གསུང་བཟླས་པའི་རྣལ་འབྱོར།

སྤྱི་དོན་གཉིས་པ་གསུང་བཟླས་པའི་རྣལ་འབྱོར་ལ། སྤྱིའི་གོ་བ་ནི་འདིས་སྦྱངས་བྱ་མ་དག་འཁྲུལ་བའི་ངག་ཚིག་གི་སྒྲ་དོན་དེར་འཛིན་གྱི་བག་ཆགས་དང་བཅས་པ་ཡིན་ལ། སྦྱོང་བྱེད་ངག་བཟླས་གཙོ་ཆེ་བའི་དབང་དུ་བྱས་ན། སྔགས་ཀྱི་སྒྲ་རྣམས་ཡང་དང་ཡང་དུ་བསྐྱར་ཞིང་བཟླས་པས། སྦྱངས་འབྲས་གསུང་རྡོ་རྗེའི་ཕྲིན་ལས་ཀྱིས་འགྲོ་དོན་མཛད་པའི་རྟེན་འབྲེལ་བསྒྲིགས་པའོ། །ཁྱད་པར་གྱི་དགོས་པ་ནི། དཔེར་ན་མིའི་མིང་ནས་བོས་པས་རང་དང་ཉེ་བར་འོང་བ་ཆོས་ཉིད་ཡིན་པ་བཞིན་དུ་ཡེ་ཤེས་པའི་ལྷ་རྣམས་འབོད་པའི་དོན་ཡང་ཡིན། དགོངས་འདུས་ལས། བྱ་བ་སྒྲུབ་འདོད་དེ་གྲོགས་བཙལ་བ་ལྟ་བུ་ནི་ལྷ་དང་། ཀྱེ་གྲོགས་ཆེན་མོ་ཞེས་པ་ལྟ་བུ་མིང་འབོད་པ་ནི་སྔགས་སོ། །ཞེས་དང་། རྡོ་རྗེ་གུར་ལས། སངས་རྒྱས་བྱང་ཆུབ་སེམས་དཔའ་དང་། མཁའ་འགྲོ་མ་དང་རང་བཙུན་མོ། མངོན་སུམ་དུ་ནི་བྱ་བའི་ཕྱིར། སྔགས་ཀྱིས་སྙན་གསན་དབབ་པ་ཡིན་ཞེས་སོ། །ངོ་བོ་ནི་སངས་རྒྱས་རྣམས་ཀྱི་གསུང་རྡོ་རྗེའི་ཡེ་ཤེས་ཀྱི་རིགས་སྔགས་དེ་དང་རྣམ་པ་མཚུངས་པ་ཐ་མལ་པའི་ཡིག་འབྲུའི་རྣམ་པར་བསྒོམ་ནས། ཡེ་ཤེས་ཀྱི་རིག་སྔགས་སུ་མོས་པས་ཡང་ཡང་བསྐྱར་ཟློས་བྱ་བ་ནི་ཛབ་སྟེ་བཟླས་པའི་ངོ་བོའོ། །དེ་ལྟར་ལྷ་ལ་གསལ་སྣང་ཐེབས་ཚེ། རང་ཉིད་དམ་ཚིག་སེམས་དཔའི་ཐུགས་ཙིཏྟ་རིན་པོ་ཆེ་འོད་ཀྱི་རང་བཞིན་མཆོང་གུར་ཕུབ་པ་ལྟ་བུ་དངས་གསལ་སྒྲིབ་གཡོག་དང་བྲལ་བའི་ནང་དུ་ཉི་ཟླའི་གདན་ལ་ཡེ་ཤེས་སེམས་དཔའི་ཐུགས་ཀར་ཕྱག་མཚན་གྱི་ཁོང་སེང་དུ། ཉི་ཟླ་རྐྱང་པའམ་བརྩེགས་མའི་གདན་སྲན་མ་བཀས་པ་ཙམ་གྱི་སྟེང་དུ། ཏིང་འཛིན་སེམས་དཔའི་རྩ་བའི་ཐུགས་སྲོག་ཧྲཱི༔ཧཱུྃ་སོགས་ལྷའི་ཁ་དོག་དང་མཚུངས་པ་སྤུས་བྲིས་པ་ཙམ་དུ་ཕྲ་བ། མར་མེ་ལྟར་གསལ་ཞིང་འཚེར་བ་ལངས་སྟབས་སུ་ལྷའི་ཞལ་ངོ་བསྟན་ཕྱོགས་ལྟར། ཡིག་ངོ་ལེབ་ཕྱོགས་མདུན་བསྟན་དུ་གསལ་གདབ་བོ། །དེ་ལ་དམ་ཚིག་སེམས་དཔའ་ནི་རགས་པ་གནས་སྐབས་པའི་ལུས་དང་ཆོས་མཐུན་ཞིང་། ཡེ་ཤེས་སེམས་དཔའ་ནི་ཕྲ་བ་གཉུག་མའི་ལུས་ཤིན་དུ་ཕྲ་བའི་རླུང་སེམས་ངོ་བོ་དབྱེར་མེད་དུ་གནས་པའི་རླུང་འོད་ཟེར་ལྔ་པ་དང་ཆོས་མཐུན། ཏིང་འཛིན་སེམས་དཔའ་ནི་ཤིན་ཏུ་ཕྲ་བའི་སེམས་དང་ཆོས་མཐུན་ཅིང་རང་འདྲའི་ཡེ་ཤེས་སེམས་དཔའ་ཞེས་པ་ནི་རིགས་ཀྱི་བདག་པོའི་རིགས་ཅན་དུ་འདྲ་བ་ཡིན་གྱི། སྐུ་མདོག་ཕྱག་མཚན་སོགས་དམ་ཚིག་པ་དང་འདྲ་བའི་དོན་མིན་པར་གསུངས་སོ། །སེམས་དཔའ་སུམ་བརྩེགས་ཀྱང་སྣོད་ལ་བཅུད་བཅུག་པ་ལྟ་བུའི་རྟོག་ངན་སྤོང་དགོས་པར་ཡང་གསུངས་ཤིང་། འགའ་ཞིག་ལས་སེམས་དཔའ་སུམ་བརྩེགས་ཡོད་མེད་སྣ་ཚོགས་སྣང་བས་ཆོ་ག་རང་གཞུང་གི་སྐབས་བཞིན་ཤེས་པར་བྱའོ། །དེ་ཡང་སྐུ་རྒྱུད་ལས། རང་ལས་བྱུང་ཞིང་རང་ཉིད་དང་། དམ་ཚིག་གཅིག་ཏུ་གནས་པའི་ཕྱིར། དམ་ཚིག་སེམས་དཔའ་ཞེས་བྱའོ། །ཞེས་པས་རང་གི་སྒོ་གསུམ་ལྷའི་སྐུ་གསུང་ཐུགས་སུ་བསྐྱེད་ཅིང་། དེ་ལས་མི་འདའ་བས་ན་དམ་ཚིག ལྷར་གསལ་ཞིང་ཐ་མལ་གྱི་ལོག་ལྟ་མེད་པས་ན་སེམས་དཔའ་ཞེས་བྱའོ། །ཡང་དེ་ལས། ཡེ་ནས་ཤེས་རིག་རྒྱལ་པོར་སྣང་། དེ་ཕྱིར་ཡེ་ཤེས་སེམས་དཔའ་འོ། །ཞེས་དང་། གསེར་ཕྲེང་ལས། ཡེ་ནས་གནས་པའི་དོན་གང་ཞིག །མ་ནོར་ཤེས་ཕྱིར་ཡེ་ཤེས་བརྗོད། །ཅེས་པས་། ཡེ་ནས་སྐུ་གསུམ་རང་ཆས་སུ་གནས་པའི་དོན་ཤེས་པས་ན་ཡེ་ཤེས་དང་གཉིས་འཛིན་གྱི་ལོག་ལྟ་མེད་པས་ན་སེམས་དཔའ་ཞེས་བྱ་ཞིང་། སེམས་མི་གཡོ་བར་རྩེ་གཅིག་ཏུ་གནས་པའི་ཐབས་སམ་རྟེན་ཡིན་པས་ན་ཏིང་འཛིན་དང་། བྱིང་རྨུགས་སོགས་སྐྱོན་གྱིས་བརྫི་མི་ནུས་པས་ན་སེམས་དཔའ་ཞེས་བྱའོ། །ཞེས་པདྨ་མ་ཏིས་གསུངས་སོ། །ཡང་ཆགས་མེད་ཀྱིས་ནི་ཐུགས་སྲོག་གི་ཡིག་ངོ་གདོང་མདུན་བསྟན་དུ་བཞེད་ཀྱང་རྗེ་བླ་མའི་དགོངས་པ་ནི་སྔ་མ་ལྟར་རོ། །ཐུགས་སྲོག་དེའི་མདུན་ནས་བརྩམ་སྟེ། བཟླ་བྱའི་སྔགས་ཕྲེང་གཡས་སུ་འཁོར་དགོས་པ་རྣམས་ནི་སྔགས་ངོ་ཕྱིར་བསྟན་དང་། ཕྱི་ནས་བཀླག་ཕྱོགས་ལྟར་ཡིག་འབྲུ་རྣམས་ལངས་སྟབས་སུ་གཡོན་དུ་བཀོད་པ་ཕྲེང་བ་ལྟར་འཁོར་བའི་མགོ་འདྲེན་ༀ་ལྟ་བུ་དང་། ཧྲཱི་ཧཱུྃ་སོགས་མཇུག་གི་སྔགས་འབྲུ་ཐུག་པ། དེ་ཡང་རིང་བའི་རིགས་ལ་མདུན་ནས་ཡིག་མགོ་བརྩམ་པའི་སྔགས་ངོ་ནང་དང་སྔགས་མཇུག་ཕྱི་རོལ་ཏུ་ཐད་ཀར་འགྲིགས་པའི་རིམ་པ་གཉིས་གསུམ་སྦྲུལ་འཁྱིལ་བ་ལྟ་བུར་བསྒོམ་ལ། བཟླ་བའི་དུས་གཡས་སུ་བཀླག་ཐབས་སུ་འཁོར་དགོས་པ་ཡིན། སྔགས་ཕྲེང་གཡོན་དུ་འཁོར་དགོས་པ་རྣམས་ནི། ཐུགས་སྲོག་གི་མདུན་ནས་སྔ་མ་ལྟར་ཡིག་འབྲུ་རྣམས་ལངས་སྟབས་སུ་སྔགས་ངོ་ནང་དུ་བལྟ་བ། ནང་ནས་བཀླག་ཕྱོགས་གཡས་སྐོར་དུ་བཀོད། སྔགས་རིང་བ་རྣམས་ནི་སྐོར་ལུགས་སྔ་མ་ལྟར་བྱ། བཟླ་བའི་དུས་གཡོན་འཁོར་དགོས་པ་ཡིན་ཞེས་ཟུང་འཇུག་སྙེ་མར་གསུངས། དེ་ཡང་ལྷ་ཡབ་ཀྱི་རིགས་རྣམས་ལ་གཡས་འཁོར་དང་། ཡུམ་རྣམས་ལ་གཡོན་འཁོར་ལྟ་བུ་ཤས་ཆེ་ཡང་ངེས་པ་མེད་པས་རང་གཞུང་གི་དགོངས་པ་དང་འབྱོར་བ་དགོས་སོ། །གཞན་ཡང་བསྲུང་བཟློག་གི་དམིགས་གནད་སོགས་ནི་སྐབས་ཐོབ་བཞིན་ཤེས་པར་བྱའོ། །དེ་ཡང་ཐུགས་སྲོག་ས་བོན་དང་སྔགས་ཕྲེང་རྣམས་ཅི་ཙམ་ཕྲ་བ་དེ་ཙམ་དུ་སེམས་ཟིན་པ་ལ་ཕན་པར་གསུངས་སོ། །དེ་ལྟར་འཛབ་དགོངས་གསལ་གདབ་པ་ལ། ཐོག་མར་འགོག་བཟླས། དེ་ནས་ཡིད་བཟླས་དང་། ངག་བཟླས་རྣམས་རིམ་བཞིན་བྱ་སྟེ་ཐུགས་སྲོག་སྔགས་ཕྲེང་གིས་བསྐོར་བ་ལ་ཤེས་པ་རྩེ་གཅིག་ཏུ་གཏད་ནས་སྲོག་རྩོལ་སྡོམ་པའི་སྦྱོར་བས་བར་རླུང་འཇམ་ཞིང་རན་པར་ཁམས་ལ་མི་གནོད་ཙམ་དུ་བཟུང་ལ། རླུང་ཕྱིར་འབྱུང་བ་ནི། ཐུགས་སྲོག་སྔགས་ཕྲེང་དང་བཅས་པ་ལས་འོད་ལྔའི་ཟེར་ཐག་སྣལ་མ་བརྐྱངས་པ་ལྟ་བུ་སྣ་བུག་གཉིས་ནས་ཕྱིར་ཐོན་ཏེ་སྣང་སྲིད་ཐམས་ཅད་དག་པའི་འཁོར་ལོར་སྦྱངས། ནང་དུ་རྔུབ་པ་དང་བརྟན་གཡོའི་སྣོད་བཅུད་ཀྱི་དངོས་པོ་ཐམས་ཅད་སྟེམ་གྱིས་ཞུ་ནས་འོད་ལྔའི་རྣམ་པར་སྣ་བུག་གཉིས་ནས་སླར་ཞུགས་ཏེ། ཐུགས་སྲོག་སྔགས་ཕྲེང་དང་བཅས་པ་ལ་ཐམས་ཅད་ཐིམ་པར་བསམ་ཏེ། ནང་དུ་གནས་པའི་ཚེ་བར་རླུང་བཟུང་ལ། །རིག་པ་སྔགས་ཕྲེང་དང་དབྱེར་མེད་དུ་བསྲེ་བ་ལ་བསླབ་པར་བྱ་བ་ནི་འགོག་བཟླས་སོ། །དེ་ནས་སྔགས་ཕྲེང་ལས་རང་སྒྲ་གྲགས་པའི་སྒྲ་གདངས་ལ་ཤེས་པ་གཏད་ནས་རྩ་སྔགས་ཆད་ལྷག་མ་སོང་བར་ཡིད་བཟླས་ཁོ་ན་བྱ། དེ་ནས་ངག་བཟླས་བྱ་བ་ནི། རྔམ་གློག་ལས། སྒྲ་ཆེན་མ་ཡིན་ཆུང་བར་མིན། མགྱོགས་པ་མ་ཡིན་བུལ་བར་མིན། དྲག་པོར་མ་ཡིན་ཞན་པར་མིན། ཡིག་འབྲུ་ཡན་ལག་ཉམས་པས་མིན། ཡེངས་བ་མ་ཡིན་སྨྲ་བཞིན་མིན། གླལ་སོགས་བར་དུ་ཆོད་པས་མིན། ཞེས་གསུངས་པ་ལྟར་གྱི་སྐྱོན་བཅུ་སྤངས་བར་བྱ་ལ། དེ་བཞིན་དུ་དགོངས་འདུས་ལས་ཀྱང་། སྔགས་ངག་ནས་བརྗོད་པའི་ཚེ། ཧ་ཅང་རིང་ན་དབུགས་ཀྱིས་མི་སྐྱོལ་ཞིང་སྐད་འགགས་པས་སྤངས། ཧ་ཅང་ཐུང་ན་དབུགས་ཚི་ཆད་དེ་ཚེ་ལ་གཟན་པའམ་ཁ་དོག་མི་གསལ་བས་སྤངས། དྲག་ན་ཁམས་ལ་གཟན་པའམ། རྩུབ་ན་མི་མ་ཡིན་ལ་ཕོག་ཐུག་དང་བརྒྱལ་བས་སྤངས། ཞན་ན་སྔགས་ལ་ངར་མི་ཐོན་ཅིང་ནུས་པ་མྱུར་དུ་མི་འབྱུང་བས་སྤངས། དལ་ན་གྲངས་ཉུང་བས་སྤངས། བྲེལ་ལ་སྒྲོས་མི་ཐོན་ཅིང་ཆད་ལྷག་འགྲོ་བས་སྐྱོན་དྲུག་སྤངས་ལ་བཟླ་བར་གསུངས་ཤིང་། ཡང་གསང་རྒྱུད་རིན་པོ་ཆེ་འབྲུག་སྒྲ་ལས། རི་སྒོག་གིས་ཞག་དགུ། ལྕེ་ཡིས་ཉེར་གཅིག སྒོག་གཡེར་ཟྭ་ཐུག་གིས་གསུམ། བྱིན་གྱིས་མ་བརླབ་པའི་ཤ་ཆང་གིས་ཞག་ལྔ་ཉམས་པ་དང་། རྫུན་དང་ཕྲ་མ་ལ་སོགས་པཿ ངག་གི་མི་དགེའི་ལས་རྣམས་ཀྱིསཿ སྔགས་ཀྱི་ནུས་པ་གཏན་བརླག་གམཿ མཐར་ཡང་ཡུན་རིང་འགྱང་བར་འགྱུརཿ ཕུས་གདབ་འཇིག་རྟེན་བྲེ་མོ་ཡིསཿ སྔགས་ཀྱི་ནུས་པ་ཉམས་པས་སྤོངཿ ཞེས་གསུངས་པས། སྤྱི་དང་བྱེ་བྲག་གི་སྐྱོན་དེ་རྣམས་སྤངས་ལ་གསལ་དག་སྙན་པའི་གདངས་དང་བཅས་པས་བཟླའོ། །དེ་ཚེ་ཐུགས་ཀའི་ས་བོན་སྔགས་ཀྱིས་བསྐོར་བ་ལ་ཡིད་གཏད་དེ་བཀླག་པའི་ཚུལ་གྱིས་བཟླ་བ་ནི། བཀོད་པའི་བཟླས་པའམ། ཟླ་བ་སྐར་ཕྲེང་ལྟ་བུའི་ཛབ་དགོངས་དེ་ཉིད་བསྙེན་པའི་ཡན་ལག་ཡིན་ནོ། །ཡང་འགའ་ཞིག་ཏུ་བཀོད་པའི་བཟླས་པའམ། གདན་ལས་འཕགས་ཏེ་རང་སྒྲ་དང་བཅས་བཀླག་པའི་ཚུལ་གྱིས་འཁོར་བ་ལ་སེམས་གཏད་དེ་བཟླ་བ་ནི། ཟླ་བ་སྐར་ཕྲེང་ལྟ་བུར་གསུངས་ཀྱང་རྒྱུད་དང་བླ་མའི་དགོངས་པ་ནི་སྔ་མ་ལྟར་རོ། །ཉེ་བར་བསྙེན་པ་འགལ་མེའི་འཁོར་ལོ་ལྟ་བུའི་ཛབ་ནི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་འཕྲོས་ཏེ། ཡིག་འབྲུ་རྣམས་ལངས་ཐབས་སུ་གཅིག་གི་ཞབས་སུ་གཅིག་གི་དབུ་ཚུད་པ། གཅིག་རྗེས་གཅིག་ནོན་ལུ་གུ་རྒྱུད་ཀྱི་ཚུལ་དུ་རེག་ལ་མ་འབྱར་ཞིང་བར་མ་ཆད་པའི་ཕྲེང་བ་འཕྲོས་ཏེ། སྔགས་ཀྱི་རང་སྒྲ་དང་བཅས། ཡེ་ཤེས་པ་དང་དམ་ཚིག་སེམས་དཔའི་ཞལ་ནས་རིམ་པར་ཐོན། ཡུམ་གྱི་ཞལ་དུ་ཞུགས་སྐུའི་ནང་བརྒྱུད། མཁའ་གསང་དང་ནོར་བུའི་ལམ་ནས་བརྒྱུད་དེ་བདེ་ཆེན་བྱང་སེམས་ཀྱི་ངོ་བོར་ཐུགས་སྲོག་ལ་ཐིམ་པས། མཆོག་ཐུན་གྱི་དངོས་གྲུབ་མ་ལུས་པ་ཐོབ་པར་བསམ་ཞིང་། སླར་ཡང་སྔ་མ་ལྟར་བར་མ་ཆད་དུ་འཁོར་བར་བསམ་ལ་བཟླའོ། །ཡང་སྔགས་ཕྲེང་རྣམས་ཕྱི་རོལ་ནས་རང་གི་ཞལ་དུ་ཞུགས་སྐུའི་དབྱིབས་བརྒྱུད་རྡོ་རྗེའི་ལམ་ནས་ཡུམ་གྱི་པདྨར་ཞུགས། དྷུ་ཏིར་བརྒྱུད་དེ་ཞལ་ནས་ཐོན་རང་གི་ཞལ་དུ་ཞུགས་པ་སྙིང་གའི་ས་བོན་ལ་ཐིམ། ཡང་དེ་ལས་སྔར་ལྟར་བྱུང་ལྷ་མོའི་པདྨར་ཞུགས་ཤིང་འཁོར་བ་སོགས་ནི་དོ་ལི་སྟེ་ཁྱོགས་ཀྱིས་བཟླས་པའོ། །ཐུན་རེར་དེ་གཉིས་སྤེལ་དགོས་པར་གསང་སྔགས་ལམ་རིམ་ལས་གསུངས། ཡང་ན་དམ་ཡེ་ཕྱེ་ལ་བདག་ཉིད་ཀྱི་ཞལ་ནས་ཐོན་མདུན་གྱི་ཡེ་ཤེས་སེམས་དཔའི་ཞལ་དུ་ཞུགས། དེའི་ལྟེ་བ་ནས་ཐོན་དེ་བདག་གི་ལྟེ་བར་ཞུགས་ཤིང་འཁོར་བར་བསམ་མོ། །ཡང་སྐབས་འགར་སྔགས་ཀྱི་འོད་ཟེར་འཁོར་བ་ལས་སྔགས་ཕྲེང་འཁོར་བར་མ་བཤད་པའང་ཡོད་དོ། །མདུན་བསྐྱེད་ཡོད་པ་རྣམས་ལ་ཛབ་དགོངས་འདི་བཞིན་སྦྱར་ཞིང་། བདག་མདུན་བར་དུ་འོད་ཟེར་སྤྲོ་བསྡུ་དགོས་སོ། །སྒྲུབ་པ་ལ་རྒྱལ་པོའི་ཕོ་ཉ་ལྟ་བུའི་ཛབ་དགོངས་ནི། ཐུགས་ཀའི་ས་བོན་ལས་འོད་ཟེར་འཕྲོས་ཏེ་རིམ་བཞིན་འཁོར་རྣམས་ཀྱི་ཐུགས་བརྒྱུད་བསྐུལ་བ་སོགས་དང་། ཡང་སྔགས་ཕྲེང་ལས་འོད་ཟེར་མཁའ་ཁྱབ་ཏུ་འཕྲོས་པས། སངས་རྒྱས་ཐམས་ཅད་ལ་ཐུགས་མཉེས་པའི་མཆོད་པ་ཕུལ་བས་ཚོགས་གཉིས་རྫོགས། དེ་དག་གི་བྱིན་རླབས་དང་དངོས་གྲུབ་ཐམས་ཅད་འོད་ཟེར་གྱི་ཚུལ་དུ་བྱུང་བ་བདག་ལ་ཐིམ་པས་དབང་བཞི་ཐོབ། སྒྲིབ་བཞི་དག སྐུ་བཞི་མངོན་དུ་བྱས་པར་བསམ་པ་ནི་བདག་དོན་བྱིན་རླབས་བསྡུ་བའི་བཟླས་པའོ། །ཡང་འོད་ཟེར་འཕྲོས་པས་མཁའ་ཁྱབ་ཀྱི་འགྲོ་བ་རིགས་དྲུག་གི་སེམས་ཅན་ཐམས་ཅད་ལ་ཕོག་པས་ལས་ཉོན་སྡུག་བསྔལ་བག་ཆགས་ཐམས་ཅད་སྦྱངས་ནས། སྒོ་གསུམ་རྡོ་རྗེ་གསུམ་གྱི་ངོ་བོར་སངས་རྒྱས་པར་བསམ་པ་ནི་གཞན་དོན་ཕྲིན་ལས་ཀྱི་བཟླས་པའོ། །ཡང་འོད་ཟེར་སྤྲོ་བ་དང་མཉམ་དུ་ལྷ་སྐུ་དག་སྤྲོ་ཞིང་འཇུག་པའི་རླུང་གིས་ཚུར་སྡུད་ཚེ་སྙིང་གའི་ས་བོན་ལ་ཐིམ་པ་ཡང་ཡོད་ཅིང་། འདི་ལ་ཁྲོ་བོའི་བཟླས་པར་ཡང་བཤད་དེ། ཕཊ་ཀྱིས་སྤྲོས་པས་སྟོང་གསུམ་སྐུ་ཡིས་གང་། ཞེས་གསུངས་པ་ལྟར་རོ། །སྒྲུབ་ཆེན་བུང་བ་ཚང་ཞིག་ལྟ་བུའི་ཛབ་ནི། ལྷ་དང་སྔགས་ཕྲེང་ལས་འོད་ཟེར་གྲངས་མེད་པ་འཕྲོས་པས། འགྲོ་དྲུག་གི་སྒྲིབ་པ་སྦྱངས་ཤིང་དག་ནས་སྣོད་བཅུད་ཐམས་ཅད་ལྷ་དང་གཞལ་ཡས་ཁང་གི་རང་བཞིན་ཡི་དམ་ལྷའི་དཀྱིལ་འཁོར་དུ་གྱུར། སྒྲ་གྲགས་ཐམས་ཅད་སྔགས་ཀྱི་རང་སྒྲ་བུང་བ་ཚང་ཞིག་པ་ལྟར་ཏི་རི་རི་སྒྲོགས་ཤིང་། སེམས་ཀྱི་དྲན་རྟོག་ཐམས་ཅད་བདེ་གསལ་མི་རྟོག་པའི་ཡེ་ཤེས་ཆོས་སྐུའི་རོལ་བ་འཛིན་མེད་ངང་ནས་བཟླ་བ་ནི། བདག་གཞན་གཉིས་མེད་ཀྱི་བཟླས་པའོ། །ཡང་འོད་ཟེར་སྤྲོ་བསྡུའི་དམིགས་པ་སྤྱིར་བཏང་གི་ཚེ། ཐུགས་ཀའི་སྔགས་ཕྲེང་ལས་འོད་ཟེར་བྱུང་བ་གཙུག་ཏོར་དང་། མཛོད་སྤུ་དང་ལྗགས་དང་ཐུགས་ཀའི་དཔལ་བེའུ་དང་། བ་སྤུའི་ཁུང་བུ་སོགས་ནས་ཐོན་ཏེ། སྟོང་གསུམ་འཇིག་རྟེན་གྱི་ཁམས་འདིས་མཚོན་པའི་ཕྱོགས་བཅུའི་ཞིང་ཁམས་རྣམས་སུ་ཁྱབ་པར་སྤྲོས་པས། འོད་ཟེར་གྱི་སྣེ་ལས་མཆོད་པའི་སྤྲིན་ཕུང་དང་བསྟོད་པའི་གླུ་དབྱངས། མེ་ཏོག་དང་སྤོས་ཆུའི་ཆར་ཆེན་པོ་བབས་པས་བྱང་ཆུབ་སེམས་དཔའ་ཁྱེའུ་དང་བུ་མོའི་གཟུགས་ཅན་བསམ་གྱི་མི་ཁྱབ་པ་བྱུང་ནས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མཆོད་ཅིང་བསྟོད་ནས། འགྲོ་བའི་དོན་དུ་ཐུགས་རྒྱུད་བསྐུལ་བས། ཐམས་ཅད་ཀྱང་ཡི་དམ་གྱི་སྐུ་ཆེ་ཆུང་དང་རྣམ་འགྱུར་མ་ངེས་པ་སྣ་ཚོགས་པ། གང་ལ་གང་འདུལ་གྱི་རོལ་པར་བཞེངས་ནས། ཐམས་ཅད་ཀྱི་སྐུའི་ལྟེ་བ་དང་། གསང་གནས། སྟ་ཟུར་གཉིས། པུས་མོའི་སླ་ང་། ཞབས་ཀྱི་མཐིལ་འཁོར་ལོ་རྩིབས་སྟོང་དང་ལྡན་པ་སོགས་ལས་སྐུ་དང་འོད་ཟེར་སྔགས་ཀྱི་རང་སྒྲས་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ་ཁམས་གསུམ་འགྲོ་བ་རིག་དྲུག་གི་སེམས་ཅན་ཐམས་ཅད་ཀྱི་ལས་ཉོན་འཁྲུལ་སྣང་བག་ཆགས་དང་བཅས་པ་བ་མོ་ལ་ཉི་ཟེར་ཕོག་པ་ལྟར་སྦྱངས་ནས། ཐམས་ཅད་ཡི་དམ་གྱི་སྐུར་གྱུར་ཏེ་སྔགས་ཀྱི་རང་སྒྲ་བུང་བ་ཚང་ཞིག་པ་བཞིན་སྒྲ་ཏི་རི་རི་སྒྲོགས་པར་བསམ། ཡང་འོད་ཟེར་རྣམས་ཚུར་འདུ་བ་དང་ལྷན་ཅིག་རྒྱལ་བ་སྲས་དང་བཅས་པའི་མཁྱེན་བརྩེ་ནུས་པའི་ཡོན་ཏན་དང་། སྣོད་བཅུད་དག་པའི་འཁོར་ལོ་གསལ་བ་ཐམས་ཅད་སྐུ་དང་། ཡིག་འབྲུ། ཕྱག་མཚན་འོད་ཟེར་གྱི་རྣམ་པར་འདུས་ཏེ་རྩ་བའི་དཀྱིལ་འཁོར་དང་གཙོ་བོའི་བ་སྤུའི་བུ་ག་ནས་ཞུགས་ཏེ་ཐུགས་སྲོག་ལ་ཐིམ་པར་བསམ་ཞིང་འཁོར་འདས་བདག་གཞན་དུ་འཛིན་པའི་རྟོག་པ་ཐམས་ཅད་རིག་པའི་ཡེ་ཤེས་ཀྱི་ངང་དུ་རོ་མཉམ་དབྱེར་མེད་དུ་བསྲེ་ཞིང་ལྷ་དང་སྣང་བ་ཆོས་ཉིད་གསུམ་གཅིག་དུ་འདྲེས་པའི་གནད་ལ་གོམས་པར་བྱའོ། །ཞེས་མཁན་པད་རྡོར་གསུངས་པ་ལྟར་རོ། །གཞན་ཡང་ལས་བཞི་སོ་སོའི་སྐབས་ཀྱི་དམིགས་པའི་བྱེ་བྲག་ནི་རང་གཞུང་ལྟར་རོ། །མདོར་ན་སྐུ་ཕྱག་རྒྱ་གསལ་བའི་ཏིང་ངེ་འཛིན། གསུང་ཆོས་རྒྱ་གསང་སྔགས་དག་པར་བཟླ་བ། ཐུགས་དམ་རྒྱ་ཐམས་ཅད་སྐྱེ་མེད་དུ་རྟོགས་པ་གསུམ་དང་ལྡན་པར་བྱའོ། །དེ་ལྟ་ཛབ་དགོངས་བཞི་པོ་ཆོ་ག་གཅིག་ལ་སྦྱར་དགོས་པའི་ངེས་པ་མེད་ཀྱང་གཙོ་ཆེར་རང་གཞུང་གི་བཟླས་དམིགས་སྐབས་ཀྱི་དངོས་བསྟན་གང་ཡིན་པ་དེ་ཉིད་སྦྱར་བས་ཆོག་གོ། གང་ལྟར་ཡང་སྔགས་བཟླ་བའི་ཚེ་སྔགས་འབྲུ་རྣམས་ཀྱང་རང་སྒྲ་དི་རི་རི་སྒྲོགས་པ་དང་། ལྷ་ཚོགས་རྣམས་ཀྱང་ཞལ་ནས་སྔགས་ཀྱི་སྒྲ་འུར་དིར་གསུངས་ཤིང་སྣོད་བཅུད་སྐྱེ་འགྲོ་རྩི་ཤིང་ལ་སོགས་ཐམས་ཅད་ཀྱང་ལྷའི་རང་བཞིན་དུ་གྱུར་ནས་སྔགས་ཀྱི་སྒྲ་འུར་དིར་རེ་སྒྲོགས་པར་བསམ་པ་ཕན་ཡོན་དང་ནུས་པ་ཆེ་བ་ཡིན་ཅེས་དཔལ་སྤྲུལ་གསུངས་སོ། །ལས་དང་པོའི་རིགས་ཐོག་མར་སྔགས་ཕྲེང་ལ་སེམས་གཏད་ནས་བཟླ། རང་ལྷ་ཡིན་པའི་ང་རྒྱལ་བྱ། སྔགས་ཕྲེང་སྐོར་རེའི་མཚམས་སུ་ལྷ་གསལ་འདེབས་སྐྱོར། དེ་ལ་གོམས་ནས་རིམ་པས་འོད་ཟེར་སྤྲོ་བསྡུ་སོགས་ལ་སློབ་བོ། །དེ་ལྟར་བསྙེན་པ་ཐེམ་ནས་བསྒྲུབ་པའི་དམིགས་བཟླས་རྣམས་བྱའོ། དེ་ཡང་ཡང་དག་ཐིག་ལེ་གཅིག་པའི་མན་ངག་ལས། ཐུན་གཅིག་ལྷ་ལ་སེམས་གཏད་སྒོམཿ ཐུན་གཅིག་གསང་སྔགས་བཟླས་པ་བྱ༔ ཐུན་གཅིག་རླུང་དང་འགྲོ་འོང་བསྟུན༔ ཐུན་གཅིག་མངོན་སུམ་གནད་ལ་དབབ༔ མ་བཅོས་རིག་པ་ཀུན་ཏུ་བཟང༔ ཞེས་གསུངས་སོ། །ཨོ་རྒྱན་ཆེན་པོས། མ་ཡེངས་ཏིང་འཛིན་ལྡན་པས་བཟླཿ གཞན་དུ་ཡེངས་པར་གྱུར་པས་ནིཿ བསྐལ་བར་བཟླས་ཀྱང་འབྲས་མི་འབྱིནཿ ཅེས་དང་། གསུང་རྒྱུད་ལས། གཉིད་རྨུགས་འདྲེས་པས་བཟླས་པ་ནིཿ བགེགས་ཀྱི་བར་ཆད་འཇུག་པའི་རྒྱུཿ ལོག་པའི་བསམ་པས་བཟླས་པ་ནིཿ བྱང་ཆུབ་ལམ་དུ་འགྲོ་མི་སྲིདཿ ཅེས་དང། པད་སྡོང་བརྩེགས་པའི་རྒྱུད་ལས། ཏིང་འཛིན་སྔགས་དང་བཟླས་བརྗོད་གསུམཿ གསུམ་མདངས་གཅིག་གིས་བསྐྱེད་པའི་ཕྱིརཿ གསལ་དག་བརྗོད་པ་གཙང་བ་གཅེསཿ དེ་འབྲས་ཅི་འདོད་དངོས་གྲུབ་འབྱུང་། ཞེས་སོགས་གསུངས་པ་ལྟར་ལྷ་བསྒོམ་པ་དང་སྔགས་བཟླ་བ་གང་གི་སྐབས་སུ་དྲན་ཤེས་དང་མ་བྲལ་བ་གལ་ཆེ་སྟེ། དགོངས་འདུས་ལས། སྤྱོད་ལམ་ལེགས་ལེགས་ཉེས་སྤྱོད་པསཿ ཕུབ་མ་ཞབས་སུ་ཆུ་བཅུས་བཞིནཿ རང་འཁྲུལ་མ་ཚོར་ཉེན་ཡོད་པསཿ སྐབས་སྐབས་དབང་པོ་ནང་དུ་གཏདཿ ལེགས་ཉེས་གཞིག་འདྲལ་ལམ་ལ་བལྟཿ ཐུན་ཆུང་གྲངས་མང་ཕྱི་ནང་བསྟུནཿ ཡང་དག་གནས་ལུགས་ངང་ལ་བཞགཿ ཅེས་གསུངས་པ་ལྟར་རོ། །བཟླ་ཚུལ་གཞན་ཡང་ལམ་རིམ་ལསཿ སྐྱོན་བཅུ་སྤངས་ལ་རྣམ་གསུམ་གྱིསཿ བཟླས་པ་གྲངས་བཞིན་རྫོགས་པར་བྱཿ ཞེས་པས། སྐྱོན་བཅུ་ནི་གོང་དུ་སྨོས་པ་ལྟར་རོ། །རྣམ་པ་གསུམ་ནི་གསལ་བ་གསུམ་དང་ཕྱི་ནང་གསང་གསུམ་དང་། ཕྲ་མོ་གསུམ་གྱི་བཟླ་ལུགས་སོ། །དེ་ལ་གསལ་བ་གསུམ་གྱི་བཟླ་ཚུལ་ནི་གང་ལ་སྤྲོ་བསྡུའི་གནས་བདག། གང་ལ་སྤྲོ་བའི་ཡུལ་མདུན། གང་སྤྲོ་བར་གྱི་འོད་ཟེར་འཕྲོ་འདུ་གསལ་བའོ། །དེ་ཡང་ལམ་རིམ་ལས། ཡེ་ཤེས་མདུན་དུ་ལྷག་པ་ལ། བཟླས་པ་གསལ་བ་གསུམ་གྱིས་བྱ། ཕཊ་ཛཿས་མདུན་གྱི་ནམ་མཁར་ཡེ་ཤེས་པ་རྟེན་དང་བརྟེན་པར་བཅས་པ་ཕྱེ་ལ། བདག་དམ་ཚིག་སེམས་དཔའི་ཐུགས་ཀ་ནས་འོད་ཟེར་ཕར་སྤྲོ་བ་དང་། ཚུར་སྡུད་པའི་འཕྲོ་འདུ་འགལ་མེའི་འཁོར་ལོ་ལྟ་བུ་དང་སྔགས་ཀྱི་རང་སྒྲ་འབྲུག་སྟོང་ལྡིར་བ་ཙམ་དུ་སེམས་ལ་གྲགས་སྟོང་དབྱེར་མེད་ཀྱི་ངང་ནས་བཟླས་པ་བྱའོ། །ཕྱི་ནང་གསང་གསུམ་གྱིས་བཟླ་བ་ནི། ཕྱི་ལྟར་ན་དམ་ཡེ་ཕྱེ་ནས་སྤྲོ་བསྡུ་ཞལ་ནས་ཞལ་དུ་ཞུགས། གསང་བའི་རྡོ་རྗེ་ནས་རྡོ་རྗེར་འཁོར་བའི་ཚུལ་གྱིས་བཟླ་འམ། ཡང་ན་འོད་ཟེར་ཕར་འཕྲོས་པས་སྒྲིབ་པ་སྦྱངས་བར་བསྐུལ་ཞིང་། ཚུར་འདུས་པས་སྒྲིབ་པ་བྱང་ནས་དངོས་གྲུབ་ཀྱི་སྣོད་ཏུ་བྱའོ། །ནང་ལྟར་ན་ཡེ་ཤེས་སེམས་དཔའ་འབྱེད་དམ་མི་འབྱེད་ཀྱང་རུང་སྟེ། འོད་ཟེར་ཕར་འཕྲོས་པས་དངོས་གྲུབ་བསྐུལ་ནས་ཚུར་འདུས་པས་དངོས་གྲུབ་ཐོབ་པར་བསམ་པའོ། །གསང་བ་ལྟར་ན། ཕར་མི་སྤྲོ་བར་ཚུར་དངོས་གྲུབ་སྡུད་པ་ཁོ་ནའམ། ཡང་ན་