དཀྱིལ་འཁོར་ཀུན་གྱི་ཁྱབ་བདག་མཚོ་སྐྱེས་རྡོ་རྗེ་འཆང་ཆེན་པོའི་ཐུགས་རྗེ་མངོན་པར་སྐུལ་བའི་བསྟོད་དབྱངས་ནོར་བུ་སྣང་ཡངས་ཀྱི་རྒྱན།
དཀྱིལ་འཁོར་ཀུན་གྱི་ཁྱབ་བདག་མཚོ་སྐྱེས་རྡོ་རྗེ་འཆང་ཆེན་པོའི་ཐུགས་རྗེ་མངོན་པར་སྐུལ་བའི་བསྟོད་དབྱངས་ནོར་བུ་སྣང་ཡངས་ཀྱི་རྒྱན་ཅེས་བྱ་བ་བཞུགས་སོ།། །།
ན་མོ་གུ་རུ་པདྨཱ་ཀ་རཱ་ཡ། རྒྱལ་དབང་མཚོ་སྐྱེས་རྡོ་རྗེ་དང་རྡོ་རྗེ་འཆང་པདྨ་དབང་ཆེན་དབྱེར་མེད་པའི་ཞབས་ལ་སྒོ་གསུམ་གུས་པས་སྐྱབས་སུ་མཆིའོ། །གསོལ་བ་འདེབས་སོ། །བྱིན་གྱིས་བརླབ་ཏུ་གསོལ། །མི་ཤིགས་མཁའ་ཁྱབ་མཁའ་ཡི་སྐུ་རྡོ་རྗེ། །གཉུག་མའི་འཇའ་ལུས་བརྟན་དང་གཡོ་བ་ན། །ཆ་མེད་ཀུན་འགྲོ་པདྨའི་འོད་འབར་བ། །རང་བྱུང་མཚན་དཔེ་གསལ་རྫོགས་དེ་ལ་འདུད། །རང་བཞིན་ཆོས་ཉིད་དྭངས་མ་ནཱ་དའི་དབྱངས། །རྣམ་པ་ཆོས་ཀྱི་འཁོར་ལོ་རྟེན་འབྲེལ་སྒྲ། །སྨྲ་བསམ་བརྗོད་མེད་པདྨའི་གསུང་རྡོ་རྗེ། །རྟག་ཁྱབ་གཅིག་དང་དུ་བྲལ་དེ་ལ་འདུད། །ནང་གསལ་ཡེ་ཤེས་གཞོན་ནུ་བུམ་པ་སྐུ། །མི་འགྱུར་བདེ་བ་
མཁའ་མཉམ་ཐུགས་རྡོ་རྗེ། །རང་སྣང་རིས་མེད་པདྨ་སཾ་བྷའི་དབྱིངས། །སྐུ་དང་ཐིག་ལེ་རོ་གཅིག་དེ་ལ་འདུད། །ལྷན་སྐྱེས་དབྱིངས་རིག་རྡོ་རྗེ་ལུ་གུ་རྒྱུད། །དག་པ་རབ་འབྱམས་སྣང་སེམས་དབྱེར་མེད་པ། །བུམ་བཟང་དཔག་བསམ་ཤིང་ལྟར་འབད་མེད་དུ། །སྐད་ཅིག་གཅིག་གིས་དོན་སྒྲུབ་མཛད་ལ་འདུད། །རྡུལ་ཕྲན་རེ་ལ་ཕྲ་བའི་ཡེ་ཤེས་འཇུག །དངོས་ཀུན་མི་ཕྱེད་གྲུབ་པའི་རྡོ་རྗེར་བསྡོམས། །མི་ཟད་རྒྱན་གྱི་འཁོར་ལོའི་སྤྲིན་བཀོད་པས། །བྱང་ཆུབ་སྤྲོ་བསྡུའི་བྱེད་པོ་དེ་ལ་འདུད། །སྙིང་རྗེའི་སྤྱོད་ཡུལ་ཡོངས་སུ་རྣམ་པར་དག །ཕྲིན་ལས་མཛད་པ་ནམ་མཁའི་མཐའ་དང་མཉམ། །བསམ་གྱིས་མི་ཁྱབ་རིག་སྔགས་འཆང་བ་ཡིས། ཁམས་
གསུམ་འཁོར་བ་དོང་སྤུགས་མཛད་ལ་འདུད། །གཞི་ལས་རྗེན་པར་བུད་པ་རང་རིག་གི། ཏིང་འཛིན་དགའ་བས་ནང་ནས་སྙེམས་པ་ཡིས། །གཉིས་མེད་བཀའ་ནན་རབ་བརྗིད་ཕྱག་རྒྱ་ཡིས། །སྣང་སྲིད་ཟིལ་གནོན་པདཱྨ་ཀ་རར་འདུད། །རྫུ་འཕྲུལ་འདུ་འགོད་གཅིག་གི་ཁོར་ཡུག་ན། །ཐམས་ཅད་བདག་ཉིད་དཀྱིལ་འཁོར་འཁོར་ལོའི་མགོན། །མི་འཇིགས་སེང་གེའི་ང་རོ་དབྱངས་སུ་ལེན། །ཁྱབ་བདག་རྡོ་རྗེ་སློབ་དཔོན་དེ་ལ་འདུད། །འཁོར་འདས་རྟོགས་པས་རབ་ཟོས་ནམ་མཁའི་ལུས། །སྙིང་པོའི་ཆར་ཡང་རྡོ་རྗེའི་སྲོག་གྲུབ་ནས། །བདུད་རྩིའི་བཅུད་ལེན་རིས་མེད་འགྲོ་ལ་སྦྱིན། །གཞོན་ནུ་སྐྱེ་འཆི་གཉིས་སྤངས་དེ་ལ་འདུད། །མ་ངེས་བརྟུལ་ཞུགས་དུ་མས་འཇིག་རྟེན་འདིར། །ཕྲིན་ལས་རྣམ་པ་བཞི་ཡི་འཁོར་ལོས་སྒྱུར། །དཔག་པར་དཀའ་བའི་རྣམ་ཐར་རྒྱ་མཚོའི་བདག །ཕྱོགས་ལས་རྣམ་པར་རྒྱལ་བ་དེ་ལ་འདུད། །རྒྱལ་བ་གཞན་གྱི་མཛད་པ་བརྟུལ་གྱུར་ཀྱང་། །ཁྱོད་ཀྱི་ཕྲིན་ལས་དུས་བཞི་མཉམ་པ་ཉིད། །ཆ་ལས་རྣམ་གྲོལ་སྒྱུ་འཕྲུལ་དྲྭ་བའི་གར། །འགྲན་བྲལ་ཚེ་དབང་རིག་འཛིན་དེ་ལ་འདུད། ཁྱད་པར་གདོང་དམར་བོད་ཀྱི་སྐྱེ་བོ་ལ། །དུས་གསུམ་སངས་རྒྱས་ལས་ཀྱང་ཐུགས་རྗེ་ཆེ། །སྙིགས་འགྲོར་ལྷག་པར་བརྩེ་བས་བྱིན་རླབས་མྱུར། །བཀའ་དྲིན་
འཁོར་མཐའ་མེད་པ་དེ་ལ་འདུད། །མཚན་ཙམ་འཛིན་པས་བྱང་ཆུབ་ཕྱིར་མི་ལྡོག །དད་པས་སྲིད་ཞིའི་དཔལ་ཀུན་བདེ་བླག་བྱེད། །དྲན་པ་ཙམ་གྱིས་སྡུག་བསྔལ་མཐའ་དག་སེལ། །འདོད་འབྱུང་ཡིད་བཞིན་ནོར་བུ་དེ་ལ་འདུད། །གུས་པས་རྣམ་ཐར་ཉིན་མཚན་བསམ་པ་ལས། །ཡིད་ལ་མི་བྱེད་ཤུགས་འབྱུང་གདུང་དབྱངས་བཅས། །མཁའ་མཐའ་ཞིང་རྡུལ་མཉམ་པའི་ལུས་བཏུད་ནས། །བྱང་ཆུབ་བར་དུ་ཕྱག་འཚལ་སྐྱབས་སུ་མཆི། །སྒོ་གསུམ་ཐལ་བར་བརླག་ནས་རྙེད་པ་དང་། །བཀུར་བསྟི་རིམ་གྲོས་མཆོད་ཀྱང་མི་ཚིམས་པར། །དུས་གསུམ་ལུས་སྲོག་ལོངས་སྤྱོད་དགེ་རྩ་སོགས། །ཀུན་བཟང་མཆོད་སྤྲིན་ཕྱི་ནང་གསང་བས་མཆོད། །ཕུང་ཀྲོལ་སྡིག་པའི་རྩ་བ་བདག་འཛིན་འདི། །ཐོག་མེད་དུས་ནས་ད་བར་མ་རིག་པས། །གཞི་ཡི་བཞུགས་ཚུལ་དང་འགལ་སྒྲིབ་བསགས་པ། །ཐམས་ཅད་གནོང་ཞིང་འགྱོད་པ་ཆེན་པོས་བཤགས། །དགེ་དང་བྱེད་པོ་གཉིས་ཀ་རིག་པའི་མདངས། །དེ་ལ་དགའ་བས་རྒྱས་འགྱུར་རིགས་འཕེལ་ཕྱིར། །མི་མཆོག་རྣམས་ཀྱིས་ཇི་ལྟར་ཡི་རང་བ། །དེ་ལྟར་དགའ་བའི་པདྨོ་གྲོལ་བར་བགྱི། །ཅིག་ཆར་བ་དང་རིམ་གྱིས་འཇུག་པའི་ཐབས། །ཟབ་རྒྱས་ཆོས་ཚུལ་དུ་མའི་སྟོན་པ་རུ། །གང་འཚམས་དགེ་བའི་
བཤེས་གཉེན་མང་སྤྲུལ་ནས། །ཐོས་གྲོལ་ཆོས་ཀྱི་ཆར་ཆེན་འབེབས་པར་བསྐུལ། །ཇི་སྲིད་སེམས་ཅན་ཁམས་ཀྱི་མཐར་ཐུག་པ། །དེ་སྲིད་སྙིང་རྗེ་འཛད་པ་མེད་པས་ན། །རང་རྒྱུད་ཉེས་པས་གནས་ལུགས་མི་སྒྲིབ་པར། །དྲི་མེད་སྙིང་རྗེའི་ལུས་ཅན་བཞུགས་སུ་གསོལ། །བྱང་ཆུབ་སྙིང་པོར་ཡོངས་བསྔོས་རྒྱལ་རྣམས་ཀྱི། །དགེ་རྩ་ཆུད་མི་ཟ་བར་ཚོགས་དང་དུས། །འདི་གཏན་དགེ་བ་རྣམ་པར་སྨིན་པ་བཞིན། །བསྔོ་བ་བཟང་པོ་དེ་དང་མཚུངས་པར་བགྱི། །དེང་སང་སྙིགས་མ་ལྔ་བདོའི་དུས་ལ་ཐུག །གཟུགས་ཅན་ཆོས་མིན་ལ་སྤྱོད་གཟུགས་མེད་རྣམས། །དེ་ལ་མངོན་པར་ཕྱོགས་པ་འདི་གཟིགས་ལ། ཞི་བས་སྤ་བཀོང་དྲག་པོས་ཚར་གཅོད་མཛོད། །དགེ་དང་བདེ་བ་ཐན་སྤྲིན་བཞིན་ཏུ་ཡལ། །མི་དགེ་སྡུག་བསྔལ་འཚུབ་མ་བཞིན་ཏུ་ལྡང་། །བོད་འབངས་སྡུག་པའི་དུས་ལ་བབས་ལགས་ན། །སྔོན་གྱི་གཡར་དམ་བསྙེལ་ལམ་གང་དུ་བོར། །པདྨའི་སྔགས་བརྒྱུད་རྗེ་ཡི་ལྷ་བརྒྱུད་ཀྱིས། །ད་དུང་རང་ཚུགས་འཛིན་ཞིང་རེ་ས་དང་། །སྐྱབས་གནས་ཁྱེད་ལས་མེད་པ་འདི་ལྟར་ན། །ཞལ་བཞེས་ཕྱི་ཐག་ཅུང་ཟད་མ་ཐུང་ངམ། །དུས་བཟང་རྣམས་སུ་དངོས་སུ་བྱོན་གསུངས་མོད། །དངོས་སུ་མཇལ་བའི་སྐལ་བ་མ་མཆིས་ཀྱང་། །བརྒྱུད་ནས་སྤྲུལ་པའི་འོད་ཀྱི་བསྟན་
འགྲོ་ཡི། །ཕན་བདེའི་པད་ཚལ་ད་ནི་བསྐྱེད་རེ་རན། །ཀྱེ་མ་བཟང་བྱེད་ཉི་མ་དམའ་སར་ནུབ། །ངན་བྱེད་སྤྲིན་ཕུང་དགུང་སྔོན་དབྱིངས་ན་སྙེགས། །འདི་ལ་དགྲ་བོ་དག་ཀྱང་ཡིད་འཁྲུགས་ན། །ཐུགས་རྗེ་ཅན་ཁྱོད་ཅུང་ཟད་མི་བརྩེའམ། །མི་རུང་སྣ་དགུའི་དུས་ངན་བྱུང་བའི་ཚེ། །མི་ཐོག་རེར་སོང་ལས་ཅན་རེ་རེ་ལ། །བྱིན་གྱིས་བརླབས་ནས་མཐོང་སྐར་ཉི་ཞུར་བཞིན། །བདེ་སྐྱིད་ཡང་དང་ཡང་དུ་སྤེལ་གསུངས་པས། །ནད་མུག་མཚོན་གསུམ་གྱི་ནི་སྐལ་ངན་ཤར། །ངེས་དོན་སྙིང་པོའི་བསྟན་པ་འཇིག་ལ་ཉེ། །དམ་པས་སྤངས་ནས་རིང་ཞིག་ལོན་པའི་ཕྱིར། །དཀོན་མཆོག་བདེན་རྟགས་ད་ནི་སྟོན་པར་རིགས། ལས་ངན་སྐྱོན་གྱིས་བཅོས་སུ་མ་བཏུབ་པ། །བདག་རྒྱུད་དམ་པའི་ཆོས་དང་འདྲེས་པ་དང་། །འཆི་མེད་ཚེ་དང་འཛད་མེད་དཔལ་འབྱོར་གྱིས། །བསམ་དོན་མ་ལུས་ཡིད་བཞིན་འགྲུབ་པར་མཛོད། །ཁྱད་པར་སྔོན་སྨོན་གང་མཆིས་དུས་འདི་རུ། །སད་ནས་པད་འབྱུང་བསྟན་དང་སེམས་ཅན་དོན། །མཁའ་མཐར་བརྡལ་བའི་ཕྲིན་ལས་རབ་བརྙེས་ནས། བདག་གཞན་དོན་གཉིས་འགྲུབ་པར་བྱིན་གྱིས་རློབས། །སྐྱེ་དང་ཚེ་རབས་རིགས་བདག་པད་འབྱུང་དང་། །མི་འབྲལ་ཐེག་པ་མཆོག་གི་ལམ་ཞུགས་ཏེ། །ཟབ་དོན་གསུང་གི་བདུད་རྩི་སྩོལ་བ་ཡི། །འགྲོ་འདྲེན་ཕྲིན་ལས་བྱ་མ་རྟར་འགྱུར་ཤོག །མ་བཅོས་རང་བྱུང་
ལྟ་བ་མཁའ་ལྟར་མཐོ། །ཐོ་ཅོར་མི་སྤྱོད་དུས་ཚོད་དག་དང་འབྲེལ། །ཁྱད་པར་རྩ་བ་ཡན་ལག་དམ་ཚིག་ཀུན། །སྲོག་བཞིན་བསྲུངས་ནས་མཆོག་དངོས་གཉིས་ཐོབ་ཤོག །ཨ་ཏི་ཁྱབ་བརྡལ་ཟང་ཐལ་ཆེན་པོའི་ཀློང་། །མེད་ཕྱལ་གཅིག་པུ་ལྷུན་གྲུབ་དགོངས་པའི་གཟེར། །ཡིད་ཆོས་རིག་པའི་སྙིང་པོར་ལ་བཟླ་བས། །ཀ་དག་རྗེན་པ་ནང་ནས་འཆར་བར་ཤོག །མཚན་འཛིན་གྲུབ་མཐའ་ཀུན་འཇིག་ཡིད་དཔྱོད་ཀྱི། །ལམ་དུ་མ་ལུས་དབང་པོའི་མངོན་སུམ་དུ། །ལྷུན་གྲུབ་ཐོད་རྒལ་རྡོ་རྗེའི་གསེབ་ལམ་ནས། །འཇའ་ལུས་འཕོ་བ་ཆེན་པོའི་སྐུ་བརྙེས་ཤོག །རང་སྣང་པདྨ་འོད་འབར་ཞིང་རྒྱ་མཚོར། །རང་རིག་ཐོད་ཕྲེང་རྩལ་དང་དབྱེར་མེད་པར། །རང་བྱུང་ཀུན་བཟང་དགོངས་པའི་ཀློང་ཆེན་པོར། །རང་གསལ་སྐུ་ཡེ་ཟུང་དུ་འཇུག་པར་ཤོག །ཅེས་ཕྱི་མཐའ་ཐུག་པར་མགོན་པོ་མཆོག་གི་བྲན་ཏུ་དམ་བཅས་པའི་བཙུན་པ་ཡོན་ཏན་རྒྱ་མཚོས་རང་ལོ་ཉེར་བཞི་སྤྲེལ་ལོ་སྦྲེལ་ཟླའི་ཚེས་བཅུར་བྲིས་ཏེ་གསོལ་བ་བཏབ་པ་དགེ་ལེགས་འཕེལ།། ༈ །།ཨོ་རྒྱན་རྗེ་འབངས་བཅས་པའི་གསོལ་འདེབས་རྡོ་རྗེའི་ཚིག་རྐང་བྱིན་རླབས་ཆར་འབེབས་བཞུགས་སོ། །གུ་རུ་པདྨ་སིདྡྷི་ཧཱུྃ་ཧྲཱིཿ །མ་བཅོས་སྤྲོས་བྲལ་བླ་མ་ཆོས་ཀྱི་སྐུ། །བདེ་ཆེན་ལོངས་སྤྱོད་བླ་མ་ཆོས་ཀྱི་རྗེ། །པད་སྡོང་ལས་འཁྲུངས་བླ་མ་སྤྲུལ་པའི་སྐུ། །སྐུ་གསུམ་རྡོ་རྗེ་འཆང་ལ་གསོལ་བ་འདེབས། །སྔོན་
ཚེ་སྣང་བ་མཐའ་ཡས་འོད་དཔག་མེད། །རི་བོ་ཏ་ལར་འཕགས་པ་སྤྱན་རས་གཟིགས། །དྷ་ན་ཀོ་ཥར་པདྨ་འབྱུང་གནས་ཞབས། །དུས་གསུམ་སངས་རྒྱས་ཁྱོད་ལ་གསོལ་བ་འདེབས། །འོག་མིན་གནས་སུ་ཆོས་སྐུ་ཀུན་ཏུ་བཟང་། །སྟུག་པོ་བཀོད་པར་རྡོ་རྗེ་འཆང་ཆེན་ཏེ། །རྡོ་རྗེ་གདན་དུ་ཐུབ་པ་ཆེན་པོ་ཉིད། །དབྱེར་མེད་པདྨ་ཉིད་དུ་ལྷུན་གྱིས་གྲུབ། །སངས་རྒྱས་ཀུན་འདུས་ཁྱོད་ལ༴ དབང་གི་བདག་ཉིད་དཔལ་འབར་པདྨའི་གཙོ། །ཐུགས་རྗེ་ཀུན་ཁྱབ་འགྲོ་བའི་ཡིད་བཞིན་གཏེར། །བདུད་དཔུང་ཀུན་འཇོམས་རྡོ་རྗེའི་ཏིང་འཛིན་ལྡན། །པདྨ་བཛྲ་རྩལ་ལ༴ སྐུ་མཆོག་འགྱུར་མེད་བུདྡྷ་ཐོད་ཕྲེང་རྩལ། །གསུང་མཆོག་འགག་མེད་པདྨ་ཐོད་ཕྲེང་རྩལ། །ཐུགས་མཆོག་སྐྱེ་མེད་རྡོ་རྗེ་ཐོད་ཕྲེང་རྩལ། །ཡོན་ཏན་ནུབ་མེད་རཏྣ་ཐོད་ཕྲེང་རྩལ། །ཕྲིན་ལས་ལྷུན་གྲུབ་ཀརྨ་ཐོད་ཕྲེང་རྩལ། །སྐུ་ལྔ་ཡོངས་སུ་རྫོགས་ལ་གསོལ་བ་འདེབས། །ལྷ་ཡི་གནས་སུ་གུ་རུ་སྲིད་ཐུབ་འཛིན། །ལྷ་མིན་གནས་སུ་གུ་རུ་རྣམ་པར་རྒྱལ། །མི་ཡི་གནས་སུ་གུ་རུ་ཤཱཀྱ་སེང་། །བྱོལ་སོང་གནས་སུ་གུ་རུ་སེང་རབ་བརྟན། །ཡི་དྭགས་གནས་སུ་གུ་རུ་རྣམ་སྣང་བྱེད། །དམྱལ་བའི་གནས་སུ་གུ་རུ་རྣམ་པར་གནོན། །འགྲོ་འདུལ་གུ་རུ་དྲུག་ལ་གསོལ་བ་འདེབས། །ཧཱུྃ། །རྒྱ་
མཚོར་སྐུ་འཁྲུངས་ཨོ་རྒྱན་ཡུལ་དུ་བྱོན། །རྒྱལ་པོའི་སྲས་མཛད་རྫུ་འཕྲུལ་སྣ་ཚོགས་སྟོན། །འཁོར་བར་མ་ཆགས་ཐབས་ཀྱི་རོལ་རྩེད་མཛད། །པདྨ་རྒྱལ་པོའི་སྐུ་ལ་གསོལ་བ་འདེབས། རྒྱ་གར་ཡུལ་བྱོན་རྡོ་རྗེ་གདན་ཏུ་བཞུགས། །བདུད་བཞི་བཅོམ་པས་སངས་རྒྱས་ཀུན་དང་མཉམ། །འདུལ་ཁྲིམས་ལྡན་པས་དགེ་སློང་ཆ་ལུགས་འཛིན། །ཤཱཀྱ་སེང་གེའི་སྐུ་ལ༴ ཟ་ཧོར་ཡུལ་བྱོན་མ་ག་དྷ་རུ་བཞུགས། །བསིལ་བ་ཚལ་དུ་བམ་རོའི་སྒྲུབ་པ་མཛད། །སྡེ་སྣོད་བཅུ་གཉིས་ཐུགས་ཀྱི་ཀློང་ན་གསལ། །པདྨ་སཾ་བྷའི་སྐུ་ལ༴ མུ་སྟེགས་ཡུལ་བྱོན་དགའ་བའི་ཚལ་དུ་བཞུགས། །སྙན་པའི་སྒྲ་ཡིས་ཕྱོགས་མཚམས་ཀུན་ཏུ་ཁྱབ། །གསང་སྔགས་ཕྱི་ནང་ཐུགས་ཀྱི་ཀློང་ན་གསལ། །རྡོ་རྗེ་གྲོ་ལོད་སྐུ་ལ༴ ཡངས་བ་ཅན་བྱོན་སོ་ས་གླིང་དུ་བཞུགས། །ལྟ་བ་མི་འཚོལ་ཞི་གནས་སྒོམ་མི་བྱེད། །ཐ་དད་ཕྱོགས་འཛིན་མ་གོས་མཁའ་ལྟར་གདལ། །པདྨ་ཐོད་ཕྲེང་རྩལ་ལ༴ ཁ་ཆེའི་ཡུལ་བྱོན་སིངྒ་ལ་རུ་བཞུགས། །ཐོས་བསམ་ལྡན་པས་འགྲོ་བ་མ་ལུས་འདུལ། །བྱམས་པ་ཆེན་པོས་ཕ་མ་ལྟ་བུར་མཛད། །བློ་ལྡན་མཆོག་སྲེད་སྐུ་ལ་གསོལ། །ལི་ཡི་ཡུལ་བྱོན་ལྕང་ར་སྨུག་པོར་བཞུགས། །ཤེལ་སྒོང་བྲག་ཏུ་མངོན་ཤེས་མཁའ་ལྟར་ཁྱབ། །གཞན་དོན་ཕྲིན་ལས་འབྲས་བུ་ལོ་འདབ་རྒྱས། །
