འབྲས་བུ་ཡོངས་རྫོགས་རྒྱུད་ཀྱི་ཏི་ཀ་གསལ་བྱེད་དྲི་མེད་སྙིང་པོ།
༄༅། །འབྲས་བུ་ཡོངས་རྫོགས་རྒྱུད་ཀྱི་ཏི་ཀ་གསལ་བྱེད་དྲི་མེད་སྙིང་པོ་བཞུགས་སོ༔
༄༅༔ བྦབྦཅུཐཤ།༔ དོན་ཐམས་ཅད་རྫོགས་པའི་དཔལ་ཀུན་ཏུ་བཟང་པོ་ལ་ཕྱག་འཚལ་ལོ༔ འབྲས་བུ་ཡོངས་རྫོགས་ཆེན་པོའི་རྒྱུད་འདི་ལ་གསུམ་སྟེ༔ ཀླད་ཀྱི་དོན་དང༔ གཞུང་གི་དོན་དང༔ མཇུག་གི་དོན་ནོ༔ དང་པོ་ཀླད་ཀྱི་དོན་ལ་གསུམ་སྟེ༔ སྒྲའི་སྐད་ཤན་སྦྱར་བ་དང༔ མཚན་དོན་བསྟན་པ་དང༔ ཕྱག་འཚལ་བའོ༔ དང་པོ་ནི༔ རྒྱ་གར་སྐད་དུ༔ ཞེས་པ་ནི༔ སངས་རྒྱས་ཀྱི་ཞིང་ཁམས་གདུལ་བྱ་རྒྱ་ཤིན་ཏུ་ཆེ་བས་ན་རྒྱ༔ རྒྱ་ཆེ་བའི་ཆོས་གར་གསུངས་པས་ན་གར་སྐད་གང་ལས་བསྒྱུར་ཕྱིར་སྐད་ཅེས་བྱའོ༔ གདུལ་བྱ་རྒྱ་ཆེ་བ་ཆོས་ལ་དཀར་བ་ལ་རྒྱ་དཀར༔ རྒྱ་ཆེ་བ་ཆོས་ལ་གནག་པ་ལ་རྒྱ་ནག་ཅེས་བྱའོ༔ ཆོས་བསྒྱུར་བའི་སྐད་རིགས་ཉི་ཤུ་རྩ་གསུམ་ལས་བསྒྱུར༔ ཕལ་ཆེར་བསྒྱུར་བ་ནི་ཡང་དག་གསང་བའི་སྐད༔ ཌཱཀྐི་མའི་སྐད༔ ཨོ་རྒྱན་གྱི་སྐད༔ མ་རུ་རྩེའི་སྐད༔ དྷ་ན་ཀཱོ་ཤ་གླིང་པའི་སྐད༔ སང་ཀྲ྇་ཏའི་སྐད༔ ཀ་ལ་པིང་ཀ་འཛོ་ཀི་ཡོ་ནའི་སྐད༔ སྤྲིན་འཛུ་རྩེའི་སྐད༔ བརྒྱད་ལས་བསྒྱུར་རོ༔ དེ་ལ་འདིར་པཎྜི་ཏ་ལྷའི་སྐད་དུ༔ གྷ་ཏ་པ་ན༔ ཨ་ཏྲི་ཡ་ཏན་ཏྲ༔ ཞེས་པའི་སྒྲ་དེ་བོད་སྐད་དུ་བསྒྱུར་བས༔ རྒྱུད་ཀྱི་མཚན་འབྲས་བུ་ཡོངས་རྫོགས་ཆེན་པོའི་རྒྱུད་ཅེས་བྱ་བར་བྱུང་བའོ༔ འཁོར་འདས་ཀུན་ལ་འབྲེལ་བས་རྒྱུད་ཅེས་བྱའོ༔
