རྗེས་ཐོབ་ཀྱི་རྣལ་འབྱོར།

གཉིས་པ་རྗེས་ཐོབ་ཀྱི་རྣལ་འབྱོར་ནི་སྔར་གྱི་ས་བཅད་བདུན་པ་ལྷ་ལམ་དུ་ཁྱེར་བ་ཉིད་ཡིན་ཏེ། དེ་ཡང་ཇི་སྐད་དུ། རྗེས་ཐོབ་སྒྱུ་མ་སྨིག་རྒྱུ་དང་། །རྨི་ལམ་གཟུགས་བརྙན་ཆུ་ཟླ་བཞིན། །མིག་ཡོར་བྲག་ཆ་དྲི་ཟའི་གྲོང་། །ཆུ་བུར་སྤྲུལ་པ་ཇི་བཞིན་སྤྱོད། ཅེས་ཤེས་བྱ་བཅུ་དང་། བླ་མ་ཡི་དམ་མི་སྤང་ཞིང་། །བླང་དོར་མ་ནོར་ཏིང་ངེ་འཛིན། །སྒོམ་དོན་སྤྱོད་པ་གསང་དང་དྲུག །བསྐྱེད་པའི་རིམ་པའི་དམ་ཚིག་ཡིན། ཞེས་དམ་ཚིག་གི་གནས་དྲུག་སྟེ། དེ་དག་ལ་བླང་དོར་མ་ནོར་བར་བྱ་བ་དང་། གཞན་ཡང་གདན་གསུམ་ལྷའི་དཀྱིལ་འཁོར་དུ་ཤེས་པས་སྣང་གྲགས་རིགས་གསུམ་ལྷ་སྔགས་ཆོས་སྐུའི་ལམ་ཁྱེར་དང་མ་བྲལ་བར་དག་སྣང་ལ་བསླབ་པར་བྱའོ། །གདན་གསུམ་ནི་རྒྱུའི་དུས་ཀྱི་ཕུང་པོ་ལྔ་དང་། འབྱུང་བ་ལྔ་ནི་འབྲས་དུས་ཀྱི་རིགས་ལྔ་ཡབ་ཡུམ་བཅུ་སྟེ། ཕུང་ཁམས་གཤེགས་པ་གཤེགས་མའི་གདན་དང་། མིག་རྣ་བ་སྣ་ལྕེ་བཞིའི་རྣམ་ཤེས་དག་པ་ས་སྙིང་། སྤྱན་གཟིགས། ཕྱག་ན་རྡོ་རྗེ་སྟེ་ནང་གི་སེམས་དཔའ་བཞི་དང་། དེའི་དབང་པོ་བཞི་དག་པ་བྱམས་པ། སྒྲིབ་སེལ། ཀུན་བཟང་། འཇམ་དཔལ་ཏེ་ཕྱིའི་སེམས་དཔའ་བཞི་དང་། གཟུགས་སྒྲ་དྲི་རོ་ཏེ་ཡུལ་བཞི་དག་པ་སྒེག་ཕྲེང་གླུ་གར་སྟེ་ཕྱི་སྒེག་བཞི་དང་། འདས་མ་འོངས་ད་ལྟ་མ་ངེས་པ་སྟེ་དུས་བཞི་དག་པ། པུཥྤེ་མ་སོགས་ནང་སྒེག་བཞི་སྟེ། སྐྱེ་མཆེད་སེམས་དཔའ་སེམས་མའི་གདན་དང་། ལུས་ཀྱི་རྣམ་ཤེས་དབང་པོ་རེག་བྱ་རེག་ཤེས་བཞི་དག་པ་གཤིན་རྗེ་གཤེད། སྟོབས་པོ་ཆེ། རྟ་མགྲིན། བདུད་རྩི་འཁྱིལ་བ་སྟེ་སྒོ་བ་བཞི་དང་། རྟག་ཆད་བདག་མཚན་བ ཞི་དག་པ་ལྕགས་ཀྱུ་མ་སོགས་ཡུམ་བཞི་སྟེ། ལུས་དབང་ངམ་ཡན་ལག་ཁྲོ་བོ་ཁྲོ་མོའི་གདན་ཅེས་ལྷ་སོ་བཞིའོ། །གདན་ཞེས་པའང་འོག་གི་གདན་ལྟ་བུ་མ་ཡིན་པར། ལྷ་ཐམས་ཅད་གདན་འཛོམ་པའི་དོན་ཡིན་ཅེས་པདྨ་ཕྲིན་ལས་གསུངས་སོ། །སེམས་དཔའ་སེམས་མ་དེ་དག་ཀྱང་དག་འབྲས་ཀྱི་ངོས་ནས་བཞག་པའི་སངས་རྒྱས་ཡིན་གྱི། ས་བཅུའི་བྱང་སེམས་ལྟ་བུ་ལ་འཁྲུལ་བར་མི་བྱའོ། །དེ་ལྟར་ཐུན་མཚམས་ཀྱི་བྱ་བར་འགྲོ་འདུག་ཟ་འཆག་གི་སྤྱོད་ལམ་གང་གི་ཚེ་ཡང་ལྷའི་ང་རྒྱལ་དང་མ་བྲལ་བའི་སྒོ་ནས། ཞིང་སྦྱོང་བ་དང་། འདོད་ཡོན་ཚོགས་སུ་བསྒྱུར་བ་དང་། ཕྱག་འཚལ་བ་སོགས་ཆོས་སྤྱོད་བཅུའི་བྱ་བ་དང་། སེམས་ཅན་གྱི་རྒྱུད་སྨིན་པ་སོགས་ཐབས་སུ་གང་འགྱུར་བྱ་བ་ལ། སྒོ་གསུམ་ཐལ་མལ་དུ་མ་ཤོར་བ་བྱ་དགོས་ཏེ། ཐུན་མཚམས་རྣམས་སུ་རྣམ་རྟོག་རྒྱ་འབྱམས་ཤོར་ན་ཐུན་ཡང་ལད་འགྲོ་ཞིང་། ཐུན་མཚམས་སུ་ངེས་འབྱུང་སྐྱོ་ཤས་སོགས་བསྐྱེད་དེ། ཐུན་ལ་འཇུག་ཁར་ཤེས་པ་སྐྱོ་ཆད་དེ་ཡོད་ན་ཐུན་དེ་ཡང་གོ་ཆོད་ངེས་ཞིག་འོང་ཞིང་། དེས་སྤྲོ་བ་སྐྱེས་ནས་ཐུན་རྗེས་མ་རྣམས་ཀྱང་རིམ་པས་ཡོན་ཏན་ཡར་ལྡན་དུ་འགྲོ་བར་གསུངས་སོ། །གཞན་ཡང་ཟས་གོས་སྤྱོད་ལམ་གྱི་རྣལ་འབྱོར་ཉམས་སུ་ལེན་ཚུལ་ཡང་། དྷརྨ་ཤྲིས་ནང་གི་ཆོས་སྤྱོད་ལས་གསུངས་པ་ལྟར་ཤེས་པར་བྱའོ། །དེ་ནས་ཐུན་གཞན་རྣམས་ཀྱི་ཚེ་ཡང་། ཚོགས་ཞིང་རྣམས་སྲུང་འཁོར་གྱི་ནང་གི་ནམ་མཁར་སྤྱན་དྲངས་ཤིང་། གསོལ་འདེབས། སྐྱབས་སེམས་ནས་བཟུང་མཇུག་བསྡུ་ལྡང་སོགས་དང་བསྔོ་སྨོན་བཀྲ་ཤིས་ཀྱི་བར་དཀྱུས་བཞིན་བྱའོ། །བསྙེན་ཡིག་ཁ་ཅིག་ལས་ཐུན་ཕྱི་མ་རྣམས་ལ་བགེགས་བསྐྲད་སྲུང་འཁོར་སོགས་དོར་ནས། མཆོད་པ་བྱིན་རླབས་ནས་འཇུག་པ་དང་། ཐུན་མཐར་བསྡུ་རིམ་མི་བྱེད་པའམ། བྱེད་ཀྱང་སྲོད་ཐུན་གྱི་མཐའ་ལས་བྱེད་པ་སོགས་ཡོད་ཀྱང་། འདི་ལྟར་བྱས་ན་ལེགས་ཏེ། རྒྱུ་མཚན་བསྙེན་པའི་སྐབས་འདིར་བསྐྱེད་རིམ་གྱི་ཆོ་ག་སྐྱེ་འཆི་བར་དོ་གསུམ་སྦྱོང་བའི་གདམས་པ་ཆ་ཚང་ལ་བློ་སྦྱོང་བའི་ཕྱིར། སྐྱབས་སེམས་ཚད་མེད་བཞི་བསྒོམ་པ་སོགས་བསོད་ནམས་ཀྱི་ཚོགས་དང་། སྭ་བྷ་ཝས་སྟོང་པར་སྦྱངས་བ་ཡེ་ཤེས་ཀྱི་ཚོགས་ཏེ་ཚོགས་གཉིས་ཀྱི་རང་འབྲས་ཟུང་འཇུག་གི་བསྐྱེད་རིམ་ལྷའི་ཕྱག་རྒྱར་སྨིན་ཚུལ་ལྟར་སློབ་དགོས་པ་དང་། ཐུན་མཚམས་ཀྱི་ཉུ་ལེ་སྐྲོད་པ་དང་། བར་ཆད་སྲུང་བ་སོགས་ཀྱི་དགོས་པ་ཡོད་པར་གསུངས་སོ། །རྒྱུན་དུ་གཞི་བགེགས་ཀྱི་གཏོར་མ་བསྔོ་རྒྱུ་ཡོད་ན་སྔ་ཐུན་གྱི་མགོར་བྱ། མེད་ཀྱང་ཆད་སྐྱོན་དུ་མི་འགྱུར། སྲོད་ཐུན་ལ་གཏོར་བསྔོ་དང་། ཚོགས་བསྐང་རྒྱས་བསྡུས་མཚམས་པ་རེ་གཏོང་། སྤྱིར་ཚོགས་སྐོང་གི་དུས་གནད་སྲོད་དང་མཚན་མའི་ཆ་ངེས་པར་ཡིན་པས་དེ་ལྟར་བྱ་བའམ། སྟབས་བདེ་བ་སོགས་ཀྱིས་ཕྱི་དྲག་པོའི་ཐུན་ལ་བྱས་ཀྱང་འགལ་བ་མེད་དོ། །གལ་ཏེ་རྒྱུན་པར་མ་འཛོམས་ན་ཡང་བསྙེན་པའི་ཐོག་མཐའ་དང་། དུས་ཆེན་རྣམས་སུ་བྱས་པས་འཐུས་སོ། ཆད་བསྟན་ནི་རྒྱུན་པར་མེད་ཀྱང་རུང་ངོ་། །གང་ལྟར་ཡང་སྲོད་ཐུན་གྱི་རྗེས་སུ་ཀུ་སཱ་ལུའི་ཚོགས་བསགས་ཀྱི་མཐར། ཉལ་བའི་རྣལ་འབྱོར་ནི་མགོ་བྱང་ཁ་ནུབ་རྒྱབ་ཤར་དུ་བསྟན་ཏེ། གཞོག་གཡས་པ་འོག་ཏུ་བསྟན་ལ་ལག་གཡས་འགྲམ་འོག་ཏུ་བཅུག་སྟེ། སྲིན་མཛུབ་ཀྱིས་སྣ་བུག་གཡས་པ་དགག་ལག་གཡོན་བརླ་སྟེང་བརྐྱང་པ་སེང་གེའི་ཉལ་སྟབས་བྱས་ཏེ་དགེ་བའི་བྱ་བ་ལ་སྣང་བ་དང་ལྡང་གི་འདུ་ཤེས་ཀྱིས། སངས་རྒྱས་ཆོས་ཀྱི་སྐུ་ཐོབ་པར་གྱུར་ཅིག་སྙམས་པས་ཆོས་ཉིད་ནམ་མཁའ་ལྟ་བུའི་ངང་དུ་བློ་བཞག་ནས་ཉལ། ནང་ལྟར་ན་བསྡུ་བྱའི་དཀྱིལ་འཁོར་གསལ་གདབ་རང་གི་སྙིང་གའི་འོད་ཀྱིས་ཕོག་པས་མ་དག་པའི་སྣོད་བཅུད་ཐམས་ཅད་རྟེན་ལ་ཐིམ། དེ་རིམ་བཞིན་ཐུགས་སྲོག་ན་དཱའི་བར་བསྡུ། དེ་ཡང་མི་དམིགས་པའི་དབྱིངས་སུ་བསྡུ་ལ། བསམ་མེད་ཀྱི་ངང་གཉིད་ལོག་པར་བྱ་ཞིང་དེར་གཉིད་མ་བྱུང་ན་ཡང