རྟེན་གཞལ་ཡས་ཁང་བསྐྱེད་པ།
གཉིས་པ་ལ་རྟེན་གཞལ་ཡས་ཁང་བསྐྱེད་པ་དང་། བརྟེན་པ་ལྷ་བསྐྱེད་པའོ། །དང་པོ་ནི་གསང་སྔགས་ལམ་གྱི་ཊཱི་ཀ་དང་གསང་བ་འདུས་པའི་བསྐྱེད་རིམ་དང་། བདེ་གཤེགས་ཀུན་འདུས་ཀྱི་བསྙེན་ཡིག་ཟུར་འདེབས་རྣམས་ལས་མཐུན་པར་གསུངས་པ་ལྟར་སྲུང་བའི་འཁོར་ལོ་ཡངས་ཤིང་རྒྱ་ཆེ་བའི་ནང་གི་ནམ་མཁར་སྔར་གྱི་རྒྱུ་ཏིང་གི་ས་བོན་དེ་ལས་ཨེ་ཡྃ་རྃ་བྃ་ལྃ་སུྃ་བྷྲུྃ་རྣམས་རིམ་པ་བཞིན་ཆད་པ་ལས་འོད་ཟེར་འབར་ཞིང་འཕྲོས་པས་འབྱུང་ལྔའི་གཟུང་འཛིན་གྱི་ཞེན་རྟོག་སྦྱངས། འབྱུང་ལྔའི་དྭངས་བཅུད་ཡེ་ཤེས་ལྔའི་ཡོན་ཏན་དུ་གནས་པ་བསྡུས་ཏེ་ཐིམ་ནས་ཞུ་བ་ལས། རྟོག་བྲལ་རང་གི་སེམས་དབུགས་ཁྲག་ཤ་རུས་དྲོད་དང་ཕྱི་ནང་གི་འབྱུང་ལྔ་རྣམ་པར་དག་པ་ཡུམ་ལྔའི་མཁའ་ཀློང་རིམ་པ་བཞིན་གསལ་གདབ་སྟེ། དེའི་ཚུལ་ཡང་། ཨེ་ཡིག་ཡོངས་སུ་གྱུར་པས་དངོས་འཛིན་ཐམས་ཅད་སྦྱངས་ཏེ་སྟོང་དབྱིངས་ནམ་མཁའི་རང་བཞིན་མཐིང་ཀ་གྲུ་གསུམ་ནམ་མཁའ་གྲུ་གསུམ་ཁ་ཏོག་དཀར་པོ་དང་། འབྱུང་བ་གཞན་ལ་འོད་ཟེར་གྱིས་མཐའབསྐོར་བ་ཡང་བཤད་དོ། གྱིས་རྣམ་ཐར་སྒོ་གསུམ་གྱི་སྟོང་ཉིད་དང་། བྷ་གའི་དབྱིབས་ཀྱིས་བདེ་བ་ཆེན་པོའི་ཡེ་ཤེས་མཚོན་ཅིང་། རྒྱ་ཁྱོན་ཚད་མེད་པའི་གདེངས་ཁ་གྱེན་དུ་བསྟན་པ་ལྟ་བུའི་དབྱིབས་ཁ་ཏོག་ཅན་ནི་རྒྱལ་བའི་དཀྱིལ་འཁོར་རབ་འབྱམས་ཀུན་ཏུ་བཟང་མོ་གསང་བའི་བྷ་ག་ལ་བཞུགས་པའི་དོན་དང་། དེའི་སྟེང་དུ་ཡྃ་ལས་རླུང་གི་དཀྱིལ་འཁོར་ལྗང་ནག་རྒྱ་གྲམ་གྱི་རྣམ་པ་འོད་ཟེར་ལྗང་ནག་གིས་བསྐོར་བ། དེའི་སྟེང་དུ་རྃ་ལས་མེའི་དཀྱིལ་འཁོར་དམར་པོ་གྲུ་གསུམ་པ་འོད་ཟེར་དམར་པོས་བསྐོར་བ། དེའི་སྟེང་དུ་བྃ་ལས་ཆུའི་དཀྱིལ་འཁོར་དཀར་པོ་ཟླུམ་པོ་འོད་ཟེར་དཀར་པོས་བསྐོར་བ། དེའི་སྟེང་དུ་ལྃ་ལས་གསེར་གྱི་ས་གཞི་སེར་པོ་གྲུ་བཞི་པ་འོད་ཟེར་སེར་པོས་བསྐོར་བ། དེ་ཡང་རི་རབ་མན་ཆད་ཀྱི་འབྱུང་རིམ་རྣམས་ནམ་མཁའི་ནང་དུ་ཡོད་པར་བཞེད་པའང