རྩ་གསུམ་ལྷག་པའི་ལྷའི་ཐུགས་རྗེ་བསྐུལ་བ་རྡོ་རྗེ་རྟའི་མགྲིན་གླུ།
རྩ་གསུམ་ལྷག་པའི་ལྷའི་ཐུགས་རྗེ་བསྐུལ་བ་རྡོ་རྗེ་རྟའི་མགྲིན་གླུ་ཞེས་བྱ་བ་བཞུགས་སོ།། །།
ན་མོ་གུ་རུ་དེ་བ་ཌཱ་ཀི་ནཱི་ཡཻ། གྲངས་མེད་སངས་རྒྱས་ཞིང་གི་བཀོད་པ་ཡིས། །རབ་མཛེས་བདེ་ལྡན་འདྲེན་པ་འོད་དཔག་མེད། །པདྨའི་སྣང་བ་རབ་རྒྱས་བཅོམ་ལྡན་འདས། །ཚེ་དང་ཡེ་ཤེས་ཤིན་ཏུ་རྣམ་ངེས་པ། །ཀུན་ནས་སྣང་བ་མཐའ་ཡས་གཟི་བརྗིད་རྒྱལ། །མཚན་དཔེ་རྡོ་རྗེའི་སྟོབས་མཆོག་སྐུ་ཡི་འོད། །ཚངས་དབྱངས་ཡན་ལག་དྲུག་ཅུ་གསུང་གི་འོད། །སྟོབས་དང་དབང་བཅུ་མི་འཇིགས་མ་འདྲེས་ཆོས། །དཔག་མེད་ཐུགས་ཀྱི་འོད་མངའ་ཐམས་ཅད་མཁྱེན། །འཁོར་དང་སྐུ་ཚེའི་ཚད་དང་ཞིང་ཁམས་སོགས། །མཐའ་ཡས་སྨོན་ལམ་གྲུབ་པའི་མཐར་སོན་པ། །ཕྱོགས་དུས་རྒྱལ་བ་ཀུན་གྱིས་བསྔགས་པ་དེར། །རེས་མ་ནོར་རྩེ་གཅིག་སྐྱབས་ལགས་ན། །དྲན་དང་མོས་པས་སྡིག་ལྟུང་ཀུན་ཟད་ནས། །ཚེ་བསོད་དཔལ་རྒྱས་བྱང་ཆུབ་སྙིང་པོའི་བར། །ཕྱིར་མི་ལྡོག་པའི་ཐུགས་དམ་མ་བསྙེལ་བར། །སྲིད་མཚོར་སྡུག་བསྔལ་བརྒྱ་ཡིས་གཙེས་པ་ལ། །ཡེ་ཤེས་འདོད་དགུ་འཇོ་བའི་འོད་ཟེར་གྱིས། །འདི་གཏན་བདེ་བ་མཆོག་ཐུན་དངོས་གྲུབ་སྩོལ། །འཆི་མེད་ཚེ་དང་ཡེ་ཤེས་དབང་ཆེན་སྐུར། །སྒོ་གསུམ་རྡོ་རྗེ་གསུམ་དུ་བྱིན་གྱིས་རློབས། །བདག་དང་བདག་ལ་འབྲེལ་ཐོགས་འགྲོ་བ་ཀུན། །ནུབ་ཕྱོགས་བདེ་བ་ཅན་ཏུ་ལམ་སྣ་དྲོངས། །རིང་མིན་བྱང་ཆུབ་སྙིང་པོར་ལུང་བསྟན་སྩོལ། །སྐུ་དང་ཞིང་ཁམས་རྒྱ་མཚོ་སྤྲོ་བསྡུའི་གཞི། །རྣམ་སྣང་ནམ་མཁའ་
རྒྱལ་པོ་གངས་ཆེན་མཚོ། །རྒྱལ་ཀུན་གསུང་གི་དབང་ཕྱུག་ཨ་རོ་ལིཀྲ། །རྩ་གསུམ་རབ་འབྱམས་དཀྱིལ་འཁོར་འཁོར་ལོ་ཀུན། །གཅིག་བསྡུས་རྒྱལ་བ་རྒྱ་མཚོ་པདྨའི་མགོན། །སེང་གེ་སྒྲ་སོགས་ཕྱོགས་བཅུའི་འདྲེན་པ་བཅུ། །མཁའ་ལ་སྤྱོད་སོགས་གང་འདུལ་བྱེ་བའི་གར། །འཇིག་རྟེན་དབང་པོ་ཀུན་གྱི་དབང་ཕྱུག་ཆེ། །འགྲོ་དྲུག་ཡོངས་ལ་རྟག་ཏུ་སྤྱན་རས་གཟིགས། །ཐུགས་རྗེ་ཆེན་པོས་འཁོར་བ་དོང་ནས་སྤྲུགས། །གང་གིས་མོས་སམ་ཡིད་ལ་དྲན་པས་ཀྱང་། །མཚམས་མེད་ལ་སོགས་ལས་ཀྱི་སྒྲིབ་པ་འདག །མཚན་ཙམ་ཐོས་པས་སྡུག་བསྔལ་ཐམས་ཅད་འགག །གང་གསུང་ཡི་གེ་དྲུག་པ་རྡོ་རྗེའི་སྒྲ། །ཐེང་གཅིག་བརྗོད་པས་སྡིག་ལྟུང་ཕྱག་མས་འདེད། །ཕན་ཡོན་དུས་གསུམ་རྒྱལ་བས་བརྗོད་མི་ལོངས། །བདག་གི་ཡི་དམ་ལྷ་མཆོག་བཅོམ་ལྡན་འདས། །ཐུགས་རྗེའི་གཏེར་མངའ་འཕགས་མཆོག་ཐུགས་རྗེ་ཅན། །ཁྱེད་མཁྱེན་ཁྱོད་ལས་སྐྱབས་གཞན་བདག་ལ་མེད། །འཇིགས་བཅས་ཁ་དབྲག་ལམ་དུ་བོར་འདྲ་བདག །ཅི་མཛད་རེ་ལྟོས་སྤྱན་རས་གཟིགས་ལ་བཅའ། །ཐུགས་བསྐྱེད་ཐུགས་རྗེ་ཆེ་ཆུང་ད་རེས་ཤེས། །ཚད་མེད་སྙིང་རྗེ་རྒྱས་པའི་ཕྱག་རྐྱོངས་ལ། །སྡུག་བསྔལ་མེ་ཡི་འོབས་ལས་དབུགས་ཕྱུང་ཞིག །ལུས་ཀྱི་ནད་གདོན་ཞི་ནས་གཟི་བརྗིད་རྒྱས། །ངག་ལ་ནུས་པ་ཐོབ་ནས་བདེན་ཚིག་འགྲུབ། །ཡིད་ཀྱི་ཉོན་
མོངས་ཀུན་ཞི་ཉམས་རྟོགས་འཕེལ། །སྒོ་གསུམ་སྡིག་སྒྲིབ་ཀུན་བྱང་ཚོགས་གཉིས་རྫོགས། །ཡོན་ཏན་གངྒཱའི་བྱེ་སྙེད་མྱུར་ཐོབ་ནས། །མཐོང་ཐོས་དྲན་རེག་གྲོལ་བ་བཞི་ལྡན་པ། །ཉིད་ཀྱི་གོ་འཕང་མཆོག་ཏུ་དབང་བསྐུར་ཞིག །ཕྱོགས་བཅུ་དུས་གསུམ་རྒྱལ་བ་སྲས་བཅས་ཀྱི། །གསང་གསུམ་བྱིན་རླབས་ནུས་མཐུ་གཅིག་བསྡུས་པ། །སྲིད་པ་གསུམ་ན་ཆེ་བའི་རིག་སྔགས་འཆང་། །མགོན་མེད་འགྲོ་བ་ཡོངས་ཀྱི་མགོན་གཅིག་པུ། །ཁྱད་པར་བོད་ཀྱི་སྐྱབས་གཅིག་ཨོ་རྒྱན་རྗེ། །གསུང་གི་རྡོ་རྗེ་པདྨ་ཐོད་ཕྲེང་རྩལ། །ཕྲིན་ལས་ཡོངས་སུ་རྫོགས་པས་སྐུ་ལྔའི་ཚུལ། །རིགས་དྲུག་འགྲོ་བ་འདུལ་མཛད་གུ་རུ་དྲུག །གདུལ་བྱ་གང་ལ་གང་འདུལ་མཚན་མཆོག་བརྒྱད། །འཕྲུལ་མཚན་བཞི་བཅུ་སྒྱུ་འཕྲུལ་དྲྭ་བའི་གར། །གསང་གསུམ་བསམ་མི་ཁྱབ་པའི་འདུལ་ཐབས་ཀྱིས། །འཁོར་བ་མ་སྟོང་བར་དུ་དོན་མཛད་པ། །འཕོ་བ་ཆེན་པོ་འཇའ་ལུས་རྡོ་རྗེའི་སྐུ། །མངོན་ཤེས་དྲུག་ཅུས་འགྲོ་ལ་བུ་ལྟར་གཟིགས། །རྫུ་འཕྲུལ་བྱིན་རླབས་ནམ་མཁའི་གློག་ལས་མྱུར། །མཐུ་སྟོབས་ནུས་པ་རྡོ་རྗེའི་མེ་ལས་དྲག །སྙིགས་མའི་དུས་སུ་ལྷག་པར་ཐུགས་རྗེ་ཆེ། །ཁྱོད་འདྲའི་རྒྱལ་བ་ཕྱོགས་དུས་གཞན་ན་མེད། །བཀའ་དྲིན་དྲན་ནོ་ཨོ་རྒྱན་རིན་པོ་ཆེ། །གསོལ་བ་འདེབས་སོ་པདྨ་སཾ་བྷ་ཝ། །བྱིན་གྱིས་རློབས་ཤིག་མཚོ་སྐྱེས་རྡོ་རྗེ་འཆང་། །གུས་པས་བསྟེན་ནོ་རིགས་ཀྱི་བདག་པོ་མཛོད། །སྙིང་
ནས་དྲན་ནོ་སྙིང་གི་དྭངས་མར་བཞུགས། །བྱེད་ལས་བསམ་རྒྱུ་མེད་དོ་ཐུགས་རྗེས་ཟུངས། །དམ་ཆོས་སྒྲུབ་པའི་བར་ཆད་བསལ་རེ་རན། །ཡེ་ཤེས་སྐུ་མཆོག་མིག་སྔར་སྟོན་རེ་རན། །བྱིན་རླབས་འཕོ་བའི་རྩལ་དབང་བསྐུར་རེ་རན། །སྨིན་གྲོལ་གདམས་པས་རྗེས་སུ་བཟུང་རེ་རན། །མཆོག་དང་ཐུན་མོང་དངོས་གྲུབ་སྩོལ་རེ་རན། །དག་པའི་འཁོར་ལ་བརྩེ་བས་ཞལ་བཞེས་པ། །དེང་སང་དགོས་པའི་དུས་ལ་བབ་ལགས་ན། །གཡར་དམ་མ་བསྙེལ་ལས་ངན་བདག་ལ་སོགས། །བོད་འབངས་སྐྱིད་སྡུག་ཡེ་ཤེས་སྤྱན་གྱིས་གཟིགས། །རྗེ་བཙུན་བཅོམ་ལྡན་འདས་མ་སྟོན་ཟླའི་མདངས། །དྲན་པས་སྡུག་བསྔལ་མུན་རུམ་བསལ་མཛད་མ། །ཟབ་ཞི་སྤྲོས་བྲལ་ཤེས་རབ་ཕ་རོལ་ཕྱིན། །སྲིད་ལས་རབ་འདས་མཁྱེན་པ་བསམ་མི་ཁྱབ། །རྒྱལ་ཀུན་སྙིང་རྗེ་གཟུགས་སུ་གྱུར་བས་ན། །ཞི་ལ་མི་གནས་བརྩེ་བ་བསམ་མི་ཁྱབ། །ཉོན་མོངས་བདུད་ལ་མྱུར་ཞིང་དཔའ་བ་ཡི། །བརྟུལ་ཞུགས་གར་མཛད་ནུས་པ་བསམ་མི་ཁྱབ། །རྒྱལ་བ་སྲས་བཅས་སྐྱེད་པའི་ཡུམ་གཅིག་མ། །ཡོན་ཏན་བརྗོད་ན་རྒྱལ་བའི་ལྗགས་ཀྱང་བརྟུལ། །མཚན་དང་རིག་སྔགས་སྐུ་ཡི་རྣམ་པ་ཙམ། །གང་གིས་དྲན་པས་ཕོངས་པ་ཀུན་སྐྱོབ་མ། །སྣ་ཚོགས་གཟུགས་ཀྱིས་སྣ་ཚོགས་འཇིག་རྟེན་ཀུན། །གསོ་བྱེད་ཚེ་རབས་ཀུན་ཏུ་བསྟེན་པའི་ལྷ། །འཕགས་མ་སྒྲོལ་མས་མྱུར་དུ་
ཐུགས་རྗེས་གཟིགས། །བརྒྱད་དང་བཅུ་དྲུག་འཇིགས་ལས་བསྐྱབ་ཏུ་གསོལ། །སྡིག་ལྟུང་མི་དགེའི་ཉེས་པ་བསལ་དུ་གསོལ། །གསང་གསུམ་བྱིན་རླབས་མངོན་སུམ་བསྟན་ཏུ་གསོལ། །ཚེ་བསོད་དཔལ་འབྱོར་ཉམས་རྟོགས་བསྐྱེད་དུ་གསོལ། །མཁྱེན་བརྩེ་ཉི་ཟླའི་སྣང་བ་སྟོང་བཀྱེ་ནས། །བདག་གཅིག་ཇི་འདྲ་སེམས་ཅན་ཀུན་མཚུངས་པར། །མི་མཐུན་གཅོད་རོང་ཡ་ངར་མི་ལྟུང་ཞིང་། །ཐར་འདོད་བྱང་ཆུབ་སེམས་ཀྱི་ལམ་སྲང་ནས། །ཀུན་མཁྱེན་གྲོང་ཁྱེར་ཆེན་པོར་ཕྱིན་པར་མཛོད། །སྣང་བ་མཐའ་ཡས་རྡོ་རྗེའི་ཡེ་ཤེས་ནི། །གདུག་པའི་གཉེན་པོར་མེ་ལྟར་འབར་བའི་སྐུ། །སྙིང་རྗེ་ཁྲོས་པ་པདྨ་ཧེ་རུ་ཀ །གར་གྱི་དབང་ཕྱུག་ཁྲོ་རྒྱལ་ཡོངས་ཀྱི་རྗེ། །དབང་ཆེན་རོལ་པ་རྡོ་རྗེ་རྟ་ཡི་ཞལ། །རྟ་སྐད་ཐེང་གསུམ་འཁོར་འདས་སྲོག་རྩ་གཡོ། །གར་དགུའི་འགྱུར་བས་ས་ལམ་ཟིལ་གྱིས་གནོན། །ཧྲཱིཿཡི་ང་རོས་སྣང་སྲིད་དབང་དུ་མཛད། །དཔལ་གྱི་རྟ་བྲོས་བདུད་བཞི་ཟིལ་གྱིས་གནོན། །མཐུ་སྟོབས་རྩལ་གྱིས་སྲིད་གསུམ་ཐལ་བར་བརླག །ཆོས་ཉིད་བདུད་རྩིས་དུག་གསུམ་སྨན་ཏུ་བསྒྱུར། །ཆེ་བཙན་འགྲན་བྲལ་ཉི་མ་འབུམ་གྱི་གཟི། །ཐུགས་རྗེ་ཆེན་པོ་དྲག་པོའི་སྐུར་བཞེངས་པ། །རྟ་མཆོག་དབང་གི་རྒྱལ་ལ་ཕྱག་འཚལ་བསྟོད། །ཐུགས་དམ་བསྐུལ་ལོ་སྔོན་ལས་འཕྲལ་རྐྱེན་གྱིས། །དམ་ཆོས་སྒྲུབ་ལ་ཉེ་བར་འཚེ་བའི་བགེགས། །ཕྱི་ནང་གསང་
བའི་མི་མཐུན་ཕྱོགས་ཀུན་དང་། །ཁྱད་པར་ཚེ་དང་ཐར་པའི་བར་ཆད་བདུད། །གཟའ་ཀླུ་རྒྱལ་བསེན་མ་རུངས་འབྱུང་པོ་ཡི། །མཐུ་རྩལ་ནུས་པ་སྟོབས་བཅུའི་ཤུགས་ཀྱིས་ཆོམས། །རྫུ་འཕྲུལ་མཚོན་ཆས་ལུས་སྲོག་དུམ་བུར་གཏུབས། །སྙིང་ལ་སྲེག་བྱེད་རྡོ་རྗེའི་མེ་ཆར་ཕོབ། །རྡོ་རྗེ་སྟྭམྦྷ་ནི་ཡི་གར་གྱིས་ནོན། །ཁམས་གསུམ་ཡོངས་སྒྲོལ་ཆེན་པོའི་བརྟུལ་ཞུགས་སྒྱུར། །འཁོར་འདས་སྙིང་ལ་མོས་བཞིའི་ཕྱག་རྒྱས་ཐོབ། །རྟ་ཡི་འདུར་གླུས་སྣང་སེམས་དབང་དུ་སྡུས། །རྣམ་རྟོག་ཉོན་མོངས་ཆོས་ཉིད་རྒྱན་ཤར་ནས། །བདེ་སྟོང་ཡེ་ཤེས་འབར་བར་བྱིན་གྱིས་རློབས། །མྱུར་མཛད་ཡེ་ཤེས་མགོན་པོ་སྤྱན་རས་གཟིགས། །བླ་མ་ཀུན་འདུས་བྱིན་རླབས་གཟི་བརྗིད་ཅན། །ཡི་དམ་ཀུན་འདུས་དངོས་གྲུབ་རྒྱ་མཚོའི་གཏེར། །མཁའ་འགྲོ་ཀུན་འདུས་ཕྲིན་ལས་ཆགས་ཐོགས་མེད། །སྐྱེ་འགྲོ་ཀུན་གྱི་རེ་བ་ཚུལ་བཞིན་ཏུ། །སྐོང་མཛད་ཡིད་བཞིན་ནོར་བུ་ལྟ་བུའི་སྐུ། །ཡེ་ཤེས་ལས་དང་འཇིག་རྟེན་ཚུལ་འཛིན་པའི། །ཁྲོ་བོའི་དབང་པོ་མཁའ་འགྲོ་མ་རྣམས་ཀྱི། །མཐུ་སྟོབས་ཕྲིན་ལས་རྫུ་འཕྲུལ་གཅིག་བསྡུས་པ། །གསོལ་བཏབ་ཙམ་གྱིས་འདི་ཕྱིའི་འཇིགས་ལས་སྐྱོབ། །མ་བསྒྲུབ་པར་ཡང་ཐུགས་རྗེའི་བྱིན་གྱིས་བརླབས། །ཚུལ་བཞིན་བསྒྲུབ་ན་དངོས་གྲུབ་མ་ལུས་སྟེར། །ལོ་ཟླ་ཙམ་གྱིས་མཆོག་ཐུན་
བདེ་བླག་འཇོ། །སྣ་ཚོགས་ཕྲིན་ལས་ཁྱད་དུ་འཕགས་པ་ཡང་། །ཡིད་བཞིན་ནོར་བུས་འདོད་དགུ་འབད་མེད་སྩལ། །ཤེས་རབ་བློ་འཕེལ་ཚེ་བསོད་བློ་གྲོས་སྐྱེད། །དབང་གི་རྒྱལ་པོས་ཁམས་གསུམ་སྲིད་གསུམ་སྡུད། །ཚེ་བདག་ལྗང་གུས་བདུད་བཞི་ལོག་འདྲེན་བཅོམ། །ནག་པོ་ཆེན་པོས་རེ་བ་མཐའ་དག་སྐོང་། །གདུལ་བྱའི་དབང་གིས་རབ་འབར་འཇིགས་པའི་གཟུགས། །དཔལ་ལྡན་ཕྱག་དྲུག་པ་ལ་ཕྱག་འཚལ་བསྟོད། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །བདག་སོགས་ཉོན་མོངས་བརྒྱ་ཡིས་གཡེངས་པ་རྣམས། །འདི་ཕྱིའི་བར་དོའི་འཇིགས་ལས་བསྐྱབ་ཏུ་གསོལ། །རྡོ་རྗེའི་ནང་དམེ་ལ་སོགས་བྱད་མ་ཡི། །བསམ་སྦྱོར་ངན་པའི་རྦོད་གཏོང་ཕུར་ཁ་ཟློག །ལྷ་འདྲེ་མི་གསུམ་མི་ནོར་ཟས་གསུམ་ཀུན། །ལྕགས་ཕྱེས་ཁབ་ལེན་རྡོ་བཞིན་དབང་དུ་སྡུས། །རྡོ་རྗེའི་སྣང་བརྙན་དད་པའི་མིག་སྔར་སྟོན། །མཆོག་ཐུན་དངོས་གྲུབ་བདེ་བླག་ཉིད་དུ་སྩོལ། །ལོ་ཟླ་ཙམ་གྱིས་སངས་རྒྱས་ས་ལ་སྐྱོལ། །བྱིན་རླབས་འདོད་དགུའི་དབྱིག་གི་ཆར་ཕབ་ནས། །རེ་བའི་ཤིང་རྟ་ཕྱུར་བུར་བཀང་དུ་གསོལ། །མདོར་ན་བདག་གི་སྐྱེ་དང་ཚེ་རབས་སུ། །བློ་གཏད་ལིང་བསྐྱུར་བྱས་བའི་རྩ་བ་གསུམ། །དགོས་པའི་དུས་སུ་ཐུགས་རྗེའི་ཤུགས་བསྐྱེད་ལ། །བྱང་ཆུབ་སྒྲུབ་པའི་བར་ཆད་ཞི་བ་དང་། །ཆོས་མཐུན་དཔལ་འབྱོར་དབྱར་གྱི་མཚོ་ལྟར་རྒྱས། །སྟན་ཐོག་འདི་རུ་ཟུང་འཇུག་
སྐུ་ཐོབ་ནས། །དོན་གཉིས་ལྷུན་གྱིས་འགྲུབ་པར་བྱིན་གྱིས་རློབས། །ཞེས་པའང་རང་ལོ་སོ་བཞི་པ་ཆོ་འཕྲུལ་ཟླ་བའི་དཀར་ཕྱོགས་སུ་དོ་གལ་ཆེ་བའི་དབང་གིས་སྤོང་བ་པ་བློ་གྲོས་མཐའ་ཡས་ཀྱིས་དབེན་ཁྲོད་ཀུན་བཟང་བདེ་ཆེན་གླིང་དུ་གསོལ་བ་བཏབ་པ་སིདྡྷི་རསྟུ།། ༈ །།བ་བརྟན་རྡོ་རྗེའི་རང་བཞིན་གསང་བ་གསུམ། །དྲན་པ་ཙམ་གྱིས་འཆི་བདག་དཔུང་འཇོམས་ཤིང་། །ཚེ་དང་ཡེ་ཤེས་སྩོལ་མཛད་བཅོམ་ལྡན་འདས་མགོན་པོ་ཚེ་དཔག་མེད་ལ་གསོལ་བ་འདེབས། །བར་ཆད་ཀུན་སོལ་ཚེ་དབང་དངོས་གྲུབ་སྩོལ། །གཞོན་ནུ་བུམ་པ་སྐུར་བཞུགས་དགའ་རབ་ཞབས། །རྡོ་རྗེའི་སྐུ་བརྙེས་མཁས་པ་ཤྲཱི་སི༚་ཧ། །སྐྱེ་འཆི་གཉིས་སྤངས་འཆི་མེད་པདྨ་འབྱུང་། །རྒྱལ་ཡུམ་འཚོ་རྒྱལ་ཞབས་ལ་གསོལ་བ་འདེབས། །བར་ཆད་ཀུན་སོལ་ཚེ་དབང་དངོས་གྲུབ་སྩོལ། །འཕོ་ཆེན་འོད་སྐུར་རྟག་བཞུགས་བི་མ་ལ། །བདེ་ཆེན་ཡང་དག་གྲུབ་པ་ཧཱུྃ་ཀ་ར། །ཟག་མེད་འཇའ་ཚོན་ལུས་ཅན་ནམ་མཁའི་སྙིང་། །རྗེ་འབངས་རིག་འཛིན་རྒྱ་མཚོར་གསོལ་བ་འདེབས། །བར་ཆད་ཀུན་སོལ་ཚེ་དབང་དངོས་གྲུབ་སྩོལ། །འགྲོ་འདུལ་པདྨའི་རྒྱལ་ཚབ་རཏྣ་གླིང་། །ཚེ་དབང་རིག་པ་འཛིན་གྲགས་རྒྱལ་བའི་སྲས། །ཕྲིན་ལས་ནམ་མཁའི་མཐར་སོན་ཨ་རཱ་ག །ཚེ་མཆོག་གྲུབ་པའི་ཚོགས་ལ་གསོལ་བ་འདེབས། །བར་ཆད་ཀུན་སོལ་ཚེ་དབང་དངོས་གྲུབ་སོལ། །ཚེ་དཔག་མེད་དངོས་པདྨ་ཉིན་
མོར་བྱེད། །འགྲོ་འདུལ་གར་མཁན་བསྟན་འཛིན་ཕྲིན་ལས་ཞབས། །སྨིན་གྲོལ་བཅུད་སྩོལ་འདྲེན་མཆོག་རྣམ་གསུམ་སོགས། །རྩ་བརྒྱུད་བླ་མའི་ཚོགས་ལ་གསོལ་བ་འདེབས། །བར་ཆད་ཀུན་སོལ་ཚེ་དབང་དངོས་གྲུབ་སྩོལ། །བཅོམ་ལྡན་ཚེ་དཔག་མེད་མགོན་ཡབ་དང་ཡུམ། །ལྷ་མོ་བཞི་དང་ཚེ་འགུགས་མགྱོགས་མ་བཞི། །སྒོ་སྲུང་མ་བཞི་རིགས་ཀྱི་ལྷ་མོ་ལྔ། །འཆི་མེད་དཀྱིལ་འཁོར་ལྷ་ལ་གསོལ་བ་འདེབས། །བར་ཆད་ཀུན་སོལ་ཚེ་དབང་དངོས་གྲུབ་སྩོལ། །ཡི་དམ་ལྷ་ཚོགས་དཔའ་བོ་རྣལ་འབྱོར་མ། །འཆི་མེད་གྲུབ་པའི་ལྷ་དང་དྲང་སྲོང་ཚོགས། །བཀའ་གཏེར་སྐྱོང་མཛད་རྒྱུད་གསུམ་དམ་ཅན་སོགས། །རྩ་གསུམ་རབ་འབྱམས་རྒྱ་མཚོར་གསོལ་བ་འདེབས། །བར་ཆད་ཀུན་སོལ་ཚེ་དབང་དངོས་གྲུབ་སྩོལ། །བླ་མ་རྒྱལ་བ་སྲས་བཅས་ཐུགས་རྗེ་ཅན། །གསོལ་འདེབས་བུ་ལ་ཡེ་ཤེས་སྤྱན་གྱིས་གཟིགས། །སྐྱབས་མཆོག་རྣམས་ཀྱིས་གཏན་ནས་མི་བསླུ་བས། །འདོད་པའི་འབྲས་བུ་ད་ལྟ་ཉིད་དུ་སྩོལ། །ནད་གདོན་བགེགས་དང་གློ་བུར་ཡེ་འདྲོགས་སོགས། །དུས་དང་དུས་མིན་འཆི་བ་བཟློག་ཏུ་གསོལ། །སྲོག་བཅད་རྟེན་གསུམ་བཤིགས་སོགས་ཚེ་ཐུང་བའི། །ལས་སྒྲིབ་མཐའ་དག་རྩད་ནས་སྦྱང་དུ་གསོལ། །བསོད་ནམས་དབང་ཐང་དགེ་བའི་ལས་འཕྲོ་སོགས། །རིང་འཚོའི་མཐུན་རྐྱེན་གོང་དུ་སྤེལ་དུ་གསོལ། །བླ་ཚེ་སྲོག་དབུགས་ཉམས་
འཐོར་རྐུས་དང་འཕྲོག །བཀུག་བསྟིམས་རང་མལ་གནས་པར་མཛད་དུ་གསོལ། །རྣམ་པར་རྟོག་པའི་འཕོ་བ་ཇི་སྙེད་པ། །འཕོ་མེད་བདེ་བར་བྱིན་གྱིས་བརླབ་དུ་གསོལ། །མི་ཤིགས་རྡོ་རྗེ་མི་འགྱུར་གཡུང་དྲུང་དང་། །མི་ནུབ་རྒྱལ་མཚན་ཚེ་བརྟན་མཛད་དུ་གསོལ། །ལོ་བརྒྱ་འཚོ་ཞིང་སྟོན་བརྒྱ་མཐོང་བ་དང་། །བར་ཆད་ཀུན་ཞིའི་དངོས་གྲུབ་སྩལ་དུ་གསོལ། །ལུས་རྟེན་འདི་ལ་ཚེ་དབང་རིག་པ་འཛིན། །གེགས་མེད་མྱུར་དུ་འགྲུབ་པར་མཛད་དུ་གསོལ། །སྒོ་གསུམ་མི་ཕྱེད་རྡོ་རྗེ་གསུམ་དུ་གྲུབ། །དོན་གཉིས་མཐའ་རུ་ཕྱིན་པའི་དངོས་གྲུབ་སྩོལ། །ཅེས་པའང་རྒྱལ་ཟླའི་དཀར་ཕྱོགས་ཀྱི་གྲལ་ཚེས་དགེ་བར་བདེ་བའི་རྡོ་རྗེས་དཔལ་སྤུངས་ཡང་དབེན་ཀུན་བདེ་གླིང་དུ་གསོལ་བ་བཏབ་པ་ཡ་ཐཱ་སིདྡྷི་རསྟུ། །དགེ་ལེགས་འཕེལ།། ༈ །།ག་བརྟན་རྡོ་རྗེའི་ཚེ་དབང་མཆོག་གྲུབ་ཅིང་། །འཕོ་འགྱུར་མེད་པའི་ཡེ་ཤེས་གདིང་ཆེན་ཐོབ། །སངས་རྒྱས་ཀུན་འདུས་པདྨ་དབང་ཆེན་ལ། །གསོལ་བ་འདེབས་སོ་ཕྱི་ནང་བར་ཆད་ཞི། །ཚེ་དབང་ཡེ་ཤེས་དོན་གཉིས་མཐར་ཕྱིན་མཛོད། །ཡེ་ཤེས་ཐུགས་རྗེ་བསམ་གྱིས་མི་ཁྱབ་ཅིང་། །སྐུ་ཚེ་འོད་སྣང་ཕྲིན་ལས་མཐའ་ཡས་པ། །འཆི་བདག་འཇིགས་བཅོམ་གསུང་གི་རྡོ་རྗེ་ལ། །གསོལ༴ ཚེ༴ རིག་སྔགས་སྐུར་སྟོན་དངོས་གྲུབ་མྱུར་སྩོལ་མ། །ཟླ་བའི་མདངས་ལྡན་དུས་ཀྱི་མུན་པ་འཇོམས། །ངན་འགྲོ་ཡོངས་སྦྱོང་རྣམ་པར་རྒྱལ་མ་ལ། །གསོལ༴ ཚེ༴
དྲན་པ་ཙམ་གྱིས་བདུད་བཞིའི་འཇིགས་པ་འཇོམས། །གུས་པས་བསྟེན་ན་འཆི་མེད་ཚེ་དབང་སྩོལ། །རྒྱལ་ཀུན་སྐྱེད་ཡུམ་ཡིད་བཞིན་འཁོར་ལོ་ལ། །གསོལ༴ ཚེ༴ སྐྱེ་འཆི་མི་མངའ་རྡོ་རྗེའི་སྐུར་བཞུགས་ནས། །འཁོར་བ་མ་སྟོང་བར་དུ་འགྲོ་དོན་མཛད། །ཡིད་བཞིན་ནོར་བུ་གུ་རུ་པདྨ་ལ། །གསོལ༴ ཚེ༴ ཟག་པ་རབ་ཟད་འབྱུང་བའི་དྭངས་མའི་སྐུ། །ནམ་མཁའ་ཇི་སྲིད་རྟག་ཁྱབ་ཕྲིན་ལས་ཅན། །པ་ཆེན་ལྔ་བརྒྱའི་གཙུག་རྒྱན་རིན་པོ་ཆེར། །གསོལ༴ ཚེ༴ དབྱིངས་ཕྱུག་དྭངས་མའི་བཅུད་ཀྱིས་རྒྱས་པའི་སྐུ། །བགྲེས་རྒུད་མི་མངའ་བཅུ་དྲུག་ན་ཚོད་ཅན། །མཆོག་དངོས་གྲུབ་པ་ལྷ་ཡི་ལྕམ་གཅིག་མར། །གསོལ༴ ཚེ༴ ཟག་མེད་རྡོ་རྗེ་བདེ་བའི་ལང་ཚོ་འབར། །མཆོག་དང་ཐུན་མོང་དངོས་གྲུབ་སྦྱིན་པའི་མ། །མཐིང་འོད་འབར་མ་མཁའ་འགྲོའི་ཚོགས་ཀྱི་རྗེར། །གསོལ༴ ཚེ༴ དུས་བཞི་མཉམ་ཉིད་ཆོས་སྐུ་འགྱུར་མེད་སྲོག །ཀུན་ནས་བཟླུམས་པའི་ཐིག་ལེ་ཆེན་པོའི་སྐུ། །འཆི་མེད་གཡུང་དྲུང་རྣམ་སྣང་ལོ་ཙཱ་བར། །གསོལ༴ ཚེ༴ ནམ་མཁའི་ལུས་ཅན་བཤེས་གཉེན་རྣལ་འབྱོར་པ། །ཚེ་ལ་མངའ་བརྙེས་གྲུབ་ཆེན་བརྩོན་འགྲུས་མཚན། །རིན་ཆེན་དཔལ་བཟང་ཚེ་དབང་གྲགས་པ་ལ། །གསོལ༴ ཚེ༴ གཟུང་འཛིན་རྒྱུ་བ་དབུ་མར་བསྟིམས་པ་ལས། །ཡོངས་གྲུབ་རྡོ་རྗེས་དུས་ཀྱི་རྒོལ་བ་བཅོམ། །ཚེ་དབང་རིག་འཛིན་
རྩ་བརྒྱུད་བླ་མ་ལ། །གསོལ༴ ཚེ༴ ཚེ་དཔག་མེད་མགོན་རིགས་ལྔ་ཡབ་དང་ཡུམ། །ལྷ་མོ་བཞི་དང་མགྱོགས་མ་སྒོ་མ་བཞི། །དཀྱིལ་འཁོར་ལྷ་ཚོགས་བཀའ་སྡོད་བཅས་པ་ལ། །གསོལ་བ༴ ཚེ་དབང་༴ རྩ་བརྒྱུད་རིག་འཛིན་དཔལ་ལྡན་བླ་མ་དང་། །རྒྱལ་བ་སྲས་བཅས་འཆི་མེད་ཚེ་ཡི་ལྷ། །ཐུགས་དམ་ཞལ་བཞེས་བཏང་སྙོམས་མི་སྲིད་པས། །གསོལ་འདེབས་བུ་ལ་བརྩེ་བས་རྗེས་དགོངས་ལ། །ཚེ་དབང་མཆོག་གི་དངོས་གྲུབ་སྩལ་དུ་གསོལ། །སྐྱེ་འཆི་མེད་པ་ལྟ་བའི་གདིང་ཐོབ་ཅིང་། །འཕོ་འགྱུར་མི་མངའ་རྡོ་རྗེའི་སྐུ་བརྙེས་ནས། །ཕྲིན་ལས་རྟག་ཅིང་ཁྱབ་པ་དེ་སྲིད་དུ། །རྒྱུ་འབྲས་ནད་དང་འཆི་བདག་མུན་པ་ཀུན། །ཡེ་ཤེས་ཐུགས་རྗེའི་ཉི་མས་བསལ་དུ་གསོལ། །དུས་དང་དུས་མིན་འཆི་སོགས་བར་ཆད་ཞི། །ལོ་བརྒྱ་འཚོ་ཞིང་སྡེ་བཞིའི་དཔལ་འབྱོར་རྒྱས། །སྟོན་བརྒྱ་མཐོང་ཞིང་དོན་གཉིས་མཐའ་རུ་ཕྱིན། །བསྟན་པ་གསལ་ཞིང་བསྟན་འཛིན་ས་ཀུན་ཁྱབ། །བསམ་དོན་ལྷུན་གྱིས་འགྲུབ་པར་བྱིན་གྱིས་རློབས། །ཞེས་པའང་གསང་འདུས་ནང་སྒྲུབ་ཀྱི་སྐབས་སུ་གུ་་ས་མུ་དྲས་བྲིས་ཏེ་གསོལ་བ་བཏབ་པ་སིདྡྷི་རསྟུ།། ༈ །།བ་བདག་ཀུན་བཟང་དཔལ་ལྡན་རྡོ་རྗེ་སེམས། །དགའ་རབ་རྡོ་རྗེ་འཇམ་དཔལ་བཤེས་གཉེན་རྩལ། །ཤྲཱི་སི༚་ཧ་མཁས་པ་ཡེ་ཤེས་མདོ། །རྒྱལ་ཀུན་སྤྱི་གཟུགས་
པད་འབྱུང་བི་མ་ལ། །བཻ་རོ་མཚོ་རྒྱལ་གཡུ་སྒྲ་སྙིང་པོ་སོགས། །དགོངས་བརྡ་སྙན་བརྒྱུད་རྣམས་ལ་གསོལ་བ་འདེབས། །ཏིང་འཛིན་བཟང་པོ་ལྕེ་བཙུན་སེང་གེ་དབང་། །མི་ཕམ་ཨ་རོ་ཟུར་པ་མེས་དབོན་དང་། །དམ་གཙང་བྱམས་གསུམ་ཀུན་མཁྱེན་རང་བྱུང་ཞབས། །ཀློང་ཆེན་རབ་འབྱམས་པདྨ་ལེགས་གྲུབ་རྩལ། །ལྷ་བཙུན་ཆེན་པོ་འཇིགས་མེད་གླིང་པ་སོགས། །སྡེ་གསུམ་མངའ་བདག་རྣམས་ལ་གསོལ༴ ཆོས་ཀྱི་དབང་ཕྱུག་རྒོད་ལྡེམ་ལས་འབྲེལ་རྩལ། །སངས་རྒྱས་རྡོ་རྗེ་རཏྣ་པདྨ་གླིང་། །ཀརྨ་ཀུན་སྐྱོང་གླིང་དང་འཇའ་ཚོན་སྙིང་། །བདུད་འདུལ་ཀློང་གསལ་སྙིང་པོ་གཏེར་བདག་གླིང་། །སྟག་ཤམ་རྡོ་རྗེ་ཆོས་རྗེ་གླིང་པ་སོགས། །རྫོགས་ཆེན་གཏེར་འབྱེད་རྣམས་ལ༴ བཀའ་བབས་བདུན་ལྡན་འཇམ་དབྱངས་མཁྱེན་བརྩེའི་དབང་། །མཛོད་ལྔའི་སྒོ་འབྱེད་བློ་གྲོས་མཐའ་ཡས་སྡེ། །ཆོས་སྐུའི་རང་ཞལ་སྟོན་མཛད་བཀའ་དྲིན་ཅན། །རྩ་བའི་བླ་མ་གཉིས་ལ་གསོལ༴ གསོལ་བ་འདེབས་སོ་རྫོགས་ཆེན་བརྒྱུད་པ་རྣམས། །བྱིན་གྱིས་རློབས་ཤིག་རྟོགས་གྲོལ་དུས་མཉམ་མཛོད། །འཁོར་འདས་སེམས་ཉིད་རང་བྱུང་ཡེ་ཤེས་སུ། །རྫོགས་པས་བསལ་བཞག་མེད་པའི་ངང་སྒོམ་གྱིས། །སྟོང་གསལ་རང་རིག་དབྱེར་མེད་ཆོས་སྐུར་གྲོལ། །སེམས་སྡེའི་དགོངས་ཉམས་མཐར་ཕྱིན་བྱིན་གྱིས་རློབས། །ཆོས་ཀུན་ཆོས་ཉིད་བཟང་མོའི་ཀློང་
རྫོགས་པས། །བྱ་བྲལ་གསལ་སྟོང་བདེ་བ་དབྱེར་མེད་ཀྱི། །གནད་བཞིས་ཚུལ་བཞི་ལམ་བསླངས་བྲག་པ་ཟད། །ཀློང་སྡེའི་རྟོགས་པ་མངོན་གྱུར་བྱིན་གྱིས་རློབས། །སྤང་བླང་བྱར་མེད་ཡིན་ལུགས་གནད་ཐོག་ཕེབ། །སེམས་ཀྱི་དྲི་བྲལ་རིག་སྟོང་རྗེན་པར་བུད། །ཅོག་བཞག་ཆེན་པོའི་དབྱིངས་སུ་ལ་ཟླ་བའི། །མན་ངག་གྲོལ་ས་ཟིན་པར་བྱིན༴ རང་ཐོག་ངོ་འཕྲོད་གཅིག་ཐོག་ཐག་ཆོད་དེ། །གྲོལ་ཐོག་གདིང་འཆོས་རང་སྣང་རིས་མེད་ཀྱི། །དགོངས་པའི་རྩལ་རྫོགས་ཀ་དག་ཟད་སར་འཁྱོལ། །ཁྲེགས་ཆོད་གྲུབ་མཐར་སྙོགས་པར་བྱིན༴ འོད་གསལ་མངོན་མཐོང་ཉམས་སྣང་གོང་དུ་འཕེལ། །རིག་པ་སྐུར་སྨིན་འཁྲུལ་སྣང་གཞི་ཐོག་ཟད། །གཞོན་ནུ་བུམ་པར་བྱང་ཆུབ་འཕོ་ཆེན་སྐུས། །གཞན་དོན་ལྷུན་གྲུབ་འབྱུང་བར༴ སྐུ་གསུམ་རང་རིག་ཡིན་ལུགས་གསལ་འདེབས་ཀྱིས། །སྣང་རིག་སྟོང་གསུམ་ཐིག་ལེ་གཅིག་ཏུ་རྫོགས། །ཐོགས་མའི་མགོན་པོ་ཉིད་དང་དབྱེར་མེད་པའི། །གོ་འཕང་ཚེ་འདིར་འགྲུབ་པར་བྱིན་གྱིས་རློབས། །ཅེས་པའང་། ཀུན་སྤོང་རྡོ་རྗེ་རྩེ་མོའི་རྣལ་འབྱོར་ལ་གཞོལ་བ་འཇམ་དབྱངས་དགེ་ལེགས་ཐུགས་བཞེད་ལྟར་རྩིས་མེད་ཀྱི་རྣལ་འབྱོར་པ་པདྨ་གར་དབང་རྩལ་གྱིས་རྫོང་ཤོད་བདེ་གཤེགས་འདུས་པའི་གནས་ཀྱི་སྙིང་པོ་འོད་གསལ་རྡོ་རྗེ་ཐུགས་ཀྱི་རྫོང་དུ་བགྱིས་པ་དགེ་ལེགས་འཕེལ།། ༈ །།སྒྲུབ་སྡེ་ཆེན་པོ་བཀའ་འདུས་ཀྱི་ལྷ་དང་གྲུབ་པའི་རིག་འཛིན་རྣམས་ལ་གསོལ་
བ་འདེབས་པ་དཔལ་ཆེན་དགྱེས་གླུ་ཞེས་བྱ་བ། རང་བྱུང་གདོད་མའི་མགོན་པོ་ཀུན་ཏུ་བཟང་། །རྒྱལ་ཚབ་སྟོན་པ་རིགས་ལྔ་གངས་ཆེན་མཚོ། །དཀྱིལ་འཁོར་ཀུན་བྱེད་རྡོ་རྗེ་སེམས་དཔའ་དང་། །གསང་བདག་རྡོ་རྗེ་ཆོས་ལ་གསོལ་བ་འདེབས། །གསང་བའི་གཉེར་འཛིན་ལས་ཀྱི་དབང་མོ་ཆེ། །བསྐྱེད་རྫོགས་རྫོགས་པ་ཆེན་པོའི་གུང་ཤིང་དགུ། །བཀའ་བབ་ཐོག་མཐའ་བར་དུ་བྱོན་པ་ཡི། །རིག་འཛིན་གྲུབ་པ་རྣམས་ལ་གསོལ་བ་འདེབས། །མེ་ལོང་ཡེ་ཤེས་ཡང་དག་ཧེ་རུ་ཀ །གྲུབ་པའི་སློབ་དཔོན་རྡོ་རྗེ་ཧཱུྃ་ཀ་ར། །མཉམ་ཉིད་ཡེ་ཤེས་གཤིན་རྗེ་གཤེད་གྲུབ་པ། །འཇམ་དཔལ་བཤེས་གཉེན་ཞབས་ལ་གསོལ་བ་འདེབས། །སོར་རྟོག་ཡེ་ཤེས་དབང་ཆེན་རྟ་མཆོག་དཔལ། །གྲུབ་པའི་སློབ་དཔོན་ནཱ་ག་རྫུ་ན་དང་། །ཆོས་དབྱིངས་ཡེ་ཤེས་ཆེ་མཆོག་དངོས་གྲུབ་པ། །ཕྱག་རྒྱ་རྒྱ་ཆེན་ཞབས་ལ་གསོལ་བ་འདེབས། །ནན་ཏན་ཡེ་ཤེས་རྡོ་རྗེ་གཞོན་ནུ་མཆོག་གྲུབ་པའི་སློབ་དཔོན་པྲ་བྷ་ཧ་སྟིའི་ཞབས། །དབྱིངས་སྒྲོལ་ཡེ་ཤེས་མངོན་རྫོགས་རྒྱལ་པོ་དངོས། །དྷ་ན་སཾ་སྐྲྀ་ཏ་ལ་གསོལ༴ འདའ་ཀ་ཡེ་ཤེས་དྲེགས་པ་ཀུན་འདུལ་རྗེ། །གྲུབ་པའི་སློབ་དཔོན་རོམྦུ་གུ་ཧྱ་དང་། །ཀློང་གྱུར་ཡེ་ཤེས་སྟོབས་ལྡན་ནག་པོ་གྲུབ། །ཤཱི༚ནྟ་གྷའི་ཞབས་ལ༴ ཡེ་ཤེས་དགུ་དངོས་དཔལ་ཆེན་དཀྱིལ་འཁོར་དགུ། །སྤྲོ་ཞིང་སྡུད་མཛད་ཁྱབ་བདག་རྡོ་རྗེ་འཆང་། །བཀའ་བབ་ཀུན་འདུས་དཔལ་ལྡན་
པདྨ་སྐྱེས། །རྡོ་རྗེ་སློབ་དཔོན་མཆོག་ལ༴ འཇམ་དཔལ་བཀའ་བབས་གསང་སྔགས་བསྟན་པའི་བདག། ཡང་རྫོང་བྲག་ཏུ་དངོས་གྲུབ་རྣམ་གཉིས་མཉེས། །ཉི་ཟླ་གདན་བཏིང་བྲག་ལ་ཕུར་པ་འདེབས། །སངས་རྒྱས་ཡེ་ཤེས་ཞབས་ལ༴ དབང་ཆེན་བཀའ་བབས་འགྲོ་འདུལ་གངས་ཅན་མགོན། །མཆིམས་ཕུ་དབེན་རྩར་དངོས་གྲུབ་རྣམ་གཉིས་བརྙེས། །སྐུ་ལུས་མེར་བསྒྱུར་རྟ་སྐད་སྤྱི་བོར་བསྒྲགས། །རྒྱལ་བ་མཆོག་དབྱངས་ཞབས་ལ༴ ཡང་དག་བཀའ་བབས་ས་བཅུའི་རྩེ་མོར་སོན། །ལྷོ་བྲག་མཁར་ཆུར་དངོས་གྲུབ་རྣམ་གཉིས་བརྙེས། །ཉི་ཟེར་ཆིབས་ཤིང་ཧཱུྃ་སྒྲས་ལས་ཀུན་སྒྲུབ། །ནམ་མཁའི་སྙིང་པོའི་ཞབས་ལ༴ བདུད་རྩིའི་བཀའ་བབས་ཆོས་ཉིད་ཟད་སར་འཁྱོལ། །ཤེལ་བྲག་གནས་སུ་དངོས་གྲུབ་རྣམ་གཉིས༴ བྲག་ལས་ཆུ་བཏོན་ནུས་པས་སྐུ་དགྲ་བཏུལ། །གཉགས་ཆེན་ཛྙཱ་ནའི་ཞབས་ལ༴ ཕུར་པའི་བཀའ་བབས་མཁའ་སྤྱོད་ཌཱ་ཀིའི་རྗེ། །སེང་གེ་རྫོང་དུ་དངོས་གྲུབ་རྣམ་གཉིས༴ མི་བརྗེད་གཟུངས་ཐོབ་ཤི་བ་མངོན་སུམ་བསླངས། །ཡེ་ཤེས་མཚོ་རྒྱལ་ཞབས་ལ༴ བླ་མེད་བཀའ་བབས་ཚེ་ལ་རང་དབང་ཐོབ། །ཤམ་པོ་གངས་རར་དངོས་གྲུབ༴ མ་མོ་བྲན་ཁོལ་སྤྱན་གྱིས་ནགས་ཚལ་བསྲེགས། །དཔལ་གྱི་ཡེ་ཤེས་ཞབས་ལ༴ མཆོད་བསྟོད་བཀའ་བབས་མཐུ་སྟོབས་ནུས་པའི་བདག །སྟག་ཚང་ཕུག་ཏུ་དངོས༴ ལྷ་སྲིན་བྲན་
