འཁོར་ལོའི་མགོན་པོའི་ངོ་བོར་བཞུགས་པའི་ལྷག་པའི་ལྷ་ཡིད་བཞིན་འཁོར་ལོ་ལ་བསྟོད་པའི་ཚོགས་ཕྲེང་བར་བསྟར་བ་ཡོངས་སུ་སྦྱངས་པའི་བཻདཱུརྱའི་ཕྲེང་བ།
འཁོར་ལོའི་མགོན་པོའི་ངོ་བོར་བཞུགས་པའི་ལྷག་པའི་ལྷ་ཡིད་བཞིན་འཁོར་ལོ་ལ་བསྟོད་པའི་ཚོགས་ཕྲེང་བར་བསྟར་བ་ཡོངས་སུ་སྦྱངས་པའི་བཻདཱུརྱའི་ཕྲེང་བ་ཞེས་བྱ་བ་བཞུགས་སོ། །
རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོ་ལ་གསོལ་བ་འདེབས་པ་བདུད་རྩིའི་ལྗོན་ཤིང་ཞེས་བྱ་བ། ན་མ་ཨཱརྱཱ་ཏཱ་རཱ་ཡཻ། །སྐྱེ་འགགས་མེད་པའི་ནམ་མཁའ་ལ། །ཐུགས་རྗེའི་ཟླ་བ་ཤར་བ་ཡིས། །འཇིགས་པའི་ཚ་གདུང་གཞིལ་མཛད་པ། །འཕགས་མ་མཆོག་ལ་ཕྱག་འཚལ་ལོ། །འགྲེའོ། །གང་ལ་བསྟེན་པས་དོན་གཉིས་ཀྱི། །ནོར་བུ་འདོད་དགུར་འབྱུང་བ་ཡང་། །འབད་མེད་ལག་རྩེར་སྦྱིན་པ་པོ། །འཕགས་མ༴ །སྐད་ཅིག་དྲན་པ་ཙམ་གྱིས་ཀྱང་། །བརྒྱད་དང་བཅུ་དྲུག་འཇིགས་པ་འཇོམས། །ཚེ་དང་ཡེ་ཤེས་མཆོག་སྩོལ་བ། །འཕགས་མ༴ །ཉེས་པའི་ཚང་ཚིང་དཀྲིགས་གང་དེ། །རབ་འབར་ཐུགས་རྗེའི་ཞུགས་ཆེན་ལ། །ལྷག་མ་མེད་པར་བཞེན་མཛད་པ། །འཕགས་
མ༴ །མོས་པའི་འབབ་སྟེགས་མངོན་མཐོ་བ། །དེ་དེར་ཡེ་ཤེས་གཟིགས་པ་ལྷུང་། །མོས་པ་ཐ་དད་མཁྱེན་པ་པོ། །འཕགས་མ༴ །མོས་པ་དུ་མ་དགར་མཛད་པའི། །སྣ་ཚོགས་ཐབས་ཀྱི་དབྱིག་གིས་ནི། །རེ་བའི་ཤིང་རྟ་འགེང་བ་པོ། །འཕགས་མ༴ །བདག་དང་བདག་གིར་མེད་པ་ཡི། །ཤེས་རབ་དབུས་སུ་གནས་བཅས་ནས། །ཤེས་བྱའི་མཐའ་ལ་རྟོག་པ་པོ། །འཕགས་མ༴ །གང་ལ་མོས་པ་མེད་པར་ཡང་། །སྟེས་ཏེ་ཁྱོད་མཚན་གང་ཕྱིར་དྲན། །དེ་དེའི་འཇིགས་པ་མྱུར་དུ་འཕྲོག །འཕགས་མ༴ །སྙིང་རྗེའི་ཆུ་ཡིས་བྲན་གྱུར་པའི། །ཐུགས་ཀྱིས་སྲིད་པའི་ཁམས་ཀུན་ཏུ། །ཉིན་མཚན་རེར་ཡང་ལན་དྲུག་གཟིགས། །འཕགས་མ༴ །སྙིགས་མའི་མུན་པ་ཆེན་པོ་
ཡང་། །བསལ་བྱེད་ཉི་ཟླའི་འོད་སྣང་ཅན། །དགོངས་མཚོ་བསྲུབས་ལས་སྐྱེད་པ་པོ། །འཕགས་མ༴ །འཕགས་པའི་ཡུལ་དུ་ཟླ་བ་དང་། །ལྗོངས་འདིར་བསྟན་པའི་ཉིན་བྱེད་སོགས། །མཁས་གྲུབ་རྒྱ་མཚོ་སྤྲུལ་པ་པོ། །འཕགས་མ༴ །སངས་རྒྱས་དུས་གསུམ་དུ་གཤེགས་པ། །མཆོག་དམན་སྲས་བཅས་ཁྱོད་ལས་འཁྲུངས། །རྒྱལ་བ་རྒྱ་མཚོའི་རིགས་ཀྱི་བདག །འཕགས་མ༴ །ཁྱོད་ནི་ཤེས་རབ་ཕ་རོལ་ཕྱིན། །འཁོར་འདས་ཀུན་ལ་ཁྱབ་པ་པོ། །གང་དུའང་མི་དམིགས་བསམ་བརྗོད་བྲལ། །འཕགས་མ༴ །ཤེས་རབ་མཆོག་གི་རྩལ་གྱིས་ནི། །ཟག་བཅས་ཟག་བཅས་མ་ཡིན་པའི། །སྲིད་ཞིའི་དགེ་བ་མཐའ་དག་སྐྱེད། །འཕགས་མ༴ །ཁྱོད་ནི་རིག་པའི་ཡེ་ཤེས་ཏེ། །ཀློང་ཡངས་ཆེན་པོའི་སྦུབས་སུ་ཞུགས། །ངོ་བོ་རང་བཞིན་ཐུགས་རྗེའི་བདག །འཕགས་མ༴ །སྣང་བ་གཤིས་ལ་ཡོད་པ་དང་། །སྣང་ནས་སྣང་བར་འགྲོ་བ་ཀུན། །ཡེ་ཤེས་སྟོབས་ཀྱི་རོལ་པ་སྟེ། །འཕགས་མ༴ །མུན་ནས་མུན་པར་འཇུག་པར་ཡང་། །ཐབས་ཀྱིས་སྣང་བའི་སྒོ་འཕར་ཕྱེ། །འགྲོ་བ་མཐའ་དག་སྒྲོལ་བ་པོ། །འཕགས་མ༴ །ཁྱོད་ནི་གནས་ལུགས་ཕྱག་རྒྱ་ཆེ། །དུས་གསུམ་རྒྱལ་བའི་དགོངས་པ་སྟེ། །ཐོག་མ་དང་ནི་ཐ་མ་མེད། །འཕགས་མ༴ །ཁྱོད་ནི་མེ་ལོང་ཡེ་ཤེས་ཏེ། །ཡེ་ཤེས་ཀུན་གྱི་རྒྱུ་མཚན་ཕྱིར། །
མཉམ་པ་ཉིད་སོགས་རྟག་ཏུ་འཆར། །འཕགས་མ༴ །ཁྱོད་ནི་རྒྱུན་གྱི་མཐར་སྐྱེས་པའི། །རྡོ་རྗེ་ལྟ་བུའི་ཏིང་འཛིན་ཏེ། །དཔག་མེད་ཡོན་ཏན་ཀུན་གྱི་གཏེར། །འཕགས་མ༴། ཁྱོད་ནི་ཞིང་ས་འདྲ་བ་ཡི། །བླ་ན་མེད་པའི་བྱང་ཆུབ་སེམས། །འཕགས་བཞིའི་བྱང་ཆུབ་མ་ལུས་འཁྲུངས། །འཕགས་མ༴ །ཁྱོད་ནི་རང་བྱུང་འོད་གསལ་བ། །བརྗོད་མེད་ཁོངས་ནས་ཤར་བའི་དོན། །ནང་གསལ་རྒྱ་ཡན་ཟུང་དུ་འཇུག །འཕགས་མ༴ །སྣ་ཚོགས་ཁམས་དང་དབང་པོ་ལ། །སྣ་ཚོགས་སྐུ་དང་སྣ་ཚོགས་གསུང་། །དེ་བཞིན་སྣ་ཚོགས་ཐུགས་སུ་སྣང་། །འཕགས་མ༴ །ཁྱོད་ནི་དོན་དམ་བདེན་པ་སྟེ། །གཅིག་གིས་གར་གྱིས་དུ་མའི་ཉམས། །སྒྱུ་འཕྲུལ་གསང་བ་བསམ་མི་ཁྱབ། །འཕགས་མ༴ །ཀུན་རྫོབ་ཀུན་་རྫོབ་ཏུ་བདེན་པ། །ཕུན་སུམ་ཚོགས་ལྔས་བཟུང་བ་ཡང་། །ཁྱོད་ཀྱི་ཐུགས་རྗེའི་རང་འོད་ལགས། །འཕགས་མ༴ །གང་ཞིག་ལས་ཀྱི་འཇིགས་པ་ཡང་། །གཞོམ་ནུས་ལས་ལ་དབང་བ་ཡི། །སྟོབས་སོགས་དབང་ཕྱུག་གོ་ཆ་ཅན། །འཕགས་མ༴ །མདོར་ན་རྒྱལ་བ་སྲས་བཅས་ཀྱི། །ཡུམ་གྱུར་ཡིད་བཞིན་འཁོར་ལོ་སྟེ། །འགྲོ་ཀུན་སྲིད་མཚོ་ལས་སྒྲོལ་བའི། །ཐུགས་རྗེའི་གཏེར་ཆེན་ཁྱོད་ལས་སུ། །དེ་ཕྱིར་བདག་ནི་སྐྱེ་བ་ཀུན། །འཕགས་མ་ཨུཏྤལ་འཆང་བ་ཉིད། །མཉེས་ནས་རྗེས་བཟུང་མ་གྱུར་བར། །
སྐྱབས་གཞན་ཚོལ་བར་མ་གྱུར་ཅིག །ཙནྡྲ་གོ་མཱི་འཕགས་པ་དང་། །རྒྱལ་དབང་ཆོས་ཀྱི་འབྱུང་གནས་བཞིན། །བདག་ཀྱང་མྱུར་དུ་རྗེས་བཟུང་སྟེ། །དོན་གཉིས་ལྷུན་གྱིས་གྲུབ་པར་ཤོག །བསྟན་འཛིན་སྐྱེས་བུའི་ཞབས་པད་བརྟན། །བསྟན་པ་རིན་ཆེན་ཡུན་ཏུ་གནས། །གནས་སྐབས་ཆོས་མཐུན་དཔལ་གྱིས་འབྱོར། །བསམ་དོན་ཡོངས་རྫོགས་བཀྲ་ཤིས་ཤོག །ཅེས་པའང་རང་ལོ་ཉེར་གཉིས་རྒྱལ་ཟླའི་ཚེས་དགེ་བར་འདི་ཉིད་བསྙེན་པའི་ཐུན་མཚམས་ཞིག་ཏུ་སྙིང་ནས་གསོལ་བ་འདེབས་པ་པོ་ནི་ཀརྨ་ངག་དབང་ཡོན་ཏན་རྒྱ་མཚོའོ། །སརྦ་ཐཱ་མངྒ་ལཾ།། ༈ །།རྗེ་བཙུན་འཕགས་མ་སྒྲོལ་མ་ཡིད་བཞིན་འཁོར་ལོ་ལ་གསོལ་བ་འདེབས་པ་འཆི་མེད་གྲུབ་པའི་ལྗོན་ཤིང་ཞེས་བྱ་བ། རབ་དཀར་ཆུ་སྐྱེས་དབུས་འཁྲུངས་རྒྱལ་བའི་ཡུམ། །མཚན་ཐོས་ཙམ་གྱིས་འཇིགས་པ་ཀུན་སྒྲོལ་མ། །མུན་པའི་གོ་འཕང་བསྙིལ་འོད་རྣོ་ལྡན་པའི། །སྟོན་ཟླའི་སྟེང་དུ་རང་བྱུང་པདྨ་ཅན། །ཚུལ་ཁྲིམས་རྣམ་དག་བརྟན་ལྡན་བསུང་ངད་སྤྲོ། །པདྨའི་ཟེ་བ་ནོར་བུའི་འོད་ཟེར་འབར། །ཀུན་རྟོག་གཅིག་ཆར་སྡུད་བྱེད་མེ་ཏོག་མདའ། །འོ་མའི་ཆུ་གཏེར་རབ་དཀྲུགས་ཞི་བའི་ལུས། །མུ་ཏིག་འོད་ལྡན་རོལ་པའི་འཛུམ་རླབས་དཀར། །ག་པུར་དྲི་བསུང་ཉིད་དང་ལྷན་ཅིག་གཡོ། །པདྨ་གསར་པ་ལྟ་བུའི་ཞལ་རས་ལས། །རྟག་ཏུ་འཆི་མེད་བདུད་རྩིའི་རྡུལ་དམར་སྐྱུགས། །བཅུ་དྲུག་དར་ལ་
བབ་པའི་གཞོན་ནུ་མས། །ཉམས་དང་འགྱུར་བའི་ཁེངས་པ་བསྡུས་པ་ལས། །དགའ་ཆེན་སྐད་ཅིག་རྫོགས་པའི་གོ་སྐབས་ན། །འཕོ་མེད་རི་མོ་སྲོག་གི་དྭངས་མར་འབྲི། །མ་ལྟར་བྱམས་པའི་རང་བཞིན་ལི་བ་ཡི། །སྤྲོས་པའི་ལེན་བུ་སྤྲོས་མེད་ལྟག་པར་འཁྱིལ། །འཕགས་ནོར་བདུན་མཐར་སོན་པའི་སྟོབས་ལས་གྲུབ། །རིམ་པ་བདུན་པོ་གཅིག་ཆར་འབིགས་པ་དང་། །འཇིག་རྟེན་བདུན་ལ་འཛའ་བ་མི་ལྷོད་པའི། །ཨུཏྤལ་རྒྱས་པའི་སྤྱན་བདུན་ཅུང་ཟད་འཛུམ། །འདིས་མཆོག་མི་འཇིགས་སྦྱིན་ཅེས་སྐྱེ་དགུ་ཀུན། །ཉེར་འཚོར་བསྟི་བའི་སྟ་ཟུར་གཡས་ནས་རྒྱ། །ཉམ་ངའི་སྨན་ཏུ་པུས་སྟེང་རྩེ་དགར་བརྐྱང་། །ལྷག་མ་བསྒྲེངས་ཤིང་མཐེབ་སྲིན་དུད་པ་ལས། །པད་དཀར་འདབ་བརྒྱ་ཤར་བའི་མཚར་སྡུག་ལ། །སྙིང་རྗེར་བཅས་པའི་ཟུར་མིག་རྗེས་སུ་ཆགས། །གསེར་གྱི་གེ་སར་འཇམ་པའི་ཡུ་བ་འཁྱུགས། །མཐིང་གི་དཔལ་བེའུ་རྡོ་རྗེ་སྙིང་པོར་ཞུགས། །ཙྪིནྡྡ་མ་ིའི་ཁ་དོག་མཐིལ་ན་སྦས། །ཟླ་བ་ཉི་མ་མཚམས་སྤྲིན་ཨཉྫ་ན། །བསྲེས་པའི་མཁའ་སྣང་མཁའ་དང་མཉམ་པར་བཀོད། །བྱང་ཆུབ་སེམས་ཀྱི་ཆེ་བ་མི་དམན་པ། །འཇིག་རྟེན་ཀུན་ཏུ་རྣམ་པར་རྒྱས་པ་ཅན། །བསིལ་བའི་མུ་ཁྱུད་ངལ་འཚོར་བསྟེན་པ་དང་། །བརྒྱ་སྟོང་རི་བའི་དྲི་མེད་ཀཱ་ཤི་ཀ །དུཿཀཱུ་ལ་དང་པཉྩ་ལི་ཀཱ་ཡི། །གོས་ཟུང་ཕན་ཚར་བགྲན་པ་བཞིན་ཏུ་བགོས། །
གཅིག་ལས་དུ་མར་འཕོ་བའི་རིན་ཆེན་དང་། མུ་ཏིག་དོ་ཤལ་མིག་འཕྲུལ་བཞིན་ཏུ་དཔྱངས། །གསར་དུ་ཁ་བྱེ་དྲི་ཞིམ་གཡོ་རྣམས་ཀྱིས། །ཚིམས་པས་བུང་བའི་ཕྲེང་བ་འཁོར་ལྡན་པ། །པུཎྜ་རཱཾ་ཀའི་དྲྭ་བ་དྲྭ་ཕྱེད་འཛིངས། །མཐིང་ཤུན་གསང་ཁེབས་གསེར་གྱི་པ་ཏྲ་འཁྱུགས། །ནམ་མཁའི་ངོས་སུ་གློག་གི་རྩེ་དགའ་ངོམས། །སྒྲ་ལ་རྣམ་བརྟགས་སིལ་སིལ་སྒྲོགས་ཁོ་ནས། །ཐོག་མར་དོན་རྣམས་གླག་ཅོར་སྨྲ་བྱེད་པ། །ནོར་བུའི་འོག་བག་གསེར་གྱི་དྲིལ་ཆུང་དང་། །ཕྱག་ཞབས་དག་ཏུ་གཡེར་ཁ་འཁྲོལ་ལྡན་པའི། །ཤེལ་དང་བཻཌཱུ་རྱ་ཡི་གདུབ་ཀོར་འཐབ། །ཏིང་འཛིན་བྱེ་བ་འབུམ་ཕྲག་ལང་ཚོ་ཡིས། །མྱོས་པའི་ཡན་ལག་རྫོགས་པར་འབར་མཐོང་ནས། །དམ་པ་སློང་བའི་ཆགས་ལྡན་མ་དུད་པའི། །ཡིད་ཀྱི་གནམ་རུ་རང་དབང་མེད་པར་བཀུག །བ་སྤུའི་ཁུང་བུ་བསོད་ནམས་བྱེ་བ་ལས། །གྲུབ་པ་རེ་རེ་ཞིང་ཡང་འཇིག་རྟེན་ཁམས། །རྣམ་པར་ཕྱེ་བ་རབ་འབྱམས་སྤྱོད་ཡུལ་ཀྱང་། །ཟླ་བ་ག་པུར་ཙནྡན་ཆུ་རྒྱུན་གྱིས། །ཀུན་ཏུ་བཀྲུས་པའི་འཚོ་བ་རངས་པར་བྱས། །རྟག་ཏུ་ཙནྡན་ཆུ་ཡིས་ལུས་གཤེར་ལ། །དཀར་མིན་ཨུཏྤལ་གཞོན་ནུ་རྣ་བར་འཛུད། །དྲི་ཡི་ཐིག་ལེ། །ཕྱི་ནང་གི་གནས་སུ་གྲུབ་པ་སྦྱིན་པ། །གནས་དང་གནས་སུ་བགོ། །ཙུམྦ་ན། ཁ་སྦྱོར་གྱི་བདེ་ཀློང་དུ་འཁྱིལ་ག་ ཡི་སྦྲང་། །སྙིང་རྗེ་ཆེན་པོ་དམིགས་པ་མེད་པས་བརླན་པ། ཆང་གཞིབ་བ་སོགས། །སྟོང་ཉིད་གསང་མཛོད་འཛིན་པའི་ཕྱིར། །
དྲི་ཟའི་ན་ཆུང་ཇི་འདྲ་དེ་འདྲའོ། །ཡོན་པོར་འཁྱོགས་ཤིང་དྲང་པོར་བསྲང་བ་སོགས། །རྡོ་རྗེའི་སྐུ་ལ་རྣམ་འགྱུར་ཅི་དགར་རྫོགས། །ཀུན་ནས་ཞལ་ཕྱག་ཕ་མཐའ་ཡས་མོད་ཀྱི། །མཐའ་གཉིས་ཞབས་ཀྱི་སྐྱིལ་ཀྲུང་སྲིད་དང་ཞིར། །སོ་སོར་མི་ཕྱེད་ནམ་མཁའི་ཀློང་དུ་བཅས། །མཛེས་པའི་གྲགས་ལྡན་དག་བྱེད་རྡུལ་དམར་སྐྱུགས། །བུང་བས་འཐུང་བའི་པདྨོ་རབ་མང་ཡང་། །འབྱེད་དང་གསོ་བ་ཟུང་སྡེབ་ཀརྤཱུ་རའི། །འོད་ཀྱི་ཐུར་མ་གཅིག་གིས་འཇིག་རྟེན་འདིར། །ལས་ཀྱི་བརླན་བཙས་དམུས་ལོང་ཐོབ་ཇི་སྙེད། །ཤེས་རབ་མིག་གི་ཀུ་མུད་ཁ་འབྱེད་པ། །བདུད་རྩིའི་ཐིག་ལེ་འདི་ཁོ་ན་ཡི་གསོས། །བསིལ་བའི་ཆབ་ཀྱིས་མ་བྲན་འགའ་མེད་པས། །མཛེས་པ་གཞན་ལས་ལྷག་པར་འཛེགས་བཞིན་ཏུ། །གཞན་གྱི་མཚར་སྡུག་སྒྲུབ་པ་ཁོ་ནར་གྱུར། །འདི་ལྟར་ཉོན་མོངས་ལྷན་ཅིག་སྐྱེས་ཀྱང་དགྲ། །མ་འདྲིས་ཁྱོད་ཀྱི་ཡེ་ཤེས་གཉེན་ཏུ་གྱུར། །ལྷན་སྐྱེས་ལུས་ཀྱི་འབྱུང་བ་ནད་གྱུར་ལ། །ཕན་བྱེད་དགོན་པར་འཁྲུངས་པའི་སྨན་བཞིན་ནོ། །ལེགས་བྱས་གྲུར་ཞུགས་དེད་དཔོན་བླ་ལྡན་བཅས། །འབད་བས་བཙལ་ན་མཚར་སྙམ་མི་བགྱིད་དེ། །མ་བསྒྲུབ་སྲིད་མཚོ་ཉམ་ངར་ཡིད་བཞིན་ནོར། །སྨོན་ལམ་ཡུལ་ཕྱིར་མགྲོན་ཏུ་ཁུགས་པ་འདི། །གང་དེར་ནུས་པའི་ཚོན་རིས་བཀྲག་ཙམ་དུ། །མ་ཟད་བསོད་ནམས་མེ་ལོང་དྭངས་པར་ངེས། །ཉམ་ངའི་གྲོང་དུ་
ཉེས་པའི་མེས་གདུང་བར། །བསིལ་བྱེད་དལ་འགྲོའི་ཚེས་དང་མཚུངས་གཞན་མེད། །འཇིག་རྟེན་འདི་ན་སྙིང་བརྩེའི་གཞན་དབང་ཅན། །བདག་ལ་ཉེ་བ་གང་དེར་མགུ་བྱ་ཡིན། །ཐར་འདོད་དངོས་པོར་བརྐམ་ཆགས་ཀྱིས་བསྙེགས་ཀྱང་། སྨིག་རྒྱུར་མགྲིན་པ་བཏེགས་པའི་ངལ་བ་ལས། །རེ་བ་མ་འཚལ་རི་སྐྱེས་བུ་མོ་རྣམས། །ཉེ་བའི་བུ་བཞིན་དགོངས་ནས་དུས་ཀུན་ཏུ། །མི་འཇིགས་སྦྱིན་ཞེས་དམ་བཅའ་ཐུགས་རྗེའི་ལྷ། །རྣམ་ཐར་རྒྱ་མཚོའི་རླངས་པ་གཡོ་བའི་ལྕེ། །ཆོས་ཁམས་མཁའ་ལ་ད་ཙམ་མི་དཀྲིགས་སམ། །ཤ་བ་རིས་བསྒྱུར་གླིང་བུ་རི་དྭགས་ཀྱིས། །མ་ཤེས་ཆགས་པས་བཀུགས་པའི་བསླུ་བྲིད་ལས། །སྲོག་གི་གཤེད་མ་སྐད་ཅིག་ལྷུང་བ་བཞིན། །སྤུ་གྲིར་རབ་ཆགས་སྦྲང་རྩིའི་མངར་བ་ལ། །མི་ཚེ་ཡུད་ཙམ་འབྲལ་བར་མ་ཕོད་ནས། །འདི་དང་གཞན་ཏུ་འཇིགས་པའི་ཁུར་དུ་མ། །ལས་བཞིན་སྐལ་པར་བབས་པ་ཁོ་ན་ཡིས། །ཆུ་གཏེར་རྣ་རྒྱན་ཅན་གྱི་ཁོངས་གཏམས་ཤིང་། །བདེ་འབྲས་རྒྱུ་སྤངས་འདི་གཟིགས་བརྩེ་ལྡན་འགའ། །ཡོད་ན་སྔོན་ཆད་བསྐལ་པ་དེ་སྙེད་དུ། །ངལ་བའི་འབྲས་བུས་དབུགས་དབྱུང་ད་ནི་དུས། །སེང་ལྡེང་ཆལ་སོགས་སྟུག་པོའི་ནགས་ཁྲོད་དང་། །གླིང་དང་གླིང་ཕྲན་གྲོང་ཁྱེར་གྲོང་རྡལ་དང་། །བྲག་རིའི་བྱ་སྐྱིབས་ལྗོངས་ཀྱི་ཚང་ཚིང་དབུས། །ཆུ་ཀླུང་གདེང་ཀ་རི་རྩེ་རི་རབ་ཟོམ། །ཕུག་དང་རི་ཁྲོད་འབྲོག་ཆེན་དགོན་པའི་