་སྣང་ངོ། །དེའི་སྟེང་དུ་སུྃ་ལས་རིན་པོ་ཆེ་སྣ་བཞི་ལས་གྲུབ་པའི་རི་རབ་བང་རིམ་བཞི་པའི་སྟེང་དུ། མེ་དཔུང་འབར་བའི་ཀློང་ན་རྡོ་རྗེའི་ས་གཞི་ར་གུར་བླ་བྲེ་སོགས་སྲུང་བའི་འཁོར་ལོ་སྔར་གྱི་སྲུང་འཁོར་དང་འདི་མི་གཅིག་གསུངས་ཡངས་ཤིང་རྒྱ་ཆེ་བའི་དབུས་སུ་དུར་ཁྲོད་བརྒྱད། དེའི་ནང་དུ་ལྕགས་རི་ཁོར་ཡུག་གི་ཁྱམས་དང་། པདྨ་སྟོང་བརྡལ་བའི་ལྟེ་བར་ཉི་ཟླའི་དཀྱིལ་འཁོར་གྱི་སྟེང་དུ། སྣ་ཚོགས་རྡོ་རྗེ་རྒྱ་གྲམ་གྱི་ལྟེ་བར་གཙུག་ཏོར་འཁོར་ལོས་བསྒྱུར་བའི་ས་བོན་བྷྲུྃ་ཡིག་ཁ་ཏོག་ལྔ་ལྡན་ལས་འཕྲོས་པའི་འོད་ཟེར་གྱིས་འཁོར་བའི་ཡུལ་དང་ཁང་ཁྱིམ་སོགས་ཀྱི་ཞེན་རྟོག་སྦྱངས། འདས་པའི་ཞིང་དང་གཞལ་ཡས་ཁང་གི་ཡོན་ཏན་དང་བྱིན་རླབས་ཐམས་ཅད་བསྡུས་ཏེ་ཞུ་བ་ལས་རང་གི་གནས་ཁང་རྣམ་པར་དག་པའི་ངོ་བོ་ཡེ་ཤེས་རིན་པོ་ཆེའི་གཞལ་ཡས་ཁང་གྲུ་བཞི་པ། ཆོས་ཉིད་སྤྲོས་བྲལ་མཚོན་པའི་ལྟེ་བ་ཟླུམ་པོ་བདེན་བཞིའི་གྲུ་ཆད་བདེན་གཉིས་ཟུང་འཇུག་གི་བར་ཁྱམས་འཁོར་བ། ཡེ་ཤེས་རེ་རེ་ལའང་ལྷག་པའི་ཡེ་ཤེས་བཞི་བཞི་དང་ལྡན་པས་གདུལ་བྱའི་རེ་བ་སྐོང་བའི་རྟགས་སུ་གྲུ་ཆད་ལས་ཕྱིར་འཕྱར་བའི་རིན་པོ་ཆེའི་གློ་འབུར་རིགས་བཞིའི་ཁ་ཏོག་ཅན་གྱིས་མཛེས་པ། རྣམ་ཐར་བཞིའི་སྒོ་བཞིའི་སྒོ་ཁྱུད་ཀྱི་ཟླས་དྲངས་པའི་འགྲམ་ལོག་གིས་མཛེས་པ་ཐེག་བརྒྱད་བགྲོད་པའི་རྟགས་སུ་སྒོ་ཕུག་གི་ཕྱི་ནང་གཉིས་ན་ཐེམ་སྐས་བཞི་རེ་སྟེ་རྒྱུའི་རྟ་བབས་བརྒྱད་དང་། དེའི་གྲུབ་མཐའི་ཡོན་ཏན་རྫོགས་པའི་རྟགས་སུ་སྒོ་ཁང་གི་སྟེང་ན་རྒྱན་གྱི་རྣམ་པར་ཏོ་ར་ན་ཞེས་འབྲས་བུའི་རྟ་བབས་བརྒྱད་དེ། རྟ་རྐང་ཆུ་སྐྱེས་སྒྲོམ་ཟར་ཚགས། །སྣམ་འཕྱང་ཆུན་འཕྱང་ཤར་བུ་མདའ་ཡབ་རྣམས་བརྩེགས་པའི་བྱ་འདབ་ཀྱི་རྩེར་ཁྱུང་མགོས་བརྒྱན་པ། སྒོ་ཁང་གི་སྟེང་ན་པདྨ་ལ་གནས་པའི་ཆོས་འཁོར་གྱི་རྩེར་གདུགས་དང་། གཡས་གཡོན་དུ་རི་དྭགས་གཉིས་ཀྱིས་མཛེས་པ། གཉིས་སུ་མེད་པའི་ཡེ་ཤེས་