རྐྱེན་སྣང་ལམ་དུ་ཁྱེར་བ་ན་བ་ལམ་ཁྱེར་རྡོ་རྗེའི་མགུར།
༄༅། །རྐྱེན་སྣང་ལམ་དུ་ཁྱེར་བ་ན་བ་ལམ་ཁྱེར་རྡོ་རྗེའི་མགུར་ཞེས་བྱ་བ་བཞུགས་སོ། །
༈ ན་མོ་གུ་རུ་བྷྱཿ ཡང་དེ་ཉིད་ཀྱི་དུས་སུ་རྐྱེན་སྣང་ལམ་དུ་ཁྱེར་བ་ན་བ་ལམ་སློང་གི་མགུར་འདི་གསུངས་སོ། །དགའ་བདེའི་ངང་ལ་རྟག་ཏུ་བཞུགས། །རང་གཞན་དོན་གཉིས་རྫོགས་པའི་དཔལ། །མཚུངས་མེད་བླ་མའི་ཞབས་ལ་འདུད། །ཡང་ཅིག་གསོན་དང་སྐལ་ལྡན་ཀུན། །ན་བ་ཆོས་ཀྱི་སྐུལ་རྐྱེན་ཡིན། །མི་དགའི་སྤང་བློ་བདག་ལ་མེད། །ཉམས་ལེན་བདེ་སྡུག་ཀུན་ལ་དགོས། །ཁྱེད་ལ་གསལ་འདེབས་བཤད་ཀྱི་ཉོན། །ན་བས་ཚེ་འདིའི་ཞེན་པ་སྤོང་། །མི་རྟག་འཆི་བ་རྗེས་སུ་དྲན། །ཅིས་ཀྱང་དགོས་མེད་རྒྱུད་ལ་སྐྱེ། །ན་བ་ཞེན་ལོག་གསལ་འདེབས་ཡིན། །ན་བས་དད་དང་ངེས་འབྱུང་སྐྱེ། །ཅིས་ཀྱང་མི་ཕན་ཆོས་རང་དྲན། །སྙིང་ནས་ཡིད་འབྱུང་སྐྱོ་ཤས་སྐྱེ། །ན་བ་ཐར་ལམ་གསལ་འདེབས་ཡིན། །ན་བས་ཚོགས་གཉིས་སྐུལ་རྐྱེན་བྱེད། །གཏོང་ཕོད་སྦྱིན་པའི་ས་བོན་འདེབས། །དཀར་པོའི་ལས་ལ་བག་ཆགས་འཇོག །ན་བ་དགེ་བའི་གསལ་འདེབས་ཡིན། །ན་བས་སྔོན་གྱི་ལས་ངན་འཛད། །ད་ལྟའི་ལས་དང་ཉོན་མོངས་སྦྱོང་། །ཕྱི་མའི་ལས་ངན་མགོ་གནོན་པས། །ན་བ་སྒྲིབ་སྦྱོང་གསལ་འདེབས་ཡིན། །ན་བས་ཕྱི་མ་ངན་སོང་དུ། །སྐྱེ་ངེས་མྱོང་འགྱུར་འདིར་འདྲེན་པས། །གཉེན་པོའི་ནང་ནས་བླ་ན་མེད། །ན་བ་བདེ་ལེགས་གསལ་འདེབས་ཡིན། །ན་བས་ཕུང་པོའི་ཞེན་པ་བཟློག །རང་གཞན་ལུས་ལ་ཆགས་པ་སྤོང་། །ཆགས་སྡང་ཉོན་མོངས་རང་འགག་པས། །ན་བ་ངེས་ལེགས་གསལ་འདེབས་ཡིན། །ན་བས་གདུང་སེམས་མོས་གུས་སྐྱེད། །བྱིན་རླབས་འཇུག་ཅིང་རྟོགས་པ་སྐྱེ། །ཆོས་མོས་ལྷག་པའི་ཤེས་རབ་སྐྱེ། །ན་བ་ལམ་བཟང་གསལ་འདེབས་ཡིན། །ན་བའི་ཡོན་ཏན་དྲན་བྱས་ནས། །སེམས་ཅན་ཀུན་གྱི་ནད་བསལ་ཕྱིར། །རང་ཉིད་ན་བར་རབ་དམིགས་