རྗེ་བཙུན་བཞད་པ་རྡོ་རྗེའི་དབང་བསྐུར་བྱིན་རླབས་དང་འབྲེལ་བ་ཡེ་ཤེས་བཅུད་སྦྱིན།
རྗེ་བཙུན་བཞད་པ་རྡོ་རྗེའི་དབང་བསྐུར་བྱིན་རླབས་དང་འབྲེལ་བ་ཡེ་ཤེས་བཅུད་སྦྱིན་ཅེས་བྱ་བ་བཞུགས་སོ། །
རྗེ་བཙུན་རས་པ་ཆེན་པོ་ལ། །སྙིང་ནས་གུས་པས་གསོལ་འདེབས་ན། །གསང་གསུམ་བྱིན་རླབས་བདག་སོགས་ལ། །མྱུར་ཐུགས་རྟོགས་གྲོལ་དུས་མཉམ་མཛོད། །འདིའི་བླ་མའི་རྣལ་འབྱོར་ལ་བརྟེན་ཏེ་བྱིན་རླབས་ཀྱི་རིམ་པས་སྐལ་ལྡན་རྗེས་སུ་འཛིན་པར་འདོད་པའི་རྣལ་འབྱོར་པ་བྱིན་རླབས་ཀྱི་རིམ་པ་ཟམ་མ་ཆད་པར་ཐོབ་པ་དག་གིས། །སྟེགས་བུའི་ཁར་གཙང་ཞིང་དག་པའི་མཎྜལ་ལ་རྡུལ་ཚོན་གྱིས་པདྨ་འདབ་བརྒྱད་བྲིས་པའི་དབུས་མེ་ཏོག་གི་ཚོམ་བུ་གཅིག་འགོད། དེའི་སྟེང་འཕྲུལ་སྟེགས་ལ་རྗེ་བཙུན་ཆེན་པོའི་སྐུ་བརྙན་བྲིས་འབུར་གང་རུང་བཞུགས་པའི་གཡས་ཕྱོགས་སུ་བུམ་པ་བཅུད་ལྡན་ཁ་རྒྱན་མགུལ་ཆིངས་དང་བཅས་པ། གཡོན་ཕྱོགས་སུ་ཐོད་ཆང་བདུད་རྩི་རིལ་བུ་སྦྱར་བ་དང་རིག་མའི་ཙཀླི། མཐའ་སྐོར་དུ་མཆོད་པའི་ཡོ་བྱད་དང་ཚོགས་རྫས་སོགས་བཀོད། །སློབ་དཔོན་གྱི་མདུན་ཏུ་ནང་མཆོད་འཐོར་ནས། ལས་བུམ། སྔོན་གཏོར་སོགས་མཁོ་བའི་ཆས་རྣམས་འདུ་བྱས་ལ་བླ་མའི་རྣལ་འབྱོར་ཡེ་ཤེས་
དཔལ་འབར་ལྟར་ནང་མཆོད་བྱིན་རླབས་དང་འབྱུང་གཏོར་བཏང་ལ། སྐྱབས་སེམས་ཡན་ལག་བདུན་པ་སྔོན་ཏུ་འགྲོ་བས་བདག་བསྐྱེད་རྡོ་རྗེ་ཕག་མོའི་བསྒོམ་བཟླས་ཅི་འགྲུབ། དེ་ནས་མཆོད་པ་བྱིན་རླབས་མདུན་རྟེན་བསྐྱེད་པ་ནས་གསོལ་འདེབས་མཇུག་གི། སརྦ་སིངྡྷི་ཧཱུྃ་ཡན་གྲུབ་ནས། རྣམ་བུམ་དང་ཐོད་པའི་རྫས་ལ་དམིགས་ཏེ། ཨོཾ་ཨཱཿཧཱུྃ་སྭཱ་ཧཱ། ཞེས་ལན་ཅི་འགྲུབ་དང་། །ལས་བུམ་འཁྱིལ་བའི་སྔགས་ཀྱིས་བྱིན་བརླབ། ལོག་ནས་ཇི་ལྟར་འབྱུང་བའི་དབང་རྣམས་བདག་འཇུག་གི་ཚུལ་དུ་རང་གིས་རྫོགས་པར་བླང་། དེ་ནས་དད་གུས་དང་ལྡན་པའི་སློབ་མ་རྣམས་ཕྱི་རོལ་དུ་ཁྲུས་བྱས། སྔོན་གཏོར་བཏང་བ་དང་མཚམས་བཅད་སྲུང་འཁོང་གཞུང་ལྟར་བྱ། ནང་དུ་འཁོད་ནས་མེ་ཏོག་བཀྱེ་བསྡུ་གྲུབ་པ་དང་། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་ཏུ་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་མྱུར་དུ་ཐོབ་པར་བྱ། །དེའི་ཆེད་དུ་
རྗེ་བཙུན་རྣལ་འབྱོར་གྱི་དབང་ཕྱུག་མི་ལ་བཞད་པ་རྡོ་རྗེའི་དབང་དང་བྱིན་རླབས་ཀྱི་རིམ་པ་ཞུ་སྙམ་པའི་སེམས་བསྐྱེད་པ་གསལ་བཏབ་ནས་གསན་འཚལ། དེའང་སྡུད་པ་ལས། སངས་རྒྱས་ཆོས་རྣམས་དགེ་བའི་བཤེས་ལ་བརྟེན་ཏོ་ཞེས། གཡོན་ཏན་ཀུན་གྱི་མཆོག་མངའ་རྒྱལ་བ་དེ་སྐད་གསུངས། ཞེས་དང་། རྒྱུད་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམ། །དེ་མཉེས་པས་ནི་ཀུན་མཁྱེན་གྱི། །གོ་འཕང་ཚེ་འདིར་ཐོབ་པར་འགྱུར། ཅེས་མདོ་ལུགས་སུ་དགེ་བའི་བཤེས་གཉེན་ལ་སངས་རྒྱས་ཀྱི་ཆོས་ཐམས་ཅད་བསྟེན་ཅིང་རྫོགས་པར་གསུངས་པ་དང་། སྔགས་སུ་རིགས་དང་དཀྱིལ་འཁོར་ཐམས་ཅད་ཀྱི་བྱ་བ་བདག་ཡིན་པའི་ཕྱིར་བླ་མ་སྒྲུབ་ཅིང་མཆོད་པ་ནི་ལམ་ཐམས་ཅད་ཀྱི་སྙིང་པོར་གྱུར་པ་ཡིན་པས་འཕགས་བོད་རྣལ་འབྱོར་གྱི་དབང་ཕྱུག་མ་ལུས་པ་ཐམས་ཅད་ལམ་ཟབ་མོ་འདི་ཁོ་ན་ལ་བརྟེན་ནས་གྲུབ་པའི་གོ་འཕང་མཐོན་པོར་བདེ་བླག་ཏུ་གཤེགས་པ་ཤ་སྟག་ཡིན་ལ། བླ་མ་ཚད་མར་གྱུར་པ་འཕགས་བོད་ཀྱི་ལྗོངས་སུ་ཇི་སྙེད་ཅིག་བྱོན་པའི་ནང་ནས་རྗེ་བཙུན་ཆེན་པོ་མེ་ལ་རས་པ་ནི། ཐོག་མར་བླ་མ་བསྟེན་པའི་མོས་གུས་དང་དཀའ་སྤྱད། བར་དུ་སྒྲུབ་པ་ཉམས་ལེན་གྱི་བརྩོན་འགྲུས་དང་དཀའ་ཐུབ། མཐར་གྲུབ་པ་ཆེན་པོ་མངོན་ཏུ་གྱུར་ཏེ་རྡོ་
རྗེ་ཐེག་པའི་ལས་ནས་སྐུ་ཚེ་གཅིག་གིས་མཆོག་གི་དངོས་གྲུབ་སྒྲ་ཇི་བཞིན་ཏུ་བརྙེས་པའི་ཚུལ་ལ་གངས་ཅན་གྱི་ལྗོངས་ན་སུས་ཀྱང་འགྲན་ཟླ་དང་བྲལ་བས། འཕགས་ཡུལ་གྱི་པ་ཆེན་ནཱ་རོ་པ་ལྟ་བུས་ཀྱང་ཉི་མ་དང་ཟླ་བ་ལྟར་བསྔགས་ཤིང་ཕྱག་གིས་བཏུད་པ་དང་། གྲུབ་ཆེན་དམ་པ་སངས་རྒྱས་སོགས་ཀྱིས་ཀྱང་རྩོད་མེད་ཀྱི་གྲུབ་ཐོབ་ཏུ་བསྔགས་པས་མཚོན་ཛ་མྦུའི་གླིང་ན་ཡོངས་སུ་གྲགས་ཤིང་བཀའ་བརྒྱུད་གྲུབ་ཐོབ་ས་ཆེན་པོའི་རྡུལ་ལྟ་བུ་དུས་གསུམ་དུ་གཤེགས་པ་ཐམས་ཅད་ཀྱི་འབྱུང་ཁུངས་སུ་གྱུར་པ་དང་། ཉིད་ཀྱི་ཞལ་ནས། ཁོ་བོའི་མིང་ཐོས་པ་དང་། ཁོ་བོའི་ཕྱོགས་ལ་རེག་པ་ཐམས་ཅད་སྐྱེ་བ་བདུན་བརྒྱུད་དུ་ངན་སོང་དུ་མི་འགྲོ་ཞེས་དང་། ཁྱེད་རང་རྣམས་ཀྱིས་གང་མོས་སུ་གསོལ་བ་ཐོབ་དང་། གསོལ་བ་འདེབས་པ་དེའི་མདུན་ན་ང་ཡོད་ཅིང་། གང་འདོད་པའི་དོན་སྩལ་བ་ཡིན་པས་གསོལ་བ་ཞེ་ཐག་པ་ནས་ཐོབ་ཅིག་སོགས་མི་འཇིགས་པ་སྦྱིན་པའི་རྡོ་རྗེའི་བཀའ་ཡང་ནས་ཡང་དུ་སྩལ་བ་མ་ཟད། ད་ལྟ་ཟུང་འཇུག་ཡེ་ཤེས་ཆེན་པོའི་སྐུ་ནམ་མཁའི་རང་བཞིན་བརྟན་གཡོ་ཀུན་ཁྱབ་ཏུ་བཞུགས་པས་གསོལ་བ་འདེབས་པ་པོའི་རྒྱུད་ལ་རྡོ་རྗེའི་ཡེ་ཤེས་སྩོལ་མེད་དུ་སྐྱེད་པར་ངེས་པ་ཡིན་པས། དེ་ལྟ་བུའི་གྲུབ་པའི་འཁོར་ལོས་སྒྱུར་བ་ཆེན་པོའི་དབང་བསྐུར་བྱིན་རླབས་ཀྱི་རིམ་
པ་ཟབ་མོ་བསྒྲུབ་པར་བགྱི་བ་ལ་སློབ་དཔོན་གྱི་བྱ་བ་རྣམས་གྲུབ་ཟིན། སློབ་མའི་བྱ་བ་ལ་ཐོག་མར་མཎྜལ་འབུལ་བར་ཞུ། ཞེས་མཚམས་སྦྱར་ནས་མཎྜལ་འབུལ་གཞུག །དེ་ནས་ཀྲིང་རྩེ་གཅིག་པས་དམིགས་པ་འདི་བཞིན་ཏུ་མཛོད། མདུན་གྱི་མཎྜལ་འདི་ཉིད་མངོན་པར་དགའ་བའི་ཞིང་གི་བཀོད་པ་ལྟ་བུ་དག་པ་ཡེ་ཤེས་ཀྱི་རང་བཞིན་རྒྱ་ཁྱོན་ཚད་མེད་པ་ངོ་མཚར་གྱི་བཀོད་པ་འབྱམས་སུ་ཀླས་ཤིང་རང་སྣང་མཆོད་པའི་སྤྲིན་ཕུང་མཐའ་ཡས་པས་བརྒྱན་པའི་དབུས་སུ་སེང་ཁྲི་པདྨ་ཉི་ཟླའི་སྟེང་དུ། ངོ་བོ་དུས་གསུམ་སངས་རྒྱས་ཐམས་ཅད་ཀྱི་ཡེ་ཤེས་རང་གཟུགས་རྩ་བའི་བླ་མ་དང་དབྱེར་མེད་པ་རྗེ་བཙུན་བཞད་པ་རྡོ་རྗེ་ཉིད། །རྣམ་པ་རིགས་ཐམས་ཅད་ཀྱི་ཁྱབ་བདག་དྲུག་པ་རྡོ་རྗེ་འཆང་ཆེན་པོ་ཨིནྡྲ་ནཱི་ལའི་ལྷུན་པོ་ལྟར་མཐིང་སྔོན་འོད་ཟེར་འབར་བ། ཤིན་ཏུ་ཞི་ལ་སྒེག་ཅིང་འཛུམ་པའི་ཉམས་ཅན་མཚན་དང་དཔེ་བྱད་གསལ་ལ་རྫོགས་པ། ཕྱག་གཉིས་ཀྱིས་རྡོ་རྗེ་དང་དྲིལ་བུ་ཐུགས་ཀར་བསྣོལ་ཐབས་སུ་འཛིན་ཅིང་རང་སྣང་ཤེས་རབ་མཆོག་གི་བདེ་བར་སྤྱོད་པ། །དར་དང་རིན་པོ་ཆེའི་རྒྱན་གྱིས་སྤྲས་ཤིང་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། །དྲན་པ་ཙམ་གྱིས་བདེ་བ་ཆེན་པོའི་ཡེ་ཤེས་སྐྱེད་པར་ནུས་པའི་བདག་ཉིད་རྩ་གསུམ་རྒྱ་མཚོའི་སྤྱི་གཟུགས་སུ་བཞུགས་པའི་སྤྱན་སྔར་རང་རང་གི་ལུས་ལོངས་
སྤྱོད་དུས་གསུམ་དགེ་ཚོགས་དང་བཅས་པ་སྣོད་བཅུད་རྟེན་དང་བརྟེན་པར་ཕྱི་ནང་གསང་བའི་མཆོད་སྤྲིན་གྱིས་བཀང་བའི་ཚུལ་དུ་འབུལ་བའི་མོས་པས་ཞིང་ཁམས་འབུལ་བར་ཞུ། །ཨོཾ་ཨཱཿཧཱུྃ། གླིང་བཞིའི་འཇིག་རྟེན་སོགས་གཞུང་ལྟར་ཕྱི་ནང་གསང་བའི་མཎྜལ་འབུལ། དེ་ནས་ཁྱེད་རང་རྣམས་ཀྱི་ལུས་ཞིང་རྡུལ་གྱི་གྲངས་དང་མཉམ་པར་སྤྲུལ་ཏེ་བླ་མའི་ཞབས་ཀྱི་པདྨོར་སྤྱི་བོས་གཏུགས་ཏེ་གུས་པས་ཕྱག་འཚལ་བའི་མོས་པས་ཐལ་མོ་སྦྱར་ཏེ་འདིའི་རྗེས་ཟློས་མཛོད། །གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །ལན་གསུམ། དེ་ལྟར་ཕྱག་བྱས་ཏེ་དད་མོས་གདུང་ཤུགས་དྲག་པོས་གསོལ་བ་བཏབ་པའི་རྐྱེན་གྱིས་བླ་མ་རྡོ་རྗེ་འཆང་ཆེན་པོས་རིན་པོ་ཆེའི་བུམ་པ་ཡེ་ཤེས་ཀྱི་བདུད་རྩིས་གང་བ་བསྣམས་ཏེ་ཁྱེད་རང་རྣམས་ཀྱི་སྤྱི་བོ་ནས་མངོན་པར་དབང་བསྐུར་བའི་མོས་པ་མཛོད། །ཞེས་བུམ་པ་སྤྱི་བོར་བཞག་ལ། །དབང་བསྐུར་རྡོ་རྗེ་ཆེན་པོ་ནི། ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཇི་ལྟར་བལྟམས་པ་སོགས་དང་། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡེ་ཤྲཱི་ཧཱུྃ། ཞེས་དབང་བསྐུར་ཞིང་བུམ་ཆུ་སྦྱིན།
དེ་ལྟར་དབང་བསྐུར་བས་བདུད་རྩིའི་ཆུ་རྒྱུན་གྱིས་ལུས་ཐམས་ཅད་གང་། །དྲི་མ་བག་ཆགས་དང་བཅས་པ་དག་ནས་ཁྱེད་རང་ཡང་རྡོ་རྗེ་འཆང་ཆེན་པོའི་སྐུ་སྣང་སྟོང་སྒྱུ་མའི་ཚུལ་ཅན་ཏུ་ལམ་སྟེ་གྱུར་པར་མོས་མཛོད། །དེས་བུམ་པའི་དབང་ཐོབ། ལུས་ཀྱི་དྲི་མ་དག །ལམ་བསྐྱེད་རིམ་བསྒོམ་པ་ལ་དབང་། འབྲས་བུ་སྐུ་རྡོ་རྗེ་སྤྲུལ་པའི་སྐུ་ཐོབ་པའི་ནུས་པ་ཁྱད་པར་ཅན་བཞག་པ་ཡིན་ནོ། །བླ་མ་རྡོ་རྗེ་འཆང་རང་སྣང་གི་ཡུམ་རྡོ་རྗེ་སྙེམས་མ་དང་མཉམ་པར་སྦྱོར་བའི་དགའ་བའི་སྒྲ་དང་བདེ་བའི་འོད་ཟེར་གྱིས་ཕྱོགས་བཅུའི་སངས་རྒྱས་རྣམས་སྤྱན་དྲངས་ཏེ་ཞལ་དུ་ཞུགས། རྗེས་སུ་ཆགས་པས་ཞུ་ནས་དཀར་དམར་བྱང་སེམས་བདུད་རྩིའི་རང་བཞིན་ཏུ་མཁའ་གསང་ལས་བབས། ཐོད་པའི་བདུད་རྩི་དང་རོ་གཅིག་ཏུ་འདྲེས་པ་དེ་ལྗགས་ཐོག་ཏུ་སྦྱིན་པར་མོས་མཛོད། །ཐོད་པའི་བདུད་རྩི་ཁྱོར་བ་གཡོན་པར་སྦྱིན་ལ། །ཇི་ལྟར་འདས་པའི་སངས་རྒྱས་ཀྱིས། །བྱང་ཆུབ་སྲས་རྣམས་དབང་བསྐུར་ལྟར། །དེ་བཞིན་བྱང་ཆུབ་སེམས་རྒྱུན་གྱིས། །དེ་རིང་ཁྱོད་ལ་དབང་བསྐུར་རོ། །ཨོཾ་ཨཱཿཧཱུྃ། ཞེས་བརྗོད། སློབ་མས། ཨ་ཧོ་མ་ཧཱ་སུ་ཁཾ། ཞེས་བརྗོད་ཅིང་མྱང་། བྱང་ཆུབ་ཀྱི་སེམས་མགྲིན་པའི་ལམ་བརྒྱུད། རྩ་གནས་ཐམས་ཅད་དུ་ཁྱབ་ཅིང་སོན་པས་བདེ་བ་ཆེན་པོ་བརྗོད་བྲལ་གྱི་ཡེ་ཤེས་ཉམས་སུ་མྱང་བར་མོས་ཤིག །
