རྗེ་བཙུན་རས་ཆུང་པ་རྡོ་རྗེ་གྲགས་པ་ལ་བསྔགས་པ་རྡོ་རྗེའི་རྒྱུད་མངས།
རྗེ་བཙུན་རས་ཆུང་པ་རྡོ་རྗེ་གྲགས་པ་ལ་བསྔགས་པ་རྡོ་རྗེའི་རྒྱུད་མངས་ཞེས་བྱ་བ་བཞུགས་སོ།། །།
བཀའ་བརྒྱུད་གྲུབ་པའི་ཆུ་ཀླུང་འབབས་པའི་གཞི། །གངས་ཅན་རྣ་བའི་རྒྱན་གྱི་ཁ་བའི་རིར། །མི་ཡི་སེང་གེ་སྐྱེས་མཆོག་རས་ཆུང་པ། །གདོད་ནས་སྨོན་ལམ་སྟོབས་ཀྱིས་འབྲེལ་ལ་འདུད། །གསང་བའི་བདག་པོ་རྒྱལ་བ་ཀུན་གྱི་སྙན། །རྒྱ་བོད་ཀུན་ཏུ་གསང་བ་འཛིན་པ་ལས། །མཚར་སྡུག་ཁྱེའུའི་གཟུགས་ཅན་གུང་ཐང་པ། །རྗེ་བཙུན་ཐུགས་ཀྱི་བུ་གཅིག་དེ་ལ་འདུད། །ཝ་ལ་ཙཎྜའི་གདམས་པའི་བསིལ་བྱེད་ཀྱིས། །གཟོད་ནས་གཏུམ་པོར་གྲུབ་པའི་མེ་སྦར་བས། །གདུག་ཅན་ཚང་ཚིང་མཐའ་དག་བསྲེགས་པའི་རྒྱུན། །རྣལ་འབྱོར་སྤྱོད་ཡུལ་ལྷན་ཅིག་བཟུང་ལ་འདུད། །ཚེ་དབང་ཡེ་ཤེས་ཌཱ་ཀིའི་ཐུགས་ཀྱི་མཛོད། །བརྟོལ་ནས་བཅུ་ཕྲག་གཅིག་ལ་བརྒྱད་ལྷག་པ། །འགྲོ་དོན་ཤམ་བུ་ཅན་གྱི་ཟབ་མོའི་ཆོས། །གངས་རིའི་ལྗོངས་སུ་ཐང་མར་བརྡལ་ལ་འདུད། །ཁྱད་པར་མཁའ་འགྲོ་རྒྱ་མཚོའི་སྲོག་གི་སྙིང་། །ཞག་བདུན་ཙམ་གྱིས་མཆོག་ཐུན་འགྲུབ་བྱེད་པ། །གངས་རིའི་མགོན་པོ་ཐུན་མིན་ཕྲིན་ལས་ཀྱི། །ཉི་མའི་ཤིང་རྟ་གསར་དུ་དྲངས་ལ་འདུད། །ནཱ་རོའི་རིམ་པ་དྲི་མེད་བཤེས་གཉེན་ལས། །ལེགས་འོང་གསང་འཛིན་རྣམས་ཀྱི་རྣ་བའི་བཅུད། །ལུས་མེད་མཁའ་འགྲོའི་ཆོས་དྲུག་གསང་བའི་རྒྱ། །བཀྲོལ་མཛད་བླ་མའི་བླ་མར་གྱུར་ལ་འདུད། །ཟུང་འཇུག་ཡེ་ཤེས་སྐུ་ཅན་རྗེ་བཙུན་ཆེ། །སྐུ་དང་གྲིབ་མ་བཞིན་ཏུ་མཉེས་པ་དགུས། །བསྟེན་ཚུལ་མཐར་ཕྱིན་རྣམ་ཐར་གཅིག་གྱུར་པ། །
།ཐུགས་སྲས་ཟླ་བ་ལྟ་བུར་གྲགས་ལ་འདུད། །སྙན་བརྒྱུད་ནོར་བུ་རྣམ་གསུམ་གསང་བའི་མཛོད། །གཞན་ལ་མཚན་ཙམ་དཀོན་པའི་རིན་ཐང་ཅན། །ཁྱོད་ལ་རང་ནོར་བཞིན་ཏུ་ཕོག་པ་ཡིས། །སྒྲུབ་བརྒྱུད་རྒྱལ་མཚན་ཏོག་ཏུ་གྱུར་ལ་འདུད། །ཆགས་བྲལ་འདོད་ཆགས་ཆེན་པོའི་གར་གྱིས་སྒེག །ཞི་ཡང་ཞེ་སྡང་ཆེན་པོའི་གཟི་བརྗིད་འབར། །གཏི་མུག་སྤངས་པའི་རྨོངས་ཆེན་ཕ་རོལ་ཕྱིན། །རྡོ་རྗེའི་ས་མཐར་སོན་པ་དེ་ལ་འདུད། །གསུང་གི་གླིང་བུའི་ཆ་ཤས་ལྷུང་བ་ཡིས། །ཡིད་ཀྱི་རི་དྭགས་རྣམ་གྲོལ་ས་ལ་རྩེ། །གསང་བའི་ཐེག་པས་མི་དང་མི་མ་ཡིན། །གྲངས་མེད་རྡོ་རྗེའི་རྒྱལ་སར་འཁྲིད་ལ་འདུད། །འཕོ་མེད་དགའ་བཞིའི་མདངས་ཀྱིས་སྒེག་པའི་སྐུ། །མཁའ་སྤྱོད་མཛེས་མའི་དཀྱིལ་འཁོར་མཛེས་པའི་རྒྱན། །གྲུབ་པའི་རིག་འཛིན་ཡོངས་ཀྱིས་ཕྱག་བྱས་པ། །ཧེ་རུ་ཀ་དཔལ་དཔའ་བོ་ཆེ་ལ་འདུད། །དུས་གསུམ་གཤེགས་དང་དེ་སྲས་བློ་ཆེན་གྱི། །ཆོས་ཀྱི་མཛོད་དང་གེགས་བྱེད་སྲུང་བའི་གོ། །བགོས་པའི་འཕྲུལ་ཆེན་ནམ་ཡང་མི་ཟད་པས། །ཞིང་ཁམས་རྒྱ་མཚོ་མངོན་པར་འགེངས་ལ་འདུད། །འདྲེན་པ་སྟོང་གི་ཚེ་ན་བསྟི་བའི་གནས། །ལྕང་ལོ་ཅན་གྱི་རྡོ་རྗེའི་ཁང་བརྩེགས་སུ། །རྣམ་སྨིན་འཇའ་ཚོན་སྐུ་རུ་གནས་བསྒྱུར་ཏེ། །ནམ་མཁའི་ལམ་ནས་གྱ་གྱུར་གཤེགས་ལ་འདུད། །སྐྱེས་མཆོག་ཁྱེད་ཀྱི་སྒྲུབ་བརྒྱུད་མི་ཉམས་ཤིང་། །ཁྱོད་ཀྱི་རྣམ་པར་ཐར་དང་རོ་
གཅིག་པར། །བདག་གྱུར་གསང་བ་གངྒཱའི་རྒྱུན་སྤེལ་བས། །མཁའ་སྤྱོད་དབང་ཕྱུག་ས་གཞི་ཀུན་ཁྱབ་ཤོག །ཅེས་པའང་བཀའ་བརྒྱུད་རིན་པོ་ཆེའི་རྗེས་འཇུག་རྟགས་ཙམ་འཛིན་པ་བློ་གྲོས་མཐའ་ཡས་ཀྱིས། །སྐྱེས་མཆོག་རས་ཆུང་རྡོ་རྗེ་གྲགས་པའི་སྒྲུབ་གནས་བྱིན་རླབས་དང་མཁའ་འགྲོའི་སྤྲིན་ཕུང་འདུ་བའི་གནས་སུ་དགེ་སྦྱོར་བློ་ནུས་དང་སྦྱར་བ་བགྱིས་པའི་རྗེས་ཐོག་ཏུ་དད་པ་ཆེན་པོས་གསོལ་བ་བཏབ་པ་དགེ་ལེགས་འཕེལ།། ༈ །།མཁས་གྲུབ་ཁྱུང་པོ་རྣལ་འབྱོར་ལ་བསྔགས་པ་ཨུ་དུམྦ་རའི་འཛུམ་ཟེར་ཅེས་བྱ་བ། །ཉན་ཐོས་རྫུ་འཕྲུལ་ཆེན་པོར་ལུང་བསྟན་ཅིང་། །ཡེ་ཤེས་ཌཱ་ཀི་རྣམ་གཉིས་ཐུགས་ཀྱི་སྲས། །མཁས་གྲུབ་བརྒྱ་དང་ལྔ་བཅུའི་གདུང་འཚོབ་པ། །ཁྱུང་པོ་རྣལ་འབྱོར་ཞབས་ལ་གསོལ་བ་འདེབས། །དང་པོ་སྒོ་བཞི་མཛོད་ལྔའི་བོན་སྒོར་ཞུགས། །གཞུང་ལུགས་མཐར་ཕྱིན་ཡི་དམ་ལྷ་ཞལ་མཐོང་། །བཤད་སྒྲུབ་སྡེ་བཙུགས་གཤེན་གྱི་བསྟན་འཛིན་ལ། །འགྲན་ཟླ་སྤངས་བར་མཛད་དེར་གསོལ་བ་འདེབས། །བར་དུ་ཐུབ་བསྟན་སྒོར་ཞུགས་ཐུན་མོང་དང་། །ཐུན་མིན་རིག་པའི་གནས་ཀུན་བདེ་བླག་མཁྱེན། །སེམས་ཕྱོགས་གཙོར་གྱུར་རྫོགས་ཆེན་བསྟན་པའི་བདག །བཻ་རོའི་བག་ཆགས་སད་དེར་གསོལ༴ །ཐ་མར་སྨོན་ལམ་སྟོབས་ཀྱིས་འཕགས་ཡུལ་བགྲོད། །མཁས་གྲུབ་བརྒྱ་དང་ལྔ་བཅུའི་ཐུགས་བཅུད་ལོངས། །མདོ་སྔགས་ཆོས་ཚུལ་རྒྱ་མཚོར་རང་བྱང་ཆུབ། །སྟོན་པ་གཉིས་པར་གྱུར་ལ༴ །ཁྱད་པར་ཡེ་ཤེས་ཌཱ་ཀི་
ཞལ་གཉིས་ཀྱིས། །རྗེས་བཟུང་རྡོ་རྗེ་འཆང་གི་གསང་ཚིག་བསྩལ། །བརྒྱུད་པར་བཅས་ལ་དངོས་སུ་བྱིན་རློབ་པ། །ལུང་བསྟན་ཞལ་བཞེས་ཐོབ་ལ༴ །འཕགས་ཡུལ་མཁས་གྲུབ་བྱེ་བས་མགྲིན་གཅིག་བསྔགས། །ཚངས་དང་བརྒྱ་བྱིན་ནོར་བུའི་ཐོད་ཀྱི་བཏུད། །ལྷ་རྣམས་ཀུན་གྱིས་མེ་ཏོག་ཆར་ཆེན་བསྙིལ། །ངོ་མཚར་བསམ་ལས་འདས་ལ༴ །སྤྱན་དང་མངོན་ཤེས་ཏིང་འཛིན་རྒྱ་མཚོ་མངའ། །རྫུ་འཕྲུལ་རྣམ་རྩེའི་ཆོ་འཕྲུལ་ཆེན་པོ་བསྟན། །མཐའ་ཡས་འགྲོ་བའི་ཁམས་དང་མོས་པ་མཁྱེན། །སྲིད་མཐར་ཞལ་གྱིས་འཆེས་ལ༴ །གནས་ལྔར་རྒྱུད་སྡེ་ལྔ་ཡི་དཀྱིལ་འཁོར་སྤྲུལ། །བཀོད་པ་བརྒྱ་དང་རྩ་བརྒྱད་དུས་གཅིག་བསྟན། །སྲིད་གསུམ་འབྱུང་པོའི་ཚོགས་ཀྱིས་བྲན་བཞིན་བཏུད། །མཁའ་འགྲོའི་ཚོགས་རྗེར་གྱུར་ལ༴ །སྤྲུལ་པའི་དཀྱིལ་འཁོར་རྣམས་སུ་དབང་བསྐུར་ཞིང་། །ཐེག་ཆེན་ཆོས་འཁོར་རྒྱུན་ཆད་མེད་པར་བསྐོར། །གདུལ་བྱ་ཁྲི་ཕྲག་བརྒྱད་སོགས་སྨིན་གྲོལ་མཛད། །སངས་རྒྱས་མཛད་པ་སྒྲུབ་ལ༴ །བརྒྱ་དང་ལྔ་བཅུར་འགྲོ་མང་ཐབས་ཀྱིས་འདུལ། །རྣམ་ཐར་རྒྱ་མཚོའི་སྤྲིན་གྱིས་ཞིང་ཀུན་ཁྱབ། །འདི་ནས་བདེ་ལྡན་ཞིང་གི་འདྲེན་པར་གྱུར། །དབང་བཅུ་རྫོགས་པར་བརྙེས་ལ༴ །རྒྱལ་ཚབ་དམ་པ་ཆོས་ཀྱི་གདུང་འཛིན་པ། །མོག་ལྕོག་སྐྱེར་སྒང་གཉན་སྟོན་འགྲོ་མགོན་སོགས། །སྲིད་མཐའི་བྱང་སེམས་དུ་མ་རིམ་བྱོན་ཏེ། །ས་སྟེང་གྲུབ་པས་བཀང་ལ༴ །གྲུབ་ཆེན་