ཉི་མ་འོད་ཟེར་སྐུ་ལ༴ བལ་པོའི་ཡུལ་བྱོན་ཡང་ལེ་ཤོད་དུ་བཞུགས། །གནོད་སྦྱིན་རྫོང་དུ་དམ་སྲི་སྡེ་བརྒྱད་བཏུལ། ཁམས་གསུམ་དབང་སྡུད་སྲིད་གསུམ་ཟིལ་གྱིས་གནོན། །སེང་གེ་སྒྲ་སྒྲོགས་སྐུ་ལ་གསོལ་བ་འདེབས། །བོད་ཡུལ་དབུས་བྱོན་སྟག་ཚང་སེང་ཕུག་བཞུགས། །སྣང་བ་མཐའ་ཡས་སྤྲུལ་པ་མི་ཡི་མགོན། །མཁའ་འགྲོ་སྡེ་བཞི་མ་ཚོགས་རོལ་དུ་ཁྲིད། །བདེ་བའི་དངོས་གྲུབ་སྐུ་ལ༴ སྲིན་པོའི་ཡུལ་བྱོན་རྔ་ཡབ་གླིང་དུ་བཞུགས། །ཟངས་མདོག་དཔལ་རིར་གདོང་དམར་སྲིན་པོ་བཏུལ། །སྐྱེ་འགྲོ་སེམས་ཅན་ཐམས་ཅད་བདེ་ལ་བཀོད། །པདྨ་འབྱུང་གནས་སྐུ་ལ༴ པདྨ་འགྲོ་མགོན་རྩལ་དང་དབང་ཕྱུག་མགོན། །པདྨ་གྲུབ་པའི་བློ་གྲོས་ཆེ་མཆོག་རྩལ། །མཁའ་འགྲོའི་དབང་ཕྱུག་མགོན་པོ་བི།།།པ། །ནག་པོ་སྤྱོད་པ་ཁྱེའུ་ཆུང་མཁའ་ལྡིང་རྩལ། །པདྨ་ས་ར་ཧ་དང་མངའ་བདག་རྩལ། །པདྨ་ཀུན་ཏུ་རྒྱུ་དང་ཆགས་མཆོག་རྩལ། །འགྲོ་བའི་སྐབས་གནས་པདྨ་ཕྲིན་ལས་མགོན། །དོན་ཡོད་ཞགས་པ་གཟི་བརྗིད་འོད་འཕྲོ་བ། །ཌོམྦི་པ་དང་རིགས་ལྡན་པདྨ་དཀར། །པདྨ་བཛྲ་པདྨ་ཐོད་ཕྲེང་རྩལ། །འཕྲུལ་མཚན་ཉི་ཤུར་བསྟན་ལ་གསོལ་བ་འདེབས། །རྡོ་རྗེ་སྙིང་པོ་མགོན་པོ་སྲི་འདུལ་ཆེ། །ནཱ་ག་ཀླུ་འདུལ་ནག་པོ་ཀུན་འཇོམས་རྩལ། །རྡོ་རྗེ་བེ་ཅོན་དེད་དཔོན་བགེགས་རིགས་འཇོམས། །ཚེ་བདག་དམར་པོ་ཛྭ་ལ་ཀརྨ་སྲིན། །
ཡགྴ་མེ་དབལ་སྐུ་མཆོག་དམར་པོར་གྲགས། །གསང་བདག་ཁྱབ་འཇུག་རྡོ་རྗེ་འཇིགས་པར་བྱེད། །སྲི་རྒྱལ་རབ་འཇོམས་རྔམ་ཆེན་མུ་སྟེགས་གཤེད། །དཔལ་ཆེན་ཧེ་རུ་གར་གྱི་དབང་ཕྱུག་གཙོ། །མ་དག་གདུག་པའི་ལས་རྒྱུད་རྩད་ནས་གཅོད། །འགྲན་ཟླ་བྲལ་བ་ཁྲོ་རྒྱལ་ཡོངས་ཀྱི་རྗེ། །དྲེགས་པ་ཚར་གཅོད་རྣམ་འཕྲུལ་སྣ་ཚོགས་སྟོན། །དམར་ནག་མེ་ཕྲེང་ཅན་ལ་གསོལ་བ་འདེབས། །ལྷ་ལྕམ་མནྡཱ་ར་བ་འོད་འཆང་མ། །ཤཱཀྱ་དེ་མ་ཡེ་ཤེས་མཚོ་རྒྱལ་མ། །ཀཱ་ལ་སིདྡྷི་བཀྲ་ཤིས་ཁྱེ་འདྲེན་སོགས། །ཡུམ་མཆོག་མཁའ་འགྲོའི་ཚོགས་ལ༴ འཇམ་དཔལ་བཀའ་བབ་བྲག་ལ་ཕུར་པ་འདེབས། །སངས་རྒྱས་ཡེ་ཤེས་ཞབས་ལ་གསོལ་བ་འདེབས། །དབང་ཆེན་བཀའ་བབ་རྟ་ཞལ་སྤྱི་བོར་ཐོན། །རྒྱལ་བ་མཆོག་དབྱངས་ཞབས་ལ༴ ཡང་དག་བཀའ་བབ་ཉི་མའི་ཟེར་ལ་གཤེགས། །ནམ་མཁའི་སྙིང་པོའི་ཞབས་ལ༴ ཆེ་མཆོག་བཀའ་བབ་བྲག་ལས་བདུད་རྩི་འབྱིན། །ཡེ་ཤེས་གཞོན་ནུའི་ཞབས་ལ༴ ཕུར་པའི་བཀའ་བབ་བསད་པའི་མི་རོ་བསླངས། །ཡེ་ཤེས་མཚོ་རྒྱལ་ཞབས་ལ༴ བླ་མེད་བཀའ་བབ་མ་མོ་བྲན་དུ་ཁོལ། །དཔལ་གྱི་ཡེ་ཤེས་ཞབས་ལ༴ མཆོད་བསྟོད་བཀའ་བབ་དྲེགས་པ་ཕོ་ཉར་འགྱེད། །དཔལ་གྱི་སེང་གེའི་ཞབས་ལ༴ དྲག་སྔགས་བཀའ་བབ་ཡེ་ཤེས་སྤྱན་དང་ལྡན། །བཻ་རོ་ཙ་ནའི་ཞབས་ལ༴ བདེར་འདུས་
བཀའ་བབ་གཞན་སྣང་ཟིལ་གྱིས་གནོན། །ཁྲི་སྲོང་ལྡེའུ་བཙན་ཞབས་ལ་གསོལ་བ་འདེབས། །རྡོ་རྗེ་བདུད་འཇོམས་བར་སྣང་རླུང་ལྟར་རྒྱུ། །ཡེ་ཤེས་དབྱངས་ཆེན་མཁའ་སྤྱོད་གནས་རྣམས་བགྲོད། །སོག་པོ་ལྷ་དཔལ་གཅན་གཟན་གཉའ་ནས་འཛིན། །སྣ་ནམ་ཡེ་ཤེས་མཁའ་ལ་བྱ་ལྟར་ལྡིང་། །གཡུ་སྒྲ་སྙིང་པོ་གསེར་གྱི་རྡོ་རྗེར་སྤྲུལ། །དཔལ་གྱི་དབང་ཕྱུག་ཕུར་བུས་གདིང་ཚད་བསྒྲལ། །ཤུད་བུ་དཔལ་སེང་ཆུ་བོ་གྱེན་དུ་ཟློག །འདན་མ་རྩེ་མང་མི་བརྗེད་གཟུངས་རྣམས་ཐོབ། །སྐ་བ་དཔལ་བརྩེགས་གཞན་སེམས་ས་ལེར་མཁྱེན། །རྒྱལ་བའི་བློ་གྲོས་རོ་ལངས་གསེར་དུ་བསྒྱུར། །ཁྱེའུ་ལོ་ཙཱས་ནམ་མཁའི་བྱ་ཕྱག་འཛིན། །དྲན་པ་ནམ་མཁས་བྱང་ནས་གཡག་རྒོད་འགུགས། །འོ་བྲན་དབང་ཕྱུག་ཆུ་ལ་ཉ་ལྟར་འཕྱོ། །རྨ་ཐོག་རིན་ཆེན་ཕ་ཝོང་ཟན་ལྟར་གསོལ། །དཔལ་གྱི་རྡོ་རྗེ་རི་བྲག་ཐོགས་མེད་རྒྱབ། །ལང་གྲོ་དཀོན་མཆོག་ཐོག་ཆེན་མདའ་ལྟར་འཕེན། །རྒྱལ་བ་བྱང་ཆུབ་ནམ་མཁར་སྐྱིལ་ཀྲུང་བཞུགས། །མཆིམས་ཕུའི་གྲུབ་ཆེན་རྗེ་འབངས་ཉེར་ལྔ་ལ། །གསོལ་འདེབས་ཁྱེད་རང་ལྟ་བུར་བྱིན་གྱིས་རློབས། །ཡེར་པའི་གྲུབ་ཐོབ་བརྒྱ་རྩ་ཡང་རྫོང་གི། རྟོགས་ལྡན་ང་ལྔ་ཤེལ་བྲག་སྔགས་འཆང་བ། །སུམ་ཅུ་ལ་སོགས་གུ་རུ་པདྨ་ཡིས། །རྗེས་བཟུང་སྐྱེས་མཆོག་རྣམས་ལ་གསོལ༴ མཁན་
ཆེན་ཞི་འཚོ་རྦ་རིགས་རཏྣ་སོགས། །ཁྲིམས་ལྡན་དགེ་འདུན་རྣམས༴ བི་མ་མི་ཏྲ་ཏིང་འཛིན་བཟང་པོ་སོགས། །རྡོ་རྗེའི་སྐུ་བརྙེས་ཁྲི་ལ༴ ཅོག་རོ་ཀླུ་ཡི་རྒྱལ་མཚན་ཡེ་ཤེས་སྡེ། །ཤཱཀྱ་པྲ་བྷ་ཀླུ་དབང་སྲུང་བ་སོགས། །སྒྲ་བསྒྱུར་བརྒྱ་རྩ་བརྒྱད་ལ༴ མེས་དབོན་རྣམ་གསུམ་ལྷ་སྲས་སྐུ་མཆེད་སོགས། །སྤྲུལ་པའི་ཆོས་རྒྱལ་རྣམས་ལ༴ གྱིམ་ཤང་ནག་པོ་ལ་སོགས་སྔགས་པའི་ཚོགས། །འབུམ་ཕྲག་བཅུ་དང་བརྒྱད་ལ༴ གཉན་ཆེན་དཔལ་དབྱངས་ཡེ་ཤེས་སྙིང་པོ་སོགས། །སྔགས་གྲུབ་བརྒྱད་ཅུར་རྩ་ལྔར༴ ཤེལ་དཀར་རྡོ་རྗེ་འཚོ་སོགས་འཇའ་ལུས་ཀྱི། །མཁའ་འགྲོ་ཉི་ཤུ་རྩ་ལྔར༴ རྨ་གཉག་སོ་ཟུར་གནུབས་དང་དམ་གཙང་བྱམས། །རོང་ཟོམ་ཀློང་ཆེན་པ་སོགས་བཀའ་བརྒྱུད་ཀྱི། །བསྟན་པ་འཛིན་མཛད་ཀུན༴ གཏེར་ཆེན་བརྒྱ་རྩ་གཏེར་ཕྲན་སྟོང་རྩ་གཉིས། །ལས་ཅན་ཆོས་ཀྱི་བདག་སོགས་གཏེར་བརྒྱུད་ཀྱི། །བསྟན་པ་འཛིན༴ མདོ་སྒྱུ་སེམས་གསུམ་བཀའ་དགོངས་ཕུར་གསུམ་དང་། །ཕག་ཁྲོས་སེང་གསུམ་མ་མགོན་སྡེ་ལྔ་དང་། །ཛམ་ལྷ་རིགས་ལྔ་ལ་སོགས་ཡི་དམ་དང་། །མཁའ་འགྲོ་དམ་ཅན་རྒྱ༴ ཕྱི་ནང་གསང་བའི་བར་ཆད་ཞི་བ་དང་། །བསམ་པ་ལྷུན་གྱིས་འགྲུབ་པར་བྱིན་གྱིས་རློབས། །དབང་བཞིའི་ཡེ་ཤེས་རྒྱུད་ལ་སྨིན་པ་དང་། །རིམ་གཉིས་ལམ་ནས་ཟུང་འཇུག་རྡོ་རྗེའི་སྐུ། །སྟན་ཐོག་འདི་རུ་ཐོབ་
བར་བྱིན་གྱིས་རློབས། །དེ་སྐད་ཚིག་གི་མཚམས་སྦྱོར་བ་གཏོགས་པ། །ཕལ་ཆེར་རྡོ་རྗེའི་གསུང་ཚིག་ཁོ་ན་སྟེ། །ཡིད་ཆེས་ཁུངས་བཙུན་བྱིན་རླབས་དྲོད་དང་ལྡན། །གུ་རུའི་རྣམ་འཕྲུལ་ཐ་དད་མཚན་གྱི་ཚོགས། །བཀོད་ན་ལེགས་ཀྱང་མང་དྲག་རྒྱུན་འདོན་དཀའ། །རྩ་བའི་གཙོ་བོ་བསྡུས་པས་མ་ཚང་མེད། །རང་ཉིད་ཕྱིར་དུ་བྲི་སྙམ་གཡེང་།།། །དད་འབྱོར་ལྡན་པ་ཕུན་ཚོགས་དགེ་ལེགས་གྱིས། །རྗེ་འབངས་ཉེར་ལྔའི་གསོལ་འདེབས་བསྐུལ་བ་ཡིས། །རྐྱེན་བྱས་པདྨའི་རྗེས་འཇུག་གུ་་པས། །ནགས་ཁྲོད་ཀུན་བཟང་བདེ་ཆེན་གླིང་དུ་བྲིས། །འབྲེལ་ཐོགས་འགྲོ་ཀུན་གུ་རུས་རྗེས་འཛིན་ཤོག །མངྒ་ལཾ།། ༈ །།སངས་རྒྱས་ཀུན་དངོས་མ་ཧཱ་གུ་རུ་ལ་མི་ཕྱེད་དད་པའི་གདུལ་དབྱངས་རིགས་མཆོག་གྲུབ་པའི་ཕྱག་རྒྱ་ཞེས་བྱ་བ་བཞུགས་སོ།། །ཀུན་བཟང་འོད་མི་འགྱུར་བ་ཐོག་མའི་མགོན། །ཀློང་གསལ་ཉི་མ་ཡེ་ཤེས་འོད་ལྔའི་རྩལ། །མཉམ་ཡངས་རོལ་པ་ཆེན་པོའི་བརྡ་དང་རྟགས། །དག་པ་རབ་འབྱམས་རྒྱལ་དང་རྒྱལ་བའི་སྲས། །སྒྱུ་འཕྲུལ་གསང་བ་སྙིང་པོར་བཀོད་པའི་སྤྲིན། །མི་ཟད་རྒྱན་གྱི་འཁོར་ལོའི་སྤྲོ་བསྡུ་པ། །ཞིང་འདིར་གུ་རུ་པདྨ་འབྱུང་གནས་ཞེས། །རྡོ་རྗེ་སློབ་དཔོན་གཟུགས་སུ་ཤར་ལ་འདུད། །ཚེ་འོད་དཔག་མེད་པདྨའི་སྣང་བ་རྒྱས། །བསྐལ་བཟང་སྒྲོན་མེ་བརྒྱ་ཕྲག་བཅུ་ལ་སོགས། །སངས་རྒྱས་ཐམས་ཅད་དགོངས་པའི་རྩལ་ལས་འཁྲུངས། །དུས་གསུམ་རྒྱལ་བའི་ཕྲིན་ལས་ཀུན་ཀྱང་མཛད། །
ཕྱོགས་བཅུའི་ཞིང་དུ་རྡུལ་སྙེད་བཅོམ་ལྡན་འདས། །རེ་རེའི་མདུན་ན་བཀོད་པ་ཚད་མེད་སྤྲུལ། །མདོ་སྔགས་བསྟན་གཉིས་ཟུང་དུ་འཇུག་པར་སྣང་། །འོད་གསལ་རྡོ་རྗེ་སྙིང་པོའི་འབྲས་བུ་བརྡལ། །སྤྱན་རས་གཟིགས་སོགས་སེམས་དཔའི་སྐུར་བསྟན་ནས། །སྙིང་རྗེའི་མཐུ་ཡིས་འཁོར་བ་དོང་ནས་སྤྲུགས། །སངས་རྒྱས་ཐོད་པ་རྩལ་སོགས་ཧེ་རུ་ཀའི། །དཀྱིལ་འཁོར་རྒྱ་མཚོས་དངོས་ཀུན་བདེ་བར་སྡོམ། །ལ་ལར་དཔའ་ཆེན་ཁྲོ་བོའི་དབང་པོར་བཞེངས། །འཁོར་ལོ་རྣམ་བཞི་འཁོར་འདས་སྲོག་ཏུ་སྐོར། །རྟ་སྐད་ཐེང་གསུམ་རྒྱུད་གསུམ་ཁྱབ་པར་སྒྲོགས། །རུ་ལུའི་སྒྲ་དབྱངས་གྲུབ་མཐའ་ཟད་པར་འདྲེན། །ཐབས་ཤེས་བདུད་རྩིས་གཉུག་མའི་ཕུང་ཁམས་གསོ། །རིགས་མཆོག་ཕུར་བུས་སྲིད་བཅུད་ཐལ་བར་འབྱིན། །དགའ་རབ་དཔལ་སེང་དྲི་མེད་བཤེས་གཉེན་དང་། །མདའ་བསྣུན་བི་རཱུ་ནག་པོ་སྤྱོད་ལ་སོགས། །གྲུབ་པའི་སློབ་དཔོན་དུ་མའི་སྒྱུ་ཐབས་ཀྱིས། །གྲུབ་པའི་འཁོར་ལོ་ནམ་མཁའི་ཕ་མཐར་སྒྱུར། །རེས་འགའ་ཉན་ཐོས་བློ་གྲོས་ཆེན་པོ་དང་། །མཁས་མཆོག་དུ་མའི་གཟུགས་ཀྱིས་བསྟན་གསལ་མཛད། །པདྨ་དཀར་སོགས་ཆོས་སྐྱོང་རྒྱལ་བློན་དང་། །དགེ་སྦྱོང་བྲམ་ཟེ་རིག་སྔགས་འཆང་བའི་ཚུལ། །གཉིས་སྤངས་དབུས་གནས་ཕྱོགས་ཀྱི་གོས་ཅན་མ། །ལྷན་སྐྱེས་བདེ་སྐྱེད་ཌཱ་ཀིའི་རྡུལ་ཚོགས་སྤྲོ། །མདོར་ན་ཟག་
མེད་ཐུགས་ཀྱི་ཐིག་ལེ་ལས། །སྐུ་དང་ཞིང་ཁམས་རབ་འབྱམས་སྤྲོ་ཞིང་བསྡུ། །ཁྱད་པར་བོད་དང་འགྲོ་ལྡིང་རྔ་ཡབ་གླིང་། །རྒྱལ་བ་ཀུན་གྱི་ཐུགས་རྗེས་སྤངས་པ་དེ། །བརྩེ་བས་བཟུང་མཛད་མ་ཧཱ་གུ་རུ་རྗེ། །འཕུར་འགྲོའི་སློབ་དཔོན་རྒྱལ་བ་ཀུན་གྱི་དངོས། །རང་བྱུང་སངས་རྒྱས་མཚོ་སྐྱེས་རྡོ་རྗེ་འཆང་། །མཁའ་འགྲོའི་དབང་ཕྱུག་བདེ་བ་ཆེན་པོ་དཔལ། །མ་རུངས་ཚང་གཅོད་བདུད་འདུལ་ཐོད་ཕྲེང་རྩལ། །གདོད་ནས་མཆོག་བརྙེས་པདྨ་བཛྲའི་ཞབས། །བོད་འབངས་སྐྱབས་གཅིག་ཨོ་རྒྱན་རིན་པོ་ཆེ། །སྙིང་ནས་གསོལ་འདེབས་བུ་ལ་ཐུགས་རྗེས་གཟིགས། །མདོ་སྔགས་བསྟན་པ་དགོངས་ཀའི་དམར་ཐག་བཞིན། །ཆོས་བཞིན་སྤྱོད་ལ་བར་ཆད་རླུང་ལྟར་འཚུབས། །ནག་ཕྱོགས་གདུགས་པའི་ཆོ་འཕྲུལ་ས་སྟེང་ཁྱབ། །བོད་ཁམས་བདེ་སྐྱིད་ནམ་གཞུག་ཆར་ལྟར་ཟད། །མཐའ་དམག་རྒྱ་འདྲེ་འབྱུང་པོའི་ཁ་རླངས་འཐིབས། །དུ་རུཥྐ་ཡི་བསྐལ་ངན་ཐོག་མར་ཤར། །དུས་གསུམ་མཁྱེན་པའི་ལུང་བསྟན་ཐོག་ཏུ་བབ། །གདུལ་དཀའ་འདུལ་བའི་དུས་ཚོད་དེང་ལགས་སོ། །སྐྱབས་གཅིག་ཁྱོད་ལས་རེ་ས་མེད་པ་རྣམས། །དུག་ལྔའི་དབང་གྱུར་སྤྱོད་པ་རྩིངས་མོད་ཀྱང་། །ཁྱེའུ་སྨྱོ་ལ་ཕ་མ་ཁྲོ་བ་བཞིན། །ཐར་མེད་སྡུག་བསྔལ་རྒྱ་མཚོར་འདོར་ཕོད་དམ། །མི་དགེ་སྤྱོད་ཀྱང་དཀོན་མཆོག་གཙུག་ཏུ་ཁུར། །དམ་སྡོམ་འཆལ་ཡང་ཨོ་རྒྱན་རྗེ་ལ་མོས། །ལྟ་དགོངས་དམན་ཀྱང་པདྨའི་རྗེས་སུ་ཞུགས། །སྨྱོན་པས་རི་ལུང་གང་ལ་བརྩེ་བས་གཟིགས། །ཚོགས་