དེས་གསང་བའི་དབང་ཐོབ། ངག་གི་དྲི་མ་དག། ལམ་རང་ལུས་ཐབས་ལྡན་བསྒོམ་བ་ལ་དབང་། འབྲས་བུ་གསུང་རྡོ་རྗེ་ལོངས་སྐུ་འགྲུབ་པའི་ནུས་པ་ཁྱད་པར་ཅན་བཞག་པ་ཡིན་ནོ། །བླ་མའི་ཐུགས་ཀ་ནས་ཡེ་ཤེས་ཀྱི་རིག་མ་གཟུགས་དང་ལང་ཚོ་ཕུན་སུམ་ཚོགས་པ་ཞིག་བྱུང་ནས་ཁྱེད་རང་རྣམས་ལ་ཕྱག་རྒྱའི་དངོས་གྲུབ་ཀྱི་དོན་ཏུ་གཏད་པར་མོས་ཤིག །རིག་མའི་ཙཀྲི་གཏད་ལ། །དགའ་སྟེར་གནས་སྟེར་ལྷ་མོ་ནི། །སྣ་ཚོགས་གཟུགས་ཅན་ཡིད་འོང་མ། །ཁྱེར་ཅིག་ཁྱེར་ཅིག་སེམས་དཔའ་ཆེ། །ཁྱེར་ལ་མཆོད་པ་རྟག་ཏུ་གྱིས། ཁྱེད་རང་རྡོ་རྗེ་འཆང་ཆེན་པོར་གསལ་བ་ལ་ད་ལྟར་གཏད་པའི་རིག་མ་དེ་ཉིད་ཡུམ་རྡོ་རྗེ་སྙེམས་མའི་ངོ་བོར་གནས་པའི་གནས་གསུམ་འབྲུ་གསུམ་དང་མཁའ་གསང་རྡོ་རྗེ་དང་པདྨར་གསལ་བས། མཆོག་ཏུ་མི་འགྱུར་བའི་བདེ་བ་ཆེན་པོ་ལ་སེམས་ཅན་ཐམས་ཅད་བསྒྲལ་བར་འདོད་པའི་འདུ་ཤེས་དང་རྗེས་སུ་ཆགས་པའི་སྦྱོར་བས་སྙོམས་པར་ཞུགས་པས། བྱང་སེམས་གནས་བཞིར་ཡས་ནས་བབ་པ་དང་། སླར་ལྡོག་པའི་རིམ་པས་མས་བརྟན་པའི་དགའ་བཞི་ཉམས་སུ་མྱང་བར་མོས་ལ་བདེ་སྟོང་དབྱེར་མེད་པའི་རང་ངོ་ལ་མཉམ་པར་ཞོག་མཛོད། དེས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་དག །ལམ་གཞན་ལུས་ཕོ་ཉ་བསྟེན་པ་
ལ་དབང་། འབྲས་བུ་ཐུགས་རྡོ་རྗེ་ཆོས་སྐུ་འགྲུབ་པའི་ནུས་པ་ཁྱད་པར་ཅན་བཞག་པར་མོས་མཛོད། དེ་ནས་ཁྱེད་རང་རྣམས་ལུས་གནད་ལྟ་སྟངས་ག་ལོ་བ་མེད་པའི་ངང་། དབང་གསུམ་པའི་སྐབས་སུ་ཉམས་སུ་མྱོང་བའི་དཔེའི་ཡེ་ཤེས་དེས་མཚོན་ནས་དོན་གྱི་གནས་ལུགས་རིག་པའི་ངོ་བོ་རང་བཞིན་གྱིས་འདུས་མ་བྱས་པ་འཁོར་འདས་ཐམས་ཅད་ཀྱི་སྲོག་ཏུ་གནས་པ་དེ་རང་ངོ་ཚུལ་བཞིན་ཏུ་ཤས་པའི་སྐད་ཅིག་ལ་གློ་བུར་བག་ཆགས་ཀྱི་དྲི་མ་སངས་ནས་བྲལ་འབྲས་ཆོས་སྐུ་མངོན་ཏུ་བྱེད་པ་ཡིན་པས། སངས་རྒྱས་ཐམས་ཅད་ཀྱི་ཆོས་སྐུ་རང་རིག་གཅེར་མཐོང་དུ་ངོ་སྤྲད་པ་རྡོ་རྗེའི་ཚིག་འདིའི་དོན་ལ་མཉམ་པར་འཇོག་པར་ཞུ། ཡེ་ཤེས་འདི་ནི་ཆེས་ཕྲ་ཞིང་། །རྡོ་རྗེ་ནམ་མཁའི་དཀྱིལ་ལྟ་བུ། །རྡུལ་བྲལ་མཐར་ཕྱིན་ཞི་བ་ཉིད། །ཁྱོད་ཀྱི་ཕ་ནི་ཁྱོད་ཉིད་དོ། །ཞེས་དར་ཅིག་མཉམ་པར་བཞག །དེས་དབང་བཞི་པ་ཐོབ། །སྒོ་གསུམ་ཆ་སྙོམས་ཀྱི་དྲི་མ་བག་ཆགས་དང་བཅས་པ་དག །ལམ་ཕྱག་རྒྱ་ཆེན་པོ་བསྒོམ་པ་ལ་དབང་། འབྲས་བུ་ཡེ་ཤེས་རྡོ་རྗེ་ངོ་བོ་ཉིད་སྐུ་འགྲུབ་པའི་ནུས་པ་ཁྱད་པར་ཅན་བཞག་པར་མོས་མཛོད། དེས་འཇུག་སྒོའི་དབང་བསྐུར་ཐུན་མོང་བ་གྲུབ་པ་ལགས། དེ་ནས་ཐུན་མོང་མ་ཡིན་པའི་བྱིན་རླབས་ཟབ་མོ་སྒྲུབ་པར་བྱེད་པ་ལ་མོས་པ་འདི་བཞིན་ཏུ་མཛད་འཚལ། མདུན་ཏུ་
