དམིགས་པའི་གཙོ་བོ་ལྷའི་སྣང་ཞེན་ལ་བསླབ་པ།
རྣམ་པ་གསལ་བ།
ལྔ་པ་དམིགས་པའི་གཙོ་བོ་ལྷའི་སྣང་ཞེན་ལ་བསླབ་པ་ལ། རྣམ་པ་གསལ་བ་ང་རྒྱལ་དང་མ་བྲལ་བ་གནད། ང་རྒྱལ་བརྟན་པ་ལྟ་བས་ཟིན་པ་གལ་ཆེ། རྣམ་དག་དྲན་པ་ཨ་འཐས་སུ་མི་གོལ་བའི་ཆེད་ཡིན་དང་གསུམ་མོ། དེ་ལས་སྔ་མ་ནི་བསྐྱེད་རིམ་གྱི་ཁྲིད་དངོས་ཡིན་ལ། ཕྱི་མ་གཉིས་ནི་འགལ་སྤོང་མཐུན་སྒྲུབ་ཀྱི་སྒོ་ནས་ཡན་ལག་ལྟ་བུར་ཤེས་དགོས་སོ་ཞེས་རྒྱལ་སྲས་གཞན་ཕན་པས་གསུངས་སོ། །དེ་ལ་དང་པོ་རྣམ་པ་གསལ་བ་ནི། སྤྱིར་སྨིན་སློབ་ཀྱི་དབང་དུ་བྱས་ན། བཟོ་བོ་མཁས་པས་བྱས་པའི་བྲིས་སྐུ་མཚན་ཉིད་ལྡན་པའི་མདུན་དུ་མཆོད་པ་བཤམས། སྔོན་འགྲོ་རྣམས་རྒྱས་བསྡུས་ཇི་ལྟར་རིག་པ་བཏང་ནས། དེ་ནས་བླ་མ་དགོངས་འདུས་ལས་གསུངས་པ་བཞིན། འཇམ་དབྱངས་མཁྱེན་བརྩེའི་ཞལ་རྒྱུན་ལྟར་ན། རང་གི་སྤྱི་བོར་སེང་གེའི་ཁྲི་པདྨ་ཉི་ཟླའི་གདན་ལ་བླ་མ་རྡོ་རྗེ་འཆང་སྐྱབས་གནས་ཀུན་འདུས་སུ་གསལ་བ་མོས་གུས་ཀྱིས་ལུས་ལོངས་སྤྱོད་ཐམས་ཅད་ཕུལ་ནས་དུས་གསུམ་སངས་རྒྱས་ཐམས་ཅད་ཀྱི་ངོ་བོ་དྲིན་ཆེན་རྩ་བའི་བླ་མ་རིན་པོ་ཆེ་ལ་གསོལ་བ་འདེབས་སོ། བདག་གི་རྒྱུད་བྱིན་གྱིས་རླབ་ཏུ་གསོལ། ཁྱད་པར་ཏུ་བསྐྱེད་རིམ་གྱི་ཏིང་ངེ་འཛིན་ཡང་དག་པར་རྒྱུད་ལ་ད་ལྟ་ཉིད་དུ་སྐྱེ་བར་བྱིན་གྱིས་རླབ་ཏུ་གསོལ། ཞེས་གསོལ་བ་དྲག་ཏུ་བཏབ། བླ་མ་དགྱེས་ཤིང་འཛུམ་པའི་མདངས་ཀྱིས་འོད་དམར་པོར་ཞུ་སྟེ་རང་གི་སྤྱི་གཙུག་ནས་ཐིམ་པར་མོས་ལ་ཐུགས་ཡིད་དབྱེར་མེད་དུ་འདྲེས་པའི་ངང་ལ་དར་ཅིག་ངལ་གསོ། དེ་ནས་མདུན་གྱི་ཐང་སྐུ་ལ་བལྟ། ཡང་མིག་བཙུམ་ལ་དེའི་ཐད་ཀར་དེ་འདྲ་ཞིག་ཨེ་གསལ་བལྟ་བ་རེས་མོས་བྱ། མིག་བཙུམ་ཀྱང་དེ་འདྲ་ལམ་ཙམ་གསལ་ནས་རང་གི་ལུས་ལ་སྤོས་ཏེ་སྒོམ་པ་རྣམས་རེས་མོས་ཀྱིས་འབད། གོམས་ནས་ཆེ་ཆུང་མང་ཉུང་གཙོ་འཁོར་སོགས་ལ་རྩལ་སྦྱངས། དེ་ལྟར་སྐུ་ཡོངས་སུ་རྫོགས་པ་དུས་གཅིག་ཏུ་གསལ་འདེབས་པའམ། ཡང་ན་སྐུ་དང་རྒྱན་གྱི་ཆ་ཤས་རེ་རེ་ནས་རིམ་པར་གསལ་བ་རེས་མོས་སུ་སློབ། གང་ལྟར་ཡང་ཐོག་མར་གཙོ་བོ་ཁོ་ན་ལ་སེམས་བཟུང་སྟེ་དེ་ཡང་དབུ་རྒྱན་གྱི་རྩེ་ནས་པདྨའི་གདན་གྱི་བར་གྱི་སྐུ་མདོག་ཞལ་ཕྱག་རྒྱན་དང་ན་བཟའ་སྤྱན་གྱི་དཀར་ནག་ཕྱག་ཞབས་ཀྱི་རི་མོ། མཚན་དཔེའི་རྣམ་འགྱུར་འོད་ཟེར་གྱི་འཕྲོ་འདུ་སོགས་ཆ་ཕྲ་མོ་ནས་གསལ་ཆ་བཏོན་ཏེ། དེ་ཡང་རས་བྲིས་ལྟ་བུ་ལེབ་ལེབ་པོ་དང་ལྡིར་ལྡིར་པོ། འབུར་མ་ལྟ་བུའི་གདོས་བཅོས་བེམ་པོ་ལྟར་དང་། འཇའ་ཚོན་ལྟ་བུའི་སེམས་མེད་རྣམས་མ་ཡིན་པར་མདུན་རྒྱབ་གཡས་གཡོན་དཀུ་སྐབས་ཕྲ་སྦོམ་སོགས་སྐབས་ཕྱེ་བ་ལ། ནང་ཁྲོལ་གདོས་བཅོས་སོགས་སྤངས་པའི་དངས་མ་འོད་ཀྱི་ལུས་མཁྱེན་བརྩེ་ནུས་གསུམ་གྱི་ཡེ་ཤེས་དང་ལྡན་པའི་ལྷ་དངོས་སུ་བྱོན་པ་ལྟ་བུ་ཞིག་ལ་བསླབ། དེ་ལ་སེམས་ཟིན་ནས་རིམ་བཞིན་འཁོར་དང་། གཞལ་ཡས་ཁང་དང་ཞིང་གི་བཀོད་པ་དང་སྲུང་བའི་འཁོར་ལོ་ཚུན་ཆད་ཀྱི་གསལ་སྣང་བཏོན་ཏེ། རེས་རྣམ་པ་སྤྱི་ལ་སེམས་བཟུང་། རེས་བྱེ་བྲག་ལ་སེམས་བཟུང་སྟེ་རྟེན་དང་བརྟེན་པའི་དཀྱིལ་འཁོར་གྱི་འཁོར་ལོ་ཐམས་ཅད་ཡིད་ངོར་བཀྲ་ལམ་གྱིས་འཆར་བ་ལ་སློབ་པ་རྣམ་པ་གསལ་བ་ཞེས་བྱ། དེ་ཡང་བསྐྱེད་རིམ་གྱི་དོན་པོ་ལྷ་ལ་སེམས་འཛིན་པའི་ཞི་གནས་སྒྲུབ་པའི་ཐབས་ཁྱད་པར་ཅན་ཡིན་པས་རྣམ་པ་གསལ་བ་ལ་རིག་པ་གཅུར་ནས་བསྒོམ་པ་གལ་ཆེ། དེ་ལ་གོམས་པས་ཉམས་ལྔ་པོ་རིམ་གྱིས་སྐྱེ་བ་ཡིན་ནོ། །སྐབས་འདིར་ལྷ་རྣམས་ཀྱི་སྐུ་མདོག་ཕྱག་མཚན་སོགས་ཆོ་ག་རང་གཞུང་ལྟར་ཤེས་དགོས་ལ། སྤྱི་འགྲོས་ཀྱི་རྣམ་བཤད་འགའ་ཞིག་ནི། རྔམ་གློག་ལས། དེ་ལྟར་སྐུ་མཆོག་རེ་རེ་ལ། །ཚུལ་དགུ་དག་དང་ལྡན་པ་སྟེ། །མཉེན་དང་ལྕུགས་དང་འཁྲིལ་བག་དང་། །ལྡེམ་བག་ཆགས་དང་གཞོན་ཚུལ་དང་། །གསལ་དང་འཚེར་དང་ལྷུན་སྡུག་དང་། །གཟི་བྱིན་འབར་བ་རབ་ཏུ་གནས། ཞེས་གསུངས་པས་ཞི་བ་ལ་ཚུལ་དགུ་སྟེ། ང་རྒྱལ་གནས་སུ་དག་པས་སྐུ་ཤ་མཉེན་པ། ཞེ་སྡང་དག་པས་དཀུ་སྐབས་ཕྱེད་ཅིང་འཚམས་པས་ལྕུགས་པ། འདོད་ཆགས་དག་པས་སྐུ་ལྷོད་པར་མ་གྱུར་པས་འཁྲིལ་བག་ཆགས་པ། ཕྲག་ཏོག་དག་པས་སྐུ་དྲང་ཞིང་ལྡེམ་པ། གཏི་མུག་དག་པས་སྐུ་གཞོན་ཤ་ཆགས་པ། མ་རིག་པ་སྤངས་པས་སྐུ་གཙང་ཞིང་གསལ་བ། ཡེ་ཤེས་རྒྱས་པས་བཀྲག་ཅིང་འཚེར་བ། མཚན་དཔེ་རྫོགས་པས་བརྗིད་ཅིང་ཡིད་དུ་འོང་བས་ལྷུན་སྡུག་པ། ཆེ་བའི་ཡོན་ཏན་གྱིས་ཐམས་ཅད་ཟིལ་གྱིས་གནོན་པས་གཟི་བྱིན་ཆེན་པོ་དང་ལྡན་པ་སྟེ། སྔ་མ་ལྔ་ངོ་བོའི་ཡོན་ཏན་དང་། ཕྱི་མ་བཞི་རྣམ་པའི་ཡོན་ཏན་ནོ། །དེ་ཡང་གསལ་ཞིང་དག་པའི་འོད་ཟེར་སྣ་ཚོགས་ཕྱོགས་བཅུར་འཕྲོ་བའི་ཀློང་ན་བཞུགས་ཤིང་། གདུལ་བྱའི་ཉོན་མོངས་པའི་གདུང་བ་སེལ་བའི་བརྡར་ལྷ་རྫས་ལས་གྲུབ་པའི་དར་གྱི་ཆས་གོས་ལྔ་དང་། འདོད་ཡོན་མ་སྤངས་རྒྱན་དུ་རྫོགས་པས་འགྲོ་བའི་རེ་བ་སྐོང་བའི་བརྡར་རིན་པོ་ཆེའི་རྒྱན་བརྒྱད་དེ་རྒྱན་ཆས་བཅུ་གསུམ་གྱིས་བརྒྱན་པའོ། །དེ་ལ་དར་གྱི་ཆས་གོས་ལྔ་ནི། དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོག ཚི་གུ་ཚི་གུ་ཞེས་པ་དམར་སྨུག་ལ་བཤད་པའང་སྣང་ངོ་སྟེ་སྣ་ཚོགས་པའི་སྨད་དཀྲིས། སེར་པོས་སྐ་རགས་སམ་ཆོས་གོས། ལྗང་གུས་གར་གྱི་ཕུ་དུང་ཞེས་པ་སྟོད་ཁེབ་ལྟ་བུ་ལ་ཕུ་དུང་ཐུང་ངུ་ཡོད་པ། རིགས་ལྔའི་དབུ་རྒྱན་གྱི་འོག་ཏུ་དར་སྣ་ཚོགས་པའི་ཅོད་པཎ་དང་། དར་མཐིང་ཁྲའི་ཅོད་པཎ་ལྟག་པ་ནས་ཕྱིར་འཕྱང་བའི་ཟི་ལྡིར་རྣམས་སོ། །འགའ་ཞིག་ཏུ་སྐ་རགས་སམ་ཆོས་གོས་ཞེས་པ་དོར་ནས་ཅོད་པཎ་དང་ཟི་ལྡིར་གཉིས་སོ་སོར་བགྲང་བར་སྣང་ངོ། །རྒྱན་བརྒྱད་ནི་རིན་པོ་ཆེའི་དབུ་རྒྱན། སྙན་རྒྱན། མགུར་ཆུ་ཞེས་མགུལ་རྒྱན། སྐ་རགས། ཕྱག་གདུབ། ཞབས་གདུབ། དོ་ཤལ་ལམ་མཆོད་ཕྱིར་ཐོག་ཅེས་པ་རིན་པོ་ཆེའི་ཕྲེང་བ་ལྟེ་འོག་ཡན་འཁོར་བ། སེ་མོ་དོ་ཞེས་པ་ནུ་མའི་བར་སླེབ་པའི་དོ་ཤལ་ཐུང་བ་རྣམས་སོ། །ཡང་བྱང་ཆུབ་ཀྱི་ཡན་ལག་བདུན་མཚོན་བྱེད་དབུ་རྒྱན། དོ་ཤལ། གདུ་བུ། སྙན་ཆ། དཔུང་རྒྱན། སེ་མོ་དོ། མེ་ཏོག་གི་ཕྲེང་བ་སྟེ་རིན་པོ་ཆེའི་རྒྱན་བདུན་ནོ། ཁྲོ་བོ་ལ་གར་གྱི་ཉམས་དགུ་སྟེ། གལ་པོ་ལས། སྒེག་པ་དཔའ་བ་མི་སྡུག་པ། །དགོད་དང་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་སྟེ། །གར་དགུའི་ཚུལ་གྱིས་འགྱིང་བའོ། །ཞེས་པ་ལྟར། ཞལ་ལུང་ལས། ཆགས་ཉམས་ཀྱིས་སྒེག་པ། ཁྲོ་ཉམས་ཀྱིས་དཔའ་བ། རྨོངས་ཉམས་ཀྱིས་མི་སྡུག་པ་སྟེ་སྐུའི་ཉམས་གསུམ། ཧ་ཧ་དང་ཧི་ཧི་སོགས་བཞད་པའི་གད་མོ་འབྱིན་པས་དགོད་པ། ཟུངས་ཤིག་དང་རྒྱོབས་ཤིག་ལ་སོགས་འཇིགས་པའི་ང་རོ་སྒྲོགས་པས་གཤེ་བ། དེ་དག་ཀྱང་འབྲུག་སྟོང་དུས་གཅིག་ཏུ་ལྡིར་བ་ལྟ་བུའི་སྒྲ་གདངས་དང་ལྡན་པས་དྲག་ཤུལ་ཏེ་གསུང་གི་ཉམས་གསུམ། རྨོངས་པའི་འགྲོ་ཁམས་རྗེས་སུ་འཛིན་པའི་སྙིང་རྗེ། མ་རུང་པའི་སེམས་ཅན་ཁྲོ་བས་འདུལ་ཕྱིར་རྔམས་པ། ཐམས་ཅད་ཆོས་ཉིད་དུ་རོ་མཉམ་པས་ཞི་བ་དང་། ཐུགས་ཀྱི་ཉམས་གསུམ་སྟེ་གར་དགུ་དང་ལྡན་པའོ། །གཞན་ཡང་བཀའ་བརྒྱད་རྣམ་བཤད་ལས་ནི། ཐེག་དམན་ལས་དབུགས་འབྱིན་པས་དགོད་ཅིང་། ཆོས་ཉིད་ངང་གིས་ཁྲོས་པས་དྲག་པོའི་ཉམས་དང་། ཐུགས་རྗེ་མྱུར་བས་རྔམས་པ། སེམས་ཅན་གྱི་དོན་ལ་ཆགས་པས་གཤེ་བ། ས་ལམ་ཆིག་ཆོད་དུ་སྟོན་པས་གཏུམ་པ། ཐེག་པ་འོག་མ་ལས་འཕགས་པས་སྒེག་པ། གང་ལ་གང་འདུལ་དུ་སྟོན་པས་དཔའ་བ། ཐུགས་ཆོས་ཉིད་དུ་ཞི་བ་ལོག་ལྟ་ཚར་གཅོད་པས་འཇིགས་པ། འགྲོ་དོན་ལ་ཐུགས་བརྩེ་གཅིག་པས་སྙིང་རྗེའི་རང་བཞིན་ཅན་ཏེ་དགུའོ། །ཞེས་གསུངས་ཤིང་། དགོད་ཁྲོ་གཉིས་གཅིག་ཏུ་བསྡུ་བར་མཛད། རྒྱན་ཆས་ཀྱི་རིམ་པ་ལ། དཔལ་ཆེན་པོའི་སྐུ་ལ་ཡེ་ནས་རང་ཆས་སུ་གནས་པའི་དཔལ་གྱི་ཆས་བརྒྱད་ནི། རྒྱུད་ལས། དབུ་སྐྲ་གྱེན་བརྫེས་འཁོར་བ་རུ་བཟློག་ཆས། །རྡོ་རྗེའི་ཁྱུང་གཤོག་ཐབས་དང་ཤེས་རབ་ཆས། །མཐིང་དམར་ཅོད་པཎ་རྟག་ཆད་ཟིལ་གནོན་ཆས། །སྤྱི་གཙུག་རྡོ་རྗེ་སློག་པ་རིགས་བདག་ཆས། །དབང་གི་བསེ་ཁྲབ་གཟི་འབར་བགྲོད་པའི་ཆས། །གཉིས་མེད་སྦྱོར་བ་ཤེས་རབ་ཡུམ་གྱི་ཆས། །གནོད་གདུག་བཟློག་བྱེད་དཔའ་བོ་ལྕགས་ཀྱི་ཆས། །ཉོན་མོངས་སྲེག་བྱེད་རྡོ་རྗེ་མེ་ཡི་ཆས། ཞེས་དང་། གཡུང་ཊཱིཀ་ཏུ། གཟི་བརྗིད་འབར་བ་ཆུ་སྲིན་བརྗིད་པའི་ཆས། །ཐབས་དང་ཤེས་རབ་ཟུང་འབྲེལ་ཉི་ཟླའི་ཆས། །གདུག་པ་ཅན་བསྲེག་ཡེ་ཤེས་མེ་ཡི་ཆས། །སྐྱེ་ཤི་རྩད་གཅོད་མཆེ་བ་ཟླ་ཚེས་ཆས། །ཁྱབ་མཛད་རེ་སྐོང་རྡོ་རྗེ་གཤོག་པའི་ཆས། །མངའ་ཐང་ཡོངས་རྫོགས་རྡོ་རྗེ་སློག་པའི་ཆས། །སངས་རྒྱས་སར་བགྲོད་དབང་གི་བསེ་ཁྲབ་ཆས། །གནོད་གདུག་ཟློག་བྱེད་རྒྱ་གྲམ་ལྕགས་ཀྱི་ཆས། ཞེས་དང་། བདེ་འདུས་ལས། རྒྱལ་བྱེད་ལྕགས། བསེ་ཁྲབ་དབང་། གཅན་གཟན་གཟིག སྤྲུལ་པ་རྡོ་རྗེ། གདུག་པ་སྦྲུལ། དཔའ་བོ་སྟག གཟི་མདངས་ཞིང་ལྤགས། ངར་མ་ཟལ་ཁྲབ། རྩལ་ཆེན་སེང་གེ། གཏུམ་པ་དོམ་གྱི་ཆས་དང་བཅུའོ། །ཡང་ཁྱད་པར་ཅུང་ཟད་མི་འདྲ་བ་གཞན་ཡང་། རྟ་མགྲིན་ཁམས་གསུམ་རོལ་པའི་དགོས་དབང་ལས། དཔའ་བོ་ཏིང་འཛིན་རྣོན་པོ་སྟག་གི་ཆས། །གནོད་གདུག་ཟློག་བྱེད་རྒྱ་གྲམ་ལྕགས་ཀྱི་ཆས། །ཤེས་རབ་ཏིང་འཛིན་རྡོ་རྗེ་འཆོལ་བའི་ཆས། །དབང་གི་བསེ་ཁྲབ་དམར་པོ་གཟི་བརྗིད་ཆས། །དཔའ་བརྗིད་མཉེན་ལྕུགས་སྦྲུལ་ནག་རྒྱན་གྱི་ཆས། །དབང་ཕྱུག་ཟ་བྱེད་ཏིང་འཛིན་མཆེ་བའི་ཆས། །རྡོ་རྗེའི་སློག་པ་མཐིང་ག་ལེ་བརྒན་ཆས། །སྡུད་བྱེད་གཅན་གཟན་གཏུམ་པ་གཟིག་གི་ཆས། ཞེས་རྣམ་ཐར་བརྒྱད་དུ་གསུངས་སོ། །དུར་ཁྲོད་ཆས་བརྒྱད་ལས། བགོ་བའི་གོས་གསུམ་ནི། སྟོབས་བཅུའི་གཏི་མུག་འཇོམ་པའི་བརྡར་གླང་ཆེན་གྱི་སྟོད་གཡོག བྱང་ཆུབ་སེམས་ཀྱིས་འདོད་ཆགས་བཅོམ་པའི་བརྡར་ཞིང་ལྤགས་ཀྱི་རྐེད་ཆིངས། དཔའ་བརྟུལ་དྲག་པོའི་ལས་ཀྱིས་ཞེ་སྡང་བཅོམ་པའི་བརྡར་སྟག་ལྤགས་ཀྱི་ཤམ་ཐབས་གྲོལ་བའོ། །གདགས་པའི་རྒྱན་གཉིས་ལས། སྦྲུལ་རྒྱན་ནི། ཀླུ་རྒྱལ་རིགས་དཀར་པོས་སྐྲ་ཆིངས། རྗེ་རིགས་སེར་པོས་སྙན་ཆ། བྲམ་ཟེའི་རིགས་དམར་པོས་སེ་མོ་དོ་དང་མགུར་ཆུ། དམངས་རིགས་ལྗང་གུས་སྐ་རག་དང་དོ་ཤལ། གདོལ་བ་ནག་པོས་གདུ་བུ་རྣམས་སོ། །ཐོད་རྒྱན་ནི། ཐོད་པ་སྐམ་པོ་ལྔས་དབུ་རྒྱན། འཛག་པའི་མགོ་རློན་ལྔ་བཅུའི་དོ་ཤལ། ཚལ་བུས་དཔུང་རྒྱན་རྣམས་སོ། བྱུག་པའི་རྩི་གསུམ་ནི། དཔྲལ་བར་ཐལ་ཆེན་གྱི་ཚོམ་བུ། མཁུར་ཚོས་གཉིས་སྣའི་ཟོར་དང་འབུར་གསུམ་དུ་རཀྟའི་ཐིག་ལེ། མགྲིན་པར་ཞག་གི་ཟོར་རིས་གསུམ་མོ། །ཡང་ན་མཁུར་ཚོས་དཔྲལ་ཀོས་བཞིར་རཀྟའི་ཐིག་ལེའམ་སྨིན་མཚམས་སུ་རཀྟའི་ཐིག་ལེ། ཨོལ་ཀོར་ཞག་གི་ཟོ་རིས་ཞེས་ཀྱང་བཤད། དེ་བརྒྱད་ཀྱི་ཁར་ཡེ་ཤེས་ཀྱི་མེ་དཔུང་དང་། རྡོ་རྗེའི་གཤོག་པ་གཉིས་བསྣན་པས་དཔལ་གྱི་ཆས་བཅུའོ། །སྙན་གོང་གཡས་གཡོན་ན་ཉི་ཟླའི་འོད་ཟེར་འཕྲོ་བ་ནི་གསལ་བའི་ཆས་གཉིས་སོ། །ཐབས་གཙོ་བའི་དབང་ལས་རུས་པའི་རྒྱན་དྲུག་ནི། སྤྱི་བོར་དབུ་སྐྲ་ཐོར་ཚུགས་སུ་བཅིངས་པ་ལས་རུས་པའི་དྲྭ་མིག་སོ་གཉིས་འཕྱང་འཕྲུལ་དང་བཅས་པ། མགྲིན་པར་རུས་པའི་དྲྭ་མིག་བཅུ་དྲུག་གི་མགུལ་རྒྱན། རྒྱབ་མདུན་སེ་རལ་ཁ་རུས་ཕྲེང་བརྒྱ་རྩ་གཉིས་གཤིབ་ཀྱི་དོ་ཤལ་ལམ་ག་ཤ། སྐུ་སྨད་སྟག་ཤམས་ཀྱི་སྟེང་དུ་རུས་པའི