ལྕེ་བཙུན་གྱི་མགུར།
༄༅༔ ལྕེ་བཙུན་གྱི་མགུར་བཞུགས་སོ། །
༄༅༔ སངས་རྒྱས་ལ་ཡིད་ཆེས་སྐྱེས་ཙམ་ན༔ བརྒྱུད་པའི་བྱིན་རླབས་འབྱུང་བར་ངེས༔ གོང་མ་ལ་མོས་པ་སྐྱེས་ཙམ་ན༔ ཐུགས་རྗེའི་བྱིན་རླབས་འབྱུང་བར་ངེས༔ བླ་མ་ལ་གདུང་བ་སྐྱེས་ཙམ་ནག༔ ཉམས་དང་བྱིན་རླབས་སྐྱེ་བར་ངེས༔ སྣང་སྲིད་ཆོས་སྐུར་ཤེས་ཙམ་ན༔ ཉོན་མོངས་རང་སར་གྲོལ་བར་ངེས༔ ཡེ་གྲོལ་ཅེར་བཞག་གིས་རྒྱས་ཐེབས་ན༔ སངས་རྒྱས་དགོངས་པ་ཡིན་པར་ངེས༔ ལུས་ངག་བདེ་བ་རྙེད་ཙམ་ན༔ བླ་མའི་བྱིན་རླབས་ཡིན་པར་ངེས༔ འཁྲུལ་པ་ཕྱི་རོལ་གྱི་སྣང་བ་འགགས་ཙམ་ན༔ རང་གི་རྩོལ་བ་ཡིན་པར་ངེས༔ དེ་ལྟར་རྟོགས་པའི་རྣལ་འབྱོར་བདག༔ འཁོར་འདས་(༡༥༧)རུ་ཤན་ཕྱེད་པས་བདེ༔ ཞེས་ལྕེ་བཙུན་གྱི་མགུར་རོ༔ ཛ་ཡནྟུ༔
༄། །བི་མ་སྙིང་ཐིག་གི་སྤྲོས་མེད་དབང་དཀྱིལ་ནི་གཞི་མཐིང་ག་མཐར་འོད་ལྔའི་ར་བས་བསྐོར་བའི་དབུས་སུ་བུམ་པ་བསྣོལ་མ་གཉིས་ཀ་དམར་པོ་མགུལ་ཆིངས་དར་ལྗང་ཁུ་པདྨ་དམར་པོ་ཤིང་ལོས་བརྒྱན་པ་ཞབས་གཉིས་ལ་སྣ་ཚོགས་པད་གདན་སྟེང་མའི་ཞབས་མདུན་དང་འོག་མའི་ཞབས་ལྷོར་བསྟན་ཏོ། །ཞབས་གཉིས་མཚམས་སུ་ཐིག་ལེ་དཀར་པོ། དེ་བཞིན་ལྷོ་ནུབ་ཏུ་སེར་པོ། ནུབ་བྱང་དམར་པོ། བྱང་ཤར་ལྗང་གུ་སོ་སོ་ལ་འོད་ལྔས་འདི་ལྟར་བསྐོར་ཏེ་ཐམས་ཅད་ཀྱང་རེག་ཐུག་མེད་པར་བྲི། སྤྲོས་མེད་དཀྱིལ་འཁོར་འདི་ལ་བྲི་ཚུལ་མི་འདྲ་བ་ཡོད་ཀྱང་ཀུན་མཁྱེན་ཆེན་པོའི་ཡིག་ཆ་ལས་འབྱུང་བ་ལྟར་ཡིན་པས་ཡིད་ཆེས་ཀྱི་གནས་ཡིན་ལ། འདིའི་ཐིག་འདེབས་ཚུལ་ཟབ་མོ་ཡང་ཐིག་ཏུ་ཡོད་གསུངས། འདི་ཤིན་ཏུ་སྤྲོས་མེད་ཀྱི་གོང་དུ་དགོས།། །།
