༨ ཁྱུང་ཆེན་རྡོ་རྗེའི་མགུར།
༈ མཁའ་ལྟར་དག་པའི་དཔལ་མགོན་ཆོས་ཀྱི་རྗེ། །ཆོས་ཉིད་རྟོགས་པས་འཁོར་འདས་གཞི་ནས་གྲོལ། །ཀུན་ཏུ་བཟང་དང་ཐུགས་དགོངས་དབྱེར་མེད་པའི། །མཚུངས་མེད་འགྲོ་མགོན་བླ་མའི་ཞབས་ལ་འདུད། །རིག་པའི་ངང་ལ་འཁོར་འདས་དབྱེར་མེད་པས། །གཞི་ནས་མ་སྐྱེས་ཆོས་ཟད་བློ་འདས་ངང་། །གཟུང་འཛིན་ཡུལ་མེད་ཆོས་ཉིད་རིག་པའི་འགྲོས། །བར་མེད་ཕྱལ་པ་རྗེན་པར་ཟང་ཐལ་ལེ། །གང་སྣང་ཐམས་ཅད་གཞི་མེད་སྟོང་པའི་གཟུགས། །མེད་ལ་གསལ་སྣང་སྒྱུ་མ་ཆུ་ཟླ་འདྲ། །སྣང་ལ་བདེན་མེད་གཞི་ལ་ཡོད་མ་མྱོང་། །ཡུལ་མེད་སྟོང་པ་རྗེན་པར་ཟང་ཐལ་ལེ། །གང་ཤར་རིས་མེད་རང་གསལ་སྟོང་པའི་ངང་། །དྲན་རྟོགས་རྗེས་མེད་སྟོང་ཡལ་ནམ་མཁའ་འདྲ། །སེམས་དང་སེམས་བྱུང་གཞི་རྩ་དངོས་པོ་མེད། །འཛིན་པའི་ཡུལ་མེད་སྟོང་པར་ཟང་ཐལ་ལེ། །སྣང་སྲིད་སྣོད་བཅུད་འཁོར་འདས་ཅི་སྣང་ཡང་། །སྟོང་པ་ཟང་ཀ་(༡༣)མ་བཅོས་གདོད་མའི་ངང་། །གཞི་མེད་རྟེན་མེད་རང་བྱུང་རིག་པའི་ངང་། །འཆར་ཚུལ་མ་འགགས་སྣང་བར་ཟང་ཐལ་ལེ། །རང་གསལ་འཛིན་མེད་ཆོས་དབྱིངས་རིག་པའི་འགྲོས། །རྒྱ་ཡན་ཡོངས་གྲོལ་རྒྱལ་བའི་ དགོངས་པ་ལ། །སྣ་ཚོགས་ཆོས་ཀུན་ཡེ་ནས་རྣམ་དག་པས། །གཉུག་མ་བློ་བྲལ་རྗེན་པར་ཟང་ཐལ 
་ལེ། །ཇི་ལྟར་འཆར་ཡང་དེ་ལྟར་མི་འཛིན་པས། །གང་ལྟར་སྣང་ཡང་དེ་ལྟར་མི་རྟོག་པར། །སྤྲོས་བསྡུ་མེད་པར་རང་གྲོལ་རིག་པའི་ངང་། །རང་བབ་ཕྱལ་པ་རྗེན་པར་ཟང་ཐལ་ལེ། །ཕྱི་རུ་མི་སྤྲོ་ནང་དུ་མི་བསྡུ་ལ། །ཡིད་ལ་མི་བྱེད་དམིགས་གཏད་བློ་ལས་འདས། །སྒོམ་དང་མི་བསྒོམ་བསམ་ལས་འདས་པའི་ངང་། །རང་བྱུང་ཡེ་ཤེས་རྗེན་པར་ཟང་ཐལ་ལེ། །ཐུན་མཚམས་བར་མེད་རྒྱ་ཡན་རིག་པའི་འགྲོས། །རང་གསལ་རྗེན་པ་དམིགས་གཏད་ཀུན་དང་བྲལ། །ཕྱི་ནང་ཡུལ་མེད་ཆོས་དབྱིངས་གདོད་མའི་ངང་། །བར་མེད་རིག་པ་ཆོས་སྐུར་
ཟང་ཐལ་ལེ། །ཡེ་ནས་ལྷུན་གྲུབ་རྒྱལ་བའི་དགོངས་པ ་ལ། །གཞི་ནས་མ་བཅོས་ལྷུན་གྱིས་གྲུབ་པའི་ངང་། །རྒྱུ་འབྲས་བླང་དོར་འཁོར་འདས་གཉིས་མེད་པར། །འོད་གསལ་རིག་པ་ལོངས་སྐུར་ཟང་ཐལ་ལེ། །མ་ཡེངས་མི་གནས་དྲི་མེད་རིག་པ་ལ། །གར་ཡང་མ་གྲུབ་ཅིར་ཡང་མ་འགགས་པར། །རྒྱ་ཆད་ཕྱོགས་ལྷུང་ཡོད་མེད་འདས་པའི་ངང་། །འཆར་གཞི་མ་འགགས་སྤྲུལ་སྐུར་ཟང་ཐལ་ལེ། །འཁོར་བར་སྣང་ཡང་གཞི་མེད་སྟོང་པའི་གཟུགས། །རང་བཞིན་འཁྲུལ་སྣང་གདོད་ནས་ཡོད་མ་མྱོང་། །སྤང་དུ་མེད་པ་སྒྱུ་མའི་གསལ་སྣང་འདི། །འཁོར་བ་དོང་སྤྲུག་ དགོངས་པ་ཟང་ཐལ ་ལ། །རང་སྣང་འཆལ་ཚུལ་ཅིར་ཡང་མ་འགགས་པས། །སྐུ་དང་ཡེ་ཤེས་དག་པའི་ཞིང་ལ་སོགས། །ཇི་ལྟར་སྣང་ཡང་གཞི་མེད་སྟོང་པའི་གཟུགས། །འཁོར་འདས་མིང་མེད་སྟོང་པར་ཟང་ཐལ་ལེ། །རིགས་པའི་ངང་ན་བཟང་ངན་ཅི་སྣང་ཡང་། །སྟོང་གསལ་མ་འགགས་རང་སྣང་རོལ་པ་ཙམ། །གཞན་དུ་མ་གཡོས་རང་དུ་མ་གྲུབ་ལ། །གཉིས་མེད་རང་སྣང་རིག་པ་ཟང་ཐལ་ལེ། །སྣང་བརྟག་ཆོས་རྣམས་བློས་བཏགས་འཁྲུལ་པ་ལ། །གང་དུ་མ་གྲུབ་ཕྱི་ནང་ཡུལ་མེད་ངང་། །རང་བྱུང་ཡེ་ཤེས་སྤྲོས་པའི་མཐའ་ལས་འདས། །ཆོས་ཟད་ངང་དུ་བློ་ཟད་ཟང་ཐལ་ལེ། །འཁོར་རུང་འདས་རུང་སྣང་རུང་སྲིད་ཀྱང་རུང་། །གཟུང་རུང་འཛིན་རུང་ཐམས་ཅད་གཞི་རྩ་བྲལ། །ཐེག་པའི་ཡང་རྩེ་རྫོགས་པ་ཆེན་པོ་རུ། །ཡེ་ནས་སངས་རྒྱས་ཆོས་སྐུར་ཟང་ཐལ་ལེ། །སྤང་བླང་མེད་པ་བྱང་ཆུབ་ཆེན་པོའི་དབྱིངས། །འགྱུར་བ་མེད་པ་རང་བྱུང་རིག་པའི་ཀློང་། །བློ་ལས་འདས་པ་རྫོགས་པ་ཆེན་པོའི་ངང་། །ཀུན་བྱེད་རིག་པ་ཆོས་ཀུན་ཟང་ཐལ་ལེ། །མ་བསམ་མ་དཔྱད་གདལ་བ་ཆེན་པོའི་གཞི། །དབྱིངས་ལས་མ་གཡོས་ཆོས་སྐུ་རང་མལ་ལམ། །རང་རིག་དྲི་མེད་མངོན་གྱུར་འབྲས་བུའི་ངང་། །རང་བྱུང་རིག་པ་འགྱུར་མེད་ཟང་ཐལ་ལེ། །བྱ་རྩོལ་བྲལ་(༡༤)བའི་ཆོས་སྐུའི་མཁའ་དབྱིངས་ལ། །རང་བྱུང་རིག་པ་རྟོགས་པའི་རྩལ་ཆེན་གྱིས། །རྒྱུ་འབྲས་ཐེག་པའི་གཡང་ས་རབ་བཅད་དེ། །རིག་པའི་ཁྱུང་ཆེན་གདོད་མར་ཟང་ཐལ་ལེ། །རྩལ་ཆེན་རྫོགས་པ་ཆོས་ཉིད་རྡོ་རྗེའི་སྐུ། །ཐེག་པའི་ཡང་རྩེ་རྫོགས་པ་ཆེན་པོའི་དོན། །ཇི་བཞིན་མངོན་གྱུར་ཀློང་ཆེན་རབ་འབྱམས་ཀྱིས། །ཁམས་གསུམ་ཡོངས་གྲོལ་མི་ནུབ་རྒྱལ་མཚན་བསླངས། །མ་ལུས་འགྲོ་ཀུན་འབད་མེད་ཡོངས་གྲོལ་ཏེ། །ཀུན་བཟང་ཆོས་སྐུར་ལྷུན་གྱིས་གྲུབ་པར་ཤོག །རྫོགས་པ་ཆེན་པོ་དོན་གྱི་དབྱིངས། ཁྱུང་ཆེན་རྡོ་རྗེའི་མགུར། སློབ་དཔོན་རིན་ཆེན་ཤེས་རབ་ཀྱི་དོན་དུ་ལྷུན་གྲུབ་གླིང་གི་དབེན་གནས་སུ་མཛད་པ་རྫོགས་སོ།། །།ནམ་མཁའ་མཐའ་དབུས་མ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་སྦྱར་བའོ།། །།