ཏཱའི་སི་ཏུ་པདྨའི་ལྗགས་ལྡན་དྲུག་གི་ཐོག་མར་བྱོན་པ་རྡོ་རྗེ་འཆང་པདྨ་དབང་ཆེན་ལ་གསོལ་བ་འདེབས་པ་མོས་གུས་ཀྱི་ཆུ་སྐྱེས་རྣམ་པར་རྒྱས་པ།
ཏཱའི་སི་ཏུ་པདྨའི་ལྗགས་ལྡན་དྲུག་གི་ཐོག་མར་བྱོན་པ་རྡོ་རྗེ་འཆང་པདྨ་དབང་ཆེན་ལ་གསོལ་བ་འདེབས་པ་མོས་གུས་ཀྱི་ཆུ་སྐྱེས་རྣམ་པར་རྒྱས་པ་ཞེས་བྱ་བ་བཞུགས་སོ།། །།
ཏཱའི་སི་ཏུ་པདྨའི་ལྗགས་ལྡན་དྲུག་གི་ཐོག་མར་བྱོན་པ་རྡོ་རྗེ་འཆང་པདྨ་དབང་ཆེན་ལ་གསོལ་བ་འདེབས་པ་མོས་གུས་ཀྱི་ཆུ་སྐྱེས་རྣམ་པར་རྒྱས་པ་ཞེས་བྱ་བ། །པདྨཱ་ཀ་ར་འགྲོ་འདུལ་རྡོ་རྗེའི་གར། །ཐུབ་བསྟན་ཉིན་མོར་བྱེད་པའི་དཔལ་དུ་ཤར། །དབང་ཕྱུག་བརྒྱད་ལྡན་གདོད་མའི་མགོན་པོ་མཆོག །པདྨ་ཉིན་བྱེད་དབང་པོར་གསོལ་བ་འདེབས། །དག་པ་གཉིས་ལྡན་ཀུན་ཁྱབ་ཆོས་སྐུའི་མཁར། །ངེས་པ་ལྔ་ལྡན་ལོངས་སྐུའི་གསང་བ་གསལ། །མཁྱེན་པ་གཉིས་ལྡན་སྤྲུལ་སྐུའི་འདུ་འཕྲོ་ཅན། །སངས་རྒྱས་ཀུན་འདུས་ཞབས་ལ་གསོལ་བ་འདེབས། །ས་བཅུའི་དབང་ཕྱུག་བྱམས་ཆེན་འཇམ་པའི་དབྱངས། །མཚོ་སྐྱེས་རྡོ་རྗེ་མ་ཧཱ་ཀཱ་ལ་སོགས། །སྙིགས་དུས་སྐྱབས་
སུ་སྤྲུལ་པའི་སྐུར་བཞེངས་པ། །པདྨའི་མཚན་ཅན་རྡོ་རྗེ་འཆང་ལ་འདུད། །ཤེས་དང་ཤེས་བྱའི་དབྱིངས་སུ་བྱང་ཆུབ་བཞིས། །ཆོས་དབྱིངས་རྒྱས་པར་རྣམ་ཐར་སྤྲིན་བཀོད་ནས། །གདུལ་བྱ་ཕྱོགས་གཅིག་འདུལ་བའི་ཐབས་མཁས་ཀྱང་། །དུས་གསུམ་ཐོག་མཐའ་མེད་པར་སྟོན་ལ་འདུད། །ཡུལ་གྱི་དགེ་བཅུ་པདྨོས་གང་བའི་རྫིང་། །དུས་གསུམ་མཁྱེན་སོགས་རྒྱལ་བ་འབྱུང་བའི་ཞིང་། །དོན་མཐུན་ཡིད་ལྷུང་ས་ཡི་ཐིག་ལེ་རུ། །བསམས་བཞིན་སྐྱེ་བའི་སྲིད་པ་བཟུང་ལ་འདུད། །སྤྲུལ་པའི་འཁོར་ལོར་དབང་མདོག་སྨེ་བས་སྤྲས། །དུང་གི་མགྲིན་ལྡན་སྟག་ཤམ་རེ་ཁཱ་བཀྲ། །རྡོ་རྗེའི་གསང་གསུམ་འགྱུར་བ་མེད་པའི་
བརྡས། །ལུང་ཟིན་སྐྱེས་བུར་འཁྲུལ་མེད་མཚོན་ལ་འདུད། །ཐེག་མཆོག་ཆོས་ཀྱི་སྒྲ་སྒྲོགས་སྐྱེ་ལྔ་བ། །ཕྲིན་ལས་ལྷུན་གྲུབ་དར་གྱི་འཕུར་ལྡིང་ཅན། །མཚན་གྱི་ཡི་གེ་དང་བཅས་ཨོ་རྒྱན་རྗེས། །དཔལ་ལྡན་དཔའ་བོའི་ཕྱག་ཏུ་བསྩལ་ལ་འདུད། །སྔོན་གནས་མཁྱེན་དང་དམ་པའི་སྤྱོད་པ་ཡིས། །བསྟན་པའི་ཉིན་བྱེད་སླར་ཡང་འཆར་བ་ཉིད། །ངེས་པ་རྙེད་ནས་ཞབས་སེན་ནོར་བུའི་ཏོབ། །ལྷར་བཅས་སྐྱེ་དགུའི་གཙུག་ཏུ་བཅིངས་ལ་འདུད། །ལུང་རྟོགས་དཔལ་གྱིས་སྤུངས་པའི་ཆོས་ཀྱི་སྡེ། །ས་སྤྱོད་ཡིད་དགའ་ཆོས་འཛིན་སེང་གེའི་ཁྲིར། །འོད་དཔག་མེད་དངོས་གར་གྱི་དབང་ཕྱུག་གིས། །མངའ་གསོལ་ཤིས་བརྗོད་མེ་ཏོག་འཐོར་ལ་འདུད། །སྐྱེས་ཐོབ་ཆོས་ཀྱི་སྤྱན་རས་རྡུལ་མེད་པས། །བརྡ་བསྟན་ཙམ་གྱིས་ཆོས་ཀྱི་གཏིང་སླེབ་ཀྱང་དྲང་བའི་དོན་ཏུ་སྦྱོར་བྱུང་མཐའ་ཡས་པས། །ཐམས་ཅད་མཁྱེན་པའི་གོ་སར་འཛེགས་ལ་འདུད། །བོད་ཡུལ་དབུས་འགྱུར་འཆང་དུ་ཞབས་པད་བཀོད། །ཞིང་མཆོག་རྣམས་ལ་ཚོགས་གཉིས་གོང་དུ་སྤེལ། །གནས་ཆེན་རྣམས་ལ་ཕྱི་ནང་རྟེན་འབྲེལ་བསྒྲིགས། །བཟང་པོ་སྤྱོད་པའི་དོན་ཀུན་གྲུབ་ལ་འདུད། །སྐྱེས་པའི་རབས་སུ་འབྲེལ་བ་བླ་མའི་མཆོག །འཇིག་རྟེན་
དབང་ཕྱུག་དཔལ་ལྡན་ཀརྨ་པས། །རྒྱལ་ཚབ་སྲས་ཀྱི་ཐུ་བོར་མངའ་གསོལ་ཏེ། །དོན་བརྒྱུད་ནོར་བུའི་མཛོད་ཁང་གཏད་ལ་འདུད། །འབྲུག་ཆེན་ཆོས་ཀྱི་སྣང་བ་ཡབ་སྲས་སོགས། །སར་གནས་སྤྲུལ་པའི་ཡོངས་འཛིན་ཚུལ་བཞིན་བསྟེན། །བསླད་མེད་སྨིན་གྲོལ་བདུད་རྩིའི་ཆུ་ཀླུང་གིས། །ཐུགས་ཀྱི་བུམ་བཟང་ཡོངས་སུ་གཏམས་ལ་འདུད། །སོ་ཐར་སྡོམ་པའི་ནོར་བུར་གཅེས་སྤྲས་ཀྱིས། །ཐུབ་པའི་རྒྱལ་མཚན་ཉེས་ལྟུང་དྲིས་མ་གོས། །ཚུལ་ཁྲིམས་དྲི་བཟང་ཁོར་ཡུག་ཀུན་ཏུ་ཁྱབ། །སྐྱེ་བོ་ཚད་མེད་བསྟན་ལ་བཀོད་དེར་འདུད། །བྱང་ཆུབ་སེམས་ལ་ཐོག་མེད་ནས་གོམས་པས། །ཉིན་མཚན་རྟག་ཏུ་གཞན་ཕན་འབའ་ཞིག་ལས། །རང་དོན་བགྱི་བ་རྡུལ་ཙམ་མ་མཆིས་པ། །མ་འདྲིས་སྐྱེ་དགུའི་མགོན་ཏུ་གྱུར་ལ་འདུད། །ལྔ་ཕྲག་ལྔ་ཡི་བགྲང་བྱར་ཕེབས་པ་ནས། །ཁྱེར་སོ་གསུམ་གྱི་གྲུབ་མཐར་རབ་སྙོགས་ཏེ། །འཁྲུལ་སྣང་དག་པའི་འཁོར་ལོར་བྱང་ཆུབ་པས། །དཀྱིལ་འཁོར་ཀུན་གྱི་ཁྱབ་བདག་གྱུར་ལ་འདུད། །ཚིག་ཙམ་མིན་པ་རྟོགས་གྲོལ་དུས་མཉམ་སྟེ། །རྩ་ཐིག་རླུང་གསུམ་ཡེ་ཤེས་དབུ་མར་དག །འོད་གསལ་ཕྱག་རྒྱ་ཆེན་པོར་འདུ་འབྲལ་མེད། །གཞན་རྒྱུད་བྱིན་གྱིས་རློབ་པར་
མཛད་ལ་འདུད། །ཆོས་བརྒྱད་འཆིང་གྲོལ་དམན་ལ་ལྷག་པར་བརྩེ། །གཏོང་བ་ནམ་མཁའ་མཛོད་ཀྱི་སྒོ་འཕར་དབྱེ། །རང་སྣང་དབང་འདུས་གཞན་སྣང་ཟིལ་གྱིས་མནན། །ཚར་གཅོད་རྗེས་འཛིན་ལྷུན་གྱིས་གྲུབ་ལ་འདུད། །ལྐོག་གྱུར་གནས་དང་གཞན་སེམས་མངོན་སུམ་མཁྱེན། །སྲ་མཁྲེགས་རྡོ་ལ་ཞབས་ཀྱི་རྗེས་མང་བྱོན། །ཤུལ་རིང་གནས་སུ་རབ་གནས་ཟང་ཐལ་ཕོབས། །རྫུ་འཕྲུལ་ཆོ་འཕྲུལ་བསྙོན་མེད་སྟོན་ལ་འདུད། །རྩ་གསུམ་རྒྱལ་བ་རྒྱ་མཚོའི་གསང་པ་གཟིགས། །མཐུ་ལྡན་དྲི་ཟའི་རྒྱལ་པོས་ཞབས་ལ་བཏུད། །གང་སྐུའི་སྙིགས་མ་ཙམ་གྱིས་ནད་གདོན་སེལ། །གྲུབ་པ་བྱེ་བའི་གཙུག་རྒྱན་གྱུར་ལ་འདུད། །བོད་ཁམས་བདེ་བའི་ཕྲིན་ལས་རླབས་ཆེན་བསྒྲུབས། །བསོད་ནམས་ཚོགས་ཆེན་ཕྱོགས་མཐའ་ཡས་པ་བསགས། །སྒྲུབ་བརྒྱུད་བསྟན་སྲོག་ཕྱོགས་རེར་མིན་པར་བཟུང་། །ཕྱོགས་ལས་རྣམ་རྒྱལ་ཆོས་ཀྱི་རྒྱལ་པོར་འདུད། །ལ་ལ་སྨིན་གྲོལ་གདམས་པས་རྗེས་སུ་བཟུང་། ཁ་ཅིག་སྤོང་དང་ཀློག་པའི་གནས་ལ་བཀོད། །གཞན་དག་དགེ་རྩ་སྣ་རེའི་ས་བོན་བསྐྲུན། །འབྲེལ་ཚད་དོན་དང་ལྡན་པར་མཛད་ལ་འདུད། །ཁྱད་པར་ཕྱག་ན་པདྨོ་བཅུ་བཞི་པ། །ཆོས་ཀྱི་རྒྱལ་ཚབ་མཆོག་ཏུ་དབང་བསྐུར་ཏེ། །ཐུབ་བསྟན་ཇི་སྲིད་
ཕྲིན་ལས་རྒྱུན་མི་འཆད། །རྒྱལ་བ་ཀུན་གྱི་ཡབ་ཏུ་གྱུར་ལ་འདུད། །ཤིང་ཕོ་རྟ་ནས་ཆུ་མོ་གླང་གི་བར། །བརྒྱད་ཅུ་སྙེད་དུ་གཞན་གྱི་དོན་མཛད་ནས། །རྟག་འཛིན་ཅན་རྣམས་དགེ་ལ་བསྐུལ་བའི་སླད། །མྱ་ངན་འདའ་བའི་དུས་མཁྱེན་དེ་ལ་འདུད། །དྲི་བཟང་ངད་འཐུལ་འཇའ་ཚོན་བླ་རེ་བྲེས། །ས་ཆེན་གཡོ་ཞིང་ལྷ་ཡི་རྔ་སྒྲ་བསྒྲགས། །སྐུ་གཟུགས་ཡིག་འབྲུ་གདུང་གི་དྲངས་མར་བྱོན། །ངོ་མཚར་ཆོ་འཕྲུལ་ཚད་མེད་སྟོན་ལ་འདུད། །བརྟན་མཁས་ཡོན་ཏན་ཀུན་ལྡན་གནས་བརྟན་ཚུལ། །བསྡུ་བཞི་ཕྱིན་དྲུག་རྒྱལ་སྲས་སྤྱོད་མཐར་སོན། །རྡོ་རྗེ་འཛིན་པ་ཀུན་གྱི་རིགས་ཀྱི་བདག །བསྟན་འཛིན་ཉིན་བྱེད་ཞབས་ལ་གསོལ་བ་འདེབས། །མི་ཕྱེད་རྩེ་གཅིག་གུས་པས་གསོལ་བཏབ་མཐུས། །འདི་ནས་བཟུང་སྟེ་སྐྱེ་བ་ཐམས་ཅད་དུ། །བྱམས་མགོན་རྡོ་རྗེ་འཆང་གིས་རྗེས་བཟུང་ནས། །སྲས་ཀྱི་ཐུ་བོར་དབུགས་དབྱུང་བསྩལ་གྱུར་ཅིག །ལོག་ལྟ་ཐུགས་འགལ་སྐད་ཅིག་མི་འབྱུང་བར། །རྙེད་བཀུར་སྒྲུབ་པས་མཉེས་པ་མཐར་ཕྱིན་ཏེ། །སྐུ་གསུང་ཐུགས་ཀྱི་གསང་བའི་མཛོད་ཐོབ་ཅིང་། །ཕྲིན་ལས་ནམ་མཁའི་མཐའ་མཉམ་སྤེལ་བྱེད་ཤོག །མ་གྱུར་འགྲོ་ཀུན་བླ་མའི་གོ་འཕང་ལ། །མ་འཁོད་བར་དུ་རྣམ་ཐར་ཚད་མེད་པས། །འཁོར་
བ་དོང་ནས་སྤྲུགས་པའི་དཔལ་དུ་བདག །ཀུན་བཟང་འཇམ་མགོན་སྤྱན་རས་གཟིགས་མཚུངས་ཤོག །རྒྱལ་བསྟན་སྤྱི་དང་དགྱེས་མཛད་སྤྲུལ་པའི་སྐུའི། །བསྟན་པའི་ཉི་མ་མི་འགྲིབ་ཕྱོགས་བརྒྱར་འཆར། །ལུང་རྟོགས་ནོར་བུའི་སྐྱེད་ཚལ་ཉམས་དགའ་བར། །རྣམ་གྲོལ་བཅུད་ཀྱིས་སྐྱེ་དགུ་འཚོ་གྱུར་ཅིག །ཐུན་མོང་གི་རྣམ་པར་ཐར་པ་ཕྱོགས་གཅིག་ལས་བརྩམས་པའི་ཚིགས་སུ་བཅད་པ་འདི་རང་སློབ་ལྔ་རིག་སྨྲ་བ་ཀརྨ་མཐུ་སྟོབས། །སྒྲུབ་བརྩོན་ཀརྨ་ལྷ་དཔལ་སོགས་ཀྱིས་རིང་ནས་བསྐུལ་ཞིང་། ཉེ་ཆར་དད་བརྩོན་མཆོག་ལྡན་སྒྲུབ་བླ་མ་ཀརྨ་དོན་གྲུབ་ནས་བཀྲ་ཤིས་པའི་ལྷ་རྫས་བཅས་ཆེ་ཐང་དུ་བསྐུལ་བའི་ངོར། བྱམས་མགོན་བླ་མས་རྗེས་སུ་བཟུང་བའི་བཀའ་འབངས་ཀྱི་ཐ་ཤལ་པ་བློ་གྲོས་མཐའ་ཡས་ཀྱིས་དཔལ་སྤུངས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་ཤིང་ཡོས་ཆོ་འཕྲུལ་ཟླ་བའི་དཀར་ཕྱོགས་ཀྱི་ཚེས་བཅུ་ལ་དད་པ་ཆེན་པོས་གསོལ་བ་བཏབ་པའི་ཡི་གེ་པ་ནི་ལྔ་རིག་སྨྲ་བ་ཚེ་དབང་དོན་གྲུབ་ཀྱིས་བགྱིས་པ་དགེ་ལེགས་འཕེལ།། ༈ །།ཀམ་ཚང་ཆོས་སྤྱོད་ཞལ་སྐོང་རྒྱལ་དབང་བཅུ་བཞི་པའི་གསོལ་འདེབས་བཞུགས་སོ། །སྲིད་ཞིའི་ཁྱབ་བདག་གཟི་བརྗིད་འོད་དཔག་མེད། །ལོངས་སྤྱོད་ཡོངས་རྫོགས་རྣམ་སྣང་སྤྱན་རས་གཟིགས། །གངས་ཅན་མགོན་པོའི་སྐུར་བཞེངས་ཀརྨ་པ། །ཐེག་མཆོག་རྡོ་རྗེའི་ཞབས་ལ་གསོལ་
བ་འདེབས། །མཁའ་ཁྱབ་དབྱིངས་སུ་མངོན་པར་བྱང་ཆུབ་སྟེ། །ཞིང་ཁམས་ཀུན་དང་ཁྱད་པར་ཛམ་གླིང་འདིར། །དམིགས་མེད་ཐུགས་རྗེའི་རང་གཟུགས་ཡང་ནས་ཡང་། །སྐལ་པའི་སྣོད་བཞིན་འཆར་ལ༴ གསུང་གི་འཁོར་ལོར་དབང་ཆེན་གྲུབ་པའི་སྐུ། །ཕྱི་ནང་རྟེན་འབྲེལ་འགྲོས་མཚུངས་རྡོ་རྗེའི་ལུང་། །བསླུ་མེད་སྒྲུབ་བརྒྱུད་པད་ཚལ་རྒྱས་པ་ཡི། །སྣང་བྱེད་ཐོག་མར་བཞད་ལ༴ རྗེའུའི་རིགས་སཱ་ལ་ཆེན་པོར་སྲིད་པ་བཟུང་། །དགུན་དུས་པད་སྡོང་ཡལ་ག་བརྒྱ་ལྡན་འཁྲུངས། །དྲི་བཟང་ངད་པས་ཁོར་ཡུག་ཀུན་ཏུ་ཁྱབ། །མཐོང་ཐོས་སྤྲོ་བ་བསྐྱེད་ལ༴ སྔོན་གནས་རྗེས་དྲན་གསང་གསུམ་ངོ་མཚར་གྱིས། །སྙིང་རྗེའི་དབང་ཕྱུག་དཔལ་ལྡན་ཀརྨ་པར། །ཡོངས་སུ་གྲགས་ཏེ་ལྷར་བཅས་འཇིག་རྟེན་གསུམ། །དབུགས་འབྱིན་ཆེན་པོ་སྩལ་ལ༴ ཐམས་ཅད་མཁྱེན་པར་གཟོད་ནས་གྲུབ་གྱུར་ཀྱང་། །དྲང་བའི་དོན་ཕྱིར་རིག་གནས་མདོ་རྒྱུད་ལ། །སྦྱངས་པའི་ཚུལ་བསྟན་མཁྱེན་གཉིས་དཀྱིལ་འཁོར་རྒྱས། །རྟོག་འཁྲུལ་མུན་པ་སེལ་ལ༴ འཁྲུལ་མེད་དགེ་བའི་བཤེས་གཉེན་ཚུལ་བཞིན་བསྟེན། །ལུང་རྟོགས་ནོར་བུའི་མཛོད་ལ་རང་དབང་སྒྱུར། །ལྷག་པའི་བསླབ་པ་ཡོངས་འདུའི་གྲིབ་བསིལ་དུ། །ལུས་ཅན་ངལ་གསོ་སྦྱིན་ལ༴ དོན་
བརྒྱུད་བྱང་ཆུབ་སྙིང་པོའི་རྒྱལ་ཐབས་ཆེར། །རྡོ་རྗེ་སེང་གེའི་ཁྲི་ལ་ཞབས་བཞུགས་ཏེ། །འདུལ་བ་རྣམ་བཞིའི་ཕྲིན་ལས་མཐའ་ཡས་པ། །རྒྱལ་བ་ཉིད་དང་མཚུངས་ལ༴ མ་ངེས་རིགས་ཅན་གདུལ་བྱའི་བློར་འཚམས་པ། །འཁོར་ལོ་གསུམ་གྱི་མཛད་པའི་ཆོ་འཕྲུལ་གྱིས། །མཐའ་དབུས་སྐྱེ་དགུ་མཐོང་ཐོས་དྲན་རེག་ཀུན། །རྣམ་གྲོལ་ལམ་དུ་བཀོད་ལ༴ ཉི་ཟླའི་བགྲོད་པ་སྒྲ་གཅན་དབྱིངས་སུ་དག །ཡེ་ཤེས་ཉིན་བྱེད་གསལ་འགྲིབ་མེད་པ་ཤར། །ཏིང་འཛིན་སྒོ་བརྒྱར་སྙོམས་པར་འཇུག་ཅིང་ལྡང་། །ལྷན་སྐྱེས་གྲུབ་པའི་རྒྱལ་པོར༴ རིགས་དང་དཀྱིལ་འཁོར་རྒྱ་མཚོ་སྤྲོ་ཞིང་བསྡུ། །སྐལ་ལྡན་ཡོངས་ལ་དངོས་གྲུབ་རྣམ་གཉིས་སྩོལ། །རྒྱུད་དང་དེ་སྒྱོར་གསང་བ་ཀུན་གྱི་བདག །རྡོ་རྗེ་འཆང་དངོས་ཁྱོད་ལ༴ བཅུ་ཕྲག་བདུན་ལ་རྒྱལ་བའི་རྗེས་འགྲོ་བའི། །མཛད་པ་མཐར་ཕྱིན་རྟག་ལྟ་སུན་དབྱུང་ཕྱིར། །དབང་ཆེན་ཐོབ་པའི་ཡ་མཚན་ལྟས་དང་བཅས། །གདུལ་བྱ་གཞན་དོན་དགོངས་ལ༴ ཡེ་ཤེས་སྐུ་མཆོག་ནམ་མཁའི་མཐའ་དང་མཉམ། །གཞོམ་མེད་གསུང་དབྱངས་སོ་སོའི་སྐད་དུ་སྟོན། །ཟབ་གསལ་དགོངས་པ་ཤེས་བྱ་ཀུན་ལ་ཁྱབ། །མཉམ་པ་ཉིད་གསུམ་བརྙེས་ལ༴ ཚད་མེད་ཐུགས་རྗེའི་སྒྱུ་འཕྲུལ་
སྐལ་པ་བཞིན། །འཁོར་བ་སྲིད་དུ་ཕྲིན་ལས་མི་ཟད་པས། །རྒྱལ་བ་ཀུན་ལས་ལྷག་པའི་ཐུགས་བསྐྱེད་དང་། །སྨོན་ལམ་རྨད་དུ་བྱུང་ལ་གསོལ་བ་འདེབས། །སྐྱེ་བ་ཀུན་ཏུ་དཔལ་ལྡན་ཀརྨ་པས། །རྗེས་བཟུང་རྣམ་ཐར་ཕྲིན་ལས་མཉམ་ཉིད་དུ། །གྱུར་ནས་མཁའ་ཁྱབ་འགྲོ་བ་མ་ལུས་པ། །བྱང་ཆུབ་ཆེན་པོའི་ས་ལ་འགོད་ནུས་ཤོག །ཅེས་འཇིག་རྟེན་གསུམ་གྱི་མགོན་པོ་རིགས་ཀུན་ཁྱབ་བདག་ཐམས་ཅད་མཁྱེན་པ་རྒྱལ་དབང་བཅུ་བཞི་པའི་རྣམ་ཐར་རྗེས་སུ་དྲན་པའི་གསོལ་འདེབས་འདིའང་། སྐྱབས་གཅིག་འཁོར་ལོའི་དབང་ཕྱུག་བྱམས་མགོན་ཏཱའི་སི་ཏུ་མཆོག་གི་སྤྲུལ་པའི་སྐུ་པདྨའི་ལྗགས་ལྡན་གཉིས་པའི་བཀའ་ལུང་སྤྱི་བོར་མཆོད་ནས། རྒྱལ་བ་མཐིང་དམར་ཅོད་པན་འཆང་བཟུང་གིས་རྗེས་སུ་བཟུང་བའི་སྐལ་བཟང་ཐོབ་པ་འདུ་གསུམ་པ་བློ་གྲོས་མཐའ་ཡས་པའི་སྡེས་གུས་པ་ཆེན་པོས་བྲིས་ནས་གསོལ་བ་བཏབ་པ་དགེ་ལེགས་འཕེལ།། ༈ །།རྒྱལ་བ་ཀུན་གྱི་ནུས་པའི་སྒྱུ་འཕྲུལ་དང་། །ཡེ་ཤེས་ཐུགས་རྗེ་གཅིག་བསྡུས་སྙིགས་དུས་ཀྱི། །འགྲོ་མགོན་པདྨ་ཉིན་བྱེད་དབང་པོའི་སྡེ། །བཀའ་བརྒྱུད་བཅུད་འདུས་དེ་ལ་གསོལ་བ་འདེབས། །མགོན་དེའི་རྟག་ཅིང་ཁྱབ་པའི་ཕྲིན་ལས་ཀྱི། །ཤིང་རྟ་མཆོག་གྱུར་ཐོས་བསམ་སྒོམ་གསུམ་དང་། །
འཆད་རྩོད་རྩོམ་གསུམ་མཁས་བཙུན་བཟང་གསུམ་གྱིས། །རྒྱལ་བསྟན་གསལ་མཛད་རྣམས་ལ་གསོལ་བ་འདེབས། །ཉི་དང་འོད་བཞིན་སྲས་ཀྱི་ཐུ་བོའི་ཚུལ། །དམ་པའི་མགོན་གྱིས་རྗེས་བཟུང་དམ་པ་ཡི། །རྣམ་ཐར་མཆོག་འཆང་སུམ་ལྡན་རྡོ་རྗེ་འཛིན། །སྐྱབས་དང་མགོན་གྱུར་རྣམས་ལ་གསོལ་བ་འདེབས། །སྡོམ་གསུམ་བདུད་རྩིའི་དྭངས་བཅུད་སྩོལ་མཛད་ཅིང་། །བདག་བློ་ཆོས་ལ་སྒྱུར་བའི་བཀའ་དྲིན་ཅན། །རྗེ་བཙུན་པདྨ་སློབ་མའི་ཚོགས་བཅས་ལ། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །སྐྱེ་ཀུན་སྲས་བཅས་རྒྱལ་བས་རྗེས་བཟུང་ཞིང་། །ཐར་པའི་ལམ་ལ་བར་ཆད་མི་འབྱུང་བར། །བཟང་པོ་སྤྱོད་པས་བྱང་ཆུབ་ཚོགས་རྫོགས་ཏེ། །བླ་མ་ཆོས་སྐུའི་གོ་འཕང་མྱུར་ཐོབ་ཤོག །ཅེས་པའང་དད་ལྡན་སྔགས་འཆང་ནང་ཆེན་ཀརྨ་བཀྲ་ཤིས་རྒྱ་མཚོ་ནས་བསྐུལ་ངོར་ཡོན་ཏན་རྒྱ་མཚོས་དཔལ་སྤུངས་ཡང་ཁྲོད་དུ་བྲིས་པ་དགེ་ལེགས་འཕེལ།། ༈ །།ཀུན་མཁྱེན་བྱམས་མགོན་ཆོས་ཀྱི་འབྱུང་གནས་ཀྱི། །ཐུགས་ཀྱི་སྲས་མཆོག་གནས་ལྔ་སྨྲ་བའི་དབང་། །གྲུབ་ཆེན་ག་ཡ་དྷ་རའི་ཐུགས་སྤྲུལ་ཏེ། །འབེ་ལོ་ཆེན་པོའི་ཞབས་ལ་གསོལ་བ་འདེབས། །བསྐལ་མང་གོང་ནས་བྱང་