གཉིས་པ་མཚན་གྱི་དོན་བསྟན་པ་ནི༔ ཀུན་ཏུ་བཟང་པོའི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་འདིར་རྫོགས་ཤིང་འདིའི་གོང་ན་གཞན་མེད་པར་བསྟན་པའོ༔ རང་བྱུང་རང་ཤར་ནི་ཐམས་ཅད་ཀུན་ཏུ་བཟང་པོ་ལས་བྱུང་ཞིང་འགག་མེད་དུ་རང་ཤར་བའོ༔
གསུམ་པ་ཕྱག་བཙལ་བ་ནི༔ གཉིས་པོ་དབྱེར་མེད་དུ་འདོད་པའོ༔
རྒྱུད་ཀྱི་གཞུང་དོན་དངོས་ལ་ལྔ་སྟེ༔ སྟོན་པ་གང་གིས༔ གནས་གང་དུ༔ (༢༥)འཁོར་གང་ལ༔ དུས་གང་གི་ཚེ༔ རྒྱུད་དོན་གང་གསུངས་པའོ༔ དང་པོ་སྟོན་པ་ནི༔ སྟོན་པ་ཀུན་ཏུ་བཟང་པོ་ཡིས༔ ཞེས་པས༔ སྟོན་པ་རང་བྱུང་ཆེན་པོ་ལྷུན་གྲུབ་ཆོས་ཀྱི་སྐུ༔ རྟོག་པ་ཐམས་ཅད་ལས་འདས་པའི་གནས་འོག་མིན་ཆོས་ཀྱི་དབྱིངས༔ རྒྱ་ཆད་ཕྱོགས་ལྷུང་ཐམས་ཅད་དང་བྲལ་བར༔ འཁོར་རིགས་ལྔའི་སྟོན་པ་རྡོ་རྗེ་སེམས་དཔའ་ལ་སོགས་པ་རང་དང་དབྱེར་མེད་པ་རྣམས་ལ༔ དུས་ནི་གང་དུ་རྒྱུད་ལས༔ འདི་སྐད་བདག་གིས་བསྟན་པའི་དུས་གཅིག་ན༔ ཞེས་པས་སྟོན་པ་གནས་འཁོར་གསུམ་འཛོམ་པའི་དུས་འདིར་བསྟན༔ ཅེས་པའོ༔ རྒྱུད་ཀྱི་དོན་གང་གསུངས་ན༔ ཀུན་ཏུ་བཟང་པོ་ཡབ་ཀྱི་དགོངས་པ་རྫོགས་པ་ཆེན་པོ་འདི་ཉིད་བྱིན་རླབས་ཀྱིས་རྩོལ་མེད་རང་བྱུང་དུ་གསུངས་པའོ༔ ཇི་ལྟར་གསུངས་ན༔ ཨེ་མ་འདི་འཛིན་སྐལ་བ་ཆེ༔ འདི་ནི་རང་བྱུང་ཆེན་པོ་འོ༔ ཞེས་པས་ལུས་ཅན་ཐམས་ཅད་ལ༔ ཀུན་ཏུ་བཟང་པོའི་དགོངས་པ་རང་བྱུང་དུ་ཁྱབ་ཅིང་ཁྱད་པར་རང་གི་ལུས་ལ་ཏིལ་ལ་མར་གྱིས་ཁྱབ་པ་ལྟར་གནས་སོ༔ དེ་ཡང་ལུས་གྲུབ་པ་དང་རྩ་གྲུབ༔ དེ་དང་དུས་མཉམ་དུ་རླུང་དང་ཐིག་ལེ་ཡེ་ཤེས་གྲུབ་པའོ༔ ལུས་འདི་འབྱུང་བ་བཞི་འདུས་པ་ལས་གྲུབ་སྟེ༔ ས་ལས་ཤ་རུས་པ་པགས་པ་གྲུབ༔ ཆུ་ལས་ཁྲག་དང་ཆུ་སེར་ཐིག་ལེ་གྲུབ༔ མེ་ལས་དྲོད་གྲུབ༔ རླུང་ལས་དབུགས་གྲུབ༔ དེ་ལྟར་འབྱུང་བ་བཞི་འདུས་པ་ལས་ཡན་ལག་དབང་པོ་དང་དོན་སྙིང༔ རྩའི་གཙོ་བོ་དང་འཁོར་ལོ་ལྔ་ལ་སོགས་པ་རྣམས་གྲུབ་བོ༔ དེ་ཡང་ལུས་གྲུབ་པས་རྩ་གྲུབ་པ་ནི་རྩའི་གཙོ་བོ་ལ་ལྔ་སྟེ༔ ཐབས་ཀྱི་དབུ་མ་ནི་ཡར་སྣ་ཀླད་པ་ལ་ཟུག༔ མར་སྣ་གསང་གནས་སུ་སླེབ་པ༔ ཨ་བ་དྷཱུ་ཏི་ཞེས་བྱ་སྟེ༔ ཁ་དོག་དཀར་གསལ་སྦོམ་ཕྲ་མདའ་སྙུག་ཙམ་དུ་གནས༔ ཐ་མལ་པ་རྣམས་རྒྱུངས་པ་ཞེས་ཟེར༔ ཤེས་རབ་ཀྱི་དབུ་མ་ནི་ཀུན་དྷ་ར་མ་ཞེས་བྱ་སྟེ༔ ཡར་སྣ་སྤྱི་གཙུག་ཏུ་ཟུག་པ༔ མར་སྣ་གསང་གནས་སུ་ཟུག་པ༔ ཁ་དོག་དམར་གསལ་སྦོམ་ཕྲ་མདའ་སྙུག་ཙམ་དུ་གནས་སོ༔ ཐ་མལ་དུ་མིང་སྲོག་རྩ་ཞེས་ཟེར་རོ༔ ཐབས་ཤེས་དབྱེར་མེད་ཀྱི་དབུ་མ་ནི་སྒལ་ཚིགས་ཀྱི་མདུན༔ སྲོག་རྩའི་རྒྱབ་ན་ཡར་གནས་ཏེ་ཡར་སྣ་སྤྱི་བོའི་ཚངས་བུག་ལ་(༢༦)ཟུག་པ༔ མར་སྣ་གསང་གནས་ལ་ཟུག་པ༔ ཁ་དོག་ཕྱི་དཀར་ལ་ནང་དམར་བ༔ ཁྲག་དང་ཆུ་སེར་མེད་པ༔ ནང་སྟོང་པ་གྲོ་སོག་གི་སྦུ་གུ་ལྟ་བུ༔ སྦོམ་ཕྲ་དར་དཀར་ཀྱི་སྐུད་པ་ཙམ་གནས༔ དེ་ནི་ཐབས་ཤེས་རབ་དབྱེར་མེད་དོན་དམ་པའི་དབུ་མའོ༔ དེ་རྣམས་ཀྱི་གཡས་གཡོན་ན་གནས་པའི་རྩ་ནི་ཡར་སྣ་ཀླད་པའི་ནང་ནས་མར་གུག་སྣ་བུག་གཉིས་སུ་ཟུག༔ མར་སྣ་གསང་གནས་ན་ཟུག་པ༔ ཁ་དོག་གཡས་དམར་པོ་མིང་རོ་མ་ཞེས་ཟེར་རོ༔ གཡོན་ཁ་དོག་སེར་པོ་མིང་རྐྱང་མ་ཞེས་ཟེར་རོ༔ སྦོམ་ཕྲ་མདའ་སྙུག་ཙམ་དུ་གནས་སོ༔ རྩ་ལྔ་པོ་འདི་རྣམས་ལུས་ཀྱི་དཀྱིལ་ན་ཐིག་ལྟ་བུའམ་ཀ་བ་གཤིབ་པ་ལྟ་བུའམ༔ རྡོ་རྗེ་རྩེ་ལྔ་པའི་རྣམ་པ་ལྟར་གནས་པས་རྡོ་རྗེའི་ལུས་ཞེས་བྱའོ༔ དེ་ཡང་གསང་རྒྱུད་ལས༔ རྩ་ལྔ་རྡོ་རྗེའི་དབྱིབས་ལྟར་གནས༔ རྡོ་རྗེའི་ལུས་ཞེས་དེ་ལ་བྱ༔ ཞེས་གསུངས་སོ༔ དེ་ལྟར་རྩ་ཡི་གཙོ་བོ་ལྔ་ལས༔ རྩ་ཕྲན་འཁོར་ལོ་ལྔར་གནས་ཏེ༔ སྤྱི་བོ་བདེ་ཆེན་གྱི་འཁོར་ལོ་ན་རྩ་འདབ་དྲུག་ཅུ་གདུགས་ཀྱི་ཚུལ་དུ་གནས༔ མགྲིན་པ་ལོངས་སྤྱོད་ཀྱི་འཁོར་ལོ་ན་རྩ་འདབ་བཅུ་དྲུག་ཁྲིའུའི་ཚུལ་དུ་གནས༔ སྙིང་ག་ཆོས་ཀྱི་འཁོར་ལོ་ན་རྩ་འདབ་བརྒྱད་པད་མའི་ཚུལ་དུ་གནས༔ ལྟེ་བ་སྤྲུལ་པའི་འཁོར་ལོ་ན་རྩ་འདབ་དྲུག་ཅུ་རྩ་བཞི༔ སྐྲ་ཤད་ལྟར་ཡན་མན་འཛིངས་ནས་གནས༔ གསང་གནས་བདེ་སྐྱོང་འཁོར་ལོ་ན༔ རྩ་འདབ་ཉི་ཤུ་རྩ་བརྒྱད་སྡོང་པོ་ལྟར་རྩ་བ་གཅིག་ཏུ་འདུས་ནས་གནས༔ དེ་ལས་རྩ་ཕྲན་བ་སྤུའི་གྲངས་དང་མཉམ་པར་ལུས་ཀུན་ལ་ཁྱབ་པར་གནས་སོ༔ དེ་ལྟར་རྩ་གང་ན་གནས་པ་ན་འབྱུང་བའི་དྭངས་མ་རྒྱུའི་ཐིག་ལེས་ཁྱབ་ནས་གནས༔ དེའི་ཆ་ཀུན་དང་ཡེ་ཤེས་དབྱེར་མེད་ཟང་ཐལ་དུ་གནས་སོ༔ དེ་ལྟར་ལུས་སྤྱི་ལ་ཟང་ཐལ་དུ་ཁྱབ་ཀྱང་ཁྱད་པར་དུ་སྙིང་ལ་གནས་སོ༔ དཔེར་ན་ཙན་དན་གྱི་སྡོང་པོ་ལ་དྲིས་ཀུན་ལ་ཁྱབ་ཀྱང་ཁྱད་པར་སྙིང་པོ་ལ་བཟང་བ་བཞིན་ནོ༔ ཇི་ལྟར་གནས་ན་ཙིཏྟ་རིན་པོ་ཆེ་ཟུར་བརྒྱད་པའི་ནང་དབུས་ན་རིག་པ་ཡེ་ཤེས་ལྔ་ལྡན་ཐིག་ལེ་ལུ་གུ་རྒྱུད་གསལ་ལ་འཚེར་བ༔ མདངས་དང་ལྡན་པ་སྒེག་པ༔ སངས་རྒྱས་བཞི་བཅུ་རྩ་གཉིས་ཀྱི་རྣམ་པར་གནས་སོ༔ དེ་དག་ཀྱང་གདན་ཁྲི་དང་རྒྱན་ཆ་དང་(༢༧)གཙོ་འཁོར་དང་བཅས་པ་ལ་ངོ་བོའི་ཆ་ནས་སྐུ་ཉུང་འབྲུ་ཙམ་ལ་ཡེ་ཤེས་ཀྱི་ཆ་ནས་སྤྱན་ཕུལ་ཐག་ཙམ་དུ་བཞུགས་སོ༔ དེ་རྣམས་ཀྱི་རྩལ་ལས་རང་གི་ཀླད་པ་དུང་ཁང་གི་གཞལ་ཡས་ཁང་ན་ཁྲག་འཐུང་ལྔ་བཅུ་རྩ་བརྒྱད་ཀྱི་རྣམ་པར་བཞུགས་སོ༔ དེ་ཡང་ཡེ་ཤེས་ལྔའི་རང་འོད་དང་ལྡན་པ་སྐུ་ཉུང་འབྲུ་ཙམ་ལ་སྤྱན་ཕུལ་ཐག་ཙམ་དུ་གནས་སོ༔ ཀློང་གསལ་ལས༔ སྙིང་ནང་ཡབ་ཡུམ་ཞི་བའི་ཚུལ༔ དུང་ཁང་ཁྲོ་བོའི་ཚུལ་དུ་གནས༔ ཞེས་སོ༔ དེ་ལྟར་གནས་པ་དེ་འོལ་ཚོད་འདུས་བྱས་མ་ཡིན་ཏེ་ཡེ་ནས་ཀུན་ཁྱབ་རང་གསལ་དུ་གནས་སོ༔ རྒྱུད་ལས༔ བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ༔ ཅེས་པ་དང༔ རྒྱུད་ལས༔ ཡེ་ནས་གཞི་ལ་གནས་གྱུར་ཀྱང༔ བར་དུ་རྐྱེན་མེད་རྐྱེན་གྱིས་གསལ༔ ཞེས་སོ༔ དེས་ཀུན་ཏུ་བཟང་པོའི་དགོངས་པ་ཡེ་ཤེས་ཟང་ཐལ་ཆེན་པོ་ལྷུན་གྲུབ་ཏུ་གནས་པ་བསྟན་པའོ༔ དེ་ནས་ཡུམ་ཆེན་ཀུན་བཟང་གི་དགོངས་པ་ནི༔ དེ་ནས་ཡུམ་ཆེན་ཀུན་བཟང་ཞེས་པ་ལ་སོགས་པ་གསུངས་ལ༔ དབྱིངས་རང་བཞིན་གྱིས་རྣམ་པར་དག་པ་སྟོང་པ་ཉིད་སངས་རྒྱས་ཐམས་ཅད་སྐྱེད་པར་བྱེད་པ་ཀུན་གྱི་གཞིར་གྱུར་པ་གཟུགས་དང་ཁ་དོག་དངོས་པོ་མཚན་མ་ཅན་གང་དུ་མ་གྲུབ་པ་ལ༔ ཡ་ཏ་རྒྱལ་བའི་དཀྱིལ་འཁོར་ནས༔ མ་ཐ་རིགས་དྲུག་དམྱལ་བ་ཡན་ཆོད་ལ་ཆུ་དང་རླན་ལྟ་བུར་ཁྱབ་ནས་གནས་ཏེ༔ དེ་ཡང་གཞན་ནས་འོངས་པའམ་འགྲོ་བ་ཅན་ཞིག་མ་ཡིན་ཏེ༔ དུས་ཐམས་ཅད་དུ་གནས་པ་དེ་ཉིད་གློ་བུར་དུ་བྱུང་བ་མ་ཡིན་པར་ཡེ་ནས་སྟོང་པས་ཡེ་སྟོང༔ གཞན་ལ་མ་ལྟོས་པས་གཞན་སྟོང་པ༔ ཀུན་གྱི་ངོ་བོ་སྟོང་པས་སྐུ་སྟོང་པ༔ དུས་གསུམ་སྔ་ཕྱི་མེད་པར་སྟོང་པས་མཉམ་པར་སྟོང་པ༔ ཕྱོགས་རིས་མེད་པར་སྟོང་པས་ཀུན་ཁྱབ་གདལ་བར་སྟོང་པའོ༔ དེ་ལྟ་བུའི་སྟོང་པ་ཉིད་དེ་མིག་གིས་མཐོང་དུ་མེད༔ ལྕེས་སྨྲ་རུ་མེད༔ ཡིད་ཀྱིས་དཔྱད་དུ་མེད༔ དཔེས་མཚོན་དུ་མེད་ཅིང་མཚོན་པ་ལས་འདས་མོད་ནའང༔ ཕྱོགས་ཙམ་བྲལ་བའི་དཔེས་མཚོན་པ་སྟོང་གསལ་ནམ་མཁའ་ལྟ་བུའོ༔ ནམ་མཁའ་དབྱར་གྱི་ན་བུན་སངས༔ དགུན་གྱི་འཚུབ་མ་མ་ལངས༔ ནམ་ལངས་ཉི་མ་ཤར་སད་(༢༨)བྱུང་བའི་དུས་དེ་ན་སྟོང་པ་ལ་གང་གིས་ཀྱང་མ་བསྒྲིབས་པ༔ གསལ་ལ་ངོས་བཟུང་དང་བྲལ་བ་དེ་ཉིད་སྟོང་ཉིད་མཚོན་པའི་དཔེའོ༔ དེ་ཡང་དཔེས་མཚོན་དུ་མེད་པ་དེ་ཉིད་དཔེས་མཚོན་པ་ཙམ་ལས་དངོས་འདྲ་བ་ནི་མ་ཡིན་ཏེ༔ ཕྱོགས་འདྲ་ཙམ་ཡིན་མོད༔ ཅིའི་ཕྱིར་ན༔ སྟོང་ཉིད་ནི་རིག་པ་ཅན་གྱི་སྟོང་པ་ལ༔ ནམ་མཁའ་ནི་རིག་པ་མེད་པའི་སྟོང་པའི་སྟོང་པའོ༔ དཔེར་ན་ཕྱོགས་འདྲ་བའི་དཔེ་མཚོན་པ་ཙམ་དུ་ཟད་དོ༔ དེ་ཡང་མཚན་ཉིད་མཚོན་པའི་ནམ་མཁའ་དཔེར་བཞག་ཀྱང༔ རེ་ཞིག་ཕྱོགས་ཙམ་དཔེར་བཞག་མཚོན་པ་སྟེ༔ སེམས་ཉིད་རིག་བཅས་སྟོང་པ་སྟེ༔ ནམ་མཁའ་རིག་མེད་སྟོང་པས་མཚོན་དུ་མེད༔ དེ་ཀུན་ཏུ་བཟང་མོ་ཡུམ་གྱི་དགོངས་པ༔ གཏད་མེད་ལྷུག་པ༔ རང་བཞིན་རྣམ་དག་ཆོས་ཉིད་འགྱུར་མེད་དུ་གནས་པའོ༔
དེ་ནས་ཡབ་ཡུམ་གཉིས་མེད་ཀྱི་དགོངས་པ་དབྱིངས་རིག་གསལ་སྟོང་དབྱེར་མེད་དུ་བསྟན་པ་ནི༔ དེ་ནས་ཡབ་ཡུམ་གཉིས་མེད་འཁྲིལ༔ དགོངས་པ་གཅིག་ཏུ་བཀའ་སྩལ་པ༔ ཅེས་གསུངས་པས་གསལ་བ་དང་སྟོང་པ་དབྱེར་མེད་ལྷུན་གྲུབ་ཏུ་གནས་ཏེ༔ སྐད་ཅིག་ཏུ་འདུ་འབྲལ་མེད་པར་སྟོང་པའི་དུས་ན་ཡང་རིག་པ་འོད་དང༔ འོད་ཁྱིམ༔ ཐིག་ལེ་དང་ལུ་གུ་རྒྱུད་སྐུ་དང་ཡེ་ཤེས་དེ་ལྟ་བུའི་རང་བཞིན་དུ་ཁྲ་ཆི་ལེ་གསལ་བར་གནས་སོ༔ གསལ་བའི་དུས་ནའང་ངོ་བོ་སྟོང་གསལ་དབྱེར་མེད༔ དེ་བཞིན་སྣང་སྟོང་དབྱེར་མེད༔ གྲགས་སྟོང་དབྱེར་མེད༔ ཚོར་སྟོང་དབྱེར་མེད༔ མྱོང་སྟོང་དབྱེར་མེད༔ རིག་སྟོང་དབྱེར་མེད་པར་གནས་སོ༔ ཡོན་ཏན་ཀུན་རྫོགས་མཚོན་བྱེད་ཕྱིར༔ ཞེས་པ་ནི༔ དེ་ལྟར་གོང་དུ་བསྟན་པའི་དབྱིངས་རིག་དབྱེར་མེད་དེ༔ རྩལ་རྫོགས་ཤིང་བརྟན་པ་ཐོབ་པར་བྱ་བའི་ཕྱིར་ཉམས་སུ་བླང་བ་ནི༔ འཇིག་རྟེན་གྱི་བྱ་བ་ཐམས་ཅད་སྤངས༔ གནས་འདུ་འཛི་མེད་པའི་ནམ་མཁའ་རྒྱ་ཆེ་བའི་སར་ཕྱི་ནང་གི་མཐུན་རྐྱེན་འཛོམ་པས༔ སྟན་བདེ་བ་ལ་རྐང་པ་སྐྱིལ་ཀྲུང༔ ལག་པ་མཉམ་གཞག༔ ལུས་བསྲངས་ལ་མིག་སྨིན་མཚམས་སུ་གཏད༔ སྟེང་འོག་རླུང་བག་ཙམ་བཟུང་ལ་མ་ཡེངས་པར་རིག་པ་རྩེ་གཅིག་ཏུ་ནམ་མཁའ་ལ་བལྟས་པས༔ ཆོས་ཉིད་དབང་པོས་མངོན་(༢༩)སུམ་དུ་མཐོང་བར་འགྱུར་རོ༔ མངོན་སུམ་དུ་མཐོང་བ་དེ་ལས་ལུས་ངག་ཡིད་གསུམ་མ་འགུལ་བར་ཉམས་སུ་བླངས་པས༔ རིག་པ་ཡེ་ཤེས་རྩལ་རྫོགས་ནས༔ འཁྲུལ་པའི་རྟོག་པ་ནུབ་སྟེ་སྐུ་དང་ཞིང་ཁམས་སུ་ཤར་ནས་ཕུང་པོ་ལྷག་མེད་དུ་སངས་རྒྱས་སོ༔ ཡི་གེ་ཉི་ཤུ་རྩ་ལྔས་བསྟན༔ ཅེས་པ་ནི་ཉམས་ལེན་མཐར་ཕྱིན་དུས་སུ་དབང་པོའི་ཞེན་པ་བཟློག་པས་རྣམ་པར་མི་རྟོག་པའི་ཡེ་ཤེས་ལ་གནས༔ ཕུང་པོའི་ཞེན་པ་ལོག་པས་འཁྲུལ་པའི་ལུས་དེ་མངལ་ཁ་སྟོངས༔ ཡུལ་ཀུན་ཞེན་པ་ལོག་པས་གཉིས་སུ་འཛིན་པ་ཞིག༔ སེམས་ཀྱི་དངོས་པོ་སྤུར་བས་མཚན་མ་རང་སར་གྲོལ༔ བྱུང་ཚོར་གནས་སུ་དག་པས་ངར་འཛིན་ཞིག༔ འདུ་ཚོགས་སྣང་བ་ངོས་བཟུང་བས་རང་རིག་ཡེ་ཤེས་སུ་ཤར༔ རིག་པ་བཙོན་རར་བཅུག་པས་འཁོར་བ་གཞི་མེད་དུ་རང་སར་དག༔ འཁྲུལ་པ་རང་རྒྱུད་ཁུངས་ཆོད་པས་སྲུང་མཚམས་རང་སར་དག༔ རིགས་དྲུག་རིམ་གྱིས་བསྒྲལ་བས་འགྲོ་དྲུག་གཡང་ས་ཆོད༔ འཁོར་བའི་དོང་ནས་ཐོན་པས་རང་རྒྱུད་དོན་ལ་གནས་ཏེ་ཕྱིར་མི་ལྡོག་པའི་ས་ཐོབ༔ ཆོས་ཅན་ཐུར་དུ་གཞུག་པས་ཆོས་ཉིད་དོན་གྱི་མཚན་མ་རྟོགས༔ རོའི་ཡུལ་ཁུངས་སྤུར་བས་ཡེ་ཤེས་ལུས་ཅན་དེ་བཞིན་གཤེགས་པ་ཐོབ༔ ཞེན་པའི་ཕྲེང་ཐག་ཆོད་པས་བར་ཆོད་དབྱིངས་སུ་དག༔ ལུ་གུ་རྒྱུད་ཨར་ལ་གཏད་པས་རིག་པ་གཡོ་འགུལ་མེད་པར་གནས༔ ལྷའི་ཕྱག་རྒྱ་བལྟས་པས་རིག་པ་གསལ་འགྲིབ་མེད་པར་གསལ༔ ལྟ་སྒོམ་ལོག་པ་དག་པས་དྲི་མེད་ཆོས་སྐུ་ཐོབ༔ ས་ལམ་དུས་གཅིག་བཅད་པས་རྩོལ་བ་རང་སར་གྲོལ༔ ཡིད་དཔྱོད་ལྟ་བ་ཁུངས་བཅད་པས་སྙེམས་དང་བྲལ༔ སྐུ་གསུམ་ལམ་དུ་སློངས་པས་འཁྲུལ་པ་ཀ་ནས་དག༔ སྣང་བ་དངོས་སུ་སློངས་པས་རྟོགས་པ་མངོན་དུ་གྱུར༔ དགྲ་ཡི་ཞེན་མཐའ་བཅད་པས་བདུད་བཞི་ཆོས་ཉིད་དུ་ཆོམས༔ བསམ་གཏན་ཆེན་པོའི་ས་གནོན་པས་དམིགས་པའི་མཚན་མ་ཐམས་ཅད་དང་བྲལ༔ སངས་རྒྱས་མངོན་ཞེན་ལོག་པས་འབྲས་བུའི་རེ་དོགས་རང་སར་ཆོད༔ ཕྲིན་ལས་མཐའ་རུ་ཕྱིན་པས་གཟུགས་སྐུས་འགྲོ་དོན་ལྷུན་གྱིས་གྲུབ༔ རྒྱལ་སྲས་རྣམས་ཀྱི་ས་ནོན་པས་ཆོས་ཀྱི་དབྱིངས་ལ་ཟད་མི་ཤེས་པའི་ཡོན་ཏན་འགྱུར་(༣༠)མེད་དུ་ཐོབ་བོ༔ ཡབ་ཡུམ་གཉིས་སུ་མེད་པ་ཡི༔ དགོངས་པ་ཀུན་ཏུ་བཟང་པོའོ༔ ཞེས་པ་ནི༔ གོང་དུ་བསྟན་པ་ཐམས་ཅད་རིག་པ་གསལ་སྟོང་དུ་འདུས་པའི་དོན་ཡིན་ནོ༔ ཡོངས་རྫོགས་ཏི་ཀ་གསལ་བྱེད་དྲི་མེད་སྙིང་པོ་རྫོགས་སོ༔ ས་མ་ཡ༔ རྒྱ་རྒྱ་རྒྱ༔ བྱས་ཨུ༔ བུ།༔ཏྶ༔ ཉཅ།།མྶ༔