རྨི་ལམ་སྦུབས་འཇུག་ཅེས་བྱ་བ།
༄༅༔ རྨི་ལམ་སྦུབས་འཇུག་ཅེས་བྱ་བ་བཞུགས་སོཿ རིན་ཆེན་ཤོག་སེར་སྐོརཿ
༄༅༔ རྐཊགརྒླ།མཾཥཿ རྨི་ལམ་སྦུབས་འཇུག་ཅེས་བྱ་བཿ ཡེ་ཤེས་མཚོ་རྒྱལ་ལ་ཕྱག་འཚལ་ལོཿ བག་ཆགས་ཉིད་ལས་འཁྲུལ་པའི་གཟུགས་ཤར་བཿ འཁོར་བའི་རྒྱུ་རྐྱེན་རྨི་ལམ་སྣང་བ་ཉིདཿ ཡེ་ཤེས་སྦུབས་སུ་འཇུག་པའི་མན་ངག་ནིཿ ཇི་ལྟར་བདག་ལ་བབས་པའི་ཚུལ་བཞིན་བཤདཿ དེའང་ཉིན་དུས་ཀྱི་སྣང་བ་འཁྲུལ་པའི་བག་(༥༤)ཆགས་ལསཿ མཚན་དུས་ཀྱི་རྨི་ལམ་སྣ་ཚོགས་སུ་འབྱུང་བ་ནིཿ རྣམ་རྟོག་ཕྱིར་བལྟས་ཡུལ་གྱི་རྗེས་སུཿ ནང་གི་རིག་པ་རླུང་གིས་བསྐྱོད་པ་ཉིད་འབྲངས་པ་ལས་བྱུང་བས་ཉིང་འཁྲུལ་དུ་ཤར་ཏེཿ ལས་དང་བག་ཆགས་ཀྱི་རྣམ་པ་བསགས་པས་འཁོར་བར་འཁྱམས་པའི་ཕྱིརཿ བླ་མའི་མན་ངག་གིས་ཡེ་ཤེས་ཆེན་པོའི་དབྱིངས་སུ་སྦ་བར་བྱ་སྟེཿ དེའང་ཉི་མ་འགར་དལ་བར་བྱས་ལཿ སྣང་བ་ཐམས་ཅད་རྨི་ལམ་སྒྱུ་མར་རྩལ་སྦྱངས་ཏེཿ མཚན་མོ་ཉལ་བས་རྨི་ལམ་ན་གང་ཤས་ཆེར་བརྟག་གོཿ དེ་ཡང་ད་ལྟ་འབའ་ཞིག་གིས་ཉིན་དུས་ཅི་བྱས་རྨི་ན་བག་ཆགས་ཤས་ཆུང་བས་ཤིན་ཏུ་སྦྱང་སླའོཿ འདས་པ་ཤས་ཆེ་བར་རྨི་ན་སྔར་འདྲེས་ཀྱི་བག་ཆགས་ཤས་ཆེ་བས་ཅུང་ཟད་དཀའོཿ ཆལ་ཆོལ་དུ་འདྲེས་མར་རྨི་ཞིང་བག་ཆགས་མེད་པའི་རྣམ་པ་ཤས་ཆེར་རྨི་ན་སྦྱང་བར་ཤིན་ཏུ་དཀའ་སྟེཿ དུས་གསུམ་གྱི་བག་ཆགས་ཤིན་ཏུ་འཐུག་པའི་ཕྱིར་རོཿ དེ་ནས་མི་མེད་པའི་རི་ལ་སོང་སྟེཿ གང་ཤས་ཆེ་བའི་རྨི་ལམ་དེཿ ད་ལྟའི་སྣང་བ་འདི་གསལ་བཏབ་ལཿ ལུས་མཆོངས་རྒྱུགཿ ངག་ཀུ་ཅོཿ སེམས་དྲན་རྟོག་སྣ་ཚོགས་པ་བླངས་ཏེཿ སྐད་ཅིག་སྐད་ཅིག་ལ་བདེན་མེད་དུ་ཤར་ཤར་སྦྱངས་ཤིང་ཕཊ་ཕཊ་ཅེས་བརྗོད་ལ་བླ་མ་སྤྱི་བོར་བསྒོམས་ཏེཿ འཁོར་འདས་རུ་ཤན་འབྱེད་པའི་སྤྱོད་པ་བཞིན་བྱའོཿ དེ་ལྟར་ཟླ་བ་ཕྱེད་དམཿ ཞག་བཅུར་སྦྱངས་པསཿ གང་ཤར་གཟའ་གཏད་དང་བྲལ་བར་གཏན་ལ་ཕེབས་སོཿ དེ་དག་གི་སྐབས་སུ་མཚན་མོ་གང་ལའང་མི་རྟོག་པར་ལྷོད་ཀྱིས་གློད་ལ་ཉལ་ལོཿ དེ་ནས་སྐྱེ་འགགས་གྲངས་འདེབས་ཀྱི་དགེ་སྦྱོར་རྟོག་པའི་འཕྲོ་འདུ་ཐམས་ཅད་ལིངས་ཀྱིས་བསྐྱུར་ལཿ སྒྱུ་མ་དང་རྨི་ལམ་ལྟ་བུའི་ལམ་ཁྱེར་ཡང་མི་བྱ་བརཿ དབེན་ཞིང་དྭངས་པའི་གནས་སུ་ལུས་བཞུགས་སྟངས་གསུམ་གང་རུང་ངམཿ རྡོ་རྗེ་སྐྱིལ་ཀྲུང་གིས་གནས་ཤིང་ངག་སྨྲ་བརྗོད་ཐམས་ཅད་བཀགཿ སེམས་དྲན་བསམ་ཐམས་ཅད་ཡིད་ལ་མི་བྱེད་པརཿ ནམ་མཁའ་དག་པའི་ངོས་སུ་མིག་མི་འགུལ་བར་གཏད་དེཿ རླུང་ཕྱིར་དལ་གྱིས་བཟུང་ལཿ ནང་དུ་མི་བཞག་པར་མཉམ་པར་བཞག་པསཿ ཤེས་པ་ཕྱི་ནང་གང་ནའང་མི་གནས་(༥༥)པའི་ཆོས་ཉིད་ཤེས་རབ་རང་བྱུང་གི་སྒྲོན་མ་ཁོང་ནས་འཆར་རོཿ དེ་ཉིད་ཀྱི་ངང་ལ་ཐབས་དེས་ཇི་ཙམ་བཞག་བཞག་གདོད་མའི་ཀ་དག་ཏུ་ད་ལྟ་གནས་པསཿ འཕྲོ་འདུའི་རྟོག་པ་གཞི་ལ་ཐིམ་སྟེཿ རྣམ་པར་མི་རྟོག་པའི་ཡེ་ཤེས་བློས་མ་བྱས་པའི་ཆོས་ཉིདཿ རང་ལ་གནས་པའི་ཡེ་ཤེསཿ བྱ་རྩོལ་འདས་པའི་སྒོམ་པཿ ཀུན་ཏུ་བཟང་པོའི་རང་བཞིན་དུས་ཐམས་ཅད་དུ་འཆར་རོཿ
དེ་ལྟར་ཉིན་མོ་ཉམས་སུ་བླངས་ནས་ཉལ་བའི་ཚེཿ གཞོག་གཡས་ཕབ་ལཿ སེམས་ཀྱི་དྲན་བསམ་འཕྲོ་འདུའི་རྟོག་པ་གང་ཡང་མི་བྱ་བར་ལྷོད་ནས་ཉལ་བསཿ དང་པོར་རྨི་ལམ་གསལ་ལ་དྭངས་པ་སྔར་བས་ཉུང་བ་རྨིའོཿ དེ་ནས་ཇེ་ཉུང་ཇེ་ཉུང་ལ་མཐར་དབྱིངས་སུ་ཐིམ་ནསཿ མི་རྨི་བར་ཆོས་ཉིད་གདོད་མའི་ངང་དུ་གནས་པར་འགྱུར་རོཿ དེའི་ཚེ་ཉིན་མཚན་འདྲེས་པ་ཞེས་བྱ་སྟེཿ རང་བཞིན་སྤྲོས་བྲལ་གྱི་ངང་དུ་འཁོར་བར་གྲོལ་བསཿ ཚེའི་དུས་བྱས་དུས་ཀ་དག་གི་གྲོལ་གཞི་ནམ་མཁའ་ལྟ་བུའི་ངང་དུ་སངས་རྒྱའོཿ དེ་ནི་ཆོས་ཉིད་ཀ་དག་གི་སྣང་བའི་སྦུབས་སུ་རྨི་ལམ་སྦ་བ་ཞེས་བྱའོཿ དེ་ནས་ལྷུན་གྲུབ་འོད་གསལ་གྱི་ངང་དུ་སྦ་བ་ནིཿ འཁོར་འདས་རུ་ཤན་འབྱེད་པ་ཡན་ཆད་སྔར་དང་འདྲ་བ་ལསཿ ཁྱད་པར་དུ་ལྟ་སྟངས་དང་གཟིགས་སྟངས་བསྟུན་ལཿ ཉིན་དུས་མངོན་སུམ་འོད་ལྔའི་ངང་ལས་མ་ཡེངས་པར་བྱས་པསཿ འཕྲོ་འདུའི་རྟོགས་པ་ཐམས་ཅད་འོད་གསལ་གྱི་དབྱིངས་སུ་ནུབ་ནསཿ སྣང་ཡུལ་དུ་འོད་ལྔར་སྣང་ཡངཿ སེམས་ཀྱི་སོ་སོར་མི་རྟོག་པ་མཉམ་རྫོགས་སྤྲོས་པ་དང་བྲལ་བའི་ཡེ་ཤེསཿ ཤེས་རབ་རང་བྱུང་གི་སྒྲོན་མ་ཁོང་ནས་ཤར་ཏེཿ སྟོང་གསལ་གཉིས་མེད་ཀྱི་དོན་གདོད་མའི་ངང་ལཿ ཐབས་དེས་ཇི་ཙམ་བཞག་བཞག་དབྱིངས་སུ་གནས་པའོཿ དེའི་ཚེ་རང་བྱུང་ལྷན་ཅིག་སྐྱེས་པའི་ཡེ་ཤེས་འབའ་ཞིག་ལ་སྤྱོད་པའོཿ མཚན་མོ་ཉལ་དུས་རླུང་སེམས་རབ་ཏུ་དལ་བས་སྔ་མ་ལྟར་སེང་གེའི་ཉལ་ལུགས་ཀྱིས་ཉལ་ཏེཿ སྙིང་གི་ནང་དུ་འོད་ལྔའི་མར་མེ་མཐེ་བོང་ཙམ་ལས་འོད་ཟེར་འཕྲོས་པས་ལུས་ཀྱི་ནང་ཐམས་ཅད་གངཿ དེ་ལས་ཕྱིར་འཕྲོས་པས་གནས་ཁང་འོད་ལྔས་གངཿ དེ་ལས་ཕྱིར་འཕྲོས་(༥༦)པས་ཡུལ་གྲུ་ཐམས་ཅད་གང་ནསཿ མཐར་ནམ་མཁས་གར་ཁྱབ་པ་འོད་ལྔས་ཁྱབ་པར་བསྒོམ་མོཿ དེ་ཡང་གསལ་བཿ འཚེར་བཿ ལྷུན་སྡུག་པཿ འོད་ཟེར་འབར་བཿ ཕྲི་ལི་ལི་འདུག་པར་བསམ་པའི་ངང་ལས་གཉིད་དུ་སོང་བསཿ དང་པོ་རྨི་ལམ་གསལ་དྭངས་ལཿ བདེ་བ་གསལ་བཿ མི་རྟོག་པས་བརྒྱན་པ་འཆར་ཞིངཿ རིམ་གྱིས་སངས་རྒྱས་ཀྱི་ཞིང་སྣང་དངཿ འོད་ལྔའི་སྣང་བས་ཁྱབ་པར་རྨི་ལམ་ནའང་མཐོང་སྟེཿ དེ་ནས་རྨི་ལམ་ཇེ་ཉུང་ལ་སོང་བའི་མཐར་འོད་གསལ་གྱི་དབྱིངས་སུ་ཐིམ་ནས་རྨི་ལམ་གང་ཡང་མེད་པར་ཉིན་པར་བཞིན་སོང་དུས་ཉིན་མཚན་འདྲེས་པ་ཞེས་བྱ་སྟེཿ འཁྲུལ་སྣང་ལོངས་སྐུར་ཐིམ་ནས་གདོད་མའི་གཞི་ལ་མཐར་ཕྱིན་པར་འགྱུར་རོཿ ཁྱད་པར་དུ་འོད་གསལ་གྱི་སྣང་བ་ཤར་དུས་གདོད་མའི་ངང་དུ་གྲོལ་བར་འགྱུར་རོཿ དེའང་ཕྱོགས་གཞན་ལས་རྨི་ལམ་སྦྱོང་བཟུང་སྤེལ་སྒྱུར་དུ་བྱེད་པ་ནིཿ རྟོག་པའི་དྲ་བ་རྒྱུན་མི་འཆད་པས་འོད་གསལ་མ་བུ་འདྲེས་པར་དཀོན་ནོཿ འདིར་ཀ་དག་དང་ལྷུན་གྲུབ་གཉིས་ཀྱི་སྦུབས་སུ་རྨི་ལམ་སྦས་པསཿ ད་ལྟ་ནས་གཞི་ཐོག་ཏུ་བཙན་ས་ཟིན་ཏེཿ གདོད་མའི་རང་ངོ་ཤེས་ནས་ཚེ་འདིར་གྲོལ་བ་དངོས་ཡིན་ནོཿ འོ་ན་ཀ་དག་གཅིག་པུས་ཀྱང་གྲོལ་ནཿ དེ་ལ་སྣང་བ་བཞི་ཇི་ལྟར་རྩི་སྙམ་ནཿ དང་པོ་ཀ་དག་སྤྲོས་པ་དང་བྲལ་བའི་ཡེ་ཤེས་རང་ངོ་ཤེས་པ་ནི་ཆོས་ཉིད་མངོན་སུམ་གྱི་སྣང་བའོཿ དེའི་ངང་ལ་གོམས་པས་ཕྱི་སྣང་བ་སྣ་ཚོགས་ལ་གཟུང་འཛིན་གྱི་བློ་མི་སྐྱེཿ ནང་རྟོག་པ་སྣ་ཚོགས་ལ་འཕྲོ་འདུའི་སེམས་མི་འཇུགཿ གསང་བ་བདེ་གསལ་མི་རྟོག་པའི་ཉམས་བཟང་པོ་ཇེ་ཆེར་འཕེལ་བསཿ ཉམས་གོང་འཕེལ་གྱི་སྣང་བ་ཞེས་བྱའོཿ དེའི་ངང་ལ་གོམས་པས་གཟུང་འཛིན་གཉིས་འཛིན་གྱི་རྟོག་པ་རང་སར་གྲོལ་ཏེཿ འཛིན་མེད་མཐའ་བྲལ་གྱི་རྟོག་པ་མངོན་དུ་གྱུར་ནསཿ འཁོར་འདས་རེ་དོགས་དང་བྲལ་དུསཿ སྤྱན་དང་མངོན་ཤེས་དངཿ ཐུན་མོང་གི་དངོས་གྲུབ་ཞོར་ལ་འགྲུབ་པ་ནིཿ རིག་པ་ཚད་ཕེབས་ཀྱི་སྣང་བ་ཞེས་བྱའོཿ དེའི་ངང་ལ་ཅི་ཡང་འཛིན་པ་མེད་པར་གནས་པས་ལས་དང་བག་ཆགས་དང་གཟུང་འཛིན་འཁྲུལ་(༥༧)རྟོག་ཐམས་ཅད་ཟད་པ་ནིཿ ཆོས་ཉིད་ཟད་པའི་སྣང་བའོཿ དེ་ནས་ལུས་བོར་བ་དང་ཕུང་པོ་ལྷག་མ་དང་བཅས་ཏེཿ སེམས་གདོད་མའི་གཞི་ལ་མྱ་ངན་ལས་འདའ་བ་ཡིན་ནོཿ དེ་ལྟ་བུའི་རྣལ་འབྱོར་པ་རྣམས་ནི་ད་ལྟ་ཉིད་ནས་ལྷག་བཅས་ཀྱི་མྱ་ངན་འདས་པ་ཡིན་ནོཿ ལུས་བོར་དུས་དེ་ཡང་མེད་པསཿ ཡང་དག་པར་ལྷག་མེད་དུ་སངས་རྒྱས་པའོཿ ལྷུན་གྲུབ་ཀྱི་སྣང་བ་བཞི་ཚད་དུ་ཕྱིན་པ་རྣམས་ནི་ད་ལྟར་ནས་ལྷག་མེད་དུ་མྱ་ངན་ལས་འདས་ཏེཿ རྡོས་བཅས་ཟད་པའི་ཕྱིར་རོཿ དེ་ལ་ལྟོས་ནས་ལྷག་བཅས་སུ་འདས་པ་སྔ་མར་བཞག་གོཿ དེས་ནི་ཐབས་འདི་ཤིན་ཏུ་གསང་ཞིང་ཉམས་སུ་བླངས་ནཿ ཟླ་བ་ཕྱེད་ན་རྨི་ལམ་གདོད་མའི་དབྱིངས་སུ་ནུབ་པ་ལ་ཐེ་ཚོམ་མེད་དོཿ བརྩོན་པ་རབ་ཀྱི་སྤྱོད་ཡུལ་ལོཿ འབྲིང་གིས་ཟླ་བ་གཅིགཿ ཐ་མས་ཟླ་བ་གསུམ་ན་གདོད་མའི་དབྱིངས་སུ་འོད་གསལ་མ་བུ་འདྲེས་པར་བྱེད་དོཿ དེ་ཡང་ཕྲ་རགས་ཀྱི་རྟོག་པ་ཡུལ་ལ་འཕྲོས་པས་གདོད་མའི་གཞི་ལས་གཡོས་པའོཿ དེ་ཉིད་གང་ཡང་མེད་ན་དང་པོའི་གཞི་ལ་ཟིན་པའོཿ དེའི་ཕྱིར་གདོད་མའི་གྲོལ་གཞི་ལ་བརྟན་པའི་ཚདཿ རྨི་ལམ་དབྱིངས་སུ་ནུབ་དུས་ན་ཡིན་པར་རྒྱུད་ལུང་མན་ངག་ཀུན་མཐུན་ནོཿ དེས་ན་གསང་བའི་མན་ངག་འདི་ཆེས་ཤིན་ཏུ་གསང་ཞིང་ཉམས་སུ་ལོངས་ཤིགཿ ཕ་མ་སྙིང་དང་འདྲ་བའི་མན་ངག་འདིཿ མཁའ་འགྲོས་གནང་སྟེ་སྙིང་ལ་གབ་ན་ཡངཿ ཕྱི་རབས་སྐལ་ལྡན་རྗེས་གཟུང་སྙིང་རྗེའི་བློསཿ གསང་བའི་ཐབས་འདི་མངོན་དུ་ཕྱུང་བ་ཡིནཿ གཞན་དུ་སྤེལ་ན་མཁའ་འགྲོས་ཆད་པ་འབྱུངཿ དེ་ཕྱིར་རང་གི་སྙིང་ལ་རྒྱས་ཐོབ་ལཿ ཤིན་ཏུ་གསང་བའི་ཚུལ་གྱིས་ཉམས་སུ་ལོངསཿ ཨོ་རྒྱན་ཐུགས་སྲས་དྲི་མེད་འོད་ཟེར་གྱིསཿ གངས་རི་ཐོད་དཀར་རིན་ཆེན་སྙིང་པོར་བཀོདཿ སྐལ་ལྡན་ལས་ཅན་རྣམས་དང་འཕྲད་པར་ཤོགཿ ས་མ་ཡཿ རྒྱ་རྒྱ་རྒྱཿ དགེའོཿ