གནས། །སྨད་འཚོང་ཆང་འཚོང་གཡུང་མོ་ཀླ་ཀློ་སོགས། །རིགས་ངན་གྲོང་ཁྱེར་དེ་དག་ཐམས་ཅད་དུ། །རིག་འཛིན་སྔགས་འཆང་མོ་དང་མཁའ་འགྲོ་མ། །སྡུག་དང་མི་སྡུག་རྒན་གཞོན་བར་མའི་དབྱིབས། །བཟའ་བཏུང་འཁྲིག་པའི་དེ་ཁོ་ན་སྟེར་སོགས། །ཞི་ཆགས་གཏུམ་མོའི་དུམ་བུ་སྣ་ཚོགས་ཀྱིས། །དབང་མཛད་གཡོ་མཛད་མ་ལུས་འཇིག་རྟེན་འདིར། །གང་ཡང་དེ་འབྲེལ་ཕྲ་མོས་རྙེད་པ་མཆོག །ལག་རྩེར་རང་ནོར་བཞིན་ཏུ་གེགས་མེད་པར། །འོང་ཞེས་དཔལ་གྱི་མགུར་ནས་བདེན་པའི་ལྗགས། །ངེས་པར་དོན་ལྡན་གཡོ་བ་ཡིན་ན་ང་། །རྩེ་གཅིག་གུས་པའི་ཡིད་ཀྱི་ཤིང་རྟ་ལ། །རེ་བའི་རིན་ཆེན་ཅུང་ཟད་སྦྱིན་པར་འོས། །ཐལ་མོ་ཡ་གཅིག་བསྣུན་པས་སྟོབས་ཆེན་གྱད། །གཞན་སྟོབས་ནོངས་ལ་བསྔགས་པ་བསྒྲགས་ཐོས་ན། །གདེངས་པ་ཙམ་གྱིས་ཡིད་སྲུབས་དཔུང་དང་རིས། །གཅིག་ཆར་འཇོམས་བྱེད་འདི་ཙམ་ཡ་མཚན་བཞིན། །ངང་ཚུལ་མི་འཇའ་འབྱུང་པོ་བྲང་འགྲོ་བ། །གདུག་པའི་ཁ་རླངས་སྲིད་རྩེར་བརྐྱང་རྣམས་ལ། །མཐུ་སྟོབས་དྲག་པོར་འབེབས་པའི་མ་གི་ཏས། །མགོ་ལ་གནམ་ལྕགས་ལྷུང་བ་བཞིན་ཏུ་མཛོད། །རྙེད་དཀའ་མི་ཡི་ལུས་ཀྱི་རིན་ཆེན་གྲུ། །ཚུལ་མིན་རྣམ་གཡེང་རླུང་གིས་རབ་འཕུལ་ནས། །ངན་འགྲོ་ཆུ་སྲིན་ཁ་རུ་ཆུད་ལ་ཉེ། །སྐྲགས་ཤིང་སྡང་བས་བ་སྤུ་རབ་གཟིངས་ཏེ། །འདི་འདྲའི་ཅི་བྱ་བརྟོལ་དང་བྲལ་ལགས་ན། །
ཀྱེ་ཧུད་འཕགས་མ་བདག་གི་སྐྱབས་གནས་ཁྱོད། །ཐུགས་རྗེས་ཅུང་ཟད་མི་གཟིགས་གང་དུ་གཡེལ། །ཚེ་རབས་ཀུན་ཏུ་རྣམ་དཀར་གྱི་ན་ལ། །གོམས་པས་བྱང་ཆུབ་འཚོ་བ་བཀྲེན་པ་བདག །བརྟན་པ་ཕུན་ཚོགས་དགྱེས་བཞིན་མ་བསྩལ་ན། །སླད་ནས་ཡི་ཆད་མིག་གིས་བསྒྲིབ་པར་འགྱུར། །སྟེས་ཏེ་བླ་བཅོལ་སྨྲ་བ་མ་ལགས་ཀྱི། །ཅི་སླད་དུས་རིང་འདི་ལྟར་བཏང་སྙོམས་འདོར། །སྲིད་པའི་དགོན་པ་འདི་ལ་མི་འཇིགས་ཕྱག །ལྷུག་པར་བརྐྱང་བའི་བརྩེ་ལྡན་འགའ་ཡོད་དམ། །ཐུགས་རྗེའི་གྲིབ་བསིལ་ཡངས་པའི་ཁོར་ཡུག་ལ། །བདག་ནི་འབད་པས་རྩེ་གཅིག་སྙེགས་བྱས་ཀྱང་། །ལྗོན་ཤིང་ཙམ་གྱི་ཕོངས་པའང་མ་སྩལ་བས། །འཕགས་མ་ལ་ནི་ཕྱོགས་རིས་མ་མཆིས་ན། །ཅིག་བདག་ཉིད་བསྐལ་པ་བརྒྱ་རྣམས་སུ། །བྱས་པའི་འབྲས་བུ་གང་དེ་འདི་འདྲའོ། །སྡུག་བསྔལ་ཆོམ་རྐུན་དུ་མས་རྟག་མནར་བ། །འཁོར་བ་འཇིགས་སུ་རུང་བའི་འབྲོག་ཆེན་འདིར། །ཅུང་ཟད་ཙམ་ཡང་བསྟི་བར་མ་བྱས་པར། །བདག་གིས་སེམས་དམྱལ་མཐའ་མེད་ཡང་ནས་ཡང་། །མྱོང་ཤེས་དེ་རིང་ཡི་ག་རབ་ལྡོག་སྟེ། །འདྲེན་བྱེད་ངོགས་སུ་མ་ཆིས་མུ་ཏིག་གི། །འོད་ལྡན་དོག་པ་རིང་ཐུང་འདི་བཀུ་ནས། །འཁྱམས་པས་ཇི་ལྟར་མགྲོན་པ་ཡིད་བྱེད་ལྟར། །རྟག་ཏུ་ཁྱོད་ལ་ཡི་ག་རབ་ཤོར་བའི། །བདག་སྡུག་པ་ལ་དངོས་གྲུབ་འབྲས་བ་ཡི། །དབུགས་དབྱུང་ཅུང་ཟད་ད་ལྟ་མེད་གྱུར་ན། །ཕྱིས་ནས་ཁྱད་
པར་འགའ་ཡང་མ་ཐོབ་པར། །ཉོན་མོངས་གདུང་བས་མྱ་ངམ་ཐང་འདི་རུ། །འགྱོད་བཞིན་གདོན་མི་ཟ་བར་གུམ་པར་འགྱུར། །ཏིང་འཛིན་རྒྱ་མཚོ་ལྟ་བུ་བརྙེས་བཞིན་ཏུ། །ཐར་འདོད་ཡོངས་ལ་བསམ་གཏན་མི་སྩལ་བར། །འགའ་ཞིག་སྐམ་པ་སེལ་བས་ཅི་ལ་ཕན། །ཐུགས་རྗེ་ནམ་མཁའ་ལྟ་བུ་མངའ་བཞིན་ཏུ། །འགྲོ་ཀུན་སྲིད་ལས་མྱུར་དུ་མི་བསྒྲལ་བར། །འགའ་ལ་མཐོང་བ་སྩལ་བས་ཅི་ཞིག་བྱ། །རྟག་བརྟན་མི་ཤིགས་རྡོ་རྗེའི་ཚེ་བརྙེས་ནས། །ཀུན་ལ་བདུད་རྩིའི་བཅུད་ལེན་མི་སྦྱིན་པར། །རེ་རེས་འཆི་མེད་གྲུབ་ཀྱང་སུ་ཡིད་དགའ། །མཁྱེན་རབ་ཉི་ཟླའི་གཟི་འོད་སྟོང་འབར་བས། །འབད་མེད་མ་རིག་མུན་པ་མི་སེལ་བར། །འབད་པས་དམ་པ་རྙེད་ཀྱང་ཅི་སྟེ་ཚིམས། །ཁྱོད་ལས་ཆེ་བ་ཐོབ་པར་རེ་ན་ཡང་། །བདག་ལ་བདག་འཛིན་བུབ་ཁ་འདི་བྱུང་བས། །ཕྱིར་འགྱེད་ནན་ཏུར་ཅི་བྱས་ཚེ་འདི་རུ། །འབུང་གསུམ་བཏོན་པའི་སྡུག་བསྔལ་རྒྱུ་འབྲས་ལ། །བདེ་བའི་གོ་སྐབས་ཉི་ཚེར་མ་མྱོང་བས། །ཁྱོད་ཐུགས་ཟག་མེད་དགའ་བའི་ཆུས་བརླན་པའི། །བགོ་སྐལ་ཙམ་ཞིག་རྗེས་སུ་མི་སྩལ་ན། །སྲིད་ཞིའི་མཐའ་ལས་འཕགས་པའི་སྟོང་ཉིད་དང་། །སྙིང་རྗེ་གཟུགས་བརྙན་བཞིན་ཏུ་མ་གྱུར་ཏམ། །ཀྱེ་མ་རྗེ་བཙུན་ཐུགས་རྗེའི་བདག་ཉིད་གསོན། །འཇིག་རྟེན་མི་ཚེ་འདི་ནི་འདི་ལྟར་ཐུང་། །གློ་བུར་ན་ཚ་རྐྱེན་ངན་འདི་ཙམ་རྒོད། །ལས་དང་ཉོན་
མོངས་དྲག་པོས་འདི་ལྟར་ནོན། །དགེ་བའི་ལས་ལ་བརྩོན་འགྲུས་འདི་ཙམ་ཞན། །ལྷ་དང་བླ་མའི་ཐུགས་རྗེས་འདི་ལྟར་བཏང་། ཁམས་གསུམ་འཁོར་བའི་རྒྱ་མཚོར་འདི་ལྟར་འཁོར། །འཆི་ཀའི་གནད་གཅོད་སྡུག་བསྔལ་ཚབ་རེ་ཆེ། །བར་དོའི་མུན་པ་ནག་པོ་གཏིང་རེ་ཟབ། །འཇིགས་སྐྲག་ལོག་པའི་འཁྲུལ་སྣང་ཡ་རེ་བ། །འཇིག་རྟེན་འདིར་ཡང་ཅི་བྱ་བརྟོལ་མེད་ཅིང་། །ཕྱི་མ་གར་འགྲོའི་ཆ་ཡང་མ་འཚལ་བར། །ད་ལྟ་འཆི་ན་གཏད་སོ་ཅང་མེད་པར། །སྡུག་གུས་མ་མས་བོར་བའི་དྭ་ཕྲུག་གམ། །དམུས་ལོང་གཉེན་སྤངས་འདྲ་བའི་མགོན་མེད་བདག །ད་ནི་ཐུགས་རྗེས་ཟུངས་ཤིག་དུས་ལ་བབ། །རང་ལ་བལྟས་ན་རང་ཡིད་མ་ཆེས་ལ། །གཞན་ལ་བལྟས་ཀྱང་ཡི་མུག་ཁོ་ན་སྐྱེ། །ལྟ་སྤྱོད་མཐོང་ན་སྙིང་རླུང་གཏིང་ནས་འཁྲུགས། །རྣ་བས་ཐོས་ཀྱང་སྐྱོ་ཤས་ཁོང་ནས་ལྡང་། །འདི་འདྲ་དུས་ངན་བསྟན་པའི་མར་ཤམ་འདིར། །བདག་ནི་ཁྱེད་ལ་རེའོ་ཐུགས་རྗེ་ཅན། །བདག་ཅག་སེམས་ཅན་བསམ་བརླག་བྱིས་པའི་ངང་། །བདེ་བ་འདོད་ཀྱང་སྡུག་བསྔལ་ཐོག་ཏུ་བབ། །ཁྱོད་ལ་གཡར་དམ་བཙན་པོ་མཆིས་ཞེ་ན། །ཅུང་ཟད་ཙམ་ཞིག་བརྩེ་བ་མི་འབྱུང་ངམ། །ངན་སོང་འཁོར་བར་བཏང་ངམ་འཕགས་མ་མཁྱེན། །མཐོ་རིས་ཐར་པར་འཁྲིད་དམ་འཕགས་མ་མཁྱེན། །མི་ཚེ་སྟོང་ཟད་བཅོལ་ལམ་འཕགས་མ་མཁྱེན། །ཉམ་ངའི་བར་ཆད་བསལ་ལམ་འཕགས་མ་
མ་མཁྱེན། །བདུད་ལ་རྒྱལ་ཁ་བསྐུར་རམ་འཕགས་མ་མཁྱེན། །དཀོན་མཆོག་བདེན་རྟགས་བོར་རམ་འཕགས་མ་མཁྱེན། །སེམས་རྒྱུད་ཆོས་དང་བསྲེའམ་འཕགས་མ་མཁྱེན། །མཆོག་ཐུན་དངོས་གྲུབ་སྦྱིན་ནམ་འཕགས་མ་མཁྱེན། །ད་ལྟའི་དུས་དང་རྨུ་རྒོད་བདག་འདྲ་ལ། །ཐུགས་རྗེ་ནུས་པ་མངོན་སུམ་བསྟན་མེད་ན། །བློ་སེམས་ཆོས་དང་འདྲེས་ནས་གྲུབ་པ་གཉིས། །མངོན་བྱས་དུས་བཟང་བསྐལ་བཟང་སྐྱེ་བོ་རྣམས། །རྒྱལ་བ་རབ་འབྱམས་ཐུགས་རྗེ་འཇུག་པ་ལ། །སླར་ཡང་རྗེས་སུ་འཛིན་པས་ཅི་ཞིག་བྱ། །སྔོན་ཚེ་བདེ་གཤེགས་རྔ་སྒྲར་གཡར་ལམ་དུ། །རྒྱལ་བ་ཀུན་ལས་ཐུགས་བསྐྱེད་ལྷག་འཚལ་ན། །རྒྱལ་བ་ཀུན་གྱིས་མ་ཐུལ་བདག་ཡིན་པས། །ད་ལྟ་ཉིད་དུ་བརྩེ་བའི་ཕྱག་རྐྱོངས་ཤིག །ཉིན་མོ་རྣམས་སུ་ཆགས་སྡང་འཁོར་ལོ་འཁྲུགས། །མཚན་མོ་ཐམས་ཅད་གཏི་མུག་གཉིད་ཀྱིས་ནོན། །བར་སྐབས་ལོང་གཏམ་ལྡབ་ལྡིབ་གཡེང་བས་ཁྱེར། །རེས་འགའ་ཟ་ཞིང་རེས་འགའ་ལོང་འདུག་བྱེད། །སྐྱེས་ནས་མ་ཤིའི་བར་དུ་འདི་འདྲས་གཡེངས། །སྡིག་པའི་ལས་ནི་སྦྱོར་དངོས་རྗེས་གསུམ་ཚང་། །དགེ་བ་བྱས་ཀྱང་བྱིས་པའི་ཐལ་རྩེད་འདྲ། །ཀྱི་ཧུད་སྙིང་མེད་པོ་ལ་ད་གཟིགས་ཤིག །སྲིད་མཚོ་ཀུན་རྟོག་ན་ཀྲས་དཀྲུགས་བྱས་པར། །ཕ་མཐའ་ངེས་སྒྲོལ་ཏཱ་རེའི་སྙན་ཚིག་གི། །གདོས་པ་འཛིན་པ་ཞི་བསིལ་ཆུ་
རྒྱུན་ཅན། །ཟླ་བཞིན་མ་ཀྱེ་རང་གིས་སྔར་བསྒྲུབས་པ། །འཇིག་རྟེན་གསུམ་དུ་འཁོར་ལོས་སྒྱུར་བ་ཡི། །རྒྱལ་རིགས་སྤྱི་བོ་ཉིད་ནས་དབང་བསྐུར་བ། །བདུད་རྩིའི་ཐིགས་པ་གང་དེ་བདག་ལ་སྩོལ། །རེ་བས་བསྒྲིམས་ནས་སྔོན་ཆད་བསླད་གྱུར་གྲང་། །ད་ནི་ལུས་སེམས་ལྷོད་དེ་ཁྱོད་ཁོ་ནར། །མགོ་བོར་ཕྱོགས་གཏད་བགྱིད་ལས་བྱར་མེད་པས། །ཡུམ་ཆེན་ཆོས་སྐུའི་གོ་འཕང་མྱུར་ཐོབ་ཤོག །ཅེས་རང་ལོ་ཉེར་བཞི་བར་མེ་སྤྲེལ་ཆུ་སྟོད་ཟླ་བའི་ཡར་ཚེས་ལ་གུས་པས་གསོལ་བ་བཏབ་པ་དཔལ་སྤུངས་སྒྲུབ་ཁང་དུའོ། །༈། །འཕགས་མའི་གསོལ་འདེབས་གྲུབ་པའི་ངག་ཅེས་བྱ་བ། །ཨོཾ་སིངྡྷྡྷི་ར་སྟུ། དུས་གསུམ་རྒྱལ་བ་རྒྱ་མཚོ་སྐྱེད་པའི་ཡུམ། །ཞི་ལ་མི་གནས་སྙིང་རྗེའི་འཛུམ་རླབས་གཡོ། །སྲིད་པས་མ་གོས་འདམ་སྐྱེས་པདྨ་བཞིན། །གང་གི་རིན་ཆེན་མཚན་ཙམ་འཛིན་པས་ཀྱང་། །དུས་མིན་འཆི་སོགས་མི་བཟད་འཇིགས་པའི་ཚོགས། །བརྒྱད་དང་བཅུ་དྲུག་མཐའ་ཡས་སྲུང་མཛད་མ། །ཆོས་སྐུའི་ཞིང་ན་ཤེས་རབ་ཕ་རོལ་ཕྱིན། །ལོངས་སྐུའི་ཞིང་ན་རིགས་ལྔའི་ཡུམ་ཆེན་ལྔ། །སྤྲུལ་སྐུ་འཕགས་མ་སྒྲོལ་མ་ཐུགས་རྗེའི་གཏེར། །ཆོས་དབྱིངས་ནམ་མཁའི་མཐའ་དང་སེམས་ཅན་ཁམས། །ཇི་སྲིད་ལས་དང་ཉོན་མོངས་མཐར་ཐུག་བར། །བསམ་གྱིས་མི་ཁྱབ་རྣམ་འཕྲུལ་སྤྲིན་གྱིས་གང་། །བདེ་ཆེན་ཞིང་དུ་གོས་དཀར་
ཚེ་ཡི་ལྷ། །གྲུ་འཛིན་རི་ལ་ཡིད་བཞིན་འཁོར་ལོ་ཡུམ། །བསིལ་ལྡན་སྐྱེ་དགུའི་སྐྱབས་གནས་བཀའ་དྲིན་ཅན། །འཇའ་ལུས་ཌཱ་ཀི་ཡེ་ཤེས་མཚོ་རྒྱལ་མ། །ཇི་སྲིད་སེམས་ཅན་རེ་རེའི་མདུན་ན་ཡང་། །སྙིང་རྗེ་ནུས་པར་བཅས་ཏེ་རྟག་ཏུ་གནས། །ཕན་བདེ་གཅིག་གི་ཕྱིར་ཡང་འཁོར་བ་ན། །བརྩེ་བ་མི་ལྷོད་ཐབས་མཁས་ཕྱག་རིང་བརྐྱང་། །མཁའ་ཁྱབ་ཞིང་དུ་དཀོན་མཆོག་མ་ལུས་པའི། །ཡོན་ཏན་ཇི་སྙེད་ཁྱོད་ཀྱི་རོལ་པ་སྟེ། །འཕགས་བཞིའི་རྒྱུད་ཀྱི་རིགས་གཉིས་དཔལ་རྒྱ་མཚོ། །རྒྱུན་མཐའི་ཡེ་ཤེས་ཟབ་ཅིང་ཕྲ་བ་དང་། །སྲིད་ལམ་འདུས་བྱས་འདུས་མ་བྱས་པའི་དགེ། ཁམས་ཀྱི་རྒྱུན་ལས་རྣམ་པར་དཀར་གང་ཡིན། །དེ་དག་མ་ལུས་འཕགས་མའི་གར་ཡིན་པས། །མ་གཅིག་བྱིན་རླབས་རྣམ་འཕྲུལ་བསམ་མི་ཁྱབ། །སྤངས་རྟོགས་ཡོན་ཏན་ནམ་མཁའི་ཕ་མཐར་བརྒལ། །དུས་གསུམ་རྒྱལ་བའི་སྣང་བརྙན་རྫོགས་པར་བསྐྲུན། །རྒྱལ་བས་ཁྱོད་ཚུལ་ཆ་ཙམ་བརྗོད་པར་དཀའ། །སྐྱབས་གནས་མཐར་ཐུག་ཐུགས་རྗེའི་གཞན་དབང་ཅན། །ཁྱོད་ཉིད་ཁོ་ནར་སྙིང་ནས་མོས་པའི་བློས། །བྱང་ཆུབ་བར་དུ་བདག་སོགས་སྐྱབས་སུ་མཆི། །འཇིག་རྟེན་ཁམས་ན་དཔལ་འབྱོར་ཇི་སྙེད་དང་། །འགྲོ་ཀུན་དུས་གསུམ་བསགས་པའི་ལེགས་སྤྱད་དང་། །བདག་ལུས་ཡན་ཆད་ཆགས་མེད་བློ་ཡིས་འབུལ། །མི་དགེ་སྡིག་པའི་ལས་
རྣམས་མཐོལ་ཞིང་བཤགས། །དགེ་ལ་ཡི་རང་ཆོས་འཁོར་བསྐོར་བར་བསྐུལ། །མྱ་ངན་མི་འདའ་ཡུན་རིང་བཞུགས་གསོལ་འདེབས། །དགེ་ཀུན་ཡུམ་གྱི་གོ་འཕང་མཆོག་ཏུ་བསྔོ། །པད་དཀར་མཛེས་སྡུག་ཡོངས་སུ་བསྟེན་པ་ཡི། །ཟླ་བའི་དབུས་ན་དྲི་མ་མེད་པའི་སྐུ། །འཆི་མེད་རྡོ་རྗེ་བདེ་བའི་ལང་ཚོ་ངོམས། །མི་འགྱུར་མི་ཤིགས་བདུད་རྩིའི་དྭངས་མ་རྒྱས། །ནོར་བུ་འབར་བའི་འོད་ཟེར་རྣོན་པོ་འཕྲོ། །འདོད་དགུའི་རེ་བ་མཐའ་དག་སྦྱིན་པར་མཛད། །རྩེ་གཅིག་གུས་པས་ཁྱོད་ལ་གསོལ་བ་འདེབས། །བདག་སོགས་འགྲོ་བའི་ལས་ཉོན་སྡིག་སྒྲིབ་དང་། །ནད་གདོན་བར་ཆད་ཞི་བའི་དངོས་གྲུབ་སྩོལ། །ཚེ་དང་བསོད་ནམས་དཔལ་འབྱོར་སྙན་གྲགས་དང་། །བློ་གྲོས་ཉམས་རྟོགས་རྒྱས་པའི་དངོས་གྲུབ་སྩོལ། །བྱིན་རླབས་ཐིག་ལེ་སྲིད་ཞིའི་དྭངས་མའི་བཅུད། །ཡིད་ལ་གང་འདོད་དབང་སྡུད་དངོས་གྲུབ་སྩོལ། །དུག་ལྔ་དུག་གསུམ་གཟུགས་ཅན་གཟུགས་མེད་ཀྱི། །མི་མཐུན་བསམ་སྦྱོར་ཚར་གཅོད་དངོས་གྲུབ་སྩོལ། །མདོར་ན་འདི་བཟུང་བྱང་ཆུབ་སྙིང་པོའི་བར། །མི་འབྲལ་ཁྱོད་དང་འགྲོགས་པའི་སྐལ་བཟང་གིས། །ཉེས་བརྒྱའི་ཆུ་འཛིན་གཞར་ཡང་མི་ལྡང་བར། །ལེགས་ཚོགས་ཡོན་ཏན་ཡར་ངོའི་ཟླ་ལྟར་རྒྱས། །རིང་མིན་ཟུང་འཇུག་ཤེས་རབ་ཕར་ཕྱིན་གྱི། །གོ་འཕང་མཆོག་གིས་བདག་གཞན་རྩེན་གྱུར་ཅིག །ཅེས་པའང་ས་ཁྱི་ཆོ་འཕྲུལ་ཟླ་བའི་བཅུ་བཞི་རྒྱལ་ཕུར་འཛོམ་པའི་འགྲུབ་