བཞུགས་པའི་བླ་མ་རྡོ་རྗེ་འཆང་དེ་ཉིད་སྐད་ཅིག་ལ་གནས་འགྱུར་ཏེ་རྗེ་བཙུན་རྣལ་འབྱོར་གྱི་དབང་ཕྱུག་མི་ལ་བཞད་པ་རྡོ་རྗེ་སྐུ་མདོག་སྔོ་སང་ཡེ་ཤེས་ཀྱི་གཟི་བྱིན་ཚད་མེད་པར་འབར་བ། འཛུམ་པའི་མདངས་ཅན་དགྱེས་པའི་སྤྱན་གྱིས་སྒྲུབ་པ་པོ་ལ་གཟིགས་པ། དབུ་སྐྲ་ཕོད་ཀ་ལིང་ངེ་བ། རྒྱབ་ཕྱིང་བུ་ལོག་གེ་བ། སྐུ་ལ་རས་དཀར་གྱི་བླ་གོས་གསོལ་ཞིང་སྒོམ་ཐག་གིས་སེ་རལ་ཁར་འཁྱུད་པ། ཕྱག་གཡས་སྙན་ལ་བརྟེན་ཅིང་རྡོ་རྗེའི་མགུར་དབྱངས་ལྷང་ལྷང་སྒྲོག་པ། གཡོན་མཉམ་བཞག་ཐོད་པ་བདུད་རྩིས་བཀང་བ་བསྣམས་ཤིང་ཞབས་གཉིས་རོལ་པའི་སྟབས་ཀྱིས་བཞུགས་པ། བཀའ་བརྒྱུད་གྲུབ་ཐོབ་རྒྱ་མཚོས་སྤྲིན་འཁྲིགས་པ་ལྟར་བསྐོར་བ། ལྷན་ཅིག་སྐྱེས་པ་མི་འགྱུར་བའི་བདེ་བ་ཆེན་པོ་རྒྱས་པའི་ཡེ་ཤེས་ཀྱི་སྐུ་བཀྲག་མདངས་གཟི་བརྗིད་བཟོད་པར་དཀའ་བ་ཉི་མའི་སྙིང་པོ་ལྟ་བུ། གསུང་ཐེག་ཆེན་གསང་སྔགས་རྡོ་རྗེ་ནཱ་དའི་རང་སྒྲ་རུ་འཇོ་བ། ཐུགས་ཟབ་གསལ་གཉིས་མེད་ཕྱག་རྒྱ་ཆེན་པོ་བདེ་སྟོང་ཟུང་འཇུག་ཆེན་པོར་རྟག་ཏུ་མཉམ་པར་བཞག་བཞིན་པ། ཡོན་ཏན་སངས་རྒྱས་ཐམས་ཅད་དང་རྣམ་དབྱེར་མེད་ཅིང་། མཛད་པ་ཕྲིན་ལས་མ་ངེས་ཅིར་ཡང་སྟོན་པ་དཔག་པར་དཀའ་བའི་སྒྱུ་འཕྲུལ་ཅན་ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་
གནོན་པ། ལྷ་དང་ལྷ་མོ་དཔག་ཏུ་མེད་པས་མཆོད་པའི་བཀོད་པ་བསམ་གྱིས་མི་ཁྱབ་པས་མཆོད་པར་གསལ་བའི་སྤྱན་སྔར། ཁྱེད་རང་རྣམས་ཀྱི་སྐུ་ལུས་རྣམ་སྨིན་གྱི་ཕུང་པོ་འདི་ཉིད་ཀྱི་དབུའི་ཡ་ཐོད་ཧག་གིས་བཀོག་པའི་ནང་དུ་སྐུ་ལུས་ལྷག་མ་རིལ་པོར་བཅུག་པ་ལ། ཨོཾ་ཨཱཿཧཱུྃ། ལན་གསུམ། ཞེས་བརྗོད་པས་ཡེ་ཤེས་ཀྱི་བདུད་རྩི་རོ་བརྒྱ་དང་ལྡན་པ་དཀར་ལ་དམར་བའི་མདངས་ཅན་ཏུ་མེར་གྱིས་ཞུ་བ། བླ་མ་རྗེ་བཙུན་ཆེན་པོའི་ལྗགས་རྡོ་རྗེའི་འོད་ཟེར་གྱི་སྦུ་གུས་དྲངས་ཏེ་གསོལ་བའི་མོས་པ་དང་བཅས་འདིའི་རྗེས་ཟློས་མཛོད། །ཞལ་ཟས་རོ་བརྒྱ་ལྡན་ཅིང་ཡིད་འཕྲོག་པ། །ལེགས་སྦྱར་འདི་ནི་བཞད་པ་རྡོ་རྗེ་ལ། །དད་པས་ཕུལ་བས་འགྲོ་བ་འདི་དག་ཀུན། །འབྱོར་ལྡན་ཏིང་འཛིན་ཟས་ལ་སྤྱོད་པར་ཤོག །ཨོཾ་ཨཱཿཧཱུྃ་གུ་རུ་ཧཱ་ས་བཛྲ་ག་་ཙཀྲ་ས་པ་རི་ཝཱ་རེ་བྷྱཿཨི་དཾ་བ་ལི༚་གྲྀཧྞནྟུ་མ་མ་སརྦ་སིངྡྷི་མྨི་པྲ་ཡཙྪ། ཞེས་ནང་གི་ཚོགས་འབུལ། དེ་ནས་ལུས་ཞིང་གི་རྡུལ་སྙེད་དུ་སྤྲུལ་ནས་མཁའ་ཁྱབ་སེམས་ཅན་ཐམས་ཅད་དང་ལྷན་ཅིག་སྒོ་གསུམ་གུས་པ་ཆེན་པོས་ཕྱག་འཚལ་བའི་མོས་པས་ཐལ་མོ་སྦྱར་ཏེ་དད་གུས་དྲག་པོས་འདིའི་རྗེས་ཟློས་མཛོད། བྱང་ཕྱོགས་མུན་པའི་སྨག་རུམ་ན། །གངས་ལ་ཉི་མ་ཤར་འདྲ་བའི། །ཐོས་པ་དགའ་ཞེས་བྱ་བ་ཡི། །སྐྱེས་བུ་དེ་ལ་གུས་
