ཟབ་མོ་ཡང་ཏིག་ལས། གཞི་ལམ་འབྲས་བུའི་གནས་གསལ་བ།
༄༅། །ཟབ་མོ་ཡང་ཏིག་ལས། གཞི་ལམ་འབྲས་བུའི་གནས་གསལ་བ་བཞུགས་སོ། །
༄༅། གཞི་ལམ་འབྲས་བུའི་གནས་གསལ་བ་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གདོད་ནས་བྱང་ཆུབ་མངོན་པར་འདུས་མ་བྱས། །རྣམ་དབྱེར་མེད་པའི་ཡོན་ཏན་ལྷུན་གྲུབ་ཅིང་། །གློ་བུར་ཁམས་སྟོང་ཐོག་མཐའ་མེད་པའི་དབྱིངས། །རྣམ་དག་བྱང་ཆུབ་སེམས་ལ་ཕྱག་འཚལ་ལོ། །རྒྱལ་བའི་དགོངས་པ་ཤིན་ཏུ་རྨད་བྱུང་གང་། །རྡོ་རྗེ་རྩེ་མོ་ལྷུན་གྱིས་གྲུབ་པའི་དབྱིངས། །གཞི་ལམ་འབྲས་བུའི་དེ་ཉིད་ངེས་པའི་དོན། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །གཞི་དབྱིངས་མི་འགྱུར་སེམས་ཉིད་འོད་གསལ་ཁམས། །རང་བཞིན་རྣམ་དག་བདེ་གཤེགས་སྙིང་པོ་ལ། །མ་རིག་གཟུང་འཛིན་གློ་བུར་བསྒྲིབས་པ་ཡིས། །ཀུན་ཏུ་བརྟགས་པ་ཡུན་རིང་གོམས་བྱས་པས། །ཡུལ་དང་དོན་དང་སེམས་སུ་བག་ཆགས་ཏེ། །འཁོར་བའི་འཁྲུལ་སྣང་སྣ་ཚོགས་མངོན་པར་གྲུབ། །ཐོག་མཐའ་མེད་ཅན་ཤིང་རྟའི་འཕང་ལོ་བཞིན། །ཁམས་གསུམ་རིགས་(༡༥༦)དྲུག་བདེ་སྡུག་སྣ་ཚོགས་སྣང་། །རང་རང་ལས་ཀྱིས་ཉེ་བར་བཀོད་ཅན་ནོ། །འདི་ཀུན་རང་བཞིན་རྨི་ལམ་སྒྱུ་མ་བཞིན། །དྲི་ཟའི་གྲོང་དང་སྤྲུལ་པ་མིག་ཡོར་ཚུལ། །བྲག་ཆ་ཆུ་ཟླ་འདྲ་ཞིང་སྙིང་པོ་མེད། །གསོག་དང་གསོབ་དང་ཡ་མ་བརླ་འདྲ་ཞིང་། །རྐྱེན་སྣང་རྟེན་ཅིང་འབྲེལ་འབྱུང་ངོ་བོ་ཉིད། །མ་བརྟགས་ཉམས་དགའ་བརྟགས་ན་ངོས་བཟུང་མེད། །མེད་པ་གསལ་སྣང་སྟོང་པའི་རང་གཟུགས་སྟེ། །སྣང་བའི་དུས་ན་བདེན་པའི་རང་བཞིན་མེད། །མེད་ལ་ཡོད་པར་བཟུང་བས་བརྟགས་པ་ཙམ། །གཟུང་བའི་ཡུལ་མེད་རྨི་ལམ་སྒྱུ་མའི་འགྲོས། །གཟུགས་སོགས་ཡུལ་ལྔར་རང་སྣང་སྟོང་གཟུགས་བཞིན། །ངོ་བོ་ཆ་ཤས་རང་བཞིན་མེད་པ་སྟེ། །གཞི་མེད་གནས་མེད་ཡུལ་དངོས་གྲུབ་པ་མེད། །དེ་ཕྱིར་བཟུང་དང་གཟུང་ཡུལ་གྲུབ་པ་མེད། །རྣམ་ཀུན་སྟོང་པར་གདོད་ནས་དག་པ་ཡིན། །འཛིན་པའི་སེམས་ཀྱང་རང་བཞིན་ཡོད་མིན་ཏེ། །ཀུན་གཞིར་བརྟེན་པ་ཀུན་གཞིའི་རྣམ་ཤེས་དང་། །ཡིད་དང་ཉོན་ཡིད་སྒོ་ལྔའི་ཤེས་པ་སྟེ། །རྣམ་ཤེས་ཚོགས་བརྒྱད་སེམས་ཀྱི་རྣམ་པ་ཡང་། །རིག་པའི་ཆ་ལ་མ་རིག་སྒྲོ་བཏགས་ཀྱི། །ཀུན་དུ་བརྟགས་པས་སེམས་ཞེས་མཚོན་པ་ཙམ། །དོན་གྱི་ངོ་བོ་རང་སྟོབས་རིག་པ་སྟེ། །ཁྱད་པར་གཞན་སྟོབས་སེམས་བྱུང་ལྔ་བཅུ་གཅིག །དཔྱད་ན་རྒྱུན་དང་སྐད་ཅིག་ཆ་ཤས་མེད། །དུས་གསུམ་དངོས་མེད་སྐྱེ་འགག་གནས་པས་སྟོང་། །གང་གིས་གང་འཛིན་དེ་ལ་རང་བཞིན་ཅི། །ཁ་དོག་དབྱིབས་མེད་ཕྱོགས་ཆ་མཐའ་དབུས་མེད། །བསམ་དང་བྲལ་བ་ནམ་མཁའི་རང་བཞིན་ཅན། །དངོས་དང་དངོས་པོ་མེད་པའི་མཚམས་ལས་འདས། །ཡེ་ནས་བདག་མེད་སྤྲོས་དང་བྲལ་བའི་ཕྱིར། །འཛིན་པའི་སེམས་ལ་རང་བཞིན་མེད་པ་ལགས། །དེ་ལྟར་གཟུང་དང་འཛིན་པ་མེད་པ་ཉིད། །གདོད་ནས་རྣམ་དག་དོན་གྱི་གནས་ལུགས་ཏེ། །རྣམ་དབྱེར་བཅས་པའི་དྲི་མ་བདེན་སྟོང་ཕྱིར། །འཁོར་བ་མིང་ཙམ་སྒྱུ་མར་རྟོགས་བྱས་ནས། །བརྟེན་གཞི་འོད་གསལ་སྙིང་པོའི་ཁམས་ལ་འཇུག །སྣོད་བཅུད་བརྟེན་གཞི་ནམ་མཁའི་དབྱིངས་རུམ་བཞིན། །འཁོར་འདས་ཀུན་འབྱུང་རིག་པ་བྱང་ཆུབ་སེམས། །(༡༥༧)མཐའ་དང་དབུས་མེད་ཡངས་པ་ཆེན་པོའི་ཀློང་། །སྟོང་གསལ་འགྱུར་མེད་སྤྲོས་དང་བྲལ་བ་ནི། །ཉི་མཁའ་བཞིན་ཏེ་རྒྱ་ཆད་ཕྱོགས་ལྷུང་བྲལ། །ནོར་བུ་བཞིན་ཏེ་ཡོན་ཏན་ལྷུན་གྱིས་གྲུབ། །ཐོག་མཐའ་མེད་དེ་དུས་གསུམ་འཕོ་འགྱུར་མེད། །འདུས་མ་བྱས་ཏེ་རྒྱུ་རྐྱེན་ཀུན་ལས་འདས། །དོན་དམ་དབྱིངས་ཏེ་ཟབ་ཅིང་རྒྱ་ཆེའི་གནས། །ཀུན་ལ་ཡོད་ཀྱང་རྟོགས་པར་དཀའ་བའི་དོན། །གཞི་དབྱིངས་མི་འགྱུར་སྤྲོས་དང་བྲལ་བ་ལགས། །ནམ་མཁའི་ངང་དུ་སྣོད་བཅུད་ཤར་བ་ལྟར། །ཆོས་རྣམས་ཐམས་ཅད་རིག་པའི་ངང་དུ་སྣང་། །མཁའ་དང་སྣོད་བཅུད་ངང་དང་ངང་ཅན་ལྟར། །རིག་དང་ཆོས་ཀུན་དབྱིངས་དང་དབྱིངས་སྣང་སྟེ། །སྣང་དང་སྣང་གཞི་དཔྱད་ན་སྟོང་པའི་ངང་། །གཅིག་དང་དུ་མའི་ཆ་ཤས་ཀུན་ལས་འདས། །སྣོད་བཅུད་ཆགས་འཇིག་འཕོ་ལྡེག་ཅི་བྱུང་ཡང་། །ནམ་མཁའི་རང་བཞིན་འགྱུར་བ་མེད་པ་ལྟར། །སྣང་སྲིད་འཁོར་འདས་བཟང་ངན་ཅི་བྱུང་ཡང་། །རིག་པའི་རང་བཞིན་འགྱུར་བ་མེད་པར་གནས། །རིག་པ་ཡེ་སྟོང་རང་བཞིན་རྣམ་དག་ལས། །འདི་ཞེས་མི་མཚོན་བསམ་བརྗོད་ཀུན་ལས་འདས། །ཡོད་མིན་མེད་མིན་ཡོད་མེད་མཐའ་དང་བྲལ། །དབུས་ཤེས་མི་དམིགས་གདོད་ནས་མ་སྐྱེས་པ། །ཡེ་ནས་ལྷུན་གྲུབ་བྱང་ཆུབ་སེམས་ཀྱི་ངང་། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ཉིད། །ཀུན་འབྱུང་གང་ཡིན་ཤེལ་དང་ནོར་བུ་བཞིན། །ཕྱོགས་དང་རིས་བྲལ་དག་ཅིང་དྲི་མ་མེད། །གཉིས་མེད་བསམ་བྲལ་འགྱུར་མེད་དེ་བཞིན་ཉིད། །དོན་དམ་སྙིང་པོ་གདོད་མའི་སངས་རྒྱས་ཏེ། །ཆོས་རྣམས་ཀུན་གྱི་གཞི་ཡི་གནས་ལུགས་ལགས། །དབྱིངས་གཞིར་མ་རྟོགས་སྟོང་པ་ལྟ་བ་དང་། །སྟོངས་པ་ཉི་ཚེ་དབྱིངས་ལ་བདག་ཏུ་འཛིན། །རྟག་ཆད་ཉིད་དེ་མཐའ་བྲལ་དོན་དང་འགལ། །འཁོར་བ་གཞི་མེད་མཚན་ཉིད་ཆད་པ་དང་། །མྱ་ངན་འདས་གཞི་ལྷུན་གྱིས་གྲུབ་པ་གཉིས། །དབྱིངས་དང་དབྱིངས་སྣང་མཁའ་དང་སྤྲིན་ཚོགས་བཞིན། །ཉི་དང་ཟེར་བཞིན་ཡོན་ཏན་ལྷུན་གྲུབ་ཀུན། །དབྱིངས་ལ་ཡོད་ཀྱང་སྒྲིབ་པ་མ་དག་པ། །གློ་བུར་དྲི་བཅས་སྤྲིན་རུམ་ཉི་མ་བཞིན། །(༡༥༨)དེ་གསལ་ཆེད་དུ་ལམ་གྱི་འབད་པ་དང་། །དག་པ་ཉི་མཁའ་འབྲས