བར་དོ་ངོ་སྤྲོད།

༄༅། །བར་དོ་ངོ་སྤྲོད་བཞུགས་པའི་དབུའོ༔

༄༅༔ བར་དོ་ངོ་སྤྲོད་ལ༔ ཤེལ་དཀར་ཟུར་བརྒྱད་པ་ཉི་ཞུར་ལ་ཕྱར་ནས༔ ཀྱེ་སྐལ་བ་དང་ལྡན་པ་ཀུན༔ སྣོད་ལྡན་ཐུགས་ཀྱི་མེ་ལོང་འདི༔ ཆོས་སྐུ་དངོས་མ་ཡིན་ཏེ་དཔེ་ནི་འདི་འདྲ་བས་ཤེས་པར་བྱའོ༔ དཔེ་འདི་ལ་ཕྱི་ནང་མེད་པ་ལྟར་ཆོས་སྐུ་ལ་ཕྱི་ནང་མེད་པར་ཤེས་པར་གྱིས་ཤིག༔ ཤེལ་འདི་ལ་མདུན་རྒྱབ་མེད་པར་ཟང་ཐལ་བ་བཞིན་ཆོས་སྐུ་ལ་མདུན་རྒྱབ་མེད་ཅིང་ཟང་ཐལ་དུ་ཤེས་པར་གྱིས་ཤིག༔ ཤེལ་འདི་ལ་ནང་མེད་པའི་ནང་ནས་རྐྱེན་མེད་པའི་འོད་ལྔ་གསལ་བ་ལྟར་ཆོས་སྐུ་སྟོང་པ་ཟང་ཐལ་གྱི་ངང་ནས་གཟུགས་སྐུ་རང་གསལ་སྟོང་པ་ཡེ་ཤེས་ཀྱི་སྙིང་པོ་ཅན་འཆར་བ་ཤེས་པར་གྱིས་ཤིག༔ འདིའི་ནང་ནས་འོད་ལྔ་ཤར་བ་ལྟར་ཆོས་སྐུ་ལས་གཟུགས་སྐུ་གཉིས་གདུལ་བྱའི་སྣང་ངོར་ཤེས་པར་གྱིས་ཤིག༔ དེ་ལྟར་སྐུ་གསུམ་དང་ཡེ་ཤེས་ལྔ་ལྡན་དུ་བཞུགས་པ་ལ་འཁྲུལ་པ་ལ་རྒྱུ་གསུམ་དང་རྐྱེན་བཞི་སྟེ༔ ཐལ་འགྱུར་རྒྱུད་ལས༔ འཁྲུལ་པའི་རྒྱུ་ནི་མ་རིག་པ༔ མ་རིག་པ་ནི་རྣམ་པ་གསུམ༔ བདག་ཉིད་གཅིག་པས་འཁྲུལ་རྩ་༼རང་བྱུང་དཀྱིལ་འཁོར་རང་ལ་སྣང་ཡང་རང་ངོ་མ་ཤེས་(༩༩)པས་༽བྱས༔ ལྷན་ཅིག་སྐྱེས་པས་༼དེ་ལྟར་ང་ལས་འོད་བྱུང་ངམ་འོད་ལས་ང་བྱུང་སྙམ་༽རྟོག་པ་གཉིས༔ ༼གཉིས་སུ་བརྟག་པས་༽ཀུན་ཏུ་བརྟགས་པས་༼དེ་ལ་ཐུགས་རྗེའི་ཡུལ་ཅན་དུ་བདེན་པར་བརྟགས་ནས་༽ཡུལ་དུ་གྱུར༔ ༼བཟུང་དེ་གསུམ་དུས་མཚུངས་པས་༽རྒྱུ་དེ་ལ་རྐྱེན་བཞིར་༼དེ་མ་ཐག་གི་རྐྱེན་བྱིས་པ་ལ་མེ་ལོང་བསྟན་པ་ལྟ་བུར་༽འཁྲུལ་པ་སྟེ༔ ཐལ་འགྱུར་ལས༔ རྒྱུ་༼བདག་ཉིད་གཅིག་པས་མ་རིག་པས་རྒྱུའི་རྐྱེན་བྱས་ཏེ་མེ་ལོང་ལྟ་བུ་༽དང་བདག་༼ལྷན་ཅིག་སྐྱེས་པ་དབང་ཤེས་ངར་འཛིན་གྱི་༽པོ་ངོས་བཟུང་སྟེ༔ དམིགས་པ་༼ཀུན་ཏུ་བརྟགས་པའི་ཡུལ་དྲུག་གིས་དམིགས་པའི་རྐྱེན་བྱས་ཏེ་མེ་ལོང་དུ་བྱད་ཤར་བ་ལྟ་བུ་༽ཉིད་དང་དུས་མཚུངས་པས༔ རྐྱེན་ནི་རྣམ་པ་བཞི་དག་གི༔ འདུ་ཤེས་བཟུང་བས་འཁྲུལ་ཞེས་བྱ༔ ཡང་རྒྱུད་ལས༔ ཆོས་ཉིད་ཡུལ་གྱི་འཁྲུལ་གཞིར་འཐད༔ ཅི་ཕྱིར་རིག་མེད་བེམ་པོར་སྣང༔ རིག་པ་སེམས་ཀྱི་འཁྲུལ་གཞིར་འཐད༔ ཅི་ཕྱིར་རིག་ཙམ་ཕྱོགས་མཐུན་ཕྱིར༔ འོད་ལྔ་ཡུལ་གྱི་འཁྲུལ་གཞིར་འཐད༔ ཁ་དོག་དབྱིབས་སུ་ཆོས་མཐུན་ཕྱིར༔ ཞེས་སོ༔

