ཆོས་ཉིད་བར་དོའི་ཡོན་ཏན།

༄༅༔ ཆོས་ཉིད་བར་དོའི་ཡོན་ཏན་བཞུགས་པའོ༔

༄༅༔ གུ་རུ་རཏྣ་ལ་ན་མོ༔ འཆི་ཁ་མ་ལ་ནད་ཀྱིས་སེམས་འཁྲུགས༔ དྲན་པ་མི་གསལ་ཀྱང་བར་དུ་མི་ཆོད་པའི་རྟགས་གསུམ་ནི༔ ཀུན་གསལ་ལས༔ བརྡ་ལ་བར་དུ་མི་ཆོད་པ་ཆུ་ནང་གི་ཟླ་བ་ལ་རྡོ་བརྒྱབ་པ་ལྟ་བུ༔ རྟགས་ཚེས་བཅུ་དྲུག་གི་ཟླ་བ་མདངས་མ་ནུབ་པར་ཉི་མའི་མདངས་ཤར་ནས་བར་ན་མུན་པ་མེད་པ་ལྟ་བུ༔ དོན་ལ་བར་དུ་མི་ཆོད་པ་སྐུ་གསུམ་འབྲལ་མེད་ལུས་དང་གྲིབ་མ་ལྟ་བུའོ༔

༈ དེས་ན་ཆོས་ཉིད་བར་དོའི་ཡོན་ཏན་ནི༔ མི་གནས་པ་རྣམ་པ་གཉིས༔ དག་པ་རྣམ་པ་བཞི༔ དབང་དུ་མི་འགྲོ་བ་བཞི༔ བར་མ་ཆོད་པ་གཉིས༔ གདམས་པའི་གནད་གཉིས༔ སྐྱེ་བ་མི་ལེན་པའི་གཏན་ཚིགས་གསུམ༔ གསལ་འདེབས་བཞི༔ སྐྱེལ་མ་གསུམ༔ བསུན་མ་གསུམ༔ མཚམས་སྦྱོར་གསུམ༔ ཟང་ཐལ་གྱི་ཆོས་བཞི་རང་གྲོལ་བར་བསྟན་པའོ༔ དང་པོ་མི་གནས་པ་གཉིས་ནི༔ ཡར་སངས་རྒྱས་ཀྱི་ས་ལ་མི་གནས༔ མར་འཁོར་བའི་ས་ལ་མི་གནས༔ འོ་ན་གང་ན་གནས་ན་གཞི་ཀ་དག་ལྷུན་གྲུབ་ཕྱེད་པ་རྣམ་པ་བཞིའི་ཐོག་ན་གནས༔

དག་པ་བཞི་ནི༔ གང་ཚེ་ལས་འདས་པ་དེ་ཉིད་ལུས་སྔ་མ་བོར༔ ཕྱི་མ་ཡིད་ཀྱི་ལུས་མ་བླངས་པས་ལུས་སྔ་ཕྱི་མེད་པས་སྒྲིབ་པ་མ་སྦྱངས་དབྱིངས་སུ་དག༔ ལུས་སྔ་ཕྱི་མེད་པས་སེམས་སྐྱེ་བའི་རྩ་བ་མེད༔ སེམས་གནས་པའི་རྟེན་མེད༔ སེམས་ཐོན་པའི་སྒོ་ལྔ་མེད༔ རྣམ་ཤེས་ཆོས་ཉིད་རིག་པ་ལ་ཐིམ་པས་རྣམ་པར་ཤེས་པའི་སེམས་མེད་པས་ཉོན་མོངས་རང་སར་དག༔ ཁམས་གསུམ་གྱི་སྐྱེ་བ་གང་དུ་ཡང་མ་བླངས་པས་འཁོར་བ་མ་སྤངས་པར་དག༔ རང་སྣང་གི་དཀྱིལ་འཁོར་མཁའ་ལ་གསལ་བས་སྣང་སྲིད་མ་སྤངས་པར་དག་པའོ༔