་བུའི་གནས་སྐབས་རྣམས། །དབྱིངས་དང་ངང་ནས་འཕོ་དང་འགྱུར་མེད་པས། །ལྷུན་གྲུབ་འདུས་མ་བྱས་དབྱིངས་ཡོན་ཏན་ལ། །ཇི་ལྟར་སྔོན་བཞིན་ཕྱིས་དེའི་རང་བཞིན་ཉིད། །གཞི་གཅིག་སྟེང་ན་དེ་ལྟར་གནས་པ་ནི། །སྤྲིན་གྱིས་མ་དག་དག་དང་རྣམ་དག་དེས། །རིམ་བཞིན་དབྱིངས་ལ་དྲི་བཅས་གཞི་དང་ནི། །ལམ་གྱི་ཕྱོགས་གཅིག་དག་དང་འབྲས་བུའི་དུས། །ཤིན་ཏུ་རྣམ་དག་ཉི་མཁའ་རང་བཞིན་བཞིན། །འདི་དག་དབྱིངས་གཅིག་གཞི་ལས་མ་གཡོས་དཔེ། །སེམས་ཉིད་འོད་གསལ་ལྷུན་གྲུབ་འདུས་མ་བྱས། །ཆོས་རྣམས་ཀུན་གྱི་གཞི་མར་ཤེས་པར་བྱ། །དོན་འདི་འཁོར་ལོ་ཐ་མའི་དགོངས་པ་སྟེ། །གསང་སྔགས་རྡོ་རྗེ་ཐེག་པའི་ངེས་དོན་ལགས། །འདི་ལྟར་སུས་ཤེས་སྐྱེས་བུ་མཁས་པ་ཡིན། །འདུས་མ་བྱས་དབྱིངས་ཤིན་ཏུ་རྣམ་དག་ལ། །སྟོངས་སོགས་དབྱིངས་ཀྱི་ཡོན་ཏན་ཡེ་ལྡན་དང་། །གློ་བུར་རྣམ་དག་དྲི་བྲལ་ཡོན་ཏན་ལྡན། །འདི་གཉིས་དབྱེ་བ་མ་ནོར་ཤིན་ཏུ་གཅེས། །གཞི་ཡི་ཆོས་སྐུ་སྟོབས་སོགས་ཡོད་སྨྲ་ཡི། །དག་པ་གཉིས་ལྡན་ཡོན་ཏན་དེ་ལྟ་མིན། །དྲི་བཅས་དྲི་མེད་སྐབས་ཡིན་དེ་ཡི་ཕྱིར། །ལྷུན་གྲུབ་དབྱིངས་ཀྱི་ཡོན་ཏན་ཉིད་དང་ནི། །མངོན་གྱུར་འབྲས་བུའི་ཡོན་ཏན་ལ་ལྟོས་ནས། །གཞི་དང་འབྲས་བུའི་གནས་སྐབས་གཉིས་དག་ལས། །དབྱིངས་འདི་རང་བཞིན་རྣམ་པར་དག་པ་ཅན། །གཞི་ཡི་ཆོས་སུ་མཁས་པས་རིག་པར་བྱ། །ལམ་ནི་དབྱིངས་ཀྱི་དྲི་མ་བསལ་བས་ཏེ། །དབང་བཞིས་སྨིན་པའི་རིག་པ་བྱང་ཆུབ་སེམས། །སྟོང་ཉིད་སྙིང་རྗེ་ཟུང་དུ་འབྲེལ་བ་སྟེ། །ཟབ་མོའི་གནད་ཀྱི་ཉམས་སུ་ལེན་པར་འདོད། །འདིར་ནི་རང་གི་མོས་དགེ་ཕུན་ཚོགས་དང་། །བླ་མའི་བྱིན་རླབས་ཤིན་ཏུ་རྨད་བྱུང་མཐུས། །ཆོས་རྣམས་བདག་མེད་སྤྲོས་དང་བྲལ་བའི་དོན། །སེམས་ཉིད་འོད་གསལ་གཞི་ཡི་གནས་ལུགས་ཉིད། །དབང་ཁྲིད་གདམས་པས་ལེགས་པར་ངོ་འཕྲོད་པ། །གནས་ལུགས་རྟོགས་པའི་ལྟ་བ་ལགས་པར་གསུངས། །དེའི་ཕྱིར་གཞི་དང་ལྟ་བ་ཕྱེད་པ་གཅེས། །གཞི་ནི་དབྱིངས་ཀྱི་གནས་ལུགས་དོན་ཡིན་ལ། །ལྟ་བ་དེ་ཉིད་རྟོགས་(༡༥༩)པའི་རང་བཞིན་ལགས། །རྟོགས་པའི་ངང་ལ་འཇོག་པ་སྒོམ་པ་སྟེ། །རྣམ་པར་མི་རྟོག་ཡེངས་མེད་སྤྲོས་དང་བྲལ། །མཁའ་ལྟར་རྣམ་དག་འོད་གསལ་འདུས་མ་བྱས། །བསམ་བརྗོད་མཚོན་འདས་རིག་པ་བྱང་ཆུབ་སེམས། །རང་རྣལ་ངང་གནས་སྒོམ་པའི་རྒྱལ་པོ་ལགས། །དེ་ཚེ་བྱིང་རྒོད་མཚན་མ་རབ་ཞི་ལ། །བདེ་གསལ་མི་རྟོག་ཉམས་སྐྱེ་འཛིན་ཞེན་མེད། །ཚོགས་དྲུག་ལྷུག་པ་སྒོ་ལྔ་རྒྱ་ཡན་ཉིད། །རིག་པ་རྟེན་མེད་ཕྱལ་པ་བར་སྣང་འདྲ། །ཕྱི་ནང་བར་མེད་ཟང་ཐལ་ཆེན་པོ་སྟེ། །རྒྱལ་བའི་དགོངས་པར་རང་བྱུང་ཡེ་ཤེས་ནི། །མཐའ་གྲོལ་ཀློང་ཡངས་ཆེན་པོར་ཤེས་པར་བྱ། །སེམས་ཅན་སེམས་དང་རྒྱལ་བའི་དགོངས་པ་གཉིས། །རིག་པ་ཁོལ་བུ་རྒྱ་ཡན་ཁྱད་པར་ཏེ། །ཡུལ་གཅིག་ཡིད་བྱེད་འདུ་ཤེས་གཟེབ་ལ་ཐོགས། །ཁམས་གསུམ་སེམས་ཅན་རང་རང་དམིགས་དང་བཅས། །དེ་ལས་རྣམ་འདས་ཕྱོགས་དང་རིས་མེད་པ། །མཁའ་ལྟར་རྣམ་དག་རྒྱལ་བའི་དགོངས་པ་ལགས། །
༈ རྒྱལ་བ་བྱས་ཀྱང་རང་བྱུང་ཡེ་ཤེས་ངང་། །རང་མལ་གནས་པ་རྒྱལ་བའི་དགོངས་པ་ཉིད། །སེམས་ཅན་བྱས་ཀྱང་རང་གནས་མ་རྟོགས་པ། །སེམས་དང་སེམས་བྱུང་ཀུན་རྟོག་གཟུང་འཛིན་ཉིད། །རྟོག་དང་མི་རྟོག་མཚན་མའི་ངང་ལ་གནས། །འདོད་གཟུགས་གཟུགས་མེད་སེམས་གསུམ་ར་བ་རུ། །རང་བྱུང་ཡེ་ཤེས་བཅིངས་ནས་བདག་ཏུ་བཟུང་། །དེ་བས་རྟོགས་དང་མི་རྟོག་དུས་ཀུན་ཏུ། །རིག་པ་རང་གསལ་རྒྱ་ཡན་ཟང་ཐལ་ཉིད། །རང་གནས་མཉམ་པའི་དགོངས་པ་ཤེས་པར་བྱ། །འདི་ཉིད་ཤེས་པས་ཀུན་ལ་མཁས་པར་འགྱུར། །སྙིང་པོའི་དེ་