དཔལ་ཆེན་ཡང་དག་ཧེ་རུ་ཀ་ཟླ་གམ་དགུ་པའི་དཀྱིལ་འཁོར་དུ་དབང་བསྐུར་བའི་ཆོ་ག་ཁྲག་འཐུང་མངོན་པར་འབྱུང་བ།
དཔལ་ཆེན་ཡང་དག་ཧེ་རུ་ཀ་ཟླ་གམ་དགུ་པའི་དཀྱིལ་འཁོར་དུ་དབང་བསྐུར་བའི་ཆོ་ག་ཁྲག་འཐུང་མངོན་པར་འབྱུང་བ་ཞེས་བྱ་བ་བཞུགས་སོ། །
བླ་མ་དང་རྡོ་རྗེ་ཁྲག་འཐུང་ལྷ་དགུའི་དཀྱིལ་འཁོར་གྱི་འཁོར་ལོ་ལ་ཕྱག་འཚལ་ལོ། །སྟོང་ཆེན་དབྱིངས་ཕྱུག་ཡུམ་མཁར་སྙོམས་ཞུགས་པ། །བདེ་མཆོག་དཔའ་བོ་རྡོ་རྗེ་ཁྲག་འཐུང་ཉིད། །དབང་ཕྱུག་སྐུར་སྣང་རྩ་བརྒྱུད་བླ་མ་ལ། །གུས་པས་འདུད་དོ་དབང་དང་བྱིན་རླབས་སྩོལ། །དཀྱིལ་ཆོག་སྤྲོས་པ་བསྡུས་ཏེ་བྱ་བའི་ཚུལ། །མཁས་འདོད་ང་རྒྱལ་བློ་ཡིས་བསྐུལ་མིན་ཅིང་། །གཞན་ལ་ཕན་པའང་བརྒྱ་ལམ་རེས་འགའ་ཞིག། འོན་ཀྱང་མོས་པའི་མཐུ་ལས་དབྱེ་བར་བྱ། །དཔལ་ཡང་དག་མར་མེ་དགུ་པའི་དཀྱིལ་འཁོར་དུ་མངོན་པར་དབང་བསྐུར་བ་ལ་ཐབས་ཀྱི་ཡན་ལག་སྣོད་བཅུད་ཀྱི་རྟེན་འབྲེལ་དང་། །དམ་ཚིག་བརྟུལ་ཞུགས་ལ་སོགས་པ་ལེགས་པར་ཚོགས་ནས། ཐབས་ཀྱི་ངོ་བོ་
ལ་གཉིས། ལས་ཀྱི་གཞི་བཟུང་བ་དང་། ལས་རིམ་དངོས་ལ་འཇུག་པའོ། །དང་པོ་ནི། སྟོན་པ་དང་འཁོར་དང་གནས་དང་སྒྲུབ་བའི་རྫས་ཕུན་སུམ་ཚོགས་པ་བཞི་དང་ལྡན་པ་སྟེ། དེ་དག་གི་ཚུལ་རྒྱས་པ་ཧེ་རུ་ཀ་གལ་པོ་སོགས་ལས་རྟོགས་པར་བྱའོ། གཉིས་པ་ལས་ཀྱི་རིམ་པ་དངོས་ལ་མོས་སློབ་ཚོམ་བུ་ཚོགས་སྒྲུབ་ཀྱི་ལུགས་དང་། སྒྲུབ་མཆོད་དཀྲུས་མ་སློབ་མ་རྗེས་བཟུང་ཙམ་གྱི་ལུགས་གཉིས་སུ་ཡོད་པའི་དང་པོ་ནི། གལ་པོ་སོགས་རྒྱུད་དང་ཧཱུྃ་མཛད་ཀྱི་རྒྱ་གཞུང་སོ་མཆན་བཅས། ཆོས་རྗེ་དཔལ་ལྡན་བླ་མ་དང་ས་ལོ་ཆེན་པོས་མཛད་པའི་ཕུར་པའི་ཡིག་ཆ་མ་བུ་རྣམས་ཀྱི་དགོངས་དོན་རྒྱས་པར་བཀྲོལ་བ། རྒྱལ་དབང་ལྔ་པ་ཆེན་པོས་མཛད་པའི་སྒྲུབ་དཀྱིལ་ལས་རྟོགས་པར་བྱ་སྟེ། དེའི་ས་བཅད་ཀྱི་སྡོམ་ནི། སྔོན་འགྲོ་ཕུན་སུམ་
ཚོགས་ལྔས་གཞི་བཟུང་ལ། །ས་ཡི་ཆོ་གར་བརྟགས་སློང་ཚོགས་གསོག་སྦྱང་། །བྱིན་རླབས་བཟུང་དང་སྲུང་བ་བདུན་དུ་བསྡུས། །སྟ་གོན་གཏོར་མ་གཏོང་ཞིང་རྒྱལ་ཐོ་འཛུག །སྲི་མནན་སྒོ་བྱང་གདགས་ཤིང་མ་ཏྲཾ་བསྒྲལ། ཆག་ཆག་ཐིག་གདབ་ལྷ་དང་བུམ་པ་དང་། །སློབ་མ་སྟ་གོན་བཅས་ཏེ་བཅུ་རུ་བཤད། །དངོས་གཞི་དཀྱིལ་འཁོར་སྒྲུབ་ལ་འདྲི་བ་དང་། །བྱིན་རླབས་ཏིང་འཛིན་བསྒོམ་པ་གསུམ་ཡིན་ཏེ། །དང་པོར་ཚོན་བཀྱེ་མཚན་མ་སྒྲུབ་རྫས་དགོད། །བསྲེ་བསྣན་ཆས་དབུལ་མངའ་གསོལ་བཅས་ཏེ་དྲུག །ཕྲིན་ལས་གྱིར་ཞིང་གཏོར་མ་བཏང་བ་དང་། །ལྷག་ཆད་ཁ་སྐོང་བཅས་ཀྱིས་ཏིང་འཛིན་བསྒོམ། །དབང་ལ་ཕྱི་འཇུག་ནང་འཇུག་དབང་བཞིའོ། །རྗེས་ཆོག་དམ་ཚིག་བསྒྲག་དང་དངོས་གྲུབ་བླང་། །སྦྱིན་སྲེག་གཏེར་སྦ་ལྷག་མ་སྒོ་དབྱེ་དང་། །དབང་གཟུགས་བརྟན་སྐྱོང་ཆད་མདོ་ཟོར་བྲོ་བརྡུང་། །ཚེ་འགུགས་མཆོད་གཏོར་ཐོ་དང་སྒེ་བྱང་བསྡུ། །མར་མེ་སྨོན་ལམ་གཏང་རག་དཀྱིལ་འཁོར་བསྡུ། ཚོན་སྐྱེལ་ཕུར་ཤུལ་བཀྲུ་ཞིང་ལུས་སྲུང་དང་། །བཟོད་གསོལ་བཏང་རག་གཏོང་ཞིང་སྨོན་ལམ་གདབ། །ཤིས་པར་བརྗོད་ཅིང་ཉེར་ལྔའི་གྲངས་སུ་བཤད། །གཉིས་པ་ནི། །དང་པོར་ས་གཞི་ཡོངས་སུ་བཟུང་། །གཉིས་པར་སྟ་གོན་གནས་པ་དང་། །ནུབ་གསུམ་པ་ལ་འཇུག་པར་བྱ། །ཞེས་གསུང་པ་བཞིན་དུ་ཤེས་པར་བྱ་བ་ལས། དང་པོ་ལའང་བརྟག་པ། བསླང་བ། སྦྱོང་བ། བྱིན་རླབས། བཟུང་བ། སྲུང་བ་སྟེ་དྲུག་ཏུ་ཡོད་པའི།
དང་པོ་སྤྱིར་དཔྱད་ལ་བརྟག་པ་དང་། ཁྱད་པར་ལྷོ་འཕྱེའི་ལྟོ་བར་རྟེན་འབྲེལ་བརྟག་པ་སོགས་ནི་འདིར་མ་སྤོས་སོ། །གཉིས་པ་ལ། སྣང་བ་ལ་བསླང་བ་ནི། བརྟགས་པས་རུང་བའི་ས་དེ་རྒྱལ་པོ་སོགས་ལ་བདེན་པའི་ཚིག་གིས་བླང་བའམ། རིན་གྱིས་ཉོས་ནས་རང་དབང་དུ་འགྱུར་བར་བྱ། མི་སྣང་བ་ལས་བསླང་བ་ནི། དབང་དུ་བྱས་པའི་གཞི་དེར་བ་བྱུང་དྲི་བཟང་བདུད་རྩི་ལྔ་ལ་སོགས་པའི་མཎྜལ་ལ་མེ་ཏོག་ཚོམ་བུ་གཅིག་བཀོད་པའི་མདུན་དུ་ས་ལྷའི་ཟླུམ་གཏོར་དང་ཉེར་སྤྱོད་ལྔ། དེའི་རྒྱབ་ཕྱོགས་ལྷ་བུར་བདག་བསྐྱེད་མཆོད་པ་རྣམ་བདུན་སྨན་རཀ་གཏོར་གསུམ་བཅས་བཤམ། ཡུལ་བདག་གཏོར་མ་དཀར་དམར་གཉིས་བསང་ཆུས་སྦྱངས་ལ། ལས་སྔགས་དང་། ཡཾ་རཾ་ཁཾ། གིས་བསང་། རཏྣ་བྷཉྫ་ཨོཾ་ཨཱཿཧཱུྃ། རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། བྷཱུ་མི་པ་ཏི་ས་པ་རི་བཱ་ར་ཨཱ་ཀརྵ་ཡ་ཛཿ བྷཱུ་མི་པ་ཏི་ས་པ་རི་བཱ་ར་ཨ་ཀཱ་རོ་སོགས་བཏགས་པ་ལན་གསུམ་གྱིས་ཕུལ། ཧཱུྃཿ །ས་ཕྱོགས་འདི་ན་གནས་པ་ཡི། །ས་བདག་ལྷ་ཀླུ་འཁོར་དང་བཅས། །གཏོར་མ་དམ་པ་འདི་བཞེས་ལ། །བདག་གིས་བསྒྲུབ་པ་མ་ཐོན་པར། །ཁྱེད་ལ་གནས་འདི་བདག་གཡར་གྱི། །ཅི་བདེ་བར་ནི་གཞན་དུ་སོང་། །བྷཱུ་མི་ལ་
ཏི་ས་པ་རི་བཱ་ར་གཙྪ། གནང་བ་བྱིན་པས་གཞན་དུ་དེངས་པར་མོས། གསུམ་པ་ནི། ལས་སྔགས་བཟླས་ཏེ་དྲི་བཟང་གི་ཆུ་འཐོར། བདག་བསྐྱེད་བཟླས་པ་ཡན་ཚད་བར་གྲུབ་པ་དང་དཀྱིལ་འཁོར་བསྡུས་ཏེ་གཙོ་བོའི་ང་རྒྱལ་བཟུང་ལ། རང་གི་མིག་གཡས་པར་མ་ལས་ཉི་མ་རཾ་གྱིས་མཚན་པ། གཡོན་པས་ཨཱ་ལས་ཟླ་བ་ཨས་མཚན་པ། ཧཱུྃ་གཡས་པའི་སྤྱན་ཟུར་ལ་གནས་པའི། །མ་ལས་ཉི་མའི་དཀྱིལ་འཁོར་གྱི། །འོད་ཀྱིས་སྣང་བའི་དངོས་པོ་ཀུན། །ཐམས་ཅད་མ་ལུས་བསྲེག་པར་བྱ། མ་སཱུརྻ་མཎྜལ། ད་ཧ་ད་ཧ་བྷ་སྨིན་ཀུ་རུ་ཧཱུྃ། ཡཾ་སྥ་ར་་ཕཊ། །ཐུགས་ཀའི་ཧཱུྃ་ལས་བྱུང་བ་ཡི། །ཡཾ་ལས་རླུང་གི་དཀྱིལ་འཁོར་གྱིས། །དངོས་ཀུན་བསྲེགས་པའི་ཐལ་བ་ཡང་། །ཐམས་ཅད་མ་ལུས་གཏོར་བར་བྱ། ཡཾ་བཱ་ཡུ་མཎྜ་ལ་བྷཀྵ་རེ་་ཀུ་རུ། །གཡོན་པའི་སྤྱན་ཟུར་ལས་བྱུང་བའི། །ཨ་ལས་ཟླ་བའི་དཀྱིལ་འཁོར་གྱི། །འོད་ཀྱི་སྣང་བའི་དངོས་པོ་ཀུན། །ཐམས་ཅད་མ་ལུས་བཀྲུ་བར་བྱ། ཨ་ཙནྡ་མཎྜ་ལས་་པ་ཀུ་རུ། ཞེས་རྫས་དང་ཏིང་ངེ་འཛིན་གྱིས་སྦྱང་། །ཆོས་ཐམས་ཅད་སྟོང་པ་ཉིད་དུ་བསམས་ཤིང་། ཨོཾ་ཤཱུ་ནྱ་ཏཱ་སརྦ་དྷརྨ་སྭ་བྷཱ་བ་ཤུདྡྷོ྅ཧཾ། སྣ་ཚོགས་འདི་དག་འཁྲུལ་པ་ལས་སྣང་ཡང་དོན་དམ་པར་ཆོས་ཀྱི་དབྱིངས་ཉིད་དོ། ཨོཾ་སྭ་བྷཱ་བ་ཤུདྡྷ་སརྦ་དྷརྨཿ
སྭ་བྷཱ་པ་ཤུདྡྷོ྅ཧཾ། ཞེས་ཆོས་ཉིད་ཀྱིས་སྦྱང་། ཨོཾ་བྷྲཱུྃ་ག་ག་ན་ཁཾ་ཨཱཿཧཱུྃ། ས་གཞི་ནམ་མཁའ་སྟོང་པའི་རང་བཞིན་ལས་འབྱུང་ལྔའི་དཀྱིལ་འཁོར་རི་རབ་དང་བཅས་པས་བརྟན་པར་གྱུར་པའི་རྡོ་རྗེའི་ས་གཞི། ར་བ། གུར་མེ་དཔུང་འབར་བའི་འོད་དང་ལྡན་པར་བསམ། སྣ་ཚོགས་རྡོ་རྗེའི་ཕྱག་རྒྱ་ས་ལ་རེག་པ། མཉམ་པའི་ཕྱག་རྒྱ་ལས་སྲིན་ལག་ནང་དུ་བཀུག་སོར་མོ་གཞན་རྣམས་བགྲད་པའོ། ཨོཾ་མེ་དི་ནི་བཛྲི་བྷཱ་ཝ་བཛྲ་བནྡྷ་ཧཱུྃ། ཞེས་བརྗོད་པ་ནི་བྱིན་རླབས་ཀྱིས་སྦྱོང་བའོ། བཞི་པ་ནི། མཆོད་གཏོར་བསང་སྦྱང་། སྟོང་པའི་ངང་ལས་རིན་པོ་ཆེའི་སྣོད་དུ་ལྷ་རྫས་ལས་གྲུབ་པའི་མཆོད་པ་དང་། གཏོར་མ་རྣམས་ཟག་པ་མེད་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ལན་གསུམ། པཾ་པདྨ་མཎྜ་ལ། པདྨའི་གདན་ཏུ་གྱུར། བདག་གིས་ཐུགས་ཀའི་ཧཱུྃཿ ལས་འོད་ཟེར་ལྕགས་ལྟ་བུ་སྤྲོས་པས་སའི་ལྷ་མོ་ས་འོག་ནས་སྤྱན་དྲངས་པར་བསམ་ཤིང་། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། ཅེས་བརྗོད་ཅིང་ཐལ་མོ་ས་ལ་ལན་གསུམ་བནབས་པས་ས་འོག་ནས་སའི་ལྷ་མོ་འཐོན་ཏེ་པདྨའི་གདན་ལ་བཞུགས་པ་སྐུ་མདོག་སེར་མོ་བརྒྱན་གྱིས་བརྒྱན་པ་ཕྱག་ན་བུམ་པ་སེར་པོ་བསྣམས་པ་
རྣལ་འབྱོར་བཀའ་སྩལ་ཇི་ལྟར་བགྱི་ཞེས་སྨྲ་བར་བསམས་ལ། ཨོཾ་བཛྲ་ཨཱ་ཧ་ར་ཧཱུྃ། ཨོཾ་བཛྲ་དྷུ་པེ་ཧཱུྃ། ཨོཾ་བཛྲ་པུཥྤེ་ཧཱུྃ། ཨོཾ་བཛྲ་ཨཱ་ལོ་ཀེ་ཧཱུྃ། །ཨོཾ་བཛྲ་གནྡྷེ་ཧཱུྃ། ཨོཾ་བཛྲ་ཨུཏྟ་ཕ་ལ་ཡེ་ཧཱུྃ། ཨོཾ་བཛྲ་བི་སྥུ་ར་ཡེ་ཧཱུྃ། ཨོཾ་པྲི་ཐི་བཱི་དེ་བཱི་ཨ་ཀཱ་རོ་སོགས་ལན་གསུམ་དང་། ཨོཾ་ཨཱཿཧཱུྃ་གིས་ནང་མཆོད་ཕུལ་ལ། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་ལྟར། །དེ་བཞིན་བདག་གིས་བདུད་ལས་ནི། །རྒྱལ་བར་བྱ་སྟེ་དཀྱིལ་འཁོར་བྲི། །དེ་ཕྱིར་དབང་གྱུར་ལྷ་མོས་ཀྱང་། །ས་གཞི་བྱིན་གྱིས་བརླབ་ཏུ་གསོལ། ཞེས་ལན་གསུམ་བརྗོད་པས། །ལྷ་མོས་དགའ་བའི་མདངས་ཕྱུང་སྟེ། །ཁྱོད་ནི་སློབ་དཔོན་དམ་པ་ཡིན། །སེམས་ཅན་དོན་ཕྱིར་དཀྱིལ་འཁོར་བྲིས། ཞེས་གནང་བ་བྱིན་ནས་ས་དེ་ཉིད་དུ་ཐིམ་པས་གསེར་གྱི་ས་གཞིར་གྱུར་པར་བསམ་མོ། །ལྔ་པ་ལ་བློས་བཟུང་བ་ནི། །བདག་གིས་སེམས་ཅན་དོན་བྱའི་ཕྱིར། །ལྷ་མོ་ཁྱོད་ཀྱིས་དཔང་གྱིས་ཤིག། རིན་ཆེན་སྣ་ཚོགས་ཕྱེ་བཏགས་པས། །བདག་གི་དོན་ཡོད་དཀྱིལ་འཁོར་བྲི། ཞེས་བརྗོད་ཅིང་དོན་བསམ་མོ། །སྟངས་སྟབས་ཀྱིས་བཟུང་བ་མདོར་བསྡུས་པའི་དབང་དུ་བྱས་ཏེ། སློབ་དཔོན་བཞེངས་ལ་རྡོ་རྗེ་དྲིལ་བུ་འཛིན་པས་རྣམ་པར་མི་རྟོག་པའི་ངང་ལས། ཧཱུྃ་ཤྲཱི་བཛྲ་དྷྲི་ཀ་ཧཱུྃ་ཛཿཞེས་བརྗོད་པས། རང་ཉིད་ཁྲོ་བོའི་རྒྱལ་
པོ་ཞེ་སྡང་རྡོ་རྗེ་འཇིགས་སུ་རུང་བའི་སྐུར་གྱུར། །དབུགས་དབྱུང་བའི་དཀྱིལ་འཁོར་གྱི་ལྷ་རྣམས་མདུན་གྱི་ནམ་མཁར་སད་པར་མོས། ཁྱེད་རྣམས་ཀྱིས་བྱིན་གྱིས་རློབ་པའི་གནས་སུ་དགོངས་པར་མཛད་དུ་གསོལ། ཞེས་གསོལ་བ་བཏབ་པས་དཀྱིལ་འཁོར་གྱི་དབུས་སུ་བྱོན་པར་གྱུར། ཕྱག་དང་མཆོད་པ་ཡིད་ཀྱིས་ཕུལ། དེ་དག་གི་བྱིན་རླབས་ཀྱིས་སྟེགས་བུ་དེ་ཡང་གཟི་མདངས་དང་ལྡན་པར་བསམས་ལ། བདག་ཉིད་སྟེགས་བུའི་དབུས་སུ་ཞུགས་ཏེ། རྐང་མཐིལ་གཉིས་སུ་ཨ་ལས་སྣ་ཚོགས་རྡོ་རྗེ་དང་། མིག་གཉིས་མ་དང་ཊ་ལས་ཉི་མ་དང་ཟླ་བར་བསམས་ནས། བཛྲ་དྲྀཥྚི་མ་ཊ། ཞེས་བརྗོད་ཅིང་ཕྱོགས་ཀུན་ཏུ་སྡང་མིག་གིས་ལྟ་བ་དང་། ཧཱུྃ་ཧཱུྃ་ཞེས་དྲག་ཏུ་བརྗོད་ཅིང་། རྡོ་རྗེ་གསོར་ཞིང་དྲིལ་བུ་འཁྲོལ་བཞིན་དུ་རྡོ་རྗེའི་འགྲོས་ཀྱིས་གཡས་སུ་བསྐོར་ནས། བཀའ་བསྒོ་པ་ནི། ཧཱུྃ། ས་ཕྱོགས་འདི་ན་གནས་པ་ཡི། །ལྷ་ཀླུ་གནོད་སྦྱིན་དྲི་ཟ་དང་། །འབྱུང་པོ་སྲིན་པོ་ཤ་ཟའི་ཚོགས། །གང་དག་གནས་པ་མྱུར་དུ་སོང་། །རྡོ་རྗེ་འཛིན་པའི་བཀའ་བྱུང་ནས། །གང་དག་མི་འགྲོ་དེ་རྣམས་ལ། །རྡོ་རྗེ་རབ་ཏུ་འབར་བ་ཡིས། །མགོ་ནས་བརྒྱབ་སྟེ་རྐང་པར་འགས། ཞེས་དང་། ཧཱུྃ་བཞི་པའི་སྔགས་བརྗོད་དེ་གུ་གུལ་གྱིས་འདུག །ཡུངས་ཀར་གྱིས་