ཆུབ་ཐུགས་བསྐྱེད་ཅིང་། །ཐེག་ཆེན་རིག་སད་ཚོགས་གཉིས་དཔག་མེད་བསགས། །སྐྱེ་ཀུན་དམ་པའི་མགོན་གྱིས་རྗེས་སུ་བཟུང་། །རྒྱལ་སྲས་ཐུ་བོའི་ཞབས་ལ༴ ངེས་པར་འབྱུང་བའི་ཚུལ་ཁྲིམས་ས་གཞི་བརྟན། །གཞན་ཕན་བྱང་སེམས་ནོར་བུའི་འཁྲི་ཤིང་ཕྱུག །བདེ་སྟོང་ཨེ་ཝཾ་འབྲས་བུའི་རྒྱས་བཏབ་པ། །སུམ་ལྡན་རྡོ་རྗེ་འཛིན་ལ༴ སྐྱེས་སྦྱངས་འགྲན་ཟླ་བྲལ་བའི་ལུས་སྟོབས་རྒྱས། །སྒྲ་དང་ཚད་མའི་མཆེ་སྡེར་ཤིན་ཏུ་རྣོ། །བཟོ་དང་གསོབ་རལ་པའི་ཁུར་གྱིས་ཕྱུག །མི་ཡི་སེང་གེའི་ཞབས་ལ༴ འཆད་ན་ལེགས་བཤད་བདུད་རྩིའི་ཐང་མ་བརྡལ། །རྩོད་ཚེ་མ་ལུས་ཕྱོགས་ལས་རྣམ་པར་རྒྱལ། །རྩོམ་པ་ཟབ་རྒྱས་ཚིག་དོན་སྔོན་མེད་སྤྲོ། །སྨྲ་བའི་དབང་ཕྱུག་ཞབས་ལ༴ རིག་པའི་གནས་ཆེན་བཅོ་བརྒྱད་ལ་སོགས་པ། །ཤེས་བྱའི་གནས་ཀུན་མ་འདྲེས་ཐུགས་སུ་ཆུད། །འཇིག་རྟེན་གསལ་བྱེད་མ་ཧཱ་པཎྜི་ཏ། །ཚེ་དབང་ཀུན་ཁྱབ་ཞབས་ལ༴ ཁྱད་པར་ཀླུ་ཐོགས་རྣམ་གཉིས་བཞེད་པའི་གཞུང་། །ངེས་དོན་དབུ་མ་ཆེན་པོའི་གནས་རྣམས་ལ། །ལྐོག་ཏུ་མ་གྱུར་མཁྱེན་པའི་སྤྱན་རས་ཡངས། །ཐེག་ཆེན་སྒྲོན་མའི་ཞབས་ལ༴ སྒྲོལ་མགོན་ཞབས་དང་བསྟན་པའི་ཉིན་བྱེད་ཀྱི། །གསང་བ་འཛིན་
ཅིང་བསྟན་པ་སྤེལ་བ་ལ། །ཁྱོད་དང་མཚུངས་པ་འགའ་ཡང་མ་མཆིས་པ། །འཕགས་ཆེན་དམ་པའི་ཞབས་ལ༴ རྒྱུད་སྡེ་སྤྱི་དང་ཁྱད་པར་གཤིན་རྗེ་གཤེད། །དམ་ཆོས་བདུད་ཀྱི་གཅོད་ཡུལ་ལ་སོགས་པ། །ཟབ་ལམ་རྡོ་རྗེའི་རྣལ་འབྱོར་མཐར་ཕྱིན་པའི། །གྲུབ་པའི་དབང་ཕྱུག་ཞབས་ལ༴ གསུང་གི་ཟེགས་མ་ཆ་ཤས་རེ་རེས་ཀྱང་། །ངེས་གསང་གནད་བརྒྱ་བདེ་བླག་སྣང་བྱེད་པ། །ལུང་རྟོགས་རོལ་པའི་མཚོ་ཆེན་ཟབ་གསང་ནོར། །འདོད་རྒུའི་འབྱུང་གནས་ཞབས་ལ༴ སྐྱེ་བ་ཀུན་ཏུ་ཆོས་ཀྱི་སྣང་བ་དང་། །ཉི་དང་འོད་བཞིན་འབྲལ་བ་མེད་ཚུལ་གྱིས། །དམ་ཆོས་སྤེལ་ཞིང་འགྲོ་མང་སྨིན་མཛད་པ། །སར་གནས་སེམས་དཔའི་ཞབས་ལ༴ གསོལ་བཏབ་མཐུ་ལས་བདག་སོགས་འགྲོ་བ་ཀུན། །རྟག་ཏུ་དགེ་བའི་བཤེས་ཀྱིས་ཟིན་ནས་ཀྱང་། །དྲི་མེད་སོ་སོར་རྟོགས་པའི་ཤེས་རབ་ཀྱིས། །ཐམས་ཅད་མཁྱེན་པའི་གྲོང་དུ་འཇུག་གྱུར་ཅིག །འཁོར་གསུམ་རྣམ་དག་ཚོགས་རབ་རྫོགས་པ་དང་། །ཀུན་ལ་མ་རྨོངས་ཤེས་བྱའི་སྣང་བ་རྒྱས། །དོན་གཉིས་མཐར་ཕྱིན་རྡོ་རྗེའི་སྐུ་བརྙེས་པའི། །བཀྲ་ཤིས་དཔལ་གྱིས་འཇིག་རྟེན་མཛེས་བྱེད་ཤོག །ཅེས་ཤེས་བྱ་ཀུན་ལ་བློ་གྲོས་ཡངས་པ་དྲུང་ཀརྨ་འགྱུར་མེད་ཀྱིས། རྗེ་འདིའི་ཡོན་ཏན་ལ་རྒྱུ་མཚན་ཤེས་ནས་དད་ས་ཐོབ་སྟེ་ཚུལ་འདི་ཡང་
ནན་དུ་བསྐུལ་བའི་ངོར། འདུ་གསུམ་པ་ཝཱ་གཱི་ཤྭར་ས་དབེན་པ་ཟླ་མཛེས་སུ་ཤུར་མར་བྲིས་པ་དགེ་ལེགས་འཕེལ།། ༈ །།ཀུན་མཁྱེན་དུས་གསུམ་སངས་རྒྱས་དོལ་པོ་པ། །ཀརྨ་བཀའ་བརྒྱུད་ཡོངས་ཀྱི་བཞེད་པའི་མཐིལ། །འོད་གསལ་འགྱུར་མེད་ཐེག་མཆོག་སེང་གེའི་སྒྲ། སྒྲོགས་མཛད་དཔལ་ལྡན་བླ་མ་གསོལ་བ་འདེབས། །ཚོགས་གཉིས་བསགས་པས་བསླབ་གསུམ་རྣམ་པར་དག །མོས་གུས་སྟོབས་ཀྱིས་རང་བྱུང་བདེན་དོན་གཟིགས། །སྨོན་ལམ་མཐུ་ལས་ཀུན་མཁྱེན་ཇོ་ནང་པའི། །བསྟན་པའི་མེ་རོ་བསླངས་དེར་གསོལ་བ་འདེབས། །གློ་བུར་དྲི་མས་སྟོང་པའི་དེ་བཞིན་ཉིད། །བླ་མེད་ཡོན་ཏན་ཆོས་ཀུན་ལྷུན་གྲུབ་པ། །སོ་སོ་རང་གི་རིག་པའི་ཤེས་རབ་ཀྱིས། །གཞི་འབྲས་དབྱེར་མེད་རྟོགས་ལ༴ གཞན་ཕན་བྱང་ཆུབ་སེམས་ཀྱི་རྩ་བ་བརྟན། །ཕྱིན་དྲུག་བསྡུ་དངོས་གཞི་ཡི་ཡལ་ག་བརྒྱད། །དོན་གཉིས་ལྷུན་གྲུབ་སྙེ་མ་གཡུར་དུ་ཟ། །སྐྱེས་ཆེན་དཔག་བསམ་དབང་པོར༴ རིམ་གཉིས་ཞུ་བདེ་པྲ་ཕབ་ཡེ་ཤེས་ཀྱིས། །རྣམ་ཀུན་མཆོག་ལྡན་སྟོང་གཟུགས་ཕྱག་རྒྱ་རེ། །འགྱུར་མེད་རྡོ་རྗེ་བདེ་བའི་སྲོག་གྲུབ་པ། །སྙིང་པོའི་རྣལ་འབྱོར་མ་ཚིག་
དེར༴ ཀུན་བཏགས་འཁྲུལ་པས་བསླད་པའི་རབ་རིབ་ཁམས། །གཞན་དབང་རྫུན་བརྟོལ་ལྟ་སྒོམ་ཐུར་མས་བསལ། །ཡོངས་གྲུབ་ཡེ་ཤེས་དག་པའི་མིག་ཆེན་པོས། །མཆོག་གཟིགས་དྲིན་ཆེན་བླ་མར་གསོལ་བ་འདེབས། །རྡོ་རྗེ་སེམས་དཔའ་སྒྲོལ་བའི་མགོན་པོ་ཡི། །དགོངས་སྤྱོད་ཉི་མའི་ཤིང་རྟ་འདྲེན་སླད་དུ། །ཚེ་དབང་གྲུབ་པའི་རྒྱལ་དང་དབྱེར་མེད་པར། །གསང་གསུམ་བརྟན་ཞིང་ཕྲིན་ལས་རབ་རྒྱས་ཤོག །ཅིས་པ་འདིའང་མཁྱེན་རབ་ཡངས་པ་བླ་མ་ངག་དབང་རྒྱ་མཚོས། དཔལ་ཇི་ཐང་གི་ཆོས་སྡེའི་ཚོགས་འདོན་ཏུ་འཛུགས་རྒྱུའི་དགོངས་བཞེད་ལྟར། ལྟོམ་ལས་པ་ཀརྨ་ངག་དབང་ཡོན་ཏན་རྒྱ་མཚོས་དཔལ་སྤུངས་ཀྱི་གདན་ས་ཆེན་པོར་བྲིས་པ་དགེ་ལེགས་འཕེལ།། ༈ །།རྒྱལ་བ་ཀུན་གྱི་མཁྱེན་བརྩེའི་ཡེ་ཤེས་ནི། །གང་ཐུགས་ཟབ་གསལ་གཉིས་སུ་མེད་པར་གཅིག །བླ་མ་འཇམ་དཔལ་དཔའ་བོར་གསོལ་བ་འདེབས། །གདོད་མའི་ཡེ་ཤེས་སད་པར་བྱིན་གྱིས་རློབས། །རྒྱལ་བ་ཀུན་གྱི་བརྩེ་བའི་ཐུགས་རྗེ་ནི། །གང་ཐུགས་དམིགས་པ་མེད་པའི་སྙིང་རྗེའི་ངང་། །བླ་མ་སྤྱན་རས་གཟིགས༴ གཟུགས་སྐུའི་ནུས་པ་རྫོགས་པར༴ རྒྱལ་བ་ཀུན་གྱི་ནུས་པའི་མཐུ་སྟོབས་ནི། །གང་གི་འགྲོ་འདུལ་ཕྲིན་ལས་ངང་དུ་མཉམ། །བླ་མ་གསང་བའི་བདག་པོར༴ མཁའ་ཁྱབ་འགྲོ་བ་འདུལ་བར་བྱིན་གྱིས་རློབས། །དཀོན་མཆོག་གསུམ་གྱི་རྣམ་ཐར་
རྒྱ་མཚོའི་སྤྲིན། །དཔལ་ལྡན་བླ་མའི་གསང་བ་གསུམ་ལ་རྫོགས། །ཀུན་བྱེད་རྡོ་རྗེ་འཛིན་ལ་གསོལ་བ་འདེབས། །བསམ་ཡས་རྣམ་ཐར་བརྙེས་པར་བྱིན་གྱིས་རློབས། །རྩ་གསུམ་སྒྱུ་འཕྲུལ་དྲ་བའི་འཁོར་ལོ་ཡང་། །འགྱུར་མེད་བདེ་བ་ཆེན་པོའི་དབྱིངས་སུ་ཤར། །ཁྱབ་བདག་རྡོ་རྗེ་སེམས་དཔར༴ གསང་གསུམ་གྲུབ་མཐའ་སྙོགས་པར་བྱིན་གྱིས་རློབས། །མདོར་ན་སྲིད་ཞིའི་གཟུགས་བརྙན་མ་ལུས་པ། །དབྱིངས་ལས་སྤྲོ་ཞིང་ཁྱོད་ཀྱི་དབྱིངས་སུ་སྡུད། །དང་པོའི་སངས་རྒྱས་བླ་མར་གསོལ་པ༴ རང་སེམས་རང་དབང་ཐོབ་པར་བྱིན་གྱིས་རློབས། །དམ་ཚིག་ལམ་ལས་དབང་བཞིའི་རྩལ་རྫོགས་ཏེ། །མཐའ་ཡི་དབུགས་རྣམས་དབུ་མའི་ཐིག་ལེར་འགགས། །ཕྱག་རྒྱ་ཆེན་པོས་རྟག་ཏུ་འཁྱུད་གྱུར་པ། །ཧེ་རུ་ཀ་དཔལ་ཚེ་འདིར་འགྲུབ་པར་ཤོག །ཅེས་པ་འདིའང་ཟབ་མོའི་རྣལ་འབྱོར་ལ་གཞོལ་བ་ཡོན་ཏན་ཕུན་ཚོགས་ཀྱིས་གསུང་བསྐུལ་ངོར་བློ་གྲོས་མཐའ་ཡས་ཀྱིས་བྲིས་པ་དགེ་ལེགས་འཕེལ།། ༈ །།རྡོ་རྗེའི་ལུས་ལས་ཟབ་མོའི་གནས་ལུགས་རྟོགས། །མོས་གུས་ལམ་གྱིས་རྟོགས་པའི་ཡེ་ཤེས་བརྙེས། །ཟུང་འཇུག་རྣལ་འབྱོར་ཆེན་པོའི་རྒྱལ་ཐབས་པ། །ཀརྨ་བདེ་གསལ་ཞབས་ལ༴
