ཡེ་ཤེས་པ་སྤྱན་དྲངས་ཤིང་བརྟན་པར་བཞུགས་པ།
གསུམ་པ་སྤྱན་འདྲེན་པ་ནི། དེ་ལྟར་རང་གི་སྙིང་གའི་ཧཱུྃ་ཡིག་ལས་འོད་ཟེར་དམར་པོའི་རྩེ་མོ་ནང་དུ་ཅུང་ཟད་གུག་པ་ལྕགས་ཀྱུའི་དབྱིབས་ཅན་དཔག་ཏུ་མེད་པ་འཕྲོས་པས་མཁའ་ཁྱབ་ཀྱི་ཞིང་རབ་འབྱམས་ན་བཞུགས་པའི་རྩ་གསུམ་རྒྱལ་བའི་དཀྱིལ་འཁོར་གྱི་ཚོགས་བཀའ་སྡོད་སྲུང་མ་དང་བཅས་པ་ཆོས་སྐུ་རྣམ་པ་ཐམས་ཅད་པའི་བདག་ཉིད་དུ་བཞུགས་པ་དེ་དག་གི་ཐུགས་རྒྱུད་བསྐུལ་བས། ཆོས་ཀྱི་སྐུ་ལས་མ་གཡོས་བཞིན་དུ་ཐུགས་རྗེའི་དབང་གིས་གཟུགས་སྐུའི་རོལ་པར་བཞེངས་ནས་འབྱོན་མ་རག་པར་བསམ་པ་ནི། སྙན་གསན་དབབ་པ་སྟེ་འཇིག་རྟེན་ན་རྒྱལ་པོ་སྤྱན་དྲངས་པའི་ཐོག་མར་སྙན་གསན་འབེབས་དགོས་པ་བཞིན། དམ་ཚིག་པས་ཡེ་ཤེས་ཀྱི་དཀྱིལ་འཁོར་བཀུར་གནས་སུ་བྱ་བའི་ཆེད་དུ་སྲི་ཞུ་གུས་པའི་སྒོ་ནས་ཚུལ་མཐུན་པའོ། །དེ་ཡང་བསྐྱེད་རིམ་ལྷའི་རྣལ་འབྱོར་ལ་ཞུགས་ཤིང་མི་ཕྱེད་པའི་དད་པ་དང་ལྡན་པ་ན། རྩ་བ་གསུམ་གྱི་ལྷ་ཚོགས་ཐམས་ཅད་རང་བཞིན་ཐུགས་དམ་གྱི་རྒྱུད་བསྐུལ་ནས་མོས་ཤིང་བསྐྱེད་པའི་གནས་སུ་སྐད་ཅིག་གིས་འབྱོན་པར་འགྱུར་བ་ཆོས་ཉིད་ཡིན་པས། མོས་གུས་ཀྱིས་གདུང་བ་བསྐྱེད་ཅིང་། སྤོས་བཏུལ་དབྱངས་རོལ་དང་བཅས་པས་སྤྱན་འདྲེན་གྱི་ཚིག་རྣམས་སྙན་པར་བརྗོད་པས། རྟེན་གཞལ་ཡས་ཁང་སྲུང་བའི་གུར་དང་བཅས་ཏེ། བརྟེན་པ་ཞི་ཁྲོའི་ལྷ་ཚོགས་གང་ཡིན་ཀྱང་། བདག་དམ་ཚིག་པའི་དཀྱིལ་འཁོར་བསྐྱེད་པའི་ལྷ་ཚོགས་དང་འདྲ་བ་མར་མེ་གཅིག་ལས་གཉིས་མཆེད་ཀྱི་ཚུལ་དུ་ཡེ་ཤེས་སྒྱུ་མའི་རྣམ་རོལ་ཁ་བ་བུ་ཡུག་འཚུབ་པ་ལྟར་དཔག་ཏུ་མེད་པ་བྱོན་ནས་མཁྱེན་བརྩེ་ནུས་གསུམ་གྱི་གཟི་བྱིན་གྱི་ཕུང་པོར་དམ་ཚིག་གི་དཀྱིལ་འཁོར