འཇམ་དཔལ་གཞོན་ནུར་གྱུར་པའི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་དབྱེར་མེད་པའི་ཡེ་ཤེས་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཆར།
འཇམ་དཔལ་གཞོན་ནུར་གྱུར་པའི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་དབྱེར་མེད་པའི་ཡེ་ཤེས་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཆར་ཞེས་བྱ་བ་བཞུགས་སོ།། །
ན་མོ་ཨཱརྱ་མཉྫུ་ཤྲཱི་ཡེ། །རྒྱལ་བ་ཀུན་གྱི་ཐུགས་ལ་རྟག་བཞུགས་ཤིང་། །གཉིས་སུ་མེད་པའི་ཡེ་ཤེས་གང་ཡིན་པ། །དེ་ནི་འཇམ་དཔལ་ཡེ་ཤེས་སེམས་དཔའ་སྟེ། །བདག་གི་སྙིང་ལ་ཡེ་ཤེས་དབབ་ཏུ་གསོལ། །རྒྱལ་བ་ཀུན་གྱི་གསུང་གི་དབང་ཕྱུག་སྟེ། །བརྗོད་མེད་བརྗོད་པ་གཞོམ་དུ་མེད་པའི་རྒྱུ། །ཆོས་འཁོར་མ་ལུས་སྨྲ་བའི་ཚིག་གི་བདག །བདུད་རྩིའི་ཟེགས་མ་བདག་ལ་སྩལ་དུ་གསོལ། །རྒྱལ་ཀུན་ཡེ་ཤེས་སྐུ་སྟེ་འཇམ་པའི་དཔལ། །སྒྲིབ་པ་ཀུན་སྤངས་རང་བྱུང་གཞོན་ནུའི་ལུས། །མཚན་དཔེ་ཉི་མ་ཟླ་བ་སྣང་བའི་འོད། །བདག་ལ་ཞལ་གྱི་ཆ་ཤས་བསྟན་ཏུ་གསོལ། །མཁའ་ཁྱབ་འགོག་པའི་བདེན་པ་རྡུལ་སྤངས་པ། །རྣམ་གྲོལ་ལུས་ཀྱིས་གདོད་ནས་
མངོན་མཛད་ཀྱང་། །སྒྱུ་འཕྲུལ་དྲྭ་བ་ཁྱབ་ཅིང་རྟག་པ་ཡི། །ཁྱབ་བདག་ཆེན་པོས་བདག་གི་བླ་མ་མཛོད། །རྒྱལ་སྲས་ཡེ་ཤེས་ཡངས་པའི་གོ་འབྱེད་ཅིང་། །མཚན་མ་མེད་པ་ཅི་ཡང་མི་རྟོག་པའི། །རྣམ་ཐར་ཆོས་ཀྱི་དབྱིངས་དང་སྙོམས་པར་ཞུགས། །ནམ་མཁའ་འདྲ་བས་བདག་ལ་གོ་སྐབས་ཕྱེས། །བཏང་སྙོམས་ཆེན་པོས་འཁོར་འདས་ཁུར་ཁྱེར་ཞིང་། །བསྡུ་བ་རབ་ཡངས་འགྲོ་ཀུན་ཉེར་འཚོའི་གཞི། །ཡོན་ཏན་ལོ་ཏོག་དུ་མ་བསྐྱེད་མཛད་པའི། །ས་ཆེན་འདྲ་བས་བདག་ཀྱང་སྨིན་མཛད་གསོལ། །སྒྲིབ་པའི་སྤྲིན་དང་བྲལ་བའི་དཀྱིལ་འཁོར་ནི། ཁ་དོག་སྣ་ཚོགས་སྣང་བར་འབར་བ་ཡིས། །ཉོན་མོངས་རྒྱ་མཚོ་ཡུད་ཙམ་ཉིད་ལ་སྐེམས། །ཉི་མ་འདྲ་བས་སྡིག་པའི་མུན་པ་
སོལ། །ཤེས་རབ་དཀྱིལ་འཁོར་སྙིང་རྗེའི་བསིལ་ཟེར་ཅན། །ཆོས་ཉིད་མཁའ་ལ་ཆགས་པ་མེད་པར་ཤར། །བློ་ཆེན་སྐར་མའི་དབུས་ན་ཉ་རྒྱས་ཀྱི། །ཟླ་བ་འདྲ་བས་བདག་ལ་སྣང་བ་སྩོལ། །ཚོགས་གཉིས་དཔག་ཡས་རིན་ཆེན་མཛོད་མངའ་ཞིང་། །སྲིད་དང་ཞི་བའི་གླིང་ལ་རང་དབང་སྒྱུར། །མཉམ་མེད་རྣམ་ཐར་གསེར་གྱི་འཁོར་ལོས་འདྲེན། །ཆོས་ཀྱི་རྒྱལ་པོས་བདག་ལ་བཀའ་ལུང་སྩོལ། །བདེ་བའི་སྤྱད་པ་སྤྱོད་འདོད་དོན་མཐུན་གྱི། །རྒྱལ་སྲས་གཞོན་ནུ་སྲིད་ལམ་དུབ་པ་ལ། །ཤེས་རབ་གཏེར་ཁ་ཟད་པ་མེད་པར་སྦྱིན། །བུམ་བཟང་འདྲ་བས་བདག་གི་དབུལ་སེལ་མཛོད། །སྙིང་རྗེའི་རྩ་བ་འགྲོ་ཁམས་ས་གཞིར་ཟུག །སྨོན་ལམ་རྒྱ་མཚོའི་ལོ་མ་འབྲས་བུས་དུད། །འབད་མེད་ལྷུན་གྱིས་གྲུབ་པའི་འདོད་པ་འཇོ། །ལྗོན་ཤིང་འདྲ་བས་བདག་གི་གྲིབ་བསིལ་མཛོད། །དབང་བཅུའི་ཕ་མཐར་སོན་པའི་ཟིལ་དངར་དང་། །སྟོབས་བཅུའི་ནུས་པས་འཆི་བདག་ཚར་གཅོད་པ། །སར་གནས་ཉེ་དབང་ཚོགས་ཀྱིས་སྤྱད་བྱ་སྟེ། །བདུད་རྩི་འདྲ་བས་བདག་གི་འཆི་བ་སོལ། །མི་ཤེས་པ་དང་ལེ་ལོའི་གཉིད་སློང་ཞིང་། །བདེན་བཞིའི་སྒྲ་ཡིས་ལོག་ཞུགས་རྣལ་མར་འགོད། །གདུལ་དཀའ་ཚར་གཅོད་མི་སྲུན་བཏང་སྙོམས་མཛད། །རྔ་ཆེན་འདྲ་བས་བདག་གི་བག་
མེད་སོལ། །བྱང་སེམས་བྱེ་བ་སྙེད་ལ་གཏམ་སྟོན་ཞིང་། །ལྷ་སོགས་མངོན་པར་དགའ་བའི་གྲགས་པ་ཅན། །འཇིག་རྟེན་གསུམ་ན་མཚན་གྱི་སྒྲ་གཅིག་པ། །འབྲུག་སྒྲ་འདྲ་བས་བདག་ལ་ཆོས་ཆར་སྩོལ། །གཟུང་འཛིན་རབ་ཏུ་བརྟན་པའི་ཁང་པ་ན། །སྡིག་ལྟའི་མུན་པས་ཉམས་པའི་བྱིས་པ་ལ། །ལྷག་པར་ཡེ་ཤེས་སྣང་བ་ལམ་མེ་བ། །འགྲོ་བའི་མར་མེ་གྱུར་པས་དྲང་དུ་གསོལ། །ཕུང་སོགས་དངོས་པོའི་ཚང་ཆིང་ཀུན་ཟ་བ། །མཁྱེན་རབ་དྲི་མེད་འབར་བའི་འོད་ཟེར་ཅན། །ཆགས་ཐོགས་མེད་པའི་ཡེ་ཤེས་མེ་ལྕེ་ཡིས། །བདག་གི་ལས་ཉོན་སྒྲིབ་པ་བསྲེག་ཏུ་གསོལ། །ཡང་དག་ལྟ་བས་འགྲོ་ལ་གཟིགས་གཟིགས་ནས། །ལས་ཀྱི་འཁྲུལ་འཁོར་སྒྱུ་མ་ལྟ་བུར་མཁྱེན། །རབ་རིབ་སྤངས་པས་ལྟ་བའི་སྐྱོན་མེད་པ། །ཡེ་ཤེས་མིག་གཅིག་བདག་ལ་གཟིགས་སུ་གསོལ། །ཏིང་འཛིན་བུད་མེད་ཁྲག་ཁྲིག་བརྒྱས་བསྐོར་ཡང་། །མི་གནས་ཚངས་པར་སྤྱོད་ལས་མ་ཉམས་པར། །བཅིང་གྲོལ་མེད་པའི་ཁྲིམས་ཀྱི་ལུང་འབོག་པ། །གཙང་གནས་དམ་པས་བདག་ལ་ཚངས་པ་སྩོལ། །འཁོར་བ་རྒྱུ་དང་བཅས་པ་ཐུགས་ཆུད་པས། །གང་གང་ཉེས་པའི་གསོག་ལྡང་དེ་དང་དེ། །གང་འདུལ་སྦྱོར་བ་བརྒྱ་པས་རྩད་ནས་ཕྱུང་། །སྨན་པ་ཆེན་པོས་བདག་གི་ཟུག་རྔུ་ཆོམས།
སྤྲོས་པ་ཀུན་བྲལ་དེ་བཞིན་ཉིད་ཀྱི་མཚོར། །ཐབས་མཁས་ཐུགས་རྗེའི་གྲུ་ལ་རྟ་གཞོན་ཏེ། །འཁོར་བ་ཇི་སྲིད་འགྲོ་ཀུན་སྒྲོལ་ལ་ཞུགས། །དེད་དཔོན་ཆེན་པོས་བདག་ཀྱང་བསྒྲལ་དུ་གསོལ། །བྱམས་དང་བཟོད་པ་སྲ་བའི་གོ་མནབ་སྟེ། །ཤེས་བཅུའི་མཚོན་ཆས་བདུད་དང་གཤིན་རྗེ་སོགས། །མི་བཟད་གཡུལ་ངོ་ཟློག་མཛད་འཇིགས་ཆེན་དགྲ། །དཔའ་བོ་ཆེན་པོས་བདག་གི་འཇིགས་པ་སོལ། །དུས་སུ་བཏང་སྙོམས་སྐད་ཅིག་མི་མངའ་ཞིང་། །དུས་མིན་རྩོལ་བཅས་ཕྲིན་ལས་མི་མཛད་པར། །མཁྱེན་པའི་ཡེ་ཤེས་དུས་ལ་རྟག་ཏུ་དགོངས། །དུས་ཤེས་ཆེན་པོས་བདག་གི་དུས་མཁྱེན་མཛོད། །ལམ་གྱི་རྒྱུད་ལས་ཡང་དག་འདས་གྱུར་ཀྱང་། །ལམ་དང་ལམ་མ་ཡིན་ལ་ཤིན་ཏུ་མཁས། །དབང་ལམ་ཐ་དད་སྟོན་ལ་མི་བསྙེངས་པ། །བདག་ལའང་བྱང་ཆུབ་ཆེན་པོའི་ཤུལ་བསྟན་གསོལ། །འཁྲུལ་དང་གྲོལ་བ་འགའ་ཡང་མ་གཟིགས་ཀྱང་། །སྡུག་བསྔལ་འཁོར་ལོ་རྡོ་རྗེ་རྣོན་པོས་གཅོད། །འགྲོ་བ་རྒྱུད་ལྔ་དབེན་ལ་རབ་བཞག་པ། །བརྟན་པའི་འཁོར་ལོས་བདག་གི་འཁྲུལ་པ་སོལ། །ཀུན་ཏུ་དཔའ་བར་འགྲོ་བའི་ཏིང་འཛིན་དང་། །རྫུ་འཕྲུལ་རྣམ་པར་རྩེ་བའི་ཆོ་འཕྲུལ་གྱིས། །ཐེག་ཆེན་ཆོས་ཀྱི་རྒྱལ་མཚན་ཀུན་ཏུ་བཙུགས། །ཐེག་པ་དམ་པའི་བཞོན་
པར་བདག་བསྐྱོན་གསོལ། །རྒྱལ་བ་ཀུན་གྱི་ཆོས་སྒོ་མཐའ་ཡས་པ། །སྟོང་པ་ཉིད་ལས་བརྩམས་ཏེ་སྨྲ་མཁས་པས། །སྨྲ་བའི་ཁྱུ་མཆོག་ཚིག་གིས་མི་འཕྲོག་པ། །བདག་ལ་ཟབ་མོ་རྟོགས་པའི་བློ་གྲོས་སྩོལ། །འདུ་བྱེད་མཁའ་ལྟར་མཉམ་པ་ཉིད་བརྙེས་པས། །ཆོས་རྣམས་ཀུན་ལ་དེ་བློ་མཉམ་པར་བཞག །དངོས་དང་དངོས་མེད་ཀུན་ལས་རྣམ་གྲོལ་བས། །བདག་ཀྱང་མཚན་མ་མེད་ལ་གཞུག་ཏུ་གསོལ། །བདག་མེད་རྟོགས་པ་སེང་གེའི་སྒྲས་བསྒྲགས་ནས། །མཚན་མ་བརྒྱ་ཕྲག་རྣམ་པ་ཀུན་ཏུ་བཤེགས། །སྒྱུ་མའི་ཆོས་ཏེ་སྒྱུ་མ་ལས་ཀྱང་གྲོལ། །བདག་སོགས་སྤྲོས་པའི་འཆིངས་ལས་དགྲོལ་བར་མཛོད། །རྐང་གཉིས་མཆོག་མ་སྔར་གཤེགས་ཐམས་ཅད་ཀྱིས། །ཁྱོད་ཀྱི་མཐུ་ནི་རྟག་ཏུ་བསྟན་པར་མཛད། །འབྱུང་དང་འབྱུང་འགྱུར་ཀུན་ཀྱང་དེ་བཞིན་ཏེ། །མཐུ་སྟོབས་ཆེན་པོས་ངན་འགྲོ་ལས་བསྐྱབ་གསོལ། །ཐུབ་པ་འདས་ནས་དམ་ཆོས་བསྲུང་བ་དང་། །འགྲོ་ལ་དབུགས་འབྱིན་ཆེན་པོ་སྩལ་འདོད་པས། །རྫུ་འཕྲུལ་རྐང་པས་དུས་ཀུན་རྒྱུ་ལགས་ན། །བདག་ཀྱང་འཁོར་བའི་མཚོ་ལས་དབུགས་དབྱུང་སྩོལ། །གང་དུ་འཇིག་རྟེན་འདྲེན་པས་དབེན་པ་ན། །བྱིས་པའི་གཟུགས་ཀྱིས་སངས་རྒྱས་མཛད་པ་མཛད། །དུས་
དང་དུས་སུ་རྒྱལ་བསྟན་ཁུར་བསྣམས་པས། །སྐལ་དམན་བདག་གི་འདྲེན་པ་མཛད་དུ་གསོལ། །དུས་མཐར་སེམས་ཅན་ཀུན་ལ་མཆོག་སྦྱིན་ཞིང་། །སྔགས་ཀྱི་གཟུགས་ཀྱིས་སྐྱེ་བོ་སྐྱབས་མེད་པ། །སྐྱོབ་པའི་གོ་ཆ་རྒྱལ་རྣམས་མདུན་བཞེས་པས། །སྒྲུབ་པོ་བདག་ལ་མཆོག་གི་གྲུབ་པ་སྩོལ། །སྟོབས་བཅུ་མངའ་བས་མགྲིན་གཅིག་གསོལ་བའི་མཚན། །འཇམ་དཔལ་ཞེས་བྱ་ཐོས་དང་དྲན་པ་ཡང་། །བསོད་ནམས་ཕུང་པོ་བསམ་གྱིས་མི་ཁྱབ་གསུངས། །བདག་ཀྱང་མཚན་གྱི་ཡི་གེས་བྱིན་བརླབ་མཛོད། །ཟབ་མོའི་ཤེས་རབ་བསམ་མི་ཁྱབ་བསགས་པས། །འཇིག་རྟེན་ཆོས་ལ་རྡུལ་ཙམ་མི་བསྟེན་པར། །ཆོས་ཀྱི་རྒྱལ་ཐབས་དབང་སྒྱུར་ཆེན་པོ་པ། །བདག་ཀྱང་ཆོས་ཀྱི་རྒྱལ་པོར་དབང་བསྐུར་གསོལ། །དབྱིབས་དང་ཁ་དོག་ཆ་ལུགས་མི་མངའ་ཡང་། །དྲི་མེད་དཔལ་འབར་གཟི་བརྗིད་ཕྲེང་བ་ཅན། །ཆུ་ཟླ་བཞིན་དུ་བཟུང་བ་མ་མཆིས་པས། །བདག་ལའང་བསོད་ནམས་ཆེན་པོའི་གཟི་བརྗིད་སྩོལ། །འདས་པའི་དུས་སུ་རྒྱལ་བ་འཇམ་པའི་ཏོག །མ་འོངས་དུས་ན་མགོན་པོ་ཀུན་ཏུ་གཟིགས། །ད་ལྟ་མོས་པ་རབ་དགའི་སྙིང་པོ་སོགས། །རྒྱལ་བ་རྒྱ་མཚོས་མ་རིག་སྦུབས་བརྟོལ་ཞིང་། །སངས་རྒྱས་སྤྱན་
གྱིས་གཟིགས་པའི་རྡུལ་སྙེད་ཀྱི། །ཞིང་ཁམས་ཀུན་ཏུ་རྣམ་འཕྲུལ་ཚད་མེད་པས། །ངོ་མཚར་ཆེན་པོའི་སྤྱོད་ལ་རབ་ཞུགས་པ། །རྒྱལ་སྲས་རྒྱ་མཚོས་སྲིད་མཐའ་དབྱིངས་སུ་བརྟུལ། །མགོན་པོ་ཁྱོད་ནི་རྒྱལ་བ་ཀུན་གྱི་ཡབ། །ཡོན་ཏན་ཆོས་ཀྱི་དབྱིངས་དང་མཉམ་པས་བརྒྱན། །སྒྲུབ་པ་གཉིས་པོ་དག་གི་མཐར་གཤེགས་ཀྱང་། །ད་དུང་སེམས་ཅན་ཁོ་ནའི་དོན་ལ་དགྱེས། །རྒྱལ་བ་བྱེ་བས་གསུངས་ཀྱང་སྐྲ་རྩེ་ཡི། །ཟེག་མ་ཙམ་གྱུར་རྣམ་ཐར་རྒྱ་མཚོ་ལ། །བདག་ལྟས་བསྔགས་པའི་ཅལ་ཅོལ་འབུམ་སྒྲོགས་ཀྱང་། །ཕྱོགས་སུ་མི་ཉེ་ཆར་ཡང་མི་ཕྱིན་མོད། །ཉི་ཟླའི་སྣང་བས་གཞན་གྱི་མིག་ཕྱེ་ལ། །སྲིན་བུས་རང་གི་ཤུལ་ལམ་མཚོན་པ་ལྟར། །རང་ཉིད་ཁོ་ན་དད་པའི་ཤུལ་མཚོན་པའི། །ཚིག་གི་སྒྲོན་མེ་འཇམ་མགོན་ཐུགས་རྗེས་བཞེས། །འོད་ཀྱི་ཏོག་དང་ཡེ་ཤེས་བླ་མ་མཆོག །ཞི་བའི་དབང་པོ་སྨོན་ལམ་བློ་གྲོས་སོགས། །བློ་ཆེན་ཁྱོད་དང་མཚུངས་པར་སྤྱོད་པ་ལྟར། །བདག་ཀྱང་འཇམ་དཔལ་དཔའ་བོའི་རྗེས་སུ་སློབ། །མོས་པའི་དགེ་བས་སྙིང་གི་མུན་བཅོམ་ནས། །ད་ལྟ་ཉིད་དུ་འཇམ་དཔལ་གཞོན་ནུའི་སྐུ། །རྫུ་འཕྲུལ་ཆེ་ཞིང་ཁ་དོག་བཟང་པོ་ཅན། །མངོན་སུམ་དབང་པོའི་ཡུལ་དུ་གྱུར་པར་མཛོད། །སྲིད་པ་
ཤུལ་རིང་མགྲོན་པོའི་དབུགས་འབྱིན་ཅིང་། །བསོད་ནམས་བརྒྱ་པའི་རྩིབས་ཀྱི་རི་མོ་ཅན། །ཕྱག་མཐིལ་བདག་གི་མགོ་ལ་ཉུག་མཛད་ནས། །བྱང་ཆུབ་བར་དུ་བླ་མ་མཛད་དུ་གསོལ། །ཞེས་པ་འདི་ནི། རྗེ་བཙུན་མཁྱེན་པའི་གཏེར་ཆེན་གྱི་ཕོ་བྲང་དང་ཁད་ཉེ་ཞིང་མི་རྣམས་ཀྱང་རང་བཞིན་གྱིས་གཙུག་ལག་གི་བློ་གྲོས་གསལ་བ་ཤར་ཕྱོགས་རྣམ་དག་བཀོད་པའི་ལྗོངས་སུ་འདུ་གསུམ་པ་བློ་གྲོས་མཐའ་ཡས་ཀྱིས་དད་པས་བྲིས་པ་སྐྱེ་བ་ཀུན་ཏུ་འཇམ་དཔལ་དཔའ་བོས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ།། ༈ །།རྗེ་བཙུན་སྤྱན་རས་གཟིགས་དབང་ཕྱུག་གི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་བསོད་ནམས་དང་ཡེ་ཤེས་ཀྱི་ཚོགས་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཆར་ཞེས་བྱ་བ་བཞུགས་སོ། །ན་མོ་མ་ཧཱ་ཀཱ་རུ་ི་ཀཱ་ཡ། བསོད་ནམས་ཡེ་ཤེས་གྲངས་མེད་གསེར་གྱི་རྡུལ། །རྒྱལ་ཀུན་མཁྱེན་དང་བརྩེབས་བསྡུས་པ་ལས། །ཞིང་ཁམས་རྒྱ་མཚོའི་མཆོད་སྡོང་གཅིག་པུ་པ། །མགོན་པོ་སྤྱན་རས་གཟིགས་ལ་ཕསཆཉཙསནས་འདུད། །ཆུ་ཀླུང་བྱེ་མ་སྙེད་ཀྱི་བཅོམ་ལྡན་འདས། །ལྷ་ཡི་བསྐལ་བར་རིམ་གྲོས་བསྙེན་བཀུར་བའི། །བསོད་ནམས་ཕུང་པོ་གཞལ་དུ་མེད་པ་ཡང་། །ཁྱོད་ཀྱི་སྤུ་རྩེ་ཉག་གཅིག་ལ་གནས་ཏེ། །དེ་ལྟའི་བསོད་ནམས་ཡོན་ཏན་
སྤོབས་པ་ནི། །དེ་བཞིན་གཤེགས་པ་ལ་ཡང་མ་མཆིས་ན། །བྱང་སེམས་གཞན་ལྟ་སྨོས་ཀྱང་ཅི་དགོས་ཞེས། །དུས་གསུམ་གཤེགས་པས་ཡང་ཡང་བསྔགས་ལ་འདུད། །འཇིག་རྟེན་འདི་ན་ཕུན་ཚོགས་གང་ཡིན་པ། །དེ་ཀུན་རྫོགས་པའི་སངས་རྒྱས་སྐྱེས་བུའི་མཐུ། །ཐུབ་པ་ཉི་མ་བརྒྱ་ཕྲག་བཅུ་སྙེད་ཀྱང་། །ཐུགས་རྗེའི་ཕྱག་གི་འོད་ཟེར་ཆ་གཅིག་གོ །གངྒཱའི་ཀླུང་བརྒྱ་རྒྱལ་བའི་མཚན་བརྗོད་ཅིང་། །ལ་ལས་སྤྱན་རས་གཟིགས་ཀྱི་མཚན་དྲན་པ། །ཡོན་ཏན་མཚུངས་པ་ལས་ཀྱང་ལྷག་པར་དེ། །བྱང་ཆུབ་ལག་པའི་མཐིལ་དུ་བསྩལ་ལ་འདུད། །ནམ་མཁའ་བཞིན་ཏུ་བཟུང་བ་མ་མཆིས་པ། །སྐུ་ཡི་རང་བཞིན་རྒྱལ་བས་མ་གཟིགས་ཤིང་། །བ་སྤུའི་ཁུང་བུ་གཅིག་གི་ཕ་མཐའ་ཡང་། །ཀུན་ཏུ་བཟང་པོས་འབད་པས་རྟོགས་མ་གྱུར། ཀ་ན་ཀ་དང་ཀྲྀཥྞ་ཉི་མའི་འོད། །དབང་པོའི་རྒྱན་སོགས་བ་སྤུའི་ཁུང་རེར་ཡང་། །རྒྱལ་སྲས་རྒྱ་མཚོའི་རྣམ་ཐར་བཀོད་གྱུར་པ། །ངོ་མཚར་ཆེན་པོའི་ཕ་རོལ་ཕྱིན་ལ་འདུད། །ཕྲ་རབ་རྡུལ་དང་མཉམ་པའི་ཏིང་འཛིན་སྒོ། །བ་སྤུ་རེ་རེ་ལ་ཡང་བརྒྱ་ཕྱེ་བས། །འཇུག་ལྡང་འགྲན་ཟླར་ཆས་པའི་ཀུན་ཏུ་བཟང་། །སྤོབས་པའི་ཆུ་རྒྱུན་བརྟུལ་བའི་ཚུལ་ཡང་
བསྟན། །རྒྱལ་བ་ཞིང་རྡུལ་གྲངས་ཀྱིས་བསྐལ་པའི་བར། །བསྔགས་པ་བརྗོད་ཀྱང་དེ་ཡི་ཡོན་ཏན་མཁའ། །སོར་མོས་གཞལ་ལྟར་ཟད་པར་མི་ནུས་གསུངས། །མི་སྲིད་སྲིད་པའི་ཆོས་ཅན་དེ་ལ་འདུད། །སེམས་ཅན་གང་དག་སྨིན་པར་གྱུར་པ་ལ། །སངས་རྒྱས་འབྱུང་བ་ཕྱོགས་བཅུར་བསྟན་མཛད་ཅིང་། །ཉན་རང་འཁོར་ལོས་སྒྱུར་དང་མིག་སྟོང་པ། །ལྷ་ཀླུ་གནོད་སྦྱིན་ཕ་དང་མ་ཡང་སྤྲུལ། །འདི་ལྟར་མཐུ་དང་གཟི་བརྗིད་ཆེ་བ་ཡི། །ཉི་ཟླ་གཉིས་པོ་སྤྱན་གྱི་མདངས་ལས་ཏེ། །ཚངས་དང་དབང་ཕྱུག་ཆུ་ལྷ་སྲེད་མེད་བུ། །དབྱངས་ཅན་མ་སོགས་སྐུ་ཡི་ཆ་ལས་ཕྱུང་། །མདོར་ན་ཤེས་བྱའི་གཤིས་ལ་སྲིད་ཚད་ཀྱིས། །གང་ལ་གང་འདུལ་ཕན་པ་རྟག་སྒྲུབ་པས། །སྲིད་གསུམ་ཆུ་བོ་བཞི་ལས་སྒྲོལ་བ་ཡི། །དགེ་བའི་ཟམ་པ་གཅིག་པུར་གྱུར་ལ་འདུད། །འགྲོ་བའི་དོན་ལ་རྒྱུན་ཏུ་ཐུགས་བྲེལ་ཅིང་། །ཞིང་མང་ཀུན་ཏུ་གཤེགས་ནས་རྒྱལ་བ་མཆོད། །རྒྱལ་སྲས་སྤྱོད་པ་ཕྱོགས་བཅུར་སྒྲུབ་བཞིན་ཏུ། །རྡུལ་བྲལ་འཇིག་རྟེན་བདེ་བའི་འབྱུང་གནས་སུ། །འདྲེན་པ་ཚེ་དཔག་མེད་པའི་སྣམ་ལོགས་ན། །དྲི་མེད་པདྨའི་སྙིང་པོར་རྟག་བཞུགས་ཏེ། །བསིལ་གཡབས་ཐོགས་ནས་རིམ་གྲོ་བརྩོན་མཛད་པ། །ཁྱོད་ཀྱི་སྒྱུ་
མ་འདི་ནི་ཡོངས་མི་ཤེས། །དམིགས་མེད་སྙིང་རྗེ་ག་བུར་ཆུས་བཀྲུས་ཤིང་། །དམ་པ་བསྩལ་བའི་སྤྱན་རས་ཟླ་བའི་འཛུམ། །བྲི་གང་མེད་པར་སྡུག་བསྔལ་སྨག་རུམ་དུ། །ཐམས་ཅད་བུ་དང་མཉམ་པར་གཟིགས་ལ་འདུད། །འཁོར་བའི་སེམས་ཅན་གཅིག་ཀྱང་མ་ལུས་པ། །ཉིད་དང་གོ་འཕང་མཚུངས་པར་བཞག་པ་ཡི། །གཡར་དམ་མཚན་མ་འོད་ཁྱིམ་དམར་པོའི་ནང་། །བདེ་གཤེགས་དབང་ཕྱུག་བཞུགས་པའི་གཙུག་ཏོར་མངའ། །ཇི་ལྟར་སྟོན་ཀའི་ལང་ཚོ་ལ་བབ་པའི། །ཟླ་བ་སྤྲིན་གྱི་གོས་དང་བྲལ་བ་ལྟར། །འཇིག་རྟེན་དགའ་སྐྱེད་ཕྱག་ན་པདྨོའི་སྐུ། །ཚད་བཟུང་མེད་ཀྱང་གདུལ་བྱའི་སྣང་ཚུལ་དུ། །རི་དྭགས་ལྤགས་པ་རལ་པའི་ཐོར་ཚུགས་དང་། །བགྲང་ཕྲེང་རིལ་བ་ཚངས་པའི་སྐུད་པ་སོགས། །དྲང་སྲོང་གཟུགས་ཀྱིས་ཕྱོགས་བཅུ་ཀུན་ཏུ་རྒྱུ། །མཐོང་ཐོས་ཐར་པའི་ཁ་ལོ་སྒྱུར་ལ་འདུད། །སྙིང་པོ་བཅུ་གཉིས་ལྡན་པའི་ཞིང་བཟུང་ཡང་། །དམན་དང་ཕོངས་ལ་ལྷག་པར་ཐུགས་བརྩེ་བས། །སྙིགས་མའི་མཐའ་དང་ངན་སོང་འགྲོ་གཟིགས་ན། །པདྨའི་མཚོ་ལ་ངང་མོ་བཞིན་ཏུ་འཇུག །བདེ་གཤེགས་ཐུགས་རྗེའི་མཐུ་ཡིས་མ་ཐུལ་ཞིང་། །ཐུར་དུ་བལྟས་ཏེ་ངན་འགྲོར་རབ་གཞོལ་བ། །
མི་མཇེད་ཞིང་ལས་སྙིགས་མའི་མཐར་ཐུག་པ། །གངས་ཅན་འགྲོ་བ་ཕྱག་མཚན་བཞེས་ལ་འདུད། །རིན་ཆེན་ཚོགས་ལ་སྣང་བའི་མཐུ་ཡོད་ཀྱང་། །བསོད་ནམས་དམན་ལ་འབྱུང་བ་དཀོན་པས་ན། །སྣང་བའི་སྒྲོན་མས་གཏན་ཏུ་སྤངས་པ་ལ། །ཐུགས་རྗེ་ཆེན་པོའི་ཉི་མ་གཅིག་པུར་ཤར། །ཡི་དྭགས་འགྲོ་བ་མཐོ་རིས་རྟེན་ཏུ་བསྒྱུར། །དམ་པའི་ཆོས་དང་ཟང་ཟིང་གཏེར་ཁ་ཕྱེ། །མངོན་མཐོ་ངེས་པར་ལེགས་པའི་ལམ་སྲོལ་གཏོད། །བཀའ་དྲིན་བླ་ན་མེད་པ་དེ་ལ་འདུད། །ལྷ་མོ་སྒྲོལ་མ་ཧ་ཡ་གྲཱི་བ་དང་། །ཡེ་ཤེས་མགོན་པོ་གནོད་གནས་དབང་པོ་སོགས། །སྐུ་དང་ཕྱག་རྒྱ་རིག་པའི་ཁྱད་པར་ཡང་། །རེ་བ་མྱུར་དུ་སྐོང་བའི་བྱིན་རླབས་ཅན། །རྡོ་རྗེ་སློབ་དཔོན་དགེ་བའི་བཤེས་གཉེན་དང་། །ཆོས་སྐྱོང་རྒྱལ་བློན་ཁྱིམ་བདག་བྲམ་ཟེ་སོགས། །ཞིང་ཁམས་སྤྱི་དང་ཁྱད་པར་བོད་ཡུལ་དུ། །སྤྲུལ་པའི་སྤྲིན་གྱིས་རྟག་ཏུ་ཁྱབ་ལ་འདུད། །ཇི་ལྟར་བདེ་འབྱུང་ནོར་བའི་སྐྱེད་ཚལ་དུ། །འཁོར་ལོས་སྒྱུར་རྒྱལ་བག་ཡངས་རྩེ་བ་བཞིན། །མེ་ཞུན་པར་མཚམས་མེད་པར་འབར་བའི་ནང་། །མནར་མེད་སེམས་ཅན་གདོན་པར་བརྩམ་པ་ན། །མེ་ཏོག་ཆར་པ་ཤིང་རྟའི་འཕང་ལོ་ཙམ། །སྙིང་རྗེའི་བསིལ་དང་ལྷན་ཅིག་ཕབ་པ་
ཡིས། །སྡུག་བསྔལ་ཅན་རྣམས་གཏན་བདེའི་སར་བཞག་སྟེ། །དམྱལ་གནས་པདྨའི་རྫིང་བུར་བསྒྱུར་ལ་འདུད། །མགལ་དུམ་ལྟ་བུའི་འགྲོ་ལ་ཕན་བཏགས་ཕྱིར། །ཡི་དྭགས་གཤིན་རྗེའི་གྲོང་དུ་དེ་འཇུག་སྟེ། །རྡོ་རྗེའི་སེར་བ་བྱམས་པའི་རླུང་གིས་གཏོར། །ལྟོགས་པ་རྣམས་ལ་ལྷ་ཡི་ཟས་སུ་སྣང་། །དེ་ཚེ་སོར་མོའི་རྩེ་ལས་བདུད་རྩིའི་ཆུ། །མྱོང་བ་ཙམ་ནས་ལས་ཀྱི་སྒྲིབ་པ་དང་། །བཀྲེས་སྐོམ་ལྷན་ཅིག་སེལ་བའི་རྒྱུན་བསྩལ་ནས། །ལྷག་མེད་བདེ་ཆེན་ཞིང་དུ་ཁྲིད་ལ་འདུད། །གཤང་གཅི་ཟས་སུ་ཟ་བའི་སྲིན་བུའི་ཁྱུར། །སངས་རྒྱས་ཐོས་གྲོལ་ཆེན་པོའི་མཚན་གྱི་དབྱངས། །སྦྲང་འཐུང་མགྲིན་པའི་གླིང་བུས་བསྒྱུར་བ་ལས། །དེ་དག་ཀུན་ཀྱང་ཕྱིར་མི་ལྡོག་ལ་བཀོད། །ཚ་སྒོ་ཅན་ཏུ་ཁ་ཟས་མ་འཚལ་བས། །གཅིག་ཤ་གཅིག་གིས་ཟ་བར་གྱུར་རྣམས་ལ། །ཟས་གོས་ཆོས་ཀྱི་ཆར་པ་ཕབ་ནས་ཀྱང་། །སངས་རྒྱས་མཐོང་བའི་མྱུ་གུ་བསྐྱེད་ལ་འདུད། །གནོད་སྦྱིན་སྲིན་པོ་སྲོག་གི་འཚོ་བ་པ། །ཉི་ཟླས་མི་སྣང་མུན་པའི་མངལ་གནས་པར། །ནོར་བུ་དམ་པ་སྦྱིན་པའི་འོད་བཀྱེ་ནས། །བདེན་མཐོང་མིག་བུ་ཆོས་ཀྱི་གཏམ་གྱིས་ཕྱེ། །འདོད་པའི་ཚད་པས་གདུང་བའི་སྲིན་མོ་ལ། །འཕགས་པའི་ལམ་
དང་མཛེས་པའི་གཟུགས་བསྟན་ཏེ། །དེ་དག་སྙིང་ལ་ཞི་བའི་གཤེར་གྱིས་བརླན། །སྐྱེ་དགུར་སྲོག་གི་སྦྱིན་པ་བསྩལ་ལ་འདུད། །དོན་གཉེར་སླད་དུ་རྒྱ་མཚོར་ཞུགས་པ་ན། །འཇིགས་རུང་གཤིན་རྗེའི་བཞིན་རས་ལྟར་ཁྲོ་བ། །དུས་མིན་རླུང་གིས་ཕྱིན་ཅི་ལོག་ཏུ་བདས། །སྦྲུལ་་གདུག་ལྟ་བུའི་ཁ་རུ་ཆུད་པ་ཡང་། །ཅང་ཤེས་སྨན་གྱི་ལོ་མ་ཟ་བ་དེ། །གསེར་གྱི་བྱེ་མའི་ཐང་དུ་ལུས་སྤྲུགས་ནས། །ཛམ་གླིང་མི་རྣམས་རང་གི་ཁྱིམ་དུ་བསྐྱལ། །ཤི་བ་མངོན་སུམ་སློང་བར་མཛད་ལ་འདུད། །གསེར་གྱི་ས་ལ་སྤྱིའུ་ཚུགས་འདུག་རྣམས་དང་། །དངུལ་གྱི་ས་གཞིར་ཟུང་ལྡན་རྐང་པས་རྒྱུ། །རྡོ་རྗེའི་མངལ་གྱི་ཕུག་གནས་ལྷ་མིན་སོགས། །གཞན་གྱིས་མ་དུལ་བ་རྣམས་གདུལ་བྱ་མཛད། །ཕྲག་དོག་རླབས་ཀྱིས་རྣམ་པར་དཀྲུགས་པ་ཡི། །འཐབ་རྩོད་ཆུ་རྐ་བཏང་སྙོམས་ངོགས་སུ་སྒྱུར། །ལྷ་ཡང་བག་མེད་སྲུང་བའི་མེལ་ཚེ་བ། །འཇིག་རྟེན་མགོན་པོ་མཚན་དོན་མཐུན་ལ་འདུད། །མུན་པའི་ཁང་པར་ཆུད་ལ་སྒྲོན་མེ་སྟེ། །ཐན་པས་ཚིག་པ་རྣམས་ལ་སྤྲིན་གྱི་གདུགས། །སྐོམ་པས་གདུང་ལ་བསིལ་བའི་ཆུ་རྒྱུན་ཉིད། །ནད་ཀྱིས་བཏབ་ལ་སྨན་དང་སྨན་པར་གྱུར། །དམན་དང་ལྷག་པའི་ཡིད་ཀྱིས་མ་ཞི་དང་། །ལོག་པའི་
ལམ་གྱི་སྟོན་པར་གྲགས་རྣམས་ཀྱང་། །བདེ་བླག་ཉིད་དུ་ཐུགས་རྗེས་རྗེས་བཟུང་ནས། །བྱང་ཆུབ་མཆོག་ཏུ་ལུང་བསྟན་བསྩལ་ལ་འདུད། །གསོད་པའི་ཕྱིར་ནི་ཆེད་དུ་འོང་བ་ཡི། །རྡོ་རྗེའི་རི་བོའི་བར་དུ་འཐགས་ན་ཡང་། །ཁྱོད་མཚན་ཐེ་ཚོམ་མེད་པར་རྗེས་དྲན་ན། །བ་སྤུའི་རྩེ་ཡང་ཉམས་པར་མི་འགྱུར་གསུངས། །དེ་བཞིན་སྲིན་པོ་རོ་ལངས་བྱད་སྟེམས་དང་། །མེ་ཆུ་དུག་མཚོན་སྦྲུལ་གདུག་ཕ་རོལ་དཔུང་། །ཁྲི་མུན་ཆོམ་རྐུན་གནམ་ལྕགས་ལྟུང་སོགས་ལ། །དྲན་པ་ཁོ་ནས་ཟུག་རྔུ་་གཏིང་ནས་འབྱིན། །སྡུག་བསྔལ་ཁུ་སྒོར་ལས་ཀྱི་ཁོང་བསྒྲིལ་དང་། །ཉོན་མོངས་གདོས་ཀྱིས་བཅིངས་པའི་ལུས་ཅན་ལ། །འཇིགས་པ་གྲིབ་མ་བཞིན་ཏུ་འབྲང་ན་ཡང་། །མི་འཇིགས་སྦྱིན་པས་རྟག་ཏུ་བསྐྱབ་ལ་འདུད། །སཱ་ལའི་ས་བོན་ཤིན་ཏུ་ཕྲ་བ་ཡང་། །དྲོད་གཤེར་འཕྲད་པས་དགུང་ཞག་འགའ་འདས་ནས། །དཔག་ཚད་ཁྱབ་པའི་ལྗོན་ཤིང་རྒྱས་པ་ལྟར། །རྩེ་གཅིག་དད་པས་མཚན་ནས་བརྗོད་པ་དེ། །ངན་འགྲོ་ལོག་པར་ལྟུང་བའི་ལམ་ཆད་ཅིང་། །སངས་རྒྱས་ཞིང་དུ་གོམ་པ་བདེ་བླག་འགོད། །ཏིང་འཛིན་སྤོབས་པ་མུ་མཐའ་མེད་ལ་སྤྱོད། །ཇི་ལྟར་སྨོན་པ་ཚེ་འདིར་འགྲུབ་པ་སོགས། །ཁྱད་པར་གཞན་
ཡང་ཐོབ་པར་མ་གྱུར་ན། །བདག་ཉིད་བྱང་ཆུབ་སྙིང་པོར་མི་བཞུགས་ཞེས། །སྙིང་རྗེ་ཆེན་པོའི་གཟུངས་ཀྱི་མཐུ་བསྟན་ནས། །ཐོས་པས་ཚིམས་པའི་ཐུགས་བསྐྱེད་བཞེས་ལ་འདུད། །ལོ་ཏོག་འབྲས་བུ་སད་ཀྱིས་ཁྱེར་བ་ལ། །སོ་ནམ་འབད་རྩོལ་སུས་ཀྱང་མི་བྱེད་ལྟར། །སྡིག་པ་ཆེན་པོས་སེམས་ཀྱི་རྒྱུད་བསྲེགས་པས། །རྒྱལ་བ་སྲས་དང་བཅས་པས་རབ་སྤངས་པ། །འཕགས་ལ་སྐུར་འདེབས་ཆོས་ལ་དབང་ཟ་ཞིང་། །མཚམས་མེད་ལྔ་དང་དཀོན་མཆོག་དཀོར་ནོར་སྤྱོད། །ཤན་པ་ཕག་པ་ཉ་དང་རི་དྭགས་རྔོན། །ཚུལ་ཁྲིམས་འཆལ་དང་ལོག་པར་ཞུགས་རྣམས་ཀྱང་། །རྣ་བའི་དབང་པོར་མཚན་གྱི་ཟེར་ཕོག་སྟེ། །མགོན་པོ་ཁྱོད་ལ་དད་པའི་སེམས་རྙེད་ན། །ནོངས་པ་ལྕི་བའང་བ་མོ་ལྟར་ཞུ་ནས། །སྐྱོན་མེད་ཐར་པའི་ས་བོན་བསྐྲུན་ལ་འདུད། །ཆོས་ཀྱི་དབང་ཕྱུག་བརྙེས་པའི་རྒྱལ་རྣམས་དང་། །རྒྱལ་སྲས་དཔའ་བོ་ཤིན་ཏུ་གྲགས་ཆེན་པོ། །སྒྲིབ་པ་རྣམ་པར་སེལ་བ་ལ་སོགས་ཀྱང་། །ཁྱོད་ཀྱི་རིག་སྔགས་ཚོལ་བའི་ཚུལ་བསྟན་ཞིང་། །ཁྱོད་ཞལ་བལྟ་ལ་ཤིན་ཏུ་བརྐམ་ལགས་ན། །རིག་སྔགས་ནོར་བུ་སུག་པར་མཆིས་ན་ཡང་། །བོང་བ་བཞིན་ཏུ་བཏང་སྙོམས་བོར་ནས་སུ། །འབད་པས་ཆོས་མ་ཡིན་པ་
དོན་ཏུ་གཉེར། །ཁྱོད་ཞལ་མཐོང་བའི་ལས་ལས་ཕྱིར་ཕྱོགས་པ། །ལས་སྒྲིབ་ཁུར་པོས་ཧ་ཅང་ནོན་དྲག་པའི། །དེང་སང་སྐྱེ་བོ་བདུད་ཀྱིས་བསླུས་པ་རྣམས། །སླར་ཡང་ཁྱོད་ཀྱི་སྙིང་རྗེས་མ་གཟིགས་ན། །དྭ་ཕྲུག་ཕ་མས་བོར་ན་བཤེས་མེད་ལྟར། །སངས་རྒྱས་ཀུན་གྱི་གདུལ་བྱར་མ་གྱུར་ཏེ། །ངན་འགྲོའི་རྒྱ་མཚོར་མོད་ལ་བྱིངས་འགྱུར་བས། །མྱུར་དུ་ཐུགས་རྗེའི་ལྕགས་ཀྱུས་བཟུང་དུ་གསོལ། ཁ་ན་མ་ཐོ་བྱེ་བས་གཡོགས་ནས་སུ། །རང་རྒྱུད་ཆུ་ཤིང་བཞིན་ཏུ་རུལ་གྱུར་པ། །བདག་ནི་མགོན་པོ་ཁྱོད་ལས་སྐྱབས་མེད་པས། །ད་ལྟ་ཉིད་དུ་བྱམས་པའི་ཕྱག་རྐྱོངས་ལ། །ལས་ཀྱི་སྒྲིབ་པ་བྱིན་རླབས་འོད་ཀྱིས་སོལ། །དག་པའི་སེམས་ལ་ཡེ་ཤེས་གཟུགས་བརྙན་སྟོན། །ཆོས་ཀྱི་བདུད་རྩིས་ཐར་བའི་སྲོག་བརྟས་ནས། །དོན་གཉིས་ལྷུན་གྲུབ་མཆོག་གི་སྦྱིན་པ་སྩོལ། །ཕྱོགས་བཅུའི་རྒྱལ་ལས་ཐུགས་དམ་ནོད་པ་ལྟར། །ཁྱོད་མཚན་རྟག་ཏུ་ཡིད་ལ་བྱེད་པ་བདག །དྲི་མས་རེག་གམ་རླུང་རྫིས་ཕོག་རྣམས་ཀྱང་། །རང་གི་བཞུགས་གནས་བདེ་བ་ཅན་ཏུ་དྲོངས། །དེར་སྐྱེས་ནས་ནི་བྱང་ཆུབ་སྤྱོད་ལ་ཞུགས། །ལམ་གྱི་ཁྱད་པར་གོང་མ་རབ་ཐོབ་སྟེ། །འཇིག་རྟེན་དབང་ཕྱུག་རྣམ་ཐར་ཅི་འདྲ་བ། །