གདོད་ནས་སྐྱེ་འགག་གནས་བྲལ་རང་གི་སེམས། །གཉུག་མ་ལྷན་ཅིག་སྐྱེས་པའི་དེ་བཞིན་ཉིད། །བཅིང་གྲོལ་མེད་པ་དུས་གསུམ་རྒྱལ་བའི་ཡུམ། །དོན་དམ་བདེན་པ་མངོན་སུམ་རྟོགས་པར་ཤོག །རེ་དོགས་མི་བྱ་གང་ཤར་ངོ་བོ་སྐྱོང་། །རྣམ་རྟོག་མི་དགག་གང་སྐྱེ་ཐད་དཀར་གཅོད། །བཟང་ངན་མི་གདམ་གང་བྱུང་སེམས་སུ་བསྒོམ། །གསལ་རིག་རྒྱུན་ཆད་མེད་པར་རྟོགས་པར་ཤོག །མོས་གུས་དྲག་པོས་ཐུགས་ཡིད་གཅིག་ཏུ་འདྲེས། །ཤུགས་འབྱུང་སྙིང་རྗེས་སྣང་སེམས་དབྱེར་མེད་ཐིམ། །གེགས་གོལ་མེད་པ་རྣམ་རྟོག་ཆོས་ཀྱི་སྐུར། །བཅོས་མིན་ངེས་པ་ནང་ནས་རྙེད་གྱུར་ཅིག །ཅེས་སྒོ་ནས་སྒྲུབ་ཆེན་དབུ་རལ་ཅན་གྱི་ངོར་ཡོན་ཏན་རྒྱ་མཚོས་ཁྲ་འགུ་བཀྲ་ཤིས་ཆོས་གླིང་དུ་བྲིས་པ་དགེ་ལེགས་འཕེལ།། ༈ །།ཨོཾ་སྭ་སྟི། །བདེན་དོན་ངག་ལ་འཕོ་མེད་དབང་ཐོབ་པས། །བྱང་ཆུབ་ཆོས་ཀྱི་འཕེལ་བ་རབ་རྫོགས་ཏེ། །སྤངས་རྟོགས་རྒྱ་མཚོར་ལོངས་སུ་སྤྱོད་པ་ཡི། །དཔལ་ལྡན་བླ་མའི་ཞབས་ལ་གསོལ་བ་འདེབས། །མཆོག་གསུམ་རྩ་གསུམ་དམ་ཅན་སྲུང་མའི་མཐུས། །མི་མཐུན་ཉེས་བརྒྱའི་སྤྲིན་ན་རིས་དབྱིངས་སུ་ཡལ། །དགེ་ལེགས་མཛད་པའི་འོད་སྟོང་མཁའ་ཁྱབ་བརྡལ། །སྙིང་
པོའི་བསྟན་པའི་པད་ཚལ་རྒྱས་བྱེད་ཤོག །བདག་སོགས་སྐྱེ་བ་ཀུན་ཏུ་དམ་པ་ཡིས། །རྗེས་བཟུང་ཟབ་མོ་ནང་གི་དབུ་མ་དང་། །རྡོ་རྗེའི་རྣལ་འབྱོར་རྟོགས་པའི་སྣོད་གྱུར་ནས། །ཆོས་རྗེ་ཡབ་སྲས་གོ་འཕང་མྱུར་ཐོབ་ཤོག །ཅེས་པའང་རྣམ་འདྲེན་དམ་པ་ངག་དབང་ཆོས་འཕགས་ནས་གསུང་བསྐུལ་ངོར། ཀརྨ་ངག་དབང་ཡོན་ཏན་རྒྱ་མཚོས་དཔལ་ཛམ་ཐང་གི་ཆོས་སྒར་དུ་བྲིས་པ་དགེ་ལེགས་འཕེལ།། ༈ །།སྤྱན་རས་གཟིགས་དངོས་ཀརྨ་ཆགས་མེད་ཀྱི། །གསུང་སྤྲུལ་བདེ་ཆེན་སྙིང་པོ་ལ་སོགས་པ། །དམ་པས་རྗེས་བཟུང་དམ་པའི་རྣམ་ཐར་ཅན། །སྙིང་པོའི་བསྟན་འཛིན་མཆོག་ལ་གསོལ་བ་འདེབས། །ལྷག་པའི་ཚུལ་ཁྲིམས་བསླབ་པས་ཉེས་སྤྱོད་སྤངས། །ལྷག་པའི་སེམས་ཀྱི་བསླབ་པས་དགེ་ཆོས་སྡུད། །ལྷག་པའི་ཤེས་རབ་བསླབ་པས་གཞན་ཕན་བརྩོན། །སངས་རྒྱས་བསྟན་འཛིན་མཆོག་ལ་གསོལ་བ་འདེབས། །རྒྱུད་སྡེ་མང་པོའི་བསྙེན་སྒྲུབ་མཐའ་རུ་ཕྱིན། །རྫོགས་རིམ་ཆོས་དྲུག་མྱོང་ཚང་གཏན་ལ་ཕེབ། །རང་སེམས་ཆོས་སྐུ་ཕྱག་རྒྱ་ཆེན་པོར་རྟོགས། །སྒྲུབ་བརྒྱུད་བསྟན་འཛིན་མཆོག་ལ་གསོལ་བ་འདེབས། །ཚུལ་འཆོས་སྒྱུ་བྲལ་མ་བཅོས་ལྷུག་པར་སྤྱོད། །གཟའ་གཏད་
ཀུན་སྤངས་སྣང་བ་ཐད་ཀར་གཅོད། །བརྩོན་འགྲུས་ཕུལ་ཕྱིན་ཨ་བདྷཱུ་ཏི་པ། །རྡོ་རྗེ་སློབ་དཔོན་མཆོག་ལ་གསོལ་བ་འདེབས། །ཐུགས་རྗེའི་མཐུ་དང་མོས་པའི་རྟེན་འབྲེལ་ལས། །དགོངས་པའི་ལྷག་མ་ཆོས་ཀྱི་དབྱིངས་སུ་རྫོགས། །བདག་ཀྱང་གྲོལ་བ་བཞི་ཡིས་འགྲོ་སྒྲོལ་བའི། དེད་དཔོན་བླ་མེད་བླ་མའི་དཔལ་ཐོབ་ཤོག །ཅེས་བླ་མ་རྡོ་རྗེ་སློབ་དཔོན་གང་ལ་གསོལ་བ་འདེབས་པ་འདིའང་དད་དང་ཤེས་རབ་ཀྱི་ནོར་ཅན་ཀརྨ་དབང་ཕྱུག་ནས་ཆེད་དུ་བསྐུལ་བ་ལྟར། །དེ་ཉིད་ཀྱི་བཀའ་དྲིན་ཆེན་པོས་ཀྱང་བསྐྱངས་པ་ཡོན་ཏན་རྒྱ་མཚོས་དཔལ་སྤུངས་རི་ཁྲོད་དུ་བྲིས་པ་དགེ་ལེགས་འཕེལ།། ༈ །།མཁན་ཆེན་བླ་མ་བྱང་སེམས་ཟླ་བ་བཟང་པོ་ལ་གསོལ་བ་འདེབས་པ་མ་ལ་ཡའི་དྲི་བསུང་ཞེས་བྱ་བ་བཞུགས་སོ། །དཔལ་ལྡན་ཀརྨ་ཀཾ་ཚང་ངེས་དོན་གྱི། །བསྟན་པ་དྲི་མེད་མཁྱེན་བརྩེ་ནུས་པ་ཡིས། །རབ་ཏུ་རྒྱས་མཛད་རྗེ་བཙུན་བླ་མ་ལ། །རྩེ་གཅིག་གསོལ་བ་འདེབས་སོ་བྱིན་གྱིས་རློབས། །དྲི་མེད་ཟླ་ཤར་ཡེ་ཤེས་བརྩེགས་ལ་སོགས། །མཁས་གྲུབ་ཚར་དུ་དངར་བའི་རྣམ་རོལ་གྱིས། །སྙིང་པོའི་བསྟན་དང་དེ་ཡི་གདུལ་བྱའི་དོན། །དུས་གསུམ་རྟག་པར་མཛད་ལ་གསོལ་བ་འདེབས། །དལ་འབྱོར་སྡོང་པོར་བསླབ་གསུམ་ཡལ་ག་རྒྱས། །བྱང་ཆུབ་སེམས་ཀྱི་མེ་ཏོག་ཀུན་ནས་འཛུམ། །གྲུབ་
པའི་འབྲས་བུས་སྐལ་ལྡན་རིས་མེད་པར། །ཐར་ལམ་བཅུད་སྦྱིན་མཛད་ལ༴ པདྨའི་རྒྱལ་ཚབ་པདྨ་དབང་ཆེན་སོགས། །མཚན་ལྡན་བླ་མར་མཉེས་པ་མཆོག་ཏུ་བསྒྲུབས། བསགས་དང་སྦྱངས་པའི་བཏུལ་ཞུགས་མཐའ་རུ་ཕྱིན། །རླབས་ཆེན་ཚོགས་གཉིས་རྫོགས་ལ༴ རྨད་བྱུང་བཟང་པོ་སྤྱོད་པའི་ཕ་རོལ་སོན། །ངོ་མཚར་ཕྲིན་ལས་འབྲེལ་ཚད་དོན་དང་ལྡན། །སྙིང་པོའི་བསྟན་ལ་སྲི་ཞུ་རླབས་ཆེན་མཛད། །སྐལ་ལྡན་བསྡུ་བཞིས་སྐྱོབ་ལ༴ ལྷ་སྐུའི་གསལ་སྣང་བརྟན་པས་ཡེ་ཤེས་ཕེབས། །རང་བྱིན་རླབས་ཀྱིས་རྡོ་རྗེའི་ལམ་མཆོག་བགྲོད། །དོན་དམ་ཆོས་ཉིད་མངོན་སུམ་གཟིགས་པ་ཡིས། །ཕྱག་རྒྱ་ཆེ་མཆོག་གྲུབ་ལ། །བརྟན་མཁས་ཡོན་ཏན་ཀུན་ལྡན་གནས་བརྟན་གཙོ། །གཞན་ཕན་བདུད་རྩིས་རྒྱུད་བརླན་བྱང་སེམས་མཆོག །རིམ་གཉིས་རྣལ་འབྱོར་མཐར་ཕྱིན་རྡོ་རྗེ་འཛིན། །དཀྱིལ་འཁོར་དབང་ཕྱུག་ཉིད་ལ༴ མི་ཕྱེད་གུས་པས་གསོལ་བ་བཏབ་པའི་མཐུས། །སྐྱེ་ཀུན་དཔལ་ལྡན་བླ་མས་རྗེས་སུ་བཟུང་། །རྡོ་རྗེ་གསུམ་དང་དབྱེར་མེད་མཆོག་གྲུབ་ནས། །རང་གཞན་དོན་གཉིས་ལྷུན་གྱིས་གྲུབ་པར་ཤོག །ཅེས་པའང་སྤར་གྱི་རིག་བྱེད་འཛིན་པ་ཀརྨ་ལེགས་ལྡན་ནས་བསྐུལ་ངོར་ཀརྨ་ངག་དབང་ཡོན་ཏན་རྒྱ་མཚོ་བློ་གྲོས་མཐའ་ཡས་པའི་
སྡེས་གུས་པ་ཆེན་པོས་གསོལ་བ་བཏབ་པ་དགེ་ལེགས་འཕེལ།། ༈ །།སྤྲུ་པའི་གཏེར་ཆེན་མཆོག་གྱུར་གླིང་པའི་རྣམ་ཐར་གསོལ་འདེབས་བཀྲ་ཤིས་འཁྱིལ་པའི་དབྱངས་སྙན་ཅེས་བྱ་བ་བཞུགས་སོ། །ཀུན་ཁྱབ་བདེ་ཆེན་འོད་གསལ་ཆོས་ཀྱི་སྐུ། །འཁོར་འདས་སྙིང་པོ་མི་ཤིགས་ཐིག་ལེ་ཆེ། །དངོས་པོ་ཀུན་གྱི་ཁྱབ་བདག་གདོད་མའི་མགོན། །རྗེ་བཙུན་བླ་མའི་ཞབས་ལ་གསོལ་བ་འདེབས། །ཨོ་རྒྱན་སངས་རྒྱས་གཉིས་པའི་ཐུགས་ཀྱི་སྲས། །གཏེར་འབྱིན་གྲུབ་ཐོབ་རྒྱ་མཚོའི་འཁོར་ལོས་སྒྱུར། །རྣམ་ཐར་བསམ་ཡས་སྙིགས་དུས་བསྟན་འགྲོའི་མགོན། །མཆོག་གྱུར་གླིང་པའི་ཞབས་ལ་གསོལ་བ་འདེབས། །གདོད་ནས་རབ་ཞིའི་བདུད་རྩི་བརྙེས་གྱུར་ཀྱང་། །སྐུ་དང་ཞིང་ཁམས་རྒྱ་མཚོའི་སྤྲིན་བཀོད་དེ། །བཟོ་སྐྱེ་མཆོག་གི་སྤྲུལ་སྐུ་མཐའ་ཡས་པས། །འདུལ་བཞིའི་ཆོ་འཕྲུལ་སྟོན་ལ༴ ཁྱད་པར་གངས་ཅན་མངའ་བདག་ཁྲི་སྲོང་རྗེའི། །སྲས་ཀྱི་ཚུལ་བཟུང་མཆོག་གི་དངོས་གྲུབ་བརྙེས། །སངས་རྒྱས་གླིང་སོགས་རྨད་བྱུང་ངོ་མཚར་བའི། །སྒྱུ་འཕྲུལ་གར་བརྒྱས་རོལ་ལ༴ ཐུགས་བསྐྱེད་ཁྱད་འཕགས་སྙིགས་མའི་འགྲོ་ལ་དགོངས། །ཕྲིན་ལས་ཁྱད་འཕགས་གང་འདུལ་དེར་མཐུན་སྟོན། །རྣམ་