བྲབ་ཅིང་རོལ་མོའི་སྒྲ་དྲག་པོ་དང་བཅས་པའི་ཚམས་རྔམས་དང་། །བདག་གི་ཐུགས་ཀ་ནས་ཁྲོ་བོའི་སྤྲིན་མི་བཟད་པ་སྤྲོས་པས་བགེགས་ཐམས་ཅད་ཤིང་བལ་རླུང་གིས་གཏོར་བ་བཞིན་ཕྱོགས་བཅུར་བསྐྲད་པར་བསམ་མོ། དེ་ནས་སླར་ཡང་ཞེ་སྡང་རྡོ་རྗེའི་སྙེམས་པས། ཧཱུྃ་ཧཱུྃ་ཞེས་གླུར་ལེན་ཅིང་། རྡོ་རྗེ་གསོར་བ་དང་། དྲིལ་བུ་འཁྲོལ་བཞིན་དུ་བརྗིད་བག་དང་བཅས་པའི་རྡོ་རྗེའི་འགྲོས་ཀྱིས་ཤར་ནས་དབང་ལྡན་གྱི་བར་དུ་དཀྱིལ་འཁོར་ལ་ལན་གསུམ་བསྐོར་རོ། །དྲུག་པ་ཕུར་གདབ་ནི། སིང་ལྡིང་གི་ཕུར་བུ་ཙནྡན་གྱིས་བྱུགས་ཤིང་སྐུད་པ་དང་ཅོད་པན་དམར་པོ་མེ་ཏོག་གི་ཕྲེང་བ་རྣམས་བཅིངས་པ་བཞི་མདུན་དུ་བཀོད་པ་ལ། རང་གི་སྙིང་ག་ནས་ཧཱུྃ་སྤྲོས་ཕུར་བུ་ལ་ཐིམ་པ་ཡོངས་སུ་གྱུར་པ་ལས། མཐའ་ཡས་དང་། རྣམ་པར་རྒྱལ་བ་དང་། འབྲུག་སྒྲ་དང་། གསུས་པོ་ཆེ་བཞིར་གྱུར། སྟོད་ཁྲོ་བོའི་གཟུགས་ཅན། སྨད་རྡོ་རྗེ་རྩེ་གཅིག་པ་ལྟ་བུར་འབར་བར་བསམ་ལ། ཧཱུྃ། ཀྲོ་དྷ་ཡ་ས་ཧ་ཏྲེ་ཏ་ཏྲེ་ད་ཕཊ། ཅེས་བརྒྱ་རྩ་བཟླས་ལ་དྲིལ་ཞིང་། ཨོཾ་གྷ་གྷ་གྷ་ཏ་ཡ་གྷཱ་ཏ་ཡ་སརྦ་དུ་ཥྚཾཱ་ཕཊ་ཀཱི་ལཱ་ཡ་ཀཱི་ལ་ཕཊ། སརྦ་པཱ་པཾ་ཕཊ། ཧཱུྃ་ཧཱུྃ། བཛྲ་ཀཱི་ལ་ཡ། བཛྲ་དྷཱ་ར་ཨཱ་ཛྙཱ་པ་ཡ་ཏི། ཀཱ་ཡ་ཝཀྩིཏྟ། བཛྲ་ཀཱི་ལ་ཡ་ཧཱུྃ་ཕཊ། ཅེས་བརྗོད་དེ་དཀྱིལ་འཁོར་གྱི་གྲྭ་བཞིར་གདབ་པས། བགེགས་རྣམས་ཀྱི་སྙིང་ཕུག་ནས་འོད་གསལ་བའི་གནས་ཐོབ་པར་མོས།
བསྡུ་ན་ཕུར་བུ་གཅིག་ཁོ་ན་བདུད་རྩི་འཁྱིལ་པར་མོས་ཏེ་བཏབ་པས་ཀྱང་འགྲུབ་བོ། སྲུང་འཁོར་ནི་ལས་བྱང་གི་སྲུང་འཁོར་རྫོགས་པར་བསྒོམས་པའམ། བསྡུ་ན། སླར་ཡང་ཤངས་ཀྱི་རླུང་སྒྲོམ་ནས་ཧཱུྃ་ལས་བྱུང་བའི་རྡོ་རྗེ་ལ་སོགས་པ་མཚོན་ཆ་སྣ་ཚོགས་གྲངས་མེད་པ་ཕྱོགས་བཅུར་སྤྲོས་པས་བགེགས་ཐམས་ཅད་ཚར་བཅད། ཚུར་འདུས་པ་ལས་མཚོན་ཆ་རྣམས་པ་ལྔའི་གུར་དུ་འཁྲིགས་པས་ཅིས་ཀྱང་མི་ཤིགས་པར་གྱུར། ཅེས་མོས། འདི་ཡན་ཆད་ཉིན་དང་པོར་བྱེད་ན་ཆོས་སྲུང་གཏོར་འབུལ་ཚོགས་དང་རྗེས་ཆོག་ལས་བྱང་ལྟར་བྱ། རས་བྲིས་ཀྱི་ཕྱོགས་ལ་ས་ཆོག་འདི་དག་མི་དགོས་ཀྱང་ཐོག་མའི་ཡུལ་བདག་གཏོར་མ་ཙམ་བཏང་བ་ནི་རྙིང་མ་སྤྱིའི་ཕྱག་ལེན་ཡིན་ལ། ཅུང་ཟད་རྒྱས་པར་བྱེད་ན་ལས་བྱང་གི་རྗེས་སུ། ས་ལྷ་བགེགས་བསྐྲད་ཕུར་གདབ་སྲུང་འཁོར་ཙམ་བྱ་བའི་ལུགས་ཀྱང་ཡོད་པས་རྣམ་དབྱེ་ཕྱེད་པར་བྱའོ། གཉིས་པ་སྟ་གོན་གྱི་ཆོ་ག་ནི། ས་ཆོག་དང་ཞགས་གིས་ཆོད་ན་བདག་བསྐྱེད་བཟླས་པ་བཅས་བྱ། དངོས་ལ་བདུན་ གཏོར་མ་བཏང་བ་རྒྱལ་ཆེན་ཆག་ཆག་ཐིག་གདབ་ལྷ་བུམ་པ་སློབ་མ་ལྷག་པར་གནས་པའོ། །དང་པོ་ནི། མཎྜལ་གྱི་སྟེང་དུ་དྲི་དང་བཅས་པའི་ཚོམ་བུ་བཀོད། མཆོད་པ་དང་གཏོར་མ་བཞི་བཤམས་ཏེ། ས་སློང་བའི་སྐབས་ལྟར་བྱིན་གྱིས་བརླབ། རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་དཀོན་མཆོག་སྲི་ཞུའི་མགྲོན། མགོན་པོ་ཡོན་
ཏན་གྱི་མགྲོན་རིགས་དྲུག་སྙིང་རྗེའི་མགྲོན། ལན་ཆགས་བགེགས་རིགས་ཀྱི་མགྲོན་དང་བཅས་པ་ཐམས་ཅད་སྐད་ཅིག་གིས་ཨོཾ་བཛྲ་ས་མཱ་ཛཿཔདྨ་ཀ་མ་ལ་ཡཱ་སྟཾྭ། ཨརྒྷཾ་ནས་ཤབྡ་པྲ་ཏིཙྪ་སྭཱ་ཧཱའི་བར་གྱིས་མཆོད་ལ་གཏོར་མ་དང་པོ། ཧཱུྃ། སངས་རྒྱས་སྐུ་གསུམ་རྣམ་པར་དག །དོན་དམ་བསྒྲུབ་དང་བསྟན་པའི་ཆོས། །ཉན་རང་བྱང་ཆུབ་སེམས་དཔའ་ལ། །མཆོད་སྦྱིན་གཏོར་མ་འབུལ་གྱིས་བཞེས། །གཙོ་བོ་སྣང་མཛད་སྣང་མཐའ་ཡས། །ས་སྤྱན་གོས་དཀར་མཱ་མ་ཀཱི། །འཇམ་དཔལ་སྤྱན་རས་ཕྱག་རྡོར་དང་། །གཤིན་རྗེ་རྟ་མགྲིན་བདུད་རྩི་འཁྱིལ། །རྩེ་མོ་རྣོན་པོ་ཀཱི་ལ་ཡར། །མཆོད་སྦྱིན་གཏོར་མ་འབུལ་གྱིས་བཞེས། ཨོཾ་ཨ་ཀཱ་རོ་སོགས་ལན་གསུམ་གྱིས་ཕུལ། གཉིས་པ། ཧཱུྃ། གནོད་སྦྱིན་བརྒྱད་དང་ལྷ་ཆེན་བརྒྱད། །ཀླུ་ཆེན་བརྒྱད་དང་གཟའ་ཆེན་བརྒྱད། །རྒྱུ་སྐར་ཉེར་བརྒྱད་ལྷ་དང་ཀླུ། །དྲི་ཟ་ལྟོ་འཕྱེ་མིའམ་ཅི། །འདབ་བཟང་གྲུལ་བུམ་སྲིན་པོ་བརྒྱད། །ཧ་རི་ཀ་དང་པཉྩི་ཀར། །མཆོད་སྦྱིན་གཏོར་མ་འདི་འབུལ་གྱིས། །བཞེས་ལ་སྒྲུབ་པའི་ཕྲིན་ལས་མཛོད། ཨོཾ་སརྦ་དྷརྨ་པཱ་ལ་ས་པ་རི་བཱ་ར་ཨ་ཀཱ་རོ་སོགས་གསུམ། གསུམ་པ། ཧཱུྃ། ལྷ་དང་འབྱུང་པོ་ཚངས་གནོད་སྦྱིན། །དྲི་ཟ་སྲིན་
པོ་ལོག་འདྲེན་ཀླུ། །རྗེད་བྱེད་སྨྱོ་བྱེད་ལྷ་མ་ཡིན། ཤ་ཟ་སྲུལ་པོ་བེ་ས་ར། །ནམ་གྲུ་བྱ་དང་སྐོམ་བྱེད་གདོན། །གཞོན་ནུའི་གདོན་ཆེན་འཁོར་དང་བཅས། །མཆོད་གཏོར་འདི་ལོང་ཕྲིན་ལས་མཛོད། སརྦ་བྷཱུ་ཏ་གྲ་ཧ་ས་པ་རི་བཱ་ར་ན་མཿསརྦ་ཏ་ཐཱ་ག་ཏེ་བྷྱོཿ སོགས་ནམ་མཁའ་མཛོད་ཀྱི་སྔགས་རྒྱ་ལན་གསུམ། བཞི་པ། ཧཱུྃ། འགྲོ་བ་རིགས་དྲུག་ལ་སོགས་པ། །ལན་ཆགས་སྙིང་རྗེའི་མགྲོན་ཚོགས་དང་། །བགེགས་རིགས་སྟོང་ཕྲག་བརྒྱད་ཅུ་རྣམས། །མཆོད་སྦྱིན་འདི་ཡིས་ཚིམས་པར་བྱོས། ཨ་སུ་ནྲྀ་ཏྲི་པྲེ་དུ་ཛཿསརྦ་བིགྷྣཱན་ཅེས་དང་། སཾ་བྷཱ་ར་གསུམ་གྱིས་བསྔོས་ལ་འཇིག་རྟེན་པའི་གཏོར་མ་གསུམ་པོ་ཕྱིར་དོར་རོ། །གཉིས་པ་ནི། སྒྲུབ་ཁང་གི་ཕྱོགས་བཞིར་རྒྱལ་ཆེན་བཞིའི་སྐུ་རྟེན་གཟུག་པའི་མདུན་དུ་ཟླུམ་གཏོར་དང་མཆོད་པ་བཤམས་ལ་བྱིན་རླབས་ས་ལྷའི་སྐབས་ལྟར་བྱ། ཤར་དུ། སྟོང་པའི་ངང་ལས་རིན་པོ་ཆེའི་ཁྲིའི་སྟེང་དུ་དྷྲི་ལས་རྒྱལ་པོ་ཆེན་པོ་ཡུལ་འཁོར་སྲུང་ལྗང་གུ་ཕྱག་གཉིས་ཀྱིས་པི་ཝཾ་བསྒྲེང་བ། དྲི་ཟའི་ཚོགས་ཀྱིས་ཡོངས་སུ་བསྐོར་བའི་གནས་གསུམ་འབྲུ་གསུམ་དང་། རང་གི་ཐུགས་ཀ་ནས་འོད་འཕྲོས་གྲོང་ཁྱེར་ཡུལ་འཁོར་སྲུང་ནས་ཡེ་ཤེས་པ་སྤྱན་དྲངས། ཨོཾ་མ་ཧཱ་རཱ་ཛ་དྷྲིཥྚ་རཥྚ*ཎཱ་ས་པ་རི་*བཱ་ར་ཨེ་ཧྱེ་ཧི། པདྨ་ཀ་མ་ལ་ཡེ་སྟཾྭ།
ཛཿཧཱུྃ་བྃ་ཧོཿ སྔགས་སྔ་མའི་རྗེས་སུ། ཨི་དཾ་ཨརྒྷཾ་པཱ་དྱཾ་པུཥྤཾ་དྷཱུ་པཾ་དི་པཾ། གནྡྷཾ་ཨཱ་ཧ་ར་ཤབྡ་པྲ་ཏཱིཙྪ་སྭཱ་ཧཱ་ས་མཆོད་ལ། ས་པ་རི་བཱ་རའི་རྗེས་སུ། ལག་པ་པདྨའི་ཐལ་མོ་སྦྱར་བས། ན་མཿསརྦ་ཏ་ཐཱ་ག་ཏེ་བྷྱོཿབི་ཤྭ་མུ་ཁེ་བྷྱཿསརྦ་ཏ་ཁཾ་ཨུཏྒ་ཏེ་སྥ་ར་་ཨི་མ་ག་ག་ན་ཁཾ་གྲིཧྞེ་དཾ་བ་ལི༚་ཏེ་སྭཱ་ཧཱ་བཏགས་པས་གཏོར་མ་འབུལ། །ཤར་ཕྱོགས་ན་ནི་གནས་སྲུང་པོ། །འཇིག་རྟེན་སྐྱོང་བ་གཟི་བརྗིད་ལྡན། ཤར་ཕྱོགས་དག་ནི་སྐྱོང་བྱེད་པ། །རྫུ་འཕྲུལ་ཆེ་ལ་སྟོབས་ཀྱང་ཆེ། །མཆོད་སྦྱིན་གཏོར་མ་འདི་སྣོམས་ལ། །རྣལ་འབྱོར་བདག་ཅག་འཁོར་བཅས་ཀྱི། །བར་ཆད་ཐམས་ཅད་ཞི་བ་དང་། །དངོས་གྲུབ་མ་ལུས་སྩལ་དུ་གསོལ། ཅེས་བརྗོད་ཅིང་། ཏིཥྛ་བཛྲ་ས་བརྟན་པར་བཞུགས་པར་བསྒོམ། དེ་བཞིན་དུ་ལྷོར་གཞན་འདྲ་བ་ལས་བཻ་ལས་འཕགས་སྐྱེས་པོ་སྔོན་པོ་གཡས་རལ་གྲི། གཡོན་གདན་ལ་བརྟེན་པ་གྲུལ་བུམ་གྱི་ཚོགས་ཀྱིས་བསྐོར་བ། གྲོང་ཁྱེར་འཕགས་པར་སྐྱེས་ནས་ཡེ་ཤེས་པ་སྤྱན་དྲངས། ཨོཾ་མ་ཧཱ་རཱ་ཛ་བཻ་རུ་དྷ་ཀ་ས་པ་རི་བཱ་ར་ཞེས་དང་། ལྷོ་ཕྱོགས་ན་ནི་འཕགས་སྐྱེས་པོ། ཞེས་སོགས་བསྒྱུར། ནུབ་ཕྱོགས་སུ། བི་ལས་མིག་མི་བཟང་དམར་པོ་གཡས་སྦྲུལ་ཞགས། གཡོན་མཆོད་རྟེན་འཛིན་པ་ཀླུའི་ཚོགས་ཀྱིས་བསྐོར་བ་གྲོང་ཁྱེར་སྣ་ཚོགས་གཟུགས་ནས་
ཡེ་ཤེས་པ་སྤྱན་དྲངས། ཨོཾ་མ་ཧཱ་རཱ་ཛ་བི་རཱུ་པཱཀྵ་ས་པ་རི་བཱ་ར་ཞེས་དང་། ནུབ་ཕྱོགས་ན་ནི་མིག་མི་བཟང་། ཞེས་སོགས་བསྒྱུར། བྱང་ཕྱོགས་སུ། བཻ་ལས་རྒྱལ་པོ་ཆེན་པོ་རྣམས་ཐོས་བུ་སེར་པོ་གཡས་རིན་པོ་ཆེས་མཚན་པའི་དབྱུག་ཏོ། གཡོན་ནེའུ་ལེ་འཛིན་པ་གནོད་སྦྱིན་གྱི་ཚོགས་ཀྱིས་བསྐོར་བ་གྲོང་ཁྱེར་ལྕང་ལོ་ཅན་ནས་ཡེ་ཤེས་པ་སྤྱན་དྲངས། ཨོཾ་མ་ཧཱ་རཱ་ཛ་བཻ་ཤྲ་བ་*ཎཱ་ས་པ་རི་*བཱ་ར་ཞེས་དང་། བྱང་ཕྱོགས་ན་ནི་ལུས་ངན་པོ། ཞེས་སོགས་བསྒྱུར་རོ། རས་བྲིས་མགྱོགས་དབང་གི་སྐབས་སུ་རྒྱལ་ཆེན་ཐོ་འཛུག་འདི་མ་གྲུབ་ཀྱང་ཆད་སྐྱོན་མེད་དོ། །གསུམ་པ་ནི། སྟེགས་བུ་ལ་བདུད་རྩི་ལྔས་བསྐྱང་ནུལ་བྱ་ཞིང་། ཧཱུྃ། བཀའ་གསང་རྨད་དུ་བྱུང་བའི་དཀྱིལ་འཁོར་དུ། །དམ་རྫས་དག་པ་རང་བྱུང་བདུད་རྩི་ལྔས། །བདེ་གཤེགས་རིགས་ལྔའི་དངོས་གྲུབ་བསྒྲུབ་པའི་ཕྱིར། །ཡང་དག་གསང་བའི་དཀྱིལ་འཁོར་ཆག་ཆག་འདེབས། །ཨོཾ་ཨཱཿཧཱུྃ་སྭཱ་ཧཱ། སརྦ་པཉྩ་ཨ་མྲྀ་ཏ་མཎྜ་ལ་ཧཱུྃ། ཞེས་བརྗོད་དོ། བཞི་པ་ནི། ཐོག་མར་ལས་ཐིག་གདབ་བདེ་ནས་ཡེ་ཤེས་ཀྱི་ཐིག་གནམ་དང་ས་ལ་འདེབས་པའི་ལུགས་དང་། ཐིག་ཚོན་བྱིན་རླབས་ཐ་དད་དུ་བྱ་བ་སོགས་ཕྱག་ལེན་རྒྱས་པའི་ཕྱོགས་ཡིན་ལ། འདིར་ས་བཅད་ཙམ་དུ་མདོར་བསྡུ་ན། བ་སུ་རའམ་རས་བལ་གྱི་ཐིག་སྐུད་ལྔ་བསྒྲིལ་ཚོན་སྣ་ལྔས་ཁ་བསྒྱུར་བ་དང་། རྡུལ་ཚོན་ཁ་དོག་ལྔ་ཐལ་ཆེན་དང་བདུད་རྩི་ལྔ་ཅུང་ཟད་སྦྱར་བ་ལ་རིགས་དང་
མཐུན་པའི་ས་བོན་ལྔ་མང་དུ་བཟླ། །ཨརྒྷཾ་སོགས་ཀྱིས་མཆོད། ཐིག་སྐུད་བསྒྲིལ་ཞིང་། །ཨོཾ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཧཱུྃ། ཨོཾ་ཨཱཿཧཱུྃ། ཞེས་བརྗོད་ཅིང་བདུད་རྩི་ལྔ་དང་དྲི་ཆབ་ཀྱིས་བསངས་ནས་སྣོད་གཙང་མར་བཞག་གོ་ཨོཾ་ཨཱཿསརྦ་པཉྩ་རཏྣ་ས་མ་ཡེ་ཧཱུྃ་ཧཱུྃ་ཧཱུྃ། ཞེས་བཟླ་ཞིང་ཚོན་རྣམས་ལ་རེག་པའི་མཐར། ཧཱུྃ་ཞེས་བརྗོད་པས་རིན་པོ་ཆེའི་རྡུལ་ཕྲ་རབ་ཏུ་གྱུར་པར་བསམས་ལ། ཨོཾ་བཛྲ་ཤྲཱི་ཧེ་རུ་ཀ་ཧཱུྃ། ཞེས་བརྗོད་པས། བདག་ཉིད་དཀྱིལ་འཁོར་གྱི་བདག་པོར་གསལ་བ་ཤར་ནས་ནུབ་ཏུ་ཕྱོགས་པ་ལ་རྗེས་སུ་ཆགས་པའི་སྦྱོར་བས་ཞུགས་པས་ཐིག་སྐུད་བྱང་ཆུབ་སེམས་ཀྱི་ངོ་བོར་དཀར་ཕྲེང་གིས་བྱུང་བར་བསམ་ཞིང་། ཛྙཱ་ན་བཛྲ་ཧཱུྃ ཞེས་གཡས་པའི་ཁུ་ཚུར་གྱིས་ཐིག་སྐུད་གྱི་སྣེ་མོ་ཐིག་གཡོག་ལ་བསྐྱུར་ཏེ། དེས་གཡོན་པའི་ཁུ་ཚུར་གྱིས་དྲངས་ནས་ལྟེ་བར་བཟུང་ལ། བྷཱུཾ་བི་ཤྭ་བི་ཤུདྡྷེ་བཛྲ་ཛྙཱ་ན་ཙཀྲ་མཎྜ་ལ་ཧཱུྃ། ཞེས་བརྗོད་ཅིང་། དཀྱིལ་འཁོར་གྱི་སྟེང་གི་ནམ་མཁའ་ལ་རྒྱ་གྲམ་དུ་བཏབ་པས་རང་བཞིན་གྱི་དཀྱིལ་འཁོར་བཀྲ་ལམ་གྱི་གསལ་བར་བསམ་མོ། །དེ་ལྟར་ཚངས་ཐིག་གཉིས་པོ་ཙམ་མོ། །ཡང་ན་ཐིག་ཆེན་བརྒྱད་པོ་སྤྱི་དང་མཐུན་པར་མཁའ་ལ་གདབ་ཅིང་། དེ་བཞིན་ཏུ་ཡབ་ཡུམ་གྱི་སྙིང་པོ་བརྗོད་བཞིན་པར་ས་ལ་ཡང་གདབ་པར་བྱ་སྟེ། ཚངས་པའི་ཐིག་གི་ཕྱོགས་བཞི་རུ། ཆ་ཆེན་བརྒྱད་བརྒྱད་བཅུ་དྲུག་ལ། ཚངས་ཐིག་ནས་བཟུང་དང་པོ་དང་། དྲུག་པ་ཕྱེད་གདབ་ཕྱི་མ་བསིལ། གཉིས་པ་བདུན་པ་ཆ་བཞིར་བགོ།
