ཟབ་མོ་ཡང་ཏིག་ལས། གདམས་ཁྲིད་དོན་གྱི་མདོ་ཆིངས།
༄༅། །ཟབ་མོ་ཡང་ཏིག་ལས། གདམས་ཁྲིད་དོན་གྱི་མདོ་ཆིངས་བཞུགས་སོ། །
༄༅། གདམས་ཁྲིད་དོན་གྱི་མདོ་ཆིངས་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དངོས་གྲུབ་ཆར་འབེབས་དཔལ་མགོན་བླ་མ་དང་། །མཁའ་འགྲོ་དམ་ཅན་རྒྱ་མཚོའི་ཞབས་བཏུད་དེ། །བླ་མེད་རྡོ་རྗེ་སྙིང་པོའི་ཐེག་པ་འདིར། །ཇི་ལྟར་འཇུག་ཚུལ་གནད་ཀྱི་མན་ངག་བྲི། །དད་པ་རབ་དང་ལྡན་པའི་སྐལ་བཟང་གིས། །འཁོར་བའི་གནས་ལས་བརྒལ་བར་བྱ་དོན་དུ། །དམ་པའི་བླ་མ་རབ་ཏུ་མཉེས་བྱས་ཏེ། །སྔོན་དུ་གསེར་ལ་སོགས་པའི་མཎྜལ་ཕུལ། །ཚོགས་ཀྱི་འཁོར་ལོས་མཆོད་ནས་གསོལ་བ་གདབ། །དེས་ཀྱང་མཚན་བཏགས་རྗེས་སུ་བཟུང་བྱས་ལ། །ལོ་ཟླའི་སྔོན་དུ་བླ་མའི་རྣལ་འབྱོར་དང་། །མཎྜལ་གསོལ་འདེབས་(༢༣༥)ལུང་འབོགས་བརྩོན་པར་བྱ། །དུས་ལ་བབས་ཚེ་དབེན་པའི་གནས་དག་ཏུ། །སྒྲུབ་པའི་མཐུན་རྐྱེན་ཚོགས་ཆས་ཀུན་བསགས་ལ། །ཐོག་མར་སྤྲོས་བཅས་བུམ་པའི་དབང་བསྐུར་བྱ། །དེ་ནས་སྣོད་ལྡན་རིགས་ཀྱི་བུ་རྣམས་ལ། །ཐུན་མོང་སྔོན་འགྲོ་ལམ་ཁྲིད་རྫོགས་པར་གདབ། །དམིགས་པ་རེ་ལ་རབ་འབྲིང་ཐ་མའི་རིམ། །ཞག་ལྔ་གསུམ་རེར་བརྩོན་པས་ཉམས་སུ་བླང་། །དེ་ནས་སྤྲོས་མེད་གསང་བའི་དབང་བསྐུར་ལ། །ལམ་ཁྲིད་ཆེན་མོ་ཤིན་ཏུ་འབྱོངས་པར་གདབ། །དབང་ཁྲིད་གང་བྱེད་སྔོན་དུ་མཎྜལ་དང་། །བརྒྱུད་པའི་གསོལ་འདེབས་དད་གུས་ཚད་མེད་བྱ། །ཁྱད་པར་ཁྲིད་དམིགས་ཀུན་གྱི་སྔོན་འགྲོ་རུ། །མཎྜལ་གསོལ་འདེབས་ཤིན་ཏུ་གཅེས་པར་བསྟན། །འདིས་ནི་ཚོགས་རྫོགས་སྒྲིབ་གཉིས་བྱང་བ་དང་། །བླ་མ་སྒྲུབ་པའི་མཆོག་གི་སྙིང་པོར་འགྱུར། །དེ་ཡི་བྱིན་རླབས་རྟོགས་པ་ཤུགས་ལ་འཆར། །ཏིང་འཛིན་ལྷུན་གྲུབ་གེགས་དང་བར་ཆད་སེལ། །ཁྲིད་དམིགས་རེ་ལ་རབ་འབྲིང་སྔར་དང་མཚུངས། །ཁྱད་པར་སེམས་ཀྱི་སྔོན་འགྲོའི་དུས་དག་ཏུ། །དྲི་བ་གཟབ་ལ་ཐེ་ཚོམ་ཆོད་པར་བྱ། །ཡུན་རིང་འབད་པས་འདི་ཡི་རང་གནད་གཟབས། །གནས་ལུགས་རྟོགས་པས་ཤེས་རབ་རྩལ་ལ་རེག །དེ་ཡི་གནད་དུ་འདི་ལས་ལྷག་པ་མེད། །ཞག་འགས་དོན་གྱི་སྙིང་པོ་དངོས་སུ་མཐོང་། །གདམས་པའི་ཁྱད་ཆོས་ཀུན་ལས་འཕགས་པ་ཡིན། །འོག་མའི་ལམ་དུ་ལོ་མང་བསྒོམས་པ་ལས། །འདི་ཡི་དམིགས་གནད་ཞག་གཅིག་དོན་ལ་ཉེ། །དེ་བས་མོས་གུས་བརྩོན་འགྲུས་རབ་བསྐྱེད་ལ། །སྐད་ཅིག་མ་ཡེངས་བསམ་མནོ་ཞིབ་མོར་གཏང་། །རྟོགས་པ་འབུལ་ཞིང་ཐེ་ཚོམ་ཆོད་པར་བྱ། །དོན་སྤྱིའི་སྒོམ་པས་སེམས་ཉིད་རྟོགས་དུས་མེད། །རང་གི་མ་མཐོང་མུན་པའི་མདའ་འཕེན་འདྲ། །འདིར་ནི་རང་གི་དངོས་སུ་མཚུངས་རྟོགས་པས། །རང་རིག་ཆོས་སྐུ་འོད་གསལ་ཉི་ཤར་འདྲ། །ཡིད་དཔྱོད་བློ་བྲལ་མངོན་སུམ་ཨེ་མ་ཧོ། །དེ་ནས་དངོས་གཞི་ཁྲེགས་ཆོད་ངོ་སྤྲད་ལ། །གཞི་གྲོལ་ཟང་ཀ་རིག་པའི་ཐག་ཆོད་གྲོགས། །ཁྱུང་ཆེན་ལ་སོགས་མང་ཉུང་ཅི་རིགས་བཤད། །ཞག་འགའ་དེ་ཡི་དོན་ལ་བརྟན་ཆགས་བྱ། །འདི་ནི་ཀ་དག་ཆོས་སྐུའི་དོན་ཆེན་ཏེ། །ལྟ་བའི་རྫོགས་ཆེན་ངོ་མཚར་རྨད་བྱུང་བས། །ཐག་ཆོད་དགོངས་པས་གཏན་ལ་ཕེབས་པར་བྱ། །(༢༣༦)དེ་ནས་ཐོད་རྒལ་འོད་གསལ་ངོ་སྤྲོད་ལ། །ལྷུན་གྲུབ་རང་གསལ་གཟུགས་སྐུ་རང་གནས་དོན། །རང་བྱུང་ནང་གསལ་ཕྱིར་སྣང་ཡིད་ཆེས་བྱ། །དེ་ཡི་གསལ་འདེབས་སྣང་བཞི་མཐའ་རྟེན་བསྟན། །འབྲིང་དང་ཐ་མའི་གདམས་ངག་རྫོགས་པར་བྱ། །ད་བར་དུ་ཡང་གནད་ཀྱི་ངོ་སྤྲོད་ནི། །གཞི་ལམ་འབྲས་གསུམ་ཞུགས་དོན་གསུམ་གནས་དང་། །ངོ་སྤྲོད་རྣམ་བཞི་སྒྲ་འོད་ཟེར་གསུམ་དང་། །གསང་ལམ་ཐུགས་རྗེ་རྒྱུན་གྱི་ངོ་སྤྲོད་རྣམས། །ཤིན་ཏུ་གཟབས་ལ་གཏན་ལ་ཕེབས་པར་བྱ། །དེ་ནས་དབང་པོའི་ཚད་དང་རབ་སྦྱོར་ལ། །ཁྲེགས་ཆོད་ཐོད་རྒལ་རྒྱབ་ཆོས་ཅི་འོས་བཤད། །དད་བརྩོན་ཆེ་ཞིང་སྒྲུབ་ངེས་གང་ཟག་ལ། །ཉམས་ལེན་ལག་ཁྲིད་འཆུགས་མེད་དངོས་སུ་བསྟན། །ཁྲིད་རྒྱབ་ཚར་ནས་ཚོགས་ཀྱི་གཏང་རག་བྱ། །ཟླ་བ་གསུམ་གཉིས་གཅིག་གིས་རིམ་པ་བཞིན། །རབ་འབྲིང་ཐ་མའི་དབང་ཁྲིད་གདམས་པ་གྲུབ། །དེ་རྗེས་བརྩོན་པས་ལོ་ཟླར་ཉམས་སུ་བླང་། །འདི་དག་ཐོག་མའི་གདམས་ཁྲིད་མན་ངག་གོ། །དེ་ནས་ལོ་ནི་གཅིག་ལ་སོགས་པ་ན། །སྐལ་བཟང་དད་ལྡན་བརྩོན་པའི་སློབ་མ་དེས། །བླ་མ་མཆོག་ལ་དབང་རྫོགས་གསོལ་བ་གདབ། །དེས་ཀྱང་རི་རྩེ་ལུང་སྟོང་ལ་སོགས་པར། །སློབ་མ་ཁྲིད་ལ་སྔོན་འགྲོ་སྤྱོད་པ་བརྩམ། །སྔོན་གྱི་ལམ་འཁྱེར་བོགས་འབྱིན་རྩལ་སྦྱང་བྱ། །རུ་ཤན་ཕྱེད་ནས་ཤིན་ཏུ་སྤྲོས་མེད་ངང་། །རབ་ཏུ་སྤྲོས་མེད་དབང་རྫོགས་དུས་གཅིག་བསྐུར། །དགའ་སྟོན་བྱ་ཞིང་དམ་བཅའ་སྒྲུབ་ཡོན་དབུལ། །དེ་ནས་གསང་ཆེན་ངེས་པའི་རྒྱུད་རྣམས་དང་། །ལུང་དང་མན་ངག་གདམས་ཁྲིད་རྒྱ་ཆེར་བསྟན། །དད་བརྩོན་སྒྲུབ་ལ་སྙིང་པོར་བྱེད་རྣམས་ལ། །གསང་བའི་གནད་རྣམས་མ་ལུས་ཚང་བར་བྱིན། །བསྟན་པའི་སྙིང་པོ་འཛིན་པར་ནུས་རྣམས་ལ། །རྒྱུད་ལུང་མན་ངག་ལུང་རྣམས་ཚང་བར་བྱིན། །བརྒྱུད་པའི་བྱིན་རླབས་ཆུ་བོ་འབབ་པ་ལ། །གཏད་རྒྱ་བཀའ་ལུང་ངེས་པའི་སྙིང་པོ་བྱིན། །དེ་ལས་གཞན་དུ་བླ་མ་མཆེད་མི་གུས། །ཚེ་འདིའི་ཞེན་པ་ཅན་ལ་གདམ་གཞུག་སྦ། །ཅི་ཕྱིར་གདམས་ཀྱང་དེ་ལ་ཕན་མི་ཐོགས། །གསང་བའི་གནད་རྣམས་འཆུགས་ཤིང་བྱིན་རླབས་ཡལ། །བཀའ་བསྒོ་འཆོལ་ནས་བཀའ་ཆད་འབྱུང་བའི་ཕྱིར། །སྣོད་(༢༣༧)དང་མི་ལྡན་རྣམས་ལ་གསང་ཞིང་སྦ། །སྣོད་ལྡན་རྣམས་ལ་བྱིན་ཞིང་བཀའ་རྒྱས་གདབ། །དེས་ནི་བསྟན་པའི་སྙིང་པོ་ཡུན་རིང་གནས། །སྤྱིར་ན་གསང་སྔགས་དབང་ཁྲིད་མན་ངག་ལ། །ཁྲིགས་ཆགས་དང་ནི་དུམ་བུའི་ལུགས་གཉིས་ཏེ། །སྐལ་ལྡན་ཡང་རབ་རྣོན་པོའི་རིགས་རྣམས་ལ། །དབང་བཞི་དུས་གཅིག་གདམས་ཁྲིད་ཁྲིགས་ཆགས་གསུངས། །འོན་ཀྱང་བརྟག་དཀའ་མངོན་ཤེས་མི་ལྡན་ཕྱིར། །ཕྱག་བཞེས་ཉིད་ལ་དུམ་བུའི་ལུགས་འདི་མཛད། །དེ་བས་འདི་ཉིད་ཤིན་ཏུ་ལེགས་པར་མངོན། །སྐལ་ལྡན་ཡིན་ན་བསྒུག་ལོངས་ཡོད་པ་དང་། །དོན་གཉེར་ཆེ་བས་ཅིས་ཀྱང་རྫོགས་པར་ཐོབ། །སྐལ་བ་ཡོད་མེད་རང་བཞིན་མི་ཤེས་པར། །ཟབ་མོའི་དབང་ཁྲིད་དུས་གཅིག་རྫོགས་པར་གདབ། །གསང་སྒོ་འཆོལ་ན་དཔོན་སློབ་གཉིས་ཀ་ལ། །མཁའ་འགྲོ་གྲུབ་པ་ཅན་གྱི་བཀའ་ཆད་འབྱུང་། །དེ་བས་དུམ་སྐྱོང་འཁྲིད་པའི་ཐབས་ཟབ་འདི། །སྔོན་བྱུང་བླ་མས་སྙན་བརྒྱུད་རིན་ཆེན་རྣམས། །རིམ་གྱིས་འཁྲིད་པའི་ལོ་རྒྱུས་ཡིད་ཆེས་མཐོང་། །ཁོ་བོས་ཀྱང་ནི་རིག་འཛིན་བླ་མ་ལ། །རབ་འབྲིང་ཐ་མའི་ཞབས་ཏོག་སྲི་ཞུ་བྱས། །མཉེས་བཞིན་པ་ཡིས་ཐུགས་རྗེས་བཟུང་བ་ལས། །དུམ་བུའི་ལུགས་སུ་བར་བར་གནད་རྣམས་ཐོས། །ལོ་དྲུག་སོང་རྗེས་དབང་བཞི་རྫོགས་པ་དང་། །ཕྲ་མོའི་གདམས་ཁྲིད་ངོ་སྤྲོད་གཏད་རྒྱ་ཐོབ། །དེ་བས་གསང་ཆེན་དོན་གྱི་ཐེག་པ་འདི། །ཤིན་ཏུ་ཟབ་དྲགས་གཉན་ལ་བབས་ཆེ་བས། །ལོ་རེ་ཟླ་རེས་ཞུས་དག་ག་ལ་ཆོད། །ཡུན་དུ་སྒྲུབ་ཅིང་ཡུན་དུ་བླ་མ་བརྟེན། །ཡུན་དུ་བསྲིངས་པ་དོན་ཆེན་ཡུན་གྱིས་འགྲུབ། །ངང་ཐུང་རེས་འཇོག་ཡོན་ཏན་ཐོབ་དུས་མེད། །ཟབ་ཅིང་རྒྱ་ཆེ་བསྟན་པའི་སྙིང་པོ་འདི། །མཁའ་ལྟར་རྒྱ་ཆེ་ཟབ་ཅིང་རྟོགས་དཀའ་བས། །བླ་མ་བརྟེན་ཞིང་སྒྲུབ་པ་ཡུན་བསྲིངས་པས། །ཆོས་རྣམས་རྫོགས་ཤིང་མཐར་ཐུག་ངེས་པ་རྙེད། །དེ་ཕྱིར་རིམ་གྱིས་དུམ་སྐྱོང་གནད་དུ་ཆེ། །ཕྱིན་ཆད་རྗེས་སུ་འཇུག་པའི་བུ་རྣམས་ཀྱིས། །དབང་ཁྲིད་གདམས་པ་དེ་ལྟར་བརྟེན་པར་བྱ། །བླ་མའི་བཀའ་རྒྱ་ཡིན་ནོ་སྙིང་ལ་ཕུར། །རྗེས་འཇུག་གཏད་རྒྱ་(༢༣༨)ཡིན་ནོ་དམ་དུ་ཟུང་། །ངེས་པའི་སྙིང་གཏམ་ཡིན་ནོ་བརྩོན་པས་སྒྲུབས། །སྙིང་པོའི་གདམས་པ་ཡིན་ནོ་ཟད་སར་སྐྱོལ། །གཙོ་བོ་དམ་ཚིག་ཡིན་ནོ་རྣམ་དག་སྲུངས། །བྱིན་རླབས་རྩ་བ་ཡིན་ནོ་མོས་གུས་སྐྱེད། །དངོས་གྲུབ་རྩ་བ་ཡིན་ནོ་སྒྲུབ་ལ་རེམས། །བླ་མས་བྱིན་གྱིས་བརླབ་ཀྱིས་གསོལ་བ་ཐོབ། །ཡི་དམ་དངོས་གྲུབ་སྟེར་གྱིས་བསྐྱེད་རྫོགས་སྒོམས། །མཁའ་འགྲོས་སྟོང་གྲོགས་བྱེད་ཀྱིས་ཚོགས་གཏོར་ཤོམས། །བཀའ་སྲུང་བར་ཆད་སེལ་གྱིས་མཆོད་ལ་བརྩོན། །ཚེ་འདི་འཁྲུལ་པ་ཡིན་གྱིས་ཞེན་པ་ཆོད། །ཅིས་ཀྱང་དགོས་མེད་ཡིན་གྱིས་དངོས་འཛིན་ཐོང་། །གདམས་པའི་མཐར་ཐུག་ཡིན་གྱིས་སེམས་ཉིད་ལྟོས། །འདིར་བདེ་ཕྱི་མར་སྐྱིད་ཀྱིས་ཆོས་རང་མཛོད། །འཇིག་རྟེན་བྱ་བ་བཏང་ན་ངང་གིས་བདེ། །སྣང་བ་ཆོས་ལ་བསྒྱུར་ན་དེས་ཀྱང་བདེ། །ཟབ་དོན་སྙིང་པོ་བསྒྲུབས་ན་ཤིན་ཏུ་བདེ། །གནས་ལུགས་ཟད་སར་སྐྱོལ་ན་ལོས་ཀྱང་བདེ། །དེ་བས་སྐལ་ལྡན་མོས་གུས་ཡོད་པ་རྣམས། །གདམས་པའི་མཆོག་འདི་ནན་ཏན་སྙིང་པོར་མཛོད། །ཚེ་འདིར་(༢༣༨)འཁོར་བའི་རྒྱ་མཚོ་རབ་བརྒལ་ནས། །ཞི་བ་བྱང་ཆུབ་མྱ་ངན་འདས་ཐོབ་འགྱུར། །ཚུལ་འདི་གདམས་ཁྲིད་དོན་གྱི་སྙིང་པོའི་ཆིངས། །མ་འོངས་སྐལ་ལྡན་རྣམས་ལ་གདམས་པ་སྟེ། །རང་གཞན་དོན་གཉིས་འགྲུབ་པར་བྱེད་དོན་དུ། །མ་ནོར་མ་འཁྲུལ་གོ་རིམ་ལག་ཁྲིད་བསྡེབས། །དགེ་བ་འདི་ཡིས་མ་ལུས་འགྲོ་བ་ཀུན། །མངོན་པར་བྱང་ཆུབ་མཛད་པ་མཐའ་ཡས་ཤོག །གདམས་ཁྲིད་དོན་གྱི་མདོ་ཆིངས་ཞེས་བྱ་བ། ཐེག་པ་རྒྱལ་པོའི་(༢༣༩)རྣལ་འབྱོར་པ་ཀློང་ཆེན་རབ་འབྱམས་ཀྱིས། གངས་རི་ཐོད་དཀར་གྱི་མགུལ། ཀུན་ཏུ་བཟང་པོའི་ནགས་ནང་། ཟླ་བ་ཆུ་ཤེལ་གྱི་ཁང་བཟངས་སུ་ལེགས་པར་སྦྱར་བ་རྫོགས་སོ།། །།དགེའོ། །དགེའོ། །དགེའོ།། །།