བར་དོའི་སྨོན་ལམ་ངོ་སྤྲོད།
༄༅། ། བར་དོའི་སྨོན་ལམ་ངོ་སྤྲོད་ཅེས་བྱ་བ་བཞུགས་སོ། །
ཀྱེ་མ་རིགས་ཀྱི་བུ་ཁྱོད་ལེགས་པར་ཉོན། །ཁྱོད་ལུས་གདོས་བཅས་ཕུང་པོ་ཤུལ་དུ་བོར། །ད་ལྟ་རྣམ་ཤེས་རྟེན་མེད་བར་དོར་འཁྱམས། །འདི་དུས་དཀོན་མཆོག་མིན་པ་སྐྱབས་གནས་མེད། །ད་ནི་ཤུལ་གྱིས་ཟས་ནོར་ཉེ་དུ་སོགས། །སྐད་ཅིག་ཙམ་ཡང་ཡིད་ལ་མ་བྱེད་པར། །བར་དོའི་དུས་འདིར་བར་དོར་ཤེས་པར་གྱིས། །རང་གི་ཡིད་ལུས་ཡི་དམ་ལྷ་རུ་སྒོམས། །ཅིར་སྣང་(༡༢)མི་བདེན་རྨི་ལམ་སྒྱུ་མར་ལྟོས། །ཕན་གནོད་ལྷ་འདྲེའི་གཟུགས་དང་མི་སྙན་སྒྲ། །ས་གཡོ་རི་འགུལ་ཤིང་འདེགས་མཚོ་འཁྲུག་དང་། །མུན་ནག་སྲོས་དང་གནམ་གྲུམ་སྒྲ་ཆེན་སོགས། །འཇིགས་འཇིགས་འདྲ་བའི་འཁྲུལ་སྣང་མཐོང་བའི་ཚེ། །རྨི་ལམ་སྣང་བ་ཅི་འདྲར་ཤེས་པར་གྱིས། །ནམ་མཁའ་ཅིས་ཀྱང་གཞིག་པར་མི་ནུས་ལྟར། །ཁྱོད་ཀྱིས་ཡིད་ལུས་སྟོང་པ་དེ་ལ་ནི། །སྲིད་གསུམ་དགྲ་རུ་ལངས་ཀྱང་ཅི་བྱར་ཡོད། །རང་གིས་རང་ལ་འཁྲུལ་པར་མ་བྱེད་པར། །གཟུགས་སྣང་ཐམས་ཅད་ལྷ་སྐུ་སྒྱུ་མར་ལྟོས། །སྒྲ་ཚོགས་ཅི་གྲགས་ཡི་དམ་ལྷ་ཡི་སྔགས། །རང་སེམས་སྟོང་པ་སྐྱེ་མེད་ཆོས་སྐུར་ཞོག །སྤྱི་བོའི་གཙུག་ཏུ་རྩ་བའི་བླ་མ་སྒོམས། །མི་འབྲལ་གུས་པས་གདུང་ཤུགས་གསོལ་བ་ཐོབ། །སྣོད་བཅུད་རང་གཞན་བཅས་པ་འདི་ཀུན་ཀྱང་། །བརྡར་བཏགས་ཙམ་སྟེ་གཅིག་དང་ཐ་དད་མེད། །ཐམས་ཅད་རང་སེམས་སྙིང་པོ་གཅིག་ཏུ་དྲིལ། །ཨ་ཡིག་དཀར་པོ་འོད་ཟེར་འབར་བ་ཡིས། །ནུབ་ཕྱོགས་བདེ་བ་ཅན་གྱི་འཇིག་རྟེན་ཁམས། །རྣམ་དག་ཡོན་ཏན་བགྲང་ལས་འདས་པ་དེ། །མིག་གི་དྲུང་ན་འདུག་པ་ལྟ་བུར་ལྟོས། །སངས་རྒྱས་སྣང་བ་མཐའ་ཡས་ཚེ་དཔག་མེད། །འོད་ཟེར་ཉི་མ་འབུམ་གྱི་གཟི་ལྡན་པ། །མཚན་དཔེ་དཔག་ཡས་བལྟར་མི་ངོམས་པ་དེའི། །ཐུགས་ཀའི་དབུས་སུ་རང་སེམས་དབྱེར་མེད་བསྲེས། །ཟབ་མོ་ཆོས་ཀྱི་དབྱིངས་སུ་མཉམ་བཞག་གོ། །ཞེས་རང་གཞན་གྱི་ཡིད་དང་རྣ་བར་ངེས་པར་བྱས་ན་སྲིད་པ་བར་དོར་གྲོལ་བ་ཐོབ་པའི་རྟེན་འབྲེལ་ཡོད་པས་དོ་གལ་གྱིས་ཆེད་དུ་འབད་པར་གྱིས་ཤིག། །།