སྦྱོར་གྱི་སྔ་དྲོར་འོག་མིན་ཀརྨའི་གདན་ས་ནས་བཙུན་པ་ཡོན་ཏན་རྒྱ་མཚོས་གསོལ་བ་བཏབ་པའོ།། ༈ །།འཕགས་མའི་གསོལ་འདེབས་འཆི་མེད་རྡོ་རྗེའི་གླུ་ཞེས་བྱ་བ། །ཨོཾ་ཨ་མཱར་ི་ཛཱི་བནྟུ། མི་འགྱུར་རྡོ་རྗེའི་སྐུ་བརྙེས་མ། །བདུད་བཞིའི་གཡུལ་ལས་རྒྱལ་བ་མ། །མི་འཆེ་ཚེ་ཡི་མཆོག་སྦྱིན་མ། །བཅོམ་ལྡན་ཡིད་བཞིན་འཁོར་ལོར་འདུད། །ལྷག་པའི་ལྷ་དང་བླ་མའི་སྐུ། །དབྱེར་མེད་གཅིག་ཏུ་འདུས་པ་ནི། །བདག་སོགས་དད་པའི་མིག་ངོ་རུ། །འཕགས་མ་སྒྲོལ་མར་བསྟན་ལ་འདུད། །ཁྱོད་ཐུགས་ཞི་ལས་མ་གཡོས་ཀྱང་། །ཉམ་ཐག་འགྲོ་ལ་དབུགས་སྩོལ་ཕྱིར། །སྒྱུ་འཕྲུལ་དྲ་བའི་རོལ་པ་ནི། །རྣམ་འགྱུར་ཉེར་གཅིག་སྟོན་ལ་འདུད། །སྔོན་གྱི་ལས་ཀྱིས་བདས་པ་ཡི། །སྙིགས་མའི་སྐྱེ་ལ་འཇིགས་རྣམས་ཀྱིས། །མི་འདོར་ལུས་དང་གྲིབ་མ་བཞིན། །དེ་ཀུན་ཁྱོད་མཚན་དྲན་པས་བཟློག །དབྱིབས་དང་སྔགས་དང་བསམ་གཏན་གྱིས། །ཡུན་རིང་འདྲིས་པར་མ་བྱས་ཀྱང་། །ཁྱོད་མཚན་ཡིད་ལ་ཡོད་ཙམ་གྱིས། །འཇིགས་པ་བརྒྱད་ལ་སོགས་པ་འཇོམས། །སྐྱེ་ནས་ལས་ཀྱིས་འབྲེལ་བ་དང་། །རིགས་སྔགས་སྙིང་ལ་བཀོད་པ་དང་། །གསོལ་བ་རིང་དུ་བཏབ་པ་ལ། །ཕྲ་མོའི་འཇིགས་ལས་ཅིས་མི་སྐྱོབ། །དེ་ཕྱིར་ཡིད་བཞིན་ནོར་མཚུངས་པའི། །དལ་རྟེན་སྐྱེད་པའི་ཟ་མ་ཏོག །འཇིག་རྟེན་
གཞན་ཏུ་འགྲོ་བ་ཡི། །ལྟས་ཀྱི་མཚན་མ་ངན་པས་བཅིངས། །འཕགས་མའི་ཐུགས་རྗེའི་ཕྱག་བརྐྱང་ལ། །དོགས་པའི་དྲྭ་བ་བཅད་པ་དང་། །མི་འཇིགས་རིང་དུ་འཚོ་བ་ཡིས། །ཡིད་ལ་བདེ་བའི་དཔལ་བྱིན་ཅིག །གལ་ཏེ་དུས་ལ་བབ་གྱུར་ཏེ། །ཉི་སྲས་སྲོག་ལ་གཟས་གྱུར་གྲང་། །དབང་བཅུ་དང་ནི་སྟོབས་བཅུ་ཡིས། །བེ་ཅོན་གདོང་ནས་བཟློག་པར་མཛོད། །ཁྱོད་མཚན་ཡིད་ལ་བཀོད་པ་ཡིས། །བདུད་ཀྱི་ཕྲུ་མ་བྱེ་བས་ཀྱང་། །བ་སྤུའི་རྩེ་མོའང་གཡོ་མི་ནུས། །དེ་ལྟའི་ཐུགས་རྗེ་མངའ་ཞེས་གསུངས། །ནད་རིམས་འཆི་ལ་སོགས་པ་ཡི། །ཞགས་པས་ཇི་ལྟར་ཐེབས་གྱུར་ཀྱང་། །མྱུར་དུ་ནུས་པའི་རལ་གྲི་ཡིས། །གཅོད་པར་མཛོད་ཅིག་སྒྲོལ་མ་ཀྱེ། །ཁྱོད་མཚན་ཡིད་ལ་ཡོད་པ་ལ། །དུས་མ་ཡིན་པའི་འཇིགས་མི་འབྱུང་། །གཤིས་ངན་འཆི་བས་མི་འཆི་ཞིང་། །ཡིད་ལ་མི་བདེ་འབྱུང་བ་མིན། །བདག་ནི་རྩེ་གཅིག་ཁྱོད་དྲན་པས། །བརྩེ་ཆེན་ཟླ་བའི་འཛུམ་ཞལ་གྱིས། །འཇིགས་དང་མྱ་ངན་མུན་པ་བཅིལ། །ཕན་བདེའི་ཀུནྡ་ཁ་ཕྱེས་ཤིག །ཁྱོད་མཚན་ཡིད་ལ་བཀོད་པ་ལ། །དྲག་པོ་བིཥྞུ་ཚངས་སོགས་ཀྱི། །གཙུག་གིས་རྐང་པ་ལ་བཏུད་ཅིང་། །རྒྱལ་བ་རྣམས་ཀྱིས་དགོངས་པར་གསུངས། །ཆེ་དགུའི་རིགས་ཀྱིས་བྲོ་བོར་བ། །འཚལ་ཏེ་གདུག་པ་ཅན་ཀུན་སྲུངས། །སྲས་དང་བཅས་པའི་རྒྱལ་རྣམས་ཀྱིས། །བུ་གཅིག་བཞིན་ཏུ་
དགོངས་པར་མཛོད། །ཁྱོད་མཚན་ཡིད་ལ་བཀོད་པ་ལ། །རིགས་གཟུགས་ཚེ་དང་དབང་ཕྱུག་ལྡན། །ཕྱོགས་ལས་རྣམ་པར་རྒྱལ་བ་དང་། །སྡིག་པ་དག་ནི་རྟག་ཏུ་འཕྲོག །དྲིན་གྱིས་འཚོ་བའི་མ་གཙོ་གྱུར། །ཇི་སྙེད་མར་གྱུར་འགྲོ་བ་རྣམས། །མི་མཐུན་ཕྱོགས་ལས་རབ་རྒྱལ་ཞིང་། །སྡིག་ཟད་ཡོན་ཏན་ཀུན་རྫོགས་མཛོད། །ཚངས་སོགས་ཉི་ཚེའི་ལྷ་ལ་ཡང་། །གསོལ་བཏབ་བདེན་འབྲས་མི་བསླུ་ན། །དུས་གསུམ་གཤེགས་པའི་ཡུམ་གྱུར་མས། །འགྲོ་བ་མི་བསླུ་སྨོས་ཅི་དགོས། །བདག་དང་བདག་གི་སྐྱེད་བྱེད་ཀྱི། །གཙོ་གྱུར་ནམ་མཁས་ཁྱབ་པ་ཡི། །འགྲོ་བ་འཇིགས་པས་གཟིར་ཀུན་གྱི། །འཇིགས་པ་མྱུར་དུ་འཕྲོགས་ཤིག་ཀྲ། །མྱོང་བར་ངེས་པའི་རྣམ་སྨིན་གྱིས། །ཅིས་ཀྱང་བསལ་བར་མ་གྱུར་ན། །འདི་ལ་མཁའ་ཁྱབ་འགྲོ་ཀུན་གྱི། །འཇིགས་དང་སྡུག་བསྔལ་ཇི་སྙེད་ཐིམ། །ཕྱིན་ཆད་འགྲོ་བས་མི་མྱོང་ཞིང་། །བདག་གིའང་དེ་ལྟ་མྱོང་མ་གྱུར། །སྡུག་གུའི་མ་ཡང་སྡུག་བསྔལ་དང་། །བུད་མེད་ལུས་ཀྱི་ཐ་མར་མཛོད། །ཅི་སྟེ་འཚོ་བ་ཉིད་ན་ཡང་། །མི་ལྡོག་དགེ་བའི་བློ་སྐྱེས་ནས། །ཆོས་ཀྱི་འབྱོར་པ་རྒྱས་པ་དང་། །བདུད་ཀྱི་གཡང་ས་ཆེ་ལས་སྒྲོལ། །མི་སྐྱེའི་ཆོས་ལ་བཟོད་ཐོབ་ནས། །མཁའ་ཁྱབ་འགྲོ་བ་བསྒྲལ་བརྩམས་པའི། །ཆགས་ཐོགས་མེད་པའི་ཤེས་རབ་ཀྱིས། །
འཚོ་བ་དོན་དང་ལྡན་པར་མཛོད། །ནམ་ཞིག་དུས་ཀྱིས་གཏུག་པ་ན། །གནད་གཅོད་ཚོར་བ་མེད་པ་དང་། །ཡིད་དབང་རྣལ་དུ་གནས་པ་ཡིས། །བདེ་ནས་བདེ་བའི་ཞིང་དུ་ཁྲིད། །དུག་གསུམ་རྟོག་པ་འགགས་ནས་སུ། །འོད་གསལ་ནམ་མཁའི་དཀྱིལ་ལྟ་བུ། །མ་དང་བུ་འདྲེས་སྐད་ཅིག་ལ། །རྣམ་པར་གྲོལ་བའི་ངོ་སྤྲོད་མཛོད། །སྐུ་དང་ཐིག་ལེ་ཤར་ན་ཡང་། །མི་འཇིགས་ལྷ་དང་དབྱེར་མེད་ཐིམ། །འཁྲུལ་སྣང་འོད་ཀྱི་ལམ་ལ་སོགས། །འཁོར་བར་འཁྱམས་པའི་སྒོ་རྣམས་ཁོག །ལས་ཀྱིས་སྲིད་པ་བར་དོ་རུ། །འཁྱམས་ཀྱང་འཕགས་མའི་ཞལ་སྟོན་ལ། །བདེ་ལྡན་པདྨོ་བཀོད་ལ་སོགས། །དག་པའི་ཞིང་དུ་དབུགས་དབྱུངས་ཤིག །སྐྱེ་ནས་སྐྱེ་བ་ཐམས་ཅད་དུ། །བཅོམ་ལྡན་འདས་མས་རྗེས་བཟུང་སྟེ། །མི་ཟད་རྒྱན་གྱི་འཁོར་ལོ་དང་། །དབྱེ་བ་མེད་པར་བྱིན་གྱིས་རློབས། །འགྲོ་བ་རྣམས་ནི་མ་ལ་བྱམས། །ཁྱོད་ནི་འགྲོ་བ་རྣམས་ལ་བྱམས། །དེས་ན་བདག་གི་རེ་བ་འདི། །མི་བསླུ་འབྲས་བུ་ཡོད་པར་མཛོད། །ཚེ་རབས་དུ་མར་དགེ་བསགས་པས། །དལ་རྟེན་ལན་ཅིག་ཐོབ་པ་ལས། །སྙིང་པོ་ཅུང་ཟད་མ་ལོན་པར། །ཆོས་བཞིན་འཚོ་བའི་མཆོག་བྱིན་ཅིག །ཁྱད་པར་ཤཱཀྱའི་བསྟན་པ་དང་། །སྟེས་ཏེ་ཡུད་ཙམ་མཇལ་བའི་དུས། །རིན་ཆེན་གླིང་ནས་སྟོང་ལོག་ཏུ། །བཏང་བར་མ་མཛད་སྙིང་རྗེའི་བདག །མདོར་ན་ཤིའམ་གསོན་ཀྱང་རུང་། །བྱང་ཆུབ་
ལམ་ལས་མི་ལྡོག་པར། །ཆོས་ལྡན་འབྱོར་བའི་ཚལ་རྒྱས་པའི། །བྱིན་རླབས་སྦྲང་རྩིའི་ཆར་པ་ཕོབ། །བདག་གིས་རིང་ནས་བསྒྲུབས་པའི་ལྷ། །དུས་གསུམ་རྒྱལ་བའི་ཡུམ་གྱུར་མ། །ཡིད་བཞིན་འཁོར་ལོ་ཁྱོད་ཡིན་པས། །གསོལ་བཏབ་དོན་དང་ལྡན་པར་མཛོད། །བདག་དང་བདག་གི་སྐྱེད་བྱེད་མའི། །གཙོར་བྱས་མཁའ་ཁྱབ་འགྲོ་བ་ཀུན། །བཅོམ་ལྡན་འདས་མས་རྗེས་བཟུང་སྟེ། །རྟག་པ་དམ་པའི་སྐུ་ཐོབ་ཤོག །ཅེས་པའང་། །རང་ལ་ནང་གི་ཁམས་འདུས་དང་། ཕྱིའི་ཟིངས་ཆ། །སྐྱེད་བྱེད་དྲིན་མོ་ཆེ་ལའང་མི་དགེ་བའི་མཚན་མ་མངོན་གྱུར་དུ་ཤར་བའི་སྐབས་གསོལ་བ་འདེབས་པ་པོ་ནི་ཀརྨ་ངག་དབང་ཡོན་ཏན་རྒྱ་མཚོ་སྟེ་རང་ལོ་ཉེར་དྲུག་པ་ལའོ། །མངྒ་ལཾ།། ༈ །།འཕགས་མའི་སྙན་དབང་དུ་གསོལ་བ་སྙིང་གི་མེ་ཏོག་ཁ་བྱེ་བ་ཞེས་བྱ་བ། སྲིད་དང་ཞི་བའི་མཐའ་ལ་མི་གནས་ཕྱིར། །ལྐོག་ཏུ་གྱུར་པའི་ཤེས་བྱ་མ་མཆིས་པས། །རྗེ་བཙུན་མ་ཁྱོད་ཉམ་ཆུང་བདག་གི་ཚིག །ཐུགས་ཀྱི་དཀྱིལ་དུ་ད་ལྟ་འགྲོ་བར་རིགས། །ལུས་ཀྱི་བྱ་བ་ཚེ་འདིའི་ལྟོ་རྒྱབ་ཕྱིར། །ངག་གིས་སྨྲས་ཚད་རང་འདོད་ཆགས་སྡང་ཚིག །ཡིད་ཀྱི་མནོ་བའང་སྲིད་པའི་ཉེར་ལེན་ཏེ། །སྒོ་གསུམ་དོན་ཡོད་བྱས་པ་ཅང་མ་མཆིས། །ཁྱད་པར་དུ་ཡང་བསྟན་སྒོར་ཞུགས་རློམས་ནས། །ཆོས་ལ་བསྟེན་པའི་
སྡིག་པ་མི་བཟད་ལྕིང་། ཤིན་ཏུ་ལྕི་བའང་མ་ཚོར་འདིར་སྣང་གི། །ཟུག་རྔུ་ཕྲ་མོའང་སེམས་ཀྱི་གཅོང་དུ་ཚོར། །རྒྱལ་བས་ལུག་ལྟར་ལྐུག་སོགས་ཐ་ཆད་ཀྱི། །དགེ་སློང་མཚན་ཉིད་མང་པོ་གང་གསུངས་པ། །དེ་དག་ད་ལྟ་བདག་ལ་ཅིག་ཆར་ཚང་། །རང་རྒྱུད་བསྲེག་པའི་བསམ་སྦྱོར་ཅི་ཡང་བགྱིས། །ཐོག་མར་སྤང་བླང་ཇི་བཞིན་མ་ཤེས་ལ། །བར་དུ་ཤེས་ཀྱང་ཡིད་མི་ཆེས་པས་ལེན། །ད་ལྟ་ཉོན་མོངས་མང་བའི་ཚན་ཁ་ལ། །གཉེན་པོས་མ་ཐུབ་ཐ་མལ་ཉིད་དུ་འབྱམས། །སོ་ཐར་ནས་བརྩམས་བླ་མེད་རྒྱུད་སྡེ་མན། །ཞུས་ལོས་སྡོམ་དང་དམ་ཚིག་ཁས་བླངས་ཀྱང་། །སྐྱབས་སྡོམ་ཙམ་ཞིག་རྒྱུད་ལ་མི་ལྡན་པ། །བདག་ཅག་ཕྱི་མའི་གནས་སྐབས་ཇི་ལྟར་འགྱུར། །མཐོ་བའི་ཡོན་ཏན་ཐོས་ན་ཕྲག་དོག་སྐྱེ། །དམན་པའི་གནས་སྐབས་ཐོབ་ལ་སྡང་ཞིང་བརྙས། །ཡོན་ཏན་སྣེ་གཅིག་མེད་ཀྱང་ང་རྒྱལ་ཆེ། །རྨུ་རྒོད་བདག་འདྲ་ཐུལ་བ་སུ་ཞིག་ཡོད། །གཞན་དག་འབྱོར་ན་བརྣབ་སེམས་གཏིང་ནས་ལྡང་། །རང་ཉིད་འབྱོར་ན་སེར་སྣའི་མདུད་པ་དམ། །ཚིག་ངན་ཙམ་ལ་བཟོད་པའི་གོ་ཆ་ཤོར། །ཁྱིམ་པ་མགོ་བྲེག་བདག་གིས་ཅི་ཞིག་བྱ། །གོང་དུ་བཀུར་ཀྱང་ཡ་རབས་ཀུན་སྤྱོད་མེད། །དམན་པར་བཞག་ན་སྙོམས་ཆུང་འདུག་མི་ཚུག །བར་མ་ཙམ་གྱིས་རང་གཞན་ཟག་པ་སྤེལ། །མ་རབས་ཁྱི་དང་འདྲ་བར་གཟིགས་ལགས་སམ། །རང་ལ་དྲིས་ན་ལན་ལྡོན་སྤོབས་པ་
།།།།མེད། །གཞན་གྱིས་བཤད་ན་ཡིད་ཆེས་ངེས་ཤེས་མེད། །ཚིག་དོན་ཕྱེ་ཆུ་མ་འདྲེས་སྦོམ་ཡོར་གྱིས། །ཤེས་འདོད་རང་མགོ་བསྐོར་བ་རང་ལ་སྡིག །གོང་མའི་ཡོན་ཏན་མཐོང་ཡང་དད་པ་མེད། །དམན་པའི་སྡུག་བསྔལ་མཐོང་ཡང་སྙིང་རྗེ་མེད། །རང་རྒྱུས་རབ་ལ་ཆེ་ཡང་ངོ་ཚ་མེད། །ཀྱེ་མ་དུས་དང་བདག་སྐལ་ངན་པ་འཛོམས། །བླ་མའི་ཞབས་འདེགས་སྒྲུབ་ཚེ་དབེན་པ་བསྙག །དབེན་གནས་བསྟེན་ཚེ་ཙབ་ཙུབ་གཡེང་བས་ཁྱེར། །ལས་མ་ནུས་ལ་ཆོས་ཀྱང་མི་ནུས་པས། །འཇིག་རྟེན་མི་ཡི་གྲལ་དུ་ཚུད་ཐབས་ཅི། །བཟླས་བརྗོད་བྱས་ན་དབེན་གསུམ་མཉམ་བཞག་དྲན། །སྟོང་ཉིད་རྩེ་གཅིག་བསྒོམ་དུས་སྤྲོས་བཅས་སྤྱོད། །གང་ལའང་མ་ཟུག་སྤྲེའུའི་ཕྲུ་གུ་བདག །འབྲས་བུ་འདུ་ཤེས་གསུམ་ལས་ཅི་ཞིག་ཐོབ། །ཆོས་གོས་གྱོན་ཀྱང་ནང་ན་ཡོན་ཏན་མེད། །ཡིག་དྲུག་བཏོན་ཀྱང་གཞན་ལ་ཕན་སེམས་མེད། །སེམས་ལ་བལྟས་ཀྱང་རྟོགས་པའི་བོགས་སྐྱེད་མེད། །འདི་འདྲའི་ངང་ནས་མི་རིང་གཞན་ཏུ་འགྲོ། །ཁྱིམ་པ་བྱས་ཀྱང་བཙུན་ཆས་མགོ་སྤུ་བྲེག །རབ་བྱུང་བྱས་ཀྱང་ཆོས་དང་གང་ཟག་འགལ། །ཆོས་བརྒྱད་ལོག་འཚོ་ལྔ་ཡི་རིན་བཅལ་ནས། །དཀོར་རྫས་ཁྲོ་ཆུའི་བཏུང་བ་བག་མད་འཐུང་། །དམ་ཆོས་སྟོན་པའི་བླ་མའི་སྐྱོན་ལ་བརྟག །བརྒྱུད་པའི་བླ་མར་མོས་གུས་བསྒོམ་པ་སྐད། །ཡིད་ཆེས་དད་པས་
མཆི་ཐིགས་ཙམ་མེད་པར། །གསོལ་འདེབས་ཚར་རེ་བཀླགས་པས་ཆོག་པར་བརྩི། །མཐུན་རྐྱེན་འཛོམས་ཀྱང་དོན་མེད་གཡེང་བ་འཕེལ། །མཐུན་རྐྱེན་མེད་ན་རྩོལ་སྒྲུབ་རྟོག་པ་སྤུན། །བློ་ཐག་གཤའ་མ་ནང་ནས་མ་ཆོད་པས། །ཅི་ལྟར་བྱས་ཀྱང་དབེན་པའི་གོ་སྐབས་བྲལ། །རྒྱན་གོས་རྟགས་ཀྱིས་ཁྱིམ་པས་བླ་མར་མཐོང་། །ཆོས་ཀྱི་དྲིས་དབེན་དམ་པས་དུད་འགྲོར་མཐོང་། །རྒྱུ་འབྲས་འཆོལ་སྤྱོད་གཤིན་རྗེས་བཏག་བྱར་མཐོང་། །རང་སྣང་དགྲར་ལངས་ལྷས་ཀྱང་འདྲེ་རུ་མཐོང་། །གཞན་སེམས་ཤེས་པའི་མངོན་ཤེས་མི་ལྡན་ཞིང་། །རང་རྒྱུད་བརྟགས་པའི་བློ་མིག་ལྡང་བཞིན་ཏུ། །ཆོས་གཏམ་སྣ་ཚོགས་སྨྲ་བའི་སྙིང་ཁམས་ཅན། །རྗེ་བཙུན་འཕགས་མའི་ཐུགས་ཀྱིས་མ་ཁྲེལ་ལམ། །ད་དུང་གསོན་ཅིག་རྗེ་བཙུན་ཐུགས་རྗེའི་གཏེར། །དེ་སྔོན་འཁོར་བར་ཡུན་རིང་འཁོར་བ་ན། །དགེ་བའི་ལས་ནི་ཅི་ཡང་མ་བགྱིས་ཏེ། །ཅུང་ཟད་བགྱིས་པའང་གནས་སྐབས་འབྲས་བུར་ཟད། །ད་ནི་དགེ་ལ་བརྟུན་པར་མ་གྱུར་ན། །ཡིད་ལ་མེད་པར་དུས་ཀྱིས་ཟིན་པའི་ཚེ། །སྐྱོབ་པ་སུ་མཆིས་གླིང་དང་དཔུང་གཉེན་སུ། །རང་ལ་མེད་པར་གཞན་དག་སྦྱིན་པོའང་སུ། །དེ་ཕྱིར་བག་ཙམ་དགེ་ལ་བློ་བསྲལ་ཏེ། །སེམས་ན་བྲོད་པ་ཡང་དང་ཡང་བཏིང་མོད། །ལས་འདི་ཟིན་ཏེ་དེ་ནས་བྱའོ་ཞེས། །བློ་ངན་རྒྱུན་འདིས་ཕྱི་བཤོལ་ཁོ་ན་བཏབ། །འདི་ན་སྒྲིབ་གསུམ་སྙིང་པོར་བཅད་