༈ བི་མ་སྙིང་ཐིག་སྤྲོས་བཅས་དཀྱིལ་འཁོར་བྲི་ཚུལ་རྟ་བབས་སོགས་མཁའ་འགྲོ་སྙིང་ཐིག་དང་འདྲ། རྩིག་པ་དང་རྟ་བབས་སྣམ་བུའི་ཁ་དོག་སོགས་ཀྱང་ཁྱད་མེད། ལྷ་གནས་ལ་དབུས་སུ་པད་འདབ་བརྒྱད་ལྟེ་བ་མཐིང་ག་ཟེའུ་འབྲུ་སེར་པོ་ཅན། དབུས་སུ་རྣམ་སྣང་ཡབ་ཡུམ་མཐིང་ག་ཡབ་འཁོར་དྲིལ། པད་འདབ་ཤར་དུ་རྡོར་སེམས་ཡབ་ཡུམ་གཞན་གསུམ་ལའང་ཡབ་ཡུམ་༼པད་ཟླའི་གདན་ལ་བཞུགས་པའོ། །༽རིགས་འགྲེས་ཡབ་ཐམས་ཅད་གཡས་རང་རྟགས་ཕྱག་མཚན་ཐུགས་ཀ་དང་གཡོན་དྲིལ་བུ་དཀུར་བརྟེན་ཐམས་ཅད་ལོངས་སྤྱོད་རྫོགས་སྐུ། ཡུམ་རྣམས་སྐུ་མདོག་ཡབ་ལྟར་གྲི་ཐོད་འཛིན་པའོ། །ཞབས་རྡོར་སྐྱིལ། མཚམས་ཀྱི་འདབ་བཞིར་ཤར་ལྷོར་ལཱ་སྱེ་དཀར་མོ་མེ་ལོང་། ལྷོ་ནུབ་མཱ་ལེ་མཐིང་ག་རིན་པོ་ཆེའི་ཕྲེང་བ། ནུབ་བྱང་གཱིརྟི་དམར་མོ་པཱི་ཝཾ། བྱང་ཤར་ནཱིརྟི་ལྗང་གུ་གར་གྱི་ཕྱག་རྒྱ་ཅན་པད་ཉིའི་གདན་ལ་སེམས་སྐྱིལ་གྱིས་བཞུགས་པ། པདྨ་བྲི་ཚུལ་ལ་ཕྱོགས་བཞི་ནང་མ་རྣམས་ཤར་དཀར་ལྷོ་(༡༥༨)སེར་ནུབ་དམར་བྱང་ལྗང་ཕྱི་རིམ་མཐིང་ག །མཚམས་བཞིའི་ནང་མ་དམར་སྐྱ་ཕྱི་མ་ལྗང་གུ་ཡིན་ནོ། །འདོད་སྣམ་ལ་མཆོད་པའི་ལྷ་མོ་སྤྱི་ལྟར་རོ། །སྒོ་བ་ཡབ་ཡུམ་མེད། ཕྱི་རོལ་ཏུ་རྡོ་ར་དང་དེ་ཕྱིར་མེ་རི་ལྔ་ལྡན་གྱིས་སྤུད་དགོས། དུར་ཁྲོད་དང་པད་ཕྲེང་མེད། ཀུན་མཁྱེན་ཆེན་པོའི་ཕྱག་བཞེས་བཞིན་གཏེར་ཆེན་བླ་མ་མཆོག་གི་དཀྱིལ་ཐང་ལ་ཞིབ་ཏུ་བལྟས་ནས་ཇི་ལྟ་བ་བཞིན་བྲིས་པ་ཡིན། ཀུན་མཁྱེན་ཆེན་པོའི་ཕྱག་ལེན་རྒྱུན་འཁྲུལ་མེད་ཡིན་གསུངས། ༼འགྱུར་མེད་སྐལ་བཟང་ཁུ་དབོན་གྱི་ཕྱག་བྲིས་ལས་བཤུས་སོ། །༽དགེའོ།། །།