ཐར་ཁྱད་འཕགས་སྔོན་མེད་གསང་མཛོད་འཆང་། །ཁྱད་པར་གསུམ་ལྡན་ཁྱོད་ལ༴ མདོ་སྟོད་ས་ཡི་ཐིག་ལེར་བསམ་བཞིན་ཏུ། །སྐྱེ་བ་བཞེས་ནས་གཞོན་ནུའི་སྐབས་སྲ་ཡང་། །ཕལ་པའི་ཡུལ་འདས་དམ་པའི་རྣམ་ཐར་སད། །དད་ལྡན་སྒྲོ་བ་སྐྱེད་ལ༴ བཅུ་གསུམ་བཞེས་ཚེ་ཨོ་རྒྱན་དངོས་སུ་མཇལ། །ཟབ་གཏེར་རྗེས་གནང་སྩལ་ནས་བྱིན་གྱིས་བརླབས། །ལྷ་སྲས་ཐུགས་དམ་རྟེན་སོགས་དངོས་གྲུབ་ཐོབ། །དགོངས་གཏེར་ཀློང་ནས་བརྡོལ་ལ༴ ཀར་འབྲུག་འབྲི་སྟག་ཡབ་སྲས་གཙོར་གྱུར་པའི། །རེས་མེད་ཚད་མའི་སྐྱེས་ཆེན་དུ་མ་བསྟེན། །མཉེས་པ་གསུམ་གྱིས་མདོ་སྔགས་བདུད་རྩིའི་བཅུད། །ཐུགས་ཀྱི་དཔལ་བེར་བསྐྱིལ་ལ༴ པད་འབྱུང་དངོས་སྣང་པདྨ་དབང་ཆེན་དང་། །དཔལ་ལྡན་དཔའ་བོ་གཙུག་ལག་ཆོས་རྒྱལ་གྱིས། །བརྡ་ཡིས་ལུང་བསྟན་དོན་གྱི་བརྒྱུད་པ་གཏད། །གེགས་སེལ་དངོས་གྲུབ་བརྙེས་ལ༴ ཁྱད་པར་འཇམ་མགོན་མཁྱེན་བརྩེའི་དབང་པོ་དང་། །ཡབ་སྲས་འབྲེལ་པའི་ལས་ཀྱི་འཕྲོ་སད་ནས། །ཐུགས་ཡིད་གཅིག་འདྲེས་ངོ་མཚར་རྟེན་འབྲེལ་གྱི། །སྒོ་འཕར་བརྒྱ་ཕྲག་ཕྱེད་ལ༴ སྐྱེ་བས་ཐོབ་པའི་དྲི་མེད་ཡེ་ཤེས་སྤྱན། །དྲང་དེས་ཆོས་ལ་ལྐོག་ཏུ་མ་གྱུར་པས། །མཁས་དང་གྲུབ་པར་རློམས་
ཀུན་ཟིལ་གནོན་པའི། །མཁྱེན་གཉིས་རྩལ་ཆེན་རྫོགས་ལ༴ ས་སྤྱོད་གསུང་གི་འཁོར་ལོ་ལ་སོགས་པར། །བསྐྱེད་རྫོགས་རྫོགས་ཆེན་རྣལ་འབྱོར་མཐར་ཕྱིན་ཏེ། །འཁྲུལ་བཞིག་ཅིང་ལས་བཞི་རང་དབང་འབྱོར། །གྲུབ་པའི་གཙུག་རྒྱན་གྱུར་ལ༴ དག་པའི་སྣང་བར་པདྨ་འོད་ཞིང་དུ། །ཡང་ཡང་ཕེབས་ནས་བླ་མ་སྐུ་གསུམ་དང་། །རྗེ་འབངས་ཚོགས་བཅས་བསྙེན་སྒྲུབ་རྣམ་བཞི་མཛད། །དབང་བསྐུར་ལུང་བསྟན་ཐོབ་ལ༴ རྒྱལ་བ་རྒྱལ་སྲས་ཡི་དམ་དཔག་མེད་གཟིགས། །མཁའ་འགྲོ་རྣམས་དང་ཚོགས་ཀྱི་འདུ་བར་རོལ། །དམ་ཅན་གཏེར་སྲུང་དཀར་ཕྱོགས་སྐྱོང་རྣམས་ཀྱིས། །ཅི་བཅོལ་བཀའ་བཞིན་སྒྲུབ་ལ༴ བླ་མ་སྐོར་གསུམ་སྒྲུབ་སྡེ་ཞི་དང་ཁྲོ། །མཉམ་སྦྱོར་མདོ་སྒྱུ་རྫོགས་ཆེན་སྡེ་གསུམ་སོགས། །སྔོན་ཆད་ས་སྟེང་མ་བྱོན་ཆོས་རྟེན་གྱི། །ནོར་བུའི་མཛོད་ཆེན་ཕྱུངས་ལ༴ མདོ་ཁམས་གནས་ཆེན་ཉེར་ལྔ་གཙོར་གྱུར་པའི། །གནས་མཆོག་བརྒྱ་རྩའི་ཞལ་རས་དངོས་བརྒྱུད་ནས། །སྣང་བར་མཛད་ཅིང་སྐྱེ་དགུ་མཐའ་ཡས་པ། །ཐར་པའི་ཁ་ལོ་སྒྱུར་ལ༴ ཀར་འབྲུག་ཡབ་སྲས་སྔ་འགྱུར་བསྟན་འཛིན་མཆོག །གངས་ཅན་དཔལ་མགོན་རྣམས་ཀྱིས་གཙོར་མཛད་དེ། །རིས་མེད་སྐྱེས་ཆེན་ཀུན་གྱིས་
ཞབས་ལ་བཏུད། །བླ་མའི་བླ་མར་གྱུར་ལ༴ ཨོ་རྒྱན་རྡོ་རྗེའི་ལུང་གིས་བསྔགས་པ་ཡིས། །རྩ་བའི་ཆོས་བདག་རྣམ་བཅུའི་ཐོག་དྲངས་ཏེ། །མངའ་རིས་དབུས་གཙང་མདོ་ཁམས་མཐའ་དབུས་སུ། །ཟབ་གཏེར་ཕྲིན་ལས་སྤེལ་ལ༴ གནས་མཆོག་རྣམས་ལ་རྡོ་རྗེའི་བྱིན་ཆེན་ཕབ། །སྡེ་བརྒྱད་འབྱུང་པོར་བཀའ་ནན་རབ་བརྗིད་སྩལ། །ས་གནད་ཀུན་ཏུ་ཕྱི་ནང་རྟེན་འབྲེལ་བསྒྲིགས། །སྙིགས་མའི་སྐལ་ངན་ཟློག་ལ༴ ཐུན་མོང་ཐུན་མོང་མིན་པའི་སྨིན་གྲོལ་དང་། །སྒྲུབ་ཆེན་གར་འཆམས་མྱང་གྲོལ་སྦྱིན་པ་སོགས། །ཕྱོགས་མེད་སྩལ་བས་སྐྱེ་དགུ་གྲངས་མེད་པ། །འབྲེལ་ཚད་དོན་ལྡན་མཛད་ལ༴ རྟག་འཛིན་ཅན་རྣམས་དགེ་ལ་བསྐུལ་བ་དང་། །དོན་མཆོག་རྒྱ་ཆེན་གཞན་ལ་གཟིགས་ནས་ཀྱང་། །སྐལ་ལྡན་སྣང་ངོར་ཆོ་འཕྲུལ་དུ་མར་བཅས། །པདྨ་འོད་དུ་གཤེགས་ལ་གསོལ་བ་འདེབས། །པདྨས་ཡོངས་སུ་ཁེབས་པའི་ཞིང་ཁམས་སུ། །པདྨའི་འོད་ཟེར་རྒྱལ་བའི་སྲས་མཆོག་ནི། །པདྨའི་མྱུ་གུ་ལ་སོགས་ཕྱོགས་བཅུ་ན། །རྣམ་འཕྲུལ་མཐའ་ཡས་སྟོན་ལ་གསོལ་བ་འདེབས། །སྒོ་གསུམ་གུས་པས་གསོལ་འདེབས་བུ་རྣམས་ལ། །སྐུ་གསུང་ཐུགས་ཀྱི་བྱིན་རླབས་སྩོལ་བ་དང་། །
སྐྱེ་བ་ཀུན་ཏུ་འབྲལ་མེད་རྗེས་འཛིན་ནས། །དག་པའི་ཞིང་ཁམས་མཆོག་ཏུ་དྲང་དུ་གསོལ། །བྱང་ཆུབ་སྒྲུབ་པའི་འགལ་རྐྱེན་ཀུན་ཞི་ཞིང་། །གནས་སྐབས་བསམ་དོན་ཆོས་བཞིན་འགྲུབ་པ་དང་། །རིག་འཛིན་རྣམ་བཞིའི་ལམ་མཆོག་བདེ་བླག་བགྲོད། །མཐར་ཐུག་བདེ་ཆེན་རྡོ་རྗེ་སེམས་འགྲུབ་ཤོག །ཟབ་གཏེར་བསྟན་པ་འཛམ་གླིང་ཀུན་ཏུ་ཁྱབ། །དེར་འཛིན་སྐྱེས་མཆོག་སྐུ་ཚེ་བསྐལ་བརྒྱར་བརྟན། །ཕྲིན་ལས་རྟག་ཅིང་ཁྱབ་པའི་དགེ་ལེགས་ཀྱི། །བཀྲ་ཤིས་ཉི་མས་ས་གསུམ་སྣང་གྱུར་ཅིག །ཅེས་རིགས་ལྡན་མཁའ་འགྲོའི་གཙོ་མོ་བདེ་ཆེན་ཆོས་སྒྲོན་གྱིས་རྟེན་དང་བཅས་པའི་གསུང་གིས་བསྐུལ་བ་དང་། མོས་ལྡན་གཞན་དག་གིས་ཀྱང་མཚམས་སྦྱར་བ་ལ་བརྟེན། །གཏེར་ཆེན་ཆོས་ཀྱི་རྒྱལ་པོ་གང་དེས་གསང་བའི་མཛོད་ཀྱིས་དབུགས་དབྱུང་སྩལ་བ། ཀརྨ་ངག་དབང་ཡོན་ཏན་རྒྱ་མཚོའམ། བློ་གྲོས་མཐའ་ཡས་པའི་སྡེས་གུས་པ་ཆེན་པོས་བྲིས་ནས་གསོལ་བ་བཏབ་པ་དགེ་ལེགས་འཕེལ།། ༈ །།ཀུན་མཁྱེན་བླ་མ་འཇམ་དབྱངས་མཁྱེན་བརྩེའི་དབང་པོའི་འཁྲུངས་རབས་རགས་བསྡུས་ཀྱི་གསོལ་འདེབས་ངོ་མཚར་དཔལ་སྐྱེད་བཞུགས་སོ། །ན་མོ་གུ་ར་བེ། །རྒྱལ་བ་སྲས་དང་བཅས་པའི་ཡེ་ཤེས་མཛོད། །ཕྱོགས་དུས་རྫོགས་སངས་རྒྱས་ཀུན་སྐྱེད་པའི་ཡབ། །མཁའ་
ཁྱབ་འགྲོ་བ་འདྲེན་མཛད་ཐུགས་རྗེ་ཅན། །བཅོམ་ལྡན་འཇམ་དཔལ་དབྱངས་ལ་གསོལ་བ་འདེབས། །མཁྱེན་རབ་ཕུལ་བྱུང་ཆོས་ཀུན་ཐུགས་སུ་ཆུད། །ཨ་ཏིའི་བསྟན་བདག་འཇམ་དཔལ་བཤེས་གཉེན་དང་། །རྡོ་རྗེའི་སྐུ་བརྙེས་འགྲོ་དོན་རྟག་ཏུ་བཞུགས། །བི་མ་མི་ཏྲའི་ཞབས་ལ༴ གངས་ལྗོང་ཆོས་ཀྱི་ཉིན་བྱེད་འདྲེན་པ་ཡི། །ཤིང་རྟ་ཆེན་པོ་འཇམ་མགོན་ཁྲི་ལྡེའི་ཞབས། །འབྲེལ་ཚད་དོན་ལྡན་བཀའ་འདུས་ཆོས་ཀྱི་བདག །རྒྱལ་སྲས་མཆོག་གྲུབ་རྒྱལ་པོར་གསོལ་བ་འདེབས། །འོད་དཔག་མེད་མགོན་དཱི་པཾ་ཀ་ར་ཡི། །ཐུགས་སྲས་མཆོག་གྱུར་ནག་ཚེ་ཚུལ་ཁྲིམས་རྒྱལ། །སྤྱན་རས་གཟིགས་སྤྲུལ་གངས་ཅན་བསྟན་འགྲོའི་དཔལ། །རྒྱལ་བའི་འབྱུང་གནས་ཞབས་ལ༴ ངོ་མཚར་གཏེར་འབྱིན་རྒྱ་མཚོའི་འཁོར་ལོས་སྒྱུར། །མངའ་བདག་ཉང་རལ་ཉི་མ་འོད་ཟེར་དང་། །མི་ལའི་ཐུགས་སྲས་མཁའ་སྤྱོད་སྐུ་དངོས་གཤེགས། །རས་ཆུང་རྡོ་རྗེ་གྲགས་པར༴ བྱང་ཕྱོགས་རྒྱུད་དུ་དགེ་སློང་འཚོ་བྱེད་ཅེས། །རྒྱལ་བས་ལུང་བསྟན་མཉམ་མེད་སྒམ་པོ་པ། །བོད་ཡུལ་རྡོ་རྗེ་འཛིན་ཀུན་གཙུག་གི་རྒྱན། །གྲགས་པ་རྒྱལ་མཚན་ཞབས༴ ཆོས་རྒྱལ་གསུང་སྤྲུལ་གཏེར་ཁ་བཅོ་བརྒྱད་བདག །