ནས་སུ། །ཞི་བསིལ་བདུད་རྩི་གཞན་ལ་ཕན་བརྩོན་པ། །མང་པོ་དག་ཀྱང་སྲིད་ལམ་མཆིས་པ་ན། །ཁྱོད་ཀྱི་ཡེ་ཤེས་མཐུ་ཡིས་དབུགས་དབྱུང་སྩལ། །དེ་ནས་བརྩམས་ཏེ་བྱང་ཆུབ་མཐར་ཐུག་པར། །འགྲོ་མང་སྨིན་ཅིང་ཞིང་ཁམས་སྦྱང་མཛད་ནས། །བསམ་གྱིས་མི་ཁྱབ་དཔལ་ལ་དབབ་འབྱོར་བ། །དེ་བཞིན་བདག་ལའང་ཐུགས་བརྩེ་སྩལ་བར་རིགས། །སྙིགས་མའི་དུས་དང་བདག་སྐལ་ངན་པས་ཀྱང་། །ཉེ་བར་ཐོབ་པའི་བློ་ངན་གང་ཡིན་པ། །བརྟུལ་བར་མཛད་པ་ཁྱོད་ལས་མ་མཆིས་ན། །རང་སྐལ་བབ་པར་གཡེལ་བར་མཛད་སྲིད་དམ། །འཁོར་ལོས་སྒྱུར་བའི་དཔལ་ལའང་སྤྱོད་སྲིད་ཀྱི། །ཆོས་ཀྱི་འབྱོར་པ་རྒྱས་པ་ད་རེས་ཙམ། །མི་ལུས་དོན་མཐུན་འགྲོག་བཞིན་གཏན་གྱི་ཁེ། །མ་ཐོབ་ངན་འགྲོར་ཆུད་ན་ཅི་ཞིག་བྱ། །ལུས་ནི་སྲིད་པའི་གཡུལ་དུ་འཕྱན་གྱུར་ཀྱང་། །སེམས་ནི་ཅང་ཤེས་མཛའ་བཤེས་གཞན་སྤངས་ནས། །དཀོན་མཆོག་འཁོར་ལོའི་བདག་པོ་མི་འདོར་བའི། །བརྟུལ་ཞུགས་དེ་ནི་སྲོག་ལྟར་བཙའ་ལགས་ན། །བདག་ཡིད་མི་དགེའི་ལམ་དུ་འཁྱོགས་བཞིན་ཏུ། །ལྟར་སྣང་ལེགས་སྤྱད་ཆ་ཙམ་བསྒྲུབ་པ་ལ། །འབད་པ་འབྲས་བུ་མེད་པ་འདི་ཅི་ཞེས། །ཡི་ཆད་སྨྲེ་སྔགས་བླབ་ཅོལ་འདོན་པ་སྣང་། །དེད་དཔོན་ཆེན་མོར་སྐྱབས་སུ་སོང་བཞིན་ཏུ། །བདག་ཅག་འཁོར་བའི་རྒྱ་མཚོར་ལྷུང་སྲིད་ན། །ཚོགས་གཉིས་གཏིང་
དཔག་དཀའ་བས་བསྒྲུབས་པ་ཡི། །སྙིང་རྗེའི་གདོས་པ་བྲལ་དང་ཁྱད་ཅི་ཡོད། །རྗེ་བཙུན་མ་ཁྱོད་སྤྱན་རས་གཟིགས་དབང་གི། སྤྱན་ཆབ་ལས་འཁྲུངས་བུད་མེད་གཟུགས་ཀྱིས་ནི། །སངས་རྒྱས་ཀུན་གྱི་མཛད་པ་རབ་མཛད་པ། །བརྟན་དང་སྙིང་རྗེ་ཆེ་ཞིང་དཔའ་བས་ལགས། །གསོལ་བ་བཏབ་ན་རེ་བ་མཆོག་སྩོལ་བས། །མཚུངས་བྲལ་བླ་མའི་ངོ་བོར་ཤར་བ་ཁྱོད། །གདུལ་བྱ་འདུལ་ལ་ཕྱོགས་རིས་མེད་མོད་ཀྱང་། །ཁྱད་པར་བོད་ཀྱི་ཡུལ་དུ་དགོངས་ཞེས་ཐོས། །དེ་ཕྱིར་གུས་པའི་ཡིད་ཀྱི་ཆུ་མཚོ་ན། །དྲི་མེད་མཛེས་མའི་གཟུགས་བརྙན་ལེགས་བྲིས་ཏེ། །མོས་པ་ཙམ་གྱིས་རྗེས་སུ་མ་བཟུང་ཡང་། ཡི་ཆད་མ་མཆིས་བུ་ཡིས་མ་འབོད་ལྟར། །ལྷ་སྐུ་བསྒོམས་ཀྱང་མཐོང་བ་མ་སྩལ་ཞིང་། །བཟླས་བརྗོད་བྱས་ཀྱང་ནུས་པའི་རྟགས་མ་ཐོན། །ཐུགས་ཡིད་བསྲེས་ཀྱང་བྱིན་རླབས་དྲོད་མ་ཕེབ། །འོན་ཀྱང་རང་གི་ཉེས་པས་བསྒྲིབས་པར་ཟད། །བྱང་བལྟས་ཕུག་པར་ཉི་མས་མི་སྣང་ཞིང་། །མཁྲིས་ནད་ཅན་གྱིས་དུང་མདོག་ལོག་པར་མཐོང་། །དཀོན་མཆོག་བདེན་པ་ལོག་སྲེད་ཅན་དག་ལ། །འཇུག་པར་དཀའ་བ་བསོད་ནམས་མིན་པའི་མཐུ། །གང་ལ་ཐོག་མཐའ་བར་མ་མ་གཟིགས་པས། །གཟིགས་པ་མཆོག་ཏུ་གྱུར་པའི་གདིང་ཚད་ཀྱིས། །སྐད་ཅིག་གཅིག་ལ་འགྲོ་ཀུན་བསྒྲལ་བརྩམ་པའི། །སྙིང་སྟོབས་ཁུར་ཆེན་དེ་ནི་སུ་ཡིས་ཐེག །ཏིང་འཛིན་བྱེ་
བའི་འོད་དང་འགྲོགས་པ་ཡི། །མཚན་དཔེའི་ཉི་མ་ལན་གཅིག་འཕོས་པ་ཡིས། །ཐོགས་མེད་དུས་ཀྱི་སྒྲིབ་པའི་སྨག་བཅིལ་ནས། །ཡང་དག་ལྟ་བ་སྦྱིན་པའི་རྗེ་བཙུན་མ། །ཕྲ་རབ་རྡུལ་ལས་འདས་ཀྱང་རྣམ་བཅས་སྐུ། །པྲ་ཕབ་རང་བཞིན་བཙུན་མོའི་རོལ་པ་ཅན། །རྣམ་པ་ཀུན་མཆོག་དགའ་བས་ཐུགས་ཚིམས་ནས། །གཞོམ་མེད་ཡི་གེའི་སྤྲིན་གྱི་འཕྲོ་འདུ་སྤྲོ། །སྤང་བྱའི་ངོ་བོར་མ་གྲུབ་ཐ་སྙད་ཙམ། །དེ་ལ་གཉེན་པོའི་ཆོས་གཞན་མི་ལྡན་པས། །སྤྱད་དུ་མེད་པར་སྤྱོད་པའི་ཕ་རོལ་དུ། །སྒྱུ་མའི་འཕྲུལ་འཁོར་བཞིན་ཏུ་བདེ་བར་གཤེགས། །མཚན་མར་དམིགས་པའི་སྙིང་རྗེ་དེ་དང་ནི། །བློ་ཡིས་བརྟགས་པའི་སྟོང་པ་ལས་འདས་པ། །སྤྱོད་ཡུལ་ཤིན་ཏུ་དག་པའི་ཐབས་ཤེས་ཀྱི། །མངོན་རྟོགས་སོ་སྐྱེའི་བློ་ཡིས་བསམ་མི་ཁྱབ། །སྟོང་པ་ཉིད་དང་མཚན་མ་མེད་པ་དང་། །སྨོན་པ་མེད་པའི་རྣམ་ཐར་ལ་གནས་པས། །ཐུགས་བསྐྱེད་བསགས་སྦྱངས་མཛད་པའི་ཚུལ་གང་ཡིན། །བློ་ཡིས་བརྟགས་པས་མི་མཚོན་ནམ་མཁའ་འདྲ། །ཉོན་མོངས་རླབས་ཀྱིས་རྣམ་པར་དཀྲུགས་པ་ཡི། །བྱིས་པའི་སེམས་ཀྱི་ཆུ་མཚོ་ཇི་འདྲ་བ། །དེ་འདྲ་འཕགས་མས་མཁྱེན་ཅིང་བརྩེ་བའི་ཕྱིར། །སྐྱོན་བྲལ་ཐུགས་རྗེས་རབ་ཏུ་བགྲུང་དུ་གསོལ། །དེ་ནས་གཉེན་པོའི་སེམས་ལ་དབང་ཐོབ་སྟེ། །མི་དགེའི་རྩ་བ་ཆད་པས་འབྲས་བུ་ལྡོག །བྱང་ཆུབ་
སྤྱོད་པ་རྒྱུན་ཆད་མེད་པ་ཡི། །གྲིབ་བསིལ་ཉམས་དགར་བསྟི་བའི་བཀའ་དྲིན་སྩོལ། །དཀོན་མཆོག་ཀུན་དངོས་རྗེ་བཙུན་འཕགས་མ་ལ། །སྐྱབས་སུ་མཆིས་པས་གཏན་གྱི་བློ་ཁེལ་ནས། །ནད་དུག་མཚོན་སོགས་སྲོག་གི་ཕྱིར་དུ་ཡང་། །གནས་སྐབས་སྐྱབས་ལ་ལྟོས་བློ་མེད་པར་མཛོད། །ངེས་འབྱུང་མེད་པས་དམ་ཆོས་སྒྲུབ་པ་ཡང་། །བྱེ་མའི་ཁང་བུ་བཞིན་ཏུ་མི་བརྟན་པས། །སྲིད་ལས་ངེས་པར་འབྱུང་བའི་བློ་ཡི་ཤུགས། །བཟློག་དཀའ་དུས་མཐའི་མེ་ལྟར་སྦར་དུ་གསོལ། །སྲིད་འབྱོར་ཆུ་བུར་ལྟ་བུར་ཡིད་ཆེས་ནས། །འདུ་ཤེས་མཆོག་གྱུར་མི་རྟག་སྙིང་ལ་གཟེར། །དགེ་སྡིག་ལས་ཀྱི་འབྲས་བུ་མི་བསླུ་བར། །ཤེས་ནས་སྤང་བླང་ནུས་པར་བྱིན་གྱིས་རློབས། །ཟུག་རྔུའི་འབྱུང་གནས་དུག་གི་ས་བོན་ལྟར། །ཆོས་བརྒྱད་ལོ་མ་སྡུག་བསྔལ་འབྲས་བུ་ཅན། །སྲིད་རྩ་བདག་འཛིན་དུག་གི་སྡོང་པོ་འདི། །ཡེ་ཤེས་རལ་གྲིས་རྩད་ནས་བཅད་དུ་གསོལ། །གང་ལ་བསྟེན་ན་ལས་ཀྱི་རྒྱུན་བཅད་ཅིང་། །འཆག་དང་སྨྲ་བ་ཚུན་ཆད་དག་ལ་བསྒྱུར། །བྱང་ཆུབ་ལག་རྩེར་གཏོད་པའི་ཡིད་བཞིན་ནོར། །སེམས་ཀྱི་དམ་པ་སྐྱེ་ཞིང་ཉམས་མེད་གསོལ། །ལྷ་དང་བླ་མ་ཐ་དད་མི་བལྟ་ཞིང་། །སྣོད་བཅུད་ཐ་མལ་བདེན་ཞེན་མི་སྐྱེ་བར། །མོས་གུས་དག་པའི་སྣང་བ་ཚད་ལ་ཕེབས། །རིག་པ་སྙིང་གི་དབུས་སུ་སད་པར་མཛོད། །གསལ་བས་དངོས་སྣང་ལྷ་ཡི་འཁོར་ལོར་ཤར། །བརྟན་པས་བདག་ཏུ་
ལྟ་བའི་འདུ་ཤེས་སྟོང་། །རང་བཞིན་ཡོངས་ཤེས་ལྟ་བ་གྱད་དུ་གྱུར། །རིམ་པ་དང་པོར་དབང་འབྱོར་དངོས་གྲུབ་སྩོལ། །མི་རྟོག་རླུང་གིས་བུས་བ་དགའ་བའི་མེ། །ཨ་ཧཾ་མཉམ་འདྲེས་གནས་ལ་སོགས་པར་སོན། །ཞུགས་སོགས་རིམ་པས་བྱེ་བ་གྲངས་སྙེད་ཀྱི། །རྟོག་པའི་དྲྭ་བ་སྲོག་ཏུ་སྡོམ་པར་མཛོད། །གནས་འགྱུ་ལ་སོགས་ཚིག་གིས་མི་མཚོན་པ། །དྲི་མེད་རིག་པ་རྗེན་པ་ཐེར་ལ་བུད། །རྒྱུན་ཆད་མེད་པས་ཕྱི་ནང་འཛིན་སྟངས་བྲལ། །གནས་ལུགས་རྟོགས་པའི་བྱིན་རླབས་དབབ་ཏུ་གསོལ། །བདེ་གསལ་རོ་ལ་ཆགས་པའི་བསམ་གཏན་དང་། །སྟོང་པ་ཡུལ་དུ་བྱས་པའི་ལྷག་མཐོང་སྟེ། །རྒྱུ་འབྲས་ཆད་ལྟ་སྙིང་རྗེ་དགྲར་ལངས་སོགས། །གོལ་སའི་དྲི་མ་མཐའ་དག་བཀྲུ་བར་མཛོད། །དུས་མིན་འགྲོ་དོན་ཟང་ཟིང་འདུ་ལོང་དང་། །འཕྲལ་སྣང་ནུས་པ་སྙན་གྲགས་ཆེ་བ་སོགས། །དམ་ཆོས་སྒྲིབ་པའི་བསོད་ནམས་གང་སྐྱེས་ཀྱང་། །བདུད་ཀྱི་བར་གཅོད་ཉིད་ཕྱིར་བཟློག་ཏུ་གསོལ། །བདག་བློ་ཆོས་མིན་བྱ་བར་ཅུང་ཟད་དུ། །ཞུགས་ཀྱང་དེ་ཉིད་ཁོ་ནར་མ་བཟློག་ན། །རྟོག་ངན་སྔར་འདྲིས་མི་བཞིན་ཕྲལ་དཀའ་བས། །གཉེན་པོས་འབུར་འཇོམས་ནུས་པར་བྱིན་གྱིས་རློབས། །སྐྱེས་ཐོབ་བློ་གྲོས་སྙིང་ནས་སད་པ་ལས། །ཐོས་བསམ་སྒོམ་པ་རེས་འཇོག་ཅན་མིན་པར། །ཤེས་དང་ཤེས་བྱ་ཅིག་ཅར་ཁོང་ཆུབ་ནས། །
མཁས་དང་གྲུབ་པ་ཟུང་དུ་ཆུད་པར་མཛོད། །ཁྱོད་ལ་དད་དང་ལྷག་བསམ་དཀར་བའི་མཐུས། །བདག་གི་སྡིག་པ་མོད་ལ་རབ་ཟད་ནས། །ཙཱ་ཤའི་ཁྱུ་བཞིན་མཐོང་ན་དགེ་ཐོབ་པ། །རྗེ་བཙུན་འཕགས་མའི་ཞལ་བཟང་བསྟན་ཏུ་གསོལ། །རྗེ་བཙུན་འཕགས་མའི་ཞལ་བཟང་བསྟན་ནས་ཀྱང་། །འབྲལ་བ་མེད་པར་གཙུག་གི་རྒྱན་བཞུགས་ཏེ། །ཆོས་ཀྱི་བདུད་རྩི་ངོམས་མེད་སྩལ་བ་དང་། །མི་རིང་བྱང་ཆུབ་མཆོག་ཏུ་ལུང་སྟོན་ཅིག །སྐྱེ་བོ་མི་བཟད་ངན་འགྲོའི་སྦྲུལ་གདུག་གིས། །རྟག་ཏུ་གཙེས་པ་ཕུང་ལྔའི་འདོར་ལེན་ནི། །རྨ་དང་ཤུ་བ་ལྟ་བུའི་ཟུང་རྔུ་རྣམས། །འཇིག་རྟེན་གསོ་བྱེད་ཐུགས་རྗེའི་སྨན་གྱིས་གསོས། །ལེགས་པར་བསམ་ན་རང་ལ་མི་གཅེས་པ། །འགའ་ཡང་མེད་མོད་དེ་བཞིན་གཞན་གཅེས་པས། །ཀུན་ཀྱང་ཐེག་ཆེན་སྤྱོད་པ་རྫོགས་གྱུར་ཏེ། །ཞི་བའི་རྒྱལ་ཐབས་མཆོག་ཏུ་དབུགས་དབྱུང་མཛོད། །དམ་ཆོས་ཚུལ་བཞིན་སྒྲུབ་པར་མ་གྱུར་ན། །ཆོས་སྲིད་གང་ལའང་སྙིང་པོ་མི་སྣང་བས། །བློ་ཤུགས་མེ་ལྟར་འབར་བས་གཏན་གྱི་དོན། །ཚེ་འདིར་འགྲུབ་པར་ཐུགས་རྗེས་བཟུང་དུ་གསོལ། །ཅེས་དགེ་སྦྱོང་ལྟར་སྣང་བ་ཡོན་ཏན་རྒྱ་མཚོས། །རང་ལོ་ཉེར་བརྒྱད་པར་དཔལ་སྤུངས་ཀྱི་གདན་སར་འཕགས་མ་ལ་རྒྱུ་མཚན་གསོལ་ནས་གསོལ་བ་བཏབ་པའོ། །མངྒ་ལཾ།། ༈ །།འཕགས་མ་ཡིད་བཞིན་འཁོར་ལོའི་ཐུགས་དམ་གནད་ནས་
བསྐུལ་བའི་གསོལ་འདེབས་མོས་གུས་ཀྱི་ཏམྦ་ུར་ཞེས་བྱ་བ། སྤྱན་རས་གཟིགས་དབང་སྙིང་རྗེའི་ཆུ་གཏེར་ལས། །ཕན་བདེའི་ཀུན་དུ་རྒྱས་པའི་དཔལ་འཁྲུངས་པ། །འཕགས་མ་སྒྲོལ་མ་བདུད་རྩིའི་འོད་སྣང་ཅན། །འཇིགས་བཅས་མུན་པའི་རླབས་འདི་ཞི་བར་མཛོད། །རྒྱལ་ཀུན་ཡུམ་གྱུར་གདུང་བ་སེལ་བའི་སྨན། །བྱམས་པའི་མ་མ་སྐྱེ་དགུའི་གཉེན་གཅིག་པུ། །ཚེ་རབས་ཕྲེང་བར་ཕུལ་དུ་མ་མཆིས་པའི། །སྐྱབས་ཁྱོད་སྙིང་པོའི་བར་དུ་སྐྱབས་སུ་བསྟེན། །བདག་སོགས་ལས་ཀྱིས་མནར་བའི་འགྲོ་བ་རྣམས། །གང་དུ་གནས་ཀྱང་ནད་མཚོན་མུ་གེ་སོགས། །མི་འདོད་དུ་མས་ཡང་ཡང་གཙེས་ལགས་ན། །སྡུག་བསྔལ་འདོམས་ནས་དྲོངས་ཤིག་རྗེ་བཙུན་མ། །བག་ཆགས་རྗེས་འབྲང་རྣམ་རྟོག་ཆུ་གཉེར་ལྟར། །སྐད་ཅིག་རེ་རེར་ངན་འགྲོའི་རྒྱུ་མང་བསགས། །འཁོར་བའི་ས་བོན་འཛད་དུ་མེད་པ་འདིའི། །གཞི་རྩ་ད་ལྟ་ཆོད་ཅིག་རྗེ་བཙུན་མ། །དེ་རྒྱུ་ཚོགས་ཆེན་སྔོན་ཏུ་མ་སོང་བས། །དད་པས་རྒྱལ་བའི་བསྟན་སྒོར་ཞུགས་རློམས་ཀྱང་། །དཀོན་མཆོག་གསུམ་ལ་བློ་གཏད་མ་ཁེལ་བའི། །ལས་སྒྲིབ་རྩད་ནས་ཕྱུང་ཞིག་རྗེ་བཙུན་མ། །མངོན་སུམ་དུ་ཡང་སྨིན་པར་གྱུར་མཐོང་ན། །ད་དུང་ལས་དང་ལས་ཀྱི་འབྲས་བུ་ལ། །ཡིད་ཆེས་མ་སྐྱེས་གཅན་གཟན་ངུར་སྨྲིག་མདོག །བདག་ཡིད་དགེ་ལ་དྲོངས་
ཤིག་རྗེ་བཙུན་མ། །ཉིན་མཚན་སྐད་ཅིག་མི་རྟག་མི་ཡི་ལུས། །ཡང་དག་འབྱོར་ལ་དོན་ཆེན་མ་འགྲུབ་བར། །བཟློག་པར་དཀའ་བ་འཆི་བདག་ཞགས་པའི་རྒྱུན། །ཡེ་ཤེས་རལ་གྲིས་ཆོད་ཅིག་རྗེ་བཙུན་མ། །གནས་སྐབས་སུ་ཡང་གདོན་དང་རིམས་དུག་མཚོན། །གློ་བུར་ཉིད་དུ་གཤིས་ངན་འཆི་བ་དང་། མེ་ཆུ་གཅན་སོགས་བརྒྱད་དང་བཅུ་དྲུག་གི། འཇིགས་ལས་མྱུར་དུ་སྐྱོབས་ཤིག་རྗེ་བཙུན་མ། །བདག་འཛིན་ངན་གོམས་སེམས་ཀྱི་རྒྱུན་ཇི་སྲིད། །དེ་སྲིད་སྡུག་བསྔལ་ཆུ་བོ་རྟག་འབབས་པས། །ཕུང་སོགས་རང་བཞིན་ཡོངས་སུ་ཤེས་པ་ཡི། །རྟོགས་པའི་སྒྲོན་མེ་སྤོར་ཞིག་རྗེ་བཙུན་མ། །འགྲོ་རྣམས་མར་ཤེས་བྱམས་དང་སྙིང་བརྩེ་བ། །ཚིག་ཙམ་མིན་པར་གཞན་གྱི་སྡུག་བསྔལ་དང་། །བདག་བདེ་དངོས་སུ་བརྗེ་བའི་དཔའ་རྣམས་ཀྱི། །སྙིང་སྟོབས་རླབས་ཆེན་སྐྱེད་ཅིག་རྗེ་བཙུན་མ། །ཚེ་རབས་ཀུན་ཏུ་ཕྱིན་ཅི་མ་ལོག་པའི། །དགེ་བའི་བཤེས་མཇལ་དེས་བསྟན་ཆོས་ཀུན་རྟོགས། །བྱང་ཆུབ་བར་དུ་ཚེ་དང་ཐར་སོགས་ལ། །བར་གཅོད་བདུད་དཔུང་གཞོམས་ཤིག་རྗེ་བཙུན་མ། །བློ་མིག་རྡུལ་བྲལ་ཟབ་མོའི་ཤེས་རབ་ལྡན། །ཉོན་མོངས་བགས་ཀྱིས་ཆུང་བའི་ཟོ་བཟང་བས། །བསླབ་ལ་རབ་གུས་དྲན་དང་ཤེས་བཞིན་པར། །བདག་རྒྱུད་ཆོས་དང་བསྲེས་ཤིག་རྗེ་བཙུན་མ། །ནམ་ཞིག་ཚེ་ཡི་འཕེན་པ་རྫོགས་པའི་ཚེ། །གནད་གཅོད་མེད་པར་འདུ་