ཁོལ་དྲེགས་པ་ལས་ལ་འགྱེད། །དཔལ་གྱི་སེང་གེའི་ཞབས་ལ༴ དྲག་སྔགས་བཀའ་བབས་ཡེ་ཤེས་སྤྱན་དང་ལྡན། །གཡའ་མ་ལུང་དུ་དངོས༴ དགོངས་པ་ཡོན་ཏན་གུ་རུ་རྗེ་དང་མཉམ། །བཻ་རོ་ཙ་ནའི་ཞབས་ལ༴བདེ་འདུས་བཀའ་བབས་བསྟན་པའི་ཤིང་རྟ་མཆོག །བསམ་ཡས་དབུ་རྩེར་དངོས་གྲུབ༴ ཏིང་འཛིན་མི་གཡོ་གཞན་སྣང་ཟིལ་གྱིས་གནོན། །ཆོས་རྒྱལ་ཆེན་པོའི་ཞབས་ལ༴ བཀའ་བརྒྱད་བཀའ་བབས་ཡོན་ཏན་དཔག་མེད་ལྡན། །སོ་སོའི་གནས་སུ་དངོས༴ གྲུབ་པའི་རྟགས་བསྟན་གཞན་དོན་རྒྱུན་མི་ཆད། །སྔ་འགྱུར་རིག་འཛིན་རྣམས་ལ༴ དཔལ་ཆེན་ཚོམ་བུ་དགུ་ཡི་ལྷ་རྣམས་དང་། །འཕགས་ཡུལ་རིག་འཛིན་བརྒྱད་ཀྱི་ཐུགས་ཀྱི་བཅུད། །རྫོང་འཕྲང་མངའ་བདག་མཁས་པ་མི་བཞི་དང་། །གྲུབ་ཐོབ་དངོས་གྲུབ་སོགས་ལ་གསོལ༴ བདེ་གཤེགས་འདུས་པའི་དཀྱིལ་འཁོར་ལྷ་རྣམས་དང་། །མཁོ་མཐིང་གནས་ནས་སྙིང་འདྲ་སྒྲུབ་པའི་སྡེ། །སྤྱན་དྲངས་མངའ་བདག་སྐུ་སྤྲུལ་ཉང་རལ་ཞབས། །སྲས་སློབ་བརྒྱུད་པར་བཅས་ལ་གསོལ་བ་འདེབས། །གསང་བ་ཡོངས་རྫོགས་དཀྱིལ་འཁོར་ལྷ་རྣམས་དང་། །གནམ་སྐས་ཅན་ནས་སྙིང་ཁྲག་གདམས་པའི་སྐོར། །སྤྱན་དྲངས་གསུང་སྤྲུལ་སྤང་སྟོན་ཆོས་ཀྱི་དབང་། །སྲས་སློབ་བརྒྱུད་པར་བཅས་ལ༴ རང་བྱུང་རང་ཤར་དཀྱིལ་འཁོར་ལྷ་རྣམས་དང་། །ལྷ་བྲག་
གནས་ནས་སྲོག་གི་དྭངས་མའི་སྐོར། །སྤྱན་དྲངས་བདུད་འཇོམས་སྤྲུལ་པ་རྒོད་ལྡེམས་ཅན། །སྲས་སློབ་བརྒྱུད་པར་བཅས་ལ༴ བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་དང་། །ཤེལ་བྲག་གནས་ནས་བླ་མེད་གཏེར་སྨྱོན་སྐོར། །འབྱིན་མཛད་རྒྱལ་སྲས་ལྷ་རྗེའི་རྣམ་པར་འཕྲུལ། །ཡར་རྗེ་ཨོ་རྒྱན་གླིང་པར་གསོལ༴ འདུས་པ་རྣམ་བཞིའི་དཀྱིལ་འཁོར་ལྷ་རྣམས་དང་། །གནམ་ལྕགས་བྲག་ནས་ཟབ་ཅིང་རྒྱ་ཆེའི་གཏེར། །སྤྱན་དྲངས་བཻ་རོ་དངོས་བྱོན་རྡོ་རྗེ་གླིང་། །གཏེར་འབྱིན་ཀུན་གྱི་རྒྱལ་པོར་གསོལ༴ ཐུགས་ཀྱི་མེ་ལོང་དཀྱིལ་འཁོར་ལྷ་རྣམས་དང་། །བུམ་ཐང་གནས་ནས་ཡང་ཟབ་འབྲས་བུའི་སྐོར། །སྤྱན་དྲངས་པདྨ་གསལ་སྤྲུལ་པདྨ་གླིང་། །སྲས་སློབ་བརྒྱུད་པར་བཅས་ལ༴ བཀའ་བརྒྱད་ཡོངས་འདུས་དཀྱིལ་འཁོར༴ སྙིང་སྒྲོམ་མུན་པའི་མཛོད་ནས་ཡང་རྩེའི་ཆོས། །སྤྱན་དྲངས་ཁྲི་སྲོང་ཐུགས་སྤྲུལ་པདྨ་དབང་། །གྲོགས་མཛད་རིག་འཛིན་རྗེ་ལ༴ དྲེགས་པ་ཀུན་འདུལ་དཀྱིལ་འཁོར༴ ཁ་རག་ཆུ་མོ་ཕུག་ནས་ཕྲིན་ལས་གཏེར། །འབྱིན་མཛད་འབྲོག་མིའི་ཡང་སྲིད་བསམ་གཏན་མཚན། །རྣམ་འཕྲུལ་རིམ་གསུམ་བྱོན་ལ༴ དངོས་གྲུབ་སྙིང་པོའི་དཀྱིལ་འཁོར༴ ལྗོན་པ་ལུང་དང་ཞྭ་ཡི་ལྷ་ཁང་གཏེར། །འདོན་མཛད་ཉང་བན་ཐུགས་སྤྲུལ་འཇའ་ཚོན་སྙིང་། །
ཆོས་བདག་བརྒྱུད་པར་བཅས་ལ༴ བདེ་གཤེགས་ཡོངས་འདུས་དཀྱིལ་འཁོར༴ མི་འགྱུར་གསང་བའི་སྒྲོམ་ནས་ཡང་ཟབ་གཏེར། །འབྱིན་མཛད་ལང་གྲོའི་རྣམ་འཕྲུལ་ཀློང་གསལ་སྙིང་། །སྲས་སློབ་བརྒྱུད་པར༴ བདེ་གཤེགས་སྙིང་པོའི་དཀྱིལ་འཁོར༴ བཙན་རི་རྡོ་རྗེའི་བྲག་ནས་བཀའ་འདུས་སྐོར། །སྤྱན་དྲངས་བཻ་རོའི་རྣམ་འཕྲུལ་བདེ་ཆེན་གླིང་། །སྲས་སློབ་བརྒྱུད་པར་བཅས་ལ༴ བཀའ་བརྒྱད་སྤྱི་དང་བྱེ་བྲག་ལྷ་རྣམས་དང་། །གནས་མཆོག་རྣམས་ནས་ཡོ་ག་རྣམ་གསུམ་གཏེར། །འབྱིན་མཛད་དམ་འཛིན་རྣམ་འཕྲུལ་མཆོག་གྱུར་གླིང་། །ངོ་མཚར་ཤིང་རྟ་ཆེན་པོར༴ གཞན་ཡང་སྒྲུབ་སྡེའི་ཆོས་དང་དེའི་སྟོན་པ། །དུས་གསུམ་གཤེགས་དང་འབྱོན་གྱུར་ཇི་སྙེད་ལ། །དད་པས་ཕྱག་འཚལ་མོས་པས་གསོལ་བ་འདེབས། །ལུས་ངག་ཡིད་ལ་རྡོ་རྗེའི་བྱིན་རླབས་སྩོལ། །དྲི་མ་རྣམ་དགུ་ད་ལྟ་ཉིད་དུ་འབྱངས། །བསྐྱེད་རྫོགས་གུང་ཤིང་དགུ་ལ་རང་བྱན་ཆུད། །དཔལ་ཆེན་རྣམ་དགུའི་དགོངས་པ་མཐར་ཕྱིན་ནས། །ཡེ་ཤེས་རྣམ་དགུ་མངོན་ཏུ་འགྱུར་བར་ཤོག །བསྒྲུབ་བྱའི་ལྷ་དང་སྒྲུབ་བྱེད་སྔགས་ཀྱི་ཐབས། །གྲུབ་པའི་རིག་འཛིན་ཆེན་པོ་ཁྱེད་རྣམས་ཀྱི། །གོ་འཕང་སྟན་ཐོག་འདི་རུ་མངོན་གྱུར་ཤོག །སྲིད་ཞི་ཡོངས་ཀྱི་སྤྱི་དཔལ་ཉིད་གྱུར་ཅིག །གུ་རུའི་ཐུགས་དམ་རྩོད་མེད་ཡོངས་གྲགས་པ། །སྒྲུབ་
སྡེའི་ཆོས་རྣམས་བཤད་ཅིང་སྒྲུབ་པའི་སྡེས། །ས་སྟེང་ཀུན་ཁྱབ་སྨིན་ཅིང་གྲོལ་བའི་རྒྱུན། །གངྒཱའི་ཀླུང་ལྟར་འཕེལ་བའི་བཀྲ་ཤིས་ཤོག །ཅེས་པ་འདི་ནི། གངས་ཅན་གྱི་ལྗོང་ཙམ་ན་འགྲན་ཟླ་བྲལ་བ། གུ་རུའི་སྒྲུབ་གནས་ཐམས་ཅད་ཀྱི་རྒྱལ་པོ། རྗེ་འབངས་རྣམས་ལ་བདེ་གཤེགས་འདུས་པ་གཙོར་གྱུར་ཡོ་ག་གསུམ་གྱི་ཟབ་ཆོས་མཐའ་དག་སྩལ་བའི་གནས་སུ་གྲགས་ཤིང་གྲུབ་པ། བསམ་ཡས་མཆིམ་ས་ཕུའི་བྲག་དམར་ཀེའུ་ཚང་དུ་བདེ་གཤེགས་འདུས་པའི་ཚོགས་མཆོད་བརྒྱ་ཕྲག་བགྱིས་པའི་ཚེ། མོས་གུས་ཆེན་པོས་ཐོལ་བྱུང་དུ་གསོལ་བ་འདེབས་པ་པོ་ནི་པདྨ་གར་གྱི་དབང་ཕྱུག་རྩལ་ལོ། །དགེ་ལེགས་འཕེལ།། ༈ །།འཇམ་དཔལ་སྐུའི་དཀྱིལ་འཁོར་དང་བཀའ་བབ་ཀྱི་སློབ་དཔོན་ཆེན་པོ་རྣམས་ལ་གསོལ་བ་འདེབས་པ་འཁོར་ལོ་མཐར་འབྱིན་ཅེས་བྱ་བ། རྒྱལ་ཀུན་ཡེ་ཤེས་རང་གཟུགས་འཇམ་དཔལ་དབྱངས། །དངོས་ཀྱིས་རྗེས་བཟུང་འཇམ་དཔལ་བཤེས་གཉེན་ཞབས། །གདམས་པའི་བཀའ་བབ་ཁྲག་འཐུང་ནག་པོ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དྲག་སྔགས་མངའ་བདག་ཤཱི༚ནྟ་གྷ་དང་། །མན་ངག་གསང་མཛོད་གཙུག་ལག་དཔལ་དགེ་བ། མཐུ་སྟོབས་དབང་ཕྱུག་བ་སུ་དྷཱ་ར་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དུས་གསུམ་རྒྱལ་བ་ཀུན་གྱི་གསང་བའི་མཛོད། །ས་སྟེང་གྲུབ་པའི་རྒྱལ་པོ་ཨོ་རྒྱན་རྗེ། །བདུད་འདུལ་ཡེ་ཤེས་
ཌཱ་ཀི་མཚོ་རྒྱལ་མར། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །འོད་བྱེད་ས་བརྙེས་གསང་སྔགས་བསྟན་པའི་བདག །འཇམ་དཔལ་དངོས་བྱོན་གནུབས་ཆེན་ཡབ་སྲས་དང་། །རིགས་ཆོས་བརྒྱུད་འཛིན་གསེར་གྱི་ཕྲེང་བ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཟབ་གཏེར་སྒོ་འབྱེད་ཞད་ཁྲོམ་རྡོ་རྗེ་འབར། །སྔགས་བསྟན་སྲོག་འཛིན་འགྱུར་མེད་རྡོ་རྗེ་རྩལ། །སྙིགས་མའི་འགྲོ་འདུལ་མཆོག་གྱུར་བདེ་ཆེན་གླིང་། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རྒྱུད་དང་མན་ངག་གདམས་པའི་བཀའ་སྲོལ་ཀུན། །གཅིག་འདུས་མཐུ་སྟོབས་མངའ་བདག་དབང་པོའི་སྡེ། །གནམ་ལྕགས་མེ་འབར་བརྒྱུད་པར་བཅས་རྣམས་ལ། །གསོལ་བ་འདེབས་སོ༴ འདས་པའི་སངས་རྒྱས་བཅོམ་ལྡན་འཇམ་པའི་ཏོག །ད་ལྟར་ནོར་བུ་རིན་ཆེན་བརྩེགས་པའི་རྒྱལ། །མ་འོངས་སངས་རྒྱས་མགོན་པོ་ཀུན་གཟིགས་ལ། །གསོལ་བ་འདེབས་སོ༴ སངས་རྒྱས་ཐམས་ཅད་སྐྱེད་པའི་ཡབ་གྱུར་ཀྱང་། །རྒྱལ་བ་ཀུན་གྱི་མདུན་ན་རྒྱལ་སྲས་ཚུལ། །དཀྱིལ་འཁོར་རྒྱ་མཚོའི་ཁྱབ་བདག་འཇམ་དཔལ་དབྱངས། །གསོལ་བ་འདེབས་སོ༴ ཕྱག་རྒྱ་ཟིལ་གནོན་དེ་བཞིན་གཤེགས་པའི་རིགས། །འཇོམས་བྱེད་ནག་པོ་ལ་སོགས་རྡོ་རྗེའི་རིགས། ཁ་ཐུན་ལ་སོགས་རིན་པོ་ཆེ་ཡི་རིགས། །འཇིགས་བྱེད་རུ་མཚོན་དམར་པོ་
པདྨའི་རིགས། །ཤོར་སོང་ཉི་མ་ཁྲོས་པ་ལས་ཀྱི་རིགས། །འཆར་ཁ་ནག་པོ་ཉི་མ་བཞི་པ་དང་། །ཡང་ཟློག་ཀིང་ཀང་ཁྲོ་ཆུ་དུག་གི་གདོང་། །ལས་ཀྱི་བཀའ་སྡོད་ཡ་མ་རཱ་ཛ་དང་། །ཙ་མུནྟྲི་སོགས་དྲག་ཤུལ་ཕོ་ཉའི་ཚོགས། །རབ་འབྱམས་གཤིན་རྗེ་རོལ་པའི་དཀྱིལ་འཁོར་ཆེ། །སྐུ་མཆོག་འཇམ་དཔལ་ཞི་ཁྲོའི་ལྷ་ཚོགས་ལ། །གསོལ་བ་འདེབས་སོ༴ བསྐྱེད་པས་ལྷ་སྣང་གསལ་བརྟན་གྱད་དུ་གྱུར། །རླུང་སྔགས་བཟླས་པས་ངག་ལ་ནུས་པ་འབར། །སྟོང་སྲོག་གཟེར་གྱིས་གཞི་ལམ་འབྲས་བུར་ཐེབས། །འཇམ་དཔལ་གཤིན་རྗེའི་གོ་འཕང་མྱུར་འགྲུབ་ཤོག །སྲུང་བའི་རྫོང་བརྟན་ཟློག་པའི་མཚོན་ཆ་རྣོ། །སྔགས་བསྡེབ་འབྱེད་དང་མདོས་ཀྱི་འཁྲུལ་འཁོར་འབྱངས། །མནན་གཏད་ངན་སྔགས་བསད་པའི་རྣ་ཆ་ལ། །དབང་འབྱོར་མངོན་སྤྱོད་མཐའ་རུ་ཕྱིན་པར་ཤོག །ཚེ་འདིར་འཇམ་དཔལ་དུས་དགྲའི་དབང་པོ་དང་། །དབྱེར་མེད་ཚར་གཅོད་རྗེས་འཛིན་ཕྲིན་ལས་ཀྱིས། །མི་སྲུན་གདུལ་དཀའ་མཐའ་དག་རབ་བཏུལ་ནས། །ཀུན་དུ་གཟིགས་པའི་ཞིང་ཁམས་སྦྱོང་བར་ཤོག ་འཁོར་འདས་ཀུན་གྱི་ཁྱབ་བྱེད་བདེ་གཤེགས་སྙིང་། །གློ་བུར་དྲི་མའི་སྦུབས་ལས་མྱུར་གྲོལ་ཏེ། །གསང་བའི་འཁོར་ལོ་རང་གི་སེམས་ལ་འདུས། །གཞི་ཡི་གནས་ལུགས་རང་ངོ་འཕྲོད་པར་ཤོག །ཆོས་དབྱིངས་སྟོང་པའི་རང་མདངས་སྲིད་པ་
གསུམ། །ཅི་ཡང་མེད་ལས་ཅི་ཡང་འཆར་བར་ཤེས། །སྲིད་པའི་འཁོར་ལོ་ལྟེ་བའི་གནས་སུ་འདུས། །ལམ་གྱི་ཉམས་ལེན་འཁྲུལ་མེད་ཤེས་པར་ཤོག །ཞི་རྒྱས་དབང་དང་བསད་བསྐྲད་འགུགས་དབྱེ་ལྐུགས། །སྨྱོ་འབོག་མནན་པའི་ལས་ཆེན་བཅུ་པོ་འགྲུབ། །གཅོད་པའི་འཁོར་ལོ་ཕྱག་ལ་རབ་འདུས་ནས། །འགྲོ་བ་འདུལ་བའི་ཕྲིན་ལས་ཐོགས་མེད་ཤོག །ཆོས་རྣམས་སེམས་ཀྱིས་སྤྲུལ་ཅིང་རང་གི་སེམས། །སྐུ་གསུམ་རང་བཞིན་འབྲས་བུ་ལྷུན་གྱིས་རྫོགས། །སྤྲུལ་པའི་འཁོར་ལོ་ཞབས་ལ་འདུས་པར་རྟོགས། །འཁོར་ལོ་རྣམ་བཞིའི་དགོངས་པ་མཐར་ཕྱིན་ཤོག །འཇམ་དཔལ་གཞོན་ནུར་གྱུར་པས་རྗེས་བཟུང་ཞིང་། །གཤིན་རྗེ་གཤེད་པོའི་གོ་འཕང་མཆོག་གྲུབ་ནས། །མུ་མཐའ་མེད་པའི་མཁའ་མཉམ་འགྲོ་བ་ཀུན། །གདོད་མའི་དབྱིངས་སུ་སྒྲོལ་བའི་མཐུ་ཐོབ་ཤོག །ཅེས་པ་འདིའང་། བོད་ཡུལ་གནས་ཆེན་ཀུན་གྱི་རྒྱལ་པོ། ཁྱད་པར་འཇམ་དཔལ་སྐུའི་གནས་སྒྲགས་ཀྱི་ཡང་རྫོང་དུ་འཇམ་དཔལ་ཕྱག་རྒྱ་ཟིལ་གནོན་གྱི་སྒྲུབ་ཟློག་ཞག་གསུམ་མ་ཞིག་བགྱིས་པའི་ཐོག་མར་ལྟས་དང་རྟེན་འབྲེལ་ལེགས་པའང་ཅུང་ཟད་བྱུང་བ་ལ་བརྟེན་ནས། །ཟང་ཆོས་འདི་ལ་བཀའ་བབ་ལུང་བསྟན་ཐོབ་པ་པདྨ་གར་དབང་བློ་གྲོས་མཐའ་ཡས་ཀྱིས་ཡུད་ཙམ་ལ་ཤུར་མར་བྲིས་པ་དགེ་ལེགས་འཕེལ།། ༈ །།སང་འདུས་མི་བསྐྱོད་པ་འགོས་ལུགས་ཀྱི་བརྒྱུད་འདེབས། །ཟབ་གསལ་རིགས་བརྒྱའི་ཁྱབ་བདག་
རྡོ་རྗེ་འཆང་། །གསང་ཆེན་སྡུད་པོ་ཕྱག་ན་རྡོ་རྗེ་དང་། །ཨིནྡྲ་བྷཱུ་ཏི་ཀླུ་ཡི་རྣལ་འབྱོར་མར། །གསོལ་བ་འདེབས་སོ་རིམ་གཉིས་མཐར་ཕྱིན་ཤོག །བི་སུ་ཀལྤ་དཔལ་ལྡན་ས་ར་ཧ། །འཕགས་མཆོག་ཀླུ་སྒྲུབ་ཨཱརྻ་དེ་བ་དང་། །ནཱ་ག་བོ་དྷི་ཟླ་བ་གྲགས་པ་ལ། །གསོལ་བ༴ སློབ་པའི་རྡོ་རྗེ་ནག་པོ་སྤྱོད་པའི་ཞབས། །དགེ་བའི་མགོན་པོ་ཏེ་ལོ་ནཱ་རོ་པ། །ཤེས་རབ་སྲུང་དང་ཀ་ན་ཀ་ཤྲཱི་ལ། །གསོལ་བ༴ དཱི་པཾ་ཀ་ར་འགོས་ལོ་ལྷས་བཅས་དང་། །སེང་རྒྱལ་ཡེ་ཤེས་སེང་གེ་ཉི་མ་སེང་། །ཉི་ལྕམ་རྔོག་སྟོན་འཕགས་ལྷ་ཐང་སྦེ་པར། །གསོལ་བ༴ གསེར་སྡེང་གཞོན་ནུ་ཆོས་སྐུ་འོད་ཟེར་དང་། །འཕགས་འོད་བུ་སྟོན་རིན་ཆེན་རྣམ་པར་རྒྱལ། །དཔལ་མཆོག་དངོས་གྲུབ་ཟླ་དཔལ་ཚུལ་རྒྱལ་ལ། །གསོལ་བ༴ མཁྱེན་རབ་མཆོག་གྲུབ་དཀོན་མཆོག་དཔལ་བཟང་པོ། །བཀྲ་ཤིས་རྒྱལ་མཚན་དཔལ་ལྡན་ཆོས་བཟང་བ། །རྡོ་རྗེ་འཆང་དངོས་ཀུན་དགའ་སྙིང་པོ་ལ། །གསོལ་བ༴ ཡེ་ཤེས་རྒྱ་མཚོ་བློ་གྲོས་རྣམ་རྒྱལ་དང་། །ངག་དབང་ཕྲིན་ལས་ཀུན་བཟང་དབང་པོ་རྗེ། །ཚེ་དབང་ནོར་བུ་ཕྲིན་ལས་ཤིང་རྟ་ལ། །གསོལ་བ༴ བསྟན་པའི་ཉིན་བྱེད་ཚེ་དབང་ཀུན་ཁྱབ་དང་། །ཀརྨ་རནྟ་འོད་གསལ་འགྱུར་མེད་ཞབས། །སྨིན་གྲོལ་ལམ་སྟོན་རྩ་བའི་བླ་མ་ལ། །གསོལ་བ༴ རྡོ་རྗེ་བཞིས་བསྒྲུབས་སྔགས་ཀྱི་སྐུ་དང་ནི། །སྟོང་
པའི་དེ་ཉིད་གཉིས་སུ་མེད་པར་ཞུགས། །ཡེ་ཤེས་ལྷ་སྐུར་ཤར་བས་ཕྲ་རགས་ཀྱི། །ཐ་མལ་ང་རྒྱལ་དག་པར་བྱིན་གྱིས་རློབས། །བདེ་གསལ་མི་རྟོག་གཙོར་གྱུར་སྔགས་རྒྱ་དང་། །མཉམ་བཞག་རིམ་པས་སྣང་གསུམ་འོད་གསལ་བཅས། །ལེགས་འབྱངས་དོན་དམ་རྡོ་རྗེའི་བཟླས་པ་ཡིས། །སྲོག་རྩོལ་དབང་དུ་གྱུར་པར་བྱིན་གྱིས་རློབས། །མི་ཤིགས་སྔགས་དང་རླུང་གི་རྫས་ཀྱི་མཐུས། །ཏིང་ངེ་འཛིན་གྱི་སྒྱུ་མ་རབ་ཐོབ་ཅིང་། །རླུང་སེམས་དྭངས་མ་རྡོ་རྗེ་སེམས་དཔའི་སྐུ། །མི་འགྱུར་བདེ་ཆེན་ཐོབ་པར་བྱིན་གྱིས་རློབས། །རྫས་སྔགས་རླུང་གི་ཐིག་ལེས་དུག་གསུམ་པོ། །ལམ་བྱེད་ཕྱག་རྒྱ་གསུམ་གྱིས་སྣང་བ་རྣམས། །རྣམ་དག་འོད་གསལ་མངོན་ཏུ་བྱེད་པའི་གྲོགས། །བརྟུལ་ཞུགས་མཐའ་རུ་ཕྱིན་པར་བྱིན་གྱིས་རློབས། །སྣང་གསུམ་གྱིས་བསྡུས་ཁམས་གསུམ་སྒྲིབ་པའི་ལྕགས། །འོད་གསལ་འགྱུར་མེད་བདེ་བའི་རྩིས་ཟོས་པས། །ཟུང་འཇུག་གསེར་བཟང་སྒྱུ་འཕྲུལ་དྲྭ་བའི་སྐུ། །བདེན་གཉིས་དབྱེར་མེད་རྡོ་རྗེ་འཆང་འགྲུབ་ཤོག །ཅེས་པ་འདིའང་རྡོ་རྗེའི་རྣལ་འབྱོར་པ་བླ་མ་ངག་དབང་ཆོས་འཕེལ་གྱི་ཐུགས་བཞེད་ལྟར་ཀརྨ་ངག་དབང་ཡོན་ཏན་རྒྱ་མཚོས་དཔལ་ལྡན་ཛཾ་ཐང་གི་ཆོས་སྡེར་བྲིས་པ་དགེ་ལེགས་འཕེལ།། ༈ །།རྫོགས་ལྡན་བཀའ་དང་བསྟན་བཅོས་མ་ལུས་པར། །རྟོན་པ་བཞི་ཡི་སྣང་བ་ཆེར་རྒྱས་ཏེ། །སྙིང་
པོའི་བསྟན་པའི་མེ་རོ་སློང་མཛད་པ། །སྒྲོལ་བའི་མགོན་པོའི་ཞབས་ལ་གསོལ་བ་འདེབས། །བཅོས་མ་གློ་བུར་རང་བཞིན་གཉུག་མ་ཡི། །བདེན་གཉིས་རྒྱལ་ཁམས་རྣམ་པར་དབྱེ་བ་ལ། །ངེས་པ་དོན་གྱི་རྒྱལ་ཚབ་སྣར་ཐང་པ། །རིན་ཆེན་རྒྱ་མཚོའི་ཞབས་ལ༴ རྟོག་གེའི་སྤྱོད་ཡུལ་འཁོར་བའི་རྒྱ་མཚོ་བརྒལ། །རྣལ་འབྱོར་སྤྱོད་ཡུལ་ཞི་བའི་གླིང་དུ་གཤེགས། །ཁྱབ་རྟག་ཕྲིན་ལས་འདོད་རྒུ་ལྷུག་པར་བསྩལ། །བློ་གྲོས་རྣམ་རྒྱལ་ཞབས་ལ༴ རྣམ་གསུམ་ངོ་བོ་ཉིད་མེད་མཁས་པའི་ཕུལ། །འཕོ་བྲལ་བརྟུལ་ཞུགས་མཐར་ཕྱིན་བཙུན་པའི་རབ། །བྱང་ཆུབ་ཐུགས་གཉིས་འབྱངས་པ་བཟང་པོའི་མཆོག །ངག་དབང་ཕྲིན་ལས་ཞབས་ལ༴ འགལ་འདུའི་སྐྱོན་མེད་དོན་དམ་བདེན་གཅིག་པུ། །ཐོས་བསམ་སྒོམ་པའི་སྟོབས་ཀྱིས་ལེགས་རྟོགས་ནས། །འཁྲུལ་ལུགས་ཤན་ཕྱེ་གཤིས་ལུགས་ལ་ཟློ་བ། །ཀུན་བཟང་དབང་པོའི་ཞབས༴ སྟོང་ཆེན་འགྱུར་མེད་ལྔ་ཡི་ཨེ་དབྱིངས་སུ། །ཐིག་ལེ་སྟོང་པ་འགྱུར་མེད་དྲུག་གི་ཝཾ། །ཟུང་འཇུག་སྒྱུ་མའི་སྐུར་སྣང་རིག་པ་འཛིན། །ཚེ་དབང་ནོར་བུའི་ཞབས༴ ཐོགས་མེད་ཞལ་གཟིགས་བྱམས་ཆོས་དགོངས་དོན་ལ། །མངའ་བརྙེས་ཕྱིར་མི་ལྡོག་པའི་གཏམ་སྟོན་པ། །ཤེས་བྱ་ཀུན་གཟིགས་མ་ཧཱ་པཎྜི་ཏ། །ཆོས་ཀྱི་འབྱུང་གནས་ཞབས་ལ༴
གཤིས་ལུགས་མཐར་ཐུག་ཕུང་པོ་གསུམ་པའི་དོན། །གངས་རིའི་ལྗོངས་ན་སེང་གེའི་སྒྲས་སྒྲོགས་པའི། །སྤྱན་རས་གཟིགས་དབང་དཔལ་ལྡན་ཀརྨ་པ། །བདུད་འདུལ་རྡོ་རྗེའི་ཞབས་ལ༴ བྱིན་རླབས་སྟོབས་ཀྱིས་སྐལ་ལྡན་གདུལ་བྱ་རྣམས། །རིགས་ཁམས་ཐེག་པ་ཆེན་པོར་སད་པར་མཛད། །མི་ཕམ་མགོན་པོ་བཤེས་གཉེན་ཚུལ་བཟུང་བ། །པདྨ་ཉིན་བྱེད་དབང་པོར་གསོལ་བ་འདེབས། །ཡང་ན་ཆོས་ཀྱི་འབྱུང་གནས་རྗེས་སུ། ཆོས་ལྔ་རང་བཞིན་གསུམ་དང་བདག་མེད་གཉིས། །ཐུགས་སུ་ཆུད་ནས་ལེགས་པར་རྣམ་འབྱེད་ཀྱི། །ངེས་དོན་འཁོར་ལོ་ཕྱོགས་མེད་བསྐོར་བ་པོ། །ཚེ་དབང་ཀུན་ཁྱབ་ཞབས་ལ༴ གསོལ་བ་འདེབས། །དྲི་མེད་ལུང་དང་རིག་པའི་མེ་ལྕེ་ཡིས། །སུམ་ལྡན་མར་བཅད་ལྟ་ངན་ཚང་ཚིང་བསྲེགས། །མཐར་ཐུག་དབུ་མའི་ལྟ་བ་སྣང་མཛད་པ། །ཚེ་དབང་མཆོག་གྲུབ་ཞབས་ལ༴ བཅུ་ཕྲག་རིག་པའི་གནས་རྣམས་ཐུགས་སུ་ཆུད། །མཁའ་ཁྱབ་འོད་གསལ་གཉུག་མའི་གྲུབ་མཐའ་སློང་། །མི་ཕམ་མགོན་པོས་བྱིན་རླབས་དབུགས་དབྱུང་ཐོབ། །འགྱུར་མེད་མཐུ་སྟོབས་རྣམ་རྒྱལ་གསོལ་བ་འདེབས། གཞན་སྟོང་དབུ་མའི་བརྒྱུད་འདེབས་ཀྱི་ཁ་སྐོང་འདི་བཞིན་རྣམ་འདྲེན་ངག་དབང་ཆོས་འཕེལ་ཐུགས་བཞེད་ལྟར་བློ་གྲོས་མཐའ་ཡས་ཀྱིས་བྲིས་པ་དགེ།། ༈ །།སྟོད་འདུལ་ཁ་ཆེ་བརྒྱུད་པའི་སྡོམ་རྒྱུན་གསོ་
འདེབས་མུ་ཏིག་ཕྲེང་བ་ཞེས་བྱ་བ་བཞུགས་སོ། །ན་མོ་ཤཱཀྱ་མུ་ན་ཡེ། །མཚན་ཙམ་ཐོས་པས་བསྐལ་ཆེན་བརྒྱད་ཁྲི་ཡི། །འཁོར་བའི་མཐའ་བསྙིལ་བྱང་ཆུབ་ལམ་བཟང་ལས། །ཕྱིར་མི་ལྡོག་མཛད་སྟོན་པ་ཐུགས་རྗེ་ཅན། །མཉམ་མེད་ཤཱཀྱའི་རྒྱལ་པོར་གསོལ་བ་འདེབས། །ཤེས་རབ་ཅན་མཆོག་འཕགས་པ་ཤཱ་རིའི་བུ། །བསླབ་ལ་གུས་མཆོག་རྒྱལ་སྲས་སྒྲ་གཅན་འཛིན། །གནས་བརྟན་གྲུབ་བརྒྱའི་སྤྱི་མེས་རཱ་ཧུ་ལ། །འཕགས་མཆོག་ཀླུ་སྒྲུབ་ཞབས་ལ་གསོལ༴ ཉོན་མོངས་དགྲ་བཅོམ་གུ་་མ་ཏི་དང་། །རིག་གྲོལ་བརྒྱད་ལྡན་རནྟ་མི་ཏྲའི་ཞབས། །རིག་པའི་དབང་ཕྱུག་དྷརྨ་བྷ་དྲ་དང་། །གུ་་ས་མུ་དྲ་ལ༴ དྷརྨ་མཱ་ལཱ་བློ་གྲོས་འབྱུང་གནས་སྤས། །རབ་གསལ་རྣམ་འཕྲུལ་པ་ཆེན་ཤཱཀྱ་ཤྲཱི། །རྒྱལ་བསྟན་གསལ་མཛད་འཕགས་པ་བྱང་ཆུབ་དཔལ། །འདུལ་འཛིན་དབང་ཕྱུག་གྲགས་ལ༴ ལྷ་མིའི་གཙུག་རྒྱན་གཞོན་ནུ་བྱང་ཆུབ་དང་། །ཚུལ་ཁྲིམས་ཕུང་པོ་རབ་རྫོགས་ཡོན་རྒྱལ་མཚན། །ཕར་ཕྱིན་དྲུག་ལྡན་ཡོན་ཏན་བློ་གྲོས་དང་། །འཇིགས་བྲལ་སེང་གེ་དཔལ་ལ༴ འཕགས་པའི་སྣང་བརྙན་རབ་འབྱོར་སེང་གེ་དང་། །རིགས་ལྡན་རྣམ་འཕྲུལ་ཆོས་གྲུབ་སེང་གེའི་མཚན། །འཇིག་རྟེན་དབང་ཕྱུག་མི་སྐྱོད་དགའ་བའི་ཞབས། །དཀོན་མཆོག་ཡན་ལག་དཔལ་ལ༴ འབྲེལ་ཚད་དོན་ལྡན་དབང་ཕྱུག་རྡོ་རྗེའི་ཞབས། །
གར་དབང་རྡོ་རྗེ་འཆང་དངོས་ཆོས་ཀྱི་དབང་། །མཁས་ཤིང་གྲུབ་པའི་དབང་ཕྱུག་བདུད་རྩིའི་མཚན། །མཁན་ཆེན་རྣམ་རོལ་ཞབས་ལ༴ ཡོངས་རྫོགས་བསྟན་འཛིན་ཆོས་ཀྱི་དོན་གྲུབ་ཞབས། །ཐམས་ཅད་མཁྱེན་གཟིགས་བསྟན་པའི་ཉིན་མོར་བྱེད། །པད་དཀར་འཆང་དངོས་བདུད་འདུལ་རྡོ་རྗེ་དང་། །པདྨ་ཉིན་བྱེད་དབང་པོར༴ ཀརྨ་ངེས་དོན་བསྟན་པ་རབ་རྒྱས་ཞབས། །ངག་གི་དབང་ཕྱུག་ཡོན་ཏན་རྒྱ་མཚོའི་མཚན། །ཐུབ་བསྟན་སྒོར་གཞུག་མཁན་སློབ་རྣམ་གཉིས་སོགས། །སོ་ཐར་བརྒྱུད་པའི་བླ་མར༴ ངེས་འབྱུང་བསམ་པས་རྒྱལ་བའི་བསྟན་ལ་ཞུགས། །སྡོམ་པ་སྐྱེ་ཤིང་གནས་པའི་མཐུན་རྐྱེན་ཚོགས། །སྤང་དང་འཇུག་པའི་བསླབ་བྱ་རྒྱུད་ལ་འབྱོར། །ཚུལ་ཁྲིམས་ཕ་རོལ་ཕྱིན་པར་བྱིན་གྱིས་རློབས། །ལྟུང་བའི་སྒོ་བཞི་དྲན་ཤེས་སོ་པས་བཅད། །ཚུལ་ཁྲིམས་རྒྱལ་མཚན་ཉེས་པའི་དྲིས་མ་གོས། །བསླབ་པ་གསུམ་གྱི་ཕུང་པོ་རབ་རྫོགས་ནས། །ཐུབ་པའི་བསྟན་ལ་བྱ་བ་བྱེད་ནུས་ཤོག །ནམ་མཁའི་མཐའ་མཉམ་འགྲོ་བ་མ་ལུས་པ། །ཁྱིམ་སྤངས་རབ་ཏུ་བྱུང་བའི་བརྟུལ་ཞུགས་ཀྱིས། ཚུལ་ཁྲིམས་མཐར་ཕྱིན་གཙང་རྟག་བདེ་བའི་སྐུ། །ཐམས་ཅད་མཁྱེན་པའི་གོ་འཕང་ལ་འཁོད་ཤོག །ཅེས་པ་འདིའང་བསྟན་པ་དང་དམ་པའི་ཆོས་ལ་རྩེ་གཅིག་ཏུ་འདུན་ཅིང་ལྔ་རིག་སྨྲ་བའི་བློ་གྲོས་གསལ་བ་ཀརྨ་སངས་རྒྱས་ཆོས་འཕེལ་ནས་བསྐུལ་ངོར་ཀརྨ་ངག་དབང་ཡོན་ཏན་རྒྱ་མཚོས་དཔལ་
སྤུངས་ཀྱི་གཙུག་ལག་ཁང་དུ་སྤེལ་བ་དགེ་ལེགས་འཕེལ།། ༈ །།ཨེ་མ་ཧོཿནུབ་ཕྱོགས་བདེ་བ་ཅན་གྱི་ཞིང་ཁམས་སུ། །འོད་དཔག་མེད་མགོན་ཀུན་ཁྱབ་ཆོས་ཀྱི་སྐུ། །སངས་རྒྱས་སྣང་མཐའ་ཡས་ལ་གསོལ་བ་འདེབས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །ལྷོ་ཕྱོགས་པོ་ཏ་ལ་ཡི་གནས་མཆོག་ཏུ། །འོད་དཔག་མེད་མགོན་ལོངས་སྤྱོད་རྫོགས་པའི་སྐུ། །འཕགས་མཆོག་ཐུགས་རྗེ་ཆེན་པོ་ལ་གསོལ་བ་འདེབས། །བྱམས་དང་སྙིང་རྗེ་འབྱོང་བར་བྱིན་གྱིས་རློབས། །ལྷོ་ནུབ་པདྨ་འོད་ཀྱི་གཞལ་ཡས་སུ། །འོད་དཔག་མེད་མགོན་ཐུགས་རྗེ་སྤྲུལ་པའི་སྐུ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །དོན་གཉིས་ལྷུན་གྱིས་འགྲུབ་པར་བྱིན་གྱིས་རློབས། །སྣང་སྲིད་དག་པ་རབ་འབྱམས་ཕོ་བྲང་དུ། །འོད་དཔག་མེད་མགོན་འགྲོ་འདུལ་སྒྱུ་མའི་གར། །མཁས་གྲུབ་ཆགས་མེད་ཡབ་སྲས་ལ་གསོལ་བ་འདེབས། །རྗེ་བཙུན་ཁྱེད་དང་མཉམ་པར་བྱིན་གྱིས་རློབས། །ཚེ་འདིར་སྒྲིབ་གཉིས་བྱང་ཞིང་ཚོགས་གཉིས་རྫོགས། །འཕོས་མ་ཐག་ཏུ་བདེ་ཆེན་ཞིང་སྐྱས་ནས། །སངས་རྒྱས་ཞལ་མཐོང་ས་ལམ་ཡོངས་ས་རྫོགས། །བྱང་ཆུབ་ཆེན་པོའི་གོ་འཕང་མྱུར་ཐོབ་ཤོག །ཅེས་གནམ་ཆོས་འོད་ཆོག་བརྒྱུད་འདེབས་སུ་གླིང་རྗེ་བཙུན་མ་འཇམ་དབྱངས་ཚུལ་ཁྲིམས་དབང་མོའི་ཐུགས་བཞེད་ལྟར་བློ་གྲོས་མཐའ་ཡས་ཀྱིས་སྤེལ་བ་དགེ། །
ངེས་དོན་ཕྱག་རྒྱ་ཆེན་པོའི་སྟོན་པ་རུ། །རྒྱལ་བས་ལུང་བསྟན་དྭགས་པོ་ལྷ་རྗེའི་མཚན། །གྲོལ་བ་བཞི་ལྡན་ཆོས་རྗེ་ཀརྨ་པ། །རང་བྱུང་མཚོ་སྐྱེས་རྒྱལ་བ་གཉིས་པའི་ཞབས། །སྙིགས་མའི་དུས་སུ་སངས་རྒྱས་སྐུར་སྣང་བ། །བཀའ་བརྒྱུད་ཀུན་འདུས་པདྨ་ཉིན་མོར་བྱེད། །རྡོ་རྗེའི་ཐུགས་དང་ཡེ་ཤེས་སྐུ་བརྙེས་པ། །དྭགས་པོ་བཀའ་བརྒྱུད་གྲུབ་ཐོབ་རྒྱ་མཚོ་ལ། །སྙིང་ནས་གསོལ་བ་འདེབས་སོ་ཐུགས་རྗེས་གཟིགས། །ཡང་ཡང་གསོལ་བ་འདེབས་སོ་བྱིན་གྱིས་རློབས། །རྗེ་བཙུན་ཁྱེད་ཀྱི་སྐུ་དང་མཉམ་པ་དང་། །ཁྱེད་གསུང་བདག་གི་བརྗོད་པར་གྲུབ་པ་དང་། །ཁྱེད་ཀྱི་རྟོགས་པ་བདག་ལ་འཕོ་བར་མཛོད། །དོན་གཉིས་ལྷུན་གྱིས་གྲུབ་པའི་དངོས་གྲུབ་སྩོལ། །ཐོག་མེད་དུས་ཀྱི་འཁྲུལ་པ་ཚབས་ཆེ་བས། །རྟག་ཏུ་འགྲོགས་ཀྱང་རང་ཞལ་མ་མཐོང་བར། །ཐེ་ཚོམ་སྙོམ་སྐྱུར་ཁོ་ནས་དུས་འདའ་བའི། །མ་རིག་མུན་པ་བླ་མས་བསལ་དུ་གསོལ། །རང་སེམས་འཁྲུལ་པ་དགྲ་རུ་ཤར་བ་ཡི། །རིགས་དྲུག་འཁོར་བའི་སྡུག་བསྔལ་སྣ་ཚོགས་ལ། །རྟག་ཏུ་སྤྱོད་ཀྱང་ད་དུང་མི་འཚེར་བའི། །སྙིང་སྐྲན་ནད་འདི་བླ་མས་བརྟོལ་དུ་གསོལ། །ལས་མཐའ་ཕྱིར་བཟློག་བདུད་ཀྱི་ལུང་བསྟན་དང་། །ཆོས་བརྒྱད་བསོད་ནམས་ཆོས་མིན་སྟོབས་འབྱོར་དང་། །ཟང་ཟིང་གཡེང་བས་མི་ཚེ་སྟོང་ཟད་པ། །བརྒལ་དཀའི་འཕྲང་ལས་
བླ་མས་བསྒྲལ་དུ་གསོལ། །མོས་གུས་ཆུང་ཞིང་དག་སྣང་སྙིང་རྗེ་མེད། །ལས་འབྲས་ཚུལ་ལ་ཡིད་ཆེས་མི་སྐྱེ་བར། །ཆོས་མིན་ལས་ཀྱིས་རྟག་ཏུ་མགོ་འཁོར་བའི། །བདུད་ཀྱི་ཕོ་ཉ་བླ་མས་བཟློག་ཏུ་གསོལ། །རྒྱལ་བའི་བཀའ་དང་བླ་མའི་གདམས་ངག་ལ། །ངེས་ཤེས་རྙེད་པས་རྟོགས་པ་ནང་ནས་བརྡོལ། །གནས་ལུགས་རང་ཞལ་རང་གིས་མཚོན་ནས་སུ། །བློ་བདེའི་གདིང་ཆེན་བླ་མས་སྩལ་དུ་གསོལ། །དངོས་སྣང་ཐམས་ཅད་རྨི་ལམ་སྒྱུ་མ་བཞིན། །བདེན་གྲུབ་རྡུལ་ཙམ་མེད་ཀྱང་འཁོར་བ་རུ། །དར་དྲགས་ཡུན་རིང་སྡོད་པའི་ཆགས་སྡང་མཁན། །ལས་ངན་གཡང་ལས་བླ་མས་བསྲུང་དུ་གསོལ། །དེ་བདག་དངོས་པོ་གདོད་ནས་མ་གྲུབ་པར། །རི་བོང་རྭ་དང་མོ་གཤམ་བུ་ལྟ་བུར། མ་རྟོགས་སྟོང་པའི་མཁའ་ལ་མདུད་པ་བོར། །ཨ་འཐས་རྒྱ་འདི་བླ་མས་བཤིག་ཏུ་གསོལ། །འཁོར་འདས་གཉིས་པོ་རྟོགས་དང་མ་རྟོགས་ལས། །མེད་ཀྱང་སྤང་བླང་དགག་སྒྲུབ་མཚན་མས་བཅིངས། །གནས་ལུགས་དོན་ལ་བློ་གྲོས་རྒྱ་ཆུང་བ། །འདུ་ཤེས་འཆིང་བ་བླ་མས་བཅད་དུ་གསོལ། །ཐ་མལ་དུས་ཀྱི་བཟོ་མེད་རིག་པ་འདི། །ལྷུག་པར་སྐྱོང་ལས་བྱ་རྒྱུ་གཞན་མེད་པར། །རྩོལ་མེད་ཆོས་སྐུའི་ཉི་མ་འཁོར་ཡུག་ཤར། །བློ་འདས་རང་ཞལ་བླ་མས་སྤྲད་དུ་གསོལ། །གང་ཤར་རྟོག་པ་མ་བཅོས་རང་ཐོག་ཏུ། །ཕྱམ་