འགྲོ་འདུལ་གུ་རུ་ཆོས་ཀྱི་དབང་ཕྱུག་དང་། ཁམས་གསུམ་སྐྱེ་དགུའི་སྐྱབས་གཅིག་ཆོས་ཀྱི་རྒྱལ། །བློ་གྲོས་རྒྱལ་མཚན་ཞབས༴ རྩོད་བྲལ་ཐེག་པའི་ཆོས་འཁོར་བླ་མེད་བསྐོར། །ཀུན་ཏུ་བཟང་པོ་དྲི་མེད་འོད་ཟེར་དང་། །བསམ་ཡས་སྒྱུ་འཕྲུལ་དྲྭ་བའི་གཏེར་མཛོད་འཆང་། །ཡར་རྗེ་ཨོ་རྒྱན་གླིང་པར༴ བཀའ་གདམས་བསྟན་པའི་མངའ་བདག་ཐམས་ཅད་མཁྱེན། །ཕྲིན་ལས་མཁའ་ཁྱབ་དགེ་འདུན་གྲུབ་པ་དང་། །རི་ཁྲོད་མགོན་པོས་རྗེས་བཟུང་མཆོག་དངོས་གྲུབ། །པ་ཆེན་བན་རཏྣར་གསོལ༴ རྒྱུད་སྡེ་རྒྱ་མཚོའི་འབྱུང་གནས་ཞ་ལུ་བ། །མཁྱེན་རྟོགས་དབང་ཕྱུག་མཁྱེན་རབ་ཆོས་ཀྱི་རྗེ། །གཞན་ཕན་ཆོ་འཕྲུལ་ཛམ་གླིང་ཁྱབ་པར་སྟོན། །གྲུབ་ཆེན་ཐང་སྟོང་རྒྱལ་པོར༴ གསང་ཆེན་སློབ་བཤད་བསྟན་འཛིན་ཀུན་གྱི་ཕུལ། །འཇམ་དཔལ་དབྱངས་དངོས་མཁྱེན་བརྩེའི་དབང་ཕྱུག་དང་། །མཚན་ཐོས་སྲིད་པའི་འཇིགས་སྐྱོབ་མཁས་གྲུབ་མཆོག །པདྨ་དབང་གི་རྒྱལ་པོར༴ རིག་སྔགས་འཆང་བ་མཐུ་ལྡན་དབང་པོའི་སྡེ། །བཀྲ་ཤིས་སྟོབས་རྒྱལ་མཁའ་འགྲོ་ཡོངས་གྲུབ་རྩལ། །རྩོད་པའི་དུས་མཐར་གངས་ཅན་སྐྱོབ་པའི་མགོན། །ངག་དབང་བློ་བཟང་རྒྱ་མཚོར༴ རྒྱལ་སྲས་ལྷ་རྗེའི་ཡང་སྲིད་བཅུ་
གཉིས་པ། །ཨོ་རྒྱན་གསུང་སྤྲུལ་གཏེར་ཆེན་ཆོས་རྗེ་གླིང་། །མཁྱེན་བརྩེ་ནུས་ལྡན་མཁན་ཆེན་ཨེ་ཝཾ་པ། །ནམ་མཁའ་འཆི་མེད་ཞབས་ལ༴ དགོངས་པའི་རྩལ་རྫོགས་ཨ་ཏིའི་བསྟན་པ་ཡིས། །ཀུན་ཏུ་ཁྱབ་མཛད་འཇིགས་མེད་གླིང་པ་དང་། །བཀའ་བབས་བདུན་ལྡན་མཚུངས་བྲལ་འཁོར་ལོའི་མགོན། །འཇམ་དབྱངས་མཁྱེན་བརྩེའི་དབང་པོར་གསོལ་བ་འདེབས། །མི་ཕྱེད་རྩེ་གཅིག་གུས་པས་གསོལ་བཏབ་མཐུས། །སྐྱེ་བ་ཀུན་ཏུ་དམ་པ་མཆོག་རྣམས་ཀྱིས། །རྗེས་སུ་བཟུང་ནས་རླབས་ཆེན་སྤྱོད་པ་ཡིས། །རང་གཞན་དོན་གཉིས་མཐའ་རུ་ཕྱིན་པར་ཤོག །མགོན་ཁྱོད་མངོན་པར་རྫོགས་པར་འཚང་རྒྱ་བའི། །འཁོར་གྱི་འདུས་པ་དང་པོར་སྐྱེས་ནས་ཀྱང་། །ཆོས་སྒོ་ཀུན་འཛིན་བསྟན་པ་ཕྱོགས་བརྒྱར་སྤེལ། །ཉིད་དང་དབྱེར་མེད་མངོན་པར་བྱང་ཆུབ་ཤོག །གང་གི་གསང་གསུམ་བསྐལ་བརྒྱར་བརྟན་པ་དང་། །ཟབ་རྒྱས་ཆོས་འཁོར་རྒྱུན་ཆད་མེད་པར་བསྐོར། །འཇིག་རྟེན་རྒུད་པ་མིང་ཡང་མི་གྲགས་ཤིང་། །དགེ་ལེགས་རྫོགས་ལྡན་གསར་པས་ཀུན་ཁྱབ་ཤོག །ཅེས་པའང་དཔལ་ལྡན་ཨེ་ཝཾ་པའི་བསྟན་འཛིན་ཆེན་པོ་མངའ་རིས་ཆོས་རྗེ་ཀུན་དགའ་འཇམ་དབྱངས་ཀྱིས་གསུང་བསྐུལ་རྟེན་བཅས་གནང་ངོར། ཀུན་མཁྱེན་བླ་མ་རིན་པོ་
ཆེའི་རྡོ་རྗེའི་བཀའ་སློབ་བློ་གྲོས་མཐའ་ཡས་པའི་སྡེས་ཆོ་འཕྲུལ་ཟླ་བའི་དཀར་ཕྱོགས་ཀྱི་ཚེས་བཟང་པོར་རྫོང་སར་བཀྲ་ཤིས་ལྷ་རྩེའི་ཆོས་གྲྭ་ཆེན་པོར་བགྱིས་པ་དགེ་ལེགས་འཕེལ།། ༈ །།སྐྱེས་ཐོབ་མཁྱེན་རབས་ནམ་མཁའི་ཁྱོན་ལྟར་ཡངས། །བསླབ་པ་གསུམ་གྱི་སྦྱངས་ཡོན་མཐའ་རུ་ཕྱིན། །འབྲེལ་ཚད་རྒྱལ་སྲས་སྤྱོད་པར་འཇུག་མཛད་པ། །ཨོ་རྒྱན་འཇིགས་མེད་ཆོས་ཀྱི་དབང་པོ་ལ། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །དགེའོ།། ༈ །།བྱང་ཆུབ་སེམས་དང་རྣམ་པར་མི་རྟོག་པ། །ཟུང་འཇུག་གྲུབ་བརྙེས་རྗེ་བཙུན་ཁྱི་ཐུལ་ཅན། །མི་ཕམ་མགོན་དང་ཚོགས་གཉིས་ལེགས་གྲུབ་སོགས། །དམ་པའི་བྱིན་རླབས་ཡེ་ཤེས་རྣམ་པར་རོལ། །རྡོ་རྗེ་འཆང་དངོས་པདྨ་ཉིན་བྱེད་ཀྱིས། །རྗེས་བཟུང་ཀརྨ་ཀཾ་ཚང་རིང་ལུགས་པ། །ངག་གི་དབང་ཕྱུག་ཐོས་བསམ་བསྒོམ་གསུམ་གྱི། །ཡོན་ཏན་ཀུན་ནས་འདུ་བའི་རྒྱ་མཚོ་མཆོག །དཔལ་ལྡན་བླ་མའི་ཞབས་ལ་གསོལ་བ་འདེབས། །དཀོན་མཆོག་རྩ་བ་གསུམ་གྱི་བདེན་པའི་མཐུས། །གསང་གསུམ་འགྱུར་མེད་རྡོ་རྗེ་གསུམ་དུ་བརྟན། །གཞན་ཕན་བཞེད་པའི་དོན་ཀུན་མཐར་ཕྱིན་ཞིང་། །བདག་སོགས་རྣམས་ཀྱང་སྐྱེ་ནས་
ཚེ་རབས་སུ། །མཚན་ཉིད་ཀུན་ལྡན་རྡོ་རྗེ་སློབ་དཔོན་དང་། །མི་འབྲལ་རང་གཞན་དོན་གཉིས་ལྷུན་གྱིས་གྲུབ། །རྡོ་རྗེ་འཛིན་པའི་གོ་འཕང་མཆོག་བརྙེས་ཤོག །ཅེས་སོ་སྐྱེ་ལ་གསོལ་འདེབས་དངངས་བསྟོད་འདི་ལྟར་མི་འོས་ཀྱང་དད་ལྡན་ཚེ་དབང་བསམ་འགྲུབ་ཀྱིས་བསྐུལ་ངོ་མི་ལྕོགས་ཕྱིར་དཔལ་སྤུངས་ཐུབ་བསྟན་ཆོས་འཁོར་གླིང་དུ་བྲིས་པ་དགེ་ལེགས་འཕེལ།། ༈ །།ཡོན་ཏན་རྒྱ་མཚོ་དཔལ་ལས་ལེགས་འཁྲུངས་ཤིང་། །མཁྱེན་གཉིས་བློ་གྲོས་འོད་དཀར་མཐའ་ཡས་འཕྲོ། །ཟག་མེད་བདེ་བའི་རྡོ་རྗེའི་ཆ་གང་བ། །དཔལ་ལྡན་བླ་མའི་ཞབས་ལ་གསོལ་བ་འདེབས། །ཟབ་གསང་དཀྱིལ་འཁོར་རྒྱ་མཚོའི་མགོན་པོ་ཉིད། །སྙིགས་དུས་རྡོ་རྗེ་འཛིན་པའི་སྐུར་ཤར་བ། །རང་རིག་སྤྲོས་བྲལ་ངང་དུ་རོ་གཅིག་པར། །རྟག་པ་དམ་པའི་སྐུ་རུ་བཞུགས་གསོལ་འདེབས། །བདག་སོགས་སྐྱེ་ཀུན་མཆོག་གི་བཤེས་གཉེན་གྱིས། །རྗེས་བཟུང་བྱང་ཆུབ་སེམས་མཆོག་རྣམ་གཉིས་དང་། །མི་འབྲལ་རྡོ་རྗེའི་དམ་ཚིག་མཐར་ཕྱིན་ནས། །དཔལ་ལྡན་རྡོ་རྗེ་སེམས་དཔའི་གནས་ཐོབ་ཤོག །ཅེས་པའང་ཨེ་ཝཾ་པ་སརྦ་ཛྙཱ་མཆོག་སྤྲུལ་རིན་པོ་ཆེའི་ཉེ་གནས་ཚུལ་རྒྱམ་པས་བཞེད་ངོར་གུ་ས་སྤེལ་བ་དགེ་ལེགས་འཕེལ།། །།
ན་མོ་མཉྫུ་ཤྲི་ཡེ། །མཁའ་ཁྱབ་གཉུག་མའི་རྡོ་རྗེའི་ཡེ་ཤེས་ཀྱིས། །སྒྲིབ་གསུམ་ཆ་དང་བཅས་པ་ཟོས་པ་ལས། །མཁྱེན་གཉིས་བཅུ་དྲུག་ལང་ཚོ་འབར་བ་ཅན། །བླ་མ་འཇམ་དཔལ་དབྱངས་ལ་གསོལ་བ་འདེབས། །གང་གི་བྱིན་རླབས་བདུད་རྩིའི་འོད་བཟང་པོས། །བློ་གྲོས་རྒྱ་མཚོ་ཡོངས་སུ་གང་བ་ལས། །རིས་མེད་བསྟན་པའི་པད་ཚལ་རྒྱས་བྱེད་པ། །བསྟན་འཛིན་མཆོག་རྣམས་བསྐལ་བརྒྱར་ཞབས་བརྟན་གསོལ། །བདག་ཀྱང་སྐྱེ་བར་མགོན་པོ་འཇམ་དབྱངས་ཀྱིས། །རྗེས་བཟུང་སྲིད་ཞིའི་མཐའ་ལ་མི་གནས་པར། །ཕྱིར་མི་ལྡོག་པའི་ཆོས་འཁོར་བསྐོར་བ་ལ། །ཐོགས་མེད་ངག་གི་དབང་ཕྱུག་ཉིད་གྱུར་ཅིག །ཅེས་པའང་ཐར་རྩེ་མཆོག་གི་སྤྲུལ་པའི་སྐུ་ཆེན་པོ་འཇམ་དབྱངས་མཁྱེན་བརྩེས་བོང་བ་གསེར་གཟིགས་ཀྱི་ཚུལ་འདི་རང་ཉིད་ལ་སྦྱར་བར་དགོས་ཞེས་བཀའ་ཕེབས་རྟེན་འབྲེལ་ཆེད་དུ་མ་ལྡོག་པར། །འཕགས་ཆེན་སྤྱི་ལ་གསོལ་བ་འདེབས་པའི་ཁུངས་སུ་བྱས་ཏེ་གུ་ས་རས་བྲིས་པ་དགེ་ལེགས་འཕེལ།། ༈ །།ངོ་བོ་སྤྲོས་དང་བྲལ་བ་ཆོས་ཀྱི་སྐུ། །རང་བཞིན་གསལ་ལམ་འགགས་ལོངས་སྤྱོད་རྫོགས། །ཐུགས་རྗེ་གང་འདུལ་དེར་སྣང་སྤྲུལ་པའི་སྐུ། །དཔལ་ལྡན་བླ་མའི་ཞབས་ལ་གསོལ་བ་འདེབས། །འཁོར་འདས་ཐམས་ཅད་གདོད་