ཡབ་ཀྱི་ཞལ་ནས་ཡུམ་གྱི་ཞལ་དུ་ཞུགས། མཁའ་གསང་ནས་ཚུར་འཁོར་བ་ལ་དམིགས་པའོ། །ཕྲ་མོ་གསུམ་གྱིས་བཟླ་ཚུལ་ནི་སྤྲོ་བསྡུའི་ཚེ་ཡིག་འབྲུ་དང་ཕྱག་མཚན་སྐུ་ཕྲ་མོའི་འཕྲོ་འདུའམ། རྡོ་རྗེའི་བཟླས་པ་བྱེད་པའོ། །གཞན་ཡང་ངག་གི་བཟླས་པ། གཟུགས་ཀྱི་བཟླས་པས། །རྣལ་འབྱོར་གྱི་བཟླས་པ། རྡོ་རྗེའི་བཟླས་པ་དང་བཞི་ལས། དང་པོ་ནི་སྤྲོ་བསྡུའམ། དམ་ཚིག་གི་དང་། ཁྱོགས་ཀྱི་དང་། ཁྲོ་བོའི་བཟླས་པ་སྟེ་སྔར་སྨོས་པའི་འགལ་མེའི་འཁོར་ལོ་སོགས། ངག་བཟླས་ཀྱི་ཛབ་དགོངས་རྣམས་སོ། །གཟུགས་ཀྱི་བཟླས་པ་ནི་ལྷའི་རྣམ་པ་དྲན་པའོ། །རྣལ་འབྱོར་གྱི་བཟླས་པ་ནི། དེ་ཁོ་ན་ཉིད་ཙམ་ལ་སེམས་པའོ། །རྡོ་རྗེའི་བཟླས་པ་ནི་བཞི་སྟེ། དགོངས་པ་ལུང་སྟོན་ལས། བརྗོད་དང་དམིགས་པར་བཅས་པ་དང་། བརྡར་གྱུར་དང་ནི་དོན་དམ་མོ། །ཞེས་འབྲུ་གསུམ་ངག་ཏུ་བཟླ་བ་བརྗོད་བཅས་རྡོར་བཟླས། ཡི་གེ་གསུམ་གྱི་དབྱིབས་དང་ཁ་དོག་གི་རྣམ་པར་བསྒོམ་པ་དམིགས་པ་རྡོར་བཟླས། རླུང་འབྱུང་འཇུག་གནས་གསུམ་འབྲུ་གསུམ་གྱི་གདངས་སུ་མོས་པས་རླུང་སྔགས་དབྱེར་མེད་དུ་ཤེས་ནས་བཟླ་བ་བརྡར་གྱུར་རྡོར་བཟླས། རླུང་གི་འགྲོ་འོང་གནས་གསུམ་དང་སྒོ་གསུམ་ཕྱག་རྒྱ་ཆེན་པོ་དབྱེར་མེད་དུ་ཤེས་པས་མིང་ཚིག་བརྗོད་པ་ཐམས་ཅད་སྒྱུ་མ་ལྟ་བུར་རྟོགས་པ་དོན་དམ་རྡོ་རྗེའི་བཟླས་པའོ། །སྐབས་འདིར་སྔགས་ཀྱི་བགྲང་ཕྲེང་ཀྱང་། སློབ་དཔོན་ཆེན་པོས། རྒྱུ་ནི་རབ་ལ་རིན་པོ་ཆེཿ འབྲིང་པོ་ཤིང་གི་འབྲས་བུ་སྟེཿ ཐ་མ་ཤིང་དང་ས་རྡོ་དངཿ སྨན་གྱི་ལྡེ་གུའི་ཕྲེང་བའོ། །ཞེས་སོགས་དང་། རྒྱུ་དང་ཁ་དོག་གི་དབྱེ་བས་ལས་བཞི་སོ་སོ་ལ་ཤེས་པའི་བྱེ་བྲག་ཀྱང་གསུངས་ཤིང་། ཁྱད་པར་དུ། བོ་དྷི་ཙི་ནི་ཀུན་ལ་ཤིས། ཞེས་དང་། གྲངས་འགྱུར་ཁྱད་ཀྱང་། བོ་དྷི་ཙི་ནི་གྲངས་མེད་དོ། །ཞེས་གསུངས་ཤིང་། ཞི་ཁྲོ་གང་ལའང་ཤིས་པ་ཉིད་དེ་མཆོག་ཏུ་བསྔགས་སོ། །བཅང་དུ་མི་རུང་བ་ནི་མཚམས་མེད་ཀྱི་ལས་བྱས་པ། །བཤན་པ། དམ་ཉམས། དམེ་བོ། ཡུག་ས། རྐུན་མ་སོགས་ཀྱི་ལག་ནས་བྱུང་བ་དང་། གཞན་ལ་འཕྲོག་པ་དང་། ལྷ་ལ་གཞན་གྱིས་ཕུལ་བ་དང་། ལྷའི་རྒྱན་ནས་བཀྲོལ་བ་དང་། གྲངས་མ་འགྲིགས་པ་དང་། མེས་ཚིག་པ། དུད་འགྲོས་འགོང་པ། བྲ་བྱིས་ཟོས་པ་སོགས་ཀྱིས་སྔགས་ལ་དམ་སེལ་འཇུག་པར་གསུངས་པས་སྤང་བར་བྱ་ཞིང་། རྒྱུར་རུང་བ་དེ་ཉིད་ཆུས་བཀྲུ་ཞིང་། བ་བྱུང་དང་དྲི་བཟང་གིས་བྱུག་པར་འཇམ་དཔལ་རྩ་རྒྱུད་ལས་གསུངས་ཤིང་། རང་ཤར་ལས། ཕྲེང་ལུང་གསུམ་མམ་དགུ་སྒྲིལ་བྱ། སྐུ་གསུམ་རིགས་ལྔ་ཐེག་དགུར་བརྗོད། མདོ་འཛིན་སུམ་བརྩེགས་སྐུ་གསུམ་མོ། །ཞེས་པ་ལྟར་ཕྲེང་ཐག་ཀྱང་ལས་བཞི་དང་མཐུན་པའི་སྲད་བུ་དང་དྲག་པོ་ལ་རྒྱུ་མ་སྒྲིལ་བ་དང་། རྒྱུས་པ་སོགས་ཀྱང་གསུངས་ཤིང་། དེ་ཡང་དགོངས་འདུས་ལས། ཀུན་ཀྱང་ཕྲ་སྦོམ་ཕྲེང་བ་ཡིཿ མིག་དང་བསྟུན་ལ་རན་པར་བྱཿ ཡངས་པ་མ་ཡིན་དོག་པ་མིནཿ རིང་བ་མ་ཡིན་ཐུང་བ་མིནཿ ཧ་ཅང་དོག་ན་ལས་མི་འགྲུབཿ ཡངས་ན་གསེབ་ཚང་བར་ཆད་འཇུགཿ རིང་ན་ལྷ་འགྱང་བསྒྲུབ་པ་གཡེལཿ ཧ་ཅང་ཐུང་ན་ཚེ་ལ་གཟནཿ མཐུད་མ་ཅན་དང་མདུད་པ་ཅནཿ ཕྲ་སྦོམ་མ་སྙོམས་གོད་ཁ་འབྱུངཿ དེ་སོགས་རྣམ་དབྱེ་ཤེས་པར་བྱཿ ཞེས་དང་། གལ་སྟེ་ཐག་པ་ཆད་གྱུར་ནཿ ཞག་བར་མ་ཆོད་མྱུར་དུ་བསབཿ ཅེས་སོ། སྲད་བུར་ཇི་ལྟར་བརྒྱུད་ཚུལ་ནི། སམ་བྷུ་ཊི་ལས། ཨ་ལི་ཀ་ལི་ས་བོན་ཉིདཿ ཧཱུྃ་གི་སྲད་བུས་བརྒྱུ་བར་བྱཿ ཞེས་པས། ཕྲེང་ཐག་ཡི་དམ་གཙོ་བོ་ལ་ཕྲེང་བ་འཁོར་གྱི་ལྷ་ཚོགས་ཀྱིས་བསྐོར་བར་བསམ་ཞིང་ཧཱུྃ་གི་གླུ་ལེན་པ་དང་མཉམ་དུ་རྒྱུ་བར་གསུངས་ཤིང་། དགོངས་འདུས་ལས། སྣ་ཚོགས་ལས་ཀྱི་ཕྲེང་བ་ལཿ མདོ་འཛིན་སྐུ་གསུང་ཐུགས་ཀྱི་རྒྱཿ ཞེས་པས། སྐུ་གསུང་ཐུགས་རྡོ་རྗེ་མཚོན་བྱེད། སྟེང་མ་སྔོན་པོ། བར་མ་དམར་པོ། འོག་མ་དཀར་པོ་བྱ་བར་གསུངས་སོ། །དེ་ལྟ་བུའི་ཕྲེང་བ་མཚན་ཉིད་དང་ལྡན་པ་དེ་རབ་གནས་བྱ་བར་གསུངས་པས་དེའི་ཚུལ་ནི། དགོངས་འདུས་རྣམ་བཤད་ལས། ལག་གཡོན་པའི་ནང་དུ་ཕྲེང་བ་སྦྲུལ་འཁྱིལ་བ་ལྟར་བསྐྱིལ་བའི་དབུས་སུ། མདོ་འཛིན་ཙོག་པུར་ཡོད་པ་བྱས་ལ་འདི་ཉིད་ལས་བཤད་པ་ལྟར་ཐོག་མར་ལག་པ་བྱིན་རླབས་བྱ་སྟེ་ངག་ཏུ། ལག་པ་གཡས་པའི་མཐིལ་དུ་ཉི་མ་ལ་ཧཱུྃ་གཡོན་པའི་མཐིལ་དུ་ཟླ་བ་ལ་ཨཿས་མཚན་པར་གྱུར། ཅེས་བརྗོད་ཅིང་བསམ། དེ་ནས་ལྷའི་ང་རྒྱལ་དང་ལྡན་པས། ཨོཾ་སྭ་བྷ་ཝ་སོགས་ཀྱིས་ཕྲེང་བ་ཐ་མལ་དུ་འཛིན་པའི་རྟོག་པ་སྦྱངས། སྟོང་པའི་ངང་ལས་པདྨ་ཉི་ཟླའི་སྟེང་། །སྐད་ཅིག་དྲན་རྫོགས་མདོ་འཛིན་ཡི་དམ་གཙོ། །ཕྲེང་བ་འཁོར་གྱི་རྣམ་པར་གྱུར་པས་བསྐོར། །གནས་གསུམ་ཡིག་འབྲུ་གསུམ་གྱི་ས་བོན་ལས། །འོད་འཕྲོས་རང་འདྲའི་ཡེ་ཤེས་སྤྱན་དྲངས་ནས། །ཛཿཧཱུྃ་བྃ་ཧོས་གཉིས་སུ་མེད་པར་བསྟིམ། །རྡོ་རྗེའི་ཆོས་བདུན་ངང་དུ་ལྷུན་གྱིས་གྲུབ། །བདེ་གཤེགས་བྱང་ཆུབ་སེམས་དཔའ་སྲས་འཁོར་བཅས། །གདོད་ནས་ཕྲེང་བའི་ངོ་བོར་ཤར་བ་ལས། །ཡིན་ལ་ཡིན་པར་གོ་བའི་ངེས་ཤེས་ཀྱིས། །ཐབས་ཤེས་སོར་མོའི་སྦྱོར་བས་སྙིང་པོའི་སྔགས། །བགྲང་བ་ཙམ་གྱིས་འཇིག་འདས་དངོས་གྲུབ་ཀུན། །ཐོགས་མེད་འགྲུབ་པའི་ནུས་མཐུ་ཅན་དུ་གྱུར། ཞེས་བརྗོད་ཅིང་རྩ་སྔགས་ཀྱི་མཐར་རྟེན་འབྲེལ་སྙིང་པོ་དང་། ཨ་དཱི་ཀ་དི། སྦྲེལ་བ་གང་མང་བཟླས་པས་མེ་ཏོག་ལ་བསྔགས་ཏེ་འཐོར། ཁྱད་པར་རང་གཞུང་ནས་བཤད་པའི་སྔགས་འདི་བརྒྱ་རྩ་བཟླ་ཞིང་། ཐམས་ཅད་དམིགས་པའི་ཁྱད་པར་ནི། བསྒྲུབ་བྱའི་ལྷ་དེ་དག་ཡིག་འབྲུ་དེ་དག་གི་རྣམ་པར་ལས་མཐུན་གྱི་ཁ་དོག་ཅན་དུ་ནམ་མཁའ་ནས་ཆར་འབབ་པ་བཞིན་དུ་བྱུང་ནས་ཕྲེང་བ་ལ་ཐིམ་པར་བསམ་ལ། ཨོཾ་རུ་ཙི་པྲ་མར་ཏ་ན་ཡེ་རཏྣ་མ་ཎི་དྷ་ར་ཛྙཱ་ན་དེ་ཝ་ཨ་བྷཱི་ཥིཉྩ་ཧཱུྃ་སྭཱ་ཧཱ། ཞེས་བཟླས་རྗེས་ཤིས་པ་བརྗོད། དེ་ནས་ལས་ལ་སྦྱོར་བའི་ཚེ། ཐོག་མར་འབྲུ་གསུམ་བརྒྱ་རྩ་བརྒྱད་དང་། དེ་ནས་ཨ་དཱི་ཀ་དཱི་དང་རྟེན་སྙིང་། ཕྲེང་བ་བྱིན་རླབས་ཀྱི་སྔགས་ཉེར་གཅིག་ལ་སོགས་བཟླས་རྗེས་བཟླས་པ་གང་ཡིན་ལ་འཇུག་པར་གསུངས་ཤིང་། དེ་དག་རྣམས་གཞུང་གི་དགོངས་པ་འཁྲུལ་མེད་དུ་བསྡེབས་པ་ཡིན་ནོ། །དེ་ལྟར་ཚུལ་བཞིན་བྱས་པའི་ཕྲེང་བ་དེ་ལ་བགྲང་བའི་སྔགས་གང་ཡིན་འབུམ་འགྱུར་དུ་འགྲོ་བར་གསུངས་ཤིང་། གཞན་ཡང་དེ་ཉིད་ལས། སྐབས་སྐབས་རབ་གནས་བསྐྱར་ན་བཟངཿ ཞེས་གསུངས་པ་ལྟར། སྐབས་སུ་བྱིན་རླབས་བསྐྱར་བ་མན་ངག་ཡིན་ནོ། །ཞེས་གསུངས་པ་ལྟར་ཐུན་མགོར་ཕྲེང་བ་བྱིན་རླབས་འདི་ལྟར་བྱའོ། །བགྲང་ཚུལ་ཡང་། དྲག་འདུལ་གནམ་ལྕགས་འཁོར་ལོ་ལས། བགྲང་ཕྲེང་སྣ་ཚོགས་ཕྲེང་ཐག་ལུ་གུ་རྒྱུདཿ མཐེ་བོང་ཛཿལས་འོད་ཟེར་ལྕགས་ཀྱུ་ཡིསཿ ལྷ་ཉིད་དགུག་ཅིང་ལྟེ་བ་སྙིང་གར་བསྐྱིལཿ ཞེས་དང་། ཨོ་རྒྱན་ཆེན་པོས། ཞི་བ་ལ་ནི་སྙིང་གར་བགྲངཿ རྒྱས་པ་ལྟེ་བའི་ཐད་དུ་སྟེཿ དབང་ལ་ཕྲེང་བ་གསང་གནས་ཐདཿ དགུག་པའི་འདུན་པས་འདྲེན་པར་བྱཿ དྲག་པོར་སྐྱིལ་ཀྲུང་བསྣོལ་མཚམས་ཀྱིཿ པུས་མོའི་སྟེང་དུ་བགྲང་བར་བཤདཿ སྣ་ཚོགས་ལས་ལ་གང་བདེར་བྱཿ ཞེས་དང་། ཞི་བའི་སྔགས་རྣམས་འདྲེན་པའི་དུསཿ མཛུབ་མོའི་སྟེང་ནས་འདྲེན་པར་བྱཿ དེ་བཞིན་རྒྱས་པ་གུང་མོའི་སྟེང་། དབང་ལ་སྲིན་ལག་དྲག་པོ་ལཿ མཐེའུ་ཆུང་སྟེང་ནས་འདྲེན་པ་སྟེཿ ཀུན་ཀྱང་གཡོན་པ་ཀུན་ཉིད་དེཿ གཡས་ཀྱི་ལག་པས་མི་འདྲེན་ཞིངཿ ཞེས་དང་། སྐབས་འགར་ལག་པ་གཉིས་ཀས་མཉམ་དུ་འདྲེན་པ་དངཿ དྲག་པོ་ལ་གཡས་པའི་མཐེབ་སྲིན་གྱིས་བགྲང་བ་དང་། བཟློག་སྔགས་ལྟ་བུ་ལ་ཕྱིར་འཕེན་གྱིས་བགྲང་ཚུལ་ཡང་གསུངས་སོ། །ལས་བཞི་སྤྱི་ཁྱབ་ཏུ་སོར་མོ་བཞི་སྦྱར་བའི་མཛུབ་མོའི་སྟེང་དུ་བཞག་ནས་མཐེ་བོང་ལྕགས་ཀྱུའི་རྣམ་པས་བགྲང་བ་ཉིད་འཇུག་པ་བདེ་ཞིང་ལེགས་པ་ཉིད་དོ། །བཅང་བའི་དམ་ཚིག་ཀྱང་སློབ་དཔོན་ཆེན་པོས། ཚུལ་དང་ལྡན་པའི་ཕྲེང་བ་གཅིགཿ ལུས་དང་གྲིབ་ལྟར་མི་འབྲལ་འགྲོགསཿ ཕྲེང་བའི་དམ་ཚིག་རྩ་བ་ཡིནཿ ཡན་ལག་དམ་ཚིག་མང་བཤད་ཀྱངཿ མདོར་བསྡུས་འདི་ལྟར་ཤེས་པར་བྱཿ ཕྲེང་བ་གཞན་ལ་མི་བསྟན་ཅིངཿ ལུས་ཀྱི་དྲོད་དང་མ་བྲལ་ནཿ གང་བསྒྲུབ་མྱུར་དུ་འགྲུབ་པར་འགྱུརཿ དེ་བཞིན་གཞན་གྱི་ལག་མི་འགྲིམཿ ཁྱད་པར་དམ་ཉམས་གྲིབ་ཅན་དངཿ རང་དང་དམ་ཚིག་མི་གཅིག་པའིཿ མི་ཡི་ལག་ཏུ་མི་འགྲིམ་གཅེསཿ བཟླས་པ་བྱེད་དུས་འདྲེན་པ་ལསཿ དུས་མིན་ལག་ལ་འདྲེན་པ་མིནཿ མི་ཡི་བརྩི་སླད་གཤར་མི་བྱཿ རབ་གནས་མི་ལྡན་ཕྲེང་བ་ནིཿ ནམ་ཡང་བཅང་བར་མི་བྱ་ཞིངཿ རབ་གནས་ལྡན་པའི་ཕྲེང་བ་དེཿ ལས་གཞན་མི་བྱ་གསང་བར་བྱཿ ས་ལ་མི་བཞག་ཡལ་མི་དོརཿ འཕྲེང་བ་བསླད་ཅན་ཞེས་བྱ་བཿ རིགས་མི་མཐུན་རྣམས་བསྡེབ་མི་བྱཿ ཞེས་གསུངས་ཤིང་། སྔགས་བགྲང་བའི་ཚེ། མི་གཏམ་ཤོར་ན་ཕྲེང་རྡོག་བཞི། གློ་ལུ་ན་ལྔ། གླལ་ན་གསུམ། སྦྲིད་ན་བཅུ། མཆིལ་མ་དོར་ན་གཅིག་རྣམས་མི་རྩི་བར་སྔགས་རིགས་པ་རྣམས་གསུངས་སོ། །དེ་ཡང་དང་པོ་ལྷར་སྣང་གསལ་བ། དེ་ནས་སྔགས་ཕྲེང་གསལ་བ། དེ་ནས་འཕྲོ་འདུ་བྱ་བ་སོགས་སྔ་མ་སྔ་མ་རྣམས་ལ་གསལ་སྣང་གི་བརྟན་པ་མ་ཐོབ་པར་ཕྱི་མ་ཕྱི་མ་རྣམས་མི་བྱ་བར་གནད་ཆེའོ། །དེ་ཡང་ཐུན་བསྡུ་བ་ནི་བསྙེན་པའི་ལྷག་ཆད་ཁ་སྐོང་ཕྱིར། དབྱངས་གསལ། ཡིག་བརྒྱ། ཡེ་དྷར་བཅས་ལན་གསུམ་རེ་བཟླས་མཐར་མཆོད་བསྟོད་བྱ་སྟེ། སྒོམ་དོན་ནི་སྔར་བཤད་པ་ལྟར་དང་། དེ་ཡང་མ་ཧཱ་སྒོམ་ཁོག་ལས། སྐུ་བསྐྱེད་རིམ་ལྷག་ཆད་ཀ་ལིས་བསྐང་། གསུང་སྔགས་ཚིག་ལྷག་ཆད་ཨ་ལིས་བསྐང་། ཐུགས་འཕྲོ་འདུའི་ལྷག་ཆད་ཡིག་བརྒྱས་བསྐང་། ཞེས་དང་། བླ་མ་དགོངས་འདུས་ལས་ཀྱང་། ཨོཾ་གྱིས་མགོ་དྲངས་བའི་དབྱངས་གསལ་གྱི་མཐརཿ འགྲུབ་པར་གྱུར་ཅིག་སྭཱ་ཧཱ་ཞེས་བརྗོད་པས་ལྷག་ཆད་ཁ་སྐོང་ཞིང་མྱུར་དུ་འགྲུབ་པ་དང་བྱིན་རླབས་ཆེ་བར་གསུངས་སོ། །དེ་ཡང་སྒྲུབ་པའི་སྐབས་སུ་ལྟས་བཟང་བྱུང་ན་དེ་མ་ཐག་ཏུ་དངོས་གྲུབ་མ་བླང་ན་ཡལ་ཉེན་ཡོད་པས་བཟླས་པའི་རྗེས་འབྲེལ་དུ་སྐབས་འདིར་རྒྱུན་གྱི་དངོས་གྲུབ་ལེན་དགོས་པར་དུ་མ་ནས་གསུངས་ཤིང་མཐར་ཕྱིན་པའི་ཚེ་ཐོ་རངས་སྐྱ་རེངས་ཤར་དུས་ལྷག་པར་ངེས་པར་དངོས་གྲུབ་བླང་ངོ། །འདིའི་སྒོམ་དོན་ནི་འོག་ནས་འཆད་དོ། །དེ་ནས་གཏང་རག་གི་མཆོད་བསྟོད་སྔོན་དུ་འགྲོ་བས། བཟོད་གསོལ་ནི་བདག་ཅག་གིས་མི་ཤེས་པ་དང་བག་མེད་པ་སོགས་ལས་དང་པོ་བའི་དབང་གིས། ཏིང་འཛིན་མ་གསལ་བ་དང་བཟླས་བརྗོད་གྲངས་ཉུང་བ་དང་ཆོ་ག་ལྷག་ཆད་དུ་གྱུར་པ་མཆོད་རྫས་ཡོ་བྱད་མ་འབྱོར་ཞིང་ལེ་ལོ་གཡེང་བ་སོགས། གསང་སྔགས་ཟབ་མོའི་ཆོ་ག་སྤྱད་ཉེས་པར་གྱུར་པའི་འགལ་འཁྲུལ་ཐམས་ཅད་གནོང་ཞིང་འགྱོད་པ་དྲག་པོས་བཤགས་པར་བགྱི་ན་བཟོད་པར་མཛད་དེ་ཚངས་པ་དམ་པ་སྩལ་དུ་གསོལ། ཞེས་གསོལ་བ་བཏབ་སྟེ། ཡི་གེ་བརྒྱ་པ་བཟླས་པས་ཉམས་ཆགས་ཐམས་ཅད་བྱང་ཞིང་དག་པར་བསམ་མོ། །