གདམས་ངག་མཛོད་པོད་བཅོ་ལྔ་པ།
བླ་མེད་སྔགས་ཆོས་ཀྱི་སྙིང་པོའི་བཅུད་ལེན་ལམ་ཟབ་བདུད་རྩིའི་ཐིག་ལེ།
བླ་མེད་སྔགས་ཆོས་ཀྱི་སྙིང་པོའི་བཅུད་ལེན་ལམ་ཟབ་བདུད་རྩིའི་ཐིག་ལེ་ཞེས་བྱ་བ་བཞུགས་སོ།། །།
ན་མོ་གུ་རུ་ཤྲཱི་ཀཱ་ལ་ཙཀྲ་ཡེ། མི་འགྱུར་བདེ་ཆེན་སྟོང་གཟུགས་ཕྱག་རྒྱ་ཆེ། །ཟུང་འཇུག་ཨཱ་ལི་ཀཱ་ལི་མཉམ་སྦྱོར་བ། །རྣམ་ཀུན་མཆོག་ལྡན་རྣམ་པ་ཐམས་ཅད་མཁྱེན། །དཔལ་ལྡན་བླ་མ་དུས་ཀྱི་འཁོར་ལོར་འདུད། །བླ་མེད་སྔགས་ལམ་ཉིང་ཁུ་མཆོག །སྨིན་འཕེལ་བྱང་ཆུབ་ཆེན་པོའི་བར། །རིམ་པ་ལམ་ཟབ་ཅེས་བྱ་བ། །བླ་མའི་མན་ངག་བཞིན་བཤད་བྱ། རྣལ་འབྱོར་པ་བདེ་བའི་གདན་ལ་མཉམ་པར་བཞག་སྟེ་བདུད་རྩི་མྱང་ནས། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བདག་གི་ཕུང་པོ་ཁམས་སྐྱེ་མཆེད། །ཡུལ་བཅས་མ་དག་འཛིན་པའི་ཆ། །སྤྲོས་བྲལ་རང་བཞིན་རྣམ་དག་པ། །གདན་གསུམ་ཚང་བའི་དཀྱིལ་འཁོར་དངོས། །རང་སྣང་དག་པ་སྤྱི་བོའི་གཙུག །བདེ་བ་ཆེན་པོའི་སྙིང་གི་དཀྱིལ། །ཁམས་ལྔ་ལྡན་པ་ལག་གི་མཐིལ། །ཕྱོགས་བྲལ་ཁྱབ་བརྡལ་ནམ་མཁའི་
དབྱིངས། །འབྱུང་ལྔ་འོད་ཀྱི་འཁོར་ལོའི་དབུས། །པདྨ་ཟླ་ཉི་སྒྲ་གཅན་སྟེ། །རིག་པ་ཧཱུྃ་ལས་ཀུན་རྫོབ་དུས། །དོན་དམ་འཁོར་ལོའི་བདག་ཉིད་ཆེ། །དཔལ་མཆོག་དང་པོའི་སངས་རྒྱས་ནི། །དཔལ་ལྡན་རྩ་བའི་བླ་མ་དངོས། །རྡོ་རྗེ་སེམས་དཔའ་ཧེ་རུ་ཀ །ཀུན་བྱེད་རྒྱལ་པོ་ཀུན་ཏུ་བཟང༌། །སྔོ་སངས་དེ་བཞིན་གཤེགས་པའི་སྐུ། །ཞི་ཁྲོ་འདྲེས་པ་ཆགས་པའི་ཉམས། །སྤྱན་གསུམ་མཆེ་བཞིའི་མྱུ་གུ་མཛེས། །རྡོ་རྗེའི་རྒྱན་དང་སྟག་ཤམ་ཅན། །དབུ་སྐྲ་བུང་བ་ལྟར་གནག་ཅིང༌། །འཚོགས་མར་སྣ་ཚོགས་རྡོ་རྗེའི་ལྟེར། །རིགས་བདག་བསྐྱེད་མཛད་རྒྱལ་བས་བརྒྱན། །ཐོར་ཅོག་གཡོན་དུ་ཟླ་ཚེས་དང༌། །རྩེ་མོར་ནོར་བུའི་འོད་འབར་བ། །ལྟ་བས་མི་ཚུགས་བསམ་མི་ཁྱབ། །ཕྱག་གཉིས་སོར་མོ་མཐེ་བོང་ནས། །བརྩི་རིམ་སེར་དཀར་དམར་ནག་ལྗང༌། །ཕྱག་སོར་རྩ་བ་ནས་བརྩམས་ཏེ། །ཚིག་ཕྲེད་རིམ་གསུམ་ནག་དམར་དཀར། །ཕྱག་མཐིལ་པདྨ་ལྟར་དམར་ཞིང༌། །ཕྱག་མཚན་རྡོ་རྗེ་དྲིལ་བུ་བཅས། །ཡུམ་