མའི་གཞི་ལ་རྫོགས། །རྟོགས་ནས་མངོན་པར་བྱང་ཆུབ་གཞན་སྣང་དུ། །རྣམ་རོལ་ཅིར་ཡང་འཆར་བའི་སེམས་དཔའ་ཆེ། །བློ་གྲོས་མཐའ་ཡས་ཞབས་ལ༴ འཁྲུལ་མེད་སྙིང་པོའི་དོན་གཟིགས་སེང་གེའི་སྒྲ། །ཡང་སྲིད་ཀུན་ཏུ་བསྙེངས་པ་མེད་པར་སྒྲོགས། །ཐབས་ཤེས་ཕྱག་རྒྱས་བསྡམས་པའི་རྡོ་རྗེ་འཛིན། །པདྨ་གར་དབང་རྩལ་ལ༴ སྐྱབས་གནས་བླ་མ་དཀོན་མཆོག་ཀུན་འདུས་སུ། །ངེས་པ་རྙེད་ནས་རྩེ་གཅིག་གསོལ་བཏབ་མཐུས། །རྒྱལ་ཀུན་རྡོ་རྗེ་བཞི་ཡི་བྱིན་རླབས་བཅུད། །བདག་རྒྱུད་ལ་ཞུགས་སྐད་ཅིག་སྨིན་གྲོལ་ཤོག །སྡོམ་པའི་ཚུལ་ཁྲིམས་རྣམ་གསུམ་རྣམ་པར་དག །དགེ་བ་ཆོས་སྡུད་ཕར་ཕྱིན་དྲུག་མཐར་སོན། །སེམས་ཅན་དོན་བྱེད་བསྡུ་བཞིའི་རྩལ་ཆེན་རྫོགས། །རིམ་གཉིས་བརྟན་ཐོབ་ཟུང་འཇུག་ཆེ་བརྙེས་ཤོག །ཅེས་པ་འདིའང་ཛཾ་ཐང་དཔོན་བླ་མ་བསླབ་པ་གསུམ་ལྡན་ཀརྨ་དམ་ཆོས་ནས་གསུང་བསྐུལ་ངོར་ཀརྨ་ངག་དབང་ཡོན་ཏན་རྒྱ་མཚོས་དཔལ་སྤུངས་ཡང་ཁྲོད་ནས་བྲིས་ཏེ་ཕུལ་བ་དགེ་ལེགས་འཕེལ།། ༈ །།ཕྱོགས་མེད་དགེ་བའི་བཤེས་གཉེན་ཚུལ་བཞིན་བསྟེན། །རིས་མེད་ཐུབ་པའི་བསྟན་ལ་གཅིག་ཏུ་གུས། །ཤེས་དང་ཤེས་བྱར་ཐོས་བསམ་སྒོམ་ལྡན་པ། །དཔལ་ལྡན་བླ་མའི་ཞབས་ལ་
གསོལ་བ་འདེབས། །ངག་གི་དབང་ཕྱུག་ཡོན་ཏན་རྒྱ་མཚོའི་མཇིངས། །ལྷག་བསམ་བློ་གྲོས་རིན་ཆེན་མཐའ་ཡས་པ། །པདྨའི་རིགས་འཆང་གར་གྱི་དབང་ཕྱུག་རྩལ། །རྣམ་སྣང་ལོ་ཙཱའི་ངོ་བོར་གསོལ་བ་འདེབས། །རྒྱལ་བ་དགྱེས་པའི་སྤྱོད་མཆོག་ཀུན་རྫོགས་ནས། །སྣང་མཛད་ཉི་མས་འཇིག་རྟེན་གསལ་བའི་ཚེ། །འདུས་པ་མཆོག་གི་གྲངས་སུ་དབུགས་དབྱུང་ཞིང་། །བྱང་ཆུབ་ཆེན་པོར་ལུང་བསྟན་ཐོབ་གྱུར་ཅིག །ཅེས་པའང་དད་བརྩོན་མཁྱེན་རབ་ཀྱིས་རྒྱུད་ཕྱུག་པ་སྡེ་བ་དྲུང་ནམ་མཁའ་རྒྱལ་མཚན་གྱི་ཐུགས་བཞེད་སྐོང་སླད་བློ་གྲོས་མཐའ་ཡས་ཀྱིས་ལྷ་ལྡན་སྤྲུལ་པའི་གནས་སུ་བྲིས་པ་དགེ་ལེགས་འཕེལ།། ༈ །།དུས་གསུམ་རྒྱལ་བ་སྲས་བཅས་སྐྱེད་པའི་ཡུམ། །བཅོམ་ལྡན་རྗེ་བཙུན་འཕགས་མ་སྒྲོལ་མ་དང་། །དབྱེར་མེད་བླ་མ་སངས་རྒྱས་ཀུན་འདུས་ལ། །སྒོ་གསུམ་རྩེ་གཅིག་གུས་པས་གསོལ་བ་འདེབས། །འཆི་མེད་རྡོ་རྗེ་བདེ་བའི་ཡེ་ཤེས་ཀྱིས། །སྨིན་ཅིང་གྲོལ་ནས་དོན་གཉིས་མྱུར་འགྲུབ་ཤོག །ཅེས་འཇམ་དཔལ་བསྟན་དར་སོགས་དད་ལྡན་རྣམས་ཀྱི་ངོར་བློ་གྲོས་མཐའ་ཡས་ཀྱིས་སྤེལ་བ་དགེ་ལེགས་འཕེལ།། ༈ །།སྐྱེས་ཆེན་ཡོངས་འཛིན་དུ་མས་རྗེས་སུ་བཟུང་། །རིས་མེད་རྒྱལ་བསྟན་
ཀུན་ལ་མཁྱེན་པ་རྒྱས། །སུམ་ལྡན་རྡོ་རྗེ་འཛིན་མཆོག་རིགས་ཀྱི་བདག །བློ་གྲོས་མཐའ་ཡས་ཞབས་ལ་གསོལ་བ་འདེབས། ཞེས་དགེ་སློང་ཚོགས་གཉིས་རྡོ་རྗེའི་ངོར་རི་རྒྱལ་རྫོང་དུ་རང་ཉིད་ཀྱིས་སྨྲས་པ་དགེ་ལེགས་འཕེལ།། ༈ །།ན་མོ་གུ་རུ། །ཀ་དག་ལྟ་བ་ལྷུན་འབྱམས་གསང་བའི་སྦུབས། །རིག་པའི་བུམ་སྐུ་ཁྱད་ཆོས་རྣམ་དྲུག་རྫོགས། །ཀུན་བཟང་ཆོས་ཀྱི་སྐུ་དང་ངོ་བོ་གཅིག །གནས་ལུགས་རྟོགས་ལྡན་མཆོག་ལ་གསོལ་བ་འདེབས། །ལྷུན་གྲུབ་སྒོམ་པ་འོད་ཀྱི་ཁང་བུ་རུ། །ལྔ་ལྡན་ཐིག་ལེ་རིགས་བརྒྱའི་སྣང་བརྙན་འཁྱིལ། །རིགས་ལྔ་ལོངས་སྤྱོད་རྫོགས་དང་རང་བཞིན་གཅིག །མངོན་སུམ་རྣལ་འབྱོར་མཆོག་ལ༴ གང་ཤར་སྤྱོད་པ་རོ་སྙོམས་རྒྱལ་ཁམས་ན། །འཁོར་འདས་རྫུན་རིས་ཆུ་དང་ཆུ་ལྟར་འདྲེས། །མ་ངེས་སྤྲུལ་པའི་སྐུ་དང་ཐུགས་རྗེ་གཅིག །བརྟུལ་ཞུགས་སྤྱོད་འཆང་མཆོག་ལ༴ ཞེན་ལོག་ངེས་འབྱུང་ལྷ་ཡི་དགའ་ཚལ་ན། །མོས་གུས་སྙིང་རྗེ་མེ་ཏོག་ལྡིང་ཁང་བཀྲ། །དག་སྣང་རིས་མེད་སྦྲང་རྩིའི་ཟིལ་དངར་སྐྱུགས། །ལམ་ཞུགས་གང་ཟག་མཆོག་ལ༴ དུང་དུང་སྐྱོ་ཤས་མྱ་ངམ་ཐང་ཆེན་ཏུ། །ལྷང་ལྷང་འོ་དོད་པདྨའི་
མགོན་ལ་འབོད། །ཐིབ་ཐིབ་བྱིན་རླབས་ཆར་སྤྲིན་སྐུལ་བ་པོ། །རིག་འཛིན་བླ་མ་མཆོག་ལ་གསོལ་བ་འདེབས། །ཚོགས་དྲུག་ལྷུག་པར་ཡན་པའི་དོ་ར་ན། །རིག་པའི་ཁྱེའུ་ཆུང་རང་འགྲོས་གར་སྟབས་རྩེ། །བདེ་སྟོང་ཁ་ཡི་ཆང་གིས་སེམས་མྱོས་པ། །གསང་སྔགས་མོས་སྤྱོད་མཆོག་ལ་གསོལ་བ་འདེབས། །བས་མཐའི་ནགས་ཚལ་བསམ་གཏན་སྐྱིལ་པོ་རུ། །སེམས་ཀྱི་སྤྲོས་བཅད་རྣམ་རྟོག་ནང་སྡུད་ཀྱང་། །ཤེས་བྱའི་མཁའ་ལ་བློ་གྲོས་སྣང་བ་ཤར། །མཁས་དབང་སྒྲུབ་པོ་མཆོག་ལ་གསོལ་བ་འདེབས། །སྣང་སྟོང་ལྷ་སྐུ་ཕྱག་རྒྱར་ལམས་སེ་ལམ། །གྲགས་སྟོང་རྡོ་རྗེའི་སྔགས་བཟླས་དི་རི་རི། །དྲན་སྟོང་ཆོས་ཉིད་གཉུག་མར་ཡ་ལ་ལ། །ཁྱེར་སོ་གསུམ་ལྡན་མཆོག་ལ་གསོལ་བ་འདེབས། །བྱང་ཆུབ་སེམས་ཀྱིས་བཟུང་བའི་གསེར་གླིང་དུ། །ཅི་སྣང་ཅི་སྤྱོད་ཡེ་ཤེས་རིན་པོ་ཆེ། །དེ་ཕྱིར་དམ་པའི་སེམས་ལ་ནན་ཏན་ཅན། །གསེར་འགྱུར་རྩི་བཟང་མཆོག་ལ་གསོལ་བ་འདེབས། །འཁོར་བ་དོང་ནས་སྤྲུགས་པའི་སེམས་མཆོག་བསྐྱེད། །འབྲེལ་ཚད་དོན་དང་ལྡན་པའི་སྨོན་ལམ་འདེབས།
ཁམས་གསུམ་རྒྱ་ཐེག་ཆེན་པོའི་དགོངས་ཉམས་སྐྱོང་། །ཐེག་ཆེན་རིགས་འཁྲུངས་མཆོག་ལ༴ དུས་མཐར་རྡོ་རྗེ་འཆང་ཉིད་ཐ་མལ་གྱི། །སློབ་དཔོན་གཟུགས་ཀྱིས་གདུལ་བྱའི་དོན་མཛད་ཅེས། །བསླུ་མེད་རྡོ་རྗེའི་བདེན་ཚིག་མི་བརྫུན་པས། །བདག་གིས་གསོལ་བཏབ་འབྲས་བུ་དོན་ཡོད་ཤོག །རྒྱལ་བའི་ཐུགས་རྗེའི་ཉི་མ་ཁྱབ་བརྡལ་ཡང་། །བླ་མའི་རྟེན་འབྱུང་མེ་ཤེལ་མ་བརྟེན་པར། །འགྲོ་རྒྱུད་བག་ཆགས་སྲེག་པར་མི་མཛད་པས། །སྨིན་གྲོལ་རྟེན་འབྲེལ་རྒྱུད་ལ་འགྲིགས་པར་ཤོག །དོན་དམ་ཡེ་ཤེས་ཀུན་ཀྱང་སྲོག་གཅིག་ཕྱིར། །དཔལ་ལྡན་བླ་མ་གཅིག་གི་ཐུགས་རྗེ་ལ། །བརྟེན་ནས་རྒྱལ་ཀུན་བྱིན་རླབས་འཇུག་ངེས་པས། །རྟོགས་གྲོལ་དུས་མཉམ་དངོས་གྲུབ་སྩལ་དུ་གསོལ། །ཅེས་པའང་དགེ་བཤེས་ཏིང་འཛིན་བཟང་པོའི་ངོར་པདྨ་གར་དབང་རྩལ་གྱིས་སོ། །བདག་དང་བདག་འདྲའི་བླ་མའི་གཟུགས་བརྙན་ལ། །གསོལ་འདེབས་བརྒྱ་ལས་ཡིག་དྲུག་གཅིག་གིས་དགའ། །མོས་གུས་ཡལ་ག་ལྡེམས་ཀྱང་བྱིན་རླབས་འོད། །མ་མཆིས་རྟོགས་པའི་པདྨེ་བཞད་ནུས་མིན། །འོན་ཀྱང་མོས་ལྡན་ཏིང་འཛིན་བཟང་པོ་ནས། །ཡང་ཡང་གསུངས་པའི་གཡར་རོ་མ་གཅོག་ཕྱིར། །སྐྱེས་ཐོབ་སྤྱི་དང་ཁྱད་པར་ཁྱེད་རང་གི། དྲིན་ཐོབ་ཀུན་ལ་གསོལ་གདབ་རུང་འདི་བྲིས། །ཐུགས་རྗེས་གཞན་རྒྱུད་གྲོལ་བའི་མཐུ་མེད་
ཀྱང་། །ཨོ་རྒྱན་རྗེ་ལ་བཟོད་མེད་མོས་གུས་ཐོག །བཀའ་བརྒྱུད་འདི་ལ་བྱིན་རླབས་ཆུ་རྒྱུན་མངའ། །རྟེན་འབྲེལ་དེ་མཐུས་ཁྱོད་ཐུགས་སྨིན་གྲོལ་ཤོག །མངྒ་ལཾ།། ༈ །གདོད་ནས་སྤྲོས་བྲལ་བླ་མ་ཆོས་ཀྱི་སྐུ། །རང་རིག་རང་གསལ་ངང་ནས་གསོལ་བ་འདེབས། །གཉིས་མེད་གཉིས་སུ་འཁྲུལ་པའི་སྣང་སེམས་ཀུན། །ཀ་དག་དབྱིངས་སུ་གྲོལ་བར་བྱིན་གྱིས་རློབས། །བདེ་སྟོང་དབྱེར་མེད་བླ་མ་ལོངས་སྤྱོད་རྫོགས། །ཁྱབ་བརྡལ་མཉམ་ཡངས་ངང་ནས་གསོལ་བ་འདེབས། །འཁོར་འདས་མཉམ་ཉིད་བདེ་བ་ཆེན་པོ་རུ། །ཡེ་རྫོགས་གནས་ལུགས་རྟོགས་པར་བྱིན༴ གང་འདུལ་དེར་སྟོན་བླ་མ་སྤྲུལ་པའི་སྐུར། །མོས་གུས་གདུང་ཤུགས་ངང་ནས་གསོལ་བ༴ སྒྱུ་མའི་རང་བཞིན་ཀུན་རྫོབ་འཁྲུལ་སྣང་འདི། །བདེན་མེད་རང་སར་གྲོལ་བར༴ སྨིན་གྲོལ་ཆར་འབེབས་ཐར་པའི་ས་བོན་བསྐྱེད། །བཀའ་དྲིན་མཉམ་མེད་རིག་འཛིན་བླ་མ་ལ། །གསོལ་བ་འདེབས་སོ་འཁྲུལ་པ་སྐད་ཅིག་མར། །གཞི་མེད་རྩ་བྲལ་ཆོས་སྐུར་རྟོགས་པར་མཛོད། །སྲིད་ལས་ངེས་འབྱུང་རྩེ་གཅིག་སྒྲུབ་ལ་བརྩོན། །མོས་གུས་སྙིང་རྗེ་དག་སྣང་རྩལ་ཆེན་རྫོགས། །བསྐྱེད་རྫོགས་ཟུང་འཇུག་ཟབ་ལམ་མཐའ་རུ་ཕྱིན། །ཚེ་གཅིག་གདོད་