དེ་འདྲ་ཁོ་ནས་འགྲོ་བ་འདྲེན་པར་ཤོག །རེ་ཞིག་ཤར་རོང་གི་ལྗོངས་རྒྱ་བ་ན་མེ་ཏོག་དཀར་དམར་གྱི་ལྡིང་ཁང་མངོན་པར་བཀྲ་ཞིང་། རི་བོ་ཏ་ལའི་ཕོ་བྲང་དུ་ཁ་ཕྱོགས་པའི་དབེན་རིའི་མགུལ་དུ་ཡོན་ཏན་རྒྱ་མཚོས་དད་པའི་སེམས་ཀྱིས་སྦྱར་བ་སྐྱེ་བ་ཀུན་ཏུ་འཇིག་རྟེན་མགོན་པོས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ།། ༈ །།དཔལ་རྡོ་རྗེ་འཛིན་པའི་རྣམ་ཐར་ཕྱོགས་གཅིག་གི་ཆ་ཤས་བཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་གཟུངས་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཆར་ཞེས་བྱ་བ་བཞུགས་སོ། །ན་མོ་བཛྲ་པཱ་་ཡེ། །གསང་བའི་བདག་པོ་ཕྱོགས་བཅུའི་ཞིང་རྣམས་སུ། །རྒྱལ་བ་རྣམས་ཀྱི་གསང་བའི་མཛོད་གཏེར་ཞིང་། །ངེས་དོན་ཐོས་པ་འཛིན་པའི་སྙན་ཏུ་གྱུར། །ནམ་མཁའ་གཉིས་པ་གཟོད་ནས་མ་སྐྱེས་ལྟར། །ཟབ་མོའི་ཆོས་ཉིད་དབྱེ་བ་མེད་པ་ལ། །སངས་རྒྱས་ཀུན་དང་མཉམ་པ་ཉིད་ཐོབ་པས། །སྐུ་གསུང་ཐུགས་ཀྱི་གསང་བར་ཤིན་ཏུ་ཞུགས། །རྡོ་རྗེའི་རྣམ་པར་ཐར་པ་ལ་གནས་ནས། །ཆོ་འཕྲུལ་ཆེན་པོ་འཁོར་བའི་མཐར་ཐུག་སྟོན། །ཆོས་དབྱིངས་ཁྱབ་པར་རྣམ་པར་རོལ་པའི་སྐུ། །ཁྱུ་མཆོག་མཐུ་སྟོབས་བསམ་མི་ཁྱབ་པར་ཕྱུང་། །འཇིག་རྟེན་གསུམ་གྱི་ས་ལས་རྣམ་པར་རྒྱལ། །སེམས་ཀྱི་སྐད་ཅིག་ཐང་གཅིག་ཡུད་
ཙམ་དུ། །འགྲོ་ཀུན་བསམ་དང་སྤྱོད་པའི་རྗེས་འགྲོ་བ། །སྣ་ཚོགས་ཆོས་སྒོ་རྫོགས་པ་བསྟན་པར་སྤོབས། །ཆོས་ཀྱི་དྲིལ་བུ་གསང་བའི་སྒྲ་སྙན་འཁྲོལ། །ཐབས་ལ་མཁས་པའི་མངོན་པར་ཤེས་པ་དང་། །བསྡུ་བའི་དངོས་པོ་དག་གི་ཕ་རོལ་ཕྱིན། །དྲག་ཤུལ་སེང་གེ་གང་ལའང་བསྙེངས་པ་མེད། །ཀུན་མཁྱེན་ཉག་གཅིག་རྒྱ་མཚོར་འབབ་པ་ཡི། །ཡི་གེའི་ཆར་པ་བདེན་པའི་སྤྲིན་ལས་ཕབ། །རྒྱལ་སྲས་དབང་བསྐུར་བརྙེས་རྣམས་རྣམ་དཔྱོད་ཀྱང་། །དེ་བཞིན་གཤེགས་པའི་གསང་བ་ལ་ཞུགས་ན། །གཞོན་ནུ་ཉི་ཞུར་དག་གིས་ཚིམས་པ་བཞིན། །ཕྱོགས་རེའི་གནས་ལ་ངོ་མཚར་མིག་ཐོབ་ཀྱང་། །ཁྱོད་ཀྱི་ཕུལ་དུ་བྱུང་བའི་ཤེས་རབ་ཀྱིས། །འཇིག་རྟེན་འཇིག་རྟེན་འདས་པ་སུ་དང་ཡང་། །ཐུན་མོངས་མིན་པ་ཟབ་མོའི་གཏིང་སླེབ་ནས། །གསང་བ་བདེ་བླག་རྟོགས་ཤིང་བསྟན་ནུས་པས། །ཀུན་བདག་ཀུན་ཏུ་བཟང་པོའི་གྲགས་པ་གསལ། །དུས་གསུམ་འདྲེས་པའི་མཐའ་ལ་རབ་བཞུགས་ཏེ། །རྒྱལ་བ་ཀུན་ལ་རྒྱུན་མཐའི་དབང་བསྩལ་ཞིང་། །བསམ་ཡས་གཟུགས་མངའ་སེམས་ཅན་དོན་མཛད་ཕྱིར། །རྣམ་པར་སྣང་མཛད་དབྱིངས་ལ་བཞུགས་པ་པོ། །དེ་དག་མདུན་ཏུ་གུས་པས་གཤེགས་ནས་ཀྱང་། །
ཆོས་ཀུན་བདག་པོར་གྱུར་པའི་དབང་ཡང་ནོད། །གདོད་ནས་ཞི་ཞིང་རྟག་ཏུ་མ་སྐྱེས་ཀྱང་། །གཟུགས་བརྙན་ཚུལ་གྱིས་འཇིག་རྟེན་ཀུན་ཏུ་སྣང་། །སྲིད་པའི་ཉེ་བར་ལེན་པ་མི་མངའ་ཡང་། །སྲིད་པ་ཇི་སྲིད་སྲིད་པའི་རྒྱ་མཚོར་འཇུག །ཕུང་པོའི་མཚན་མ་ཡོངས་སུ་སྤངས་བཞིན་ཏུ། །རྒྱལ་སྲས་མཐུ་བོ་ཆེ་ཡི་ལུས་སུ་སྟོན། །སྟོང་པ་ཀུན་ནས་ཉོན་མོངས་སྤངས་པའི་གཏམ། །འཆད་ཀྱང་ལས་ཀྱི་འབྲས་བུ་འདོར་མི་མཛད། །མི་སྲུན་བརླངས་པོར་སྤྱོད་ལ་ཆེར་འབར་ཡང་། །དེ་དག་ཐུགས་རྗེའི་ཆབ་ཀྱིས་རྟག་ཏུ་བརླན། །བདག་དང་སེམས་ཅན་སུ་ཡང་མ་གཟིགས་ཀྱང་། །གསང་བའི་དམ་པས་འགྲོ་ལ་ཕན་པ་བཏགས། །རྟག་ཏུ་ཞི་བའི་དབྱིངས་སུ་མཉམ་བཞག་ཀྱང་། །གཏུམ་པོ་ཁྲོས་པས་ཁྲོ་བ་མ་ལུས་འཇོམས། །རིག་པ་དགོངས་པའི་མཐིལ་དུ་སྦེད་པ་ཡང་། །ཐུན་མོངས་འགྲོ་བའི་ཉེར་འཚོའི་སྤྱད་པར་གྱུར། །དེ་ལྟར་འཇིག་རྟེན་ཀུན་དང་མི་མཐུན་པའི། །རྣམ་ཐར་འདི་ལ་ངོ་མཚར་སུ་མི་ཐོབ། །སངས་རྒྱས་ཀུན་གྱི་ཐུགས་ཀྱི་གསང་བ་དང་། །སྤངས་རྟོགས་ཡེ་ཤེས་ཕུན་སུམ་ཚོགས་པ་དག །ཁྱོད་ཀྱི་ཐུགས་ལ་མངོན་སུམ་བཞིན་ཏུ་ཞུགས། །སྦྱིན་དང་དུལ་བ་ཡང་དག་སྡོམ་ལ་སོགས། །ཕ་རོལ་ཕྱིན་དང་
འཕགས་པའི་བདེན་པ་དང་། །བྱང་ཆུབ་ཡན་ལག་གཟུངས་དང་ཏིང་འཛིན་སྟོབས། །མ་འདྲེས་ཆོས་སོགས་འཇིག་རྟེན་ལས་འདས་དང་། །འཇིག་རྟེན་སྐྱོང་བ་ཀུན་གྱི་གཟི་བརྗིད་མདངས། །དྲང་སྲོང་གཙང་མ་ཚངས་བར་སྤྱོད་རྣམས་ཀྱི། །དཀའ་ཐུབ་བརྟུལ་ཞུགས་རང་གི་ལོངས་སྤྱོད་ལས། །གྲུབ་པའི་རྡོ་རྗེ་སྟོང་ཉིད་གཟུགས་གྱུར་པ། །ཚན་པོ་ཆེས་ཀྱང་བསྐྱོད་པར་དཀའ་བ་དེ། །རྒྱལ་བ་ཀུན་གྱིས་ཁྱོད་ཀྱི་ཕྱག་ཏུ་བསྩལ། །ཉན་ཐོས་ཚུལ་ཁྲིམས་བསམ་གཏན་སྙོམས་འཇུག་དང་། །བྱང་སེམས་སྙིང་རྗེས་དྲངས་པའི་ཕ་རོལ་ཕྱིན། །རྒྱལ་རྣམས་བླ་ན་མེད་པའི་ཆོས་ཀྱི་སྒོ། །རང་གི་རིགས་ཀྱི་རིག་པ་དེས་བྱེད་ཅིང་། །དྲག་པོ་ཉི་མའི་བུ་དང་ལུས་ངན་པོ། །རླུང་ལྷ་ནམ་མཁའ་ལྡིང་སོགས་གདུག་པ་འདུལ། །ཁྲོ་བོ་དྲག་པོར་ཁྲོས་རྣམས་རྨོངས་པར་མཛད། །གཡོན་ཅན་སྒྱུ་དང་ལྡན་པ་རབ་ཏུ་རྨུགས། །སྡང་བ་སྐྱོད་ཅིང་རྨོངས་རྣམས་རྣམ་པར་འཇིག །དམ་པོ་རྩད་གཅོད་རྒྱས་རྣམས་སྦུར་མར་བརླག །ཡོན་པོ་སྲུང་ཞིང་གཅད་པ་སྙིང་རྗེས་བསྐྱབས། །སྲིན་པོ་རེངས་ཤིང་འབྱུང་པོ་སྒྲག་པར་མཛད། །མ་གྲུབ་གྲུབ་པའི་ནུས་པ་རྫོགས་པར་སྟོན། །གྲུབ་པ་དག་ཀྱང་ཆུད་ཟོས་མེད་མཛད་པས། །
རང་གི་གསང་བའི་མཐུ་ནི་རབ་བསྐྱེད་ཅིང་། །གཞན་གྱི་སྔགས་ལ་རིག་པའི་ཕུར་བུས་འདེབས། །དུས་མིན་འཆི་སོགས་འཇིགས་པ་འཇིག་མཛད་ཅིང་། །གདུག་པའི་ཀླུ་སོགས་གསོད་བྱེད་གསོད་པར་མཛད། །ཁྱོད་སྔོན་གཞོན་ནུ་ཆོས་ལ་སེམས་པའི་དུས། །སྨོན་ལམ་ཡོངས་སུ་བཟུང་བའི་ཁྱད་པར་ལས། །མེ་ཏོག་གཞི་ཡི་སྙིང་པོའི་རྒྱན་བཀོད་པའི། །འཇིག་རྟེན་ཀུན་ཏུ་འདུལ་བའི་དབང་གཟིགས་ནས། །གནོད་སྦྱིན་གཟུགས་ཀྱིས་གདུལ་དཀའ་སྨིན་སླད་དུ། །འབྲོག་གནས་གནས་པར་སྡེ་དཔོན་ཚུལ་བཟུང་སྟེ། །འདྲེན་པ་སྟོང་གི་ཆོས་ཀྱི་མཛོད་སྲུང་ནས། །སྐྱེ་དགུ་འཚོ་བའི་བྱ་དཀའ་བསྒྲུབ་པར་མཛད། །རིན་ཆེན་བཀོད་པའི་སྙིང་པོ་ཇི་སྲིད་གནས། །དེ་སྲིད་ཆུ་ཡི་ཕུང་པོ་མི་སྐམ་ལ། །ནོར་བུ་དུ་མ་འབྱུང་བའི་རྟེན་བྱེད་ལྟར། །ཁྱོད་ཀྱི་མཐུ་ཡིས་འཇིག་རྟེན་ཁམས་དག་ཏུ། །རྒྱུད་དོ་ཅོག་གི་ཆུ་ཀླུང་འབབ་པ་དང་། །རིག་པ་ཕྱག་རྒྱའི་ཚོགས་ཀྱི་སྟོབས་སྐྱེད་ལ། །གལ་ཏེ་ཁྱོད་ཉིད་མངོན་དགར་གཤེགས་པ་ན། །ཟབ་ཅིང་རྒྱ་ཆེའི་ཆོས་ཚུལ་མ་ལུས་པ། །ལན་ཚྭའི་ཕུང་པོ་ཆུ་ལ་ཐིམ་པ་བཞིན། །ཆོས་ཀྱི་དབྱིངས་སུ་དམིགས་པ་མེད་པར་འགྱུར། །ཡེ་ཤེས་ཆེན་པོའི་གཟུངས་ཀྱི་དབང་བསྐུར་བས། །
གཅིག་ནས་གཅིག་ཏུ་རྒྱུན་མི་འཆད་པ་ཡི། །སངས་རྒྱས་མཛད་པ་རླབས་པོ་ཆེ་སྒྲུབ་པས། །དཔེ་བྲལ་འཇམ་པའི་དབྱངས་ལ་སོགས་པས་ཀྱང་། །ཁྱོད་ལ་དེ་བཞིན་གཤེགས་པ་ཉིད་དུ་གཟིགས། །རབ་འབྱམས་རྒྱ་མཚོ་སངས་རྒྱས་ཞིང་ཀུན་ཏུ། །མངོན་པར་སྐྱེ་ཞིང་འབྱུང་དང་བྱང་ཆུབ་དང་། །མྱ་ངན་འདས་པའི་བར་གྱི་མཛད་སྟོན་པ། །མགོན་པོ་ཀུན་གྱི་དྲུང་ན་རྟག་རོལ་ཞིང་། །བཟོ་སྐྱེ་མཆོག་སོགས་རྒྱལ་བའི་སྤྱོད་ཡུལ་གྱི། །རྣམ་འཕྲུལ་ཇི་སྙེད་སྤྲུལ་པ་དེ་སྙེད་སྤྲུལ། །དང་པོའོ་ལས་ཅན་སེམས་བསྐྱེད་ནས་བརྩམས་ཏེ། །རྒྱལ་ཚབ་ཆེན་པོའི་ས་ལ་བཞུགས་བའི་བར། །ཕྱོགས་བཅུ་དག་ན་བྱང་ཆུབ་སྤྱོད་ཞུགས་པ། །རེ་རེའང་ལུས་དང་གྲིབ་མ་བཞིན་ཏུ་སྲུང་། །ཉན་རང་རང་བདེ་དོན་ཏུ་གཉེར་རྣམས་དང་། །འཁོར་བའི་ངམ་གྲོག་ཕ་མཐའ་མེད་པ་རུ། །འདུ་བྱེད་སྡུག་བསྔལ་རླུང་གི་ས་གཡེངས་གྱུར་པ། །སྲོག་ཆགས་རེ་རེའི་རྒྱབ་དང་མདུན་ཏུ་ཡང་། །ལག་ན་རྡོ་རྗེ་ཐོགས་པའི་གཟུགས་སྟོན་ཀྱང་། །འཇིག་རྟེན་པ་ལ་ཡེ་ཤེས་མིག་མེད་པས། །ཀུན་ཏུ་བཟང་པོའི་ལྟད་མོ་མཐོང་མ་གྱུར། །ཡེ་ཤེས་སྒྱུ་མས་ཆོས་ཀྱི་སྒྱུ་མ་སྤྲུལ། །ལས་ཀྱི་སྒྱུ་མའི་འཁྲུལ་འཁོར་རབ་ཏུ་འཇིག །སྒྱུ་མ་ཟབ་
མོ་རིག་པས་གཞོམ་མེད་པ། །ཁྱོད་ཀྱི་སྒྱུ་མ་འདི་ནི་བརྟག་པར་དཀའ། །འདོད་ཁམས་བདག་པོ་སྡིག་ཏོའི་ཡིད་ཅན་དང་། །ལོག་འདྲེན་འབྱུང་པོའི་བདག་པོ་མཁའ་འགྲོ་མ། །ཡི་དྭགས་གནོན་པོ་སྦྲུལ་དང་སྦྲུལ་འཛིན་སོགས། །ཉོན་མོངས་མྱོས་འགྱུར་བཏུང་བས་རབ་མྱོས་ཏེ། །བདེན་པའི་ཆོས་ཉིད་ཁོང་དུ་མ་ཆུད་པར། །མཐོ་རིས་ཐར་པའི་ལམ་ལས་ཕྱོགས་བསླད་དེ། །དེ་བཞིན་གཤེགས་དང་བསྟན་ལ་ཐོ་རྩོམ་ཞིང་། །འགྲོ་བའི་དགེ་རྩ་གཅོད་ལ་ཞུགས་པ་རྣམས། །ཚར་གཅོད་རྣམ་པར་འཐགས་ལ་ཕྱོགས་པ་ན། །སྟོབས་བཅུའི་སྙིང་པོ་བསྡུས་པའི་གཏུམ་པོའི་ལུས། །སྲེག་བྱེད་མེ་ལྕེའི་ཕྲེང་བས་རབ་གཡོགས་པ། །གློག་གི་འཁོར་ལོ་བར་མེད་འཁོར་བ་བཞིན། །རྒྱལ་བ་བྱེ་བ་སྙེད་ཀྱིས་བྱིན་བརླབས་ཤིང་། །ཆོས་ཉིད་ལས་གྲུབ་མི་ཕྱེད་རྡོ་རྗེའི་ཐོག །འོད་ཟེར་ཚ་ཚས་ཉི་མ་ཟིལ་གནོན་ཏེ། །སྟོང་གསུམ་ཐམས་ཅད་སྣང་བ་གཅིག་གྱུར་པས། །རྒྱ་མཚོ་མཆིལ་མ་བཞིན་ཏུ་སྐེམས་བྱེད་ཅིང་། །རི་རབ་ཐལ་བ་བཞིན་ཏུ་གཏོར་བ་དང་། །ལྷན་ཅིག་དྲག་པོ་རྣམ་པར་བསྒྱིངས་པའི་སྒྲ། །དུས་རླབས་རབ་ཏུ་འཁྲུགས་དང་ལྕེ་འབབ་པའི། །འབྲུག་སྟོང་དུས་གཅིག་བསྒྲགས་འདྲ་ཐོས་པའམ། །དྲན་པའི་མོད་ལ་ཡིད་སྲུབས་བཅུད་
བྲལ་མའི། །སྙིང་ཁྲག་མངལ་རྒྱས་ལ་ལྟུང་བར་བྱེད། །བྲོས་ཀྱང་འབར་བ་དུས་མཐའི་མེས་བཅིངས་ཤིང་། །གབ་པའི་སྐྱིབས་མེད་སྲོག་སྙིང་འཕར་བཞིན་ཏུ། །ཤི་ལ་ཐུག་པར་ལན་བརྒྱར་བརྒྱལ་དེ་རྣམས། །གཞར་ཡང་བརྩེ་བའི་ཞགས་པ་མི་གློད་པས། །སྐྱབས་སུ་འགྲོ་དང་བསླབ་པའི་གཞིར་བཀོད་ནས། །དཀོན་མཆོག་གདུང་བརྒྱུད་ཅི་ཡང་སྤེལ་བར་མཛད། །ཁྲོ་བར་སྣང་ཡང་བྱམས་པ་ཆེན་པོས་གདུལ། །ཕོལ་མིག་སྨན་གྱིས་གསོ་རུ་མི་གཏུབ་པ། །སྨན་པ་མཁས་པས་དབུག་ཅིང་དྲལ་བ་དང་། །སྲེག་པའི་དཔྱད་ཀྱིས་རྩད་ནས་གདོན་པ་བཞིན། །སེམས་དམྱལ་ངན་སོང་གསུམ་གྱི་འབྲས་བུ་ཅན། །འཇིགས་པ་དུས་ཀྱི་ཚེར་མ་གཏིང་ནས་འདོན། །སེམས་ཞུམ་བརྩོན་འགྲུས་བརྟན་པོ་མ་ཡིན་པའི། །བྱང་ཆུབ་ཐོག་མར་ཞུགས་རྣམས་གཟེངས་བསྟོད་ཅིང་། །བདུད་ཀྱི་སྐུང་འཕྲང་དག་ལས་དབུགས་དབྱུང་བསྩལ། །ཆོ་འཕྲུལ་འདུན་ས་སྲིད་པ་གསུམ་པོ་ན། །རྨད་བྱུང་དགེ་མཚན་ནམ་མཁའི་མཐར་བྲེས་པར། །ལྷ་མིའི་བླ་མ་མི་འཇིགས་གཟི་བརྗིད་ཅན། །འགྲོ་བའི་བསོད་ནམས་ཞིང་དུ་རབ་བཞུགས་ཏེ། །ཆོས་དང་ཟང་ཟིང་སྦྱིན་པས་རང་ཉིད་ཀྱིས། །སྐྱེ་བ་དུ་མར་མགྲོན་ཏུ་བོས་པ་རྣམས། །
སྣང་ནས་སྣང་བར་ཁྲིད་པའི་ངོ་མཚར་ལ། །འགྲན་ཟླར་ཆས་པའི་རྒོལ་ངན་མུ་སྟེགས་བྱེད། །ཕུག་རོན་སྤུ་བཏོགས་ལྟ་བུའི་གཅེར་བུ་པ། །རྨོངས་པས་བསྒྲུབས་པའི་བློ་ངན་བ་ཀུ་ལ། །དད་པའི་འདབ་མ་རྟག་ཏུ་ཟུམ་པའི་ཚེ། །གླང་ཆེན་མྱོས་པའི་སྐད་དང་ལྷན་ཅིག་ཏུ། །སེང་གེའི་ཁྲི་ལས་རྡོ་རྗེ་འཛིན་བྱུང་སྟེ། །འཐོར་རླུང་དྲག་པོར་གཡོས་པས་གླགས་ལྟའི་ཁྭ། །བསྡིགས་ཤིང་བསྐྲད་ནས་འཇིག་རྟེན་ལས་འདས་པའི། །ཆོ་འཕྲུལ་ཆེ་བའང་ཁྱོད་ཀྱི་མཐུ་ཡི་མ་བསྐྱེད། །དཔའ་བོ་ཉི་མའི་གཉེན་གྱི་སྲས་གཅིག་པུ། །འཁོར་བཞི་སྐྱོབས་པའི་རྫོང་བཙན་སྟོབས་པོ་ཆེ། །ཁྱབ་འཇུག་མིག་གསུམ་པ་དང་ལྷ་མ་ཡིན། །དེ་དག་གྲུབ་པའི་ཚོགས་ཀྱིས་ཕྱག་བྱས་པ། །མདོར་ན་ཆོས་ཀྱི་རྒྱལ་པོ་ཐམས་ཅད་ཀྱི། །གསང་བ་གསུམ་གྱི་གནས་ལས་ཁྱོད་བྱུང་ཞིང་། །གསང་བའི་ཡེ་ཤེས་རྒྱལ་དང་རྒྱུད་གཅིག་པས། །ཆོས་ཀྱི་ཅོད་པན་རྒྱལ་བ་རྣམས་ཀྱིས་བཏགས། །མུན་པའི་རུམ་ན་གློག་དམར་འགྱུ་བ་བཞིན། །གཏི་མུག་མལ་དུ་རྟག་པར་ཉལ་བ་བདག །བརྒྱ་ལམ་ཞིག་ན་ཁྱོད་ལ་དད་ཐོབ་པ། །དགེ་བའི་ཞུགས་ཆེན་སྙིང་ལ་འབར་བ་དེས། །བདུད་ཀྱིས་བཅིངས་པའི་དྲྭ་བ་བརྒྱ་དྲལ་ནས། །འཇིགས་པ་ལྔ་དང་བྲལ་བའི་ས་ཡི་སྤོར། །མི་གནས་
གནས་པ་ཆེན་པོས་དོན་བྱེད་ཅིང་། །རྒྱལ་ཀུན་གསང་བར་ལྐོག་ཏུ་མ་གྱུར་པ། །གསང་བའི་བདག་པོའི་རྣམ་ཐར་ཡོངས་རྫོགས་ཤོག །འདི་ནི་རྒྱལ་མོ་ཚ་བའི་རོང་གི་མཐར་ཐུག་པ་ཁྲོ་ཆུའི་ཡུལ། །རི་བྲག་གནོད་སྦྱིན་ཁྲོས་པ་འདྲ་བ་ལ་ཤིང་ལྟུག་པོའི་ཚལ་དུ་གཅན་གཟན་གཏུམ་པོ་རྒྱུ་བས་བརྒྱན་ཅིང་། མི་སྲུན་པའི་མི་དང་མི་མ་ཡིན་འབའ་ཞིག་པས་གང་བ་དེར། །ཡོན་ཏན་རྒྱ་མཚོས་དད་པས་བྲིས་པ་སྐྱེ་བ་ཀུན་ཏུ་གསང་བའི་བདག་པོས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ།། ༈ །།རྒྱལ་ཚབ་བྱམས་པ་མགོན་པོའི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་ཕ་རོལ་ཏུ་ཕྱིན་པ་རྒྱ་མཚོ་གྲངས་མེད་པ་རྗེས་སུ་སྒྲོགས་པའི་སྤྲིན་གྱི་ཆར་ཞེས་བྱ་བ་བཞུགས་སོ། །ན་མ་ཨཱརྱ་མཻ་ཏྲ་ཡེ། །འཇིག་རྟེན་སྣང་ལ་ཆས་པའི་ཉིན་མོར་བྱེད། །འཆར་ཀའི་ལི་ཁྲིའི་འོད་ཀྱིས་མཚོན་པ་ལྟར། །བྱང་ཆུབ་སྙིང་པོར་རབ་ཏུ་གཞོལ་བ་ལ། །སྐྱེ་བ་གཅིག་གིས་ཐོགས་པའི་མ་ཕམས་པ། །སངས་རྒྱས་ཆོས་ཀུན་ཕྱག་མཐིལ་བཞག་པ་ལྟར། །མགོན་པོ་ཁྱོད་ལ་ལྐོག་ཏུ་མ་གྱུར་པས། །ཤཱཀྱའི་ཏོག་སོགས་རྐང་གཉིས་གཙོ་རྣམས་ཀྱིས། །ཅོད་པན་དབུ་ལ་བཞག་ནས་དབང་བསྐུར་ཏོ། །སྔོན་གྱི་དེ་བཞིན་གཤེགས་རྣམས་གདུང་འཛིན་ཅིང་། །ད་ལྟ་ཉི་མའི་གཉེན་གྱི་ཆོས་སྲིད་སྐྱོང་། །
མ་འོངས་དཀོན་མཆོག་ཆུ་གཏེར་སྲིད་པའི་མཐར། །བྱམས་ཆེན་སྤྲིན་ལས་འབད་རྩོལ་མེད་པར་བཀྱེ། །སེམས་ཀྱི་སྐད་ཅིག་གཅིག་ལ་མཐའ་ཡས་པའི། །རྒྱལ་བ་རྣམས་དང་ཆོས་ཀྱི་བཀའ་བགྲོ་ཞིང་། །དེ་དག་བྱིན་གྱིས་བརླབས་ཀྱི་ཡེ་ཤེས་ཐོབ། །དེ་དང་མཚུངས་པར་རྣམ་འཕྲུལ་རྒྱ་མཚོ་བཀོད། །མི་འཇིགས་སེང་གེའི་སྟོབས་ཀྱིས་འཁོར་གནོན་ཞིང་། །རྒོལ་བའི་འདུས་པ་ངན་པ་རབ་ཏུ་བཅོམ། །སངས་རྒྱས་ཀུན་གྱིས་རྒྱལ་ཚབ་སར་བཀོད་པས། །གྲགས་པའི་རོལ་མོ་ཞིང་མང་རྣམས་སུ་འགྲོ། །བདུད་ཀྱི་སྤྱོད་ཡུལ་འབྲོག་དགོན་རབ་བརྒལ་ཏེ། །སངས་རྒྱས་ཡུལ་ལ་རང་གི་ཁྱིམ་བཞིན་འཇུག །མི་ཟད་གཟུངས་ཀྱི་སྒོ་མོ་བརྒྱ་ཕྱེ་ནས། །འགྲོ་ཀུན་དབང་པོ་ཚིམས་བྱེད་སྤོབས་པ་ཐོབ། །ཐུགས་མཆོག་དང་པོར་བསྐྱེད་ནས་རྒྱུན་མཐའི་བར། །ཀུན་སྙོམས་བྱམས་པ་ཆེན་པོའི་ཏིང་འཛིན་གྱིས། །ཚངས་པའི་ལམ་དང་བྱང་ཆུབ་ཕྱོགས་ཀྱི་ཆོས། །བདེ་བའི་ཐེག་པ་བདེ་བླག་ཉིད་དུ་བསྒྲུབས། །བྱང་སེམས་བྱེ་བས་བལྟ་བའི་བཞིན་རས་དང་། །ཚད་མེད་སྦྱིན་པ་ཆེན་པོ་བྱིན་པའི་ཕྱག །རྡུལ་སྙེད་རྒྱལ་ལ་བསྙེན་བཀུར་མཛང་མཛད་པའི། །སྐུ་མཆོག་ཡིད་དགའ་ཆོས་འཛིན་འདུན་སར་འཕགས། །བསྐལ་པ་བྱེ་བ་ཁྲག་ཁྲིག་གྲངས་
མེད་པར། །ལམ་དང་འཇུག་པ་བདེ་བའི་ཐབས་མཁས་ཀྱིས། །སྦྱིན་སོགས་ཚོགས་གཉིས་ཕ་རོལ་ཕྱིན་པའི་སྐུ། །སྐྱེས་བུ་ཆེན་པོའི་མཚན་གྱིས་ལེགས་པར་བརྒྱན། །བསོད་ནམས་ཡེ་ཤེས་རིང་བསྲེལ་ཆོས་ཀྱི་གཏེར། །གཅིག་བསྡམས་གསེར་གྱི་གཏན་པ་ཕྱིས་འདྲ་བ། །ལྷག་བསམ་གཟི་འོད་དུས་གསུམ་འཕྲོ་བ་ཡི། །རིན་ཆེན་མཆོད་སྡོང་ཟུར་ཕུད་རྩེ་མོར་བཞེས། །དག་ཅིང་འོད་གསལ་ནོར་བུ་བཻ་ཌཱུརྱས། །ནོར་བུ་མཆིང་བུའི་རིན་ཐང་ཟིལ་གྱིས་གནོན། །རྒྱལ་ཚབ་ཅེས་བྱའི་མཚན་གྱི་རྔ་བོ་ཆེས། །རྒྱལ་སྲས་རྒྱ་མཚོའི་གྲགས་པ་ཟིལ་གྱིས་གནོན། །བདུད་འཇོམས་གཡུལ་ངོའི་ཐོག་མ་ལ་བཞུགས་ཏེ། །རྡོ་རྗེ་ལྟ་བུའི་མཚན་ཆ་ངར་མ་ཡིས། །སྲིད་རྩེའི་བར་གྱི་ཉོན་མོངས་ཕྲུ་མ་ལ། །མ་བཏབ་པར་ཡང་ཐལ་བར་བགྱིད་ལ་ཕྱོགས། །དྲན་བློ་རྟོགས་དང་དགའ་བའི་རླབས་འབར་ཞིང་། །སོ་སོ་ཡང་དག་རིག་ལ་འཇུག་མཁས་པས། །ཚིག་ཀུན་རྣམ་པར་ཕྱེ་སྟེ་བསྐལ་པའི་བར། །བསྟན་ཀྱང་ཐོགས་པ་མེད་པའི་བརྗོད་ལ་མཁས། །ཚིག་དང་ཡི་གེ་ཟབ་མོའི་གཏིང་སླེབ་པས། །དེ་དག་ཟད་པ་མེད་པའི་སྒོས་བརྗོད་ཅིང་། །ཚིག་གཅིག་ཁོངས་སུ་མདོ་སྡེ་རྒྱ་མཚོའི་ཚུལ། །མ་ཉམས་མ་གོད་
བརྗོད་པ་གཙང་བས་སྟོན། །ལུང་དང་རྟོགས་པའི་ཆོས་ཕུང་རྒྱ་མཚོའི་རྡུལ། །ཆོས་ཀྱི་གཟུངས་ཀྱིས་གཅིག་བཞིན་དྲན་ཞིང་སྤོབས། །དེ་དག་འགྲོ་བ་ཀུན་གྱིས་རྟོགས་འགྱུར་བའི། །འཁོར་ལོ་བསྐོར་ལས་རྟག་ཏུ་ཕྱིར་མི་ལྡོག །ཤེས་སྒྲིབ་ལྟ་བའི་མུན་པ་ཕྲ་མོ་ཡང་། །དཔའ་བར་འགྲོ་བའི་སྣང་བས་རབ་བསལ་ཏེ། །ཟབ་ཅིང་གཏིང་དཔག་དཀའ་བའི་མཐའ་དྲུག་པོ། །ལེགས་པར་རྣམ་འབྱེད་སེང་གེའི་སྒྲ་དབྱངས་སྒྲོགས། །དྲན་པ་འཁྲུལ་པ་མེད་པའི་སྣོད་མཆོག་ཏུ། །ལེགས་པར་གསུང་བའི་བདུད་རྩིའི་བཅུད་བཟུང་སྟེ། །ལྷག་པའི་བསམ་པ་རྣམ་པར་དག་པ་ཡིས། །ཐར་པའི་སྲོག་འཚོ་སེར་སྣ་མེད་པར་བསྟབས། །སྒྲིབ་ཅིང་ཆགས་པ་མེད་པའི་ཡེ་ཤེས་ཀྱི། །མཐོང་བ་མངོན་གྱུར་མངོན་པར་ཤེས་པ་དང་། །རིག་པ་ཆེན་པོས་འགྲོ་ཁམས་ཐ་དད་པ། །གཞན་དྲིང་མི་འཇོག་རྣམ་གྲོལ་ལམ་དུ་བཙུད། །བསམ་ཡས་བསྐལ་པར་དཀའ་བ་ཚད་མེད་པས། །ཕོངས་པའི་ནོར་བཞིན་བསྒྲུབས་པའི་ཆོས་ཀྱི་མཛོད། །ཚུལ་གཉིས་འབྱེད་པའི་རྣམ་དཔྱོད་མཐར་ཐུག་ཕྱིར། །ཤཱཀྱའི་རྒྱལ་པོས་ཁྱོད་ཀྱི་ཕྱག་ཏུ་ཕོག །ཚངས་པའི་དབང་པོའི་གཟུགས་འདྲ་ལུས་རྣམས་དང་། །སྨོན་ལམ་རབ་ཏུ་ཞི་བ་དག་པའི་གཟུགས། །འགྲོ་དང་བསྐལ་པ་
མཉམ་པས་ཕྱོགས་བཀང་སྟེ། །ཐུབ་པའི་དམ་ཆོས་ཐབས་ཚུལ་དུ་མས་སྲུང་། །འདི་ན་ཕྱུགས་ཀྱི་ཤིང་རྟས་འགྲོ་བ་དང་། །ཉི་མའི་རྟ་དང་ཉན་ཐོས་རྫུ་འཕྲུལ་གྱིས། །སྙིང་པོར་འགྲོ་བ་རྣམས་ལའང་སྙིང་པོའི་མིག །གཞན་དྲིང་མེད་པའི་མཐུ་ཡིས་རིང་ནས་བྱིན། །ཆུད་ཟོས་པ་ཡི་ཁམས་ལ་རབ་གཟིགས་ཤིང་། །སེམས་ཅན་རྣམས་ཀྱང་དེ་བཞིན་ལྟ་ལ་འགོད། །དེ་བཞིན་གཤེགས་པའི་རྫུ་འཕྲུལ་གྱིས་འགྲོ་བའི། །དཔའ་བོ་ཆེན་པོ་མཁའ་ལྡིང་རྩལ་ལྡན་གྱུར། །སངས་རྒྱས་རྣམས་ལ་བྱ་བ་རབ་བྱས་ཤིང་། ཡུན་རིང་ཚངས་པར་སྤྱོད་པའི་ཆོས་ཀྱི་བློན། །ལྷུན་པོ་འདྲ་བའི་ལྷ་མཆོག་བརྒྱ་སྟོང་གིས། །དགའ་ལྡན་ཆོས་ཀྱི་རྒྱལ་པོ་མཆོད་ཅིང་བསྔགས། །བསོད་ནམས་བྱ་བའི་དངོས་ལྔ་ཤིན་ཏུ་བསྟེན། །དགེ་བའི་དཀའ་ཐུབ་བརྟུལ་ཞུགས་མཐར་ཕྱིན་ནས། །རྒྱུན་མཐའི་ཏིང་འཛིན་གསེར་གྱི་བུམ་ཆུ་ཡིས། །སྤྱི་བོར་དབང་བསྐུར་འཁོར་ལོས་སྒྱུར་བ་དེ། །བྱང་ཆུབ་ཡན་ལག་བདུན་གྱི་ནོར་དང་བཅས། །འགྲོ་བ་ཀུན་ལ་བུ་ལྟར་ཐུགས་སྙོམས་པས། །མངོན་མཐོའི་ལས་ལམ་སྒྲུབ་པའི་བཀའ་ཁྲིམས་ཀྱིས། །ངེས་དོན་གྱ་གྱུ་མེད་ལ་མཐར་གྱིས་བཞག །ཆོས་ཉིད་རྣམ་གྲོལ་ཡངས་པའི་མཁའ་ལམ་
ན། །སྨོན་ལམ་སྙིང་རྗེའི་ཤིང་རྟས་ཁ་དྲངས་པ། །ལྷ་མིའི་ནང་དུ་བསོད་ནམས་གཟི་བརྗིད་ཅན། །སྐྱེས་བུ་ཆེན་པོ་འགྲོ་བའི་ཉི་མ་དེ། །ཆོ་འཕྲུལ་འོད་ཀྱི་ཐུར་མ་རྣམ་རྩེ་བས། །ལྟ་བས་ཁེབས་པའི་ར་རི་ཀུན་བསལ་ཞིང་། །ཡང་དག་ལྟ་བས་ལྟ་བའི་མིག་བུ་ཕྱེ། །འགྲན་ཟླ་གཉིས་པས་དབེན་པར་ཕན་ལ་ཞུགས། །ནག་པོའི་ཕྱོགས་སྤངས་དཀར་པོའི་ཕྱོགས་རྫོགས་ཤིང་། །ལྷ་བྲན་རྒྱུ་སྐར་དབུས་སུ་མངོན་པར་འཕགས། །བལྟ་ན་སྡུག་པའི་འོད་ཀྱི་དྲྭ་བ་ཅན། །ས་བཅུའི་དབང་ཕྱུག་སྐྱེ་དགུའི་ཟླ་བ་དེ། །བསོད་ནམས་མཁའ་ལ་ཡང་དག་སྤྱོད་པས་འཛེགས། །དཔག་ཡས་རྣམ་པར་ཐར་པའི་འཕེལ་བ་རྫོགས། །སྐལ་ལྡན་བློ་ཡི་ཀུནྡ་ཁ་ཕྱེ་ཞིང་། །དཀར་པོའི་ཆུ་གཏེར་བདུད་རྩིའི་ཐིགས་པས་སྤེལ། །འཇིག་རྟེན་ཡོན་ཏན་ཀུན་གྱི་མཚོར་སྐྱེས་ཀྱང་། །འཇིག་རྟེན་ཆོས་ཀྱི་འདམ་གྱིས་མ་གོས་ཤིང་། །འཇིག་རྟེན་གསུམ་གྱི་གཙུག་གི་རྒྱན་གྱུར་པ། །འཇིག་རྟེན་ཀུན་དགར་བྱེད་པའི་པདྨ་དེ། །བརྩོན་འགྲུས་ཆོས་ཆུས་མངོན་པར་བརླན་པ་ལས། །མ་འདྲེས་ཆོས་ཀྱི་འདབ་མའི་མངལ་གྲོལ་ཞིང་། །ཐབས་མཁས་ཟེ་བ་ཏིང་འཛིན་སྙིང་པོ་ཅན། །ཚུལ་ཁྲིམས་བསུང་གིས་ཕྱོགས་ཀུན་ཤིས་པ་སྒྲུབ། །མུ་སྟེགས་ཅན་གྱི་གླང་ཆེན་མྱོས་པའི་དགྲ། །
མི་འཇིགས་སྟོབས་དང་ཉེ་བའི་སྟོབས་རྩལ་ཅན། །སྙོམས་པར་འཇུག་པའི་རི་ཡི་སུལ་འགྲིམ་ཞིང་། །འདུན་པའི་ནགས་སུ་སྐྱེས་པའི་སེང་གེ་དེ། །ཡེ་ཤེས་མཐོང་བ་མདུན་རྒྱབ་མེད་པར་དག །འཕགས་པའི་བདེན་བཞིའི་མཆེ་སྡེར་ཤིན་ཏུ་རྣོ། །རྣམ་ཐར་སྒོ་མོ་གསུམ་གྱི་གདོང་གླལ་ནས། །ཕྱིར་མི་ལྡོག་པའི་ང་རོ་ཆེན་པོ་སྒྲོག །ཐམས་ཅད་མཁྱེན་པའི་ཞལ་ལས་འོངས་པའི་ཆོས། །ཀུན་ཉོན་དྲི་མ་ཡོངས་སུ་འཁྲུད་བྱེད་པ། །ཐོས་པའི་ཆུ་ཀླུང་སྦུད་ལ་ད་དུང་ཡང་། །མི་ངོམས་གཏིང་དཔག་དཀའ་བའི་རྒྱ་མཚོ་དེ། །ཡོན་ཏན་རིན་ཐང་བྲལ་བའི་ནོར་བུས་གང་། །གདུལ་བྱའི་དུས་ཀྱི་མཚམས་ལས་མི་འདའ་ཞིང་། །འདུལ་བཞིའི་རླབས་ཕྲེང་ཟད་པ་མེད་པར་བརྐྱང་། །ཆོས་ཀྱི་ཆར་པ་འབེབས་ལ་དབང་དུ་གྱུར། །ཆོས་ཁམས་རིན་ཆེན་བརྟག་པའི་གཙུག་ལག་ལ། །བྱང་ཞིང་རྣམ་འབྱེད་དག་པའི་མིག་ཐོབ་པ། །བདེ་གཤེགས་སྙིང་པོའི་གཏེར་གྱི་རྒྱུས་ཤེས་ཏེ། །བསོད་ནམས་སྟོབས་ཀྱིས་ཅི་བདེར་འདོན་པ་དེས། །འགྲོ་སེམས་ས་གཞི་རིན་ཆེན་འབྱུང་གནས་ལ། །ཆོས་ཉིད་སྦས་པའི་གཏེར་ཆེན་ངོ་སྤྲད་ནས། །བསལ་བཞག་མེད་ཀྱང་རྟོག་པ་གློ་བུར་དྲི། །སྦྱོང་བྱེད་དགོངས་འགྲེལ་ཟབ་མོའི་ཆུ་རྒྱུན་ཕབ། །རབ་རིབ་
མུན་པ་ཀུན་དང་མི་འགྲོགས་པའི། །རྡུལ་བྲལ་རབ་ཏུ་སྣང་བའི་མིག་ཐོབ་པ། །ལ་ལ་ཞིག་གིས་མུན་པ་མུན་ནག་ཏུ། །ཚོགས་ཆེན་རྣམ་པ་ཐ་དད་མཐོང་བ་ལྟར། །མདོ་སྡེའི་ཚུལ་གྱི་གསུང་རབ་ཀླུང་གསོལ་ནས། །མཚན་མ་མེད་ལ་གཟིགས་པའི་སྤྱན་དག་པས། །སྟོང་ཉིད་རྗོད་པས་སྦས་པའི་མངོན་རྟོགས་ཀྱང་། །ཡན་ལག་བརྗོད་ལ་དྲངས་ཏེ་གཏན་ལ་ཕབ། །སྣོད་གྱུར་གང་དུ་ནོར་བུ་རིན་པོ་ཆེ། །བཞག་ན་དཔལ་དང་ལྡན་པར་འགྱུར་བ་བཞིན། །འཛམ་བུའི་རྒྱལ་མཚན་དུ་ནི་བལྟམས་པ་ན། །སུམ་རྩེན་བཀོད་པ་ས་ལ་འཕོ་བར་འགྱུར། །དེ་ཚེ་བླ་ན་མེད་པར་བྱང་ཆུབ་ནས། །སངས་རྒྱས་སྤྱན་གྱིས་ཕྱོགས་བཅུར་གཟིགས་པ་ན། །བསྟན་ལ་འབྲེལ་ཡང་ལས་ཀྱི་ཉེས་པ་ཡིས། །ངན་འགྲོའི་བཙོན་རར་ཆུད་པ་རྣམས་གཟིགས་ཏེ། །ཐུགས་རྗེའི་ཕྱག་གིས་སྡུག་བསྔལ་སྒྲོག་བརྡལ་ཞིང་། །ལྷ་མིའི་གྲོང་ཁྱེར་རྣམས་སུ་ངལ་གསོས་ཏེ། །སྐལ་པ་འཚམས་པའི་ཐེག་གསུམ་ལ་བཞག་པ། །རྒྱལ་ཚབ་ལྷ་བརྒྱའི་མགོན་པོའི་ཐུགས་དམ་ལགས། །ཤཱཀྱའི་བསྟན་ལ་དགེ་རྩ་ཆུང་ངུ་ཡི། །ས་བོན་རབ་ཏུ་ཕྲ་བ་བཏབ་པ་ཡང་། །བྱམས་པའི་ཉི་མས་འཇིག་རྟེན་སྣང་བའི་ཚེ། །འབྲས་བུའི་བར་དུ་འཕེལ་ཞིང་ཡངས་
པར་མཛད། །དཔལ་ལྡན་བླ་མ་མཆོག་དང་དབྱེར་མེད་པ། །མི་ཕམ་མགོན་པོས་ཚེ་འདིར་རྗེས་བཟུང་ནས། །ཚུལ་ཁྲིམས་ཕུང་པོ་ཡོངས་སུ་རྫོགས་པ་དང་། །གཟུངས་དང་སྤོབས་པ་ཐོབ་པར་བྱིན་གྱིས་རློབས། །མ་འོངས་དུས་སུ་ཀླུ་ཤིང་དབང་པོའི་དྲུང་། །འཇིག་རྟེན་འདྲེན་པ་མངོན་སུམ་མཐོང་གྱུར་ནས། །བྱང་ཆུབ་མཆོག་ཏུ་ལུང་བསྟན་ཐོབ་ནས་ཀྱང་། །བསྟན་ལ་བྱ་བ་བྱེད་པའི་མཆོག་གྱུར་ཤོག །གང་དུ་མི་དགེ་བའི་མུན་པ་དང་རྟག་ཏུ་འགྲོགས་པ་ལ་རྒྱལ་སྲས་གཞན་གྱི་ཕྲིན་ལས་འཇུག་པར་མ་གྱུར་པ་ན། །བྱམས་མགོན་ཏཱའི་སི་ཏུ་ཁོ་ནའི་ཐུགས་རྗེའི་སྣང་བ་ཕྱམ་བརྡལ་བས་ཐར་པའི་ལམ་ཡངས་པར་གྱུར་པ་རྒྱལ་རོང་ཁྲོ་ཆུ་ཤུ་བྷཾ་གྱི་ཆོས་གྲར་མགོན་པོ་གང་དེའི་བཀའ་འབངས་པ་ཡོན་ཏན་རྒྱ་མཚོས་དད་པས་བྲིས་པ་སྐྱེ་བ་ཀུན་ཏུ་མགོན་པོ་བྱམས་པས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ།། ༈ །།བྱང་ཆུབ་སེམས་དཔའ་སའི་སྙིང་པོའི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་སྨོན་ལམ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཆར་ཞེས་བྱ་བ་བཞུགས་སོ། །ན་མཿཀྵཾ་ཏི་གྷཱ་ཡ། །བྱང་ཆུབ་སེམས་དཔའ་རིན་ཆེན་ཕུང་པོའི་དབུས། །ས་ཡི་སྙིང་པོ་རྒྱལ་མཚན་ཏོག་ལྟར་འཕགས། །སེམས་ཅན་བསམ་པ་ཐ་དད་འདོད་འཇོ་ཞིང་། །
ཉེ་རིང་མེད་པར་ཕན་པ་རིན་ཆེན་བཞིན། །རྒྱལ་བའི་སྲས་རྣམས་སྔོན་གྱི་འདུ་བྱེད་ལས། །སྐྱེས་ཀྱང་རེ་བ་མོད་ལ་རྫོགས་བྱེད་པ། །སྐྱེས་བུ་འདི་ཡི་དོ་ཟླ་ཡོད་མ་ཡིན། །ཀུན་མཁྱེན་ཡེ་ཤེས་རྒྱ་མཚོའི་ཕ་རོལ་ཕྱིན། །ཐུན་མོངས་མིན་པའི་ཆོས་ལ་དབང་དུ་གྱུར། །པདྨ་རྒྱས་ལྟར་འབྲས་བུའི་དཔལ་དང་ཉེ། །མང་ཐོས་ཚུལ་ཁྲིམས་བག་ཡོད་ལ་གནས་ཏེ། །སྐྱེ་བོའི་ནང་ན་དམ་པར་གྱུར་རྣམས་ལ། །ཕྱིར་མི་ལྡོག་པའི་ཕྱག་རྒྱས་བཏབ་ནས་ཀྱང་། །བྱང་སེམས་མཐོང་བའི་དབང་པོ་དག་པར་སྒྲུབ། །ཉན་ཐོས་ཤེས་རབ་མཆོག་དང་རང་སངས་རྒྱས། །ལྷ་དང་བཅས་པའི་འཇིག་རྟེན་ཐམས་ཅད་ཀྱིས། །ཡོན་ཏན་ཕྲ་བའི་ཆར་ཡང་དཔོག་མི་ནུས། །གལ་ཏེ་སྐྱེས་བུ་ཆེན་པོའི་ཡོན་ཏན་དང་། །དགེ་རྩ་རྒྱས་པར་རྐང་གཉིས་གཙོས་བཤད་ན། །འགྲོ་བས་མི་རྟོགས་རྨོངས་ཤིང་མྱོས་པར་གསུངས། །བསྐལ་པ་རྒྱ་མཚོ་ཐོག་མའི་མཐའ་ནས་ཀྱང་། །ཚད་མེད་བཅོམ་ལྡན་འདས་ལ་དམ་བཅས་ཏེ། །ལུས་ཅན་ཕན་ལ་ཞུགས་པའི་སྙིང་རྗེ་དང་། །མི་འཕྲོག་བརྩོན་འགྲུས་ཆེན་པོའི་སྟོབས་བསྐྱེད་པའི། །བསོད་ནམས་གོང་དུ་འཕེལ་བའི་ཤུགས་ཆེན་པོས། །རྡུལ་སྙེད་ཞིང་དུ་ཆགས་པ་མེད་བགྲོད་དེ། །སོ་སོའི་སྐྱེ་བོ་ལྟ་ལ་ཆགས་པ་རྣམས། །སྡུག་
བསྔལ་རྣམ་པ་སྣ་ཚོགས་གཟེབ་ལས་བསྒྲལ། །མངོན་མཐོ་ངེས་པར་ལེགས་པའི་ལམ་སྣང་སྟོན། །རེ་བའི་ཡིད་ཀྱང་ཡོངས་སུ་བསྐང་བར་མཛད། །རྟག་ཆད་གཙུག་ལག་འཆང་ཞིང་མཚམས་མེད་དང་། །སྡིག་པ་བཅུ་སྤྱོད་འཕགས་དང་ཆོས་ལ་སྐུར། །ཉོན་མོངས་གོས་བགོ་གཡོ་སྒྱུའི་ཟས་ཀྱིས་འཚོ། །འཇིག་རྟེན་ཕྱི་མས་མི་འཇིགས་སྙིང་བསྲན་ཅན། །ངན་པར་སྤྱོད་ཀུན་ལྷན་ཅིག་འཚོགས་པ་ཡི། །རྙོགས་པ་ལྔས་རྙོགས་འདྲེན་པས་སྟོངས་པ་ལ། །སྨོན་ལམ་རླུང་གི་ཤིང་རྟས་ཁ་དྲང་བ། །ས་ཡི་དབང་ཕྱུག་ཉི་མ་ལྷག་པར་ཤར། །རྩོད་པ་ཅན་ཏུ་རྒྱུན་མི་ཆད་གཤེགས་ནས། །མི་སྲུན་གདུལ་བྱ་སྨིན་མཛད་དེ་ལྟ་བུའི། །སྙིང་སྟོབས་ཆེན་པོ་ནམ་ཡང་འབྱུང་བར་དཀའ། །སྙོམས་འཇུག་ཕྲ་བ་གཅིག་གི་མཐུ་བསྟན་ཚེ། །སངས་རྒྱས་ཞིང་ཀུན་མཆོད་སྤྲིན་གྱ་ནོམས་པས། །གུས་བཅས་དཀོན་མཆོག་མཆོད་པའི་སྐྱེ་བོས་གང་། །གཅིག་དང་འདྲ་བར་རྡུལ་སྙེད་རྒྱལ་བའི་ཞིང་། །ཏིང་འཛིན་གཅིག་གི་སྤྱོད་ཡུལ་མཚུངས་ལ་བཀོད། །དེ་བཞིན་འགྲོ་བ་སྨིན་པ་ཁོ་ནའི་ཕྱིར། །དྲོ་སྐད་ཅིག་གི་ནན་ཏན་ཚད་མེད་སྙེད། །དཔེ་ཡིས་མི་མཚོན་བགྲང་བ་མི་འཇུག་སྟེ། །ཟག་མེད་ཏིང་ངེ་འཛིན་གྱི་རྒྱ་མཚོ་
ལས། །ཟེག་མ་རེ་རེས་ཕྱོགས་བཅུའི་ཞིང་ཀུན་ཏུ། །ཇི་ལྟར་འོས་པའི་སྒྱུ་འཕྲུལ་འདུ་མཛད་པ། །ཐམས་ཅད་མཁྱེན་པ་ཁོ་ནའི་མཁྱེན་པའི་ཡུལ། །གང་ཞིག་ཐོས་པའི་ནོར་གྱིས་དབུལ་བ་ལ། །མང་ཐོས་དབྱིག་གི་སྙིང་པོ་ལྷུག་པར་བསྩལ། །ཚུལ་ཁྲིམས་ཕུང་པོ་དྲི་མར་གྱུར་པ་ཡང་། །འཕགས་པ་དགྱེས་པའི་ཟག་མེད་སྡོམ་ལ་བཀོད། །ལུས་ངག་ཡིད་གསུམ་རྣམ་པར་གཡེངས་པ་དག །བསམ་གཏན་ཞི་བ་དམ་པས་རྒྱུད་བརླན་ཞིང་། །ལྐོག་གྱུར་ལྟ་བའི་དབང་པོ་ཟུམ་པ་རྣམས། །མངོན་ཤེས་མཐོང་བ་ཤིན་ཏུ་དག་པར་སྒྲུབ། །ཤེས་རབ་རྨོངས་པའི་དྲི་མས་རྙོགས་པ་ཡང་། །ཀེ་ཏ་ཀ་ཡིས་གཙང་ཆབ་བཞིན་ཏུ་བགྲུང་། །བསོད་ནམས་བྱ་བའི་ཐབས་ལ་རྨོངས་པ་ན། །ཐབས་མཁས་སྤྱོད་པ་མཁའ་ལྟར་ཡངས་པར་མཛད། །ཁོར་མོ་ཡུག་ཏུ་ཟག་པའི་སྲེད་ལེན་གྱི། །མཚམས་སྦྱོར་ལེན་པ་མེད་པར་རྣམ་པར་དགྲོལ། །གཟུགས་སོགས་སྡུག་གུའི་འདོད་དང་བྲལ་བ་ལ། །ལྷ་ཡི་འདོད་པའི་མཆོག་གི་ཟིལ་དངར་སྟོབ། །བཟོ་དང་བསྟན་བཅོས་སྒྱུ་རྩལ་སློབ་པར་ཡང་། །ཚངས་དང་ཕུར་བུའི་རྣམ་དཔྱོད་དེ་ཡིས་སྟེར། །མདོར་ན་རྒྱལ་བས་རབ་བསྔགས་ས་ཡི་སྙིང་། །དམིགས་པའི་བསྟེ་སྟང་
བཅས་པས་སྐྱབས་གསོལ་ཞིང་། །རིན་ཆེན་མཆོག་ལྟར་དཀོན་པའི་མཚན་བཟུང་ན། །རེ་བ་མི་འགྲུབ་འགའ་ཡང་ཡོད་མིན་ཏེ། །ཤིན་ཏུ་སྦྱངས་པའི་ནོར་བུའི་རྒྱལ་པོ་དང་། །དཔག་བསམ་ཤིང་དང་བུམ་པ་བཟང་པོས་ཀྱང་། །སྲིད་ལས་འདས་པའི་དམ་པ་མི་སྦྱིན་པས། །བསམ་པ་རྫོགས་པར་སྐོང་བའི་མཐུ་མེད་ལ། །འཕགས་པའི་མཚན་ལ་བྱི་དོར་བྱེད་པའི་མི། །བྱང་ཆུབ་བར་དུ་འདོད་པས་མི་བྲེལ་ཞིང་། །གཞན་གྱི་འདོད་འཇོ་དེ་དང་མཚུངས་པར་འགྱུར། །གང་དག་བཟའ་བཏུང་བགོ་བ་རིན་ཆེན་རྒྱན། །ཁྲི་སྟན་ནད་ཀྱི་རྐྱེན་སྨན་སྐྱེད་མོས་ཚལ། །མེ་ཏོག་འབྲས་བུ་འབྲུ་དང་ནོར་གྱི་དབྱིག །ཁང་ཁྱིམ་ཡུལ་གྲུ་བཞོན་པ་བྲན་ཁོལ་དང་། །རིགས་བརྒྱུད་རྙེད་བཀུར་ཁེ་དང་གྲགས་པའི་དཔལ། །དབང་པོ་ཉམས་དང་མ་ཚང་ཐོབ་པ་སོགས། །བསོད་ནམས་ས་བོན་གང་ཞིག་མ་བཏབ་པས། །འཚོ་བའི་རྐྱེན་དང་བདེར་གནས་ཡོ་བྱད་ཀྱིས། །ཕོངས་པའི་དངོས་པོ་མང་ངམ་ཉུང་ཡང་རུང་། །ལེགས་པར་གསུངས་དང་ས་ཡི་དབང་ཕྱུག་གི། །སྨོན་ལམ་རིག་སྔགས་གྲུབ་དང་སྨན་ཆེན་གྱི། །མཐུ་བཞིན་བསམ་མི་ཁྱབ་ལ་ཡིད་ཆེས་པས། །དམ་པ་སློང་ན་རེ་བ་ལས་ལྷག་པའི། །
དགོས་དགུའི་གཏེར་ཁ་འབད་རྩོལ་མེད་པར་ཕྱེ། །བཙོན་གྱི་གོ་རར་བཅིང་བས་རབ་བཅིངས་ཤིང་། །ཆད་པའི་ལས་ཀྱིས་འཚོ་གཅིང་ནན་ལ་བོར། །གཡུལ་ངོར་ལྷུང་བའམ་མཛའ་བར་མ་གྱུར་པས། །འཐབ་ཕྱིར་འགྱེད་སོགས་སྐྱེ་བོའི་ལུས་སེམས་ལ། །མི་འདོད་གདུང་བའི་ཚོར་བ་ཅི་ཡང་རུང་། །ནེམ་ནུར་མེད་པར་ཡོན་ཏན་དཔག་མེད་མཚན། །དྲན་པའི་མོད་ལ་ཟུག་རྔུ་གཏིང་ནས་འབྱིན། །གདུག་པའི་སྦྲུལ་གྱིས་ཟིན་ལ་མ་གི་ཏ། །གཅན་གཟན་ཁྲོ་བས་ཉེན་ལ་གདོང་ལྔའི་སྒྲ། །ཚ་གྲང་འདུ་འཁྲུགས་གསོ་བའི་སྨན་ཆེན་པོ། །ཞུགས་ཀྱིས་ཚིག་ན་བསྐལ་པའི་ཆུ་རྒྱུན་ཏེ། །ཆུ་བོའི་དབུས་ན་གྲུ་ཟམ་བཞོན་པའི་མཆོག །རླུང་གིས་ཁྱེར་ན་བརྟོད་པའི་ཕུར་བུ་སྟེ། །རྦབ་ཏུ་ལྷུང་ན་འདེགས་པའི་གཤོག་རླབས་ཉིད། །སུ་མཐོང་དགྲ་ཡི་དྭངས་མར་འདུ་ཤེས་ཤིང་། །ཅི་སྣང་གསོད་པའི་མཚོན་ཆར་གྱུར་པའི་ཚེ། །སྐྱེས་བུ་ཆེན་པོ་ལྷག་པར་ཐུགས་བརྩེ་བས། །སྡིག་སེམས་འབར་བ་བྱམས་པའི་ཆབ་ཀྱིས་གཞོམ། །ཕན་ཚུན་མ་བུའི་གདུང་བས་འཚོ་བར་མཛད། །སྲེད་པས་ཐ་བར་བགྱིས་པའི་དགོན་དུང་ན། །བཅུད་ལྡན་ཏིལ་ཙམ་སྤྱོད་པ་ལྟ་ཅི་སྨོས། །ཀོ་ཊ་བ་དང་སྐྲ་ཡི་ལྭ་བས་ཀྱང་། །མི་འབྱོར་ཡི་
དྭགས་འབྲས་བུ་མྱོང་བ་ལ། །བཟའ་བཅའ་བཏུང་བ་གོས་ཀྱི་ཆར་ཕབ་ནས། །དབུལ་པོའི་གྲོང་དུ་རྫོགས་ལྡན་དགའ་སྟོན་འགྱེད། །འཆོས་མེད་ནད་རིམས་གཤིན་རྗེ་ཁྲོས་པའི་ཁར། །ལས་མཐུན་བཟའ་བ་བཞིན་ཏུ་འདེབས་པ་ན། །འགྲོ་བའི་སྨན་པར་གྱུར་པས་ཡུད་ཙམ་ལ། །དུས་ཀྱི་ཞགས་པ་བདེན་སྟོབས་རལ་གྲིས་བཅད། །སྲོག་གི་སྦྱིན་པས་འཚོ་བ་ཐུང་རྣམས་སྐྱོང་། །ཆགས་སྡང་རྨོངས་པ་དྲག་ལ་རྣོ་བ་ཡིས། །སྡིག་སེམས་དབྱར་གྱི་ཆུ་བཞིན་ཤུགས་རྒྱས་ནས། །མི་དགེའི་སྤྱོད་པ་འོག་ཏུ་གཞོལ་བའི་རྒྱུན། །བཟློག་ཏུ་མེད་པར་ཤ་ཐང་ཆད་པ་ན། །སྡིག་འཕྲོག་དགེ་སྦྱོང་ཆེན་པོའི་གཟུགས་ཅན་ལ། །དད་པ་ལས་བྱུང་དགེ་བའི་ཚ་ཟེར་གྱིས། །ལས་ཉོན་རྒྱུ་དང་བཅས་ལ་རྨང་ནས་སྐེམས། །ཤེས་རབ་ཕྲ་བ་ཟབ་པའི་མཐར་ཕྱིན་ནས། །འབྱུང་བ་ཆེན་པོའི་སྐྱེ་དང་འགག་པའི་རྒྱུ། །ཐོག་མཐའ་བར་མའི་མཚན་ཉིད་མཐུན་པ་དང་། །མི་མཐུན་ཕྱོགས་ཀུན་རྟོགས་ནས་དབང་དུ་མཛད། །གཞན་ཕན་སྨོན་ལམ་དབང་གིས་ས་འདི་ཡང་། །མཉན་པས་གྲུ་བོ་ཆེ་བཞིན་རྟག་ཏུ་འཛིན། །ལྗོན་ཤིང་རྩི་སྨན་ལོ་ཏོག་རྩྭ་སྔོན་སོགས། །རྩ་བ་འཕེལ་ཞིང་མྱུ་གུ་སྡོང་པོ་སྐྱེད། །འཇམ་
མཉེན་ལོ་མ་རྒྱས་ཤིང་མེ་ཏོག་བཀྲ། །འབྲས་བུ་སྣུམ་པོར་སྨིན་དང་དེ་དག་གི། །དྲི་བསུང་རོ་བདའ་ནུས་མཐུ་རྫོགས་པར་དུ། །ཁྲོས་པའི་ཀླུ་བཏུལ་དུས་ཀྱི་ཆར་པ་སྐུལ། །རྫུ་འཕྲུལ་མཁའ་ལ་སྣོད་བཅུད་ཀུན་བརྟེན་པས། །རྒྱུ་དང་མི་རྒྱུའི་ཉེར་འཚོའི་སྤྱད་པ་ཡང་། །ས་དང་ས་ཡི་དབང་ཕྱུག་ཐུན་མོངས་གྱུར། །ཞིང་ས་མི་གཤིམས་ན་ཡང་འབྲུ་འདོད་དེ། །ཞིང་པས་སོ་ནམ་ནན་ཏན་མ་བྱས་པར། །རྩེ་གཅིག་ས་ཡི་སྙིང་པོ་རབ་མཆོད་ན། །དེ་ཡི་ཏིང་འཛིན་དམ་པའི་ཡོན་ཏན་གྱིས། །རང་བྱུང་བཞིན་ཏུ་སྙེ་མའི་དོག་པས་ལྕི། །གལ་ཏེ་རེ་བའི་ཕྱིར་དུ་འགའ་ཞིག་གིས། །བྱམས་ཆེན་འཇམ་དབྱངས་འཇིག་རྟེན་དབང་ཕྱུག་དང་། །ཀུན་ཏུ་བཟང་སོགས་གངྒཱའི་བྱེ་སྙེད་ཀྱི། །རྒྱལ་བའི་མྱུ་གུ་བསྐལ་པ་ཁྲག་ཁྲིག་ཏུ། །མཆོད་ཅིང་གསོལ་བ་བཏབ་ལས་གང་སུ་དག །སྐད་ཅིག་གཅིག་ལ་ས་ཡི་སྙིང་པོའི་མཚན། །རྗེས་སུ་དྲན་ཏེ་བསྟི་སྟང་བཅས་མཆོད་ན། །མྱུར་དུ་རེ་བའི་ཤིང་རྟ་མིག་འཕྲུལ་བཞིན། །གང་བས་འཕགས་ཏེ་འགྲོ་བའི་སྨོན་ལམ་ཀུན། །ཡོངས་སུ་རྫོགས་བྱེད་ཡིད་བཞིན་ནོར་བུའི་གཏེར། །སྦྱིན་པ་རྣམ་པ་དུ་མའི་ཆར་འབེབས་ཤིང་། །བསོད་ནམས་མ་བསགས་པའི་ཡང་
མཛོད་གྱུར་པས། །ཤིན་ཏུ་འབད་པའི་ནན་ཏན་ཁྱད་པར་ལ། །འགྲོ་བའི་བླ་མ་སྲས་དང་བཅས་པས་བསྔགས། །ཞིང་བརྒྱར་སངས་རྒྱས་མཛད་པ་རྫོགས་པར་སྟོན། ཁ་ཅིག་ཉན་ཐོས་རང་རྒྱལ་འཁོར་ལོས་སྒྱུར། །ལ་ལར་འདོད་ཁམས་ས་དང་གནམ་གྱི་ལྷ། །སྟོང་གསུམ་བདག་པོ་དབང་ཕྱུག་ཆེན་པོར་སྤྲུལ། །མཐུ་བོ་ཆེ་དང་སྐྱེས་པ་བུད་མེད་གཟུགས། །སེང་གེ་ཁྱུ་མཆོག་སྤོས་ཀྱི་བ་ལང་དང་། །དམྱལ་བའི་སེམས་ཅན་དམྱལ་སྲུང་ལ་སོགས་པ། །སྐལ་པ་བཞིན་ཏུ་ཚད་མེད་ལུས་སྟོན་ཏེ། །རྩོལ་མེད་ཡེ་ཤེས་འདོད་དགུར་སྒྱུར་བ་ཡིས། །ཆོས་ཆེན་འཁོར་ལོ་རྒྱུན་ཆད་མེད་པར་སྐོར། །སེམས་ཅན་རང་རང་ལས་ལ་སྤྱོད་བཞིན་པར། །ཐེག་པ་གསུམ་གྱི་མྱང་འདས་གྲོང་ཁྱེར་དུ། །འགྲོ་བའི་དེད་དཔོན་ཁྱོད་ལ་སྐྱབས་སུ་མཆི། །ཐབས་ལ་མཁས་པས་བདག་ཅག་སྨིན་པ་དང་། །མངོན་པར་འདོད་པའི་སྨོན་ལམ་འགྲུབ་པར་མཛོད། །དཔའ་བོ་གང་ལ་སྦྱིན་པའི་མཐུ་ཡོད་ཀྱང་། །ལས་ངན་དབང་གིས་སྤྱོད་པའི་ནུས་མེད་པ། །ལེགས་བྱས་སྣོད་དུ་མ་གྱུར་བདག་འདྲ་ལ། །ལྷག་པར་དགོངས་ཤིག་སྙིང་རྗེ་ཆེན་པོ་ཀྱེ། །ཁྱོད་མཚན་ཐོས་པའི་
དགེ་བ་རྒྱ་མཚོ་ལ། །དད་པའི་གདེངས་ཀས་སྲུང་བའི་ལྷག་མ་ཅན། །ཆོས་ཆེན་རྒྱལ་སྲིད་དག་ལ་དབང་འབྱོར་ནས། །འགྲོ་བ་སྐྱོབ་པའི་བསོད་ནམས་མཐུ་ཆེན་གྱིས། །ཕན་བདེའི་ཆུ་ཀླུང་སྲིད་པའི་མཐར་བཀྱེ་བ། །མཚུངས་མེད་ས་ཡི་གཙོ་དང་མཚུངས་པར་ཤོག །སོ་སོའི་སྐྱེ་བོ་སྔོན་ལས་ཀྱིས་ཁ་དྲངས་བ་ལ་འགྲོ་དོན་ཏུ་བཏགས་པའི་མིང་སྙན་པས་བོད་དེ་ཤར་ཕྱོགས་ཀྱི་ལྗོངས་རྒྱུ་ཞིང་སོང་སོང་བ་ན། །འབྲས་སཱ་ལུ་དང་མ་རྨོས་པའི་ལོ་ཏོག་སོགས་འབྲུ་བཅུད་དུས་སྨིན་ནུས་པའི་ཡུལ། །སྐྱེ་བོའི་ཁྱིམ་རྣམས་འབྲུའི་བང་བས་གང་ཞིང་འཕགས་པའི་བཞུགས་གནས་ཀཱེུ་ཧཱུ་ཤན་དང་ཉེ་བའི་ལྗོངས་ག་ལ་བར་ཡོན་ཏན་རྒྱ་མཚོས་དད་པས་བྲིས་པ་སྐྱེ་བ་ཀུན་ཏུ་འཕགས་པ་སའི་སྙིང་པོས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ།། ༈ །།སྒྲིབ་པ་ཐམས་ཅད་རྣམ་པར་སེལ་བའི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་ཏིང་འཛིན་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཆར་ཞེས་བྱ་བ་བཞུགས་སོ། །ན་མཿསརྦཱ་བ་ར་་བི་སྐམྦྷཱ་ཡ། །མཚན་ཐོས་ཙམ་གྱིས་ལས་དང་ཉོན་མོངས་པའི། །སྒྲིབ་པ་ཐམས་ཅད་རྣམ་པར་སེལ་བ་དེ། །ད་ལྟ་ཕྱོགས་བཅུའི་ཞིང་ན་རྒྱལ་སྲས་ཚུལ། །སྤྲིན་མེད་ཉི་མ་བཞིན་ཏུ་ལྷམ་མེར་སྣང་། །ནམ་མཁའི་རྔ་ལས་བདེན་པའི་
སྒྲ་བྱུང་ན། །བག་མེད་མི་འདོད་ན་ཡང་སློང་བ་ལྟར། །དུས་གསུམ་གཤེགས་པས་ཁྱོད་མཚན་གསུང་མ་ཐག །སེམས་མེད་ས་ཡང་རྣམ་པ་དྲུག་ཏུ་གཡོ། །བསྐལ་པ་བྱེ་བ་ཁྲག་ཁྲིག་དུ་མ་རུ། །བློ་ཆེན་གཞན་གྱིས་འབད་ཀྱང་མི་འགྲུབ་པའི། །ཏིང་འཛིན་རྒྱ་མཚོ་འཇམ་དཔལ་དཔའ་བོ་ཡིས། །སེ་གོལ་གཏོགས་པའི་ཡུན་ལ་བདེ་བླག་སྒྲུབ། །གལ་ཏེ་སྟོང་གསུམ་འགྲོ་བ་འདི་དག་རྣམས། །བརྟན་པའི་འཁོར་ལོའི་གོ་འཕང་ལ་གནས་ཀྱང་། །ཐེ་ཚོམ་སེལ་བ་བྱང་ཆུབ་སེམས་མ་ཡི། །རྣམ་ཐར་བརྒྱ་ཕྲག་སྟོང་གི་ཆར་མི་ཕོད། །སྟོང་གསུམ་དག་ན་སྐྱེ་བོ་ཇི་ཡོད་པས། །གལ་ཏེ་སྲིང་མོ་དེ་ཡི་དཔལ་ཐོབ་ཀྱང་། །སྒྲིབ་པ་རྣམ་པར་སེལ་བའི་ཏིང་འཛིན་སྟོབས། །ཡེ་ཤེས་རྣམ་པར་འཕྲུལ་པའི་དཔེར་མི་བཟོད། །ཀླུ་ཡི་དབང་པོས་ཆུ་གཏེར་སྤེལ་བ་བཞིན། །དེ་ལས་ཉི་ཟླའི་དཀྱིལ་འཁོར་མཁར་ཐོན་པས། །འཇིག་རྟེན་སྣང་བཞིན་དེས་ཀྱང་པདྨ་དང་། །ཀུ་མུད་བཞད་པས་བུང་བ་འཚོ་བ་བཞིན། །རྡུལ་སྙེད་ཞིང་དུ་ཀུན་བཟང་སྤྱོད་ཞུགས་པ། །འཇམ་དཔལ་གཞོན་ནུས་བྱང་ཆུབ་ལ་བཙུད་དེ། །འཇམ་པའི་དབྱངས་དང་དེ་མཚུངས་ཚད་མེད་པ། །ཐེ་ཚོམ་སེལ་མས་དང་པོར་སྨིན་པར་
བྱས། །དེ་དང་དེ་འདྲ་གངྒཱའི་བྱེ་མ་སྙེད། །སྤྱོད་ཡུལ་ནམ་མཁའ་ལྟ་བུའི་བྱང་ཆུབ་སེམས། །འཇུག་སྲེད་རྒྱལ་པོ་རྒྱལ་བ་ལ་སོགས་པ། །ད་ལྟ་ཆོས་ཀྱི་འཁོར་ལོ་སྐོར་བ་དང་། །མྱ་ངན་འདས་དང་སླད་ནས་་གཤེགས་པ་ཡི། །མི་མཆོག་ཁ་ལོ་སྒྱུར་བ་གྲངས་འདས་ཀྱང་། །སྒྲིབ་སེལ་བླ་མའི་བླ་མར་གྱུར་པ་དེས། །བྱང་ཆུབ་སེམས་ཀྱི་རྩ་བ་ཐོག་མར་བཙུགས། །འགྲོ་བ་གང་གི་རྣ་བར་ལྷགས་གྱུར་ཀྱང་། །སྒྲིབ་པའི་དྲྭ་བ་མ་ལུས་དྲལ་ནས་ཀྱང་། །ངན་སོང་གསུམ་དང་བུད་མེད་དམན་ལ་སོགས། །སྲིད་པའི་སྡུག་བསྔལ་མྱོང་བའི་ཐ་མར་བྱེད། །བདེ་ནས་བདེ་བའི་འཇུག་ངོགས་ལ་གཞོལ་ཞིང་། །མཐར་གྱིས་ཐམས་ཅད་མཁྱེན་པའི་སར་བཞག་པ། །མཚན་ཙམ་གྱིས་ཀྱང་སངས་རྒྱས་མཛད་སྤྱོད་ན། །དཔག་པར་དཀའ་བའི་ཡོན་ཏན་ལྟ་ཅི་སྨོས། །ཁྱོད་ཀྱིས་བརྙེས་པའི་ཏིང་འཛིན་རྒྱ་མཚོའི་མཆིངས། །ཡེ་ཤེས་ཕུང་པོ་འཇམ་དཔལ་གཞོན་ནུས་ཀྱང་། །མིང་གི་རྣམ་གྲངས་ཙམ་ཡང་མི་མཁྱེན་ཞེས། །དེ་འདྲའི་རྣམ་ཐར་སུས་ཀྱང་བསམ་མི་ཁྱབ། །ཀུན་བརྟགས་བརྟེན་པ་གང་ལའང་མ་བརྟེན་པས། །གཟིགས་པ་མེད་པའི་ཐམས་ཅད་མཁྱེན་པ་ཡང་། །མིག་ཡོར་ཆོས་ཏེ་མངོན་པར་མི་འདོད་པས།
སངས་རྒྱས་མཛད་པ་ཆོས་དབྱིངས་མཐའ་རུ་གཞོལ། །སྲིད་པའི་རྒྱུད་དུ་སྐྱེས་ཀུན་མ་སྐྱེས་པ། །རྨི་ལམ་ཤེས་པས་འབྱུང་དེ་སྲིད་པའི་ཕྱིར། །ལེན་པ་མེད་པའི་བརྩོན་འགྲུས་བླང་བ་ཡིས། །བདུད་ཀྱི་དཀྱིལ་འཁོར་མ་ལུས་རྣམ་པར་དཀྲུགས། །འགྲོ་ཁམས་སྒྱུ་མར་སྒྱུ་མའི་སྐྱེས་བུ་དེས། །སྤྲོས་པར་སྣང་ཡང་འགྲོ་དང་འོང་མེད་པ། །གཅིག་པུའི་ལུས་ཀྱིས་ཞིང་རྡུལ་གྲངས་སྙེད་ཀྱི། །ཞིང་ཀུན་སྐུ་ཡིས་ཁྱབ་པ་ཉི་མ་འདྲ། །ཡེ་ཤེས་སྒྲུབ་པས་བསྒྲུབ་ཏུ་མ་མཆིས་པ། །སྨིག་རྒྱུའི་ཆུ་ལ་རི་དྭགས་སྲེད་པས་བསླུས། །མ་བསྒྲུབས་ཡེ་ཤེས་གྲུབ་པའི་ཁྱུ་མཆོག་དང་། །སེང་གེའི་ང་རོས་མི་ཤེས་རྣམ་པར་གནོན། །འཇིག་རྟེན་སྤྲུལ་པ་ལྟ་བུ་མ་སྤྲུལ་པ། །ཡེ་ཤེས་ཐ་མི་དད་པའི་སྒོར་གཞུག་པས། །ཕྲ་ཡང་སྣ་ཚོགས་བྱེད་པོ་བཞིན་ཏུ་ཆུབ། །གནས་མེད་ནམ་མཁའི་སྣང་བས་ཕན་ལ་གནས། །ཆོས་ཉིད་དཔེ་དང་ཚིག་གིས་མི་མཚོན་པས། །བརྗོད་དུ་མེད་ལ་རྒྱལ་བས་མ་གསུངས་པ། །སྟོང་ཉིད་འཁོར་ལོ་ཆོས་ཀྱི་སྤྲིན་གྱི་རྔ། །བ་སྤུའི་བུ་ག་ཀུན་ནས་རྟག་ཏུ་ཕྱུང་། །མཉན་དང་སྟོན་པ་གཞན་རིག་ལས་སྐྱེས་པ། །བརྗོད་པའི་སྒྲ་བརྙན་རྗོད་པས་མི་བརྗོད་ཀྱང་། །རྟག་ཏུ་རྗོད་པ་མང་པོས་དེ་ཉིད་
དོན། །བློ་གྲོས་དམན་པ་རྣམས་ལ་མཚོན་པར་མཛད། །འདུ་བྱེད་སྤྲིན་གྱི་ཚང་ཚིང་རབ་བརྡལ་བ། །སྐྱེ་བའི་རྒྱུད་ལ་མཐོང་མེད་བལྟས་ནས་སུ། །ངལ་གསོའི་ཐར་པའི་གྲོང་དུ་ཐེག་པའི་ཚུལ། །སྣ་ཚོགས་དགོད་པས་བགྲོད་གཅིག་བགྲོད་པར་མཛད། །དབང་པོ་གཅིག་ལ་དབང་པོ་ཐམས་ཅད་པ། །ཕན་ཚུན་རྣམ་གནས་ཕྲ་དང་བརྟན་པའི་ཚུལ། ཁམས་ཡིད་མོས་པ་དེ་དང་འདྲ་བ་བརྒྱ། །ཐོག་མཐའ་མེད་པ་ལག་མཐིལ་བཞིན་ཏུ་གཟིགས། །གང་ནས་མ་འཕོས་རྡུལ་ཙམ་མ་འདྲེས་པ། །ལས་དང་རྣམ་པར་སྨིན་པའི་གཟུགས་བརྙན་བརྒྱ། །སེམས་ཀྱི་མེ་ལོང་དོས་སུ་ཤར་གཟིགས་ནས། །མི་ལེན་མི་འདོར་བཏང་སྙོམས་ཆེན་པོས་དོར། །བདག་ཏུ་འཛིན་པ་མོ་གཤམས་བུས་བསགས་པའི། །ལས་ཀྱི་འབྲས་ལས་སྐྱེ་བ་མེད་སྐྱེས་པ། །སྡུག་བསྔལ་འཁྲུལ་འཁོར་སྡུག་བསྔལ་གྱིས་གཞོམ་ནས། །སྒྲིབ་པའི་འཆིང་བ་རྒྱུན་ཆད་མེད་པར་གཅོད། །ཕན་མཛད་ཞལ་ནི་རྟག་ཏུ་མཐོང་གྱུར་ཀྱང་། །འཇིག་རྟེན་པ་རྣམས་དོན་མེད་མུན་པར་འཁྱམས། །དམིགས་པའི་སྤྱོད་པས་ཅི་ཡང་མི་སྤྱོད་པ། །ཆགས་མེད་དེ་ནི་སེམས་ཅན་དོན་རབ་སྤྱོད། །འབྱུང་བ་བཞི་ཡི་གཟུགས་ལས་འདས་བཞིན་ཏུ། །གཟུགས་དང་མིང་གི་དབུ་བ་བརྡོལ་ཇི་སྙེད། །
དེ་སྙེད་རྗེས་སུ་དངོས་མེད་གཟུགས་སོང་བ། །རང་རང་ལས་མཐས་སྲིད་པའི་ཉིང་མཚམས་བརྟུལ། །དེ་བཞིན་ཡེ་ཤེས་དག་པའི་མིག་ལམ་དུ། །ཚོར་སོགས་ཕུང་པོའི་རབ་རིབ་མི་འཛིན་ཀྱང་། །ཕུང་པོ་དགོད་པ་ལྕགས་ཀྱི་འཕྲུལ་ཐབས་དེས། །ཉེ་བར་ལེན་པའི་ཕུང་པོའི་ལྕགས་རིགས་གཅོད། །འདུ་ཤེས་གློག་གི་དྲྭ་བ་མཁར་ཁྱབ་ཀྱང་། །ཤེས་བྱ་ནམ་མཁའི་མེ་ཏོག་བྱེ་བྲག་ལ། །ཤེས་པས་མི་དཔྱོད་དཔྱད་པའི་བློ་གྲོས་དག །ཡེ་ཤེས་སྒོ་མོ་བྱེ་བ་དུས་གཅིག་ཕྱེ། །དངོས་བྲལ་དངོས་པོ་མེད་པའི་དངོས་ལ་གནས། །ཡོད་དང་མེད་པའི་མདུད་པ་ཐམས་ཅད་བཀྲོལ། །ཐབས་ལ་མཁས་པའི་ཡེ་ཤེས་མངོན་སུམ་པས། །ཐམས་ཅད་མཁྱེན་ཀྱང་ཡེ་ཤེས་ལ་མི་གནས། །གྲུབ་པ་མེད་པའི་ཆོས་ལ་བྱང་ཆུབ་དང་། །དེ་ལས་སྐྱེས་པ་ཉིད་ན་མ་སྐྱེས་སྲས། །དེས་ཀྱང་མ་བཅིངས་པ་རྣམས་དགྲོལ་བ་ཡི། །སྒྱུ་མའི་འཁོར་ལོ་བྱ་རྩོལ་མེད་པར་བསྐོར། །གཟུགས་སྐུ་མཐོང་ཡང་བསྐལ་པ་ཁྲག་ཁྲིག་ཏུ། །ངོམས་ཤིང་ཚིམས་པས་ཆོག་མི་ཤེས་འགྱུར་ན། །དཔེ་བྲལ་ཆོས་སྐུ་སྨོས་ཀྱང་ཅི་དགོས་པ། །མཐོང་བ་བྲལ་དེ་ཀུན་གྱི་སྙིང་ལ་བསྟན། །མི་མཐུན་ཕྱོགས་ཉིད་མཐུན་པའི་ཕུལ་དུ་གྲུབ། །བགྲོད་
བྱ་མེད་ལ་གཤེགས་པ་མི་མཛད་ཀྱང་། །གཏོང་བ་ལ་སོགས་ཕ་རོལ་ཕྱིན་པའི་སྐུ། །བཻ་ཌཱུརྱ་བཞིན་བསམ་པའི་ཚོན་གྱིས་བསྒྱུར། །དེ་བཞིན་གཤེགས་དང་མཚུངས་པའི་འགྲོས་ཐོབ་པས། །མི་སློབ་ལམ་དུ་རང་བཞིན་གནས་གྱུར་ཀྱང་། །བསླབ་པ་ཀུན་གྱི་མཐའ་རུ་སོན་པ་དེ། །མ་བསླབ་པ་རྣམས་བསླབ་པ་བཞིན་ཏུ་སྟོན། །ཚད་མེད་ནམ་མཁའི་དབྱིངས་དང་དུས་གསུམ་ཀུན། །རྒྱས་པར་འགེངས་པར་ཀུན་ནས་གནས་པའི་ལུས། །དཔེ་ལས་འདས་པའི་མི་མཆོག་ཐམས་ཅད་ཀྱི། །ཆོས་སྤྲིན་ཆེན་པོས་བར་མཚམས་མེད་པར་ཡོགས། །བྱང་སེམས་སྤྱོད་པ་ཐམས་ཅད་ལས་འདས་པའི། །ཆོས་དབྱིངས་རྣམ་འབྱེད་ཏིང་ངེ་འཛིན་གྱི་མཐུ། །མངོན་ཏུ་བསྟན་ཀྱང་མངོན་ཏུ་མི་མཛད་པར། །འཁོར་བའི་མུ་དང་ཁ་ད་ཆད་དུ་སྤྱོད། །ཕྱོགས་དང་རིས་སུ་མེད་པའི་ཆོས་དབྱིངས་སུ། །ཕྱོགས་ཀྱི་རྗེས་སུ་འབྲང་བས་རབ་ཏུ་ཞུགས། །ཕྱོགས་དང་ཆ་ཤས་རྣམ་པར་དབྱེ་བ་ཡིས། །ཡང་དག་དབྱིངས་ལ་གཞོལ་བ་ཤིན་ཏུ་ཕྲ། །མཉམ་ཉིད་དུས་ལ་ཆ་ཡིས་མི་འབྱེད་པས། །སྐད་ཅིག་ལ་ཡང་བསྐལ་པ་རྒྱ་མཚོ་སྟེ། །བསྐལ་པ་དེ་དག་སྐད་ཅིག་ནང་བསྡུས་ཀྱང་། །དུས་གསུམ་འཇུག་པ་རིང་དང་ཐུང་མི་འགྱུར། །མཉན་པ་ལྟ་བུར་སྨོན་ལམ་གྲུ་
བཟུང་ནས། །འཁོར་བ་རྨི་ལམ་ཆུ་མཚོར་ཉམ་ཉེས་པ། །ཡེ་ཤེས་གང་ཆེན་མཚོ་ཡི་ཐང་ཆེན་ཏུ། །སུ་ཡང་བརྒལ་བ་མེད་པར་རྣམ་པར་འདོན། །སྐད་ཅིག་གཅིག་ལ་དུས་གསུམ་གཤེགས་རྣམས་དང་། །དམ་པའི་ཆོས་བགྲོ་རྣམ་འཕྲུལ་མཐའ་ཡས་པས། །བསྐལ་མང་མཆོད་ཅིང་བྱེ་བ་ཁྲག་ཁྲིག་གི། །ཞིང་རྣམས་ཀུན་ཏུ་སེམས་བསྐྱེད་གཅིག་གིས་འཇུག །ཞིང་གི་བཀོད་པ་རྒྱ་མཚོའི་རྡུལ་སྒྲུབ་ཅིང་། །འགྲོ་བ་དེ་དང་མཉམ་པར་སྨིན་པ་ཀུན། །སྐྲ་རྩེ་ཕྲ་བའི་ཆ་ཤས་ལ་ཞུགས་ཀྱང་། །ཡེ་ཤེས་རྒྱ་མཚོར་འཕེལ་དང་འགྲིབ་མི་སྣང་། །ཚུལ་ཁྲིམས་གོས་བཟང་གཟུངས་མཆོག་གསེར་གྱི་གདུབ། །ཏིང་འཛིན་མེ་ཏོག་གསར་པའི་ཕྲེང་བ་དང་། །ཤེས་རབ་ནོར་བུའི་དོ་ཤལ་འོས་པའི་རྒྱན། །ཉེར་སྤྱད་ཐུན་མོངས་པས་ཀྱང་ཤིན་ཏུ་མཛེས། །མཐའ་དབུས་མེད་པའི་རྣམ་འཕྲུལ་ཀུན་ཏུ་ཟབ། །ཡེ་ཤེས་རྒྱ་ཆེན་རྒྱལ་བའི་སྤྱོད་ཡུལ་བ། །མཚན་མ་མེད་ལས་སྐྱེས་པའི་མཚན་ཉིད་ནི། །ཚེག་གི་ལམ་གྱིས་མི་དཔོག་དོན་དེ་ལ། །རྒྱལ་སྲས་མཆོག་དང་དགེ་རྩ་མི་མཚུངས་པའི། །ཉན་ཐོས་ཆེན་པོ་རྣམས་ཀྱང་མགོ་རྨོངས་ན། །ཟག་པས་ཀུན་ནས་དཀྲིས་པའི་སོ་སྐྱེའི་བློ། །ཁབ་ཀྱི་མིག་བུས་ནམ་མཁའ་ཇི་ལྟར་གཞལ། །
མ་རིག་བག་ལ་ཆགས་པའི་མུན་ཁང་དུ། །འཁོར་བ་ཐོག་མ་མེད་ནས་ཉལ་ན་ཡང་། །ཁྱོད་མཚན་ཟེར་ཙམ་རྣ་བར་མ་ཕོག་པས། །ད་དུང་སྒྲིབ་པའི་མལ་ནས་ལྡང་མ་ནུས། །བསོད་ནམས་སྒོ་མོ་རྒྱལ་བའི་ཐུགས་རྗེས་ཕྱེ། །སྒྲིབ་སེལ་གྲགས་པའི་གཟི་བརྗིད་ཕྱམ་བརྡལ་ན། །བདག་ཅག་མུན་པའི་རྫོང་ལས་སློང་བ་ཡི། །དུས་སྐབས་འདི་ཡིན་འཕགས་པས་མཁྱེན་ལགས་སམ། །རང་གི་ཡིད་ལ་རྟོག་པའི་ཆོམ་རྐུན་དང་། །ཕྲ་རྒྱས་བདུད་ཀྱི་བྱ་མ་རྟ་གབ་ནས། །སེམས་ཀྱི་རིན་ཆེན་སྙིང་པོའི་བར་དུ་ཡང་། །འཕྲོག་པ་འདི་དག་ལྡང་མེད་ཁྲིམས་འོག་ཆུག །སྨོན་ལམ་ཡེ་ཤེས་ཡོངས་སུ་བསྡུ་བ་དང་། །སྙིང་རྗེ་ཆེན་པོ་བདེ་གཤེགས་སྲས་ཀྱི་ནོར། །ཐ་མི་དད་ཀྱང་རྣམ་པར་འཕྲུལ་པའི་རྒྱན། །ཁྱོད་བཞིན་ཁྱད་པར་འཕགས་པའི་སྣོད་དུ་མཛོད། །དབྱངས་ཀྱི་དཀྱིལ་འཁོར་མིང་གི་ཆུ་ཀླུང་སྒྲ། །འོད་ཟེར་དྲྭ་བ་བཀྱེ་སོགས་མཐོང་ཐོས་དང་། །རྗེས་སུ་དྲན་པས་བསམ་པ་ཇི་ལྟ་བར། །སྨིན་དང་འདུལ་བ་མཁའ་དང་མཉམ་པར་ཤོག །ཅེས་པའང་ན་བུན་དང་ལྗོན་ཤིང་གི་ཕྲེང་བས་ཁེབ་པ་ལས་ཆུའི་ཟེག་མ་རྟག་ཏུ་འཐོར་བས་དྲི་མ་འཁྲུད་པའི་དག་བྱེད་རང་ཤུགས་སུ་གྲུབ་པ་ཤར་ཕྱོགས་ཀྱི་ལྗོངས་ག་ལ་བར། ཡོན་ཏན་རྒྱ་མཚོས་གུས་པ་ཆེན་པོས་བྲིས་པ་སྐྱེ་བ་ཀུན་ཏུ་དཔའ་བོ་ཆེན་པོ་སྒྲིབ་པ་
རྣམ་པར་སེལ་བས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ།། ༈ །།རྒྱལ་སྲས་ནམ་མཁའི་སྙིང་པོའི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་སེམས་ཅན་གྱི་བསམ་པ་དང་སྤྱོད་པ་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཆར་ཞེས་བྱ་བ་བཞུགས་སོ། །ན་མ་ཨཱ་ཀཱ་ཤ་གྷཱ་ཡ། །ཆོས་ཀྱི་རྒྱལ་པོ་དུས་གསུམ་གཤེགས་པའི་བློན། །ཆོས་ཀྱི་མཛོད་ཀྱི་སྒོ་སྲུང་གཅིག་པུ་བ། །སྐྱེས་བུ་ཆེན་པོ་ནམ་མཁའི་སྙིང་པོ་ཞེས། །རྒྱལ་སྲས་དབུས་ན་ཨུ་དུམྦ་ར་དེ། །དུས་དང་ཕྱོགས་སུ་འབྱུང་བ་དཀོན་པའི་མཆོག །ནམ་མཁའ་ཆུ་ཡི་རླངས་པ་བྲལ་བའི་ངོས། །ཉི་མའི་སྙིང་པོ་ཆགས་དང་ཐོགས་མེད་པ། །སྣང་བའི་དམ་པས་འགྲོ་ལ་ཕན་བཏགས་ཀྱང་། །རྒྱགས་དང་དྲིན་ལ་ལན་གྱི་འདོད་མེད་དེ། །དམུས་ལོང་དམིག་བུ་མེད་པ་མ་གཏོགས་པར། །དེ་ཡི་སྣང་བ་ཕྱོགས་སུ་ལྷུང་མི་འགྱུར། །གང་བློ་ཤེས་རབ་ནམ་མཁའི་རང་བཞིན་ལ། །ཐབས་མཁས་སྙིང་པོ་དུས་ཀུན་གང་བྱུང་བ། །གཅིག་ཏུ་བསྡུས་ཀྱང་རློམས་པའི་སེམས་མེད་པ། །ཐུགས་རྗེ་ཆེན་པོ་དེ་ཡང་དེ་བཞིན་ཏེ། །ལོག་སྲེད་ཅན་མིན་སྐྱེ་བ་བཞིར་སྐྱེས་པ། །བྱང་ཆུབ་ལམ་