ལ་རྣམ་རོལ་ཕྱག་རྒྱས་འཁྱུད། །ཞབས་གཡོན་དཀར་པོ་གཡས་དམར་པོ། །བསྐུམ་དང་བརྐྱང་བའི་འོག་ཏུ་ནི། །དཀར་པོ་དབང་ལྡན་མིག་གསུམ་པ། །རྩེ་གསུམ་ཐོད་པ་འཛིན་ཁ་སྦུབ། །དམར་པོ་འདོད་ལྷ་མེ་ཏོག་གི༌།མདའ་ལྔ་གཞུ་འཛིན་གན་རྐྱལ་མནན། །དབང་ལྡན་འདོད་ལྷའི་ཆུང་མ་ཡིས། །གུས་པས་ཞབས་སོར་དཔྲལ་བཏུད་དེ། །ལག་གི་བརྟེན་ཡང་གཡོ་མེད་པར། །རི་དབང་ལྟར་བརྗིད་དེར་འཁྱུད་པའི། །སྣ་ཚོགས་ཡུམ་གྱུར་གསེར་གྱི་མདོག །སྤྱན་གསུམ་ཁྲོ་འཛུམ་དབུ་སྐྲ་གྲོལ། །ཕྱག་རྒྱ་ལྔས་སྤྲས་གྲི་ཐོད་འཛིན། །གཡས་བསྐུམ་གཡོན་བརྐྱང་མཉམ་པར་རོལ། །རྡོར་པད་ཨེ་ཝཾ་ཟུང་འཇུག་སྙོམས། །མཚན་དཔེ་ཡོངས་རྫོགས་ཡབ་ཡུམ་སྐུ། །འོད་ཟེར་ཡེ་ཤེས་མེ་ལྔ་འབར། །དེ་ལྟར་གསལ་བའི་སྐུ་ཡི་གནས། །སྤྱི་མགྲིན་ཐུགས་ལྟེ་གསང་གཙུག་ཏོར། །ཨོཾ་ཨཱཿཧཱུྃ་ཧོ་སྭཱ་ཧཱ་དྲུག །དཀར་དམར་ནག་སེར་ལྗང་མཐིང་མདོག །ཡིག་འབྲུ་རྣམས་ལས་འོད་ཟེར་ནི། །མཁའ་ཁམས་ཇི་སྲིད་ཀུན་ཁྱབ་སྟེ། །རྩ་བརྒྱུད་བླ་མ་ཡི་དམ་ལྷ། །རབ་འབྱམས་རྒྱུད་སྡེ་བཞི་དྲུག་གཾ །ཡི་དམ་རབ་འབྱམས་རྒྱ་མཚོ་དང༌། །སངས་རྒྱས་བྱང་སེམས་ཉན་རང་འཕགས། །དཔའ་བོ་རྣལ་འབྱོར་ཞིང་སྐྱོང་བ། །ཆོས་སྲུང་དམ་ཅན་ཚོགས་བཅས་ཀུན། །མདུན་གྱི་ནམ་མཁར་སྤྱན་དྲངས་ཤིང༌། །དེ་རྣམས་ལ་ནི་མཆོད་པའི་སྤྲིན། །ཉེར་སྤྱོད་འདོད་ཡོན་ཤ་བདུད་རྩི། །སྙོམས་འཇུག་བདེ་ཆེན་མཉམ་པ་ཉིད། །མཆོད་དགྱེས་དཀོན་མཆོག་རྩ་གསུམ་ཚོགས། །བླ་མ་དུས་ཀྱི་འཁོར་ལོར་ཐིམ། །དབྱེར་མེད་དུ་མ་རོ་གཅིག་པས། །ཀུན་འདུས་ཡིད་བཞིན་ནོར་བུར་གྱུར། །
དེ་ནས་གུས་པའི་ཡིད་ཀྱིས་རྩ་གཅིག་པས་སངས་རྒྱས་དུས་ཀྱི་འཁོར་ལོ་རྩ་གསུམ་འདུས་པའི་ངོ་བོར་ཕུར་ཚུགས་སུ་གསོལ་བ་བཏབ་པ་ནི། གང་ལ་རྒྱུ་དང་མཚན་ཉིད་མེད། །གཡོ་དང་དེ་བཞིན་རིས་མེད་པས། །ཀ་ལ་ཙཀྲར་མངོན་བརྗོད་པ། །གཉིས་མེད་དེ་ལ་གསོལ་བ་འདེབས། །དེ་བཞིན་དུས་འཁོར་བདེ་ཆེན་པོ། །སྐུ་གསུམ་མཆོག་དང་དཀྱིལ་འཁོར་གསུམ། །རྡོ་རྗེ་གསུམ་མཆོག