ཁྱུང་པོའི་རྣམ་ཐར་མཁའ་ལྡིང་གི། གཤོག་རླབས་ཤེས་བྱའི་མཁའ་མཐར་བསྐྱོད་པའི་ཚེ། །གངས་ཅན་མཁས་དང་གྲུབ་པའི་གཉིས་སྐྱེས་ཚོགས། །རང་ཚུགས་བཏང་ནས་ཁྱོད་ཀྱི་རྗེས་སུ་རྩོལ། །མགོན་པོ་ཁྱོད་ལ་རྩེ་གཅིག་གསོལ་བཏབ་མཐུས། །ཁྱོད་ཀྱི་རྣམ་ཐར་མ་ལུས་འགྲུབ་ནས་ཀྱང་། །ས་ཡི་སྟེང་ན་ཉི་ཟླ་ལྟར་གྱུར་ཏེ། །ཁྱོད་བསྟན་སྲིད་པ་གསུམ་དུ་སྣང་བྱེད་ཤོག །ཅེས་པའང་ཁྱུང་རིགས་ལ་ས་བོན་དང་། རྙིང་མ་དང་བཀའ་བརྒྱུད་ཀྱི་ཆོས་སྐོར་རིམ་པར་ཞགས་ཤིང་། །གྲུབ་ཆེན་འདི་ཉིད་ཀྱི་གསེར་ཆོས་ལ་མོས་པའི་གཡར་དམ་འཆའ་བ་སྤོང་བ་པ་ཡོན་ཏན་རྒྱ་མཚོས་དབེན་པའི་རི་ངོགས་སུ་བྲིས་ཏེ་གསོལ་བ་བཏབ་པ་སིངྡྷི་ར་སྟུ།། ༈ །།དཔལ་ལྡན་ཕག་མོ་གྲུ་པ་ལ་བསྔགས་པ་སངས་རྒྱས་དགྱེས་པའི་རོལ་མོ་ཞེས་བྱ་བ། །ཤིན་ཏུ་ཞི་བའི་བདུད་རྩིས་རབ་དགྱེས་པ། །ལོག་པར་དད་་སེལ་སྲིད་ལ་ཆགས་པ་ན། །ཞིང་བརྒྱ་མངོན་པར་གཡོ་བའི་རྫུ་འཕྲུལ་ཅན། །འགྲོ་མགོན་རིན་པོ་ཆེ་ལ་ཕྱག་འཚལ་ལོ། །སྲིད་ཞི་ཀུན་ཏུ་བཟང་པོའི་ནགས་ཁྲོད་དུ། །རང་བྱུང་རྡོ་རྗེ་རྒྱལ་པོས་བྱིན་བརླབས་པས། །འཁྲུལ་མཚན་གདོད་ནས་གྲོལ་བའི་སྐྱེ་དགུ་ཀུན། །མཁའ་འགྲོའི་དྲྭ་བར་སྡོམ་ལ་ཕྱག་འཚལ་ལོ། །ཡང་དག་མཐའ་ལ་གདོད་ནས་རྣམ་པར་གནས། །རིགས་ཅན་གསུམ་ལ་བྱང་ཆུབ་རྩ་བ་བཙུགས། །སངས་རྒྱས་མཛད་པའི་གར་གྱིས་རྣམ་རོལ་བ། །མཐའ་ཡས་གདུལ་བྱ་འདུལ་ལ་ཕྱག་འཚལ་ལོ། །རྡོ་རྗེ་ཕག་མོ་དཔའ་བོའི་དབང་ཕྱུག་བཅས། ཁ་སྦྱོར་སྡུག་བསྔལ་
ནུབ་པའི་གྲུ་བོ་ཆེ། །སྲིད་པ་བདེ་བར་འདྲེན་ལ་སྙིང་གི་སྟོབས། །དགའ་བཞིའི་མཐར་ཐུག་འབར་ལ་ཕྱག་འཚལ་ལོ། །དྲི་མེད་བསམ་གཏན་བདུད་རྩིའི་ཕྱག་རྒྱ་ནི། །ཅིས་ཀྱང་མི་ཕྱེད་གསང་བའི་སྙིང་པོར་བཅིངས། །ཤེས་རབ་རྟག་པའི་གཟི་བརྗིད་བཟོད་དཀའ་བས། །ལྷན་སྐྱེས་མུན་པ་འཕྲོག་ལ་ཕྱག་འཚལ་ལོ། །འདྲེན་པར་གྲགས་དང་མ་འདྲེས་ཆོས་ལྡན་ཞིང་། །སྣང་སེམས་དབང་དུ་སྒྱུར་བའི་སྟོབས་རྣམས་མངའ། །འཇིག་རྟེན་ཁམས་ན་འཇིགས་པ་མི་མངའ་བ། །སངས་རྒྱས་ཆོས་ཀུན་རྫོགས་ལ་ཕྱག་འཚལ་ལོ། །བརྟུལ་ཞུགས་རབ་ཏུ་བརྟན་པའི་རྡོ་རྗེ་ནི། །བདུད་ཀྱི་དཔུང་ལ་ལྷ་མིན་གོ་འཕང་སྦྱིན། །དྲེགས་པ་ཟིལ་གནོན་སྟན་གཅིག་རྡོ་རྗེའི་གདན། །སྐྱིལ་ཀྲུང་གཅིག་གིས་མནན་ལ་ཕྱག་འཚལ་ལོ། །རྡོ་རྗེ་ལྟ་བུའི་ཏིང་འཛིན་ཤིན་ཏུ་བརྟན། །དཔའ་བར་འགྲོ་བས་གཞན་སྣང་དབང་དུ་མཛད། །སྒྱུ་མ་ལྟ་བུས་ཆོ་འཕྲུལ་མཐའ་ཡས་བཀྱེ། །རྣམ་ཐར་རྒྱལ་བས་བསྔགས་ལ་ཕྱག་འཚལ་ལོ། །སྐད་རིགས་མི་གཅིག་འཛམ་གླིང་ཁྱོན་ཡངས་ཀུན། །ཐར་པར་འགུགས་པ་གྲུབ་པའི་ཕོ་ཉ་བཀྱེ། །འཁོར་བ་དོང་ནས་སྤྲུགས་ལ་དབང་ཐོབ་པས། །བདེ་གཤེགས་མཚན་གྱིས་བརྗིད་ལ་ཕྱག་འཚལ་ལོ། །འོད་ཟེར་རབ་འཕྲོ་ནོར་བུའི་ཏོག་ལྡན་པ། །ཐུར་མ་བརྒྱ་པའི་གྲིབ་མར་ངལ་འཚོ་བའི། །སྐྱེས་མཆོག་མི་ཡི་སེང་གེ་ལྔ་བརྒྱའི་དབུས། །བླ་མེད་ཆོས་འཁོར་བསྐོར་ལ་ཕྱག་འཚལ་ལོ།
ཁམས་དབང་མོས་པ་མངོན་པར་མཁྱེན་པ་ཡིས། །གདུལ་བྱ་རྣམས་ལ་སོ་སོའི་སྒོ་བསྟན་ནས། །བགྲོད་གཅིག་འབྲས་བུ་བདེ་བླག་ཐོབ་པར་མཛད། །ཐབས་མཁས་ཐུགས་རྗེ་ཅན་ལ་ཕྱག་འཚལ་ལོ། །ཁྱོད་མཚུངས་སྐྱེས་བུ་ཨུ་དུམྦ་ར་ལྟར། །སྙིགས་མའི་དུས་སུ་ཤིན་ཏུ་དཀོན་པས་ན། །མཚུངས་མེད་བདེ་གཤེགས་འགྲོ་མགོན་རིན་པོ་ཆེ། །ས་གསུམ་ཀུན་ཏུ་གྲགས་ལ་ཕྱག་འཚལ་ལོ། །ཁྱོད་ནི་ཚད་མར་གྲུབ་པས་རྣམ་ཐར་བདེན། །བདེན་པའི་བྱིན་རླབས་བསམ་གྱིས་མི་ཁྱབ་པས། །བདག་ཀྱང་མྱུར་བར་ཁྱོད་ཀྱི་གོ་འཕང་མཆོག །ལྷུན་གྲུབ་མཁའ་མཉམ་འགྲོ་བ་འདྲེན་པར་ཤོག །ཅེས་པའང་བཀའ་བརྒྱུད་རིན་པོ་ཆེའི་རྗེས་འཇུག་གི་རྟགས་ཙམ་འཛིན་པ་ཀུན་ལས་ཀྱང་ཐ་ཤལ་གྱི་གོ་འཕང་བ། ཀརྨ་ངག་དབང་ཡོན་ཏན་རྒྱ་མཚོས་དཔལ་ཕག་མོ་གྲུ་ཀུན་ཏུ་བཟང་པོའི་ནགས་ཁྲོད་དུ་ཤུར་མར་བྲིས་པ་དགེ་ལེགས་འཕེལ།། ༈ །།དཔལ་ས་སྐྱ་པ་ཆེན་པོ་ཀུན་དགའ་སྙིང་པོ་ལ་བསྔགས་པ་ངོ་མཚར་མེ་ཏོག་ཅེས་བྱ་བ། །རྡོ་རྗེའི་རྣལ་འབྱོར་ཆེ་བརྙེས་པས། །བདེ་སྟོང་འཕོ་འགྱུར་མེད་པའི་སྲོག །གྲུབ་པའི་དབང་ཕྱུག་ས་སྐྱ་པ། །ཀུན་དགའ་སྙིང་པོར་དད་པས་བསྔགས། །དཔལ་ལྡན་ཟབ་གསང་རིག་སྔགས་འཆང་། །འཁོན་སྟེན་རྡོ་རྗེ་འཛིན་དབང་པོའི། །གྲུབ་རིགས་ཐིག་ལེར་ཆས་གྱུར་པའི། །བདག་ཉིད་ཆེ་དེར་ཡིད་རབ་དང་། །སྔོན་རབས་བགྲང་མཐའ་ཡས་པ་ནས། །ཚོགས་གསུམ་སྙིང་པོར་ཆས་པ་གང་། །བརྟུལ་ཞུགས་བླ་ན་མེད་གྲུབ་པའི། །
