ངེས་དོན་སྙིང་པོ་ཞེས་བྱ་བ།
དོན་དང་པོ། དབང་རྣམ་པར་ཕྱེ་བའི་དོན་གཅིག་ཏུ་བསྡུས་པ་བསྟན་པ།
༄༅༔ སྒརྶགྶན།འཥླཿ ངེས་དོན་སྙིང་པོ་ཞེས་བྱ་བཿ དཔལ་ཀུན་ཏུ་བཟང་པོ་ལ་ཕྱག་འཚལ་ལོཿ ཐུགས་རྗེའི་རང་བཞིན་ཕན་བདེའི་སྤྲིན་ཚོགས་ཅནཿ རང་བྱུང་པདྨ་རྒྱལ་ལ་ཕྱག་འཚལ་ལོཿ ཤིན་ཏུ་སྤྲོས་དང་བྲལ་བའི་གང་ཟག་རྣམསཿ མངོན་སུམ་སྙིང་པོའི་དོན་འདིར་གཞུག་བྱའི་ཕྱིརཿ སྤྲོས་ཀུན་དོར་ཏེ་སྤྲོས་མེད་སྙིང་པོའི་དོནཿ ཇི་ལྟར་བདག་ལ་བབས་བཞིན་འདིར་བརྗོད་བྱཿ དེ་ལ་གཞི་དབང་ཿ ལམ་ཁྲིདཿ འབྲས་བུའི་(༢)གྲོལ་ལུགས་གསུམ་ལསཿ
དང་པོ་ནི་ཚོགས་ཀྱི་འཁོར་ལོས་བརྒྱན་པར་བླ་མས་བསྐྱེད་རྫོགས་བསྒོམ་ཞིང་ཿ སློབ་མ་ལ་སྐྱབས་སུ་འགྲོ་བ་དང་ཿ བྱང་ཆུབ་ཏུ་སེམས་བསྐྱེད་པ་དངཿ སྟོང་པའི་ངང་ལས་ཀུན་བཟང་ཡབ་ཡུམ་མཐིང་ག་ཞལ་སྦྱོར་རྡོ་རྗེའི་སྐྱིལ་ཀྲུང་མཛད་པར་སྒོམ་དུ་བཅུག་ནསཿ བླ་མ་བརྒྱུད་པ་དངཿ སངས་རྒྱས་རིགས་ལྔཿ མཁའ་འགྲོ་སྡེ་ལྔ་དང་བཅས་པ་དབྱིངས་ནས་སྤྱན་དྲངས་ལཿ ཧཱུྃ་ཧཱུྃ་ཧཱུྃཿ ཕེཾ་ཕེཾ་ཕེཾཿ ཧྲིཾ་ཧྲིཾ་ཧྲིཾཿ ཛ་ཧཱུྃ་བཾ་ཧོཿ པྲ་བྷེ་ཤ་ཡ་པྲ་བྷེ་ཤ་ཡཿ ཞེས་བཟླས་ཤིང་བསྟིམ་ལཿ རོལ་མོ་དཀྲོལཿ ཚིལ་ཆེན་གྱི་དུད་པ་གཏོང་ངོཿ དེ་ནི་ལུས་ལྷར་གསལ་བ་བུམ་དབང་ངོཿ དེ་ནས་ནམ་མཁར་ཀུན་བཟང་ཡབ་ཡུམ་བླ་མ་བརྒྱུད་པ་དང་བཅས་པའི་སྦྱོར་མཚམས་ནས་བྱང་སེམས་བབས་པསཿ སློབ་མའི་སྤྱི་བོར་ཐིམ་ནས་ལུས་གང་བསཿ བདེ་བ་རྒྱས་པར་བསམ་ཞིངཿ བདུད་རྩི་ལྕེ་ལ་བཞག་སྟེཿ ལུས་ཀྱི་ནང་ཡི་གེས་གང་བར་བསམ་ཞིངཿ ཨཱ་ཨཱཿཧཱུྃ་དངཿ ཨཱ་ལི་ཀཱ་ལི་བརྒྱ་རྩ་རེ་བཟླས་པ་ནིཿ ངག་སྔགས་སུ་གསལ་བ་གསང་བའི་དབང་ངོཿ དེ་ནས་བླ་མ་ཡབ་ཡུམ་དུ་སྒོམ་དུ་བཅུག་ནས་སྙོམས་པར་ཞུགས་པར་བསམ་དུསཿ དབའ་རླབས་མནན་པས་བདེ་བ་སྐྱེས་པ་ལ་འཛིན་པ་མེད་པར་ངོ་སྤྲོད་པ་ནི་ཤེས་རབ་ཡེ་ཤེས་ཏེ་ཡིད་བདེ་བ་ཆེན་པོར་གསལ་བའོཿ དེ་ནས་བུ་ཁྱོད་ཤར་གྱི་ནམ་མཁར་འགྲོ་བར་སྒོམས་ཤིགཿ ཨེ་མ་འགྲོ་བའི་གནས་འདུག་གམཿ འགྲོ་བའི་མཁན་པོ་འདུག་གམཿ འགྲོ་བྱེད་ཀྱི་ཤེས་པ་འདུག་གམཿ ལྷོ་དང་ནུབ་དང་བྱང་ལའང་དེ་བཞིན་དུ་སྦྱར་ནས་ནམ་མཁའི་དཀྱིལ་ན་ཉི་མའི་དཀྱིལ་འཁོར་འོད་གསལ་བའི་སྟེང་དུ་ཡོད་པར་བསྒོམས་ལཿ ཇེ་མཐོ་ཇེ་མཐོར་སོང་བས་(༣)སེམས་དང་ནམ་མཁའ་འདྲེས་ཏེ་ལྡོག་པའི་གནས་མེད་པརཿ མི་རྟོག་པའི་ངང་ལ་སྟོང་གསལ་འཛིན་པ་མེད་པར་མཉམ་པར་འཇོག་ཏུ་བཅུག་ནསཿ སེམས་ཉིད་ནམ་མཁའ་ལྟ་བུར་ངོ་སྤྲད་པ་ནིཿ རང་བྱུང་ཡེ་ཤེས་ཀྱི་གནས་ལུགས་ཀ་དག་ལྷུན་གྲུབ་ཀྱི་རང་བཞིནཿ རྫོགས་པ་ཆེན་པོའི་ཚིག་དབང་རིན་པོ་ཆེའོཿ དེ་ཡང་དང་པོ་རྣམ་རྟོག་དངཿ སྒོ་ལྔའི་ཤེས་པ་རང་གྲོལ་དུ་ཤེས་པར་བྱ་བའི་ཕྱིརཿ གྲགས་སྟོང་ལ་སོགས་པར་ངོ་སྤྲད་རྗེས་ནམ་མཁའ་ལྟ་བུའི་དོན་ལ་ངོ་སྤྲད་པ་ནི་གནད་དམ་པའོཿ དབང་རྣམ་པར་ཕྱེ་བའི་དོན་གཅིག་ཏུ་བསྡུས་པ་རྫོགས་སོཿ ས་མ་ཡཿ རྒྱ་རྒྱ་རྒྱཿ
དོན་གཉིས་པ། ལམ་གྲོལ་བར་བྱེད་པའི་གདམས་པ་བསྟན་པ།
༈ དོན་གཉིས་པ་ཁྲིད་ལ་གསུམ་ལསཿ སྔོན་འགྲོ་ནི་ལག་པ་སྤྱི་བོ་ལ་མ་རེག་པར་ཐལ་མོ་སྦྱར་ཏེ་བརྐྱངཿ རྐང་པའི་མཐིལ་སྤྲད་དེ་བསྐྱེདཿ སྐེད་པ་བསྲང་ལ་རྡོ་རྗེ་མཐིང་ག་མེ་འབར་བའི་ལྟེ་བ་ལ་ཧཱུྃ་གིས་མཚན་པ་གཅིག་ཏུ་བསྒོམས་ལ་ཞག་གཅིག་འབད་ནསཿ ཧཱུྃ་ལས་ཧཱུྃ་འཕྲོས་ནམ་མཁའ་གང་བསཿ ཧཱུྃ་སྒྲ་འབྲུག་སྟོང་ལྡིར་བ་ཙམ་བསྒྲགསཿ ཧཱུྃ་རྣམས་ནམ་མཁའི་དཀྱིལ་ན་ཕར་འགྲོ་ཚུར་འགྲོ་རང་ཉིད་རྡོ་རྗེར་གྱུར་པའི་ཕྱི་ནང་ཟང་ཐལ་དུ་སོངཿ རྡོ་རྗེ་ཡང་ཇེ་མཐོར་འགྲོ་ཞིང་ཧཱུྃ་སྒྲས་ནམ་མཁའ་གང་བར་བསམས་ལཿ ཧཱུྃ་ཧཱུྃ་ཧཱུྃ་ཞེས་སྙན་ལ་གདངས་རིང་བ་ཞག་གསུམ་རིམ་པ་བཞིན་འབད་དོཿ དེ་ནས་མཚན་མོ་ཉལ་དུས་རྣམས་སུ་དྲན་བསམ་ཡིད་ལ་མི་བྱེད་པའི་ངང་དུ་རྣལ་ལ་དབབ་པ་ཡང་བྱའོཿ དེ་ནས་ད་ལྟར་གྱི་སེམས་དྲན་རྟོག་སྣ་ཚོགས་སུ་འཆར་བ་ནིཿ ཤར་དུས་གང་ནས་བྱུངཿ གང་ན་འདུགཿ ཡལ་སོང་དུས་གར་སོངཿ ཁ་དོག་ངོས་གཟུང་ཇི་ལྟ་བུཿ ཤར་བ་དང་འཆར་མཁན་གཉིས་གཉིས་སུ་གྲུབ་བམ་ཞེས་ཞག་གསུམ་དུ་བརྟག་ཏུ་གཞུག་པར་བྱའོཿ དེ་དག་ནི་སྔོན་འགྲོ་དམ་པའོཿ དེ་ནས་དངོས་གཞི་ལཿ གཞི་ཀ་དག་ཁྲེགས་ཆོད་ཀྱི་ངོ་སྤྲོད་དངཿ ལམ་ལྷུན་གྲུབ་ཐོད་རྒལ་གྱི་ངོ་སྤྲོད་གཉིས་ལསཿ དང་པོ་ནི་ཚོགས་གཏོར་དང་གསོལ་བ་བཏབ་པའི་རྗེས་ལཿ ཀྱེ་སྐལ་ལྡན་ཕྱི་རོལ་སྣ་ཚོགས་སུ་སྣང་བ་ཐམས་ཅད་རྨི་ལམ་དང་འདྲ་སྟེཿ སེམས་ལ་སྣང་ཡང་དོན་ལ་མ་གྲུབ་པསཿ བཅས་བཅོས་དང་དགག་སྒྲུབ་མ་བྱེདཿ (༤)ནང་དྲན་རིག་སྣ་ཚོགས་སུ་འཆར་བ་ལྟར་སྣང་ཡང་འཆར་བ་དང་འཆར་མཁན་མ་གྲུབཿ ངོ་བོ་དང་ངོས་གཟུང་མ་གྲུབཿ ཆུའི་རི་མོ་ལྟར་ཝལ་པོ་རྗེས་མེད་དུ་གྲོལ་བསཿ གཏང་གཞག་དང་རེ་དོགས་མ་བྱེདཿ ཕྱི་སྣང་ཐོག་ཏུ་གཞག་པསཿ ནང་རིག་ཐོག་ཏུ་གྲོལ་ནས་སེམས་སྤྲོ་བསྡུ་མེད་པའི་གནས་ལུགས་ལ་གནས་པ་ནིཿ ཀུན་ཏུ་བཟང་པོའི་དགོངས་པ་ཡིན་པསཿ ཅིར་སྣང་ཆོས་ཉིད་དུ་ཤེས་པསཿ རིག་རྩལ་རྗེས་མེད་དུ་ཐོང་ཞིགཿ ཕྱི་འབྱུང་བ་ལྔཿ ནང་ཕུང་པོ་ལྔཿ གསང་བ་དུག་ལྔ་གང་སྣང་གི་ཐོག་ཏུ་ཙེན་གྱིས་རྣམ་རྟོག་སྤྲོ་བསྡུ་མེད་པའི་ངང་ལ་རང་བབས་སུ་ལྷོད་དེ་གློད་དངཿ གང་སྣང་འོད་གསལ་དུ་གྲོལ་ནས་བདེ་ཆེན་ཕྱོགས་ཡན་དུ་གྲོལ་ཏེཿ བདེ་གསལ་མི་རྟོག་པའི་ཉམས་རང་བྱུང་དུ་སྐྱེ་ཞིངཿ སེམས་ཉིད་རང་བྱུང་གི་ཡེ་ཤེས་ནམ་མཁའ་མཐའ་དབུས་མེད་པའི་དགོངས་པ་ནང་ནས་ནང་གསལ་འཆར་བ་ཡིནཿ ཞེས་ཐེབས་པར་གདབ་བོཿ གཉིས་པ་ཐོད་རྒལ་ནི་སྔ་དྲོ་འཆར་མཚམས་སམཿ ཕྱི་དྲོ་ནུབ་མཚམས་སུ་དྲང་སྲོང་གི་འདུག་སྟངས་ཀྱིས་བལྟར་བཅུག་པསཿ ཡེ་ཤེས་ཀྱི་སྣང་བ་མངོན་སུམ་དུ་མཐོང་བའི་ཚེཿ ཕྱི་འོད་ཀྱི་སྣང་བ་ལ་མ་ཡེངས་པར་བལྟས་པའི་དུས་ནཿ དགག་སྒྲུབ་ཀྱི་ཞེན་རྟོག་དབྱིངས་སུ་ནུབ་སྟེཿ གང་ལའང་མི་རྟོག་པའི་ཡེ་ཤེས་སྤྲོ་བསྡུ་མེད་པ་ཤར་དུསཿ འདི་ཁོ་ན་སངས་རྒྱས་ཐམས་ཅད་ཀྱི་དགོངས་པཿ ཤེས་རབ་རང་བྱུང་གི་སྒྲོན་མ་འོད་སྣང་མངོན་སུམ་གྱི་གནད་ལས་རྩོལ་མེད་ལྷུག་པར་འཆར་བ་ངོ་ཤེས་པར་གྱིས་ཤིག །དུས་བཞི་ཆོས་ཉིད་ཀྱི་འཁོར་ལོ་བདེ་ཆེན་འོད་གསལ་གྱི་དགོངས་པ་ལས་མི་གཡོ་བ་སྟེཿ གདོད་མ་ཆོས་ཟད་ཀྱི་དགོངས་པ་ལ་ཐུག་པས་ཟད་པ་ངོ་ཤེས་ཡིན་ཐོག་ཏུ་ཞོག་ལ་དུས་ཐམས་ཅད་དུ་སྐྱོངས་ཤིག་ཅེས་གདབ་བོཿ དངོས་གཞིའོཿ རྗེས་སྣང་བ་བཞིའི་འཆར་ལུགས་ལ་བཞི་ལསཿ ཆོས་ཉིད་མངོན་སུམ་གྱི་སྣང་བ་ནིཿ དེ་ལྟར་གོམས་ནས་ཐིག་ལེ་གསུམ་སྦྲེལ་དུ་སྣང་བ་ཚུན་ཆད་དེཿ ལུས་འདུག་སྟངས་ལས་མི་གཡོ་བཿ ངག་སྨྲ་བརྗོད་ཉུང་བཿ སེམས་བདེ་གསལ་མི་རྟོག་པ་ཤས་ཆེ་ཞིངཿ རྨི་ལམ་དགེ་བ་སྡིག་པ་ཟད་པ་རྣམས་རྨིའོཿ ཉམས་གོང་(༤)འཕེལ་ནིཿ འོད་སྣང་ལིང་ཙེ་དངཿ ཡུལ་གྲུ་ཁྱབ་པའི་ནང་ནས་ཐིག་ལེ་ཐིག་ཕྲན་དུ་གསལ་ལ་མི་གཡོ་ཞིངཿ པདྨ་སྟོང་ལྡན་དངཿ མཆོད་རྟེན་དངཿ གཞལ་མེད་ཁང་ལྟ་བུ་ནས་ལྷ་ཡབ་རྐྱང་པའི་བར་དུ་སྣང་ཞིངཿ ལུས་ངག་སེམས་གསུམ་སྔར་བས་དག་ཅིངཿ བར་འགར་མངོན་ཤེས་ཀྱང་ལྡན་པའོཿ རིག་པ་ཚད་ཕེབས་ནིཿ ལྷའི་སྐུ་གཟུགས་སྦྲེལ་ནས་དབྱིངས་སྣང་ནམ་མཁའ་ཁྱབ་པ་སྟེཿ རྨི་ལམ་མེད་ཅིང་རྫུ་འཕྲུལ་དང་མངོན་ཤེས་འགྲུབ་པའོཿ ཆོས་ཉིད་ཟད་པ་ནིཿ སྣང་བའི་འཕེལ་དངཿ ཕྱི་ནང་གི་འཛིན་པ་དངཿ རྡོས་བཅས་སུ་སྣང་བ་ཐམས་ཅད་ཟད་པའོཿ འདི་དག་ནི་ལམ་སྣང་བ་བཞིའི་འཕེལ་ཚད་ཟད་པའི་རིམ་པ་སྟེཿ ལམ་གྲོལ་བར་བྱེད་པའི་གདམས་པ་རྣམས་རྫོགས་སོཿ ས་མ་ཡཿ རྒྱ་རྒྱ་རྒྱཿ
དོན་གསུམ་པ། འབྲས་བུའི་གྲོལ་ལུགས་བསྟན་པ།
༈ དོན་གསུམ་པ་འབྲས་བུའི་གྲོལ་ལུགས་ནིཿ གདོད་མའི་གཞི་ཐོག་ཏུ་ཕྱིན་པ་སྟེཿ དཔེར་ན་ཤེལ་འོད་ནང་དུ་ཐིམ་དུས་འོད་ལྔ་སྦུབས་སུ་འཁྱིལ་པའི་ཚེ་ནང་གསལ་དུ་ཡོད་ལཿ ཕྱི་གསལ་དུ་མེད་ཀྱང་འོད་ཀྱི་འཆར་གཞི་བྱེད་པ་ལྟརཿ (༥)ལམ་སྣང་གི་ལོངས་སྐུ་གདོད་མའི་ཟད་ས་ཀ་དག་རང་བྱུང་གི་ཡེ་ཤེས་སྤྲོས་པ་དང་བྲལ་བའི་ཆོས་སྐུར་ཐིམ་དུསཿ ངོ་བོ་ལ་གཟུང་འཛིན་མཚན་མའི་ཆོས་སུ་མ་གྲུབ་ཅིངཿ ཆོས་སྐུའི་སྦུབས་ན་ལོངས་སྐུ་ལྔ་ལྡན་གྱི་འོད་དངཿ སྤྲུལ་སྐུ་དཀར་པོ་གཉིས་ཐིམ་ལ་མ་རྨུགས་པར་འཆར་གཞིའི་ཚུལ་དུ་ཡོད་པ་མཚོན་ཏེཿ ནང་གསལ་ལྷུན་གྲུབ་ཆེན་པོར་བཞུགས་སོཿ དེའི་དུས་ཐམས་ཅད་མཁྱེན་པའི་ཡེ་ཤེས་མཁྱེན་བྱེད་དུ་ཡོད་ཀྱངཿ སྤྱོད་བྱེད་དུ་མ་ཤར་བ་ཞེས་བྱའོཿ འདི་ནི་ཀ་དག་གི་ངང་ནས་ལྷུན་གྱིས་གྲུབ་པའི་ཡེ་ཤེས་ནང་གསལ་འཆར་གཞིར་བཞུགས་པའི་དུས་སུཿ དེ་ནས་གདུལ་བྱའི་སྣང་བ་ལ་འཇུག་པ་ནིཿ ཤེལ་ལས་འོད་གཉིས་པོ་ཕྱིར་འཆར་བ་བཞིན་དུཿ ཀ་དག་ཆོས་སྐུའི་ངང་ལསཿ རང་སྣང་ཕྱིར་གསལ་གྱི་ལོངས་སྐུའི་སྣང་ཆ་ལསཿ རང་བཞིན་སྤྲུལ་པ་སྐུའི་རིགས་ལྔའི་སངས་རྒྱས་སེམས་དཔའ་ས་ལ་བཞུགས་པ་ལ་སྣང་ཞིངཿ ལྷའི་ཐུབ་པ་ལ་སོགས་པ་འགྲོ་བ་འདུལ་བའི་ཐུབ་པ་སྤྲུལ་པའི་སྐུ་དངཿ བེམ་པོར་སྣང་བས་དོན་བྱེད་པ་སྣ་ཚོགས་སྤྲུལ་པའི་སྐུ་རྣམས་གང་(༦)ལ་གང་མོས་སུ་འཆར་བ་ནིཿ ལྷུན་གྱིས་གྲུབ་པའི་ཐུགས་རྗེ་ལས་གཡོ་བ་དངཿ འབད་པའི་རྩོལ་བ་གང་ཡང་མེད་བཞིན་དུ་ངང་གིས་སྣང་བ་ཡིན་ནོཿ གདུལ་བྱ་མེད་ན་དེའི་ངོ་ཁ་ལ་སྣང་བའི་སྟོན་པ་ཡང་མི་སྣང་བཿ ཆུ་སྣོད་མེད་པས་ཟླ་གཟུགས་མི་སྣང་བ་ལྟ་བུ་སྟེཿ དབྱིངས་ཐོག་མའི་གཞི་ལ་གཡོ་བ་མེད་པར་དུས་ཐམས་ཅད་དུ་བཞུགས་སོཿ གནམ་གང་གི་ཟླ་བ་དབྱིངས་ན་གནས་ཀྱངཿ ཕྱིར་མི་གསལ་བ་ལྟརཿ ཀ་དག་གི་གཞི་ལ་བཞུགས་པར་ཤེས་པར་བྱའོཿ ཐ་མ་འབྲས་བུའི་གྲོལ་ལུགས་བསྟན་པ་རྫོགས་སོཿ ས་མ་ཡཿ རྒྱ་རྒྱ་རྒྱཿ
འདི་ནི་ངེས་དོན་འོད་གསལ་སྙིང་པོ་ལམཿ མཁའ་འགྲོ་སྙིང་ཐིག་གསང་བའི་བཅུད་བསྡུས་ནསཿ གངས་རི་ཐོད་དཀར་ཨོ་རྒྱན་རྫོང་གནས་སུཿ དྲི་མེད་འོད་ཟེར་ཤར་བས་སྣང་བར་བྱསཿ ཕྱི་རབས་སྐལ་ལྡན་བྱང་ཆུབ་འདོད་པ་དགཿ ཡི་གེ་འདི་ལ་རྟག་ཏུ་ནན་ཏན་གྱིསཿ ཚིག་ཉུང་དོན་འདྲིལ་ཉམས་སུ་བླང་བདེ་བཿ གང་དང་མི་འདྲ་སྙིང་པོའི་གནད་བསྡུས་ཏེཿ ཕྱི་རབས་དོན་དུ་ལེགས་པར་བཀོད་པ་འདིཿ གསང་ཞིང་རྒྱས་གདབ་སྙིང་ལ་ས་མ་ཡཿ མཁའ་འགྲོ་སྙིང་ཏིག་གི་དབང་ཁྲིད་གྲོལ་ས་དང་བཅས་པ་དྲིལ་བའི་གནདཿ ངེས་དོན་སྙིང་པོ་ཞེས་བྱ་བཿ པདྨ་ལས་འབྲེལ་རྩལ་གྱིས་ཡི་གེར་བཀོད་པ་རྫོགས་སོཿ ས་མ་ཡཿ རྒྱ་རྒྱ་རྒྱཿ