ཕྱག་འཚལ། ལན་གསུམ། དེ་ལྟར་དད་མོས་གདུང་ཤུགས་དྲག་པོས་ཕྱག་འཚལ་ཞིང་གསོལ་བ་བཏབ་པའི་རྐྱེན་གྱིས། རྗེ་བཙུན་རྣལ་འབྱོར་གྱི་དབང་ཕྱུག་རས་པ་ཆེན་པོའི་དཔྲལ་བ་ནས་སྐུའི་བྱིན་རླབས་ཀྱི་རང་བཞིན་གཡོན་རྐྱང་མ་དང་རྗེས་སུ་འབྲེལ་བའི་ཀུནྡ་བྱང་སེམས་དཀར་པོའི་རྒྱུན་བྱུང་། ཁྱེད་རང་རྣམས་ཀྱི་དཔྲལ་བར་ཐིམ། ལུས་རྩའི་དྲི་མ་དག །བུམ་པའི་དབང་ཐོབ། མགྲིན་པ་ནས་གསུང་གི་བྱིན་རླབས་ཀྱི་རང་བཞིན་གཡས་རོ་མ་དང་རྗེས་སུ་འབྲེལ་བའི་རཀྟ་བྱང་སེམས་དམར་པོའི་རྒྱུན་བྱུང་། ཁྱེད་རང་རྣམས་ཀྱི་མགྲིན་པར་ཐིམ། །ངག་རླུང་གི་དྲི་མ་དག །གསང་བའི་དབང་ཐོབ། སྨིན་མཚམས་ནས། ཐུགས་ཀྱི་བྱིན་རླབས་ཀྱི་རང་བཞིན་དབུ་མ་དང་རྗེས་སུ་འབྲེལ་བའི་ཁུ་ཁྲག་འདྲེས་པའི་བྱང་སེམས་ཀྱི་རྒྱུན་བྱུང་། ཁྱེད་རང་རྣམས་ཀྱི་སྨིན་མཚམས་སུ་ཐིམ། ཡིད་ཐིག་ལེའི་དྲི་མ་དག །ཤེས་རབ་ཡེ་ཤེས་ཀྱི་དབང་ཐོབ་པར་མོས་མཛོད། དེ་དག་ནི་འདྲ་བས་འདྲ་བ་ལམ་དུ་བྱེད་པ་གོང་མའི་བརྡ་དབང་རྣམ་པ་གསུམ་ཡིན་ནོ། །དེ་བཞི་པ་ཡེ་ཤེས་རྡོ་རྗེའི་དབང་བསྐུར་བ་ལ། ཐོག་མར་མོས་གུས་དྲག་པོས་ཕུར་ཚུགས་སུ་གསོལ་བ་འདེབས་པ་འདི་ཉིད་ལྷན་ཅིག་དབྱངས་སུ་ལེན་པར་ཞུ། རྗེ་མི་ལ་བཞད་པ་རྡོ་རྗེ་ལ་གསོལ་བ་འདེབས་
སོ། །ཞེས་ལན་བདུན་དབྱངས་དང་བཅས་དཔོན་སློབ་ལྷན་ཅིག་བརྗོད། དེ་ནས་ཁྱེད་རང་རྣམས་ལུས་གནད་རྣམ་སྣང་གི་ཆོས་བདུན་དང་ལྡན་པས་ལྟ་སྟངས་གཡོ་བ་མེད་པའི་ངང་། སེམས་དུས་གསུམ་གྱི་རྣམ་རྟོག་གི་སྤྲོ་བསྡུས་མ་བསླད་པར་རང་རིག་གཉུག་མ་བཟོ་བཅོས་བྲལ་བ་བདེ་སྟོང་བརྗོད་མེད་ཕྱག་རྒྱ་ཆེན་པོའི་ངང་དུ་མཉམ་པར་འཇོག་པར་ཞུ། དེ་ལ་གནས་ལུགས་ཀྱི་དོན་ངོ་སྤྲོད་པའི་ཚུལ་དུ་རྗེ་བཙུན་རྣལ་འབྱོར་གྱི་དབང་ཕྱུག་རས་པ་ཆེན་པོའི་ཞལ་ནས་དོ་ཧ་རྡོ་རྗེའི་གླུས་གདམས་པ་སྩལ་ཞིང་དགོངས་པའི་དྲོད་གཏད་པས་དོན་གྱི་རྟོགས་པ་རྒྱུད་ལ་འཕོས་པའི་མོས་པ་མཛོད། སྣང་དང་སྟོང་དང་དབྱེར་མེད་གསུམ། །འདི་གསུམ་ལྟ་བའི་མདོར་བསྡུས་ཡིན། །གསལ་དང་མི་རྟོག་ཡེངས་མེད་གསུམ། །འདི་གསུམ་སྒོམ་པའི་མདོར་བསྡུས་ཡིན། །མ་ཆགས་མ་ཞེན་ལྷུག་པ་གསུམ། །འདི་གསུམ་སྤྱོད་པའི་མདོར་བསྡུས་ཡིན། །ཆོས་སྐུ་ལོངས་སྐུ་སྤྲུལ་སྐུ་གསུམ། །འདི་གསུམ་འབྲས་བུའི་མདོར་བསྡུས་ཡིན། །གཉིས་སུ་མེད་པ་ལྟ་བའི་དོན། །ཡེངས་པ་མེད་པ་སྒོམ་པའི་དོན། །ཟུང་དུ་འཇུག་པ་སྤྱོད་པའི་དོན། །འདི་གསུམ་དབྱེར་མེད་འབྲས་བུའི་དོན། །ལྟ་བ་འདི་ལ་གཟེར་གསུམ་གདའ། །སྒོམ་པ་འདི་ལ་གཟིར་གསུམ་གདའ། །
སྤྱོད་པ་འདི་ལ་གཟེར་གསུམ་གདའ། །འབྲས་བུ་འདི་ལ་གཟེར་གསུམ་གདའ། །ལྟ་བའི་གཟེར་གསུམ་བཤད་ཙ་ན། །སྣང་སྲིད་སེམས་སུ་འདུས་པར་གདའ། །སེམས་ཉིད་གསལ་བའི་ངང་དུ་གདའ། །དེ་ལ་ངོས་བཟུང་མེད་པར་གདའ། །ལྟ་བའི་གཟེར་གསུམ་དེ་ལ་མཛོད། །སྒོམ་པའི་གཟེར་གསུམ་བཤད་ཙ་ན། །རྣམ་རྟོག་ཆོས་ཀྱི་སྐུ་རུ་གདའ། །རིག་པ་གསལ་བའི་ངང་དུ་གདའ། །མ་བཅོས་ལྷུག་པར་བཞག་པར་གདའ། །སྒོམ་པའི་གཟེར་གསུམ་དེ་ལ་མཛོད། །སྤྱོད་པའི་གཟེར་གསུམ་བཤད་ཙ་ན། །དགེ་བཅུ་སྤྱད་དུ་མེད་པར་གདའ། །སྡིག་བཅུ་སྤང་དུ་མེད་པར་གདའ། །གཉེན་པོས་སྤང་དུ་མེད་པར་གདའ། །སྤྱོད་པའི་གཟེར་གསུམ་དེ་ལ་མཛོད། །འབྲས་བུའི་གཟེར་གསུམ་བཤད་ཙ་ན། །འཁོར་བ་སྤང་དུ་མེད་པར་གདའ། །མྱང་འདས་བསྒྲུབ་ཏུ་མེད་པར་གདའ། །རང་སེམས་སངས་རྒྱས་ཡིན་པར་གདའ། །འབྲས་བུའི་གཟེར་གསུམ་དེ་ལ་མཛོད། །གཟེར་བཅུ་གཉིས་ལོགས་ནས་གཟེར་གཅིག་འདེབས། །གཟེར་ནི་ཆོས་ཉིད་སྟོང་པའི་གཟེར། །འདེབས་མཁན་བླ་མ་རིན་ཆེན་མཛད། །མ་རྟོགས་བར་དུ་ཡང་མི་ཐེབས། །ལྷན་གྱིས་རྟོགས་ན་ཐེབས་པ་ཡིན། །
