དབང་སྒྲུབ་དང་བུམ་པ་སྒྲུབ་ཐབས།
༄༅༔ དབང་སྒྲུབ་དང་བུམ་པ་སྒྲུབ་ཐབས་བཞུགས་སོ༔
༄༅༔ གདམས་པ་འདིའི་ཕྱི་སྒྲུབ་ནི༔ རིགས་ལྔ་ཡབ་ཡུམ་ཕྱི་ལྟར་བསྒྲུབས་ནས༔ བསྙེན་པ་བྱ་བ་ནི་ཕྱི་སྒྲུབ༔ ནང་སྒྲུབ་ནི༔ བདག་ཀུན་ཏུ་བཟང་པོར་བསྐྱེད་པའི་སྐུ་ལ་རིགས་ལྔ་ཡབ་ཡུམ་བཀོད་དེ་བསྒྲུབ་པ་ནི་ནང་སྒྲུབ༔ ཕྱི་སྒྲུབ་དང་ནང་སྒྲུབ་གང་མོས་ཀྱི་སྒྲུབ་པ་ཚད་དུ་བསྐྱལ་ཏེ་སློབ་མ་ལ་བུམ་དབང་བསྐུར་བ་ནི༔ གང་ཟག་ཐུན་མོང་དུ་སྨིན་པར་འགྱུར་བའོ༔ གསང་སྒྲུབ་མཁའ་འགྲོ་ཡབ་ཡུམ་མངོན་རྟོགས་ལྟར་བསྒོམ་ཞིང་བསྒྲུབས་པ་ནས་དབང་གསུམ་ནོར་བུ་ལུགས་སུ་བསྐུར་བར་བྱའོ༔ ཡང་གསང་བླ་ན་མེད་པའི་སྒྲུབ་པ་ནི་མངོན་སུམ་རང་ཐོག་ཏུ་ཕབ་སྟེ་རིག་པའི་རྩལ་དབང་རང་བྱུང་དུ་བསྐུར་བའོ༔ དེ་ལ་ཕྱི་ལྟར་ན་རིགས་ལྔ་ཡབ་ཡུམ་དུ་བསྒྲུབ་པ་ཕྱི་སྒྲུབ༔ རང་ཀུན་བཟང་ཡབ་ཡུམ་དུ་གསལ་ཏེ༔ རིགས་ལྔ་ལུས་ལ་བཀོད་པ་ནང་སྒྲུབ༔ རང་མཁའ་འགྲོ་ཡབ་ཡུམ་དུ་བསྐྱེད་ནས་འཁོར་ལོ་ལྔར་མཁའ་འགྲོ་ཡབ་ཡུམ་བསྐྱེད་དེ་སྒྲུབ་པ་ནི་གསང་སྒྲུབ་བོ༔ རང་རིག་གཅེར་མཐོང་དུ་ངོ་སྤྲད་ནས་ཉམས་སུ་ལེན་པ་ཡང་གསང་སྒྲུབ་པའོ༔ བུམ་དབང་གི་ཕྱི་སྒྲུབ་རིགས་ལྔར་བསྐུར་རོ༔ གསང་དབང་མན་ཆད་གསང་སྒྲུབ་པོ༔ མཁའ་འགྲོ་ལྔར་བསྐུར་བ་ཡིན་ཏེ་དེ་ནི་ཤིན་ཏུ་ཟབ་བོ༔ ཕྱི་ལྟར་ན་རིགས་ལྔ་ཡབ་ཡུམ༔ ནང་ལྟར་ན་མཁའ་འགྲོ་ཡབ་ཡུམ་ཡིན་ཏེ༔ དོན་གྱི་ངོ་བོ་ལ་གཅིག་པའི་ཕྱིར་རོ༔ རིན་ཆེན་དབང་གི་ཕྲེང་བ་འདི༔ ཤིན་ཏུ་ཟབ་ཕྱིར་གཏེར་དུ་སྦས༔ ལས་ཅན་ཞིག་དང་(༡༢༧)འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ པདྨ་ལས་འབྲེལ་རྩལ་གྱིས་ཆུ་མོ་གླང་གི་སྟོན་ཟླ་ཐ་ཆུང་གི་ཉེར་བདུན་ལ་དྭགས་ལུང་ཕྲ་མོ་བྲག་ནས་གཏེར་ནས་གདན་དྲངས་པའོ༔ ས་མ་ཡ༔ རྒྱ་རྒྱ་རྒྱ༔
༄༅༔ བླ་མ་ཡི་དམ་མཁའ་འགྲོ་ལ་ན་མོ༔ དེ་ཡང་གོང་དུ་བསྙེན་པ་བྱས་ནས༔ དབང་བསྐུར་བའི་དུས་སུ༔ འབྲི་བའི་དཀྱིལ་འཁོར་རམ་ཚོམ་བུ་གང་འགྲུབ་ལ་དཀྱིལ་འཁོར་དང་ལྷ་ཚོགས་ཕྱི་སྒྲུབ་ལྟར་གསལ་བར་བསྐྱེད་དོ༔ ཕོ་བྲང་གི་ཕྱི་དུར་ཁྲོད་ལ་སོགས་པ་རྣམས་སུ་བླ་མ་དང་ཡི་དམ་དཔའ་བོ་ཌཱཀྐི་ཆོས་སྐྱོང་ལ་སོགས་པ་སྤྲིན་གཏིབས་པ་ལྟར་བསྐྱེད་དོ༔ དེ་ནས་བུམ་པའི་བཟླས་པ་བྱ་བ་ནི་སོ་སོའི་བུམ་པར་ཡབ་ཡུམ་གསལ་བར་བསྐྱེད་དོ༔ རང་ཀུན་ཏུ་བཟང་པོར་བསྐྱེད་པའི་ཐུགས་ཀ་ནས་ཧཱུྃ་ལས་འོད་ཟེར་འཕྲོས་པས་འོད་ཟེར་གཟུངས་ཐག་ལ་འཁྲིལ་ནས་སོང་སྟེ་ལྷ་སོ་སོའི་ཐུགས་ཀར་ཕོག་པས་ཡབ་ཡུམ་སྦྱོར་བ་མཛད་པའི་བྱང་སེམས་དཀར་དམར་དུ་བབ་པས་བུམ་པ་གང་བར་བསམ་ཞིང་བཟླས་པ་བྱའོ༔ མཇུག་ཏུ་ཡབ་ཡུམ་འོད་དུ་ཞུ་ནས་བདུད་རྩི་དང་གཉིས་སུ་མེད་པར་འདྲེས་པར་བསམ༔ དེ་ལྟར་བུམ་པ་ལ་དམིགས་པའི་བཟླས་པ་ཅི་འགྲུབ་ཏུ་བྱའོ༔ དེ་ཡང་བུམ་པ་རེ་རེ་ལ་ལྷ་སོ་སོའི་དམིགས་པ་དང་བཟླས་པ་བྱེད་དམ༔ བུམ་པ་གཅིག་ཏུ་བསྡུས་ཏེ་བཟླས་པ་བྱས་ཀྱང་བཏུབ་པོ༔ བུམ་པ་བསྒྲུབ་པའི་རིམ་པའོ༔ དགེའོ༔ ཁྠཾ༔