ཕྱག་འཚལ་མཆོད་བསྟོད་བྱ་བ།

བཞི་པ་ཕྱག་འཚལ་བ་ནི། དོན་དམ་པར་ལྷ་དང་རང་སེམས་དབྱེར་མེད་དུ་ཤེས་པ་ནི་ལྟ་བ་མཇལ་བའི་ཕྱག་སྟེ། བསྐྱེད་རྫོགས་ཆེན་མོ་ལས། འདོད་ཡོན་གྱི་ལྷ་མོ་རྣམས་ཀྱིས་དཀྱིལ་འཁོར་གྱི་ལྷ་ཚོགས་རྣམས་ལ་གཞལ་ཡས་ཁང་གི་སྒོ་བཞི་ནས་དམ་ཚིག་ཡེ་ཤེས་འདུ་འབྲལ་མེད་པའི་ཚུལ་གྱིས་ཕྱག་འཚལ་ལོ། །ཞེས་དང་། མ་ཧཱ་བསྒོམ་ཁོག་ལས། བདག་དམ་ཚིག་ཡེ་ཤེས་གཉིས་སུ་མེད་པར་རྟོགས་པ་དོན་གྱི་ཕྱག་འཚལ། ཅེས་གསུངས་པ་ལྟར་སྣང་སྲིད་ཐམས་ཅད་ལྷ་དང་གཞལ་ཡས་ཁང་གི་རང་བྱུང་ཡེ་ཤེས་ཆེན་པོར་ངོ་ཤེས་པའི་དོན་ལ་ཡིད་ཆེས་བསྐྱེད་པ་ནི་དོན་གྱི་ཕྱག་ཁྱད་པར་བ་ཡིན་ལ། ཐུན་མོང་བརྡ་ཙམ་དུ་ལྷ་རྣམས་ཀྱི་ཡོན་ཏན་དྲན་པས་གུས་པའི་ཡིད་ཀྱིས་ཕྱག་མཆོད་སོགས་བྱ་བ་ནི། འཕྲུལ་དགའི་ལྷ་རྣམས་ཀྱིས་རང་གིས་སྤྲུལ་པའི་འདོད་ཡོན་ལ་རྩེ་ཞིང་རོལ་བ་བཞིན་དུ། བདག་ཉིད་གཙོ་བོའི་ཐུགས་ཀ་ནས་རིག་པའི་ལྷ་མོ་བཞི་ཐོན་པ་ལས། སྒོ་བཞི་ནས་ཨ་ཏི་པུ་ཧོ་ཞེས་དམ་ཚིག་ཡེ་ཤེས་འབྲེལ་བའི་བརྡ་ཕྱག་བཟང་ངན་མེད་པར་བཙལ་བས་དཀྱིལ་འཁོར་བའི་ལྷས་ཀྱང་པྲ་ཏི་ཛ་ཧོ་ཞེས་ཕྱག་ལན་གནང་བར་བསམ་སྟེ། སླར་རང་གི་ཐུགས་ཀར་བསྡུ་ཞིང་གཉིས་མེད་བདེ་བའི་ཉམས་དང་ལྡན་པར་བསམ་མོ། །ཡང་མདུན་བསྐྱེད་ཡོད་ཚེ་བདག་བསྐྱེད་ཀྱི་ཐུགས་ཀ་ནས་སྤྲུལ་པའི་ལྷ་མོ་བཞི་བྱུང་བས་མདུན་བསྐྱེད་ལ་ཕྱག་བྱ་ཞིང་མདུན་བསྐྱེད་ཀྱི་ཐུགས་ཀ་ནས་ཀྱང་དེ་ལྟར་ལྷ་མོ་བཞི་བྱུང་བས་ཕྱག་ལན་མཛད་པར་བསམ་ལ། མཐར་རང་རང་གི་ཐུགས་ཀར་བསྡུའོ། །ཞེས་འཇིགས་གླིང་གསུངས་སོ། །ཡང་ན་ཕྱག་ནི་ལུས་ངག་ཡིད་གསུམ་གུས་པར་འདུད་པ་ཙམ་ཡིན་པས་འཚལ་ཡུལ་དང་འཚལ་མཁན་དམིགས་བསལ་ཐ་དད་མི་དགོས་ཞེས་དཔལ་སྤྲུལ་གསུངས་སོ། །མཆོད་པ་ལ་ཕྱི་ནང་ཐུན་མོང་གི་མཆོད་པ་ནི་རང་གི་ཐུགས་ཀ་ནས་གཟུགས་རྡོ་རྗེ་མ་ལ་སོགས་མཆོད་པའི་ལྷ་མོ་དཔག་ཏུ་མེད་པར་སྤྲུལ་ནས། དེ་དག་གི་ལག་ན་ཉེར་སྤྱོད་བདུན་འདོད་ཡོན་ལྔ་སོགས་མཆོད་རྫས་དཔག་ཏུ་མེད་པ་ཐོགས་ཤིང་། གླུ་དབྱངས་རོལ་གར་དང་བཅས་ཏེ་མཆོད་པའི་ཟེགས་མ་རེ་རེ་ལའང་འདོད་དགུའི་སྤྲིན་ཕུང་བསམ་གྱིས་མི་ཁྱབ་པར་སྤྲོས་པས་དཀྱིལ་འཁོར་གྱི་ལྷ་གཙོ་བོར་གྱུར་པའི་ཕྱོགས་དུས་ཀྱི་རྒྱལ་བ་སྲས་བཅས་དམ་ཅན་ཆོས་སྐྱོང་སོགས་ལྷ་རྣམས་དགྱེས་པ་སྐོང་བར་བསམ་ཞིང་། བྱེ་བྲག་ཏུ་ཡན་ལག་བརྒྱད་ལྡན་གྱི་མཆོད་ཡོན་ཞལ་དུ། དྭངས་བསིལ་ཡིད་འོང་གི་ཆུ་ནི་ཕྱག་ཞབས་བསིལ་བྱེད་དུ། ལྷ་རྫས་མེ་ཏོག་གི་ཕྲེང་བ་སྤེལ་ལེགས་པ་ནི་དབུ་ལ། ལྷན་སྐྱེས་དང་སྦྱར་བྱུང་གི་དྲི་ཞིམ་པོའི་བདུག་སྤོས་ནི་ཤངས་ལ། རིན་པོའི་ཆེའི་རྩི་མར་སོགས་ཀྱི་སྒྲོན་མེ་ནི་སྤྱན་ལ། ཙན་ཏན་དང་གུར་གུམ་སོགས་ཀྱི་དྲི་ངད་ལྡན་པའི་སྨན་ཆབ་ནི་སྐུ་ལ། རོ་བརྒྱ་བཅུད་ལྡན་གྱི་ཞལ་ཟས་ནི་ལྗགས་ལ། འབུད་དཀྲོལ་བརྡུང་བ་སོགས་སྙན་འཇེབས་རོལ་མོའི་སྒྲ་དབྱངས་ནི་སྙན་གྱི་དབང་པོ་རྣམས་ལ་འབུལ་ཞིང་མཐར་ལྷ་མོ་རྣམས་ཀྱང་གནས་དེ་དག་ཏུ་ཐིམ་པར་བསམ་མོ། དེ་ཡང་འཇིགས་གླིང་གིས། དེ་ལྟར་མཆོད་བསྟོད་རྣམས་ལྷས་ལྷ་ལ་བགྱི་བ་ལྟ་བུ་ནི་ཤིན་ཏུའང་ཡིན་ཏེ། མ་དག་པའི་སྣོད་བཅུད་དག་པའི་སྣོད་བཅུད་དུ་སྦྱངས། དག་པའི་སྣོད་བཅུད་སྤྲུལ་པའི་བསྐྱེད་རིམ་དུ་བསྒྱུར་བ་ལ་མཆོད་པ་བྱེད་མཁན་རང་རྒྱུད་པ་ག་ལ་ཡོད། ཅེས་གསུངས་སོ། །ཡང་ན་འདོད་སྣམ་ལ་འཁོད་པའི་ལྷ་མོ་རྣམས་ཀྱིས་མཆོད་པ་འབུལ་བ་ཡིན་ཞེས་དཔལ་སྤྲུལ་གསུངས་ཤིང་། དེའང་བྱ་འདབས་ཀྱི་ལོགས་དྲྭ་བ་དྲྭ་ཕྱེད་ཀྱི་གསེབ་ནས་མཆོད་པ་འབུལ་བ་ཡིན་ཞེས་པད་ཕྲིན་གསུངས་སོ། །མདོར་ན་གང་ལྟར་ཡང་འདྲ་ནའང་། ཚུལ་དེ་དག་ཀུན་ཀྱང་ལྷན་ཅིག་ཏུ་གྲུབ་ན་ལེགས་མོད། ཡང་མདུན་བསྐྱེད་ལྟ་བུའི་ཚེ་ན་མཆོད་པའི་ལྷ་མོ་རྣམས་ལྷ་ཚོགས་ཀུན་གྱི་གནས་སོ་སོར་ཐིམ་ཞིང་། སླར་ཡང་ཚུར་བྱུང་ནས་སྐྱེས་ལན་གྱི་ཚུལ་དུ་རང་གི་གནས་སོ་སོར་ཐིམ་པས་དངོས་གྲུབ་ཐོབ་པར་བསམ་མོ། །ཞེས་རྒྱུད་ལས་གསུངས་སོ། །དེ་ཡང་མཆོད་པ་རྣམས་བཀོད་ལེགས་མཛེས་པ་ནི་བཤམས་པ་རྫས་ཀྱི་མཆོད་པ། དེ་ཉིད་ཀུན་ཏུ་བཟང་པོའི་མཆོད་སྤྲིན་ལྟར་དམིགས་པ་ནི་ཏིང་ངེ་འཛིན་གྱི་མཆོད་པ། འབུལ་ཚིག་སྙན་པར་བརྗོད་པ་ནི་དབྱངས་ཀྱི་མཆོད་པ། ལུས་གུས་པས་ཕྱག་རྒྱ་པད་སྐོར་གྱིས་འབུལ་བའི་བརྡ་སྤྲོད་པ་ནི་ཕྱག་རྒྱའི་མཆོད་པ། འབུལ་ཚིག་གི་སྔགས་ཨརྒྷཾ་སོགས་ནི་སྔགས་ཀྱི་མཆོད་པ་དང་ལྔའོ། །ཞེས་དགོངས་འདུས་ལས་གསུངས་སོ། །དེ་ལྟར་འདོད་ཡོན་ལྔ་དབང་པོ་ལྔར་ཕུལ་བས་ཞེན་མེད་ཀྱི་ཉམས་སྐྱེས་པར་བསམ་མོ། །དབང་པོ་རབ་ཀྱིས་ཅིར་སྣང་ནམ་མཁའ་མཛོད་ཀྱི་སྤྲིན་ཆེན་པོར་སྤྲོས་ཏེ་རང་ཤར་རང་གྲོལ་དུ་འབུལ་བར་གསུངས་སོ། །ནང་མཆོད་ལ་སྨན་ནི་རྩ་བ་བརྒྱད་དང་ཡན་ལག་སྟོང་རྩ་སྦྱར་བའི་དམ་རྫས་ཁྱད་པར་བ་དེ་ནི་ཆོས་ཐམས་ཅད་བླང་དོར་མེད་པར་མཉམ་པ་ཉིད་དུ་རྟོགས་པ་ལས་བྱུང་བས། གཉིས་འཛིན་རྣམ་རྟོག་གི་བདུད་སེལ་བའི་རྩི་སྟེ། གྲུབ་པ་བཞི་དང་ཡིན་པ་གསུམ་གྱི་རང་བཞིན་བླ་ན་མེད་པའི་སྨན་ཆེན་པོ། མཐེབ་སྲིན་ཉི་ཟླའི་གའུས་བཅུས་ཏེ་གཏོར་བས་བདུད་རྩིའི་ཟེགས་མ་ལྷ་རྣམས་ཀྱི་ཞལ་དུ་ཐིམ་པས་བདེ་བ་ཆེན་པོའི་རོས་ཚིམ་པར་བསམ་པ་སྟེ། མ་ཧཱ་སྒོམ་ཁོག་ལས། རང་གི་ཐུགས་ཀ་ནས་ལྷ་མོ་མང་པོ་སྤྲོས་ཏེ་ཀ་པཱ་ལ་བདུད་རྩིའི་གང་བ་ནས་ལྷ་མོའི་མཐེབ་སྲིན