དབང་པོའི་རིམ་པ་དང་སྦྱར་ཏེ་ལྷ་སྒོམ་ཚུལ།

གསུམ་པ་ནི། དགོངས་འདུས་ལས་དབང་པོ་རབ་གྱིས་མ་བཅོས་རང་བྱུང་ཡེ་གསལ་ལྷུན་གྲུབ་སྤྲོས་བྲལ་རྣམ་པར་དག་པ་ལྷའི་ངོ་བོར་ཤེས། འབྲིང་གིས་འདུས་བྱས་མཚན་མ་ཅན་མ་ཡིན་པར་ཐུགས་རྗེ་རང་བྱུང་གི་རྩལ་རྩ་ཁམས་དག་པ་གསལ་འཚེར་གྱི་ལྷར་ཤེས། ཐ་མས་གཟུགས་སྣང་ཐམས་ཅད་ལྷ་དང་ལྷ་མོ་མི་རྟོག་པའི་ངང་ཆུ་ལས་ཉ་འཕར་བའི་ཚུལ་ཅན་དང་། དད་དམ་དག་པས་མངོན་བྱང་ལྔ་དང་། ཏིང་འཛིན་གསུམ་གྱི་སྒོ་ནས་གསལ་བར་བསྐྱེད། ཅེས་དང་། པད་སྡོང་བརྩེགས་པའི་རྒྱུད་ལས་ཀྱང་། དབང་པོ་རབ་འབྲིང་ཐ་མ་སོ་སོ་ལ་གསུམ་རེ་དབྱེ་བ་ལ་དགུ་ཕྲུག་སོགས་ཀྱི་སྒོ་ནས་རྒྱས་པར་གསུངས་པ་རྣམས་ཀྱང་གཞུང་དེ་དག་ལས་རྟོགས་པར་བྱའོ། །