་དྲྭ་མིག་རེ་བཞི་ཡོད་པའི་འོག་པགས་ཏེ་སྐ་རགས། ཕྱག་ཞབས་ཀྱི་མཁྲིག་མར་རུས་པའི་ཕྱག་གདུབ་དང་ཞབས་གདུབ་སྟེ་དྲུག་གམ། ཡང་ན་གདུ་བུ་གཉིས་གཅིག་ཏུ་བརྩིས་ན་སྙན་རྒྱན་དང་དྲུག་སྟེ་ཕར་ཕྱིན་དྲུག་གོ། །ཡང་ན་ཕྲག་པ་གཡས་གཡོན་དུ་རུས་པའི་ནོར་བུ། ནུ་མར་རུས་པའི་པདྨ། རྒྱབ་གཞོང་རུས་པའི་རྡོ་རྗེ། སོག་པར་རུས་པའི་འཁོར་ལོ། སྐེད་པར་རུས་པའི་དཔལ་བེའུ། ལྟེ་བར་རུས་པའི་རྒྱ་གྲམ་དང་དྲུག་གོ། ཞེས་ཀྱང་འབྱུང་ངོ། །ཤེས་རབ་གཙོ་བའི་དབང་དུ་རུས་པའི་ཕྱག་རྒྱ་ལྔ་ནི། དོ་ཤལ་ཕྲི་ལྷག་རྣམས་ཏེ་ཡེ་ཤེས་ལྔའོ། །སྐ་རགས་དང་། ཞབས་གདུབ་ལས་དཔྱང་པའི་གཡེར་ཁའི་ཕྲེང་བ་རྣམས་ནི་རྟེན་འབྲེལ་བཅུ་གཉིས་སྟོན་པའམ། གསུང་རབ་ཡན་ལག་བཅུ་གཉིས་སོ། །དྲག་པོའི་རྒྱན་ཆས་དེ་དག་ཀྱང་སྔོན་ཧེ་རུ་ཀས་རུ་ཏྲ་བསྒྲལ་བས་དེའི་ཆས་རྣམས་རང་གི་དཔའ་རྟགས་སུ་བཞེས་པ་སྟེ་ཆས་བརྒྱད་དོ། གཞན་ཡང་རྒྱན་དེ་དག་གི་ཁར་ཨུཏྤལ་ཉི་ཟླས་སྙན་གོང་བརྒྱན་པ་དང་། གསང་ཁེབ་དར་སྣ་ལ་ཕུར་བ་གསུམ་གསུམ་འཕྱང་ཞིང་སྟ་ཟུར་གཉིས་ནས་དར་དཔྱང་གསུམ་འཕྱང་བ། ཆུ་སྲིན་ཁས་དཔུང་ཁེབ་ལྟ་བུ་དང་། སྐུ་སྨད་བརྒྱན་པ་སོགས་དང་། གཡས་གཡོན་རྡོ་རྗེ་དང་རིན་པོ་ཆེའི་གཤོག་པ་བརྐྱང་པའི་དཔུང་གཡས་སུ་བྱ་ཁྱུང་དཀར་པོ། གཡོན་ཁར་བྱ་ཁྱུང་ནག་པོ་ལྡིང་བ་སོགས་འདྲ་མིན་དུ་མ་གསུངས་སོ། །སྤྱིར་ཞི་བ་ལ་ཁྲོ་བོའི་རྒྱན་རྣམས་མི་ཚུད་ལ། ཁྲོ་བོ་ལ་ཞི་བའི་རྒྱན་རྣམས་མ་བཀག་པར་ཡང་གསུངས་ཤིང་། སྐུ་མདོག་དང་ཞལ་ཕྱག་རྒྱན་ཆ་སོགས་ལ་འདྲ་མིན་ཅུང་ཟད་རེ་འབྱུང་ནའང་། ཐུགས་རྗེ་དང་མཛད་པ་ལ་ཕྱོགས་རིས་མེད་པས་གདུལ་བྱའི་ཇི་ལྟར་མོས་པ་བཞིན་སྣང་དུ་རུང་བ་ཡིན་པས་གང་ལྟར་ཡང་འགལ་བ་མེད་ཀྱང་ཆོ་ག་རང་རང་གི་སྐབས་ཐོབ་བཞིན་ཤེས་པ་གལ་ཆེའོ། །ཡང་ལྷ་བསྐྱེད་ཀྱི་སྐབས་འདིར་སྒྱུ་འཕྲུལ་ལྟར་ན་ཕྱག་རྒྱ་གཅིག་པའི་ལྷ་རེ་རེ་ལའང་། སྙིང་གར་ཡེ་ཤེས་སེམས་དཔའ་རང་འདྲ་རྒྱན་མེད་དང་། དབུ་རྒྱན་གྱི་ལྷ་རིགས་ལྔ་དང་། གནས་གསུམ་དུ་བྱིན་རླབས་ཀྱི་ལྷ་ལོངས་སྐུའི་ཆས་ཅན་གསུམ་དང་ལྷག་པའི་ལྷ་དགུ། རྩ་ལྷ་དང་བཅུའོ། །ཡང་ན་དབུ་རྒྱན་ནི་རིགས་བདག་གཅིག་གིས་བསྡུས་པས་གཅིག་ཏུ་བརྩིས་པས་སྔགས་ཀྱི་ཡན་ལག་ལྔ་དང་ལྡན་པའི་ལྷ་སྐུ་ཞེས་གསུངས་སོ། །ཆོ་ག་སྤྱི་ལྟར་ན། བདག་གི་དེ་ཁོ་ན་ཉིད། ལྷའི་དེ་ཁོ་ན་ཉིད། གསང་སྔགས་ཀྱི་དེ་ཁོ་ན་ཉིད། བཟླས་བརྗོད་ཀྱི་དེ་ཁོ་ན་ཉིད། འཕྲོ་འདུའི་དེ་ཁོ་ན་ཉིད་དེ་སྔགས་ཀྱི་ཡན་ལག་ལྔ་ཞེས་གསུངས་སོ། །ཞི་ཁྲོའི་རྣམ་འགྱུར་དང་རྒྱན་ཆས་སོགས་གསལ་ཐེབ་པ་ལས་ཐུན་མོང་པའི་ཡོན་ཏན་ཐམས་ཅད་འབྱུང་བར་གསུངས་ཏེ། སློབ་དཔོན་ཆེན་པོས་གདན་ཆེ་ལ་བརྟན་པས་ཚེ་རིང་བ། ཞབས་བགྲད་ཁམས་ཆེ་བས་སྡོད་ཚུགས་པ། སྐུ་ལང་ཚོ་རྒྱས་ཤིང་ཡིད་དུ་འོང་བས་ནད་ཉུང་ཞིང་ཁམས་བཟང་བ། ཕྱག་མཚན་གསལ་བས་བསམ་པ་འགྲུབ་པ། རྒྱན་ཚང་བས་འབྱོར་བ་དང་ལྡན་པ། ཞལ་དང་མཆེ་བ་སྐུ་མདོག་རྣམས་གསལ་བར་བསྒོམ་པས་ཐམས་ཅད་བཀའ་ཉན་ཅིང་སྣང་བ་དབང་དུ་འདུ་བའི་རྟེན་འབྲེལ་ལོ། ཞེས་གསུངས་སོ། །དེ་ཡང་གཙོ་བོར་གཤིས་མ་བཅོས་པའི་གདངས་ཀྱི་སྣང་ཆ་ལྷའི་སྐུར་ལམ་མེར་འཆར་བ་ནི་གསལ་སྣང་མཚན་ཉིད་པ་ཡིན་པར་གསུངས་པས། གཞལ་ཡས་ཁང་ལྷ་དང་བཅས་པ་ཐམས་ཅད་ཀྱང་། གཙོ་བོ་ཉིད་ཀྱི་འགག་མེད་ཡེ་ཤེས་ཀྱི་སྒྱུ་འཕྲུལ་བདེ་གསལ་སྟོང་པ་ཉིད་ཀྱི་ཆོ་འཕྲུལ་ལས་བྱུང་བ་ཁོ་ན་ལས་གཞན་དུ་མ་གྱུར་ཅིང་། བསྐྱེད་པ་དེ་རྣམས་ཀྱང་དངས་པའི་མཁའ་ལ་འཇའ་ཚོན་ཤར་བའམ་དྭངས་པའི་མཚོ་ནང་དུ་གཟའ་སྐར་ཤར་བ་ཇི་བཞིན་སྣང་ལ་བདེན་པར་མ་གྲུབ་ཅིང་རྣམ་པ་ཐམས་ཅད་པར་འཆར་བའི་ཆོས་ཉིད་ཀྱི་རྟེན་ཅིང་འབྲེལ་འབྱུང་དྲན་བཞིན་པ་ལ་གནས་པ་གལ་ཆེ། ཞེས་གསུངས་སོ། །
ང་རྒྱལ་བརྟན་པ།
གཉིས་པ་ང་རྒྱལ་བརྟན་པ་ནི། བསྒོམ་བྱའི་ལྷ་དེ་ཉིད་ཀྱང་ཡིད་ངོར་གསལ་བའི་དམིགས་རྟེན་ལྟ་བུ་ཙམ་མ་ཡིན་པར། བསྒོམ་བྱའི་ལྷར་སྣང་དང་སྒོམ་མཁན་ཐ་དད་མེད་པར་ཡི་དམ་གྱི་ལྷ་དེ་ཉིད་ངའོ་སྙམ་པའི་ང་རྒྱལ་གྱི་འཛིན་སྟངས་མ་བྲལ་བ་ལ་བསླབ་པས་བར་ཆད་ཀྱིས་མི་ཚུགས་ཤིང་བདག་འཛིན་འཇིག་པའི་དགོས་པ་ཁྱད་པར་བ་ཡོད་དེ། དགོངས་འདུས་ལས། ཀུན་བཏགས་མཉམ་རྗེས་མེད་པ་ལ། །ང་རྒྱལ་བརྟན་པ་གནད་ཆེ་སྟེ། །དེ་ཡང་གསལ་རུང་མ་གསལ་རུང་། །ལྷ་རང་ཡིན་ནམ་སྙམ་བྱ་ཞིང་། །ཐ་མལ་སྣང་ཞེན་མེད་པར་བྱ། །ཞེས་དང་། །རྩེ་ལེས། སྣོད་བཅུད་གཟོད་ནས་དག་པའི་ལྷ་སྔགས་སུ། །ཡིན་ཚུལ་ཇི་བཞིན་ཤེས་པ་མེད་ཐབས་མེད། །ཅེས་དང་། །སེམས་ཉིད་ངལ་གསོ་ལས། རང་སེམས་ཡེ་ནས་ལྷ་ཡི་རང་བཞིན་པས། །ལུས་ནི་དཀྱིལ་འཁོར་སྒྲ་ཚིག་གསང་སྔགས་ཉིད། །ཐམས་ཅད་ལྷུན་རྫོགས་ཡེ་ཤེས་ཆེན་པོའི་ངང་། །དམ་ཚིག་ཡེ་ཤེས་གཉིས་མེད་དགུག་གཞུག་མེད། །གཤེགས་གསོལ་མི་དགོས་བཟང་ངན་བླང་དོར་མེད། །ཡེ་ནས་དཀྱིལ་འཁོར་ཡིན་པའི་བདག་ཉིད་ལ། །ཡིན་པར་ཤེས་པའི་ཚུལ་གྱིས་གསལ་འདེབས་ལས། །མ་གྲུབ་པ་ལ་ཡང་གྲུབ་བྱེད་པ་མིན། ཅེས་གསུངས་པ་ལྟར། །སྦྱང་བྱ་སྐྱེ་འཆི་བར་དོ་གསུམ་དང་། ཕྲ་བའི་ལུས་ངག་ཡིད་གསུམ་ཉིད། སྦྱངས་འབྲས་རྒྱལ་བའི་སྐུ་གསུམ་དང་། རྡོ་རྗེ་གསུམ་གྱི་རང་བཞིན་དུ་ཡེ་ནས་གནས་པར་ཐག་བཅད་ནས། གློ་བུར་གྱི་སྒྲིབ་པ་སྦྱངས་བའི་ཕྱིར། སྦྱོང་བྱེད་ཏིང་འཛིན་གསུམ་དང་། གསལ་བ་གསུམ་གྱི་ལམ་ཁྱེར་དང་མ་བྲལ་བར། སྣང་གྲགས་རིགས་གསུམ་ལྷ་སྔགས་ཡེ་ཤེས་ཀྱི་རོལ་བར་རྒྱས་འདེབས་པ་ལ་ང་རྒྱལ་བརྟན་པ་ཞེས་བྱ་བར་གསུངས་སོ། །
རྣམ་དག་དྲན་པ།
གསུམ་པ་རྣམ་དག་དྲན་པ་ནི། གསལ་བརྟན་གྱི་ཉམས་སྐྱེས་པ་ན་གཞི་འབྲས་སྦྲེལ་བའི་དག་པ་དྲན་པས་བསྐྱེད་རིམ་མཆོག་གི་དངོས་གྲུབ་ཀྱི་ཉེ་རྒྱུར་སྨིན་པ་ལ་བསླབ་པར་བྱ་སྟེ། དེ་ལྟར་གསལ་བ་དེ་ཡང་དངོས་པོ་རང་མཚན་ཅན་དུ་བདེན་པར་མི་ཞེན་པར་དོན་རང་སྣང་ཡེ་ཤེས་ཀྱི་དཀྱིལ་འཁོར་ལ་མདོག་དབྱིབས་ཞལ་ཕྱག་སོགས་ཀྱི་སྤྲོས་པ་མི་མངའ་ཡང་སངས་རྒྱས་རང་སྣང་གི་ཡོན་ཏན་རྣམས་གདུལ་བྱའི་བློ་ངོར་མཚོན་བྱེད་ཀྱི་བརྡ་རྟགས་སུ་རྟེན་དང་བརྟེན་པའི་རྣམ་པ་སྣ་ཚོགས་པར་ཤར་བ་ཡིན་པས། དེ་ལ་རྟེན་གཞལ་ཡས་ཁང་གི་དག་པ་མདོ་ཙམ་ནི་སྔར་སྨོས་པ་ལྟར་རོ། །བརྟེན་པ་ལྷའི་དག་པ་ནི་ཆོས་ཐམས་ཅད་དེ་བཞིན་ཉིད་དུ་རོ་གཅིག་པའི་བརྡར་ཞལ་གཅིག ཞལ་གསུམ་ནི་རྣམ་ཐར་གསུམ་མམ་སྐུ་གསུམ། ཕྱག་གཉིས་ཐབས་དང་ཤེས་རབ། ཕྱག་བཞི་ཚད་མེད་བཞི། ཕྱག་དྲུག་ཡེ་ཤེས་ལྔར་རང་བྱུང་གི་ཡེ་ཤེས་དང་དྲུག་གམ་ཕར་ཕྱིན་དྲུག ཞབས་བཞི་བསྡུ་དངོས་བཞི། ཞབས་གཉིས་ཚུལ་ཁྲིམས་དང་ཏིང་འཛིན། སྐྱིལ་ཀྲུང་ནི་སྲིད་ཞི་མཉམ་ཉིད། བཞེངས་སྟབས་ནི་འགྲོ་དོན་ལ་གཡེལ་བ་མེད་པ། སྤྱན་གསུམ་ནི་དུས་གསུམ་གཟིགས་པ། མཆེ་བ་བཞི་ནི་སྐྱེ་བ་བཞི་རྩད་ནས་གཅོད་པ། ཡབ་ཡུམ་ནི་ཐབས་ཤེས་ཟུང་འཇུག ཡུམ་དེ་ཡང་མཚན་མའི་རྟོག་པའི་སྒྲིབ་གཡོག་དང་བྲལ་བ་མཚོན་བྱེད་སྐུ་གཅེར་བུ། མི་འགྱུར་བའི་བདེ་བ་ཆེན་པོ་དགའ་བ་བཅུ་དྲུག་དང་ལྡན་པ་མཚོན་བྱེད་བཅུ་དྲུག་ལོན་པ། ན་ཚོད་དར་ལ་བབས་པ། དབྱིངས་ལས་ཡེ་ཤེས་ཕྱོགས་མེད་དུ་རྒྱས་པ་མཚོན་བྱེད་དབུ་སྐྲ་གྲོལ་བ། ཞི་ལྷག་ཟུང་འཇུག་ཏུ་ཤེས་བྱེད་མཁའ་གསང་མཉམ་པར་སྦྱོར་བ། སྐུ་མདོག་ཀྱང་དཀར་པོ་ནི་སྐྱོན་གྱིས་མ་གོས་པ། སེར་པོ་ནི་ཡོན་ཏན་རྒྱས་པ། དམར་པོ་ནི་ཐུགས་རྗེས་ཆགས་པ། ལྗང་གུ་ནི་ཕྲིན་ལས་ཐོགས་མེད། ནག་པོ་ནི་ཆོས་ཉིད་མི་འགྱུར་བའོ། །ཕྱག་མཚན་ཀྱང་ཡེ་ཤེས་ལྔ་མཚོན་པའི་རྡོ་རྗེ་རྩེ་ལྔ། ཉོན་མོངས་གཅོད་པའི་འཁོར་ལོ། ཡོན་ཏན་དགོས་འདོད་ཀུན་འབྱུང་བའི་རིན་པོ་ཆེ། སྐྱོན་གྱིས་མ་གོས་པདྨ། ཕྲིན་ལས་ཐོགས་མེད་སྣ་ཚོགས་རྡོ་རྗེ། ཀུན་རྟོག་གཅོད་པ་གྲི་གུག མི་རྟོག་ཡེ་ཤེས་བདེ་བ་སྐྱོང་བ་ཀ་པཱ་ལ། བདུད་བཞི་བཅོམ་པ་ཁྲག་གིས་གང་བ། སྐྱེ་ཤི་རྩད་ནས་གཅོད་པ་རལ་གྲི། དུག་གསུམ་རྩད་གཅོད་ཁ་ཊཱཾ་ཀ་སོགས་དང་། རྒྱན་ཆས་ཀྱི་དག་པ་ཡང་མདོ་ཙམ་སྔར་སྨོས་པ་ལྟར་རོ། །དེ་ལྟར་རྟགས་བསྟོད་སོགས་ཀྱི་དོན་བཞིན་སྣང་སྲིད་ལྷའི་འཁོར་ལོ་སོ་སོར་དག་པ་ནི་ཆོས་ཅན་ལྷ་དང་ལྷ་མོའི་དག་པ་ཞེས་བྱ་ལ། ལྷ་ཡབ་ཡུམ་མཉམ་སྦྱོར་གྱི་དམིགས་པ་གསལ་འདེབས་པའམ་བསྐྱེད་རྫོགས་ཟུང་འཇུག་ཏུ་བསྒོམ་པའི་ཚེ། རྫོགས་རིམ་གྱིས་ལུས་ལ་གནད་དུ་བསྣུན་པས་བདེ་ཆེན་ཆ་མཐུན་ཙམ་ཤར་བས་ཀྱང་བསྐྱེད་རིམ་ལ་རྒྱས་འདེབས་པ་སྟེ་གང་ལྟར་ཡང་རྗེས་ཆགས་བདེ་བ་ཆེན་པོས་རྩིས་ཟིན་པར་བྱེད་པ་ནི་རང་རིག་བདེ་ཆེན་གྱི་དག་པ་དང་། སྣང་ཆ་སྒྱུ་མ་ལྟ་བུ་ལ་སྤྲོས་བྲལ་གྱི་ལྟ་བས་རྒྱས་བཏབ་སྟེ་སྣང་སྟོང་ཟུང་འཇུག་ཏུ་བསྒོམ་པ་ནི་ཆོས་ཉིད་དེ་བཞིན་ཉིད་ཀྱི་དག་པའོ། །ལྷའི་རྣམ་པ་དེ་ཤར་ཙམ་ནས་དག་པ་དེ་དང་དེའི་ངོ་བོར་འདུ། ཤེས་པ་བཅོས་མིན་དུ་འབྱུང་ན་གོམས་ཤིང་ལོབ་པ་ཡིན་ནོ། །ཞེས་འཇམ་དབྱངས་མཁྱེན་བརྩེས་གསུངས་སོ། །དེ་ཡང་ལས་དང་པོ་བས་དེ་ཙམ་མི་ནུས་པས། ལྷའི་གསལ་སྣང་ཐེབ་ཙམ་ཀྱི་མཐར་དེ་དག་ཀྱང་སངས་རྒྱས་ཀྱི་ཐུགས་ཡེ་ཤེས་ཆེན་པོའི་རྣམ་རོལ་བྱང་ཆུབ་ཕྱོགས་ཀྱི་ཆོས་རྣམས་མཚོན་བྱེད་ཀྱི་བརྡ་རྟགས་སུ་ཤར་བ་ཡིན་ནོ་སྙམ་པའི་མོས་གུས་ལ་གནས་པས་དག་དྲན་རྗེས་མཐུན་པ་འབྱུང་ཞིང་། ལྷ་རང་རྒྱུད་དུ་འཛིན་པའི་གོལ་ས་ལས་ལྡོག་པ་ཡིན་ནོ། །མདོར་ན་གཟུགས་ཀྱི་སྐུར་སྣང་ཡང་། ཆོས་སྐུའི་རང་བཞིན་ལས་མ་འདས་པར་སྣང་སྟོང་སྒྱུ་མའི་རོལ་པར་རྩལ་སྦྱོང་བ་ལ་རྣམ་དག་དྲན་པ་ཞེས་བྱའོ། །དེ་དག་ཐམས་ཅད་ཀྱི་སྐབས་སུ་བསྐྱེད་རིམ་ལ་བརྟེན་ནས་ཐ་མལ་གྱི་སྣང་ཞེན་སྦྱང་བ་ལམ་བསྒོམ་པའི་དོན་འབྲས་ཡིན་པས། དེ་ལ་སྣང་བ་ནི་རང་གི་དབང་པོ་ལྔའི་ཡུལ་དུ་གཟུགས་སྒྲ་དྲི་རོ་རེག་བྱ་ལྔ་དང་ཡིད་ཡུལ་དུ་ཆོས་ཁམས་ཀྱི་རྣམ་རྟོག་སྣང་བ་དེ་ཡིན་པས། དེ་སྦྱོང་བྱེད་དུ་རྣམ་པ་གསལ་བ་གསུངས་ཏེ། སྣོད་བཅུད་ལྷ་དང་གཞལ་ཡས་ཁང་སྒྲ་གྲགས་སྔགས་ཀྱི་རང་བཞིན་དུ་གསལ་ནས་སེམས་ཡུལ་ལ་མི་འཕྲོ་བ་དེ་ཡིན། ཞེན་པ་ལ་བདག་ཏུ་ཞེན་པ་དང་། དངོས་པོར་ཞེན་པ་གཉིས་ཡོད་པས། དང་པོ་བདག་ཏུ་ཞེན་པ་ནི། ཐོག་མ་མེད་པའི་དུས་ནས་ངའོ་སྙམ་པའི་ངར་འཛིན་འདི་ཡིན་པས་དེའི་གཉེན་པོར་ང་རྒྱལ་བརྟན་པ་གསུངས་ཏེ། ངའམ་བདག་ཐ་མལ་དུ་འཛིན་པ་དོར་ནས་ཡི་དམ་གྱི་ལྷ་ཡིན་ནམ་སྙམ་པའི་ངེས་ཤེས་བརྟན་པོ་བྱེད་པ་དེ་ཡིན། རྣམ་པ་གསལ་བ་དང་། ང་རྒྱལ་བརྟན་པ་འདི་གཉིས་ལ་ང་རྒྱལ་བརྟན་པ་འདི་གལ་ཆེ་སྟེ། རང་ངེས་པར་ལྷ་ཡིན་པའི་ངེས་ཤེས་མེད་ན་རྣམ་པ་གསལ་ཡང་རྒྱུད་ཐ་མལ་ཡིན་པས་དོན་མེད། རང་ངེས་པར་ལྷ་ཡིན་པའི་ང་རྒྱལ་ཡོད་ན་བདག་འཛིན་འཇིག་ཅིང་རྣམ་པའང་ཤུགས་ཀྱིས་གསལ་འོང་བ་ཡིན། དངོས་པོར་ཞེན་པ་ཞེས་པ་དེ། སྣོད་བཅུད་དུ་ཞེན་པའི་བདེན་ཞེན་ཏེ་རྟག་བརྟན་དུ་ཞེན་པའི་ཨ་འཐས་ཆོས་ཀྱི་བདག་ཟེར་བ་ཡིན་པས་དེའི་གཉེན་པོར་རྣམ་དག་དྲན་པ་གསུངས་ཏེ། སངས་རྒྱས་ཀྱི་ཐུགས་རྒྱུད་ལ་ཡོད་པའི་ཡོན་ཏན་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ལ་སོགས་པའི་རང་བཞིན་གཞལ་ཡས་ཁང་དང་། ལྷ་དང་ཞལ་ཕྱག་སོགས་བརྡ་དང་རྣམ་པ་ཙམ་ཡིན་པས་དོན་ལ་བདེན་གྲུབ་ཏུ་འཛིན་པའི་ཞེན་པ་སྦྱངས་པ་ཡིན་པས། འདི་གསུམ་གལ་ཆེ་བས་རེས་མོས་ཀྱིས་བློ་སྦྱོང་། འདི་རྣམས་