དུ་འདྲེན་པའི་ཤིང་རྟ་མཆོག །ཆོས་ཀྱི་དབྱིངས་སུ་གཏོགས་པའི་རིན་ཐང་ཅན། །ཐམས་ཅད་ཁྱོད་ཀྱི་དགེ་བའི་གཏེར་ལ་ཆུད། །ཕོངས་པ་རྣམས་ཀྱི་བུམ་པ་བཟང་པོ་སྟེ། །དགེ་རྩའི་འབྲས་བུ་སྐྱེད་པའི་ས་ཡང་ཡིན། །འདུན་དང་དྲན་པས་དྲང་བའི་བསླབ་པ་ཡི། །ལྷུན་པོའི་གཏོས་སུ་བྱང་སེམས་ཆོས་ཀུན་གཞོལ། །ཤེས་བྱའི་ཆོས་སུ་གྱུར་པས་མི་ཕྱེད་པ། །ཆོས་ཀུན་བཟོད་པའི་རྡོ་རྗེའི་གོ་ཆས་གཡོགས། །སྲིད་དང་ཞི་བའི་མཐའ་ལ་མི་ཐོགས་པར། །བརྩོན་འགྲུས་རླུང་ཤུགས་འཁོར་འདས་ཀུན་ཏུ་གཡོ། །སེམས་ཅན་དོན་བྱེད་ཏིང་འཛིན་བྱེ་བའི་ཀླུང་། །ཏིང་འཛིན་རྒྱ་མཚོའི་འཇིངས་ལ་སྡུད་ཅིང་སྤྲོ། །གནས་ཆེན་པོ་སོགས་དམ་པ་ཅི་འདོད་པ། །སློང་ལ་དངོས་ཀུན་སྟེར་བའི་ཡོངས་འདུས་ལྗོན། །འཚོ་བ་ཡོ་བྱད་བདེ་བར་གནས་རྣམས་དང་། །མི་མཐུན་འཇིགས་ལས་སྐྱོབ་པའི་རྫོང་བཙན་མཆོག །ལམ་ཞུགས་དངོས་པོའི་རང་བཞིན་ཐ་དད་པ། །ཡེ་ཤེས་ནམ་མཁའ་ཡངས་པས་གོ་འབྱེད་ཅིང་། །སངས་རྒྱས་ཆོས་རྣམས་གང་ལ་བརྟེན་པའི་གནས། །རང་རྒྱལ་འཇུག་ལྡོག་བགྲང་བའི་ཕྲེང་བ་སྟེ། །ཉན་ཐོས་རྣམས་ལ་བསླབ་པའི་གོས་བཟང་ཉིད། །ཕ་རོལ་ཕྱིན་པ་རྣམས་ཀྱི་འབྲས་བུའི་བཅུད། །ས་བཅུ་བརྙེས་པའི་ཚོགས་
ཀྱི་ཡིད་བཞིན་ནོར། །དཔའ་བར་འགྲོ་བ་རྣམས་ཀྱི་འཚོ་བའི་ཤིང་། །ལྟ་བའི་དྲྭ་བ་གཅོད་པའི་རྣོ་མཚོན་ཉེ། །བག་ཆགས་མཚམས་སྦྱོར་དྲལ་བའི་རལ་གྲི་དང་། །ཐབས་ཅན་རྣམས་ལ་ཚེས་གྱི་གྲངས་སུ་གྱུར། །ལྷ་ཡི་མིག་སྟེ་མི་རྣམས་ཀྱི་ནི་ལམ། །དུད་འགྲོའི་འཇིགས་སྐྱོབས་ཡི་དྭགས་རྣམས་ཀྱི་ཟས། །སེམས་དམྱལ་མགོན་ཏེ་སྦྱིན་གནས་རྣམས་ཀྱི་སྣོད། །ནད་ལ་རྐྱེན་སྨན་བཀྲེས་པ་རྣམས་ཀྱི་འཐུ། །སྒོམ་ལ་ཆུ་ཤེལ་ངལ་བ་རྣམས་ཀྱི་མལ། །སྙོམས་འཇུག་ལྡན་ལ་ཉི་མའི་ནོར་བུ་མཆོག །བསླབ་པ་འཁྲུགས་པ་རྣམས་ཀྱི་མིག་འབྱེད་ཅིང་། །སྡོམ་པ་སྤྱོད་རྣམས་བཞིན་རས་མཐོང་བའི་སྣོད། །སྒྲོ་སྐུར་ཚིག་གིས་གདུང་ལ་གྲིབ་མའི་གདུགས། །དགེ་རྩ་ཆད་དེ་ལྟུང་བའི་འཁར་བ་ཉིད། །མུན་ལ་ཉི་དང་ལམ་སྟོར་རྣམས་ཀྱི་ཟླ། །ཁྲེལ་དང་ངོ་ཚས་གཅེར་བ་རྣམས་ཀྱི་གོས། །རྒོལ་བའི་གླང་པོ་འཇོམས་པའི་གདོང་ལྔ་པ། །བདུད་ཀྱི་དགྲ་ལ་དཔའ་བའི་དཔུང་ཆེན་པོ། །མཐོ་རིས་སྐས་ཀ་ཕ་རོལ་འགྲོ་བའི་རྟ། །མྱ་ངན་བརྒལ་ཏེ་ཕྱིན་པའི་ཟམ་པ་དེ། །དེ་བཞིན་གཤེགས་པ་ཉག་གཅིག་མ་གཏོགས་པ། །དབང་ཐོབ་རྒྱལ་བའི་མྱུ་གུ་སོགས་པས་ཀྱང་། །མཆོད་ཅིང་རི་མོར་བྱ་བའི་གནས་ཡིན་ཞེས། །དཔལ་
གྱི་མགུར་ལས་བསྔགས་པའི་སིལ་སྙན་བཀྲོལ། །སྐྱབས་ངན་ལ་བསྟན་ལྟ་བའི་ཐིབས་འོག་ཏུ། །ཆུད་ནས་མཐོ་རིས་ཐར་པའི་སྐབས་བྲལ་བ། །གལ་ཏེ་ཁྱོད་མཚན་ཐོས་ནས་མོས་བྱེད་ན། །བག་ལ་ཉལ་དང་བསམ་པ་དེས་གཟིགས་ཏེ། །གང་ལ་དགེ་བའི་རྩ་བ་བསྐྱེད་པའམ། །སྦྱིན་སོགས་བསོད་ནམས་བྱ་བའི་དངོས་གཅིག་གིས། །དགེ་བའི་བཤེས་ཀྱི་ལམ་ནས་དབང་ཐོབ་ཅིང་། །སྤྱོད་དང་སྨོན་ལམ་བསམ་པ་དྲང་བ་ཡིས། །ལྟ་གྱུར་གཡང་ས་བྱེ་བ་ལས་ཟློག་པ། །པྲ་སེན་ཡི་གསལ་སྣང་བཞིན་ཏུ་སྟོན། །མཐོང་བ་ཉམས་དང་ལྕེ་བཅིངས་གྱུར་པ་སོགས། །གདོན་དང་འདུ་བ་འཁྲུགས་པས་གཙེས་རྣམས་ཀྱང་། །མོས་པའི་རྫིང་བུ་ཁྱོད་ཕྱིར་བགྲུང་བ་ལ། །བརྒྱ་བྱིན་བྲམ་ཟེ་སྨན་པའི་གཟུགས་ཤར་ཏེ། །སྦྱོར་བ་གཅིག་གིས་ཕན་པ་བརྒྱ་ཕྲག་བསྩལ། །བཟོ་གནས་འཚོ་བ་རིག་དང་ནོར་གྱི་དབྱིག། །དབང་ཕྱུག་གྲགས་སོགས་ཉེ་བར་སྤྱོད་རྣམས་དང་། །ཐོས་དང་དབེན་ལས་སྐྱེས་པའི་བསམ་གཏན་གྱི། །བདེ་བའི་ཡོངས་སུ་སྤྱད་པ་བསྒྲུབ་པའམ། །འགྲོ་མང་སྡུག་བསྔལ་རྒྱུ་དང་ཕྲལ་འདོད་ཅིང་། །བྱང་ཆུབ་སྤྱོད་ལ་འཇོག་པའི་བློ་ཆེན་པོས། །གཞན་ཕན་ཆེད་དུ་བདག་ཉིད་ཞུགས་རྣམས་ཀྱང་། །གང་ལ་དད་པའི་སྙིང་ཆུས་བྲན་པ་ཡི། །
མིག་གི་ཨུཏྤལ་གསར་དུ་འབུས་པ་ལ། །འཕགས་པས་སྐལ་པར་འཚམས་པའི་གཟུགས་བསྟན་ཏེ། །སྐྱེ་བོ་བྱེ་བ་ཁྲག་ཁྲིག་ཐབས་གཅིག་གིས། །སྨིན་པར་ནུས་པའི་གདམས་ངག་ཆེན་པོ་འབོག །ལམ་མ་ཞུགས་དང་ཐེག་པའི་བཞོན་པ་ཅན། །རང་འབྲས་ཁྱིམ་དུ་འབད་པས་བགྲོད་བྱེད་པ། །དེ་དག་ཕྱིར་མི་ལྡོག་པའི་གྲོང་ཁྱེར་དུ། །སྐད་ཅིག་ཡུད་ལ་ཅུང་ཟད་རྩོལ་བས་གཞོག །ལྷག་པའི་བསམ་པས་ནན་ཏན་འགྲོས་ལྡན་ཞིང་། །ལྟ་བ་མ་འཁྱོགས་རྒྱགས་དང་གཡོ་མེད་པ། །དེ་ལ་གྲགས་པ་ཆེན་པོ་ཐུགས་བརྩེ་སྟེ། །མཐུ་དང་བརྩོན་འགྲུས་བརྟུལ་བ་བརྟན་པོ་ཡིས། །བཟང་པོ་སྤྱོད་པའི་ཕ་རོལ་ཕྱིན་ལ་བཀོད། །རྒྱུ་མེད་སྨྲ་དང་ཕྱི་མ་མི་འཚལ་ཞིང་། །ཆོག་མི་ཤེས་དང་རྨོངས་པའི་མུན་པར་འཐམ། །ཁྲོ་སོགས་ཀུན་དཀྲིས་ཆེན་པོས་ཟག་བཅས་ཀྱི། །དགེ་རྩ་ཐམས་ཅད་སྤྲུགས་པར་བགྱིད་པ་དང་། །མོས་པའི་སྙིང་གི་སྣོད་ཆག་ཕས་ཕམ་པས། །ལྟུང་བའི་དངོས་ལས་ལྡང་བར་མ་ནུས་པ། །མཁས་པས་སྤངས་པའི་རྒྱལ་བློན་ཉན་ཐོས་དང་། །རྒྱལ་བའི་བརྒྱུད་དུ་དང་པོར་སྐྱེས་པ་རྣམས། །སྡིག་སེམས་གཟུགས་བརྙན་ཆུ་སྲིན་ཁྲོས་པའི་ཁར། །ལས་ཀྱི་རླུང་གིས་བདས་་
ལས་ཕྱིར་ལྷོན་ཏོ། །ངན་པར་འགྲོ་བའི་ལམ་གྱི་རྒྱུན་གཅོད་ཅིང་། །དཀར་པོའི་ཆོས་སྣོད་ཞིག་པ་སླར་ལ་འཆོས། །དེ་དག་ཕྱིར་དུ་དགེ་སྦྱོང་གཟུགས་སོགས་ཀྱིས། །མཐའ་འཁོབ་རྣམས་སུ་འབྱུང་ཞིང་གནས་པ་སྟོན། །ཐམས་ཅད་མཁྱེན་པས་བཤད་པའི་ཟབ་མོའི་མདོ། །གཟུངས་དང་བཟོད་པ་ས་རྣམས་སྟོན་བྱེད་པ། །སྔོན་ཆད་མ་ཐོས་ཆོས་ཀྱི་རྔ་བརྡུངས་ནས། །སྙིང་ལ་ཉལ་བའི་ཐེ་ཚོམ་ལས་སློང་སྟེ། །ངོ་མཚར་བཅས་པས་གཏོང་ཞིང་འཆགས་པའི་ཞུགས། །སྒྲིབ་པའི་ཚང་ཚིང་གང་ན་ཡོད་པར་བཀྱེ། །གལ་ཏེ་མོས་ལ་སོགས་པའི་འབབ་སྟེགས་ཅན། །ལྷག་པའི་བློ་ཡི་མེ་ལོང་ཕྱིས་ན་ཡང་། །ཟག་པའི་དྲི་མས་མིག་བུ་མ་དག་པ། །འཕགས་པ་མཐོང་བའི་སྐལ་པས་དམན་པ་ལ། །སེམས་དང་མཐུན་པའི་གཟུགས་སུ་དེ་གསལ་ནས། །ཐབས་དང་ལྡན་པའི་ཡེ་ཤེས་མིག་ཕྱེ་སྟེ། །མཐུ་ཆེན་བརྟུལ་བ་བརྟན་པོ་རང་ཉིད་ཀྱི། །རྒྱལ་ཐབས་བུམ་ཆུ་དེ་དག་སྤྱི་བོར་བླུགས། །ཐུན་མོང་མིན་པའི་ཡོན་ཏན་དེ་མཚོན་ཞིང་། །ཤིན་ཏུ་དཔའ་བ་ལས་བྱུང་ཡིད་བཞིན་གྱི། །ནོར་བུ་བརྒྱ་བྱིན་ཐོགས་པ་འོད་འབར་བ། །སྣང་བའི་དབུས་ན་ཉི་མའི་གཟི་འོད་ཅན། །དེ་ཡི་ཡན་ལག་དམ་པའི་རྒྱན་ཏུ་ཐོགས། །ཀུན་
རྫོབ་བདེན་པས་བསྒྲུབས་པའི་ཚོགས་བསྟན་ཀྱང་། །གནས་བརྟན་ཟག་པ་ཟད་དང་ས་ཐོབ་སོགས། །དབང་པོ་དྲུག་དང་རྣམ་གྲོལ་ལ་རྨོངས་ན། །དོན་དམ་སྐྱེ་བ་མེད་པའི་མཐུ་བསྟན་པས། །རྒྱུན་མཐའི་ས་ལ་གནས་པ་མ་གཏོགས་པ། །ལྷར་བཅས་འགྲོ་བ་རྨོངས་ཤིང་བསླད་པ་ཡི། །སྦྱོར་བའི་མཚན་མ་རྣམ་པར་བརྟག་པ་དཀའ། །འཇིག་རྟེན་དག་ན་ཕ་མཐའ་མི་རྙེད་པ། །ནམ་མཁའི་མཐའ་ནི་ལ་ལས་རྙེད་སྲིད་ཀྱི། །སྲིད་པའི་གཡུལ་ངོ་ཟློག་པའི་དཔའ་བོ་དེས། །བྱམས་དང་སྙིང་རྗེ་ཏིང་འཛིན་སྟོབས་བསྐྱེད་དེ། །ཡེ་ཤེས་ཐབས་ཀྱིས་སེམས་ཅན་ཡོངས་སྨིན་པ། །དེ་ཡི་ཚད་ནི་སུས་ཀྱང་བཟུང་དུ་མེད། །རྒྱ་མཚོའི་ཐིགས་པ་ཤིན་ཏུ་ཕྲ་བ་དང་། །གངྒཱའི་བྱེ་མའི་རྡུལ་ལས་ཆེས་མང་བའི། །དེ་བཞིན་གཤེགས་སོགས་སྣ་ཚོགས་འཕྲུལ་ཆེན་པོ། །དངོས་དང་རྨི་ལམ་ན་ཡང་སྤྲུལ་པར་མཛད། །ཁྱོད་མཚན་ཐོས་ནས་སུ་ཞིག་མོས་པའི་བློས། །ཚོན་གྱི་ཕྱེ་མས་བྲིས་པའི་གཟུགས་མཆོད་དམ། །བདག་གི་སྲོག་ཀྱང་གང་ལ་འབུལ་བྱེད་པ། །དེ་ལ་ཇི་སྲིད་འཚོ་ཡི་བར་དུ་ཡང་། །ལྟུང་བའི་རྩ་བས་ཉམས་པར་མི་འགྱུར་ཞིང་། །དུས་མིན་འཆི་སོགས་འཇིགས་པས་མི་འཇིགས་པར། །
དུས་ཀྱི་ས་རྣམ་ཤེས་ཐ་མ་རྒྱུ་བའི་ཚེ། །སྔོན་ཆད་འདྲིས་པའི་གཟུགས་ཀྱིས་ཆོས་བསྟན་ཏེ། །སྒྲིབ་པའི་ལྷག་མ་ཐུགས་རྗེའི་མཐུས་བསལ་ནས། །ད་ལྟར་འཚོ་གཞེས་རྙོགས་པ་བྲལ་བ་ཡི། །སངས་རྒྱས་ཞིང་ཁམས་རྣམས་སུ་ལམ་སྣ་འདྲེན། །ཇི་ལྟར་སྐལ་པ་དམན་ཀྱང་མཐོ་རིས་ཀྱི། །སྐྱེད་མོས་ཚལ་དུ་དགེ་བའི་སྐྱེད་བསྲིངས་ནས། །མཐར་གྱིས་ཐར་པའི་ལང་ཚོ་བརྟའ་བར་མཛད། །དེ་བཞིན་གཤེགས་པ་སྐྱེས་བུའི་མཐུ་ཆེན་པོས། །བདག་ཅག་ཁྱོད་མཚན་ཐོས་ནས་མོས་བྱེད་ཀྱང་། །ཧ་ཅང་མུན་པའི་རྒྱ་རུ་འཐུམ་དྲག་པས། །རྨི་ལམ་དུ་ཡང་ཁྱོད་ཞལ་མངོན་མ་གྱུར། །འགྲོ་ལ་ཕན་ཕྱིར་བྱང་ཆུབ་སེམས་བསྐྱེད་ཀྱང་། །དང་པོ་ལས་ཀྱང་དང་པོའི་ལས་ཅན་བདག །ལྟུང་བའི་ཁུར་གྱིས་ཡང་ཡང་ནོན་གྱུར་སྟེ། །འཕགས་པའི་ས་ལ་ལྡང་བའི་སྐབས་དབེན་པས། །ཐུགས་རྗེ་མཆིས་ན་ཕྱུང་བའི་དུས་ལགས་སོ། །སྡུག་བསྔལ་ཁུར་པོས་ཉིན་གཅིག་ནོན་གྱུར་ན། །དོར་བའི་ངལ་བ་བརྒྱ་ཕྲག་བསྟན་རྣམས་ཀྱང་། །ཡུན་རིང་སྡུག་བསྔལ་འབྱུང་གནས་ལྟུང་བའི་ཁུར། །རི་ཙམ་བརྩེགས་ཀྱང་ཡང་བ་བཞིན་ཏུ་ཁྱེར། །གདུགས་མཚན་གཅིག་ཏུ་སྙིང་ནས་ཁྱོད་དྲན་ན། །རྩ་བའི་ལྕི་བ་བདེ་
བླག་བོར་ནུས་ཀྱང་། །དམན་པའི་སྐལ་པར་དེ་ཡང་མ་ཤོང་བར། །དོན་མེད་སྤྱོད་པ་བདག་འདྲར་ཐུགས་རྗེས་དགོངས། །ཡེ་ཤེས་སྤྱན་ལ་སྒྲིབ་པ་མི་མངའ་བས། །མི་ཤེས་བྱིས་པའི་རང་བཞིན་འདི་གཟིགས་སམ། །སྙིང་རྗེའི་ཡུལ་དུ་བདག་ཀྱང་གཏོགས་པས་ན། །ཀྱེ་ལགས་ཐུགས་རྗེའི་དགབ་པ་སྩལ་དུ་གསོལ། །དམན་པའི་དུས་དང་སྐལ་པ་དབང་བཙན་པས་ལྟུང་བའི་ལྕིད་ཀྱིས་ཤིན་ཏུ་ནོན་ཀྱང་ལེགས་པར་ལྡང་བའི་བསམ་སྦྱོར་ལ་རྟག་ཏུ་ཞུགས་པའི་བློ་གྲོས་མཐའ་ཡས་ཀྱི་གོ་ཆ་ཅན་གྱིས། རྒྱལ་མོ་ཤིང་གི་རོང་དུ་དོན་གཉིས་བསྒྲུབ་པའི་གཟུགས་བརྙན་ལ་ཞུགས་པ་ན་དད་པས་བྲིས་པ་སྐྱེ་བ་ཀུན་ཏུ་རྒྱལ་སྲས་ནམ་མཁའི་སྙིང་པོས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ། །འཕགས་པ་ཀུན་ཏུ་བཟང་པོའི་རྣམ་ཐར་ཕྱོགས་གཅིག་གི་ཆ་ཤས་ལ་ཅུང་ཟད་བསྔགས་པ་ནོར་བུ་རིན་པོ་ཆེའི་རྒྱལ་པོ་རྣམ་ཐར་རྒྱ་མཚོ་གྲངས་མེད་པ་རྗེས་སུ་སྒྲོག་པའི་སྤྲིན་གྱི་ཚར་ཞེས་བྱ་བ་བཞུགས་སོ། །ན་མ་སྶ་མནྟ་བྷ་དྲཱ་ཡ། །འཕགས་པ་ཀུན་ཏུ་བཟང་པོ་རྒྱལ་རྣམས་དང་། །ཡང་དག་མཐའ་ལ་གནས་པ་མཚུངས་མོད་ཀྱང་། །སེམས་ཅན་སྙིང་རྗེས་གཟིགས་པའི་ས་ལ་བཞུགས། ཁམས་གསུམ་ལས་འདས་ཉེས་པའི་རྡུལ་རྣམས་སྤངས། །མཁའ་མཉམ་རབ་གསལ་ཆོས་ཀྱི་སྣང་བ་བརྙེས། །
སུས་ཀྱང་མི་བརྫི་ཁྱུ་མཆོག་རླབས་པོ་ཆེ། །དཔེ་མེད་དཔེ་ལས་འདས་པ་ནམ་མཁའ་ལྟར། །ཡེ་ཤེས་སྤོབས་པའི་སྤྱོད་ཡུལ་བསམ་མི་ཁྱབ། །བ་སྤུའི་ཁུང་བུ་གཅིག་ན་ཆེས་ཕྲ་བའི། །ཡོན་ཏན་བྱེ་བའི་ཆར་ཡང་ཚད་མ་མཆིས། །དེ་འདྲ་རེ་རེར་ཡོངས་བཟུང་ཞིང་རྣམས་དང་། །སྐད་ཅིག་གཅིག་ལ་སྣ་ཚོགས་ཏིང་འཛིན་གྱིས། །ཀུན་ནས་སྒོ་རུ་འཇུག་པའི་བསམ་ཡས་ཐབས། །དུས་གསུམ་ཆགས་ཐོགས་བྲལ་བའི་ཤེས་རབ་དང་། །ཤིན་ཏུ་མྱུར་བའི་རྫུ་འཕྲུལ་ལྷན་ཅིག་ཞུགས། །བསམ་གྱིས་མི་ཁྱབ་རྣམ་པར་འཕྲུལ་བ་དང་། །བསྒྲུབ་པར་དཀའ་བའི་ཁྱུ་མཆོག་མཐུ་དང་ལྡན། །ཚད་མེད་སྤྱོད་ལ་འཇུག་པས་མངོན་པར་འབྱུང་། །འཁོར་བའི་མཐར་ཐུག་སྐྱོ་བ་མེད་པ་ཡི། །སྙིང་རྗེ་ཆེན་པོའི་སྨོན་ལམ་ཟད་མི་ཤེས། །མཐའ་ཡས་ཡེ་ཤེས་འཇུག་པས་རབ་ཏུ་ཞུགས། །སངས་རྒྱས་ཆོ་འཕྲུལ་བླ་ན་མེད་པ་ཐོབ། །ཆགས་མེད་མཐའ་ཡས་ རྒྱལ་བའི་སྟོབས་བཅུ་ཡིས། །རབ་བཀྲུས་ཆོས་དབྱིངས་དམ་པའི་ལུས་དང་ལྡན། །བདེ་གཤེགས་ཀུན་གྱི་བྱིན་གྱི་རླབས་ལ་གནས། །ཡེ་ཤེས་ཐ་མི་དད་པའི་རྒྱན་ཆས་སྒེག །འོད་ཟེར་དྲྭ་བས་ཆོས་དབྱིངས་རྒྱས་པར་འགེངས། །སེམས་ཀྱི་ཞེ་བརྙེས་ཤེས་རབ་མཁའ་
དང་མཚུངས། །ཏིང་འཛིན་སྟོབས་ཀྱིས་མི་འཇིགས་ཕ་རོལ་གནོན། །ཆོས་རྣམས་ཀུན་ལ་དམིགས་པ་མེད་པ་ཐོབ། །སེང་གེའི་ང་རོ་འཇིགས་པ་མེད་པར་བསྒྲགས། །སྨིན་དང་འདུལ་བ་མཐའ་དབུས་མེད་པར་རྫོགས། །སྐུ་གཅིག་འཇིག་རྟེན་ཁམས་ཀུན་རྒྱས་པར་འགེངས། །དབྱངས་གཅིག་འགྲོ་བ་ཀུན་གྱི་རྣ་བར་འབབ། །སྐྲ་སྦུབས་གཅིག་ཏུ་ཞིང་ཁམས་ཐམས་ཅད་བསྡུ། །རྡུལ་ཕྲན་གཅིག་ཏུ་སེམས་ཅན་ཀུན་ལུས་འགོད། །འགྲོ་གཅིག་ལུས་ལ་རྒྱལ་ཀུན་སྤྱོད་ཡུལ་བསྩལ། །ཏིང་འཛིན་གཅིག་ལ་ཏིང་འཛིན་སྒོ་བརྒྱ་བསྒྲུབས། །ཚིག་གཅིག་བསྟན་པས་འགྲོ་ཀུན་ཐེ་ཚོམ་བཅད། །ཡེ་ཤེས་གཅིག་གིས་ཆོས་ཀུན་དབྱིངས་ལ་འཇུག །བདེ་གཤེགས་ཀུན་གྱི་དྲུང་དུ་རྟག་འགྲོ་བས། །ལུས་མཐའ་ཡས་པར་སྐད་ཅིག་བྱིན་གྱིས་བརླབས། །ཕྱོགས་བཅུའི་སངས་རྒྱས་ཀུན་གྱི་ཞིང་མ་ལུས། །རྒྱས་བར་འགེངས་པར་སྤྱོད་ཡུལ་ཐོགས་པ་མེད། །རྒྱལ་བའི་རྣམ་འཕྲུལ་མཐའ་ཡས་ལ་དམིགས་པས། །སྤྱན་གྱི་དཀྱིལ་འཁོར་ཤིན་ཏུ་རྣམ་པར་དག །མངོན་པར་བྱང་ཆུབ་ཀུན་གྱི་སྒོར་འགྲོ་བ། །ཆད་པ་མེད་པས་ཚད་མེད་འགྲོས་དང་ལྡན། །ཆོས་ཚུལ་རྒྱ་མཚོ་གཏིང་ཕྱིན་མཁྱེན་པ་ཡི། །སྣང་བ་ནོད་པས་སྣང་བ་མཐའ་
ཡས་པ། །སོ་སོ་ཡང་དག་རིག་པ་རྣམ་དག་པས། །མཐའ་ཡས་བསྐལ་པར་ཡོན་ཏན་མི་ཟད་བསྟེན། །ཡེ་ཤེས་རྒྱ་མཚོའི་སྤྱོད་ཡུལ་རྣམ་དག་པས། །ནམ་མཁའི་ཁམས་ཀྱི་མཐའ་ཀླས་མཁྱེན་པས་ཁྱབ། །བསམ་པ་ཇི་ལྟ་བཞིན་ཏུ་འགྲོ་བའི་གཟུགས། །ཀུན་ཏུ་སྟོན་པས་གང་ལའང་གནས་པ་མེད། །སྲོག་དང་གང་ཟག་སེམས་ཅན་མེད་པའི་དབྱིངས། །ཡོངས་སུ་ཤེས་པས་རབ་རིབ་དྲུང་ནས་ཕྱུང་། །ཞིང་ཁམས་ཤིན་ཏུ་ཕྲ་བའི་རྡུལ་སྙེད་དུ། །རྒྱལ་བ་ཀུན་གྱི་དྲུང་དུ་རྟག་བཞུགས་ཏེ། །ཏིང་འཛིན་རྣམ་པར་འཕྲུལ་པ་དཔག་མེད་སྟོན། །བསམ་པ་བཞིན་ཏུ་སྐུ་ཡི་སྤྲིན་བཀྱེ་སྟེ། །ནམ་མཁའི་མཚན་ཉིད་ཅན་གྱི་རྒྱལ་སྲས་སྐུ། །གང་ལའང་མི་གནས་དེ་བཞིན་ཉིད་ལ་གནས། །འཁོར་གྱི་དཀྱིལ་འཁོར་རྣམ་ཐར་རྒྱ་མཚོ་ཅན། །ཐམས་ཅད་རྒྱལ་བའི་སྲས་ཀྱི་ལུས་སུ་ཆུད། །རྣམ་པར་སྣང་མཛད་སྨོན་ལམ་དབྱིངས་ལ་ཞུགས། །གང་ཆེན་མཚོ་ཡི་མཛོད་གནས་ནོར་བུའི་མཆོག །བཞིས་ནི་རྒྱ་མཚོ་རིན་ཆེན་འབྱུང་གནས་གྱུར། །དེ་བཞིན་གཤེགས་པའི་ཡེ་ཤེས་དཀོན་པའི་མཆོག །འཕགས་པའི་ཡེ་ཤེས་རིན་ཆེན་འབྱུང་བའི་གནས། །བཞི་པོ་ཆོས་ཀྱི་མཛོད་ན་འཁོད་པ་ཡང་། །བློ་ཆེན་ཁྱོད་དང་ཐུན་མོངས་ཉིད་དུ་གྱུར་
རིན་ཆེན་ཉི་མའི་སྙིང་པོ་ལ་སོགས་པས། །ཆུ་གཏེར་འཕེལ་འབྲི་མེད་པའི་དཔལ་སྐྱེད་ལྟར། །བསོད་ནམས་ཏིང་ངེ་འཛིན་དང་མངོན་ཤེས་སོགས། །ཀུན་མཁྱེན་ས་ལ་མཉམ་པ་ཉིད་སྡུད་པ། །མཐའ་དབུས་མེད་པ་ཡངས་པའི་ཡེ་ཤེས་ཀྱང་། །རྒྱལ་བ་རྣམས་དང་ལྷན་ཅིག་སྤྱོད་ལ་ཞུགས། །ཇི་ལྟར་ཚངས་པ་ཆེན་པོའི་གཞལ་མེད་ཁང་། །འགྲོ་ཀུན་རྒྱན་གྱི་དམ་པར་གྱུར་པ་ན། །སྟོང་གསུམ་གཟུགས་བརྙན་མ་འདྲེས་སྣང་བ་ལྟར། བ་སྤུའི་ཆ་ཤས་ཤིན་ཏུ་ཕྲ་བར་ཡང་། །བྱང་ཆུབ་སེམས་དཔའི་སྤྱོད་ཡུལ་རྣམ་འཕྲུལ་བའི། །རྒྱན་དང་བཀོད་པ་ཡོངས་སུ་རྫོགས་པར་སྣང་། །ཚད་མེད་ཡེ་ཤེས་རྡོ་རྗེའི་བློ་གྲོས་ཀྱིས། །ཆོས་དབྱིངས་མཐའ་དབུས་མེད་ལ་གནས་བཞིན་ཏུ། །འཇིག་རྟེན་ཀུན་ཏུ་གནས་པ་མེད་སྤྱོད་ཅིང་། །འགྲོ་ཀུན་ལུས་དང་གཟུགས་ཀྱི་རྗེས་སུ་ཞུགས། །དུས་གསུམ་སྐུ་ནི་མཉམ་པ་ཉིད་གྱུར་ཀྱང་། །ཡོན་ཏན་ཆེན་པོའི་རང་བཞིན་སྣ་ཚོགས་གཟུགས། །ས་ཡི་དཀྱིལ་འཁོར་ཀུན་ཏུ་མངའ་དབང་མཛད། །བྱང་ཆུབ་སྙིང་པོ་རྒྱ་ཆེར་རྟག་རོལ་ཀྱང་ །བདེ་གཤེགས་ལམ་ཆེན་སྟོན་མཛད་སྲས་ཀྱི་ཚུལ། །དག་པ་དབང་ཕྱུག་ཚིག་དང་བློ་ལ་སོགས། །
ཡོན་ཏན་བྱེ་བ་ཀུན་ལ་རྟག་ཏུ་སྦྱིན། །ཏིང་འཛིན་རྒྱ་ཆེ་དུ་མའི་ཚུལ་གྱིས་ཀྱང་། །གསང་བ་གསུམ་གྱི་སྤྱོད་ལ་འཇུག་མི་ནུས། །མི་ལྡོག་བདག་ཉིད་ཆེན་པོའི་སྤྱོད་ལ་གནས། །གཞན་གྱིས་མི་སྤྱོད་པ་ལ་རྣམ་པར་སྤྱོད། །ཆོས་ཆེན་རྒྱལ་སྲིད་ཆེ་ལ་དབང་མཛད་ཕྱིར། །དབང་མཐའ་ཡས་པ་དུས་གསུམ་ཀུན་ཏུ་སྒྱུར། །ཡོན་ཏན་གཞལ་དུ་མེད་པའི་རིན་ཆེན་ཏེ། །བསམ་གྱིས་མི་ཁྱབ་འབྱུང་བའི་རྒྱ་མཚོ་ཆེ། །ཡོན་ཏན་ཆར་རྒྱུན་འཇོ་བའི་སྤྲིན་ཆེན་ཏེ། །ས་མཚམས་ལས་འདས་ནམ་མཁའི་མཐའ་དང་མཚུངས། །ནམ་མཁའ་སྐྲ་རྩེས་གཞལ་དུ་རུང་ཡང་སྲིད། །ཞིང་རྡུལ་གྲངས་སུ་བགྲང་བར་ནུས་སྲིད་ཀྱི། །གང་ལ་ཀུན་ཏུ་བཟང་ཞེས་མཚན་གསོལ་བའི། །རྒྱལ་སྲས་དེ་ཡི་ཡོན་ཏན་ཚད་མེད་ཅེས། །རྒྱལ་བ་སྲས་དང་བཅས་པས་རྟག་ཏུ་བསྔགས། །འཇིག་རྟེན་འདི་ན་བྱིས་པ་རྣམ་པར་རྨོངས། །རྣམ་རྟོག་ཆ་གཉེར་རྟག་ཏུ་མི་ཟད་ཀྱང་། དཔེ་ཟླ་བྲལ་བ་ཁྱོད་ཀྱི་ཡོན་ཏན་ལ། །ཅུང་ཟད་ཙམ་ཡང་བསམ་པར་ནུས་མ་གྱུར། །འཁོར་བ་རྒྱུན་རིང་འདི་སྙེད་དག་ཏུ་ནི། །ཟིན་མེད་འཁོར་མོ་ཡུག་ཏུ་ལས་སྤྱོད་ཀྱང་། །ཐ་ན་སེ་གོལ་གཏོགས་པའི་ཡུན་ཙམ་དུ། །ཁྱོད་ཀྱི་ཡུལ་ལ་འཇུག་པའི་སྐལ་པ་ཕྲ། །གངྒཱའི་བྱེ་མ་
སྙེད་དང་དེ་ལས་གཞན། །ཆོས་དབྱིངས་རྗེས་སུ་སོང་བའི་ཞིང་རྣམས་སུ། །རྒྱལ་བས་ཁྱོད་ཀྱི་བསྔགས་པ་ཡང་ཡང་གསུངས། །རྣམ་པར་ཐར་པ་མུ་མཐའ་མེད་པར་གྲགས། །ཕྱོགས་བཅུའི་ཞིང་ན་ཤིན་ཏུ་དབང་ཐོབ་པའི། །སྙིང་སྟོབས་ཆེན་པོ་དཔའ་བོ་གང་བཞུགས་པ། །དེར་ན་ཁྱོད་ཀྱི་རྗེས་སུ་འབད་པས་སློབ། །སྡིག་ཏོ་ཅན་ཡང་མཚན་གྱིས་ཟིལ་ནོན་ནས། །ལོག་པར་ཞུགས་པའི་བ་དན་རིང་དུ་བསྙལ། །ཐལ་བའི་རི་བོ་ཡེ་ཤེས་རླུང་གིས་གཏོར། །སྡིག་པའི་བག་ཆགས་བྱམས་པའི་ཆོས་ཆུས་བཀྲུ། །འཁོར་བའི་རྒྱ་མཚོར་བྱིངས་རྣམས་ཕ་རོལ་བསྒྲལ། །ཉོན་མོངས་གཟེབ་ཏུ་ཆུད་པའི་སྒྲོག་བརྡལ་ཞིང་། ཞི་བ་ཕྱོགས་གཅིག་པ་ཡི་འཆིང་བ་བཅད། །འདུན་པས་འགྲོ་རྣམས་གོང་དུ་དབུགས་དབྱུང་བ། །མཁས་ཤིང་ཟབ་པའི་མཚན་ཉིད་བརྟག་མི་བཟོད། །ཁྱོད་ནི་འབྱུང་བཞིའི་ནང་ནས་ནམ་མཁའ་སྟེ། །སྣང་བ་རྣམས་ལས་ཉིན་མོར་བྱེད་པའི་འོད། །མི་དབང་ཁྲོད་ན་གསེར་གྱི་འཁོར་ལོས་སྒྱུར། །རྒྱལ་སྲས་དབུས་སུ་ཁྱོད་ནི་ཐུ་བོ་ལགས། །འཕགས་པ་ཡིས་ཀྱང་ཕྱོགས་ཙམ་མི་མཚོན་པ། །ཁྱོད་ཀྱི་ཡོན་ཏན་སོ་
སྐྱེས་ཇི་ལྟར་འཇལ། །འོན་ཀྱང་ཕན་ཡོན་མཐོང་བས་ཇི་ནུས་ཀྱིས། །སྐྱེ་བ་ཀུན་ཏུ་ཁྱོད་ལ་བསྔགས་པར་འདོད། །ས་བཅུའི་དབང་ཕྱུག་རྣམས་ཀྱང་བླ་མ་ལྟར། །བསྙེན་ཅིང་དཔེ་རུ་བྱ་བའི་སྤྱོད་ཡུལ་ལ། །བྱིས་པས་ཅུང་ཟད་ཞུགས་པར་ནུས་མིན་ཀྱང་། །ངོ་མཚར་ཆེན་པོའི་རྗེས་སུ་འབད་པས་སློབ། །ཏིང་འཛིན་སྒོ་བརྒྱ་ལྡན་པའི་ཁང་བཟང་དུ། །ས་བཅུའི་དབང་ཕྱུག་རྣམས་ཀྱི་ཚོགས་ཀྱི་དབུས། །འཇིག་རྟེན་མགོན་པོ་འཇིགས་པ་མེད་པར་བཞུགས། །དེ་བཞིན་རྡུལ་སྙེད་ཞིང་ན་དེ་སྙེད་སྐུ། །ཡོན་ཏན་བྱེ་བས་བརྒྱན་པའི་ཀུན་ཏུ་བཟང་། །རྟག་ཏུ་དད་པའི་ཡིད་ཀྱིས་བསམ་པར་བགྱི། །དབྱངས་གཅིག་གིས་ཀྱང་ཕྱོགས་དུས་ཐམས་ཅད་དུ། །ཡོན་ཏན་རྗེས་སུ་ཁྱབ་པའི་བསྔགས་པ་བརྗོད། །བདག་ལུས་ཞིང་ཁམས་རྒྱ་མཚོའི་རྡུལ་སྙེད་དང་། །དེ་སྙེད་འགྲོ་བ་རེ་རེའི་ལུས་བཏུད་དེ། །བསོད་ནམས་བརྒྱ་པའི་ཞབས་མཐིལ་སྤྱི་བོར་ལེན། །སྣ་ཚོགས་བཀོད་པའི་འོད་ཟེར་སྟོང་འབར་བས། །ཆོས་དབྱིངས་མཐའ་དབུས་མེད་པར་གཏམས་པ་ཡི། །ཕྱག་རྒྱའི་སྤྲིན་ལས་མཆོད་པའི་ཆར་ཕབ་པ། །ཇི་ལྟར་མཁས་པ་ཀུན་ཏུ་བཟང་པོ་ཡི། །བྱང་ཆུབ་སེམས་དང་རྣམ་པར་ཐར་པ་ཡིས། །བཀོད་
པའི་ཁྱད་པར་མ་ཚང་མེད་པས་མཆོད། །རྨི་ལམ་དུ་ཡང་མི་དགེའི་རྩ་བ་དང་། །མི་འགྲོགས་རྣམ་སྨིན་རྣམ་པར་སུན་འབྱིན་ཅིང་། །དྲན་པས་ཉེས་སྤྱད་བསྡམས་པའི་སྒོ་གཏན་དང་། །ཤེས་བཞིན་སྒོ་གླེག་རྟག་ཏུ་དཔའ་བ་ཡིས། །དེང་ནས་ཀུན་ཏུ་བཟང་པོའི་སྤྱོད་ལ་འཇུག །བྱང་ཆུབ་ས་བོན་དངོས་དང་བརྒྱུད་པ་ནས། །དུས་གསུམ་བཟང་པོ་སྤྱོད་པས་གང་བཏབ་པ། །དེ་འབྲས་སྤྱོད་དང་ཆར་ཡང་གཏོགས་པ་ནི། །ཆོས་དབྱིངས་ཁོངས་སུ་མཆིས་སོ་ཅོག་ཀུན་ལ། །ཡི་རང་ནམ་ཟླ་ཕྱོགས་མེད་དྲོས་པས་བརླན། །སྲིད་པའི་སྐྱེ་རྒྱུན་རབ་ཏུ་གཅོད་བྱེད་པ། །དམ་ཆོས་འཁོར་ལོ་རྒྱ་ཆེན་བསྐོར་བཞིན་ཏུ། །མཁའ་དང་འགྲོ་ཁམས་ཇི་སྲིད་དེ་སྲིད་དུ། །གཟུགས་སྐུ་གདུལ་བྱའི་མིག་ལ་སྣང་མཛད་གསོལ། །སྲས་བཅས་རྒྱལ་བའི་ཡོངས་བསྔོ་རྒྱ་མཚོ་ལ། །བདག་གཞན་ལེགས་པར་སྤྱད་པའི་ཆུ་ཐིགས་ཀུན། །དམིགས་པ་མེད་པའི་སེམས་ཀྱིས་ལེགས་བསྲེས་པས། །ཀུན་ཏུ་བཟང་སོགས་རྒྱལ་དང་རྒྱལ་སྲས་ཀྱི། །རྣམ་ཐར་རྒྱ་མཚོ་གྲངས་མེད་བྱེ་བ་ཕྲག །གོང་ནས་གོང་དུ་འཕེལ་བ་བདག་རྒྱུད་ལ། །མྱུར་དུ་རྫོགས་ཏེ་མཚུངས་པ་མེད་གྱུར་ཅིག །སྲིད་པ་གཞན་ཏུ་ཉིང་མཚམས་མི་སྦྱོར་བར། །
སྣང་བ་མཐའ་ཡས་ཞིང་རབ་བདེ་ལྡན་ཏུ། །འདབ་བརྒྱ་མཛེས་པའི་ལྷུམས་ན་མཚན་དཔེའི་ལུས། །སངས་རྒྱས་ཆོས་ཀྱི་སྣོད་དུ་སྐྱེས་གྱུར་ནས། །ས་བཅུའི་དབང་ཕྱུག་རྣམས་དང་སྐལ་མཉམ་ཤོག །རྒྱལ་དང་རྒྱལ་སྲས་ཐུ་བོ་མ་ལུས་པས། །བྱིན་གྱིས་བརླབ་ཅིང་རྗེས་སུ་བཟུང་ནས་ཀྱང་། །འཆལ་དང་ང་རྒྱལ་སྙོམ་ལས་ཐེ་ཚོམ་སོགས། །བྱང་ཆུབ་སྤྱོད་ལ་བར་གཅོད་མི་འབྱུང་བར། །འཁོར་འདས་ཀུན་ན་མཉམ་པ་མེད་པ་ཡི། །རྣམ་ཐར་སྨོན་ལམ་ཕྲིན་ལས་འགྲུབ་གྱུར་ཅིག །འདི་ཡང་འཕགས་པ་ཉིད་གཟུགས་བརྙན་ཟོལ་གྱིས་རྟག་ཏུ་བཞུགས་པའི་མ་ཧཱ་ཚིན་གྱི་རི་བོ་འོ་མི་ཤན་དང་འདབ་ཆགས་པའི་ལྗོངས་སུ་ཡོན་ཏན་རྒྱ་མཚོས་དད་པས་བྲིས་པ་སྐྱེ་བ་ཀུན་ཏུ་འཕགས་མཆོག་ཀུན་ཏུ་བཟང་པོས་རྗེས་སུ་འཛིན་པའི་རྒྱུར་གྱུར་ཅིག །མངྒ་ལཾ། །སྐྱེས་ཐོབ་དམན་ཞིང་སྦྱངས་བའི་མཐུ་ཆུང་བས། །འཆད་རྩོད་རྩོམ་གསུམ་ནུས་པའི་གདིང་མེད་ཅིང་། །ཅུང་ཟད་ཤེས་པ་གཞན་གྱི་ཆགས་སྡང་རྒྱུ། །ཕན་པ་མེད་ལ་གནོད་པའི་སྣ་འདྲེན་པ། །སྙིགས་དུས་མཁས་པའི་བྱ་བས་ཅི་ཞིག་བྱ། །འོན་ཀྱང་རྒྱལ་སྲས་ཁྱུ་ཆོག་འདི་དག་གིས། །ཡོན་ཏན་མཐོང་ནས་མི་བཟོད་དད་པ་ཡིས། །བསྔགས་བརྗོད་རྒྱ་མཚོའི་སྤྲིན་ཆེན་གཡོ་བ་ལས། །རྣམ་ཐར་ནོར་བུའི་ཆར་པ་འདི་ཕབ་བོ། །རྒྱལ་བ་ཉིད་དང་ཉེ་བའི་
སྲས་འདི་རྣམས། །སྔགས་སུ་དཀྱིལ་འཁོར་གཙོར་ཡང་གསུངས་མོད་ཀྱི། །འདིར་ནི་ཕལ་ཆེར་མདོ་སྡེའི་ཚུལ་དག་དང་། མཐུན་པའི་བསྔགས་པ་ཇི་ལྟར་དཔོག་པ་བརྗོད། །འདོད་པའི་ཚེ་རས་བྲལ་ཞིང་ལྡོག་པ་མེད། །ཀུན་བཟང་སྨོན་ལམ་སྤྱོད་ལས་ངེས་བྱུང་བ། །བསམ་གྱིས་མི་ཁྱབ་རྒྱལ་སྲས་མཆོག་རྣམས་དང་། །བདག་གཞན་འགྲོ་བ་མཉམ་པ་ཉིད་བརྙེས་ཤོག །ཅེས་ཉེ་བའི་སྲས་ཆེན་བརྒྱད་ལ་བསྔགས་པ་བརྗོད་པའི་ཚིག་ཕྲེང་འདི་རྣམས་ཀརྨ་བཀའ་བརྒྱུད་ཀྱི་བཙུན་པ་ཡོན་ཏན་རྒྱ་མཚོས་ཤར་རོང་གི་ལྗོངས་རྒྱུ་བའི་སྐབས་ཅི་རིགས་པར་བསྟར་བ་བཀྲ་ཤིས་དཔལ་འབར་འཛམ་གླིང་མཛེས་པའི་རྒྱན་ཏུ་ཤོག །ཤུ་བྷཾ།། ༈ །།རྒྱལ་བས་ལུང་བསྟན་རྒྱལ་ཚབ་ཀུན་མཁྱེན་རྗེས། །རྒྱལ་བ་ཉིད་དང་རྒྱལ་སྲས་རྣམས་བསྔགས་སྤར། །རྒྱལ་ །སྲས་རྣམས་བཅས་རྒྱལ་བ་དགྱེས་བསྒྲུབས་དགེས། །རྒྱལ་བ་མིན་ཀུན་རྒྱལ་མཆོག་ཉིད་གྱུར་ཅིག །ཅེས་དཔལ་སྤུངས་ཆོས་གྲྭར་རྗེའི་གསུང་གི་བདུད་རྩིས་འཚོ་བ་ཀརྨ་མངྒ་རསྨིས་སྤར་དུ་བཀོད་པའོ། སརྦ་དཱ་ཀ་ལྱཱེ་ཾ། །