ལྔ་བརྒྱད་དབུས་དོར་མཐའ་གཉིས་གདབ། །གསུམ་པ་མི་གདབ་བཞི་པ་ཕྱེད། །བཅས་པ་ཕོ་བྲང་ནང་མའི་ས། །དབུས་ནས་བཞི་པའི་ཕྱེད་ཚུན་བཅད། །ཆ་ཕྲན་གཅིག་བསྐོར་ཤར་ངོས་སུ། །ཟུར་ཐིག་ནས་བརྩམས་ཆ་བྲན་གཉིས། །ཕྱིར་བསྐྱེད་པ་ནས་འཕྲེད་དུ་བཅད། །དེ་ལ་ནང་སྒོ་རྒྱན་མེད་བྱ། །ནང་སྒོའི་རྩ་ཐིག་སྒོ་ཟུར་ནས། །ཆུ་བྲན་གཅིག་བསྐོར་རེ་མིག་གླིང་། །དགུར་བཅད་ཟླ་གམ་དགུ་པ་བྱ། །ཕྱི་ཡི་མདའ་།ཐིག་ཟུར་རྩེ་ནས། །ཆ་ཆེན་ཕྱེད་དང་གཅིག་དང་ཕྱེད། །སླར་ཡང་གཅིག་བསྐོར་ཁོར་ཡུག་གོ། །རྟ་བབས་འོག་གཞིའི་རྒྱ་གྲམ་སོགས། །ཐུན་མོང་ཉིད་ཕྱིར་སྤྱི་ལྟར་བྱ། །ཞེས་པ་ལྟར་རོ། །རས་བྲིས་ལ་ཐིག་ཚོན་གཉིས་ཀའི་བྱ་བ་མི་དགོས་སོ། །ལྔ་པ་ནི། །རས་བྲིས་ཀྱི་ཕྱོགས་ལ་ལྷ་སྟ་གོན་མི་བྱེད་པ་མང་བས་བསྡུ་ན་དེ་ལྟར་ཡང་རུང་ཙམ་ནི་ཡིན་ལ། །འདི་ཉིད་དཀྱིལ་འཁོར་བཞེངས་པ་ལ་སྤྱིར་གནང་བ་ཞུ་བའི་དོན་ཡིན་པས་གྲུབ་ན་ནི་ཤིན་ཏུ་ལེགས་སོ། །དེ་ལྟར་དཀྱིལ་འཁོར་གྱི་གཞི་ལ་ལྷ་སོ་སོའི་སྔགས་བཟླ་བཞིན་པར་དྲི་བཟང་དང་བདུད་རྩི་ལྔའི་ཐིག་ལེ་གཙོ་བོའི་གནས་སུ་གྲུབ་ཞིང་དང་། །གཞན་རྣམས་སུ་ཟླུམ་པོར་བྱ་ཞིང་། །དེ་རྣམས་ཀྱི་སྟེང་དུ་རང་རང་གི་སྔགས་ཀྱིས་མེ་ཏོག་གི་ཚོམ་བུ་བཀོད། །སྒོས་མཆོད་གཙོ་འཁོར་སོ་སོའི་གཡས་སུ་ཞལ་ཟས་གཡོན་ཏུ་སྤོས། །མདུན་ཏུ་མར་མེ། །སྤྱི་མཆོད་འདོད་སྣམ་གྱི་ཐད་ནས་གཡས་བསྐོར་གྱིས་ཕྱི་མཆོད། །རྒྱབ་མདུན་གང་བདེར་སྨན་རཀ་གཏོར་གསུམ་བཀོད། །བསྡུ་ན་སྒོས་མཆོད་མ་འཛོམ་ཀྱང་རུང་། །ལས་བྱང་ལྟར་མཆོད་པ་བསང་སྦྱང་ནས་བརྩམས་བྱིན་རླབས་
ཚང་བར་བྱ། དེ་ནས། །དཀྱིལ་འཁོར་གྱི་ས་གཞི་དངས་ཤིང་ཐོགས་པ་མེད་པ་ལ་ཚོམ་བུ་རྣམས་ལྷ་སོ་སོ་རང་རང་གི་གདན་ཇི་ལྟར་བཞིན་གྲུབ་པར་གྱུར། །པཾ་པདྨ་མཎྜ་ལ། ཨ་ཙནྡྲ་མཎྜ་ལ། །མ་སཱུརྻ་མཎྜ་ལ། མ་ཧཱ་དེ་བ་ཛཿཨུ་མ་དེ་བཱི་ཛཿམ་ཏྲཾ་ཛཿདབུས་ཀྱི་གདན་སྟེང་དུ་དཔལ་ཆེན་བཛྲ་ཧེ་རུ་ཀ་སྐུ་མདོག་མཐིང་ནག་སོགས་སྒྲུབ་ཐབས་ལྟར་ལ། ཀློང་ན་བཞུགས་པའོ། ཡུམ་ཀྲོ་དྷཱི་ཤྭ་རི་སོགས་ནས་ཞབས་གཡས་བརྐྱང་གིས་ཡབ་ལ་སྦྱོར་བ། ཤར་དུ་གཽ་རཱི་སྔོན་མོ་ཞིང་དབྱུག་ཕྱར་ཞིང་སོགས་བསྐྱེད་སྔགས་དང་ས་བོན་དོར་ཏེ། གཡོན་བརྐྱང་གི་རོལ་པས་འགྱིང་བའོ། བར་གྱིས་དཀྱིལ་འཁོར་བསྒོམས་ལ། སྙིང་གའི་ས་བོན་ལས་འོད་ཟེར་འཕྲོས་པས་ཆོས་དབྱིངས་སྐྱེ་བ་མེད་པའི་ངང་ལས་སོགས་ཀྱིས་ཡེ་ཤེས་པར་སྙན་གསན་དབབ་ཅིང་། སྤྱན་འདྲེན་པ་བསྟིམ་པ་བརྟན་པ་ཕྱག་མཆོད་བསྟོད་པ་སོགས་སྒྲུབ་ཐབས་བཞིན་རྒྱས་བསྡུས་ཅི་རིགས་པར་བྱས་ལ། སྙན་གསན་དབབ་པ་ནི། སྦོས་དང་བཅས་པས་རྡོར་དྲིལ་འཛིན་པས། །ཐུགས་བརྩེར་ལྡན་པའི་དགོངས་པ་ཅན། །ཁྱེད་རྣམས་ལ་ནི་མཆོད་པ་དང་། །སེམས་ཅན་ཡོངས་སུ་བཟུང་བའི་ཕྱིར། །དཀྱིལ་འཁོར་བཟང་པོ་ས་འདི་ལ། །བྱིན་གྱིས་རློབས་པར་མཛད་དུ་གསོལ། ཞེས་ལན་གསུམ་དུ་གསོལ་བ་བཏབ་པས། །དགྱེས་པ་ཆེན་པོའི་རྗེས་སུ་གནང་བར་གྱུར། ཅེས་མོས་ལ་མཆོད་བསྟོད་མདོར་བསྡུས་བྱའོ། །དྲུག་པ་
ནི། བུམ་པ་ལྷའི་གྲངས་དང་མཉམ་པའམ། །ཡང་ན་གཉིས་སུ་བསྡུས་སྟེ། །རྣམ་རྒྱལ་དང་། ལས་ཀྱི་བུམ་པའོ། །དེ་དག་ཀྱང་རྒྱུ་རིན་པོ་ཆེ་ལས་གྲུབ་ཅིང་མཚན་ཉིད་དང་ལྡན་པ། །མགུལ་ཆིངས་དང་ཁ་རྒྱན་གཟུངས་ཐག་ལྡན་པ། །རྣམ་རྒྱལ་གཙོ་བོའི་ཕྱག་མཚན་དང་། །ལས་བུམ་ལ་སྣ་ཚོགས་རྡོ་རྗེ་བཀོད། །རྡོ་རྗེ་གནོད་སྦྱིན་གྱི་སྔགས་བཟླས་པའི་ཡུངས་དཀར་གྱིས་བྲབ་ཅིང་གུ་གུལ་གྱིས་བདུག་ཏེ་གེགས་བསྐྲད། །སྨན་ལྔ་འབྲུ་ལྔ་དྲི་ལྔ་རིན་པོ་ཆེ་ལྔ་སྙིང་པོ་ལྔ་བདུད་རྩི་ལྔ་རྣམས་དང་ལྡན་པའི་ཆུ་ལ་གཙོ་བོའི་སྔགས་དང་ལས་སྔགས་སོ་སོར་བཟླས་ནས་བུམ་པ་གཉིས་པོར་བླུགས་ལ་རྣམ་རྒྱལ་པདྨ་འདབ་བརྒྱད་མེ་ཏོག་གི་ཚོམ་བུ་བཀོད་པའི་དབུས་དང་། །ལས་བུམ་ལོགས་སུ་བཞག་ལ་མཆོད་པ་སྤྱི་མཐུན་བཤམ། བསང་སྦྱང་། །སྟོང་པའི་ངང་ལས་བྷྲཱུྃ་དཀར་པོ་ལས་བྱུང་བའི་བུམ་པ་ཡངས་ཤིང་རྒྱ་ཆེ་བའི་དབུས་ཀྱི་བུམ་པའི་ལྟེ་བ་དང་ཕྱོགས་མཚམས་བརྒྱད་དུ་པཾ་པདྨ་མཎྜ་ལ་ནས་མ་ཏྲཾ་ཛཿའི་བར་གོང་ལྷ་སྟ་གོན་ལྟར་བུམ་པ་ལྷ་གྲངས་ཡོད་ན། །ཕྱོགས་མཚམས་ཀྱི་བུམ་པ་བརྒྱད་དུ་ཞེས་བསྒྱུར་དབུས་ཀྱི་གདན་གྱི་སྟེང་དུ་ཧཱུྃ་ལས་རྡོ་རྗེ་སྔོན་པོ་རྩེ་ལྔ་པ་ལྟེ་བ་ལ་ཧཱུྃ་གིས་མཚན་པ། །ནང་དང་ཕྱིའི་ཕྱོགས་མཚམས་ཀྱི་གདན་ལ་གྃ་ཙྃ་པྲྃ་བྃ་པྃ་གྷྃ་མྃ་ཙྃ་རྣམས་ལས་འོད་འཕྲོས། དོན་གཉིས་བྱས། ཚུར་འདུས་ཡོངས་སུ་གྱུར་པ་ལས། དབུས་ཀྱི་གདན་སྟེང་དུ་དཔལ་ཆེན་བཛྲ་ཧེ་རུ་ཀ་ནས་གཡོན་བརྐྱང་གི་རོལ་པས་འགྱིང་བའོ།
བར་ལྷ་སྟ་གོན་སྐབས་བཞིན་བསྐྱེད། །ལས་བུམ་བྷྲཱུྃ་ལས་གཞལ་ཡས་ཁང་གི་ནང་དུ་ཉི་མ་ལ་གནས་པའི་ཧཱུྃ་ཡིག་འབར་བར་གྱུར། ཨོཾ་བཛྲ་ཡཀྵ་བི།།།ནྡ་ཀྲིཏ་ཧཱུྃ་ཕཊ། ཅེས་བརྗོད་པས། །ཁྲོ་བོ་རྡོ་རྗེ་གནོད་སྦྱིན་ལྗང་གུ་རྒྱ་གྲམ་དང་སྡིགས་མཛུབ་བསྒྲེང་བ་ཞབས་གཡོན་བརྐྱང་བའི་སྟབས་ཀྱི་བཞུགས་པར་གྱུར། །རང་གི་སྙིང་ག་ནས་འོད་འཕྲོས་པས་དཔལ་ཆེན་ཡང་དག་ལྷ་དགུའི་དཀྱིལ་འཁོར་རྡོ་རྗེ་གནོད་སྦྱིན་དང་བཅས་པ་སྤྱན་དྲངས། བཛྲ་ས་མཱ་ཛཿ ཧཱུྃ་བཅོམ་ལྡན་དཔལ་ཆེན་ཁྲོ་རྒྱལ་ཡབ་ཡུམ་དང་། །སྤྲུལ་པ་ཡང་སྤྲུལ་བཀའ་སྡོད་སྲུང་མའི་ཚོགས། །གློག་ལྟར་མྱུར་བའི་ཐུགས་རྗེས་འདིར་གཤེགས་ནས། །བདེ་ཆེན་ཐུགས་ཀྱི་དངོས་གྲུབ་སྩལ་དུ་གསོལ། ཨོཾ་བཛྲ་ཤྲཱི་ཧེ་རུ་ཀ་མཎྜ་ལ་ས་པ་རི་བཱ་ར་ས་མཱ་ཛཿ། གསལ་ལ་མི་འགྱུར་ཆོས་ཀྱི་སྐུ། །གསལ་མེད་ཆོས་དབྱིངས་ནམ་མཁའ་འདྲ། །བརྗོད་མེད་རྣམ་ཤེས་གཟུགས་དང་བྲལ། །འདུ་འབྲལ་མེད་པ་མཁའ་ལ་རྫོགས། ཨོཾ་ཤྲཱི་ཧེ་རུ་ཀ་དྷརྨ་དྷཱ་ཏུ་སྭ་བྷཱ་ཝ་མ་ཧཱ་སུ་ཁ་ཧཱུྃ། ཞེས་བརྗོད་ལ་བརྟན་པར་བཞུགས་སུ་གསོལ། རྟོག་མེད་སྤྲོས་བྲལ་མཁའ་དབྱིངས་དག །སྐྱེ་མེད་རྡོ་རྗེ་སྐུ་གསུང་ཐུགས། །རང་བྱུང་བཅོམ་ལྡན་ཐུགས་རྗེའི་ལྷ། །འདུ་འབྲལ་མེད་ལ་ཕྱག་འཚལ་ལོ། ཨ་ཏི་པུ་ཧོཿཔྲ་ཏི་ཛ་ཧོཿདམ་
ཚིག་པའི་སྤྱི་བོར་ཨོཾ་མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པའོ། །ཐབས་ཀྱི་སྤྱོད་པས་སེམས་ཅན་དོན། །བྱམས་དང་སྙིང་རྗེས་གང་འདུལ་བ། །སངས་རྒྱས་ཕྲིན་ལས་རྫོགས་པར་མཛོད། །དབང་དང་བྱིན་རླབས་འདིར་སྩོལ་གཅིག །གསོལ་བ་བཏབ་པས་དབང་གི་ལྷ་རྣམས་ཀྱིས་ཡེ་ཤེས་ཀྱི་ཆུས་སྤྱི་བོ་ནས་དབང་བསྐུར་བས་ལུས་ཐམས་ཅད་གང་། དྲི་མ་ཐམས་ཅད་དག །ཆུ་ལྷག་མ་ཡར་ལུད་པ་ལས་གཙོ་འཁོར་ཐམས་ཅད་ཀྱི་སྤྱི་བོར་ཧེ་རུ་ཀ་རིགས་ལྔ་ཡབ་ཡུམ་དང་། །རྡོ་རྗེ་གནོད་སྦྱིན་ལ་བཛྲ་ཧེ་རུ་ཀས་དབུར་བརྒྱན་པར་གྱུར། མཆོད་པ་བསང་སྦྱང་། །སྟོང་པའི་ངང་ལས་ཨ་ལས་བྷནྡྷ་འབར་བའི་སྣོད་ཡངས་ཤིང་རྒྱ་ཆེ་བར་ཧཱུྃ་ལས་བྱུང་བའི་མཆོད་ཡོན། ཞབས་བསིལ་མེ་ཏོག་བདུག་སྤོས་མར་མེ་དྲི་ཆབ་ཞལ་ཟས། རོལ་མོ་ལ་སོགས་པ་མཆོད་རྫས་བསམ་གྱིས་མི་ཁྱབ་པ་དཔལ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་བསམ་གྱིས་མི་ཁྱབ་པར་གྱུར། ཨོཾ་བཛྲ་ཨཱ་ཧ་ར་ལི་ཧཱུྃ་ཕཊ། ཨོཾ་བཛྲ་པུཥྤེ་ཨཱཿཧཱུྃ་ནས་ཨོཾ་བཛྲ་ཤབྡ་ཨཱཿཧཱུྃ། ཨོཾ་བཛྲ་ཨུཏྟ་ཕ་ལ་ཡ་ཧཱུྃ་ཕཊ། ཨོཾ་བཛྲ་པིཏྤཱུ་ར་ཡ་ཧཱུྃ་ཕཊ། ཅེས་བྱིན་རླབས་ལ། ཧཱུྃ་ཨརྒྷཾ་མེ་ཏོག་བདུག་སྤོས་
དང་། །མར་མེ་དྲི་ཆབ་བཤོས་དང་སྒྲ། །ཕྱི་ནང་གསང་བང་སྦྱར་བ་རྣམས། །བདག་དང་མཉམ་པའི་ཚོགས་ལ་འབུལ། །ཚོགས་གཏོར་པཉྩ་ཨ་མྲྀ་ཏ། །ཏན་གན་ལ་སོགས་ཅི་འབྱོར་བ་ཏིང་འཛིན་ཡིད་ཀྱིས་མཆོད་པ་འདི། །རྒྱལ་བ་རྒྱ་མཚོས་བཞེས་སུ་གསོལ། ཨོཾ་ཤྲཱི་ཧེ་རུ་ཀ་ས་པ་རི་བཱ་ར་ཨི་དཾ་ཨརྒྷཾ་པུཥྤེ་དྷཱུ་པེ་དཱི་པེ་གནྡྷེ་བ་ལི༚་ཏ་པྲ་ཏཱིཙྪ་ཧོཿཤྲཱི་པཉྩ་ཁ་ཁ་ཁཱ་ཧི་ཁཱ་ཧི་ཛཿཧཱུྃ་བྃ་ཧོཿ མ་ཧཱ་པཉྩ་ཨ་མྲྀ་ཏ་བ་ལི༚་གྲྀཧྞ་ཧོ་ཁཱ་ཧི་ཁཱ་ཧི་པི་བ་ཧོཿ ཨ་ལ་ལ་ཧོཿ ཨ་མྲྀ་ཏ་ཁཱ་ཧི། ཞེས་མཆོད། ཧཱུྃ་བདེ་གཤེགས་མཉམ་ཉིད་ཆོས་ཀྱི་ངང་། །མ་སྐྱེས་རྡོ་རྗེ་ཀུན་ཏུ་བཟང་། །ཐབས་མཁས་ཁྲོ་རྒྱལ་སྐུར་སྟོན་པ། །ཧེ་རུ་ཀ་ལ་ཕྱག་འཚལ་ལོ། །རྣམ་དག་སྐུ་ལ་ཆགས་མི་མངའ། །དགྱེས་མཛད་དཔལ་ཆེན་སྐུ་ལ་འཁྲིལ། །ཤེས་རབ་གཉིས་མེད་བདེ་ཆེན་རྫོགས། །ཁྲོ་མོ་དབང་ཕྱུག་ལ་ཕྱག་འཚལ། །མེ་ལོང་མཉམ་ཉིད་སོ་སོར་རྟོག །བྱ་གྲུབ་ཡེ་ཤེས་རང་བཞིན་དང་། །འབྱུང་བཞི་རྣམ་པར་དག་པ་ཡི། །ལྷ་མོ་རྣམ་ལ་ཕྱག་འཚལ་བསྟོད། །འཇིགས་པའི་ཧཱུྃ་སྒྲ་ངེས་སྒྲོག་ཅིང་། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་ལྷ། །བགེགས་ཀྱི་དགྲ་ལ་
ཕྱག་འཚལ་བསྟོད། ཅེས་བསྟེར། གཟུངས་ཐག་ལ་འཇུས་ཏེ། བདག་གི་ཞལ་ནས་སྔགས་ཀྱི་ཕྲེང་བ་གཟུངས་ཐག་ལ་འཁྲིལ་ཏེ་སོང་། །བུམ་པའི་ལྷ་རྣམས་ཀྱི་ཐུགས་རྒྱུད་བསྐུལ། ཆགས་པ་ཆེན་པོས་དགྱེས་པར་རོལ་པའི་བྱང་སེམས་ཡེ་ཤེས་ཀྱི་བདུད་རྩིར་བབས་པས་བུམ་པ་གང་བར་བསམ་ཞིང་། ལྷ་དགུའི་སྔགས་གཙོ་འཁོར་གྱི་འགྲོས་སྦྱར་བ་བརྒྱ་རྩ་བརྒྱད་དམ་ཉེར་གཅིག་སོགས་དང་ལས་བུམ་ལ་དམིགས་ཏེ་ལས་སྔགས་བཛྲ་ཡཀྵ་བརྒྱ་རྩ་བཟླས་ལ། སྔགས་ཙམ་གྱིས་མཆོད། རུ་ལུ་དང་ཧཱུྃ་བརྗོད་ཅིང་མེ་ཏོག་དཀར་པོ་བུམ་པའི་ནང་དུ་འབུལ་ཞིང་། སྔགས་དེ་ཉིད་ཀྱིས་སྤོས་དང་བདུག་པའང་དབུལ་ཞིང་བདུག །རྣམ་རྒྱལ་གྱི་ལྷ་ཐམས་ཅད་འོད་དུ་ཞུ། བྱང་ཆུབ་ཀྱི་སེམས་ཀྱི་ཆུས་ཡོངས་སུ་གང་བར་བསམ་ལས་བུམ་ལ་དམིགས་ཏེ། ཇི་སྲིད་དཀྱིལ་འཁོར་གྱི་བྱ་བ་རྣམས་མཐར་མ་ཕྱིན་གྱི་བར་བགེགས་བཟློག་པའི་ཕྲིན་ལས་མཛད་དུ་གསོལ། ཅེས་ཕྲིན་ལས་གཞོལ་དཀྱིལ་འཁོར་གྱི་ཁོར་ཡུག་ཏུ་རས་ཡུག་གི་སྟེང་དུ་མེ་ཏོག་དཀར་པོ་གཅལ་དུ་བཀྲམ་པའི་སྟེང་དུ་གཙོ་བུམ་ཤར་དང་གཞན་རྣམས་རང་རང་གི་ཕྱོགས་སུ་བཞག། ལས་བུམ་བྱང་ཤར་དུ་དགོད་དོ། །བདུན་པ་སློབ་མ་སྟ་གོན་ལ། སྤྲོ་བསྐྱེད་སྡོམ་བཟུང་བྱིན་རླབས་དང་། སོ་ཤིང་ཁྱོར་ཆུ་རྩ་སྲུང་སྐུད། ཆོས་བཤད་གཏོར་མ་མཆོད་བསྟོད་བཅུ། དེ་ལ་དང་པོ་ནི། དཀྱིལ་འཁོར་ཡོལ་བས་བསྒྲིབ་རྫས་བཞི། མེ་ཏོག་སྤོས་མར་མེ་དྲི་ཆབ་ཀྱི་མཆོད་པ་སོགས་འདུ་བྱས་ལ། དྲུང་དུ་མ་གྱུར་པའི་སློབ་མ་རྣམས་ཕྱི་རོལ་དུ་
ཇི་ལྟར་བལྟམ་ཕ་སོགས་ཀྱིས་ཁྲུས་བྱ། ཕྱག་དང་མེ་ཏོག་བཅས་ནང་དུ་འཁོད་པ་ལ་སློབ་དཔོན་གྱིས། འོ་ན་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་ཏུ་བཅོམ་ལྡན་འདས་དཔལ་ཆེན་ཧེ་རུ་ཀའི་གོ་འཕང་སྐུ་ཚེ་འདི་ཉིད་ལ་མྱུར་བ་ཉིད་དུ་ཅི་ནས་ཐོབ་པར་བྱ། དེའི་ཆེད་དུ་རྡོ་རྗེ་ཐེག་པའི་ལམ་གྱི་རྩ་བ་དབང་བསྐུར་བ་ཟབ་མོ་ནོད་ལ། ལམ་རིམ་པ་གཉིས་ཉམས་སུ་བླང་བར་བགྱིའོ་སྙམ་པ་བྱང་ཆུབ་མཆོག་ཏུ་ཐུགས་བསྐྱེད་པ་དང་། ཆོས་གསན་པའི་ཀུན་ཏུ་སྤྱོད་པ་རྣམས་ཀྱང་གསལ་བཏབ་ནས་ལེགས་པར་གསན་འཚལ། དེ་ལ་གང་གསན་པར་བྱ་བ་ནི། བདག་ཅག་གི་སྟོན་པ་ཐུགས་རྗེ་ཅན་དེས་ཆོས་སྐུ་དགོངས་པ་དང་། ལོངས་སྐུ་བརྡའི་ཚུལ་དང་། སྤྲུལ་སྐུ་སྒྲ་ཚིག་ཐ་སྙད་ཀྱི་སྒོ་ནས་འཕགས་པ་དང་སོ་སྐྱེའི་གདུལ་བྱའི་ཡུལ་དང་འཚམས་པར་ཆོས་ཀྱི་དབྱིངས་དང་ནམ་མཁའི་ཁམས་ཀྱི་རྗེས་སུ་འགྲོ་བའི་ཆོས་སྒོ་རབ་འབྱམས་རྒྱ་མཚོ་དཔེ་དང་ཚད་ལས་འདས་པར་བསྟན་པ་རྣམས་ཀྱང་སྤང་གཉེན་ནམ། གདུལ་ཡུལ་དབང་པོའི་རིམ་པས་རིགས་བསྡུ་ན་རྒྱུ་འབྲས་ཐེག་པ་གཉིས་སམ། སྔ་འགྱུར་བ་རྣམས་ལ་ཀུན་འབྱུང་འདྲེན་པའི་ཐེག་པ་གསུམ། དཀའ་ཐུབ་རིགས་བྱེད་ཀྱི་ཐེག་པ་གསུམ། དབང་སྒྱུར་ཐབས་ཀྱི་ཐེག་པ་གསུམ་སྟེ་དཀུར་གྲགས་པ་ལས། སྐབས་སུ་བབས་པ་འདི་ནི་རྣལ་འབྱོར་ཆེན་པོ་དབང་སྒྱུར་ཐབས་ཀྱི་
ཐེག་པ་ལ་ནང་གསེས་བསྐྱེད་རྫོགས་རྫོགས་པ་ཆེན་པོ་སྟོན་པའི་གཞུང་རྒྱུད་ལུང་མན་ངག་གསུམ་དུ་རིམ་པར་བཞུགས་པའི་དང་པོ་བསྐྱེད་པ་མ་ཧཱ་ཡོ་ག་ལ་ཏནྟྲ་ཆེན་པོ་སྡེ་བཅོ་བརྒྱད་དུ་གྲག་པ་རྩ་བ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྒྱུད་ལྔ། སྒྲུབ་པ་ལག་ལེན་དུ་སྟོན་པ་རོལ་པའི་རྒྱུད་སྡེ་ལྔ། སྤྱོད་པའི་ཡན་ལག་ཏུ་འགྲོ་བའི་རྒྱུད་སྡེ་ལྔ། མ་ཚང་བ་ཁ་སྐོང་བའི་རྒྱུད་གཉིས། སྤྱིའི་རྒྱུད་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་རྣམས་སུ་མཆིས་པ་ལས། འདིར་སྒྲུབ་པ་ལག་ལེན་ཏུ་སྟོན་པ་ལས། ཐུགས་ཀྱི་ཏནྟྲ་ཧེ་རུ་ཀ་རོལ་པའི་རྒྱུད་ཀྱི་བྱེ་བྲག་དཔལ་ཁྲག་འཐུང་གི་གལ་པོ་ཆེའི་རྒྱུད་ཀྱི་རྗེས་སུ་འབྲང་བ་ཡང་དག་ཟླ་གམ་དགུ་པའི་དཀྱིལ་འཁོར་དུ་སྨིན་བྱེད་ཀྱི་དབང་ཉིད་བསྐུར་བའི་སྐབས་སུ་བབས་པ་ཡིན། དེ་ལའང་ཧེ་རུ་ཀ་གལ་པོ་ལས། །རང་བཞིན་ལྷུན་གྲུབ་དཀྱིལ་འཁོར་དུ། སློབ་མ་རབ་གཞུག་དབང་བསྐུར་ཏེ། །བྱ་བྲལ་རྫོགས་པའི་མན་ངག་བསྟན། །ཏིང་འཛིན་བརྟན་པའི་དཀྱིལ་འཁོར་དུ། །སློབ་མ་འབྲིང་གཞུག་དབང་བསྐུར་ཏེ། །བསྐྱེད་རྫོགས་གྲུབ་པའི་མན་ངག་བསྟན། །གཟུགས་བརྙན་བསྙེན་སྒྲུབ་དཀྱིལ་འཁོར་དུ། །ཐ་མའི་སློབ་གཞུག་དབང་བསྐུར་སྟེ། །རིམ་གྱིས་བློ་སྦྱངས་མན་ངག་བསྟན། །ཞེས་གསུངས་པ་བཞིན་སློབ་མ་མཆོག་དང་འབྲིང་དང་ཐ་
མའི་རིགས་ཅན་རྣམས་ལ་ཡེ་ཤེས་དང་ཏིང་ངེ་འཛིན་དང་གཟུགས་བརྙན་གྱི་དཀྱིལ་འཁོར་དུ་སྐལ་པ་དང་འཚམས་པའི་དབང་བསྐུར་ནས་དེ་དང་དེའི་མན་ངག་རྣམས་སྟོན་པར་གསུངས་པ་ལས། ཕྱི་མའི་དབང་དུ་བྱས་ནས་བསྒྲུབ་པའི་རིམ་པ་ལ་སྦྱོར་དངོས་རྗེས་གསུམ་ལས་སྐབས་འདིར་སྦྱོར་བ་སྟ་གོན་གྱི་བྱེ་བྲག་སློབ་མ་ལྷག་པར་གནས་པའི་ཆོས་རྣམས་སྒྲུབ་པར་བྱེད་པ་ཡིན་པས། དེའི་སླད་དུ་ཐོག་མར་ཁྱེད་རང་རྣམས་ཀྱི་ལུས་ལོངས་སྤྱོད་དུས་གསུམ་དང་འབྲེལ་བའི་དགེ་ཚོགས་རྒྱ་མཚོ་དང་བཅས་པ་ཐམས་ཅད་གཅིག་ཏུ་བསྡོམས་ནས་འབུལ་བའི་མོས་འདུན་བགྱིས་ཏེ་ཞིང་ཁམས་འབུལ་མཛོད། ཅེས་བརྗོད་དེ་མཎྜལ་འབུལ་དུ་གཞུག །ཐོག་མར་ཁྱེད་རང་རྣམས་གསང་སྔགས་ཟབ་མོའི་སྒོར་ཞུགས་པ་རྙེད་པའི་མཆོག་ལེགས་པར་རྙེད་པས་སྤྲོ་བ་བསྐྱེད་པ་ནི་འདི་ལ་སྙན་གཏོད་འཚལ། བུ་ཁྱོད་ཚུལ་ལྡན་སྣོད་ཡིན་པས། །ཐེག་ཆེན་གསང་བའི་གཞུང་བཞིན་ཉོན། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བཤད་པར་བྱ། །རྫོགས་སངས་རྒྱས་ཚོགས་འདས་རྣམས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བ་རྫོགས་སངས་རྒྱས། །འགྲོ་ལ་ཕན་ཕྱིར་གནས་བཞུགས་ལ། །དེ་ཀུན་གསང་སྔགས་ཟབ་མོ་ཡི། །ཆོ་ག་ཟབ་མོ་འདི་རྟོགས་
ནས། །སྐྱེས་མཆོག་རང་གི་གནས་ཉིད་དུ། །ཐམས་ཅད་མཁྱེན་པ་ཚད་མེད་བརྙེས། །གསང་སྔགས་སྦྱོར་བ་མཉམ་མེད་པ། །བཅོམ་ལྡན་ཁྲག་འཐུང་དཀྱིལ་འཁོར་གྱིས། །བདུད་ཚོགས་ཤིན་ཏུ་མི་བཟད་པའི། །དཔུང་ཆེན་མཐའ་དག་རྣམ་བཅོམ་པས། །དེ་ཕྱིར་ཀུན་མཁྱེན་ཡེ་ཤེས་ཕྱིར། །བུ་ཁྱོད་བློ་གྲོས་འདི་གྱིས་ཤིག །ཅེས་བརྗོད། གཉིས་པ་སྡོམ་པ་བཟུང་བ་ལ། སྐྱབས་འགྲོ་སྡིག་བཤགས་ཡི་རང་དང་། །སེམས་བསྐྱེད་སྡོམ་བཟུང་དངོས་དང་ལྔ། དེ་ལ་དང་པོ་ནི། །དབང་དོན་རྒྱུད་ལ་འཛིན་པ་ནི་དམ་ཚིགས་དང་སྡོམ་པ་ལ་རགས་ལས་པས་སྡོམ་པ་བཟུང་བའི་རྩ་བ། བླ་མ་དཀྱིལ་འཁོར་གྱི་ལྷ་ཚོགས་མཆོག་གསུམ་སྲུང་མར་བཅས་པ་ལ་སྐྱབས་གསོལ་སྔོན་ཏུ་འགྲོ་བས་སྡོམ་པ་མཐའ་དག་ལེགས་པར་བཟུང་བ་སྙིང་ཐག་པ་ནས་དམ་འཆའོ་སྙམ་པའི་བློས་འདིའི་རྗེས་ཟློས་མཛོད། སངས་རྒྱས་ཆོས་དང་དགེ་འདུན་ལ། །རྟག་ཏུ་སྐྱབས་སུ་འགྲོ་བར་བགྱི། །རྣལ་འབྱོར་མཁའ་འགྲོ་གསང་སྔགས་ཅན། །རིགས་ཀྱི་དཀྱིལ་འཁོར་སོ་སོ་ཡི། །འཁོར་ལོ་བཞུགས་པའི་བདག་ཉིད་རྣམས། །ཀུན་ལ་སྐྱབས་སུ་འགྲོ་བར་བགྱི། །དཔའ་བོ་ཕོ་མོ་འཁོར་བཅས་དང་། །བྱང་ཆུབ་སེམས་དཔའ་བདག་ཉིད་ཆེ། །ཁྱད་པར་དུ་ཡང་སློབ་དཔོན་ལ། །བདག་ནི་
སྐྱབས་སུ་འགྲོ་བར་བགྱི། །མ་ལུས་ཕྱོགས་ན་བཞུགས་པ་ཡི། །དཀྱིལ་འཁོར་བདག་ལ་དགོངས་སུ་གསོལ། །བདག་ནི་དུས་འདི་ནས་བཟུང་སྟེ། །ཇི་སྲིད་བྱང་ཆུབ་སྙིང་པོའི་བར། །དེ་ཡི་ཚངས་སྤྱོད་གཉིས་མེད་པར། །བདག་གི་སྡོམ་པ་མ་ལུས་བཟུང་། ཞེས་ལན་གསུམ། གཉིས་པ་ནི། སྒོ་གསུམ་གྱིས་བསགས་པའི་མི་དགེ་བ་མཐའ་དག་བཤགས་པའི་བློས་འདིའི་རྗེས་ཟློས། །དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་པོ་གཟུང་བར་བྱ། །བདག་གིས་སྡིག་པ་བགྱིས་པ་དང་། །བགྱིད་སྩལ་རྗེས་སུ་ཡི་རང་བ། །མགོན་པོའི་སྤྱན་སྔར་མཆིས་ནས་སུ། །དེ་དག་ཐམས་ཅད་བཤགས་པར་བགྱི། གསུམ་པ་ནི། །བདག་གཞན་དུས་གསུམ་དུ་བསགས་པའི་དགེ་བ་མཐའ་དག་ལ་རྗེས་སུ་ཡི་རང་བའི་བློས་འདིའི་རྗེས་ཟློས། །རྒྱལ་བ་སྲས་བཅས་ཚོགས་རྣམས་དང་། །རང་རྒྱལ་དགྲ་བཅོམ་འགྲོ་རྣམས་ཀྱིས། །བསྒོམ་བཟླས་ལ་སོགས་བསོད་ནམས་ལ། །དད་པས་རབ་ཏུ་ཡི་རང་ངོ། །བཞི་པ་ནི། །བླ་ན་མེད་པའི་བྱང་ཆུབ་མཆོག་ཏུ་སེམས་བསྐྱེད་པ་འདིའི་རྗེས་ཟློས། །དགེ་བའི་ཚོགས་མང་སྤེལ་བའི་ཕྱིར། །བྱང་ཆུབ་གཉིས་མེད་དོན་བསྐྱེད་ནས། །འགྲོ་རྣམས་དེ་རིང་དོན་དུ་གཉེར། །སངས་རྒྱས་གྱུར་ནས་བདག་གིས་ནི། །འགྲོ་
རྣམས་སྲིད་པའི་གནས་ལས་འདོན། ལྔ་པ་ནི། །སྔགས་ཀྱི་ཐུན་མོང་མ་ཡིན་པ་རིགས་ལྔ་སྤྱི་དང་བྱེ་བྲག་པས་བསྡུས་པ་སོགས་རྩ་བ་དང་ཡན་ལག་གི་དམ་ཚིག་རྣམས་བླངས་ནས་ཚུལ་བཞིན་བསྲུང་བར་བགྱིའོ་སྙམ་པའི་བློས་འདིའི་རྗེས་ཟློས། །སེམས་བསྐྱེད་མངོན་པར་སངས་རྒྱས་དང་། །ཆོས་ཀྱི་འཁོར་ལོ་སྐོར་བྱེད་ཅིང་། །ཚོགས་སྤྱོད་བྱང་ཆུབ་སེམས་དཔའ་ལ། །བདག་གིས་གུས་པས་སྐྱབས་སུ་མཆི། །སངས་རྒྱས་རྣམ་འབྱུང་ཇི་ལྟ་བར། །སྐལ་ལྡན་བྱང་ཆུབ་སེམས་དཔའ་ཡིས། །ཐུབ་མཆོག་བྱང་ཆུབ་རྒྱ་ཆེན་པོ། །འགྲོ་བ་རྒྱ་ཆེན་དོན་ལ་དམིགས། །མགོན་རྣམས་བདག་ལ་དགོངས་སུ་གསོལ། །མ་ལུས་ཕྱོགས་བཞུགས་དཀྱིལ་འཁོར་རྣམས། །དུས་འདི་ཉིད་ནས་སངས་རྒྱས་ལ། །བླ་མེད་རྒྱ་ཆེན་དང་བར་གཟིགས། །ཇི་ལྟར་དུས་གསུམ་བདེ་གཤེགས་རྣམས། །བྱང་ཆུབ་མཆོག་ཏུ་ངེས་མཛད་ནས། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་བཟུང་བར་
བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམ་ཏེ་བཟུང་ནས་ནི། །ནམ་དུ་ཡང་ནི་མི་སྤང་ངོ། །རྡོ་རྗེ་རིགས་མཆོག་ཆེན་པོ་ཡི། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ནི་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ནི་བཟུང་བར་བྱ། །ལས་གྱི་རིགས་མཆོག་ཆེན་པོ་ཡི། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བྱ། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་མཆོག་ཏུ་སེམས་བསྐྱེད་ཅིང་། །བདག་གིས་སྡོམ་པ་མ་ལུས་བཟུང་། །མ་གྲོལ་པ་རྣམས་དགྲོལ་བར་བྱ། །མ་བསྒྲལ་བ་རྣམས་བདག་གིས་བསྒྲལ། །དབུག་མ་ཕྱིན་པ་དབུགས་དབྱུང་ཞིང་། །ཐམས་ཅད་མྱ་ངན་འདས་ལ་འགོད། །དགེ་བའི་ལས་རྣམས་འདི་དག་གིས། །འཇིག་རྟེན་སངས་རྒྱས་མྱུར་འགྲུབ་ནས། །འཁོར་བའི་རྒྱ་མཚོར་བྱིང་བ་རྣམས། །བླ་མེད་བྱང་ཆུབ་གནས་པར་བགྱི། ཞེས་རིག་པ་འཛིན་པའི་སྡོམ་པ་ལེན་དུ་གཞུག་
གསུམ་པ་བྱིན་གྱིས་བརླབ་པ་ནི། །ལས་སྔགས་ཀྱིས་བསང་། སྭ་བྷཱ་བས་སྦྱངས། སྟོང་པའི་ངང་ལས་པདྨ་ཟླ་ཉི་ལྷ་ཆེན་ཡབ་ཡུམ་གྱི་སྟེང་དུ་ཧཱུྃ་ལས་སློབ་མ་རྣམས་བཛྲ་ཧེ་རུ་ཀ་ནག་དཀར་དམར་བའི་ཞལ་གསུམ་ཕྱག་དྲུག་ཞབས་བཞི་བགྲད་པ། གཡས་གསུམ་རྡོ་རྗེ་ཁ་ཊཾྭཱ་རྡེའུ་ཆུང་། གཡོན་གསུམ་དྲིལ་བུ་དུང་དམར་རྒྱུ་ཞགས་འཛིན་པ། ཡུམ་ཀྲོ་དྷཱི་ཤྭ་རི་མ་དང་མཉམ་པར་སྦྱོར་བའི་སྐུ་ཅན་དུ་བཞུགས་པའི་གནས་གསུམ་དུ་ཨོཾ་ཨཱཿཧཱུྃ་དཀར་དམར་མཐིང་གསུམ་གསལ་བར་གྱུར། སློབ་དཔོན་རྡོ་རྗེ་དང་བཅས་པའི་ཕྱག་གཡས་ཀྱིས་སློབ་མའི་གནས་གསུམ་དུ་དྲི་བཟང་གི་ཆུས་ཐིག་ལེ་བཀོད་ལ། ཨོཾ་ཨཱཿཧཱུྃ། ཞེས་བརྗོད་པའི་རྐྱེན་གྱིས་ཁྱེད་རང་རྣམས་ཀྱི་དཔྲལ་བར་ཨོཾ་ལས་འཁོར་ལོ་དཀར་པོ་རྩིབས་བརྒྱད་པའི་ལྟེ་བར་ཨོཾ་གྱིས་མཚན་པ་ཡོངས་སུ་གྱུར་པ་ལས་སྐུ་རྡོ་རྗེ་དཀར་པོ། མགྲིན་པར་ཨཱཿལས་པདྨ་དམར་པོ་འདབ་མ་བརྒྱད་པའི་ལྟེ་བར་ཨཱཿས་མཚན་པ་ཡོངས་སུ་གྱུར་པ་ལས་གསུང་རྡོ་རྗེ་དམར་པོ། །ཐུགས་ཀར་ཧཱུྃ་ལས་རྡོ་རྗེ་སྔོན་པོ་རྩེ་ལྔ་པ་ལྟེ་བར་ཧཱུྃ་གིས་མཚན་པ་ཡོངས་སུ་གྱུར་པ་ལས་ཐུགས་རྡོ་རྗེ་སྔོན་པོ། གསུམ་ཀའང་དུར་ཁྲོད་ཀྱི་ཆས་ཅན་ཕྱག་གཡས་པ་རྣམས་ཀྱིས་འཁོར་ལོ་པདྨ་རྡོ་རྗེ། གཡོན་པ་རྣམས་ཀྱིས་དེས་ཡུ་བ་བྱས་པའི་དྲིལ་བུ་འཛིན་པ། རང་འདྲའི་ཡུམ་ལ་འཁྱུད་ཅིང་གཡོན་བརྐྱང་གི་སྟབས་ཀྱིས་
བཞུགས་པར་མོས་ཤིག །དེ་ལྟར་སྒོ་གསུམ་རྡོ་རྗེ་གསུམ་དུ་གྱུར་པ་དེ་མཆོད་པའི་ཡུལ་དུ་བཟང་བས་དབུ་ལ་མེ་ཏོག །ཤངས་ལ་བདུག་སྤོས། སྤྱན་ལམ་དུ་མར་མེ། ཐུགས་ཀར་དྲིའི་བྱུག་པ་རྣམས་ཕུལ་བར་མོས་ཤིག །ཨོཾ་ཤྲཱི་བཛྲ་རཱ་ག་པུཥྤེ་པུ། དེ་བཞིན་དུ། དྷཱུ་པེ་དྷཱུ། ཨཱ་ལོ་ཀེ་ཧྲཱིཿགེནྡྷ་གན། ཞེས་མཆོད་པ་བཞི་གནས་སོ་སོར་དབུལ་བའི་ཚུལ་བྱ། བཞི་པ་སོ་ཤིང་སྦྱིན་པ་ནི། འབྱུང་ལྔ་བྱུགས་བའི་མཎྜ་ལར་པདྨ་འདབ་བརྒྱད་བྲིས་པ་མདུན་དུ་བཀོད་ཅིང་སློབ་དཔོན་གྱིས་རྩ་སྔགས་བཟླས་པའི་སོ་ཤིང་གཏད་ལ། དངོས་གྲུབ་ཀྱིས་ལྟས་བརྟག་པའི་ཕྱིར་ཨུ་དུམྦ་ར་ལ་སོགས་པའི་དྲང་པོ་སོར་བཅུ་གཉིས་པ་དྲི་ཡིས་བྱུག་ཤིང་རྩེ་མོར་མེ་ཏོག་གི་ཕྲེང་བ་བཅིངས་པ་འདི་ཉིད་ཁྱེད་རང་ཁ་ཤར་དུ་ཕྱོགས་ལ་མི་སྨྲ་བར་བཅའ་བའི་ཚུལ་གྱིས་མཎྜལ་ཉིད་གདོད་ནས་གྲུབ་པའི་རིགས་ལྔའི་དཀྱིལ་འཁོར་དུ་མོས་པ་ལ་འདོར་བར་ཞུ། ཞེས་དོར་ལ། དེ་ལྟར་དོར་བའི་མཚན་ལྟས་ཀྱང་། ཇི་སྐད་དུ། རྩེ་མོ་བདག་ལ་བསྟན་པ་དང་། རྩེ་མོ་གྱེན་ལ་ཕྱོགས་གྱུར་ན། །མཆོག་གི་དངོས་གྲུབ་མཚན་མ་ཡིན། །མཚམས་དང་བྱང་དུ་ཁ་བལྟས་ན། །འཇིག་རྟེན་པ་ཡི་ལས་འགྲུབ་འགྱུར། །རྩེ་མོ་ཐུར་དུ་བསྟན་པས་ནི། །ས་འོག་དངོས་གྲུབ་ངེས་པར་
འགྲུབ། །ཕྱོགས་བཞི་རྩེ་མོ་བྱེ་བྲག་གིས། །ལས་བཞིའི་མཚན་མ་ཤེས་པར་བྱ། །ཞེས་གསུངས་པ་ལྟར་ངེས་པར་བྱའོ། །ལྔ་པ་ཁྱོར་ཆུ་སྦྱིན་པ་ནི། རྨི་ལམ་གསལ་པར་བྱ་བ་དང་། ཁྱེད་རང་རྣམས་ཀྱི་ཕྱི་ནང་གི་དྲི་མ་ཐམས་ཅད་དག་པར་བྱེད་པའི་ཆུ་འདིས་ཁ་ལན་གསུམ་དུ་བཤལ་ཏེ་ལྷག་མ་རྒྱབ་ཏུ་དོར་བས་ཉེས་པའི་སྐྱོན་རྣམས་དག་པར་མོས་ཤིག །ཨོཾ་ཧྲཱིཿབི་ཤུདྡྷ་སརྦ་དྷརྨཿཔཱ་པཾ་ནཱི་ཙ་སྱ། སཾ་ཤོ་དྷ་ཡ་སརྦ་བི་ཀལྦན་ཨ་པ་ན་ཡ་ཧཱུྃ། ཞེས་དུང་ཆུ་སྦྱིན། དྲུག་པ་རྩ་ཀུ་ཤ་གཏད་པ་ནི། ཨོཾ་ཨཱཿཧཱུྃ། བཟླས་པས་བྱིན་རླབས་ལ། རྨི་ལམ་མི་འཁྲུགས་པར་བྱ་བའི་ཕྱིར་དག་བྱེད་མཆོག་ཏུ་དགེ་པའི་རྩྭ་མཆོག་གི་ཕོན་པོ་ཆུང་བ་སྔས་དང་ཆེ་བ་སྟན་གྱི་དོན་ཏུ་ཟུང་ཞིག །ཅེས་ལག་གཡས་གཡོན་ཏུ་གཏད། བདུན་པ་སྲུང་སྐུད་གདགས་པ་ནི། སྐུད་པ་ཁ་དོག་སྣ་ལྔ་པ་བསྒྲིལ་པ་ལུས་ཚད་དང་མཉམ་པ་ལ་རྡོ་རྗེའི་མདུད་པ་ལྔ་བྱས་ལ། སྲུང་སྐུད་ཀྱི་མདུད་པ་རྣམས་ཧཱུྃ་ཨོཾ་སྭཱ་ཨཱཾཿཧཱཾ། དེ་ལས་འོད་ཟེར་འཕྲོས། རང་བཞིན་གནས་ནས་རིགས་ལྔ་སྤྱན་དྲངས་ཡིག་འབྲུ་ལ་བསྟིམ། དེ་ཞུ་བ་སྐུད་པར་ཐིམ་པས་རིགས་ལྔའི་ངོ་བོར་བསམས་ལ། འཁོན་ལྔ་བཟླས་པས་བྱིན་གྱིས་བརླབ། ཧཱུྃ་ཨ་ཨོཾ་ཨ་ཧྲཱིཿཨ་ཏྲཱཾ་ཨ་ཧཱ་ཨཿཨོཾ་སརྦ་རུདྡྷེ་ཀུ་རུ་ཀུ་རུ་སྭཱ་ཧཱ་དང་། ཨོཾ་ཨཱཿཧཱུྃ་བཟླས་པས་བྱིན་གྱིས་བརླབས་ལ་སྐྱེས་པའི་
གཡས་དང་བུད་མེད་ཀྱི་གཡོན་ཏུ་འཆིང་ཞིང་ལས་སྔགས་བཟླ། རྨི་ལམ་ལ་བར་དུ་གཅོད་པའི་བགེགས་རྣམས་བསྲུང་བར་མོས་ཤིག །བརྒྱད་པ་ནི། །ཕྱིར་མི་ལྡོག་པ་ཟབ་མོའི་ཆོས་བཤད་པ་ནི་འདི་ལ་གསན་པས་ཁྱབ་པར་གདའ། །ཀུན་མཁྱེན་འཇིག་རྟེན་ཁམས་འབྱུང་བ། །ཨུ་དུམྦཱ་རའི་མེ་ཏོག་བཞིན། །རྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ། །གསང་སྔགས་སྤྱོད་ཚུལ་ཟབ་མོ་འདི། །དེ་བས་ཀྱང་ནི་རྙེད་པར་དཀའ། །གང་གིས་སེམས་ཅན་དཔག་མེད་དོན། །མྱ་ངན་མི་འདའ་བྱེད་ནུས་པའི། །བསྐལ་པ་བྱེ་བ་གྲངས་མེད་དུ། །གང་གིས་སྡིག་པ་བྱས་པ་གང་། །དཀྱིལ་འཁོར་འདི་འདྲ་མཐོང་བས་ནི། །དེ་དག་ཐམས་ཅད་ཟད་པར་འགྱུར། །སྔགས་སྤྱོད་ཚུལ་ལ་གནས་པ་ཡི། །མཉམ་པར་གྱུར་པ་གཞན་གང་ཡོད། །ཚེ་འདི་ཉིད་ལ་སྔགས་བཟླས་པས། །བླ་མེད་གནས་སུ་འགྲོ་འགྱུར་ཏེ། །སྡུག་བསྔལ་ཀུན་འབྱུང་ཉམ་ཐག་པའི། །ངན་འགྲོའི་སྡུག་བསྔལ་སྤོང་བར་འགྱུར། །དེ་ནས་སྤྱོད་མཆོག་ཚུལ་འདི་ལ། །བློ་གྲོས་ཤིན་ཏུ་བརྟན་པས་ན། །དེ་རིང་ཁྱོད་ནི་རྙེད་པར་མཆོག །བདག་ཉིད་ཆེན་པོ་ཐོབ་པར་འགྱུར། །གང་གིས་རྒྱལ་བ་ཐམས་ཅད་ནི། །སྲས་བཅས་རྣམས་ཀྱི་བསྟན་པ་ནི། །བློ་མཆོག་ལྡན་པས་ཡོངས་གཟུང་སྟེ། །གནས་
ཤིང་བདག་ཉིད་ཆེན་པོ་ལ། །ཐེག་ཆེན་གསང་བའི་གནས་དག་ཏུ། །དེ་རིང་འགྲོ་བར་འགྱུར་བ་ཡིན། །ལམ་མཆོག་འདི་ནི་དཔལ་དང་ལྡན། །ཐེག་ཆེན་སྣང་བ་ཆེར་འབྱུང་བས། །ཁྱོད་ནི་འགྲོ་བར་གྱུར་པས་ནི། །དེ་བཞིན་གཤེགས་པར་འབྱུང་བར་འགྱུར། །དངོས་སྟ་སྦྲེལ་བའི་ལུགས་ལ་དེ་ཙམ་གྱིས་ཆོག་ཅིང་། སོ་སོར་ཕྱེ་བའི་སྐབས། །དོ་ནུབ་ཁྱེད་རང་རྣམས་ཀུ་ཤའི་གདན་ལ་མི་སྨྲ་བར་སེང་གེའི་ཉལ་སྟབས་ཀྱིས་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་ལ་མོས་པ་རྩེ་གཅིག་པར་ཉོལ་ལ་རྨི་ལམ་གང་མཐོང་བ་ནངས་པར་ང་ལ་སྨྲོས་ཤིག །ཅེས་བསྒོས་ལ། བསོད་ནམས་འདི་ཡིས་སོགས་དགེ་བ་བསྔོས་ཏེ་གྱེས་སོ། །དགུ་པ་གཏོར་མ་གཏོང་བ་ནི། རྒྱས་པར་ན་ཕུར་པའི་དཀྱིལ་ཆོག་རྟོགས་པར་སླབ་ལྟར་བྱ་བར་གསུངས་ཀྱང་། །ས་བཅད་ཙམ་ཕྱི་རོལ་དུ་གཏོར་མ་གཅིག་ལ་ཆ་གསུམ་གྱི་ཕྱོགས་སྐྱོང་གི་གཏོར་མ་ལྟར་བཏང་ངོ། །བཅུ་པ་མཆོད་བསྟོད་ནི། དཀྱིལ་འཁོར་ལན་གསུམ་བསྐོར། མཆོད་པ་ཁ་གསོལ་ལ་བྱིན་རླབས་དང་མཆོད་བསྟོད་བུམ་བསྐྱེད་ལྟར་བྱ། རྡོ་རྗེ་གཙུག་གཏོར་གྱི་ཕྱག་རྒྱ་དང་ཨོཾ་བཛྲ་ཨུཏྟིཥྛ་ཞེས་སྟ་གོན་གྱི་ལྷ་ནམ་མཁར་བྱོན་པར་བསམ། གཏོར་ཆོག་དང་བདག་བསྐྱེད་ཀྱི་རྗེས་ཆོག་རྒྱས་བསྡུས་ཅི་ལྟར་འགྲུབ་པར་བྱའོ། རྩ་བའི་གསུམ་པ་དཀྱིལ་འཁོར་དུ་འཇུག་པའི་བྱ་བ་ལ་གསུམ། དཀྱིལ་འཁོར་བསྒྲུབ་པ། དབང་བསྐུར་བ། དེ་དག་གི་རྗེས་ཀྱི་བྱ་བའོ། དང་པོ་ལ་བཞི། །འདྲི་བ་
རྫས་དགོད་པ། བྱིན་རླབས། ཏིང་འཛིན་ནོ། དང་པོ་ནི། བཛྲ་ཧྲཱིཿཞེས་འདེགས་པའི་རྒྱས་ཐིག་གི་ཕོ་བྲང་མཁའ་ལ་བཏེགས་ནས། ཧྲཱིཿཞེས་སྒོའི་རྩ་ཐིག་ཕྱིས་ལ། སྔར་སྐོར་ཐིག་བྱས་ན། ཧཱུྃ་བཞི་པ་བཟླས་ནས་ལྟེ་བའི་ཕུར་བུ་ཕྱུངས་སྟེ། ཁུང་བུ་ཚོན་སྣ་ལྔ་འབྱུང་རིགས་སྡེབས་པས་འགེག་གོ། །དེ་ནས་སློབ་དཔོན་གྱིས། འདི་ནི་ཆོས་དབྱིངས་རྣམས་དག་པར། །སེམས་ཅན་རྣམས་ནི་རབ་སྒྲོལ་བྱེད། །དཔལ་ལྡན་རྒྱལ་པོ་ཆེ་གེ་མོ། །དེ་བཞིན་གཤེགས་པ་ཀུན་གྱི་གནས། །ཡང་དག་བདེན་པའི་བྱིན་རླབས་ཀྱིས། །དཀྱིལ་འཁོར་ལས་རྣམས་ཤིས་པར་མཛོད། ཅེས་བརྗོད་ཅིང་དབང་ལྡན་གྱི་བརྩིགས་པའི་རེ་ཁཱ་ལྔ་སོར་བཞི་ཙམ་བྲིས་ལ་ཐོད་པས་བཀབ། རྩིས་པ་སྒྲེལ་རན་པ་ན་ཚོན་པྲ་བརྟག །དེ་ནས་སློབ་མ་རྣམས་ཀྱིས་ཀྱང་ཅི་བདེར་བྲི་སྟེ་ཧཱུྃ་གི་སྒྲ་རྒྱུན་མི་ཆད་པས་སོ། ཟླ་གམ་དབུས་མའི་ཤར་དཀར་པོ། གཞན་དགུ་པོ་དམར་པོ། གཞི་དམར་སྨུག །གདུང་བཞི་གདུང་ཟླུམ་དང་བཅས་པ་སྔོན་པོ་ལ་རྡོ་རྗེ་དཀར་པོ། ནང་རྩིག་ཐོད་པ་སྟེ་སྔོ་དམར་དཀར་བ། གྲུ་ཆད་ལྗང་གུ་ཁྱམས་ཕྱོགས་མདོག་སོགས་སྤྱི་དང་མཐུན་པ་ལས། ཁྱད་པར་དུར་ཁྲོད་ཀྱི་བཀོད་པའི་མཚན་ཉིད་ཅན་དུ་བྲིས་ལ། མཚན་མ་རྣམས་རྡུལ་ཚོན་གྱིས་བྱེད་ན་སྐུ་དང་ཡིག་འབྲུ་ཕྱག་མཚན་ཐིག་ལེ་སོགས་སྔ་མའི་རྗེས་འབྲེལ་ཁོ་ནར་བྲིའོ། དེ་ལྟར་ཐིག་ཚོན་གྱི་ལས་རྫོགས་པ་ན་མཆོད་བསྟོད་བྱས་གཙྪ་མུཿཞེས་ཡེ་ཤེས་པ་གཤེགས་སུ་གསོལ་ལོ། །གཉིས་པ་ནི།
རྒྱས་པར་ན། རྟེན་རྫས་ལྷ་གྲངས་ཀྱི་ཕུར་པ། མར་མེ། ཐོད་སྐུ། བུམ་པ་རྣམས་དང་། ཞིང་གི་བླ་བྲེ། མཆོག་ཕུར་བཞི་དང་ལྕགས་ཕུར་བཞི་སོགས་རྒྱན་རྫས། ཕྱི་ནང་གསང་བའི་མཆོད་རྫས། བདུད་རྩིའི་བུམ་པ་སོགས་ཚེ་རྫས་རྣམས་གལ་པོ་ལས་གསུངས་པའི་ཚིགས་བཅད་རྣམས་ཀྱིས་སོ་སོར་བཀོད་པ་ཡིན་ཀྱང་། འདིར་སྤྲོས་པ་ཆུང་བའི་དབང་དུ་བྱས་ཏེ། མེད་དུ་མི་རུང་བའི་རྟེན་རྫས་ཀྱི་གཟོ་བོ། ཁམ་ཕོར་རི་མོ་བྲིས་པ་དགུ། སྣང་བའི་འོད་དང་བཅས་པ་དགྲམ། ཞེས་པས་ཐོད་པ་མཚན་ལྡན་ལ་བྱང་སེམས་དཀར་དམར་གྱིས་གཙོ་བོའི་སྐུའམ་སྔགས་དང་རྡོ་རྗེ་ཁ་ཊཱྭྃཾ་ཀ་བྲིས་པ་དང་། བྲམ་ཟེ་ལ་སོགས་པའི་ཐོད་པ་ཚལ་བུ་བརྒྱད་ལ་གཽ་རཱི་མ་སོགས་མ་མོ་བརྒྱད་སོ་སོའི་སྐུའམ་སྔགས་དང་མཚན་མ་བྲིས་པ་རྣམས་དང་པདྨ་བྷདྡྷར་སྣུམ་ཆེན་དང་འབྲུ་མར་སྣ་ཚོགས་ཙིཏྟའི་ཤར་བུ་ལ་སོགས་པའི་སྡོང་བུ་ལ་སྦར་བའི་མར་མེ་དགུ་ཡང་ཐོད་པ་རྣམས་དང་འབྲེལ་ཆགས་སུ་བཤམ། དབང་གི་སྐབས་ལྟ་བུར་ཐོད་སྐུ་སོ་སོར་མ་འཛོམ་ན་གཙོ་བོ་ཁོ་ནས་ཆོག་ཅིང་། མར་མེའང་ཐོད་པ་གཅིག་ཟན་གྱིས་བཀང་བར་ཀོང་བུ་དགུ་ལ་འབྲི་མོག་གིས་ཁ་བསྒྱུར་བའི་མར་མེ་དགུ་མཛད་པ་ལུགས་འདིའི་ཕྱག་རྒྱུན་ཏུ་སྣང་ངོ། གང་ལྟར་ལས་སྔགས་ཀྱིས་བགེགས་བསྐྲད། གཙོ་འཁོར་སྔགས་ཀྱིས་གཟི་བྱིན་བསྐྱེད་ལ། ཧཱུྃ་དབུས་ནས་རང་བྱུང་གྲུབ་པའི་ལྷ། །ཐུགས་མཆོག་བཛྲ་ཧེ་རུ་ཀ །བཛྲ་ཀྲོ་དྷཱི་ཤྭ་རི་གཉིས། །རང་བཞིན་དཀྱིལ་འཁོར་ཆེན་པོ་ནས། །ཛཿཧཱུྃ་བྃ་ཧོཿས་སྤྱན་འདྲེན་ན། །དུར་ཁྲོད་ཆེན་པོའི་གནས་མཆོག་དང་། །དུག་གསུམ་བསྒྲལ་བའི་
དཀྱིལ་འཁོར་འདིར། །ལྷ་ཆེན་བསྣོལ་བའི་གདན་སྟེང་དུ། །དགྱེས་ཤིང་བརྟན་པར་བཞུགས་སུ་གསོལ། ཅེས་དང་གཙོ་སྔགས་ཀྱི་མཐར། ཀཱ་ཡ་ཝཱཀ་ཙིཏྟ་ས་མ་ཡ་ཏིཥྛ་ལྷན། ཅེས་དཀྱིལ་འཁོར་གྱི་དབུས་སུ་མཉྫིལ་སྣོད་འབྲུས་བཀང་བར་བསླངས་ཏེ་བཀོད། ཐོད་སྐུ་གཞན་ཡོད་ན། ཧཱུྃ་ཕྱོགས་མཚམས་རང་བྱུང་གྲུབ་པའི་ལྷ། །མ་མོ་ཆེན་མོ་མེ་འབར་མ། །རྡོ་རྗེ་ཐུགས་ཀྱི་ཁྲོ་མོ་བརྒྱད། །དུར་ཁྲོད་ཆེན་པོའི་གཞལ་ཡས་ཁང་། །དུག་གསུམ་བསྒྲལ་བའི་དཀྱིལ་འཁོར་འདིར། །མཆོག་ཕྲན་བསྣོལ་བའི་གདན་སྟེང་དུ། །དགྱེས་ཤིང་བརྟན་པར་བཞུགས་སུ་གསོལ། ལྷ་མོ་སོ་སོའི་སྔགས་གཤམ་དུ་བཛྲ་ས་མ་ཡ་ཏིཥྛཾནྟུ་ཞེས་ཕྱོགས་མཚམས་བརྒྱད་དུ་དགོད་དོ། །མར་མེ། ཨཱ་ལོ་ཀེ་ས་མ་ཡ་ཏིཥྠ་ལྷན། ཅེས་བས་། གཙོ་བོའི་མདུན་ཏུ་བཀོད་ཅིང་། སྔར་ལྷག་གནས་བྱས་པའི་བུམ་པ་ཡང་། དཀྱིལ་འཁོར་གྱི་དབུས་སོགས་སུ་བཀོད། སྒྲུབ་མཆོད་སོགས་ཀྱི་སྐབས་འཛོམ་ན། ཞིང་གི་གཡང་གཞིར་རཀྟའི་ཐིག་ལེ་དགུ་ཚོམས་སུ་བཀོད་པ་བླ་ར་བྲེ་བ་སོགས་ཕྱོགས་ཀུན་ཏུ་བླ་རེ་དང་ཡོལ་བ་དང་རྒྱལ་མཚན་དང་བ་དན་ལ་སོགས་པས་བརྒྱན། ཕྱིའི་ཁོར་ཡུག་ལ་མདའ་དར། མེ་ལོང་། རལ་གྲི། ཕུར་བུ་ལ་སོགས་པ་བཞི་བཞི་དང་། ཚོན་སྐུད་ཀྱི་དྲྭ་བས་མཛེས་པར་བསྐོར། མཐའ་སྐོར་དུ་མེ་ཏོག་ལ་སོགས་པ་ཕྱིའི་མཆོད་པ་རྣམས་དང་། སྨན་གཏོར་རཀྟ་ལ་སོགས་པ་ནང་གི་དམ་རྫས་རྣམས་ལེགས་པར་བཤམ། གཞན་ཡང་དབང་གི་རྫས་རིགས་ལྔའི་དབུ་རྒྱན།
