བླ་མ་དགོངས་པ་འདུས་པའི་ལྷ་ཚོགས་ལ་བསྟོད་སྨོན་ཏུ་སྦྱར་བ་བསམ་དོན་ཀུན་འགྲུབ།
བླ་མ་དགོངས་པ་འདུས་པའི་ལྷ་ཚོགས་ལ་བསྟོད་སྨོན་ཏུ་སྦྱར་བ་བསམ་དོན་ཀུན་འགྲུབ་ཅེས་བྱ་བ་བཞུགས་སོ། །
ན་མོ་གུ་རུ་པདྨ་བཛྲཱ་ཡ། །གསུང་གི་རྡོ་རྗེ་བདེ་བ་ཆེན་པོའི་དཔལ། །སྐད་ཅིག་དྲན་པས་འདི་ཕྱིའི་བདེ་བ་འཇོ། །ཚེ་དང་ཡེ་ཤེས་འོད་སྣང་མཐའ་ཡས་པ། །མགོན་པོ་ཆོས་ཀྱི་སྐུ་ལ་ཕྱག་འཚལ་ལོ། །འཁོར་བ་མ་སྟོངས་བར་དུ་གཞན་དོན་མཛད། །མཚན་ཙམ་ཐོས་པས་ངན་འགྲོའི་སྐྱེ་སྒོ་བཅད། །མི་འཇིགས་སྦྱིན་པ་བཅོམ་ལྡན་འཇིག་རྟེན་དབང་། །ཐུགས་རྗེ་ཆེ་ལྡན་ཞབས་ལ་གུས་པས་འདུད། །སྐྱེ་འཆི་ཀུན་སྤངས་མི་ཤིགས་རྡོ་རྗེའི་སྐུ། །འཁོར་བ་དོང་སྤྲུགས་པདྨ་ཐོད་ཕྲེང་རྩལ། །སངས་རྒྱས་ཀུན་ལས་ལྷག་པའི་བཀའ་དྲིན་ཅན། །རིགས་ཀྱི་བདག་པོས་དུས་འདིར་བྱིན་རླབས་སྩོལ། ཧྲཱིཿ །ཕྱོགས་བཅུ་དུས་གསུམ་རྒྱལ་བ་རྒྱ་མཚོ་ཡི། །གསང་གསུམ་མི་ཟད་རྒྱན་གྱི་འཁོར་ལོའི་སྤྲིན། །གཅིག་ཏུ་རྫོགས་པ་འཁོར་ལོའི་བདག་པོ་སྟེ། །དགོངས་པ་ཀུན་འདུས་དཀྱིལ་འཁོར་ལྷ་ལ་འདུད། །ཕྱི་ལྟར་དྷུ་མ་ཐ་ལ་མཁའ་འགྲོའི་གྲོང་། །ནང་ལྟར་རྣམ་དག་བཀོད་པའི་དཀྱིལ་འཁོར་མཆོག །གསང་བ་རྡོ་རྗེ་བཙུན་མོའི་བྷ་ག་སྟེ། །ཐར་པ་ཆེན་པོའི་གཞལ་ཡས་ཡངས་པ་ན། །རང་བྱུང་རྒྱལ་བ་མགོན་པོ་འོད་དཔག་མེད། །གཉེན་པོས་མ་བཅོས་ངོ་བོ་ཉིད་རང་བཞིན། །སོང་རྟོགས་ཡེ་ཤེས་འདུས་མ་བྱས་པའི་སྐུ། །རིགས་ཀུན་ཁྱབ་བདག་པདྨ་བཛྲ་རྩལ། །འགྱུར་མེད་བདེ་དང་སྟོང་པ་འདྲེས་པའི་སྐུ། །དམར་གསལ་དྭངས་པ་པདྨ་རཱ་གའི་མདོག །སྤྱན་
གསུམ་མཆེ་བཞིས་མཚན་པའི་ཁྲོ་འཛུམ་ཞལ། །དཀར་མཐིང་དམར་བར་བསྟན་ལ་ཕྱག་འཚལ་བསྟོད། །ལས་སྒྲིབ་ཀུན་བསྲེག་སྨར་སྨིན་མེ་ཡི་མདངས། །འཁྱིལ་ཞིང་འཕྱང་བ་ལྕང་ལོའི་ཟར་བུ་ནི། །མཐོན་མཐིང་ཡང་དག་ལྟ་བ་མཐར་ཕྱིན་རྟགས། །ཡོན་ཏན་ཡོངས་སུ་རྫོགས་ལ་ཕྱག་འཚལ་བསྟོད། །དགོངས་པ་མི་འགྱུར་རྡོ་རྗེ་རྩེ་ལྔ་པ། །ཉོན་མོངས་རྩད་གཅོད་ཤེས་རབ་རལ་གྲི་འབར། །སྙིང་པོའི་དབང་སྩོལ་བཅུད་ལྡན་རིན་ཆེན་གྱི། །བུམ་པས་གཡས་ཕྱག་མཚན་ལ་ཕྱག་འཚལ་བསྟོད། །ཚངས་པའི་དྲིལ་བུ་ཐེག་ཆེན་ཆོས་དབྱངས་སྒྲོགས། །བནྡྷ་བཅུད་བཀང་དངོས་གྲུབ་ཆར་རྒྱུན་འབེབས། །དུག་གསུམ་དྲུང་འབྱིན་ཁ་ཊཱཾྭ་གཡོན་ན་བསྣམས། །འགྲོ་དྲུག་ཕྱག་རྒྱས་སྒྲོལ་ལ་ཕྱག་འཚལ་བསྟོད། །མུ་ཏིག་བཀྲམ་པ་པདྨའི་ཟེའུ་འབྲུལ། །ཨཏྨ་གྷའི་མགོ་བོ་ནོར་བུས་སྤྲས། །རྩེ་གསུམ་རྩེ་ལྔ་རྩེ་དགུ་རྡོ་རྗེའི་བྲག །པདྨ་ཉི་ཟླས་མཚན་ལ་ཕྱག་འཚལ་བསྟོད། །དགུ་རྫོགས་གདན་ལ་དྲེགས་པ་བྱོལ་སོང་དང་། །སྲིད་པ་ལུགས་བཟློག་འཁོར་ལོ་མནན་པའི་ཞབས། །བདུད་བཞི་ཟིལ་གནོན་བརྐྱང་བསྐུམ་འདོར་སྟབས་བསྒྲད། །མཚན་དཔེའི་གཟི་བརྗིད་འབར་ལ་ཕྱག་འཚལ་བསྟོད། །རུས་པའི་རྒྱན་དྲུག་རིན་ཆེན་འཕྱང་འཕྲུལ་མཛེས། །གླང་ཆེན་ཀོ་རློན་སྟག་གི་ཤམས་་ཐབས་མནབས། །ཕྱག་ཞབས་སྤྲུལ་དང་ཞིང་ཆེན་སྐེད་པར་དཀྲིས། །ཕྲིན་ལས་འགྲོ་འདུལ་སྟོན་ལ་ཕྱག་འཚལ་བསྟོད། །ཁྲག་ཐིག་རྩིབས་