སྒོ་འཕར་ཐོག་མར་ཕྱེས་ལགས་གྲང་། །ལྗོངས་འདིར་བདེན་གསུང་རྡོ་རྗེའི་ལུང་། །ཡིད་ཅན་ཀུན་གྱི་སྤྱོད་ཡུལ་དུ། །བསྙོན་འདོར་མེད་པར་བྱིན་དེ་ཡིས། །སྟོན་པའི་རྒྱལ་ཐབས་འཛིན་པར་ཟད། །སྡེ་སྣོད་པདྨ་རྒྱས་པའི་མཚོར། །རྟག་གུས་དང་པའི་སྦྱོར་བ་ཡིས། །དགོངས་དོན་རླབས་ཀྱིས་གཅོད་ནས་སུ། །ཐེག་ཆེན་པད་རྩའི་རོ་མཆོག་མྱོང་། །ཟབ་གསང་སྙིང་པོར་དྲིལ་བའི་གླུ། །མི་ཤིགས་ནཱ་དའི་སྒྲས་བཟུང་བ། །སྔགས་རྒྱུད་རྒྱ་མཚོ་བཏུང་དེ་ཕྱིར། །གསང་བའི་བདག་པོའི་ནུས་མཐུར་གྲུབ། །ཁྱད་པར་དགོངས་དོན་མཐར་ཐུག་པ། །ཕྱིར་མི་ལྡོག་པ་སྙིང་པོའི་གཏམ། །ཤིང་རྟ་གཉིས་ཀྱི་ལམ་སྲོལ་ཡང་། །ཟུང་འཇུག་མཁྱེན་པའི་རྣམ་དཔྱོད་ངོམས། །ཡོངས་འཛིན་ཡེ་ཤེས་ཕུང་པོ་ལས། །སྙན་བརྒྱུད་ཚད་མ་བཞི་ལྡན་པ། །གདམས་ངག་ལམ་དང་འབྲས་བུ་བཅས། །སྲིད་མཐར་འགྲོ་དོན་རྫོགས་མ་གྱུར། །སྲོག་རྩོལ་ཟོས་པའི་ཕྲ་མོའི་ལུས། །དག་པའི་ཐིག་རླུང་རྒྱས་གྱུར་པས། །གཏིང་མཐའ་མེད་པའི་བདེ་བའི་རོས། །དབུ་མའི་ས་ལ་རབ་ཏུ་མྱོས། །འཁོར་ལོའི་བགྲོད་པ་དག་ནས་ཀྱང་། །ནང་གི་ལམ་ནས་དབྱེར་མེད་པའི། །ཁྱབ་བདག་མ་ནིང་གོ་འཕང་ལས། །རྡོ་རྗེ་འཛིན་པའི་མཚན་སྙན་ལེན། །དབང་ཕྱུག་ཆེན་པོའི་རྒྱལ་ཐབས་པ། །གོས་དཀར་ལྕང་ལོའི་ཕྲེང་བ་འཛིན། །ཐོད་རྒལ་སྤྱོད་པས་ས་འཕར་བ། །འབྲེལ་ཚད་གཏན་བདེར་འཁྲིད་དེར་བསྔགས། །
ཁྱོད་ནི་རྡོ་རྗེ་འཆང་དབང་པོ། །ཧེ་རུ་ཀ་དཔལ་ཆེ་བའི་མཆོག །ཡོན་ཏན་བརྗོད་ཀྱིས་ག་ལ་ལོངས། །མདོར་བསྡུས་ཚིགས་སུ་བཅད་པའི་དགེས། །འགྲོ་ཀུན་ཚེ་འདིར་ཧེ་རུ་ཀ །ཁ་སྦྱོར་ཡན་ལག་བདུན་ལྡན་པའི། །གོ་འཕང་མཆོག་ལ་དབང་བསྒྱུར་ཏེ། །འཁོར་བ་དོང་ནས་སྤྲུགས་པར་ཤོག །ཅེས་པའང་སྒོ་སྟོད་ནས་དཔལ་ལྡན་ས་སྐྱ་པའི་བསྟན་འཛིན་མཆོག་གི་གསུང་བསྐུལ་ངོར་ཡོན་ཏན་རྒྱ་མཚོས་ཁྲི་འབུའི་སྒར་ཆེན་ཏུ་བྲིས་པ་དགེ་ལེགས་འཕེལ།། ༈ །།གངས་ཅན་གྱི་གསང་ཆེན་བསྟན་པའི་བདག་པོ་ཁུ་དབོན་བརྒྱུད་པར་བཅས་པ་ལ་བསྔགས་པ་བརྗོད་པ་གཟི་བརྗིད་མཐའ་ཡས་ཞེས་བྱ་བ། །རྒྱུད་སྡེ་གངྒཱའི་ཀླུང་གིས་མ་ཁེངས་པར། །བི་རཱུའི་ཞལ་གྱི་བདུད་རྩི་ལྟོར་བསྐྱིལ་བ། །བརྩེ་ཆེན་པདྨ་དཀར་འཛིན་དྲང་སྲོང་དེས། །དག་བྱེད་རྒྱུན་གྱིས་གངས་ཅན་ཉེས་པ་བཀྲུས། །ཚངས་པའི་ཡི་གེས་འཕགས་ཡུལ་ཆོས་ཀྱི་གླར། །བསྔགས་པའི་གླིང་བུས་མཁའ་སྤྱོད་རི་དྭགས་མིག །བསླུས་སམ་མཁའ་སྤྱོད་བདེ་ཆེན་ཚོགས་ཀྱི་རྗེར། །ཆོས་ཁྲིའི་སྟེང་ནས་བསོད་ནམས་རྩེ་མོ་བསུས། །རྡོ་རྗེ་དྲིལ་བུ་ནམ་མཁར་འཇོག་པ་དང་། །ལྷན་ཅིག་གདུག་པའི་འབྱུང་པོ་བསྐྲད་པའི་ཟིལ། །མ་བཟོད་གངས་ཅན་རྡོ་རྗེ་འཛིན་ཀུན་གྱི། །གཙུག་གིས་རབ་བཏུད་གྲགས་པའི་རྒྱལ་མཚན་མཐོ། །ཀུན་མཁྱེན་གཉིས་པ་ལྗོངས་འདིར་བྱོན་པ་ན། །བསྟན་ལ་དགའ་བའི་ལྷ་ཡིས་ག་ཞ་འབྱིན། །ཕྱོགས་ལས་རྣམ་རྒྱལ་ས་
སྐྱ་པ་ཆེན་ཞེས། །ཡ་མཚན་སྙན་གྲགས་ནམ་མཁའི་མུ་ཁྱུད་བརྒལ། །བློ་ལས་འདས་པའི་ཆོ་འཕྲུལ་མཐའ་ཡས་པས། །ཛམ་གླིང་སྐྱེ་དགུ་འདུལ་ལ་ཐུབ་ཆེན་བཞིན། ཁམས་གསུམ་ཆོས་ཀྱི་རྒྱལ་པོ་འཕགས་པའི་མཚན། །འཇིག་རྟེན་དག་ན་ཉི་མ་བཞིན་ཏུ་གསལ། །ཐེ་ཚོམ་དྲྭ་བ་འཕགས་པ་ཀླུས་བཅད་པས། །སྤྲོས་པའི་མཐའ་བྲལ་ཨ་བདྷཱུ་ཏི་པ། །དཔལ་ལྡན་བླ་མའི་ཡོན་ཏན་རྡོ་རྗེའི་ཚིག །ཇི་སྙེད་བརྗོད་ཀུན་ཁྱོད་ལུང་བསྟན་པར་ངེས། །ས་གཞིའི་དབང་ཕྱུག་ནོར་བུའི་ཅོད་པན་གྱིས། །ཞབས་སེན་ཟླ་བའི་མེ་ལོང་ཕྱིས་པ་ལས། །འཇམ་དབྱངས་རྩེ་ལྔའི་རི་ལས་གདན་བསྐྱོད་པ། །ཐེག་ཆེན་ཆོས་རྗེའི་རྣམ་པར་ཐར་པས་རྟོགས། །མཁྱེན་པའི་རླབས་ཀྱིས་ཤེས་བྱ་ནམ་མཁའི་མཐའ། །ནུས་པའི་ཤུགས་ཀྱིས་བདུད་སྡེའི་བྲང་འགྲོ་ལ། །འཇིགས་མེད་མཐུ་ཆེན་གྲུབ་པའི་མཁའ་ལྡིང་དབང་། །ཀུན་དགའ་རྣམ་རྒྱལ་འགྲན་ཟླའི་གཉིས་སྐྱེས་དབེན། །རྣམ་ཐར་པདྨ་གཞོན་ནུ་བཞིན་ཏུ་གཙང་། །གྲགས་པ་དབྱར་གྱི་རྔ་ཆེན་བཞིན་ཏུ་གསལ། །ཕྲིན་ལས་དལ་འགྲོའི་རྒྱུན་བཞིན་རྟག་འབབས་པས། །བསྟན་ལ་བྱ་བ་བྱས་སོ་ངོར་ཆེན་རྗེ། །སྙན་བརྒྱུད་རིན་ཆེན་གྲམ་བུར་བརྡལ་བའི་ངོགས། །བློ་གསལ་ངང་མོ་འདུ་བའི་རྒྱ་མཚོ་ལས། །ཉི་ཟླའི་དཀྱིལ་འཁོར་གསར་པ་བརྡལ་དེས་ཀྱང་། །ཡུན་རིང་འཇིག་རྟེན་མུན་པ་བསྙིལ་ལ་བརྩོན། །
གསེར་གྱི་སྐུད་པར་མུ་ཏིག་ཕྲེང་བ་བཞིན། །པདྨས་ལུང་བསྟན་གདུང་རབ་རིམ་བྱོན་དང་། །ཐུབ་པའི་རྒྱལ་མཚན་ལྟུང་བའི་བུག་པས་དབེན། །ཐུབ་བསྟན་སྲོག་འཛིན་མཁན་རབས་རིམ་བྱོན་དང་། །ཟབ་དགུའི་བཅུད་སྡུད་རྒྱལ་པོའི་བང་མཛོད་བཞིན། །གསང་ཆེན་སྙན་བརྒྱུད་བསྟན་འཛིན་ཟོལ་མེད་པ། །དེ་ཀུན་ཁ་བའི་ལྗོངས་ཀྱི་འདྲེན་མཆོག་ཏུ། །ངེས་པའི་ཤེས་པས་འདུད་ཅིང་ཕྱག་བགྱིའོ། །སེམས་ཅན་གཅིག་ཙམ་དགྲོལ་བའི་ཕྲིན་ལས་ཀྱང་། །དུས་གསུམ་གཤེགས་པས་རྟག་ཏུ་དགོངས་མཛད་ཅིང་། །གསང་བའི་སྒྲ་ཅོམ་གང་ན་ཡོད་པ་དེ། །དམ་ཅན་གཙུག་གི་ནོར་བུའི་རྒྱན་འགྱུར་ན། །མཐའ་ཡས་འགྲོ་ལ་ཐར་ལམ་དྲང་པོ་སྟོན། །གསང་ཆེན་སྙིང་པོའི་སྲོག་རྩ་བཟུང་བ་དེ། །དཔྱད་དུ་ཅི་ཡོད་བཙོ་མའི་གསེར་བཟང་ལྟར། །ཐུབ་བསྟན་འབྱོར་པ་རྒྱས་པའི་དབྱིག་བྱེད་དོ། །རྒྱལ་བས་གསུངས་ཤིང་འཕགས་ཡུལ་འགྲེལ་པས་བཀྲལ། །མཁས་པས་བཤད་ཅིང་གྲུབ་པས་ཉམས་སུ་བླངས། །དེ་འདྲའི་གཞུང་ལ་ཐོས་བསམ་སྒོམ་བརྩོན་པ། །བརྩེ་ཆེན་སློབ་མར་བཅས་པའི་གྲུབ་པའི་མཐའ། །རྒྱ་མཚོ་ལས་བྱུང་དེད་དཔོན་མཁས་པས་བླངས། །བྱི་དོར་ལེགས་བྱས་དགོས་འདོད་ཀུན་འཇོ་བ། །མཆོད་ཅིང་དབྱིག་གི་སྙིང་པོར་བསྟེན་ནུས་པ། །འཇིག་རྟེན་འདི་ན་བསོད་ལྡན་རེས་འགའ་ཞིག །གཏན་ཚིགས་འདི་ཡིས་རྒྱལ་བསྟན་ཡོངས་ལ་མོས། །ཁྱད་པར་ས་སྐྱའི་རྗེ་བཙུན་ཞབས་ལ་དད། །དེ་ལ་ཟོལ་ཟོག་མེད་པའི་
