཀར་དམར་འདྲེས་པ་གྱེན་དུ་ལྡོག་སྟེ་ཡབ་ཀྱི་ཐུགས་ཀར་གནས་པ་ཧཱུྃ་བརྒྱད་དུ་གྱུར་པ་དཔལ་བརྒྱད་ཀྱི་ས་བོན་དུ་བྱས་ཏེ་ཕྱིར་སྤྲོ་བསྡུ་ལས་བསྐྱེད་པ་ལ་བདག་སྲས་དང་། དཔལ་སོ་སོའི་སྦྱོར་མཚམས་མཁའ་གསང་ལས་ཉི་མ་དང་ཟེར་བཞིན་དུ་རང་རང་གི་སྲས་བཞི་སྤྲོས་པ་ལ་གཞན་སྲས་ཞེས་བྱའོ། །ཞེས་གསུངས་སོ། མངལ་སྐྱེས་སྦྱོང་བྱེད་འབྲིང་གི་བསྐྱེད་རིམ་ལའང་གསུམ་ལས། བསྡུས་པ་ནི་ཕ་རྒྱུད་ལྟར་རྡོ་རྗེའི་ཆོ་ག་གསུམ་སྟེ། སྦྱང་བྱ་བར་སྲིད་མངལ་གནས་བཙའ་བ་གསུམ། སྦྱོང་བྱེད་རྡོ་རྗེ་རྩེ་ལྔ་སོགས་ཕྱག་མཚན་གྱི་རྣམ་པར་བསྒོམ་པས། སྦྱང་བྱའི་ཡིད་ཐུགས་རྡོ་རྗེར་དག༵ ཕྱག་མཚན་དེ་གནས་འགྱུར་རམ་ཧཱུྃ་ཡིག་སོགས་ཀྱིས་མཚན་པར་བསྒོམ་པས་ངག་གསུང་རྡོ་རྗེར་རྫོ༵གས། དེ་ལས་འོད་ཟེར་སྤྲོ་བསྡུས་དོན་གཉིས་བྱས་པས་ཡོངས་གྱུར་ལྷའི་སྐུ་རྒྱན་དང་ཆ་ལུགས་སོགས་རྫོགས་པར་བསྒོམ་པས་ལུས་སྐུ་རྡོ་རྗེར་སྨི༵ན་པའོ། །འབྲིང་ནི་མ་རྒྱུད་ལྟར་མངོན་བྱང་བཞི་སྟེ། ཀལྤོ་ལས། དང་པོ་སྟོང་པ་བྱང་ཆུབ་སེམས། །གཉིས་པ་ས་བོན་བསྡུ་བ་སྟེ ། །གསུམ་པ་ལ་ནི་གཟུགས་རྫོགས་པ། །བཞི་པ་ལ་ནི་ཡི་གེ་འགོད། ཞེས་གསུངས་པས་དེ་དག་གི་སྦྱང་བྱ་རིམ་པར་ ༡ འཆི་སྲིད་བར་དོ་དང་བཅས་པ། ༢ དྲི་ཟའི་སེམས་ཁུ་ཁྲག་གི་དབུས་སུ་ཞུགས་པ། ༣ རླུང་བཅུས་ལུས་རིམ་གྱིས་བསྐྱེད་པ། ༤བཙས་ནས་དབང་པོ་ཡུལ་ལ་སད་པ་རྣམས་སོ། རྒྱས་པ་ནི་སྦྱང་བྱ་བར་དོའི་ཚོགས་ལམ་རྣམ་ཤེས་མངལ་དུ་འཇུག་ཁ་མ། ཞུགས་པ་མཐོང་ལམ། ཞུགས་ནས་ཟླ་བཅུར་སྒོམ་ལམ་རྫོགས་པ། བཙའ་བ་མི་སློབ་ལམ་དང་ལྔར་སྦྱར་ཏེ། དང་པོ་གསུམ་སྦྱོང་བྱེད་ཏིང་འཛིན་གསུམ་དང་། བཞི་པ་སྦྱོང་བྱེད་མངོན་བྱང་ལྔ་སྟེ། ཀྱེ་རྡོར་ལས། ཟླ་བ་མེ་ལོང་ཡེ་ཤེས་ཏེ། །བདུན་གྱི་བདུན་པ་མཉམ་པ་ཉིད། །རང་ལྷའི་ས་བོན་ཕྱག་མཚན་ནི། །སོ་སོར་རྟོག་པར་བརྗོད་པར་བྱ། །ཐམས་ཅད་གཅིག་གྱུར་ནན་ཏན་ཉིད། །རྫོགས་པ་ཆོས་དབྱིངས་དག་པ་སྟེ། ཞེས་སོ། །ལྔ་པ་སྦྱོང་བྱེད་ལྷར་སྣང་ཕྱག་རྒྱ་ཆེན་པོ་རྟེན་དང་བརྟེན་པ་གསལ་བ་སྲོག་སྡོམ་གཟེར་བཞིའི་མན་ངག་གིས་བསྙེན་སྒྲུབ་ཡན་ལག་བཞི་རྫོགས་ནས་ཆོ་གའི་བསྡུ་རིམ་གྱི་བར་རོ། །དྲོད་གཤེར་སྐྱེས་ཀྱི་བག་ཆགས་སྦྱོང་བྱེད་བསྡུས་པ་ནི། སྦྱང་བྱ་དྲོད་གཤེར་ལ་བརྟེན་ནས་ལུས་རྫོགས་པ་བཞིན་དུ། སྦྱོང་བྱེད་ཉི་ཟླའི་སྟེང་དུ་ཡིག་འབྲུ་ཡོངས་སུ་གྱུར་པ་ལས་ལྷ་སྐུ་རྫོགས་པར་བསྒོམ་པའོ། །བརྫུས་སྐྱེས་ཀྱི་བག་ཆགས་སྦྱོང་བྱེད་ཤིན་ཏུ་བསྡུས་པ་ནི། སྙིང་པོ་བརྗོད་པ་ཙམ་གྱིས་སྐད་ཅིག་གིས་བསྐྱེད་པ་སྟེ། རང་ཤར་ལས། ཅིག་ཆར་འཇུག་པ་གང་ཞེ་ན། ལྷ་རྣམས་མ་བསྐྱེད་སྙིང་པོ་དྲན་པས་རྫོགས། ཞེས་པས། དབང་རབ་རྣམས་ཀྱིས་སེམས་ཉིད་གདོད་མའི་ལྷ་སྐུར་མེ་ལོང་གི་གཟུགས་བརྙན་ལྟར་སྐད་ཅིག་དྲན་རྫོགས་སུ་བསྐྱེད་པའོ། །དེ་དག་ལ་མངལ་སྒོང་གཉིས་སྦྱོང་བྱེད་ནི་མ་ཧཱ་ཡོ་ག་ལྟར་དང་། དྲོད་གཤེར་ནི་ཨ་ནུ་དང་། བརྫུས་སྐྱེས་སྦྱོང་བྱེད་ནི་གཙོ་བོ་ཨ་ཏི་ཡོ་ག་ལྟར་རོ། །དེ་དག་གི་ཚེ་འཁོར་བ་དང་རྣམ་པ་མཐུན་པའི་སྲིད་པ་སྦྱང་ཤིང་ད༵ག མྱང་འདས་དང་བཞུགས་ཚུལ་མཐུན་པའི་འབྲས་བུ་གཞི་ལ་རྫོ༵གས། གཉིས་ག་རྫོགས་རིམ་གྱི་སྨི༵ན་བྱེད་དུ་འགྲོ་བ་ནི་སྤྱིའི་གོ་བའོ། །དེ་ལྟར་གཙོ་ཆེར་ལས་དང་པོ་བ་སོགས་ཀྱིས་བསྐྱེད་ཚུལ་རྒྱས་བསྡུས་ཀྱི་ཁྱད་པར་དེ་དག་གིས། སྐྱེ་གནས་བཞི་སོ་སོར་སྦྱོང་ཚུལ་ཀྱང་གཙོ་བོར་སྟོན་པ་ཡིན་གྱི། དོན་ལ་བཞི་ཀ་སྦྱངས་བ་ལ་ཁྱད་མེད་དོ། །
དབང་པོའི་རིམ་པ་དང་སྦྱར་ཏེ་ལྷ་སྒོམ་ཚུལ།
གསུམ་པ་ནི། དགོངས་འདུས་ལས་དབང་པོ་རབ་གྱིས་མ་བཅོས་རང་བྱུང་ཡེ་གསལ་ལྷུན་གྲུབ་སྤྲོས་བྲལ་རྣམ་པར་དག་པ་ལྷའི་ངོ་བོར་ཤེས། འབྲིང་གིས་འདུས་བྱས་མཚན་མ་ཅན་མ་ཡིན་པར་ཐུགས་རྗེ་རང་བྱུང་གི་རྩལ་རྩ་ཁམས་དག་པ་གསལ་འཚེར་གྱི་ལྷར་ཤེས། ཐ་མས་གཟུགས་སྣང་ཐམས་ཅད་ལྷ་དང་ལྷ་མོ་མི་རྟོག་པའི་ངང་ཆུ་ལས་ཉ་འཕར་བའི་ཚུལ་ཅན་དང་། དད་དམ་དག་པས་མངོན་བྱང་ལྔ་དང་། ཏིང་འཛིན་གསུམ་གྱི་སྒོ་ནས་གསལ་བར་བསྐྱེད། ཅེས་དང་། པད་སྡོང་བརྩེགས་པའི་རྒྱུད་ལས་ཀྱང་། དབང་པོ་རབ་འབྲིང་ཐ་མ་སོ་སོ་ལ་གསུམ་རེ་དབྱེ་བ་ལ་དགུ་ཕྲུག་སོགས་ཀྱི་སྒོ་ནས་རྒྱས་པར་གསུངས་པ་རྣམས་ཀྱང་གཞུང་དེ་དག་ལས་རྟོགས་པར་བྱའོ། །