ཐོད་སྐམ་ལྔའི་རྩ་ཆིངས། རྡོ་རྗེ་དང་དྲིལ་བུ་ཁ་ཊྭཱཾཾཱ་དང་ཌཱ་མ་རུ། རྗེས་གནང་ཆས། མིག་སྨན་དང་མིག་།ཐུར། མེ་ལོང་། དྲིལ་བུ། མདའ་གཞུ། རྒྱུད་ཀྱི་གླེགས་བམ། དུང་དང་འཁོར་ལོ། རིག་ལྔའི་ཕྱག་མཚན། གསང་དབང་ཐོད་པའི་བདུད་རྩི་མངར་གསུམ་དང་སྦྱར་བ་སོགས་ཇི་ལྟར་བདེ་བར་བཞག །སློབ་དཔོན་གྱི་མདུན་ཏུ་ལས་བུམ། ཡུངས་ཐུན། མེ་ཏོག །ཌཱར་དྲིལ། ནང་མཆོད་སོགས་མཁོ་བའི་ཡོ་བྱད་རྣམས་ཉེ་བར་བསྔོགས་པར་བྱའོ། གསུམ་པ་བྱིན་གྱིས་བརླབ་པའི་ཐོག་མར། རོལ་མོའི་སྒྲ་དང་བཅས་དཀྱིལ་འཁོར་ལན་གསུམ་དུ་བསྐོར་ཞིང་ཡིག་བརྒྱ་བཟླ། སློབ་དཔོན་ཤར་དུ་འཁོད་ལ། ཧཱུྃ། ཆོས་དབྱིངས་དག་པའི་ངོ་བོ་ལས། །སྐུ་གསུམ་རྣམས་པར་བྱུང་ནས་ནི། །སེམས་ཅན་རྣམས་ཀྱི་དོན་བྱའི་ཕྱིར། །དཀྱིལ་འཁོར་འདི་ལ་བྱིན་གྱིས་རློབས། །དུས་གསུམ་བདེ་བར་གཤེགས་པ་རྣམས། །ངོ་བོ་ཉིད་ཀྱིས་མེད་ཀྱང་ནི། །བདག་གིས་སློབ་མ་དབང་བསྐུར་ཕྱིར། །དཀྱིལ་འཁོར་འདི་ལ་བྱིན་གྱིས་རློབས། ཞེས་བརྗོད་ལ་རོལ་མོ་བྱའོ། བཞི་པ་ཏིང་ངེ་འཛིན་བསྒོམ་པ་ནི། རྒྱུད་དང་དབང་གི་རྒྱ་གཞུང་སོ་མཆན་རྣམས་སུ་ཏིང་ངེ་འཛིན་གྱིས་བྱིན་གྱིས་རློབས་པའི་ཚུལ་རྒྱས་པར་གསུངས་པའི་དོན། སྒྲུབ་ཐབས་ལྟར་རྒྱུད་སྦྱོང་བ་ནས་བརྩམས་མཐར་ཆགས་སུ་བཏང་བ་ལས། བཤགས་པ་དང་དམ་བཅའ་བའི་རྗེས་སུ་ཆོ་གའི་དཀྱུས་ཀྱི་བྱིན་འབེབས་ཀྱི་མཐར། ལྷ་སོ་སོའི་སྙིང་པོ་རྣམས་
ཀྱི་གཤམ་དུ། ཨཱ་བེ་ཤ་ཡ་ཨ་ཨ་ཛཿཧཱུྃ་བྃཿཧོཿ ཞེས་བཏགས་པ་མང་དུ་བཟླ་ཞིང་། །རོལ་མོའི་སྒྲ་དང་བཅས་པས། སྔར་ནམ་མཁར་བཏེགས་པའི་སྟ་གོན་གྱི་ལྷ་རྣམས་ཀྱང་གཟུགས་བརྙན་གྱི་དཀྱིལ་འཁོར་ལ་དབྱེར་མེད་དུ་ཐིམ་པར་བསམ་ཞིང་། དེ་དང་འབྲེལ་བར་བརྡ་སྒོ་དབྱེ་བ་དང་བརྡ་ཕྱག་འཚལ་བ་ཡང་བཤད་དེ། དེ་ལྟར་ན། ས་མ་ཡ་ཧོཿ ས་མ་ཡ་སྟཾྭ། ཛཿཧཱུྃ་བྃ་ཧོཿ ཨོཾ་པྲ་བེ་ཤ་ཡ་ཕཊ། ཨ་ལ་ལ་ཧོཿ ཞེས་ཕྱོགས་བཞི་ནས་སྒོ་དབྱེ། ཨོཾ་ཨཱཿཧཱུྃ་ཨ་ཏི་པུ་ཧོཿསརྦ་ཏ་ཐཱ་ག་ཏ་བནྡྷ་ན་ཀ་རོ་ཡཱ་མི་མ་ཧཱ་ཡོ་གཱི་ནཱི། པྲ་ཏི་པུ་ཧོཿ ཞེས་བརྡའི་ཕྱག་བྱ་སྟེ། ཉི་མ་དང་པོ་ཁོ་ན་ལ་འཇུག་གོ། དེ་ནས་མཆོད་རྫས་བརླབ་པ་སོགས་དཀྱུས་བཞིན་ལས། དཀྱིལ་འཁོར་བསྐྱེད་པ་ནི། །སྒྲུབ་བཞི་བདག་གི་ལུས་ངག་ཡིད་གསུམ་དང་བསྒྲུབ་བྱ་ལྷའི་སྐུ་གསུང་ཐུགས་གསུམ་དབྱེར་མེད་ཅིང་། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཐ་མི་དད་དེ། ཡེ་ནས་སངས་རྒྱས་ཀྱི་ངོ་བོར་རོ་མཉམ་པའི་ཕྱིར་བདག་དང་ལྷ་ཞེས་སོ་སོར་དབྱེ་ཞིང་གདགས་སུ་མེད་པས་ན། སྒྲུབ་གཞི་དང་། སྒྲུབ་རྫས། བསྒྲུབ་བྱ་ཐམས་ཅད་བདག་མདུན་དབྱེར་མེད་དམ་ཚིག་གི་དཀྱིལ་འཁོར་གཅིག་གིས་བསྡུས་པར་བསྒོམ་ཞིང་། མཆོད་པ་དང་བསྙེན་པ་ལ་སོགས་པའི་སྐབས་སུ་ལྷ་ལ་དབང་མི་ཟ་བའི་ཕྱིར། དམ་ཡེའི་ཐ་སྙད་དུ་སོ་སོར་ཕྱེ་ནས་ལས་དེ་དག་སྒྲུབ་པ་དང་། བདག་ཉིད་སློབ་མ་གཞུག་པའི་ཚེ་ནའང་གཉིས་སྣང་ཅན་གྱི་རྟོག་ངོར་དེ་ལྟར་དུ་བྱ་བ་ཡིད་ངོར་བདེ་ཞིང་གྲུབ་པ་རྣམས་ཀྱི་མན་ངག་བརྒྱུད་པའོ། བཟླས་པའི་རྗེས་སུ་ཆོས་སྲུང་ལ་གཏོར་མ་འབུལ་ཕྱོགས་སྐྱོང་ལ་གཏོར་མ་
ཆ་གསུམ་བཏང་ཞིང་ལྷག་ཆད་ཁ་སྐོང་བའི་སྐོར་བ་དང་ཡིག་བརྒྱའང་གོང་བཞིན་བྱ། །དངོས་སྟ་སྦྲེལ་བའི་སྐབས་ཕྱོགས་སྐྱོང་གཏོར་འབུལ་སྔ་ཕྱིར་གང་རུང་ཞིག་གིས་འཐུས་ལ། དེ་ནས་ཚོགས་བྱིན་རླབས་ནས་བསྦྲལ་བསྟབ་ཀྱི་བར་དུའང་སྒྲུབ་ཐབས་ཀྱི་དབུས་བཞིན་བྱས་ལ། བདག་ཉིད་འཇུག་པ་སློབ་མ་དབང་བསྐུར་གྱི་སྐབས་བཞིན་མཚམས་སྦྱོར་དོར་བའི་དབང་ཚིག་དངོས་གཞི་རྟོག་པ་བརྗོད་པ་སོགས་འོག་ནས་འབྱུང་བ་ལྟར་བྱ་བའམ། བསྡུ་ན་རིག་པའི་མེ་ཏོག་ཙམ་དོར་བས་ཀྱང་དགོས་པ་འགྲུབ་སྟེ། དེ་ལྟར་ན། རྡོར་དྲིལ་ཐོགས་ལ། །ཨོཾ་ཁྲོ་ལ་ཁྲོས་པས་ཞི་མཛད་པ། །ཐུགས་རྗེས་ཁྲོ་དཔལ་འཇམ་པའི་ཚོགས། །འབར་བའི་བྱིན་རླབས་རྨད་པོ་ཆེ། །དེ་ཉིད་དུ་ནི་བདག་ལ་སྩོལ། །ཨོཾ་བཛྲ་ཀྲོ་དྷ་ས་མ་ཡ་སྟཾྭ། །ཨོཾ་བཛྲ་ཀྲོ་དྷ་ས་མ་ཡ་ཧཱུྃ། །ཨོཾ་བཛྲ་ཀྲོ་དྷ་ས་མ་ཡ་ཕཊ། ཅེས་བརྗོད་ལ། བདག་ཉིད་དཀྱིལ་འཁོར་གྱི་ལྷ་དང་གཉིས་སུ་མེད་པའི་ཏིང་ངེ་འཛིན་གྱིས་དཀྱིལ་འཁོར་དུ་ཞུགས་ལ་རིག་པའི་མེ་ཏོག་དོར་ནས་དཀྱིལ་འཁོར་ལ་མགོས་འདུད་དེ་ཐལ་མོ་སྦྱར་ལ། །ཨོཾ་རྡོ་རྗེ་ཡེ་ཤེས་ཐོབ་བྱེད་པའི། །དེ་བཞིན་གཤེགས་པ་ཐམས་ཅད་ཀྱི། །སྙིང་པོའི་དཀྱིལ་འཁོར་ཆེན་པོ་འདིར། །བདག་གི་སློབ་མ་འཇུག་པར་འཚལ། །ཞེས་སློབ་མ་གཞུག་པར་གསོལ་བ་བཏབ་ནས་གནང་བ་ནོད་ཅིང་དཀྱིལ་འཁོར་ཡོལ་བས་བསྒྲིབ་པོ། གཉིས་པ་སློབ་མ་དབང་བསྐུར་བ་ལ་གསུམ། འཇུག་པའི་ཆོ་ག །དབང་གི་དངོས་གཞི། རྗེས་དམ་ཚིག་བསྒྲགས་པ་ཟུང་ལ་སོགས་པའོ། །དང་པོ་ལ་གཉིས་ཕྱི་
འཇུག་དང་། ནང་འཇུག་གོ །དང་པོ་ཕྱི་ནས་འཇུག་པ་ནི། སྔར་སྟ་གོན་བྱས་པའི་སློབ་མ་རྣམས་ཕྱི་རོལ་དུ་ཁྲུས་བྱ། ཕྱག་བཅས་གྲལ་ལ་འཁོད། བགེགས་གཏོར། རཾ་ཡཾ་ཁཾ་གིས་བསང་། སྟོང་པའི་ངང་ལས་བྷཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་གིས་བྱིན་གྱིས་བརླབས། སརྦ་བྷཱུ་ཏ་ཨཱ་ཀརྵ་ཡ་ཛཿསརྦ་བྷཱུ་ཏ་ཨི་ངཾ་བ་ལི༚་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་བསྔོས་ལ། ན་མོ། རྩ་བརྒྱུད་ཀྱི་བླ་མ་མཆོག་གསུམ་རྒྱལ་བ་རྒྱ་མཚོའི་ཚོགས་དང་བཅས་པ་རྣམས་ཀྱི་བདེན་པ་དང་། །བཅོམ་ལྡན་འདས་དཔལ་ཆེན་རྡོ་རྗེ་ཁྲག་འཐུང་ལྷ་དགུའི་དཀྱིལ་འཁོར་ལྷ་ཚོགས་བཀའ་སྡོད་སྲུང་མ་དང་བཅས་པའི་བདེན་པ་དང་། བདེན་པ་ཆེན་པོའི་མཐུས། དེང་འདིར་སློབ་བུ་རྣམས་ལ་དབང་བསྐུར་ཟབ་མོ་བགྱི་བལ་བར་དུ་གཅོད་པའི་བགེགས་ཚོགས་ཐམས་ཅད་གཏོར་མ་འདིས་ཚིམ་པར་གྱིས་ལ་འདིར་མ་གནས་པ་གཞན་དུ་དེངས་ཤིག །གལ་ཏེ་མི་འགྲོ་ན་ཁྲོ་བོ་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བ་འདིས་ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། ཞེས་པ་ཙམ་མམ། སྤྲོ་ན་སྒྲུབ་ཐབས་ལྟར། ཧཱུྃ། །རྣལ་འབྱོར་ཆེན་པོའི་དཀྱིལ་འཁོར་སོགས་དང་། ཧཱུྃ་བཞིའི་དྲག་སྔགས། གུ་གུལ་ཡུངས་ཐུན་སོགས་ཀྱིས་
བགེགས་བསྐྲད། ཨོཾ་བཛྲ་རཀྵ་རཀྵ་ཧཱུྃ། ཞེས་བརྗོད་པས་ཕྱི་རོལ་ཐམས་ཅད་རྡོ་རྗེའི་ས་གཞི་རྭ་གུར་བླ་བྲེ་དང་བཅས་པ་ཡེ་ཤེས་ཀྱི་མེ་དཔུང་མཐའ་མེད་དུ་འཕྲོ་བས་མཚམས་བཅད་པར་གྱུར། ཅེས་སྲུང་འཁོར་བསྒོམ། དེ་ནས་མེ་ཏོག་བཀྱེ་བསྡུ་དང་སེམས་བསྐྱེད་གསལ་བཏབ་ལ། །དེ་ལ་འདིར་གསན་བྱའི་ཆོས་ནི་གསང་སྔགས་གསར་རྙིང་གཉིས་སུ་གྲགས་པ་ལས། བོད་ཀྱི་ལྗོངས་སུ་ཆོས་རྒྱལ་ལོ་པ་སྤྲུལ་པའི་སྐྱེས་མཆོག་རྣམས་ཀྱིས་ཐོག་མར་བསྒྱུར་བཤད་འཆད་ཉན་སྒོམ་སྒྲུབ་ཀྱིས་གཏན་ལ་ཕབ་པ་སྔ་འགྱུར་རྙིང་མ། དེ་ལའང་བཀའ་གཏེར་དག་སྣང་བབ་སོ་གསུམ་དུ་གྲགས་པ་ལས། གདོད་མའི་མགོན་པོ་དང་གསང་བའི་བདག་པོ་སོགས་ནས། ད་ལྟའི་བར་ཚིག་དོན་གཉིས་ཀའི་བརྒྱུད་པ་བྲེང་ཆགས་སུ་བྱོན་པ་རྒྱ་ཆེ་བ་བཀའ་མ། དེ་ལ་རྣལ་འབྱོར་ཆེན་པོ་ཡོ་ག་རྣམ་པ་གསུམ་དུ་གྲགས་པ་ལས་རྒྱུད་མ་ཧཱ་ཡོ་ག །དེ་ལའང་བསྐྱེད་རིམ་ཐབས་ཀྱི་ཆ་དང་རྫོགས་རིམ་རླུང་གཙོ་བོར་བྱེད་པས་གསལ་སྟོང་རྣམ་པར་མི་རྟོག་པའི་ཚུལ་གྱིས་ཉམས་སུ་ལེན་པ་མ་ཧཱའི་མ་ཧཱ་སྟེ་ཕ་རྒྱུད་གསང་བ་འདུས་པ་ལ་སོགས་པ་དང་། བསྐྱེད་རིམ་གྱི་སྤྲོས་པ་ཤས་ཆུང་ཞིང་ཤེས་རབ་རྫོགས་པའི་རིམ་པ་
ཁམས་བྱང་ཆུབ་ཀྱི་སེམས་ཐིག་ལེ་གཙོ་བོར་བྱེད་པས་བདེ་སྟོང་རྣམ་པར་མི་རྟོག་པའི་ཚུལ་དུ་ཉམས་སུ་ལེན་པ་མ་ཧཱའི་ཨ་ནུ་སྟེ་མ་རྒྱུད་སངས་རྒྱས་མཉམ་སྦྱོར་དང་དཔལ་ཡང་དག་ལ་སོགས་པ་དང་། བསྐྱེད་རྫོགས་ཟུང་དུ་འཇུག་ཅིང་དེའང་རྫོགས་རིམ་རྩ་ཐིག་རླུང་གསུམ་ལས་བསྐྱེད་པའི་བདེ་གསལ་རྣམ་པར་མི་རྟོག་པའི་ཡེ་ཤེས་དང་། ཁྱད་པར་འོད་གསལ་ཡེ་ཤེས་ཆེན་པོ་ལ་གཙོ་བོར་བྱེད་པའི་ཚུལ་གྱིས་ཉམས་སུ་ལེན་པ་མ་ཧཱའི་ཨ་ཏི་སྟེ་གཉིས་མིང་ཀྱི་རྒྱུད་སྒྱུ་འཕྲུལ་དྲྭ་བ་ལ་སོགས་པ་རྣམས་སུ་མཆིས་པ་ལས། འདིར་མ་རྒྱུད་རིགས་དྲུག་གི་ནང་ཚན་དཔལ་ཧེ་རུ་ཀ་སྟེ་སྔགས་གསར་མ་ལ་གྲགས་པའི་བདེ་དགྱེས་སོགས་དང་ངོ་བོ་གཅིག་པ་དཔལ་ཡང་དག་ཅེས་རྒྱ་བོད་མཁས་གྲུབ་ཀུན་གྱིས་ཕྱག་རྒྱ་ཆེན་པོའི་མཆོག་སྒྲུབ་པའི་ཐུགས་དམ་གསང་བའི་ལྷ་མཆོག་ཉི་ཟླ་ལྟར་གྲགས་པ། འདི་ལ་བསྒོམ་བྱའི་ལྷ་གྲངས་ཀྱི་དབང་གིས་ཟླ་གམ་དྲུག་ཅུ་རྩ་བརྒྱད་པ་དང་། དེ་ལས་ཁྲོ་བཅུ་ཕྲི་བའི་ལྔ་བཅུ་རྩ་བརྒྱད་པ་དང་། བཅོ་བརྒྱད་པ་ལ་སོགས་རྒྱུད་རྣམས་ལས་མང་དུ་གསུངས་ཀྱང་མན་ངག་གི་ཕྱག་སྲོལ་རྣམས་སུ་ལྷ་མང་ལྔ་བཅུ་རྩ་བརྒྱད་པ་དང་། དགུ་པ་དང་། ཟླ་གམ་གཅིག་པ་རྣམས་ལ་མཛད་པ་མང་བ་
ལས། ཡང་དག་གྲུབ་པའི་དོན་གྱི་སྙིང་པོ་ནི་ཁྲག་འཐུང་ལྷ་དགུ་སྟོ་ཟླ་གམ་དགུ་མའི་དཀྱིལ་འཁོར་འདི་ཉིད་ཡིན་ལ། འདི་ལའང་རྡོ་རྗེ་ཧཱུྃ་མཛད་དང་གནུབས་ནམ་མཁའི་སྙིང་པོ་ནས་སྔགས་འཆང་གི་རྒྱལ་པོ་སོ་ཟུར་རྣམས་ལ་རིམ་པར་བརྒྱུད་པ་སོགས་བཀའ་སྲོལ་མང་དུ་བྱོན་པ་ལས། སྐབས་སུ་བབས་པ་འདི་ནི་སངས་རྒྱས་གཉིས་པ་པདྨཱ་ཀ་ར་ནས་འཁོན་སྟོན་ཀླུ་དབང་སྲུང་བ་ལ་ཐུགས་དམ་གྱི་ལྷར་སྩལ་ཞིང་། དེས་འཁོན་རྡོ་རྗེ་རིན་ཆེན་ལ་གནང་བ་དང་། ཡང་སློབ་དཔོན་ཧཱུྃ་ཆེན་ཀ་ར། རྒྱལ་དབང་པདྨ་ཐོད་ཕྲེང་། སྣ་ནམ་རྡོ་རྗེ་བདུད་འཇོམས། གཉགས་ཛྙཱ་ན་ཀུ་མཱ་ར། དེ་ལས་འཁོན་སྟོན་རྡོ་རྗེ་རིན་ཆེན་གྱིས་ཞུས་ཏེ་འདི་ལ་བརྒྱུད་པའི་ཆུ་བོ་གཉིས་འདུས་སུ་གྱུར་ཅིང་། དེས་འཁོན་ཡོན་ཏན་འབྱུང་གནས་ལ་སྩལ་བ་ནས་རིམ་པར་བརྒྱུད་དེ། བདག་ཅག་གི་དཔལ་ལྡན་བླ་མ་དམ་པའི་བར་བརྒྱུད་པའི་ཆུ་བོ་ཟམ་མ་ཆད་པར་བྱོན་པ། དཔལ་ལྡན་ས་སྐྱ་པའི་ཡབ་ཆོས་ཡང་ཕུར་གཉིས་ཞེས་རྩོད་མེད་དུ་བྲགས་པའི་ཡ་གྱལ་ཡང་དག་ཟླ་གམ་དགུ་མའི་དཀྱིལ་འཁོར་དུ་དབང་བསྐུར་བ་བགྱིད་པ་ལ། སློབ་དཔོན་གྱིས་བགྱི་བར་འོས་པ་རྣམས་རྒྱུད་དང་གྲུབ་པའི་ཕྱག་བཞེས་ལས་ཇི་ལྟར་འབྱུང་བ་ཆང་ལ་མ་འཁྲུལ་པ་སྔོན་ཏུ་སོང་གྲུབ་པས། ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པའི་ཐོག་མར་དཀྱིལ་འཁོར་དུ་འཇུག་པའི་ཆོས་རྣམས་ཞུ་བའི་ཡོན་ཏུ་དམིགས་