བསག་འདོད་ཀྱང་ལྟོ་གོས་འཚོ་བས་བཀྲེན། །ཉམས་ལེན་བྱས་ཀྱང་ཞེ་བཅད་སྙིང་རུས་ཆུང་། །ཆོས་བཞིན་སྒྲུབ་ཚེ་རྐྱེན་ངན་ཐོག་ཏུ་བབ། །སྐལ་དམན་བདག་ཅག་རྣམས་ལ་ཐུགས་རྗེས་སྐྱོབས། །དེང་བཟུང་གཞོན་ནུ་བུམ་སྐུར་བྱང་ཆུབ་བར། །རྒྱལ་བ་པདྨ་ཐོད་ཕྲེང་མ་གཏོགས་པའི། །སྐྱབས་དང་རེ་ས་གཞན་ཏུ་ཚོལ་གྱུར་ན། །ན་རཀ་དོང་དུ་སྐྱོལ་ཅིག་ས་མ་ཡ། །རྩ་བའི་བླ་མར་བཟུང་ངོ་བྱིན་གྱིས་རློབས། །ལྷག་པའི་ལྷ་རུ་བསྙེན་ནོ་དངོས་གྲུབ་སྩོལ། །བདེ་སྐྱེད་མཁའ་འགྲོར་བསྟེན་ནོ་ཡེ་ཤེས་སྤོར། །ཆོས་སྐྱོང་ཚོགས་རྗེར་བསྒྲུབ་བོ་ཕྲིན་ལས་མཛོད། །ལུས་ངག་ཡིད་གསུམ་པདྨ་སཾ་བྷ་དང་། །རྒྱལ་བའི་སྐྱེད་ཡུམ་མཐིང་འོད་འབར་མ་ལ། །སྙིང་ནས་འབུལ་ལོ་ལེགས་ཉེས་སྐྱིད་སྡུག་དང་། །མཐོ་བཏང་དམའ་བཏང་ཅི་མཛད་ཁྱེད་རང་མཁྱེན། །བདག་གི་སྒོ་གསུམ་ཨོ་རྒྱན་ཡབ་ཡུམ་གྱི། །གསང་བ་གསུམ་དང་དབྱེར་མེད་གཅིག་གྱུར་ནས། །བདག་ཉིད་ཆེན་པོ་པདྨ་ཡབ་ཡུམ་གྱི། །འགྲོ་འདུལ་ཕྲིན་ལས་ནམ་མཁའི་མཐར་སྤེལ་ཤོག །ཧཱུྃ་ཆེན་ཀ་ར་རྒྱལ་ཚབ་བཻ་རོ་སོགས། །པདྨས་རྗེས་བཟུང་སྲིད་དོ་འཚལ་ཀུན་གྱི། །ཐུགས་བསྐྱེད་སྨོན་ལམ་རྣམ་ཐར་མཛད་ཕྲིན་ཚོགས། །ཐམས་ཅད་བདག་ཉིད་ཁོ་ནས་ངེས་འགྲུབ་ཤོག །འཁོར་ལོས་དཔུང་ཚོགས་ནམ་མཁར་འདྲེན་པ་ལྟར། །འགྲོ་ཀུན་གྲོལ་བཞིའི་མཁའ་ལ་འདྲེན་པར་
ཤོག །རྡོ་རྗེས་དངོས་པོ་ཐམས་ཅད་བཅོམ་པ་ལྟར། །ལྟ་ངན་ཐམས་ཅད་བདག་གིས་ཕམ་བྱེད་ཤོག །སྲ་མཁྲེགས་བྲག་རྫོང་ཐོག་གིས་བཤིག་པ་ལྟར། །གདུག་པ་ཅན་ཀུན་ནུས་མཐུས་འདུལ་བར་ཤོག །མ་གི་ཏ་ཡིས་དུག་སྦྲུལ་སྐྲག་བྱེད་ལྟར། །ཆོས་ཀྱི་དི་ཡིས་ཆོས་མིན་སྐྲག་བྱེད་ཤོག །སེང་འོས་ཐིགས་པས་ཕལ་པ་མང་སྒྱུར་ལྟར། །རྟོགས་པའི་ཐིགས་པས་ཉོན་མོངས་ཀུན་བསྒྱུར་ཤོག །སྒྲོན་མེ་གཅིག་གིས་བསྐལ་སྟོང་མུན་འཇོམས་ལྟར། །འཁོར་བའི་མུན་ཁང་བདག་གིས་གསལ་བར་ཤོག །ཁབ་ལེན་རྡོ་བས་ལྕགས་སྒྲོག་གཅོད་པ་ལྟར། །ཞེན་པའི་འཆིང་ཀུན་བདག་གིས་གཅོད་བྱེད་ཤོག །པདྨའི་མཚོ་ལ་ངང་མོ་འདུ་བ་བཞན། །སྐལ་ལྡན་ཐམས་ཅད་བདག་ལ་འདུ་བར་ཤོག །གསེར་འགྱུར་རྩི་ཡིས་ལྕགས་རྣམས་སྒྱུར་བ་བཞིན། །མཐོང་ཐོས་དྲན་རེག་སྣང་བཞི་ཟད་ཕྱིན་ཤོག །ཤེལ་གོང་འདམ་དུ་བྱིང་ཡང་དྲི་མེད་ལྟར། །སྲིད་པར་སྐྱེས་ཀྱང་སྲིད་པས་མ་གོས་ཤོག །ཀ་ལ་པིངྐས་སྒོ་ངར་སྒྲ་འབྱིན་ལྟར། །མ་ཡི་མངལ་ནས་ཆོས་ཀྱི་སྒྲ་འབྱིན་ཤོག །སེང་ཕྲུག་མ་ཡི་རུམ་ནས་རྩལ་རྫོགས་ལྟར། །ལུས་རྒྱས་བཏུམས་ཀྱང་རྣལ་འབྱོར་རྩལ་རྫོགས་ཤོག །རྩི་མཆོག་པདྨོ་ཟོས་པས་ཚེ་རིང་ལྟར། །བདག་གིས་འགྲོ་ལ་ཚེ་དབང་སྦྱིན་ནུས་ཤོག །ཤ་ཀའི་ཤིང་ལས་སྨན་རིགས་འབྱུང་བ་ལྟར། །བདག་ལས་འགྲོ་
ཀུན་འཚོ་བའི་སྨན་འབྱུང་ཤོག །དཔག་བསམ་དྲི་བཟང་ཁོར་ཡུག་འཐུལ་བ་ལྟར། །ཚུལ་ཁྲིམས་དྲི་ཡིས་ལྷར་བཅས་དགའ་སྐྱེད་ཤོག །ཆོས་ཀྱི་རྔ་སྒྲས་བག་མེད་སློང་བ་བཞིན། །འོད་གསལ་རྡོ་རྗེ་ཐེག་པའི་སྒྲ་སྒྲོགས་ཤོག །སྤྲིན་དང་བསང་བུ་མཁའ་ལ་གྲོལ་བ་ལྟར། །གཅེར་མཐོང་རིག་པར་རྟོག་ཚོགས་རང་གྲོལ་ཤོག །མཁའ་ལྡིང་དབང་པོ་ཀླུ་ཡིས་མི་བརྫི་ལྟར། །བར་ཆད་བདུད་ལས་རྟག་ཏུ་རྣམ་རྒྱལ་ཤོག །སེང་གེ་གང་ལའང་བག་ཚ་མེད་པ་བཞིན། །དངོས་དང་དངོས་མེད་ཀུན་ལ་བསྙེངས་བྲལ་ཤོག །བཻ་ཌཱུའི་སྙིང་པོར་དྲི་མས་མ་གོས་ལྟར། །སྡོམ་དང་དམ་ཚིག་ཉེས་པས་མ་གོས་ཤོག །ཆུ་བོ་རྒྱ་མཚོའི་གྲོགས་སུ་འགྱུར་བ་ལྟར། །འདོད་ཡོན་ལམ་གྱི་གྲོགས་སུ་འཁྱེར་ནུས་ཤོག །འབྱུང་བཞི་ཐམས་ཅད་ནམ་མཁས་ཁྱབ་པ་ལྟར། །བདག་གི་ཐུགས་རྗེས་འགྲོ་ཀུན་ལ་ཁྱབ་ཤོག །ཉི་ཟླས་གླིང་བཞི་སྐོར་ལ་ངལ་མེད་བཞིན། །པད་འབྱུང་ཕྲིན་ལས་རྟག་ཏུ་སྒྲུབ་བྱེད་ཤོག །ཡིད་བཞིན་ནོར་ལས་འདོད་པ་ཀུན་འཇོ་ལྟར། །བདག་ཉིད་སེམས་ཅན་ཀུན་གྱི་འདོད་འཇོར་ཤོག །གྲོང་ཁྱེར་རྒྱུན་གཅོད་ལྟ་བའི་གདིང་རྙེད་དེ། །རི་བོ་ཅོག་བཞག་མན་ངག་ཉམས་འོག་ཆུད། ཁམས་གསུམ་ཡོངས་གྲོལ་དགོངས་པའི་གཟེར་ཐེབས་ནས། །ཉོན་མོངས་གནས་དག་གང་ཟག་ཆོས་བོར་ཤོག །རྡོ་རྗེའི་སྐུ་ཅན་པད་འབྱུང་
ཡབ་ཡུམ་གྱི། །ལྟ་བ་སྐྱོང་ཞིང་བསྟན་པ་སྤེལ་བ་དང་། །གདུལ་དཀའ་འདུལ་བའི་ཕྲིན་ལས་རབ་བསྒྲུབས་ནས། །པདྨ་འོད་ཀྱི་ཀློང་དུ་བྱང་ཆུབ་ཤོག །ཅེས་པའང་ས་ཕོ་སྤྲེལ་ལོ་སྤྲེལ་ཟླའི་ཚེས་བཅུའི་དུས་བཟང་མཆོད་པའི་སྐབས་པདྨ་གར་གྱི་དབང་ཕྱུག་ཕྲིན་ལས་འགྲོ་འདུལ་རྩལ་གྱིས་གུས་པ་ཆེན་པོས་གསོལ་བ་བཏབ་པ་སྟེ་མཆོག་གསུམ་རྩ་བ་གསུམ་ལ་བསླུ་བ་མི་མངའ་བའི་བདེན་པས་དེ་དེ་བཞིན་ཏུ་འགྲུབ་བར་གྱུར་ཅིག །དགེ་ལེགས་འཕེལ།། ༈ །།སྐྱབས་གཅིག་སངས་རྒྱས་གཉིས་པའི་མཚན་གྱི་བྱེ་བྲག་ལ་བསྟོད་ཅིང་དགོས་དོན་སྨོན་ལམ་དུ་གསོལ་བ་འདོད་འཇོའི་གཏེར་བུམ་ཞེས་བྱ་བ། །ཆོས་དབྱིངས་རྣམ་དག་པདྨོ་བདེ་བ་ཅན། །མ་འཁྲུལ་རང་རིག་སངས་རྒྱས་འོད་མི་འགྱུར། །རང་སྣང་འཁོར་ལ་དགོངས་པ་རྒྱུད་རང་ཤར་བསྟན། །སྤྲུལ་པའི་སེམས་དཔས་བསྡུས་པ་གསོལ་བ་འདེབས། །བསམ་པ་ལྷུན་གྱིས་འགྲུབ་བར་བྱིན་གྱིས་རློབས། །དེ་ཉིད་རིག་འཛིན་བརྡ་དང་གང་ཟག་གི། ཚིག་ལས་བརྒྱུད་དེ་གདུལ་བྱའི་ལམ་འདྲེན་ཕྱིར། །སྐུ་དང་ཞིང་གི་བཀོད་པ་ཚད་མེད་པ། །འཁོར་བ་ཇི་སྲིད་སྟོན་ལ་གསོལ༴ བསམ་པ༴ ཀོ་ཥའི་མཚོ་ཀླིང་པད་སྡོང་དགུ་པའི་དབུས། །རབ་འབྱམས་རྒྱལ་བ་ཀུན་གྱི་གསང་བ་འདུས། །རིགས་ཀུན་ཁྱབ་བདག་མཚོ་སྐྱེས་རྡོ་རྗེ་འཆང་། །པདྨ་འབྱུང་གནས་ཞབས་ལ༴ བསམ་པ༴ ཨོ་རྒྱན་རྒྱལ་སར་སྟོབས་ཀྱི་འཁོར་ལོས་སྒྱུར། །རྡུལ་སྙེད་སྨིན་ཅིང་
གྲོལ་ནས་ངེས་འབྱུང་སྟེ། །བརྟུལ་ཞུགས་སྤྱོད་པས་མཁའ་འགྲོའི་དབང་ཕྱུག་གྱུར། །པདྨ་རྒྱལ་པོའི་ཞབས་ལ༴ བསམ་པ༴ རིག་པའི་གནས་ལྔར་མཁས་པའི་ཕུལ་དུ་ཕྱིན། །རཱ་ག་རཀྟར་ཚེ་དཔག་མེད་མགོན་གྲུབ། །རྡོ་རྗེའི་སྐུ་ཅན་སངས་རྒྱས་ཐོད་པ་རྩལ། །བློ་ལྡན་མཆོག་སྲེད་ཞབས་ལ༴ བསམ་པ། །ཆོ་འཕྲུལ་ཆེན་པོས་ཟ་ཧོར་རྒྱལ་ཁམས་བཏུལ། །སྨྲ་བའི་སེང་གེ་པ་ཆེན་བྱེ་བའི་གཙུག །ཡན་ལག་མེད་བའི་རྡོ་རྗེའི་ཅོད་པན་མཛེས། །པདྨ་ས་བྷ་བ་ལ༴ བསམ་པ༴ དུར་ཁྲོད་བརྒྱད་དུ་དཔའ་བོའི་དབང་ཕྱུག་ཚུལ། །རིག་འཛིན་འབུམ་ལ་བཀའ་ཡི་བགྲོ་བ་མཛད། །འཕྲུལ་མཚན་བཞི་བཅུའི་གར་གྱི་རོལ་མོ་པ། །ཉི་མ་འོད་ཟེར་ཞབས་ལ༴ བསམ་པ༴ རྡོ་རྗེ་གདན་དུ་བདུད་བཞིའི་གཡུལ་ངོ་བཅོམ། །མུ་སྟེགས་ཚར་གཅོད་ཆོས་ཀྱི་རྒྱལ་མཚན་བསྒྲེངས། །ཐུབ་པའི་རྒྱལ་ཚབ་ཐུབ་དབང་གཉིས་པར་གྲགས། །ཤཱཀྱ་སེང་གེའི་ཞབས་ལ༴ བསམ་པ༴ ལོག་སྨྲའི་སྟོན་པ་ཡིད་སྲུབས་རྒྱབ་བརྟེན་བཅས། །དྲག་ཤུལ་རོལ་པས་མིང་གི་ལྷག་མར་བཀོད། །གསང་བའི་མཛོད་འཛིན་གསང་བདག་ཧེ་རུ་ཀའི། །སེང་གེ་སྒྲ་སྒྲོགས་ཞབས་ལ༴ བསམ་པ༴ གདོང་དམར་མི་དང་མི་མིན་གདུག་པའི་ཚོགས། །དངོས་དང་བརྒྱུད་ནས་ཐབས་ཀྱི་ཐེག་པར་བཞག །སྙིགས་དུས་ཐུགས་རྗེའི་ཕྲིན་ལས་ཁྱད་པར་ཅན། །རྡོ་རྗེ་གྲོ་
ལོང་ཞབས་ལ༴ བསམ་པ༴ མ་རུངས་གྲིན་པོའི་རྒྱལ་ཁམས་ཐབས་ཀྱིས་བཏུལ། །གསང་ཆེན་ཆོས་འཁོར་དུས་གསུམ་རྟག་པ་བསྐོར། །སངས་རྒྱས་ཆོ་འཕྲུལ་ཞིང་ཁམས་མཐའ་ཡས་ཁྱབ། །རྡོ་རྗེ་ཐོད་ཕྲེང་རྩལ་ལ་གསོལ་བ༴ བསམ་པ་ལྷུན་གྱིས་འགྲུབ་བར་བྱིན་གྱིས་རློབས། །ཁྱེད་ནི་དཀོན་མཆོག་ཀུན་གྱི་སྤྲུལ་པ་སྟེ། །དཀོན་མཆོག་ཀུན་ཀྱང་ཁྱེད་ཀྱི་རྣམ་འཕྲུལ་ལགས། །ཁྱེད་ནི་དཀྱིལ་འཁོར་ཀུན་གྱི་ཁྱབ་བདག་སྟེ། །དཀྱིལ་འཁོར་ཀུན་ཀྱང་ཁྱེད་ཀྱི་རོལ་གར་ཉིད། །ཁྱེད་ནི་འཁོར་འདས་ཀུན་གྱི་སྤྱི་དཔལ་ཏེ། །འཁོར་འདས་ཀུན་ཀྱང་ཁྱེད་ཀྱི་བཀོད་པ་ལགས། །ཁྱེད་ནི་བློ་གཏད་ཐུབ་པའི་སྐྱབས་མཆོག་སྟེ། །ཁྱོད་དོར་ནས་ནི་སྐྱབས་གཞན་མི་ཚོལ་བའི། །རྗེས་འཇུག་བདག་ཅག་ཐུགས་རྗེས་མི་འདོར་བ། །སངས་རྒྱས་རྟག་པ་ཨོ་རྒྱན་གུ་རུ་མཁྱེན། །མངོན་ཤེས་དྲུག་ཅུས་འཁོར་འདས་ས་ལེར་མཁྱེན། །གདུལ་བྱ་འདུལ་ཚུལ་ནམ་ཡང་བསྙེལ་བ་མེད། །དེ་ཕྱིར་མགོན་པོ་ཁྱོད་ཀྱི་བྲན་ཐ་ལ། །ཡེ་ཤེས་སྤྱན་གྱིས་མྱུར་དུ་གཟིགས་སུ་གསོལ། །དད་ལྡན་མི་རེའི་མདུན་ཏུ་པད་འབྱུང་ཞེས། །ཡིད་ཆེས་སྙིང་གི་ཐིག་ལེར་བསྒོམ་པ་ལ། །རྡོ་རྗེའི་མཚན་དཔེ་གསལ་བར་མི་སྟོན་ན། །བདེན་གསུང་རྡོ་རྗེའི་ཐ་ཚིག་གང་དུ་འགྱུར། །ནངས་རེ་དགོངས་རེར་འབྱོན་པར་ཞལ་འཆེས་ལ། །རྟག་ཏུ་
གསོལ་བ་སྙིང་ནས་འདེབས་བའི་ཚེ། ལུང་བསྟན་ཆོས་སྒྲ་སྒྲོགས་པར་མི་མཛད་ན། །སྣོད་བཅུད་འཛོམ་པའི་རྟེན་འབྲེལ་རྫུན་དུ་འགྱུར། །སྙིགས་དུས་ཐུགས་རྗེ་མྱུར་བར་དམ་བཅས་པས། །མོས་གུས་ཏིང་འཛིན་ནུས་ཚད་སྒོམ་པ་ལ། །ཡེ་ཤེས་ཆེན་པོའི་བྱིན་རླབས་མི་འབེབས་ན། །འཕོ་ཆེན་འཇའ་སྐུའི་མཐུ་རྩལ་དམན་པར་འགྱུར། །སྐལ་པ་དམན་ཅེས་བཏང་སྙོམས་ཡུལ་མཛད་ཅིང་། །ལས་ཉོན་སྒྲིབ་པའི་གཞན་དབང་ལ་བཏང་ན། །རྒྱལ་བ་ཀུན་ལས་ལྷག་པའི་ཐུགས་བསྐྱེད་དང་། །ཕྲིན་ལས་བྲག་ཆའི་གླིང་བུར་མི་འགྱུར་རམ། །སྒྲིབ་པ་ཆེ་བས་ཐུགས་རྗེ་ཅན་སྐུལ་གྱི། །སྒྲིབ་གཉིས་དག་ནས་ཁྱོད་ལ་གསོལ་ཅི་འཚལ། །སྙིང་རྗེའི་ཆབ་ཀྱིས་བདག་རྒྱུད་བཀྲུ་བར་མཛོད། །སྒོ་གསུམ་སྐུ་གསུང་ཐུགས་སུ་བྱིན་གྱིས་རློབས། །རིག་འཛིན་བླ་མས་རྟག་ཏུ་བྱིན་རློབ་ཅིང་། །ཡི་དམ་ལྷ་མཆོག་རྣམས་ཀྱི་ཞལ་རས་མཐོང་། །མཁའ་འགྲོ་དམ་ཅན་བྲན་ལྟར་ཁོལ་བ་ཡི། །རྒྱལ་ཚབ་རྡོ་རྗེ་འཛིན་པར་བདག་སྒྲུབས་ཤིག །རྒྱལ་བ་ཀུན་གྱི་གསང་བ་མཐའ་དག་དང་། །ཁྱད་པར་ཟབ་གསང་རྡོ་རྗེ་སྙིང་པོ་ལ། །རང་དབང་ཐོབ་ནས་གསང་བ་ཀུན་གྱི་མཛོད། །འཛིན་ནུས་རྡོ་རྗེ་ཆོས་སུ་བྱིན་གྱིས་རློབས། །གསང་བདག་ཡོངས་འཛིན་བརྒྱུད་པར་ལྡན་ཀུན་མཇལ། །གསང་ཆེན་སྨིན་གྲོལ་སེལ་མེད་འདོད་བཞིན་ཐོབ། །
གསང་མཛོད་མཐའ་དག་འཛིན་ཅིང་སྟོན་ནུས་པའི། །གསང་བདག་གཉིས་པར་གྲགས་པར་བྱིན་གྱིས་རློབས། །ཐོས་པའི་སྐབས་སུ་བླ་མའི་ཐུགས་ཟིན་ཅིང་། །སྒྲུབ་ལ་ཞུགས་ཚེ་ཉམས་རྟོགས་དབྱར་མཚོ་རྒྱས། །འཆད་ཚེ་མ་དང་མཁའ་འགྲོས་གནང་བ་སྩལ། །འགྲོ་ཕན་ནམ་མཁའ་མཉམ་པར་བྱིན་གྱིས་རློབས། །ཨོ་རྒྱན་རྡོ་རྗེའི་གསུང་གསང་ཀུན་སྡུད་ཅིང་། །ཇི་བཞིན་རྟོགས་ནས་དོན་བཞིན་འགྲེལ་པ་ཡི། །ལེགས་བཤད་སྨིན་གྲོལ་ས་ཆེན་ཀུན་ཏུ་ཁྱབ། །བསྟན་པ་ཡུན་རིང་འབར་བར་བྱིན་གྱིས་རློབས། །ཁྱོད་ཀྱི་བསྟན་ལ་གཞན་དྲིང་མི་འཇོག་པའི། །བྱ་བ་རླབས་ཆེན་ཚེ་རབས་ཀུན་ཏུ་སྒྲུབ། །དེ་ལ་བར་ཆད་ཅུང་ཟད་མི་འབྱུང་བར། །ཕྱོགས་ལས་རྣམ་པར་རྒྱལ་བར་བྱིན་གྱིས་རློབས། །རང་དོན་ཚགས་སུ་ཚུད་ནས་གཞན་གྱི་དོན། །འབད་མེད་ལྷུན་གྲུབ་སྲིད་པ་ཇི་སྲིད་དུ། །འགྱུར་མེད་རྡོ་རྗེའི་སྐུ་མཆོག་མགོན་ཁྱོད་དང་། །མཉམ་པ་ཉིད་དུ་འགྲོ་ཀུན་འདྲེན་གྱུར་ཅིག །གང་གི་ཚེ་རིན་པོ་ཆེ་གཏེར་གྱི་མཛོད་ཡོངས་སུ་སྡུད་པར་བརྩམ་པ་ན། ཡིད་བཞིན་ནོར་བུ་ལྟ་བུའི་མན་ངག་ཡོན་ཏན་གཏེར་མཛོད་ཀྱི་རིམ་པ་གཉིས་ལ་མཉམ་པར་བཞག་པ་དང་རྗེས་སུ་འབྲེལ་པར། པདྨ་དགྱེས་པའི་འབངས་པདྨ་གར་དབང་བདེ་བའི་རྡོ་རྗེས་གསོལ་བ་བཏབ་པ་ཡ་ཐཱ་སིདྡྷི་རསྟུ།། ༈ །ཁྱབ་བདག་མཚོ་སྐྱེས་རྡོ་རྗེ་ལ་དུས་སུ་ཐུགས་རྗེ་སྐུལ་ཞིང་གསོལ་བ་གདབ་པ་
