གསང་དབང་ལུས་དཀྱིལ་ངོ་སྤྲོད།
༄༅༔ གསང་དབང་ལུས་དཀྱིལ་ངོ་སྤྲོད་བཞུགས་སོ༔
༄༅༔ གསང་དབང་ལས༔ ཡེ་ནས་རང་ལུས་ད་ལ་རུ༔ གནས་པ་ངོ་ཡང་སྤྲད་པར་བྱ༔ ཞེས་པས༔ འོ་རིགས་ཀྱི་བུ་ཁྱོད་གསོན་ཅིག༔ ཕྱི་བུམ་པའི་དབང་གི་དུས་སུ༔ རྡུལ་ཚོན་གྱི་དལ་ལ་བརྟེན་ནས་དཔེའི་མཚོན་བྱེད་དུ་ངོ་སྤྲད་པ་ཡིན་གྱི༔ དོན་དམ་པར་སོང་ན༔ རང་གི་ལུས་འདི་རྒྱལ་བའི་དཀྱིལ་འཁོར་ཆེན་པོར་བཞུགས་པ་ཡིན་ཏེ༔ ཀློང་གསལ་ཉི་མའི་རྒྱུད་ལས༔ འབྱུང་བའི་དྭངས་ལས་གྲུབ་པ་ཡི༔ ལུས་འདི་བདེ་གཤེགས་ཕོ་བྲང་ཉིད༔ རིགས་ལྔ་ཡབ་ཡུམ་ལྔ་ཡི་གནས༔ ཕུང་ཁམས་སྐྱེ་མཆེད་ལྷ་ཡི་སྐུ༔ ཞེས་པས༔ རང་གི་རིག་པ་འདི་ཐོག་མར་འཁོར་འདས་གང་དུའང་མ་གྲུབ་པའི་སྔོན་རོལ་ནས་འོད་གསལ་བདེ་བ་ཆེན་པོར་བཞུགས་ཏེ༔ དེ་ཉིད་རང་ངོ་རང་གིས་མ་ཤེས་པས་རང་རིག་འབྱུང་བཞིའི་སྦུབས་སུ་ཚུད་པའི་ལུས་འདི་སངས་རྒྱས་ཐམས་ཅད་ཀྱི་བཞུགས་གནས་ཡིན་ཏེ༔ སྤྱི་བོ་བདེ་ཆེན་གྱི་ཙཀྲ་ན༔ རྡོ་རྗེ་མཁའ་འགྲོ་ཡབ་ཡུམ་བཞུགས༔ མགྲིན་པ་ལོངས་སྤྱོད་ཀྱི་ཙཀྲ་ན༔ (༩༡)རིན་ཆེན་མཁའ་འགྲོ་ཡབ་ཡུམ་བཞུགས༔ སྙིང་ཁ་ཆོས་ཀྱི་འཁོར་ལོ་ན༔ སངས་རྒྱས་མཁའ་འགྲོ་ཡབ་ཡུམ་བཞུགས༔ ལྟེ་བ་སྤྲུལ་པའི་འཁོར་ལོ་ན༔ པདྨ་ཌཱཀྐི་ཡབ་ཡུམ་བཞུགས༔ གསང་གནས་བདེ་སྐྱོང་ཙཀྲ་ན༔ ལས་ཀྱི་ཌཱཀྐི་ཡབ་ཡུམ་བཞུགས་པ་ཡིན་ནོ༔ ཕུང་པོ་ཐམས་ཅད་དཔའ་བོ༔ ཁམས་ཐམས་ཅད་ཌཱཀྐིའི་རང་བཞིན་ཡིན་ནོ༔ ཐ་མ་བ་སྤུའི་བུ་ག་ཡན་ཆོད་ལྷ་དང་ལྷ་མོའི་རང་བཞིན་དུ་བཞུགས་པ་ཡིན་ནོ༔ དེ་ཡང་ཀློང་གསལ་ལས༔ འབྱུང་བཞིའི་དཀྱིལ་འཁོར་སངས་རྒྱས་ཞིང༔ འཁོར་ལོ་ལ་ནི་རིགས་ལྔའི་གནས༔ ཕུང་ཁམས་ཐམས་ཅད་ལྷ་ཚོགས་ཉིད༔ སེམས་ནི་ཡེ་ཤེས་ཆེན་པོ་ཉིད༔ ཅེས་སོ༔ དེ་ལ་སོགས་པ་རྒྱས་པར་ནི་རྒྱུད་གཞན་ནས་ཀྱང་སྤྲོ་བར་བྱའོ༔ གསང་དབང་གི་ལྷན་ཐབས་སོ༔ ས་མ་ཡ༔ རྒྱ་རྒྱ་རྒྱ༔ དགེའོ༔