རིགས་ལྔ་ནང་གི་སྒྲུབ་པ།
༄༅༔ རིགས་ལྔ་ནང་གི་སྒྲུབ་པ་བཞུགས་སོ༔
༄༅༅༔ རིགས་ལྔ་ཀུན་ཏུ་བཟང་ལ་ཕྱག་འཚལ་ལོ༔ རིགས་ལྔ་ནང་ལྟར་སྒྲུབ་པ་ནི༔ ཀློང་གསལ་ལས༔ སྟོང་གསལ་རིག་པ་ཡེ་ཤེས་ལྔ༔ ཐབས་ཤེས་ཟུང་འཇུག་རང་རིག་དངོས༔ ཞེས་པས༔ རང་རིག་མི་འགྱུར་བ་ནི་རྣམ་པར་སྣང་མཛད༔ ཀུན་ཏུ་བཟང་པོ་རིག་རྩལ་མ་འགགས་པ་ནི་རིགས་བཞི་ཡབ་ཡུམ་སྒོ་མ་བཞིར་ཤར་རོ༔ དེས་ན་ལོགས་ནས་བསྒྲུབ་ཏུ་མེད་དེ་རང་ལ་རང་གསལ་བཏབ་པས་ཆོག་པའི་ཕྱིར༔ སྐད་ཅིག་དྲན་རྫོགས་སུ་(༥༡)བསྐྱེད་པར་བྱ་སྟེ༔ རང་ཉིད་ཀུན་བཟང་ཡབ་ཡུམ་ནི༔ མཐིང་ནག་ཞལ་གཅིག་ཕྱག་གཉིས་པ༔ ཀུན་བཟང་མོ་དང་གཉིས་མེད་འཁྲིལ༔ ཕྱག་མཚན་རྡོ་རྗེ་དྲིལ་བུ་འཛིན༔ སྐྱིལ་ཀྲུང་རིན་ཆེན་རྒྱན་གྱིས་བརྒྱན༔ ལོངས་སྐུ་མཚན་དཔེ་ལྡན་པར་བསྐྱེད༔ སྤྱི་བོར་རྡོ་རྗེ་སེམས་དཔའ་དང༔ མགྲིན་པར་རིན་ཆེན་འབྱུང་ལྡན་དང༔ སྙིང་ཁར་སྣང་བ་མཐའ་ཡས་ཉིད༔ ལྟེ་བར་དོན་ཡོད་གྲུབ་པ་བསྐྱེད༔ ཡན་ལག་བཞི་ལ་སྒོ་མ་བཞི༔ ཀུན་ཀྱང་ཡབ་ཡུམ་འཁྲིལ་སྦྱོར་ལ༔ སྐུ་མདོག་རིགས་ཀྱི་ཁ་དོག་འཛིན༔ དམ་ཚིག་ཡེ་ཤེས་གཉིས་མེད་པར༔ སྐད་ཅིག་ཙམ་ལ་བསྐྱེད་ནས་ཀྱང༔ གསང་བའི་སྙིང་པོ་འདི་ཉིད་བཟླས༔ ༀ་ཨཱཿཧཱུཾ༔ ཨཱ་ཧཱུཾ་ཏྲཱཾ་ཧྲཱི༔ ཨཱཿསི་ཏི་ཕ་ལ་ཧཱུྃ་ཛ༔ སྐུ་ནི་སྣང་ལ་རང་བཞིན་མེད༔ སྒྱུ་མ་ལྟ་བུར་ཤེས་བྱས་ལ༔ སྔགས་ནི་གྲགས་སྟོང་བཟླས་པར་བྱ༔ རྫོགས་རིམ་དབྱེར་མེད་ངང་ལ་བཞག༔ དེ་ལྟར་བསྒྲུབས་པའི་ཡོན་ཏན་ཡང༔ ཚེ་འདིར་ཡོན་ཏན་ཀུན་འབྱུང་ཞིང༔ ཕྲིན་ལས་རྣམ་བཞིས་འགྲོ་དོན་བྱེད༔ སྐུ་ལྔ་ཡེ་ཤེས་མངོན་དུ་འགྱུར༔ སྐྱེ་བ་འདི་ལ་རྫོགས་འཚང་རྒྱའོ༔ རིགས་ལྔ་ནང་ལྟར་སྒྲུབ་པ་ནི༔ ལས་ཅན་ཅིག་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ དགེའོ༔