འདོད་དགུ་ཡོངས་འདུས་ཞེས་བྱ་བ་བཞུགས་སོ། །ཕྱོགས་བཅུ་དུས་གསུམ་སངས་རྒྱས་ཀུན་གྱི་དངོས། །གསུང་རབ་དམ་ཆོས་མ་ལུས་འབྱུང་བའི་གནས། །འཕགས་མཆོག་དགེ་འདུན་ཚོགས་རྣམས་སྐྱེད་པའི་ཡབ། །གུ་རུ་པདྨའི་ཞབས་ལ་གསོལ་བ་འདེབས། །རྩ་བརྒྱུད་བླ་མ་ཀུན་འདུས་རྡོ་རྗེ་འཆང་། །ཡི་དམ་ལྷ་ཚོགས་འཆར་གཞི་འཁོར་ལོའི་མགོན། །དཔའ་བོ་རྣལ་འབྱོར་མ་རྣམས་ཚོགས་ཀྱི་རྗེ། །པདྨ་བཛྲ་རྩལ་ལ་གསོལ་བ་འདེབས། །གདོད་མའི་མགོན་པོ་ཀུན་བཟང་འོད་མི་འགྱུར། །ངེས་པ་ལྔ་ལྡན་རྣམ་སྣང་ནམ་མཁའི་རྒྱལ། །མཁའ་ཁྱབ་འགྲོ་འདུལ་སངས་རྒྱས་པདྨ་སྐྱེས། །བདེ་བ་ཆེན་པོའི་ཞབས་ལ༴ བདེ་བ་ཅན་ན་མགོན་པོ་འོད་དཔག་མེད། །རི་བོ་ཏ་ལར་འཕགས་པ་སྤྱན་རས་གཟིགས། །བརྫུས་སྐྱེས་སྤྲུལ་སྐུ་མཚོ་སྐྱེས་རྡོ་རྗེ་འཆང་། །པདྨ་འབྱུང་གནས་ཞབས་ལ༴ འདས་པའི་དེ་བཞིན་གཤེགས་རྣམས་གདུང་འཚོབ་ཅིང་། །ད་ལྟའི་སངས་རྒྱས་ཀུན་གྱི་ཕྲིན་ལས་མཛད། །མ་བྱོན་རྒྱལ་བ་ཐམས་ཅད་སྐྱེད་པའི་ཡབ། །པདྨ་ཀུན་ཏུ་འཆང་ལ་གསོལ་བ་འདེབས། །མཁྱེན་པའི་ཡེ་ཤེས་ཤེས་བྱ་ཀུན་ལ་ཁྱབ། །བརྩེ་བའི་ཐུགས་རྗེ་འགྲོ་ཁམས་ཇི་སྲིད་འཇུག །ནུས་པའི་མཐུ་ཡིས་བདུད་བཞི་རྩད་ནས་བཅོམ། །པདྨ་སྣང་བ་མཐའ་ཡས༴ ཕྱོགས་བཅུའི་ཞིང་ན་བསྟན་གཉིས་སྟོན་པའི་གཙོ། །འགྲོ་དྲུག་
གནས་སུ་རིག་པའི་སྐྱེས་བུ་དྲུག །སྟོང་གསུམ་ཞིང་ན་བྱེ་བ་ཕྲག་བརྒྱའི་འཕྲུལ། །པདྨ་གར་གྱི་དབང་ལ༴ ཛམྦུའི་གླིང་ན་འཕྲུལ་མཚན་བཅུ་ཕྲག་བཞི། །འཕགས་བོད་ལྗོངས་སུ་འགྲོ་འདུལ་མཚན་མཆོག་བརྒྱད། །རྔ་ཡབ་གླིང་ན་རཀྴ་ཐོད་ཕྲེང་རྩལ། །པདྨ་འགྲོ་བའི་མགོན་ལ་གསོལ་བ་འདེབས། །སྐལ་ལྡན་རྣམས་ལ་ཐུབ་མཆོག་ཤཱཀྱའི་རྒྱལ། །དབང་འབྲིང་རྣམས་ངོར་པདྨ་སཾ་བྷ་བ། །སྙིགས་དུས་རིག་པ་འཛིན་པའི་སློབ་དཔོན་ཚུལ། །པདྨ་རྣམ་པར་སྣང་ལ་གསོལ་བ་འདེབས། །དག་པའི་ཞིང་ན་ཐོད་ཕྲེང་སྡེ་ལྡར་སྤྲུལ། །འཕགས་པའི་ཡུལ་དུ་གྲུབ་ཆེན་བརྒྱད་ཅུར་འཕྲུལ། །བོད་དུ་རྗེ་འབངས་ཉི་ཤུ་རྩ་ལྔར་སྤྲུལ། །པདྨ་རྣམ་པར་རོལ་ལ༴ ངོ་བོ་རང་བྱུང་འཆི་མེད་རྡོ་རྗེའི་སྐུ། །རྣམ་པ་དཔལ་ལྡན་སངས་རྒྱས་པདྨ་སྐྱེས། །རྒྱལ་བ་ཀུན་ལས་ལྷག་པའི་ཕྲིན་ལས་ཅན། །པདྨ་ཚེ་དཔག་མེད་ལ༴ སྒྲིབ་པ་ཅན་ལ་རྒྱུ་འབྲས་ལས་ཀྱི་གཟུགས། །ལམ་པར་བསླབ་པའི་ཆོས་དང་མངོན་རྟོགས་ཚུལ། །སྒྲིབ་བྲལ་རྣམས་ལ་སྐུ་དང་ཞིང་ཁམས་སྣང་། །པདྨ་སྒྱུ་འཕྲུལ་དྲྭ་བར༴ གདུལ་བར་དཀའ་ལ་ཐེག་པ་སྣ་ཚོགས་སྟོན། །དབང་པོ་སྨིན་ལ་ཐེག་ཆེན་སེང་གེའི་སྒྲ། །རིགས་མཆོག་འོད་གསལ་རྡོ་རྗེ་རྩེ་མོས་འདུལ། །པདྨ་ཆོས་ཀྱི་དབྱངས་ལ༴ བློ་གྲོས་དམན་ལ་ཆགས་བྲལ་ཉན་ཐོས་
ཚུལ། །བློ་ཆེན་རྣམས་ངོར་དབང་ཐོབ་རྒྱལ་བའི་སྲས། །རྟག་ཏུ་སངས་རྒྱས་མཛད་པའི་རོལ་མོ་པ། །པདྨ་ཀུན་ཏུ་བཟང་ལ༴ ཕྱི་ལྟར་གསང་གསུམ་ཡོན་ཏན་མཛད་པར་བཅས། །ནང་ལྟར་དཔལ་ཆེན་སྒྲུབ་སྡེ་བརྒྱད་ཀྱི་ལྷ། །དོན་དམ་ཡེ་ཤེས་ཀློང་དགུའི་ཐིག་ལེར་ཤར། །པདྨ་ཆེ་བའི་མཆོག་ལ། །རིགས་མཆོག་ཀུན་འདུས་དཀྱིལ་འཁོར་ཚོམ་བུ་དགུ། །བར་ཆད་ཀུན་སེལ་རྣམ་འཕྲུལ་བཅུ་གཉིས་སྤྲོ། །བསམ་ཀུན་འགྲུབ་མཛད་འགྲོ་འདུལ་བཅུ་གསུམ་སྟོན། །པདྨ་ཀུན་བྱེད་རྒྱལ་ལ༴ དྲན་པ་ཙམ་གྱིས་འདི་ཕྱིའི་འཇིགས་ལས་སྐྱོབ། །གསོལ་བ་བཏབ་ན་འདོད་རྒུའི་དངོས་གྲུབ་སྟེར། །ཚུལ་བཞིན་བསྒྲུབ་ན་བདེ་ཆེན་མཆོག་སྟེར་མཛད། །གུ་རུ་ཡིད་བཞིན་ནོར་བུ་ལ༴ མཚན་ཐོས་ཙམ་གྱིས་ཐར་པའི་ས་བོན་སྐྲུན། །དད་པ་ཙམ་གྱིས་བྱང་ཆུབ་མྱུ་གུ་སྐྱེད། །འབྲེལ་ཐོབ་ཙམ་གྱིས་སྐྱེ་བར་རྗེས་སུ་འཛིན། །གུ་རུ་ཡིད་བཞིན་ནོར་བུ་ལ། །དྲན་པས་གདུང་བ་སེལ་མཛད་གུ་རུ་རྗེ། །སྐྱབས་དང་སྐྱོབ་པ་ཐམས་ཅད་གཅིག་བསྡུས་དཔལ། །ཚེ་རབས་ཀུན་ཏུ་བསྟེན་པའི་གཙུག་གི་རྒྱན། །གུ་རུ་ཡིད་བཞིན་ནོར་བུ་ལ༴ སྙིགས་མའི་འགྲོ་ལ་བརྩེ་བའི་ཐུགས་རྗེ་ཅན། །བོད་འབངས་བུ་ལྟར་སྐྱོབ་པའི་བཀའ་དྲིན་ཅན། །དད་ལྡན་མདུན་ཏུ་བཞུགས་པའི་ཐུགས་དམ་ཅན། །གུ་རུ་ཡིད་བཞིན་ནོར་བུ་ལ༴ སྐྱེ་འཆི་འཕོ་འགྱུར་མེད་
པའི་ངོ་མཚར་ཅན། །ཚེས་བཅུར་རྒྱུན་ཏུ་འབྱོན་པའི་རྫུ་འཕྲུལ་ཅན། །རྣམ་འཕྲུལ་རྒྱུན་ཆད་མེད་པའི་འགྲོ་དོན་ཅན། །གུ་རུ་ཡིད་བཞིན་ནོར་བུ་ལ༴ བར་ཆད་བདུད་དཔུང་འཇོམས་པའི་མཐུ་སྟོབས་ཅན། །མ་རུངས་གདུལ་དཀའ་འདུལ་བའི་ཐབས་མཁས་ཅན། །ལས་ངན་ལམ་སྣ་འདྲེན་པའི་བྱིན་རླབས་ཅན། །གུ་རུ་ཡིད་བཞིན་ནོར་བུ་ལ་གསོལ༴ སྐུ་ཚབ་སྐྱེས་བུ་དུས་དང་འཚམས་པར་བྱོན། །གསུང་ཚབ་གཏེར་ཆོས་མོས་པ་བཞིན་ཏུ་བརྡོལ། །ཐུགས་ཀྱི་ཡེ་ཤེས་དད་ལྡན་ཀུན་ལ་འབེབས། །གུ་རུ་ཡིད་བཞིན་ནོར་བུ་ལ༴ རི་བྲག་ཐམས་ཅད་སྒྲུབ་གནས་བྱིན་གྱིས་བརླབས། །རྟེན་མཆོག་དམ་རྫས་ས་སྟེང་ཡོངས་སུ་བཀང་། །གྲོལ་བ་བཞི་ལྡན་འགྲོ་དོན་རྒྱུན་མི་འཆད། །གུ་རུ་ཡིད་བཞིན་ནོར་བུ་ལ་གསོལ་བ་འདེབས། །དེང་སང་དུས་ངན་སྙིགས་མའི་མཐའ་ལ་ཐུག །ཐར་པ་བསྒྲུབས་ཀྱང་བར་ཆད་གཞན་དབང་གྱུར། །ཁྱོད་རྗེས་ཞུགས་ཀྱང་ལོག་པར་འཕྱན་ལགས་ན། །མགོན་པོ་བདེ་བ་ཆེན་པོས་གཟིགས་སུ་གསོལ། །འཁོར་བ་སྲིན་མོའི་གླིང་དུ་འཁྱམས་པ་བདག །དྲིན་གྱིས་འབྲེལ་བའི་ཕ་མ་རིགས་དྲུག་བཅས། །སྐྱབས་གནས་གཞན་གྱིས་སྤངས་ནས་ཡུན་རིང་བས། །དུས་གསུམ་མཁྱེན་པས་མྱུར་དུ་བསྐྱབ་ཏུ་གསོལ། །སྒོ་གསུམ་བྱ་བ་མི་དགེ་ཁོ་ནར་ཟད། །ཕལ་ཆེར་
སྔོན་གྱི་ལས་ཀྱི་ཉེས་པས་ནོངས། །མཐོང་ཐོས་དྲན་རེག་སྒྲོལ་བའི་ཐུགས་རྗེའི་འོད། །རབ་ཏུ་བྱུང་ལ་བདག་རྒྱུད་དག་མཛད་གསོལ། །སངས་རྒྱས་བསྟན་པ་དགོངས་ཀའི་དམར་ཐག་བཞིན། །གངས་ཅན་བདེ་སྐྱིད་སྟོན་གྱི་ཆུ་བྲན་ལྟར། །ནད་མུག་འཁྲུགས་རྩོད་བུ་ཡུག་འཚུབས་འདྲ་བའི། །དུས་ངན་སྙིགས་མའི་རྣམ་འགྱུར་བཟློག་ཏུ་གསོལ། །ཚེ་མཐར་ཕྱིན་ཅིང་ཆོས་མཐུན་འཚོ་བས་འབྱོར། །དགེ་བའི་བཤེས་དང་ཉེ་ལམ་སྙིང་པོ་མཇལ། །སྒྲུབ་ལ་བརྩོན་ཅིང་གཡེང་བས་མི་བསླུ་བར། །མཆོག་དངོས་འགྲུབ་པའི་བྱིན་རླབས་དབང་སྐུར་སྩོལ། །བདག་དང་བདག་ལ་འབྲེལ་ཐོགས་འགྲོ་བ་ཀུན། ཚེ་འདིར་གདོད་མའི་བཙན་ས་ཟིན་པ་དང་། །འཕོས་ཚེ་སྡུག་བསྔལ་མི་འབྱུང་ཏིང་འཛིན་དང་། །བདེ་ཆེན་ཞིང་དུ་ལམ་སྣ་འདྲེན་ཏུ་གསོལ། །ཚེ་འདིར་སངས་རྒྱས་བསྟན་དང་སེམས་ཅན་ལ། །འཕྲལ་ཡུན་ཕན་པའི་བྱ་བ་རླབས་ཆེན་འགྲུབ། །མུ་མཐའ་མེད་པའི་མཁའ་མཉམ་ཕ་མ་ཀུན། །འདྲེན་པའི་བླ་མ་མཆོག་ཏུ་བདག་འགྱུར་མཛོད། །མདོར་ན་བདག་གིས་བསམ་པའི་དོན་མཐའ་དག །བར་ཆད་མེད་ཅིང་མྱུར་བ་ཉིད་འགྲུབ་སྟེ། །རྣམ་ཐར་དཔལ་གྱི་འབྱོར་པ་མི་ཟད་པས། །བསྟན་འགྲོར་དགེ་བའི་ཉེར་འཚོར་མཛད་དུ་གསོལ། །སྐུ་དང་ཞིང་ཁམས་ཡོན་ཏན་མཛད་པར་བཅས། །གུ་རུ་ཡིད་
བཞིན་ནོར་བུ་ཅི་འདྲ་བ། །དེ་འདྲ་ཁོ་ནར་བདག་གིས་མྱུར་འགྲུབ་སྟེ། །བདེ་ཆེན་རྡོ་རྗེའི་མཁའ་ཁམས་རྟག་ཁྱབ་ཤོག །ཅེས་པ་འདིའང་དྲག་པོ་ལྕགས་སྤྲེལ་སྤྲེལ་ཟླའི་ཚེས་བཅུར་རྩ་བའི་གུ་རུ་མཚོ་སྐྱེས་རྡོ་རྗེའི་བསྙེན་སྒྲུབ་བཞུགས་པ་དང་ཆབ་ཅིག་པདྨ་གར་གྱི་དབང་ཕྱུག་ཕྲིན་ལས་འགྲོ་འདུལ་རྩལ་གྱིས་ཙྭ་འདྲ་རིན་ཆེན་བྲག་གི་སྙིང་པོ་ཀུན་བཟང་བདེ་ཆེན་འོད་གསལ་གླིང་དུ་གསོལ་བ་བཏབ་པ་འགྲོ་བ་ཀུན་ལ་གུ་རུའི་།ཐུགས་རྗེ་འཇུག་པའི་རྒྱུར་གྱུར་ཅིག །དགེ་ལེགས་འཕེལ། །གུ་རུ་པདྨ་འབྱུང་གནས་ལ་ཐུགས་དམ་བསྐུལ་པའི་གསོལ་འདེབས་བྱིན་རླབས་ཆར་འབེབས་ནོར་བུའི་རྒྱལ་པོ་བདུད་རྩིའི་སྙིང་པོ་ཞེས་བྱ་བ་བཞུགས་སོ། །ཨེ་མ་ཧོ། །ཡིད་བཞིན་ནོར་བུ་ལྟ་བུའི་གུ་རུ་རྗེ། །གསང་སྔགས་སྟོན་པ་རྡོ་རྗེ་ཐོད་ཕྲེང་རྩལ། །གསང་བའི་མཛོད་འཛིན་ཡེ་ཤེས་མཚོ་རྒྱལ་མ། །འདིར་གཤེགས་གསོལ་འདེབས་བུ་ལ་བྱིན་གྱིས་རློབས། །འབྱུང་བཞིས་མ་གོས་པད་སྡོང་རྩེ་ལས་འཁྲུངས། །སྐྱེ་འཆི་གཉིས་སྤངས་རྡོ་རྗེའི་སྐུ་མཆོག་བརྙེས། །བདེ་སྟོང་འགྱུར་མེད་ཐབས་ཤེས་ཟུང་འཇུག་ཚུལ། །སྲིད་ཞིའི་ཁྱབ་བདག་པད་འབྱུང་ཡབ་ཡུམ་ལ། །རྩེ་གཅིག་གསོལ་འདེབས་འདིར་གཤེགས་བྱིན་གྱིས་རློབས། །སྐུ་ཡི་ཞལ་སྟོན་གསུང་གིས་གདམས་བ་སྩོལ། །འོད་གསལ་ཡེ་ཤེས་ཐུགས་དང་དབྱེར་མེད་མཛོད། །ཆོས་ཀུན་
དབང་སྒྱུར་པད་འབྱུང་ཡབ་ཡུམ་ལ། །རྩེ་གཅིག་གསོལ་འདེབས༴ སྐུ་ཡིས་ཞལ་སྟོན༴ འོད་གསལ་ཡེ་ཤེས༴ དཀོན་མཆོག་ཀུན་འདུས་པད་འབྱུང་ཡབ་ཡུམ༴ རྩེ་གཅིག༴ སྐུ་ཡིས༴ འོད་གསལ༴ རྩ་གསུམ་སྤྱི་དཔལ་པད་འབྱུང་ཡབ་ཡུམ་ལ། །རྩེ་གཅིག་གསོལ༴ སྐུ་ཡིས་ཞལ་སྟོན༴ འོད་གསལ་ཡེ་ཤེས༴ སྐུ་གསུམ་བདག་ཉིད་པད་འབྱུང་༴ རྩེ་གཅིག༴ སྐུ་ཡིས༴ འོད་གསལ༴ ཐུགས་རྗེ་ཆེ་ལྡན་པད་འབྱུང་ཡབ༴ རྩེ་གཅིག༴ སྐུ་ཡིས༴ འོད་གསལ༴ བཀའ་དྲིན་མཚུངས་མེད་པད་འབྱུང་༴ རྩེ་གཅིག༴ སྐུ་ཡིས༴ འོད་གསལ༴ བོད་ཁམས་སྐྱབས་གཅིག་པད་འབྱུང་༴ རྩེ་གཅིག༴ སྐུ་ཡིས༴ འོད་གསལ༴ སྙིགས་འགྲོའི་མགོན་པོ་པད་འབྱུང་༴ རྩེ་གཅིག༴ སྐུ་ཡིས༴ འོད་གསལ༴ ཁྱེད་ཀྱི་གདུལ་བྱའི་ཡུལ་གྱུར་ཐུན་མིན་པ། །ཉམ་ཐག་ཉོན་མོངས་དབང་གྱུར་བདག་ལགས་སོ། །བདག་གི་རེ་ལྟོས་མགོན་པོ་ཁྱེད་ལས་མེད། །མངོན་ཤེས་རྫུ་འཕྲུལ་ཁྱེད་ལས་མྱུར་བ་མེད། །ཐབས་མཁས་ཐུགས་རྗེ་ཁྱེད་ལས་ཆེ་བ་མེད། །དུས་ངན་ཐ་མའི་དཔལ་མགོན་ཁྱེད་ལགས་ན། །གསང་གསུམ་སྣང་བས་མངོན་སུམ་རྗེས་བཟུང་ནས། །མདོ་རྒྱུད་བཀའ་དང་ཟབ་མོ་གཏེར་གྱི་ལུང་། །སྙིང་པོ་གདམས་ངག་ཐུན་མོང་ལས་རབ་
འབྱམས། །ཐུན་མིན་གསང་བའི་མཛོད་ལ་རང་དབང་སྒྱུར། །ཚེ་དང་ཡེ་ཤེས་མཆོག་ཐུན་དངོས་གྲུབ་སྩོལ། །དུས་ལ་བབ་པོ་ཐུགས་རྗེའི་རྩལ་ཤུགས་སྐྱེད། །བསྐུལ་ཞིང་གསོལ་བའི་དུས་སུ་མ་དགོངས་ན། །བསླུ་མེད་བདེན་གསུང་རྡོ་རྗེའི་ལུང་དང་འགལ། །ཐུགས་རྗེ་རྫུ་འཕྲུལ་ཆེ་བས་ཅི་ཞིག་བྱ། །བློ་སྙིང་བྲང་གསུམ་གུ་རུ་རྗེ་ལ་གཏད། །རྩེ་གཅིག་གསོལ་འདེབས་ཡལ་བར་མ་འདོར་བར། །ཡེ་ཤེས་ཆེན་པོའི་བྱིན་རླབས་རྒྱུད་ལ་ཕོབ། །ལུས་ལ་སྐུ་ཡི་བྱིན་ཕོབ་ལུས་སྒྲིབ་སོལ། །འཆི་མེད་འཇའ་ལུས་རྡོ་རྗེར་མངོན་གྱུར་མཛོད། །ངག་ལ་གསུང་གི་བྱིན་ཕོབ་དག་སྒྲིབ་སོལ། །གསང་ཆེན་ཆོས་དབྱངས་དུས་གསུམ་སྒྲོག་ནུས་མཛོད། །ཡིད་ལ་ཐུགས་ཀྱི་བྱིན་ཕོབ་ཡིད་སྒྲིབ་སོལ། །རང་བྱུང་གདོད་མའི་ཡེ་ཤེས་རབ་གསལ་མཛོད། །མདོར་ན་རྟག་ཏུ་ཐུགས་རྗེས་རབ་གཟིགས་ལ། །བྱིན་གྱིས་རློབ་ཅིང་དབང་མཆོག་སྐུར་བ་དང་། །སྐད་ཅིག་ཙམ་ཡང་འབྲལ་མེད་རྗེས་སུ་ཟུངས། །བར་ཆད་གེགས་ཀྱི་ཕྱོགས་ལས་རྣམ་རྒྱལ་ཞིང་། །རྡོ་རྗེའི་ལམ་མཆོག་འབད་པ་མེད་པར་བགྲོད། །ས་མཐར་ཕྱིན་ནས་གསང་བའི་བརྟུལ་ཞུགས་གྲུབ། །འགྲོ་ངོར་རིག་འཛིན་རྣམ་ལྔའི་ལུས་བཟུང་ནས། །གང་འདུལ་ཐབས་ཀྱིས་གདུལ་དཀའ་མ་ལུས་འདུལ། །
པདྨའི་ཕྲིན་ལས་ཤིང་རྟ་རང་དབང་སྒྱུར། །སྲིད་པ་ཇི་སྲིད་བར་དུ་བསྟན་འགྲོའི་དོན། །བསམ་ཡས་བསྒྲུབས་ནས་ཉིད་དང་དབྱེར་མེད་པར། །མངོན་པར་བྱང་ཆུབ་དོན་གཉིས་མཐར་ཕྱིན་པའི། །བསམ་པ་མྱུར་དུ་འགྲུབ་པར་བྱིན་གྱིས་རློབས། ཞེས་ཡོན་ཏན་གསུང་གི་གནས་མཆོག་བདེ་ཆེན་པདྨ་ཤེལ་གྱི་ཕུག་པར་གུ་རུ་རིན་པོ་ཆེའི་རྡོ་རྗེའི་ལུང་དོན་རིམ་པར་བསྒྲུབ་བར་རྩོམ་པའི་ཐོག་མར་འགྲུབ་པའི་སྦྱོར་བ་དང་ལྡན་པའི་ཤར་ཕྱོགས་ཀྱི་ཚེས་བརྒྱད་ལ་གསོལ་བ་རྩེ་གཅིག་ཏུ་བཏབ་པ་ཡ་ཐཱ་སིདྡྷི་རསྟུ།། ༈ །།གུ་རུ་པདྨ་སཾ་བྷ་བ་ལ་ཐུགས་དམ་བསྐུལ་བའི་གསོལ་འདེབས་དངོས་གྲུབ་མཆོག་སྩོལ་ནོར་བུའི་རྒྱལ་པོ་བཅུད་ཀྱི་སྙིང་པོ་ཞེས་བྱ་བ་བཞུགས་སོ། །ན་མོ་གུ་རུ་པདྨ་སཾ་བྷ་བཱ་ཡ། །དུས་གསུམ་རྒྱལ་བ་རྒྱ་མཚོ་སྤྱི་ཡི་གཟུགས། ཁམས་གསུམ་འགྲོ་བ་ཡོངས་ཀྱི་འདྲེན་པ་མཆོག །བླ་མེད་བླ་མ་པདྨ་སཾ་བྷ་བར། །གསོལ་བ་འདེབས་སོ་བསམ་དོན་མྱུར་འགྲུབ་མཛོད། །རིགས་དང་དཀྱིལ་འཁོར་ཀུན་ལ་མངའ་མཛད་ཀྱང་། །འདུལ་ཐབས་མཁས་པས་པདྨའི་རིགས་སུ་བྱོན། །ཆགས་མེད་སྐྱོན་བྲལ་པདྨ་སཾ་བྷ་བར། །གསོལ་བ་འདེབས་སོ། །སྣང་བ་མཐའ་ཡས་ཐུགས་རྗེ་རོལ་བའི་གར། །སོར་རྟོགས་ཡེ་ཤེས་ཏྲཱིཿཡིག་འབར་ཞུའི་རླབས། །མཚན་དཔེའི་སྐུར་སྣང་པདྨ་སཾ་བྷ་བར། །གསོལ་བ་འདེབས་སོ། །ཡིད་བཞིན་གཏེར་འབྱུང་དྷ་ན་ཀོ་ཥའི་
མཚོར། །མདངས་ལྡན་པདྨའི་སྙིང་པོར་བརྫུས་ཏེ་འཁྲུངས། །རང་བྱུང་སྤྲུལ་སྐུ་པདྨ་སཾ་བྷ་བར། །གསོལ་བ༴ རྒྱལ་རིགས་བྲམ་ཟེ་རིག་པ་འཛིན་རྣམས་ཀྱི། །སྲས་ཀྱི་ཚུལ་སྟོན་དེ་འདུལ་གདུལ་བྱ་རྣམས། །བྱང་ཆུབ་ལམ་འདྲེན་པདྨ་སཾ་བྷ་བར། །གསོལ་བ༴ སྙིགས་ལྔའི་གདུལ་དཀའ་འདུལ་ལ་ཐུགས་དཔའ་བས། །པད་དཀར་བཞིན་ཏུ་སྲས་བཅས་རྒྱལ་ལས་འཕགས། །ཐུབ་དབང་གཉིས་པ་པདྨ་སཾ་བྷ་བར། །གསོལ་བ༴ ངོ་བོ་བྲལ་སྨིན་ཡོན་ཏན་བྱེ་བས་བརྒྱན། །རྣམ་པ་དགོས་འབྱུང་ཡོན་ཏན་གཏེར་གྱིས་ཕྱུག །འགྲོ་བའི་རེ་སྐོང་པདྨ་སཾ་བྷ་བར། །གསོལ་བ༴ པདྨ་འདབ་མ་རྒྱས་པའི་སྤྱན་ཡངས་པས། །ཤེས་བྱ་ཀུན་ལ་ཆགས་ཐོགས་མེད་པར་གཟིགས། །ཐམས་ཅད་མཁྱེན་པ་པདྨ་སཾ་བྷ་བར། །གསོལ་བ༴ བློ་དམན་དྲང་བའི་དོན་ཏུ་མཁས་གྲུབ་ཀྱི། །སློབ་དཔོན་མང་བསྟེན་ཐེག་པ་ཀུན་ལ་སྦྱངས། །ཆོས་ཀྱི་དབང་ཕྱུག་པདྨ་སཾ་བྷ༴ གསོལ་བ༴ མཁྱེན་གཉིས་རྩལ་རྫོགས་མཐའ་བྲལ་གངས་རིར་གནས། །ལུང་རིག་ཁ་ལྔས་ལོག་སྨྲའི་རི་དྭགས་འཇོམས། །སྨྲ་བའི་སེང་གེ་པདྨ༴ གསོལ་བ༴ བསླབ་གསུམ་ཡོངས་རྫོགས་གསེར་གྱི་རི་བོ་ལ། །ལུང་རྟོགས་མཚམས་སྤྲིན་གསར་པའི་བླ་གོས་མཛེས། །མཁས་པའི་གཙུག་རྒྱན་པདྨ༴ གསོལ་བ༴ རང་བྱུང་
གདོད་ནས་མཆོག་བརྙེས་གཟི་བརྗིད་ཀྱིས། །བདུད་བགེགས་ཟིལ་གནོན་སྐལ་ལྡན་སྨིན་གྲོལ་སྦྱོར། །གྲུབ་པའི་སྤྱི་མེས་པདྨ༴ གསོལ་བ༴ གང་ལ་གསོལ་བ་བཏབ་པས་འཕྲལ་ཡུན་གྱི། །འདོད་རྒུའི་དངོས་གྲུབ་འབད་མེད་སྩོལ་མཛད་པ། །ཡིད་བཞིན་ནོར་བུ་པདྨ༴ གསོལ་བ༴ འགྱུར་མེད་ལྷན་ཅིག་སྐྱེས་དགའི་ཡེ་ཤེས་ཀྱིས། །བརྟན་གཡོ་འཁོར་འདས་ཟུང་འཇུག་ཐིག་ལེར་སྡོམ། །བདེ་བ་ཆེན་པོ་པདྨ༴ གསོལ་བ༴ འཕགས་པའི་ཡུལ་དུ་ཐུབ་བསྟན་རྒྱལ་མཚན་བསྒྲེངས། །ཨོ་རྒྱན་གནས་སུ་གསང་ཆེན་སྒྲོན་མེ་སྦར། །མདོ་རྒྱུད་མདའ་བདག༴ གསོལ་བ༴ ཁ་བ་ཅན་དུ་ལྷ་སྲིན་གདུག་པ་བཏུལ། །རྔ་ཡབ་གླིང་དུ་སྲིན་པོ་ཆོས་ལ་བཀོད། །བཀའ་དྲིན་བསམ་ཡས་པདྨ༴ གསོལ་བ༴ ཞིང་ཁམས་ཀུན་ཏུ་སངས་རྒྱས་མཛད་པ་སྟོན། །མཐའ་འཁོབ་རྣམས་སུ་གང་འདུལ་དེར་མཐུན་སྤྲུལ། །ཐུགས་རྗེ་ཐབས་མཁས་པདྨ་སཾ༴ གསོལ་བ༴ ནྱལ་བ་ཁྱེད་ལ་མངོན་ཤེས་དྲུག་ཅུ་མངའ། །མགོན་པོ་ཁྱེད་ནི་ཐུགས་རྗེའི་རྩལ་ཁ་མྱུར། །བླ་མ་ཁྱེད་ཀྱི་བྱིན་རླབས་བསམ་མི་ཁྱབ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །རིག་འཛིན་མཁའ་འགྲོའི་འཁོར་ཚོགས་རྒྱ་མཚོར་བཅས། །འདིར་གཤེགས་སྐུ་གསུང་ཐུགས་ཀྱི་བྱིན་ཆེན་ཕོབ། །ཕྱི་ནང་སྒྲུབ་གསང་དབང་གི་ཆུ་
རྒྱུན་སྩོལ། །ཟབ་རྒྱས་གསང་བའི་མཛོད་ལ་མངའ་དབང་བསྐུར། །དགྱེས་པའི་ཞལ་སྟོན་ཞབས་མཐིལ་སྤྱི་བོར་ཞོག །ངེས་པའི་ལུང་སྟོན་ཆོས་ཀྱི་བདུད་རྩི་སྩོལ། །དགོངས་བས་བྱིན་རློབས་རྟོགས་པའི་སྒྲོན་མེ་སྦོར། །རྡོ་རྗེ་གསུམ་གྱི་དབྱིངས་སུ་བྱང་ཆུབ་མཛོད། །ལུས་ལ་འགྱུར་མེད་བདེ་ཆེན་གཟི་བརྗིད་འབར། །ངག་ལ་གསང་སྔགས་ནུས་པའི་བདེན་ཚིག་འགྲུབ། །སེམས་ལ་ལྷན་སྐྱེས་ཡེ་ཤེས་རྩལ་རྫོགས་ཏེ། །མི་འཇིགས་གདིང་ཐོབ་དབང་ཆེན་བརྙེས་པར་མཛོད། །སངས་རྒྱས་ཀུན་གྱི་འདྲེན་མཆོག་གུ་རུ་རྗེ། །བདེ་བ་ཆེན་པོ་དྲི་མེད་པདྨའི་ཞལ། །མགོན་པོ་ཐུགས་རྗེ་ཅན་ལ་སྐྱབས་སུ་མཆི། །བདག་སོགས་མཁའ་མཉམ་སེམས་ཅན་བསྐྱབ་ཏུ་གསོལ། །ཕྱི་ནང་གསང་བའི་བར་ཆད་ཀུན་ཞི་ཞིང་། །བསམ་དོན་མཐའ་དག་ཆོས་བཞིན་འགྲུབ་པ་སོགས། །གསོལ་བཏབ་སྨོན་པའི་རེ་འབྲས་ཇི་མཆིས་པ། །ཐོགས་མེད་མྱུར་དུ་སྨིན་པར་བྱིན་གྱིས་རློབས། །ཞེས་ངོ་མཚར་གསང་བའི་གནས་མཆོག་འཆི་མེད་པདྨ་ཤེལ་གྱི་རི་བོ་ཟབ་མོ་གཏེར་གྱི་སྒྲུབ་པ་ལ་ཞུགས་པའི་ཚེ་ཟླ་བ་བཅུ་པའི་དཀར་ཕྱོགས་བཟང་པོ་དང་པོ་འགྲུབ་པའི་སྦྱོར་བ་དང་ལྡན་པའི་ཚེས་གྲངས་བཟང་པོར་འཆི་མེད་བསྟན་གཉིས་གཡུང་དྲུང་གླིང་པས་གསོལ་བ་རྩེ་གཅིག་ཏུ་བཏབ་པ་དགེ་ལེགས་འཕེལ།། ༈ །།གུ་རུ་པདྨ་རྒྱལ་པོ་ལ་ཐུགས་དམ་བསྐུལ་བའི་གསོལ་འདེབས་
དགོས་འདོད་ཀུན་འབྱུང་ནོར་བུའི་རྒྱལ་པོ་དབྱིག་གི་སྙིང་པོ་ཞེས་བྱ་བ་བཞུགས་སོ། །ན་མོ་མ་ཧཱ་གུ་རུ་པདྨ་རཱ་ཛ་སརྦ་སིདྡྷི་ཧཱུྃ། །སྲིད་ཞིའི་ཁྱབ་བདག་དཔལ་ལྡན་ཀུན་ཏུ་བཟང་། །འོག་མིན་ཞིང་དུ་རིགས་ལྔའི་སྟོན་པར་ཤར། །གང་འདུལ་སྤྲུལ་པ་སངས་རྒྱས་བྱང་ཆུབ་སེམས། །ཀུན་གྱི་རང་བཞིན་ཀུན་ལ་དབང་སྒྱུར་བ། །བདག་ཉིད་ཆེན་པོ་པདྨ་རྒྱལ་པོ་ལ། །གསོལ་བ་འདེབས་སོ་རྩེར་དགོངས་མྱུར་དུ་བྱོན། །ཐུགས་རྗེའི་རྩལ་སྐྱེད་དབང་སྐུར་བྱིན་གྱིས་རློབས། །ཐུགས་དམ་བསྐུལ་ལོ་འདོད་དོན་དངོས་གྲུབ་སྩོལ། །ཆོས་སྐུའི་རང་བཞིན་མཁའ་ལྟར་ཀུན་ལ་ཁྱབ། །ལོངས་སྐུ་ཡེ་ཤེས་འོད་ལྔ་མ་འདྲེས་གསལ། །སྤྲུལ་སྐུ་བྱེ་བ་ཕྲག་བརྒྱས་མི་མཇེད་འདུལ། །གང་ལ་གང་འདུལ་བཀོད་པ་བསམ་མི་ཁྱབ། །སྐུ་གསུམ་ཡོངས་རྫོགས་པདྨ་རྒྱལ་པོ་ལ། །གསོལ་བ་འདེབས༴ ཐུགས་རྗེའི༴ ཐུགས་དམ༴ པདྨའི་རིགས་མཆོག་གཟི་བརྗིད་འོད་དཔག་མེད། །གར་གྱི་དབང་ཕྱུག་ཞི་དང་ཁྲོ་བོའི་ཚུལ། །ཨོ་རྒྱན་ཡུལ་དུ་མཚོ་སྐྱེས་རྡོ་རྗེར་སྤྲུལ། །རྒྱལ་པོའི་སྲས་མཛད་རྒྱལ་སྲིད་ཆོས་ཀྱིས་བསྐྱངས། །འཁོར་ལོས་སྒྱུར་བ་པདྨ་རྒྱལ་པོ་ལ། །གསོལ་བ༴ ཐུགས་རྗེའི༴ ཐུགས་དམ༴ ཀ་དག་གཏིང་གསལ་གཞོན་ནུ་བུམ་སྐུ་ལས། །འཕོ་བ་ཆེན་པོ་འཇའ་ལུས་རྡོ་རྗེར་བཞེངས། །འགྲོ་དྲུག་རེ་རེའི་མགོན་ཏུ་གུ་རུ་
རྗེའི། །སྤྲུལ་པ་རེ་རེས་ཐར་པའི་ལམ་སྣ་འདྲེན། །འཁོར་བ་དོང་སྤྲུགས་པདྨ་རྒྱལ་པོ་ལ། །གསོལ་བ༴ ཐུགས་རྗེའི། །ཐུགས་དམ༴ གཡོ་མེད་དགོངས་པ་ནམ་མཁའི་མཐར་ཁྱབ་ཀྱང་། །ཁྱད་པར་ཐུགས་རྗེས་བོད་ལ་ལྷག་པར་གཟིགས། །དད་ལྡན་མི་རེའི་མདུན་དུ་པད་འབྱུང་རེ། །ཚེས་བཅུར་དངོས་བྱོན་སྐལ་ལྡན་རྗེས་སུ་འཛིན། །གངས་ཅན་སྐྱབས་གཅིག་པདྨ་རྒྱལ་པོ་ལ། །གསོལ་བ༴ ཐུགས་རྗེའི། །ཐུགས་དམ༴ ཆོས་ཀུན་དབྱིངས་སུ་མངོན་པར་བྱང་ཆུབ་བརྙེས། །བདེ་ཆེན་འགྱུར་མེད་ཐིག་ལེ་ཆེན་པོར་རྫོགས། །སྐུ་དང་ཞིང་ཁམས་རྒྱ་མཚོ་སྤྲོ་ཞིང་བསྡུ། །སྒྱུ་མའི་ཆོས་ལ་སྒྱུ་འཕྲུལ་རོལ་མོ་ཡིས། །འཁོར་འདས་དབང་མཛད་པདྨ༴ གསོལ་བ༴ ཐུགས་རྗེའི༴ ཐུགས་དམ༴ མཚན་དཔེ་འབར་བའི་འོད་སྐུ་ལྷུན་ཆགས་ཤིང་། །ཡེ་ཤེས་གཟི་བརྗིད་མུ་མཐའ་མེད་པར་འཕྲོ། །གསང་མཆོག་རྡོ་རྗེ་རྩེ་མོའི་ཆོས་དབྱངས་ཀྱིས། །འགྲོ་དྲུག་གདོད་མའི་ས་ལ་འབད་མེད་དགྲོལ། །དབང་བཅུའི་མཐར་སོན་པདྨ༴ གསོལ་བ༴ ཐུགས་རྗེའི། །ཐུགས་དམ། འཕགས་བོད་ཨོ་རྒྱན་འགྲོ་ལྡིང་སྲིན་ཡུལ་སོགས། །དབང་སྒྱུར་རྒྱལ་པོ་རོལ་པའི་བརྟུལ་ཞུགས་ཀྱིས། །མི་དང་མི་མིན་གདུལ་དཀའ་ཐབས་ཀྱིས་བཏུལ། །ཀུན་ཀྱང་
གསང་ཆེན་ངེས་པའི་ཐེག་པར་བཀོད། །སྣང་སྲིད་ཟིལ་གནོན་པདྨ༴ གསོལ་བ༴ ཐུགས་རྗེའི༴ ཐུགས་དམ༴ གསེར་འགྱུར་རྩེ་ཡིས་ལྕགས་ལ་རེག་པ་བཞིན། །བྱིན་རླབས་ཡེ་ཤེས་མཐུ་སྟོབས་རླབས་པོ་ཆེས། །བདག་རྒྱུད་སྒྲིབ་བྲལ་དབང་ཐོབ་རིག་འཛིན་ཏུ། །གནས་སྒྱུར་ལུང་ཆེན་ཐོབ་པའི་སྐལ་ལྡན་མཛོད། །དབང་བཞིའི་ཆུ་བོ་ལུས་ངག་ཡིད་ལ་སྩོལ། །མ་རིག་མུན་ཁང་མཁྱེན་བརྩེའི་འོད་བརྒྱས་སོལ། །ཡེ་ཤེས་གཟུགས་བརྙན་དག་པའི་སེམས་ལ་སྟོན། །ཉིད་དང་སྐད་ཅིག་འདུ་འབྲལ་མེད་པར་མཛོད། །ཐུན་མོང་།ཐུན་མིན་གསང་བའི་མཛོད་ཆེན་ཐོབ། །ཕྱི་ནང་གསང་བའི་རྡོ་རྗེའི་རྒྱ་མདུད་ཁྲོལ། །རིག་རྩལ་དབང་ཐོབ་བརྟུལ་ཞུགས་ཕྱོགས་མེད་གྲུབ། །འབྲེལ་ཚད་དོན་ལྡན་ཆེན་པོར་བྱིན་གྱིས་རློབས། །ཞེས་ཕྲིན་ལས་འགྲོ་འདུལ་སྤྲུལ་པའི་གནས་མཆོག་རི་བོ་དབང་ཞུའི་སྙིང་པོ་ཟླ་གམ་དབང་གི་ཕུག་པར་ཟབ་གཏེར་གྱི་སྒྲུབ་པ་ལ་ཞུགས་སྐབས་རྒྱལ་བ་ལྷ་ལས་བབས་པའི་དུས་ཆེན་གྱི་དཀར་ཕྱོགས་ཚེས་བཅུར་འགྲུབ་པའི་སྦྱོར་བ་དད་ལྡན་པར་གྱི་ནང་གསང་བའི་ཚོགས་འཁོར་བརྒྱ་རྩ་བགྱིས་པའི་རྗེས་འབྲེལ་དུ་འཆི་མེད་བསྟན་གཉིས་གཡུང་དྲུང་གླིང་པས་བགྱིས་པ་དགེ་ལེགས་འཕེལ།། ༈ །།གུ་རུ་བློ་ལྡན་མཆོག་སྲེད་ལ་ཐུགས་དམ་སྐུལ་བའི་གསོལ་འདེབས་བསམ་དོན་ཀུན་འགྲུབ་ནོར་བུའི་རྒྱལ་པོ་ཡེ་ཤེས་སྙིང་པོ་ཞེས་བྱ་བ་བཞུགས་སོ། །མ་ཧཱ་གུ་རུ་དྷཱི་མཱ་ན་བར་རུ་ཙི་བྷྱཿན་
མོ་ན་མཱ་མི། །ཤེས་བྱ་ནམ་མཁའི་མུ་ཁྱུད་ཡངས་པ་ལ། །ཡེ་ཤེས་ཉི་མའི་དཀྱིལ་འཁོར་རབ་ཏུ་རྒྱས། །དབྱེར་མེད་སྣང་བས་མ་རིག་མུན་པ་སེལ། །བློ་ལྡན་མཆོག་སྲེད་ཞབས་ལ་གསོལ་བ་འདེབས། །འདིར་གཤེགས་བྱིན་རློབས་དབང་དང་དངོས་གྲུབ་སྩོལ། །གཟུངས་དྲན་མངོན་ཤེས་སྤོབས་པའི་གཏེར་ཆེན་བརྡོལ། །ཆགས་ཐོགས་མེད་པའི་བློ་གྲོས་རྩལ་རྫོགས་ནས། །མཁྱེན་གཉིས་ཡེ་ཤེས་སྣང་བ་རྒྱས་པར་མཛོད། །གཞི་སྣང་ལྷན་སྐྱེས་མ་རིག་འཁྲུལ་བའི་སྦུབས། །རིག་པ་ཡེ་ཤེས་ཆེན་པོས་བརྟོལ་ནས་ཀྱང་། །གདོད་མའི་དབྱིངས་སུ་མངོན་པར་བྱང་ཆུབ་པ། །བློ་ལྡན་མཆོག་སྲེད་ཞབས་ལ༴ འདིར་གཤེགས་བྱིན༴ གཟུངས་དྲན་མངོན་ཤེས༴ ཆགས་ཐོགས་མེད་པའི༴ མཁྱེན་གཉིས་ཡེ་ཤེས༴ ཡེ་ཤེས་རྒྱ་མཚོས་ཆོས་ཀྱི་དབྱིངས་ཀུན་ཁྱབ། །བསམ་ཡས་ཡེ་ཤེས་ཡངས་པའི་རོལ་གར་སྟོན། །ཡེ་ཤེས་སྤྲིན་ལས་འདོད་རྒུའི་གྲུ་ཆར་འབེབས། །བློ་ལྡན་མཆོག༴ འདིར་གཤེགས༴ གཟུངས་དྲན༴ ཆགས་ཐོགས༴ མཁྱེན་གཉིས༴ ཡེ་ཤེས་གསུམ་ལྡན་ཀ་དག་ཆོས་སྐུའི་ཀློང་། །ལྷུན་གྲུབ་ཡེ་ཤེས་རྣམ་ལྔའི་ལོངས་སྤྱོད་རྫོགས། །མཁྱེན་གཉིས་ཡེ་ཤེས་མཁའ་ཁྱབ་འགྲོ་བ་འདུལ། །བློ་ལྡན༴ འདིར་གཤེགས༴ གཟུངས་དྲན༴