ཤེས་བཅུ་རྟོགས་ནས། །སྐྱེ་འགག་མཐའ་བྲལ་དབྱིངས་སུ་ལ་བཟླ་བའི། །འོད་གསལ་རང་ངོ་སྤྲོད་ཅིག་རྗེ་བཙུན་མ། །བར་དོ་སྐད་ཅིག་ཡུད་ཙམ་ཤར་ན་ཡང་། །དག་སྣང་དཀྱིལ་འཁོར་འཁོར་ལོའི་སྤྲོ་བསྡུ་རྫོགས། །མངོན་དགའ་བདེ་ལྡན་པདྨོ་བཀོད་ལ་སོགས། །དག་པའི་ཞིང་དུ་སྐྱོལ་ཞིག་རྗེ་བཙུན་མ། །བསམ་བཞིན་སྲིད་པར་འཇུག་པ་མ་གཏོགས་པ། །དབང་མེད་ལས་ཀྱིས་འཁོར་བར་མི་འཁོར་བར། །ཚེ་འོད་མཐའ་ཡས་རྒྱལ་བའི་ཞབས་དྲུང་དུ། །ལུང་སྟོན་ལམ་སྣ་དྲོངས་ཤིག་རྗེ་བཙུན་མ། །སངས་རྒྱས་འབྱོན་དང་མ་བྱོན་ཞིང་རྒྱ་མཚོ། །མཐའ་ཡས་ཀུན་ཏུ་དམ་ཆོས་སྲོག་ལྟར་བཟུང་། །བྱང་ཆུབ་སྤྱོད་མཆོག་རྫོགས་པར་སྟོན་བགྱིད་པའི། །སྨོན་ལམ་འགྲུབ་པར་མཛོད་ཅིག་རྗེ་བཙུན་མ། །ཐོག་མེད་ནས་བསགས་སྡིག་སྒྲིབ་ཉེས་ལྟུང་ཀུན། །ལུས་རྟེན་འདི་ལ་བྱང་ཞིང་དག་པ་དང་། །དེ་སྲིད་ཆོས་མཐུན་དཔལ་དང་འཆི་མེད་ཀྱི། །ཚེ་དབང་དངོས་གྲུབ་སྩོལ་ཞིག་རྗེ་བཙུན་མ། །རྨི་ལམ་དུ་ཡང་བྱང་ཆུབ་མཆོག་གི་སེམས། །མི་ཉམས་བདུད་ཀྱི་ལས་ཀུན་ཡོངས་སྤངས་ཏེ། །སྒོ་གསུམ་བྱ་བ་ཅི་བགྱིས་བསྟན་འགྲོ་ཡི། །ཕན་བདེའི་ཟུངས་སུ་སྤེལ་ཞིག་རྗེ་བཙུན་མ། །ཆོས་བརྒྱད་ཚེ་འདིའི་རྣམ་གཡེངས་རབ་སྤངས་ནས། །བས་མཐའི་ནགས་སུ་བར་གཅོད་མ་མཆིས་པར། །སྒྲུབ་ལ་སྙིང་པོར་
དྲིལ་བས་ཚེ་འདི་རུ། །མི་ལུས་དོན་ལྡན་མཛོད་ཅིག་རྗེ་བཙུན་མ། །བདག་གིས་ད་ལྟ་མྱོང་བའི་དུཿཁ་འདིས། །འགྲོ་བ་ཀུན་གྱི་སྡུག་བསྔལ་རྒྱུ་དང་འབྲས། །མྱུར་དུ་ཟད་ནས་ཕྱིན་ཆད་བདག་གཞན་ཀུན། །བདེ་ནས་བདེ་བར་ཁྲིད་ཅིག་རྗེ་བཙུན་མ། །ཕན་བདེའི་འབྱུང་གནས་རྒྱལ་བའི་བསྟན་པ་མཆོག །ནུབ་མེད་ཕྱོགས་བཅུ་ཀུན་ཏུ་དར་ཞིང་རྒྱས། །དེ་འཛིན་སྐྱེས་ཆེན་དམ་པ་མ་ལུས་པའི། །སྐུ་ཚེ་རིང་དུ་སྲིངས་ཤིག་རྗེ་བཙུན་མ། །ཁྱད་པར་ངེས་དོན་སྙིང་པོ་ཟབ་མོའི་དོན། །འགྲོ་ཀུན་རྣ་བར་འབབ་པའི་སྐལ་བཟང་ལྡན། །དེ་ལ་དགའ་བའི་ལྷ་ཀླུ་གནོད་སྦྱིན་ཚོགས། །དབུ་འཕང་དགུང་དུ་བསྟོད་ཅིག་རྗེ་བཙུན་མ། །རྒྱལ་ཁམས་ཀུན་ཏུ་མི་བདེའི་མིང་མེད་ཅིང་། །ཚེ་བསོད་དཔལ་རྒྱས་བསྟན་ལ་གུས་པ་སོགས། །རྫོགས་ལྡན་བདེ་སྐྱིད་ནོར་བུའི་སྤྲིན་ཆེན་ལས། །འདོད་རྒུའི་ཆར་པ་ཕོབ་ཅིག་རྗེ་བཙུན་མ། །རྒྱལ་བའི་བསྟན་དང་སེམས་ཅན་བདེ་སྐྱིད་ལ། །རྣམ་པར་འཚེ་བའི་མི་དང་མི་མ་ཡིན། །བསམ་སྦྱོར་ལོག་པར་ཞུགས་པའི་ཚང་ཚིང་ཀུན། །མཐུ་སྟོབས་མེ་ལྕེས་སྲེགས་ཤིག་རྗེ་བཙུན་མ། །མཁའ་མཉམ་མ་རྣམས་དུས་མིན་འཆི་སོགས་ཀྱི། །འཇིགས་བྲལ་དགེ་བཅུའི་དཔལ་ལ་ངང་གིས་སྤྱོད། །དཀོན་མཆོག་བསླབ་པའི་གཞིར་འགྲོགས་ཐར་པ་ཡི། ཁ་ལོ་གྱེན་ཏུ་སྒྱུར་ཞིག་རྗེ་བཙུན་མ། །ཁྱད་པར་བདག་དང་བདག་ལ་ལྟོས་
བཅས་རྣམས། །རྣམ་ཀུན་བར་ཆད་དབང་དུ་མི་འགྲོ་བར། །ཚེ་དང་སྒྲུབ་པ་མཐར་ཕྱིན་རྟག་བརྟན་གྱི། །སྲོག་གི་ཀ་བ་ཚུགས་ཤིག་རྗེ་བཙུན་མ། །འདི་ཕྱི་ཀུན་ཏུ་བློ་གཏད་བཅས་པའི་ལྷ། །དུས་གསུམ་རྒྱལ་བའི་ཡུམ་གྱུར་བཅོམ་ལྡན་མས། །སྨོན་པའི་འབྲས་བུ་གྲུབ་པར་མ་མཛད་ན། །སྐྱབས་གཞན་བདག་ལ་མེད་དོ་རྗེ་བཙུན་མ། །ཐོག་མེད་དུས་ནས་ཚོགས་གཉིས་བསྒྲུབས་པའི་སྟོབས། །བསམ་གྱིས་མི་ཁྱབ་ནམ་མཁའི་སྐུ་བརྙེས་པས། །རྩེ་གཅིག་གདུང་བས་གསོལ་བ་འདེབས་ལགས་ན། །བྱིན་རླབས་ཐུགས་རྗེ་མ་ཆུང་རྗེ་བཙུན་མ། །ཆུ་སྐྱེས་དབུས་ན་སྟོན་ཟླ་རྒྱས་པའི་སྐུ། །རྡོ་རྗེ་བདེ་བའི་ལང་ཚོ་ཤིན་ཏུ་རྫོགས། །དྲི་མེད་འོད་ཀྱི་དཀྱིལ་འཁོར་མཐའ་ཀླས་པས། །ལས་བཞིའི་ཕྲིན་ལས་སྩོལ་ཞིག་རྗེ་བཙུན་མ། །གང་ལ་རེག་པས་ཆོས་ནོར་འདོད་དང་ཐར། །བསམ་རྒུ་ཡིད་བཞིན་འཇོ་བའི་མཆོག་སྦྱིན་གྱི། །ཕྱག་མཐིལ་བསོད་ནམས་བརྒྱ་ལས་གྲུབ་པ་དེས། །བདག་གི་སྤྱི་བོར་བྱུགས་ཤིག་རྗེ་བཙུན་མ། །མཐེབ་སྲིན་བར་དུ་རིན་ཆེན་སྡོང་བུའི་རྩེར། །ཡིད་འོང་པདྨ་གསར་དུ་བཞད་པ་ལས། །མཆོག་ཐུན་སྦྲང་རྩི་ཅི་ཡང་འཇོ་བ་དེས། །བདག་ཡིད་སེམས་པ་སྐྱེད་ཅིག་རྗེ་བཙུན་མ། །མུ་ཏིག་དྲྭ་ཕྱེད་གསེར་གྱི་དྲིལ་ཆུང་ཅན། །ལྷ་རྫས་རྒྱན་སོགས་རོལ་སྒེག་རྣམ་པར་འཕྲུལ། །འཆར་ཁའི་གསེར་ཞུན་གཟི་
བརྗིད་སྟོང་འབར་བ། །དད་པའི་མིག་སྔར་སྟོན་ཅིག་རྗེ་བཙུན་མ། །རབ་འབྱམས་ཞིང་ན་ངལ་གསོ་སྦྱིན་པའི་ཕུལ། །ཟག་མེད་ཟླ་བ་རྒྱས་པའི་རྒྱབ་ཡོལ་ཅན། །མི་ཤིགས་རྡོ་རྗེའི་སྐྱིལ་མོ་ཀྲུང་བཅས་པ། །སྤྱི་གཙུག་རྒྱན་ཏུ་བཞུགས་ཤིག་རྗེ་བཙུན་མ། །ཆོས་གསུང་ཚངས་པའི་དབྱངས་ཀྱིས་ཟབ་པ་དང་། །རྒྱ་ཆེ་རྒྱུན་མི་འཆད་སྟོན་སྒྲིབ་གསུམ་གྱི། །དྲྭ་བ་ཀུན་བཅད་ཀུན་ཀྱང་བྱང་ཆུབ་ཀྱི། །རྒྱལ་སར་དབུགས་དབྱུང་སྩོལ་ཞིག་རྗེ་བཙུན་མ། །མདོར་ན་སྐྱབས་ཀྱི་སྙིང་པོ་ཁྱོད་ཡིན་པས། །བྱང་ཆུབ་མ་ཐོབ་བར་དུ་རྟག་པར་བདག །བར་གཅོད་བདུད་ཀྱི་དབང་དུ་མི་བཏང་བར། །དོན་གཉིས་མཐའ་རུ་ཕྱིན་པའི་བཀའ་དྲིན་སྩོལ། །ཅེས་ཡོན་ཏན་རྒྱ་མཚོ་བདག་རང་ལོ་སུམ་ཅུ་པར་བྲོ་ནད་ཚབ་པོ་ཆེས་ཉེན་ཅིང་རྒྱལ་ཁམས་སུའང་སྙིགས་མའི་རྒུད་པ་མངོན་ཏུ་གྱུར་པའི་སྐབས་གསོལ་བ་ཅི་དྲན་ཏུ་བཏབ་པ་དཀོན་མཆོག་གསུམ་གྱི་བདེན་པས་འགྲུབ་པར་གྱུར་ཅིག། ༈ །།རྗེ་བཙུན་མ་ལ་བསྟོད་པ་སྦྲང་རྩིའི་རླབས་ཕྲེང་ཞེས་བྱ་བ། །རྒྱལ་བ་སྲས་བཅས་སྐྱེད་པའི་ཡུམ། །འགྲོ་ལ་སྙིང་རྗེའི་སྤྱན་མྱུར་བ། །དོན་ཀུན་སྦྱིན་མའི་ཞབས་པད་ནི། །མི་འཕྲོག་དད་པའི་སྤྱི་བོར་མཆོད། །རྣམ་རྟོག་འཁོར་བའི་ཚུར་རོལ་ནས། །ཟག་པ་མེད་པའི་ཏིང་འཛིན་གྱིས། །མི་རྟོག་མྱང་འདས་ཕ་རོལ་དུ། །སྒྲོལ་མཛད་སྒྲོལ་མ་ཡུམ་ལ་འདུད། །ཟག་བཅས་ཉོན་མོངས་དྲྭ་བ་ནི། །རང་
བྱུང་ཡེ་ཤེས་གྲིས་བཅད་དེ། །ཟག་མེད་ཞི་བའི་གྲིབ་བསིལ་དུ། །སྒྲོལ་མཛད་སྒྲོལ་མ་ཡུམ་ལ་འདུད། །སྡུག་བསྔལ་ཕུང་པོའི་གྲོང་ཁྱེར་ལས། །མི་གནས་རྣམ་པར་ཐར་པ་ཡིས། །བདེ་བ་རྟག་པའི་ཁང་བཟང་དུ། །སྒྲོལ་མཛད་སྒྲོལ་མ་ཡུམ་ལ་འདུད། །གཟུང་འཛིན་འཆི་བདག་མེ་ལྕེ་ནི། །སྟོང་ཞིང་བདག་མེད་ཆུ་བོས་གཞིལ། །སྐྱེ་འགག་མེད་པའི་རྒྱལ་ས་རུ། །སྒྲོལ་མཛད་སྒྲོལ་མ་ཡུམ་ལ་འདུད། །ཆགས་མེད་སྦྱིན་པའི་ཆུ་རྒྱུན་ལ། །རེ་སྐོང་མུ་ཏིག་དབུ་བ་འཁྲིགས། །འགྲོ་ཀུན་ཐར་པའི་འབྱུང་གནས་ཉིད། །དང་པོའི་ཕ་རོལ་ཕྱིན་ལ་འདུད། །ཚུལ་ཁྲིམས་ནོར་བུའི་རྒྱན་ཆས་སྒེག །དགེ་ལེགས་འདོད་པ་དུ་མ་འཇོ། །ལུང་དང་རྟོགས་པའི་ས་གཞི་ནི། །གཉིས་པའི་ཕ་རོལ་ཕྱིན་ལ་འདུད། །བཟོད་པའི་བླ་གོས་ཤིན་ཏུ་མཁྲེགས། །ཆོས་དང་ཆོས་ཅན་རོ་གཅིག་བགོས། །བདུད་ལ་རྡོ་རྗེའི་དབྱུག་པ་ཉིད། །གསུམ་པའི་ཕ་རོལ་ཕྱིན་ལ་འདུད། །བརྩོན་འགྲུས་གསེར་གྱི་ཤིང་རྟ་ཡིས། །འཇིགས་སར་འཆེལ་རྣམས་ཡང་ནས་ཡང་། །སྟོབས་དང་ལྡན་པར་འདྲེན་མཛད་མ། །བཞི་པའི་ཕ་རོལ་ཕྱིན་ལ་འདུད། །མི་བསྙེལ་བསམ་གཏན་བདུད་རྩིའི་ཟས། །ཏིང་འཛིན་ཡན་ལག་དུ་མའི་རོ། །ཚིམས་པར་རོལ་པའི་གཞོན་ནུའི་ལུས། །ལྔ་པའི་ཕ་རོལ་ཕྱིན་ལ་འདུད། །དྲི་མེད་ཤེས་རབ་
སྤྱན་ཡངས་པོས། །ཆོས་ཀུན་ཆགས་ཐོགས་བྲལ་བར་གཟིགས། །སྤྲོས་བྲལ་ངང་ལས་མི་གཡོ་བ། །དྲུག་པའི་ཕ་རོལ་ཕྱིན་ལ་འདུད། །ཐབས་མཁས་གྲུ་ཆེན་ལ་ཞོན་ཏེ། །ཡེ་ཤེས་རིན་ཆེན་གླིང་མཆོག་ཏུ། །སྣ་ཚོགས་སྣ་ཚོགས་ཚུལ་གྱིས་དཀྲིད། །བདུན་པའི་ཕ་རོལ་ཕྱིན་ལ་འདུད། །སྨོན་ལམ་ནོར་བུ་དཔག་བསམ་ཤིང་། །དམིགས་མེད་སྙིང་རྗེའི་རྩ་བ་ཅན། །རྟོག་མེད་འབྱོར་པའི་སླད་དུ་རྟག །བརྒྱད་པའི་ཕ་རོལ་ཕྱིན་ལ་འདུད། །སྤྱོད་ཡུལ་ཤིན་ཏུ་དག་པའི་སྟོབས། །སྤང་གཉེན་ཇི་ལྟར་མཚམས་པར་འཇུག །ཀུན་ནས་མྱུར་བའི་རྫུ་འཕྲུལ་སོགས། །དགུ་པའི་ཕ་རོལ་ཕྱིན་ལ་འདུད། །གང་ཡང་སྐྱེ་བ་མེད་མཁྱེན་པས། །གང་ཞིག་འགག་པ་མི་མངའ་བ། །གང་དུའང་མི་གནས་ཟབ་ཅིང་གསལ། །ཡེ་ཤེས་ཕ་རོལ་ཕྱིན་ལ་འདུད། །རྒྱལ་བ་ཀུན་གྱི་རྣམ་པར་ཐར། །ཁྱོད་ཀྱི་བ་སྤུ་གཅིག་ན་འཇུག །ཡོན་ཏན་ཡངས་པའི་རྡུལ་ཕྲན་ལ། །མོས་བློས་ཅུང་ཟད་བསམ་པའི་མཐུས། །བདག་སོགས་མཁའ་ཁྱབ་སེམས་ཅན་ཀུན། །བདུད་ལས་རྣམ་རྒྱལ་སྒྲོལ་མ་བཞིན། །སྐད་ཅིག་གཅིག་སྦྱོང་བྱེ་བྲག་ཀྱང་། །བསྐལ་པ་རྒྱ་མཚོ་ལ་འཇུག་ཤོག །མ་ཆགས་གཏོང་བ་ནམ་མཁའ་མཛོད། །འགྲོ་ལ་དམིགས་པ་མེད་ཕྱེ་བས། །བསོད་ནམས་དམ་པའི་རིན་ཆེན་ནི། །མི་ཟད་གཏེར་དང་ལྡན་པར་ཤོག །སྒོ་གསུམ་ཉེས་སྤྱོད་
བསྡམ་པ་ལ། །འཆལ་བའི་རྡུལ་གྱིས་མ་གོས་ཀྱང་། །སྡོམ་དང་རློམས་སེམས་སྤངས་པའི་གོས། །སྐྱེ་བ་ཀུན་ཏུ་བགོ་བར་ཤོག །བདག་མེད་ནམ་མཁའ་ལྟ་བུའི་སེམས། །སྐྱེ་མེད་ཆོས་ལ་རྟག་ཞུགས་པས། །ཁུང་ཆེན་ཅི་ཡང་ཐེག་པ་ཡི། །བཟོད་པའི་གོ་ཆ་ཐོབ་པར་ཤོག །རྒྱལ་སྲས་རྣམས་ཀྱི་ཞོན་པའི་མཆོག །བདུད་ཀྱིས་མི་བརྫི་བརྩོན་འགྲུས་རྟ། །ས་ལམ་མྱུར་དུ་བགྲོད་པ་ལ། །ལེ་ལོའི་སྒྲོག་དང་བྲལ་བར་ཤོག །ལུས་ངག་ཡིད་ལ་ཞི་ཐོབ་ཅིང་། །རྣམ་ཤེས་བདུན་པོ་དབང་དུ་གྱུར། །བྱང་ཆུབ་ཆོས་རྣམས་བརྟེན་པའི་གཞི། །བསམ་གཏན་ཞབས་དང་ལྡན་པར་ཤོག །ཕུང་སོགས་ལྟ་ལ་མི་གནས་པས། །ལེན་པའི་རྣམ་ཤེས་རྡུལ་སྤངས་ཏེ། །ཤེས་བྱའི་སྒྲིབ་པ་ཕྲ་བ་ཕྲལ། །ཤེས་རབ་རིག་པའི་སྤྱན་ཐོབ་ཤོག །ཐབས་སྟོབས་སྨོན་ལམ་ཏིང་འཛིན་སོགས། །སྤྱོད་ཡུལ་མཁའ་ལྟར་རྒྱ་ཆེ་ཞིང་། །འགྲོ་ལ་འཆི་མེད་དཔལ་སྟེར་བ། །སྒྲོལ་མའི་གོ་འཕང་མྱུར་ཐོབ་ཤོག །ཅེས་པའང་ཁྲོ་ཆུ་ཤུ་བྷཾ་དགོན་ཏུ་ལྷག་པའི་ལྷ་འདི་ཉིད་ཉེ་བར་བསྙེན་པའི་ཐུན་མཚམས་སུ་ཡོན་ཏན་རྒྱ་མཚོས་བྲིས་པ་སྟེ་རང་ལོ་སོ་བཞི་པ་ལ་དགེ། ༈ །།བྱིན་རླབས་ཉིན་བྱེད་བསྐུལ་བའི་བསྟོད་དབྱངས་སྐྱ་རེངས་ཀྱི་ཕྲིན་པ་ཞེས་བྱ་བ། སྟོབས་བཅུའི་ཉི་མ་བྱེ་བའི་གཟི་བརྗིད་ཀྱིས། །འཆི་བདག་མུན་སྟུག་
ཡུད་ལ་བསལ་ནས་ཀྱང་། །ཚེ་དབང་ཡེ་ཤེས་སྦྲང་རྩིས་གཏམས་པའི་ཚལ། །རྒྱས་མཛད་བཅོམ་ལྡན། ཐུགས་རྗེ་ཅན་མས་སྐྱོངས། །མཚུངས་པ་མེད་པ་ལྷ་ཡི་འབྱོར་པ་ཡིས། །རབ་མཛེས་ཞི་བའི་སྐུ་མཆོག་ཡིད་འོང་མ། །བྱིན་རླབས་ཟིལ་དངར་འབུམ་ཕྲག་འཇོ་བ་དེས། །བདག་དང་འགྲོ་ལ་ཚེ་དབང་མཆོག་དངོས་སྩོལ། །འཁོར་བའི་མཚོ་ནང་འདམ་སྐྱེས་པདྨོ་བཞིན། །སྙིང་རྗེའི་སྟོབས་ཀྱིས་མི་སྤོང་མི་ཆགས་པར། །ནམ་མཁའ་སྲིད་དུ་ཐུགས་རྗེའི་རྩལ་སྤྲུགས་ཀྱང་། །ནམ་མཁའ་བཞིན་ཏུ་ཐུགས་རྗེ་འཛད་པ་མེད། །འདི་ན་བཟང་ངན་བར་མའི་བློ་གྲོས་ཀྱིས། །ཡང་དག་ལོག་དང་འཆོལ་བར་སྤྱོད་མོད་ཀྱི། །འདྲེན་པའི་ཕྱག་གིས་སུ་ཡང་མི་འདོར་བས། །བཏང་སྙོམས་ཆེན་པོས་སངས་རྒྱས་མཛད་པ་སྒྲུབ། །ཐོག་མར་སྲིད་པའི་མཚོ་ལས་སྲིད་པ་བསྒྲལ། །བར་དུ་རྣམ་པར་ཐར་པའི་སྤྱོད་ཡུལ་བསྩལ། །ཐ་མར་ཞི་བའི་གཉིད་ལས་བསླངས་ནས་སུ། །རྒྱལ་བའི་སྲས་ནི་དུས་གསུམ་ཀུན་ཏུ་བསྐྲུན། །དལ་འབབས་པདྨས་གང་བའི་མཚོ་ངོགས་སུ། །ཁྲུས་ལ་ཞུགས་པའི་གཟུགས་ཅན་ཡོད་འོང་མ། །དེ་རིང་ཁྱོད་སྐུའི་ངོ་མཚར་དྲན་འདི་དང་། །གདུང་བ་འགོག་པའི་ཡིད་ནི་མཚུངས་པར་གྱུར། །ཆགས་མེད་མཛེས་མ་ཆགས་པའི་ཡིད་འཕྲོག་མ། །ཞི་བའི་འཛུམ་ལྡན་སྡང་བ་ཀུན་བཅོམ་མ། །ཡེ་ཤེས་ཐུགས་