་ཡང་བསྐྱར་བས་ཆོག་གོ། གསང་བ་ལྟར་ན་ནམ་གུང་ཤེས་བྱ་བུམ་པར་དྲིལ་བ་ནི་སྙིང་པདྨ་དམར་པོ་འདབ་མ་བཞི་པ་ཅུང་ཟད་ཁ་ཟུམ་པའི་ནང་དུ་ཨ་ཡིག་སྐྱེ་མེད་མཚོན་བྱེད་ཀྱི་ཨ་ལ་རིང་ཆ་དང་ཚེས་དྲག་མེད་དོ།།དཀར་པོ་འོད་འབར་བ་བུམ་ནང་གི་མར་མེ་ལྟར་གསལ་བ་ལ་སེམས་གཏད་དེ། སྙིང་གར་རླུང་ཁ་སྦྱོར་དུ་བཟུང་བ་ལ་ལུས་སྟོད་སྨད་འདུས་པ་ལྟར་མོས་ནས་ཉལ་བའི་རྨི་ལམ་མེད་པར་གཉིད་གསལ་སྟོང་རྣམ་པར་མི་རྟོག་པའི་འོད་གསལ་དུ་འཆར་རོ། ཞེས་དྷརྨ་ཤྲིས་གསུངས་པ་ལྟར་རོ། །དེ་ནས་ཐོར་ཐུན་ལ་བབས་པའི་ཚེ། ནམ་མཁའ་ནས་དཔའ་བོ་རྣལ་འབྱོར་མ་རྣམས་ཀྱིས་ཊཱ་མ་རུ་དང་། དྲིལ་གཡེར་གྱི་སྒྲ་དང་བཅས་ཏེ། འོད་གསལ་ལས་གཟུགས་སྐུར་བཞེངས་ཤིག་པའི་གླུས་བསྐུལ་ཏེ་སད་པར་བསམ་ལ་རྗེས་ཐོབ་ཀྱི་ལྷ་སྐུར་ལྡངས་ནས་རླུང་རོ་བསལ། ཀུན་སློང་གསལ་གདབ། ངག་བྱིན་རླབས་ནས་བླ་མའི་རྣལ་འབྱོར་དབང་བཞི་བླངས་པའི་མཐར་ཐུག་གི་བར་བྱས་རྗེས། ཐོར་ཐུན་དཀྱུས་བཞིན་གཏོང་ངོ་། །ཚུལ་དེ་ལྟ་བུའི་སྒོ་ནས་བསྙེན་པ་མ་ཚར་གྱི་བར་དུ། ཐུན་བཞི་ཁྲིགས་ཆགས་སུ་གཏོང་བ་ཡིན་ནོ། །ཐུན་ཚད་ནི་འཇམ་དཔལ་རྩ་རྒྱུད་ལས་སེ་གོལ་བརྒྱ་ཡི་ཚོགས་དག་ལ། །རྩ་རྒྱུན་གཅིག་ཏུ་བསྟན་པ་ཡིན། །རྩ་རྒྱུན་བཞི་ལ་ཆུ་ཚོད་བསྟན། །ཆུ་ཚོད་བཞི་ལ་ཐུན་ཞེས་བྱ། ཐུན་བཞི་ལ་ནི་ཉིན་པར་ཏེ། །མཚན་མོ་དག་ཀྱང་དེ་བཞིན་བསྟན། །དེ་ལྟར་བརྒྱད་དང་ལྡན་པ་ལ། །ཉིན་མཚན་དུ་ནི་རབ་ཏུ་བརྟགས། །མིག་གི་འབྱེད་འཛུམ་བཅུ་ལ་ནི། །སྐད་ཅིག་ཙམ་དུ་རབ་ཏུ་བརྟགས། །སྐད་ཅིག་བཅུ་ཞེས་བཤད་པ་ནི། །ཡུད་ཙམ་དུ་ནི་ཡོངས་སུ་བརྟགས། །ཡུད་ཙམ་བཞི་ལ་ཐུན་གཅིག་ཅེས། །སྔགས་རིག་པས་ནི་ཡོངས་སུ་བརྟགས། ཞེས་གསུངས་པ་ལྟར་རོ། །དེ་ཡང་བསྙེན་པའི་ཚད་ལ་གསུམ་སྟེ། གྲངས་བསྙེན་ནི་གྲངས་འདི་ཙམ་ཞིག་བཟླ་སྙམ་པའི་བར་དེ་སྲིད་དམ་གཙོ་བོ་ལ་སྔགས་ཉུང་ན་འབྲུ་འབུམ་དང་། རིང་ན་འབུམ་ཕྲག་གཅིག་སྤྱིར་བཏང་ཡིན་ཞིང་། དམིགས་བསལ་རང་གཞུང་ནས་འབྱུང་བ་ལྟར་དང་། འཁོར་རྣམས་ལ་རྩ་སྔགས་དེའི་བཟླ་གྲངས་ཀྱི་བཅུ་ཆ་རེ་བཟླ་བར་བཤད་དོ། །དུས་བསྙེན་ནི་སྡོམ་འབྱུང་ལས། །རྫོགས་ལྡན་དུས་ན་གཅིག་བཟླས་པ། །གསུམ་ལྡན་དུས་ན་ཉིས་འགྱུར་བཀླག །གཉིས་ལྡན་དུས་ན་སུམ་འགྱུར་བཤད། །རྩོད་དུས་བཞི་འགྱུར་དུ་ནི་བཟླ། ཞེས་དང་། ཡང་ན་ལོ་གཅིག་གམ། ཟླ་བ་དྲུག་དང་གསུམ་སོགས་ཞག་གྲངས་ཇི་ཙམ་བར་བསྙེན་འདོད་པ་ལྟར་རོ། །རྟགས་བསྙེན་ནི་དངོས་ཉམས་རྨི་ལམ་གང་རུང་ལ་གྲུབ་པའི་རྟགས་མཚན་མ་མཐོང་གི་བར་རོ། དེ་ལ་རྟགས་མཚན་ཀྱང་རང་གཞུང་ནས་གང་གསུངས་པ་ལྟར་དང་། ཁྱད་པར་དུ་ཨོ་རྒྱན་ཆེན་པོས། ཉམས་དགའ་བག་དྲོ་རིག་པ་དངས༔ ཉམས་རྟོགས་འཕེལ་ཞིང་ལུས་སེམས་བདེཿ ཁྱད་པར་རྗེས་ཀྱི་ཤེས་རྒྱུད་ལཿ རྟོགས་པ་འཆར་ཞིང་བརྩོན་འགྲུས་ལྡནཿ འཇིག་རྟེན་ཆོས་ལ་བློ་མི་འཇུགཿ ཞེས་སོགས་གསུངས་ཏེ། ངེས་འབྱུང་དང་སྐྱོ་ཤས། དད་མོས་དང་དག་སྣང་། སྙིང་རྗེ་དང་བྱང་སེམས་སོགས་ལམ་གྱི་ཡོན་ཏན་གོང་འཕེལ་དུ་འགྱུར་ཞིང་ཆགས་སྡང་སོགས་ཉོན་མོངས་པ་རྣམས་རིམ་པས་འགྲིབ་པར་འགྱུར་བ་ན། དངོས་ཉམས་རྨི་ལམ་གྱི་རྟགས་གཞན་རྣམས་ཀྱང་ཡང་དག་བ་ཡིན་ཞིང་། དེ་ལས་ལྡོག་པར་འདུག་ན་ཞལ་གཟིགས་དང་ལུང་སྟོན་པ་སོགས་ཀྱང་བདུད་ཀྱིས་བསླུ་བ་ཡིན་པར་གསུངས་པས་ཤེས་པར་བྱ་ཞིང་། རྟགས་ལ་དགའ་སྡུག་དང་། རེ་དོག་མི་བྱ་བའང་གལ་ཆེའོ། །གཞན་ཡང་པད་སྡོང་བརྩེགས་པའི་རྒྱུད་ལས། དེ་ཕྱིར་ལྷ་དང་བླ་མ་ཉིདཿ གྲུབ་ནས་མཉེས་པར་བྱ་བ་དངཿ མ་མོ་ཊཱཀྐི་བྲན་ཁོལ་བཅསཿ ཐུགས་དམ་སྐོང་ནས་ལས་ལ་སྦྱརཿ ཞེས་གསུངས་པས། གྲུབ་པའི་མཚན་མ་མ་མཐོང་བར་ལས་སྦྱོར་བརྩམས་ཀྱང་དོན་མེད་པའང་ཤེས་པར་བྱའོ། །ཡང་སྲོད་ཐུན་ནམ་ཕྱི་དྲོའི་ཐུན་ལ་སྲུང་མའི་སྐོང་གསོལ་གཏོང་བའི་ཚེ་ནི། བཀའ་སྲུང་རྣམས་གཞལ་ཡས་ཁང་གི་ཕྱི་སྐོར་དུ་བསྐྱེད་པའམ་ཡང་ན་རང་ཉིད་གཙོ་བོའི་ཐུགས་ཀ་ནས་ལས་ཀྱི་ཧེ་རུ་ཀར་གསལ་ཞིང་ཕྱིའི་འཁོར་ཡུག་གི་དུར་ཁྲོད་དུ་འཁོད་པས་མདུན་མཁར་བཀའ་སྲུང་རྣམས་བསྐྱེད་ཅིང་གསོལ་མཆོད་བྱ། ཆད་བསྟན་གྱི་དུས་སུ་ཡང་དེ་ལྟར་རོ། །ཆོས་སྐྱོང་གི་རྗེས་ཆོག་གི་ཐུན་གཏོར་ཕུལ་མཐར་གཤེགས་བསྡུ་བྱས་ཀྱང་ཆོག་ལ། ཆོ་གའི་མཇུག་ཆོག་གིས་འཐུས་རྒྱུ་བྱས་ཀྱང་རུང་ངོ་། །དེ་ལྟར་སྡོམ་པའི་རྒྱུད་ལས། དེ་ལྟ་བུ་ཡི་དུར་ཁྲོད་དུ། །གནོད་སྦྱིན་རོ་ལང་སྲིན་པོ་དང་། །ཧེ་རུ་ཀ་ཡི་གཟུགས་བསྒོམ་ན། །དེ་ནི་གཏོར་མ་སྦྱིན་པ་སྟེ། ཞེས་དང་། དུས་ནི་མངོན་བརྗོད་ལས། ཆོ་ག་འདི་ཡི་རིམ་པ་ཡིས། །ཐུན་མཚམས་བཞི་རུ་སྦྱིན་པར་བྱ། ཞེས་དང་། ལྷོ་ཕྱོགས་ཁ་བལྟས་གནས་པ་ཡིས། མཚན་ཕྱེད་དུས་སུ་གཏོར་མ་སྦྱིན། ཅེས་སོ། །དེ་ཚེ་ལྗགས་ཧཱུྃ་ལས་བྱུང་བའི་རྡོ་རྗེ་འོད་ཀྱི་སྦུ་གུས་གཏོར་མའི་བཅུད་དྲངས་དེ་གསོལ་བར་བསམ། བསད་ལས་ཀྱི་གཏོར་མ་ནི་ཞལ་དུ་བསྟབ་པས་ཆོམ་ཆོམ་དུ་གསོལ་བ་ཡིན་གྱི་འོད་ཀྱི་སྦུ་གུ་ལས་འདྲེན་པ་མ་ཡིན་ནོ། །ཐུན་བར་དུ་འབུལ་བ་ཡིན་ན་ནི་ཐུན་མཚམས་ཀྱི་ལྷ་དེས་ཆོག་གོ། གཏོར་མ་རྣམས་གཏོང་དུས་གྲལ་ལས་ཅུང་ཟད་བསྒུལ་ལམ་བསྐྱོད་དེ་མཐར་སློབ་དཔོན་གྱིས་ལག་པས་བཏེགས་པའི་བརྡའ་བྱ་ཞིང་མེ་ཏོག་འཐོར་ནས་སྒྲུབ་ཁང་གི་ཡང་ཐོག་གམ་ཕྱི་རོལ་བྱང་ཤར་དུ་གཏོར་སྟེགས་ལ་འཇིག་འདས་ཀྱི་ཁྱད་པར་ལྟར་ཞལ་ཕྱིར་བསྟན་ནམ་ནང་བསྟན་གཙོ་ཆེར་ནང་བསྟན་གང་འོས་ཀྱིས་འབུལ་ལོ། །མངོན་སྤྱོད་དུས་ཟོར་དུ་འཕེན་ཚུལ་མན་ངག་ལྟར་རོ། །ཁྱད་པར་དུ་ཐུན་མོང་མ་ཡིན་པ་རྡོ་རྗེ་ཐེག་པའི་གསང་ལམ་མཐར་ཐུག་པའི་ཐབས་མཁས་ལ་བརྟེན་ནས་ཚོགས་གཉིས་མྱུར་དུ་འདུམ་པར་འདོད་པས་ཉེ་བར་བརྩམ་པའི་ཡན་ལག་ཁྱད་པར་ཅན་ནི་ཚོགས་ཀྱི་འཁོར་ལོ་སྟེ། དེ་ལ་གང་ཚོགས་པའི་དབྱེ་བ་ནི། །སྒྱུ་དྲའི་བཤད་རྒྱུད་རྡོ་རྗེ་ལས། །སྐྱེ་བོ་མཛའ་བ་ཀུན་ཚོགས་པ། །རྣལ་འབྱོར་འདུས་པའི་ཚོགས་ཞེས་བྱ། །འབྱོར་བའི་ལོངས་སྤྱོད་ཚང་བ་ནི། །བདེ་བའི་ལོངས་སྤྱོད་ཚོགས་སུ་བཤད། །ལྷ་དང་དམ་ཅན་ཀུན་འདུས་པ། །འདུས་པ་ཆེན་པོའི་ཚོགས་སུ་བཤད། ཐམས་ཅད་སྤྱོད་ལ་མི་འཛིན་པས། །ཚོགས་གཉིས་རྒྱུན་དུ་རྫོགས་བྱེད་པ། །ཚོགས་ཆེན་པོ་རུ་ངེས་པར་བཤད། ཅེས་འདུས་པ་ཐབས་ཤེས་མ་འབྲེལ་ན་དཔའ་བོ་དཔའ་མོའི་སྟོན་མོར་གྲགས་ཤིང་རྗེས་མཐུན་ཙམ་ཡེ་རྒྱ་ལ་བརྟེན་པའི་ཐབས་ཤེས་གྲངས་མཉམ་པ་ཙམ་ལ་བྱའོ། །དེ་ལྟར་ཡང་ཐབས་ཤེས་ཟུང་དུ་འབྲེལ་བའི་སྐྱེ་བོ་དུ་མ་འདུས་པ་ནི་སྐལ་ལྡན་མི་ཡི་ཚོགས། བཟའ་བཏུང་གོས་རྒྱན་བྲོ་གར་གླུ་ཚིག་སྦྱོར་སྒྲོལ་གྱི་ཡོ་བྱད་ལྔ་ལ་སོགས་པ་ཚོགས་པ་ནི། འབྱོར་ལྡན་ཡོ་བྱད་ཀྱི་ཚོགས། རྟེན་དང་བརྟེན་པར་བཅས་པའི་ཡེ་ཤེས་ཀྱི་དཀྱིལ་འཁོར་སྲུང་མ་དང་བཅས་པ་དངོས་གྲུབ་ཀྱི་རྟེན་དང་གཟུགས་བརྙན་བཀོད་ཅིང་སྒོམ་པ་ནི་དགྱེས་ལྡན་ལྷའི་ཚོགས་ཏེ་གསུམ་གྱི་སྟེང་དུ། དེ་དག་ལ་མ་ཆགས་པར་སྤྱད་པས་བསོད་ནམས་དང་། སྤྱོད་བཞིན་དུ་མི་དམིགས་པའི་ཤེས་རབ་ཀྱིས་ཟིན་པས་ཡེ་ཤེས་ཀྱི་ཚོགས་རྫོགས་པ་ནི་ཚོགས་ཆེན་པོ་སྟེ་བསྣན་པས་བཞིའོ། །དེ་ནས་དམ་སེལ་མེད་པའི་འདུས་པ་རྡོ་རྗེའི་མཆེད་ལྕམ་རྣམས་ཀྱང་། ཤགས་དང་ཀུ་ཅོ་སོགས་བག་མེད་པ་སྤངས་ལ། རིག་པ་བརྟུལ་ཞུགས་ཀྱི་ཉམས་དང་ལྡན་པས། གྲལ་ཕྱག་ནི་དཀྱིལ་འཁོར་དང་ཚུལ་ཕྱག་ནི་རྒན་པ་ལ་འཚལ་བའོ།། སྔོན་དུ་འགྲོ་བས་གདན་ལ་འཁོད་ཅིང་། ཀུན་འདུས་ལས། ཁ་ན་མ་ཐོར་བཅས་པ་དང་། ཉམས་པ་ལས་བྱུང་ཉེས་དང་བཅས། མ་དག་པ་ཡི་ཡོ་བྱད་རྣམས། གདུག་ཅན་པང་དུ་འོང་བ་ལྟར། ཝ་ཡི་བརྟུལ་ཞུགས་ཆེན་པོ་ཡི། སྐལ་བར་བཤུགས་ཏེ་སྤངས་བར་བྱ། ཞེས་དང་། ཚོགས་རྫས་སུ་མི་འོས་པ་ལོག་འཚོ་སོགས་ཀྱི་རིགས་དང་། མ་དག་པའི་ཡོ་བྱད་རྣམས་སྤངས་ཤིང་། ཚོགས་མ་མཆོད་གོང་ནས་ཟ་ཤོར་བ་ལྟ་བུ་ཕུད་ཉམས་པ་དང་། ལྷག་མར་ཕྲི་བ་ལ་ཚོགས་ཀྱི་སྤྱང་གི་ཞེས་གསུངས་པས་བླང་དོར་མ་འཇོལ་བར་བྱ། ཤ་ལྔ་དང་བདུད་རྩི་ལྔའམ། ཤ་ཆང་ནི་མེད་དུ་མི་རུང་བས་ཅི་འབྱོར་བསགས། གཞན་ཡང་གལ་པོ་ལས། རྡོ་རྗེ་ཚེ་དང་གལ་ཕྱིས་དང་། །འཇམ་དེས་ཟླ་ཕྲོམ་ཟླ་རྒྱས་དང་། །ཚེ་ཁྲི་ཛ་གད་ཛ་གྲི་དང་། །བྲན་མོ་ཤམ་མོ་ཀུན་ཏུ་རྒྱུ། །ཨ་མྲ་རྒུན་འབྲུམ་ཨ་ག་རུ། །ན་ལེ་གེ་རྒྱས་ལ་སོགས་དྲངས། ཞེས་གསང་བའི་མིང་ནས་སྨོས་པ་རྣམས་ཀྱང་། སྣང་བ་ཐབས་ཆེན་ཚེ་མཆོག་དང་། །སྟོང་པ་ཤེས་རབ་གལ་ཆེན་པོ། །གཉིས་མེད་མཐུན་སྡེབས་ཐུགས་ཀྱི་རྫས། ཞེས་ཚེ་ནི་འབྲས་ཕྱེ་སོགས་དང་། གལ་ནི་ཆང་སོགས། མཐུན་སྡེབས་ནི་དེ་གཉིས་ཀྱི་ཟན་དུ་བྱས་པའོ། །ཡང་ན་རྡོ་རྗེ་ཚེ་སྟེ་ཟན། གལ་ཕྱེས་ཏེ་སྤོད་སྣ་ཚོགས་ཀྱི་གཡོས། འཇམ་དེས་སམ་ཟླ་བ་དཀར་བ་ནི་འོ་མ་འམ། ཡང་ན་མར་ཟླ་ཕྲོམ་ཀྱང་མར་རམ་ཡང་ན་ཐུད་དང་ཁྲུམ། ཟླ་རྒྱས་ཞོ་དང་འཁུར་བ། ཚེ་ཁྲི་སྐྱུར་པོ། མ་དཱ་ནའམ་དཔའ་བྱེད་དང་། ཛ་གད་ནི་ཆང་། བ་ལ་འམ། ཛ་ཀྲི་དང་། མཱཾ་ས་ནི་ཤ། བྲན་མོ་ཚོད་མ། ཤམ་མོ་སིང་པོ། ཀུན་དུ་རྒྱུ་ཚྭ། གཡོན་ཅན་སྒོག་པ། ཨ་མྲ་མི་ཤ། རྒུན་འབྲུམ་གླང་ཤ། ཨ་ག་རུ་རྟ་ཤ། ན་ལེ་བ་གླང་ཤ། གེ་རྒྱས་ཁྱི་ཤ་རྣམས་སོ། །མདོར་ན་ཤོ་མང་ཤིང་ཏོག་སོགས་བཟའ་བཅའ་བཏུང་བའི་རིགས་རྣམས་ཅི་འབྱོར་བསགས། དེ་ཡང་ཇོ་བོ་རྗེས་བོད་ལ་བསོད་ནམས་མི་འོང་གཏོར་ཟན་སླ་མོ་བྱེད་པར་འདུག ཅེས་གསུངས་པ་ལྟར། ཚོགས་ཟན་དེ་ཡང་རང་གི་ཟ་ཚོད་རན་པ་ཙམ་ལས་སླ་མོ་བྱ་མི་རུང་བར་གསུངས་ཤིང་ཚོགས་རྫས་རྣམས་སྒྲེ་བོར་མི་འཇོག་ཅིང་། ཚོགས་གདན་ཞིང་ངམ་གཅན་གཟན་གྱི་ལྤགས་པའམ་བྲིས་པའི་ཁར་ཀ་པཱ་ལའམ་རིན་པོ་ཆེའི་སྣོད་སོགས་སུ། བཟའ་བ་གཡས་དང་། བཏུང་བ་གཡོན་དུ་བཤམས་ཏེ། ཚོགས་ཆང་བྲན། དེ་ནས་བསང་ཆུས་སམ་ཆབ་གཙང་གིས་བྲན། དེ་ནས་ནང་མཆོད་ཀྱི་བདུད་རྩི་བྲན་པས་བསངས་ལ་བགེགས་བསྐྲད་དེ་ཉེས་སྐྱོན་སྦྱངས་ཤིང་བྱིན་གྱིས་བརླབས། འོན་ཀྱང་ཕྱི་མཆོད་རྣམ་ལྔ་དང་། རཀྟ་ལིང་ག་རྣམས་ལ་ནང་མཆོད་མི་འཐོར་བར་གསུངས་སོ། །དེ་ཡང་ཚོགས་ལ་ཆང་ཆུ་བྲན་པ་ནི་སྨིན་གླིང་ཕྱག་བཞེས་ཁུངས་ཐུབ་ཡིན་མོད། ཀཿཐོག་དགེ་རྩེ་རིན་པོ་ཆེས་ནི་ཆང་ཆུ་ཕལ་པ་བྲན་པ་ནི་དགོས་པ་ཆུང་བར་གསུངས་སོ། །འོན་ཀྱང་རྡོ་བྲག་རིག་འཛིན་རྗེས་དྲི་ཆབ་དང་བདུད་རྩི་ཚོགས་ལ་བྲན་དུས་དྲི་ཆབ་དང་བདུད་རྩི་ལས་ཁྲོ་བོ་རྨེ་བརྩེགས་སོགས་ཀྱི་ཚོགས་སྤྲོས་ཏེ་བགེགས་ཐམས་ཅད་བསྐྲད་པར་བསམ། རྃ་ཡྃ ་ཁྃ་གིས་དངོས་པོར་ཞེན་པའི་གཟུང་འཛིན་བག་ཆགས་བསྲེག་གཏོར་བཀྲུ་ཞེས་གསུངས་པ་ལྟར། བསང་བ་ནི་ལས་སྔགས་ཀྱིས་བགེགས་བསལ་བ་དང་སྦྱངས་བ་ནི་ཤུ་ུནྱ་ཏ་སོགས་སྔགས་ཀྱིས་ཐ་མལ་གྱི་སྣང་ཞེན་སྦྱངས་པའོ། དེས་མཚོན་ནས་སྤྱིར་གཏོར་མ་སོགས་ལ་སྨན་རཀ་བྲན་པའང་། འབག་རྩོག་སྦྱངས་བ་དང་བགེགས་བསལ་བ་དང་མཆོད་པ་འབུལ་བ་དང་བྱིན་གྱིས་རློབས་པ་དང་། ཆན་ལ་ཕབ་བཏབ་པ་བཞིན་དུ་ཐུགས་དམ་རྒྱུད་བསྐུལ་དུའགྱུར་བ་སོགས་དགོས་པ་སྣ་ཚོགས་དང་ལྡན་པ་ཁོ་ནའོ། །ཞེས་འཇིགས་གླིང་གསུངས་སོ། །དེ་ནས་སྣོད་ཉི་ཟླར་བཅུད་ཞལ་ཟས་ལ་འབྲུ་ལྔ་བཀོད་དེ། འབྲུ་གསུམ་སོགས་ཀྱི་སྔགས་རྒྱས་སྦྱངས་སྤེལ་བསྒྱུར་ཏེ་འདོད་ཡོན་གྱི་ཕུང་པོར་བྱིན་གྱིས་རླབས། དེ་ཡང་འཇིག་རྟེན་ཁམས་ཀྱི་འདོད་ཡོན་གྱི་བཅུད་ཐམས་ཅད་བདག་གི་འོད་ཟེར་གྱིས་བསྡུས་ཏེ་ཚོགས་རྫས་ལ་བསྟིམ་པ་ནི་གནད་ཡིན་པར་གསུངས་སོ། །སྤྱིར་ཚོགས་དང་གཏོར་མ་སོགས་ནི་ཐུན་མཚམས་ཀྱི་ལྷས་ཕུལ་ཀྱང་རུང་ལ། སྲོད་ཐུན་ལ་བསྡུས་པར་གཏོང་ན། གཙོ་བོའི་ཐུགས་ཀ་ནས་རང་འདྲ་ལས་ཀྱི་ལྷ་ཐོན་ནས་དཀྱིལ་འཁོར་གྱི་ཤར་ཁྱམས་སུ་འཁོད་དེ། ཚོགས་དང་གནས་འདྲེན་སོགས་བྱ་བའམ། ཚོགས་ཞིང་སྤྱན་དྲངས་པའང་གཏོར་མ་ལྷར་གསལ་བ་ལ་བསྟིམ་མོ། །ཡང་ན་ལས་ཀྱི་ལྷ་དེ་ཉིད་ཕྱིའི་འཁོར་ཡུག་གི་བྱང་ཤར་གྱི་དུར་ཁྲོད་དུ་འཁོད་ལ། དེར་དཀྱིལ་འཁོར་གྱི་ལྷ་དང་ཕྱོགས་བཅུའི་ཞིང་ནས་སྤྱན་དྲངས་པའི་མགྲོན་ཐབས་ཀྱི་ལྷ། རྩ་གསུམ་སྲུང་མ་དང་བཅས་པའི་ཚོགས་ཞིང་རྣམས་མཁའ་ཁྱབ་ཏུ་སྤྲིན་ཕུང་ལྟར་སད་པར་བསམ་ལ། གལ་པོ་ལས། དང་པོ་འདོད་ཡོན་དྲུག་གིས་མཆོད། །གཉིས་པ་དམ་རྫས་བདུད་རྩིས་བཤགས། །གསུམ་པ་དགྲ་བགེགས་གཟུགས་ཕུང་སྟོབས། ཞེས་ཚོགས་ཕུད་རྣམས་ཆ་གསུམ་དུ་སྤྲོ་གསུངས་པ་དང་། ཡང་བཞི་རུ་གསུངས་པའང་སྣང་བས་གང་ལྟར་ཡང་། དང་པོ་ཕུད་མཆོད་ཀྱི་ཚེ། འདོད་ཡོན་གྱི་ལྷ་མོ་ནམ་མཁའ་གང་བས་མཆོད་སྤྲིན་སྣ་ཚོགས་བསམ་གྱིས་མི་ཁྱབ་པས་ཚོགས་ཞིང་རྣམས་མཆོད་ཅིང་དགྱེས་པ་བསྐྱེད་པས་ཚོགས་གཉིས་རྫོགས་པར་བསམ་མོ། བར་བ་བཤགས་པའི་ཚེ་ཤ་ལྔ་བདུད་རྩི་ལྔ་སོགས་རྣམ་པ་དམ་ཚིག་གི་རྫས་ལ་ངོ་བོ་ཡེ་ཤེས་ཀྱི་བདུད་རྩིའི་རང་བཞིན་དུ་ཕུལ་ནས་དམ་ཚིག་ཉམས་ཆགས་ཉེས་ལྟུང་ཐམས་ཅད་བཤགས་པར་གསོལ་བས་དགྱེས་ཤིང་བརྩེ་བས་དགོངས་ཏེ། ཉེས་ཚོགས་ལྷག་མེད་དུ་བྱང་ནས་ཡེ་ཤེས་ལྷ་དང་འཁོན་བཅུག་དག་པར་བསམ་མོ། །ཐ་མ་ལ་ལིང་ཀ་ཟུར་བ་མེད་ན་བྱིན་རླབས་ཀྱི་གོང་དུ་བཅད་པ་ནི་དེར་ཟད་ལ། མིན་ན་ཚོགས་ཟན་གྱི་རྒྱབ་ངོས་ནས་བཅད་པ་ཁ་གྱེན་བསྟན་དུ་བཤམས་ལ། དེའི་འདོད་ཡོན་གྱི་ལྷ་མོ་ཧཱུྃ་ཞེས་རང་ལ་བསྡུས་ཏེ་དགྲ་བགེགས་འགུགས་འཆིང་བསྡོམ་མྱོས་བྱས་མཐར་རྣམ་ཤེས་སྤར་བའི་སྙིགས་མའི་ལུས་རྟེན་ཁྲོ་ཚོགས་ཀྱིས་རྡོ་རྗེ་བཟའ་བའི་དམ་ཚིག་ཏུ་སྤྱད་པར་བསམ་ཞིང་། བདུད་རྩི་བྲན་ལ་བསྟབ་པར་བྱའོ། །ཕུད་བཤགས་བསྒྲལ་བ་གསུམ་གར་བདུད་རྩི་བྲན་ནས་གཏོར་མར་འབུལ་རྒྱུ་ཡིན་ཀྱང་སྟབས་མི་བདེ་ན་འབུལ་ཚུལ་དང་མོས་པ་བྱ་ཞིང་མདུན་ཕྱོགས་སུ་གོ་རིམ་ལྟར་བསྒྲིགས་ནས་གང་བདེར་བཞག་མཐར་དངོས་གྲུབ་ཏུ་རོལ་པའམ། ཡང་ན་གཙང་ལྷག་ཁར་བསྣན་ནས་ལྷག་གཏོར་དུས་མཆོད་སྲོལ་ཀྱང་སྣང་བས་གང་བདེར་བྱའོ། །ཡང་ཚོགས་ཕུད་ཀྱི་སྔོན་དུ་བསྐང་བ་གཏོང་སྲོལ་སྣང་རུང་། རྡོ་བྲག་རིག་འཛིན་རྗེས་བར་པ་བཤགས་པའི་རྗེས་འབྲེལ་དུ་བསྐང་བ་གཏོང་བར་གསུངས་པ་ལྟར་རམ། ཡང་ན་སྨིན་གླིང་ཕྱག་སྲོལ་ལྟར་སྐབས་འདིར་གཏོང་ན་འཐད་པར་མངོན། དེ་ཡང་ཚོགས་མཆོད་ནི་བཟའ་བཏུང་གི་མགྲོན་ཐབས་ལྟ་བུ་དང་། བསྐང་བ་དངོས་རྫས་ཀྱི་འབུལ་ནོར་སྟོབས་པའི་ཚུལ་ལྟ་བུ་ཡིན་ཞེས་འཇམ་དབྱངས་མཁྱེན་བརྩེ་རིན་པོ་ཆེས་གསུངས་སོ། །དེ་ནས་ཆ་བཞི་པ་གནམ་ཕུད་ནི། ཚོགས་རྫས་བཤམ་པར་སྨན་རཀ་བྲན་ལ་གཙང་རིས་ཀྱི་མགོན་པོ་སོགས་ལ་མཆོད་པའམ་ཡང་ན་མགྲོན་རིགས་སྤྱི་ལ་ཐུན་མོང་དུ་དམིགས་པས་ཕྱི་རོལ་དུ་གཙང་སར་འབུལ་ལོ། །དེ་ནི་ཀུན་རྫོབ་དོན་དམ་ཟུང་འཇུག་ཏུ་བསྐང་བའི་དོན་ཡིན་པར་གཏེར་མ་འགའ་ནས་གསུངས་པ་སྣང་ལ། བཀའ་གཏེར་སྤྱིའི་འགྲོས་སུ་ཆ་བཞི་པ་ནི་གཙང་ལྷག་ཟུར་དུ་བཞག་པ་ལ་མཛད་དོ། །གང་ལྟར་ཡང་ཚོགས་ཐ་མའི་རྗེས་སུ་དབང་རབ་གནས་སྦྱིན་སྲེག་སྐོང་བཤགས་སོགས་ལས་རབ་འབྱམས་ཐམས་ཅད་འདིར་བྱ་བར་གསུངས་སོ། །ཆ་ལྔ་པ་ནི། ལས་རྡོར་གྱིས་ཐབས་ཤེས་ཀྱི་རྫས་རྣམས་བསྣོལ་ཏེ་སློབ་དཔོན་ལ་ཕུལ། སློབ་དཔོན་གྱིས་པད་སྐོར་དུ་སྔོན་དུ་འགྲོ་བས་རྩེ་གསུམ་གྱི་རྒྱས་ལེན་ཅིང་དེ་ནས་གྲལ་མགོ་ནས་རིམ་པས་འདུས་པ་ཀུན་ལ་བྲིམ། ཐམས་ཅད་ཀྱིས་ཤ་ལྔ་བདུད་རྩིར་ལྔར་མོས་བཞིན་ནང་གི་སྦྱིན་སྲེག་གིས་རོལ། དེའི་ཚུལ་ནི་ཁ་ཐབ་ཁུང་། ལྕེ་འཇིག་རྟེན་མེ་ལྷ། ལག་པ་དགངས་བླུགས། བཟའ་བཏུང་བསྲེག་རྫས། འདོད་ཡོན་ལྷ་མོས་ལུས་དཀྱིལ་ཞི་ཁྲོའི་ལྷ་ཚོགས་ཚིམ་པ་དྲུག་ལྡན་དུ་མཆོད་ཅིང་། གནས་དྲུག་གི་རིགས་དྲུག་ས་བོན་ཡང་ཚོགས་བདུད་རྩིའི་འོད་ཟེར་གྱིས་སྦྱངས་ཏེ་ལས་རྒྱུན་བཅད་པར་བསམ་ཞིང་སྨོན་ལམ་གདབ། དེ་ནས་འདུས་པ་རྣམས་ཀྱིས་ལྷག་རོལ་བསོག་འཇོག་མེད་པར་གྲལ་མཇུག་ནས་ཡར་བསྡུ་ཞིང་། གལ་པོ་ལས། ལྷག་མའི་དཀྱིལ་འཁོར་བྱང་ཤར་མཚམས། །ཞིང་ལྤགས་རཀྟའི་ཟླ་གམ་ཨེ། ཞེས་པས་དཀྱིལ་འཁོར་གྱི་བྱང་ཤར་རམ་ལྷོ་ནུབ་ཏུ་ཞི་བ་ལ་དྲིའི་མཎྚལ་ཟླུམ་པོ་དང་། ཁྲོ་བོ་ལ་ཞིང་ལྤགས་ལ་ཆོས་འབྱུང་དང་ཟླ་གམ་བྲིས་པའི་ཁར་སྔར་གྱི་ཚོགས་ཕུད་ཆ་བཞི་པ་གཙང་ལྷག་ལ་བསྒྲལ་བའི་ཕྱེད་ཆ་བསྣན་པ་དང་། རྩོག་ལྷག་བཅས་གོང་འོག་གི་ཚུལ་དུ་བཤམས་ལ། ཕུད་ཀྱིས་ཡར་གྱི་གནས་བདུན་མཆོད། དཔལ་ཆེན་པོ་དང་རྣལ་འབྱོར་བའི་རྩོག་ལྷག་གིས་མར་གྱི་གནས་བདུན་མཆོད་ཅེས་གསུངས་པས། ལྷག་མའི་དཀྱིལ་འཁོར་ཕྱི་ཁྱམས་མཐིང་ནག་གྲུ་གསུམ་འབྱམས་ཀླས་པའི་ནང་དུ་གཞལ་ཡས་ཁང་སྒོ་དང་བཅས་པར། རིགས་ལྔ། གནས་ཡུལ་སྒོ་མ་སྟེ་ཡར་གྱི་གནས་བདུན་ཞེས་ངོ་མཚར་ཚོགས་ཀྱི་ལྷ་སུམ་ཅུ་བསྐྱེད། ལྷག་གཏོར་ཟླ་བ་ལ་གནས་པའི་ༀ་གྱི་འཕྲོ་འདུས་གསང་བའི་ལོངས་སྤྱོད་འདོད་ཡོན་བདུད་རྩིའི་ཕུང་པོར་བརླབ། མཁའ་འགྲོ་གིང་ལང་སོགས་མར་གནས་བདུན་པོར་བཅས་ཏེ་སྙན་གསན་དབབ་ལ་སྤྱུགས་པའི་སྒྲ་དང་འདོད་རྒྱལ་གྱི་རྒྱས་སྤྱན་དྲངས་ནས་ཕྱི་ཁྱམས་གྲུ་གསུམ་པའི་ནང་དུ་བྱ་ནག་ཐེད་ལ་བབས་པ་ལྟར་ཐིབས་ཀྱིས་བྱོན་པར་བསམ། ཧེ་རུ་ཀའི་རྡོ་རྗེའི་ཁྱུང་གཤོག་རྒྱས་ཟིལ་གྱིས་མནན། པདྨའི་སྔགས་རྒྱས་གདན་འབུལ། རྟ་གདོང་གི་སྔགས་རྒྱས་དབང་དུ་བྱ། ཡུལ་གོང་མར་གྱུར་པ་ཞི་ཁྲོའི་ལྷ་ཚོགས་ཀྱི་མགྲོན་རྣམས་རིགས་སོ་སོའི་ཚོམ་བུ་ལྔར་བཞུགས་པ་སྤྱི་ལ་གཙང་ལྷག་རྨད་བྱུང་མཆོད་གཏོར་དུ་འབུལ། སྨན་རཀ་ཀྱང་སྦྲེངས། དང་པོ་ཕུད་ཀྱིས་མི་མཆོད་དུ། ཞི་ཁྲོའི་ལྷ་ཚོགས་ཕུད་ཀྱི་བདག་པོ་ཡིན་པས་ཐོག་མར་མཆོད་དགོས་ལ། ཞེས་གཙང་ལྷག་གིས་ཡར་གྱི་གནས་བདུན་ཆིག་དྲིལ་དུ་མཆོད་པའི་དོན་དང་། བར་དུ་གཉིས་མེད་གཅིག་ཏུ་མི་རོལ་དུ། མ་མོ་མཁའ་འགྲོ་ཚོགས་ལ་དགྱེས་པས་དེ་དང་ལྷན་ཅིག་ཏུ་ཚོགས་ལ་རོལ་བར་བྱ་བ་དང་། ཐ་མ་ལྷག་མས་མི་བསྐང་དུ། ལྷག་མའི་བདག་པོ་རྣམས་མཆོད་པའི་ཕྱིར་ཏེ། དེ་ལྟར་རིམ་པ་གསུམ་དུ་མི་དབྱེ་རྒྱུ། འཇིག་རྟེན་གྱི་ཆོས་ལྟར་རྗེ་དང་འབངས་ཀྱི་ཁྱད་ཆེ་ཕྱིར་དང་། མཐར་གཉིས་མེད་གཅིག་ཏུ་མི་བསྲེ་རྒྱུ། འཁོར་འདས་ཀྱི་ཆོས་ཐམས་ཅད་གཞི་འབྲས་དབྱེར་མེད་དུ་གཅིག་པའི་ཕྱིར་རོ། །ཞེས་རྒྱུ་མཚན་བསྒྲགས་པས་ངེས་ཤེས་བསྐྱེད། དེ་ནས་རྩོག་ལྷག་གིས་མཆོད་པ་ནི་བྱེ་བྲག་ཕུད་གཏོར་དམེ་གཏོར་དུ་མར་བླུགས་ཏེ་ཕུད་ལྷག་མཚམས་སྦྱར། དེ་ཡང་ཞི་རྒྱས་དབང་གསུམ་ལ་མར་བསྲེ་དྲག་པོ་ལ་ཡར་བསྲེ་ཞེས་ཀྱང་གསུངས་སོ། །སློབ་དཔོན་ལྟ་དགོངས་དང་ལྡན་ན་གཙོ་བོའི་ང་རྒྱལ་ལ་གནས་པས་ཡ་རྐན་རྟ་མགྲིན་དང་། མ་རྐན་རྣལ་འབྱོར་མར་གསལ་བའི་སྦྱོར་མཚམས་ནས་བྱང་སེམས་ཀྱི་བདུད་རྩི་དབབ་པར་མོས་པས་དམ་ཚིག་བསྲེ་ཕྱིར་ཁ་ཕྲུ་གདབ། དཀྱུས་མ་ལ་སྨན་རཀ་འཐོར་བས་ཆོག་ཅིང་བྱིན་གྱིས་བརླབས། དུས་མཚན་དང་གདོང་ཐུག་བསྲུང་ཕྱིར་མེ་སྒྲོན་བཙུགས། མར་གནས་རྣམས་ཀྱི་མཚན་ནས་སྨོས་ཏེ་མཆོད་ཅིང་ཕྲིན་ལས་བཅོལ། དེ་རྣམས་ཀྱིས་དམ་ཚིག་རྗེས་སུ་དྲན་ཏེ་བདག་གཙུག་གི་ནོར་བུ་ལྟར་འཁུར་ནས་ཅི་བཅོལ་ཐོགས་མེད་དུ་བསྒྲུབ་པར་བསམ་ཞིང་མཐར་ལས་རྡོར་གྱིས་ཞྭ་ལྷམ་བཅས་ཏེ། བསྒྲུབ་ཁང་གི་ཕྱི་རོལ་གོམ་པ་བདུན་ཅུའི་སར་སྲིན་མོ་ཟ་ལམ་གནས་པ་ཡིན་པས་དེར་བསྐྱལ་ལ་གཏོར་གཞུང་བཤལ། བཤལ་ཆུ་བསྔོ་རྒྱུའི་སྲོལ་འདི་མི་དགོས་པར་གསུངས། མཐར་ཡར་གནས་གྱི་རིགས་ལྔ་རང་ལ་བསྡུ། མགྲོན་གཞན་གཤེགས་ཤིང་དལ་བསྡུའོ། ཡང་འདྲ་མིན་ཅུང་ཟད། ཡང་དག་དཀྱིལ་ཆོག་ལས། ལྷག་གཏོར་ཡར་གྱི་གནས་བདུན་གྱི་ལྷ་བཀྲ་ལམ་གྱིས་གསལ་བར་དམིགས། གཏོར་མའི་ལྷ་ཚོགས་ལས་མཆོད་སྤྲིན་སྣ་ཚོགས་སུ་ཤར་བས་ལྷ་རྣམས་མཆོད་པར་བསམ་ཞིང་། གཏོར་མའི་ལྷ་རྣམས་རང་ལ་བསྟིམ་ནས་གཏོར་མ་བདུད་རྩིའི་རྒྱ་མཚོར་འཁྱིལ་བར་བསམ། དེ་ནས་མར་གནས་བདུན་པོ་སྤྱན་དྲངས་ལ་རིགས་ཀྱི་ཚོམ་བུ་ལྔར་མཆོད་ཅིང་དམེ་གཏོར་ལ་ཁ་ཕྲུ་གདབ་ནས་བསྔོ་བར་གསུངས། ཡང་ཞི་བའི་སྐབས་སུ་ལྷག་དཀྱིལ་གདན་དང་བཅས་པའི་ནང་གི་དབུས་དང་ཕྱོགས་བཞིར་རིགས་ཀྱི་ཡབ་ལྔ་བསྐྱེད་ཅིང་། གཏོར་མར་བྱིན་གྱིས་རླབས་མཁའ་འགྲོ་སུམ་ཅུ་རྩ་གཉིས་སྤྱན་དྲངས་ཏེ་རིགས་ལྔ་ལ་འཁྲིལ་བར་བསམ་ཞིང་། མེ་ཏོག་སོགས་ཀྱིས་མཆོད་ནས་གཏོར་མ་ཕུལ། དེ་ནས་མར་གནས་ལ་བསྔོ་ཚུལ་ཀྱང་གསུངས་སོ། །གཏེར་ཕྱོགས་འགའ་ནས་མར་གནས་ལ་བསྔོ་ཚུལ་ཙམ་ལས་མི་འབྱུང་བའང་སྣང་ངོ་། །གང་ལྟར་ཡང་སྒྲུབ་པ་ཞག་གྲངས་ལྟ་བུའི་ཚེ་དཀྱིལ་འཁོར་གྱི་བྱང་ཤར་དུ་ལྷག་བཙོན་གཏའ་མར་འཛིན་པ་ནི་ལས་མྱུར་བའི་ཆེད་དུ་ཡིན་ནོ། །སྐབས་འདིར་ཡར་གནས་བདུན་ནི། གལ་པོ་ལས། དབྱིངས་ནས་རྣམ་པར་བསྐུལ་བ་དང་། །བྱིན་གྱིས་ཡང་དག་བརླབས་པ་དང་། །ཐབས་ཆེན་ཡབ་ཏུ་བསྟན་པ་དང་། །ཤེས་རབ་ཡུམ་དུ་གནས་པ་དང་། །ཁྲོ་མོ་ཀཽ་རི་བརྒྱད་རྣམས་དང་། །ཡུལ་གྱི་ཕྲ་མེན་ཆེན་མོ་དང་། །ཡེ་ཤེས་སྒོ་མ་བཞི་པོ་རྣམས། །ཡར་གྱི་གནས་བདུན་དཀྱིལ་འཁོར་ཏེ། ཞེས་དང་། མར་གནས་བདུན་ནི་རྫུ་འཕྲུལ་མཁའ་ལ་འགྲོ་བ་སུམ་ཅུ་གཉིས། །སྦྱོར་དང་སྒྲོལ་ལ་དགའ་བའི་གིང་ཆེན་བརྒྱད། །ལིངྐ་ཚར་གསུམ་རྟོགས་ཚད་འབུལ་བ་དང་། །ལུས་ངག་ཡིད་ཀྱིས་གནོད་པའི་འབར་མ་བརྒྱད། །བདུད་སྲིན་མ་མོ་བདུན་དང་སྲིང་མོ་བཞི། །དྲུག་ཅུ་རྩ་བཞི་ཕོ་ཉའི་གནས་རྣམས་ཏེ། །ལྷག་མ་དག་ལ་དབང་བའི་གནས་དྲུག་ཡིན། །ཉི་ཤུ་རྩ་བརྒྱད་ཕུད་ལྷག་གཉིས་ལ་དབང་། ཞེས་སོ། །དམིགས་བསལ་ཚོགས་བརྒྱ་གྲངས་བསོགས་ལྟ་བུའི་ཚེ་ནི་བྱིན་རླབས་ནས་བཟུང་ལྷག་མའི་མཐར་ཐུག་གི་བར་བསྐྱར་ཟློས་བྱ་བ་ཡིན་ཀྱང་། དྲངས་བ་ནི་རྗེས་སུ་ལན་གཅིག་ཏུ་བྱས་པས་འཐུས་སོ། །ཡང་སྨིན་གླིང་ཕྱག་སྲོལ་ལྟར་ན་དྲངས་བའང་སློབ་དཔོན་ལ་འབུལ་ཚུལ་དང་། བཞེས་པའི་མོས་པ་བྱས་མཐར་དེ་མ་ཐག་ལྷག་མ་དང་མཉམ་དུ་བསྔོ་ཚུལ་གྱི་ཕྱག་བཞེས་ཀྱང་སྣང་ལ། དེ་ལྟར་དྲངས་བའང་གྲངས་བསགས་ན་ལེགས་ཞེས་ཀོ་ཤའི་དགེ་བཤེས་གསུངས་སོ། །དེ་ལྟ་བུའི་ཚོགས་འཁོར་དེ་ནི་ཚིམ་པ་དྲུག་ལྡན་དུ་གསུངས་ཏེ་ཚོགས་ཞིང་རྣམས་མཆོད་པས་ཚིམ་པ་དང་། རྣལ་འབྱོར་པ་རྣམས་རྡོ་རྗེའི་བཟའ་བཏུང་གིས་ཚིམ་པ་དང་། ཡེ་ཤེས་ཀྱི་འཁོར་ལོ་བདུད་རྩིའི་དྭངས་མས་ཚིམ་པ་དང་། ལུས་དཀྱིལ་གྱི་ལྷ་བདེ་སྟོང་གི་ཡེ་ཤེས་ཀྱིས་ཚིམ་པ་དང་། ཕྱི་ནང་གི་མཁའ་འགྲོ་རྣམས་གླུ་དབྱངས་ཀྱིས་ཚིམ་པ་དང་། དྲེགས་པ་ལས་བྱེད་ཀྱི་འབྱུང་པོ་རྣམས་གཏོར་མས་ཚིམ་པ་དང་དྲུག་ལྡན་ནོ། །ཞེས་འཇིགས་གླིང་གསུངས་སོ། །མཐར་ཚོགས་མགྲོན་གྱི་འཇིག་རྟེན་པ་གཤེགས། ཡེ་ཤེས་པ་རང་ལ་བསྡུ་ཞིང་། རང་གཙོ་བོའི་ཐུགས་ཀར་ཐིམ་པར་བསམ་མོ། །ཡང་ན་ཆོ་གའི་རྗེས་ཆོག་དུས་ལྷན་ཅིག་གཤེགས་བསྡུ་བྱས་ཀྱང་རུང་ངོ་། ཕན་ཡོན་ནི་རྡོ་རྗེའི་དྲྭ་བ་ལས། བསོད་ནམས་ནང་ནས་ཚོགས་འཁོར་མཆོག །ཚེ་འདིར་བསམ་པ་ཀུན་འགྲུབ་ཅིང་། །བགེགས་དང་བར་ཆད་ཞི་བ་དང་། །ཕྱི་མ་རིག་འཛིན་རྒྱལ་བའི་ཞིང་། །ཀུན་དུ་བཟང་པོ་ཐོབ་པར་འགྱུར། ཅེས་དང་། གཞན་ཡང་ཇི་སྐད་དུ། དམ་ཚིག་ཉམས་པའི་སྐྱོན་སེལ་ཞིང་། །མི་མཐུན་ཕྱོགས་རྣམས་འཇོམས་བྱེད་ལ། འདོད་པའི་དོན་རྣམས་སྒྲུབ་བྱེད་ཅིང་། །དགེ་བའི་ཚོགས་རྣམས་སྡུད་པ་གང་། །ཟོས་པས་དངོས་གྲུབ་འགྱུར་བ་ཉིད། །ལྷག་པའི་ལྷ་ཡང་ཚིམ་པར་འགྱུར། །ཕྱག་རྒྱ་ཆེན་པོའི་དངོས་གྲུབ་ནི། །མྱུར་དུ་ལུང་བསྟན་ཐོབ་བྱེད་པ། །ཚོགས་ཀྱི་འཁོར་ལོའི་ཆོ་ག་ཡིན། །རིམ་འདུས་འདོད་པའི་འབྲས་བུ་འབྱིན། ཞེས་སོགས་མཐའ་ཡས་ཤིང་། མདོར་ན་བསྒྲུབ་བྱ་རྣམས་མཉེས་ཤིང་། སྒྲུབ་པོའི་ཚོགས་གཉིས་རྫོགས་པ་དང་། དམ་ཚིག་ཉམས་ཆག་ཐམས་ཅད་སྐོང་ནས་ཧེ་རུ་ཀ་དང་སྐལ་པ་མཉམ་པར་འགྱུར་བའོ། །གཞན་ཡང་། སྐབས་འདིར་བསྒྲལ་ལས་ཀྱི་དམིགས་དོན་ཅུང་ཟད་སྤྲོ་བ་ལ། སྤྱིར་བསྒྲལ་བྱ་མཆོག་ཆེན་མཆོག་ཕྲན་ལ་བཞེད་ཚུལ་མང་ཡང་། སྤྱི་ཙམ་ལ་མཆོག་ཆེན་བཀྲ་ཤིས་དག་པའི་ཞིང་ནི་སྐྱེ་བ་བདུན་པའི་མི་དང་། མཆོག་ཕྲན་སྙིང་རྗེའི་ཞིང་ནི། ཞིང་བཅུ་དང་། ཉམས་པ་བདུན་དུ་གཏོགས་པའི་དགྲ་བགེགས་ཡིན་ལ། དེ་ལ་ཞིང་བཅུ་ནི་གསལ་བཀྲ་ལས། དཀོན་མཆོག་སློབ་དཔོན་སྐུ་དགྲ་གཉིས།། དམ་ཉམས་ལོག་དང་འཁུ་བ་དང་། །འདུ་བར་འོང་དང་ཡོངས་ལ་གནོད། །ངན་སོང་གསུམ་དང་བཅུ་པོ་ནི། །རྣལ་འབྱོར་ཀུན་གྱི་དང་བླངས། ཞེས་སོ། །ཉམས་པ་བདུན་ནི། དམ་ལས་ཉམས་པས་སློབ་དཔོན་མཆེད་ལ་བརྙེས། །བཀའ་ལས་ཉམས་པས་ལས་འབྲས་ཁྱད་དུ་བསད། །དོན་ལས་ཉམས་པས་བདེན་གཉིས་ཆད་པར་ལྟ། །ལས་ཀྱིས་ཉམས་པས་ཉེས་མེད་རྣམས་ལ་འཇུག །མཚན་མས་ཉམས་པས་ཆོས་ལ་ཕྱོགས་རིས་བཟུང་། །འདོད་པས་ཉམས་པས་ཁྲེལ་མེད་འཕྲོག་བཅོམ་བྱེད། །ལོག་པས་ཉམས་པས་སེམས་ཅན་སྡུག་ལ་སྦྱོར། ཅེས་པ་ལྟར་རོ། །དེ་ལྟ་བུའི་དགྲ་བགེགས་གང་ཡིན་དེའི་དམིགས་པའི་རྟེན། ཟན་ལིིང་ཉ་བོ་མཚན་ཉིད་ལྡན་པ་འཁོར་བ་རུ་ལོག་གི་རྟེན་འབྲེལ་དུ། མགོ་བོ་ལྷོ་ནུབ། རྐང་པ་བྱང་ཤར་དུ་གན་རྐྱལ། ཡང་ན་འཁོར་འདས་ལ་མདུན་རྒྱབ་ཚུལ་དུ་མགོ་བོ་རྒྱབ་དང་། གདོང་པ་རང་ལ་བསྟན་ཏེ་རཀྟ་བྲན། རང་ཉིད་སྲུང་བའི་རྫོང་མཁར་དུ་ཞུགས། བཟློག་པ་རྡོ་རྗེའི་དཔུང་བཤམས་ནས་ལུས་ལྷ་སྐུ། ངག་བརྗོད་བྲལ། སེམས་སྐྱེ་མེད་དུ་དཔའ་བ་སྟེ་དཔའ་གསུམ། ལྟ་བ་མཐའ་བྲལ། སྒོམ་པ་བློ་འདས། སྤྱོད་པ་ཤུག་འབྱུང་གི་གདེངས་ཏེ་གདེངས་གསུམ། རིག་པ་མདུང་ལས་རྣོ་བས་ཕྱིའི་དྲེགས་པ་འབིག་པ། རིག་པ་གསེག་བརྡར་ལྟ་བུས་ནང་གི་ཉོན་མོངས་གཅོད་པ། རིག་པ་རླུང་ཤུགས་ལྟ་བུས་རྣམ་རྟོག་སྤྲིན་ཕུང་གཏོར་བའི་ངར་གསུམ་དང་དགུ་པོ་ཚང་བར་ཧཱུྃ་དགུས་ཆེ་བ་བསྐྱེད་ནས་ཕྲིན་ལས་བསྐུལ་ཞིང་། གཟིར་བྱ་དགྲ་བགེགས་གང་ཡིན་དངོས་སུ་གསལ་བ་ལ་འགུགས་བསྟིམ་བགྱིས་ཏེ། ལྟ་བ་ཆོས་ཉིད་ཀྱི་རྫོང་། སྒོམ་པ་ཏིང་འཛིན་གྱི་འཕྲང་། སྤྱོད་པ་སྙིང་རྗེའི་སྲོག་དང་ལྡན་པས་སྒྲོལ་བའི་ལས་ལ་འཇུག་སྟེ། རྒྱུད་ལས། སྙིང་རྗེ་བསྒྲལ་བའི་དམ་ཚིག་ནི། །བསད་ཅིང་མནན་པ་མ་ཡིན་ཏེ། ཞེས་པ་ལྟར། གཞི་ཡི་ཀུན་སློང་སྙིང་རྗེ་དང་། དུས་ཀྱི་ཀུན་སློང་ཞེ་སྡང་བར་མ་ཆད་པའི་ངང་ནས། མི་ལྡོག་པའི་གནད་རང་ཉིད་ཧེ་རུ་ཀར་གསལ། མི་རྡུག་པའི་གནད་ཕུར་བུ་སྲས་མཆོག་ཏུ་གསལ། མི་འབྱམས་པའི་ཕྱིར་ལིངྒ་གཟས་པོ་དངོས་སུ་གསལ་ལ། ཚེ་ཁྲུས་ནི་དམིགས་བྱའི་སྙིང་ནང་དུ་རྣམ་ཤེས་སྲོག་གི་དངོས་པོ་ལ་ཕུར་བུ་བསྒྲིལ་ཞིང་དེ་ལས་བྱུང་བའི་འོད་ཀྱིས་ཕྱོགས་བཅུའི་རྒྱལ་བ་སྲས་བཅས་ཀྱི་བྱིན་རླབས་ནུས་མཐུ་ཐམས་ཅད་བཀུགས་ནས་ཕུར་བུ་ལ་ཐིམ་པས་སྲིད་པ་གསུམ་ཡང་བརླག་པར་ནུས་པའི་མཐུ་ལྡན་དུ་བསམ་ལ་བླ་གནས་དང་བསྟུན་ནས་དབང་པོའི་སྒོ་རྣམས་སུ་རིམ་པར་བཏབ་རྗེས། ཁོའི་སྙིང་གར་བསྣུན་པས་ཁོའི་སྙིང་ནང་ན་ཁྲག་གི་དྭངས་མ་བྱེའུ་ལེབ་མའི་མགོ་ཙམ་གྱི་དབུས་ན། ཚེ་རྟེན་ཨ་དཀར་པོ་འོད་ཀྱི་རང་བཞིན་ཐིག་ལེའི་ནང་དུ་རྣམ་ཤེས་ཀྱི་རྟེན་སྲོག་ཡིག་ཎི་ལྗང་ཁུ་ཡོད་པ་དེ་ལ་ཕུར་བུའི་རྩེ་མོར་ཧཱུྃ་གསུམ་དང་། དེའི་འོག་ཏུ་ཕཊ་གསུམ་གསལ་བ་དེ་དག་གིས་སྙིང་ཁའི་ཚེ་རྟེན་ལ་བཏབ་པས་ཎི་ཨར་བཅས་ཕུར་རྩེར་དཀར་ཡེར་གྱིས་འདུས་པ་དེ། ཕུར་རྩེ་ཚུར་བསྟན་པས་ཨ་དེ་ཉིད་རང་གི་ཐུགས་ཀའི་ཧཱུྃ་ལ་ཐིམ་པས་རང་ཉིད་བཀྲག་མདངས་གཟི་བརྗིད་དང་ལྡན་པར་བསམ་པ་ནི་ཚེ་ལུང་ངོ་། ། སྲོག་ཡིག་ཎི་དེ་ཕུར་རྩེའི་ཧཱུྃ་གསུམ་ལ་ཐིམ་པས། འོག་གི་ཕཊ་གསུམ་གྱིས་འཕང་བས་འོག་མིན་དུ་དཔལ་ཆེན་པོའི་ཐུགས་པར་ཐིམ་པས། ཧཱུྃ་གསུམ་པོ་དེའི་ནང་ནས་ཀུན་གཞིའི་ཧཱུྃ་སྔོན་པོ་དེ་ཐུགས་སྲོག་གི་ཧཱུྃ་དང་བཅས་འོད་དུ་ཞུ་ནས། ཉོན་ཡིད་ཧཱུྃ་དམར་པོ་དང་བཅས་པ་མགྲིན་པའི་ཨ་ལ་ཐིམ། ཨ་དང་ཡིད་ཤེས་ཀྱི་ཧཱུྃ་དཀར་པོ་གཉིས་སྤྱི་བོའི་ཨོཾ་ལ་ཐིམ། དེ་ཡང་འོད་དུ་ཞུ་ནས་གཅིག་དུ་འདྲིལ་བ་རྒལ་ཚིག་གི་རྟ་ལ་བརྒྱུད་དེ་ཡུམ་གྱི་མཁར་བབས་པས་རྒྱལ་བའི་སྲས་སུ་སྐྱེས་པར་བསམ་པ་ནི་ཁྲུས་ལུང་དང་གནས་ལུང་ཡིན་ནོ། །དེ་ནས་སྙིགས་མའི་ལུས་རྟེན་ཕོའི་རྐང་པ་གཡས་ནས་དང་། མོའི་རྐང་པ་གཡོན་ནས་རིམ་པས་གཏུབ་སྟེ་བདུད་རྩིས་བྲན་ལ་ཟ་བྱེད་པདྨའི་གིང་ཕོ་མོ་སྤྲུལ་བ་བཅས་པས་བསྒྲལ་མཆོད་རྣམས་སྟང་སྟབས་གར་དང་བཅས་ཏེ་དཀྱིལ་འཁོར་ལྷ་ལ་བསྟབ་པས་དགྱེས་པའི་སྐན་སྒྲ་དང་བཅས་ཏེ་ཧབ་དིར་གྱིས་ཆོམ་ཆོམ་དུ་རོལ་བར་བསམ་ལ། ཆ་གཅིག་བཟློག་གཏོར་ལ་བསྟབ། ཆ་གཅིག་བཟློག་བསྐུལ་ཚེ་འབུལ། ཆ་གཅིག་ལྷག་གཏོར་གཙང་དམེ་ལ་བསྲེ་ཞེས་སྨིན་གླིང་གཏེར་ཆེན་གསུངས་པ་ལྟར་བྱའོ། །དེ་ལྟར་ཚེ་བཅུད་ཀྱི་བདག་འཚེང་། རྣམ་ཤེས་སྤར་བས་དགྲ་འཚེང་། ཤ་ཁྲག་བསྟབ་པས་ལྷ་སྟེ་འཚེང་བ་གསུམ་གྱི་བསྒྲལ་འབྲས་དང་ལྡན་པས། ལྷ་རྟེན་ལུས་སེམས་ཤ་རུས་ཏེ། ཁ་སྦྱོར་གསུམ་པོ་དབྱེ་བ་ནི། །བསད་པའི་ལས་ཀྱི་ཆོ་གའོ། །དེ་ལྟ་བུའི་མངོན་སྤྱོད་ཕྲིན་ལས་ཀྱི་གཙོ་བོ་སྲུང་བཟློག་བསད་གསུམ་གྱི་མཐའ་ནི། སྲུང་བ་ལ་མནན་པ། བཟློག་པ་ལ་འཕང་བ། བསད་པ་ལ་བསྲེག་པས་མཐའ་བསྡུ་བར་བྱ་ཞེས་ཀོང་སྤྲུལ་གསུངས་སོ། །དེ་ལྟར་ཚོགས་བསྐང་སོགས་འཇུག་ཆོག་རྒྱས་པར་སྦྲེལ་ཚེ་སྐབས་འདིར་སྲུང་མའི་ཐུན་གཏོར་འབུལ་བ་ཡིན་ནོ། །དེ་ཚེ་རྩ་གསུམ་དང་ནོར་ལྷ་མ་གཏོགས་པའི་འབུལ་གཏོར་རྣམས་བསྒུལ་ཞིང་སྨན་རཀ་བྲན། གཏོར་གཞོང་ཡེ་ཤེས་བནྡྷའི་ནང་གཏོར་མ་ཡེ་ཤེས་ཀྱི་བདུད་རྩིས་གང་བར་དམིགས། བཀའ་བསྲུང་རྣམ་སྐད་ཅིག་གིས་གཡག་རྒོད་འགྲོགས་པ་བཞིན་བྱུང་ནས་ལག་ན་རིན་པོ་ཆེའི་གཞོང་པ་ཐོགས་ནས་གཏོར་མ་བླངས་ཏེ་དགྱེས་ཚིམ་བཀྲག་གཟི་མདངས་དང་ལྡན་པར་བསམ་ཞེས་རྡོ་བྲག་རྗེས་གསུངས། འགྱུར་མེད་རྡོ་རྗེས་འགུགས་གཞུག་མཐར་དགྲ་བགེགས་ཀྱི་ཤ་ཁྲག་གཏོར་མ་ལ་ཐིམ་ནས་བདུད་རྩིར་བྱས་པ། དམ་ཅན་རྣམས་ཀྱིས་ལྷག་མ་མེད་པར་ཧབ་དིར་གྱིས་གསོལ་བར་བསམ་གསུངས་སོ། དེ་ནས་བསྐུལ་བའི་དུས་གཏོར་མ་ལྷར་གསལ་བ་ལ་སྨན་རཀ་བྲན་པས་ཐུགས་རྒྱུད་བསྐུལ་ཏེ། ཆོས་སྐུ་ཞི་བ་ཆེན་པོའི་དབྱིངས་ནས། འགྲོ་བའི་དོན་ཕྱིར་གཟུགས་སྐུ་ཁྲོས་པའི་ཚུལ་གྱིས་བཞེངས་ནས་ཕྲིན་ལས་གཡེལ་བ་མེད་པའི་ལས་ལ་རྔམས་ཤིང་རངས་པར་བསམ་མོ། །ཆད་ཐོའི་སྐབས་སུ་ཡང་སྨན་རཀ་བྲན་པས་བྱིན་གྱིས་རླབས་ཤིང་། རྒྱུན་པར་ནི་ཕོ་མོ་མ་ནིང་གི་རྒྱུད་གསུམ་གྱི་དམ་ཅན་རྣམས་ལ་གཏོར་འབུལ་གྱི་ཚུལ་དུ་མཆོད། དམིགས་བསལ་དྲག་པོའི་དུས་ཟོར་དུ་འཕང་ངོ་། །གཏོར་གཞོང་བཤལ་ཆུ་བསྟན་མའི་གཏོར་མར་བྲན་ལ། ཐུགས་ཀའི་འོད་ཟེར་གྱིས་བསྟན་མ་བཅུ་གཉིས་སྒྲུབ་ཁང་གི་ཕྱི་རོལ་དུ་སྤྱན་དྲངས་ལ་མཐུན་རྫས་ཀྱི་མཉེས་པར་བྱས་ནས། ལས་རྡོར་གྱིས་གོམ་པ་བདུན་ཅུའི་སར་ཕྱིན་ཏེ་གཏོར་མ་གཤེགས་ལ། མགྲོན་རྣམས་རང་གནས་སུ་གཏོང་། གྲལ་མཐར་གཏོར་གཞོང་ཁ་སྦུབ་ལ། སྣོད་ཀྱི་འཇིག་རྟེན་ཨེ་གྲུ་གསུམ་དུ་དགྲ་འདྲེ་མནན་ལ། གཏོར་གཞོང་རི་རབ་ཀྱི་སྟེང་བཅུད་ཀྱི་སེམས་ཅན་རྟ་མཆོག་ཧེ་རུ་ཀར་གསལ་བས་རྡོ་རྗེའི་བྲོ་བརྡུང་སྟེ་དགྲ་བགེགས་ཀྱི་ཉོན་མོངས་པ་གཏན་ནས་བརླག་པར་བསམ་པས་ལས་ཀྱི་མཐའ་སྡུད་བྱ་བ་ཡིན་ནོ། གཞན་ཡང་འཕྲོས་དོན་ཕྲན་བུ་རྣམས་ནི། དགོངས་འདུས་ལས། སྒྲུབ་པ་མ་ཐོན་པར་གཞན་གྱི་གོས་མི་གྱོན་སྒྲུབ་པ་གཡེལ། གདོན་ཅན་ལག་གི་ཟས་ཟོས་ན་ཁ་འགྱང་། གདན་མི་སྤོ་དྲོད་རྟགས་ཡལ། གཞན་ལ་སྲུང་སྐྱོབ་བྱས་ན་ནུས་པ་ཉམས། གོས་རྙིང་པ་དང་ལུས་བཀྲུས་ན་དངོས་གྲུབ་ཡལ། སྐྲ་སེན་བྲེག་ན་སྔགས་ཀྱི་ངར་ཉམས། གཞན་དང་ངག་བསྲེས་ན་སྔགས་གྲངས་སུ་མི་འགྲོ། ཁྱད་པར་དམ་ཉམས་སྡིག་ཅན་དང་གྲིབ་ཅན་སོགས་ལ་ངག་མི་བསྲེ། སྐད་གསང་མཐོན་པོར་བཟླས་ན་ནུས་པ་ཉམས་ཤིང་འབྱུང་པོ་ཕྲ་མོ་བརྒྱལ་བས་ཤུབ་བུར་བཟླ། གན་རྐྱལ་གྱིས་བྲང་སྟེང་ཕྲེང་བ་མི་བགྲང་ཕུས་མི་གདབ། མཚམས་ཁང་དུ་ཆོས་བཤད་ན་གྲུབ་རྟགས་མི་ཐོན། དམ་བཅའ་རིང་པོ་བྱས་ན་བར་ཆད་ལྡང་བས་ཐུང་ངུའི་ཡུན་བསྲིང་། མཆིལ་སྣབ་བསད་བཟློག་གི་དུས་མ་གཏོགས་ཕྱིར་མི་དོར་སྔགས་ལ་སེལ་འཇུག འགྲིམ་ལམ་དུ་མི་དོར་ངག་ནོན་འགྲོ། ཉིན་པར་མི་གཉིད་སྐྱོན་མང་། ཟག་པ་མིས་མཐོང་བ་དང་འགྲིམ་ལམ་དུ་མི་དོར། སྒྲུབ་རྫས་གཞན་ལ་མི་བསྟན། དངོས་གྲུབ་ཀྱི་རྫས་མི་སྦྱིན། ཚར་ནས་གཏང་རག་མཆོད། མཚམས་ཧར་འདོན་མི་བྱ། རྣམ་གཡེང་དང་སྒོ་གསུམ་འཁྲུགས་ཤིང་ཟིང་བའི་ལས་མི་བྱ་སྟེ། ཐ་མལ་གྱི་བྱ་བས་གཡེངས་བ་ནི་ངན་དྲེད་དང་། དགེ་སྦྱོར་ཕྱོགས་གཞན་ལ་གཡོ་བའང་བཟང་དྲེད་དུ་གསུངས་སོ། ཡང་སྔགས་བཟླ་དུས་ལྕེ་མ་བདེ་ན། ཁྲུས་དང་གཙང་སྦྲ་དག་པའམ། ལྕེའི་བད་ཀན་ལེགས་པར་བཞར་ནས། པི་པི་ལིང་ངམ་ན་ལེ་ཤམ་གྱིས་ཕྱེ་མ་ཐུམ་རེ་བླུགས་ལ་སྲིན་ལག་གིས་ལྕེའི་སྟེང་གི་ཟུར་ཐམས་ཅད་ལ་ཁྱབ་པར་བྱུག དེ་འདྲ་ནང་མ་འགར་བྱས་པས་ཕན་པར་འགྱུར་རོ། །རྒྱུན་པར་མཆོད་པ་རྣམས་ཁ་གསོ་དགོས་པས་མི་བརྗེ་བར་བྱ། དུས་ཆེན་རྣམས་སུ་མཆོད་པ་རྙིང་པ་རྣམས་ཕྱིར་མི་འདོར་བར་ཕྱོགས་གཅིག་ཏུ་བསྡུས་ཏེ་གསར་དུ་བརྗེ་བར་ཡང་མཛད། གཏོར་མ་དང་མཆོད་པ་རྣམས་བཤམས་མ་ཐག་བྱིན་རླབས་མ་བྱས་ན་བགེགས་འཇུག་པས་ཆབ་གཙང་གིས་བྲན་ཏེ་བྱིན་གྱིས་བ རླབས། རང་དང་གཏོར་མའི་བར་མ་ཆོད་པར་བྱ་ཞིང་། རྒྱང་རིང་དང་། སྟེགས་མེད་དང་། ཡོན་པོ་དང་། གོང་འོག་གི་གོ་རིམ་འཆོལ་བ་སོགས་མི་བྱ། རྩར་སྣོད་སྟོང་མི་བཞག དཔལ་གཏོར་དེ་སྒྲུབ་པའི་གཏོར་མ་བཟུང་བས་ལྷ་དང་དངོས་གྲུབ་འདུ། སྲུང་མའི་རྒྱུན་གཏོར་ནི་ནང་མོ་བཟུང་ལ་དགོང་མོ་བཏང་བས་ལས་མྱུར་དངོས་གྲུབ་སྟེར། དུས་གཏོར་དང་སྐོང་གཏོར་མ་ཆགས་པས་བསམ་པ་འགྲུབ། གཏོར་མ་གཏོང་དུས་ཞལ་ཕྱིར་མི་སྟོན། ཕྱི་རོལ་གཏོར་མ་སྟེགས་ལ་ཞལ་ནང་བསྟན་དུ་འབུལ། གཏོར་གཞོང་ཀྱང་ཁ་ཕྱིར་མི་སྟོན་ཅིང་སྒྲུབ་པ་མ་ཐོན་བར་དུ་མི་བཤལ། བཟློག་གཏོར་སོགས་དྲག་གཏོར་གྱི་ཞལ་ཕྱིར་སྟོན་ཅིང་ཟོར་དུ་འཕང་བས་དགྲ་བགེགས་ཐུལ། སྤྱིར་ཞི་བའི་གཏོར་མ་ཟོར་དུ་མི་འཕེན། རྒྱས་པ་དང་དབང་གི་གཏོར་མ་རིང་དུ་མི་བསྐྱལ ལམ་ཞུགས་བར་ཆད་སེལ་ཕྱིར་འགྲོ་ཕྱོགས་སུ་གཏོང་། གླུད་དང་འཆི་བསླུ་ལན་ཆགས་སོགས་ཀྱི་གཏོར་མ་ཕྱོགས་བཞིར་གཏོང་ཞིང་གཏོར་གཞོང་ཡང་བཤལ། བསྐྲད་པ་གེགས་སེལ་གྱི་གཏོར་མ་རྒྱང་བསྲིང་། ཁྱད་པར་དུ་སྲུང་མའི་མཆོད་གཏོར་ལྟ་བུ་ནི་བསང་མཆོད་ལྟ་བུའི་མེ་ནང་འབུལ་བ་ཤིན་དུ་ཟབ། མིན་ཀྱང་མི་ཁྱི་ཕག་སོགས་ཀྱི་ཟག་རྫས་མེད་པའི་གཙང་སར་བསྐྱལ། ཁྱི་དང་བྱི་བ་སོགས་མཆེ་དུག་ཅན་ལ་མི་སྟེར། གཞན་གྱི་ཆས་གཏོང་ལེན་མི་བྱ། གལ་ཏེ་ནང་དུ་འོང་དགོས་ན་ཕྱི་རོལ་དུ་ཞག་གིས་བར་ཆོད་པར་བྱ་ཞིང་རིམ་པས་འཇུག དེ་ཚེ་སྔ་རོལ་དུ་རྨི་ལམ་སྣ་ཚོགས་འོང་ན་འཕྲུལ་སྣང་ཡིན་པས་ཏིང་འཛིན་གཟེར། རྗེས་སུ་བྱུང་ན་གྲིབ་ལྷོང་ཡིན་པས་ཡི་གེ་བརྒྱ་པར་འབད། ཅེས་སོགས་ཀྱང་གསུངས་སོ། །ཡང་ཆོ་གའི་གཞུང་འགའ་ནས་འབྱུང་བའི་སྔགས་དོན་ཁ་ཤས་ནི། རྡོ་རྗེ་རྩེ་མོ་ལས། ཨོཾ་ནི་ཅི་ཞིག་ཡིན་པར་བརྗོད། །མཆོག་དང་ནོར་གཏེར་དཔལ་དང་གཡང་། །སྐལ་པ་བཟང་པོ་རྣམས་དང་ལྡན། །དམ་བཅའ་བ་དང་བཀྲ་ཤིས་དོན། །ནོར་བུ་འཛིན་པའི་སྔགས་སུ་བརྗོད། ཅེས་དང་། སྭཱ་ཧཱ་ཞེས་ནི་ཅི་ཡིན་བརྗོད། །སྡིག་པ་ཐམས་ཅད་ཞི་བྱེད་ཅིང་།། དགེ་བའི་ཚོགས་ནི་འཕེལ་བར་བྱེད། །ཉེས་པ་ཐམས་ཅད་འཕྲོག་བྱེད་ཅིང་། །སྡུག་བསྔལ་ཐམས་ཅད་འཇོམས་པའི་མཆོག ཅེས་དང་། ཡི་གེ་ཧཱུྃ་ནི་ཅི་ཡིན་བརྗོད། །སྡུག་བསྔལ་འཆོས་ཤིང་འཇོམས་པར་བྱེད། །གདུག་པ་སྔགས་ཀྱིས་གསོད་བྱེད་ཅིང་། །སྲིད་པའི་ཞགས་པ་གཅོད་པར་བྱེད། །ཧཱུྃ་ནི་མཆོག་ཏུ་དྲན་པར་བྱ། ཞེས་སོ། །ཚིག་གི་ཐོག་མཐའ་ཧཱུྃ་དང་བྷྱོ་ནི་སྲོག་སྔགས་ནས་འབོད་པའི་དོན་ཡིན་ནོ། །ཡང་ཨེ་ནི་འདིར། ཨ་ར་ལི་ནི་རོལ་བ། ཧྲིང་ཧྲིང་ནི་འདུས་ཤིག་གི་བརྡའ་སྐད་དོ། །ཨེ་ཧྱ་ཧི་ཚུར་བྱོན་ཚུར་བྱོན། ས་མ་ཡ་ཧྲིང་ཧྲིང་ཛཿཛཿནི་དམ་ཚིག་ལ་དགོངས་ཏེ་བྱོན་བྱོན། ཏིཥྛ་བརྟན་པར། ལྷན་ནི་བཞུགས་ཤིག་པའོ། །ཨོཾ་ཨཱཿཧཱུྃ་སྐུ་གསུང་ཐུགས་མཉེས་པའི་མཆོད་རྫས། སརྦ་པཉྩ་ཨ་མྲྀ་ཏ་ཐམས་ཅད་བདུད་རྩིར་ལྔར། ཧཱུྃ་ཡེ་ཤེས་ལྔར། ཧྲཱི་དངོས་གྲུབ་སྡུད་པ། ཋ་ཐམས་ཅད་སངས་རྒྱས་པའོ། །ཨེ་དམ་ནི་འདི། བ་ལིངྟ་གཏོར་མ། ཁ་རཾ་སྟོབས་པའམ། འབར་བའི་ཞལ་དུ། ཁ་ཧི་གསོལ་ཅིག་པའོ། །མ་ཧཱ་བ་ལིངྟ་གཏོར་མ་ཆེན་པོ། ཏེ་ཛྭ་བ་ལིངྟ་གཟི་བརྗིད་ཀྱི་གཏོར་མ། བ་ལ་བ་ཏྱ་སྟོབས་ཀྱི་ཞལ་ཟས། གུ་ཧྱེ་ས་མ་ཡ་སྭཱ་ཧཱ་གསང་བའི་དམ་ཚིག་ལེགས་པར་སྦྱིན་པའོ། །མ་ཧཱ་རཀྟ་པཱུ་ཛ་ཁཱ་ཧི་ཁྲག་ཆེན་གྱི་མཆོད་པ་གསོལ་ཅིག་པའོ། །ས་པ་རི་ཝཱ་ར་འཁོར་དང་བཅས་པ། ཨརྒྷཾ་ནི་མཆོད་ཡོན། པྲ་ཏིཙྪ་ནི་སོ་སོར་བཞེས། པཱུ་ཛ་མཆོད་པ། མེ་གྷ་སྤྲིན། ས་མུ་དྲ་རྒྱ་མཚོ། སྥ་ར་ཎ་འཕྲོ་བ། ས་མ་ཡ་དམ་ཚིག་གམ་དུས་ལའང་འཇུག ཤྲི་ཡེ་བཞིན་དུ་བཞེས། ཨ་དང་ཧཱུྃ་ནི་གསུང་ཐུགས་ཀྱི་ས་བོན། སྭཱ་ཧཱ་ནི་དབུགས་འབྱིན་པའི་དོན། པྲ་ཏིཙྪ་ཟུར་ཆགས་པ། པྲ་ཏི་ཛ་ཡེ་ནི་སོ་སོའི་བཞེད་པ་ལྟར་གསོལ་ཅིག་པའོ། །བོ་དྷི་ཙིཏྟ་བྱང་ཆུབ་སེམས། མ་ཧཱ་སུ་ཁ་བདེ་བ་ཆེན་པོ། དྷརྨ་དྷརྟུ་ཆོས་ཀྱི་དབྱིངས། ཨོཾ་བཛྲ་ཨ་མྲྀ་ཏ་ཀུནྚ་ལི་ཧ་ན་ཧ་ན་ཧཱུྃ་རྡོ་རྗེ་བདུད་རྩི་འཁྱིལ་བ་ལ་བསྣུན་བསྣུན། སརྦ་ཤ་ཏྲུཾ་དགྲ་ཐམས་ཅད། མ་ར་ཡ་རྦད་སོད་ཅིག་པའོ། །ཨ་ཧོ་སུ་ཁ་མཉམ་པའི་བདེ་བ། ཡང་ན་ཨ་སྐྱེ་མེད་ཧོ་དགྱེས་པའམ་དགྱེས་པར་མཛོད་ཅིག་པའོ། །ཨརྩིག་ཁྲོས་པ། ནེརྩིག་རབ་ཏུ་ཁྲོས་པ། ཡང་ཨ་བ་བྷྲམ་ཤའི་སྐད་དུ། ཨ་ལི་བཟའ་བ། ཨུ་ལི་བཏུང་བ། ཏ་ལི་བཅའ་བ། ཏ་པ་ལི་བགོ་བའོ། །ཏེ་ཏེ་ཧཱུྃ་ཏེ་ན་ཏེ་ཏེ་ཧཱུྃ་ནི་གླུ་བྲོ་གར་གྱི་དོན་ཡིན་པར་གསུངས་སོ། །ཀཱ་ཡ་ཝཀྐ་ཙིཏྟ་སིདྡྷི་ཧཱུྃ་ནི་སྐུ་གསུང་ཐུགས་ཀྱི་དངོས་གྲུབ་སྡུས་ཤིག སརྦ་སིདྡྷི་ཕ་ལ་ཧཱུྃ་ཨཱ༔ནི་དངོས་གྲུབ་ཐམས་ཅད་ལེགས་པར་བསྡུས་ཏེ་སྩོལ་ཅིག་པའོ། །གཞན་ཡང་དགེ་སྦྱོར་འགྱུར་ཆེ་བའི་དུས་ཁྱད་པར་ཅན་གྱི་ཟླ་བ་བཞི་ནི། དུས་འཁོར་ལྟར་ན་དགུན་ཟླ་ཐ་ཆུང་མཆུ་ཟླ། ཧོར་ཟླ་དང་པོའི་ཚེས་གཅིག་ནས་བཅོ་ལྔའི་བར་ཆོ་འཕྲུལ་ཆེན་པོ་བསྟན་པའི་དུས་ཆེན། དཔྱིད་ཐ་ས་ག་ཟླ་བ་ཧོར་ཟླ་བཞི་བའི་ཚེས་བདུན་ལ་བལྟམས་པ་དང་། བཅོ་ལྔ་ལ་བྱང་ཆུབ་པ་དང་མྱ་ངན་ལས་འདས་པའི་དུས་ཆེན། དབྱར་འབྲིང་ཆུ་སྟོད་ཟླ་བ་ཧོར་ཟླ་དྲུག་པའི་ཚེས་བཞི་ལ་ཆོས་འཁོར་བསྐོར་བ་དང་། བཅོ་ལྔ་ལ་ལྷུམ་སུ་ཞུགས་པའི་དུས་ཆེན། སྟོན་འབྲིང་དབྱུག་པ་ཟླ་བ་ཧོར་ཟླ་དགུ་བའི་ཉེར་གཉིས་ལ་ལྷ་ལས་བབས་པའི་དུས་ཆེན་སྟེ། དེ་དག་གི་ཟླ་བ་རིལ་པོ་དུས་ཆེན་སྟེ། དེ་དག་ཡིན་ནོ། །ཡང་དཔྱིད་འབྲིང་ནག་པ་ཟླ་བ་ཧོར་ཟླ་གསུམ་པའི་ཚེས་གསུམ་ལ་དུས་འཁོར་གསུངས་པ་དང་། བཅོ་ལྔ་ལ་ཤེར་མདོ་གསུངས་པའི་དུས་སོགས་རྒྱུད་པོ་གསུངས་པའི་དུས་སོ། །རྒྱུན་པར་ཉ་སྟོང་ཚེས་བརྒྱད་གསུམ་རྣམས་ནི། སྣང་མཐའ། ཤཱཀྱ་ཐུབ་པ། སྨན་བླ་རྣམས་ཀྱི་དུས་ཆེན་ཅེས་གསུངས་སོ། །ཡང་ཀུན་མཁྱེན་ཀློང་ཆེན་པའི་གསུང་ལྟར་ལོ་ཆེན་དྷརྨ་ཤྲཱིས། ཕྱི་ལྟར་ན་ཚེས་བརྒྱད། བཅུ་བཞི། བཅོ་ལྔ། གནམ་སྟོང་རྣམས་ལ་རྒྱལ་ཆེན་བཞི་དང་སུམ་ཅུ་རྩ་གསུམ་པའི་ལྷ་རྣམས་འཛམ་བུའི་གླིང་དུ་ཉུལ་བའི་དུས་བཟང་པོ་དང་། ནང་ལྟར་ན་སྔགས་གཞུང་ལས། ཡར་ངོའི་ཚེས་བརྒྱད་དང་། བཅུ་བཞི་བཅོ་ལྔ་བཅུ་གསུམ། མར་ངོའི་ཉི་ཤུ་ལྔ། ཉེར་དགུ། གནམ་སྟོང་གསུམ་སྟེ། དེ་དག་གི་ཚེས་ལ་ཕྱི་ཡི་གནས་སུ་མཁའ་འགྲོ་རྣམས་རྒྱུ་ཞིང་། ནང་ཏུ་རྩ་རླུང་གི་རྒྱུ་བ་ཁྱད་པར་ཅན་གྱི་དུས་དང་། ཁྱད་པར་ཚེས་བཅུའི་ཉིན་མོ་དང་། ཉེར་ལྔའི་མཚན་མོ་སྒྲུབ་པ་པོའི་གནས་སུ་མཁའ་འགྲོ་གྲུབ་པ་ཅན་རྣམས་འདུ་བས་ལས་གང་བརྩམ་ཀྱང་འགྲུབ་པའི་ཕྱིར་དུས་དེ་རྣམས་སུ་འབད་དོ། །ཞེས་སོ། །ཡང་ཧོར་ཟླ་དྲུག་པའི་ཚེས་བཅུ་ལ་ཨོ་རྒྱན་ཆེན་པོ་དྷ་ན་ཀོ་ཤའི་མཚོ་ལས་འཁྲུངས་པ་དང་། བཅུ་པའི་ཚེས་བཅུ་ལ་བོད་དུ་བྱོན། བཅུ་གཅིག་པའི་ཚེས་བཅུ་ལ་སྲིན་ཡུལ་གཤེགས་པའི་དུས་སོ།