༈ དབང་དུ་མི་འགྲོ་བ་བཞི་ནི༔ ཆོས་ཉིད་ཀྱི་བར་དོ་ལ་རང་བྱུང་གི་དཀྱིལ་འཁོར་མཁའ་ལ་ཤར་ཏེ༔ ལུས་སྔ་ཕྱི་མེད་པས་རང་བྱུང་གི་ཡེ་ཤེས་སྒྲིབ་པའི་དབང་དུ་མི་འགྲོ༔ (༩༧)རིགས་དྲུག་གི་ལུས་ངག་གི་སེམས་མེད་པས་རང་བྱུང་གི་ཡེ་ཤེས་ཉོན་མོངས་པའི་དབང་དུ་མི་འགྲོ༔ དགེ་སྡིག་སེམས་དང་བག་ཆགས་དག་པས་རང་བྱུང་གི་ཡེ་ཤེས་ལས་ཀྱི་དབང་དུ་མི་འགྲོ༔ མཐོ་རིས་ངན་སོང་དུ་མ་སྐྱེས་པའི་དུས་ཡིན་པས་རང་བྱུང་གི་ཡེ་ཤེས་རྒྱུ་འབྲས་ཀྱི་དབང་དུ་མི་འགྲོའོ༔

༈ བར་མ་ཆོད་པ་གཉིས་ནི༔ གང་ཚེ་ལས་འདས་པ་དེ་སྐྱེ་གནས་ཀྱི་བར་མ་ཆོད༔ སྐྱེ་བ་བླངས་པ་ལས་རང་བྱུང་གི་ད་ལ་ལྔའོ༔ ས་ལམ་གྱི་བར་མ་ཆོད༔ རང་སྣང་དཀྱིལ་འཁོར་མཁའ་ལ་འཆར་བ་ལྔའོ༔ ༈ གདམས་པའི་གནད་གཉིས་ནི༔ འཁོར་དུ་འཁོར་ས་མེད་དེ༔ སྣང་སྲིད་གཞི་ལ་དག༔ འཁྱར་དུ་འཁྱར་ས་མེད་དེ་ཆོས་ཉིད་མ་བུ་མཇལ༔ ༈ སྐྱེ་བ་མི་ལེན་པའི་གཏན་ཚིགས་གསུམ་ནི༔ ཕྱི་སྣང་བའི་ཡུལ་དག་པས་སྐྱེ་བ་ལེན་པའི་གནས་མེད༔ ནང་འཛིན་པའི་སེམས་དག་པས་སྐྱེ་བ་ལེན་པའི་བདག་མེད༔ རང་སྣང་གི་ད་ལ་མཐོང་བས་ངོ་ཤེས་ཏེ་སྐྱེ་བ་རྒྱུན་ཆད་དོ༔ ༈ གསལ་འདེབས་བཞི་ནི༔ རང་སྣང་རྐྱེན་དུ་ཤར་ཏེ་གསལ་གདབ༔ མཚན་བརྗོད་ལས༔ ཡེ་ཤེས་སྣང་བ་ལམ་མེ་བ༔ ཞེས་སོ༔ འོད་ཟེར་རྐྱེན་དུ་ཤར་དུས་གསལ་གདབ༔ སྔ་མ་ནས༔ ཡེ་ཤེས་ལྔ་ཡི་འོད་ཟེར་འཕྲོ༔ ཞེས་སོ༔ གདམས་ངག་རྐྱེན་དུ་ཤར་ཏེ་གསལ་གདབ༔ སྔ་མ་ནས༔ ཡང་དག་སངས་རྒྱས་ལམ་རིག་པ༔ ཞེས་སོ༔ དཀྱིལ་འཁོར་རྐྱེན་དུ་ཤར་ཏེ་གསལ་གདབ༔ སྔ་མ་ནས༔ གསུམ་རིག་གཙང་མ་དག་པ་སྟེ༔ ཞེས་སོ༔