ཏེ་མཎྜལ་འབུལ་བར་ཞུ། ཞེས་མཚམས་སྦྱར་ལ་མཎྜལ་འབུལ་དུ་གཞུག །མིག་དར་དམར་པོ་ལས་སྔགས་དང་ཆུས་བསང་། སྔོན་ཆད་གཉིས་སྣང་གི་རྟོག་པས་ཡེ་ཤེས་ཀྱི་མིག་ལྡོངས་ཏེ་དོན་དམ་རྡོ་རྗེའི་དཀྱིལ་འཁོར་མ་མངལ་པའི་མཚོན་བྱེད་དུ་གདོང་གཡོགས་འཆིང་བར་ཞུ། ཨོཾ་ཨཱཿཧཱུྃ་གིས་བྱིན་གྱིས་བརླབས་ཏེ་ཨཱ་ཁཾ་བཱི་ར་ཧཱུྃ་གིས་གདོང་འཆིང་དཀྱིལ་འཁོར་པ་དང་མཇལ་བའི་ཕྱག་རྟེན་དུ་རིན་ཆེན་རིན་ཐང་མེད་པའི་མེ་ཏོག་ཡངས་ཤིང་མ་ཉམས་པའི་ཆུན་པོ་ཕྱག་ཏུ་ཐོགས་པར་མོས་མཛོད། སྔགས་སྔ་མས་ཅོད་པན་སྦྱིན། དྲི་ལན་ནི། ཀྱེ་ཁྱོད་ཅི་ལ་དགའ་བས་འདིར་འཇུག་ཡིན། ཅེས་དྲིས་པའི་ལན་ཏུ་འདིའི་རྗེས་ཟློས། བདག་སྐལ་པ་བཟང་པོ་ལ་དགའ་བས་འདིར་འཇུག་པའོ། ཡང་། དེས་ཁྱོད་ལ་ཅི་ཞིག་དགོས། ཞེས་དྲིས་པའི་ལན་ཏུ་འདིའི་རྗེས་ཟློས། རྡོ་རྗེ་འཛིན་པའི་དངོས་གྲུབ་འདོད་པའི་ཕྱིར་རོ། །ཞེས་ལན་གདབ། དེ་ནས་སྔགས་ཀྱི་དངོས་གྲུབ་ལ་ཡིད་རྩེ་གཅིག་ཏུ་མོས་པས་སྙིམས་པ་མེ་ཏོག་དང་བཅས་པའི་ཐལ་མོ་སྦྱར་བས་བཏུད་དེ་གསོལ་བ་འདེབས་པ་འདིའི་རྗེས་ཟློས། བདེ་གཤེགས་སྲས་བཅས་དམ་ཚིག་པས། །ཡོན་དབུལ་ཐུགས་རྗེས་བདག་ལ་དགོངས། །སངས་རྒྱས་སྐུ་གསུམ་རང་བཞིན་མཆོག །སློབ་དཔོན་མགོན་ལ་བདག་སྐྱབས་མཆི། །སྐལ་བཟང་ལྷ་མོ་ཚོགས་བཅས་པའི། །དཀྱིལ་འཁོར་ཚོགས་ལ་ཕྱག་འཚལ་ལོ། །ཐར་པ་ཆེན་པོའི་
གྲོང་མཆོག་ཏུ། །མགོན་པོ་བདག་ནི་གཞུག་ཏུ་གསོལ། ལན་གསུམ་ཞུ། ལྷ་ལ་གནང་བ་ཞུ་བ་ནི་སློབ་དཔོན་གྱིས་བགྱི་བར་གདའ་སྟེ། ཞེས་སློབ་དཔོན་གྱིས་དཀྱིལ་འཁོར་ལ་མངོན་ཏུ་ཕྱོགས་ཏེ་ཞྭ་ཕུད་རྡོར་དྲིལ་བཟུང་ནས། རྒྱལ་བ་ཀུན་གྱི་གནས་བཞུགས་པའི། །དཀྱིལ་འཁོར་ཆེན་པོ་ཉམས་དགའ་བ། །སྙིང་པོའི་ཕོ་བྲང་ཆེན་པོ་འདིར། །བདག་གིས་སློབ་མ་གཞུག་པར་བགྱི། ཞེས་ལན་གསུམ་བརྗོད་དོ། །གཉིས་པ་ནང་དུ་འཇུག་པའི་ཆོས་རྣམས་ནི། ཁྱེད་རང་རྣམས་སློབ་དཔོན་གྱི་ཕྱག་གི་རྡོ་རྗེ་ལ་འཇུས་ཏེ། དཀྱིལ་འཁོར་དུ་ཞུགས་ནས་ཤར་སྒོར་འཁོད་པར་མོས་ཤིག །ལས་སྔགས་དང་། ཧཱུྃ་ཨྃ་སྭཱ་ཨཱཾཿཧཱ། ཞེས་བརྗོད། དཀྱིལ་འཁོར་གྱི་ལྷ་ལ་ཕྱག་ལན་གསུམ་དུ་འཚལ་ཞིང་འདིའི་རྗེས་ཟློས། དུས་གསུམ་སངས་རྒྱས་ཐམས་ཅད་ཀྱི། སྐུ་གསུང་ཐུགས་ཀྱི་བདག་ཉིད་མཆོག །བདེ་གཤེགས་རྒྱལ་བ་འཁོར་བཅས་ལ། ལུས་ངག་ཡིད་ཀྱིས་ཕྱག་འཚལ་ལོ། ལན་གསུམ། ཐམས་ཅད་རྣལ་འབྱོར་དུ་སེམས་བསྐྱེད་པའི་སླད་དུ། ཁྱེད་རང་རྣམས་ཀྱི་སྙིང་གར་སྨོན་འཇུག་བྱང་ཆུབ་ཀྱི་སེམས་ཟླ་བའི་དཀྱིལ་འཁོར་གྱི་སྟེང་དུ་ཆོས་ཐམས་ཅད་སྤྲོས་པ་དང་བྲལ་བ་རྡོ་རྗེ་རྩེ་ལྔ་པའི་རྣམ་པར་གསལ་བར་མོས་ལ་འདིའི་རྗེས་ཟློས། ཨོཾ་སརྦ་ཡོ་ག་ཙིཏྟ་ཨུ་པ་ཏ་ཡ་མི་ཧཱུྃ། ཞེས་བརྗོད་དུ་གཞུག །དེ་ནས་སྐྱབས་འགྲོ། སྡིག་བཤགས། ཡི་རང་། སེམས་བསྐྱེད་བཞི་སྟ་གོན་གྱི་
སྐབས་ལྟར་རྗེས་ཟློས་བྱར་གཞུག །དེ་ནས་གསང་བར་གདམས་པའི་ཞར་བྱུང་སེམས་བསྐྱེད་བརྟན་པར་བྱ་བ་ནི། མེ་ཏོག་དང་བཅས་པའི་རྡོ་རྗེ་སྙིང་གར་བཞག་ལ། །ཨོཾ་བདེ་གཤེགས་ཀུན་གྱི་ཁྱོད་ཉིད་དེ། དེ་རིང་བྱིན་གྱིས་བརླབས་པས་ན། །དེ་བཞིན་གཤེགས་བའི་གསང་ཆེན་འདི། །དཀྱིལ་འཁོར་དག་ཏུ་མ་ཞུགས་ཤིང་། །དད་པ་མེད་པའི་མི་རྣམས་ལ། །ནམ་ཡང་སྨྲ་བར་བྱ་བ་མིན། ཨོཾ་སུ་ར་ཏེ་ས་མ་ཡ་སྟཾྭ་ཧོཿསིདྡྷི་བཛྲ་ཡ་ཐཱ་སུ་ཁཾ། ཞེས་བརྗོད། དེ་ནས་ཡེ་ཤེས་པ་དབབ་པའི་སྔོན་ཏུ་འགྲོ་བ་དཀྱིལ་འཁོར་དུ་ཞུགས་པའི་ཕན་ཡོན་དང་། གསང་བ་མ་བསྲུངས་བའི་ཉེས་དམིགས་དང་བསྲུངས་མ་བསྲུངས་གཉིས་ཀྱི་ཁེ་ཉན་གཉིས་ཀ་དང་། །རྡོ་རྗེ་སློབ་དཔོན་བཀའ་གཉན་པར་བསྒྲགས་པའི་སྒོ་ནས་དམ་ལ་བཞག་པ་བཞི་རིམ་པར་འབྱུང་བ་ལ་སྙན་གཏོད་འཚལ། མགོ་བོར་རྡོ་རྗེ་བཞག་ལ། །རིགས་ཀྱི་བུ་མཆོག་ཚུར་ཉོན་ཅིག །དེང་ཁྱེད་བདེ་གཤེགས་འཁོར་བཅས་ཀྱི། །ནང་དུའང་ཁྱོད་ཀྱིས་ཞུགས་པ་ཡིན། །སློབ་དཔོན་ལུང་བསྟན་ངས་ཀྱང་ནི། །བཅོམ་ལྡན་ཁྲག་འཐུང་ཧེ་རུ་ཀའི། །ཡེ་ཤེས་ཁྱོད་ལ་བསྐྱེད་པར་བྱ། །རྣལ་འབྱོར་བུ་མཆོག་ཁྱོད་ཀྱིས་ཀྱང་། །དེ་བཞིན་གཤེགས་པའི་དཀྱིལ་འཁོར་གྱི། །དངོས་གྲུབ་དམ་པ་ཐོབ་པར་འགྱུར། །དངོས་གྲུབ་གཞན་ལྟ་སྨོས་ཅི་དགོས། །ཁྱོད་ཀྱི་དཀྱིལ་འཁོར་མ་མཐོང་བའི། །མདུན་
ཏུ་སྨྲ་བར་མ་བྱེད་ཅིག། གལ་ཏེ་སྨྲ་བར་གྱུར་ན་ནི། །དམ་ཚིག་ཉམས་ཏེ་དམྱལ་བར་འགྲོ། རྡོ་རྗེ་སྙིང་གར་བཞག་ལ། ཨོཾ་རྡོ་རྗེ་སེམས་དཔའ་ཁྱོད་ཉིད་ཀྱི། །སྙིང་ལ་ཡང་དག་ཞུགས་མཛད་དེ། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། ཨོཾ་ས་མ་ཡ་ཨཱུཏྟ་ག་ཐཱ། ཐོད་པའི་སྣོད་དུ་བདུད་རྩི་ལྔ་སྦྱར་བའི་ཆུ་སྦྱིན་ལ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ། བཛྲ་ཨུ་ད་ཀ་ཧྲཱིཿཋཱ། མགོ་བོར་རྡོ་རྗེ་བཞག་ལ། །དེ་རིང་ཕྱིན་ཆད་ཁྱོད་ཉིད་ཀྱི། །རྡོ་རྗེ་སེམས་དཔའ་ང་ཡིན་པས། །གང་ཞིག་བསྒོ་བའི་ལས་རྣམས་བྱོས། །ང་ལ་བརྙས་པར་མ་བྱེད་ཅིག །གལ་ཏེ་ཅུང་ཞིག་བརྙས་བྱས་ན། །དུས་མིན་འཆི་ཞིང་དམྱལ་བར་ལྟུང་། ཞེས་བརྗོད། དེ་ནས་བསྲུང་བྱའི་དམ་ཚིག་དང་སྡོམ་པ་བསྒྲགས་པར་བགྱིད་པ་ཡིན་པས་འདི་ལ་སྙན་གཏོད་འཚལ། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་རིགས་དག་པའི། །དམ་ཚིག་ཡིད་དུ་འོང་བའོ། །རྡོ་རྗེ་དྲིལ་བུ་ཕྱག་རྒྱ་ཡང་། །བློ་ཆེན་ཁྱོད་ཀྱིས་གཟུང་བར་གྱིས། །བྱང་ཆུབ་སེམས་ནི་
རྡོ་རྗེ་སྟེ། །ཤེས་རབ་དྲིལ་བུ་ཞེས་ཀྱང་གྲགས། །སློབ་དཔོན་ཁྱོད་ཀྱིས་གཟུང་བར་གྱིས། །བླ་མ་སངས་རྒྱས་ཀུན་དང་མཉམ། །འདི་ལ་བརྙས་པར་མ་བྱེད་ཅིག །འདི་ནི་རྡོ་རྗེའི་རིགས་དག་པའི། །རྡོ་རྗེ་དམ་ཚིག་ཡིན་པར་གྲགས། །ཉིན་རེ་བཞིན་ནི་དུས་དྲུག་ཏུ། །ཆོས་དང་ཟང་ཟིང་མི་འཇིགས་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །རིན་ཆེན་རིགས་ཀྱི་དམ་ཚིག་གོ། །ཕྱི་དང་གསང་བ་ཐེག་པ་གསུམ། །དམ་པའི་ཆོས་ཀྱང་མ་ལུས་གཟུང་། །འདི་ནི་པདྨའི་རིགས་དག་པའི། །དམ་ཚིག་ཡིད་དུ་འོང་བའོ། །ལས་ཀྱི་རིགས་མཆོག་ཆེན་པོ་ལ། །སྡོམས་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་གྱིས། །མཆོད་པའི་ལས་ཀྱང་ཅི་ནུས་གྱིས། ཞེས་བརྗོད། དེ་ལྟར་བསྒྲགས་པའི་དམ་ཚིག་དང་སྡོམ་པ་མཐའ་དག་ལེགས་པར་བཟུང་བར་བགྱིའོ་སྙམ་པས་འདིའི་རྗེས་ཟློས། །སེམས་སྐྱེད་མངོན་པར་སངས་རྒྱས་དང་། སོགས་ནས་བླ་མེད་བྱང་ཆུབ་གནས་པར་བགྱི། ཞེས་པ་རི་བར་སྟ་གོན་གྱི་སྐབས་ལྟར་བརྗོད། དབང་གི་གཞི་འགོད་པ་ཡེ་ཤེས་པ་དབབ་པ་ཞུ་བའི་ཡོན་ཏུ་མཎྜལ་འབུལ་འཚལ། ཞེས་མཎྜལ་ཕུལ། གསོལ་བ་གདབ་པ་འདིའི་རྗེས་ཟློས་མཛོད། །རྒྱལ་བ་ཀུན་གྱི་ཡེ་ཤེས་ཐུགས། །སྐུ་དང་གསུང་འཕྲུལ་ལས་མཛད་པ།
ཕྱག་རྒྱའི་ཆོ་ག་གང་དག་གིས། །དེ་རིང་བདག་ལ་དབབ་ཏུ་གསོལ། ལན་གསུམ། དངོས་གཞི་ཡེ་ཤེས་པ་དབབ་པ་ལ་ལུས་གནད་དྲང་པོར་བསྲང་། ངག་གནད་སྲོག་རྩོལ་བསྡམ། ཡིད་ཀྱི་གནད་གཞན་ཏུ་མ་ཡེངས་པར་དམིགས་པ་འདི་བཞིན་ཏུ་མཛོད། ཅེས་བརྡ་སྦྱར་ལ། ལས་སྔགས་དང་ཆུས་བསང་། སྭ་བྷཱ་བས་སྦྱང་། སྟོང་པའི་ངང་ལས་པདྨ་ཟླ་ཉི་ལྷ་ཆེན་ཡབ་ཡུམ་གྱི་སྟེང་དུ་ཧཱུྃ་ལས་ཁྱེད་རང་རྣམས་བཛྲ་ཧེ་རུ་ཀ་ནག་དཀར་དམར་བའི་ཞལ་གསུམ་ཕྱག་དྲུག་ཞབས་བཞི་བགྲང་པ། གཡས་གསུམ་རྡོ་རྗེ་ཁ་ཊཾྭཱ་རྡེའུ་ཆུང་གཡོན་གསུམ་དྲིལ་བུ་དང་དམར་རྒྱུ་ཞགས་འཛིན་པ། ཡུམ་ཀྲོ་དྷཱི་ཤྭ་རི་མ་དང་མཉམ་པར་སྦྱོར་བའི་སྐུ་ཅན་ཏུ་བཞུགས་པའི། སྤྱི་བོར་ཝཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ་ལ་ཧཿསྙིང་གར་ལམ་ལས་སའི་དཀྱིལ་འཁོར་གྲུབ་བཞི་སེར་པོ་ཟུར་བཞིར་རྡོ་རྗེ་རྩེ་གསུམ་པས་མཚན་པ་ལ་ཧཱུྃ། ལྟེ་བར་རཾ་ལས་མེའི་དཀྱིལ་འཁོར་གྲུ་གསུམ་དམར་པོ་རྣོ་ཞིང་འབར་བ་ལ་ཨཱཿརྐང་འོག་ཏུ་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་གཡོ་བའི་བ་དན་གྱིས་མཚན་པ་ལ་ཛྷཻ་ཾཿ དྲག་ཅིང་བཟོད་དཀའ་བའི་གཟུགས་ཅན་རླུང་གིས་བསྐྱོད་པ་རྐང་མཐིལ་ནས་ཞུགས། ལྟེ་བའི་མེ་དང་འདྲེས་ནས་འབར་བས་སྙིང་གའི་ས་བསྲེགས། སྤྱི་བོའི་ཆུཁོལ་བ་
ལས་བདུད་རྩིའི་ཚོགས་བབས་པས་ཚིམ་པར་གྱུར་ཅིང་རྐང་འོག་གི་རླུང་གིས་འདེགས་བཞིན་པར་བསམ། རང་གི་ཐུགས་ཀའི་ཧཱུྃ་གི་འོད་ལས་གནོད་སྦྱིན་མ་ལྕགས་ཀྱུ་ཐོགས་པ་དཔག་ཏུ་མེད་པ་སྤྲོས། རང་བཞིན་གྱི་གནས་ནས་ཡང་དག་སྦྱོར་བའི་དཀྱིལ་འཁོར་གྱི་ལྷ་ཚོགས་དཔག་ཏུ་མེད་པ་སྤྱན་དྲངས་པ་རྣམས་དང་དཀྱིལ་འཁོར་གྱི་ལྷ་ཚོགས་རྣམས་ལས་ཀྱང་། དེ་འདྲ་བ་ཚད་མེད་པ་འཕྲོས་པས་སློབ་མའི་སྙིང་གར་པད་ཉིའི་སྟེང་དུ་ཧཱུྃ་ལ་ཐིམ་པར་བསམ་པའི་འོད་ཀྱིས་ནང་གང་བས་སྡིག་སྒྲིབ་ཐམས་ཅད་སྦྱངས་དཀྱིལ་འཁོར་གྱི་ལྷ་ཚོགས་དང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུ་གསུང་ཐུགས་ཀྱི་ཡེ་ཤེས་ཞུགས་པར་མོས་ཤིག །རོལ་མོ་དབྱངས་དང་བཅས་པས་ལས་བྱང་གི་བྱིན་འབེབས་གྱེར། ལས་སྔགས་བརྗོད་ཅིང་བགེགས་བསྐྲད། ཨོཾ་ཛྙཱ་ན་ཨ་བེ་ཤ་ཡ། ལྷམ་བྷ་ཡ་སྟམ་བྷ་ཡ། ར་ར་ར། ཙ་ལ་ཡ་ཙ་ལ་ཡ། ཧཱུྃ་ཨཱཿཧཿཛྷཻཾ། ཞེས་བཟླས་ལ། ས་རྫ་རཱ་ཛ་དང་བདུད་རྩི་ལྔ་ལ་སོགས་པའི་སྤོས་ཀྱིས་བདུག་ཅིང་རོལ་ཆེན་བྱ། སྤྱི་བོར་རྡོ་རྗེ་རྒྱ་གྲམ་དུ་བཞག་ལ། ཡེ་ཤེས་པ་བརྟན་པར་བྱས་པའི་མོས་པ་མཛོད། ཏིཥྛ་བཛྲ་ཞེས་བརྗོད། དེ་ནས་དཀྱིལ་འཁོར་བསྟན་པའི་སྔོན་ཏུ་འགྲོ་བ་བདེན་པ་བརྗོད་པ་ཡིན་ཏེ། ཞེས་མཚམས་སྦྱར་ཏེ། སློབ་དཔོན་འགྲེངས་
ལ་ཞྭ་ཕུད་རྡོར་དྲིལ་བཟུང་དཀྱིལ་འཁོར་ལ་འདུད་པ་དང་བཅས་ཏེ། མགོན་མཆོག་གསང་བའི་དཀྱིལ་འཁོར་འདིར། །སློབ་མ་མཆོག་འདི་གཞུག་པར་བགྱི། །རིགས་ཀྱི་ལྷ་ཡི་བྱེ་བྲག་དང་། བསོད་ནམས་གང་ཡིན་དེ་བཞིན་ཤོག །དེ་བཞིན་དངོས་གྲུབ་མཚན་མ་དག །སྙིང་པོའི་གནས་འདིར་ལེགས་པར་སྟོན། ཞེས་བརྗོད། སྣང་བ་འདྲི་བ་ནི། ཀྱེ་ཁྱེད་ཀྱི་མིག་ལ་ཇི་ལྟར་སྣང་། ཞེས་དྲིས་པ་ལ་མཐོང་ལན་བྱུང་བ་དང་། དཀར་སེར་དམར་ནག་ཏུ་མཐོང་ན་རིམ་བཞིན་ཞི་རྒྱས་དབང་དྲག་ལས་སྣ་ཚོགས་འགྲུབ་པ་ཡིན་ནོ། ཞེས་ལུང་བསྟན། མེ་ཏོག་དོར་བ་ནི། སྔར་བྱིན་པའི་མེ་ཏོག་གི་ཕྲེང་བ་ཐལ་མོ་སྦྱར་བའི་བར་དུ་བཟུང་ནས་རང་གི་རིགས་ཀྱི་ལྷ་ལ་ཕུལ་བར་མོས་ཤིག །ཅེས་བསྒོ་ལ། ཟླ་གམ་དགུ་པའི་དཀྱིལ་འཁོར་དུ། །རིག་པའི་མེ་ཏོག་འདི་དོར་བས། །སྔོན་ཚེ་ཡེ་ཤེས་མཁྱེན་པའི་ལྷ། །གང་ཡིན་དེ་ལ་འབབ་པར་ཤོག །ཨོཾ་པྲ་ཏཱིཙྪ་བཛྲ་ཧོཿཞེས་ཟློ་ཞིང་དཀྱིལ་འཁོར་ལ་མེ་ཏོག་དོར་དུ་གཞུག །དེ་ལྟར་དོར་བའི་མེ་ཏོག་གཙོ་བོ་ལ་ཕོག་ན་མཆོག །བར་མཚམས་སུ་ལས་དང་དངོས་གྲུབ་འགྲུབ་པར་གསུངས་ཤིང་། ཁྱེད་རང་རྣམས་ཀྱིས་མེ་ཏོག་ཕོག་པའི་ལྷ་ནི། སོ་སོར་བརྗོད་པར་མ། སྤྱི་ཙམ་དུ། གཙོ་བོ་དཔལ་ཧེ་རུ་ཀ་ཡིན་པར་ཟུང་ཞིག །ཅེས་གདམས། མེ་ཏོག་གི་ཕྲེང་བ་དེ་ཉིད་སློབ་དཔོན་གྱིས་གཙོ་བོའི་དབུ་ནས་བླངས་