་གྱི་སྟེང་གི་ནམ་མཁར་མེ་རི་འདབ་འབྱར་ཙམ་དུ་སྤྲིན་འཁྲིགས་པ་ལྟར་བསམ་མོ། །ཡང་བཀའ་བརྒྱད་རྣམ་བཤད་ལས། དམ་ཚིག་པའི་ཐུགས་སྲོག་ལས་འོད་ཟེར་གྲངས་མེད་པའི་རྩེ་ལས་ལྷ་མོ་ལྕགས་ཀྱུ་མ་སོགས་སྤྲོས་ཏེ་ཡེ་ཤེས་པ་རྟེན་དང་བརྟེན་པར་བཅས་པ་སྤྱན་དྲངས་ཛཿཞེས་ལྕགས་ཀྱུ་མའི་ཚོགས་ཀྱིས་ཉེ་བར་བཀུགས་ཏེ་ཤར་སྒོ་ནས་བྱོན། ཧཱུྃ་ཞེས་ཞགས་པ་མའི་ཚོགས་ཀྱིས་རྟེན་བརྟེན་པ་གཙོ་འཁོར་སོ་སོ་ལ་དབྱེར་མེད་དུ་བསྟིམ། བྃ་གྱིས་ལྕགས་སྒྲོག་མས་དམ་ཡེ་གཉིས་མེད་མི་འབྲལ་བར་བྱས། ཧོས་དྲིལ་བུ་མས་དམ་ཚིག་པ་དེ་དག་ཡེ་ཤེས་པའི་ངོ་བོར་རོ་མཉམ་སྟེ་དགྱེས་པ་བསྐྱེད་ཅེས་དང་། ཡང་སྐབས་འགར་ལྕགས་ཀྱུ་མས་ཐུགས་དམ་བསྐུལ། ཞགས་པ་མས་སྤྱན་དྲངས། ལྕགས་སྒྲོག་མས་གནས་ནས་བསྐྱོད། དྲིལ་བུ་མས་དགྱེས་པར་བསྐྱེད་དེ་མདུན་མཁར་སྤྱན་འདྲེན་པར་ཡང་གསུངས་སོ། བཞུགས་སུ་གསོལ་བ་ནི། དེ་ནས་ཡེ་ཤེས་ཀྱི་དཀྱིལ་འཁོར་དེ་དག་ཐམས་ཅད་བདག་དམ་ཚིག་པའི་དཀྱིལ་འཁོར་ལ་དབྱེར་མེད་དུ་བཞུགས་པར་གསོལ་བ་བཏབ་པས་དགྱེས་ཤིང་བརྩེ་བས་མཚོ་ལ་ཁ་བ་བབས་པ་བཞིན་དུ་རྟེན་དང་བརྟེན་པ་སོ་སོ་ལ་དེ་ལྟར་དུ་རང་ལ་ཐིམ་པས་དམ་ཡེ་གཉིས་མེད་དུ་གྱུར་བར་བསམ་མོ། དེ་ཡང་ཞལ་ལུང་ལས། ཁམས་བདེ་བར་གཤེགས་པའི་སྙིང་པོ་ཉིད་ཡེ་ནས་དག་པ་ལྷའི་དཀྱིལ་འཁོར་དུ་གྲུབ་པ་ནི་དམ་ཚིག་སེམས་དཔའ་དང་། སངས་རྒྱས་ཐམས་ཅད་ཀྱི་སྐུ་ནི་ཡེ་ཤེས་སེམས་དཔའ་སྟེ་དེ་གཉིས་གདོད་ནས་དབྱེར་མེད་པ་ནི་དམ་ཡེ་གཉིས་མེད་དུ་བྱས་པའི་དོན་ཏོ། ཞེས་དང་། འཇིགས་མེད་གླིང་པས། དེ་ལྟར་ཡང་དམ་ཡེ་གདོད་ནས་དབྱེར་མེད་པ་གསལ་འདེབས་པའི་ཕྱིར་སྤྱན་འདྲེན་པ་ཡིན་གྱི་གཅིག་ལ་གཅིག་བཅུག་པ་ལྟ་བུ་