དེ་ལྟར་རྗེས་སུ་གདམས་པ་སྩལ་བར་མོས་མཛོད། སླར་མོས་གུས་དྲག་པོས་བདག་གི་རྒྱུད་བྱིན་གྱིས་བརླབ་ཏུ་གསོལ། སྙམ་པ་བྱས་པའི་རྐྱེན་གྱིས་བླ་མ་རྗེ་བཙུན་རྣལ་འབྱོར་གྱི་དབང་ཕྱུག་རས་པ་ཆེན་པོ་ཉིད་སྐུ་འོད་ཕུང་གི་རྣམ་པར་ལྟེམ་གྱིས་ཞུ་ནས་ཁྱེད་རང་རྣམས་ལ་སིབ་ཀྱིས་ཐིམ་པས་སྐུ་གསུང་ཐུགས་ཀྱི་ཡོན་ཏན་དང་བྱིན་རླབས་མ་ལུས་པ་ཐུགས་རྒྱུད་ལ་སྤར་བཏབ་པ་བཞིན་འཕོས་པར་མོས་མཛོད། སྐུ་བརྙན་ནམ་མེད་ན་ཚོམ་བུ་མགོ་བོར་འཇོག་ཅིང་དྲིལ་བུ་གསིལ། དྲི་ཞིམ་པོའི་སྤོས་བཏུལ་ཞིང་ངག་ཏུ། རྒྱལ་བ་རིགས་ཐམས་ཅད་ཀྱི་ཁྱབ་བདག་དྲུག་པ་རྡོ་རྗེ་འཆང་ཆེན་པོ་བཀའ་བཞི་བརྒྱུད་པའི་བླ་མ། གྲུབ་ཆེན་ཏཻ་ལོ་ནཱ་རོ་མར་པ་ལོ་ཙཱ་རྣམས་ཀྱི་བྱིན་གྱིས་རློབས་ཤིག །ཁྱད་པར་རྗེ་བཙུན་རྣལ་འབྱོར་གྱི་དབང་ཕྱུག་ཆེན་པོ་མི་ལ་བཞད་པ་རྡོ་རྗེས་རྡོ་རྗེའི་སློབ་མ་འདི་རྣམས་ལ་བྱིན་གྱིས་རློབས་ཤིག །ལུས་ལ་རྡོ་རྗེའི་སྐུའི་སྒོ་ནས་བྱིན་གྱིས་རློབས་ཤིག །ངག་ལ་རྡོ་རྗེའི་གསུང་གི་སྒོ་ནས་བྱིན་གྱིས་རློབས་ཤིག །ཡིད་ལ་རྡོ་རྗེའི་ཐུགས་ཀྱི་སྒོ་ནས་བྱིན་གྱིས་རློབས་ཤིག །ཡོན་ཏན་མི་ཟད་པ་རྒྱན་གྱི་འཁོར་ལོའི་སྒོ་ནས་བྱིན་གྱིས་རློབས་ཤིག །ཕྲིན་ལས་རྣམ་པ་བཞིའི་སྒོ་ནས་བྱིན་གྱིས་རློབས་ཤིག །གསང་བ་བསམ་གྱིས་མི་ཁྱབ་པའི་སྒོ་ནས་བྱིན་གྱིས་རློབས་ཤིག །ད་ལྟ་ཉིད་
དུ་བྱིན་གྱིས་རློབས་ཤིག །མྱུར་བ་ཉིད་དུ་བྱིན་གྱིས་རློབས་ཤིག །སྟན་ཐོག་འདི་ཉིད་དུ་བྱིན་གྱིས་རློབས་ཤིག །ཛཿཧཱུྃ་བྃ་ཧོཿ དེས་གྲུབ་པའི་དབང་ཕྱུག་ཆེན་པོ་མི་ལ་བཞད་པ་རྡོ་རྗེ་ལ་བརྟེན་པའི་དབང་བསྐུར་བྱིན་རླབས་ཀྱི་རིམ་པ་ལེགས་པར་གྲུབ་པ་ཡིན་པས་སྐུ་གསུང་ཐུགས་ཀྱི་དམ་ཚིག་སྤྱི་དང་། །ཁྱད་པར་ལམ་ཟབ་མོ་བླ་མའི་རྣལ་འབྱོར་འབྲལ་མེད་གཡར་དམ་དུ་བཟུང་བར་བགྱིའོ་སྙམ་པས་འདིའི་རྗེས་ཟློས་མཛོད། །གཙོ་བོས་ཇི་ལྟར་སོགས་དང་། གཏང་རག་མཎྜལ། ལུས་ལོངས་སྤྱོད་འབུལ་བ། །དགེ་བསྔོ་སྤྱི་ལྟར་བྱའོ། །དེ་ནས་ཚོགས་ཀྱི་མཆོད་པ་སོགས་རྗེས་ཀྱི་རིཔ་པའང་གཞུང་ལྟར་བྱས་པས་གྲུབ་བོ། །འདིར་བློ་དམན་ཐོས་ཆུང་ཁ་གཅིག་འདི་སྙམ་དུ་སེམས་ཏེ། དབང་བསྐུར་འདི་བཀའ་བརྒྱུད་སྤྱི་ལ་མ་གྲགས་པས་ཁུངས་དང་དགོས་པ་མེད་དམ་སྙམ་པ་དང་། བརྒྱུད་པ་མེད་དམ་སྙམ་པ་དང་། རང་བཟོ་མིན་ནོ་སྙམ་པའི་ལོག་རྟོག་གསུམ་འབྱུང་བར་འགྱུར་རོ། །དེ་ལ་དང་པོའི་སྐྱོན་སེལ་ནི། སློབ་དཔོན་དཔའ་བོ་འོད་གསལ་གྱི་ལུགས་ཀྱི་གྲུབ་ཐོབ་བརྒྱད་ཅུ་རྩ་བཞིའི་བྱིན་རླབས་གྲོལ་མཆོག་ཞབས་ཀྱི་ཕྱག་བཞེས་ལས་འབྱུང་བའི་རྩ་བའི་བླ་མ་རྡོ་རྗེ་འཆང་གི་སྤྱི་དབང་ཉིད་འདིའི་དབང་ལ་སྦྱར་བ་ཡིན་པས། རྡོ་རྗེ་འཆང་ནི་རིགས་ཐམས་ཅད་ཀྱི་ཁྱབ་བྱེད་ཡིན་པས་འདི་ཙམ་དུ་མ་ཟད་ལྷ་དང་བླ་མ་ཇི་སྲིད་ལ་ཁ་སྤོ་ཆོག་པ་ལུང་རིག་གིས་གྲུབ་པ་དང་། བྱིན་
རླབས་ཀྱང་གྲུབ་བརྒྱའི་བྱིན་རླབས་སྦྱར་བ་སྟེ་དེའང་ལམ་དུས་སྤྲོས་མེད་འོད་ཟེར་ལ་བརྟེན་པའི་ཟབ་དབང་ཙམ་ཡིན་པས་འདིར་སྦྱར་བ་ལ་འགལ་བ་མེད་པའི་སྟེང་འདི་ཙམ་གྱིས་ཀྱང་དད་ལྡན་སྐལ་པ་ཅན་རྣམས་ལ་རྗེ་བཙུན་ཆེན་པོའི་བྱིན་རླབས་འཇུག་པའི་ཉེར་ལེན་ཁྱད་པར་ཅན་ཏུ་འགྱུར་བ་མ་ཟད། འདི་ལྟ་བུ་ལ་བརྟེན་ཏེ་དད་པ་སྐད་ཅིག་ཙམ་སྐྱེས་ཀྱང་ཐུགས་རྗེས་འཛིན་པར་འགྱུར་བས་ཁུངས་དང་དགོས་པ་ནི་དེ་ཡིན་ནོ། །གཉིས་པ་ནི། དེ་ལྟ་ནའང་མི་ལ་རས་པའི་དབང་བསྐུར་ཟེར་བ་བཀའ་བརྒྱུད་ནས་བརྒྱུད་པ་མེད་དོ་སྙམ་ན་དེའང་ཡོད་པ་ཙམ་མ་ཟད་རྩལ་དུ་བཏོན་མ་བཏོན་མ་གཏོགས་ཁྱད་པར་འཕགས་པ་ཡོད་དེ། སྤྱིར་ཏེ་ལོ་ནཱ་རོ་ནས་བཟུང་བདག་ཅག་གི་འདྲེན་མཆོག་དམར་མཐིང་ཅོད་པན་འཆང་བ་ཟུང་གི་བར་དུ་སྤང་རྟོགས་ཡོན་ཏན་བུམ་པ་གང་བྱོའི་ཚུལ་དུ་བྱོན་པ་ཟམ་མ་ཆད་ཅིང་། དཔལ་ལྡན་བླ་མ་དེ་དག་གི་སྐུ་གསུང་ཐུགས་ཀྱི་བྱིན་རླབས་ཐུན་མོང་དང་ཐུན་མོང་མ་ཡིན་པ་ཡང་ནས་ཡང་དུ་ཐོབ་པ་དང་། ཁྱད་པར་ཇོ་མོ་བཀྲ་ཤིས་ཚེ་རིང་མའི་འཇིག་རྟེན་ལས་འདས་པའི་རྗེས་གནང་གི་སྐབས་སུ་རྗེ་རས་པ་ཆེན་པོ་ལ་བརྟེན་པའི་དབང་བཞི་འདིར་བཀོད་པ་དང་ཚིག་མི་གཅིག་ཀྱང་དོན་གཅིག་པར་བཞུགས་པ་དམ་པ་དེ་དག་ལས་ཡང་ཡང་ནོས་པ་ཡིན་པས་ཐེ་ཚོམ་མི་དགོས་སོ། །གསུམ་པའི་སྐྱོན་ནི་དེ་དག་གིས་སེལ་མོད། བོད་ཀྱི་མི་གསར་འགྲོགས་ཆེ་བའི་དབང་གིས་བརྡོལ་ཆོས་ལ་ཡིད་བརྟོན་བ་ཆེས་མང་བས། དེ་ལྟར་བརྟོན་ཕྱིན་ཆད་དག་སྣང་དགོངས་གཏེར་སྙན་བརྒྱུད་སོགས་སུ་གྲགས་པ་ཕལ་མོ་ཆེ་ཞིག་
ལས་ནི་འདི་ལྟ་བུ་ཆོས་སྤྱན་ལྡན་པ་རྣམས་ཀྱི་སྤྱན་སྔར་འབད་པ་ཆེན་ཞིང་ཐེ་ཚོམ་ཆུང་བ་ཡིན་ཏེ། ལྐོག་གྱུར་གནས་དེ་དག་གང་ཡིན་མངོན་ཤེས་མེད་པས་མི་རྟོགས་ལ། འདི་ལྟ་བུ་ལ་ལུང་དང་མན་ངག་མངོན་སུམ་ཚད་མས་གྲུབ་པའི་ཕྱིར་རོ། །འདིས་ཀྱང་རྗེ་བཙུན་བཞད་པ་རྡོ་རྗེ་ཡི། །བྱིན་རླབས་མཁའ་མཉམ་འགྲོ་ལ་འབད་མེད་དུ། །ཞུགས་ནས་རྟོགས་གྲོལ་དུས་མཉམ་མི་སློབ་པའི། །ཟུང་འཇུག་རྒྱལ་སར་མངོན་བྱང་ཆུབ་པར་ཤོག །ཅེས་པ་འདིའང་འབྲེལ་ཚད་དོན་ལྡན་གྱི་སྐྱེས་བུ་ཆེན་པོ་ཁྲི་འདུ་སྣང་རྩེ་རི་ཁྲོད་པ་ཀུན་དགའ་ཆོས་ཀྱི་དབང་པོས་རིང་ནས་བསྐུལ་མ་གནང་བ་དང་། ཉེ་ཆར་སྒྲུབ་བརྩོན་དམ་པ་འཇམ་དབྱངས་རྒྱལ་མཚན་གྱིས་མཚམས་སྦྱར་བ་ལྟར་བཀའ་བརྒྱུད་རིན་པོ་ཆེའི་རྗེས་འཇུག་སྤོང་བ་པའི་རྟགས་ཙམ་འཛིན་པ་ཡོན་ཏན་རྒྱ་མཚོའི་མིང་ཅན་བློ་གྲོས་མཐའ་ཡས་པའི་སྡེས་དེ་བཱི་ཀོ་ཊིའི་དབེན་ཁྲོད་ཙཱ་འདྲ་རིན་ཆེན་བྲག་གི་སྒྲུབ་གནས་སུ་བགྱིས་པ་དགེ་ལེགས་འཕེལ།། །།