་ཉི་ཟླའི་སྐྱོགས་ཁ་སྦྱོར་གྱིས་བཅུས་ཏེ་ལྷ་ཚོགས་གཙོ་འཁོར་རྣམས་ཀྱི་ལྗགས་ལ་མཆོད་པས་མཉེས་ཏེ་སྐུ་གསུང་ཐུགས་ཀྱི་དངོས་གྲུབ་ཆར་དུ་དབབ་པར་བསམ། ཞེས་པས་རང་གི་གཡས་ཀ་པཱ་ལ་འཛིན། གཡོན་མཐེབ་སྲིན་ཉི་ཟླའི་སྐྱོགས་སུ་བསམ་པས་འཐོར་ཞིང་། ཐུགས་ཀ་ནས་སྤྲུལ་པའི་ལྷ་མོ་རྣམས་ཀྱིས་ཀྱང་དེ་ལྟར་མཆོད་པར་བསམ་མོ། དང་པོ་དཀྱིལ་འཁོར་སྟེང་གི་ཆའི་བླ་མ་བརྒྱུད་པ་དང་། དེ་ནས་དཀྱིལ་འཁོར་བར་རྣམས་རིམ་པས་སོ། །དེ་ཡང་བྱང་གཏེར་ཐུགས་སྒྲུབ་ལས། བདག་ལ་ཕོག་པས་དམ་ཚིག་ཉམས་སྒྲིབ་དག༔ རྫས་ལ་གཏོར་བས་མ་དག་སྐྱོན་རྣམས་སྦྱངས༔ བགེགས་ལ་ཕོག་པས་བདུད་དང་དམ་སྲི་བསྐྲད༔ ཅེས་པ་ལྟར་རོ། དེ་ནས་ཀྱང་སྔ་མ་ལས། དེ་ནས་བདུད་རྩི་ལ་བརྟེན་ནས་དངོས་གྲུབ་བླང་ཚིག་གིས་བསྐུལ་ཏེ། བདུད་རྩིའི་ནང་དུ་དངོས་གྲུབ་ཀྱི་སྙིང་པོ་ༀ་ཨཱཿཧཱུྃ་གསུམ་བསམ་སྟེ་མཐེབ་སྲིན་ཉི་ཟླ་གའུས་བཟུང་སྟེ་སྤྱི་གཙུག་མགྲིན་པ་སྙིང་ཁར་བསྟིམ་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་མོ་ཞེས་པས། མཐར་རང་གི་ལྕེར་རེག་སྟེ་གནས་གསུམ་དུ་ཆགས་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་མོ། །སྐབས་འདིར་འགའ་ཞིག་ནས་བདུད་རྩི་གསང་ནན་ཅེས་འབྱུང་བ་ནི། གསང་བ་བདུད་རྩིའི་མཆོད་པ་སླར་ཡང་ནན་ཏན་གྱིས་འབུལ་བའི་དོན་ཡིན་པར་གསུངས་སོ། །གཏོར་མཆོད་ནི་རིན་པོ་ཆེ་སོགས་ཀྱི་སྣོད་ཡངས་ཤིང་རྒྱ་ཆེ་བར་བཟའ་བཅའ་སྣ་ཚོགས་པའི་གཏོར་མ་རོ་མཆོག་བརྒྱ་ལྡན་འདོད་དགུའི་ཕུང་པོར་སྤུང་བ་ལས་འདོད་ཡོན་གྱི་ལྷ་མོ་དཔག་ཏུ་མེད་པ་སྤྲོས་ཏེ་ཕུལ་བས། ལྷ་རྣམས་ཀྱི་ལྗགས་འོད་ཀྱི་སྦུ་གུ་དང་རྡོ་རྗེ་རྩེ་གསུམ་པའི་རྣམ་པ་ལས་བྱུང་བའི་འོད་ཀྱི་སྦུ་གུས་གཏོར་མའི་བཅུད་ཡེ་ཤེས་ཀྱི་བདུད་རྩིའི་རང་བཞིན་དྲངས་ཏེ་གསོལ་བས་དགྱེས་པར་བསམ་ཞིང་། མཐར་ལྷ་མོ་རྣམས་རང་ལ་ཐིམ་པར་བསམ་མོ། །དེ་ཡང་ཡུལ་ལྔའི་བཟའ་བ་དང་རྣམ་ཤེས་ཀྱི་བཏུང་བ་འོད་གསལ་གྱི་ཀློང་དུ་རོལ་པའི་དོན་ཡིན་པར་གསུངས། རཀྟའི་མཆོད་པ་ནི། སྲིད་པའི་སྡུག་བསྔལ་གྱི་རྩ་བ་དུག་ལྔ་དང་སེར་སྣ་སྟེ་ཉོན་མོངས་རྒྱུ་དྲུག་ཁྲག་གི་རྣམ་པར་བསྡུས་པ་ཆགས་མེད་བདེ་བ་ཆེན་པོའི་ཀློང་དུ་ཕུལ་བས། གདུལ་དཀའི་འགྲོ་རྣམས་ཐུགས་རྗེས་སྒྲོལ་བའི་ཕྱིར་ཁམས་གསུམ་ཁྲག་གི་རྒྱ་མཚོ་དགྲ་བགེགས་དམ་སྲིའི་ཤ་ཁྲག་ལྷག་མེད་དུ་བཞེས་ནས་འཁོར་བའི་གནས་སྟོང་སྟེ་ཕྱིར་མི་ལྡོག་པ་སྐྱེ་མེད་དབྱིངས་སུ་སྒྲོལ་བར་བསམ་མོ། །གསང་མཆོད་ལ་དང་པོ་སྦྱོར་མཆོད་ནི། སྣང་བའི་ཡུལ་ཅན་ཐབས་ཡབ་ཀྱི་རང་བཞིན་དང་། ཡུལ་སྟོང་པ་ཉིད་ཤེས་རབ་ཡུམ་གྱི་རང་བཞིན། དེ་གཉིས་ཟུང་འཇུག་དབྱེར་མི་ཕྱེད་པ་ནི་ཐམས་ཅད་ཡེ་སྦྱོར་ཆེན་པོ་ཡིན་ལ། དེ་ལྟར་མཉམ་སྦྱོར་ལས་བྱུང་བའི་བདེ་བ་ཆེན་པོའི་རོས་དཀྱིལ་འཁོར་ཐམས་ཅད་ཚིམ་པར་བྱེད་པ་སྟེ། དེ་ཤེས་བྱེད་ཡབ་ཡུམ་ཞལ་སྦྱོར་རྣམས་རང་རང་སྙོམ་པར་འཇུག་པ་དང་། ལྷ་མོ་རྐྱང་པ་རྣམས་རིགས་བདག་གམ་ཡབ་སྦས་པའི་ཕྱག་རྒྱ་ཁ་ཊཱཾ་ཀ་བསྒྱུར་བ་དང་སྙོམ་པར་ཞུགས་པའི་ཞུ་བདེ་ཁྱད་པར་ཅན་ཡས་བབས་མས་བརྟན་རིམ་པར་རྫོགས་པའི་བདེ་བ་ཆེན་པོའི་ཡེ་ཤེས་ལ་བློ་བཞག་ནས། བདེ་སྟོང་གི་ཡེ་ཤེས་རྒྱུད་ལ་སྐྱེ་བར་བསམ་ཞིང་ལྷ་ཐམས་ཅད་ཀྱི་རྗེས་ཆགས་དང་དབྱེར་མེད་པའི་ང་རྒྱལ་བྱེད་པའོ། །སྒྲོལ་བའི་མཆོད་པ་ནི། བསྒྲལ་བྱ་བདག་ལྟའི་མཚན་ཉིད་ཅན་གྱི་གཟུང་འཛིན་གྱི་རྣམ་རྟོག་ཡིན་ལ་དེས་འཁོར་བར་འཕེན་ཏེ་གཉིས་མེད་ཀྱི་ཡེ་ཤེས་རྟོགས་པ་ལ་བར་དུ་གཅོད་པའི་དགྲ་ཡིན་ཞིང་དེ་གང་གིས་སྒྲོལ་ན་འཛིན་རྟོག་དང་བྲལ་བའི་ཡེ་ཤེས་ཀྱི་མཚོན་ཆས་རང་རྒྱུད་ཀྱི་གཉིས་འཛིན་ཞེན་རྟོག་དང་བཅས་པ་སྐྱེ་བ་མེད་པའི་དབྱིངས་སུ་སྒྲོལ་བ་ནི་ཐམས་ཅད་ཡེ་སྒྲོལ་ཆེན་པོའི་དོན་ཡིན་ལ་དེའི་ངང་ལས་ཞིང་བཅུས་བསྡུས་པའི་སེམས་ཅན་ལས་ངན་གྱི་རྒྱུ་བསགས་པ་རྣམས་དེའི་དབང་གིས་འབྲས་བུ་སྡུག་བསྔལ་བཟོད་པར་དཀའ་བ་ལས་སྒྲོལ་བའི་ཕྱིར་སྙིང་རྗེ་ཆེན་པོས་ཀུན་ནས་བསླང་སྟེ། བདག་དང་བསྒྲལ་བྱ་ངོ་བོར་བདེན་པར་མ་གྲུབ་པའི་སྒྱུ་མ་དང་མིག་ཡོར་ལྟར་རྟོགས་པའི་སྒོ་ནས་བསྒྲལ་ཞིང་རྟོག་ཚོགས་ཐམས་ཅད་ཆོས་ཉིད་ཀྱི་དབྱིངས་སུ་ཐིམ་པས་འཁོར་འདས་མཉམ་པ་ཉིད་ཀྱི་ཀློང་དུ་རོ་གཅིག་པར་བསམ་མོ། །ཡང་བཀའ་བརྒྱད་རྣམ་བཤད་ལས་ནི། ཡབ་ཡུམ་གྱི་སྦྱོར་མཚམས་ནས་ཁྲོ་བོ་འཆོལ་བ་དཔག་མེད་སྤྲོས་ཏེ། ངར་འཛིན་གྱི་རྟོག་གཟུགས་དང་གཉིས་འཛིན་དགྲ་བགེགས་སུ་ཤར་བ་རྣམས་མཚོན་ཆ་སྣ་ཚོགས་ཀྱིས་བསྒྲལ་ཏེ་ལྷ་ཚོགས་ཀྱི་ཞལ་དུ་བསྟབ་པས། ང་བདག་རང་བཞིན་མེད་པར་ཆོས་ཀྱི་དབྱིངས་སུ་བསྒྲལ་བར་བསམ་མོ། ཞེས་དང་། དུག་ལྔའི་མཆོད་པ་ནི་ཉོན་མོངས་པ་ཡེ་ཤེས་ལྔའི་རང་བཞིན་དུ་ཕུལ་བས་འཁོར་བ་སྟོང་བར་བསམ། དུག་གསུམ་ལས་ཤ་ཁྲག་རུས་གསུམ་གྱི་རྣམ་པ་ཕུལ་བས་སྐུ་གསུམ་དུ་གྲོལ་བར་བསམ་མོ། །ཞེས་གསུངས་སོ། །དེ་ཁོ་ན་ཉིད་ཀྱི་མཆོད་པ་ནི། གདོད་མ་ནས་འཁོར་འདས་དག་པ་རབ་འབྱམས་རྒྱལ་བའི་དཀྱིལ་འཁོར་ཆེན་པོར་ལྷུན་གྱིས་གྲུབ་པས། འཁོར་གསུམ་མི་དམིགས་ཕྱག་རྒྱ་ཆེན་པོའི་དོན་ལ་དྲན་པ་ཉེ་བར་འཇོག་པའོ། །ཡང་སྣང་སྲིད་ཕྱག་རྒྱ་བཞི་རུ་མཆོད་ཅེས་པ་ནི། གཟུགས་སྣང་སྐུ། སྒྲ་གྲགས་གསུང་། དྲན་རྟོག་ཐུགས། ཟུང་འཇུག་ཡེ་ཤེས་ཀྱི་ཕྱག་རྒྱའོ། །བསྟོད་པ་ནི། རྡོ་རྗེའི་གླུ་དབྱངས་ཀྱིས་མཆོད་པ་སྟེ། རང་ལས་སྤྲུལ་པའི་ལྷ་མོ་རྣམས་ཀྱིས་དཀྱིལ་འཁོར་གྱི་ལྷ་རྣམས་ཀྱི་སྐུ་གསུང་ཐུགས་གསང་བ་བསམ་གྱིས་མི་ཁྱབ་པའི་རྣམ་པར་ཐར་བ་སྐུ་གསུམ་ཡེ་ཤེས་ལྔ་ལྡན། འབད་རྩོལ་མེད་པར་ལྷུན་གྱིས་གྲུབ་པའི་ཕྲིན་ལས་གཟུགས་སྐུའི་རྣམ་རོལ་གྱི་བརྡ་རྟགས་དང་སྤང་རྟོགས་ཕུན་སུམ་ཚོགས་པའི་བདག་ཉིད་སྟོབས་སོགས་ཡོན་ཏན་རྒྱ་མཚོའི་རྣམ་གྲངས་ལ་ཤིང་དད་པའི་བསྔགས་བརྗོད་ཀྱིས་འགྲོ་དོན་ལ་བསྐུལ་ཕྱིར་བསྟོད་དབྱངས་སྒྲོགས་པར་བསམ་ཞིང་། བསྟོད་ཡུལ་དང་བསྟོད་མཁན་འདུ་འབྲལ་མེད་པར་ཤེས་པས་བསྟོད་པར་བྱའོ། །གཞན་ཡང་གཞལ་ཡས་ཁང་གི་འོག་གཞི་འཁོར་ལོའི་ཕྱི་རོལ་ཁོར་ཡུག་གི་ཁྱམས་མུ་ཁྱུད་ཆ་ཕྲན་གཅིག་པའི་སྟེང་ནས་ཚངས་པ་དང་བརྒྱ་བྱིན་སོགས་ལྷ་ཆེན་པོ་རྣམས་དང་། གཟའ་ཀླུ་རྒྱུ་སྐར་སོགས་དྲེགས་པ་ཅན་ཐམས་ཅད་ཀྱིས་དེ་ལྟར་བསྟོད་པར་བསམ་མོ། །བསྟོད་པ་འདི་རྣམ་དག་དྲན་པའི་དོན་ཡིན་པས་ལྷ་རང་མཚན་པ་མེད་པའི་དོན་ལ་ངེས་ཤེས་འདྲོང་བར་བྱའོ། །ཞེས་འཇིགས་གླིང་གསུངས་སོ། །འདི་སྐབས་སོགས་སུ་གོ་རིམ་དང་དམིགས་སྐོར་རྣམས་ལ་འདྲ་མིན་སྣ་ཚོགས་འབྱུང་བ་གང་ལྟར་ཡང་འགལ་བ་མེད་དེ། རྒོད་ཚང་པས་དམིགས་པ་གཅིག་བསྒོམ་ཚར་ནས་གཞན་བསྒོམ་ཐབས་མེད་པ་ལྟ་བུ་མ་ཡིན་ཏེ། ཐམས་ཅད་སེམས་ཀྱི་རྣམ་རོལ་ཡིན་པ་ལ། འདི་དང་མི་འགྲིགས་པར་འདུག་སྙམ་པ་ལྟ་བུའི་གུ་དོག་པ་བྱར་མི་རུང་བ་ནི་སྤྱི་ཡི་གནད་ཆེ་ཤོས་ཡིན། ཅེས་གསུངས་ཤིང་། འཇིགས་གླིང་གིས་ཀྱང་དེས་ན་ཨ་འཐས་ཀྱི་མཚན་མར་གོལ་ནས་ཐུག་རེག་ཕོག་གིས་དོག་པ་དང་། དེ་དང་དེ་མཉམ་པོར་མི་འགྲིག་སྙམ་པ་དང་། གཅིག་ཟིན་ནས་གཅིག་འཇོག་པ་ལྟ་བུའི་ཐེ་ཚོམ་རྣམས་མི་དགོས་པར་གསུངས་སོ། །