ཉིད་རྟོགས་པའི་ངང་གནས་ཞེས། །མཚུངས་མེད་ཆོས་རྗེ་བླ་མ་དེ་སྐད་གསུངས། །མཆོག་གསུམ་རྡོ་རྗེ་སྙིང་པོའི་ཁང་བཟངས་སུ། །མི་གཡོ་རི་རྒྱལ་ལྟ་བུའི་རྣལ་འབྱོར་པ། །གནས་གསུམ་ཆོས་ཉིད་འཁོར་ལོར་གནས་པའི་ཚེ། །རྩ་གསུམ་དབུ་མ་དག་པའི་རང་བཞིན་དུ། །སྲོག་རྩོལ་ཉི་ཟླའི་འཇུག་པ་ནུབ་གྱུར་པས། །རླུང་སེམས་མི་གཡོ་ཤིན་ཏུ་དག་པ་ན། །བདེ་ཆེན་འོད་ཀྱིས་ནམ་མཁའི་དབྱིངས་ཁྱབ་པར། །ཡེ་ཤེས་རོ་གཅིག་དབྱིངས་དང་རྣམ་འདྲེས་པས། །ནང་གི་དེ་ཉིད་འོད་གསལ་ཤར་བའི་ཚེ། །ཉི་དང་ཟེར་བཞིན་ཆོས་དབྱིངས་རིག་པའི་གདངས། །ཡེ་ཤེས་སྲོག་རླུང་ཁ་དོག་(༡༦༠)འབྱེད་པ་ལས། །ཕྱི་རོལ་རྣམ་ཀུན་སྟོང་པའི་འོད་གསལ་གཟུགས། །མངོན་སུམ་ཡུལ་དུ་སྣང་བའི་རང་བཞིན་དང་། །ཕྲ་མོའི་རླུང་ཟིན་འབྱུང་ལྔའི་ཁྱད་པར་ལས། །རྟགས་བཅུ་རྣམ་དག་མེད་བཞིན་སྣང་བ་ནི། །དག་པའི་མཁའ་ལ་གཟའ་སྐར་བཀྲམ་པ་བཞིན། །དེ་ཚེ་རང་བཞིན་གཅིག་སྟེ་གདོད་མའི་ངང་། །གང་ཡང་མི་འཛིན་ཅིར་ཡང་མི་རྟོག་པས། །གནས་ལུགས་རང་བཞིན་ཤེས་རབ་ཕ་རོལ་ཕྱིན། །ཟུང་འཇུག་དབྱེར་མེད་རྫོགས་པ་ཆེན་པོའི་ངང་། །བཞི་པའི་དེ་ཉིད་ཕྱག་རྒྱ་ཆེན་པོ་ནི། །མཐའ་གཉིས་གནས་གསལ་དབུ་མའི་རང་བཞིན་ཏེ། །དུས་གསུམ་རྒྱལ་བ་ཀུན་གྱི་གཤེགས་ཤུལ་ལགས། །གང་ཚེ་གཟུང་དང་འཛིན་པ་གཉིས་མེད་པར། །བློ་ཡི་མདུན་ན་འཇུག་པ་རབ་ཞི་བ། །དེ་ཚེ་བསམ་བརྗོད་སྤྲོས་པ་མེད་པའི་དབྱིངས། །མ་སྐྱེས་རྣམ་པར་དག་པའི་ཆོས་ཉིད་ལ། །ཡང་དང་ཡང་དུ་ཉིན་མཚན་ལེགས་བསྒོམས་པས། །སྣ་ཚོགས་དངོས་དང་དེ་བློ་མི་དམིགས་པར། །མངོན་སུམ་གོང་འཕེལ་ཚད་ཕེབས་ཟད་པ་ལ། །ཕྱི་རོལ་སྣང་བའི་འོད་གསལ་དབྱིངས་ནུབ་སྟེ། །ཉི་བྲལ་རྐྱེན་གྱིས་ཤེལ་འོད་ནང་གནས་ལྟར། །རིག་པ་གཟུང་འཛིན་རླུང་དང་བྲལ་བ་ལས། །ཡེ་ཤེས་རླུང་ལྔ་རང་མལ་དབྱིངས་སུ་ཐིམ། །ནང་གི་དེ་ཉིད་ཤིན་ཏུ་མི་གཡོ་བ། །ཐོག་མ་དང་ནི་ཐ་མ་མེད་པའི་བདག །མ་ལུས་དབྱིངས་གཅིག་གདོད་མའི་སར་གཞོལ་ཏེ། །རང་རིག་རྡོ་རྗེ་སྙིང་པོའི་དབྱིངས་ལ་འཇུག །དེ་ལྟར་བསྒོམ་པས་ས་ལམ་གང་བགྲོད་དེ། །སྤྱན་དང་མངོན་ཤེས་རྫུ་འཕྲུལ་ཏིང་འཛིན་སོགས། །ཡོན་ཏན་ཆེས་མཆོག་གོང་མ་བརྙེས་པ་ལགས། །མཉམ་གཞག་ཆོས་ཉིད་ཟབ་མོའི་རང་བཞིན་དུ། །ཟག་མེད་དགེ་བ་སྤྲོས་དང་བྲལ་བའི་ཚེ། །རྟོགས་དང་ངང་གནས་སྣང་ལ་འཛིན་མེད་པས། །ལྟ་སྒོམ་སྤྱོད་གསུམ་ངོ་བོ་གཅིག་པ་ལ། །རྟོགས་པས་ཐ་དད་ཙམ་དུ་ཤེས་པར་བྱ། །རྗེས་ཐོབ་རྨི་ལམ་སྒྱུ་མའི་ཚུལ་ཙམ་དུ། །སྦྱིན་སོགས་དགེ་བ་འཁོར་གསུམ་དག་པར་སྤྱད། །སྣང་སྲིད་འཁོར་འདས་ཆོས་རྣམས་ཐམས་ཅད་ཀུན། །དབྱིངས་སྣང་བདེན་མེད་སྒྱུ་མར་རྣམ་སྦྱོང་བ། །འདི་དག་ལྟ་སྒོམ་སྤྱོད་པའི་རིམ་པ་ལགས། །མདོར་ན་གཞི་དབྱིངས་རྟོགས་པ་ལྟ་བ་སྟེ། །ངང་ལ་མི་རྟོག་ཡེངས་མེད་སྒོམ་པའི་མཆོག །རྨི་ལམ་སྒྱུ་མ་བདེན་མེད་སྤྱོད་པའི་ཚུལ། །ཐམས་ཅད་རིག་པའི་(༡༦༡)ངང་དུ་རོ་གཅིག་པས། །ལམ་གྱི་ཆོས་ཤེས་བླ་མ་སངས་རྒྱས་གསུངས། །འདི་དག་མཐར་ཕྱིན་འབྲས་བུའི་རིམ་པ་ནི། །ཁམས་དེའི་དྲི་མ་མ་ལུས་དག་པའི་ཚེ། །སྤྲིན་བྲལ་ཉི་བཞིན་དབྱིངས་ཀྱི་ཡོན་ཏན་ཀུན། །མ་ལུས་མངོན་གྱུར་བྱང་ཆུབ་ཆེན་པོ་སྟེ། །དག་པ་གཉིས་ལྡན་ལྷུན་གྲུབ་རང་སྣང་ལས། །སྤངས་དང་རྟོགས་པའི་ཡོན་ཏན་ཕུན་ཚོགས་ལྡན། །སྐུ་དང་ཡེ་ཤེས་འདུ་འབྲལ་མེད་པ་བརྙེས། །དེ་ཚེ་དབྱིངས་ཀྱི་སྐུ་གསུམ་རོ་གཅིག་པས། །རྒྱལ་བའི་སྤྱོད་ཡུལ་སྐུ་གསུམ་ཉག་ཅིག་ལས། །ཡེ་ཤེས་ཕྲིན་ལས་དག་པའི་གཟུགས་སྐུ་གཉིས། །རྒྱལ་བའི་བྱིན་རླབས་གདུལ་བྱའི་སྨོན་ལམ་མཐུས། །ཇི་ལྟར་འདོད་བཞིན་སོ་སོར་སྣང་བ་ཡིས། །ངེས་པ་ལྔ་ལྡན་ལོངས་སྤྱོད་རྫོགས་པ་དང་། །ངེས་མེད་སྣ་ཚོགས་སྤྲུལ་པའི་སྐུ་རྣམ་གཉིས། །གདུལ་བྱའི་ཁམས་དང་མོས་པའི་རྗེས་འགྲོ་བས། །ཆོས་དབྱིངས་ཇི་བཞིན་ནམ་མཁའི་དབྱིངས་ཀུན་ཁྱབ། །ནོར་བུ་ཇི་བཞིན་འདོད་དགུའི་རེ་བ་སྐོང་། །སྲིད་པ་ཇི་སྲིད་གཞན་དོན་རྒྱུན་མི་ཆད། །དེ་དག་མཐར་ཕྱིན་འབྲས་བུའི་རིམ་པ་ལགས། །ཡེ་ནས་ལྷུན་གྲུབ་དབྱིངས་ཀྱི་སྐུ་གསུམ་དང་། །གདུལ་བྱའི་རང་སྣང་ཕྲིན་ལས་གཟུགས་སྐུ་གཉིས། །མཁའ་དབྱིངས་སྟོན་ཟླ་དྭངས་པའི་མཚོར་སྣང་བཞིན། །དབྱིངས་སུ་དབྱིངས་སྣང་དེ་ཡི་གཟུགས་བརྙན་ཏེ། །གཅིག་དང་ཐ་དད་མཐའ་ལས་འདས་ཚུལ་དུ། །རྒྱལ་དང་གདུལ་བྱའི་ངོ་ཁ་སོ་སོར་སྣང་། །དེ་ཕྱིར་འདི་གཉིས་དབྱེ་བ་ཤེས་པ་གཅེས། །འདི་དག་འདྲེས་ནས་གཅིག་ཏུ་ཤེས་པ་ན། །རྒྱལ་བའི་ཆོས་སྐུ་འགྲོ་ལ་སྣང་བར་རིགས། །ངོ་བོ་གཅིག་པའི་གཟུགས་སྐུ་སྣང་བའི་ཕྱིར། །སངས་རྒྱས་ཁམས་དང་སངས་རྒྱས་བྱང་ཆུབ་དང་། །སངས་རྒྱས་ཡོན་ཏན་སངས་རྒྱས་འཕྲིན་ལས་ཏེ། །དག་པའི་སེམས་ཅན་གྱིས་ཀྱང་བསམ་བྱ་མིན། །འདི་ནི་རྒྱལ་བ་རྣམས་ཀྱི་སྤྱོད་ཡུལ་ལོ། །ཞེས་སོགས་ལུང་གི་ཡང་དག་དམིགས་ཕྱེ་བས། །དབྱིངས་དང་ཡེ་ཤེས་ཕྲིན་ལས་སྐུར་ཤེས་བྱ། །དེ་ལྟར་རྟོགས་ན་སྐྱེས་བུ་མཁས་པ་ཡིན། །ཚུལ་འདི་ངེས་པའི་དོན་གྱི་སྙིང་པོ་སྟེ། །མདོ་རྒྱུད་མན་ངག་ཀུན་གྱི་མཐར་ཐུག་ཡིན། །དགེ་བ་འདི་ཡིས་བདག་དང་འགྲོ་བ་ཀུན། །མ་ལུས་དབྱིངས་གཅིག་རྫོགས་པའི་སངས་རྒྱས་ཤོག །གཞི་ལམ་འབྲས་བུའི་གནས་གསལ་བ་ཞེས་བྱ་བ། མང་དུ་ཐོས་པའི་རྣལ་འབྱོར་པ་དྲི་མེད་འོད་ཟེར་གྱིས། གངས་རི་ཐོད་དཀར་(༡༦༢)གྱི་མགུལ་དུ་སྦྱར་བ་རྫོགས་སོ།། །།
དགེའོ། །དགེའོ། །དགེའོ།། །།