འོད་གསལ་པྲ་ཁྲིད།
༄༅༔ འོད་གསལ་པྲ་ཁྲིད་བཞུགས་པ་ལགསཿ རིན་ཆེན་ཤོག་སེར་སྐོརཿ
༄༅༔ ཐྭན།མྱགྱཱཿ རྒྱ་གར་སྐད་དུཿ རཏྣ་བན་དྷུ་ཝ་ར་ཏི་ནཱ་མཿ བོད་སྐད་དུཿ འོད་གསལ་རིན་པོ་ཆེའི་པྲ་ཁྲིད་ཅེས་བྱ་བཿ སྟོང་པ་ཡེ་ཤེས་ཀྱི་སྙིང་པོ་ཅན་ལ་ཕྱག་འཚལ་ལོཿ སངས་རྒྱས་རྣམས་ཀྱི་ངེས་པའི་བཅུད་ཕྱུང་བཿ སྙིང་པོའི་ཡང་གསང་ཚེ་གཅིག་སངས་རྒྱས་ལམཿ དགོངས་གཏེར་ཟབ་མོའི་གནད་བསྡུས་མངོན་སུམ་པརཿ ཞེ་ཕུགས་ཉམས་ལེན་སྙིང་ཕྱུང་ལག་ཁྲིད་དགོདཿ
དེ་ལ་ཚེ་འདིར་གྲོལ་བ་འོད་གསལ་གྱི་གནདཿ བར་དོར་གྲོལ་བ་འོད་གསལ་གྱི་གནདཿ ཕྱི་མར་གྲོལ་བ་འོད་གསལ་གྱི་གནད་གསུམ་ལསཿ དང་པོ་ནིཿ སྣང་དང་མུན་པའི་བྱེ་བྲག་གིསཿ འོད་གསལ་དེ་ཡང་རྣམ་པ་གཉིསཿ ཐོག་མར་སྣང་བའི་རྣལ་(༧༡)འབྱོར་ནིཿ དྭངས་ཤིང་མཐོ་བའི་ས་ཕྱོགས་སུཿ ཉི་མ་ལ་ནི་རབ་ཕྱོགས་པརཿ རྡོ་རྗེ་འཛིན་པའི་སྐྱིལ་ཀྲུང་གིསཿ མཉམ་གནས་རླུང་ནི་ཁ་ནས་དྲངཿ མི་བསྐྱོད་པ་ཡིས་དབང་བསྐུར་ཏེཿ རབ་ཏུ་ཐིམ་པས་དབྱིངས་རིག་བལྟཿ དེ་ཡང་པུས་མོ་ཕྱིར་དགྱེད་ལཿ རྐང་པ་གཉིས་བསྣོལཿ ལག་པ་གཉིས་བརླ་དང་སྐེད་པའི་བར་དུ་བསྣོལཿ ཉི་མའི་ངོས་ལ་ཕྱོགས་པརཿ བླ་མའི་མན་ངག་གིས་དབང་བསྐུར་ལཿ ཐད་དྲང་ལ་བལྟ་ཞིང་རླུང་ཁ་ནས་དབྱུང་རྔུབ་རབ་ཏུ་དལ་བར་བྱའོཿ དེའི་ཚེ་དབྱིངས་འོད་ཁྱིམ་དངཿ རིག་གདངས་ལུ་གུ་རྒྱུད་ཐིག་ཕྲན་གྱི་སྣང་བ་ལ་བལྟས་པསཿ རིག་པ་ཤེས་རབ་རང་བྱུང་གི་སྒྲོན་མ་གསལ་སྟོང་གཟུང་འཛིན་དང་བྲལ་བ་ཁོང་ནས་འཆར་རོཿ དེའི་ཚེ་དབྱིངས་སྣང་ཁ་དོག་ལྔཿ ཟ་འོག་བེར་ཁྱིམ་བཀྲམ་པ་འདྲཿ གདངས་ཀྱི་ཐིག་ལེ་སྟོང་སྒྲོན་ནིཿ འབྲེལ་ལ་མ་འདྲེས་སོ་སོར་གསལཿ རིག་གདངས་ལུག་རྒྱུད་ཐིག་ཕྲན་རྣམསཿ འགྲོ་འོང་གིས་ནི་རྣམ་པར་སྣངཿ དེ་ཉིད་མི་འགུལ་བཅིངས་པ་གཅེསཿ དབྱིངས་སྣང་ཟ་འོག་རིས་ཀྱི་ནང་ནཿ གདངས་ཀྱི་ཐིག་ལེ་སྟོང་སྒྲོན་ཟླུམ་འཁྲིགས་རིསཿ ཁ་དོག་སྣ་ལྔའི་མུ་ཁྱུད་ཀྱིས་བསྐོར་བཿ དབུས་ན་པདྨ་འདབ་བཞིའི་རྣམ་པ་ཅནཿ གཅིག་ལ་གཅིག་འབྲེལ་མང་པོ་སྣང་བའི་ནང་ནཿ ལུ་གུ་རྒྱུད་ཐིག་ཕྲན་འགྲོ་འོང་བྱེད་པ་རྣམས་ལ་མིག་དང་ཤེས་པ་མ་འགུལ་བར་བལྟས་པསཿ ས་རྡོ་རི་བྲག་ལ་སོགས་པ་མི་སྣང་བརཿ འོད་གསལ་ཆུ་ཟླ་ལྟར་སྣང་བས་ཕྱི་གཟུང་བ་ཡུལ་གྱི་འཁྲུལ་པ་འོད་གསལ་དུ་འགགས་ཤིངཿ དེའི་ངང་ལ་གནས་པསཿ ངང་དྭངས་རང་བཞིན་བདག་ཉིད་ཆེཿ སྟོང་གསལ་ཀ་དག་ངང་ལ་གནསཿ མི་གནས་མི་དམིགས་སྤྲོས་ཀུན་ཞིཿ རང་བཞིན་གདོད་མའི་སར་ཕྱིན་པའོཿ དེ་ལྟར་རིག་པ་སྟོང་གསལ་ཕྱོགས་ལྷུང་དང་བྲལ་བསཿ ནང་འཛིན་སེམས་ཀྱི་འཁྲུལ་པ་གཞི་ཐོག་ཏུ་གྲོལ་ཏེཿ དགོངས་པ་མཐའ་གྲོལ་ཀློང་ཡངས་ཆེན་པོར་ལྷུན་གྱིས་གྲུབ་བོཿ དེ་ལས་ཕྱི་ཕྱིར་གོམས་པ་ཡིསཿ ཕྱི་ནང་རྡོས་བཅས་གདོད་མར་གྲོལཿ དེའང་སྣང་བ་བཞི་རིམ་གྱིས་མཆེད་ནསཿ ཆོས་ཉིད་(༧༢)གདོད་མའི་ངང་དུ་རབ་ལོ་གསུམཿ འབྲིང་ལྔཿ ཐ་མ་བདུན་ན་གྲོལ་བ་ཡིན་ནོཿ ཞར་ལ་ཆུ་ཤེལ་སྒྲོན་མ་ཡངཿ སྣང་བའི་རྣལ་འབྱོར་ཉིད་དུ་བཤདཿ ཟླ་བའི་དཀྱིལ་འཁོར་དབུས་སུ་སྟེཿ ཉིན་དུས་ཚ་བའི་རབ་རིབ་སེལཿ སྒྲོན་མེའི་འོད་ཀྱི་རྩ་ལམ་སྦྱོངཿ
དེ་ལྟར་ཉམས་སུ་ལེན་པའི་ཚེཿ ཉིན་མོའི་སྣང་བས་མིག་གི་ཚ་བ་འཕེལ་ནས་མི་བདེ་བ་ཀུནཿ མཚན་མོ་ཟླ་བའི་དཀྱིལ་དུ་བག་རེ་བལྟས་པས་སེལ་ལོཿ མར་མེའི་འོད་ལ་བལྟས་པས་རྩ་ཤེལ་སྦུག་ཅན་གྱི་ལམ་བྱང་ནསཿ གཟིགས་སྟངས་བདེ་ཞིང་སྣང་བ་འཕེལ་བ་ཡིན་ནོཿ སྣང་བའི་རྣལ་འབྱོར་རོཿ གཉིས་པ་མུན་པའི་རྣལ་འབྱོར་ནིཿ སྣང་བ་ལ་ཟླ་བ་དྲུག་ཏུ་བསྒོམས་པས་མཚན་མོའི་འོད་གསལ་སྦྱང་བ་ནིཿ སྣང་བ་མེད་པའི་ཁྱིམ་དག་ཏུཿ རྡོ་རྗེ་སྐྱིལ་མོ་ཀྲུང་བཅས་ཏེཿ གཟིགས་སྟངས་གསུམ་ལ་སྔ་ཕྱིར་བསླབསཿ ཉི་ཤུ་གཅིག་གིས་སྐལ་ལྡན་པརཿ འགྲུབ་འགྱུར་འདི་ལ་ཐེ་ཚོམ་མེདཿ དེ་ཡང་བུ་ག་མེད་པའི་ཁང་པརཿ བྲམ་ཟེའི་སྐྱིལ་ཀྲུང་གིས་རླུང་དལ་བས་ཞག་བདུན་དུ་ཐུར་དུ་ཟིམ་བུར་བལྟཿ དེ་ནས་བདུན་དུ་ཐད་དྲངས་ལཿ དེ་ནས་བདུན་དུ་གྱེན་ལ་ཧར་པོར་བལྟས་པསཿ ན་བུན་ལྟ་བུ་དངཿ མེ་ཏོག་ལྟ་བུ་དངཿ སྣ་ཚོགས་གཟུགས་ཅན་དངཿ འོད་ལྔའི་རྣམ་པ་ཚད་མེད་པ་འཆར་རོཿ གཞན་ཡངཿ ཁམས་དྲུག་འདུས་པའི་རླུང་སེམས་ལསཿ འགྲོ་བ་དྲུག་གི་རྣམ་པར་སྣངཿ ཡེ་ཤེས་འདུས་ལས་དག་པའི་ཞིངཿ སྐུ་དང་ཐིག་ལེ་ལ་སོགས་སོཿ དེའང་ལུས་ཀྱི་གནས་སྤྱི་གཙུགཿ སྨིན་མཚམསཿ མགྲིན་པཿ ལྟེ་འོགཿ གསང་གནསཿ རྐང་མཐིལ་དྲུག་ཏུ་རླུང་སེམས་འདུས་པ་ལསཿ མ་དག་པ་སྦྱང་གཞི་འགྲོ་དྲུག་གི་སྣང་བ་སྣ་ཚོགས་འཆར་ཞིངཿ བདེ་ཆེན་འཁོར་ལོ་ལ་སོགས་པ་ལྔར་རླུང་སེམས་འདུས་པ་ལས་སངས་རྒྱས་ཀྱི་ཞིང་དང་ཉན་རང་དངཿ བྱང་ཆུབ་སེམས་དཔའ་དང་མཁའ་འགྲོ་ལྔ་ལ་སོགས་པ་དག་པའི་སྣང་བ་སྣ་ཚོགས་འཆར་ཞིངཿ རིག་པ་གང་དུའང་མ་འདུས་པས་རླུང་སེམས་གཞི་ཐོག་ཏུ་གྲོལ་བ་སྟེཿ སྣང་དང་མི་སྣང་གི་འཛིན་པ་མེད་པར་ཀུན་ཏུ་བཟང་པོའི་ཀློང་དུ་ཐིམ་པའོཿ (༧༣)དེ་ལ་ནི་ཇི་སྐད་གསུངས་པའི་སྣང་བ་བཞི་འཆར་ཡང་དེར་འཛིན་པ་མེད་པས་གྲོལ་བ་ཡིན་ནོཿ
འདིར་རྣལ་འབྱོར་པས་འཁོར་འདས་ཀྱི་རྩ་ཁམས་སུ་རླུང་སེམས་འདུས་ཀྱང་དགག་སྒྲུབ་མེད་པསཿ ལྟ་སྟངས་གཟིགས་སྟངས་བསྒྱུར་ཏེ་གང་དུའང་མི་རྟོག་པར་བཞག་པས་སྣང་བ་དེ་དག་ལས་གྲོལ་བའོཿ དེ་ལྟར་བསྒོམས་པའི་རྣལ་འབྱོར་པ་ནིཿ ཉིན་མཚན་དུས་རྣམས་ཐམས་ཅད་དུཿ ཕྱིར་ནི་སྣང་བའི་འོད་གསལ་ལསཿ ནང་དུ་སྟོང་པའི་འོད་གསལ་འཆརཿ ཐབས་ཤེས་དབྱིངས་རིག་འདུ་འབྲལ་མེདཿ ཕྱི་འོད་གསལ་ཐབས་ཀྱི་སྣང་བ་ལསཿ ནང་འོད་གསལ་ཤེས་རབ་ཀྱི་སྣང་བ་རྒྱ་ཆད་ཕྱོགས་ལྷུང་མེད་པའི་ལྟ་བཿ ངང་དྭངས་རང་གསལ་གྱི་སྒོམ་པཿ ཚོགས་དྲུག་རང་གྲོལ་གྱི་སྤྱོད་པཿ རེ་དོགས་མེད་པའི་འབྲས་བུ་རང་བཞིན་ལྷུན་གྲུབ་ཏུ་ཤར་ཏེཿ འོད་སྣང་སྣ་ཚོགས་སུ་སྣང་ཡང་དབྱིངས་རང་བཞིན་གྱི་རྣམ་དག་སྐྱེ་བ་མེད་པའི་ཆོ་འཕྲུལ་དུ་འབྱུང་བ་ནིཿ ཇི་ལྟར་སྣང་བ་ཆུ་ཟླ་འདྲཿ སྐྱེ་བ་མེད་ལས་ཐམས་ཅད་སྐྱེསཿ སྐྱེས་ཙམ་ཉིད་ནས་སྐྱེ་བ་མེདཿ སྐྱེས་དང་མ་སྐྱེས་མཉམ་པ་ཉིདཿ སྣ་ཚོགས་སྣང་ལ་སྤྲོས་དང་བྲལཿ རང་བཞིན་གཉིས་མེད་མཐའ་ལས་འདསཿ ཀུན་བཟང་ཡབ་ཡུམ་དགོངས་པར་ཕྱིནཿ དེ་ལྟར་ཆོས་ཐམས་ཅད་སྣང་ལ་རང་བཞིན་མེད་པ་གཟུགས་བརྙན་དང་འདྲ་བར་རྟོགས་པའི་རྣལ་འབྱོར་པའི་རིག་པ་ལ་ངོ་སྤྲད་ནཿ རང་རིག་མ་འགགས་ཝ་ལེར་གསལ་བ་ཀུན་ཏུ་བཟང་པོཿ གསལ་ལ་འཛིན་མེད་སྟོང་པར་སངས་ངེ་བ་འདི་ཀུན་ཏུ་བཟང་མོའི་དགོངས་པའོཿ དེའི་ཚེ་འོད་གསལ་འཛིན་མེད་སྒྲོན་མ་བཞིའི་ངང་ལ་ཆེ་བའི་ཡོན་ཏན་ཉི་ཤུ་རྩ་ལྔ་ཡང་རྫོགས་ཏེཿ མིག་ལ་སོགས་པ་དབང་པོའི་ཞེན་པ་ལོག་སྟེ་རྣམ་པར་མི་རྟོགཿ གཟུགས་ལ་སོགས་པ་ཕུང་པོའི་ཞེན་པ་ལོག་སྟེ་རིགས་དྲུག་མངལ་ཁ་སྟོངསཿ ཕྱི་ཡུལ་གྱི་ཞེན་པ་ལོག་སྟེ་གཉིས་སུ་མེད་པར་ཞིགཿ སེམས་ཀྱི་དངོས་པོ་སྤུར་ཏེ་རང་གྲོལ་སེམས་ཀྱི་བྱུང་ཚོར་གནས་སུ་ཆོད་པས་ངར་འཛིན་ཞིགཿ འདུས་ཚོར་སྣང་བ་རང་སྣང་དུ་ངོས་ཟིན་པས་རང་རིགཿ རིག་པ་ཆོས་ཉིད་ཀྱི་བཙོན་རར་ཟིན་པས་འཁོར་བ་དགཿ (༧༤)འཁྲུལ་པའི་རང་རྒྱུད་ཁུངས་ཆོད་དེ་རང་འོད་ངོས་ཟིནཿ རང་གིས་རིགས་དྲུག་རིམ་གྱིས་བསྒྲལ་ཏེ་འགྲོ་དྲུག་གི་གཡང་ས་ཆོདཿ འཁོར་བའི་དོང་ནས་ཐོན་ཏེ་ཕྱིར་མི་ལྡོགཿ ཆོས་ཅན་ཐུར་དུ་ཚུད་པས་ཆོས་ཉིད་དོན་གྱི་ཚད་མ་རྟོགསཿ རོའི་ཁུངས་སྦུར་ཏེ་ཡེ་ཤེས་ཀྱི་ལུས་ཐོབཿ ཞེན་པའི་ཕྲེང་ཐག་ཆོད་དེ་བག་ཆགས་རང་དགཿ ལུ་གུ་རྒྱུད་ཨར་ལ་གཏད་པས་རིག་པ་དབྱིངས་སུ་གནསཿ འོད་ལྔ་ལྷའི་ཕྱག་རྒྱར་མཐོང་བས་རིག་པ་རང་གསལཿ ཡིད་དཔྱོད་ཀྱི་ལྟ་སྒོམ་ལོག་པས་ཀུན་གསལ་དག་པའི་དྲི་མེད་ཆོས་ཀྱི་སྐུ་ཐོབཿ ས་ལམ་དུས་གཅིག་ཆོད་པས་རྩོལ་བ་རང་སར་དགཿ ཡིད་དཔྱོད་འཛིན་པའི་ལྟ་བ་ཁུངས་ཆོད་པས་སྙེམས་དང་བྲལཿ སྐུ་གསུམ་ལམ་དུ་ལོངས་པས་འཁྲུལ་པ་ཀ་ནས་དགཿ སྣང་བ་དངོས་སུ་བསླངས་པས་རྟོག་པ་མངོན་དུ་གྱུརཿ དགྲའི་ཞེན་པ་ཆོད་པས་བདུད་བཞིའི་འཇིགས་པ་བཅོམཿ བསམ་གཏན་ཆེན་པོའི་ས་ནོན་པས་དམིགས་གཏད་ཐམས་ཅད་དང་བྲལཿ ཕྱི་ནས་སངས་རྒྱས་སུ་རེ་བའི་མངོན་ཞེན་ཆོད་པས་རེ་དོགས་རང་གྲོལཿ ཕྲིན་ལས་མཐར་ཕྱིན་པས་འགྲོ་དོན་ལྷུན་གྱིས་གྲུབཿ རྒྱལ་སྲས་ས་ཆེན་པོ་ནོན་པས་ཆོས་དབྱིངས་ཟད་མི་ཤེསཿ དེ་ལྟར་བཏགས་གྲོལ་ནས་གསུངས་པའི་ཡོན་ཏན་རྣམས་རྣལ་འབྱོར་པ་གཅིག་གིས་ད་ལྟ་ཐོབ་པས་འདིར་གྲོལ་བ་ཡིན་ནོཿ དེ་ལྟར་གོམས་པའི་གང་ཟག་ལཿ ཏིང་ངེ་འཛིན་དང་མངོན་ཤེས་དངཿ སྤྱན་དང་རྫུ་འཕྲུལ་ལ་སོགས་འཆརཿ དེ་ལྟར་འོད་གསལ་ལ་ཉིན་མཚན་དུ་གནས་པ་ནཿ སེམས་དང་ཡིད་དང་རྣམ་པར་ཤེས་པ་ཐམས་ཅད་དང་བྲལ་བ་འོད་གསལ་རྒྱུན་གྱི་ཏིང་ངེ་འཛིན་ཆེན་པོ་འཆར་རོཿ དེ་ལས་ཕ་རོལ་གྱི་སེམས་ཤེས་པ་ལ་སོགས་པའི་མངོན་པར་ཤེས་པ་དངཿ སྒོམ་ཁང་ནས་འཛམ་བུའི་གླིང་ལ་སོགས་པ་ལེགས་པར་མཐོང་བའི་ལྷའི་མིག་ལ་སོགས་པ་དངཿ ལུས་སྣ་ཚོགས་སུ་འཕྲུལ་པས་ནམ་མཁའ་ལ་འགྲོ་བ་ལ་སོགས་པའི་རྫུ་འཕྲུལ་དངཿ གཞན་ཡང་ཡོན་ཏན་དཔག་ཏུ་མེད་པ་འཆར་རོཿ ཚེ་འདིར་གོམས་པའི་མན་ངག་གོཿ
གཉིས་པ་བར་(༧༥)དོའི་འོད་གསལ་ནིཿ འབྱུང་བ་རྣམས་རིམ་གྱིས་ཐིམ་ནསཿ ནམ་མཁའ་འོད་གསལ་ལ་ཐིམ་པའི་ཚེཿ ནམ་མཁའི་ཁམས་སུ་འོད་ལྔའི་སྣང་བ་སྣ་ཚོགས་སུ་ཤར་བ་དངཿ རང་རིག་གི་བར་ན་ཟེར་ལྔ་ཐག་པ་བརྒྱངས་པ་ལྟར་ཟུག་པས་རིག་པའི་ཡེ་ཤེས་དེ་རང་སྣང་དུ་ངོ་ཤེས་པ་ནིཿ ཀུན་ཏུ་བཟང་པོ་ཡབ་ཀྱི་དགོངས་པའོཿ རང་སྣང་ངོ་ཤེས་རང་ལ་འོད་ལྔར་གསལ་ཡངཿ འོད་དུ་འཛིན་པ་མེད་པར་གཏད་མེད་དུ་ཤིགས་སེ་འཇོག་པ་ནི་ཀུན་ཏུ་བཟང་མོའི་དགོངས་པའོཿ དེའང་སྐད་ཅིག་དང་པོར་ཡབ་ཀྱི་དགོངས་པས་རང་ངོ་ཤེས་སོཿ གཉིས་པར་ཡུམ་གྱི་དགོངས་པས་གཉིས་སུ་མེད་པའི་ཏིང་ངེ་འཛིན་ལ་གནསཿ
གསུམ་པར་གདོད་མའི་ས་ལ་ནང་གསལ་ལྷུན་གྲུབ་རིན་པོ་ཆེར་ཐིམ་པ་ནི་སངས་རྒྱས་མྱ་ངན་ལས་འདས་པ་ཞེས་བྱའོཿ ད་ལྟ་སྣང་བའི་འོད་གསལ་ལ་དེ་བཞིན་དུ་ཡང་ཡང་སྦྱང་བ་ནིཿ གནད་གལ་པོ་ཆེའོཿ དེ་ལ་མ་ཟིན་ན་ཆོས་ཉིད་ཀྱི་བར་དོ་ལ་སྣང་བ་གང་ཤར་ཡང་གདམས་ངག་དེ་བཞིན་དུ་དྲན་པ་ནི་གནད་མངོན་སུམ་དུ་ཕྱུང་བའོཿ གཞན་མེད་དོཿ འདི་ཁོ་ནའོཿ གསུམ་པ་ཐ་མ་སྤྲུལ་པའི་ཞིང་སྦྱོང་བ་ནིཿ དེ་ལས་སྣང་བ་ཕྱིར་ཐལ་ཏེཿ སྲིད་པའི་བར་དོ་རྨི་ལམ་དུ་སྣང་བ་ལྟ་བུ་ལསཿ ཆོས་ཉིད་བདེན་པའི་བྱིན་རླབས་ཀྱིསཿ ཤར་ཕྱོགས་མངོན་པར་དགའ་བ་ལ་སོགས་པར་སྐྱེས་ནས་གྲོལ་ཚུལ་ནི་ཁྲིད་ཡིག་བཞིན་ཤེས་པར་བྱའོཿ ད་ལྟ་སྐབས་སུ་ཞིང་དེ་དག་ཏུ་རང་རིག་མིག་ནས་འཕངས་སོཿ ཉལ་དུས་གཞོགས་གཡས་ཕབ་ནསཿ ཞིང་ཡིད་ལ་བྱ་སྟེ་སྙིང་གའི་འོད་ལ་སྦྱངས་པ་ནི་གདམས་ངག་དམ་པའོཿ མདོར་བསྡུ་ན་དུས་རྣམས་ཐམས་ཅད་དུ་གསལ་སྟོང་འཛིན་མེད་ཆེན་པོར་རྩལ་སྦྱང་ངོཿ ཕྱི་ནང་སྣོད་བཅུད་སྣང་བ་ལཿ རྨི་ལམ་ལྟ་བུའི་ལམ་ཁྱེར་བྱཿ རང་རིག་དྲི་མེད་ཡེ་ཤེས་ལཿ ཆུ་ཟླ་ལྟ་བུའི་ལམ་ཁྱེར་བྱཿ སྣ་ཚོགས་འཕྲོ་འདུའི་རྟོག་པ་ལཿ སྨྱོན་པ་ལྟ་བུའི་ལམ་ཁྱེར་བྱཿ གང་ཤར་དྲན་རིག་ཆུ་རིས་འདྲཿ སྔ་ཕྱིའི་འཛིན་པས་མི་བསླད་འཚལཿ རྟག་ཏུ་འཆི་བ་དྲན་པར་བྱཿ ཉལ་དུས་བར་དོའི་གདམས་པ་གཟུངཿ རྩིས་མེད་ཞེན་མེད་ཆགས་མེད་བྱཿ གང་ལའང་གཟའ་གཏད་ཆེད་འཛིན་ཐོངཿ ལས་འབྲས་མི་གོས་ནམ་མཁའ་འདྲཿ ཇི་ལྟར་བུམ་པ་ཆག་པ་ནཿ ནམ་མཁའ་གསུམ་ཉིད་གཅིག་པ་བཞིནཿ ནམ་ཞིག་འབྱུང་བཞིའི་བུམ་པ་ཆགཿ རིག་པ་ཉིད་ནི་དབྱིངས་སུ་ཐིམཿ རང་ངོ་ཤེས་པས་གྲོལ་བ་ནིཿ རྡོ་རྗེ་གདན་ལ་མངོན་བྱང་ཆུབཿ གདོད་མའི་སར་ཕྱིན་མི་འཁྲུལ་པའོཿ དེའི་ཚེ་རང་ངོ་མ་ཤེས་ན་མའི་མངལ་གྱིས་ཐོགས་ལ་འཁོར་བར་འཇུག་ཅིངཿ ཤེས་ན་རྡོ་རྗེའི་གདན་ལ་ཐོགས་ནས་མཐར་ཕྱིན་པའོཿ དེའི་ཕྱིར་ན་ད་ལྟ་ཉིད་དུ་གོམས་པར་བྱའོཿ
འདི་ནི་རྒྱལ་སྲས་པདྨའི་ཡང་གཏེར་ཏེཿ གཏེར་དང་གཏེར་ཕྲན་དགོངས་གཏེར་ཟབ་དགུ་ལསཿ འདི་འདྲའི་གདམས་པ་སྔོན་ཆད་བྱུང་བ་མེདཿ འབྲས་བུའི་ཐུགས་གཏེར་ལྷ་སྲས་ཆོས་སྐལ་འདིཿ དེང་སང་བདག་ལ་དགོངས་པས་བརྒྱུད་པའི་མཐུསཿ ངོ་སྤྲོད་གནད་དང་ཟབ་ཡིག་སྙིང་ཏིག་མཿ ཡི་གེས་མི་ཤེས་དོན་རྣམས་འདིར་བསྡུས་ཏེཿ ཤོག་སེར་ཤོག་འདྲ་རིན་ཆེན་ཤོག་སྐྱར་བཀོདཿ ཤོག་སེར་ལས་ཀྱང་ཡང་སེར་ཡི་གེ་འདིཿ མངོན་སུམ་གོམས་པའི་གནད་དུ་དེབ་ལ་བཏབཿ ཕྱི་རབས་སྐལ་ལྡན་རྣམས་དང་འདི་འཕྲད་དེཿ གདོད་མའི་ས་ལ་ཀུན་ཏུ་བཟང་པོར་ཤོགཿ དྲི་མེད་འོད་ཟེར་ཐར་པའི་གླིང་འགྲོ་ཡངཿ སྙིང་གི་སྙིང་པོ་མ་སྦས་འདིར་བཀོད་དེཿ སྐལ་ལྡན་རྣམས་ལ་སྙིང་ཕྱུང་དངོས་སུ་གཏདཿ ཡི་གེ་འདི་ལ་རྟག་ཏུ་ནན་ཏན་མཛོདཿ འོད་གསལ་རིན་པོ་ཆེའི་པྲ་ཁྲིད་ཅེས་བྱ་བཿ པདྨ་ལས་འབྲེལ་རྩལ་གྱིས་གངས་རི་ཐོད་དཀར་དུ་བཀོད་པ་རྫོགས་སོཿ དགེ་ཞིང་བཀྲ་ཤིས་སོཿ