་རྡོ་རྗེའི་དབྱིངས། །འགྱུར་བ་མེད་ལ་གསོལ་བ་འདེབས། །ཕྲ་རགས་རྡུལ་གྱི་ཆོས་ཉིད་འདས། །བྲ་ཕབ་པ་ཡི་རང་བཞིན་ཅན། །རྣམ་པ་ཀུན་གྱི་མཆོག་ལྡན་པ། །ཕྱག་རྒྱ་ཆེན་མོར་གསོལ་བ་འདེབས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །རྩ་བའི་བླ་མར་གསོལ་བ་འདེབས། །ཁྱོད་ནི་འགྲོ་བའི་བླ་མ་ཡང༌། །ཕ་མ་གཉེན་དང་གྲོགས་བཟང་པོ། །ཁྱོད་ནི་སྡིག་འཕྲོག་ཕན་བྱེད་མགོན། །ཁྱོད་ནི་གོ་འཕང་ཕུན་སུམ་ཚོགས། །ཁྱོད་མཆོག་འབའ་ཞིག་ཡོན་ཏན་གནས། །སྐྱོན་བཅོམ་དམན་རྣམས་མགོན་གྱུར་ཁྱོད། །ཡིད་བཞིན་ནོར་བུ་རྒྱལ་བའི་གཙོ། །བླ་མར་བདག་ནི་སྐྱབས་སུ་མཆིའོ། །སྐྱེ་རྒ་འཆི་དང་ན་བ་ཡི། །ཆུ་སྲིན་ལ་སོགས་འཇིགས་རུང་བ། །མི་ཟད་འཁོར་བའི་རྒྱ་མཚོ་ལས། །མགོན་པོས་བདག་ནི་བསྒྲལ་དུ་གསོལ། ཞེས་པས་གསོལ་བ་ནན་ཏན་དུ་གདབ། དེ་ལྟར་ཚིག་ཤ་ལོ་ཀ་བདུན་ལ་སྔ་མ་གསུམ་ནི་འཕགས་འགྲེ་ལ་དྲི་མེད་འོད་ན་གནས་པ་རྒྱུད་ཚིག་དར་ཕྱི་མ་གཅིག་པོ་ཡང་འགྱུར་ཆད་ཀྱིས་འཕགས་འགྲེལ་ལ་ལར་མི་གསལ་ཡང༌། དུས་འཁོར་རྒྱུད་ལས་ཕྱུང་བ་ཞིག་དང༌། བཞི་པ་སྒྱུ་འཕྲུལ་དྲྭ་བའི་ཚིག་དང༌། ལྔ་པ་དྲུག་པ་
ཟུང་ནི་དུས་འཁོར་བསྡུས་རྒྱུད་ནང་ལེའི་མཐར་དང༌། འཇམ་དཔལ་ཞལ་ལུང་ཚིག་སྒྲོས་མཐུན་པ་ལས་བླངས་པ་སྟེ་རྒྱུད་ཚིག་ཤ་སྟག་གོ །དེ་མཐར་ཐལ་མོ་སྦྱར་ཏེ། སྒྲིབ་པ་ཐམས་ཅད་བཅོམ་པ་ཡི། །དུས་ཀྱི་འཁོར་ལོ་ཁྱོད་ལ་འདུད། །མཆོག་ཏུ་མི་འགྱུར་བདེས་གང་བ། །ཡེ་ཤེས་སྐུ་ཁྱོད་ལ་ཕྱག་འཚལ། །སྟོང་ཉིད་སྙིང་རྗེ་དབྱེར་མེད་པ། །བྱང་ཆུབ་སེམས་དེ་འགྱུར་མེད་གང༌། །དབང་བསྐུར་དེ་ཡིས་བདག་ལ་ནི། །མགོན་པོ་ད་ནི་བཀའ་དྲིན་མཛོད། །ཅེས་པ་ལན་གསུམ་དུ་གསོལ་བ་གཏབ། དཔལ་ལྡན་བླ་མ་དུས་འཁོར་ལོ། །ཡབ་ཡུམ་མཛོད་སྤུ་ནས་འོད་དཀར། །ཟླ་ཞུན་འདྲ་བྱུང་བདག་དཔྲལ་ནས། །ཞུགས་ཤིང་ཕྱི་ནང་ལུས་ཀུན་སྦྱངས། །དབྱིབས་སྣང་དགའ་བ་བུམ་དབང་གི། སྨིན་གྲོལ་སྦྱང་ཐོབ་ལས་ཀུན་བྱས། །བླ་མ་ཡབ་ཡུམ་སྦྱོར་མཚམས་ནས། །དཀར་དམར་འདྲེས་པ་ཐིག་ལེའི་རྒྱུན། །བདག་ལྕེ་སྟེང་བབས་ལྕེ་ཆུང་ནས། །དབུ་མའི་ནང་བརྒྱུད་ལུས་ཀུན་ཁེངས། །སྔགས་མཆེད་ཁྱད་དགའ་གསང་དབང་གིས། །སྨིན་གྲོལ་སྦྱངས་ཐོབ་ལས་ཀུན་བྱས། །བླ་མ་ཡབ་ཡུམ་ཐུགས་ཀ་ནས། །ལྔ་ལྡན་འོད་ཟེར་སྲང་བུ་བཞིན། །བདག་གི་སྙིང་གར་ཡོངས་ཐིམ་ནས། །ཕྱི་ནང་འོད་ཟེར་དྲྭ་བས་གཡོགས། །ཆོས་ཐོབ་མཆོག་དགའ་ཤེར་དབང་གིས། །སྨིན་གྲོལ་སྦྱངས་ཐོབ་ལས་ཀུན་བྱས། །བླ་མ་ཡབ་ཡུམ་སྙིང་དབུས་ནས། །གསལ་དོང་རབ་མཚེར་རྒྱལ་བའི་སྐུ། །མི་འགྱུར་བདེ་བར་མཆོན་གང་བ། །བདག་གི་གཙུག་ནས་སྙིང་གར་ཐིམ། །ཉེར་ཐོབ་ལྷན་དགའ་དབང་བཞི་
པའི། །སྨིན་གྲོལ་སྦྱངས་ཐོབ་ལས་ཀུན་བྱས། །དེ་ལྟར་ཏིང་ངེ་འཛིན་དབང་ཡིད་རྩེ་གཅིག་ཏུ་མཉམ་པར་བཞག་ནས་ཅི་ནུས་སུ་བླང་བར་བྱའོ། །དེ་ནས་བླ་མ་དུས་འཁོར་ལོ། །ཡབ་ཡུམ་རང་གི་སྤྱི་བོར་བྱོན། །འོད་ཞུ་བདག་གི་སྒོ་གསུམ་དང༌། །དུས་འཁོར་སྐུ་གསུང་ཐུགས་མཉམ་པས། །རང་ཉིད་དཀྱིལ་འཁོར་འཁོར་ལོའི་བདག །དང་པོའི་སངས་རྒྱས་དུས་འཁོར་ལོ། །མེ་ལོང་སྔགས་ཀྱི་པྲ་ཕབ་བཞིན། །རྡུལ་བྲལ་ཡེ་ཤེས་སྐུ་རུ་གྱུར། དེ་ལྟར་ལྷ་སྐུ་ཆ་མེད་རྣམ་པ་གསལ་བ་ལ་རྣམ་རྟོག་གཞན་སྤངས་ཏེ་ཅི་གནས་སུ་མཉམ་པར་བཞག་ཅིང༌། གལ་ཏེ་རྣམ་རྟོག་འཕྲོ་བ་སེལ་ཕྱིར་རང་སྔགས་བཟླ་བར་སྤྲོ་ན། དུས་འཁོར་ཐུགས་ཀ་ནས་འོད་འཕྲོས། །སྣང་བ་དག་པ་འོད་གསལ་ཞིང༌། །འགྲོ་ཀུན་དུས་ཀྱི་འཁོར་ལོའི་སྐུ། །ཡེ་ཤེས་རོལ་བ་ཆེན་པོར་གྱུར། །ཞེས་སྣང་སྲིད་དག་པར་བལྟས་ཏེ་མཉམ་པར་བཞག་གོ །ཡང་ཨོཾ་ྷྐྵྨླྺྼྻྃ་སྭཱ་ཧཱ། ཞེས་པ་ཟླ་སྐྱོན་ལྔ་སྤངས་ཏེ་ངག་བཟླས་སམ་ཡིད་བཟླས་སོགས་ཇི་ལྟར་འདོད་པ་བྱའོ། །མཐར་ཐུན་བསྡུ་ན། སྣང་སྲིད་ཞིང་ཁམས་ལྷ་ཚོགས་ཀུན། །འོད་ཞུ་རང་ཉིད་ཡུམ་ཀྱང་ཡབ། །རབ་ཕྲའི་ཐིག་ལེར་གྱུར་ཡལ་སྟོང༌། །སྤར་ཡང་རང་ཉིད་ལྷ་སྐུར་ལྡང༌། །དེ་ལྟར་རྫོགས་རིམ་བསྒོམ་པར་འདོད་ན་སྐབས་འདིར་ཡན་ལག་དྲུག་གང་རིགས་བསྒོམ་པར་བྱའོ། །དེ་ཡང་འདིར་ཡན་ལག་དྲུག་སྙིང་པོའི་དོན་དུ་གནད་དུ་དྲིལ་ནས་གདན་ཐོག་གཅིག་ཏུ་ཉམས་སུ་ལེན་པ་ནི། བསམ་སྟན་གྱི་གདན་ལ་ལུས་དྲང་ཞིང་སྐྱིལ་ཀྲུང་ཁུ་ཚུར་བརླ་བཞག་སོགས་བྱེད་པ་ཅིང་གནང་དང་ལྡན་པས་རླུང་རོ་ལེགས་པར་བསལ་ཏེ་སོ་བར་ནས་འབྲས་ཐར་ཙམ་དུ་བྱས་ཏེ་
རླུང་རེ་ཞིག་རང་བབས་སུ་བཞག །མིག་ཧ་ཅང་གི་བཟློག་པ་མ་ཡིན་པར་སྨིན་ཕྲག་ཐད་དུ་འབྱེད་བཙུམ་རན་བ་མི་གཡོ་བར་ནམ་མཁའི་མུན་པ་ནག་ཐིང་ངེ་བར་གཏད་ལ་སེམས་རྣམ་རྟོག་གི་སྤྲོས་པ་དང་བྲལ་བར་དེ་ལྟར་གཡོ་མེད་གསུམ་ལྡན་དུ་བཞག་པར་བྱ་སྟེ། སོར་སྡུད་སྐབས་སྟོང་གཟུགས་ཤར་རུང་དེ་ལ་ཆེད་གཉེར་མེད་པ་ནམ་མཁའ་ལ་གཙོ་བོ་དང༌། བསམ་གཏན་ནི་སྟོང་གཟུགས་མི་ཤར་ཚེ་ནམ་མཁའ་དང་ཤར་ཕྱིན་སྟོང་གཟུགས་གཙོ་བོར་བྱས་ཏེ་གནས་གཞན་གཅིག་པ་ཉིད་དོ། །དེ་ཡང་དུ་བ་སྨིག་རྒྱུ་མེ་ཁྱེར་མར་མེ་མཁའ་སྣང་སེར་དཀར་དམར་ནག་དང་གློག་འོད་ཐིག་ལེ་ཐིག་ལེ་ཆེན་པོར་གྲགས་པའི་རྟག་པ་སྣང་ཀུན་སྟོང་གཟུགས་ཞེས་སེམས་ལ་སེམས་མ་མཆིས་པའི་སྟོང་ཉིད་རང་བཞིན་འོད་གསལ་གྱི་རང་མདངས་འཁྲུལ་ཤེས་ཀྱིས་མ་བསླད་པའི་མ་འཁྲུལ་བའི་རྣམ་ཀུན་མཆོག་ལྡན་གྱི་ཕྱག་རྒྱ་ཆེན་པོ་རྣམ་པ་ཐམས་ཅད་པ་སྟེ། དེ་ནི་དང་པོའི་སངས་རྒྱས་ཀྱི་ཆོས་སྐད་ཡང་དག་པའོ། །དེ་ལྟར་སོར་བསམ་ལ་གོམས་པའམ་མ་གོམས་ཀྱང་རུང༌། ཐོག་མ་དབུགས་རང་བབས་ལ་བརྡའ་འགྱུར་རྡོ་རྗེའི་བཟླས་པ་ཅི་ནུས་སུ་འབད་ཅིང་དེ་ནས་དལ་གྱིས་རླུང་ཇི་ནུས་འགོག་ཀྱིན་རྡོར་བཟླས་སྦྱར་ལ་དེ་ལྟས་མཐར་བུམ་པ་ཅན་རང་གྲུབ་ཏུ་ཡོང་བར་བཞེད་ལ། རླུང་འགོག་པའི་རྡོར་བཟླས་ནི་འགོག་བཟླས་ལྟ་བུ་མ་ཡིན་གྱི་རྔུབ་དགང་བཏང་གསུམ་པ་སྡོམས་པར་འབྲུ་གསུམ་ཚར་གཅིག་དང་སྦྱར་བ་ལས་མང་མི་དགོས་ཤིང༌། དྲག་རླུང་བུམ་པ་ཅན་སོགས་ལ་གཞིལ་ཞེས་འབྱུང་བ་རང་དང་དགོང་པ་དང་བཏང་བའི་བར་མཚམས་སུ་ལས་ཁྱད་པར་ཅན་བྱེད་རུང༌། ངོ་བོ་ནི་དགོང་པ་ལས་ལོགས་སུ་མེད་ཅིང༌། དེ་ལྟར་རྡོར་བཟླས་དང༌།