ཐལ་མཁུར་ཚོས་སོར་རིས་སོགས། །དུག་གསུམ་དབང་སྡུད་སྤངས་རྟོགས་འདུལ་ཐབས་རྫོགས། །ཐོད་སྐམ་དབུ་རྒྱན་རིན་ཆེན་རྩེ་བྲན་ཅན། །ཐོད་རློན་དོ་ཤལ་མཛད་ལ་ཕྱག་འཚལ་བསྟོད། །དར་སྣའི་ཅོད་པན་ཆེ་བའི་ཡོན་ཏན་རྒྱས། །ཆགས་ཐོགས་མེད་པར་འགྲོ་དོན་མཛད་པའི་ཚུལ། །འགྱིངས་བག་གར་དགུའི་ཉམས་ཀྱིས་དགྱེས་རོལ་བ། །དགོངས་སྤྱོད་ཀློང་དུ་གྱུར་ལ་ཕྱག་འཚལ་བསྟོད། །སྤྱི་གཙུག་ནོར་བུ་དབང་གི་རྒྱལ་པོ་ལ། །ལེ་བརྒན་དར་གྱི་ལྕེའུས་མཛེས་པའི་ཏོག །རིགས་བདག་མགོན་པོ་འོད་མི་འགྱུར་བས་མཚན། །དཀྱིལ་འཁོར་འཁོར་ལོའི་མགོན་ལ་ཕྱག་འཚལ་བསྟོད། །གཉིས་མེད་བདེ་རོལ་ལྷ་ལྕམ་མནྡཱ་ར། །དགའ་བཞིའི་ཡེ་ཤེས་སྐྱེད་མཛད་རྣལ་འབྱོར་མ། །དམར་གསལ་མདངས་ལྡན་འདོད་ཆགས་མ་སྤངས་དག །མཉམ་སྦྱོར་འཛུམ་ཞལ་སྟོན་ལ་ཕྱག་འཚལ་བསྟོད། །མ་རིག་གཉིད་སློང་ལྟག་སྤྲོད་རྗེའུ་ཆུང་བརྡུང་། །དམར་བཀང་ཆགས་པའི་དུང་ཆེན་ཡབ་ལ་སྟོབ། །རིན་ཆེན་རུས་རྒྱན་དར་དམར་ཅོད་པན་འཕུར། །གཞོན་ཚུལ་ལང་ཚོ་རྫོགས་ལ་ཕྱག་འཚལ་བསྟོད། །གསང་བ་ཡེ་ཤེས་གསང་གསུམ་བརྒྱུད་འཛིན་མ། །ཚེ་དབང་དངོས་གྲུབ་སྟེར་མཛད་བདེ་ཆེན་རྒྱལ། །དུར་ཁྲོད་མཁའ་འགྲོ་སྡུད་ཅིང་བླན་ཏུ་འཁོལ། །དབྱིངས་ཕྱུག་སྨན་གཅིག་མ་ལ་ཕྱག་འཚལ་བསྟོད། ཧྲཱིཿ །དུ་མ་རོ་གཅིག་གཙོ་དང་འཁོར་གྱི་ཚུལ། །ཉིད་ལས་མི་གཞན་ཚོགས་བརྒྱད་རྣམ་པར་དག །ཕྱོགས་
མཚམས་ལིང་རྩེ་བརྒྱད་ཀྱི་དབུས་བཞུགས་པ། །དཔལ་ཆེན་ཡབ་ཡུམ་རྣམས་ལ་ཕྱག་འཚལ་བསྟོད། །ཆོས་ཀྱི་དབྱིངས་ལས་མཚན་མའི་ཕྱག་རྒྱར་སྣང་། །ཆ་ལུགས་མ་ངེས་གང་ལ་གང་འདུལ་ཚུལ། །རབ་འབྱམས་དཀྱིལ་འཁོར་འཁོར་ལོ་སྤྲོ་ཞིང་བསྡུ། །ཡབ་ཡུམ་སྲས་འཁོར་བཅས་ལ་ཕྱག་འཚལ་བསྟོད། །མཁའ་ཁྱབ་ཏིང་འཛིན་བདུད་དཔུང་ཟིལ་གྱིས་གནོན། །རྣམ་འཕྲུལ་དུ་མས་སྐལ་ལྡན་རྗེས་སུ་འཛིན། །བདེ་སྟོང་ཉམས་ཀྱིས་ཤེས་དང་ཤེས་བྱའི་དབྱིངས། །ཀུན་ཏུ་གར་མཛད་ཁྱོད་ལ་ཕྱག་འཚལ་བསྟོད། །རྡུལ་དང་རྡུལ་སྙེད་རོ་མཉམ་བརྟག་དཀའི་ཞིང་། །ཕུན་ཚོགས་ལྔ་ལྡན་སྲིད་ཞིའི་ཐིག་ལེ་ནི། །མ་འདྲེས་ལོངས་སུ་སྤྱོད་པ་བུམ་པ་སྐུའི། །ཡེ་ཤེས་ཞིང་ཀུན་ཁྱབ་ལ་ཕྱག་འཚལ་བསྟོད། །སྣ་ཚོགས་ལུས་དང་དེ་བཞིན་སྣ་ཚོགས་ངག །སྣ་ཚོགས་སེམས་ཏེ་མི་ཕྱེད་རྡོ་རྗེ་གསུམ། །ཤིན་ཏུ་གསང་བ་ཟབ་མོའི་ཡེ་ཤེས་སྐུར། །ཞིང་ཁམས་རབ་འབྱམས་རྫོགས་ལ་ཕྱག་འཚལ་བསྟོད། །རྣམ་ཐར་སྒོ་བཞི་རྡོ་རྗེ་བཙུན་མོའི་མཁར། །རྣམ་པ་ཀུན་ལྡན་བཅུ་དྲུག་ཆ་རྫོགས་པ། །བཏགས་པའི་ཆོས་རྣམས་འདུས་མ་བྱས་པས་ཕྱེ། །ཨེ་ཝཾ་རང་བཞིན་ཁྱོད་ལ་ཕྱག་འཚལ་བསྟོད། །རང་བྱུང་རང་བཞིན་འཇའ་ཟེར་ཐིག་ལེའི་སྦུབས། །རིག་པ་རང་གྲོལ་རྡོ་རྗེ་ལུ་གུ་རྒྱུད། །བྱ་རྩོལ་ལས་འདས་ཟང་ཐལ་འོད་ཀྱི་ལུས། །ཐོག་མའི་མགོན་པོ་ཁྱོད་ལ་ཕྱག་འཚལ་བསྟོད། །མདོར་ན་སངས་རྒྱས་
