བརྟེན་པ་ལྷ་བསྐྱེད་པ།
གཉིས་པ་བརྟེན་པ་ལྷ་བསྐྱེད་པ་ནི། དགོངས་འདུས་ལས། གཞལ་ཡས་ཁང་ནི་ཕྱི་ནས་རིམ་པས་བསྐྱེད་ལ། ལྷ་རྣམས་ནི་ནང་ནས་རིམ་པས་བསྐྱེད་དོ། ཞེས་གསུངས་པ་ལྟར། སྔར་གྱི་རྒྱུའི་ཡི་གེ་དེ་དབུས་ཀྱི་གདན་ལ་བབས་པས་དེ་ཡོངས་སུ་གྱུར་པ་ལས་སམ། ཡང་ན་དེ་ཉིད་གཙོ་བོའི་གཡས་པའི་ཕྱག་མཚན་ལ་ཐུགས་སྲོག་གི་ཡི་གེས་མཚན་པར་གྱུར་ནས། འོད་ཟེར་འཕྲོ་འདུས་དོན་གཉིས་བྱས། ཚུར་འདུས་ཡོངས་སུ་གྱུར་པ་ལས་རང་ཉིད་ལྷའི་སྐུ་རྒྱན་དང་ཆ་ལུགས་ཡོངས་སུ་རྫོགས་པར་གསལ་བ་སོགས་ཆོ་ག་རང་རང་གི་བསྐྱེད་ཚིག་དང་མཐུན་པར་གཙོ་འཁོར་ཡོངས་རྫོགས་རིམ་བཞིན་དུ་བསྐྱེད་པར་བྱའོ། །དེ་ཡང་སྤྲོས་པས་མི་ལྕོགས་པའམ་གསལ་མ་ཐེབ་ན་གཙོ་འཁོར་རགས་པ་ཙམ་མམ་གཙོ་བོ་གཅིག་པུ་གསལ། འཁོར་རྣམས་མོས་བསྐྱེད་བྱ། ཐ་ན་ཐུགས་སྲོག་གཅིག་པུ་གསལ་ཞིང་བརྡ་དོན་འཕྲོད་པར་བྱས་ཀྱང་དངོས་གྲུབ་འབྱུང་བར་མ་ཧཱའི་སྒོམ་ཁོམ་ལས་གསུངས་ཤིང་། རྒྱུད་ལས། སོ་སོའི་འཁོར་ཚོགས་རྒྱ་མཚོ་གཞན༔ རང་བཞིན་དག་གིས་གནས་པ་ལ༔ སྐུ་མདོག་ཕྱག་མཚན་གསལ་མི་དགོས༔ སྐད་ཅིག་རྫོགས་པའི་ཚུལ་གྱིས་བསྐྱེད༔ ཅེས་དང་། རྒྱལ་པོ་སྤྱན་དྲངས་ན་འཁོར་རང་བཞིན་གྱིས་འོང་བ་དང་འདྲ་སྟེ་གཙོ་བོ་བསྐྱེད་པས་འཁོར་རྣམས་རང་བཞིན་གྱིས་གནས་པར་བསྐྱེད་དོ། །ཞེས་བདེ་འདུས་སྒོམ་རིམ་ལས་གསུངས་སོ། །གནས་གསུམ་བྱིན་གྱིས་བརླབས་པ་ནི། དེ་ལྟར་གཙོ་འཁོར་ཐམས་ཅད་ཀྱི་སྤྱི་བོར་དུང་ཁང་ན་འཁོར་ལོ་དཀར་པོའི་གདན་ལ་ༀ་དཀར་པོ། མགྲིན་པའི་དབུས་སུ་པདྨ་དམར་པོ་འདབ་བརྒྱད་ཀྱི་སྟེང་དུ་ཨཱཿདམར་པོ། ཐུགས་ཀར་སྙིང་གའི་མདུན་དུ་ཉི་མ་ལ་ཧཱུྃ་མཐིང་ཀ་རྣམས་སྐུ་གསུང་ཐུགས་རྡོ་རྗེའི་ངོ་བོར་གསལ་གདབ་བོ། ཡང་སྐབས་འགར་འབྲུ་གསུམ་པོ་དེ་ལས་འཕྲོ་འདུས་ཡོངས་སུ་གྱུར་པ་ལས་རྣམ་སྣང་འོད་དཔག་མེད་མི་བསྐྱོད་པ་དང་བཅས་པ་ལོངས་སྐུའི་ཆས་ཅན་གྱིས་རྒྱས་གདབ་པར་མོས་ཏེ་སྔགས་རྒྱ་གནས་སོ་སོར་འཇོག་ཅིང་རྡོ་རྗེ་གསུམ་གྱི་ང་རྒྱལ་བྱ་ཞེས་འབྱུང་ངོ་། །དེ་ནས་དབང་བསྐུར་ནི་རང་གི་སྙིང་གི་ས་བོན་ནམ་ཡེ་ཤེས་སེམས་དཔའི་ཐུགས་ཀ་ནས་འོད་ཟེར་འཕྲོས་པས། རང་བཞིན་གྱི་གནས་ནས་བདེ་བར་གཤེགས་པ་ཐམས་ཅད་དབང་ལྷ་རིགས་ལྔ་ཡབ་ཡུམ་གྱི་རྣམ་པར་མདུན་མཁར་སྤྱན་དྲངས། དེ་རྣམས་གཉིས་སུ་མེད་པར་སྦྱོར་བ་མཛད་པས་རྗེས་ཆགས་ཀྱི་མེས་ཞུ་བའི་ཡེ་ཤེས་ལྔའི་ཆུ་རྒྱུན་མགོ་བོའི་གནས་ལྔར་བབས་ཏེ་དབང་བསྐུར་བས་ཉོན་མོངས་པ་ལྔའི་དྲི་མ་དག་ནས་ཆུ་ལུད་པ་སྤྱི་བོར་བརྟན་པ་ཡོངས་སུ་གྱུར་པ་ལས། རང་རིགས་ཀྱི་བདག་པོར་གྱུར་པའི་རིགས་ལྔ་སྤྲུལ་སྐུའི་ཆ་བྱད་ཅན་གྱིས་དབུ་བརྒྱན་ཏེ་འགྲོ་བའི་དོན་ལ་དཔའ་བསྐྱེད་པར་བསམ། ཕུང་པོ་ལྔ་དག་པ་རིགས་ལྔའི་སངས་རྒྱས་སུ་ང་རྒྱལ་བྱ། རིགས་ལྔའི་དབང་རྒྱ་གནས་སོ་སོར་འཇོག་ཅིང་དབང་སྔགས་བརྗོད་པའོ། །དེ་ཡང་ཞི་བ་ལ་རིན་པོ་ཆེའི་དབུ་རྒྱན་དང་། ཁྲོ་བོ་ལ་ཐོད་པའི་དབུ་རྒྱན་གྱི་ཁང་བུ་ལ་བརྟེན་ནས་རིགས་ལྔ་སྒོམ་པ་ཞལ་ལུང་ལས་གསུངས་ཤིང་། ཁྲོ་ཞལ་ཉེར་གཅིག་ལྟ་བུར་ཡང་ཐོད་སྐམ་གྱི་ཁང་བུ་རིན་པོ་ཆེའི་ཟེ་པྲོག་དང་བཅས་པ་རིགས་ལྔའི་སངས་རྒྱས་ཀྱི་བཞུགས་གནས་ཡིན་པའི་ཕྱིར་དབུ་རེ་རེ་ལ་ཐོད་པ་སྐམ་པོ་ལྔ་ལྔས་བརྒྱན་དགོས་གསུངས་སོ། །སྐབས་འགར་དེ་ནས་གནས་གསུམ་བྱིན་གྱིས་རློབས་པ་དང་། ཡང་དབང་བསྐུར་བ་མི་དགོས་པ་སོགས་ཡོད་པས་རང་གཞུང་དང་འབྱོར་བ་དགོས་སོ། །