༄༅༔ བཅོམ་ལྡན་འདས་བྱ་བྲལ་རང་བཞག་ངང་ལ་ཕྱག་འཚལ་ལོ༔ ད་རིག་པ་ཡེ་ཤེས་དེ་གནས་པ་གང་ན་གནས་ན་དེ་ཡང་ལུས་ཀྱི་དཀྱིལ་ན་ཙིཏྟ་རིན་པོ་ཆེའི་གཞལ་ཡས་ཁང་ན་གནས་ཏེ༔ ཞི་བའི་སྐུ་ཉུང་འབྲུ་ཙམ་ཞེས་པ་ནི༔ ཕྲ་ཞིང་རྟོགས་པར་དཀའ་བའི་ཆ་ནས་བཞག་སྟེ་སྤྱན་ཕུལ་ཐག་ཙམ་ཞེས་པ་ནི༔ ཉམས་ཕྲ་མོ་ལ་བརྟེན་ནས་ཡེ་ཤེས་ཀྱི་སྣང་བ་རྒྱ་ཆེན་པོ་སྐྱེ་བ་ལ་དགོངས་པའོ༔ དེ་ཡང་ངོ་བོ་སྐུ་རུ་གནས་པ་བུམ་སྐུ་ལྟ་བུ༔ རང་བཞིན་འོད་དུ་གནས་པ་བུམ་ནང་གི་མར་མེ་ལྟ་བུའོ༔ ཐུགས་རྗེ་ཟེར་དུ་གནས་པ་ནི་ཡེ་ཤེས་ཀྱི་སྒྲོན་མའི་མདངས་མ་འགགས་པ་རང་གསལ་བའོ༔ དེའི་ཞོར་ལ་མ་རིག་པ་དང༔ ཉོན་མོངས་པ་དང༔ ལས་དང༔ བག་ཆགས་དང༔ རྣམ་པར་ཤེས་པ་ཡང་ལས་ཀྱི་རླུང་གིས་སྟོབས་བྱས་ནས་གློ་བ་ན་གནས་སོ༔ དེའི་ཤན་དབྱེ་བ་གལ་ཆེའོ༔