མཚན་ཉིད་ཐེག་པ་ལྟར་སྣང་བའི་གཉེན་པོར་རྡུལ་ཕྲན་དུ་བསིལ་བ་སོགས་དང་། བདག་གི་གཉེན་པོར་བདག་མེད་པ་བསྒོམ་པ་སོགས་སྤང་གཉེན་འགལ་བར་སྤྱོད་པ་མ་ཡིན་པར་གསང་སྔགས་ཐབས་མཁས་པའི་ཁྱད་པར་གྱིས་དཔེར་ན་རྣ་བར་ཆུ་སོང་བ་ཆུ་བླུགས་ནས་འདོན་པ་དང་། མེས་ཚིག་པའི་ཟུག་རྔུ་སླར་མེ་ལ་བསྲོ་བ་ལྟར་འཁྲུལ་སྣང་གི་གཉེན་པོར་ལྷ་སྣང་དང་། བདག་ཏུ་ང་རྒྱལ་བའི་གཉེན་པོར་ལྷའི་ང་རྒྱལ་བསྐྱེད་པ་སོགས་རྣམ་རྟོག་གི་གཉེན་པོར་རྣམ་རྟོག་བསྒོམ་པས། མ་དག་པའི་རྣམ་རྟོག་མེད་པར་བྱེད་པ་སྔགས་ཀྱི་ཐབས་མཁས་ཡིན་པས་ཐབས་བསྐྱེད་པའི་རིམ་པ་ཟེར་བའི་དོན་ཡང་དེ་ཡིན་ནོ། །རྣམ་རྟོག་དང་ཉོན་མོངས་པ་མི་སྤོང་ཟེར་བའང་འདི་ལྟ་བུ་ལ་ཟེར་བ་ཡིན་གྱི་རང་བཞིན་ཐ་མལ་གྱི་རྣམ་རྟོག་དང་ཉོན་མོངས་མི་སྤང་བ་མིན་པར་ཤེས་དགོས་སོ། །དེ་ལྟར་བསྒོམ་པའི་ཚེ་ཤེས་པ་མི་གསལ་བ་དང་། བྱིང་ཞིང་འཐིབ་པ་དང་། བསྒོམ་སྙིང་མི་འདོད་པ་སོགས་བྱུང་ན་ཤེས་པ་ཧུར་འདོན། བློའི་ཤོང་ཡངས་བསྐྱེད། ལྷའི་རྣམ་པ་སྐུ་མདོག་ཕྱག་མཚན་ལྟ་བུའི་ཕྱོགས་སུ་ཤེས་པ་གུད་དུ་མི་གཅོད་པར་སྣོད་བཅུད་ལྷ་དང་གཞལ་ཡས་ཁང་འོད་དང་འོད་ཟེར་གྱི་རང་བཞིན་བཀྲ་ལམ་ལམ། གཡོ་འགུལ་ཤིག་ཤིག་སྒྲ་གྲགས་སྔགས་ཀྱི་རང་བཞིན་དུ་འུར་ཏིང་ཏིང་། དྲན་རྟོག་ཆོས་ཉིད་ཀྱི་རང་བཞིན་ཕྱ་ལ་ལ་བཏང་སྟེ་ཧཱུྃ་གླུར་ལེན་ཅིང་ཤེས་པ་རྒྱ་བསྐྱེད། དཔང་བསྟོད། རྟོག་ཚོགས་དུམ་བུར་རྦད་རྦད་བཅད། ཧ་ཅང་གནས་ན་མི་གནས་ན། གསལ་ན་མི་གསལ་ན་སྙམ་པའི་གུ་དོག་སྤངས་ཏེ་ཡངས་ཁྲོ་ལེར་བསྒོམ། ཡང་ཤེས་པ་ཧ་ཅང་རྒོད་པ་དང་འཕྲོ་བ་རྒྱ་འབྱམས་ན། བསྙེན་པ་སོགས་བཟླ་བ་ཅུང་ཟད་མཚམས་བཅད། རླུང་རོ་འབུད། ཤེས་པ་ལྷོད་ཀྱིས་ཀློད་ནས་རང་ངོར་ཅེར་གྱིས་བལྟ། དེའི་ངང་ནས་ཐུགས་སྲོག་ལ་དམིགས་པ་གཅུར་ཏེ་སེམས་གཏད་ནས་བསྒོམ། ཧ་ཅང་དམིགས་པ་སོགས་ཨེ་གསལ་རེ་དོག་ཆེ་བས་གུ་དོག་དང་། གསལ་མ་གསལ་མེད་པར་ཁྲལ་འཇལ་བ་ལྟ་བུའི་གུ་ཡངས་གཉིས་ཀ་མི་བྱ་བར་གུ་ཡངས་དོག་ཚོད་ཟིན་པར་བྱ། སྐབས་སྐབས་སུ་དེ་ལྟར་ལྷ་བསྒོམ་པ་དང་། རྣམ་པ་གསལ་མི་གསལ་སོགས་ཀྱི་བྱེད་པོ་ཁོ་རང་ངོ་ལ་ཁ་ཚུར་ལོག་ནས་བལྟ། དེ་ཡང་བལྟ་བྱ་དང་བལྟ་མཁན་ལ་སོགས་པའི་རྟོག་པ་ཕྲ་མོ་དེ་རྒྱ་ཁྲོ་ལེར་བཏང་ནས། གང་ཡིན་དང་འདི་ཡིན་མེད་པའི་ཤེས་པ་ཧ་ཆད་དེ་བ་དེའི་ངང་བསྐྱངས། དེ་ལྟར་དགོངས་པ་མི་འགྱུར་བ་ཆོས་ཉིད་ཀྱི་གཟེར་དང་ཏིང་འཛིན་ལྷའི་གཟེར་གཉིས་རེས་མོས་དང་། ཟུང་འཇུག་བློས་གང་འཆུན་བྱེད་ཅིང་། དེ་དག་ཀུན་གྱི་དུས་སུ་བཟླས་པ་སྔགས་ཀྱི་གཟེར་རྩ་བསྙེན་རྒྱུན་ཆད་མེད་པར་བཟླ། ཐུན་འཇོག་ཁ་དང་། བསྙེན་མཚམས་གྲོལ་ཁ་རྣམས་སུ་འཕྲོ་འདུ་ཕྲིན་ལས་ཀྱི་གཟེར་འོད་ཟེར་སྤྲོ་བསྡུ་སོགས་བསྙེན་ཡིག་རྣམས་ནས་བཤད་པ་ལྟར་བྱེད་པ་ནི། སྲོག་སྡོམ་གཟེར་བཞི་ཞེས་སྔ་འགྱུར་རྙིང་མའི་ཆོས་སྐད། ཨོ་རྒྱན་སངས་རྒྱས་གཉིས་པའི་མན་ངག་ཐུན་མོང་མ་ཡིན་པ་ཡིན་པས་ཅིས་ཀྱང་གལ་ཆེ། ཞེས་དཔལ་སྤྲུལ་རིན་པོ་ཆེའི་གསུངས་པ་ལྟར་ཏེ། རྒྱུད་ལས། དེ་ཉིད་ལྡན་པའི་རྣལ་འབྱོར་པས༔ དུར་ཁྲོད་འདྲེ་ངན་སྒྲུབ་གྱུར་ཀྱང་༔ མཆོག་དང་ཐུན་མོང་འབྲས་བུ་གང་༔ མི་འདོད་རང་བྱུང་ལྷུན་གྲུབ་འབྱུང༔ དེ་ཉིད་མ་རྟོགས་ཨ་འཐས་བློས༔ ཡེ་ཤེས་སེམས་དཔའ་བསྒྲུབ་གྱུར་ཀྱང་༔ གནས་སྐབས་བདེ་འབྲས་ཕྲ་མོ་ལས༔ ཡང་དག་འབྲས་བུ་སྲིད་མཐའ་ཙམ༔ ཞེས་གསུངས་སོ། དེ་ཡང་སྔ་འགྱུར་ལྟར་ན་བདུན་ཏེ། གསང་རྫོགས་མ་ཧཱ་ལྷ་ཁྲིད་ལས། ལྷ་ལ་སེམས་བཟུང་བ། འགྱུར་བའི་སྐྱོན་བཅོས་པ། ལྷ་དབྲལ་བ། ལྷ་ལམ་དུ་སློང་བ། ལྷ་དང་རང་སེམས་བསྲེ་བ་ལྔའི་ཁོང་ནས་ཉམས་ལྔ་མངོན་དུ་བྱེད་པ་ན་སྔོན་འགྲོའི་ས་བཅད་ལྔ་དང་། ལྷ་དོན་ལ་སྦྱོར་བ་ནི་ཏིང་འཛིན་གསུམ་གྱིས་དྲངས་པའི་བསྙེན་བསྒྲུབ་ཡན་ལག་བཞི་འབྲེལ་གྱི་ལམ་ལ་སློབ་པ་སྟེ་དངོས་གཞིའི་ས་བཅད་དང་། ལྷ་ལམ་དུ་ཁྱེར་བ་ནི། ཤེས་བྱ་བཅུ་དང་དམ་ཚིག་དྲུག་སོགས་རྗེས་ཀྱི་ས་བཅད་གཅིག་དང་བདུན་ནོ། །དང་པོ་ནི། ལྷའི་སྐུ་མདོག་ཞལ་ཕྱག་རྒྱན་ཆ་ལུགས་སོགས་རྫོགས་པར་གསལ་བ་ལ་སྒོ་ལྔ་སྡུད་ཅིང་སེམས་གཞན་དུ་མ་ཡེངས་པར་བསྒོམ་པ་དང་། འགྱུ་དྲན་གྱི་རྟོག་པ་སྔར་ལས་ཤིན་ཏུ་འཚུབ་པར་འགྱུར་བ་ནི་གཡོ་བའི་ཉམས་ཏེ། དཔེར་ན་འབབ་ཆུ་དྲག་པོའི་འོག་ཏུ་ཉ་སྲམ་སོགས་ཀྱང་མི་མཐོང་ལ། དལ་གྱིས་འབབ་པའི་འོག་ཏུ་རྡེའུ་ཕྲ་མོ་ཚུན་ཆད་མཐོང་བ་ལྟར་སེམས་ཅུང་ཟད་གནས་པའི་མགོ་བརྩམ་པའི་རྟགས་སོ། སླར་རྣམ་རྟོག་རིམ་གྱིས་ཞི་ནས་ལྷ་བཀྲ་ལམ་མེར་འཆར་བ་ནི་ཐོབ་པའི་ཉམས་སོ། །གཉིས་པ་ནི། དམིགས་པ་བརྗེད་དང་ལེ་ལོ་དང་། མ་གྲུབ་དོག་དང་བྱིང་བ་དང་། རྒོད་དང་ཆོག་མི་ཤེས་པ་རྩོལ། །མ་གསལ་ལུས་སོགས་སྐྱོན་བདུན་ནོ། །ཞེས་དང་། རབ་རིབ་མོག་མོག་གྲིབ་མ་ཅན། །སྐུ་ཡི་ཚད་དང་ཆ་ལུགས་དང་། །དབྱིབས་དང་གྲངས་དང་བཞུགས་ཚུལ་དང་། །ཁ་ཏོག་འབའ་ཞིག་དབྱིབས་འབའ་ཞིག །རིམ་པར་ནུབ་དང་རྣམ་འགྱུར་ཆ། །མ་རྫོགས་འགྱུར་བའི་སྐྱོན་བཅུ་གཉིས། །ཞེས་གསུངས་པ་ལྟར། སྤྱི་དང་བྱེ་བྲག་གི་སྐྱོན་དེ་རྣམས་ཀྱི་དབང་དུ་མི་གཏོང་བར་ལྷའི་སྐུ་མདོག་ཞལ་ཕྱག་སོགས་གང་མི་གསལ་བ་དེ་ཆེད་དུ་གསལ་བཏབ་སྟེ་བསྒོམ་པའོ། །གསུམ་པ་ནི། ཐུན་རེར་ལྷ་ལ་སེམས་གཏད་དེ་མ་ཡེངས་པར་ནན་གྱིས་བསྒོམ། ཐུན་རེར་བསྒོམ་གྱི་རང་ངོ་ལ་བལྟས་ཏེ་ཡིན་ལུགས་སྐྱོང་བ་རེས་མོས་སུ་བྱེད་པའོ། བཞི་པ་ནི། ལྷའི་ཆེ་ཆུང་དང་རྣམ་འགྱུར་སོགས་མང་པོ་བྱས་ནས་བསྒོམ་པས་ལྷར་སྣང་རྒྱུན་དུ་འཆར་བ་ནི་གོམས་ཉམས་ཆུ་ཀླུང་ལྟ་བུའོ། །ལྔ་པ་ནི། བསྒོམ་བྱའི་ལྷ་དང་བསྒོམ་མཁན་གྱི་བྱེད་པ་གཉིས་སུ་མེད་པའི་ངང་ལ་མཉམ་པར་བཞག་པས་ལྷའི་གསལ་སྣང་དང་མི་འབྲལ་བ་ནི་བརྟན་ཉམས་རི་རབ་ལྟ་བུའོ། །སྐབས་འདིར་གསལ་བའི་ཚད་བཞི་ནི། ལྷ་གང་ཡིན་དེའི་སྐུའི་སྣང་ཆ་སྤྱན་གྱི་དཀར་ནག་ཚུན་ཆད་མ་འདྲེས་པ་གསལ་བས་ས་ལེ། དེ་ཡང་རིག་པའི་གསལ་ངར་དང་བྲལ་བའི་བྱིངས་ཉམས་ཅན་ལྟ་བུ་མ་ཡིན་པར་གསལ་སྟོང་སེང་བག་དང་བཅས་པའི་རིག་པའི་ངར་དང་ལྡན་པས་སེང་ངེ། དེ་དག་ཀྱང་སེམས་མེད་བེམ་པོའི་རྣམ་པ་འཇའ་ཚོན་ལྟ་བུ་མ་ཡིན་པར། བ་སྤུའི་ཁུང་བུ་དང་དབུ་སྐྲའི་ཉག་མ་ཚུན་ཆད་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་ཟིན་པས། དབང་ཤེས་དང་བཅས་པའི་ཡོན་ཏན་བརྒྱ་ཕྲག་ཏུ་འཆར་ཞིང་བཀྲ་ཧྲིག་གེར་བཞུགས་པས་ན་ལྷག་གེ། དེ་ལྟ་བུའི་ལྷ་དེ་ཡང་དེ་ལྟར་ཡིན་དང་ཡོད་དོ་སྙམ་པའི་རྗེས་དཔག་གི་བློ་རྟོག་མ་ཡིན་པར། ཡིད་ངོར་ན་མངོན་སུམ་ལྟ་བུ་བཀྲ་ལྷང་ངེར་འཆར་བས་ལྷང་ངེ་བ་དང་བཞིའོ། །བརྟན་པའི་ཚད་བཞི་ནི། བརྗེད་ངས་དང་ལེ་ལོ་སོགས་སྤྱིའི་སྐྱོན་གྱིས་མི་གཡོ་བ། རབ་རིབ་དང་མོག་མོག་སོགས་བྱེ་བྲག་གི་སྐྱོན་གྱིས་མི་འགྱུར་བ། དེ་ཡང་ཐུང་ངུ་ཙམ་མ་ཡིན་པར་ཉིན་དང་མཚན་དུ་མཉམ་པར་བཞག་ཀྱང་རྣམ་རྟོག་ཕྲ་མོས་ཀྱང་མི་བརྫི་བར་གསལ་བས་ན་མངོན་པར་མི་འགྱུར་བ། སྐུ་མདོག་དང་ཞལ་ཕྱག་འབྱོན་བཞུགས། འོད་ཟེར་སྤྲོ་བསྡུའི་རྣམ་པ་ལ་སོགས་པ་གང་ལྟར་བསྒོམ་ཡང་དེ་ལྟར་འབྱོར་བ་ནི་རབ་ཏུ་བརྟན་པར་གྱུར་བའམ་ཅིར་ཡང་བསྒྱུར་དུ་བཏུབ་པ་སྟེ། དེ་ལྟ་བུ་གསལ་བརྟན་གྱི་ཚད་བརྒྱད་གྱད་དུ་མ་གྱུར་བར་བསྒོམ་པས། གང་སྣང་ཐམས་ཅད་ལྷའི་དཀྱིལ་འཁོར་དུ་འཆར་བ་ནི་མཐར་ཕྱིན་པའི་ཉམས་སྣང་བ་ལྷའི་འཁོར་ལོ་ཞེས་བརྟན་པ་ཡོངས་སུ་རྫོགས་པ་ཐོབ་པའི་ཚད་དོ། །དྲུག་པ་ནི། ཏིང་ངེ་འཛིན་གསུམ་དང་འབྲེལ་བའི་སྲོག་སྡོམ་གཟེར་བཞིའི་མན་ངག་གིས་བསྙེན་བསྒྲུབ་ཡན་ལག་བཞི་འབྲེལ་གྱི་ལམ་ལ་སློབ་པ་སྟེ། བསྙེན་པའི་ཡན་ལག་ཏིང་འཛིན་གྱི་གཟེར། ཉེ་བསྙེན་གྱི་ཡན་ལག་སྙིང་པོ་སྔགས་ཀྱི་གཟེར། སྒྲུབ་པའི་ཡན་ལག་དགོངས་པ་མི་འགྱུར་བའི་གཟེར། སྒྲུབ་པ་ཆེན་པོའི་ཡན་ལག་འཕྲོ་འདུའི་གཟེར་རྣམས་སོ། །དེ་ཡང་གཉིས་ཀྱི་ཆ་ཐམས་ཅད་གཉིས་མེད་ཀྱི་ཡེ་ཤེས་གཅིག་ཏུ་སྡོམ་པའི་གཟེར་བུ་ལྟ་བུ་ཡིན་པས། དེ་ལ་ཏིང་ངེ་འཛིན་གྱི་གཟེར་ནི། ཏིང་འཛིན་གསུམ་གྱི་སྒོ་ནས་སྣོད་བཅུད་ལྷའི་དཀྱིལ་འཁོར་སྣང་སྟོང་སྒྱུ་མ་ལྟ་བུར་བསྒོམ་ནས། དབང་བསྐུར་རྒྱས་གདབ་སོགས་ཡན་ལག་ཚང་བར་བྱས་པས་མར་འཁོར་བའི་དུས་ཀྱི་སྐྱེ་གནས་བཞིར་སྐྱེ་བའི་ལུས་ཀྱི་བག་ཆགས་སྦྱོང་ཤིང་དག༵་པར་བྱེད། ཡར་སངས་རྒྱས་ཀྱི་དུས་ན་སྐུའི་གསང་བ་སྤྲོས་པ་ལས་འདས་ཀྱང་། གང་འདུལ་གྱི་རྣམ་རོལ་དུ་སྣང་བའི་འབྲས་བུ་གཞི་ལ་རྫོ༵གས། བར་ལམ་དུ་རྩ་ཁམས་དག་པ་ལྷར་སྦྱངས་པས་རྡོ་རྗེའི་ལུས་ལ་གནད་དུ་བསྣུན་པའི་རྫོགས་རིམ་གྱི་སྨི༵ན་བྱེད་དུ་འགྲོ་བའོ། །སྙིང་པོ་སྔགས་ཀྱི་གཟེར་ནི། ཡེ་ཤེས་སེམས་དཔའི་ཐུགས་ཀར་ཏིང་འཛིན་སེམས་དཔའ་ཐུགས་སྲོག་སྔགས་ཕྲེང་གིས་བསྐོར་བ་ལ་སེམས་གཏད་དེ་བཟླས་པ་བྱས་པས་མར་འཁོར་བའི་དུས་སུ་འཁྲུལ་བའི་ངག་གི་བག་ཆགས་ད༵ག་པར་བྱེད། ཡར་སངས་རྒྱས་ཀྱི་དུས་ན་གསུང་གི་གསང་བ་སྒྲ་ཚིག་ལས་འདས་ཀྱང་ཐེག་པ་བསམ་གྱིས་མི་ཁྱབ་པར་འཆར་བའི་འབྲས་བུ་གཞི་ལ་རྫོ༵གས། བར་ལམ་དུས་སུ་ངག་རླུང་གི་རང་བཞིན་སྙིང་པོ་སྔགས་སུ་སྦྱངས་པས་ཕ་རྒྱུད་ལྟར་རླུང་ལ་བརྟེན་པའི་རྫོགས་རིམ་གྱི་སྨི༵ན་བྱེད་དུ་འགྲོའོ། །དགོངས་པ་མི་འགྱུར་བའི་གཟེར་ནི་ལྷ་སྔགས་གང་གི་ཚེ་ཡང་ཐ་དད་གཉིས་ཆོས་སུ་འཛིན་པ་ཐམས་ཅད་དག་མཉམ་རྡོ་རྗེ་དབྱིངས་ཀྱི་དཀྱིལ་འཁོར་དུ་ཡེ་སངས་རྒྱས་པའི་ཆོས་ཉིད་བློ་འདས་ཀྱི་དོན་ལ་གནས་པས། མར་འཁོར་བའི་དུས་ཀྱི་ངན་སེམས་བག་ཆགས་དང་བཅས་པའི་ཆ་ད༵ག་པར་བྱེད། ཡར་སངས་རྒྱས་ཀྱི་དུས་ན་ཐུགས་ཀྱི་གསང་བ་བསམ་བརྗོད་ལས་འདས་ཀྱང་། རྣམ་པ་ཐམས་ཅད་མཁྱེན་པའི་ཡེ་ཤེས་བསམ་གྱིས་མི་ཁྱབ་པའི་འབྲས་བུ་གཞི་ལ་རྫོག༵ས། བར་ལམ་གྱི་དུས་ན་སྣང་སྟོང་གཉིས་སུ་མེད་པའི་ཆོས་ཉིད་ལ་གོམས་པས་བདེ་གསལ་མི་རྟོག་པ་སྟོང་པ་ཉིད་ཀྱི་རྫོགས་རིམ་བསྒོམ་པའི་སྨི༵ན་བྱེད་དུ་འགྲོའོ། འཕྲོ་འདུ་དམིགས་པའི་གཟེར་ནི། སྣོད་བཅུད་ཐམས་ཅད་ལྷ་སྔགས་ཡེ་ཤེས་ཀྱི་རང་བཞིན་ལས་མ་གཡོས་པའི་ངང་ནས། སྐུ་དང་སྔགས་ཕྲེང་ལས་འོད་ཟེར་སྣ་ཚོགས་དཔག་ཏུ་མེད་པ་འཕྲོས་པས་དོན་གཉིས་ཀྱི་བྱེད་པས་མཆོག་གི་དངོས་གྲུབ་དང་། གནས་སྐབས་འོད་ཟེར་དཀར་པོས་ཞི་བ་དང་། སེར་པོས་རྒྱས་པ་སོགས་ཕྲིན་ལས་བཞི་དང་། ཐུན་མོང་གི་གྲུབ་པ་བརྒྱད་སོགས་བསྒྲུབ་པས། མར་འཁོར་བའི་དུས་ན་སྒོམ་གསུམ་གྱིས་འཁོར་བའི་བྱ་བཞག་གི་རྣམ་པ་སྦྱོང་ཤིང་ད༵ག་པར་བྱེད། ཡར་སངས་རྒྱས་ཀྱི་དུས་ན་སྐུ་གསུང་ཐུགས་རྣམ་པ་ཐམས་ཅད་པའི་ཕྲིན་ལས་གཞི་ལ་རྫོ༵གས། བར་ལམ་དུས་སུ་དམིགས་བཅས་ཐུན་མོང་གི་ལམ་དང་དམིགས་མེད་ཡེ་ཤེས་ཀྱི་དགོངས་པ་སྣང་སྲིད་འོད་སྐུར་སྦྱང་བའི་སྨིན་བྱེད་དུ་འགྲོའོ། །དེ་ལས་དགོངས་པ་མི་འགྱུར་བའི་གཟེར་ནི་ལྟ་བ་ཡིན་པས་གཞི་ཏིང་ངེ་འཛིན་ལྷའི་གཟེར་ནི་སྒོམ་པ། སྙིང་པོ་སྔགས་ཀྱི་གཟེར་ནི་སྒོམ་པ་འང་ཡིན་ལ། ཤུགས་ཀྱིས་སྤྱོད་པའང་ཡིན་པས་ལམ། འཕྲོ་འདུ་དམིགས་པའི་གཟེར་ནི་སངས་རྒྱས་ཀྱི་ཕྲིན་ལས་ད་ལྟ་ནས་བྱེད་པའི་འབྲས་བུ་ཡིན་པས། ལྟ་སྒོམ་སྤྱོད་འབྲས་སམ་གཞི་ལམ་འབྲས་བུ་ཐ་མི་དད་པར་དབྱེར་མེད་ཟུང་འཇུག་གི་ལམ་ལ་སློབ་པས་འབྲས་བུའི་ཐེག་པ་ཞེས་བྱ་སྟེ། དེ་ཡང་གཞི་ལྟ་བ་ཡེ་ཤེས་ཀྱི་འཁོར་ལོས་འཁོར་འདས་མཉམ་ཉིད་དུ་རྟོགས་པའི་སྲིད་ཞི་གཉིས་ཀའི་སྲོག་ལ་དབང་བསྒྱུར་ཞིང་། ལམ་སྒོམ་པ་ལྷ་སྔགས་ཀྱི་འཁོར་ལོས་བསྐྱེད་རྫོགས་གཉིས་ཀའི་སྲོག་ལ་རང་དབང་ཞིང་དོན་གཉིས་ལྷུན་གྲུབ་ཀྱི་སྤྱོད་པའི་ཐབས་ཆེན་པོ་བསམ་གྱི་མི་ཁྱབ་པའི་སྲོག་ལ་རང་དབང་བ་སྟེ། རེ་རེའང་གནས་ཀྱི་ཁྱད་པར་དུ་མ་དང་ལྡན་ཅིང་། གསང་སྔགས་རྡོ་རྗེ་ཐེག་པའི་ལམ་གནད་ཐམས་ཅད་འདིར་འདུས་ལ། ཁྱད་པར་དུ་དགོངས་པ་མི་འགྱུར་བའི་གཟེར་གྱིས་ནི་གཞན་གསུམ་གྱི་སྲོག་ཀྱང་སྡོམ་པས་ན་ཤིན་ཏུ་གལ་ཆེ་བར་དཔལ་སྤྲུལ་གསུངས་སོ། །དེ་ལྟར་ཡང་རྒྱུད་ལས། སྲོག་སྡོམ་གཟེར་བཞིས་མ་ཐེབ་ན། ནམ་ཡང་དོན་མེད་ཡུག་པ་རྐྱངས། ཞེས་ཡུག་པ་ནི་རྐང་བའི་བརྡའ་ཆད་དེ་གཟེར་བཞིའི་གནད་དང་མ་ལྡན་ན། དོན་མེད་པར་རྐང་པས་འགྲོ་ཚེགས་ཆེ་ཡང་ངལ་བ་ཙམ་དུ་ཟད་པའི་དཔེར་གསུངས་སོ། །བདུན་པ་ནི་འོག་ནས་འཆད་དོ། །སྤྱིར་བསྙེན་བསྒྲུབ་ཡན་ལག་བཞི་པོ་འདི་ལ། སྒྲུབ་པའི་དུས་ཀྱི་བསྙེན་བསྒྲུབ་ཡན་ལག་བཞི། བསྐྱེད་རིམ་སྡུད་པའི་ཆིངས་སུ་བཤད་པའི་བསྙེན་བསྒྲུབ་ཡན་ལག་བཞི། རྫོགས་རིམ་སྡུད་པའི་ཆིངས་སུ་བཤད་པ་དང་། བསྐྱེད་རྫོགས་གཉིས་ག་སྡུད་པའི་ཆིངས་སུ་བཤད་པའི་བསྙེན་བསྒྲུབ་ཡན་ལག་བཞི་རྣམས་སུ་ཡོད་པ་ལས་འདི་སྒྲུབ་པའི་དུས་ཀྱི་བསྙེན་བསྒྲུབ་ཡན་ལག་བཞི་ཡིན་ཅིང་། དེ་ལ་ཡང་བསྙེན་པ་དང་བསྒྲུབ་པ་གཉིས་སུ་དབྱེ་བས་བསྙེན་པའི་ཡན་ལག་བཞི་ཡོད་པས་འདིར་བཤད་པའི་བསྙེན་བསྒྲུབ་ཡན་ལག་བཞི་པོ་ནི། སྒྲུབ་པའི་དུས་ཀྱི་བསྙེན་པའི་བསྙེན་པ། བསྙེན་པའི་ཉེ་བསྙེན། བསྙེན་པའི་བསྒྲུབ་པ། བསྙེན་པའི་སྒྲུབ་ཆེན་ཡིན་པར་ཤེས་པར་བྱའོ། །ཞེས་མཁན་རིན་པོ་ཆེ་པད་རྡོར་གསུངས་སོ། །ཡང་རྒྱུད་འགྲེལ་ལས། ལམ་དུས་ཀྱི་བསྙེན་བསྒྲུབ་ཡན་ལག་བཞི་ནི། ཀུན་ཏིང་ནི་བསྙེན་པ། ཕྱག་རྒྱ་གཅིག་སྤྲོས་ནི་ཉེ་བསྙེན། ཚོམ་བུ་ཚོགས་སྒྲུབ་ནི་སྒྲུབ་པ། དེ་འབྲས་རིག་འཛིན་བཞི་ཐོབ་མ་རག་པ་ནི་སྒྲུབ་ཆེན་ནོ། །སྦྱོར་བའི་དུས་ཀྱི་བཞི་ནི། ཡུམ་བཙལ་ཏེ་ཆས་སུ་བཅུག་པ་བསྙེན་པ། དེ་བྱིན་གྱིས་རློབས་པ་ཉེ་བསྙེན། རོལ་ནས་དབབ་བཟུང་གི་དགོངས་པ་ནི་སྒྲུབ་པ། ལྡོག་བཀྲམ་གྱི་དགོངས་པ་ནི་སྒྲུབ་ཆེན། སྒྲུབ་པའི་དུས་ཀྱི་བཞི་ནི། ཆ་རྐྱེན་རྣམས་ཚོགས་ནས་སྒྲུབ་པ་ལ་འཇུག་པར་མ་ཐོག་པ་ནི་བསྙེན་པ། ཞུགས་ནས་ཟླ་ཕྱེད་ཡན་ཆད་ཉེ་བསྙེན། ཐ་མའི་ཞག་གཅིག་མ་གཏོགས་པའི་ཕྱེད་མན་ཆད་ནི་སྒྲུབ་པ། ནུབ་ཐ་མ་ལ་དངོས་གྲུབ་ལེན་པ་སྒྲུབ་ཆེན་ནོ། །ཞེས་གསུངས་ཤིང། ཡང་སྒྲུབ་ཆེན་དུས། ཞག་དང་པོ་ལ་སྒྲུབ་རྫས་སོགས་སྟ་གོན་བྱས་ནས་ཆོ་ག་ཚར་གཅིག་གཏོང་བ་བསྙེན་པ། དེ་ནས་སྒྲུབ་པ་ཇི་ཙམ་བྱེད་པའི་ཞག་གྲངས་ཀྱི་ཕྱེད་ཚུན་ཆད་འོད་ཟེར་དཀར་པོའི་སྤྲོ་བསྡུས་སྡིག་སྒྲིབ་སྦྱོང་བའི་དམིགས་པ་གཙོ་བོར་བྱེད་པ་ཉེ་བསྙེན། དེ་ཕྱིན་ཆད་འོད་ཟེར་དམར་པོའི་སྤྲོ་བསྡུས་མཆོག་ཐུན་མོང་གི་དངོས་གྲུབ་རང་ལ་བསྡུ་བའི་དམིགས་པ་གཙོ་བོར་བྱེད་པ་སྒྲུབ་པ། ཞག་ཐ་མ་ལ་དངོས་གྲུབ་ལེན་པ་སྒྲུབ་ཆེན་ནོ། །ཆོ་གའི་ཐུན་གཅིག་དང་སྦྱར་ན། ཏིང་འཛིན་གསུམ་སྒོམ་པ་ཡན་ཆད་བསྙེན་པ། རང་ལྷ་གཙོ་བོར་བསྒོམ་པ་ཉེ་བསྙེན། འཁོར་གྱི་ལྷ་ཚོགས་ཚང་བར་བསྒོམ་པ་སྒྲུབ་པ། དབང་སྐུར་རྒྱས་གདབ་སྤྱན་འདྲེན་སོགས་ནས་བཟླས་པ་མཆོད་བསྟོད་སོགས་སྒྲུབ་པ་ཆེན་པོ་དེའོ། །ཡང་ན་གཙོ་བོ་ལ་སེམས་བཟུང་བ་བསྙེན་པ། གཙོ་འཁོར་ཡོངས་རྫོགས་ཉེ་བསྙེན། བཟླས་བརྗོད་བརྩོན་པ་སྒྲུབ་པ། འོད་ཟེར་སྤྲོ་བསྡུ་སྒྲུབ་ཆེན་ནོ། །ཞེས་ཀྱང་འབྱུང་ངོ་། །དེ་རྣམས་ལ་ཁྱད་པར་ཅུང་ཟད་རེ་སྣང་བས་འཕྲོས་དོན་དུ་བཀོད་པའོ། །མདོར་ན་ཡུལ་གཉན་པོ་ལ་འདྲིས་གདགས་པ་ལྟ་བུའི་དཔེས་མཚོན་ནས། བསྙེན་བྱའི་ཡེ་ཤེས་པ་དེ་ཉིད་རང་རྒྱུད་ལ་ཉེ་བར་བྱེད་པ་བསྙེན་པ། དེ་ལ་ཐུགས་ཡིད་འདྲེས་པར་བྱེད་པ་ཉེ་བསྙེན། ཡེ་ཤེས་རང་དབང་དུ་བྱེད་པ་སྒྲུབ་པ། གཞན་དོན་གཙོ་བོར་གྱུར་པའི་ཕྲིན་ལས་རྣམ་པ་བཞི་སྒྲུབ་པ་ནི་སྒྲུབ་ཆེན་ནོ། །ཞེས་འཇིགས་གླིང་གསུངས་པ་ལྟར་རོ། །གཞན་ཡང་ཚོགས་བསགས་སྐོང་ཆོག་སོགས་དང་འབྲེལ་སྐབས་དང་། སྒྲུབ་པ་དང་སྒྲུབ་ཆེན་གྱི་ཚེ་མདུན་བསྐྱེད་དགོས་ཤིང་། བདག་མདུན་ཐ་མི་དད་ནི་གདོད་ནས་རང་བཞིན་ཡོངས་གྲུབ་ཀྱི་དཀྱིལ་འཁོར་སྣོད་བཅུད་དག་པ་རབ་འབྱམས་རྒྱལ་བའི་ཞིང་ཁམས་བསམ་ཡས་ལྷུན་གྲུབ་དུ་གནས་པ་གསལ་འདེབས་པ་སྟེ། རིག་པ་རང་སྣང་གི་ངོ་བོར་བདག་མདུན་གཅིག་ཐ་དད་མེད་པར་རང་བཞིན་དབྱེར་མེད་དུ་བསྒོམ་པའོ། །གསར་ཕྱོགས་ན་ལྭ་བ་པའི་གཞུང་དང་། དཔལ་འཛིན་གྱི་དགྲ་ནག་དཀྱིལ་ཆོག་ཏུའང་དེ་ལྟར་ཡོད་པར་གསུངས་ཀྱང་གཞན་དོན་དབང་བསྐུར་གནས་འདྲེན་སོགས་ཀྱི་ཚེ་བུམ་བསྐྱེད་ཀྱང་དགོས་པས། དེ་ལྟར་བདག་མདུན་བུམ་གསུམ་ཆོ་ག་གཅིག་གི་འཇུག་པས་མཉམ་དུ་བསྐྱེད་པ་ནི་གསང་སྔགས་རྙིང་མའི་ལུགས་བླ་མེད་རྒྱུད་ཁོ་ནའི་ཁྱད་ཆོས་ཡིན་པར་ཡང་གསུངས་ཤིང་། དེ་ཡང་ཆོ་གའི་སྐབས་སུ་འཇུག་པ་གཅིག་པས་བདག་མདུན་ཐ་མི་དད་དུ་བསྐྱེད་ནས་བསྟོད་པའི་འཇུག་ཏུ་བྷྲུྃ་བི་ཤྭ་སོགས་ནས་ཛ༔ཞེས་བརྗོད་པས། ཕཊ་ཀྱིས་བདག་བསྐྱེད་དམ་ཚིག་གི་འཁོར་ལོ་ལས། མདུན་བསྐྱེད་ཡེ་ཤེས་ཀྱི་དཀྱིལ་འཁོར་ཕྱེ་ནས་མདུན་དུ་ཕར་སྤྲོས་པ། ཛ༔ས་མེ་རི་འདབ་འབྱར་གྱི་ཚུལ་དུ་བརྟན་པར་བྱ་བ་སྟེ། དཔེར་ན་བཞིན་གཅིག་གི་གཟུགས་བརྙན་མེ་ལོང་གཉིས་སུ་སོ་སོར་སྣང་བ་ལྟར་ཀུན་ཀྱང་ངོ་བོ་གཅིག་ལ་ཡེ་ཤེས་ཀྱི་རོལ་པ་མེ་ལོང་དང་གཟུགས་བརྙན་བཞིན་སྲུང་འཁོར་གཅིག་གི་ནང་འབྱུང་བ་རིམ་བརྩེགས་དང་བཅས་ཏེ་གཞལ་ཡས་ཁང་གཉིས་ཀའི་ཁོར་ཡུག་གི་མེ་རི་འདབ་འབྱར་གྱི་ཚུལ་དུ། བདག་མདུན་ཅིག་ཆར་གསལ་གདབ་ཅེས་སྨིན་གླིང་གཏེར་ཆེན་གསུངས་ཤིང་དེ་བཞིན་དུ་ཡེ་ཤེས་ཀྱི་རོལ་པ་གཅིག་ལས་བདག་མདུན་གཉིས་སུ་མ་ཟད་སྤྲུལ་པའི་དཀྱིལ་འཁོར་མང་པོའི་སྤྲོ་བསྡུ་གྱེར་བསྒོམ་གཅིག་གིས་བྱ་བར་བཤད་པ་སོགས་ཀྱི་རྒྱུ་མཚན་མང་དུ་འབྱུང་བའི་ཕྱིར་རོ། །ཞེས་རིག་འཛིན་རྗེས་ཀྱང་གསུངས་སོ། །དེ་ཚེ་བུམ་པ་ནི་མདུན་བསྐྱེད་ཀྱི་ཤར་ཁྱམས་ཀྱི་བར་སྣང་ལ་བསྐྱེད་ཅིང་། ལས་བུམ་ནི་འཕྲལ་དགོས་དུས་བདག་གི་མདུན་དུ་བསྐྱེད་དོ། །དེ་ཡང་རྣམ་བུམ་གཞལ་ཡས་ཁང་དུ་བསྐྱེད་པ་ཤས་ཆེ། མི་བསྐྱེད་པའི་ཕྱོགས་ལའང་བུམ་ནང་པདྨ་སོགས་ཀྱི་གདན་ལ་ཆོ་ག་གསུམ་གྱིས་བསྐྱེད། ལས་བུམ་ཕལ་ཆེར་དེ་ལྟར་དང་། ལས་བུམ་གྱི་ལྷ་མི་བཞུ་བའི་ལུགས་ཀྱང་ཡོད་དོ། །དེ་ཚེ་བགེགས་བཟློག་པའི་ཕྲིན་ལས་གསོལ་བའོ། །དམ་ཡེ་གཉིས་སུ་མེད་པ་ཞུ་བ་ནི་བླ་མེད་ལུགས་སོ། །ཡང་ན་ཆགས་མེད་ཀྱིས་ནི་བདག་བསྐྱེད་ཀྱི་ཁོར་ཡུག་གི་དུར་ཁྲོད་ཀྱི་ནང་དུ་མདུན་བསྐྱེད་བསྒོམ་ཞིང་། བདག་བསྐྱེད་ཀྱི་སྲུང་འཁོར་རྡོ་ར་དང་མེ་རི་ནི་གུར་ཕུབ་པ་ལྟ་བུའི་ནང་། མདུན་བསྐྱེད་ཀྱི་རྡོ་ར་མེ་རི་ནི་ལྕགས་རི་ལྟ་བུ་ཧད་པོར་བསྒོམ་གསུངས་སོ། །ཡང་བདག་མདུན་ཆོ་ག་ཐ་དད་པས་སོ་སོར་རིམ་གྱིས་བསྐྱེད་པ་ནི་གསར་ལུགས་སོ། །དེ་ལ་བདག་མདུན་ཐ་དད་དུ་བསྒྲུབ་ཚེ་བདག་བསྐྱེད་ཉེར་བསྡུའི་ན་ད་ཤིན་དུ་ཕྲ་བ་དེ་ཉིད་མཉམ་པར་བཞག་པའི་སྟོང་པ་དང་། མདུན་བསྐྱེད་ཀྱི་དེ་ཏིང་མཚམས་སྦྱར་བར་གསུངས། གཞན་ཡང་བདག་བསྐྱེད་ཁོ་ནའི་དུས་སྒྲུབ་རྟེན་གྱི་གཙོ་བོ་ནི། སྤྱིར་རང་གི་ཕུང་ཁམས་སྐྱེ་མཆེད་རྣམས་ཡིན་ཅིང་། ལྷ་བསྐྱེད་དུས་ཡང་གཟུགས་ཕུང་རང་གཞལ་ཡས་ཁང་ཡིན་པ་ལ། དེ་ལྟར་གསལ་འདེབས་པ་ཡིན་གྱི། བཟོ་དབྱིབས་བསྒྱུར་ནས་གཞལ་ཡས་ཁང་དུ་བསྒོམ་དགོས་པ་ལྟ་བུ་ཡང་མིན་པར་གསུངས་སོ། །དེ་ལྟར་བདག་མདུན་གང་གི་ཚེ་ཡང་བསྐྱེད་རིམ་དངོས་གཞིའི་སྐབས་རྣམས་སུ། དེ་བཞིན་ཉིད་ཏིང་ཉམས་ལེན་གྱི་ངང་ནས་ཀུན་སྣང་སྙིང་རྗེའི་འཕེན་པ་དང་གཉིས་པོ་མ་བྲལ་བར། བསྐྱེད་རིམ་ལྷའི་གསལ་སྣང་ཅི་ཐོན་དགོས་རྒྱུ་ལས་དེ་ཏིང་དང་། ཀུན་སྣང་སྔ་སོར་སྒོམ་ཙམ་བྱས་ནས་སྐྱུར་འཇོག་མི་ཆོག་སྟེ། དེ་ཏིང་དང་ལྷའི་གསལ་སྣང་མ་བྲལ་ཏེ། གསལ་སྟོང་ཟུང་འཇུག་གམ། ཟབ་གསལ་དབྱེར་མེད་དམ་སྐྱེད་རྫོགས་ཟུང་འཇུག་ཡིན། དེ་སྙིང་རྗེའི་འཕེན་བྱེད་དང་མ་བྲལ་བ་དེ་ཐེག་ཆེན་ལམ་གྱི་དངོས་གཞི། སྟོང་ཉིད་སྙིང་རྗེའི་སྙིང་པོ་ཅན་ཟེར་བ་དེ་ཡིན་པས། དེ་ཏིང་ཀུན་སྣང་གཉིས་པོ་འདི་ལས་གལ་ཆེ་བ་མེད་དེ། །སྐུ་གཉིས། ཚོགས་གཉིས། བདེན་གཉིས། ཐབས་ཤེས་རྣམས་ཟུང་དུ་འཇུག་པ་སྔགས་ཀྱི་མྱུར་ལམ་ཟབ་མོའི་ཁྱད་ཆོས་སུ་ཤེས་པར་བྱའོ། དེ་ལྟར་མ་ཤེས་པར་བསྐྱེད་རིམ་རྐྱང་པ་དངོས་མཚན་དུ་བཟུང་ནས། གསལ་སྣང་དང་ང་རྒྱལ་ཇི་ཙམ་བརྟན་ཀྱང་བྱང་ཆུབ་ཀྱི་ལམ་དུ་མི་འགྱུར་བའི་སྟེང་། འཁོར་བ་འཆིང་བའི་སྒྲིབ་པ་རྔམ་པོ་ཆེ་ཡིན་ཏེ། བྱང་སེམས་ཀྱིས་མ་ཟིན་པའི་ལྷ་བསྒོམ་པ་ལ་གདུག་འདྲེ་རྣམས་ཀྱང་བློ་སྦྱངས་པ་ཡོད་ཅིང་། ཞི་བ་རང་རྒྱུད་པར་བཟུང་ནས་བསྒོམ་པས་གཟུགས་ཁམས་ཀྱི་ལྷར་སྐྱེ་བ་དང་། ཁྲོ་བོ་རང་རྒྱུད་དུ་བསྒོམ་པ་རྒྱ་གར་ན་རྡོ་རྗེ་འཇིགས་བྱེད་ཀྱི་རྣལ་འབྱོར་པ་ཞིག་ལ། དབུ་དགུའི་རྣམ་པའི་ལྦ་བ་དགུ་བརྩེགས་དང་། མཆེ་བ་བྱུང་བ་སོགས་བཞིན་ལྷ་གང་བསྒོམ་གྱི་རྣམ་པ་ཅན་གྱི་འདྲེ་དང་གཤིན་རྗེར་སྐྱེ་བར་འཇམ་དཔལ་རྩ་རྒྱུད་དུ་གསུངས་ཤིང་ལྷ་ཁྲོ་ཆགས་ཀྱི་ཉམས་ཅན་བསྒོམ་པས་ཆགས་སྡང་ཆེར་འགྲོ་བས་ཡང་དག་གི་ལམ་དུ་མི་འགྱུར་བ་ལ་ངེས་ཤེས་འདྲོང་དགོས་སོ། དེས་ན་རབ་ལྟ་བ་གྱད་ཀྱི་ལྷ། རྟ་མགྲིན་ནག་པོའི་རྒྱུད་ལས། སེམས་ཉིད་སྐྱེ་མེད་སྟོང་གསལ་འདི། ཡེ་ནས་རང་བཞིན་ལྷ་ཡི་སྐུ། དམ་ཚིག་ཡེ་ཤེས་གཉིས་མེད་ལ། བསྐྱེད་རིམ་རྒྱས་གདབ་མི་འཚལ་ཏེ། དྲན་པ་ཙམ་གྱིས་རྫོགས་པ་ཉིད། །ལྟ་བ་གྱད་ཀྱི་ལྷ་ཞེས་བྱ། ཞེས་སོ། །ཞེས་རྡུལ་གཅིག་གི་སྟེང་ན་རྡུལ་སྙེད་ཀྱི་ལྷ་ཚོགས་ཡང་སྤྲུལ་སུམ་སྤྲུལ་སོགས་མཁའ་མཉམ་དུ་སྤྲོས་ཏེ་བསྐྱེད་པ་སྟེ་གསང་འདུས་རྩ་རྒྱུད་ལས། གྱད་ཀྱིས་ཆོད་པའི་ལྟ་བ་ཡིས། སྣང་སྲིད་དཔལ་ཆེན་སྐུ་རུ་བསྒོམ། ཞེས་དང་། འབྲིང་གཉེན་པོ་སྟོབས་ཀྱི་ལྷ། ཐ་མ་གོང་གནོན་ཡེ་ཤེས་ཀྱི་ལྷ་ཞེས་གསུངས་པའི་དོན་ལ་འབྱོར་བ་གལ་ཆེ་ཞིང་། དེ་བཞིན་དུ་ཕྲིན་ལས་ཐམས་ཅད་གསང་སྔགས་ལུང་གི་སྒོ་བཞི་དང་འབྲེལ་དགོས་ཏེ། དོན་དམ་གསལ་འདེབས་བརྗོད་པ་ཚིག་གི་སྒོ། ཐུགས་དམ་གནད་བསྐུལ་གསང་བ་སྔགས་ཀྱི་སྒོ། དམིགས་པ་རྩེ་གཅིག་ཏིང་འཛིན་ཡིད་ཀྱི་སྒོ། མཚོན་པ་བརྡར་བརྟགས་ཕྱག་རྒྱ་གར་གྱི་སྒོ། ཞེས་གསུངས་པ་ལྟར་ཡིན་པས། བསྐྱེད་རིམ་གསལ་འདེབས་ཀྱི་ཆོ་གའི་ཚིག་རྣམས་རིམ་པར་འདོན་སྐབས་སུ་གཞན་དུ་མི་གཡེངས་བར། དལ་བུའི་ཚིག་རེ་རེ་བཞིན་དམིགས་འདོན་ཡ་མ་བྲལ་བ་བྱ། སྐབས་སུ་ཡེངས་ཤོར་ན་ཡང་བསྐྱར་མགོ་ནས་ཕྱིར་ལོག་རྒྱབ། དེ་ལྟར་བྱས་ན་ཕྱིན་ཆད་ཡེངས་མི་འཆོར་བ་ལའང་ཕན་པར་གསུངས་སོ། །དེ་ལྟར་གསལ་དག་བརྟན་པའི་བསྐྱེད་རིམ་དེ་ཉིད་རྩེ་གཅིག་ཏུ་བསྒོམ་པས་སྐྱོ་བར་གྱུར་ཚེ་བཟླས་པ་ལ་འཇུག་པ་ཡིན་ཏེ། གསང་རྒྱུད་རིན་ཆེན་འབྲུག་སྒྲ་ལས། དད་པ་དམ་ཚིག་ལྡན་པ་ཡིས། །མཆོག་དོན་སྒྲུབ་འདོད་རྣལ་འབྱོར་པས། ཡེ་ཤེས་ལྷ་དང་དབྱེར་མེད་དུ། བསྲེ་བར་འདོད་ན་སྔགས་ལ་བརྩོན། ཞེས་གསུངས་པ་ལྟར།