ཀུན་གྱི་གསང་བའི་མཛོད། །བྱིན་རླབས་དངོས་གྲུབ་ཕྲིན་ལས་ཡོངས་ཀྱི་གཏེར། །རིགས་ཀུན་ཁྱབ་བདག་པདྨ་བཛྲ་གྱི། །དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་བསྟོད། །མདོ་རྒྱུད་ཡང་སྙིང་ཐེག་དགུའི་དོན་གྱི་བཅུད། །མཐོང་ཐོས་དྲན་རེག་མཆོག་གི་དངོས་གྲུབ་སྩོལ། །མཁའ་འགྲོའི་སྙིང་ཁྲག་རྩ་གསུམ་དགོངས་འདུས་ཀྱི། །ལུང་དང་རྟོགས་པའི་ཆོས་ལ་ཕྱག་འཚལ་བསྟོད། །སྨོན་ལམ་དབང་གིས་རྡོ་རྗེའི་རྒྱ་བཀྲོལ་ཞིང་། །གཞུང་བཞིན་སྤྱོད་པས་ཉིད་སྤྲུལ་ལུང་བསྟན་བརྙེས། །སྲིད་མཐའི་བར་དུ་རྒྱལ་བའི་མཛད་པ་ཅན། །རྩ་བརྒྱུད་བླ་མ་རྣམས་ལ་ཕྱག་འཚལ་བསྟོད། །གནས་ཡུལ་དཔའ་བོ་ཌཱ་ཀི་དམ་ཅན་ཚོགས། །འདོད་དགུར་བསྒྱུར་བའི་ཆོ་འཕྲུལ་མཐའ་ཀླས་པས། །དམ་ལྡན་རྣལ་འབྱོར་ཕོ་མོའི་གྲོགས་མཛད་ཅིང་། །ས་ལམ་བར་ཆད་སེལ་ལ་ཕྱག་འཚལ་བསྟོད། ཧྲཱིཿ །བླ་མ་ཡི་དམ་མཁའ་འགྲོའི་ཚོགས་བཅས་ལ། །བདག་ལུས་ཞིང་གི་རྡུལ་སྙེད་སྤྲུལ་པ་ཡིས། །མཁའ་ཁྱབ་སེམས་ཅན་བསམ་འོག་བཅུག་ནས་ནི། །སྒོ་གསུམ་རབ་གུས་གདུང་བས་ཕྱག་བགྱིའོ། །ཀུན་བཟང་མཆོད་སྤྲིན་བསམ་མི་ཁྱབ་པས་མཆོད། །དུག་གསུམ་མི་དགེའི་རིགས་གྱུར་མཐོལ་ལོ་བཤགས། །དེ་བཞིན་དགེ་བར་གྱུར་ལ་རྗེས་ཡི་རང་། །ཟབ་གསང་ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་རྡོ་རྗེའི་སྐུར་བཞུགས་གསོལ། །དགེ་རྩ་བྱང་ཆུབ་ཆེེན་པོར་བསྔོ་བར་བགྱི། །ཇི་ལྟར་རྒྱལ་རྣམས་བསགས་སྦྱངས་ཕུན་
ཚོགས་པ། །དེ་ལྟར་བྱང་ཆུབ་སྤྱོད་པ་ཡོངས་རྫོགས་ཤོག །བདག་གི་དུས་གསུམ་དགེ་བ་ཇི་སྙེད་པ། །རིགས་དྲུག་འགྲོ་བའི་ལས་ངན་ཟད་ནས་ཀྱང་། །བསླུ་མེད་བྱང་ཆུབ་སྤྱོད་ལ་འཇུག་པ་དང་། །མྱུར་དུ་ཟུང་འཇུག་གོ་འཕང་ཐོབ་ཕྱིར་བསྔོ། །མ་སྐྱེས་སེམས་ཀྱི་རང་བཞིན་ནམ་མཁའ་ལྟར། །བྱ་བྱེད་ལས་དང་འཁོར་གསུམ་མི་དམིགས་པར། །སྒྱུ་མ་ཙམ་དུ་བསྔོས་ཤིང་སྨོན་པ་ཡིས། །རྣམ་དག་འབྲས་བུ་ཡོངས་སུ་འགྲུབ་པར་ཤོག །རྒྱལ་བ་ཀུན་དངོས་པདྨ་སཾ་བྷ་བས། །ཚེ་རབས་ཀུན་ཏུ་ཡོངས་འཛིན་མཛད་གྱུར་ཅིག །འོད་གསལ་རྡོ་རྗེ་ཐེག་པའི་སྣོད་གྱུར་ནས། །མཆོག་ཐུན་དངོས་གྲུབ་སྐད་ཅིག་ཐོབ་པར་ཤོག །དལ་འབྱོར་ཐོབ་པ་དོན་མེད་མ་གྱུར་ཅིང་། །དཀོན་མཆོག་འབྱུང་བ་མི་མཉེས་མི་བགྱིད་པར། །ནམ་མཁའི་མཐའ་ཀླས་འགྲོ་བ་མ་ལུས་པ། །རྒྱལ་བས་བསྔགས་པའི་ལམ་བཟང་ལ་འཇུག་ཤོག །མི་རྟག་སྙིང་ལ་གཟེར་བས་ཞེན་ལོག་དང་། །ངེས་འབྱུང་དྲག་པོས་ཤེས་རྒྱུད་ཆོས་དང་འདྲེས། །སྡོམ་དང་དམ་ཚིག་རྒྱུ་འབྲས་སྤང་བླང་ནི། །སྲོག་ལྟར་བཙའ་བའི་བརྟུལ་ཞུགས་ཐོབ་གྱུར་ཅིག །བདེ་བའི་འབྱུང་གནས་ཀུན་རྫོབ་དོན་དམ་གྱི། །བྱང་ཆུབ་སེམས་མཆོག་སྐྱེས་བརྟན་གོང་དུ་འཕེལ། །བགྲོད་པ་གཅིག་པའི་ལམ་བཟང་རྨད་བྱུང་བ། །དག་སྣང་མོས་གུས་ཕྱོགས་མེད་འབྱོང་བར་ཤོག །སྒོ་གསུམ་སྒྲིབ་པ་དབང་བཞིའི་ཆུ་བོས་བཀྲུས། །པདྨ་བཛྲ་རྩལ་གྱི་གསང་གསུམ་དང་། །རོ་མཉམ་རྡོ་རྗེའི་རྣལ་འབྱོར་མཐར་
ཕྱིན་ནས། །གྲུབ་པའི་རིག་འཛིན་ཆེན་པོར་བདག་གྱུར་ཅིག །གསལ་བརྟན་ཚད་བརྒྱད་ལྷ་སྣང་གྱད་དུ་གྱུར། །ཡན་ལག་བཞི་ལྡན་རྡོ་རྗེའི་བཟླས་པ་ཐེམས། །ལས་བཞི་གྲུབ་བརྒྱད་རྣམ་པར་སྨིན་པའི་རིག །དབང་བསྒྱུར་མ་ཧཱ་ཡོ་ག་མཐར་ཕྱིན་ཤོག །རྩ་ཡི་མདུད་གྲོལ་རླུང་བཅུ་དབུ་མར་ཐིམས། །དཀར་དམར་ཐིག་ལེའི་ཞུ་བདེ་ཚད་དུ་སྨིན། །གཉུག་མའི་ཕུང་ཁམས་རྡོ་རྗེའི་སྲོག་གྲུབ་ནས། །ཚེ་དབང་ཨ་ནུའི་རྣལ་འབྱོར་མཐར་ཕྱིན་ཤོག །པད་འབྱུང་བླ་མའི་བྱིན་རླབས་སྙིང་ལ་འཕོས། །རིག་པ་རྗེན་པར་བུད་པས་མཉམ་རྗེས་ཀྱི། །ཐ་སྙད་ལས་འདས་འོད་གསལ་རྫོགས་པ་ཆེ། །ཁྲེགས་ཆོད་ཕྱག་རྒྱའི་རིག་འཛིན་མཐར་ཕྱིན་ཤོག །འཆར་ཚུལ་བརྒྱད་ཀྱི་ཡིན་ལུགས་ངོ་འཕྲོད་ནས། །རང་བཞིན་ཤིན་ཏུ་སྟོང་དང་སྟོང་ཆེན་ཏེ། །སྣང་མཆེད་ཐོབ་པའི་འོད་གསལ་མངོན་གྱུར་ནས། །ཡེ་ཤེས་གསུམ་སྒྲིབ་རྟོག་ཚོགས་རང་དག་ཤོག །འཁོར་འདས་རུ་ཤན་ཕྱེད་ནས་དགུ་ཕྲུག་གི། བྱ་བ་ཀུན་བཏང་སྣང་བཞིའི་རྩལ་ཆེན་རྫོགས། །ཐོབ་གསུམ་གཟེར་ཐེབ་གདིང་བཞིའི་དྲོད་རྙེད་དེ། །རགས་པ་ཉི་ཤུ་ཟག་མེད་ལུས་འགྲུབ་ཤོག །མངོན་ཤེས་རྗེས་དྲན་དྲུག་པོར་དབང་འབྱོར་ནས། །ཐིམ་ལུགས་བརྒྱད་ཀྱིས་གདོད་མའི་གྲོལ་གཞིར་ཕྱིན། །འཕོ་ཆེན་བུམ་སྐུའི་གཏན་སྲིད་ཚེ་འདིར་ཟིན། །ཨ་ཏི་ལྷུན་གྲུབ་རིག་འཛིན་མཐར་ཕྱིན་ཤོག །ལས་ཀྱི་ལྷག་མས་ཚེ་འདིར་མ་གྲོལ་ཀྱང་། ཀ་དག་དགོངས་པས་འཆི་བ་ཆོས་སྐུར་རྟོགས། །གཞི་སྣང་འོད་གསལ་ཟུང་འཇུག་ཚོམ་བུ་དང་། །
ཡེ་ཤེས་བཞི་སྦྱོར་ལྷུན་གྲུབ་ཆེར་གྲོལ་ཤོག །ཁྱད་པར་གནད་གཅོད་སྡུག་བསྔལ་མི་འབྱུང་ཞིང་། །རྡོར་སེམས་གསང་བའི་ལམ་ནས་རང་རིག་པ། །སྐད་ཅིག་ཉིད་ལ་ཡར་གྱི་ཟང་ཐལ་དུ། །འཆུག་མེད་ཆོས་ཉིད་མ་བུ་འདྲེས་པར་ཤོག །ཇི་ལྟར་དམན་ཀྱང་རླུང་སེམས་ལྷ་ཡི་སྐུ། །བཙན་ཐབས་འཕོ་བས་བདེ་ཆེན་པད་འོད་སོགས། །དག་པའི་ཞིང་དུ་མཁའ་འགྲོའི་སྐྱེལ་བསུ་བཅས། །མཐའ་ཡས་པདྨའི་སྲས་ཀྱི་མཆོག་གྱུར་ཤོག །མི་བསྐྱོད་ཞལ་མཐོང་རིན་འབྱུང་དབང་བསྐུར་ཐོབ། །སྣང་མཐས་ལུང་བསྟན་དོན་གྲུབ་དབུགས་དབྱུང་སྩལ། །མདུན་མཁར་ཁྲོ་བོའི་དཀྱིལ་འཁོར་རང་སྣང་དུ། །ངོ་ཤེས་ཀུན་བཟང་རྒྱལ་ས་ཟིན་པར་ཤོག །དེ་སྲིད་ལྷ་འདྲེ་མི་གསུམ་བར་ཆད་ཀྱིས། །མི་ཚུགས་བསམ་དོན་མཐའ་དག་ཆོས་བཞིན་འགྲུབ། །རྗེ་བཙུན་པདྨའི་ཕྲིན་ལས་སྤེལ་བ་ལ། །ཞུམ་པ་མེད་པའི་བརྟུལ་ཞུགས་བརྙེས་པར་ཤོག །རྒྱལ་བསྟན་སྤྱི་དང་གསང་ཆེན་ཟབ་མོ་ཡི། །བསྟན་དང་བསྟན་འཛིན་དར་རྒྱས་ཡུན་རིང་བརྟན། །ཁྱད་པར་ཨོ་རྒྱན་རྗེ་དང་བི་མ་ལའི། །ཐུགས་ཏིག་བསྟན་པ་དབྱར་མཚོ་ལྟར་འཕེལ་ཤོག །འགྲོ་བ་ཀུན་ཀྱང་དེ་ལ་གུས་ཤིང་འདུན། །གྲོགས་མཛད་དཀར་ཕྱོགས་ཡོངས་ཀྱི་དབུ་འཕང་མཐོ། །འཇིག་རྟེན་ཁམས་སུ་ནད་མུག་འཁྲུགས་རྩོད་ཞི། །བསྟན་པ་ངང་ངམ་ཤུགས་ཀྱིས་རྒྱས་པར་ཤོག །སྐྱབས་གནས་བསླུ་མེད་པདྨ་བཛྲ་ལ། །སྒོ་གསུམ་གུས་པས་བདག་ཉིད་བྲན་ཏུ་
འབུལ། །འཕྲལ་ཡུན་རེ་ལྟོས་གཞན་ཏུ་མ་མཆིས་པས། །ཐུགས་རྗེ་མ་ཆུང་ཉམ་ཐག་འགྲོ་ལ་དགོངས། །བདག་སོགས་དུས་མིན་འཆི་ལས་རབ་རྒྱལ་ཏེ། །རྟག་བརྟན་རྡོ་རྗེའི་ཚེ་དབང་མཆོག་བརྙེས་ཤིང་། །མཐོ་རིས་ཡོན་ཏན་བདུན་གྱི་དཔལ་དང་འབྱོར། །འབད་པ་མེད་པར་ལྷུན་གྱིས་གྲུབ་པར་མཛོད། །རྒྱལ་བསྟན་རྟགས་ཙམ་འཛིན་པའི་མཐའ་ལ་ཐུག །མདོ་སྔགས་གཟུགས་བརྙན་ཙམ་ཡང་མི་གསལ་ཞིང་། །བོད་འབངས་ཡོངས་ཀྱི་བདེ་སྐྱིད་ཟད་པའི་དུས། །སྔོན་གྱི་དམ་བཅའ་མ་བསྙེལ་ཐུགས་རྗེས་གཟིགས། །ཁྱད་པར་ནག་ཕྱོགས་འབྱུང་པོ་ཁ་དར་བས། །ཚེ་ནོར་འདོད་དང་ཐར་ལ་བར་ཆད་ཀྱི། །མུན་པའི་དྲྭ་བར་བྱིན་རླབས་ཉི་ཟླ་ཡི། །འོད་ཟེར་མཚོན་ཆ་ད་ལྟ་ཉིད་དུ་ཕོབ། །སངས་རྒྱས་ཀུན་འདུས་མཚོ་སྐྱེས་རྡོ་རྗེ་མཁྱེན། །བདག་སོགས་འགྲོ་ཀུན་རྗེས་སུ་བཟུང་ནས་ཀྱང་། །རྫུ་འཕྲུལ་ནུས་མཐུ་དཔག་མེད་ཐོབ་པར་མཛོད། །བོད་འབངས་ཡལ་བར་མདོར་བཀའ་དྲིན་ཅན། །མདོར་ན་བདག་སོགས་སྒྲིབ་བྱང་ཚོགས་རྫོགས་ཤིང་། །སྣང་སེམས་དབང་འདུས་འབྲེལ་ཚད་དོན་དང་ལྡན། །འབྱུང་བཞིས་གར་ཁྱབ་སྤྲུལ་པ་སྣ་ཚོགས་ཀྱིས། །འཁོར་བ་དོང་སྤྲུགས་དོན་གཉིས་མཐར་ཕྱིན་ཤོག །འཁོར་འདས་ཀུན་ཀྱང་པདྨ་བཛྲ་དང་། །དབྱེར་མེད་སྐུ་དང་ཡེ་ཤེས་འབྱམས་ཀླས་པས། །རང་སྣང་རིས་མེད་ཐར་པ་ཆེན་པོའི་གྲོང་། །ཐེག་ཆེན་ཆོས་ཀྱི་རྒྱལ་སྲིད་བརྟན་གྱུར་ཅིག །ཅེས་པའང་། །རིགས་
འདུས་བླ་མའི་དཀྱིལ་འཁོར་འདི་ཉིད་ལ་མི་ཕྱེད་པའི་དད་པ་ཅན་རིག་འཛིན་གྱི་བཙུན་པ་ཡོན་ཏན་རྒྱ་མཚོས་ཆུ་སྟག་ལོའི་གྲལ་ཚེས་བཅོ་ལྔ་ཤར་བ་ཅན་གསུམ་ལ་ཐུན་རེ་སྦྱར་བ་དགེ་ལེགས་འཕེལ།། ༈ །།གདོད་མའི་མགོན་པོ་འགྲོ་བའི་དོན་ཏུ་བྱོན། །འོད་གསལ་རྡོ་རྗེ་སྙིང་པོའི་སྟོན་པ་མཆོག །ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་པ། །མི་ཕྱེད་དད་པས་སྙིང་གི་པདྨོར་བསྙེན། །གཞོན་ནུ་བུམ་སྐུའི་དབྱིངས་ལས་ལྷུན་གྲུབ་རྩལ། །སྲིད་དང་ཞི་བའི་ཐིག་ལེར་རང་ཤར་བས། །དུས་བཞིར་གྲོལ་བ་བཞི་ཡི་རྣམ་པར་ཐར། །ཆོས་དབྱིངས་སྲིད་པའི་མཐའ་དང་སྙོམས་པར་ཞུགས། །ཁྱད་པར་གངས་ཅན་གདུལ་བྱ་སྨིན་པ་དང་། །སངས་རྒྱས་ལས་ཀྱང་ངེས་པར་དཀོན་པའི་ལམ། །རྩོལ་མེད་ཨ་ཏིའི་གསང་བ་སྤེལ་བའི་ཕྱིར། །དྲི་མེད་བཤེས་གཉེན་མི་ཡི་ཟོལ་དུ་འཁྲུངས། །མང་དུ་ཐོས་ཤིང་དྲི་མེད་ལུང་གིས་ཕྱུག །སྒྲོ་འདོགས་ཆོད་ཅིང་སྤོབས་པའི་གཏེར་ཁ་བྱེ། །ཚུལ་ཁྲིམས་དྲི་ལྡན་བློ་གྲོས་གཟི་བརྗིད་འབར། །ཀུན་མཁྱེན་གཉིས་པ་གངས་རིའི་ལྗོངས་སུ་བྱུང་། །བློ་ཡི་མཆོག་ནི་ལྷག་པའི་ལྷ་ཡིས་བྱིན། །རྒྱལ་བའི་དགོངས་པ་སྐྱེས་སྦྱངས་སྟོབས་ཀྱིས་རྙེད། །ཆོས་ཉིད་ཟད་སར་སྣང་བཞིའི་ལམ་ནས་གཤེགས། །ཀུན་ཏུ་བཟང་པོའི་མཛད་པའི་གར་མཛད་དོ། །དགོངས་པའི་རྩལ་ཆེན་ཡོངས་སུ་རྫོགས་པ་ལས། །ཀུན་བཟང་དགོངས་ཟབ་ལྷུག་པར་བཀྲོལ་བ་ལ། །ཁྱོད་ཀྱི་རྣམ་དཔྱོད་རླབས་ཆེན་ཇི་འདྲ་བ། །
དེ་འདྲ་འཕགས་བོད་མཁས་པ་སུ་ལའང་མེད། །ཐུན་མོང་གྲུབ་མཐའི་གཡའ་དྲིས་མ་སྦགས་པར། །འོད་གསལ་རྡོ་རྗེ་ཐེག་པ་བཻ་ཌཱུརྱ། །བཤད་སྒྲུབ་རྒྱལ་མཚན་རྩེ་མོར་ལྷོངས་ཕུད་པའི། །དེད་དཔོན་ཁྱོད་ནི་ཨུདུམྦ་ར་འདྲ། །འཇམ་དཔལ་ཡབ་ཡུམ་བསྟི་བའི་ཐུགས་མཚོ་ན། །ཚར་གཅོད་རྗེས་འཛིན་བདག་ཉིད་ཀུན་ཤེས་དང་། །ཡན་ལག་ལྔར་བཅས་རིག་པའི་པད་ཚལ་དུ། །བློ་ལྡན་བུང་བའི་ན་ཆུང་རྩེད་འཇོས་བྲེལ། །རྩོལ་བཅས་ཐེག་པའི་རྐང་འགྲོས་ངལ་དུབ་ལ། །མ་ལྟོས་རྩོལ་མེད་ལྟ་སྒོམ་གཤོགས་རྒྱངས་ཀྱིས། །སྤྱི་རྒྱ་རླབས་ཀྱིས་གཅོད་པའི་མཁའ་ལྡིང་ཞིག །ཡེ་ཤེས་བླ་མའི་ས་མཐར་བདེ་བར་བསྙེགས། །ཀུན་བཟང་དགོངས་པའི་གཏེར་ཆེན་མཚོ་བཞིན་བརྡོལ། །རྡོ་རྗེ་རྩེ་མོའི་གཤེགས་ཤུལ་ཡངས་པར་མཛད། །སྙན་གྲགས་ལྷ་ཡི་རྔ་ཆེན་ཞིང་ཀུན་འགྲོ། །སྐྱེས་བུ་ཉི་མ་སངས་རྒྱས་ཞིང་འདིའི་རྒྱན། །ཁྱོད་ཀྱི་བླ་མ་དགེ་སློང་དཔལ་དང་ལྡན། །ཁྱོད་ནི་རྡོ་རྗེའི་སྒྲ་མཁས་དཔལ་འཛིན་ཏེ། །ཁྱོད་ཀྱི་བརྒྱུད་འཛིན་དགེ་སློང་མ་དཔལ་མོས། །ཐལ་འགྱུར་ལུང་བཞིན་ཨ་ཏིའི་སྣང་བ་བརྡལ། །སོ་སྐྱེའི་མཁས་པ་བློ་ལ་སྐྱོན་ཆགས་པས། །ཁྱོད་ཀྱི་གྲུབ་མཐའ་ཕྱོགས་ལྷུང་ལམ་དུ་འཁྲིད། །བཀའ་དང་དཔེ་དཔང་ཚད་མར་མི་འཛིན་པ། །འདི་དག་མྱུར་དུ་ཚར་བཅད་མི་མཛད་དམ། །མཁས་པའི་བྱ་བས་རྒྱལ་བསྟན་རབ་གསལ་ཞིང་། །གྲུབ་པའི་རྒྱལ་སར་ཁམས་གསུམ་ཡོངས་སྒྲོལ་བ། །ཀུན་ཏུ་བཟང་པོ་དྲི་མེད་འོད་ཟེར་གྱི། །རྣམ་ཐར་བདག་སོགས་འགྲོ་