པས། །ན་བ་སེམས་བསྐྱེད་གསལ་འདེབས་ཡིན། །ན་བ་སྣང་བ་མ་འགགས་སྐུ། །ཟུག་རྔུ་བརྗོད་པ་སྔགས་ཀྱི་གསུང་། །བལྟས་པས་རིག་སྟོང་སྐྱེ་མེད་ཐུགས། །ན་བ་བསྐྱེད་རིམ་གསལ་འདེབས་ཡིན། །ན་བ་རང་གསལ་ཐབས་མཆོག་ལ། །བརྟགས་པས་སྟོང་གསལ་ཤེས་རབ་ངང་། །གཉིས་མེད་ཟུང་འཇུག་རྣམ་པར་དག །ན་བ་རྫོགས་རིམ་གསལ་འདེབས་ཡིན། །ན་བ་བླ་མའི་རྣལ་འབྱོར་ལ། །ཟུག་རྔུ་གསོལ་འདེབས་བརྗོད་(༢༤)པའི་དབྱངས། །བལྟས་པས་ཤར་གྲོལ་བྱིན་རླབས་དང་། །ན་བ་ལམ་བཟང་གསལ་འདེབས་ཡིན། །ན་བའི་སེམས་ལ་ཚུར་བལྟས་པས། །ངོ་བོ་སྟོང་པ་རང་བཞིན་གསལ། །འཆར་ཚུལ་མ་འགགས་ཅིར་ཡང་སྣང་། །ན་བ་སྐུ་གསུམ་གསལ་འདེབས་ཡིན། །ན་བས་རིག་པའི་དབྱིངས་ལ་སྦྱོར། །བརྟགས་པས་ཡུལ་མེད་སྟོང་པའི་ངང་། །རང་མལ་གདོད་མར་ཕྱམ་བརྡལ་ལེ། །ན་བ་ཆོས་སྐུའི་གསལ་འདེབས་ཡིན། །ན་བས་རང་སངས་ངང་གདངས་རྙེད། །བརྟགས་པས་རང་གནས་བསམ་གཏན་ངང་། །བར་མེད་ཕྱལ་པར་རྗེན་ཁྲེས་སེ། །ན་བ་ལོངས་སྐུའི་གསལ་འདེབས་ཡིན། །ན་བས་འཆར་གཞི་རྩ་བྲལ་མཐོང་། །བརྟགས་པས་རང་ཡལ་རྗེས་མེད་ངང་། །ཤར་གྲོལ་རིས་མེད་སྟོང་སངས་སེ། །ན་བ་སྤྲུལ་སྐུའི་གསལ་འདེབས་ཡིན། །མ་ན་བ་ལ་རྩལ་སྦྱོང་བྱས། །ན་བའི་དུས་ན་བོགས་སུ་འབྱིན། །ཐམས་ཅད་རིག་པའི་རྒྱན་དུ་ཤར། །ན་བ་དགེ་སྦྱོང་གསལ་འདེབས་ཡིན། །ན་བས་རིག་པ་དྭངས་སྙིགས་འབྱེད། །ན་བས་འབྱུང་བའི་རང་གདངས་སྟོན། །ན་བས་རྣལ་འབྱོར་སྲང་ལ་འདེབས། །ན་བ་ཤན་འབྱེད་གསལ་འདེབས་ཡིན། །ང་རང་གུ་ཡང་བློ་བདེ་ཡིན། །དམ་ཆོས་རྫོགས་པ་ཆེན་པོ་ཡིན། །རྐྱེན་སྣང་ཆོས་ཉིད་རང་གྲོལ་ཡིན། །ཐམས་ཅད་རིག་པའི་གསལ་འདེབས་ཡིན། །དགེ་བས་མཁའ་མཉམ་འགྲོ་བ་ཀུན། །བདེ་ཆེན་བྱང་ཆུབ་མཆོག་ཐོབ་ཤོག །ན་བ་ལམ་ཁྱེར་རྡོ་རྗེའི་མགུར། རྣལ་འབྱོར་གྱི་དབང་ཕྱུག་སྣ་ཚོགས་རང་གྲོལ་གྱིས་གསུངས་པ་དགེའོ།། །།