དགེ་རྩ་ཡིས། །རྣམ་དག་རྒྱལ་བསྟན་ཡོངས་རྫོགས་འཛིན་ནུས་ཤོག །ཕྱོགས་རིས་ཀྱི་ཕོ་ཙུགས་ཞིག་ཅིང་ཆོས་སྤོང་གི་སྙིང་ཁམས་ཆུང་བའི་སྤྲང་བན་བླུན་སྒོམ་ཡོན་ཏན་རྒྱ་མཚོས་དབེན་པར་གནས་པའི་ཚེ། །རྗེ་བཙུན་དེ་དག་གི་ཡོན་ཏན་ཏུར་གྱིས་དྲན་ཏེ་རྗེ་བཙུན་གོང་མས་བྱིན་གྱིས་བརླབས་པའི་དུས་ཆེན་སྨལ་བོ་ཟླ་བའི་ཚེས་ལ་དད་གུས་ཀྱི་སོར་མོས་བསྐུལ་བའི་གླིང་དུ་ཅུང་ཟད་ཅིག་བསྒྱུར་བའོ།། ༈ །།ཆོས་རྗེ་ས་སྐྱ་པ་ཆེན་ལ་བསྔགས་པའི་ཚིག་ཕྲེང་མཚོ་བྱུང་མགྲིན་གླུ་ཞེས་བྱ་བ། །རྣམ་དག་མཁའ་ལྟར་ཁྱབ་པའི་ཡེ་ཤེས་ཀྱིས། །ཤེས་བྱ་རབ་གསལ་སྨྲ་བའི་སེང་གེ་མཆོག །གངས་རིའི་ཁྲོད་ཀྱི་ཐུབ་བསྟན་མཛེས་པའི་རྒྱན། །ཀུན་དགའ་རྒྱལ་མཚན་ཞབས་ལ་ཕྱག་འཚལ་ལོ། །མཚན་དཔེ་རྗེས་མཐུན་གསལ་བའི་ཟླ་གཞོན་ནི། །ལེགས་བྱས་ཤར་རིའི་ཕྲག་གོང་ཚེས་མ་ཐག །ལེགས་པར་སྦྱར་བའི་བརྡ་སྐད་བདུད་རྩིའི་ཟེར། །བློ་ལྡན་ཀུ་མུད་བཞད་པའི་གཉེན་ཏུ་ཟག །སྐྱེ་བ་དུ་མར་གསན་ཀྱང་མ་ངོམས་པ། །སྐྱེས་བུ་མཆོག་དེ་ཐོས་ལ་ཞུགས་པ་ན། །མང་དུ་གསན་མིན་གསན་པ་ཉུང་བའང་མིན། །ལན་རེ་གསན་པས་ཆོས་ཀུན་ཁོང་དུ་ཆུད། ཁ་ཆེ་བསོད་སྙོམས་པ་སོགས་མཁས་གྲུབ་ཀྱི། །གསང་མཛོད་དུ་མ་དངོས་སུ་བརྟོལ་བཞིན་ཏུ། །འཇམ་པའི་རྡོ་རྗེ་དབྱིག་གི་གཉེན་སོགས་ཀྱིས། །ཆོས་སྒོ་དུ་མའི་ལྡེ་མིག་ལྐོག་ཏུ་བསྩལ། །ལྷ་ཡི་བཟོ་བོའི་རིགས་སུ་བསྐྲུན་པ་མིན། །བྱེད་པོའི་རྗེས་སུ་སློབ་མིན་དེ་ཡི་ལུགས། །
གཏན་ལ་ཕབ་ཚེ་ལས་སྣ་ཚོགས་པ་བཞིན། །ཐོས་མ་མྱོང་བའི་ལེགས་བཤད་མཚོ་ལྟར་བརྡོལ། །གཞན་ཕན་རྨི་ལམ་དུ་ཡང་མ་བརྗེད་ན། །དངོས་སུ་ཕན་པའི་དབང་གྱུར་སྨོས་ཅི་དགོས། །ལུས་སྲོག་འཚོ་བའི་བདུད་རྩིའི་བུམ་པ་བཟང་། །འདི་འདྲ་བདེ་སོགས་བདག་པོའི་གྲོང་ན་མེད། །དོན་དང་ཚིག་གི་འགྱུར་ཁྱད་པ་རླིང་ལ་གསལ། །བརྡ་དང་སྐད་ཀྱི་བརྗོད་ཚུལ་གཙང་ལ་དག །དབྱངས་ཀྱི་ཡན་ལག་རྒྱ་མཚོས་བརྡ་སྤྲོད་ན། །སྐད་གཉིས་ཐོགས་མེད་སྨྲ་ལ་མཚར་དུ་ཅི། །རིག་པའི་དབང་ཕྱུག་གཞུང་ལུགས་ཉལ་བ་ལས། །བསླངས་ཏེ་སྔོན་མེད་རིག་པའི་ཐོག་འཕེན་ཚེ། །རང་གཞན་རྟོག་གེའི་རིག་པའི་རྫོང་བཅོམ་པ། །འཕགས་ཡུལ་དུ་ཡང་དབྱར་གྱི་རྔ་བཞིན་གྲགས། །ཆོས་ཀྱི་མདོ་དང་རྒྱས་པ་ནང་གི་དོན། །ཐུབ་གསུང་དབང་དུ་བཀོད་ཆོ་ཁྱོད་ཀྱི་ལུགས། །ཐུབ་གསུང་ཇི་བཞིན་ཚད་མར་གྱུར་པས་ན། །མཁས་པ་ཀུན་གྱི་ལུང་གི་ཁུངས་སུ་འགྲོ། །སྙན་ཚིག་མགྲིན་བླུ་མངོན་བརྗོད་འགྱུར་ཁུག་དང་། །སྡེབ་ལེགས་མེ་ཏོག་ཆུན་པོའི་རྣ་ཤལ་ཅན། །གྲངས་ཀྱི་གནས་སོགས་འཇོ་སྒེག་མིག་ཡངས་མས། །མཁས་རྣམས་ཡིད་ཀྱི་བརྟན་པ་དུས་གཅིག་འཕྲོག །འཆད་པའི་དབྱངས་གཅིག་ཆོས་སྒོ་རྒྱ་མཚོར་འཇུག །ཆོས་ཀུན་ཚིག་གཅིག་ཁོངས་སུ་བསྡུ་བར་སྤོབས། །ཟུར་ཕུད་ལྔ་དང་རལ་གྲིའི་རྟགས་སྦས་ཀྱང་། །གཞོན་ནུའི་ལང་ཚོགས་ལ་བར་ངོམས་པ་བཞིན། །རྩོད་པའི་ཁྱུ་མཆོག་ས་སྲུང་མྱོས་པའི་
མགོར། །ལུང་རིག་སྡེར་སེན་འདེབས་པའི་ཁ་ལྔ་པ། །ལོག་སྨྲའི་སྤྲིན་སྒྲ་སྒྲོག་པར་མི་བཟོད་པས། །སྒྲ་རློམས་རི་དྭགས་ཀུན་གྱི་སྙིང་རྩ་འདར། །རྩོམ་ཚུལ་དེ་འདྲ་སྔོན་ཆད་མ་ཤེས་པས། །རྩོམ་པ་མཁན་རྣམས་ཁྱོད་རྗེས་ཆུ་བཞིན་རྒྱུག །སྨྲ་སྒོ་ཚིག་གི་བདག་འདིས་མ་ཕྱེས་ན། །གངས་ཅན་སྨྲ་བའི་ཤིང་རྟ་གང་དུ་འདྲེན། །དཔྱད་གསུམ་དག་པས་ཤཱཀྱའི་བསྟན་པ་ལ། །བྱི་དོར་མཛད་ཀྱི་མངོན་པའི་ང་རྒྱལ་མིན། །ཡེ་ཤེས་མེ་ལོང་ངོས་སུ་ཤེས་བྱའི་གཟུགས། །རང་བཞིན་འཆར་གྱི་རྟོག་དཔྱོད་མཁས་པས་མིན། །ཁྱོད་ཀྱི་ལེགས་གསུང་དག་དང་གངྒཱའི་ཀླུང་། །ཐུབ་བསྟན་རྒྱ་མཚོ་སྲིད་པ་འཁོར་ཞིང་འབབ། །རྙོགས་པ་ཅན་དང་ནམ་ཡང་མི་འདྲེ་བས། །གཟུར་གནས་རྣམས་ལ་དག་བྱེད་ཚད་མར་གྱུར། །འཛམ་གླིང་བདག་པོའི་ཐོར་ཚུགས་ནོར་བུ་ལ། །ཞབས་སེན་བཀོད་པ་གྲུབ་པའི་ཆོ་འཕྲུལ་ཏེ། །དེ་ཡི་ཞལ་རས་ལྟ་བའི་སྐབས་རྙེད་པ། །འགའ་ཡང་གྲུབ་པ་བཞིན་ཏུ་སྐྱེ་དགུས་མཆོད། །སྒྱུ་མས་སྤྲུལ་པའི་མིག་འཕྲུལ་རྡོ་རྗེ་ཡི། །ཆོས་སུ་བྱིན་གྱིས་བརླབས་ལ་ཅི་ངོ་མཚར། །དམ་ཆོས་བསྲུངས་པས་ཡིད་སྲུབས་སྡེ་དང་བཅས། །སྨ་ཕབ་བསྟན་པའི་སྲོག་རྩ་བསྲིངས་འདི་རྨད། །གྲུབ་པ་ཧེ་རུ་ཀ་དང་རྣལ་འབྱོར་མས། །ནམ་མཁའི་ལམ་ནས་སྲིད་མཐའི་བྱང་ཆུབ་སེམས། །རྒྱལ་བ་དྲི་མེད་དཔལ་དུ་ལུང་བསྟན་པ། །ཐུན་མིན་མཆོག་གི་གྲུབ་པ་ཁྱོད་
ཕྱག་འཚལ། །དེ་འདྲའི་རྣམ་ཐར་བྱིས་བློས་བསམ་མི་ཁྱབ། །ཡོན་ཏན་ཆ་ཙམ་བརྗོད་པར་ནུས་མིན་ཀྱང་། །ཅུང་ཟད་བརྗོད་འདི་ས་སྐྱ་པཎྜི་ཏ། །མོས་པའི་ཡིད་མཁར་ཤར་བའི་མཐུ་ལས་སོ། །ཁྱོད་ནི་རྒྱལ་བའི་དགོངས་པ་ཕྱོགས་མེད་རྟོགས། །དམ་ཆོས་མཐའ་དག་འགལ་མེད་འཆད་པར་ནུས། །འོན་ཀྱང་དགོངས་ཏེ་གསུངས་པའི་ཟུར་ཕྲ་མོ། །མ་རྟོགས་བློ་ཆུང་རྩོད་པའི་ཅ་ཅོ་འཕེལ། །དགོངས་གཞི་ཇི་བཞིན་རྟོགས་ན་འགལ་འདུ་ཡི། །དབྱེ་ན་ཟླུམ་མཆོད་རྟེན་ཁྱོད་ཀྱི་གསུང་རབ་བཟང་། །ལེགས་པར་རྟོགས་ནས་དོན་བཞིན་འགྲེལ་པའི་ཚུལ། །རྒྱན་དྲུག་གཞུང་དང་འདྲ་བས་རིགས་པ་ཉིད། །རྒྱལ་ཚབ་མཆོག་དང་འཕགས་ཞབས་ས་ཐོབ་ཕྱིར། །ཆོས་ཉིད་མངོན་སུམ་གྱུར་པས་འགལ་མི་སྲིད། །དོན་དེ་ཁྱེད་ཀྱིས་མཁྱེན་ནས་བསྟན་མོད་ཀྱང་། །རྗེས་འཇུག་ཕལ་ཆེར་ལྟ་བའི་མུན་པས་འཐུམས། །ལོག་པར་རྟོག་དང་དོན་བཞིན་མ་རྟོགས་པའི། །བརྒྱུད་འཛིན་བླུན་པོའི་གོ་འཕང་ཐོབ་མོད་ཀྱི། །ཇི་བཞིན་རྟོགས་ནས་ལེགས་པར་གསུངས་པ་ཡི། །གྲུབ་མཐའ་རང་བློས་བསླད་པ་ལས་ཀྱི་སྐྱོན། །རྟོག་གེ་བ་དག་རྣམ་པར་འཁྱམས་མོད་ཀྱང་། །མཁྱེན་པའི་གཏེར་གྱིས་ཐུབ་ཚུལ་དཀྲུགས་མི་སྲིད། །རི་འོར་མ་རབས་གདོལ་བར་སྤྱོད་མོད་ཀྱང་། །འཁོར་ལོས་སྒྱུར་བ་ལུགས་ལས་འདའ་བ་མིན། །དེང་ནས་ནམ་ཡང་ཁྱོད་བསྟན་མི་བསླད་པར། །དགོངས་ཟབ་
