རྟགས་བསྟན་ཏི་ཀ
༄༅༔ རྟགས་བསྟན་ཏི་ཀ་བཞུགས་སོ༔
༄༅༔ ཏྱ།ཅྭ།སྭ༔ རྒྱུད་འདི་བརྟགས་ཤིང་བཅངས་པས༔ གྲོལ་བའི་རྟགས་བསྟན་པ་ནི༔ ཨེ་མ་འདི་འཆང་བཏགས་གྲོལ་སྐྱེས་བུ་ནི༔ དུས་གསུམ་རྒྱལ་བའི་མཆོད་རྟེན་ཡིན༔ ཞེས་པས༔ རྒྱུད་འདི་རྟོགས་ཤིང་བཅངས་པའི་སྐྱེས་བུ་ནི༔ སངས་རྒྱས་ཐམས་ཅད་ཀྱི་གདུང་འཛིན་སྲས་གཅིག་ཡིན་ཏེ༔ དེ་ཉིད་འདས་ཚེ་གདུང་བཞུ་བས༔ ཞེས་པ་ནི༔ དེ་ལྟ་བུའི་རྒྱུད་འཛིན་དེ་གཤེགས་པའི་ཚེ་མཆོད་པ་རྒྱ་ཆེན་པོ་བཤམས་ལ་དབུལ༔ དབེན་པའི་གནས་སུ་པུར་ཁང་ལེགས་པར་ནང་དུ༔ འོག་ཏུ་སླ་ང་བཤམས་དེའི་སྟེང་དུ་པུར་བཞུགས་ལ་ཙན་དན་དང་རྒྱ་ཤུག་ལེགས་པར་གཅེར་ལ༔ འབྲུ་མར་གྱིས་བླུགས་ཤིང་བླ་མ་དང་མཆེད་གྲོགས་དམ་ཚིག་གི་སེལ་མེད་པས་གཞུང་དང་མཐུན་པར་པུར་བཞུ༔ དེ་ལ་རྟགས་ནི༔ འཇའ་འོད་ཟེར་དང་དུད་པའི་རྟགས༔ ཞེས་པས༔ པུར་ཁང་གི་དབུས་མཐོངས་སུ་འཇའ་འཁྱིལ་པ་དང༔ དུད་པ་སྔོན་པོ་གྱེན་ལ་འགྲེང་བ་དང༔ གཡས་སུ་འཁྱིལ་པ་དང༔ མེ་འོད་དཀར་ལ་གསལ་བ་དང༔ གཡོ་འགུལ་མེད་ཅིང་མེ་ལྕེའི་རིགས་བུདྡྷའི་ཕྱག་མཚན་དུ་འབྱུང་བའོ༔ དུད་པ་ཡལ་བའི་དུས་སུ་བརྟག་པར་བྱ་སྟེ༔ གདུང་རིགས་ལྔའམ་གཅིག་འབྱུང་ངེས༔ ཞེས་པས༔ གང་ཟག་གི་རིགས་ཀྱིས་གདུང་རིགས་རྣམ་པ་ལྔ་འབྱུང་བའམ༔ གང་རུང་གཅིག་འབྱུང་ངེས་ཏེ༔ རྣལ་འབྱོར་ཕྱིར་མི་ལྡོག་པའི་རྟགས༔ རྡོ་རྗེ་རིན་ཆེན་པད་མའི་གདུང༔ ལས་དང་དེ་བཞིན་གཤེགས་པའི་གདུང༔ ཞེས་པས༔ བཏགས་གྲོལ་བཅངས་པའི་སྐྱེས་བུ་དེ༔ ཕྱིར་མི་ལྡོག་པའི་ས་ནོན་པའི་རྟགས་སུ་རྡོ་རྗེའི་གདུང་དང༔ རིན་པོ་ཆེའི་གདུང་དང༔ པད་མའི་གདུང་དང༔ ལས་ཀྱི་གདུང་དང༔ དེ་བཞིན་གཤེགས་པའི་གདུང་དང་ལྔའོ༔ ཤ་ཁྲག་ལུས་དང་ཡན་ལག་དང༔ འབྱུང་འདུས་ལྔ་ལ་རྟེན་དུ་འབྱུང༔ ཤ་རཱི་རམ་དང་ཆུ་རཱི་རམ༔ བ་རཱི་རམ་དང་ཉ་རཱི་རམ༔ པཉྩ་རམ་དང་ལྔ་ལྡན་གདུང༔ རིགས་ལྔའི་གདུང་སྟེ་སྐུ་ཡང་འབྱུང༔ དེ་རྣམས་སྐུ་ཐོབ་རྟགས་ཡིན་ནོ༔ ཞེས་པས༔ ཤའི་རྟེན་དུ་གདུང་ཤ་རཱི་རམ་འབྱོན་ཏེ༔ ཡང་དག་པའི་རྟེན་དུ་བཞག་པའོ༔ ཁྲག་གི་རྟེན་དུ་ཆུ་རཱི་རམ་འབྱོན་ཏེ་སྲ་ཞིང་མཁྲེགས་(༡༥༦)པ་རྡོ་རྗེའི་གདུང་དུ་བཞག་པའོ༔ རུས་པའི་རྟེན་དུ་བ་རཱི་རམ་འབྱོན་ཏེ་རྒྱལ་ཚབ་ཉིད་ཀྱི་རྟེན་དུ་བཞག་པའོ༔ ཡན་ལག་གི་རྟེན་དུ་ཉ་རཱི་རམ་འབྱོན་ཏེ་ཤིན་ཏུ་སྲ་ཞིང་མཁྲེགས་པ་ལས་ཀྱི་གདུང་དུ་བཞག་པའོ༔ འབྱུང་བ་ལྔའི་དྭངས་མ་ལས་པཉྩ་རམ་འབྱོན་ཏེ༔ ཁ་དོག་ལྔ་ལྡན་དེ་བཞིན་གཤེགས་པའི་གདུང་དུ་བཞག་པའོ༔ ཞི་བ་དང་ཁྲོ་བོའི་སྐུ་གང་བྱུང་ཡང་དེ་ཡན་ཆད་སྐུ་ཐོབ་པའི་རྟགས་བསྟན་པའོ༔ གསུང་ཐོབ་པའི་རྟགས་ནི༔ གསུང་ཐོབ་རྟགས་སུ་མེ་འོད་སྒྲ༔ ཞེས་པས་མེ་འོད་ནི༔ འོད་ཁྱིམ་དང༔ གྱེན་འགྲེང་༼ཞག་ལྔ་ན་བུདྡྷ་ཐོབ་༽དུ་སྤྲས་པ་ལྟ་བུ་འབྱུང་ངོ་༔ སྒྲ་ཡང་༼ཞག་བདུན་ན་བུདྡྷ་ཐོབ་༽འུར་བ་དང༔ ཐུག་པ་འབྱུང་ངོ་༔ དེ་ལྟར་བྱུང་ན་གསུང་ཐོབ་པའི་རྟགས་སོ༔ ཐུགས་ཐོབ་པའི་རྟགས་ནི༔ འཇའ་ཚོན་ནམ་མཁའ་དྭངས་གསལ་བ༔ ངེས་པར་ཐུགས་ཐོབ་རྟགས་ཡིན་ནོ༔ ཞེས་པ་ནི༔ སེམས་ཅན་ཀུན་གྱི་སྙིང་གི་ནང་ན༔ མཐིང་ཀ་དང༔ དཀར་པོ༔ སེར་པོ༔ དམར་དང་ལྗང་བའི་མདངས་ཐུགས་ཀྱི་རྟགས་སུ་བཞག་པའོ༔ ནམ་མཁའ་དྭངས་ཤིང་གསལ་བ་དང༔ འཇའ་ཚོན་སྣ་ལྔ་ཤར་བ་ནི་ཐུགས་ཐོབ་པའི་རྟགས་སོ༔ གདུང་འབྱུང་བའི་གནས་ནི༔ གདུང་རིགས་ལྔ་ནི་འདི་ལས་འབྱུང༔ མགོ་དང་ཁྲག་དང་སྒལ་ཚིགས་དང༔ རྐང་དང་སྙིང་ལས་འབྱུང་བ་ཡིན༔ ཞེས་པས༔ གདུང་ཤ་རཱི་རམ་མགོ་ལས་འབྱུང༔ ཆུ་རཱི་རམ་ཁྲག་ལས་འབྱུང༔ བ་རཱི་རམ་སྒལ་ཚིགས་ལས་འབྱུང༔ ཉ་རཱི་རམ་ཡན་ལག་གི་རྐང་ལས་འབྱུང་ངོ་༔ པཉྩ་རམ་སྙིང་ལས་འབྱུང༔ གདུང་དེ་རྣམས་ཀྱིས་འབྲས་བུ་གང་ཐོབ་ན༔ རྟགས་ལ་འབྲས་བུ་འདི་བཞིན་འབྱུང༔ ཤ་རཱི་ཆུ་རཱི་བ་རཱི་ཡིས༔ སྐྱེ་མེད་ཡོན་ཏན་ལོངས་སྐུ་ཐོབ༔ ཉ་རཱི་པཉྩ་རམ་གྱིས་སུ༔ སྤྲུལ་སྐུ་སྐུ་ལྔ་ངེས་པར་ཐོབ༔ ཅེས་པས༔ གདུང་ཤ་རཱི་རམ་གྱིས་སྐྱེ་མེད་ཐོབ༔ ཆུ་རཱི་རམ་གྱིས་ཡོན་ཏན་འཕེལ༔ བ་རཱི་རམ་གྱིས་ལོངས་སྐུ་ཐོབ༔ ཉ་རཱི་རམ་གྱིས་སྤྲུལ་སྐུ་ཐོབ༔ པཉྩ་རམ་གྱིས་སྐུ་ལྔ་ཐོབ་པའོ༔ སངས་རྒྱས་སྐུ་ལྔ་ཡེ་ཤེས་ལྔ༔ རྒྱུད་འདི་བཏགས་གྲོལ་བཅངས་པས་འབྱུང་གདུང་ཚད་ངེས་པ་མེད་(༡༥༧)པར་གསུངས༔ ཞེས་པས༔ ཡོན་ཏན་དེ་རྣམས་རྒྱུད་འདི་རྟོགས་པ་ལ་བཅངས་པས་འབྱུང་ངོ་༔ གདུང་རིགས་མང་ཡང་གཅིག་ལས་མ་བྱུང་ཡང་ཡོན་ཏན་གོང་ལྟར་ཐོབ་བོ༔ མང་ཉུང་ལ་ངེས་པ་མེད་དོ༔ འབྲས་བུ་ཡོངས་རྫོགས་བཏགས་གྲོལ་རྒྱུད་ཀྱི་སྙིང་པོའི་བཅངས་ཐབས་དང༔ གཞན་དོན་དང་རྟགས་བསྟན་དང༔ འབྲས་བུའི་ཐོབ་ཚུལ་བསྟན་པའོ༔ ལས་ཅན་གཅིག་དང་འཕྲད་པར་ཤོག༔ ན།ཏཅ།༔ རྒྱ་རྒྱ་རྒྱ༔