ནི་མིན་པར་ཤེས་དགོས་སོ། །ཞེས་དང་། རྩེ་ལེས་ཀྱང་། དེ་ནས་སྤྱན་དྲངས་པ་ཡང་ཕྱི་རོལ་ནས་མི་གཅིག་པ་ཞིག་སྤྱན་དྲངས་ནས་འབྱོན་རྒྱུ་ཡོད་པ་ལྟ་བུ་མ་ཡིན་ཏེ། མ་དག་པའི་འཁྲུལ་སྣང་སྦྱོང་ཕྱིར་ལྷ་སོ་སོའི་མཚན་དང་བཞུགས་གནས་སོགས་ཐ་དད་ནས་སྤྱན་འདྲེན་པའི་ཚིག་ངག་ནས་བརྗོད་ཀྱང་དོན་དུ་རང་རིག་བྱང་ཆུབ་ཀྱི་སེམས་ཀྱི་རོལ་བའི་ཆོ་འཕྲུལ་སྣང་སྲིད་ཀུན་ལ་མ་ཁྱབ་པ་མེད་ཕྱིར། རང་ཤེས་རིག་པའི་དམ་ཚིག་ཡེ་ཤེས་གཉིས་སུ་བྱར་མེད་སོ་སོ་མ་ཡིན་ཐ་མི་དད་དུ་སྤྱན་དྲངས། ཞེས་གསུངས་པ་ལྟར་ཡེ་ནས་དམ་ཡེ་དབྱེར་མེད་པའི་རང་བཞིན་མ་རྟོགས་པའི་ངོར་གསལ་འདེབས་ཕྱིར་གདུལ་བྱ་དམན་པའི་བློ་དང་བསྟུན་པའམ། དག་པའི་ཞིང་ལ་ཚོགས་གཉིས་གསོག་པའམ་རིག་རྩལ་སྦྱངས་ཤིང་ཡེ་ཤེས་ལྷ་ལ་རས་ཆོད་དེ་དབང་མི་ཟ་ཕྱིར་ཀུན་རྫོབ་སྒྱུ་མ་ལྟ་བུའི་སྣང་ཚུལ་མ་འགགས་པའི་ངོར་བརྡ་ཙམ་དུ་ཡེ་ཤེས་པ་སྤྱན་དྲངས་ཤིང་བསྟིམ་པ་ཡིན་ནོ། །དེ་ཡང་དངོས་གྲུབ་མ་ཐོབ་བར་དུ་བཞུགས་པར་བསྒོམ་པ་ནི་རིང་མཐའ་འམ་བདག་དོན་གྲུབ་པའི་ཚད་དང་། རྡུལ་ཚོན་ལྟ་བུར་གཤེགས་གསོལ་མ་གྲུབ་བར་དང་། རས་བྲིས་སོགས་འབྱུང་བཞིའི་གནོད་པས་མ་ཞིག་བར་དེ་སྲིད་རྣམས་ཀྱི་དོན་ཡང་ཤེས་དགོས་པར་གསུངས་སོ། །སྐབས་འདིར་ཛཿཧཱུྃ་བཾ་ཧོཿཞེས་འབྱུང་བ་ནི་ཛས་དམ་ཚིག་པ་ལ་ཡེ་ཤེས་པ་བཀུགས་པ་དང་། ཧཱུྃ་གིས་གཉིས་མེད་དུ་བསྟིམ་པ་དང་། བཾ་གྱིས་འདོད་པ་མ་གྲུབ་གྱི་བར་དུ་མི་གཤེགས་པར་བཅིང་པ་དང་། ཧོས་དགྱེས་བཞིན་དུ་བཞུགས་པར་བསམ་མོ། ཡིག་འབྲུའི་དོན་ནི་བྱོན་ཅིག བཞུགས་ཤིག མ་གཤེགས་ཤིག དགྱེས་བཞིན་དུ་བཞུགས་ཤིག་ཅེས་དམ་ཡེ་དབྱེར་མེད་དུ་བསྲེས་ཏེ་བརྟན་པར་བྱ་བའི་དོན་ཏོ།