སྦྱར་བའི་རླུང་སྦྱོར་ནི་སྲོག་རྩོལ་དངོས་དང་སྟོང་གཟུགས་དང་བསྲེ་བ་ན་ཐུན་མོང་མ་ཡིན་པའོ། །དེ་ལྟར་སྲོག་རྩོལ་གྱི་ནུས་པས་རླུང་དབུ་མར་ཞུགས་གནས་ཐིམ་པའི་བྱ་བ་ལྟེ་བ་མན་ཁྱད་གྲུབ་ནས། སླར་འཁོར་ལོ་གོང་མ་རྣམས་དང་གསང་བ་བཅས་པར་བཞུགས་གནས་ཐིམ་གསུམ་ཁྱད་པར་ཅན་གྱིས་དབྱིད་ཐིག་ཁ་སྦྱོར་ལ་བྱང་ནས་ཡས་བརྟན་པས་དང་པོའི་ས་ཐོབ་པར་བྱེད་པ་ནི་འཛིན་པ་སྟེ་དེའི་མན་ངག་ཟུར་དུ་བྱས་པ་ཡོད་ཀྱང་གྲུབ་པའི་སློབ་དཔོན་ཕལ་ཆེས་ནི་མན་ངག་སྲོག་རྩོལ་ཁོ་ནས་རུང་ལ་དེས་གྲུབ་བའི་འབྲས་བུ་འཛིན་པ་ཡིན་པར་བཞེད་དོ། །དེ་ནས་རྗེས་དྲན་དངོས་ནི། ཕྱག་རྒྱ་གསུམ་ལ་བརྟེན་ཡས་བརྟེན་གྱི་དགའ་བ་བཞི་པའི་མཐར་ཐུག་རྗེས་དྲན་བཅུ་དྲུག་གི་ཡོན་ཏན་ཡོངས་སུ་གྲུབ་ནས། དེའི་འབྲས་བུའི་ཚུལ་དུ་ཏིང་ངེ་འཛིན་མས་བརྟེན་གྱི་དགའ་བ་བཅུ་དྲུག་ཡོངས་སུ་རྫོགས་པ་ཡན་ལག་བདུན་དབང་ཕྱུག་བརྒྱད་ཟུང་འཇུག་ཉེར་གསུམ་གྱི་ཡོན་ཏན་གྲུབ་པ་རྡོ་རྗེ་སེམས་དཔའི་གནས་ཐོབ་པ་རྣམས་དངོས་གནས་ཀྱི་སྦྱོར་བ་ཡན་ལག་དྲུག་གི་རིམ་པ་དང༌། དེ་ཡན་ལག་ཕྱི་མ་གསུམ་མོས་པ་ལམ་དུ་བྱེད་པའི་དེའི་རྒྱུ་ཚོགས་ཁྱད་པར་ཅན་སྒྲུབ་པར་གཏུམ་མོའི་རྣལ་འབྱོར་ལ་འབད་པར་བསྔགས་ཏེ། དེ་ཡང་རང་ཉིད་དུས་འཁོར་ཡབ་ཡུམ་དུ་གསལ་བཏབ་པའི་རང་གིས་ལུས་དབུས་སུ་རྩ་དབུ་མ་མཚན་ཉིད་བཞི་ལྡན་མདའ་སྨྱུག་ཙམ་ལྟེ་བ་མན་ལྗང་གུ་དེ་ཡན་ཆད་མཐིང་ག་གཡས་གཡོན་རོ་རྐྱང་དཀར་དམར་དབུ་མ་ལས་འདབ་འགྱུར་ཕྲ་བ་ཡས་སྣ་སྣ་བུག་གཡས་གཡོན་དང་མས་ནད་དབུ་མར་ཆུད་པ་སྟེ་དབུ་མའི་ལྟེ་འོག་སོར་བཞིའི་མཚམས་ཚངས་པའི་མེ་དབྱུག་པའི་དབྱིབས་ཅན་ལྟེ་བར་ཧོཿསེར་སྙིང་གར་ཧཱུྃ་སྔོན་ཡས་སྣར་ཧཾ་ཅན་བ་ནུ་ལྟ་བུ་སྟེ།
དེ་ཡང་ཟར་མའི་འབྲས་བུ་ལྟར་ཟླུམ་པའི་དབུས་བ་ནུ་ལྟར་ཅུང་ཟད་ནར་རེ་འཕྱངས་པས་དབུ་མའི་ཡས་སྣར་བཀབ་པའོ། །དེ་ནས་རླུང་རོ་བསལ། རླུང་སྦྱོར་བ་བཞི་ལྡན་ལ། དམིགས་པ་རོ་རྐྱང་རླུང་རྒྱུད་དབུ་མའི་མས་སྣ་རླུང་ཞུགས་ཚངས་པའི་མེ་འབར། ཧོ་ཡིག་ལ་རེག་ཧོཿཡིག་ལས་མེ་སེར་ཤས་ཆེ་བའི་ཁ་དོག་དྲུག་པ་འབར། རིམ་པས་ཇེ་མཐོར་སོང་སྟེ་སྙིང་གའི་ཧཱུྃ་བསྲེག་སྤྱི་བོའི་ཧཾ་ཅན་ལ་རེག་བདུད་རྩི་ཟླ་ཞུན་ལྟར་དཀར་འཚེར་འོད་ཟེར་འཕྲོ་བའམ་སྙིང་གའི་ཧཱུྃ་གསོས་ཏེ་ལྟེ་བའི