༈ སྐྱེལ་མ་གསུམ་ནི༔ སྔར་ཉམས་སུ་བླངས་པའི་སྐྱེལ་མ༔ ཉམས་གདིང་དུ་ཚུད་དེ་བརྟན་པ་ཐོབ་པའི་སྐྱེལ་མ༔ འཆི་ཁར་གསལ་ཐེབས་པའི་སྐྱེལ་མའོ༔

༈ སུན་མ་གསུམ་ནི༔ དང་པོ་ཡེ་ཤེས་འོད་ཀྱི་སུན་མ་འབྱུང༔ མུན་པ་ལ་ཉི་མ་ཤར་བ་ལྟ་བུ༔ གཉིས་པ་ཟེར་གྱི་སུན་མ་འབྱུང༔ སྡོམ་པ་ཐོག་ལ་འགྲོ་བ་ལྟ་བུ༔ གསུམ་པ་སྐུའི་སུན་མ་འབྱུང༔ མིང་ནས་ལྷང་བོས་པ་ལྟ་བུའོ༔

༈ དང་པོ་འོད་ཀྱི་སུན་མ་སྐུ་དང་ཡེ་ཤེས་ཀྱི་འོད་རང་གསལ་འཛིན་མེད་དུ་ཆོད༔ གཉིས་པ་ཟེར་གྱི་སུན་མ་རང་གྲོལ་འགག་མེད་དུ་ཆོད༔ གསུམ་པ་ཆོས་ཉིད་རང་སྒྲའི་སུན་མ་གྲགས་སྟོང་སྐྱེ་མེད་དུ་ཆོད༔

༈ མཚམས་སྦྱོར་གསུམ་ནི༔ རང་སྣང་བླ་མ་(༩༨)ཡི་དམ་མཁའ་འགྲོ་གསུམ་དུ་འཆར་ཏེ༔ དང་པོ་བླ་མའི་མཚམས་སྦྱོར་བྱིན་བརླབས་ཀྱི་རང་ངོ་ཤེས༔ གཉིས་པ་ཡི་དམ་གྱི་མཚམས་སྦྱོར་མཆོག་གི་འོད་གསལ་ལ་སྤྱོད༔ གསུམ་པ་མཁའ་འགྲོའི་མཚམས་སྦྱོར་ཀ་དག་བཙན་ས་ཟིན༔

༈ ཟང་ཐལ་གྱི་ཆོས་བཞི་ནི༔ རང་སྣང་འོག་མིན་གྱི་གནས་ཟང་ཐལ་དུ་ཤར་བས་འཇིག་རྟེན་པའི་སྣང་བ་དག་སྟེ་ཕྱི་སྣང་བའི་ཡུལ་དག་པར་སངས་རྒྱའོ༔ རང་སྣང་གི་དཀྱིལ་འཁོར་ཟང་ཐལ་དུ་ཤར་བས་ལུས་ཀྱི་སྒྲིབ་ཤིང་དག་སྟེ་སངས་རྒྱའོ༔ ཐུགས་རིག་པའི་ཡེ་ཤེས་ཉིད་ཟང་ཐལ་དུ་ཤར་བས༔ རྣམ་པར་ཤེས་པ་གཞི་ལ་ཟང་ཐལ་དུ་ཐིམ་པས་འཛིན་པའི་སེམས་མེད་དེ་སངས་རྒྱའོ༔ དྲན་པའི་ཤེས་རབ་ཟང་ཐལ་དུ་ཤར་བས་མ་རིག་པ་སངས་ཏེ་སངས་རྒྱའོ༔ རང་གྲོལ་བར་བསྟན་པ་ནི༔ རང་རིག་པའི་ཡེ་ཤེས་རང་བྱུང་རང་ཤར་རང་གསལ་དུ་བསྟན་ཏེ་མཁྱེན་པ་ཤར་ནས་གཞི་ཡེ་འཚང་རྒྱས་པ་ལ་འབྲས་བུ་མངོན་སངས་རྒྱའོ༔ ཆོས་ཉིད་བར་དོའི་ཡོན་ཏན་རྫོགས་སོ༔