ཆགས༴ མཁྱེན༴ ཚེ་དང་ཡེ་ཤེས་འོད་དཔག་མེད་པའི་འཕྲུལ། །ཐུགས་རྗེ་ཡེ་ཤེས་ཕྱོགས་བཅུའི་ཞིང་ཀུན་ཁྱབ། །ཐམས་ཅད་མཁྱེན་པའི་ཡེ་ཤེས་མངའ་བསྙེས་པ། །བློ༴ འདིར༴ གཟུངས༴ ཆགས༴ མཁྱེན༴ སྐུ་དང་ཡེ་ཤེས་འདུ་འཕྲོའི་དཀྱིལ་འཁོར་དུ། །རྒྱལ་བ་ཀུན་གྱི་ཡེ་ཤེས་སྒྱུ་མ་སྟོན། །དབང་བཅུའི་ཡེ་ཤེས་ལྷུན་གྲུབ་རིག་པ་འཛིན། །བློ༴ འདིར༴ གཟུངས༴ ཆགས༴ མཁྱེན༴ བདེ་ཆེན་ཡེ་ཤེས་ཁ་སྦྱོར་ཐིག་ལེར་འཁྱིལ། །ཡེ་ཤེས་སྒྱུ་འཕྲུལ་དྲྭ་བར་ལོངས་སུ་སྤྱོད། །བདེན་གཉིས་ཟུང་འཇུག་ཡེ་ཤེས་སྒྲོན་མེ་སྦར། །བློ༴ འདིར༴ གཟུངས༴ ཆགས༴ མཁྱེན༴ ཆོས་དབྱིངས་ཡེ་ཤེས་ཀློང་དུ་མངོན་བྱང་ཆུབ། །མེ་ལོང་ཡེ་ཤེས་རིག་མདངས་ཟང་ཐལ་ཤར། །མཉམ་ཉིད་ཡེ་ཤེས་འཁོར་འདས་ཕྱོགས་རིས་མེད། །བློ༴ འདིར༴ གཟུངས༴ ཆགས༴ མཁྱེན༴ སོར་རྟོགས་ཡེ་ཤེས་སྤྱི་དང་རང་མཚན་མཁྱེན། །བྱ་གྲུབ་ཡེ་ཤེས་ཕྲིན་ལས་རྟག་ཅིང་ཁྱབ། །རང་བྱུང་ཡེ་ཤེས་སྲིད་ཞིའི་སྙིང་པོར་བཞུགས། །བློ༴ འདིར༴ གཟུངས༴ ཆགས༴ མཁྱེན༴ སྒྲིབ་བྲལ་འཇའ་ལུས་རྡོ་རྗེ་ཡེ་ཤེས་སྐུ། །རྩོལ་མེད་རང་བྱུང་སྒྲ་དབྱངས་ཡེ་ཤེས་གསུང་། །འོད་གསལ་དེ་བཞིན་ཉིད་གཟིགས་ཡེ་ཤེས་ཐུགས། །བློ་ལྡན༴ འདིར་གཤེགས༴ གཟུངས་དྲན༴ ཆགས་ཐོགས་
མཁྱེན་གཉིས། །ཡེ་ཤེས་ཀློང་དགུའི་དགོངས་པའི་གདིང་ཐོབ་ནས། །ལྷ་དང་དབྱེར་མེད་ཕྱག་རྒྱའི་ཡེ་ཤེས་ཀྱིས། །ཀུན་གཞི་ཚོགས་བརྒྱད་ཡེ་ཤེས་རྣམ་དགུར་རྫོགས། །བློ་ལྡན༴ འདིར་གཤེགས༴ གཟུངས་དྲན༴ ཆགས་ཐོགས༴ མཁྱེན་གཉིས༴ ཞི་བའི་ཡེ་ཤེས་རྟོག་སྒྲིབ་བག་ཆགས་སྦྱོང་། །རྒྱས་པའི་ཡེ་ཤེས་སྤངས་རྟོགས་ཡོན་ཏན་སྐྱེད། །དབང་གི་ཡེ་ཤེས་རང་སྣང་འུབ་ཆུབ་མཛད། །བློ་ལྡན༴ འདིར་གཤེགས༴ །གཟུངས་དྲན༴ ཆགས་ཐོགས༴ མཁྱེན་གཉིས༴ མངོན་སྤྱོད་ཡེ་ཤེས་གཟུང་འཛིན་རྩད་ནས་བཅོམ། །མཆོག་གི་ཡེ་ཤེས་གྲོལ་བ་བཞི་ལྡན་སྟོན། །འོད་གསལ་ཡེ་ཤེས་མཐའ་གཉིས་དབུ་མར་སྡོམ། །བློ་ལྡན༴ འདིར་གཤེགས༴ གཟུངས་དྲན༴ ཆགས་ཐོགས༴ མཁྱེན་གཉིས༴ ཐོག་མེད་སྒྲིབ་པའི་མ་རིག་མུན་ཁུང་དུ་མཁྱེན་བརྩེ་ཡེ་ཤེས་ཆེན་པོའི་འོད་སྤྲོས་ལ། །གནས་ལུགས་ཇི་བཞིན་མངོན་ཏུ་འགྱུར་བ་ཡི། །ཡེ་ཤེས་སྣང་བ་ཁོང་ནས་བཞད་པར་མཛོད། །ཁྱོད་ཀྱིས་བརྙེས་པའི་ཡེ་ཤེས་རིན་ཆེན་མཛོད། །རང་ནོར་བཞིན་ཏུ་སྤྱོད་པའི་ནུས་པ་ཐོབ། །བདག་གཞན་གཏན་གྱི་དབུལ་བ་རབ་བསལ་ནས། །ཡེ་ཤེས་ཕར་ཕྱིན་ཆོས་ཀྱི་རྒྱལ་པོར་ཤོག །ཅེས་ཡོན་ཏན་གནས་ལྔ་གཅིག་ཏུ་བསྡུས་པ་རྫོང་ཤོད་བདེ་གཤེགས་འདུས་པའི་ཕོ་
བྲང་དུ་འཆི་མེད་བསྟན་གཉིས་གླིང་པས་སྨིན་ཟླའི་དཀར་ཕྱོགས་འགྲུབ་སྦྱོར་དང་ལྡན་པའི་ཚེས་བཟང་པོར་བྲིས་ནས་ཚེས་བཅུར་ཚོགས་འཁོར་བརྒྱ་རྩ་བགྱིས་པའི་རྗེས་ཐོག་ཏུ་གསོལ་བ་བཏབ་པ་དགེ་ལེགས་འཕེལ།། ༈ །།གུ་རུ་ཉི་མ་འོད་ཟེར་ལ་ཐུགས་དམ་བསྐུལ་བའི་གསོལ་འདེབས་ཕན་བདེ་ཀུན་སྩོལ་ནོར་བུའི་རྒྱལ་པོ་ཉི་མའི་སྙིང་པོ་ཞེས་བྱ་བ་བཞུགས་སོ། །ན་མོ་གུ་རུ་བུདྡྷ་སཱུརྻ་རསྨི་སརྦ་སིདྡྷི་ཧཱུྃ། །འགྱུར་མེད་རྟག་པ་དམ་པའི་ཚེས་དབྱིངས་ལས། །གཟུགས་སྐུའི་རྣམ་རོལ་འགྲོ་ཁམས་མཐར་ཐུག་བར། །དུས་གསུམ་རྒྱུན་ཆད་མེད་པར་སྤྲོ་ཞིང་སྡུད། །གུ་རུ་ཉི་མ་འོད་ཟེར་ལ་གསོལ་བ་འདེབས། །འདིར་གཤེགས་བྱིན་ཆེན་ཕོབ་ལ་དབང་མཆོག་སྐུར། །བར་ཆད་ཀུན་སེལ་བསམ་དོན་མྱུར་འགྲུབ་མཛོད། །ནམ་མཁའི་སྐུ་ཅན་ཚད་དང་རིས་མེད་ཀྱང་། །བརྟུལ་ཞུགས་སྤྱོད་པས་གདུལ་བྱ་འདུལ་བའི་ཚེ། །འཆར་ཁའི་མདངས་མཚུངས་གཟི་བརྗིད་ལྟར་མི་བཟོད། །གུ་རུ་ཉི་མ་འོད་ཟེར༴ འདིར་གཤེགས༴ བར་ཆད་ཀུན་སེལ༴ རྡོ་རྗེའི་གསུང་དབྱངས་གསང་མཆོག་སྔགས་ཀྱི་མཛོད། །ཆོས་སྒོ་རེས་ཀྱང་རྡུལ་སྙེད་འཆིང་བ་དགྲོལ། །རིགས་ཅན་གསུམ་པོ་ངེས་པའི་ཐེག་པར་བཀོད། །གུ་རུ་ཉི་མ་འོད༴ འདིར་གཤེགས༴ བར་ཆད་ཀུན༴ སངས་རྒྱས་ཀུན་དང་མཉམ་ཉིད་ཡེ་ཤེས་སྒོ། །ཤས་ཙམ་དབྱེ་བས་ཚོམ་བུ་
འབུམ་སྡེ་གྲོལ། །བརྡ་ཐབས་ཙམ་གྱིས་དགོངས་བརྒྱུད་བྱིན་རླབས་འཕོ། །གུ་རུ་ཉི༴ འདིར༴ བར་ཆད༴ མཐོང་ཐོས་དྲན་པས་འཁོར་བའི་འཇིགས་ལས་སྐྱོབ། །དད་པས་བསྙེན་ན་གདོད་མའི་ས་ལ་བཀོད། །བསམ་གྱིས་མི་ཁྱབ་རྨད་བྱུང་ཡོན་ཏན་མཛོད། །གུ་རུ༴ འདིར༴ བར༴ ནོར་བུ་བུམ་བཟང་དཔག་བསམ་ཤིང་ཆེན་ལྟར། །རྟོག་མེད་ཕྲིན་ལས་འགྲོ་བའི་རེ་འདོད་སྐོང་། །གསོལ་བཏབ་ཙམ་གྱིས་བསམ་དོན་ཡིད་བཞིན་འགྲུབ། །གུ་རུ༴ འདིར༴ བར༴ དཀྱིལ་འཁོར་ཀུན་གྱི་ཁྱབ་བདག་ཉིད་གྱུར་ཀྱང་། །འགྲོ་ངོར་བསྙེན་སྒྲུབ་རྣམ་བཞི་མཐར་ཕྱིན་མཛད། །ཕྱི་ལྟར་རྣམ་པར་སྨིན་པའི་རིག་འཛིན་ཚུལ། །གུ་རུ༴ འདིར༴ བར་ཆད༴ ཟག་པ་གསུམ་ཟད་ལམ་མཆོག་ཡོངས་སུ་རྫོགས། །སྐྱེ་འཆི་གཉིས་སྤངས་འགྲོ་དོན་རྒྱུན་ཆད་མེད། །ནང་ལྟར་ཚེ་དབང་རིག་འཛིན་སྐུར་སྟོན་པ། །གུ་རུ༴ འདིར༴ བར༴ ལྷ་དང་དབྱེར་མེད་རིགས་ལྔའི་སྤྲུལ་བསྒྱུར་གྱིས། །མཐའ་ཡས་ཞིང་གི་འགྲོ་བ་བདེ་ལ་བཀོད། །གསང་བ་ཕྱག་རྒྱ་ཆེན་པོའི་རིག་པ་འཛིན། །གུ་རུ༴ འདིར༴ བར༴ མཐར་ལམ་རྒྱལ་ཚབ་ཆེན་པོའི་ས་ལ་བཞུགས། །གང་འདུལ་སྤྲུལ་པ་ནམ་མཁའི་མཐའ་མཉམ་འགྱེད། །ཡང་གསང་ལྷུན་གྱིས་གྲུབ་པའི་རིག་མཆོག་འཛིན། །གུ༴ འདིར༴ བར༴ ཀ་དག་གདོད་མའི་དབྱིངས་སུ་མངོན་
བྱང་ཆུབ། །སྐུ་དང་ཡེ་ཤེས་འདུ་འབྲལ་མེད་པར་བཞུགས། །ངེས་དོན་ཐོག་མའི་མགོན་པོ་འོད་མི་འགྱུར། །གུ་རུ་ཉི་མ༴ འདིར་གཤེགས༴ བར་ཆད༴ ལྔ་ཕྲག་རྣམ་ལྔའི་སྒྱུ་འཕྲུལ་དྲྭ་བ་ལས། །སངས་རྒྱས་གར་མཁན་ཆོས་ཀྱི་དབྱིངས་ཀུན་ཁྱབ། །འཁོར་བ་དོང་ནས་སྤྲུགས་པའི་རྩལ་ཆེན་འཆང་། །གུ་རུ་ཉི་མ༴ འདིར་གཤེགས༴ བར་ཆད༴ ཁྱེད་ནི་བརྟན་གཡོ་ཀུན་ལ་ཁྱབ་པར་བཞུགས། །རོལ་པའི་གར་གྱིས་འཁོར་འདས་ཞིང་ཀུན་གཡོ། །གྲོལ་བ་རྣམ་བཞིས་སྲིད་པའི་འཁྲུལ་འཁོར་ལྡོག །མཆོག་ཐུན་དངོས་གྲུབ་སྩོལ་ལ་ཐོགས་པ་མེད། །བདག་ཅག་ཁྱེད་རྗེས་ཞུགས་པའི་དམུས་ལོང་རྣམས། །ཉམ་ཐག་སྲིད་པའི་འབྲོག་དགོན་འཁྱམས་ལ་གཟིགས། །ཡེ་ཤེས་སྒྲིབ་པའི་དྲྭ་བ་བཅད་ནས་ཀྱང་། །ཡང་དག་ཐར་བའི་ལམ་མཆོག་བསྟན་ཏུ་གསོལ། །ཉོན་མོངས་སྤྲིན་ཕུང་ཐུགས་རྗེའི་རླུང་གིས་གཏོར། །ཡེ་ཤེས་ཉིན་བྱེད་སྣང་བ་གསལ་དུ་གསོལ། །ལམ་གྱུར་རིག་འཛིན་རྣམ་བཞི་མཐར་ཕྱིན་ནས། །ཡེ་ཤེས་བླ་མའི་ས་ལ་བཀོད་དུ་གསོལ། །གནས་སྐབས་མི་མཐུན་གཡུལ་ལས་རྣམ་པར་རྒྱལ། །འཆི་མེད་ཚེ་ཡི་དབང་ཆེན་བསྐུར་དུ་གསོལ། །ཐུན་མཆོག་རིགས་ཀྱི་དངོས་གྲུབ་མ་ལུས་དང་། །ཁྱད་པར་འདོད་པའི་དོན་མཆོག་སྩལ་དུ་གསོལ། །མགོན་ཁྱོད་ཐུགས་རྗེ་ཉེ་རིང་མ་
མཆིས་ཀྱང་། །བདག་ནི་ལས་ངན་སྒྲིབ་པ་སྟུག་དྲག་པས། །དེ་སྔ་མཐའ་མེད་འཁོར་བའི་རྒྱ་མཚོར་གཡེང་། །སྡུག་བསྔལ་དྲག་པོས་ལུས་སེམས་རྟག་ཏུ་མནར། །ཡང་ཡང་ཐུགས་དམ་བསྐུལ་ཞིང་གསོལ་བཏབ་ཀྱང་། །ཐུགས་རྗེའི་ལྕགས་ཀྱུའི་མ་ཐེབས་ཡན་གར་ལུས། །འགྲོ་དོན་དགོངས་པར་བཏང་སྙོམས་མི་མངའ་བས། །ད་ནི་མྱུར་དུ་བྱམས་པའི་ཕྱག་རྐྱོངས་ལ། །འཇིགས་ཚོགས་མེ་འོབས་འདི་ལས་བསྐྱབ་ཏུ་གསོལ། །སྐུ་ཡི་ཞལ་སྟོན་གསུང་གི་གདམས་པ་སྩོལ། །ཡེ་ཤེས་དགོངས་པའི་རྩལ་གྱིས་བྱིན་གྱིས་རློབས། །ཕྱོགས་ལས་རྣམ་རྒྱལ་ཉིད་དང་དབྱེར་མེད་པར། །དོན་གཉིས་མཐར་ཕྱིན་བརྟུལ་ཞུགས་ཕྱོགས་མེད་གྲུབ། །ཧེ་རུ་ཀ་དཔལ་དུས་འདིར་འགྲུབ་བར་མཛོད། །ཅེས་གཙང་རོང་བཀྲ་ཤིས་བརྩེགས་རྫོང་ནས་ཉེ་བའི་སྲས་ཆེན་བརྒྱད་ཀྱི་བྱིན་རླབས་རྫས་མཆོག་རྣམས་སྤྱན་དྲངས་པའི་སྔ་རོལ་དུ། གུ་རུ་མཚན་མཆོག་བརྒྱད་དང་ཁྱད་པར་འདི་ཉིད་ཀྱི་སྐུའི་མཚན་མས་དབུགས་འབྱིན་སྩལ་བའི་དག་པ་ཡེ་ཤེས་སྒྱུ་མ་གསལ་བའི་སྐབས་སུ། འཆི་མེད་བསྟན་གཉིས་གཡུང་དྲུང་གླིང་པའམ། པདྨ་གར་དབང་བློ་གྲོས་མཐའ་ཡས་པའི་སྡེས་གསོལ་བ་བཏབ་པ་སརྦ་ཨརྠ་སིདྡྷི་བྷ་བནྟུ།། ༈ །།གུ་རུ་ཤཱཀྱ་སེང་གེ་ལ་ཐུགས་དང་བསྐུལ་བའི་གསོལ་འདེབས་དགེ་ལེགས་ཀུན་འབྱུང་ནོར་བུའི་རྒྱལ་པོ་ཟླ་བའི་སྙིང་པོ་ཞེས་བྱ་བ་བཞུགས་སོ། །ན་མོ་གུ་རུ་སམྱཀྶཾ་བུདྡྷ་ཤཱཀྱ་སི༚་ཧ་པཱ་དཱ་ཡ། །
འོད་གསལ་རྡོ་རྗེ་སྙིང་པོའི་གཞི་དབྱིངས་སུ། །གདོད་ནས་རང་གྲོལ་སྐད་ཅིག་གཟིགས་པ་བརྙེས། །སྤངས་པ་ཆེན་པོ་སྲེད་ལེན་ཟག་པ་བཅད། །རྟོགས་པ་ཆེན་པོ་མ་བཙལ་ལྷུན་གྱིས་གྲུབ། །ཆོས་སྐུ་ཤཱཀྱ་སེང་གེར་གསོལ་བ་འདེབས། །སྒྲིབ་མེད་སངས་རྒྱས་སྤྱན་གྱིས་དུས་འདིར་གཟིགས། །བདག་ཀྱང་སྤངས་དང་རྟོགས་པ་མཐར་ཕྱིན་ནས། །བླ་མ་ཆོས་སྐུ་ཁྱེད་དང་མཚུངས་བྱིན་རློབས། །འོག་མིན་ཆེན་པོར་རིགས་ལྔ་གང་ཆེན་མཚོའི། །ཞིང་དང་སྐུ་ཡི་བཀོད་པ་འབྱམས་ཀླས་པས། །ནམ་མཁའི་མཐའ་ཁྱབ་འཁྲུལ་པའི་གཞན་དབང་ཅན། །མ་བསྒྲལ་བ་རྣམས་གདོད་མའི་ས་ལ་བསྒྲལ། །ལོངས་སྐུ་ཤཱཀྱ་སེང་གེར༴ སྒྲིབ་མོད་སངས་རྒྱས༴ བདག་ཀྱང་འོད་ལྔ་ལྷུན་གྲུབ་ཀློང་ཡངས་སུ། །བླ་མ་ལོངས་སྐུ་ཁྱེད་དང་༴ ཕྱེད་སྣང་རང་བཞིན་སྤྲུལ་པའི་ཞིང་རྣམས་སུ། །ཐུགས་བསྐྱེད་སྨོན་ལམ་རྣམ་ཐར་རྒྱ་མཚོའི་བཅུད། །ངོ་མཚར་གཟུགས་སུ་སྨིན་པའི་སྒྱུ་འཕྲུལ་གྱིས། །མཐོང་ཐོས་དྲན་རེག་ཕྱིར་མི་སྡོག་ལ་བཀོད། །སྤྲུལ་སྐུ་ཤཱཀྱ་སེང་གེར༴ སྒྲིབ་མེད་སངས་རྒྱས༴ བདག་ཀྱང་རྣམ་དག་སངས་རྒྱས་ཞིང་སྦྱངས་ནས། །བླ་མ་སྤྲུལ་སྐུ་ཁྱེད་དང་༴ མ་དག་འགྲོ་དྲུག་སྒྱུ་མའི་གྲོང་ཁྱེར་དུ། །གུ་རུ་ཐུབ་དབང་དྲུག་གི་སྐུར་བསྟན་ནས། །གང་འདུལ་སྒྱུ་འཕྲུལ་རྒྱན་གྱི་རོལ་མོ་ཡིས། །འཁོར་བའི་
འཁྲུལ་འཁོར་དབྱིངས་སུ་གཅོད་མཛད་པ། །འགྲོ་འདུལ་ཤཱཀྱ་སེང་གེར༴ སྒྲིབ་མེད་སངས་རྒྱས༴ བདག་ཀྱང་འཁྲུལ་སྣང་ཡེ་ཤེས་ཆེན་པོར་ལྡོག །བླ་མ་ཐུབ་དབང་ཁྱེད༴ མི་མཇེད་ཞིང་འདིར་རྩོད་པའི་མཐར་ཐུག་ཆེ། །ཕྱོགས་བཅུའི་སངས་རྒྱས་རྣམས་ཀྱི་བཀའ་བགྲོས་ཏེ། །ཛམ་གླིང་ཐུབ་དབང་བསྟན་པ་སྤེལ་བའི་ཕྱིར། །ཐུབ་དབང་གཉིས་པའི་སྐུ་རུ་བསྟན་ཏེ་བྱོན། །བཅོམ་ལྡན་ཤཱཀྱ་སེང་གེར༴ སྒྲིབ་མེད་སངས་རྒྱས༴ བདག་ཀྱང་རྒྱལ་བསྟན་འཛིན་སྐྱོང་སྤེལ་བ་ལ། །བླ་མ་བཅོམ་ལྡན་ཁྱེད༴ བློ་དམན་གདུལ་བྱ་འདུལ་ཕྱིར་ས་དང་ལམ། །རིམ་བགྲོད་རྡོ་རྗེ་ལྟ་བུའི་ཏིང་འཛིན་གྱིས། །སྒྲིབ་པའི་རྩ་བ་བྱང་ཆུབ་སྙིང་པོར་བཅད། །རྡོ་རྗེའི་གདན་ཏུ་ཐུབ་དབང་གཉིས་པར་བསྟན། །སངས་རྒྱས་ཤཱཀྱ་སེང་གེར༴ སྒྲིབ་མེད་སངས༴ བདག་ཀྱང་ས་བཅུ་ལམ་ལྔའི་རྩེ་མོར་སོན། །བླ་མ་སངས་རྒྱས་ཁྱེད༴ གསེར་སྦྱངས་ལྷུན་པོར་མཚམས་སྤྲིན་མདངས་འཁྱུད་ལྟར། །བདུད་ཀྱི་སྟོབས་འཕྲོག་ངུར་སྨྲིག་བླ་གོས་འཆང་། །མཚན་དཔེའི་དཔལ་འབར་ཆོས་ཉིད་ལྷུན་འབྱམས་ངང་། །བདུད་བཞི་རབ་བཅོམ་ཡང་དག་རྫོགས་སངས་རྒྱས། །བདུད་འདུལ་ཤཱཀྱ༴ སྒྲིབ་མེད༴ བདག་ཀྱང་བདུད་བཞིའི་གཡུལ་ལས་རབ་རྒྱལ་ཏེ། །བླ་མ་བདུད་འཇོམས༴