འཁྲུལ་མེད་རྙེད་ནས་སྟོན་པ་ཡིས། །སྲིད་ན་ཆོས་ཀྱི་ཉིན་བྱེད་གཅིག་པུ་བ། །ཀུན་དགའ་རྒྱལ་མཚན་གོ་འཕང་མྱུར་ཐོབ་ཤོག །གངས་རིའི་བསྐོར་བའི་སྨན་ལྗོངས་སུ། །ཕྱི་དར་ཆོས་ཀྱི་ཉི་མ་འཆར་བ་དེ་སྲིད་དུ། མཁས་པ་ཀུན་གྱི་འབྱུང་ཁུངས་སམ་ཕྱི་མོ་གཅིག་པུ་བ་འཇམ་པའི་དབྱངས་དགེ་བའི་བཤེས་སུ་སྟོན་པ་གང་ལ། དད་པ་ཆེན་པོས་གཅམ་བུ་མིན་པའི་བསྟོད་དབྱངས་མཚོ་བྱུང་མགྲིན་པའི་དབྱངས་བློ་གྲོས་མཐའ་ཡས་ཀྱིས། །གང་དེས་བྱིན་གྱིས་བརླབས་པའི་དུས་ཆེན་དགེ་བར་བླངས་བ་ཤུ་བྷཾ།། ༈ །།ཆོས་རྗེ་ཀུན་མཁྱེན་དོལ་པོ་ལ་བསྔགས་པ་གཞོམ་མེད་སྒྲ་དབྱངས་ཞེས་བྱ་བ། །མཁྱེན་པ་གཉིས་ལྡན་ལྟ་ངན་མུན་པ་བསལ། །དོན་གཉིས་ལྷུན་གྲུབ་རྫོགས་ལྡན་ཆོས་འཁོར་བསྐོར། །ཕྱོགས་དུས་རྒྱལ་བ་སྲས་བཅས་ཕྲིན་ལས་བསྒྲུབས། །ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །འཛམ་གླིང་མཛེས་པའི་རྒྱན་དྲུག་རྣམ་དཔྱོད་དང་། །རྣལ་འབྱོར་བརྒྱད་ཅུའི་གྲུབ་པའི་ཡོན་ཏན་རྣམས། །གཅིག་ཏུ་བསྡུས་པ་ཀུན་མཁྱེན་ཆེན་པོ་ཞེས། །ཐུབ་མཚན་འཆང་བའི་དགེ་སློང་དེ་ལ་འདུད། །ཆོས་ཀྱི་རྒྱལ་པོར་དབང་བསྐུར་རྒྱལ་བའི་ལུང་། །ཐོད་དུ་བཅིངས་ནས་ཁ་བ་ཅན་ལྗོངས་ཀྱི། །རི་བྲག་ཁྲོད་དུ་འཁོར་ལོས་སྒྱུར་བ་བཞིན། །མི་སྲིད་པ་ཡི་ཡ་མཚན་ཆེན་པོ་བྱོན། །འཕོ་མེད་ཚུལ་ཁྲིམས་བདེ་བས་ལུས་གང་ཞིང་། །ཟག་མེད་ཏིང་འཛིན་སྒོ་བརྒྱའི་ལང་ཚོས་སྒེག །དྲི་མེད་ཤེས་རབ་ཟབ་མོའི་ཤ་ཚུགས་རྒྱས། །ཐུབ་དབང་གཉིས་པ་
།ཐུབ་པའི་རྒྱལ་མཚན་འཛིན། །ཇི་ལྟ་ཇི་སྙེད་ཇི་བཞིན་གཟིགས་པ་ཡིས། །ཀུན་མཁྱེན་གྲགས་ལྡན་ཀུན་གྱི་བླ་མ་རུ། །རྒྱལ་ཚབས་གཅིག་པུར་རྒྱལ་བས་མངའ་གསོལ་ཕྱིར། །འཇིགས་མེད་གྲགས་པ་འཇིག་རྟེན་གསུམ་ན་འབར། །ཆོས་དང་དོན་དང་ཡེ་ཤེས་ངེས་དོན་ལ། །དབང་ཐོབ་སྐྱེས་བུ་ཆོས་ཀྱི་ཉིན་བྱེད་ནི། །གང་ཟག་ཚིག་སོགས་སྲིན་བུའི་སྒྲོན་མེ་ལ། །མི་རྟོན་རྟོན་པ་བཞི་ལྡན་མཚན་གྱིས་ལྕི། །འཁོར་ལོ་གསུམ་པོ་དགོངས་དོན་གཅིག་ཏུ་བསྒྲུབས། །དྲང་ངེས་གཉིས་ཀྱི་གཤག་རལ་ཆེན་མོ་ཕྱེས། །གངས་ཅན་ལྗོངས་སུ་བཀའ་བསྡུ་བཞི་བ་མཛད། །བདེ་གཤེགས་ལུང་ཆེན་ཚད་མར་ཞལ་བཞེས་སོ། །ཐེག་མཆོག་ཕྱིར་མི་ལྡོག་པའི་ཆོས་འཁོར་བསྐོར། །མདོ་སྔགས་མཚམས་སྦྱོར་དབུ་མའི་ལམ་སྲོལ་དབྱེ། །རྒྱུད་དོན་མཐར་ཐུག་གསང་བའི་མཛོད་ཁང་དུ། །སྐལ་བཟང་རྣམས་ཀྱང་རང་དགར་སྤྱོད་པར་མཛད། །གྲུབ་པ་ཡོངས་ཀྱིས་ཐུགས་མཚོར་རྒྱས་བཏབ་ཅིང་། །མཁས་པ་ཕལ་གྱིས་རང་དབང་མ་བརྙེས་པ། །རྒྱལ་བའི་དགོངས་ཟབ་དྲི་མེད་བཻ་ཌཱུརྱ། །ཁྱོད་དང་མ་ཕམ་པ་ལས་སུ་ཞིག་སྤྱོད། །བ་སྤུའི་མཐར་ཐུག་གཞོམ་མེད་བདེ་བ་སྤྲོ། །ཀུན་རྟོག་སྲོག་རྩོལ་རྒྱུ་བ་མཐའ་དག་འགག །ཡེ་ཤེས་རིག་མའི་བདག་པོ་རྡོ་རྗེའི་ལུས། །པད་དཀར་འཆང་དང་ཐ་དད་འབྱེད་ཆོས་གང་། །ཕྱོགས་ཞེན་ཁེངས་པས་བསླད་པ་མ་གཏོགས་པ། །སེམས་ལྡན་སུ་ཞིག་ཁྱོད་ལ་གུས་མི་
བྱེད། །ཁྱོད་ནི་བླ་མ་ཁྱོད་ནི་སྟོན་པ་ཉིད། །ཁྱོད་དང་འདྲ་བའི་བཤེས་གཉེན་ཡོངས་མེད་དོ། །ཁྱོད་ཀྱི་རྣམ་ཐར་བསམ་མི་ཁྱབ་པ་ལ། །བདག་གཞན་འགྲོ་བས་བདེ་བླག་འཇུག་ནུས་ཏེ། །སྲས་དང་བཅས་པའི་རྒྱལ་བ་རྒྱ་མཚོ་ཡི། །དགོངས་པ་མཐའ་དག་མྱུར་དུ་སྐོང་གྱུར་ཅིག །འགྲོ་འདིས་ཆོས་ཉིད་མཐོང་བའི་སྐལ་མེད་ཀྱང་། །རྒྱལ་བའི་ཡེ་ཤེས་ཡོད་པར་ཡིད་ཆེས་ནས། །ཕྱུགས་དང་འདྲ་བའི་བློ་གྲོས་ངན་པ་ཡིས། །མཐོ་རིས་རྟེན་བཟང་ཆུད་གསན་མ་གྱུར་ཅིག །ཆགས་ཐོགས་མེད་པའི་ཡེ་ཤེས་རྡོ་རྗེ་ཡིས། །འཇིགས་ཚོགས་ལྟ་བའི་རི་བོ་ཀུན་བཅོམ་སྟེ། །དོན་དམ་མཁའ་ཁྱབ་ཡེ་ཤེས་རྒྱལ་ཁམས་སུ། །ཕྱིར་མི་ལྡོག་པའི་སྒྲ་དབྱངས་སྒྲོག་པར་ཤོག །ཅེས་པའང་སྨིན་དྲུག་ཟླ་བའི་དཀར་ཕྱོགས་ཀྱི་དགའ་བ་གཉིས་པར་ཀུན་མཁྱེན་རྒྱལ་བ་གཉིས་པ་འོད་གསལ་མཁའ་ཁྱབ་ལ་སྙོམས་པར་ཞུགས་པའི་དུས་དྲན་གྱི་མཆོད་པར་དཔལ་དུས་ཀྱི་འཁོར་ལོའི་རྣལ་འབྱོར་ལ་གནས་པ་དང་རྗེས་སུ་འབྲེལ་བར་བློ་གྲོས་མཐའ་ཡས་ཀྱིས་བྲིས་པ་སྐྱེ་བ་ཐམས་ཅད་དུ་ཆོས་རྗེ་ཐམས་ཅད་མཁྱེན་པས་རྗེས་སུ་བཟུང་ནས་རྡོ་རྗེ་བཞི་དང་དབྱེར་མེད་དུ་འགྲུབ་པར་གྱུར་ཅིག། ༈ །།ཀུན་མཁྱེན་བུ་སྟོན་ཆོས་རྗེ་ལ་བསྔགས་པ་རཏྣཀ་མ་ལ་ཞེས་བྱ་བ། །ཡོངས་རྫོགས་བསྟན་པའི་རྒྱལ་མཚན་མཛེས་པའི་ཏོག །དྲི་མེད་ལུང་རྟོགས་ཆར་འབེབས་རིན་པོ་ཆེ། །རང་དང་གཞན་གྱི་དོན་ཆེན་ལྷུན་གྱིས་གྲུབ། །བུ་སྟོན་ཆོས་རྗེའི་ཞབས་ལ་གསོལ་བ་འདེབས། །ཚུལ་ཁྲིམས་མཐར་ཕྱིན་པདྨོའི་