བས་བརྙེས་གྱུར་ཅིག །ཅེས་པའང་རྗེ་འདི་ཉིད་ཀྱི་བཀའ་གསང་མཛོད་ཆེན་བདུན་དང་། །སྙིང་ཐིག་མ་བུ་སོགས་ལས་འོད་གསལ་རྡོ་རྗེ་ཐེག་པ་ལ་གོ་ཉམས་ཅུང་ཟད་ཤར་བ་བློ་གྲོས་མཐའ་ཡས་ད་རི་དྲཱས་ཀུན་བཟང་བདེ་ཆེན་འོད་གསལ་གླིང་དུ་ཚིགས་སུ་བཅད་དེ་སྨྲས་པའོ།། ༈ །།སྣང་མཛད་སྲུང་བའི་རྡོ་རྗེའི་སྒྱུ་འཕྲུལ་ལས། །གངས་ཅན་བསྟན་འགྲོ་རིང་འཚོའི་དཔྱིད་དཔལ་དུ། །ཡོངས་རྫོགས་བཤེས་གཉེན་དམ་པའི་སྐུར་སྣང་བ། །ལྷ་མིའི་གཙུག་གི་རྒྱན་གཅིག་དེ་ལ་འདུད། །ཤེས་བྱ་རབ་འབྱམས་གནས་ལ་སྤོབས་པའི་གཏེར། །གྲོལ་བས་འཆད་རྩོད་རྩོམ་པའི་པདྨོའི་ཀླུང་། །མཐོ་རིས་ཚལ་མཚུངས་མཚུངས་མེད་འབྱེད་པ་ལ། །བློ་གྲོས་འོད་ཟེར་ཉི་བཞིན་བརྡལ་དེར་འདུད། །འགྲོ་བའི་ཁམས་ལ་ཉེ་དང་རིང་མེད་པར། །ཐུགས་བསྐྱེད་བཟུང་ཡང་ཕྱོགས་སུ་ལྷུང་བ་བཞིན། །འཇམ་པའི་དབྱངས་དེ་ཁྱོད་ཐུགས་སྐྱེད་ཚལ་ན། །གཞོན་ནུའི་རོལ་རྩེད་མཛད་བཞིན་བཞུགས་སམ་སྙམ། །འཆལ་བའི་དྲི་སྤངས་ཚུལ་ཁྲིམས་ཕ་རོལ་དུ། །སོན་ཀྱང་ལུང་རྟོགས་ལང་ཚོའི་གཞོན་ཤ་ནི། །ཤིན་ཏུ་མཛེས་ལ་ཆགས་པའི་མཚོ་ལྡན་མ། །མགྲིན་པའི་འཁོར་ལོར་དལ་གྱིས་ཡིབ་པ་འདྲ། །གང་ཟག་གཞན་ལ་རྨི་ལམ་ཙམ་དུ་ཡང་། །དབུགས་འབྱིན་མི་མཛད་ཐོད་ཕྲེང་རྩལ་ཡབ་ཡུམ། །ཁྱོད་དང་འབྲལ་མི་ཕོད་པར་བྱིན་རློབ་ཅིང་། །ལུང་སྟོན་རྩོལ་བའི་ཐུགས་རྗེ་དེ་ཅི་ཞིག །གཞན་གྱིས་སྨྲས་པའི་རྗེས་སུ་མི་ཟློས་པར། །རང་གི་བློ་གྲོས་སྟོབས་ཀྱིས་གྲུབ་པའི་མཐའི། །ལྟ་
སྒོམ་སྤྱོད་ཚུལ་སྔོན་དང་མི་འགལ་བར། །སྔོན་མེད་ལེགས་བཤད་འབྱིན་དེ་ཁྱད་པར་ཆོས། །བསླབ་གསུམ་གསེར་གྱི་ཀ་བས་བཏེགས་པ་ཡི། །རྣམ་ཐར་ནོར་བུའི་གཞལ་ཡས་ཉམས་དགའ་བར། །དམ་པའི་སྐྱེ་བོ་བྱེ་བ་ངལ་གསོའི་གནས། །རྣམ་རྒྱལ་ཁང་བཟང་གཉིས་པ་ས་འདིར་བྱུང་། །དམ་པའི་སྐྱེ་བོ་བྱེ་བ་ངལ་གསོའི་གནས། །རྣམ་རྒྱལ་ཁང་བཟང་གཉིས་པས་འདིར་བྱུང། །དམ་པའི་རྣམ་ཐར་ལྷ་ཡི་རྔ་བོ་ཆེ། །སྐལ་མེད་ས་སྤྱོད་རྣ་བར་ལྷུང་དཀའ་ཡང་། །དམ་པ་རྣམས་ཀྱི་སྙིང་ལ་བདུད་རྩི་དང་། །རྣ་བའི་བུ་གར་དྲི་ཟའི་གླུ་བཞིན་གྱུར། །ངེས་པར་འབྱུང་བས་དབེན་གསུམ་བདུད་རྩི་གྲུབ། །རྨི་ལམ་དུ་ཡང་ཆོས་བརྒྱད་སྒྲོག་ལས་གྲོལ། །མདོ་སྔགས་ཚུལ་ལ་མི་འཇིགས་སློབས་པ་ཐོབ། །སྙིང་པོའི་ལམ་བཟང་འཁྲུལ་མེད་སྟོན་པར་མཛད། །གཟུང་འཛིན་རྟོག་པའི་སྤྲིན་རིས་ཀུན་ཟོས་པས། །འོད་གསལ་དྷཱུ་ཏིའི་མཁའ་སྔོན་དྭངས་པ་ལ། །སྒྱུ་འཕྲུལ་རྒྱན་གྱི་བཀོད་པའི་དབང་གཞུ་བྲེས། །ཧེ་རུ་ཀ་དཔལ་མཚན་གྱི་ཅོད་པན་དཔྱངས། །གཞན་ལ་སྦས་པ་ཕྱི་དང་ནང་གི་གཏེར། །སྐལ་ལྡན་ལག་པའི་མཐིལ་དུ་འདུག་པ་བཞིན། །ཁྱོད་ལ་གྲུབ་པའི་རྟགས་སུ་ཨོ་རྒྱན་རྗེས། །ཐུན་མོང་མིན་པའི་མནོག་ནོར་ཉིད་དུ་བསྩལ། །ཚིག་སྟོང་སྦུ་བས་བསྙེམས་པའི་མཁས་པ་དང་། །བླུན་སྒོམ་ཡིད་དཔྱོད་ཅན་གྱི་གྲུབ་པ་དང་། །རང་བཟོས་བསླད་པའི་གཏེར་ཆོས་སྨྲིག་རྒྱུའི་ཕྲེང་། །ཁྱོད་ཀྱི་རྣམ་ཐར་འཇམ་ཆར་ཟེགས་མས་བསྙིལ། །བདག་ཀྱང་སྐྱེ་བར་ཁྱོད་འདྲའི་བཤེས་བསྟེན་ཅིང་། །ཁྱོད་དང་རྣམ་ཐར་མཉམ་པ་ཉིད་གྱུར་ནས། །ཕྲིན་ལས་མི་ཟད་