མངའ་རྨོངས་ལ་རབ་བརྩེ་མ། །འཕྲུལ་ཆེན་འདི་འདྲས་རྒྱལ་རྣམས་དགྱེས་པར་ཤེས། །པད་དཀར་དགའ་ཚལ་ལྟ་བུར་སྙིང་དུ་སྡུག །ནོར་བུ་བཞིན་ཏུ་འདོད་དགུའི་དངོས་པོ་འཇོ། །རྡོ་རྗེ་དང་མཚུངས་མི་མཐུན་འཇིགས་བཅོམ་པ། །རྗེ་བཙུན་མ་ཁྱོད་བདག་གི་སྙིང་གི་དཔྱིད། །དག་པའི་ཤེལ་འདྲ་སྒྲིབ་བྲལ་འོད་ཀྱི་ལུས། །གཞོན་ཤ་རབ་ཆགས་འཆི་མེད་ན་ཆུང་མ། །ཡིད་ལ་བྱས་པའི་དགའ་བ་ཇི་འདྲ་བ། །དེ་འདྲ་བདུད་རྩིའི་ཟས་ཅན་སྙིང་ལའང་མེད། །ནམ་མཁའི་མཐས་གཏུགས་འགྲོ་ལ་གཟིགས་པ་ཡི། །སྤྱན་རས་པདྨའི་འདབ་མ་རབ་ཡངས་པ། །མི་ཟུམ་སྙིང་རྗེའི་ཆུ་ཡི་དོགས་པ་འཁྲིལ། །སྲིད་གསུམ་སྙིང་གི་དྲི་མ་བཀྲུ་བ་བཞིན། །གཡོ་རྩོལ་མི་མངའ་འཇིག་རྟེན་ཀུན་ཏུ་བསྐྱོད། །རྟོག་པ་ཀུན་སྤངས་མོས་པའི་རྗེས་སུ་འཇུག །ཉི་ལྟར་སྙོམས་ཀྱང་འཆི་བདག་མུན་པ་འཇོམས། །དེ་ཕྱིར་མ་གཅིག་མཚན་གྱི་སྙན་པ་ཆེ། །དྭངས་མ་སྡུད་ཀྱང་སྒྲུབ་ལ་བཅུད་སྩོལ་མ། །གཟི་བརྗིད་འབར་ཡང་སྙིང་ལ་རབ་བསིལ་མ། །རྣམ་འགྱུར་སྤངས་ཀྱང་སྒེག་པའི་འཛུམ་ཞལ་མ། །འཇིག་རྟེན་གསོ་བྱེད་སྨན་ཆེན་རྣམ་ཐར་མངའ། །གང་ཞིག་ཉི་མའི་དཀྱིལ་འཁོར་ལ་བརྟེན་པ། །དེ་ལ་མུན་པའི་གོ་སྐབས་འབྱུང་མི་འགྱུར། །དེ་བཞིན་དུས་གསུམ་རྒྱལ་ཡུམ་ཁྱོད་བསྟེན་པ། །དེ་ལ་
དུས་མིན་འཆི་སོགས་འཇིགས་མི་འབྱུང་། །ཆུས་ཁྱེར་ར་མདའ་སྐམ་ལ་སྦྲན་པ་བཞིན། །འཇིགས་པས་གཡེང་བའི་བདག་སོགས་འཁོར་བ་པ། །ཁྱོད་ལས་མྱུར་བའི་སྐྱབས་གཞན་མ་མཆིས་པས། །སྒྲོལ་མ་བདུད་བཞིའི་འཇིགས་ལས་བསྒྲལ་དུ་གསོལ། །མཆོག་གི་ཕྱིར་ན་རྟག་ཏུ་མངོན་འདོད་པས། །བསྒྲུབས་པའི་འབྲས་བུ་ཕྱི་དུས་མ་འགྱང་བར། །མཐོང་གྲོལ་བདུད་རྩིའི་ཟེར་བརྒྱ་འཛག་པའི་སྐུ། །མིག་ལ་ཟླ་བ་བཞིན་ཏུ་སྣང་བར་མཛོད། །ཚིག་ལས་འདས་པའི་སྒྲ་སྐད་ཐམས་ཅད་པ། །ཚངས་དབྱངས་གསུང་གི་གླིང་བུའི་སྙན་འཇེབས་ནི། །ཆད་མེད་རྣ་བའི་བཅུད་དུ་ཐོས་མཛད་ནས། །རིགས་དང་མི་རིགས་ལམ་ངོ་ཕྱེད་པར་གསོལ། །རྟག་ཏུ་བལྟས་ཀྱང་ཡང་དག་མ་མཐོང་བསྒྲིབས། །ཁྱོད་ཐུགས་བསམ་མི་ཁྱབ་དང་ཤིན་ཏུ་འགལ། །ཡང་དག་ཉིད་ན་བཟང་ངན་རྡུལ་ཙམ་མེད། །འཁོར་འདས་རོ་མཉམ་དེ་ཡང་དེ་རིང་སྟོན། །བློ་བྲལ་དཔེ་ལས་འདས་པའི་དེ་བཞིན་ཉིད། །དངོས་ཀུན་ཁྱབ་བདག་མ་གཅིག་ཆོས་ཀྱི་སྐུ། །བརྟན་གཡོའི་དྭངས་བཅུད་འདུས་པའི་ཐིག་ལེ་དེ། །བདག་གི་སྙིང་གར་འཕོ་འགྱུར་མེད་པར་བཞུགས། །སྔོན་ཆད་ས་སྟེང་རྟག་ཏུ་བསྡད་པ་མེད། །སླད་དང་ད་ལྟ་རྨི་ལམ་སྣང་མཚུངས་ཀྱང་། །ལུས་རྟེན་འདི་ལས་སྙིང་པོ་མ་ལོན་པར། །སྲོག་གི་ཀ་བ་རྡོ་རྗེ་ལྟ་བུར་ཚུགས། །ཟིན་
མེད་འཁོར་བའི་བྱ་བ་ཆུ་གཉེར་ལ། །རྣམ་པར་གཡེང་བའི་བྱིས་པ་སྙིང་རེ་རྗེ། །སྐྱབས་མེད་སྐྱབས་སུ་བཞེངས་པ་འགྲོ་བའི་མས། །འདི་དག་འཁྲུལ་སྣང་འཇིགས་ལས་བསྒྲལ་དུ་གསོལ། །བདག་ཅག་ཐུགས་ཀྱིས་མ་འདོར་རྒྱལ་བའི་ཡུམ། །འཇིགས་སར་བཏང་སྙོམས་མ་མཛད་བདག་གི་སྐྱབས། །སྒྲོལ་མཛད་དམ་བཅའ་མ་གཡེལ་སྙིང་རྗེའི་ལྷ། །བློ་གཏད་བཅས་སོ་འཕགས་མ་སྒྲོལ་མ་མཁྱེན། །གང་གིས་ཐོབ་པས་འཆི་སོགས་འཇིགས་འཇོམས་ཤིང་། །མཐོ་རིས་ཐར་པའི་བདེ་ལ་ངལ་གསོ་བ། །ཁྱོད་ཀྱིས་བསྒྲུབས་པའི་རིང་འཚོའི་བཅུད་ལེན་དེ། །དེ་རིང་བདག་སོགས་རྣམས་ལ་བགོ་བཤའ་སྩོལ། །འོད་ཟེར་རྣོན་པོས་འཆི་བདག་སྙིང་ག་ཕུག །བྱིན་རླབས་ཐིགས་པ་མོས་པའི་སྣོད་དུ་གཏིགས། །ཆོས་སྐུའི་འདྲ་འབག་ཚངས་པའི་ཡུལ་ས་རུ། །བཞུགས་ནས་ཐེག་ཆེན་ཆོས་འཁོར་བསྐོར་དུ་གསོལ། །ཞེས་པའང་བག་ཡོད་ཆུ་གླང་དབོ་ཟླའི་གྲལ་ཚེས་འགྲུབ་པའི་སྦྱོར་བ་དང་ལྡན་པར་བསྙེན་པ་གྲུབ་པའི་ཚེ་ཡོན་ཏན་རྒྱ་མཚོས་གསོལ་བ་བཏབ་པ་བདག་གཞན་འབྲེལ་བཅས་རྗེས་སུ་འཛིན་པའི་རྒྱུར་གྱུར་ཅིག །སརྦ་སིངྡྷི་ྷ་བནྟུ། ལྷ་མོ་ལ་གུས་དམ་བཅས་རྒྱུན་འབབས་ཀྱི་ཚིག་ཕྲེང་བདུད་རྩིའི་ཐིགས་པ་ཞེས་བྱ་བ། ན་མོ་གུ་རུ་ཨཱརྱ་ཏཱ་རཱ་ཡ། །སྟོགས་ཆུ་མངའ་བའི་སྲས་ཀྱིས་བསྐོར་བའི་དབུས། །
སྟོབས་བཅུའི་མངའ་བདག་ཡུམ་མཆོག་རྗེ་བཙུན་མ། །དྲི་མེད་ཟླ་ཤེལ་གསར་པའི་དཀྱིལ་འཁོར་ནི། །འཆི་བདག་མུན་པ་བཅོམ་ལ་ཕྱག་འཚལ་ལོ། །འཁོར་བ་དང་པོར་བསྐྱེད་པའི་རྒྱུ་དང་རྐྱེན། །འཁོར་བའི་གནས་སྐབས་རྒྱུ་འབྲས་མཚམས་སྦྱོར་གྱི། །གནས་དང་གནས་མིན་མཁྱེན་པའི་སྟོབས་མཆོག་གིས། །འགྲོ་བས་ཡང་དག་རྒྱུ་འབྲས་གནས་ཐོབ་མཛོད། །འདས་པའི་ལས་ནི་སྐྱེས་བུའི་རང་ནོར་བཞིན། །མ་འོངས་ལས་ཀྱང་དཔྱིད་བཏབ་ས་བོན་བཞིན། །ལས་དང་རྣམ་སྨིན་མཁྱེན་པའི་སྟོབས་ཀྱི་མེས། །བདག་སོགས་ལས་ངན་ཚང་ཚིང་སྲེག་པར་མཛོད། །བསམ་གཏན་རྣམ་ཐར་ཏིང་འཛིན་སྙོམས་འཇུག་དང་། །མི་མཐུན་ཀུན་ཉོན་གཉེན་པོའི་ཕྱོགས་འཕེལ་བ། །རྣམ་བྱང་འབྱུང་འཇུག་ལྡང་བ་མཁྱེན་སྟོབས་ཀྱིས། །འཁྲུལ་མེད་ལམ་གྱི་མངོན་རྟོགས་རྒྱུད་ལ་སྩོལ། །དམུས་ལོང་སྐྱོན་ལྡན་རྣམ་པར་དག་པའི་མིག །ཡུལ་ལ་འཇུག་པ་མཉམ་པ་ཉིད་མིན་ཏེ། །དབང་པོ་དམན་མཆོག་དེ་བཞིན་མཁྱེན་སྟོབས་ཅན། །བདག་དབང་ཤིན་ཏུ་རྣོ་བར་གོང་འཕོ་མཛོད། །བཟང་ངན་བར་མ་དེ་བཞིན་རྒྱ་ཆེ་ཆུང་། །མ་ངེས་དོན་གཉེར་དོན་སྤྱོད་ཐ་དད་པ། །མོས་པ་སྣ་ཚོགས་མཁྱེན་པའི་སྟོབས་མཆིས་པས། །མོས་ལྡན་གཟིགས་པ་ལྐོག་གྱུར་མི་མཛད་གསོལ། །ངེས་དང་མ་ངེས་ལོག་སྲེད་རིགས་ཆད་ཕྱིར། །
ཐེག་གསུམ་ཞིང་སར་ཆོས་ཀྱི་འབྲས་སྣ་ཚོགས། །འདེབས་ལ་ཁམས་རྣམས་མཁྱེན་པའི་སྟོབས་མངའ་བས། །བདག་རིགས་ཐེག་པ་ཆེན་པོར་སད་མཛད་གསོལ། །གང་ལ་གནས་ན་གང་དུ་འགྲོ་འགྱུར་བ། །སྔར་གོམས་ལམ་དུ་ཞུགས་པའི་སྐྱེ་བོ་བཞིན། །འཁོར་འདས་ཀུན་འགྲོའི་ལམ་མཁྱེན་སྟོབས་མངའ་བས། །མི་གནས་མངོན་བྱང་ཆེན་པོའི་ཤུལ་ལམ་སྟོན། །རྣམ་མཁྱེན་ཤེལ་གྱི་ར་བ་རྙོགས་པ་མེད། །སྲིད་པ་མ་བྲིས་གཟུགས་བརྙན་ཐོགས་མ་མེད། །སྔོན་གནས་རྗེས་དྲན་མཁྱེན་པའི་སྟོབས་མཆོག་གིས། །ལུས་ཅན་སྐྱེ་བའི་ཕྲེང་བར་ཡིད་འབྱུང་སྩོལ། །ཚེ་དང་ལས་ཀྱི་མཐའ་དང་ཡང་སྲིད་གཞན། །ཇི་ཙམ་འབབ་ཅིང་གང་དུ་འཇུག་པའི་ལུང་། །ཚད་མ་སྒྲོགས་མཛད་སྐྱེ་འཆི་མཁྱེན་སྟོབས་ཀྱིས། །བདག་སོགས་སྐྱེ་འཆིའི་ཆུ་རྒྱུན་བཟློག་པར་གསོལ། །གང་ལ་སྲེད་ལེན་ཉིད་མཚམས་སྦྱོར་མཆིས་དང་། །གང་གིས་ཡང་སྲིད་རྩ་བ་བཅད་པ་སྟེ། །ཟག་དང་ལྡོག་པའི་འགྲོས་མཁྱེན་དཔའ་བོའི་སྟོབས། །ཟག་པ་མཐར་བྱེད་དཔུང་ལ་འཇུག་པར་མཛོད། །རྒྱལ་དང་རྒྱལ་བའི་མྱུ་གུ་སྐྱེད་པའི་ཡུམ། །སྙིང་རྗེའི་ལུས་ཅན་མཐའ་དག་འཚོ་བའི་མ། །བདག་གི་སེམས་ཀྱི་མ་གཅིག་ཁྱོད་ལགས་པས། །བུ་སྡུག་མགོན་མེད་བརྩེ་བས་འདོར་ཕོད་དམ། །མཐོ་རིས་ཡོན་ཏན་བདུན་གྱི་བླ་ན་
འབྱོར། །མ་ཡི་ཆོས་དང་གཟུགས་སྐུ་སྒྲིབ་མེད་མཐོང་། །བསྒྲལ་དང་སྐྱོབ་པའི་གཡར་དམ་ཅི་འཆལ་བ། །དེ་ལ་བདག་གི་སྟོབས་ཀྱང་འཇུག་པར་ཤོག །ཅེས་པའང་ཀུན་དགའ་ཤིང་སྟག་ཁྲུམས་ཀྱིས་ཉ་བའི་ཉིན། །བྱང་ཆུབ་སྒྲུབ་པའི་འགྲུབ་སྦྱོང་དང་ལྡན་པའི་ཐུན་མཚམས་སུ་བློ་གྲོས་མཐའ་ཡས་ཀྱིས་གསོལ་བ་བཏབ་པ་མངྒ་ལཾ། །༈། །རྗེ་བཙུན་ཐུགས་རྗེ་ཅན་མ་ལ་བསྟོད་ཅིང་ཕྱག་བྱ་བ་བདུད་རྩིའི་སྒྲ་དབྱངས་ཞེས་བྱ་བ། །ཚེ་དབང་བཀྲ་ཤིས་སྦྱིན་པའི་ཅོད་པན་ནི། །འོད་དཔག་མེད་བརྒྱན་དངོས་གྲུབ་བདུད་རྩིའི་རྒྱུན། །འགྲོ་ཀུན་གསོས་སུ་འབེབས་བའི་ལྷ་མོ་མཆོག །ཡིད་བཞིན་འཁོར་ལོའི་ཞབས་ཀྱི་པདྨོར་འདུད། །ཤིན་ཏུ་རྣམ་དག་སྤྲོས་པའི་མཐའ་ཀུན་ཞི། །གཙང་བདག་བདེ་བ་རྟག་པ་དམ་པའི་དངོས། །ཆོས་དབྱིངས་ཡེ་ཤེས་ནམ་མཁའི་ངོ་བོ་ཉིད། །དངོས་ཀུན་ཁྱབ་པའི་བདག་ལ་ཕྱག་འཚལ་ལོ། །གཟུང་འཛིན་ཀུན་སྤངས་རང་བཞིན་འོད་གསལ་བ། །སྐུ་དང་ཡེ་ཤེས་གཟུགས་བརྙན་བྱེ་བ་འཆར། །མེ་ལོང་ཡེ་ཤེས་ཉི་ཟླའི་དཀྱིལ་འཁོར་གྱིས། །ཤེས་བྱ་སྣང་བར་མཛད་ལ་ཕྱག་འཚལ་ལོ། །ཕྱོགས་དང་རིས་མེད་བརྡལ་བ་ཆེན་པོའི་ངང་། །འཁོར་འདས་ཀུན་སྙོམས་ཐུགས་རྗེའི་མུ་ཁྱུད་ཅན། །མཉམ་ཉིད་ཡེ་ཤེས་ས་ཆེན་ཡངས་པའི་གཞིར། །མཆོག་དམན་བར་མ་བརྟེན་ལ་ཕྱག་འཚལ་ལོ། །བསམ་གྱིས་མི་ཁྱབ་རྣམ་པར་
ཐར་བའི་སྒོར། །སྤྱི་དང་རང་མཚན་མ་འདྲེས་ས་ལར་སྣང་། །སོར་རྟོག་ཡེ་ཤེས་ལོ་འབྲས་ཚད་མེད་པ། །སྐྱེ་དགུའི་ཉེར་འཚོར་གྱུར་ལ་ཕྱག་འཚལ་ལོ། །ནོར་བུ་བུམ་བཟང་དཔག་བསམ་ལྗོན་ཤིང་ལྟར། །འབད་རྩོལ་མི་མངའ་གཞན་དོན་ལྷུན་གྱིས་གྲུབ། །ནན་ཏན་ཡེ་ཤེས་གཏིང་ཟབ་རྒྱ་མཚོའི་ཀླུང་། །འཁོར་བའི་མཐར་ཐུག་འབེབས་ལ་ཕྱག་འཚལ་ལོ། །སྲིད་རྩ་ཉེ་བར་ལེན་པའི་རྣམ་པར་ཤེས། །དེ་བཞིན་ཉིད་དང་རོ་གཅིག་གཉིད་སངས་པས། །མཚན་མའི་ཆོས་ཀུན་མི་ལེན་མི་འདོར་བ། །སྤངས་པ་ཕུན་སུམ་ཚོགས་ལ་ཕྱག་འཚལ་ལོ། །དྲི་མེད་མཁྱེན་རབ་པདྨ་ལྟར་རྒྱས་པས། །ཆོས་ཀུན་ནམ་མཁའ་ལྟ་བུར་ཐུགས་སུ་ཆུད། །སྐྱེ་འགག་གནས་དང་བྲལ་བའི་གཟིགས་པ་ཅན། །རྟོགས་པ་ཕུན་སུམ་ཚོགས་ལ་ཕྱག་འཚལ་ལོ། །གང་ གིས་འཁོར་བ་རང་བཞིན་མེད་གཟིགས་པ། །དེ་ཡིས་འཁོར་བའི་སྡུག་བསྔལ་དང་དུ་བཞེས། །སྲིད་པའི་མཐར་ཐུག་མྱ་ངན་མི་འདའ་བ། །ཐུགས་རྗེ་ཕུན་སུམ་ཚོགས་ལ་ཕྱག་འཚལ་ལོ། །འཕགས་མ་སྒྲོལ་མ་རྒྱལ་བ་ཀུན་གྱི་ཡུམ། །བརྩེ་ལྡན་འགྲོ་དྲུག་བུ་ལྟར་སྐྱོང་བའི་མ། །སྒོ་གསུམ་གུས་པས་འདུད་དོ་འཇིགས་ལས་སྐྱོབས། །སྙིང་ནས་གསོལ་བ་འདེབས་སོ་ཐུགས་རྗེས་ཟུང་། །མཚན་དཔེའི་སྐུ་ལས་ཟླ་བ་ཆུ་ཤེལ་འོད། །ཀུན་
གསལ་མེ་ལོང་ལྟ་བུའི་རང་བཞིན་གྱིས། །ལུས་ཅན་གདོས་བཅས་འཕོ་བའི་བག་ཆགས་བཅོམ། །འགྱུར་མེད་སྐུ་ཡི་རྡོ་རྗེར་བྱིན་གྱིས་རློབས། །ཚངས་དབྱངས་གསུང་ཟེར་པདྨ་རཱ་གའི་མདོག །ཀུན་འབྱེད་སོ་སོར་རྟོག་པའི་ཚ་གདུང་གིས། །བདག་སོགས་སྒྲ་ཚིག་འཕོ་བའི་མུན་པ་སོལ། །འགག་མེད་གསུང་གི་རྡོ་རྗེར་བྱིན་གྱིས་རློབས། །སྤྲོས་བྲལ་ཐུགས་ཀློང་ཨིནྡྲ་ནཱི་ལའི་མདངས། །ཀུན་ཁྱབ་ཆོས་དབྱངས་བདུད་རྩིའི་ཆུ་རྒྱུན་གྱིས། །འགྲོ་དྲུག་རྟོག་ཚོགས་འཕོ་བའི་དྲི་མ་བཀྲུས། །འཁྲུལ་མེད་ཐུགས་ཀྱི་རྡོ་རྗེར་བྱིན་གྱིས་རློབས། །བྲལ་སྨིན་ཡོན་ཏན་གཟི་བརྗིད་གསེར་སྦྱངས་དངོས། །ཀུན་སྙོམས་མཉམ་པ་ཉིད་དུ་ཁྱབ་པ་དེས། །སྲིད་གསུམ་སྙོམས་འཇུག་འཕོ་བའི་དབུགས་བཀག་ནས། །གཞོམ་མེད་ཡེ་ཤེས་རྡོ་རྗེར་བྱིན་གྱིས་རློབས། །རྟག་ཁྱབ་ཕྲིན་ལས་གཡུ་ཞུན་འབར་བའི་གཟི། །ཀུན་བྱེད་བྱ་བ་ལྷུན་གྱིས་གྲུབ་པ་ཡིས། །ལས་ཀྱི་སྒྲིབ་སྐྱེས་འཕོ་ཆེན་འཇིགས་པ་འཕྲོག །འཕོ་མེད་རྡོ་རྗེའི་སྐུ་རུ་བྱིན་གྱིས་རློབས། །བདེ་ཆེན་ཆུ་སྐྱེས་བཞད་པའི་སྦྲང་རྩིའི་རྡུལ། །བ་སྤུའི་མཐར་ཐུག་གཞོམ་དུ་མེད་སྤྲོས་པས། །འཆི་བའི་འཇིགས་བཅོམ་མི་ཤིགས་དྭངས་མའི་སྐུ། །ཚེ་འདི་ཁོ་ནར་གྲུབ་པས་རྗེས་འཛིན་མཛོད། །འཇིག་རྟེན་མ་རྣམས་བུ་ཡི་རེ་སྐོང་ན། །རྒྱལ་བ་ཀུན་སྐྱེད་ཐུགས་
རྗེ་ཅན་གྱི་མས། །བློ་གཏད་སྙིང་ནས་བཅས་པའི་བུ་སྡུག་གི། །བསམ་པ་མྱུར་དུ་འགྲུབ་པར་མཛད་དུ་གསོལ། །ཞེས་པའང་སྟོད་ལུང་མཚུར་གྱི་ཕུ་མཁའ་སྤྱོད་ཐུགས་ཀྱི་འཁོར་ལོའི་ལྟེ་བ་གྲུབ་ཆེན་རིན་པོ་ཆེ་ཀརྨ་པགྴིའི་སྒྲུབ་གནས་པདྨ་ཁྱུང་གི་རྫོང་དུ་རྣལ་འབྱོར་ལ་གནས་པའི་ཐུན་མཚམས་སུ་བློ་གྲོས་མཐའ་ཡས་པའི་སྡེས་གསོལ་བ་བཏབ་པ་སིངྡྷྡྷི་ར་སྟུ།། ༈ །།རྒྱལ་བའི་ཡུམ་ལ་ཐུགས་དམ་སྐུལ་ཞིང་གསོལ་བ་འདེབས་པ་འཆི་བདག་གཡུལ་རྒྱལ་ཞེས་བྱ་བ། །ཐུགས་རྗེ་རབ་མྱུར་སྲས་བཅས་རྒྱལ་བའི་ཡུམ། །ཡུན་རིང་བརྩེ་བས་སྐྱངས་མཛད་འགྲོ་བའི་མ། །དྲན་པས་འཆི་བདག་གཡུལ་འཇོམས་དཔའ་བོའི་ཞབས། །དེ་རིང་བུ་ཡི་སྤྱི་བོར་བཀོད་དུ་གསོལ། །བསོད་ནམས་མཐའ་ཡས་ལས་འཁྲུངས་གཟུགས་ཀྱི་སྐུ། །སྐད་ཅིག་གཅིག་ལ་བྱེ་བར་རྣམ་འཕྲུལ་ཞིང་། །འགྲོ་བ་འཁོར་བའི་འཇིགས་ལས་སྒྲོལ་མཛད་མ། །སྙིང་གི་ཐིག་ལེར་རྟག་བཞུགས་བྱིན་གྱིས་རློབས། །ཆོས་ཀུན་སྐྱེད་མཛད་ཤེས་རབ་ཕ་རོལ་ཕྱིན། །ཆོས་དབྱིངས་ཀུན་ཁྱབ་འོད་གསལ་ཆོས་ཀྱི་སྐུ། །སྐྱེ་འགག་མཚན་བྲལ་རྟག་པ་དམ་པའི་དངོས། །རྐང་གཉིས་གཙོ་བོ་རྣམས་ཀྱིས་ཕྱག་བྱས་མ། །ཕྱག་རྒྱ་ཆེན་མོ་བརྟན་གཡོ་ཀུན་གྱི་སྲོག །བདེ་ཆེན་ཡེ་ཤེས་རྒྱས་པའི་གཟི་བརྗིད་ཅན། །སྲིད་ཞི་སྣ་ཚོགས་ཅིར་ཡང་རྣམ་པར་
འཕྲུལ། །དམིགས་མེད་རོ་མཉམ་སངས་རྒྱས་ཀུུན་གྱི་གསང་། །ཁྱོད་ནི་རབ་ཏུ་ཟབ་པས་བརྟག་པར་དཀའ། །ཐུགས་རྗེའི་རྩལ་ཤུགས་སུས་ཀྱང་འགྲན་ནུས་མིན། །བསམ་གྱིས་མི་ཁྱབ་འགྲོ་བའི་རེ་སྐོང་མ། །ནོར་བུ་ལྗོན་ཤིང་གཏེར་གྱིས་དཔེར་མི་བཟོད། །དྲི་མེད་ཡེ་ཤེས་ནམ་མཁའི་མུ་ཁྱུད་མཐའ། །མཉམ་པ་ཉིད་གྱུར་འགྲོ་ཁམས་དེ་སྙེད་ཀྱི། །མོས་པའི་བུ་གར་ཁམས་དབང་བཞིན་ཏུ་འཇུག །བདེ་བ་ཐར་པའི་རྒྱུ་འབྲས་གོ་སྐབས་འབྱེད། །མཁའ་ཁྱབ་སྐྱེ་དགུའི་ཉེར་འཚོར་འཁྱིལ་པ་ཡི། །རབ་རྒྱས་སྙིང་རྗེ་བདུད་རྩིའི་ཆུ་གཏེར་ནི། །འདོད་རྒུ་ཡིད་བཞིན་འཇོ་བའི་དབྱིག་གིས་གཏམ། །ཐུགས་རྗེའི་དུས་རླབས་ནམ་ཡང་ཡོལ་བ་མེད། །དགེ་ལེགས་མྱུ་གུ་མཐའ་དག་བསྐྲུན་པའི་གཞི། །ལུས་ཅན་མཐའ་དག་བདེ་བར་འཚོ་བའི་གནས། །མཐའ་ཡས་རྣམ་པར་ཐར་པའི་ས་ཆེན་ལ། །རྒྱལ་སྲས་རྣམ་ཐར་ཀུན་གྱི་སྨན་ལྗོངས་སྐྱེད། །བསྡུ་བ་བཞི་ཡི་བང་རིམ་ཤིན་ཏུ་ཡངས། །བློ་ལྡན་གསེར་རིའི་དབུས་ན་མངོན་པར་འཕགས། །དུས་གསུམ་གཤེགས་པའི་ལྷ་དབང་ཀུན་བསྟེན་པ། །ཁྱོད་མཚུངས་ལྷུན་པོ་རྒྱལ་བས་ཡོངས་མ་གཟིགས། །སྲིད་ཞིའི་མཁའ་ལ་ཐབས་ཤེས་ཤིང་རྟས་སྐྱོད། །ཆོ་འཕྲུལ་གསུམ་གྱི་སྣང་བ་རྟག་ཏུ་བཀྱེ། །འཆི་བདག་མུན་ཚོགས་གཞོམ་པའི་འོད་རྣོན་ཅན། །
འགྲོ་བའི་ཉི་མ་བདག་གིས་དཔལ་དུ་ཤར། །དུས་ཀྱི་སྨག་རུམ་སེལ་མཛད་ཟླ་བའི་ཞལ། །རིང་འཚོའི་ཆུ་གཏེར་བདུད་རྩིའི་ཐིགས་པས་སྤེལ། །གང་སྐུའི་དཀྱིལ་འཁོར་འཆར་བའི་ཡིད་ཀྱི་མཁར། །རྟག་པ་དམ་པའི་དགའ་བ་ཉམས་མ་གྱུར། །སྲིད་ཞི་གཉིས་སུ་མཚན་ཙམ་དཀོན་པའི་ཕུལ། །བསོད་ནམས་ལྡན་པའི་སྐལ་པར་ལེགས་འོང་ཞིང་། །འདི་དང་གཏན་གྱི་ཕོངས་པ་མཐའ་དག་སེལ། །ཡིད་བཞིན་ནོར་བུ་བདག་སོགས་གཙུག་གི་རྒྱན། །གང་གིས་བསྟེན་པས་འཆི་བའི་འཇིགས་པ་འཕྲོག །རིང་འཚོའི་བཅུད་ལེན་སྦྱིན་ལ་མཐུ་ཆེ་བ། །བདེ་ཆེན་ཡེ་ཤེས་བདུད་རྩི་ཉོན་མོངས་ཀྱི། །ཟུག་རྔུ་བརྒྱད་ཁྲི་ཞི་བའི་ཟིལ་དངར་འཇོ། །འཇིགས་པའི་དངོས་པོ་ཕྲ་རགས་ཐམས་ཅད་བཅོམ། །ལྟ་བར་གྱུར་པའི་རི་བྲག་ཐལ་བར་འབིགས། །ཡིད་མྱུར་ཕྲིན་ལས་གང་ལའང་ཐོགས་པ་མེད། །རྡོ་རྗེའི་སྙིང་པོ་མཁྲེགས་པ་མཁའ་དང་མཚུངས། །མ་སྐྱེས་མ་འགགས་གཉིས་མེད་འདུས་མ་བྱས། །ཡི་གེ་མེད་ཅིང་སྒྲ་སྤངས་བརྗོད་དུ་མེད། །གཉེན་པོ་མ་མཆིས་མི་རྟོག་ལྷུན་གྱིས་གྲུབ། །ཤེས་རབ་ཕ་རོལ་ཕྱིན་མ་རྒྱལ་བའི་ཡུམ། །ཏིང་འཛིན་རྣམ་ཐར་བསམ་མི་ཁྱབ་ལ་གནས། །བློ་ལས་འདས་པའི་སྤྱོད་ཡུལ་མཐའ་ཡས་སྒྲུབ། །ངོ་མཚར་ཆེན་པོའི་བྱིན་གྱིས་བརླབ་མཛད་པ། །ལུས་ཅན་དགེ་རྩ་
ཡོངས་སུ་སྨིན་སླད་དུའོ། །སྐུ་གཙང་འོད་ཟེར་སྟོང་གི་དྲྭ་བས་གཡོགས། །ཞལ་མཛེས་ལུས་ཅན་ཀུན་ཡོད་མ་ལྟར་འདྲེན། །ཐུགས་སྙོམས་ཉེ་རིང་མི་མངའ་བུ་བཞིན་གཟིགས། །ཕྱག་རིང་འཇིག་རྟེན་གསུམ་པོ་འཇིགས་ལས་སྐྱོབ། །ཏཱ་རེའི་སྒྲ་དབྱངས་སྲིད་ལས་སྒྲོལ་བའི་གྲུ། །སྲིད་པའི་ཐོག་མཐའ་མཉམ་པར་བཟུང་བ་ཡི། །བརྩོན་འགྲུས་གཡོ་མེད་ཞབས་ཀྱི་ཆུ་སྐྱེས་ལ། །མི་མཆོག་སློབ་མར་བཅས་པས་ཕྱག་བྱས་མ། །ཁྱོད་ལ་བསྟོད་པས་ཐུགས་དགྱེས་མ་མཆིས་ཤིང་། །རབ་ཏུ་སྨད་ཀྱང་ཁྲོ་ཞིང་འཁྲུགས་མི་འགྱུར། །འོན་ཀྱང་རང་གི་བསོད་ནམས་སྤེལ་སླད་དུ། །བསྟོད་ཚིག་ནོར་བུའི་ཕྲེང་བ་བརྒྱུས་ཏེ་འབུལ། །སྐྱབས་མེད་བདག་ཅག་འཁོར་བར་ཡུན་རིང་འཁྱམས། །ལས་དང་ཉོན་མོངས་དྲག་པོའི་གཅོང་གིས་ཟིན། །དུས་ཀྱི་འཇིགས་སོགས་སྡུག་བསྔལ་དུ་མས་གཟིར། །མྱུར་མཛད་དཔའ་མོའི་ཐུགས་རྗེས་བཟུང་རེ་རན། །ཕལ་པའི་འགྲོ་བ་སྙིང་བརྩེ་ལྡན་པ་ཡིས། །བྱིས་པ་ཐབས་ཀྱིས་ཉེས་ལས་ལྡོག་བྱེད་ན། །ཡུད་ཙམ་གཡེལ་བ་མེད་པའི་དམ་བཅའི་གོ། །བརྟན་ལྡན་སྙིང་རྗེའི་བདག་ཉིད་སྨོས་ཅི་དགོས། །བརྩེ་བ་བྲལ་བའི་འབྱུང་པོ་ཕལ་པ་ཡང་། །གུས་པས་མཆོད་པའི་འདོད་དོན་སྒྲུབ་བྱེད་ན། །རྩེ་གཅིག་དད་པས་བསྙེན་པའི་ཉམ་ཐག་བུ། །མ་གཅིག་ཐུགས་རྗེ་
ཅན་གྱིས་འདོར་ཕོད་དམ། །འོན་ཀྱང་རྣམ་ཤེས་འཁྲུལ་པའི་གཞན་དབང་གིས། །ཐུགས་རྗེ་འཇུག་པའི་ཡུལ་དུ་མ་གྱུར་པའི། །ནོངས་པ་ཅི་བྱས་སྙིང་ནས་འགྱོད་ཅིང་བཤགས། །བྱམས་པའི་ཡུམ་གྱུར་མ་ཡིས་ཚངས་པ་རྩོལ། །རྟག་ཏུ་བསྟེན་ཅིང་ཡུན་ཏུ་བསྒྲུབས་པའི་ལྷ། །དུས་གསུམ་རྒྱལ་བའི་ཡུམ་གཅིག་ཐུགས་རྗེ་ཅན། །བདག་ལ་བརྩེ་བའི་སྤྱན་གྱིས་གཟིགས་ནས་ཀྱང་། །བྱམས་པའི་ཕྱག་གིས་བསྐྱང་བར་མཛད་དུ་གསོལ། །ལས་དང་རྐྱེན་ལས་གྱུར་པའི་ནད་དང་གདོན། །ཉེར་འཚེའི་འཇིགས་ཀུན་མྱུར་དུ་བསལ་ནས་ཀྱང་། །དལ་འབྱོར་ཆོས་ལྡན་ལོ་བརྒྱར་འཚོ་བ་ཡི། །མངོན་པར་འདོད་པའི་མཆོག་སྩོལ་མཛད་དུ་གསོལ། །འཕྲལ་དང་ཡུན་ཏུ་སྡུག་བསྔལ་སྐྱེད་པ་ཡི། །ཉེས་བྱས་གཡང་ས་བརྒྱ་ཡིས་རབ་བསྐོར་བ། །ཕྱུགས་དང་མཚུངས་པའི་བློ་གྲོས་རྨོངས་པ་རྣམས། །འཇིགས་རུང་ཉམ་ངའི་གནས་ལས་བཟློག་ཏུ་གསོལ། །རང་གི་ལས་ལས་སྐྱེས་བའི་ཉེས་པ་ཡིས། །དོགས་པའི་དྲྭ་བ་བརྒྱ་ཡིས་རྟག་བཅིངས་པ། །བདག་དང་བདག་འདྲའི་བདག་འཛིན་དྲི་མ་ཀུན། །ཞི་བའི་ཆབ་ཀྱིས་བཀྲུ་བར་མཛད་དུ་གསོལ། །གཟུང་དང་འཛིན་པའི་བག་ཆགས་མཐུ་བརྟས་པས། །འཇིགས་པའི་གཤེད་མ་བརྒྱ་ཡིས་རབ་གཙེས་པ། །མགོན་མེད་བཤེས་མེད་གྱུར་པའི་སྐྱེ་བོ་ཀུན། །
མཐུ་སྟོབས་གོ་ཆས་སྐྱོབ་པར་མཛད་དུ་གསོལ། །ལས་དང་ཉོན་མོངས་སྒྲིབ་པས་བཀབས་པ་ལ། །ལྟ་བའི་མུན་པ་བརྒྱ་ཡིས་རབ་གཡོགས་པ། །ལམ་སྟོར་གྱུར་པའི་འགྲོ་བ་ལོང་བ་ཀུན། །ཡེ་ཤེས་ཉི་མས་སྣང་བར་མཛད་དུ་གསོལ། །རྟག་ཏུ་ཞལ་མཐོང་གསུང་གི་བདུད་རྩི་ནོད། །བྱང་ཆུབ་བར་དུ་རྗེས་བཟུང་མཛད་ནས་ཀྱང་། །ཚེ་དབང་ཡེ་ཤེས་གྲུབ་པའི་དགའ་སྟོན་གྱིས། །མཁའ་མཉམ་སྐྱེ་དགུ་མཐའ་དག་འཚོ་བྱེད་ཤོག །ཅེས་པ་ནི་དྲག་པོ་ལྕགས་སྤྲེལ་གནམ་ལོ་གསར་དུ་བཞད་པའི་དཀར་ཕྱོགས་ཀྱི་དགའ་བ་དང་པོར་འགྲུབ་པའི་སྦྱོར་བ་ལ་ཙཱ་འདྲ་རིན་ཆེན་བྲག་གིས་གུལ་དུ་རྗེ་བཙུན་མའི་རྣལ་འབྱོར་ལ་གནས་པའི་ཚེ་གུ་ས་སོ།། ༈ །།འཕགས་མའི་ཐུགས་རྗེ་བསྐུལ་བ་དཔག་བསམ་གྲིབ་བསིལ་ཞེས་བྱ་བ། །ཚེ་དབང་ཡེ་ཤེས་དངོས་གྲུབ་སྦྱིན་མཛད་མ། །ཚེ་དང་ཐར་པའི་བར་ཆད་སེལ་མཛད་མ། །ཚེ་འོད་སྣང་བ་མཐའ་ཡས་དབུ་བརྒྱན་མ། །ཚེ་སྦྱིན་འཇིགས་པ་ཀུན་ལས་སྒྲོལ་མཛད་མ། །སྐྱེ་དགུ་ཀུན་ལ་བུ་བཞིན་གཟིགས་མཛད་མ། །ཉེ་རིང་མི་མངའ་ཀུན་ལ་སྙོམས་མཛད་མ། །འགྲོ་བ་མགོན་མེད་རྣམས་ཀྱི་མགོན་གྱུར་མ། །སྲས་བཅས་རྒྱལ་ལས། ཐུགས་རྗེ་མྱུར་བའི་མ། །མཚན་ཙམ་གྱིས་ཀྱང་བདུད་ལས་རྒྱལ་བའི་མ། །མ་གཡེལ་མ་གཡེལ་ཡེ་ཤེས་སྤྱན་གྱིས་གཟིགས། །གསོལ་བ་རྒྱུན་དུ་འདེབས་ལ་
། ཐུགས་རྗེས་དགོངས། །བདག་དང་བདག་ལ་སྙིང་ནས་ལྟོས་པ་དག །འདི་ཕྱི་བར་དོར་སྐྱེ་བ་ཀུན་ཏུ་ཡང་། །མ་གཅིག་ཁྱད་ལས་རེ་ས་གཞན་མེད་པས། །འཇིགས་སར་སྐྱེལ་མས་བོར་བའི་ཉམ་ཆུང་བཞིན། །འཇིགས་པའི་འཕྲང་དུ་ཐུགས་རྗེའི་སྤྱན་རས་ཀྱིས། །མི་གཟིགས་ཡལ་བར་འདོར་ན་མ་ཁྱེད་ཀྱི། །ཐུགས་བསྐྱེད་གོ་ཆ་ལྷོད་པར་མི་འགྱུར་རམ། །སྐལ་ངན་བདག་འདྲའི་དོན་ཏུ་དཔའ་བོ་རྣམས། །སྙིང་སྟོབས་ལྷག་པར་རྒྱས་པ་མ་ལགས་སམ། །སྐལ་བཟང་རྣམས་ལ་རྒྱལ་ཀུན་བྱིན་རླབས་འོད། །འཇུག་པར་གྱུར་ན་དེ་ལ་ཅི་ངོ་མཚར། །དེ་བས་འཇིགས་ལས་ཉེན་ལ་སྐྱོབ་བའི་གོ །སྐད་ཅིག་མི་གཡེལ་བྱམས་པའི་ཕྱག་རྐྱོངས་ལ། །བྱིན་རླབས་ཐུགས་རྗེ་ཡངས་པའི་གྲིབ་བསིལ་དུ། །ལས་དང་ལས་ཀྱི་རྣམ་པར་སྨིན་སྐྱེས་པའི། །ཚ་བས་གདུང་རྣམས་ངལ་གསོ་མྱུར་དུ་སྩོལ། །མ་གཅིག་ཁྱེད་ཀྱི་སྐྱབས་འོག་བསྟི་བཞིན་ཏུ། །འཇིགས་པ་བརྒྱ་ཡིས་རྟག་ཏུ་གཙེས་གྱུར་ན། །མྱུར་མ་དཔའ་མོའི་མཚན་སྙན་ཇི་ལྟར་འགྱུར། །སྐལ་པ་དམན་ཅེས་གཟིགས་པ་མི་འཇུག་ན། །སྟོབས་དང་དབང་བཅུའི་རྩལ་གྱིས་སུ་ལ་སྟོངས། །བསླབ་པ་མངོན་སུམ་བཞིན་ཏུ་བསྟན་ན་ཡང་། །ཐོག་མེད་མ་རིག་སྒྲིབ་པ་མཐུག་དྲགས་ཤིང་། །ཉོན་མོངས་གཞན་དབང་སྟོབས་སུ་ཆེ་བ་ཡིས། །འཁྲུལ་སྣང་
ལས་སྤྱོད་ཕྱིན་ཅི་ལོག་ཏུ་གསོལ། །མ་གཅིག་ཐུགས་རྗེ་ཅན་ཐུགས་འགལ་བ་སྙམ། །འོན་ཀྱང་རྟག་གུས་རྩེ་གཅིག་མི་འབྲལ་ཞིང་། །ཡང་དག་ལྟ་ལ་ལྡོག་པས་མ་གོས་ན། །བྱིས་བློ་འཁྲུལ་པའི་དབང་དུ་གང་སོང་བ། །ཡེ་ཤེས་ཡངས་པའི་ཀློང་དུ་བཟོད་མཛད་གསོལ། །བདག་དང་བདག་འདྲ་འཁོར་བའི་རྒྱ་མཚོ་རུ། །སྡུག་བསྔལ་རྦ་རླབས་དུ་མས་ཐོག་མེད་ནས། །གཙེས་ཀྱང་ད་དུང་ལས་ལ་མི་འཇིགས་པར། །སྲས་བཅས་རྒྱལ་བའི་བཀའ་ལས་འགོངས་པ་རྣམས། །སྙིང་གི་དཀྱིལ་དང་རུས་པའི་གཏིང་ཁོངས་ནས། །ནོངས་པ་བདག་གིར་བཟུང་སྟེ་མཐོལ་བཤགས་ཀྱི། །གཟི་བརྗིད་ཆེན་མོས་མྱུར་དུ་ཚངས་པ་སྩོལ། །རྒྱལ་བའི་ཡུམ་གཅིག་ཐུགས་རྗེའི་རྩལ་མ་ཆུང་། །འགྲོ་བའི་མ་གཅིག་བྱམས་པའི་སྤྱན་མ་ཟུམས། །བདག་གི་སྐྱབས་གཅིག་གཟིགས་པ་མ་གཡེལ་བར། །བདག་དང་བདག་གི་བསྲུད་བྱར་དེས་གྱུར་པ། །ཐུགས་རྗེའི་སྐྱབས་ལས་ཡུད་ཙམ་མ་འདོར་ཅིག །གནས་སྐབས་བདུད་བགེགས་བར་ཆད་ཀེག་སྲི་སོགས། །འཇིགས་པའི་མུན་པ་མཐུ་སྟོབས་ཉི་ཟླས་སོལ། །ཚེ་བསོད་དཔལ་འབྱོར་དགེ་ལེགས་ཡོན་ཏན་ཀུན། །རི་ལྟར་བརྟན་ཅིང་ཆུ་ལྟར་རྒྱུན་མི་འཆད། །ཡར་ངོའི་ཟླ་ལྟར་རྒྱས་ཤིང་གོང་འཕེལ་མཛོད། །མཐར་ཐུག་རྗེ་བཙུན་འཕགས་མའི་གསང་གསུམ་དང་། །དབྱེར་མེད་