་ཧོཿལ་ཐིམ་ཞིང༌། དེ་ཡང་མེ་བདུན་ལ་ཧོཿཅན་ལ་རྩེ་རེག་ཙམ་བར་མི་ཆད་དང་ཐིག་ལེ་རྒྱབ་ནས་ཧོཿཡིག་བར་མི་ཆད་པར་བབ་སྟེ་ཐིམ་པ་འབར་འཛག་སྐྲ་ཤད་འཛིངས་པ་ལྟར་བྱ་སྟེ། དེ་ལྟར་ཉམས་སུ་བླངས་པའི་ཐུན་མགོར་རླུང་རོ་ལེགས་པར་བསལ། བར་རླུང་བཏང་བའི་སྐབས་ཀུན་ཏུ་རླུང་ཞབས་འཛིན་པ་དང༌། མཐར་ཐུན་བཞག་སྐབས་ལུས་གཡས་སུ་གཅུད་དེ་ཐིག་ལེ་དཀར་ཆ་ཀུན་སྤྱི་བོར་ཧཾ་ལ་ཐིམ། གཡོན་དུ་གཅུད་དམར་ཆ་ཀུན་ལྟེ་བའི་ཧོཿལ་ཐིམ། དེ་ནས་ཐིག་ལེ་དཀར་དམར་འདྲེས་པར་བསམ་ལ་རླུང་གི་དུག་འདོན་ཧག་སྤུག་ཡང་དག་པར་བྱས་རྗེས་དམིགས་མེད་དང༌། རླུང་ཞབས་པར་རླུང་དུ་འཛིན་པ་རྣམས་བླ་མའི་མན་ངག་བར་མ་ཆད་པ་ཡིན་ལ། ལམ་ཕྱག་རྒྱ་ཆེན་པོ་བསྒོམ་པ་ལ་ཡང་ཤིན་ཏུ་གལ་ཆེ་བར་རྗེ་བཙུན་མི་ལས་མཉམ་མེད་སྒམ་པོ་བར་ངེད་ཀྱི་ཨ་ཐུང་འདི་བསྒོམ་དང་ད་བཟོད་ངོ་བོ་མཐོང་གསུང་བས་ཀྱང་ངེས་པར་མཚོན། ལྷག་ཏུ་ལྷ་སྐུ་གཏུམ་མོ་འབར་འཛག་ཀུན་སྟོང་གཟུགས་དང་བསྲེ་བ་ནི་དང་པོའི་སངས་རྒྱས་ཀྱི་རྫོགས་རིམ་ཁྱད་ཆོས་ཕུལ་དུ་བྱུང་བའོ། །དེ་ནས་ཐུན་མཚམས་ལ་
འཇུག་པར་འདོར་ཚེ། དགེ་བ་འདི་ཡིས་མྱུར་དུ་བདག །དུས་ཀྱི་འཁོར་ལོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །རིགས་སུ་སྐྱེ་དང་དམ་ཚིག་ཅན། །སྙོན་མེད་དུས་ཀྱི་འཁོར་ལོ་སྟོན། །བླ་མ་ལ་གུས་སྙིང་བརྩེ་ལྡན། །སྐྱེ་ཞིང་སྐྱེ་བར་འགྱུར་བར་ཤོག །ལག་པས་རྡོ་རྗེ་དྲིལ་བུ་འཛིན། །ཟབ་མོའི་ཆོས་ནི་ཀློག་པ་དང༌། །བཙུན་མོའི་ཁུ་བ་མཉམ་ཟས་ཅན། །སྐྱེ་ཞིང་སྐྱེ་བར་འགྱུར་བར་ཤོག །ཅེས་སོགས་སྨོན་ལམ་ཅི་རིགས་པ་བྱ་ལ་དེ་ལྟར་རྫོགས་རིམ་བསྒོམས་པའི་མཐའ་འམ་མི་བསྒོམ་ཡང་རུང༌། ཐུན་ལས་ལྡང་བར་འདོད་ཚེ་དགེ་བ་རྫོགས་བྱང་དུ་བསྔོ་བ་དང་སྨོན་ལམ་གྱི་རྒྱས་བཏབ་པ་ཡང་ངེས་པར་མ་ཆད་པར་གཅེས་སོ། །དེ་ལྟར་བླ་མེད་རྡོ་རྗེ་ཐེག་པ་མཐའ་དག་གི་ཉིང་ཁུ་ལམ་ཟབ་ཁྱད་པར་ཅན་འདི་རྩ་བའི་ཁུང་འཕགས་ཡུལ་གྱི་གྲུབ་པའི་སློབ་དཔོན་རྡོ་རྗེ་གདན་པ་འཇིག་རྟེན་འབྱུང་གནས་སྦས་བའི་མན་ངག་དཔལ་རྒྭ་ལོ་དང༌། རྒྱལ་བ་ཞང༌། ཡང་དགོན་པ་རྣམས་ཀྱི་ཐུགས་དམ་ཡང་སྙིང་ཞང་གི་བཀའ་འབུམ་དང༌། ཡང་དགོན་པའི་རི་ཆོས་སུ་ཆེ་ཐང་དུ་མ་མཛད་པ་ཉིད་གཞིར་བཞག །དེ་ཡང་ཞང་གི་རྩ་བའི་བླ་མ་འཁོར་ལོས་བསྒྱུར་བའི་ཆོས་ཅན་དང༌། རྡོ་རྗེ་འཆང་དུ་བྱས་པ་གདམས་སོ་ཅན། རི་ཆོས་སུ་བདེ་མཆོག་ཏུ་བྱས་པ་ཡོད་ཀྱང་འདིར་དུས་འཁོར་དུ་བྱས་པ་དང༌། དུས་འཁོར་ལྷན་སྐྱེས་རོལ་པའི་རྡོ་རྗེའི་གཞུང་རྗེ་བཙུན་སྒྲོལ་མགོན་གྱི་ཁྲིད་རིམ་དུ་དྲངས་པའི་དོན་བཞིན་ལ་རྒྱུད་ཀྱི་ཤེས་པས་བླ་མའི་མན་ངག་རྒྱུད་དོན་མ་འཁྲུལ་བས་ཁ་ཅུང་ཟད་བསྐངས་ཏེ་བྱས་པས་ནོར་འཁྲུལ་མེད་ལ་
ཞལ་ལུང་རྒྱུན་མ་ཆད་པས་བྱིན་རླབས་མ་ཉམས་པ་དང༌། སྦྱོར་དྲུག་གདན་ཐོག་གཅིག་པའི་མྱོང་ཁྲིད་ཀྱི་སྲོལ་ཀ་མ་ཉམས་པ་བྱུང་བའོ། །དེ་ལྟར་རྒྱལ་བའི་དབང་ཕྱུག་གི། བཀའ་གསང་རྒྱུད་སྡེ་ཀུན་མཐར་ཐུག །ཐུགས་ཀྱི་ཕྲིན་ལས་ཕུལ་བྱུང་ཆོས། །ལམ་ཟབ་ཤིང་རྟའི་སྲོལ་འདི་རྨད། །ཚུལ་འདིར་བདག་གིས་འབད་བགྱིས་དགེ་མཆིས་ཀུན། །འགྲོ་མགོན་བླ་མ་དགྱེས་མཛད་མཁའ་མཉམ་འགྲོར། །ཡོངས་བསྔོ་རེ་མཐུ་ཚེ་དབང་རྒྱལ་བ་ཡིས། །གོ་འཕང་ཡིད་བཞིན་ནོར་བུའི་གནས་ཐོབ་ཤོག །ཅེས་བླ་མེད་སྔགས་ཆོས་ཀྱི་སྙིང་པོའི་བཅུད་ལེན་ལམ་ཟབ་བདུད་རྩིའི་ཐིག་ལེ་ཞེས་བྱ་བ་འདི་ནི་སྒྲུབ་བརྒྱུད་བསྟན་པའི་མངའ་བདག་དཔལ་ལྡན་འབྲུག་པ་ཞེས་སྙན་པའི་བ་དན་སྲིད་རྩེར་འཕྱོ་བ་གང་གི་སྤྱི་ཕུད་ཡོངས་ཀྱི་འདྲེན་པ་འཇིག་རྟེན་དབང་ཕྱུག་གི་སྒྱུ་འཕྲུལ་འགོག་པ་མེད་པའི་རང་གདངས་རྗེ་འགྲོ་མགོན་རིན་པོ་ཆེ་སྤྲུལ་པའི་སྐུ་མཆོག་ཀུན་མཁྱེན་རྒྱལ་དབང་བཀའ་བརྒྱུད་ཕྲིན་ལས་ཤིང་རྟའི་ཞལ་སྔ་ནས་གོང་གི་བཀའ་སྩལ་དགྱེས་པ་བསྒྲུབ་པའི་སླད་དུ་རང་གི་ཉམས་ལེན་སྙིང་པོ་དང་མཐུན་པར་རབ་བྱུང་བཅུ་གཉིས་པའི་བགྲང་བྱ་རྔ་ཆེན་གྱི་ལོ་ས་ག་ཟླ་བའི་དམར་ཕྱོགས་ཀྱི་ཚེས་བཅུ་མཁའ་འགྲོ་འདུ་བའི་དུས་བཟང་པོར་ཀོང་ཡུལ་ཟང་ཁ་ལྕུགས་རི་འོད་གསལ་ལྡིང་དུ་རྣལ་འབྱོར་པ་ཚེ་དབང་ནོར་བུ་རྡོ་རྗེ་དཔལ་འབར་གྱིས་སྦྱར་བ་སརྦ་མངྒ་ལཾ།། །།