དྲྭ་བས་བཀབ། །བྱང་ཆུབ་ཕྱོགས་ཆོས་རིན་ཆེན་དུ་མས་གང་། །ཚོགས་གཉིས་ལྷུན་གྲུབ་ཆོས་ཀྱི་རྒྱ་མཚོ་འཁྱིལ། །འདོད་དགུའི་འབྱུང་གནས་བུ་སྟོན་ཞབས་ལ་འདུད། །མང་ཐོས་གདེངས་ཅན་བྱེ་བས་ཕྱག་བྱས་ཤིང་། །ལུང་རིག་རིན་ཆེན་དབང་རྒྱལ་ཟུར་ཕུད་མཛེས། །སྲུབ་མཐའ་ཆུ་བཞི་འབབས་པའི་བདག་པོ་ཆེ། །བུ་སྟོན་ཚད་མའི་སྐྱེས་བུའི་ཞབས་ལ་འདུད། །སྐྱེས་སྦྱངས་ཤ་ཚུགས་འགྲན་ཟླ་མེད་པར་རྒྱས། །རྣམ་དཔྱོད་རིན་ཆེན་དྲྭ་བས་མཛེས་པར་བཀབ། །བཅུ་ཕྲག་རིག་སྨྲའི་ཁྱུ་མཆོག་གཟོད་ནས་གྲུབ། །རྒྱལ་བསྟན་ཁུར་འདེགས་ཆོས་རྗེའི་ཞབས་ལ་འདུད། །ལྷག་བསམ་རིན་ཆེན་བརྒྱས་གང་ཡོན་ཏན་མཚོ། །གཞན་ཕན་རླབས་ཕྲེང་འཛད་པ་མེད་པར་འཆིལ། །ཡོངས་གྲུབ་དགོངས་པའི་མཚམས་ལས་མི་འདའ་བ། །ཕན་བདེའི་གཏེར་མཛོད་བུ་སྟོན་ཞབས་ལ་འདུད། །ཡོངས་འཛིན་དེད་དཔོན་དུ་མས་མ་བརྙེས་པ། །རྣལ་འབྱོར་རྒྱུད་མཆོག་རིན་ཆེན་བཻཌཱུརྱ། །བྱི་དོར་ལེགས་མཛད་གྲུབ་པའི་ལམ་སྲོལ་བཏོད། །ཤིང་རྟ་ཆེན་པོ་བུ་སྟོན་རྗེ་ལ་འདུད། །མདོ་སྔགས་གཞུང་བརྒྱའི་པདྨོའི་ཀླུང་འབྱེད་པ། །འཆད་རྩོད་རྩོམ་པ་རིན་ཆེན་འོད་ཀྱི་ཟེར། །སུས་ཀྱང་མི་འཕྲོག་སྨྲ་བའི་ཉི་མར་གྲུབ། །ངག་གི་དབང་ཕྱུག་བུ་སྟོན་ཆོས་རྗེར་འདུད། །ཆོས་ཀྱི་འཁོར་ལོས་སྒྱུར་བའི་རྒྱལ་ཐབས་ཅན། །འཕགས་ནོར་རིན་ཆེན་བདུན་གྱི་འབྱོར་པས་ཕྱུག །དམ་པའི་སྐྱེས་བུ་སྟོན་པ་
གཉིས་པར་གྲུབ། །ཐམས་ཅད་མཁྱེན་པ་ཆོས་ཀྱི་རྗེ་ལ་འདུད། །མདོ་རྒྱུད་རིན་ཆེན་རིན་ཐང་བྲལ་བའི་དབྱིག། བཤད་སྒྲུབ་རྒྱལ་མཚན་རྩེ་མོར་རབ་མཆོད་པས། །གྲུབ་གཉིས་དགོས་རྒུ་ཆར་དུ་བསྙིལ་མཛད་པ། །བརྩེ་བ་ཆེན་པོ་བུ་སྟོན་ཞབས་ལ་འདུད། །རིན་ཆེན་ཁྲོད་དུ་དབང་གི་རྒྱལ་པོ་བཞིན། །མཁས་གྲུབ་ཚོགས་སུ་བུ་སྟོན་ཆོས་ཀྱི་རྗེ། །གངས་ཅན་མཛེས་པའི་རྒྱན་ཏུ་གྲགས་པ་གསལ། །འགྲན་ཟླ་ཀུན་བྲལ་ཆོས་ཀྱི་རྒྱལ་པོར་འདུད། །བསྐལ་བཟང་སྒྲོན་མེ་བདུན་པ་རབ་གསལ་ཞབས། །ཤཱཀྱའི་བསྟན་ལ་བཟང་པོ་སྤྱོད་པའི་ཚུལ། །བསམ་གྱིས་མི་ཁྱབ་སྤྱོད་ཡུལ་མཁའ་ལྟར་ཟབ། །ས་བཅུའི་དབང་ཕྱུག་རྒྱལ་བའི་མྱུ་གུར་འདུད། །ཐུན་མོང་མ་ཡིན་རང་གི་ཁྱད་པར་ཆོས། །འཕགས་པའི་མཆོག་དང་མཉམ་པ་ཉིད་གྱུར་པ། །རྣམ་ཐར་གང་དེ་བྱིས་བློས་མི་དཔོགས་ཀྱང་། །དད་པའི་རྒྱུ་འདིས་བསྐལ་པ་གཅིག་གྱུར་ཤོག །ད་དུང་ཁྱོད་འདྲའི་སྐྱེས་བུས་གངས་ཅན་གྱི། །འཛིན་མ་ལེགས་བལྟམས་ཐུབ་བསྟན་སྒྲོན་མེ་སྦར། །སྙིགས་ལྔའི་མུན་པ་བཅིལ་ནས་ཕན་དང་བདེའི། །ཉིན་མོའི་སྣང་བས་སྐྱེ་དགུ་བསྲུང་གྱུར་ཅིག །ཅེས་པའང་ཐམས་ཅད་མཁྱེན་པ་གང་གི་རིང་ལུགས་ལ་དད་པའི་སྐལ་པ་བཟང་པོ་རྙེད་པས་རྒྱུད་སྡེ་འོག་མ་གསུམ་ལ་སྐལ་ཆད་དུ་མ་གྱུར་ཅིང་། རྒྱལ་བསྟན་ཡིན་ནོ་ཅོག་ལ་མོས་ཤིང་གུས་པའི་བརྟུལ་ཞུགས་འཛིན་པ་བློ་གྲོས་མཐའ་ཡས་ཀྱིས་དཔལ་སྤུངས་དབེན་རིར་བྲིས་པ་དགེ། །།
བོ་དོང་འཇིགས་བྲལ་ཆེན་པོ་ལ་བསྔགས་པ་དབྱངས་ཅན་རྒྱུད་མངས་ཞེས་བྱ་བ། །དཔལ་དབྱངས་ཅན་དགའ་བ་ལ་ཕྱག་འཚལ་ལོ། །འཕགས་ཡུལ་མཁས་པའི་དབང་ཕྱུག་རལ་པའི་ནགས། །འཇིགས་བྲལ་ལ་ཟླ་བས་མཛེས་བྱས་གྲགས་པའི་འོད། །ཕྱོགས་སུ་འགྲོ་ཡང་སྨོན་ལམ་ཤིང་རྟའི་ཁ །བསིལ་ལྡན་བོ་དོང་སྨན་གྱི་ལྗོངས་སུ་བསྒྱུར། །གཞོན་ནུ་གསུང་རབ་གླེགས་བམ་འབུམ་ཕྲག་བརྒྱ། །གཟིགས་པ་ཁོ་ནས་མགྲིན་པའི་མཛོད་བརྒྱན་ཏེ། །ཉི་མའི་གཉེན་གྱིས་རང་བཞིན་ཐུགས་ཆུབ་པས། །ཐམས་ཅད་མཁྱེན་པའི་ཚུལ་ལ་ཁྱད་པར་ཕྱེད། །རྒྱུད་མངས་གླུ་ཡིས་རྣམ་མཁྱེན་རྩལ་སད་པས། །གཟུངས་དང་སྤོབས་པ་རྣམ་དཔྱོད་སྒོ་བྱེ་སྙེད། །དུས་གཅིག་བྱེ་བའི་བུ་དེ་ཡུན་རིང་མ། །དབྱངས་ཅན་མཆོག་ཏུ་དགའ་བས་འཚོ་བ་སྙམ། །འཇོག་པོའི་གཙུག་རྒྱན་གྲགས་ལྡན་ཆོས་ཀྱི་ཁྲི། །འབུམ་ཕྲག་གསུམ་པ་བཏེགས་པའི་རྒྱལ་ཐབས་ལ། །སྤྱན་རས་གཟིགས་དབང་ལུང་གིས་བསྐོས་པ་ན། །ས་སྟེང་འཁོར་ལོས་སྒྱུར་བའི་བཀའ་རྟགས་འགྲོ། །འཇམ་དཔལ་རྣམ་པར་རོལ་བའི་ཆོ་འཕྲུལ་ལ། །རྒོལ་བའི་སྐྱེ་བོ་ཇི་སྙེད་རི་མོའི་གཟུགས། །སྐྱབས་སུ་སོང་ལ་མི་ཟད་བློ་ཡི་གཏེར། །མ་ལུས་ཕྱོགས་ལས་རྣམ་པར་རྒྱལ་དེས་སྦྱིན། །ཐེ་ཚོམ་དྲྭ་བ་ཐུབ་པའི་དབང་པོ་དང་། །རྣལ་འབྱོར་མས་བཅད་གསང་བ་རྒྱ་མཚོའི་མཛོད། །ཡང་ཡང་ཡང་བྱིན་ལ་དགྱེས་པའི་
འཛུམ་ཞལ་ནི། །སྲས་བཅས་རྒྱལ་བས་སྟོན་ཅིང་རིམ་གྲོ་མཛད། །སྐྱེ་འཕགས་རབ་ཏུ་བྱུང་དང་མཁས་པའི་བློ། །གྲུབ་པའི་བརྟུལ་ཞུགས་འཛིན་མར་འཛིན་ཅི་མཆིས། །མ་བསྒྲལ་བསྒྲལ་དང་དབུགས་ཆེན་དབྱུང་ལ་སོགས། །སངས་རྒྱས་འཇིག་རྟེན་བྱོན་ནས་སྐྱོང་བ་བཞིན། །ལེགས་གསུང་ནོར་བུའི་སྒོ་གླེགས་བཞི་ཕྱེ་ན། །ཆོས་ཕུང་བརྒྱད་ཁྲིའི་རིན་ཆེན་གཏེར་བརྡོལ་བས། །བཤད་སྒྲུབ་ལྷབ་ལྷུབ་གང་ན་གཡོ་བ་དེར། །ཏོག་ཏུ་འཚམས་པས་ཆོས་ཀྱི་རྒྱལ་མཚན་བསྒྲེངས། །དེ་ཉིད་འདུས་པའི་འཁོར་ལོ་བཞི་པ་ནི། །ཆོས་ཀྱི་དུང་གིས་བསྒྲགས་མོད་གཞན་ཏུ་ན། །རྩོམ་པར་སྤོབས་པ་ནམ་མཁའི་པདྨོ་སྟེ། །འདྲི་དང་ཀློག་པའི་ངལ་བའང་རི་བོའི་ཁུར། །ཡ་རབས་ལུགས་ཤེས་རྣམས་ཀྱི་དམིགས་བུ་སྟེ། །མཁས་པའི་ཉེ་དབང་དབུས་ན་བདེ་སོགས་བདག །གྲུབ་པའི་ཁྲོམ་ན་འཇིགས་མེད་གྲུབ་པའི་རྒྱལ། །ཤེས་བྱའི་དཀྱིལ་འཁོར་གྲགས་པའི་ཁྱུད་མོས་འཁྱུད། །སྟོང་ཆེན་བཞི་ལས་འདས་པའི་ཡེ་ཤེས་ནི། །མི་ཤིགས་ཁྱད་པར་གསུམ་ལྡན་ཁྱབ་བརྡལ་ཆེ། །སྔ་ན་མེད་པའི་རྨད་གཅིག་སྟོན་པ་ན། །གང་བློ་མཁའ་དང་ཆོས་ཀྱི་དབྱིངས་སུ་སྦྱོར། །ཤིང་རྟར་གྲགས་པའི་སྤྲིང་ཡིག་གདུགས་གཅིག་ཏུ། །སྦྱིན་རྣམས་བདེ་བར་གཤེགས་གསུངས་བྱེ་མ་སྙེད། །རང་དབང་འགྲེལ་ལ་སྤོབས་པའི་རླབས་འཆེལ་ན། །བློ་གྲོས་མི་ཟད་པ་དེའི་