རྒྱན་གྱི་འཁོར་ལོའི་སྤྲིན། །མཁའ་དང་འགྲོ་ཁམས་མཐར་ཐུག་བཀོད་བྱེད་ཤོག །ཅེས་པའང་ཀུན་གཟིགས་སྤྲུལ་པའི་གཏེར་ཆེན་པྲཛྙ་ར་སྨིའི་རྣམ་ཐར་ལ་སྨོན་པ་བློ་གྲོས་མཐའ་ཡས་ཀྱིས་སོ།། ༈ །།སྔ་འགྱུར་བསྟན་པའི་མེ་རོ་གཞི་བཞེངས་སུ། །སློང་ལ་སྨོན་ལམ་མཐུ་གྲུབ་རིག་པ་འཛིན། །པདྨ་གར་དབང་འགྱུར་མེད་རྡོ་རྗེ་རྩལ། །གསང་ཆེན་འཁོར་ལོས་སྒྱུར་ལ་གུས་ཕྱག་འཚལ། །རྡོ་རྗེ་ཆོས་སུ་གྲགས་པའི་རྒྱལ་བའི་སྙན། །དབང་པོའི་སྣོད་དང་མཚམས་པའི་གཟུགས་ཀྱི་གར། །དབུས་འགྱུར་ས་ཡི་ཐིག་ལེར་ཤར་ཙམ་ནས། །གངས་ལྗོངས་མཐའ་དག་སྣང་བས་བྲན་དེར་འདུད། །བཀོད་པའི་རྒྱལ་སོགས་དེ་བཞིན་གཤེགས་རྣམས་ལས། །ཐུགས་བསྐྱེད་མཁའ་མཐར་སོན་པའི་གོ་ཆ་ནི། །རབ་མཁྲེགས་རྡོ་རྗེའི་ཞུབ་ཆེན་ལྟར་བཞེས་ནས། །སངས་རྒྱས་སྟོང་གི་རྣམ་ཐར་བཟླུམས་ལ་འདུད། །རྒྱལ་བའི་གསུང་རབ་འཛིན་ཞིང་སྡུད་པ་དང་། །བོད་ཡུལ་བརྡ་དང་ཡི་གེའི་ལམ་སྲོལ་གཏོང་། །ཆོས་ཀྱི་ཤིང་རྟ་ཐོག་མར་འདྲེན་ལ་སོགས། །སྐབས་དང་འཚམས་པའི་འཕྲུལ་ཆེན་སྒྱུར་ལ་འདུད། །ཆོས་ཀྱི་བང་མཛོད་འཛིན་ལ་བདག་པོའི་གནས། །བརྙེས་ཀྱང་ཆོས་མཆོག་འོད་གསལ་རྡོ་རྗེ་ཐེག །རྩལ་དུ་བཏོན་ནས་ཆོས་ཀྱི་རྒྱལ་མཚན་བསྒྲེངས། །ངེས་གསང་བསྟན་པའི་ཆུ་མགོར་གྱུར་ལ་འདུད། །བཀའ་མའི་བཤད་སྒྲུབ་འགྱེལ་བ་རྨངས་ནས་བསླངས། །ཟབ་གཏེར་སྨིན་གྲོལ་སྐམ་པའི་རྒྱུན་སྲོལ་མཐུད། །སེམས་
ཀློང་མན་ངག་ཉམས་ལེན་བརྒྱུད་སྤེལ་ནས། །ཡོ་ག་རྣམ་གསུམ་སྲོག་རྩ་བཟུང་དེར་འདུད། །ལོ་ཙཱ་ཆེན་པོའི་ཐུགས་བསྐྱེད་ཤིང་རྟ་ཡིས། །གསང་ཆེན་ཉི་མ་གསར་དུ་དྲངས་ཙམ་ནས། །མཁན་སློབ་ཆོས་གསུམ་རྒྱལ་ཚབ་ལྷན་ཅིག་ཏུ། །བོད་ཡུལ་དབུས་སུ་འཇོམས་པར་གྱུར་ལ་འདུད། །རྩོད་བྲལ་རང་གཏེར་ནོར་བུའི་མཆོག་བླངས་ཤིང་། །བསྟན་འགྲོར་སྙིགས་མའི་རྒུད་པ་རིང་དུ་འཕྲོག །ཟོལ་མེད་བརྟུལ་ཞུགས་སྤྱོད་པའི་གར་བརྒྱ་ཡིས། །དོན་ཆེན་མཛད་པ་འབའ་ཞིག་བསྒྲུབས་ལ་འདུད། །ལུང་བསྟན་དུས་བབ་ཨོ་རྒྱན་མཁའ་འགྲོའི་གནས། །གཉིས་པ་སྨིན་གྲོལ་རྒྱུན་བཟང་ཐུབ་བསྟན་མཐར། །མཉམ་དུ་འབབ་པ་མཁས་གྲུབ་ངང་མོའི་གནས། །གཏིང་དཔག་དཀའ་བའི་མཚོ་གླིང་བསྐྱིལ་ལ་འདུད། །ལུང་ཁུངས་བཙུན་ལ་མན་ངག་ཤིན་ཏུ་ཟབ། །ཕྱག་བཞེས་གཙང་ཞིང་རྣམ་དཔྱོད་ཆེ་ལྡན་པས། །འཕགས་བོད་མཁས་པའི་ལེགས་ཆ་ཕྱོགས་གཅིག་ཏུ། །བསྡུས་པ་ལྟ་བུའི་བཀའ་སྲོལ་བཙུགས་ལ་འདུད། །མཁས་པ་མང་ཡང་གསང་དོན་ཕིག་པ་ཁྱོད། །གྲུབ་པ་མང་ཡང་ཕྱག་རྗེས་ཐོན་པ་ཁྱོད། །གཏེར་སྟོན་མང་ཡང་བསྟན་ལ་ཕན་པ་ཁྱོད། །གཟུར་གནས་བློ་ངོར་ཁྱོད་ནི་ཟླ་ལྟར་བསིལ། །སྙིགས་མའི་སྐྱེ་བོའི་བློ་མུན་སྟུག་དྲག་པས། །ཁྱོད་ཀྱི་བསྟན་པའང་ཧ་ཅང་མི་གསལ་བས། །མཁྱེན་བརྩེ་ནུས་པའི་གདིང་ཚད་རྩལ་སྤྲུགས་ལ། །ཕྲིན་ལས་ཉི་མ་བྱེ་བའི་རླབས་འབར་མཛོད། །བདག་ཀྱང་ཁྱེད་དང་དབྱེར་མེད་