སྟོབས་བཅུའི་རྩལ་རྫོགས་མི་ཡི་སེང་གེའི་ཚུལ། །མི་འཇིགས་བཞི་ཡི་སྡེར་སེན་རབ་ཏུ་བརྗིད། །མ་འདྲེས་ཆོས་ཀྱི་གངས་རིར་གནས་བཅས་ཏེ། །འཇིགས་བྲལ་ཤཱཀྱ་སེང་༴ སྒྲིབ་མེད༴ བདག་ཀྱང་སྲིད་དང་ཞི་བའི་འཇིགས་ལས་གྲོལ། །བླ་མ་འཇིགས་བྲལ༴ རྡོ་རྗེའི་སྐུ་བརྙེས་ལས་ཉོན་ཟག་པ་ཟད། །འདུལ་བ་རྣམ་བཞིའི་ཆོ་འཕྲུལ་ཆེན་པོ་སྟོན། །ལྷར་བཅས་འགྲོ་བ་ཡོངས་ཀྱི་སྐྱབས་གཅིག་པུ། །མི་འདུལ་ཁ་ལོ་སྒྱུར་མཛད་བླ་ན་མེད། །སྐྱོབ་པ༴ སྒྲིབ་མེད༴ བདག་ཀྱང་འགྲོ་ཀུན་སྐྱོབ་པའི་མགོན་གྱུར་ཏེ། །བླ་མ་སྐྱབས་མཆོག༴ ཇི་ལྟ་ཇི་སྙེད་མཁྱེན་པའི་དཀྱིལ་འཁོར་རྒྱས། །ལས་དང་ཉོན་མོངས་མ་རིག་མུན་ཁང་བཅོམ། །ཞི་བསིལ་ཆོས་གསུང་བདུད་རྩིའི་ཆར་ཆེན་པོས། །འགྲོ་རྒྱུད་ཐར་པའི་ལོ་ཏོག་སྨིན་པར་མཛད། །ཀུན་མཁྱེན༴ སྒྲིབ་མེད༴ བདག་ཀྱང་མཁྱེན་གཉིས་ཡེ་ཤེས་རྩལ་ཆེན་རྫོགས། །བླ་མ་ཀུན་མཁྱེན༴ ཁྱེད་གཅིག་བསྔགས་པས་རྒྱལ་བ་ཀུན་བསྔགས་འགྱུར། །རྒྱལ་རྣམས་བསྔགས་པའང་ཁྱེད་ཉིད་བསྔགས་པ་སྟེ། །དུས་གསུམ་གཤེགས་པ་ཀུན་དང་དབྱེར་མེད་པས། །བསམ་གྱིས་མི་ཁྱབ་རྣམ་ཐར་རྒྱ་མཚོའི་བདག །མཚུངས་བྲལ་ཤཱཀྱ༴ སྒྲིབ་མེད༴ བདག་ཀྱང་རྣམ་ཐར་ཡོན་ཏན་མཐའ་ཡས་པའི། །བླ་མ་མཚུངས་
མེད་ཁྱེད་དང་མཚུངས་བྱིན་རློབས། །གུ་རུ་ཤཱཀྱ་སེང་གེ་འགྲོ་བའི་མགོན། །བདག་དང་ལམ་རྒྱུད་ལྔས་བསྡུས་འགྲོ་རྣམས་ཀྱི། །ལས་ཉོན་སྒྲིབ་པའི་འཆིང་བ་བཅད་ནས་ཀྱང་། །ཡེ་ཤེས་སྣང་བ་ཕྱོགས་མེད་བརྡལ་བར་མཛོད། །སྐྱེ་རྒ་ན་འཆིའི་ཆུ་བོ་རྩད་ནས་སྒེམས། །བདུད་བཞིའི་གཡུལ་ལས་རྣམ་པར་རྒྱལ་བར་མཛོད། །མཐར་ཐུག་ཆེན་པོ་གསུམ་གྱི་བདག་ཉིད་ཅན། །ཕྱོགས་དུས་རྒྱལ་དང་མཉམ་པ་གསུམ་ལྡན་མཛོད། ཆོས་གསུང་དབྱངས་ཀྱིས་ལྷར་བཅས་འཇིག་རྟེན་གསུམ། །དབུགས་ཆེན་འབྱིན་ནུས་རྐང་གཉིས་གཙོར་གྱུར་མཛོད། །སུས་ཀྱང་མི་འཕྲོག་ཅིས་ཀྱང་མི་འཇིགས་པའི། །བླ་མེད་བླ་མའི་གོ་འཕང་ཐོབ་མཛད་གསོལ། ཅེས་གྲུ་གུ་བཀྲ་ཤིས་གཏེར་རྫོང་དང་གནས་ཆེན་པདྨ་ལྷ་རྩེ་ནས་སངས་རྒྱས་ཀྱི་ཚེམས་རིན་པོ་ཆེ་དང་། འདས་པའི་སངས་རྒྱས་སྟོང་གི་གདུང་མཆོག །ཆོས་འཁོར་ནོར་བུའི་རྡུལ་སོགས་སྤྱན་དྲངས་པའི་ཚེ། མགོན་པོ་གང་གི་ཚད་མེད་པའི་ཐུགས་རྗེ་དང་བཀའ་དྲིན་རྗེས་སུ་དྲན་ཏེ་གཏེར་གནས་དེ་དག་ཏུ་འཆི་མེད་བསྟན་གཉིས་གཡུང་དྲུང་གླིང་པས་གསོལ་བ་བཏབ་པ་སིདྡྷི་རསྟུ།། ༈ །།གུ་རུ་སེངྒེ་སྒྲ་སྒྲོག་ལ་ཐུགས་དམ་སྐུལ་བའི་གསོལ་འདེབས་ཕྱོགས་ལས་རྣམ་རྒྱལ་ནོར་བུའི་རྒྱལ་པོ་སྟོབས་ཀྱི་སྙིང་པོ་ཞེས་བྱ་བ་བཞུགས་སོ།། །ཧེ་གུ་རུ་སི༚་ཧ་ནཱ་ད་པཱ་དཾ་ན་མོ་ན་མཱ་མི། །ཀུན་ནས་སྤྲོས་བྲལ་གང་ཡང་མི་དམིགས་ཀྱང་། །ངར་འཛིན་སྟོབས་སུ་གྱུར་པའི་གདུག་ཅན་ལ། །སྙིང་རྗེས་ཁྲོས་པའི་སྐུར་བཞེངས་ཧེ་རུ་ཀ །ཟླ་མེད་ཁྲོ་རྒྱལ་ཀུན་གྱི་རྗེ་
བཙན་མཆོག །དཔལ་ཆེན་སེང་གེ་སྒྲ་སྒྲོགས་ཞབས་ལ་འདུད། །ཐུགས་དམ་བསྐུལ་ལོ་འདིར་བྱོན་དངོས་གྲུབ་སྩོལ། །གསོལ་བ་འདེབས་སོ་ཕྱི་ནང་བར་ཆད་སོལ། །ཐུགས་རྗེའི་རྩལ་སྐྱེད་སྲི་ཀེག་འཆི་བདུད་ཟློག །གཉིས་སྣང་གདོད་ནས་དག་པའི་ཡེ་ཤེས་སྐུ། །མཐིང་ནག་སྟོན་མཚན་ནམ་མཁའ་དྭངས་པའི་མདོག །གནམ་ལྕགས་རྡོ་རྗེས་སྲིད་གསུམ་ཟིལ་གྱིས་གནོན། །སྡིག་པའི་མཛུབ་མོས་ཁམས་གསུམ་དབང་དུ་སྡུད། །དཔལ་ཆེན་སེང་གེ༴ ཐུགས་དམ་བསྐུལ་ལོ༴ གསོལ་བ་འདེབས་སོ༴ ཐུགས་རྗེའི་རྩལ་སྐྱེད༴ ཁམ་ནག་རལ་པ་སྲིད་པའི་རྩེ་མོར་གཡེངས། །འདོར་ཐབས་ཞབས་ཀྱིས་ན་རཀ་གཏིང་ནས་གནོན། །མེ་མཚོན་རྡོ་རྗེའི་ཐོག་རྒོད་ཆར་ཆེན་པོས། །སྲི་ངན་ཀེག་རྩུབ་རྩ་སྒུར་བཞིན་ཏུ་བཅོམ། །དཔལ་ཆེན་སེང་ གེ༴ ཐུགས་དམ༴ གསོལ་བ༴ ཐུགས་རྗེའི་རྩལ༴ དྲག་ཤུལ་ཁྲོས་པའི་གཟི་བྱིན་ཆེར་འབར་བས། ས་གསུམ་དྲེགས་ཚོགས་འབྱུང་པོ་འདར་ཞིང་འདུན། །རྔམས་བརྗིད་སྟོབས་ཀྱི་ཆོ་འཕྲུལ་ཆེན་པོ་ཡིས། །གདུག་བྱེད་ལྷ་མིན་ཁོང་ཁྲག་ཁ་རུ་ལུད། །དཔལ་ཆེན༴ ཐུགས་དམ༴ གསོལ་བ༴ ཐུགས་རྗེའི༴ འབྲུག་སྟོང་ལྡིར་འདྲ་བདག་མེད་སེང་གེའི་སྒྲས། །བདག་ལྟའི་གླང་པོ་བྱེ་བའི་ཀླད་པ་འགེམས། །ཧཱུྃ་སྒྲས་རི་བོ་རལ་ཞིང་རྒྱ་མཚོ་འཁྱམས། །ཕཊ་
ཀྱིས་འཇིག་རྟེན་གཡོ་ཞིང་བདུད་བགེགས་སྐྲོད། །དཔལ་ཆེན༴ ཐུགས་དམ༴ གསོལ་བ་འདེབས༴ ཐུགས་རྗེའི༴ དོན་དམ་གསང་བ་སྦས་པའི་ཟབ་དབྱིངས་སུ། །ཡེ་ཤེས་ཉིན་མོར་བྱེད་པའི་འོད་སྟོང་བརྡལ། །ཉོན་མོངས་མུན་ཁང་བྱེ་བ་ཡུད་ཀྱིས་བཅོམ། །ཡང་དག་བདེ་ཆེན་སྣང་བ་རབ་གསལ་མཛད། །དཔལ་ཆེན༴ ཐུགས་དམ༴ གསོལ་བ༴ ཐུགས་རྗེའི། །འབར་བའི་དཀྱིལ་འཁོར་ནམ་མཁའི་མཐའ་མཉམ་སྤྲོ། །དེ་ཀུན་བ་སྤུའི་བུ་ག་གཅིག་ཏུ་སྡུད། །སངས་རྒྱས་ཀུན་གྱི་གསང་བའི་མཛོད་འཛིན་ཀྱང་། །གསང་བ་མ་ལུས་ཉིད་ཀྱི་དབྱིངས་ལས་ཕྱུང་། །དཔལ་ཆེན༴ ཐུགས་དམ༴ གསོལ་བ༴ ཐུགས་རྗེའི། །སྐལ་བཟང་སྒྲུབ་ལ་ཟླ་བ་ལྟར་བསིལ་ཡང་། །ལོག་སྲེད་ཅན་ངོར་དུས་མཐའི་མེ་བཞིན་འབར། །གཏུམ་པའི་གཉེན་པོར་གཏུམ་ཆེན་འཇིགས་པར་བྱེད། །དུག་གསུམ་འཁྲུལ་འཁོར་དྲག་ཤུལ་སྟོབས་ཀྱིས་འཇོམས། །དཔལ་ཆེན༴ ཐུགས་དམ༴ གསོལ་བ༴ ཐུགས་རྗེའི་རྩལ༴ ཞི་བ་དུལ་བའི་ཚུལ་ལ་ཡིད་འཁུ་ཞིང་། །བདེན་ཚིག་རྣ་བར་མི་ལྷོན་རྟག་ཆད་ཀྱི། །གྲུབ་མཐའ་འཆའ་པའི་མུན་སྦྲུལ་ཚང་ཚིང་རྣམས། །མཐུ་སྟོབས་བསྐལ་མེས་སྐད་ཅིག་ཉིད་ལ་སྲེག །དཔལ་ཆེན༴ ཐུགས་དམ༴ གསོལ་བ༴ ཐུགས་རྗེའི༴ དགོངས་པ་མི་གཡོ་མཁའ་ལྟར་རྣམ་
དག་ཀྱང་། །འཁོར་འདས་ཀུན་ལ་ཁྱབ་པའི་རྣམ་འགྱུར་གྱིས། །ལས་བཞི་ལྷུན་གྲུབ་མཆོག་གི་དངོས་གྲུབ་སྟེར། །སྲིད་པའི་གྲོང་ཁྱེར་རྨངས་ནས་འཇིགས་མཛད་པ། །དཔལ་ཆེན༴ ཐུགས་དམ༴ གསོལ་བ༴ ཐུགས་རྗེའི༴ གང་ཞིག་ཁྱེད་མཚན་ཐོས་སམ་དྲན་པས་ཀྱང་། །བདུད་དཔུང་བྱེ་བའི་རུ་མཚོན་དུས་གཅིག་སྙོལ། །ཕྱོགས་ལས་རྣམ་པར་རྒྱལ་བའི་རྒྱལ་མཚན་ཆེ། །ནུབ་མེད་སྲིད་པའི་རྩེ་མོར་སྒྲེང་མཛད་པ། །དཔལ་ཆེན༴ ཐུགས་དམ༴ གསོལ་བ༴ ཐུགས་རྗེའི། །ཁྲོ་རྒྱལ་ཡོངས་ཀྱི་སྟོབས་འདུས་ཧེ་རུ་ཀ །དཔལ་ཆེན་བདུད་འདུལ་གསང་བདག་སེང་གེའི་སྒྲ། །ཁྱོད་ལ་སྐྱབས་གསོལ་ཐུགས་རྗེའི་མཐུ་མ་ཆུང་། །གསོལ་བ་འདེབས་སོ་གཟིགས་པའི་སྟངས་མ་ཞན། །དགོངས་པས་ཡལ་བར་མ་འདོར་སྒྲུབ་པོ་བདག །ཀེག་སྲི་གློ་བུར་འཚེ་བའི་མིང་མེད་ཅིང་། །བར་ཆད་བདུད་ཀྱི་གཡུལ་ལས་རྣམ་པར་རྒྱལ། །འཇིགས་བྱེད་ཁྲོ་རྒྱལ་ཁྱོད་དང་དབྱེར་མེད་པར། །སྟོབས་བཅུའི་རྩལ་རྫོགས་འཇིགས་མེད་བརྟུལ་ཞུགས་གྲུབ། །བསྟན་འགྲོར་སྡང་བའི་མི་དང་མི་མིན་དཔུང་། །འཇོམས་བྱེད་གཉེན་པོ་སྟོབས་ཀྱི་དབང་ཆེན་ཐོབ། །ཁྲག་འཐུང་འཁོར་ལོས་སྒྱུར་བར་བདག་སྒྲུབས་ཤིག །ཅེས་རྫོང་ཤོད་བདེ་གཤེགས་འདུས་པའི་ཕོ་བྲང་ཆེན་པོར་ལོ་མཚམས་བཅད་རྒྱར་ཞུགས་པའི་སྐབས་སྨིན་དྲུག་ཟླ་བའི་ཚེས་བཅུར་རྡོ་རྗེ་
ཁྲག་འཐུང་ཐུགས་ཀྱི་རྫོང་ཙིཏྟ་གསང་བའི་ཕུག་པར་པདྨ་གར་དབང་བློ་གྲོས་མཐའ་ཡས་པའི་སྡེས་བྲིས་པ་ཛ་ཡ་ཛ་ཡ་སུ་ཛ་ཡ།། ༈ །།གུ་རུ་རྡོ་རྗེ་གྲོ་ལོད་ལ་ཐུགས་དམ་སྐུལ་བའི་གསོལ་འདེབས་ཕྲིན་ལས་ཡོངས་གྲུབ་ནོར་བུའི་རྒྱལ་པོ་འབར་བའི་སྙིང་པོ་ཞེས་བྱ་བ་བཞུགས་སོ། །ཧཱུྃ་ཧཱུྃ་ཧཱུྃ། །སངས་རྒྱས་ཀུན་གྱི་སྟོབས་བཅུའི་ནུས་རྩལ་འདུས། །འཆོལ་བའི་ཁྲོ་རྒྱལ་རྡོ་རྗེ་གྲོ་བོ་ལོད། །འདིར་གཤེགས་གསོལ་འདེབས་བུ་ལ་བྱིན་གྱིས་རློབས། །བདུད་བཞི་སྒྲིབ་ཚོགས་ཡེ་ཤེས་མེ་ཡིས་སྲེགས། །འདོད་པའི་དངོས་གྲུབ་ད་ལྟ་ཉིད་དུ་སྩོལ། །འཁོར་འདས་ཞིང་ན་ཆེ་བཙན་འགྲན་ཟླ་བྲལ། །འབར་བའི་སྐུར་བཞེངས་རྡོ་རྗེ་གྲོ་བོ་ལོད། །འདིར་གཤེགས༴ བདུད་བཞི་སྒྲིབ་ཚོགས༴ འདོད་པའི་དངོས་གྲུབ་ད༴ སྒྱུ་་འཕྲུལ་དྲྭ་བའི་རྣམ་འཕྲུལ་ཞིང་ཀུན་ཁྱབ། །ཐུགས་རྗེ་རབ་ཁྲོས་རྡོ་རྗེ་གྲོ་བོ་ལོད། །འདིར་གཤེགས་གསོལ་འདེབས༴ བདུད་བཞི་སྒྲིབ་ཚོགས་ཡེ་ཤེས༴ འདོད་པའི་དངོས་གྲུབ༴ གདོང་དམར་མི་དང་མི་མིན་གདུག་པ་འདུལ། །སྟོབས་ཀྱི་ཕྱག་རྒྱ་རྡོ་རྗེ་གྲོ་བོ་ལོད། །འདིར་གཤེགས་གསོལ་འདེབས༴ བདུད་བཞི་སྒྲིབ་ཚོགས༴ འདོད་པའི་དངོས་གྲུབ། །མཐའ་གྲོལ་ཡེ་ཤེས་སྟོབས་ལྡན་ཧེ་རུ་ཀ །གནས་གཏེར་མངའ་བདག་རྡོ་རྗེ་གྲོ༴ འདིར་གཤེགས༴ བདུད་བཞི་སྒྲིབ༴ འདོད་པའི༴
མཚན་ཐོས་དྲན་པ་ཙམ་གྱིས་བདུད་བཞི་འཇོམས། །བར་ཆད་ཀུན་སེལ་རྡོ་རྗེ༴ འདིར་གཤེགས༴ བདུད་བཞི་སྒྲིབ་ཚོགས༴ འདོད་པའི༴ སྐུ་གསུམ་སྐུ་ལྔ་མཚན་བརྒྱད་རབ་ཁྲོས་སྐུར། །གཅིག་བསྡུས་དཔལ་ཆེན་རྡོ་རྗེ་གྲོ་བོ་ལོད། །འདིར་གཤེགས༴ བདུད་བཞི་སྒྲིབ་ཚོགས༴ འདོད་པའི་དངོས༴ ཐུགས་རྗེ་མ་ཆུང་པདྨ་ཐོད་ཕྲེང་རྩལ། །ཐུགས་དམ་མ་བསྙེལ་རྡོ་རྗེ་གྲོ་བོ་ལོད། །བརྩེ་བས་དགོངས་ཤིག་རྗེ་བཙུན་པདྨ་འབྱུང་། །དད་པས་འབོད་དོ་ཐུགས་རྗེས་མྱུར་དུ་བྱོན། །གསོལ་བ་འདེབས་སོ་སྒོ་གསུམ་བྱིན་གྱིས་རློབས། །སྐལ་ངན་སྒྲིབ་པའི་མུན་པ་དབྱིངས་སུ་སོལ། །འཆི་བདག་བདུད་ཆོམས་འཆི་མེད་ཚེ་དབང་སྩོལ། །ཉོན་མོངས་མདུད་ཁྲོལ་ཡེ་ཤེས་རྩ་ཁ་ཕྱེས། །ཕུང་པོའི་ཟག་ཟད་འཇའ་ལུས་དངས་མར་སྨིན། །རྣམ་གཡེང་རྟོག་ཚོགས་ཆོས་ཉིད་རོལ་པའི་རྒྱན། །མཆོག་གི་རིག་འཛིན་རྣམས་དང་སྐལ་མཉམ་པའི། །སྦྱོར་ལམ་མཐར་ཕྱིན་མཐོང་སྒོམ་ཉམས་འོག་ཆུད། །དངོས་གྲུབ་མཆོག་གིས་དབུགས་ཆེན་འབྱིན་པར་མཛོད། །མ་སྲིང་མཁའ་འགྲོའི་རྩེ་གདུང་དམ་ཚིག་སྐུལ། །དམ་ཅན་སྲུང་མའི་ཚོགས་ལ་བཀའ་ནན་སྩོལ། །ལོག་འདྲེན་བར་ཆད་འབྱུང་པོ་ཚར་ཆོད་ལ། །ཁྱོད་ཀྱི་རྗེས་སུ་ཞུགས་པའི་སྒྲུབ་པ་པོར། །སྒྲིབ་མེད་ཡེ་ཤེས་ཆེན་པོས་རབ་དགོངས་ཏེ། །གསོལ་
བཏབ་འབྲས་བུ་མྱུར་དུ་མཆིས་པར་མཛོད། །ཐུགས་དམ་དུས་ལ་བབ་པོ་ས་མ་ཡ། །ཞེས་བོད་ཁམས་བཀྲ་ཤིས་འབྱུང་བའི་གནས་མཆོག་རོང་མེ་དཀར་མོ་སྟག་ཚང་དུ་ཟབ་མོ་གཏེར་གྱི་སྒྲུབ་བ་ལ་ཞུགས་པའི་སྐབས་འགྲུབ་སྦྱོར་དང་ལྡན་པའི་དཀར་ཕྱོགས་ཀྱི་གྲལ་ཚེས་བཟང་པོར་འཆི་མེད་བསྟན་གཉིས་གླིང་བས་བྲིས་པ་དགེ་ལེགས་འཕེལ།། ༈ །།གུ་རུ་ཡིད་བཞིན་ནོར་བུ་ལ་གསོལ་བ་འདེབས་པ་བར་ཆད་ཀུན་སེལ་ཞེས་བྱ་བ་བཞུགས་སོ། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། །ཚེ་དཔག་མེད་མགོན་སྤྱན་རས་གཟིགས། །རྡོ་རྗེ་འཆང་ཆེན་ཤཱཀྱའི་རྒྱལ། །སངས་རྒྱས་ཀུན་འདུས་ཆོས་ཀྱི་སྐུ། །སྡེ་སྣོད་གསུམ་དང་རྒྱུད་སྡེ་དྲུག །ཐེག་པ་རིམ་པ་དགུ་ལ་སོགས། །དམ་ཆོས་ཀུན་འབྱུང་ལོངས་སྤྱོད་རྫོགས། །སར་གནས་རྒྱལ་སྲས་བྱང་ཆུབ་སེམས། །ཟུང་བཞི་ཡ་བརྒྱད་འཕགས་པའི་ཚོགས། །དགེ་འདུན་ཀུན་གཙོ་སྤྲུལ་པའི་སྐུ། །རྗེ་བཙུན་ཨོ་རྒྱན་རིན་པོ་ཆེར། །རྩེ་གཅིག་གདུང་བས་གསོལ་བ་འདེབས། །སྒྲིབ་མེད་ཡེ་ཤེས་སྤྱན་གྱིས་གཟིགས། །འཇིགས་བརྒྱད་བདུད་བཞི་དུག་ལྔ་སོགས། །ཕྱི་ནང་གསང་བའི་བར་ཆད་སོལ། །བྱང་ཆུབ་བར་དུ་ཐུགས་རྗེས་ཟུང་། །དགའ་རབ་ཤྲཱི་སེང་བི་མ་ལ། །རྒྱན་དྲུག་གྲུབ་ཆེན་བརྒྱད་ཅུ་བཞི། །ལྷུན་གྲུབ་རྣམ་སྨིན་ཚེ་ལ་དབང་། །ཕྱག་རྒྱ་ཆེན་པོའི་རིག་པ་འཛིན། །གང་
འདུལ་སྤྲིན་འཕྲོ་བདེ་བ་ཆེ། །ཡེ་ཤེས་སྒྱུ་འཕྲུལ་དྲྭ་བའི་མཁའ། །ཁྱད་ཆོས་དྲུག་ལྡན་འཕོ་བ་ཆེ། །རྟག་པའི་རྡོ་རྗེ་བུམ་པ་སྐུ། །འོད་མི་འགྱུར་བ་གདོད་མའི་མགོན། །རྗེ་སོགས་འགྲེས། །ཆོས་དབྱིངས་ཡེ་ཤེས་ཀུན་ཁྱབ་སྐུ། །དཔལ་ཆེན་ཆེ་མཆོག་འཁོར་ལོ་སྡོམ། །རཏྣ་ཐོད་ཕྲེང་སཾ་བྷ་བ། །ཕྱག་རྒྱ་རྒྱ་ཆེན་དྲི་མེད་ཟླ། །ཚངས་པ་ལྷ་ཡི་མེ་ཏོག་རྩལ། །རང་བྱུང་བདུད་རྩིས་སྣོད་བཅུད་གསོ། །ལྷུན་གྱིས་གྲུབ་པའི་ཡོན་ཏན་ལྔ། །ལྷ་དང་རིག་པ་འཛིན་པའི་ཚུལ། །རྗེ༴ མེ་ལོང་ཡེ་ཤེས་དྲི་མེད་སྐུ། །དགྱེས་མཛད་ཡང་དག་ཧེ་རུ་ཀ །རྡོ་རྗེ་ཐོད་ཕྲེང་པདྨ་འབྱུང་། །ཧཱུྃ་ཆེན་ཀ་ར་ནམ་མཁའི་སྙིང་། །བདེ་ཆེན་གྲུབ་པ་གཅིག་པུ་ཉིད། །འབྲུ་བརྒྱད་དགོངས་པ་ནམ་མཁའི་ཀློང་། །འཁྲུལ་པ་མེད་པའི་ཐུགས་མཆོག་ལྔ། །ལྷ་དང་༴ རྗེ༴ མཉམ་ཉིད་ཡེ་ཤེས་རིས་མེད་སྐུ། །འཇིགས་བྱེད་ཁྲག་འཐུང་གཤིན་རྗེའི་གཤེད། །བུདྡྷ་ཐོད་ཕྲེང་བློ་ལྡན་མཆོག །འཇམ་དཔལ་བཤེས་གཉེན་ཡེ་ཤེས་ཞབས། །འཁོར་འདས་ཕྱག་རྒྱ་ཟིལ་གྱིས་གནོན། །འཁོར་ལོ་རྣམ་བཞི་ཡོངས་སུ་བསྐོར། །འགྱུར་བ་མེད་པའི་སྐུ་མཆོག་ལྔ། །ལྷ་དང་༴ རྗེ༴ སོར་རྟོགས་ཡེ་ཤེས་བདེ་ཆེན་སྐུ། །དབང་ཆེན་རོལ་པ་རྟ་ཡི་ཞལ། །པདྨ་ཐོད་ཕྲེང་པདྨ་རྒྱལ། །ཀླུ་སྒྲུབ་རྒྱལ་བ་མཆོག་གི་དབྱངས། །འབར་བའི་གར་གྱིས་བརྟན་
གཡོ་སྡུད། །རྟ་སྐད་ཐེང་གསུམ་རྡོ་རྗེའི་གླུ། །འགག་པ་མེད་པའི་གསུང་མཆོག་ལྔ། །ལྷ་དང་༴ རྗེ༴ ནན་ཏན་ཡེ་ཤེས་ལྷུན་གྲུབ་སྐུ། །རྡོ་རྗེ་སྲིན་པོ་གཞོན་ནུ་ཆེ། །ཀརྨ་ཐོད་ཕྲེང་ཉི་མའི་འོད། །པྲ་ཆེན་ཧ་སྟི་བདུད་འདུལ་རྒྱལ། །རིག་མཆོག་ཕུར་བུའི་ཕྱག་རྒྱ་སྒྱུར། །མཚན་མའི་ཡུལ་བཞི་ཐལ་བར་འབྱིན། །བྱ་རྩོལ་མེད་པའི་ཕྲིན་ལས་ལྔ། །ལྷ་དང་༴ རྗེ༴ སྟོང་ཉིད་ཡེ་ཤེས་ཕྱག་རྒྱའི་སྐུ། །རྣལ་འབྱོར་ནམ་མཁའ་མངོན་རྫོགས་རྒྱལ། །ཤཱཀྱ་སེང་གེ་ཐུབ་ཆེན་ལྡན། །དྷ་ན་སཾ་སྐྲྀ་དཔལ་གྱི་དབང་། །རྩ་རླུང་བྱང་ཆུབ་སེམས་ཀྱི་རྩལ། །མཁའ་ཁྱབ་རྟག་པའི་གཟི་བརྗིད་ནི། །ལྷ་དང་༴ རྗེ༴ འདའ་ཀ་ཡེ་ཤེས་ཕྱག་རྒྱའི་སྐུ། །སངས་རྒྱས་ཐོད་པའི་ཕྲེང་བ་ཅན། །དམ་ཚིག་དབང་དང་མན་ངག་ལུང་། །ཤེས་རབ་རྒྱུད་དང་ཉམས་ཆགས་སྐོང་། །རིག་འཛིན་རྩལ་འཆང་སློབ་དཔོན་བཞི། །བརྟུལ་ཞུགས་གར་གྱིས་སྒེག་པ་ཡིས། །དཀྱིལ་འཁོར་འཁོར་ལོས་སྒྱུར་བ་པོ། །ལྷ་དང་༴ རྗེ༴ དབྱིངས་སྒྲོལ་ཡེ་ཤེས་ཕྱག་རྒྱའི་སྐུ། །དྲེགས་པ་ཀུན་འདུལ་རྡོ་རྗེ་འཛིན། །བདག་མེད་སེང་གེའི་སྒྲ་ཆེན་སྒྲོགས། །རོ་མྦུ་གུ་ཧྱ་དཔལ་གྱི་སེང་། །འཇིག་རྟེན་འདས་ཀྱང་འཇིག་རྟེན་གཟུགས། །མཆོད་བསྟོད་བདག་པོ་རྒྱལ་བའི་སྟོབས། །ལྷ་དང་༴ རྗེ༴ ཀློང་གྱུར་ཡེ་ཤེས་ཕྱག་རྒྱའི་སྐུ། །སྟོབས་ལྡན་ནག་
པོ་གཏུམ་པོ་ཆེ། །འཆོལ་བའི་ཁྲོ་རྒྱལ་འཇིག་རྟེན་མགོན། །ཞི་བའི་སྙིང་པོ་རྣམ་སྣང་མཛད། །དྲག་སྔགས་དམོད་པའི་ཁ་རླངས་ཅན། །དཔལ་ཆེན་འབར་བའི་ནུས་པ་ནི། །ལྷ་དང་༴ རྗེ༴ ཤེས་རབ་ཕར་ཕྱིན་རྣལ་འབྱོར་མ། །མྱུར་མཛད་དཔའ་མོ་འཕྲོག་བྱེད་ཞལ། །རལ་གཅིག་ཚོགས་ཀྱི་བདག་པོ་སོགས། །གནས་ཡུལ་ལྷན་སྐྱེས་མཁའ་འགྲོ་དང་། །རྒྱུད་གསུམ་དམ་ཅན་དྲེགས་པའི་ཚོགས། །ཡེ་ཤེས་ཀློང་ནས་སྤྲོ་ཞིང་སྡུད། །ལས་བཞིའི་ཕྲིན་ལས་དབང་དུ་སྒྱུར། །ཉམས་གཅིག་དུ་མའི་གར་མཛད་པ། །རྗེ༴ བླ་མ་ཀུན་འདུས་གུ་རུ་རྗེ། །དཀྱིལ་འཁོར་ཀུན་བདག་བདེ་བ་ཆེ། །མཁའ་འགྲོའི་དབང་ཕྱུག་བདུད་འདུལ་སྩལ། །དྲན་པ་ཙམ་གྱིས་བར་ཆད་སེལ། །མོས་པས་བདེ་ཆེན་ཡེ་ཤེས་སྐྱེད། །གསོལ་བཏབ་ཅི་འདོད་དངོས་གྲུབ་སྩལ། །རྗེ་བཙུན་ཨོ་རྒྱན༴ རྩེ་གཅིག༴ སྒྲིབ་མེད༴ འཇིགས་བརྒྱད༴ ཕྱི་ནང་༴ བྱང་ཆུབ་བར་དུ་།ཐུགས་རྗེས་ཟུང་། །ཨོཾ་ཨཱཿཧཱུྃ་མ་ཧཱ་གུ་རུ་སརྦ་སིདྡྷི་ཧཱུྃ། །ཡིད་བཞིན་ནོར་བུ་གུ་རུ་རྗེ། །མོས་གུས་རྒྱལ་མཚན་རྩེར་མཆོད་ནས། །ཐང་ཀློད་མེད་པར་གསོལ་བཏབ་ན། །གང་འདོད་དངོས་གྲུབ་ཆར་བཞིན་འཇོ། །དེ་ཕྱིར་སྔོན་གོམས་ཤུགས་དང་མོས་པའི་བློས། །སྐྱབས་གནས་གཅིག་ཆོག་ཉིད་དུ་ངེས་རྙེད་ནས། །དེ་བཱི་ཀོ་ཊི་དཔལ་ཆེན་ཕོ་བྲང་དུ། །མེ་སྦུལ་ཆུ་སྟོད་དཀར་པོའི་ཚེས་བཅུ་ལ། །པདྨའི་རྗེས་འཇུག་པདྨ་གར་གྱི་དབང་། །མོས་གུས་སྙིང་གི་ཆུ་སྐྱེས་རྒྱ་གྲོལ་
ནས། །ཐོལ་བྱུང་སྟན་ཐོག་གཅིག་པའི་སྦྲང་རྩི་འདིས། །རང་གཞན་བུང་བའི་ཁྱུ་ཚོགས་གསོས་གྱུར་ཅིག །དགེ་ལེགས་འཕེལ།། ༈ །།མཁའ་སྤྱོད་ཌཱཀིའི་དབང་མོ་ཡེ་ཤེས་མཚོ་རྒྱལ་ལ་གསོལ་བ་འདེབས་པ་ཡིད་ཀྱི་གདུང་སེལ་ཞེས་བྱ་བ། །གདོད་མའི་ཡུམ་གྱུར་ཀུན་ཏུ་བཟང་མོའི་ཞབས། །ཆོས་རྣམས་ཀུན་འབྱུང་ཤེས་རབ་ཕ་རོལ་ཕྱིན། །དཀྱིལ་འཁོར་ཀུན་གྱི་བདག་མོ་དབྱིངས་ཕྱུག་མ། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི་བུ་ལ་བརྩེ་བའི་སྤྱན་གྱིས་གཟིགས། །རྟག་ཏུ་འབྲལ་བ་མེད་པར་ཐུགས་རྗེས་ཟུང་། །ལྷན་སྐྱེས་བདེ་ཆེན་རྟོགས་པའི་དངོས་གྲུབ་སྩོལ། །ཐུབ་པའི་སྤྱན་སྔར་གངྒཱའི་ལྷ་མོར་གྲགས། །རྒྱལ་ཀུན་དགྱེས་སྐྱེད་རྡོ་རྗེ་སྒེག་མོ་སྟེ། །དྷུ་མ་ཐ་ལར་གསང་བ་ཡེ་ཤེས་མ། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི་བུ་ལ་བརྩེ་བའི་སྤྱན་གྱིས་གཟིགས། །རྟག་ཏུ་འབྲལ་བ་མེད་པར་ཐུགས་རྗེས་ཟུང་། །ལྷན་སྐྱེས་བདེ་ཆེན་རྟོགས་པའི་དངོས་གྲུབ་སྩོལ། །འཕགས་པའི་ཡུལ་དུ་ཌཱ་ཀི་མནྡཱ་ར། །ཚེ་ལ་དབང་ཐོབ་མ་གཅིག་གྲུབ་པའི་རྒྱལ། །སྐུ་གཅིག་རྣམ་འཕྲུལ་དུ་མས་འགྲོ་དོན་མཛད། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི་བུ་ལ་བརྩེ་བའི་སྤྱན་གྱིས་གཟིགས། །རྟག་ཏུ་
འབྲལ་བ་མེད་པར་ཐུགས་རྗེས་ཟུང་། །ལྷན་སྐྱེས་བདེ་ཆེན་རྟོགས་པའི་དངོས་གྲུབ་སྩོལ། །རྡོ་རྗེའི་བཙུན་མོའི་ཐུགས་ཀྱི་འོད་ཟེར་ནི། །མཁར་ཆེན་རིགས་ཀྱི་བཅུད་དུ་སྨིན་པ་ལས། །བདེ་ཆེན་ལང་ཚོས་སྒེག་པའི་པདྨ་ལྕམ། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི༴ རྟག་ཏུ༴ ལྷན་སྐྱེས༴ ཁྱིམ་པའི་སྐྱོན་སྤངས་འཕགས་ནོར་ཤུགས་ཀྱིས་འབྱོར། །མཐོང་བས་ཡིད་འཕྲོག་གཞན་སྣང་དབང་དུ་སྒྱུར། །གདོད་ནས་ཕོ་ཉའི་ཚོགས་ཀྱི་རྗེ་མོར་གྲུབ། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི༴ རྟག་ཏུ༴ ལྷན་སྐྱེས༴ སྨོན་ལམ་དབང་གིས་གུ་རུའི་གཟུངས་མ་མཛད། །ལས་ཅན་ཐུགས་ཟིན་ཡོངས་ཀྱི་གཙོ་མོར་གྱུར། །སྒོ་གསུམ་ཞབས་ཏོག་ཕུལ་དུ་ཕྱིན་པ་བསྒྲུབས། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི། །རྟག་ཏུ༴ ལྷན་སྐྱེས༴ རྒྱལ་སྲས་ཀུན་དང་མཛད་པ་མཉམ་གྱུར་ཀྱང་། །སྙིང་སྟོབས་རྒྱལ་བའི་མྱུ་གུ་ཀུན་ལས་འཕགས། །དམན་པའི་རྟེན་ལས་མངོན་བྱང་མཆོག་བརྙེས་པ། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི༴ རྟག་ཏུ༴ ལྷན་སྐྱེས༴ མཚོ་སྐྱེས་ཐུགས་ཀྱི་གསང་མཛོད་མཐའ་དག་ཕྱེས། །མི་བརྗེད་
གཟུངས་ཀྱིས་ཆོས་སྒོ་མ་ལུས་འཛིན། །རྡོ་རྗེའི་གནས་ལ་དབང་ཐོབ་གསང་བའི་བདག །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི༴ རྟག་ཏུ༴ ལྷན་སྐྱེས༴ བོད་ཀྱི་ཡུལ་དུ་བགྲང་བྱ་ཉིས་བརྒྱར་བཞུགས། །གནས་ཆེན་གནས་ཕྲན་ཀུན་ཏུ་ཞབས་ཀྱིས་བཅགས། །འབྲེལ་ཆད་དོན་ལྡན་ཞིང་དུ་བྱིན་གྱིས་བརླབས། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི༴ རྟག་ཏུ༴ ལྷན་སྐྱེས༴ གུ་རུའི་གསུང་རབ་ཀུན་གྱི་བསྡུ་བ་མཛད། །གཏེར་ཆེན་གཏེར་ཕྲན་ཀུན་གྱི་ཞབས་བསྡམས་ཤིང་། ཁ་བྱང་ཡང་བྱང་ལ་སོགས་ས་སྟེང་བཀང་། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི༴ རྟག་ཏུ༴ ལྷན་སྐྱེས༴ གསང་བའི་ལམ་གྱིས་འགྱུར་མེད་བདེ་ཆེན་བསྒྲུབས། །བཞི་བའི་ལམ་ལས་གདོས་བཅས་འོད་སྐུར་གཤེགས། །སྐལ་ལྡན་དུ་མ་གདམས་པས་རྗེས་སུ་བཟུང་། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི༴ རྟག་ཏུ༴ ལྷན་སྐྱེས༴ དཔའ་བོ་ཌཱ་ཀྀའི་མཆོད་སྤྲིན་རྒྱ་མཚོ་བཅས། །པདྨ་འོད་དུ་མངོན་སུམ་རོལ་པས་ཕེབ། །གནས་གསུམ་མཁའ་འགྲོ་རྒྱ་མཚོའི་ཚོགས་རྗེ་མཛད། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི༴ རྟག་ཏུ༴
ལྷན་སྐྱེས༴ ཤ་ཟ་སྲིན་པོའི་སྣང་ངོར་མཐིང་འོད་འབར། །གུ་རུའི་དྲུང་ན་བདེ་ཆེན་རྒྱལ་མོ་ཞེས། །ཉི་དང་འོད་བཞིན་རྟག་ཏུ་འདུ་འབྲལ་མེད། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི༴ རྟག་ཏུ༴ ལྷན་སྐྱེས༴ རྗེས་འཇུག་རིག་འཛིན་ཀུན་ལ་བྱིན་རློབ་ཅིང་། །སྒྲུབ་པོ་རྣམས་ལ་བདེ་ཆེན་ཡེ་ཤེས་སྐྱེད། །ལས་ཅན་ཀུན་ལ་བླང་དོར་ལུང་བསྟན་སྩོལ། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི༴ རྟག་ཏུ༴ ལྷན་སྐྱེས༴ བོད་འབངས་ཀུན་ལ་ཐུགས་རྗེས་འབྲལ་མེད་གཟིགས། །ཁྱད་པར་ལས་ཅན་རྗེས་འཇུག་ཡོངས་ལ་དགོངས། །བསམ་ཡས་རྒྱུན་ཆད་མེད་པའི་བཀའ་དྲིན་ཅན། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །མོས་པའི༴ རྟག་ཏུ༴ ལྷན་སྐྱེས༴ བདག་དང་བདག་ལ་རེ་ལྟོས་བཅས་པ་ཀུན། །ཐུགས་རྗེའི་སྤྱན་གྱིས་ནམ་ཡང་མ་འདོར་བར། །ཡེ་ཤེས་ཆེན་པོའི་བྱིན་རླབས་སྩལ་བ་དང་། །གསང་བ་ཀུན་གྱི་སྣོད་དུ་རུང་བར་མཛོད། །ལྷན་སྐྱེས་ལང་ཚོ་རྒྱས་པའི་ཞལ་རས་མཐོང་། །ཐུན་མིན་གདམས་པའི་བདུད་རྩི་བགོ་སྐལ་ཐོབ། །བདེ་སྟོང་རྟོགས་པའི་ཏིང་འཛིན་མཐར་ཕྱིན་ནས། །ཁྱོད་ཀྱི་གསང་བ་གསུམ་དང་མཉམ་བྱིན་རློབས། །གནས་སྐབས་ཚེ་དབང་ལས་བཞི་གྲུབ་
ཆེན་བརྒྱད། །མཐར་ཐུག་འཇའ་ལུས་རྡོ་རྗེའི་མཆོག་གྲུབ་ནས། །མཁའ་སྤྱོད་ཐར་པ་ཆེན་པོའི་ཕོ་བྲང་དུ། །བདེ་ཆེན་རྒྱལ་དང་ཁ་སྦྱོར་སྐུ་འགྲུབ་ཤོག །ཅེས་པའང་དབུས་གཙང་གི་ལྗོངས་རྒྱུ་བའི་སྐབས་ཌཱ་ཀིའི་རྗེ་མོ་མཚན་དཔེའི་སྣང་བརྙན་གསལ་བའི་ངོ་མཚར་གྱི་གནས་ཆེན་རྫོང་ཁང་མཁར་ཆེན་ཕུག་ཏུ་ཚོགས་ཀྱི་མཆོད་པའི་རྗེས་སུ་འབྲེལ་བར། པདྨ་གར་དབང་རྩལ་གྱིས་བྲིས་ཤིང་སྦྲགས་མདའ་མཚོ་རྒྱལ་བླ་མཚོར་གསོལ་བ་བཏབ་པ་ཡེ་ཤེས་མཁའ་འགྲོས་རྗེས་སུ་བཟུང་བའི་རྒྱུར་གྱུར་ཅིག །དགེ་ལེགས་འཕེལ།། །།