རྗེས་སུ་བྱེད། །རང་དབང་བྱས་སོ་གང་གིས་དྭངས་མ་གསུམ། །གླང་ཆེན་ལྕགས་ཀྱུའི་འཁྲུལ་འཁོར་ཚུལ་གྱིས་ཏེ། །འགྲོས་བཞི་ཐིམ་ལས་རྡོ་རྗེའི་སྐུ་དེ་བཞིན། །འཆི་མེད་ཞི་བའི་དཔུང་གིས་བདུད་སྡེ་བཅོམ། །རྒྱལ་བ་མོས་པ་བྱང་ཆུབ་སྤྱོད་ལ་ཞུགས། །རྣམ་སྣང་རྣམ་པར་འཕྲུལ་བའི་འཕྲུལ་ཆེན་མཁའ། །བརྗོད་པས་མི་མཚོན་བསམ་པས་མི་དཔོགས་ཀྱང་། །བརྗོད་པའི་ཆུ་སྐྱེས་མོས་གུས་མཚོ་ལས་བརྡོལ། །བྱང་ཆུབ་སེམས་དཔའི་བློ་གྲོས་སེམས་ཅན་དང་། །རྟག་ཏུ་མཇའ་བས་རྣམ་ཐར་རྒྱ་ཆེ་བ། །བདག་སོགས་འགྲོ་ལ་བགོ་བཤའ་བསྩལ་མཛད་དེ། །ཀུན་ཀྱང་ཀུན་བཟང་སྤྱོད་པ་ཉིད་འགྱུར་ཤོག །ཤིན་ཏུ་ངོ་མཚར་བའི་རྣམ་པར་ཐར་བ་ལ་བེམ་བ་པོ་དག་ཀྱང་བདུད་པ་སྙམ་བྱེད་ན་སེམས་ལྡན་སུ་ཞིག་གུས་པ་མི་འགྱུར། འདོན་པར་དད་པའི་སྙན་ཚིག་གི་ཆུན་པོ་ཆུང་ངུ་འདིའང་བློ་གྲོས་མཐའ་ཡས་ཀྱིས་ཐལ་བྱུང་དུ་བསྟར་པ་སྟེ། །ཐམས་ཅད་མཁྱེན་པའི་བཤེས་གཉེན་དེ་ལྟ་བུ་དང་སྐལ་བ་མཉམ་པའི་རྒྱུར་གྱུར་ཅིག། ༈ ༈ །།གྲུབ་པའི་དབང་ཕྱུག་བརྩོན་འགྲུས་བཟང་པོ་ལ་ཁྱུང་བའི་གསེར་ཆོས་དང་མཐུན་པར་བསྔགས་པ་ཡི་ཤིགས་རང་སྒྲ་ཞེས་བྱ་བ། །པདྨའི་མགོན་པོ་མངལ་གྱི་པདྨོ་ལས། །གྲོལ་བ་རང་བྱུང་གྲུབ་པས་མཚར་བརྟོལ་པས། །སྙན་པའི་བ་དན་སྲིད་ན་ནུབ་པ་མེད། །མཚོ་སྐྱེས་གཉིས་པའི་ཞབས་པད་གཙུག་ན་བཅིངས། །ཨ་ཡིག་སྐྱེ་མེད་རྟག་པའི་བདུད་རྩིའི་ཆུས། །ལུས་སེམས་འཕོ་བའི་དྲི་མ་ཀུན་བཀྲུས་པས། །འཆི་
མེད་དངས་མའི་སྲོག་ཏུ་གྲུབ་པའི་སྐུ། །གཟི་བརྗིད་ཚད་མེད་འབར་ལ་ཕྱག་འཚལ་ལོ། །ཨ་ཧཾ་ཞུ་བདེས་གཉུག་མའི་ལུས་ཟུངས་གསོས། །རྩ་ཡི་མདུད་གྲོལ་འཕོ་ཆེན་དྷཱུ་ཏིར་བསྟིམས། །ཆོས་ཆེན་དབྱངས་ཀྱི་དཔལ་མོས་འཁྱུད་པའི་གསུང་། །གཞོམ་མེད་རང་སྒྲ་སྒྲོགས་ལ་ཕྱག་འཚལ་ལོ། །རྟོག་མེད་སྙིང་ཀའི་དཔའ་བོ་འབར་བའི་འོད། །བརྟན་གཡོའི་སྣང་མུན་ཀུན་ལ་གསལ་ཁྱབ་པས། །ལྷན་སྐྱེས་འཆར་ནུབ་བྲལ་བར་སད་པའི་ཐུགས། །ཆོས་ཅན་མཚན་མ་སྤངས་ལ་ཕྱག་འཚལ་ལོ། །ཆོས་ཉིད་སྒྱུ་མའི་སྐྱེས་བུ་རྩལ་རྫོགས་པས། །འཁྲུལ་སྣང་སྒྱུ་མའི་དཔུང་ལ་ཤེ་མོས་སྒྱུར། །སྒྱུ་འཕྲུལ་རྒྱ་མཚོའི་རང་བཞིན་ཡོན་ཏན་ནི། །རྒྱལ་བ་ཀུན་དང་མཉམ་ལ་ཕྱག་འཚལ་ལོ། །མགྲིན་པའི་སྒྲོན་མེས་ཉིད་འཁྲུལ་མུན་ཁང་བརྟོལ། །རྡུལ་ཕྲན་གོ་ན་དཀྱིལ་འཁོར་གསལ་རྫོགས་པ། །སྤྲུལ་སྒྱུར་མུ་མཐའ་ཡས་པའི་ཕྲིན་ལས་ནི། །ཡོངས་གྲུབ་འབད་རྩོལ་བྲལ་ལ་ཕྱག་འཚལ་ལོ། །ཡེ་ཤེས་ཟང་ཐལ་གོང་འཕོ་འདའ་ཀའི་ལམ། །ཆོས་ཀུན་བར་མ་དོར་འདུས་གསང་བའི་གནད། །མ་བསྒོམས་མངོན་འཚང་རྒྱ་ལ་ཟབ་མོའི་ཐབས། །ཀུན་མཐུན་ཀུན་ལས་འཕགས་ལ་ཕྱག་འཚལ་ལོ། །དུས་གསུམ་རྒྱལ་བས་རྟོགས་མཛད་ལྷན་ཅིག་སྐྱེས། །ནམ་མཁའི་རྡོ་རྗེ་རང་བབ་གསུམ་གྱིས་གྲུབ། །དངོས་དང་
དངོས་མེད་འཁོར་དང་འདས་པའི་སྲོག །བྱིན་རླབས་ཆགས་ཐོགས་བྲལ་ལ་ཕྱག་འཚལ་ལོ། །ཨེ་ཡིག་སྟོང་པ་སེམས་ཉིད་རྣལ་འབྱོར་མ། །ཝཾ་ཡིག་བདེ་ཆེན་སྣང་བའི་ཡི་དམ་ལྷ། །ཟུང་འཇུག་བླ་མའི་ལམ་དུ་ཕྱི་ནང་ཀུན། །སྐུ་གསུམ་རོལ་པར་ཁྱེར་ལ་ཕྱག་འཚལ་ལོ། །ཟླ་བ་ཉིན་བྱེད་མདངས་ཅན་ཐབས་ཤེས་གཟུགས། །ལྷན་སྐྱེས་རྡོ་རྗེ་བཙུན་མོའི་བྷ་གའི་མཁར། །རླུང་སེམས་ཟག་མེད་བདེ་བ་ཆེར་སྤྱོད་པ། །ཌཱ་ཀིའི་མིང་གཅིག་པོ་ལ་ཕྱག་འཚལ་ལོ། །གདོས་བཅས་འཆི་མེད་དྭངས་མའི་མགོན་པོར་བཞེངས། །ཤེས་བྱ་འཆུག་མེད་ཡེ་ཤེས་ཕྱག་རྒྱས་བསྡམས། །དངོས་ཀུན་ཁྱབ་བདག་འགྱུར་མེད་བདེ་བ་ཆེ། །གཙང་རྟག་དམ་པའི་བདག་ལ་ཕྱག་འཚལ་ལོ། །གཤེགས་ཁྲོ་སེམས་དཔའ་བཀའ་ཡི་རྟགས་བསྡུས་པ། །སྲོག་གི་བུམ་སྐུར་གདོད་གནས་ནག་པོ་ཆེ། །གྲུབ་གཉིས་མྱུར་བར་སྟེར་མཛད་ཐུགས་རྗེ་ཅན། །བླ་མ་མགོན་པོ་དབྱེར་མེད་ལ་ཕྱག་འཚལ། །རྡོ་རྗེ་འཆང་གིས་རྡོ་རྗེའི་རྒྱལ་ཐབས་བསྩལ། །ཡེ་ཤེས་མཁའ་འགྲོས་གསང་མཛོད་ལན་གསུམ་གཏད། །སྐྱེ་འཆི་འབྱུང་བ་བཞི་ལ་རང་དབང་བསྒྱུར། །ཐང་སྟོང་རྒྱལ་པོའི་ཞབས་ལ་ཕྱག་འཚལ་ལོ། །འཇའ་ཚོན་སྐུ་ཡིས་འཁོར་འདས་ནམ་མཁར་ཁྱབ། །དག་པའི་དབང་པོས་རོལ་རྩེད་གར་ཡང་མཐོང་། །བྱིན་རླབས་དཔལ་དུ་འབར་བ་གྲུབ་པའི་རྗེ། །མཚན་མཆོག་ལྔ་དང་ལྡན་ལ་ཕྱག་འཚལ་ལོ། །ཁྱོད་སྐུ་མཐོང་
ཞིང་ཁྱོད་གསུང་བདུད་རྩི་ཐོབ། །ཁྱོད་ཐུགས་ཡེ་ཤེས་ཆེ་དང་མི་ཕྱེད་པའི། །དངོས་གྲུབ་མཆོག་གིས་བདག་རྒྱུད་ཚིམས་མཛད་ནས། །ཐོག་མཐའ་བྲལ་བའི་བདག་ཉིད་ཆེ་འགྲུབ་མཛོད། །བཅུད་འདུལ་གྲུབ་པའི་དབང་ཕྱུག་གིས་ཆོ་འཕྲུལ་གྱི་རོལ་རྩེད་ངོ་མཚར་བས་རྒྱུན་ཆད་མེད་པར་བྱིན་གྱིས་བརླབས་པའི་གནས་མཆོག་ལྕགས་ཟམ་ཆུ་བོ་རིའི་རྩ་མོ་ནམ་མཁའ་ལྡིང་གི་ངོགས། པདྨ་དབང་གི་ཕུག་པར་བློ་གྲོས་མཐའ་ཡས་པའི་སྡེས་གསོལ་བ་བཏབ་པའོ།། ༈ །།རྗེ་བཙུན་ཐམས་ཅད་མཁྱེན་པ་ཏཱ་ར་ནཱ་ཐ་ལ་བསྔགས་པ་ངོ་མཚར་མཐའ་ཡས་ཞེས་བྱ་བ། །ཁྱབ་བདག་འདོད་པ་ཀུན་གྱི་དབང་ཕྱུག་གཙོ། །འཁོར་ལོ་སྡོམ་པ་རྡོ་རྗེ་སློབ་དཔོན་ཚུལ། །བརྟུལ་ཞུགས་ཉམས་བརྒྱས་སྒེག་པའི་ཧེ་རུ་ཀ །སྒྲོལ་བའི་མགོན་པོའི་ཞབས་ལ་གུས་ཕྱག་འཚལ། །ཚངས་སྤྱོད་དྲི་མེད་ལམ་གྱིས་མངོན་པར་བརྒྱན། །ཡིད་འོང་བུད་མེད་ཁྲག་ཁྲིག་ཀུན་སེམས་རྒྱུ། །ཆོས་རྔ་དབྱངས་ཆེན་སྲིད་ན་སྙན་པར་སྒྲོགས། །ཆོ་འཕྲུལ་ཆེན་པོའི་གར་ནི་ཀུན་ཏུ་བསྒྱུར། །བསྟན་ལ་རིམ་གྱིས་འཇུག་པའི་བརྟུལ་ཞུགས་དང་། །ཤེས་བྱ་ཐམས་ཅད་གཟིགས་པའི་རྣམ་དཔྱོད་དང་། །ངོ་མཚར་མཛད་པ་འབྱམས་སུ་ཀླས་པ་ཡིས། །གངས་ཅན་མཁས་གྲུབ་ཡོངས་ཀྱི་རྣམ་ཐར་བཟླུམས། །འཕྲུལ་སྣང་རི་མོ་འགོད་པའི་ཀ་ར་། །མུན་ཅན་ལྟོ་བར་བཙོན་ཏུ་བཟུང་བ་ལས། །བྱང་ཆུབ་སེམས་ཀྱིས་གང་བ་མཐར་ཐུག་སྟེ། །གང་གི་རྒྱུ་བ་