གྱིས་བཞག་པས་གཉུག་མའི་གཏེར་ཁ་རྡོལ། །དྲན་འཛིན་བློས་བྱས་རྩོལ་བའི་སླད་མེད་པར། །རྟོགས་པའི་སྒྲོན་མེ་བླ་མས་སྦར་དུ་གསོལ། །རྣམ་རྟོག་རྫུན་རིས་ཆུ་ཡི་གཉེར་མ་ཀུན། །སྤང་བླང་མ་དགོས་རིན་ཆེན་གསེར་གླིང་བཞིན། །སྣང་སེམས་སྐུ་དང་ཡེ་ཤེས་ལ་བཟླ་བ། རྟོགས་གྲོལ་དུས་མཉམ་བླ་མས་མཛད་དུ་གསོལ། །བསམ་རྒྱུ་དམ་པའི་ཆོས་ལས་མེད་པ་དང་། །སྐྱོང་རྒྱུ་སྟོང་ཉིད་སྙིང་རྗེའི་སྙིང་པོ་ཅན། །རྒྱུད་ལ་འབྱོར་བས་ཚེ་གཅིག་ལུས་གཅིག་ཏུ། བཀའ་བརྒྱུད་བླ་མའི་གོ་འཕང་འགྲུབ་པར་ཤོག །ཅེས་པའང་། ལུགས་གཉིས་མཁྱེན་པའི་སྤྱན་ཡངས་མི་རྗེ་ཀརྨ་ལྷ་དར་ནས་བསྐུལ་ངོར་ཀརྨ་ངག་དབང་ཡོན་ཏན་རྒྱ་མཚོས་བྱམས་མགོན་གཉིས་པའི་གང་ནས་དཔལ་སྤུངས་ཀྱི་གཙུག་ལག་ཁང་དུ་ས་ཟླའི་གྲལ་ཚེས་བཅོ་ལྔར་བྲིས་པ་དགེ་ལེགས་འཕེལ།། ༈ །།ཆོས་སྐུའི་ཞིང་དུ་གཟི་བརྗིད་འོད་དཔག་མེད། །ལོངས་སྤྱོད་ཡོངས་རྫོགས་རྣམ་སྣང་གངས་ཆེན་མཚོ། །སྤྱན་རས་གཟིགས་དབང་འགྲོ་འདུལ་སྤྲུལ་པའི་སྐུ། །བདུད་འདུལ་རྡོ་རྗེའི་ཞབས་ལ་གསོལ་བ་འདེབས། །སྲིད་ལས་འདས་ཀྱང་སྲིད་པའི་སྒྱུ་འཕྲུལ་གྱིས། །འཁོར་བ་དོང་སྤྲུགས་སྙིང་རྗེའི་རོལ་པ་ཅན། །གྲོལ་བ་བཞི་ལྡན་མཚུངས་མེད་ཀརྨ་པ། ཐེག་མཆོག་རྡོ་རྗེའི་ཞབས་ལ༴ །བཀའ་བརྒྱུད་ནོར་བུའི་ཕྲེང་བ་མ་ལུས་པའི། །མཁྱེན་བརྩེ་ནུས་པ་གཅིག་ཏུ་བསྡུས་པའི་གཟུགས་
སྒྲུབ་བརྒྱུད་བསྟན་པ་ཉིན་མོར་མཛད་པའི་མགོན། །གཙུག་ལག་ཆོས་ཀྱི་སྣང་བར༴ བདེ་བ་ཅན་ཏུ་བྱང་སེམས་ཆོས་ཀྱི་འབྱུང་། །དགའ་ལྡན་གནས་སུ་རྒྱལ་ཚབ་ས་བཅུའི་མགོན། །དགྱེས་མཛད་མར་པ་ལོ་ཙཱའི་སྒྱུ་འཕྲུལ་མཆོག །པདྨ་ཉིན་བྱེད་དབང་པོར༴ སྒྲུབ་བརྒྱུད་བསྟན་འགྲོའི་དཔལ་མགོན་བསམ་བཞིན་ཏུ། །སྲིད་པའི་ཚུལ་བཟུང་པདྨའི་རྣམ་པར་འཕྲུལ། །པདྨས་ལུང་བསྟན་ཏཱ་ཡི་སི་ཏུ་མཆོག །ཀུན་བཟང་ཆོས་ཀྱི་རྒྱལ་པོར༴ འཇིག་རྟེན་དབང་ཕྱུག་ཐུགས་རྗེའི་རང་གཟུགས་ལས། །ངོ་མཚར་རྣམ་ཐར་བསམ་གྱིས་མི་ཁྱབ་པས། །འབྲེལ་ཚད་ཐར་པའི་ལམ་དུ་སྦྱོར་མཛད་པ། །ཀརྨ་ཆགས་མེད་ཞབས་ལ༴ དྲི་མེད་བཤེས་གཉེན་འཇམ་མགོན་ཁྲི་ལྡེའི་ཞབས། །ཡེ་ཤེས་གཅིག་བསྡུས་ཁ་བ་ཅན་ལྗོངས་ན། །འགྲན་ཟླ་ཀུན་བྲལ་མཁས་ཤིང་གྲུབ་པའི་གཙོ། །པདྨ་མདོ་སྔགས་གླིང་པར༴ ངོ་མཚར་གནས་གཏེར་མཛོད་སྒོ་བརྒྱ་ཕྲག་འབྱེད། །གངས་ཅན་བསྟན་འགྲོ་སྐྱོབ་པའི་དཔུང་གཉེན་མཆོག །གཏེར་འབྱིན་གྲུབ་པ་ཡོངས་ཀྱི་འཁོར་ལོས་སྒྱུར། །ཨོ་རྒྱན་མཆོག་གྱུར་གླིང་པར༴ དྲི་མེད་ཟླ་ཤར་ཡེ་ཤེས་བརྩེགས་པ་སོགས། །སྐྱེས་རབས་དུ་མར་སྙིང་པོའི་བསྟན་པ་ལ། །རླབས་ཆེན་ཕྲིན་ལས་སྒྲུབ་པ་རྒྱལ་བའི་སྲས། །མཁན་ཆེན་ཟླ་བ་བཟང་པོར༴ ལང་གྲོ་
ལོ་ཙཱ་རཏྣ་གླིང་སོགས་ཀྱི། །ཡེ་ཤེས་སྒྱུ་འཕྲུལ་རྡོ་རྗེའི་ལུང་གིས་བསྔགས། །སྐྱེ་བར་སྒྲུབ་བརྒྱུད་བསྟན་པའི་སྲོག་ཤིང་འཛིན། །བསྟན་འཛིན་ཕྲིན་ལས་ཞབས་ལ༴ དྭགས་པོ་ལྷ་རྗེ་གཡུ་ཐོག་ཡོན་ཏན་མགོན། །ཐང་སྟོང་རྒྱལ་སོགས་དམ་པས་བྱིན་བརླབས་ཤིང་། །སྙིང་པོའི་བསྟན་པ་གསལ་མཛད་ཆོས་ཀྱི་རྗེ། །བསམ་གཏན་མཆོག་གི་སྤྲུལ་སྐུར༴ རྒྱལ་བའི་སྤྱན་སྔར་ཐོས་པ་འཛིན་པའི་མཆོག །གུ་རུའི་རྒྱལ་ཚབ་ལོ་ཆེན་རྣམ་སྣང་མཛད། །བསྐལ་བཟང་སངས་རྒྱས་མོས་པར་ལུང་བསྟན་པ། །བློ་གྲོས་མཐའ་ཡས་ཞབས་ལ༴ ལྷག་པའི་བསླབ་པ་གསུམ་གྱིས་རྒྱུད་གཏམས་ཤིང་། །སྨིན་གྲོལ་གདམས་ངག་ཟབ་མོའི་བང་མཛོད་འཆང་། །རིམ་གཉིས་མངོན་པར་རྟོགས་པས་ས་བཅུ་ལ། །བགྲོད། །ཡུལ་འཁོར་སྐྱོང་གི་སྲས་སྟོང་གི་ཐ་ཆུང་དེའོ། པའི་རྣམ་འདྲེན་མཆོག་དེར་གསོལ་བ་འདེབས། །དམ་པ་རྣམས་ལ་གུས་པས་ཕྱག་འཚལ་ཞིང་། །མཆོད་འབུལ་སྡིག་བཤགས་དགེ་ལ་རྗེས་ཡི་རང་། །ཆོས་གསུང་བསྐུལ་ཞིང་བསྐལ་བརྒྱར་བཞུགས་གསོལ་འདེབས། །དགེ་བས་འགྲོ་ཀུན་རྡོ་རྗེ་འཆང་ཐོབ་ཤོག །ཅེས་པ་འདིའང་ཐུན་མོང་རྗེས་འཛིན་གྱི་རིག་པ་ལ་ཕུལ་དུ་བྱུང་བའི་རྣམ་དཔྱོད་ལྡན་པ་ཀརྨ་བསམ་གཏན་ནས་བསྐུལ་ངོར། ཀརྨ་ངག་དབང་ཡོན་ཏན་རྒྱ་མཚོས་བྲིས་པ་དགེ་ལེགས་འཕེལ།། ༈ །།བསྟན་པ་སྤྱིའི་གསོལ་འདེབས་བཀྲ་ཤིས་
འབྱུང་གནས་ཞེས་བྱ་བ། ཨེ་མ་ཧོ། ལྷ་མིའི་སྟོན་པ་མཉམ་མེད་ཤཱཀྱ་ཐུབ། །ཉན་ཐོས་མཆོག་བརྒྱད་གནས་བརྟན་བཅུ་དྲུག་དང་། །བསྟན་པའི་གཏད་རབས་བདུན་ལ་སོགས་པ་ཡི། །སོ་ཐར་བརྒྱུད་པ་རྣམས་ལ་གསོལ་བ་འདེབས། །བསྐལ་བཟང་སངས་རྒྱས་སྟོང་དང་སེམས་དཔའ་གཉིས། །སྨན་བླ་མཆེད་བདུན་ཉེ་བའི་སྲས་ཆེན་བརྒྱད། །ཟབ་མོ་ལྟ་བརྒྱུད་རྒྱ་ཆེན་སྤྱོད་བརྒྱུད་ཀྱི། །རྒྱལ་བ་སྲས་དང་བཅས་ལ་གསོལ་བ་འདེབས། །རྒྱན་དྲུག་ཆེ་བཞི་རྨད་བྱུང་སློབ་དཔོན་གཉིས། །གྲུབ་ཆེན་བརྒྱད་ཅུ་མཁས་པ་སྒོ་དྲུག་དང་། །ཞི་འཚོ་རྡོ་རྗེ་གདན་པ་ཤཱཀྱ་ཤྲཱི། །རྒྱ་གར་མཁས་གྲུབ་རྣམས་ལ༴ ཀུན་བཟང་རིགས་ལྔ་སྟོན་པ་བཅུ་གཉིས་དང་། །རྡོར་སེམས་དགའ་རབ་ཤྲཱི་སེང་བི་མ་ལ། །རྒྱལ་ཀུན་འདུས་ཞལ་པད་འབྱུང་ཡབ་ཡུམ་སོགས། །རྫོགས་ཆེན་བརྒྱུད་པ་རྣམས་ལ༴ རྡོ་རྗེ་འཆང་ཆེན་ཏེ་ལོ་ནཱ་རོ་དང་། །མར་པ་མི་ལ་དྭགས་པོ་ཁུ་དབོན་ཞབས། །ཀར་འབྲུག་འབྲི་སྟག་ཚལ་པ་འབའ་རོམ་སོགས། །ཕྱག་ཆེན་བརྒྱུད་པ་རྣམས་ལ༴ ཡེ་ཤེས་མཁའ་འགྲོ་ཁྱུང་པོ་རྣལ་འབྱོར་པ། །རིན་ཆེན་བརྩོན་འགྲུས་དབོན་སྟོན་གཉན་སྟོན་རྗེ། །སངས་རྒྱས་སྟོན་པ་མཁས་གྲུབ་རྣམ་གསུམ་སོགས། །ཆོས་དྲུག་བརྒྱུད་པ་རྣམས་ལ༴ ཆོས་རྒྱལ་བདུན་དང་རིགས་ལྡན་སུམ་ཅུ་ལྔ། །དུས་ཞབས་ཆེ་ཆུང་ཀུན་མཁྱེན་ཡབ་སྲས་བཞི། །
རྗེ་བཙུན་སྒྲོལ་བའི་མགོན་པོ་ལ་སོགས་པ། །སྦྱོར་དྲུག་བརྒྱུད་པ་རྣམས་ལ༴ འབྲོག་མི་ལོ་ཙཱ་འཇམ་དབྱངས་བདུན་བརྒྱུད་དང་། །ཀུན་དགའ་རྣམ་གཉིས་གཡག་རོང་གོ་ཤཱཀ་སོགས། །ས་ངོར་རྫོང་གསུམ་དཔལ་ལྡན་ཚར་པ་ཡི། །ལས་འབྲས་བརྒྱུད་པ་རྣམས་ལ༴ དཔལ་ལྡན་ཨ་ཏི་ཤ་དང་ཁུ་རྡོག་འབྲོམ། །རྒྱལ་སྲས་སྐུ་མཆེད་གསུམ་དང་བྱ་ཡུལ་བ། །གླང་རི་ཐང་པ་འབྱུང་གནས་རྡོ་རྗེ་སོགས། །བཀའ་གདམས་བརྒྱུད་པ་རྣམས༴ དམ་པ་རྒྱ་གར་ལབ་ཀྱི་སྒྲོན་མ་དང་། །བཀའ་བབ་བུ་ཆེན་བཅུ་དྲུག་ལ་སོགས་པ། །དམ་ཆོས་སྡུག་བསྔལ་ཐམས་ཅད་ཞི་བྱེད་དང་། །གཅོད་ཡུལ་བརྒྱུད་པ་རྣམས་ལ༴ དགེ་སློང་དཔལ་མོ་པ་ཆེན་རྣམ་པ་གཉིས། །པེ་ཉ་བ་དང་བྱང་སེམས་ཟླ་རྒྱལ་ཞབས། །རྒྱལ་སྲས་ཐོགས་མེད་སྙག་ཕུ་བ་ལ་སོགས། །སྨྱུང་གནས་བརྒྱུད་པ་རྣམས་ལ༴ ཀླུ་སྒྲུབ་ཡབ་སྲས་ཟླ་གྲགས་ཞི་བ་ལྷ། །པ་ཚབ་ལོ་ཙཱ་འཇམ་དབྱངས་ཙོང་ཁ་པ། །རྒྱལ་ཚབ་གཙང་པ་བདུན་བརྒྱུད་ལ་སོགས་པ། །དབུ་མ་བརྒྱུད་པ་རྣམས་ལ༴ ཐོགས་མེད་སྐུ་མཆེད་རིན་འབྱུང་མཻ་ཏྲི་པ། །གཟུ་བཙན་རྣམ་གཉིས་ཀུན་མཁྱེན་རང་བྱུང་བ། །ཆོས་གྲགས་རྒྱ་མཚོ་ཆོས་ཀྱི་འབྱུང་གནས་སོགས། །ངེས་དོན་བརྒྱུད་པ༴ རྗེ་འབངས་ཉེར་ལྔ་ཉང་གུར་རྒོད་ལྡེམ་ཅན། །གླིང་པ་བཅུ་གཅིག་དྲི་མེད་སྡེ་ལྔ་དང་། །ནུས་ལྡན་ཉི་ཤུ་རྩ་གཅིག་ལ་སོགས་པ། །ཟབ་