མའི་གྲོལ་སར་བྱང་ཆུབ་ཤོག །ཅེས་དགེ་བཤེས་པདྨ་འོད་གསལ་བཞེད་ངོར་བློ་གྲོས་མཐའ་ཡས་ཀྱིས་རྫོང་ཤོད་གནས་སུ་སྤེལ་བ་དགེ་ལེགས་འཕེལ།། ༈ །།རྣམ་སྣང་རྡོ་རྗེ་སེམས་དཔའ་རིགས་ཀུན་བདག། བརྒྱུད་གསུམ་རིག་འཛིན་བླ་མའི་སྤྲིན་ཕུང་འཕྲོ། །ཡི་དམ་དཀྱིལ་འཁོར་བསམ་ཡས་ལྷུན་གྱིས་རྫོགས། །མཁའ་འགྲོ་ཆོས་སྐྱོང་རོལ་པའི་རྩལ་དུ་ཤར། །ཀུན་ཀྱང་དཔལ་ལྡན་བླ་མའི་རང་བཞིན་ཏེ། །བླ་མ་ཉིད་ལས་སྐྱབས་ཡུལ་གུད་ན་མེད། །གཅིག་ཆོག་རྒྱལ་པོ་བླ་མ་དམ་པ་ལ། །རྩེ་གཅིག་གུས་པས་སྙིང་ནས་གསོལ་བ་འདེབས། །དམིགས་མེད་ཐུགས་རྗེ་ཆེན་པོའི་རྩལ་སྐྱེད་ལ། །བདག་རྒྱུད་སྨིན་ཅིང་གྲོལ་བར་བྱིན་གྱིས་རློབས། །རང་གཞན་དོན་གཉིས་ལྷུན་གྱིས་གྲུབ་པ་དང་། །འཁོར་བ་དོང་ནས་སྤྲུགས་པར་བྱིན་གྱིས་རློབས། །ཅེས་པའང་སངས་རྒྱས་མཉན་པ་གྲུབ་ཆེན་གྱི་རྗེས་འཇུག་དགེ་སློང་ཀརྨ་བཟང་ལྡན་ནས་ཆེད་བུ་བསྐུལ་ངོར་ཀརྨ་ངག་དབང་ཡོན་ཏན་རྒྱ་མཚོས་དཔལ་སྤུངས་ཡང་ཁྲོད་ནས་སྤེལ་བ་དགེ་ལེགས་འཕེལ།། ༈ །།རང་བྱུང་ཡེ་ཤེས་བླ་མ་རྡོ་རྗེ་སེམས། །ཐབས་ཤེས་བརྡ་གར་རིག་རྩལ་སྤྲོ་བསྡུའི་སྤྲིན། །དབྱིངས་ལས་མ་གཡོས་འོད་གསལ་ཀུན་ཁྱབ་གདངས། །རང་རིག་ཐིག་ལེ་ཆེན་
པོའི་ངོ་བོ་ཤར། །གདོད་ནས་གཉིས་སུ་མེད་པར་སྐྱབས་སུ་མཆི། །འཁོར་འདས་མཉམ་ཉིད་བྱང་ཆུབ་སེམས་མཆོག་བསྐྱེད། །སྤང་བླང་ཡེ་གྲོལ་རྡོ་རྗེའི་དམ་ཚིག་བཟུང་། །ཀློང་ཡངས་ཁྱབ་གདལ་ངང་དུ་གསོལ་བ་འདེབས། །སྤང་རྟོགས་ཡོན་ཏན་རྒྱ་མཚོར་འཁྱིལ་པ་ལ། །མཁྱེན་གཉིས་བློ་གྲོས་ནོར་མཆོག་མཐའ་ཡས་གཏམས། །པདྨའི་ཕྲིན་ལས་གར་གྱི་དབང་ཕྱུག་རྩལ། །འཆི་མེད་བསྟན་གཉིས་གླིང་པར་གསོལ་བ་འདེབས། །གཞི་ཡི་རིགས་སད་བྱང་ཆུབ་སེམས་གཉིས་འབྱོངས། །མཁའ་ཁྱབ་འགྲོ་ཀུན་གདོད་མའི་གྲོལ་ས་རུ། །སྒྲོལ་བའི་ནུས་ཐོབ་ཡེ་ཤེས་རྩལ་ཆེན་རྫོགས། །སྲས་བཅས་རྒྱལ་བའི་དགོངས་པ་སྐོང་བྱེད་ཤོག །ཅེས་རིག་འཛིན་སྤྲུལ་པའི་སྐྱེས་མཆོག་འགྲོ་འདུལ་དཔའ་བོ་རྡོ་རྗེའི་བཞེད་སྐོང་དུ་སྤེལ་བ་ཤུ་བྷཾ་ཀུརྦནྟུ།། ༈ །།སངས་རྒྱས་ཀུན་འདུས་གུ་རུ་པདྨ་འབྱུང་། །དེ་ཡི་རིག་འཛིན་བསྟན་གཉིས་གཡུང་དྲུང་གླིང་། །དབྱེར་མེད་འོད་གསལ་ངང་དུ་གསོལ་བ་འདེབས། །བྱང་ཆུབ་བར་དུ་མི་འབྲལ་རྗེས་འཛིན་གསོལ། །སྤྱན་རས་གཟིགས་དབང་རྒྱལ་མཆོག་ཀརྨ་པ། །དེ་ཡི་བསྟན་འཛིན་ངག་གི་དབང་ཕྱུག་དཔལ། །དབྱེར་མེད་མཉམ་ཉིད་ཀློང་དུ་གསོལ་བ་འདེབས། །བྱང་ཆུབ་བར་དུ༴
འོད་དཔག་མེད་དངོས་ཆོས་ཀྱི་དབང་ཕྱུག་ཞབས། །དེ་ཡི་བརྒྱུད་འཛིན་པདྨ་གར་གྱི་དབང་། །དབྱེར་མེད་རང་རིག་དབྱིངས་སུ་གསོལ་བ་འདེབས། །བྱང་ཆུབ༴ བྱམས་མགོན་དངོས་སྣང་པདྨ་ཉིན་བྱེད་དབང་། །དེ་ཡི་ཐུགས་སྲས་བློ་གྲོས་མཐའ་ཡས་ཞབས། །དབྱེར་མེད་མོས་གུས་ཀློང་དུ་གསོལ་བ་འདེབས། །བྱང་ཆུབ༴ སྡོམ་དང་དམ་ཚིག་ཉམས་ཆགས་ཉེས་ལྟུང་སོགས། །འདི་ཕྱིར་སྒྲིབ་པའི་ལས་ངན་གང་བསགས་པ། །སྙིང་ནས་གནོང་འགྱོད་དྲག་པོས་མཐོལ་བཤགས་ན། །བྱང་དག་ཚངས་པ་མཆོག་གི་དངོས་གྲུབ་སྩོལ། །ཅི་བྱས་བསྟན་འགྲོའི་དོན་དུ་འགྱུར་བ་དང་། །འདི་ཕྱིར་བསམ་པའི་དོན་ཀུན་ལྷུན་གྱིས་གྲུབ། །འབྲེལ་ཚད་དོན་ལྡན་རྒྱལ་སྲས་སྤྱོད་པ་ཡིས། །ས་ལམ་གེགས་མེད་མྱུར་དུ་བགྲོད་པར་ཤོག །འདི་བཟུང་བྱང་ཆུབ་སྙིང་པོ་མཆིས་ཀྱི་བར། །དཔལ་ལྡན་བླ་མ་མཆོག་གིས་རྗེས་སུ་བཟུང་། །ཐུགས་ཡིད་གཅིག་དྲེས་ཕྲིན་ལས་ཕྱོགས་བརྒྱར་སྤེལ། །དོན་གཉིས་མཐའ་རུ་ཕྱིན་པར་བྱིན་གྱིས་རློབས། །ཞེས་ཤུ་བྷ་འབྲུག་དགུ་གླིང་གི་བསྟན་པའི་མངའ་བདག་ཆོས་ཀྱི་རྗེ་ནང་སོ་དབང་ཕྱུག་སེང་གེའི་ཞལ་འདོན་རྒྱུ་བློ་གྲོས་མཐའ་ཡས་པའི་སྡེས་བགྱིས་པ་དགེ་ལེགས་འཕེལ།། ༈ །།
ངེས་འབྱུང་ཚུལ་ཁྲིམས་ཤན་ཏུ་རྣམ་པར་དག །བརྟན་མཁས་ཡོན་ཏན་ཀུན་རྫོགས་གནས་བརྟན་ཆེ། །བླང་དོར་ལམ་སྟོན་ཐར་པའི་ས་མཁན་མཆོག །ཀརྨ་བཀྲ་ཤིས་འོད་ཟེར་ལ་གསོལ་བ་འདེབས། །བྱང་ཆུབ་སེམས་ཀྱི་རྩ་བ་རབ་ཏུ་བརྟན། །རྒྱལ་སྲས་སྤྱོད་ལ་འཇུག་པའི་ཡལ་ག་རྒྱས། །གཞན་ཕན་མེ་ཏོག་འབྲས་བུའི་ཁུར་གྱིས་དུད། །ཀརྨ་བཀྲ་ཤིས་འོད་ཟེར་ལ་གསོལ་བ་འདེབས། །དབང་བཞིའི་ཡེ་ཤེས་ཟབ་མོས་ལེགས་སྨིན་ཅིང་། །བསྐྱེད་རྫོགས་གདམས་པས་ཐུགས་རྒྱུད་ཡོངས་སུ་གྲོལ། །ས་ལམ་གོང་དུ་འཕེལ་བའི་རྡོ་རྗེ་འཛིན། །ཀརྨ་བཀྲ་ཤིས་འོད་ཟེར་ལ་གསོལ་བ་འདེབས། །མཚན་ལྡན་བླ་མའི་གསང་གསུམ་བསྐལ་བརྒྱར་བརྟན། །དད་ལྡན་སློབ་མའི་བསམ་དོན་ཆོས་བཞིན་འགྲུབ། །རྣམ་ཀུན་འབྲལ་མེད་ཐོས་བསམ་སྒོམ་ལ་བརྩོན། །སྐྱོབ་པ་བླ་མེད་འགྲོ་བའི་མགོན་གྱུར་ཤོག །ཅེས་དགེ་བཤེས་བློ་གྲོས་ཕུན་ཚོགས་ཀྱིས་བསྐུལ་ངོར་ཀརྨ་ངག་དབང་ཡོན་ཏན་རྒྱ་མཚོས་བགྱིས་པ་དགེ་ལེགས་འཕེལ།། ༈ །།ན་མོ་གུ་རུ་བུདྡྷ་དྷརྨཱ་སངྒྷཱ་ཡ། བཅོམ་ལྡན་དེ་བཞིན་གཤེགས་པ་འོད་དཔག་མེད། །ཐུགས་རྗེ་ཆེ་ལྡན་སྟོན་པ་ཤཱཀྱ་ཐུབ། །མངོན་དགའི་ཞིང་བཞུགས་མགོན་པོ་མི་འཁྲུགས་པ། །སྨན་གྱི་བླ་མ་བཻ་ཌཱུརྻ་ཡི་འོད། །ངན་སོང་
ཀུན་སྦྱོང་རྣམ་པར་སྣང་མཛད་དང་། །ངན་འགྲོའི་འཇིགས་སྐྱོབས་རིན་ཆེན་གཙུག་ཏོར་ཅན། །འཁོར་བ་དོང་སྤྲུགས་འཕགས་མཆོག་སྤྱན་རས་གཟིགས། །འཇིགས་ཀུན་སེལ་མཛད་རྗེ་བཙུན་སྒྲོལ་མ་ཡུམ། །རྩ་གསུམ་ཀུན་འདུས་གུ་རུ་པདྨ་འབྱུང་། །དབྱེར་མེད་དཔལ་ལྡན་རྩ་བའི་བླ་མ་ལ། །དེང་ནས་བྱང་ཆུབ་སྙིང་པོར་མཆིས་ཀྱི་བར། །སྙིང་ཁུང་རུས་པའི་གདིང་ནས་སྐྱབས་སུ་མཆི། །དད་མོས་གདུང་ཤུགས་དྲག་པོས་གསོལ་བ་འདེབས། །འདི་ཕྱི་བར་དོའི་གནས་སྐབས་ཐམས་ཅད་དུ། །བརྩེ་བས་དགོངས་ལ་ཡེ་ཤེས་སྤྱན་གྱིས་གཟིགས། །འབྲལ་མེད་ཐུགས་རྗེའི་ལྕགས་ཀྱུས་བཟུང་དུ་གསོལ། །འཁོར་བ་ངན་སོང་འཇིགས་ལས་སྐྱོབ་པ་དང་། །མཐོ་རིས་ཐར་པའི་ལམ་སྒོ་འབྱེད་དུ་གསོལ། །ཚེ་འདིར་མི་མཐུན་བར་ཆད་ཀུན་ཞི་ཞིང་། །ཕྱི་མ་བདེ་ཆེན་ཞིང་དུ་འདྲེན་དུ་གསོལ། །སྒྲིབ་གཉིས་བྱང་ཞིང་ཚོགས་གཉིས་རབ་རྫོགས་ཏེ། །དོན་གཉིས་མཐར་ཕྱིན་རྫོགས་སངས་རྒྱས་གྱུར་ཅིག །ཅེས་སྒྲུབ་བརྒྱུད་བསྟན་པའི་སྦྱིན་བདག་འོ་ཏོ་ཏ་སྩ་ཚེ་རིང་ཕུན་ཚོགས་ཞལ་འདོན་རྒྱུ་བློ་གྲོས་མཐའ་ཡས་ཀྱིས་སྤེལ་བ་དགེ་ལེགས་འཕེལ།། །།