གཅིག་གྱུར་ནས། །དོན་གཉིས་ལྷུན་གྱིས་གྲུབ་པས་གནས་སྐབས་དང་། །མཐར་ཐུག་བདེ་ལེགས་སྣང་བ་འོད་པོ་ཆེ། །མི་ནུབ་སྲིད་ཞིའི་ཁམས་ཀུན་བརྡལ་གྱུར་ཅིག །ཅེས་པའང་པདྨ་གར་དབང་ཕྲིན་ལས་འགྲོ་འདུལ་རྩལ་གྱིས་སྨྲས་པ་སྟེ། །ཐུགས་རྗེའི་གོ་སྐབས་ལ་འགགས་པས་སྨོན་ལམ་གྱི་མཐུ་ལས་བྱིན་རླབས་ཆ་ཙམ་འཇུག་པའང་སྲིད་པའི་ཕྱིར་དང་། །ངོ་མཚར་བའི་མཛད་པ་ལ་སྙིང་ནས་གུས་པ་ཆེན་པོ་ལྷན་སྐྱེས་སུ་མཆིས་པས་སོ།། ༈ །།འཇིག་རྟེན་དབང་ཕྱུག་བཤེས་གཉེན་ཚུལ་བསྟན་པ། །ཐུགས་རྗེའི་རང་གཟུགས་སྙིགས་དུས་འགྲོ་བའི་མགོན། །མཁྱེན་བརྩེ་ནུས་པའི་ཕུང་པོ་བླ་ན་མེད། །ཀརྨ་ཆགས་མེད་ཞབས་ལ་གུས་ཕྱག་འཚལ། །སྔོན་རབས་སྐྱེ་བའི་ཕྲེང་བ་དུ་མ་རུ། །ཚོགས་གཉིས་གོམས་ཤིང་སྨོན་ལམ་རྒྱུན་དག་པས། །བསྟན་ལ་ཞུགས་ནས་གྲུབ་པའི་སར་གཤེགས་པར། །དགོངས་སྤྱོད་ཆོས་བཞིན་ལྷུན་གྱིས་གྲུབ་ལ་འདུད། །ལྷག་པའི་བསམ་པ་གསེར་ལྟར་ཕུན་སུམ་ཚོགས། །ཀུན་ཏུ་སྤྱོད་པར་ཁ་ན་མ་ཐོ་སྤངས། །སྒྲུབ་པའི་རྒྱལ་མཚན་ཐད་ཀློད་མེད་པར་བཙུགས། །ཕྲིན་ལས་ནམ་མཁའི་མཐའ་དང་མཉམ་ལ་འདུད། །རྩ་བརྒྱུད་བླ་མ་རྣམས་ཀྱིས་བྱིན་རླབས་བསྩལ། །ཡི་དམ་མཁའ་འགྲོའི་ཚོགས་ཀྱིས་ལུང་བསྟན་ཐོབ། །ཆོས་སྐྱོང་དམ་ཅན་རྒྱ་མཚོས་བྲན་བཞིན་ཉན། །བདེན་པ་གྲུབ་ཅིང་མངོན་ཤེས་ལྡན་ལ་འདུད། །གྲགས་ཕྱིར་མ་ཡིན་གཞན་ཕན་འབའ་ཞིག་ཕྱིར། །རྩོལ་མེད་གསུང་
རྣམས་དོན་བཟང་གོ་སླ་ཞིང་། །བྱིན་རླབས་དད་ཆགས་ཚིགས་བཅད་རེ་རེས་ཀྱང་། །འགྲོ་ཕན་གངྒཱའི་རྒྱུན་ལྟར་མཛད་ལ་འདུད། །ཡུལ་དུས་དབང་པོར་འཚམས་བའི་ཆོས་སྟོན་ཅིང་། །གདུལ་བྱ་སྣ་ཚོགས་འདུལ་བའི་ཐབས་མཁས་ཅན། །འབྲེལ་ཚད་བདེ་ཆེན་ཞིང་དུ་སྐྱིལ་བ་ལ། །སྔ་ན་མེད་པའི་ལམ་མཁན་གྱུར་ལ་འདུད། །རྒྱལ་བའི་མྱུ་གུ་ཀུན་གྱི་སྙིང་རྗེའི་གར། །ཞིང་འདིར་ཀརྨ་ཆགས་མེད་མཚན་གྱི་དབྱངས། །དཔྱིད་ཀྱི་སྐྱེ་བོར་དུས་ཀྱི་ཁུ་བྱུག་བཞིན། །ཐོས་པ་ཙམ་གྱིས་ཀུན་དགའ་སྟེར་ལ་འདུད། །སྙིགས་མའི་སྐྱེ་བོ་བློ་གྲོས་སྣོད་ཆུང་ཞིང་། །འདོད་པའི་དྲྭ་བ་རབ་ཏུ་འཛིངས་པ་ལ། །སོ་སོར་འཚམས་པའི་ཆོས་སྒོ་སྣ་ཚོགས་པས། །རེ་སྐོང་ཡིད་བཞིན་དབང་གི་རྒྱལ་པོར་འདུད། །རྣམ་དག་མཛད་པའི་ཆ་ཤས་ཕྲ་མོས་ཀྱང་། །འཕྲལ་དང་ཡུན་གྱི་ཕན་བདེ་སྟེར་བ་ལ། །ནོར་བུ་བུམ་བཟང་དཔག་བསམ་ཤིང་གིས་ཀྱང་། །མི་བསྐྲུན་དབྱིག་གི་སྙིང་པོ་དེ་ལ་འདུད། །ཀཾ་ཚང་བསྟན་པའི་ཆུ་རྒྱུན་རིང་དུ་བསྲིངས། །ཟབ་གཏེར་ཆོས་ཀྱི་ནུས་བྱིན་རྣོ་སོ་ཕྱུང་། །གཏོ་དཔྱང་རྣམས་ཀྱང་བྱང་ཆུབ་ལམ་དུ་བསྒྱུར། །ཀུན་ཀྱང་གོ་སླ་འཇུག་བདེར་མཛད་ལ་འདུད། །ཁྱོད་ཀྱི་ངོ་མཚར་ཕྲིན་ལས་རྒྱ་ཆེ་བ། །གང་ཟག་ཕལ་གྱིས་ནམ་ཡང་བསྒྲུན་མེད་པས། །སྤྱན་རས་གཟིགས་དབང་
ཕྲིན་ལས་འབའ་ཞིག་ཕྱིར། །བསམ་མི་ཁྱབ་པའི་རྣམ་ཐར་ལྡན་ལ་འདུད། །མགོན་པོ་ཁྱོད་ལ་སྙིང་ནས་དད་པའི་མཐུས། །བདག་ཀྱང་ཁྱོད་ཀྱི་རྣམ་ཐར་ཀུན་འགྲུབ་ཅིང་། །སྲིད་པ་འདི་ནས་བདེ་བ་ཅན་ཞིང་དུ། །ལམ་སྣ་དྲོང་ཞིང་རྗེས་སུ་འཛིན་གྱུར་ཅིག །ཅེས་པའང་ཀར་རྙིང་ཟུང་འཇུག་གི་དགེ་སྦྱོང་ལྟར་སྣང་བ་ཡོན་ཏན་རྒྱ་མཚོས་སྙིང་ནས་གུས་པས་བྲིས་པ་སིངྡྷི་ྷ་བནྟུ། །དགེ་ལེགས་འཕེལ།། །།