ཡེ་ཤེས་དབུ་མར་འཕབ། །ཀུན་འོད་བདུད་རྩི་ནམ་མཁའི་འོད་ལ་སོགས། །བློ་རབ་རྣམས་ངོར་འཕགས་པའི་འགྲོས་ཀྱིས་ཏེ། །བྱིས་ལ་སྒྲུབ་པོ་བཞིན་ཏུ་སྦྱོར་བའི་ལམ། །བཅུ་གཉིས་རྡོ་རྗེའི་གནས་པས་བདག་བྱིན་བརླབས། །གཞོམ་བྲལ་རྡོ་རྗེའི་སྐུ་དང་རོ་གཅིག་པ། །སེམས་ཀྱི་འགྱུར་མེད་རང་བཞིན་མངོན་སུམ་ཉིད། །རྟེན་དང་བརྟེན་པ་ཐོག་མ་མེད་དུས་ནས། །འོངས་པའི་འབྲེལ་དེ་བཅད་ལ་དཔའ་བོ་བཞིན། །དྭངས་ཤིང་རྟོག་བྲལ་དངོས་པོ་ཐམས་ཅད་ཀྱི། །རྣམ་པ་གསལ་བར་ཤར་བའི་ཡེ་ཤེས་ནི། །ཡུལ་དུས་ཀུན་ལ་སྣ་ཚོགས་ཚུལ་འཇུག་ཕྱིར། །མཚན་གྱི་རྣམ་གྲངས་འཇམ་དཔལ་གཞོན་ནུར་གྲགས། །སྟོབས་འབྱོར་ཟང་ཟིང་སྡེ་ཚན་མང་བའི་རྗེས། །མི་ཟློ་རང་ཚུགས་གསེར་བཟང་ལྟར་བརླིང་བས། །ཕྱིར་མི་ལྡོག་པ་སེང་གེའི་སྒྲ་བསྒྲགས་ཏེ། །བྱམས་པ་ཐོགས་མེད་མཆེད་ཀྱི་དགོངས་པ་སྐོང་། །མཐུ་སྟོབས་གནམ་ལྕགས་ཞུན་མའི་ཆར་ཆེན་ཏུ། །ལྟ་ངན་བདུད་སྡེ་ཉེར་ཡང་མི་བཟོད་པའི། །དྲག་ཤུལ་འཁྲུལ་འཁོར་སྙིང་རྗེའི་ཀློང་ནས་བསྐོར། །འཇིགས་མཛད་རྡོ་རྗེའི་ཟིལ་གྱིས་སྲིད་གསུམ་གནོན། །རིག་མའི་སྐྱེས་བུ་གྲུབ་པའི་ཕུན་ཚོགས་ཅན། །མངོན་བྱང་ལྷུམས་སུ་ཚུད་པའི་རྡོ་རྗེ་འཛིན། །རྡོ་རྗེ་བཞི་ཡི་དབྱིབས་སུ་རབ་ཆགས་པས། །ཕྱོགས་དུས་རྒྱལ་བ་ཀུན་གྱི་གསང་བ་འདུས། །འདོད་ལ་འདོད་པའི་ནོར་བུའི་དཔལ་གྱིས་གང་། །སངས་རྒྱས་
ཕྲིན་ལས་ཆུ་བོའི་རྒྱུན་འབབས་པས། །གསང་བ་རྒྱ་མཚོའི་མཛོད་དེ་འཛིན་པ་ལས། །སྒྲོལ་མའི་དཀྱིལ་འཁོར་མགོན་པོར་གདོད་ནས་གྲུབ། །རིགས་ཀྱི་རྟགས་འཆང་གསང་སྔགས་རྒྱལ་པོ་སྒྲོགས། །གསང་བའི་པདྨོར་བཙུན་མོའི་ཤུ་ཀྲར་སྤྱོད། །རྡོ་རྗེ་དབང་མོའི་བདག་པོའི་གནས་ཐོབ་པས། །དཔའ་བོ་མཁའ་འགྲོའི་དྲྭ་བ་སྡོམ་པར་མཛད། །གཙུག་ཏོར་དབུས་སུ་ཟླ་བ་ཉ་རྒྱས་ཤིང་། །ནོར་བུའི་རྩེ་མོར་ཉི་མའི་དཀྱིལ་འཁོར་བརྟན། །རྣམ་ཀུན་མཆོག་ལྡན་མི་འགྱུར་བ་དེས་འཁྱུད་པ། །ཕྱི་ནང་གཞན་གསུམ་དུས་ཀྱི་འཁོར་ལོ་སྒྱུར། །གསང་དོན་འགྲེལ་ལ་འཇིགས་མེད་རང་དབང་ཐོབ། །གསང་བ་སྒྲ་བཞིན་སྤྱོད་པའི་ནུས་པ་བསྟན། །གསང་མཆོག་ཉི་མའི་ཤིང་རྟ་གསར་དུ་དྲངས། །རྡོ་རྗེ་འཆང་དབང་རྒྱལ་ཚབ་དུས་འདིར་བྱོན། །རང་གཞུང་གཙང་ལ་གཞན་གཞུང་མ་འདྲེས་འཆད། །རང་སྲོལ་ལེགས་བཙུགས་གཞན་སྲོལ་རྒྱུན་ཡང་སྐྱོང་། །རང་ཉིད་མཆོག་བརྙེས་གཞན་པ་སུན་མི་འབྱིན། །དེ་འདྲའི་དཔལ་གྱིས་ཆེན་པོར་གྲགས་རྣམས་བསྙིལ། །རྒྱལ་འཕགས་རྣམས་དང་དམ་པའི་ཆོས་བགྲོ་ཞིང་། །གྲུབ་པ་རྣམས་དང་ཉམས་ཀྱི་གླེང་མོ་འཆད། །མཁའ་འགྲོ་རྣམས་དང་ཚོགས་ཀྱི་འདུ་བར་རོལ། །སྐལ་ལྡན་རྣམས་ལ་ཆོས་ཀྱི་ཆར་ཕབ་ཏོ། །ངེས་གསང་སྙིང་པོའི་ཆོས་རྔ་རྡུང་བཞིན་ཏུ། །སྤྱོད་འཆང་དབང་པོ་གངས་ཅན་བྱོན་པའི་སྒྲས། །སྐལ་མེད་ནང་ཁྲོལ་ཁ་རུ་ལྡུག་བྱེད་ཅིང་། །སྐལ་ལྡན་རྣམས་
ལ་མཆོག་གི་ཕ་ཕོག་བསྩལ། །ཁོ་བོ་རྒྱལ་བ་པདྨའི་རྗེས་ཞུགས་ཀྱང་། །ཁྱོད་ཀྱི་བསྟན་པ་འདི་ལ་ཤིན་ཏུ་དད། །འོན་ཀྱང་བསྟན་པ་སྤེལ་བའི་མཐུ་མེད་པས། །སྨོན་ལམ་བཏབ་ཀྱང་རེ་བ་ཉིད་དུ་ཟད། །ཉི་མའི་སྣང་བས་སྲིན་བྱའི་མིག་ལྡོངས་ཤིང་། །ཡི་དྭགས་རྣམས་ལ་བདུད་རྩི་དུག་ཏུ་འགྱུར། །སྐལ་དམན་རྣམས་ཀྱིས་རྒྱལ་བའི་ཕྲིན་ལས་ཀྱང་། །ལོག་པར་མཐོང་བ་རང་གི་ཉེས་པའི་མཐུ། །སྙིགས་མའི་ཆུ་རླབས་རབ་འཁྲུགས་དུག་གི་མཚོ། །ལྟ་བའི་སྙིགས་མས་ཡང་དག་ལྟ་བ་བཀབ། །བསོད་ནམས་སྙིགས་མས་མཆོད་ཡུལ་དམན་ལ་མོས། །མཆོག་གི་བཤེས་གཉེན་ཕྲིན་ལས་ཞི་བར་གཟིམས། །སྙིང་པོའི་རྒྱལ་མཚན་བསྙོལ་མ་མཐུ་ཆེ་ཞིང་། །ཡིད་སྲུབ་བ་དན་སྒྲེང་ལ་དབང་བཙན་པ། །རྒྱལ་བསྟན་ཉི་འོད་ནུབ་ཀར་སྐར་མ་ལྟར། །དཔལ་གྱི་མགུར་ནས་ལུང་གིས་བསྟན་དེ་བཀྲ། །སྐྱེས་བུ་ཆེན་པོ་ཐོས་པའི་ཡུལ་དུ་གཤེགས། །བསྟན་པ་མེ་ཆེན་མནལ་བའི་དུད་པ་བཞིན། །བསྟན་འཛིན་ཉིན་མོའི་རྒྱུ་སྐར་དང་མཚུངས་པ། །སྐྱེ་དགུའི་བསོད་ནམས་སྐལ་པས་ཐོབ་འདི་སྐྱོ། །འདི་ལྟར་གྱུར་ན་དམ་པ་དམན་གྱིས་འཕྱ། །ཐུགས་བསྐྱེད་སྨོན་ལམ་འབྲས་བུས་སྟོང་པར་འགྱུར། །ལོག་རྟོག་བཅུད་མི་ལྡན་གྱི་གཡུལ་བཟློག་སྟེ། །རང་བསྟན་དཔག་བསམ་རྩ་བ་བསྲུང་དུ་གསོལ། །གདུལ་བྱའི་བསོད་ནམས་བྲི་གང་ཡོད་གྱུར་ཀྱང་། །རྒྱལ་བའི་ཐུགས་རྗེར་བྲི་གང་མ་མཆིས་པས། །ད་དུང་བསྟན་པའི་མི་རོ་ལྡངས་
ནས་སུ། །བདུད་ཀྱི་ཚང་ཚིང་བསྲེག་པར་མཛད་དུ་གསོལ། །སྐལ་དམན་དམུས་ལོང་ཁྱུ་ལ་བསྙད་བཏགས་ནས། །མཁའ་སྤྱོད་དགའ་མའི་རྩེད་འཇོས་མི་གཡེང་བར། །ཆོ་འཕྲུལ་སྐྱ་རེངས་གསར་པ་དང་འགྲོགས་པའི། །སྤྲུལ་པའི་ཉིན་བྱེད་རྩོད་མེད་འཆར་དུ་གསོལ། །སྤངས་རྟོགས་སྲིན་བུའི་འོད་ལས་རབ་དམན་ཀྱང་། །ལྷག་བསམ་སྣང་བའི་མུ་ཁྱུད་ལ་འགྲན་པ། །བདག་ཅག་མྱུར་དུ་རྗེས་སུ་བཟུང་ནས་ཀྱང་། །མཁྱེན་བརྩེ་ནུས་པའི་པདྨོ་འབྱེད་དུ་གསོལ། །སྙིང་པོའི་ཚུལ་འདི་ཟབ་ཅིང་གཏིང་དཔག་བཀའ། །འགྲོ་འདིས་རྟོགས་པའི་སྐལ་པ་མེད་གྱུར་ཀྱང་། །ཐོས་སོགས་བསོད་ནམས་དཔག་ཡས་གསུངས་པས་ན། །དེ་བཞིན་གཤེགས་པའི་དམ་ཆོས་འཛིན་ཏུ་གསོལ། །དཔའ་བོ་ཆེན་པོའི་ཆོ་འཕྲུལ་དཔག་མེད་ལྟར། །བདག་ཀྱང་ཆོ་འཕྲུལ་ཆེན་པོའི་གནས་ཐོབ་སྟེ། །སྲིད་ཞིར་མི་གནས་འདོད་དགུར་སྒྱུར་བའི་སྐུས། །སྲིད་པའི་འགྲོ་བ་མ་ལུས་སྒྲོལ་བར་ཤོག །ཅེས་པའང་དབོ་ཟླའི་དམར་ཕྱོགས་ཀྱི་རྒྱལ་བ་གསུམ་པར་རྗེ་ཉིད་ཀྱི་དུས་དྲན་འཁོར་ལོ་སྡོམ་པའི་རྣལ་འབྱོར་ལ་གནས་པའི་ཚེ་མོས་པའི་ཚིག་གི་མེ་ཏོག་གུ་འི་མགྲིན་མཚོ་ལས་ཐལ་བྱུང་དུ་འཐོར་བའོ། །དགེ་ལེགས་འཕེལ། །