ཐུགས་འོད་གསལ་གྱི་རྣལ་འབྱོར།
གསུམ་པ་ཐུགས་འོད་གསལ་གྱི་རྣལ་འབྱོར་ནི། སྒྲུབ་པའི་སྐབས་ལྟ་བུ་མདུན་བསྐྱེད་ཡོད་ཚེ་མདུན་གྱི་ཡེ་ཤེས་པ་རྣམས་ནི། རྟེན་ཡོད་ན་དེ་ལ་བརྟན་བཞུགས་བྱ། མེད་ན་རང་བཞིན་ཆོས་ཀྱི་དབྱིངས་སུ་གཤེགས་སུ་གསོལ་ནས་དམ་ཚིག་པ་ཐམས་ཅད་བདག་བསྐྱེད་ལ་བསྡུ། བདག་བསྐྱེད་ཁོ་ནའི་དུས་དུ་བདག་གི་ཡེ་ཤེས་པ་ནི་ནམ་ཡང་གཤེགས་པ་མ་ཡིན་པས། ཉེར་བསྡུའི་ཚིག་གིས་གསལ་གདབ་སྟེ་སྣོད་བཅུད་ཐམས་ཅད་འོད་དུ་ཞུ་ནས་གཞལ་ཡས་ཁང་ལ་ཐིམ། དེ་ཡང་མཐའ་ནས་རིམ་གྱིས་ཚུར་འདུས་ཏེ་འཁོར་གྱི་ལྷ་ཚོགས་ལ་ཐིམ། འཁོར་རྣམས་གཙོ་བོ་ཡབ་ཡུམ་ལ་ཐིམ། ཡུམ་ཡབ་ལ་ཐིམ། དེ་ཐུགས་ཀའི་ཡེ་ཤེས་སེམས་དཔའ་ལ་ཐིམ་དེ་རིམ་བཞིན་སྔགས་འཁོར་དང་ཏིང་འཛིན་སེམས་དཔའ་ཐུགས་སྲོག་ས་བོན་ལ་ཐིམ་པར་བསམ་སྟེ། དེ་ལ་སེམས་བཟུང་ཞིང་། དེ་ཇེ་ཕྲར་གྱེན་རྫོགས་ན་དཱའི་བར་ཡལ་བས་དམིགས་པ་མེད་པའི་སྟོང་ཉིད་སྤྲོས་པ་དང་བྲལ་བའི་ངང་ལ་ཇི་གནས་སུ་མཉམ་པར་བཞག་པས་རྟག་མཐའ་བསལ་ལོ། །ཡང་ན་འཇའ་ཚོན་ནམ་མཁར་ཡལ་བ་ལྟར་འཇའ་ཡལ་ལམ་གང་ལྟར་བསྡུས་ཀྱང་འདྲ་སྟེ། སྔ་མ་ལ་རྗེས་གཞིག་དང་། ཕྱི་མ་ལ་རིལ་འཛིན་ཟེར་བ་ཡིན་ན་ཡང་། ལས་དང་པོའི་ཚེ་སྔ་མ་ལྟར་རྗེས་གཞིག་བྱེད་པ་གལ་ཆེ་བར་གསུངས་སོ། །དེ་ལྟར་ཡང་ཆོས་དབྱིངས་ལས་བསྐྱེད། ཆོས་དབྱིངས་ལས་གནས། ཆོས་དབྱིངས་ལས་ལོངས་སྤྱོད། ཆོས་དབྱིངས་སུ་ཐིམ་པས་ན་སྣང་སྟོང་འགལ་མེད་ཀྱི་དོན་ལ་ངེས་ཤེས་འདྲོངས་དགོས་པ་ཡིན་ནོ། །དེ་ཡང་ཀུན་མཁྱེན་ཆེན་པོས། བསྐྱེད་རིམ་སྣང་འདིའི་བདེན་ཞེན་འགོག་པ་སྟེ། །རྫོགས་རིམ་སྒྱུ་མར་ཞེན་པའི་རྟོག་པ་སྤངས། །གང་ལའང་སྣང