མངོན་སུམ་ངོ་སྤྲོད།
༄༅༔ མངོན་སུམ་ངོ་སྤྲོད་བཞུགས་སོ༔
༄༅༔ མཧཱ་གུ་རུ་ན་མོ་ཧཱུྃ༔ བླ་མས་རིགས་ཀྱི་བུ་ལ་མངོན་སུམ་གྱི་ངོ་སྤྲད་ནས་འདི་སྐད་དུ་སྤྲོ་བ་བསྐྱེད་པར་བྱའོ༔ འོ་རིགས་ཀྱི་བུ་འདི་ལྟར་མཐོང་བ་འདི་རང་བྱུང་གི་རིག་པ་ཐིག་ལེ་ཉག་གཅིག་ཆོས་ཉིད་མངོན་སུམ་གྱི་སྣང་བ་མཐོང་བ་ཞེས་བྱ་བ་ཡིན་ནོ༔ སངས་རྒྱས་དང་བྱང་ཆུབ་སེམས་དཔའ་བླ་མ་ཡི་དམ་ཌཱཀྐི་ཐམས་ཅད་ཀྱི་ཞལ་མངོན་སུམ་དུ་མཇལ་བ་ཞེས་བྱའོ༔ སངས་རྒྱས་ཐམས་ཅད་ཀྱི་དབང་དུས་གཅིག་ལ་ཐོབ་པ་ཞེས་བྱའོ༔ འོད་མཐིང་ཁ་གསལ་བས་རྣམ་པར་སྣང་མཛད་ཀྱི་ཞལ་མཐོང༔ ཉོན་མོངས་པ་གཏི་མུག་དག་ཆོས་ཀྱི་དབྱིངས་ཀྱི་ཡེ་ཤེས་མངོན་དུ་གྱུར༔ ཞེས་རིགས་ལྔ་ལ་སྦྱོར༔ སྐུ་གསུམ་ཡེ་ཤེས་ལྔ་མངོན་དུ་གྱུར་པ་ཞེས་བྱའོ༔ ལས་དང་བག་ཆགས་དང་སྡིག་སྒྲིབ་མ་རིག་པ་ཟད་པ་ཞེས་བྱའོ༔ ཉོན་མོངས་པ་ཆོས་ཉིད་དུ་ཤར་བ་ཞེས་བྱའོ༔ ལས་དང་སྐལ་བར་ལྡན་པ་ཞེས་བྱའོ༔ བསོད་ནམས་ཀྱི་ཚོགས་རྫོགས་པ་ཞེས་བྱའོ༔ སངས་རྒྱས་ཐམས་ཅད་ཀྱི་དབང་དུས་གཅིག་ལ་ཐོབ་པ་ཞེས་བྱའོ༔ རིག་པ་རྩལ་གྱི་དབང་ཐོབ་པ་ཞེས་བྱའོ༔ དུས་དེ་རིང་ནས་སངས་རྒྱས་ཀུན་ཏུ་བཟང་པོ་དང་རིགས་ལྔའི་སངས་རྒྱས་དང་ཁྱོད་ལ་ཁྱད་པར་རྡུལ་ཙམ་ཡང་མེད་དོ༔ ཞེས་བསྔགས་པ་བརྗོད་ལ་ངོ་སྤྲོད་གདབ་བོ༔ རྒྱ་རྒྱ་རྒྱ༔