གཏེར་བརྒྱུད་པ་རྣམས་ལ༴ སོ་ཟུར་གནུབས་གསུམ་དམ་གཙང་བྱམས་གསུམ་དང་། །རོང་ཟོམ་ལོ་ཙཱ་སྣང་སོག་གངས་གསུམ་དང་། །ཀརྨ་ཆགས་མེད་ཀུན་བཟང་ཤེས་རབ་སོགས། །མདོ་སྒྱུ་སེམས་བརྒྱུད་རྣམས་ལ༴ བཻ་རོ་ཀ་ཅོག་ཞང་གསུམ་རིན་ཆེན་བཟང་། །གསང་ཕུའི་སེང་ཆེན་བརྒྱད་དང་རིན་ཆེན་གྲུབ། །བོ་དོང་འཇིགས་བྲལ་ཆེ་སོགས་བོད་ཡུལ་གྱི། །མཁས་གྲུབ་སྐྱེས་མཆོག་རྣམས་ལ༴ སྲོང་བཙན་སྒམ་པོ་ཁྲི་སྲོང་ལྡེའུ་བཙན་དང་། །མངའ་བདག་ཁྲི་རལ་ཡེ་ཤེས་འོད་ལ་སོགས། །སར་གནས་བྱང་སེམས་ཁྱིམ་པའི་ཚུལ་འཛིན་པ། །བསྟན་སྐྱོང་ཆོས་རྒྱལ་རྣམས་ལ༴ མཆོག་གསུམ་རྩ་གསུམ་དམ་ཅན་སྲུང་མའི་ཚོགས། །ཕྱོགས་བཅུ་དུས་གསུམ་གཤེགས་ཤིང་བཞུགས་རྣམས་ལ། །མི་ཕྱེད་རྩེ་གཅིག་གུས་པས་གསོལ་བ་འདེབས། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །དལ་འབྱོར་སྙིང་པོ་ལོན་པར་བྱིན་གྱིས་རློབས། །ངན་སོང་སྐྱེ་སྒོ་ཆོད་པར་བྱིན་གྱིས་རློབས། །ཚེ་བསོད་དཔལ་འབྱོར་རྒྱས་པར༴ བསམ་དོན་ཆོས་བཞིན་འགྲུབ་པར༴ གཟུང་འཛིན་འཁྲུལ་པ་ཞིག་པར༴ ལས་ངན་སྡིག་སྒྲིབ་དག་པར༴ རང་བྱུང་ཡེ་ཤེས་མཐོང་བར༴ གཉུག་མའི་གཏན་སྲིད་ཟིན་པར༴ འབྲེལ་ཚད་དོན་དང་ལྡན་པར༴ མྱུར་དུ་སངས་རྒྱས་ཐོབ་པར་བྱིན་གྱིས་རློབས།
ཞེས་པ་འདིའང་དད་ལྡན་རྡོ་སྟོད་དཔོན་མོ་བཀྲ་ཤིས་ལྷ་མོའི་ཐུགས་བཞེད་ལྟར། ཡོན་ཏན་རྒྱ་མཚོས་ཆོ་འཕྲུལ་ཟླ་བའི་ཚེས་ཆེན་བཅོ་ལྔར་གཡུ་ཐོག་རྣམ་རྒྱལ་དགོན་དུ་བྲིས་པ་དགེ་ལེགས་འཕེལ།། ༈ །།ཀུན་འདུས་ཕྱག་འཚལ་མཆོག་དགའི་འདོད་འཇོ་བཞུགས་སོ། །བླ་མ་ཡི་དམ་རྒྱལ་བ་སྲས་དང་བཅས། །མོས་པའི་བུ་ལ་མཁྱེན་བརྩེས་རབ་དགོངས་ཏེ། །མདུན་གྱི་ནམ་མཁར་དགྱེས་པ་ཆེན་པོས་བཞུགས། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །སངས་རྒྱས་ཀུན་དངོས་སྤངས་རྟོགས་མ་ལུས་རྫོགས། །དམ་ཆོས་ཀུན་འདུས་ཐར་པའི་སྒྲོན་མེ་མཆོག །དགེ་འདུན་ཀུན་གྱི་འབྱུང་གནས་བཀའ་དྲིན་ཅན། །རྩ་བའི་བླ་མའི་ཞབས་ལ་ཕྱག་འཚལ་ལོ། །འཁོར་འདས་ཀུན་གྱི་སྤྱི་གཞི་ཐོག་མའི་མགོན། །ཀུན་བཟང་འོད་མི་འགྱུར་ལ་ཕྱག་འཚལ་ལོ། །རྣམ་སྣང་མི་བསྐྱོད་རིན་འབྱུང་འོད་དཔག་མེད། །དོན་གྲུབ་རྒྱལ་བ་རིགས་ལྔར་ཕྱག་འཚལ་ལོ། །རིགས་ཀུན་ཁྱབ་བདག་རྡོ་རྗེ་འཆང་ཆེན་དང་། །དཔལ་ལྡན་རྡོ་རྗེ་སེམས་ལ་ཕྱག་འཚལ་ལོ། །མཚན་ཐོས་བསྐལ་ཆེན་བརྒྱད་ཁྲིའི་འཁོར་བ་བསྙིལ། །སྟོན་པ་ཐུགས་རྗེ་ཅན་ལ༴ མཚན་ཙམ་ཐོས་པས་ངན་འགྲོའི་སྐྱེ་སྒོ་གཅོད། །རིན་ཆེན་གཙུག་ཏོར་ཅན་ལ༴ རྡོ་རྗེ་རབ་འཇོམས་རི་དབང་རྒྱལ་པོ་སོགས། །བདེ་གཤེགས་སུམ་ཅུ་སོ་ལྔར༴ འཁོར་བ་འཇིག་དང་བྱམས་པ་སྣང་མཛད་
སོགས། །སྐལ་བཟང་སངས་རྒྱས་སྟོང་ལ༴ བློ་གྲོས་མི་ཟད་རིན་ཆེན་རྒྱལ་མཚན་སོགས། །རྨད་བྱུང་སངས་རྒྱས་བརྒྱད་ལ༴ བཅོམ་ལྡན་མི་འཁྲུགས་པ་དང་ཚེ་དཔག་མེད། །མགོན་པོ་ཀུན་ཏུ་གཟིགས་ལ་ཕྱག་འཚལ་ལོ། །རྡོ་རྗེ་སྙིང་པོ་རབ་ཏུ་འདུལ་བ་སོགས། །ཁྱད་འཕགས་སངས་རྒྱས་བཅུ་ལ༴ རིན་ཆེན་རྒྱལ་བའི་མཛོད་སོགས་ངོ་མཚར་བའི། །བདེ་བར་གཤེགས་པ་བརྒྱད་ལ༴ མཚན་ལེགས་གསེར་བཟང་སྨན་གྱི་བླ་མ་སོགས། །འགྲོ་སྐྱོབ་རྒྱལ་བ་བདུན་ལ་ཕྱག་འཚལ་ལོ། །རིན་ཆེན་འབྱུང་གནས་དགའ་བའི་དཔལ་ལ་སོགས། །ཕྱོགས་བཅུའི་སངས་རྒྱས་རྣམས་ལ༴ འཇམ་དབྱངས་སྤྱན་རས་གཟིགས་དབང་རྡོ་རྗེ་འཛིན། །རྒྱལ་སྲས་རིགས་གསུམ་མགོན་ལ༴ ས་སྙིང་ནམ་སྙིང་སྒྲིབ་སེལ་ཀུན་བཟང་སོགས། །ཉེ་བའི་སྲས་ཆེན་བརྒྱད་ལ༴ འཇིགས་པ་ཀུན་སྐྱོབ་འཕགས་མ་སྒྲོལ་མ་དང་། །ཡིད་བཞིན་འཁོར་ལོའི་ཞབས་ལ༴ སངས་རྒྱས་གཉིས་པ་འཆི་མེད་རྡོ་རྗེའི་སྐུ། །པད་འབྱུང་ཡབ་ཡུམ་གཉིས་ལ༴ ཡན་ལག་འབྱུང་དང་སྒྲ་གཅན་འཛིན་ལ་སོགས། །འཕགས་པའི་གནས་བརྟན་རྣམས་ལ༴ མདའ་བསྣུན་ལཱུ་དྲིལ་ནག་པོ་པ་ལ་སོགས། །གྲུབ་ཆེན་བརྒྱད་ཅུ་རྩ་བཞིར༴ ཀླུ་སྒྲུབ་ཡབ་སྲས་ཐོགས་མེད་སྐུ་མཆེད་སོགས། །བསྟན་པའི་གསལ་བྱེད་རྣམས་ལ༴ བཻ་རོ་ཆོས་རྒྱལ་ཀ་ཅོག་ཞང་གསུམ་སོགས། །
རྗེ་འབངས་ཉི་ཤུ་ལྔ་ལ༴ ཏེ་ལོ་ནཱ་རོ་མར་པ་མི་ལ་དང་། །དྭགས་པོ་དུས་མཁྱེན་རྣམས་ལ༴ འགྲོ་མགོན་རས་ཆེན་སྤོས་བྲག་པ་ལ་སོགས། །དོན་བརྒྱུད་གསེར་ཕྲེང་རྣམས་ལ༴ གངས་ཅན་མགོན་པོ་རྒྱལ་བ་ཀུན་གྱི་དངོས། །དཔལ་ལྡན་ཀརྨ་པ་ལ༴ དམ་པ་རྒྱ་གར་མ་གཅིག་ལབ་སྒྲོན་སོགས། །གཅོད་ཡུལ་བརྒྱུད་པ་རྣམས་ལ༴ འཇིག་རྟེན་དབང་ཕྱུག་ཀརྨ་ཆགས་མེད་དང་། །ཚེ་དབང་ནོར་བུའི་ཞབས་ལ༴ ཐམས་ཅད་མཁྱེན་པ་ཆོས་ཀྱི་འབྱུང་གནས་དང་། །མི་འགྱུར་རྡོ་རྗེའི་ཞབས་ལ༴ རོལ་པའི་རྡོ་རྗེ་རྟ་མགྲིན་མགོན་པོ་དང་། །རྡོ་རྗེ་དྲག་པོ་རྣམས་ལ༴ རྡོ་རྗེ་འཆང་དངོས་སྙིགས་དུས་འགྲོ་བའི་མགོན། །པདྨ་ཉིན་བྱེད་དབང་པོར༴ གཉགས་ཆེན་སྤྲུལ་པ་བསླབ་པ་གསུམ་གྱི་གཏེར། །བསྟན་པ་རབ་རྒྱས་ཞབས་ལ༴ པདྨ་བཛྲ་དཀྱིལ་འཁོར་ཚོམ་བུ་དགུ། །བླ་མ་དགོངས་འདུས་ལྷ་ལ༴ ཕོ་བྲང་དགུ་ཀློང་ཡེ་ཤེས་རྣམ་དགུའི་སྐུ། །སྒྲུབ་པ་བཀའ་བརྒྱད་ལྷ་ལ༴ སངས་རྒྱས་ཀུན་གྱི་ཕྲིན་ལས་སྟོབས་འདུས་པ༴ རྡོ་རྗེ་ཕུར་པའི་ལྷ་ལ༴ ཞི་བ་ཞེ་གཉིས་ཁྲག་འཐུང་ལྔ་བཅུ་བརྒྱད། །དམ་པ་རིགས་བརྒྱའི་ལྷ་ལ༴ པདྨ་འོད་འབར་མེ་ཕྲེང་སེང་གདོང་མ། །དཀོན་མཆོག་སྤྱི་འདུས་ལྷ་ལ༴ དུས་ཀྱི་འཁོར་ལོ་སྒྱུ་འཕྲུལ་ཞི་ཁྲོ་སོགས། །གཉིས་མེད་ལྷ་ཚོགས་རྣམས་ལ༴ བདེ་མཆོག་དགྱེས་རྡོར་མ་ཧཱ་མཱ་ཡ་སོགས། །མ་རྒྱུད་ལྷ་ཚོགས་རྣམས་ལ༴
གསང་འདུས་གཤེད་དམར་འཇིགས་བྱེད་ལ་སོགས་པའི། །ཕ་རྒྱུད་ལྷ་ཚོགས་རྣམས་ལ༴ རྡོར་དབྱིངས་དཔལ་མཆོག་རྩེ་མོ་ཀུན་རིག་སོགས། །རྣལ་འབྱོར་རྒྱུད་ཀྱི་ལྷ་ལ༴ རྣམ་སྣང་མངོན་བྱང་ཨ་ར་པ་ཙ་སོགས། །སྤྱོད་རྒྱུད་ལྷ་ཚོགས་རྣམས་ལ༴ རྣམ་རྒྱལ་མ་དང་གཙུག་ཏོར་དྲི་མེད་སོགས། །བྱ་རྒྱུད་ལྷ་ཚོགས་རྣམས་ལ༴ རྡོ་རྗེ་ཕག་མོ་ཁྲོས་མ་ནག་མོ་སོགས། །ཡུམ་མཆོག་མཁའ་འགྲོའི་ཚོགས་ལ༴ རྣམ་སྲས་ཛཾ་ལྷ་དཀར་སེར་དམར་ནག་དང་། །ལྷ་མོ་དཔལ་ཆེན་མོ་ལ༴ མ་མགོན་ལྕམ་དྲལ་དམ་ཅན་རྒྱ་མཚོའི་ཚོགས། །ཡེ་ཤེས་ཆོས་སྐྱོང་རྣམས་ལ༴ ཤཱཀྱ་མུ་ནི་མི་བསྐྱོད་རྡོ་རྗེ་སོགས། །བདེ་གཤེགས་སྐུ་གཟུགས་རྣམས་ལ༴ འདུལ་བ་མདོ་སྡེ་གསང་བ་སྔགས་ཀྱི་སྡེ། །གསུང་རབ་དམ་ཆོས་རྣམས་ལ༴ གནས་བརྒྱད་མཆོད་རྟེན་ཆ་བརྒྱད་ལ་སོགས་པའི། །སྐུ་གདུང་རིང་བསྲེལ་རྣམས་ལ༴ ཕྱོགས་བཅུའི་ཕྱག་བྱར་འོས་པ་ཐམས་ཅད་ལ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །དེང་ནས་བྱང་ཆུབ་བར་དུ་སྐྱབས་སུ་མཆི། །སྒོ་གསུམ་ལོངས་སྤྱོད་དུས་གསུམ་དགེ་བས་མཆོད། །མི་དགེ་སྡིག་པའི་ལས་ཀུན་མཐོལ་ལོ་བཤགས། །འཁོར་འདས་དགེ་ཚོགས་ཀུན་ལ་ཡི་རང་ངོ་། །བསྐལ་པ་རྒྱ་མཚོར་མྱ་ངན་མི་འདའ་བར། །དམ་པའི་ཆོས་ཀྱི་འཁོར་ལོར་བསྐོར་དུ་གསོལ། །བསོད་ནམས་བླ་མེད་བྱང་
ཆུབ་ཆེན་པོར་བསྔོ། །བདག་གཞན་འགྲོ་བའི་སྒྲིབ་གཉིས་མྱུར་བྱང་ནས། །ཚོགས་ཆེན་གཉིས་རྫོགས་ལམ་ལྔ་ས་བཅུ་བགྲོད། །མྱུར་དུ་བླ་མེད་བྱང་ཆུབ་ཐོབ་པར་ཤོག །ཚེ་འདིར་ཚེ་རིང་ནད་མེད་ཉམས་རྟོགས་འཕེལ། །འཕོས་མ་ཐག་ཏུ་འོད་དཔག་མེད་ཀྱི་ཞིང་། །ནུབ་ཕྱོགས་བདེ་བ་ཅན་དུ་བརྫུས་ཏེ་སྐྱེས། །སངས་རྒྱས་ཞལ་མཇལ་ལུང་བསྟན་མཆོག་ཐོབ་ནས། ཁམས་གསུམ་འཁོར་བ་དོང་ནས་སྤྲུག་བྱེད་ཤོག །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་གང་བསགས་པ། །ཐམས་ཅད་རྫོགས་པའི་བྱང་ཆུབ་ཕྱིར་བསྔོའོ། །སངས་རྒྱས་སྐུ་གསུམ་བརྙེས་པའི་བྱིན་རླབས་དང་། །ཆོས་ཉིད་མི་འགྱུར་བདེན་པའི་བྱིན་རླབས་དང་། །དགེ་འདུན་མི་ཕྱེད་འདུན་པའི་བྱིན་རླབས་ཀྱིས། །ཇི་བཏབ་བསྔོ་བ་སྨོན་ལམ་འགྲུབ་པར་ཤོག །ཅེས་པ་འདིའང་དགེ་སློང་ཀརྨ་མཆོག་དགའ་ནས་འདོད་སྐུལ་ནན་བསྐྱར་ངོར་ཡོན་ཏན་རྒྱ་མཚོས་དཔལ་སྤུངས་ཡང་ཁྲོད་དུ་བྲིས་པ་དགེ་ལེགས་འཕེལ།། །།