སྐད་ཅིག་རེ་རེར་ཆོས་དབྱིངས་སུ། །འགྲོ་བ་བྱེ་སྙེད་སྒྲོལ་བའི་ཕྲིན་ལས་ལ། །རྒྱལ་བ་སྲས་དང་བཅས་པའི་སྟོབས་རྫོགས་ཤོག །ཅེས་པའང་རྗེ་བཙུན་མ་ལ་རྩེ་གཅིག་གུས་པའི་ཡིད་ཅན་བློ་གྲོས་མཐའ་ཡས་པའི་སྡེས་གསོལ་བ་བཏབ་པ་ཡ་ཐཱ་སིངྡྷི་ྷ་བནྟུ།། ༈ །།རྗེ་བཙུན་བཅོམ་ལྡན་འདས་མའི་ཐུགས་དམ་བསྐུལ་བ་བསམ་དོན་ལྷུན་གྲུབ་ཅེས་བྱ་བ། །ཧེ་གུ་རུ་ཨཱརྱཱ་ཏཱ་རེ་ན་མོ་ན་མཱ་མི། །རྣམ་དག་དབྱིངས་སུ་རང་བཞིན་བྱང་ཆུབ་སྟེ། །སྤྲོས་པའི་མཚན་མ་མ་ལུས་མཁའ་ལྟར་དག །དུས་གསུམ་འགྱུར་བ་མེད་པའི་ཆོས་ཉིད་དུ། །ཆགས་ཐོགས་སྤངས་པའི་ཤེས་རབ་ཕ་རོལ་ཕྱིན། །གདོད་ནས་མ་སྐྱེས་ནམ་ཡང་འགགས་པ་མེད། །མི་གནས་མི་དམིགས་མཉམ་པ་ཉིད་ཀྱི་ངང་། །སྲིད་པའི་འཁྲུལ་པ་ཅི་ཡང་མ་གཟིགས་ཀྱང་། །འགྲོ་བ་རྨི་ལམ་ལྟ་བུར་འཁྲུལ་བ་ལ། །བརྩེ་བའི་ཐུགས་རྗེས་གཟུགས་ཀྱི་སྐུར་བཞེངས་ནས། །ཐབས་ལ་མཁས་པའི་མཛད་པ་བྱེ་སྙེད་ཀྱིས། །སྐད་ཅིག་རེར་ཡང་འགྲོ་མང་ཐར་གླིང་དུ། །སྒྲོལ་མཛད་བྱམས་པའི་མ་མ་སྐྱེ་དགུའི་གཉེན། །གློག་ལས་མྱུར་བའི་མཐུ་སྟོབས་ཤུགས་འཆང་བས། །ལུས་ཅན་ཀུན་གྱི་རེ་བ་སྐོང་མཛད་མ། །འཇིགས་ཆེན་གང་ལའང་བསྙེངས་པ་མི་མངའ་བས། །འཁོར་བའི་འཇིགས་པ་ཀུན་སྐྱོབས་དཔའ་མོའི་དབྱིངས། །
སྲས་བཅས་རྒྱལ་བའི་གསང་གསུམ་འབྱུང་བའི་གནས། །དཀོན་མཆོག་མཚན་གྱི་ཡི་གེ་འཕྲོ་བའི་གཞི། །སྲིད་ཞིའི་ཁམས་སུ་ཀུན་སྐྱེད་ཡུམ་གྱི་ཚུལ། །ཤེས་བྱའི་ཁོངས་ན་ཁྱོད་ཉིད་མངོན་པར་འཕགས། །ཞིང་ཁམས་རྒྱ་མཚོར་སྐུ་དང་མཛད་པས་ཁྱབ། །འགྲོ་རེའི་མདུན་ན་གང་འདུལ་རྣམ་པར་འཕྲུལ། །རིགས་དྲུག་གནས་སུ་སོ་སོའི་འདུལ་ཐབས་སྟོན། །སྲིད་གསུམ་སྡུག་བསྔལ་དྲྭ་བ་གཅོད་པ་ལ། །འཕགས་མའི། ཐུགས་རྗེའི་ཤུགས་མཚུངས་གང་ནའང་མེད། །ཐེག་པ་ཆེ་ཆུང་ཆོས་སྒོ་རབ་འབྱམས་རྣམས། །འཕགས་མའི་རང་བཞིན་ཁོ་ན་བསྟན་མཚུངས་པས། །རྗེ་བཙུན་མ་ཁྱོད་རྣམ་ཐར་བསམ་མི་ཁྱབ། །འགྲོ་ལ་དགོངས་པའི་བཀའ་དྲིན་ཚད་བཟུང་མེད། །རྒྱལ་རྣམས་ཡེ་ཤེས་སྤྱན་གྱིས་དུས་དྲུག་ཏུ། །འགྲོ་ལ་གཡེལ་མེད་གཟིགས་པ་ཆོས་ཉིད་ཀྱང་། །བདག་འདྲ་ཉོན་མོངས་བརྒྱ་ཡིས་རབ་བཙེས་ནས། །སྲས་བཅས་རྒྱལ་བས་ཡལ་བར་བོར་རྣམས་ལ། །མྱུར་མཛད་དཔའ་མོའི་ཐུགས་བསྐྱེད་ལྷག་པའི་མཐུ། །ནམ་ཡང་མི་བརྟུལ་གདུལ་བྱ་མཆོག་དམན་གྱི། །ཉེ་རིང་མེད་པར་མ་བསྒྲལ་བ་རྣམས་སྒྲོལ། །འོན་ཀྱང་བདག་འདྲ་ལས་ཀྱི་ཞགས་པས་བཅིངས། །སྡུག་བསྔལ་འཁོར་བའི་བཙོན་རར་རྟག་ཏུ་མནར། །མ་ཁྱོད་དྲན་ཅིང་སྙིང་ནས་སྐྱབས་ལགས་ན། །དྲི་མེད་ཡེ་ཤེས་གཟིགས་པ་གང་དུ་ཐལ། །
ལས་ངན་ལོག་པའི་ལམ་ལས་མི་སྐྱོབ་ན། །ལས་ཟད་ཚེ་ན་ཁྱེད་ཀྱི་ཐུགས་རྗེས་ཅི། །འཇིག་རྟེན་མས་ཀྱང་བུ་ཡི་ལོག་སྒྲུབ་ཞེས། །ཤིན་ཏུ་བཟོད་ཅིང་ཉེས་པ་ཟློག་ལ་གཟིགས། །གློ་བུར་ཐུག་འཕྲད་ཁྱེད་མཚན་དྲན་པས་ཀྱང་། །འཇིགས་ཆེན་དེ་མ་ཐག་ཏུ་སྐྱོབ་མཛད་ན། །ཡུན་རིང་བསྙེན་ཅིང་གསོལ་བ་འདེབས་པ་པོ། །དུས་ཀྱི་ཆད་པའི་འཇིགས་ལས་ཅིས་མི་སྐྱོབ། །བཅོམ་ལྡན་འདས་མའི་ཐུགས་རྗ་མཁའ་ལྟར་ཁྱབ། །གཡེལ་བ་མེད་པར་འགྲོ་ལ་རྩེ་གཅིག་དགོངས། །ཉེ་རིང་མི་མངའ་ཀུན་ལ་བུ་བཞིན་སྙོམས། །མགོན་མེད་གྱུར་ལ་ལྷག་པར་ཐུགས་བརྩེས་གཟིགས། །ཁྱོད་འདྲའི་བརྩེ་ཆེན་སུ་ཡང་མ་མཆིས་པས། །མྱུར་བ་ཉིད་དུ། ཐུགས་རྗེའི་ཕྱག་རྐྱོངས་ལ། །འཆི་བདག་ལ་སོགས་བདུད་བཞིའི་འཇིགས་པ་སོལ། །ཚེ་དང་ཐར་པའི་བར་ཆད་འཕྲང་ལས་སྐྱོབས། །ལྷག་པའི་ལྷ་མཆོག་སྙིང་རྗེའི་གཞན་དབང་ཅན། །ཡིད་འོངས་དཔའ་མོ་སྐྱེ་དགུ་གསོ་བའི་མ། །རིང་ནས་ཡེ་ཤེས་གཟིགས་པས་མི་འདོར་ཡང་། །ལྷག་པར་གལ་ཆེན་འགག་ལ་ཐུག་པའི་ཚེ། །བུ་གཅིག་མ་ལ་འབོད་པའི་ཚུལ་བཞིན་ཏུ། །བཀའ་དྲིན་དྲན་པས་སླར་ཡང་གསོལ་འདེབས་ཤིང་། །གདུང་ཤུགས་དྲག་པོས་སྙིང་ནས་ཁྱེད་འབོད་ན། །སྒྲིབ་པའི་དྲི་མ་དབང་བཅུའི་མཐུ་ཡིས་སོལ། །ཡེ་ཤེས་སྣང་བ་
བྱིན་རླབས་ཤུགས་ཀྱིས་སྦོར། །གཞོམ་མེད་རྟག་པ་དམ་པའི་ཚེ་དབང་སྩོལ། །མཆོག་སྦྱིན་ཕྱག་རྒྱ་བདག་གི་སྤྱི་བོར་ཞོག །མ་འཇིགས་གསུང་གིས་བདག་ཀྱང་དབུགས་དབྱུང་ཞིང་། །ཐུགས་རྗེའི་ཤས་ཀྱིས་མྱུར་དུ་རྗེས་སུ་ཟུང་། །དྲི་མེད་ཟླ་བ་རྒྱས་པའི་ཞལ་རས་ལས། །གསུང་མཆོག་བདུད་རྩིའི་ཐིགས་པའི་བཅུད་སྩལ་ནས། །འཆི་མེད་གྲུབ་པའི་རྒྱལ་པོར་བདག་སྒྲུབས་མཛོད། །ཅེས་པའང་རབ་ཚེས་ལྕགས་འབྲུག་གྲོ་བཞིན་ཟླ་བའི་དཀར་པོའི་ཕྱོགས་ཀྱི་ཚེས་བརྒྱད་ལ་བློ་གྲོས་མཐའ་ཡས་པའི་སྡེས་རྫོང་ཤོད་བདེ་གཤེགས་འདུས་པའི་ཕོ་བྲང་དུ་གསོལ་བ་བཏབ་པ་ཨ་མཱ་ར་ི་ཛཱི་བནྟི་སིངྡྷི་ྷ་བནྟུ།། ༈ །།རྗེ་བཙུན་ཨཱརྱཱ་ཏཱ་རེ་ལ་འདུད་ཅིང་གསོལ་བ་བར་ཆད་ཀུན་སེལ་ཅེས་བྱ་བ། །ན་མོ་གུ་རུ་ཏཱ་རཱ་ཙྪིནྡ་ཙཀྲཱ་ཡ། །རྣམ་པར་འདྲེན་མཆོག་རྩ་བ་བརྒྱུད་པར་བཅས། །ཡུམ་གཅིག་ཡེ་ཤེས་སྒྱུ་མའི་རོ་ལ་གར་ཏེ། །བྱིན་རླབས་འབྱུང་གནས་བླ་མ་ཀུན་གྱི་དངོས། །དགེ་བ་ཅན་མ་འཁོར་ལོའི་མགོན་པོར་འདུད། །ཕྱོགས་བཅུ་དུས་གསུམ་གཤེགས་པའི་རྫོགས་སངས་རྒྱས། །ཤེས་རབ་ཕ་རོལ་ཕྱིན་མའི་དབྱིངས་ལས་ཤར། །རྒྱལ་བ་རྒྱ་མཚོ་ཉིད་ལས་མི་གཞན་པ། །བཅོམ་ལྡན་འདས་མ་གཟི་བརྗིད་ཅན་ལ་འདུད། །ཞི་ཆགས་འབར་བའི་ཉམས་ལྡན་དཀྱིལ་འཁོར་ལྷ། །ཐབས་ཤེས་དབྱིངས་ཡེ་ཟུང་དུ་
འཇུག་པའི་རྩལ། །གྲུབ་གཉིས་འདོད་འཇོ་ནོར་བུ་དཔག་བསམ་ཤིང་། །འཁོར་ལོའི་འདྲེན་པ་རྣལ་འབྱོར་མ་ལ་འདུད། །གསུང་གཅིག་སྒྲ་དབྱངས་རྒྱ་མཚོའི་རྗེས་སུ་འཇུག །སྒྲ་ཀུན་དབང་པོར་འཚམས་པའི་ཆོས་ཆེན་དབྱངས། །རྒྱུན་ཆད་མི་མངའ་ཞི་བསིལ་བདུད་རྩིའི་གཏེར། །དམ་ཆོས་ཀུན་འབྱུང་རིག་པའི་རྒྱལ་མོར་འདུད། །རྒྱལ་སྲས་བྱང་ཆུབ་སེམས་ཀྱི་མྱུ་གུ་བསྐྲུན། །སྤྲོས་བྲལ་ངང་ལས་འཕགས་བཞིའི་མངོན་རྟོགས་བསྐྱེད། །ཚོགས་མཆོག་ཆུ་གཏེར་ཐུགས་རྗེའི་ཤུགས་ཀྱིས་སྤེལ། །འཇིག་རྟེན་གསོ་བྱེད་སྙན་པ་ཆེན་མོར་འདུད། །འགྱུར་མེད་བདེ་ཆེན་རྡོ་རྗེ་གསུམ་གྱི་རྩལ། །གནས་ཡུལ་དཔའ་བོ་མཁའ་འགྲོའི་འཕྲུལ་དགུར་སྒྱུར། །ལས་བཞི་ལྷུན་གྲུབ་མཆོག་གི་ཉེ་རྒྱུར་སྤྱོད། །གནས་གསུམ་ཕོ་ཉའི་དབང་ཕྱུག་མ་ལ་འདུད། །ནག་པོའི་རྩ་ལག་འཇོམས་ལ་ཆེས་དཔའ་བ། །མཐུ་རྩལ་ཐོགས་མེད་དམ་ཅན་སྡེ་དཔུང་ཡང་། །བསྟན་འགྲོ་ཕན་བདེས་སྲུང་ཕྱིར་མ་ཡི་འཕྲུལ། །ཆོས་སྐྱོང་ཆེན་མོ་ཕ་རོལ་གནོན་ལ་འདུད། །སྲིད་ཞིའི་ཁམས་ན་དགེ་ལེགས་ཇི་སྙེད་པ། །བཅོམ་ལྡན་འདས་མའི་ཐུགས་རྗེ་ཆེན་པོའི་སྟོབས། །དུས་གསུམ་གཤེགས་པས་རྟག་ཏུ་ཕྱག་མཛད་པ། །དེད་དཔོན་ཆེན་མོ་སྙིང་རྗེས་འཇུག་ལ་
འདུད། །སྡུག་བསྔལ་མཚོ་ལས་འགྲོ་ཀུན་རྟག་སྒྲོལ་བའི། །སྙིང་སྟོབས་དེ་འདྲ་ནམ་ཡང་མ་བྱུང་བས། །ངོ་མཚར་མཚན་གྱིས་བརྗིད་པའི་རྗེ་བཙུན་མ། །འཇིག་རྟེན་གསུམ་མགོན་སྒྲོལ་མ་ཡུམ་ལ་འདུད། །སྐྱེ་བོ་གང་ཞིག་འཇིགས་པས་ཉེན་པ་དག །ཁྱོད་མཚན་དྲན་པའི་མོད་ལ་བདེ་བར་སྐྱོབ། །ཐུགས་རྗེའི་རྩལ་ཤུགས་གློག་དང་མཚུངས་པ་ཡི། །གདུང་སེལ་ཡིད་མགྱོགས་མྱུར་མཛད་མ་ལ་འདུད། །ཡིད་སྲུབས་བྱེ་བའི་དཔུང་གི་རུ་མཚོན་ཀྱང་། །ཏིང་འཛིན་སྟོབས་ཀྱིས་དྲོ་སྐད་རེ་ལ་བསྙིལ། །བྱང་ཆུབ་སྒྲུབ་ལ་འཚེ་བྱེད་བདུད་བཞི་ཡི། །གཡུལ་ལས་རྣམ་རྒྱལ་དཔའ་མོ་ཆེན་མོར་འདུད། །ནམ་མཁའ་དང་མཚུངས་འཕགས་མའི་ཡོན་ཏན་མཐའ། །ཕྱོགས་དུས་སྲས་བཅས་རྒྱལ་བས་གཞལ་བར་དཀའ། །བྱིས་བློ་དད་པའི་མཐུས་སྦྱར་བསྔགས་ཚིག་གི། རིན་ཆེན་དོ་ཤལ་སྙིང་རྗེའི་རྒྱན་ཏུ་བཞེས། །སྐྱེ་དགུ་ཀུན་ལ་བུ་བཞིན་གཟིགས་མཛད་ཀྱང་། །ལས་ཀྱི་ཉེས་པས་བསྒྲིབས་པའི་ཉམ་ཆུང་བདག །དེ་ཙམ་གདུལ་བྱའི་ཡུལ་དུ་མ་གྱུར་ཏམ། །ད་ནི་མྱུར་དུ་བྱམས་པའི་སྤྱན་གྱིས་གཟིགས། །ཕྱོགས་རིས་མེད་པའི་ཐུགས་རྗེའི་ཕྱག་རྐྱོངས་ལ། །འཇིགས་རུང་འཁོར་བའི་གཡང་ལས་
བསྐྱབ་ཏུ་གསོལ། །ཆགས་ཐོགས་མེད་པའི་ཡེ་ཤེས་རལ་གྲི་ཡིས། །བདག་འཛིན་ལྗོན་པ་རྨངས་ནས་བསྒྱེལ་དུ་གསོལ། །ཟབ་ཞི་སྤྲོས་བྲལ་འོད་གསལ་ཐུར་མ་ཡིས། །མཐའ་གཉིས་ལྟ་བའི་རབ་རིབ་བསལ་དུ་གསོལ། །ཚད་མེད་བྱིན་རླབས་སྟོན་ཟླའི་འཛུམ་ཟེར་གྱིས། །སྟོང་ཉིད་སྙིང་རྗེའི་ཆུ་གཏེར་སྤེལ་དུ་གསོལ། །སྟོབས་བཅུའི་རྩལ་ཤུགས་བསྐལ་པའི་མེ་ལྕེ་ཡིས། །འཇིགས་དང་ལྟས་ངན་ཚང་ཚིང་བསྲེག་ཏུ་གསོལ། །དུས་ཀྱི་མུན་འཇོམས་དུས་ཆེན་ཉིན་བྱེད་ཀྱིས། །དུས་ཀྱི་ཆད་པའི་སྨག་རུམ་གཞོམ་དུ་གསོལ། །ཚེ་སོགས་དབང་བཅུ་གྲུབ་པའི་བཅུད་ལེན་གྱིས། །རིང་འཚོའི་སྲོག་རྩ་རྡོ་རྗེར་བསྒྲུབ་ཏུ་གསོལ། །ལྷ་ཡི་རྣལ་འབྱོར་ཚུལ་བཞིན་སྒོམ་པ་ལ། །ཡེ་ཤེས་སྣང་བརྙན་མངོན་སུམ་བསྟན་ཏུ་གསོལ། །བཟླས་པའི་རིམ་པས་རྟག་ཏུ་བསྙེན་པ་ལ། །ཟབ་རྒྱས་གདམས་པའི་བདུད་རྩི་སྩལ་དུ་གསོལ། །ཞི་ལྷག་ངང་དུ་མཉམ་པར་འཇོག་པ་ལ། །དགོངས་པ་རྩལ་གྱི་བྱིན་ཆེན་དབབ་ཏུ་གསོལ། །རྟག་ཏུ་ཁྱོད་ལ་རྩེ་གཅིག་མོས་པའི་བུ། །མ་གཅིག་བཞིན་ཏུ་གཡེལ་མེད་བསྐྱང་དུ་གསོལ། །ཉོན་མོངས་དབང་
གྱུར་ནོངས་པ་གང་བགྱིས་པ། །ཆོས་དབྱིངས་ཀློང་དུ་ཚངས་པ་སྩལ་དུ་གསོལ། །ཉིད་དང་དབྱེར་མེད་མཁའ་མཉམ་འགྲོ་བ་ཀུན། །བདེ་བླག་སྒྲོལ་བའི་དབང་མཆོག་བསྐུར་དུ་གསོལ། །མདོར་ན་གནས་སྐབས་མཐར་ཐུག་ཐམས་ཅད་དུ། །བསམ་དོན་ལྷུན་གྲུབ་དོན་གཉིས་མཐར་ཕྱིན་པའི། །བཀྲ་ཤིས་སྣང་བ་ཉི་ཟླའི་དཀྱིལ་འཁོར་མཆོག །རྟག་བརྟན་ཀུན་ཁྱབ་ཆེན་པོའི་དགེ་ལེགས་སྩོལ། །ཅེས་སྣ་ཚོགས་ཆུ་བོ་རྟ་ལོ་ཉི་མ་བྱང་བགྲོད་ཀྱི་ཐོག་མར་རྫོང་ཤོད་བདེ་གཤེགས་འདུས་པའི་ཕོ་བྲང་ཆེན་པོར་བློ་གྲོས་མཐའ་ཡས་ཀྱིས་གསོལ་བ་བཏབ་པ་སིངྡྷི་ར་སྟུ།། ༈ །།ན་མོ་གུ་རུ་ཨཱ་རྱཱ་ཏཱ་རཱ་ཡཻ། །མཚན་ཙམ་ཐོས་པས་འཇིགས་པ་ཀུན་སྐྱོབ་ཅིང་། །གསོལ་བ་བཏབ་ན་དངོས་གྲུབ་རྣམ་གཉིས་སྩོལ། །རབ་འབྱམས་རྒྱལ་བ་སྲས་བཅས་སྐྱེད་པའི་ཡུམ། །རྗེ་བཙུན་སྒྲོལ་མའི་ཞབས་ལ་གསོལ་བ་འདེབས། །མགོན་པོ་གཞན་ལས་ཐུགས་རྗེའི་བྱིན་རླབས་མྱུར། །རྟོག་འཁྲུལ་བདུད་བགེགས་འདུལ་ལ་ཆེས་དཔའ་ཞིང་། །འགྲོ་ལ་བུ་གཅིག་མ་བཞིན་བརྩེ་བས་གཟིགས། །འཕགས་མ་སྒྲོལ་མར་སྙིང་ནས་གསོལ་བ་འདེབས། །རྒྱལ་དང་རྒྱལ་བའི་མྱུ་གུ་ཀུན་ལས་ཀྱང་། །ཐུགས་བསྐྱེད་རྣམ་ཐར་ཕྲིན་ལས་ཁྱད་པར་འཕགས། །ཉམ་ངའི་གཡང་སར་ཕྲིན་ལས་གློག་ལྟར་
མྱུར། །ཤེས་རབ་ཕར་ཕྱིན་ཁྱོད་ལ་གསོལ་བ་འདེབས། །གུས་པས་ཕྱག་འཚལ་སྙིང་ནས་སྐྱབས་སུ་མཆི། །ལུས་དང་ལོངས་སྤྱོད་དགེ་ཚོགས་མཆོད་སྤྲིན་འབུལ། །སྡིག་པ་བཤགས་ཤིང་དགེ་ལ་རྗེས་ཡི་རང་། །ཚེས་འཁོར་བསྐོར་ཞིང་རྟག་པར་བཞུགས་སུ་གསོལ། །དགེ་བས་བདག་དང་མ་གྱུར་འགྲོ་བ་ཀུན། །འཕགས་མ་ཁྱོད་ཀྱི་གོ་འཕང་ཐོབ་ཕྱིར་བསྔོ། །གནས་སྐབས་འཇིགས་པ་བརྒྱད་སོགས་མི་མཐུན་ཞི། །འབྱོར་དྲུག་ལེགས་ཚོགས་ཡར་ཟླའི་དཔལ་ལྟར་རྒྱས། །ཚེ་འདིར་མངོན་སུམ་རྗེས་སུ་བཟུང་བ་དང་། །ཞལ་མཐོང་བྱིན་གྱིས་བརླབ་པར་མཛད་དུ་གསོལ། །ནམ་ཞིག་འཕོས་ཚེ་འཕགས་མ་བཞུགས་པའི་གནས། །མ་དག་མིང་མེད་རྟག་ཏུ་བདེ་སྐྱིད་ལྡན། །ངོ་མཚར་བཀོད་པ་ཕུན་ཚོགས་རྒྱ་ཆེ་བ། །གཡུ་ལོ་བཀོད་པའི་ཞིང་དུ་སྐྱེས་ནས་ཀྱང་། །བྱང་ཆུབ་སྤྱོད་པ་རྒྱ་མཚོ་མཐར་ཕྱིན་ནས། །མངོན་པར་སངས་རྒྱས་དོན་གཉིས་ལྷུན་གྲུབ་ཤོག །ཅེས་པའང་སྟག་གཟིག་མཛོ་རྫོང་དགོན་གྱི་ཡོན་གནས་མཆོག་གྱུར་བླ་གྲྭ་སྤྱི་ཡིས་གསུང་བསྐུལ་ངོར་བློ་གྲོས་མཐའ་ཡས་ཀྱིས་དཔལ་སྤུངས་ཡངས་ཁྲོད་ནས་སྤེལ་བ་སིངྡྷི་ར་སྟུ། །དགེ་ལེགས་འཕེལ།། །།