་སྟོང་བདེན་ཞེན་མེད་པ་ན། །བསྐྱེད་རྫོགས་གཉིས་མེད་རང་བཞིན་དག་པ་ཡིན། ཞེས་པ་ལྟར་སྣོད་བཅུད་རང་མཚན་དུ་འཛིན་པ་ཐ་མལ་གྱི་ཞེན་རྟོག་གི་གཉེན་པོ་ལྷར་སྣང་སྒྱུ་མའི་སྣང་ཞེན་དེ་འོད་གསལ་གྱི་དབྱིངས་སུ་བསྡུ་བ་ལ་རྫོགས་རིམ་ཞེས་བྱ་སྟེ། འཆི་སྲིད་ཆོས་སྐུར་སྦྱོང་བའི་ཉམས་ལེན་གྱི་གནད་ཡིན་པས་འདོར་མི་རུང་ངོ་། །དེ་ནས་དེ་ལས་ལྡང་བ་ནི། བསྡུ་ལྡང་འདི་རྒྱུད་སྡེ་འོག་མ་གསུམ་ལ་མེད། རྩ་སྔགས་ཚར་གཅིག་བརྗོད་པའི་རྐྱེན་གྱིས་རྗེས་ཐོབ་སྒྱུ་མའི་ལྷ་སྐུ་ཕྱག་རྒྱ་གཅིག་པའི་རྣམ་པར་ལྡང་བས་ཆད་མཐའ་བསལ་ནས་གནས་གསུམ་དུ་ཡི་གེ་འབྲུ་གསུམ་གྱིས་མཚན་པས་སྐུ་གསུང་ཐུགས་རྡོ་རྗེར་བྱིན་གྱིས་རློབས། ཡང་སྐབས་འགར་སྤྱི་བོར་ཧྃ་ཡིག་བཀོད་ལ་དེ་ཞུ་བའི་རྒྱ་གྲམ་གྱིས་གོ་བགོ། མཛུབ་རྩེ་ལ་ཁྲོ་བོ་གཉིས་བསྐྱེད་དེ་ལུས་སྲུང་། དབུ་རྒྱན་དང་ཅོད་པཎ་བཅིང་སྟེ་ཤིན་དུ་བརྟན་པར་བྱ་བའང་གསུངས། གང་ལྟར་ཡང་སྲུང་བའི་འཁོར་ལོ་གསལ་གདབ་ནས། བསྔོ་སྨོན་བཀྲ་ཤིས་ཀྱི་བར་བྱའོ། །དེ་ཡང་བསྐྱེད་རིམ་སྐབས་འདིར་གཞལ་ཡས་ཁང་གདན་བཅས་ཐམས་ཅད་རང་གི་ཕུང་ཁམས་སྐྱེ་མཆེད་རྩ་རླུང་ཐིག་ལེའི་བཞུགས་ཚུལ་དང་བསྟུན་ཏེ་གཞི་འབྲས་ཀྱི་དག་པ་སྦྱོར་ཚུལ་མ་འཁྲུལ་བར་ཉམས་སུ་བླངས་ནས། རྫོགས་རིམ་གྱི་རྟོགས་པ་ཁྱད་པར་ཅན་རྣམས་རྒྱུད་ལ་སྐྱེ་བའི་དགེ་རྩ་རྣམས་ཡོངས་སུ་སྨིན་པར་འགྱུར་བ་སྟེ་གཞི་འདིང་བ་ཡིན་པས། དམིགས་རྣམས་རེ་རེ་བཞིན། སྦྱང་བྱ། སྦྱོང་བྱེད། སྦྱངས་འབྲས་རྣམས་སོ་སོར་ངེས་པར་བྱས་ནས། དག་རྫོགས་སྨིན་གསུམ་སྦྱོར་ཤེས་པ་ནི་གལ་ཆེ་ཡང་། དེ་དག་ཞིབ་པར་གཞན་ནས་ཤེས་པར་བྱའོ། །