ཀྱི་རིན་པོ་ཆེའི་རྩིག་པ་རིམ་པ་ལྔ་སྦྲག་གི་སྟེང་ན་མུ་ཏིག་གི་དྲྭ་བ་དྲྭ་ཕྱེད་དཔྱང་པའི་སེང་མགོས་བཏེགས་པའི་རིན་པོ་ཆེའི་ཕ་གུ། དེའི་སྟེང་ན་བྲེ་ཕུལ་གྱི་སྣམ་བུར་རིན་པོ་ཆེའི་དྲྭ་བ་དྲྭ་ཕྱེད། དེའི་ཕྱི་ངོས་ནས་བྱ་འདབ་ལས་འཕྱང་བའི་རིན་པོ་ཆེའི་ཤར་བུ། སྟེང་དུ་ལན་ཀན་ནམ་པུ་ཤུ་སྟེ་མདའ་ཡབ་ཀྱིས་མཛེས་པ། དེའི་ཁར་ཟུར་དང་ཕྱོགས་རྣམས་སུ་བུམ་པ་ལ་གནས་པའི་གདུགས། འཕན། རྒྱལ་མཚན་ལ་སོགས་པའི་རྒྱན་སྣ་ཚོགས་ཕྱོགས་ཀུན་ཏུ་འཁྲིགས་པ། འདོད་ཡོན་མ་སྤང་རྒྱན་དུ་ཤར་བས་འདོད་སྣམ་ལ་མཆོད་པའི་ལྷ་མོ་མང་པོས་མཆོད་རྫས་ཐོགས་པ་སྤྲིན་ཕུང་བཞིན་གཏིབ་པས་རྒྱུན་མི་ཆད་པར་མཆོད་པ་དེ་རྣམས་ཀྱང་ཕྱི་ནང་ཀུན་ཏུ་མི་སྒྲིབ་པར་ཟང་ཐལ་དུ་གསལ་བ། ཆོས་དབྱིངས་ཡེ་ཤེས་མཐའ་ཐུག་པ་མེད་པའི་བརྡར་དབུས་ཕྱུར་བུའི་རྩེ་མོར་རྡོ་རྗེ་རིན་པོ་ཆེའི་ཏོག་གིས་མཛེས་ཤིང་བལྟར་མི་མངོན་པ། དབུས་ཀྱི་རྩེ་མོའི་ཏོག་ནས་གསེར་གྱི་ཐ་གུ་རྟ་བབས་ཀྱི་འཁོར་ལོའི་སྟེང་གི་གདུགས་ཀྱི་རྩེ་མོའི་བར་འཐེན་པ་ལ་གསེར་གྱི་དྲིལ་བུ་གཡེར་ཁ། ཟ་ར་ཚགས། ལྡ་ལྡི། རིན་པོ་ཆེའི་ཙོང་ཙོང་། ཉི་ཟླའི་ཚར་ཚར། རྔ་ཡབ་ནོར་བུའི་རྒྱན་ཅན་སོགས་ལྷ་དང་མི་ཡི་རྒྱན་དུ་མ་དཔྱང་བ་ལས་སྒྲ་སྙན་པར་སྒྲོག་པས། དབང་པོ་ལྔ་དང་སྟོབས་ལྔ་མཚོན་ཅིང་། གཞན་ཡང་སྒོ་རྒྱན་དང་། ཕྱི་རོལ་གྱི་རྒྱན་ཏ་ལ་དང་། དཔག་བསམ་གྱི་ཤིང་རྒྱན་ལྡན། ཁྲུས་རྫིང་ལྷ་མོས་མཛེས་པ་དང་། རིན་པོ་ཆེའི་ཕུང་པོ་འོད་འབར་བ་རྣམས་ཕྱོགས་རེ་རེ་ན་གཉིས་རེ་སྟེ་བརྒྱད་བརྒྱད་རྣམས་དང་། ཡང་རི་རབ་ཀྱི་སྟེང་དུ་སྣ་ཚོགས་རྡོ་རྗེ་རྒྱ་གྲམ་གྱི་ལྟེ་བ་བྷྲུྃ་ལས་གཞལ་ཡས་ཁང་བསྐྱེད་ནས། སླར་ཕྱིའི་ཁོར་ཡུག་གི་པདྨ། དུར་ཁྲོད། རྡོ་ར། མེ་རི་རྣམས་རིམ་པས་བསྐྱེད་ཅེས་གོ་རིམ་མ་ངེས་པ་ཡང་གསུངས་སོ། ཁྲོ་བོའི་ཁྱད་པར་ལ། རཀྟའི་རྒྱ་མཚོ། ཞིང་ཆེན་གྱི་ས་གཞི། ཀེང་རུས་ཀྱི་རི་རབ། ཡེ་ཤེས་ཀྱི་མེ་དཔུང་གི་ཀློང་ན། སྣ་ཚོགས་རྡོ་རྗེ་རྒྱ་གྲམ་གྱི་ལྟེ་བར་གཞལ་ཡས་ཁང་གྲུ་བཞི་སྒོ་བཞི་པ། བསེ་ཁྱམས་ཁྲག་ཁྱམས་གང་རིགས་དང་ཐོད་པ་སྐམ་རློན་རྙིད་གསུམ་གྱི་རྩིགས་པ་ལ་གནམ་ལྕགས་ཀྱི་གཟེར་བུས་བཏབ་ཅིང་། རཀྟས་སྤྱིན་ཐབས་སུ་སྦྱར་བ། རྩིགས་སྟེང་ཐོད་པ་སྣ་ཚོགས་ཀྱི་ཕ་གུ་འཕྱར་བ་ལ་རྒྱུ་མ་དང་སྙིང་གི་མགུལ་འཁོར་དང་། བྲེ་ཕུལ་གྱི་སྣམ་བུ་སྦྲུལ་དང་སོར་མོ་དང་ཐོད་ཕྲེང་གི་དྲྭ་བ་དང་དྲྭ་ཕྱེད། དྲྭ་ཕྱེད་རྣམས་ཀྱི་སྣེ་ལ་སྙིང་ཐུར་བསྟན་དུ་དཔྱང་པ། ཙིཏྟའི་ཕོ་ལོང་དང་རྐང་ལག་གི་ཤར་བུ། སྒལ་རྩིབས་ཀྱི་མདའ་ཡབ། རུས་སྦལ་མ་ཐེམ། ཆུ་སྲིན་ཡ་ཐེམ། སྦྲུལ་ནག་གི་སྐྱེས་བུ་སྟེ་སྒོའི་གཡས་གཡོན་གྱི་རུ་ཤིང་། ཞིང་གི་སྒོ་གླེགས། རྟ་བབས་ཀྱི་རྩེར་ཆོས་འཁོར་གཡས་གཡོན་དུ་ཆུ་སྲིན་གྱི་ཕྲུ་གུ་དང་། སྟེང་ན་ཞིང་གདུགས་དང་། ཞིང་ལྤགས་ཀྱི་ཐོག་ཕུབ། ཉི་ཟླའི་མཐོང་དཀར་དང་བཅས་པའི་དབུས་ཕྱུར་བུར་ལྷ་ཆེན་པོའི་ཐོད་པ་སྦུབ་པའི་སྟེང་དུ་ཙིཏྟའི་ཏོག་གིས་བརྒྱན་པ་སྟེ་འཇིགས་ཤིང་རྔམས་པའོ། གཞན་ཡང་གཞལ་ཡས་ཁང་གི་དབྱིབས་སོགས་ཕྱོགས་གཅིག་ཏུ་མ་ངེས་ཏེ། འཁོར་ལོ་སྡོམ་ཆེན་གྱི་དཀྱིལ་འཁོར་ཟླུམ་པོ་སྒོ་བརྒྱད་དང་། ཡང་དག་ཟླ་གམ་སྒོ་གཅིག་དང་། མ་རྒྱུད་ཕལ་ཆེར་ཆོས་འབྱུང་གི་རྣམ་པ་དང་། པདྨ་འདབ་བརྒྱད་སོགས་མ་ངེས་པ་མང་པོ་གསུངས་སོ། །གཞལ་ཡས་ཁང་གི་དབུས་དང་ཕྱོགས་མཚམས་ཀྱི་ལྷ་གནས་རྣམས་སུ་གདན་གྱི་ཁྱད་པར་ཡང་། གདུལ་བྱའི་རེ་བ་སྐོང་བའི་བརྡར། མི་འཇིགས་སེང་གེ་དང་། སྟོབས་གླང་པོ་སོགས་ཀྱིས་བཏེགས་པའི་རིན་པོ་ཆེའི་ཁྲི་དང་། འཁོར་བའི་སྐྱོན་གྱིས་མ་གོས་པའི་རིན་པོ་ཆེའི་པདྨ་དང་། ཟེའུ་འབྲུ་ཁེབ་པའི་ཐབས་ཤེས་ཉི་ཟླ་སོགས་སྐབས་ཐོབ་ལྟར་དང་། ཁྲོ་བོ་ལ་བྱོལ་སོང་གཙོ་བརྒྱད། རུ་ཏྲ་ཕོ་མོའམ། ཏི་ར་སྟེ་བམ་རོ། པདྨ་ཉི་ཟླ་སོགས་སོ་སོ་གཞུང་ཚིག་གིས་བསྟན་དོན་ལྟར་གང་འོས་བསྐྱེད་དོ། །