ཏེ་ཁྱེད་རང་རྣམས་ཀྱི་སྤྱི་བོར་བཅིངས་པར་མོས་ཤིག །མེ་ཏོག་རིན་ཆེན་ཕྲེང་བ་འདི། །གང་ལ་བབས་པ་རིགས་ཀྱི་ལྷ། །ཁྲག་འཐུང་ཡབ་ཡུམ་ཁྱོད་ཀྱི་ལྷ། །རྟག་ཏུ་མི་འབྲལ་བསྒོམ་པར་བྱ། །ཀྱེ་རྡོ་རྗེ་སེམས་དཔའ་ཆེན་པོའི་ཕྲེང་བ་འདི་དང་མ་བྲལ་བར་གྱིས་ཤིག །ཨོཾ་རཏྣ་མཱ་ལེ་ཨ་བྷི་ཥིཉྩ་ཏྲཱཾ། ཞེས་མགོ་ལ་འཆིང་བའི་ཚུལ་བྱ། མིག་ཐུར་ཐོགས་ལ། ཨོཾ་ལས་སྐྱེས་པའི་གསེར་གྱི་ཐུར་མས་མཚན་མའི་དྲི་མ་བསལ་བར་མོས་མཛོད། ཨོཾ་རྡོ་རྗེ་སེམས་དཔའ་ཁྱོད་ཉིད་ཀྱིས། །མིག་འབྱེད་པར་ནི་བརྩོན་པར་མཛད། སྒྲིབ་གཡོགས་ལིང་ཏོག་ཀུན་བསལ་ནས། རྡོ་རྗེའི་མིག་ནི་བླ་ན་མེད། ཨོཾ་བཛྲ་ཙཀྵུ་ཛྙཱ་ན་པྲ་བེ་ཤ་ཡ་ཕཊ། ཅེས་བརྗོད་ལ་གདོང་གཡོགས་བཀྲོལ། ཁྱོད་ཀྱི་མི་ཤེས་པའི་རབ་རིབ་དག་པས་ཡེ་ཤེས་ཀྱི་མིག་ཐོབ་སྟེ་ཐར་པ་ཆེན་པོའི་དཀྱིལ་འཁོར་མངོན་སུམ་དུ་མཐོང་བར་བསམ། ཞེས་བསྒོ། དཀྱིལ་འཁོར་རྡོ་རྗེའི་དབྱུག་པའམ་རྡོ་རྗེས་མཚོན་ལ། །བུ་ཁྱོད་དཀྱིལ་འཁོར་ལེགས་པར་ལྟོས། །ཐར་པ་ཆེན་པོའི་གྲོང་ཁྱེར་དུ། །མེ་ཏོག་གང་ལ་བབས་པ་ནི། །དེ་ཉིད་ཁྱོད་ཀྱི་རིགས་ཀྱི་ལྷ། ཞེས་ལྟ་བར་བསྐུལ་ནས། ཁྱོད་གྱིས་མཐོང་ཞིང་ཞུགས་པའི་དཀྱིལ་འཁོར་འདི་ནི། །འདི་ལྟ་བུ་མཐོང་བར་ཡིད་ལ་གྱིས་ཤིག །ཅེས་བསྒོས་ལ། སྲུང་བའི་འཁོར་ལོའི་དབུས་སུ་འབྱུང་བཞི་རི་རབ་དང་བཅས་པའི་སྟེང་དུ་ཁྲོ་བོ་རོལ་པའི་
ཕོ་བྲང་ཆེན་པོ། ནས་ཁ་དོག་སྣ་ལྔའི་མེ་དཔུང་འབར་བ། ཟླ་གམ་གླིང་དགུའི་དབུས་སུ་པད་ཟླ་ཉི་མ་དྲག་པོ་འཇིགས་བྱེད་ཆུང་མར་བཅས་པ། ཟླ་གམ་བརྒྱད་ལ་པད་ཉི་ཞིང་གི་གདན་རེ་རེ། དབུས་ཀྱི་གདན་ལ་དཔལ་ཧེ་རུ་ཀ་སྐུ་མདོག་མཐིང་ནག་ནས། འོད་ཟེར་གྱི་བ་ཐག་གཟེངས་པ། ཕྱོགས་མཚམས་རྣམས་ལ་ཤར་དུ་གོ་གོ་རཱི་སྔོན་མོ་སོགས་བསྐྱེད་སྔགས་དང་ས་བོན་དོར་བའི་ལྷ་མོ་བརྒྱད་ཀྱི་མངོན་རྟོགས་རྟོགས། གཡོན་བརྐྱང་གི་རོལ་པས་འགྱིང་བའོ། །བར་སྒྲུབ་ཐབས་ལྟར་བརྗོད་ལ། ནས། བུ་ཁྱོད་དད་པས་རབ་གུས་བསྐྱེད། །དཀྱིལ་འཁོར་བཟང་པོ་ལེགས་པར་ལྟོས། །སངས་རྒྱས་ཐམས་ཅད་མཉམ་སྦྱོར་བའི། །ཡང་དག་གྲུབ་པ་གཅིག་པུ་ཉིད། །མཁའ་འགྲོ་སྒྱུ་མའི་རིགས་མཆོག་འཛིན། འགྲོ་བ་ཕུན་སུམ་ཚོགས་ཀུན་དང་། །དངོས་རྣམས་ཐམས་ཅད་མངོན་ཏུ་གྱུར། །དམ་ཚིག་ཏིང་འཛིན་རྗེས་ཆགས་དང་། །གསང་སྔགས་སྙིང་པོ་འཛིན་པར་གྱིས། དེ་ལྟར་འཇུག་པ་རྣམ་པ་གཉིས་ཀྱི་སྒོ་ནས་ཁྱོད་ཀྱི་དཀྱིལ་འཁོར་དུ་ཞུགས་པས་རྒྱུད་ལ་ལམ་ལྔ་ལས་ཚོགས་ལམ་གྱི་རྟོགས་པ་སྐྱེ་བའི་མཐུ་དང་ལྡན་པར་བྱས་པ་ཡིན་ནོ། །ཞེས་བརྗོད། གཉིས་པ་དབང་གི་དངོས་གཞི་ལ། བུམ་གསང་ཤེར་ཡེ་ཚིག་དབང་བཞི། དང་པོ་བུམ་དབང་ལའང་གཉིས། རྡོ་རྗེ་སློབ་མའི་དབང་དང་། སློབ་དཔོན་གྱི་དབང་ངོ། །དང་པོ་ནི། ཞུགས་ནས་མངོན་པར་
དབང་བསྐུར་བ་ཞུ་བའི་ཡོན་ཏུ་མཎྜལ་འབུལ། གསོལ་བ་འདེབས་པ་འདིའི་རྗེས་ཟློས། །རྒྱལ་བ་ཀུན་གྱི་གསང་བའི་ལམ། །འགྲོ་བ་སྐྱོབ་པའི་གཟི་བརྗིད་ཅན། མཁའ་འགྲོ་མ་ཡི་འཁོར་ལོ་མཆོག །ཡོན་ཏན་ཐམས་ཅད་འབྱུང་བའི་གནས། །དེ་རིང་དབང་བསྐུར་གནང་བ་ཡི། །དུས་ལ་བབ་པར་མཁྱེན་པ་ལེགས། །དཔའ་བོ་ཆེན་པོས་མི་ལྡོག་པའི། །དབང་བསྐུར་རིམ་པ་བདག་ལ་སྩོལ། །རིག་པ་ཆེན་པོའི་ལས་བསྒྲུབས་ནས། །དངོས་པོ་མཆོག་རྣམས་ཤིས་པ་དང་། །སེམས་ཅན་ཀུན་གྱི་དོན་གྱི་ཕྱིར། །བདག་གི་རྡོ་རྗེ་སློབ་དཔོན་གཟུང་། ལན་གསུམ། ཁྱེད་རང་རྣམས་ཤར་ཕྱོགས་ཀྱི་སྒོ་དྲུང་དུ་དབང་སྟེགས་སེང་ཁྲི་པདྨའི་གདན་ལ་འཁོད་པའི་སྟེང་དུ་གདུགས་དཀར་པོ། །གཡས་གཡོན་ཏུ་རྒྱལ་མཚན་དང་བ་དན་སྒྲེང་། མདུན་ཏུ་མཆོད་པ་སྣ་ཚོགས་པས་གང་བར་མོས་ཤིག །ལས་སྔགས་ཀྱི་བསང་། སྭ་བྷཱ་བས་སྦྱང་། སྟོང་པའི་ངང་ལས་དབང་སྟེགས་ཀྱི་སྟེང་དུ་སློབ་མ་ཧཱུྃ་ལས་དཔལ་ཡང་དག་ཞལ་གསུམ་ཕྱག་དྲུག་པ་ཡུམ་ཀྲོ་དྷཱི་ཤྭ་རི་མ་དང་མཉམ་པར་སྦྱོར་བའི་གནས་གསུམ་ཨོཾ་ཨཱཿཧཱུྃ་གི་ཡི་གེས་མཚན་པར་བསམ། ཡེ་ཤེས་པ་བཛྲ་ས་མཱ་ཛཿཡེ་ཤེས་པ་སྤྱན་དྲངས། ཛཿཧཱུྃ་བཾ་ཧོཿས་གཉིས་སུ་མེད་པར་ཐིམ་པར་བསམ། རང་གི་ཐུགས་ཀའི་ཧཱུྃ་ལས་ཁྲོ་བོ་དཔག་ཏུ་མེད་པ་སྤྲོས་བར་དུ་གཅོད་པའི་བགེགས་རྣམས་བསྐྲད་པར་བསམས་ལ། རུ་ལུ་དང་ལས་སྔགས་
བརྗོད་དེ་ཡུངས་ཀར་གྱིས་བྲབ། དེ་ནས་བུམ་པ་ལྷ་གྲངས་ཡོད་ན་བུམ་ཆུ་རྣམས་རྣམ་རྒྱལ་དུ་བསྡུས་ལ། བསང་སྦྱང་། སློབ་མ་དང་དབང་རྫས་བུམ་པ་མི་དམིགས་ཏེ་སྟོང་པ་ཉིད་དུ་བསམ། སྟོང་པའི་ངང་ལས་པད་ཉིའི་སྟེང་དུ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་མི་བསྐྱོད་པ་རྡོར་དྲིལ་འཛིན་པའི་གནས་གསུམ་དུ་ཨོཾ་ཨཱཿཧཱུྃ། ཧཱུྃ་ལས་འོད་ཟེར་འཕྲོས་པས་རང་འདྲའི་ཡེ་ཤེས་སེམས་དཔའ་ས་མཱ་ཛཿ ཛཿཧཱུྃ་བྃ་ཧོཿ ཨོཾ་བཛྲ་ཨཱ་ཧ་ར་ཧཱུྃ། དེ་བཞིན་ཏུ། དྷཱུ་པེ། པུཥྤེ། ཨཱ་ལོ་ཀེ། གནྡྷེ་སྦྱར་བ་དང་། ཨོཾ་བཛྲ་ཨུཏྟ་ཕ་ལ་ཡེ་ཧཱུྃ། ཨོཾ་བཛྲ་བི་སྥུ་ར་ཡེ་ཧཱུྃ། ཞེས་མཆོད། མི་བསྐྱོད་པ་ནི་ཡེ་ཤེས་ཆེ། །རྡོ་རྗེའི་ཐུགས་ནི་བླ་ན་མེད། །སྐྱེ་མེད་སྤྲོས་བྲལ་ངོ་བོ་ཉིད། །མི་བསྐྱོད་པ་ལ་ཕྱག་འཚལ་བསྟོད། །ཅེས་པས་བསྟོད་དེ། དབང་རྫས་ཀྱི་ལྷ་འོད་དུ་ཞུ་བས་ཆུར་གྱུར་པར་བསམ། དེ་ནས་བདག་གི་ཐུགས་ཀའི་ཧཱུྃ་ལས་འོད་འཕྲོས་པས་དབང་བསྐུར་གྱི་ལྷ་དཔག་ཏུ་མེད་པ་སྤྱན་དྲངས། དེ་རྣམས་དང་དཀྱིལ་འཁོར་གྱི་ལྷ་ལ་དབང་བསྐུར་བ་ཁྱེད་རང་རྣམས་ཀྱིས་གསོལ་བ་བཏབ་པར་མོས་ཤིག །དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། །གཙོ་བོས་གཙོར་མཛད་པའི་
དེ་བཞིན་གཤེགས་པ་ཐམས་ཅད་ཀྱིས། མི་བསྐྱོད་པའི་རང་བཞིན་ཆུའི་དབང་བསྐུར་བར་བསམ་ཞིང་། བུམ་པ་མགོར་བཞག་ལ། ཏེལ་གྱི་གོང་བུ་བཞིན་གང་བའི། །རྒྱལ་བས་བུམ་པ་བཟུང་ནས་ནི། །འདི་ཉིད་ལ་ནི་དབང་བསྐུར་བས། །བག་ཆགས་མ་ལུས་དག་གྱུར་ཅིག །ཨོཾ་བཛྲ་ཨ་བྷི་ཥི་ཉྩ་ཧཱུྃ། ཞེས་བརྗོད་ཅིང་བུམ་ཆུ་གཏོར། སྤྱན་དྲངས་པའི་ཡེ་ཤེས་ཀྱི་དབང་ལྷ་ཡབ་ཡུམ་གཉིས་སུ་མེད་པར་རོལ་པ་མཛད་པའི་བྱང་ཆུབ་སེམས་ཀྱི་ཆུ་རྒྱུན་གྱིས་བུམ་པ་ཡོངས་སུ་བཀང་བས་དབང་བསྐུར་བར་མོས་ཏེ། ཨོཾ། ལྷ་ཡི་ཆུ་ནི་རྣམ་དག་པས། །རྡོ་རྗེ་གསང་གསུམ་གནས་ལས་བྱུང་། །རིག་པའི་ལྷ་མོ་ཚོགས་ལྡན་པའི། །རང་བཞིན་གཅིག་ཏུ་གྱུར་པ་ཡིན། །ཨོཾ་བཛྲ་ཨ་བྷི་ཥིཉྩ་མི། ཞེས་བརྗོད་པས། དབང་བསྐུར་བའི་ཆུ་རྒྱུན་གྱིས་སློབ་མའི་ལུས་ཐམས་ཅད་གང་། སྡིག་སྒྲིབ་དག ཆུ་ལྷག་མ་ཡར་ལུད་པ་ལས་མི་བསྐྱོད་པས་དཔུང་བརྒྱན་པར་བསམས་ལ། པུཥྤེ་ནས། ཤབྡའི་བར་གྱིས་མཆོད་ནས། དེ་ལྟར་མེ་ལོང་ལྟ་བུའི་ཡེ་ཤེས་ཀྱི་རང་བཞིན་བཅོམ་ལྡན་འདས་མི་བསྐྱོད་ཧེ་རུ་ཀའི་བྱང་ཆུབ་སེམས་ཀྱི་ངོ་བོ་ཆུའི་དབང་ཐོབ་པར་མོས་པ་གྱིས་ཤིག །དབུ་རྒྱན་བསང་སྦྱང་།
སྟོང་པའི་ངང་ལས་པད་ཉིའི་སྟེང་དུ་སྭཱ་ལས་བྱུང་བའི་རིན་པོ་ཆེ་སྭཱ་ས་མཚན་པ་ལས། རིན་འབྱུང་སེར་པོ་རིན་པོ་ཆེ་དང་དྲིལ་བུ་འཛིན་པའི་གནས་གསུམ་སོགས་གོང་ལྟར་ལ། བསྟོད་པ། ལྟ་བ་ངན་པ་འཇོམས་མཛད་པའི། །རིན་ཆེན་རྒྱལ་པོ་ཡོན་ཏན་གཙོ། །མཉམ་ཉིད་ཡེ་ཤེས་ངོ་བོ་ཉིད། །རིན་ཆེན་འབྱུང་ལ་ཕྱག་འཚལ་བསྟོད། །ཅེས་དང་། དབང་རྫས་ཀྱི་ལྷ་འོད་དུ་ཞུ་བས་རིན་པོ་ཆེའི་དབུ་རྒྱན་དུ་གྱུར། གཙོ་བོས་གཙོར་མཛད་པའི་དེ་བཞིན་གཤེགས་པ་ཐམས་ཅད་ཀྱིས་རིན་ཆེན་འབྱུང་ལྡན་གྱི་རང་བཞིན་དབུ་རྒྱན་གྱི་དབང་བསྐུར་བར་མོས་ཤིག །ཨོཾ་སངས་རྒྱས་ཀུན་གྱིས་བསྔགས་པ་ཡིས། །རིན་ཆེན་ལས་བྱུང་དབུ་རྒྱན་ཆེ། །ཐོར་ཚུགས་ཅོད་པན་གྱིས་བརྒྱན་པའི། །དར་དཔྱངས་དབང་བསྐུར་སྦྱིན་པར་བྱ། །ཨོཾ་བཛྲ་རཏྣ་མུ་ཀཱུ་ཊ་ཨ་བྷི་ཥིཉྩ་སྭཱ། །ཞེས་བརྗོད་ཅིང་མགོ་ལ་བསྒོན། དེ་ནས་ཐོད་སྐམ་ལྔའི་རྩ་ཆིངས་དབུ་རྒྱན་གྱི་རྩ་བར་བཅིངས་ལ། ཨོཾ་སངས་རྒྱས་ཀུན་གྱི་ཡེ་ཤེས་རྟགས། །ཐོད་པའི་ཕྲེང་བའི་དབུ་རྒྱན་ནི། །རྡོ་རྗེ་སེམས་དཔའ་དག་མངོན་བསྐྱེད། །རིགས་ཀྱི་ཡེ་ཤེས་མཚན་མའི་རྟགས། །ཧཱུྃ་བཛྲ་ཀ་པཱ་ལ་ཨ་བྷིཥིཉྩ་མི། །བུམ་ཅུ་འཐོར་ལ། ཨོཾ་ལྷ་ཡི་ཆུ་ནི་སོགས་ནས། ཆུ་ལྷག་མ་ཡར་ལུད་པ་ལས་རིན་ཆེན་འབྱུང་ལྡན་གྱིས་དབུར་
བརྒྱན། །མཆོད། །དེ་ལྟར་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་དཔལ་རྡོ་རྗེ་ཉི་མའི་བྱང་ཆུབ་སེམས་ཀྱི་ངོ་བོ་ཅོད་པན་གྱི་དབང་ཐོབ་པར་མོས་པ་གྱིས་ཤིག། དེ་ནས་ཕྱི་མ་རྣམས་ལ་རིགས་འགྲེ་སྟེ། རྡོ་རྗེ་ལ། ཨཱཿལས་པདྨ་ཨཱཿས་མཚན་པ་ལས། སྣང་བ་མཐའ་ཡས་དམར་པོ་པདྨ་དང་དྲིལ་བུ་འཛིན་པ། རྡོ་རྗེ་གསུང་གི་དཔག་མེད་པའི། །དེ་བཞིན་གཤེགས་པའི་གསུང་མཆོག་པ། །རྡོ་རྗེ་གསུང་ནི་ཀུན་འབྱུང་བ། །རྡོ་རྗེ་གསུང་ལ་ཕྱག་འཚལ་བསྟོད། །ཅེས་དང་། དབང་རྫས་ཀྱི་ལྷ་འོད་དུ་ཞུ་བས་རྡོ་རྗེར་གྱུར། འོད་དཔག་མེད་ཀྱི་རང་བཞིན་རྡོ་རྗེའི་དབང་བསྐུར། རྡོ་རྗེ་ལག་གཡས་སུ་གཏད་ལ། འདི་ནི་སངས་རྒྱས་ཐམས་ཅད་ཀྱི། རྡོ་རྗེ་གསང་བ་ཆེན་པོ་ཡིས། །དེ་རིང་ཁྱོད་ལ་དབང་བསྐུར་ཏེ། །རབ་ཏུ་གྲུབ་ཕྱིར་གཟུང་བར་བགྱི། །ཨོཾ་བཛྲ་ཨ་བྷིཥིཉྩ་ཧཱུྃ། །ལན་གསུམ་གསོར་ཞིང་སྙིང་གར་འཛིན་དུ་བཅུག་ལ། ཨོཾ་ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །ཅེས་བརྗོད་ཅིང་དོན་བསམ། སྣང་མཐས་དབུར་བརྒྱན། སོ་སོར་རྟོག་པའི་ཡེ་ཤེས་ཀྱི་རང་བཞིན་པདྨ་གར་གྱི་དབང་ཕྱུག་གི་ངོ་བོ་མཚོན་པར་བྱེད་པ་རྡོ་རྗེའི་དབང་ཐོབ་པར་མོས་པ་གྱིས་ཤིག །དྲིལ་བུར། ཧཱ་ལས་བྱུང་བའི་རལ་གྲི་ཧཱས་མཚན་པ་ལས་དོན་གྲུབ་ལྗང་གུ་རལ་གྲི་དང་
དྲིལ་བུ་འཛིན་པར་བསྐྱེད། རྡོ་རྗེ་ལས་རབ་ཀུན་གྱི་མཆོག །སེམས་ཅན་ཀུན་གྱི་དོན་གྲུབ་དཔལ། །བྱ་གྲུབ་ཡེ་ཤེས་ངོ་བོ་ཉིད། །ལས་ཀྱི་གཙོ་བོར་ཕྱག་འཚལ་བསྟོད། །ཅེས་དང་། དབང་རྫས་ཀྱི་ལྷ་འོད་དུ་ཞུ་བས་དྲིལ་བུར་གྱུར། དོན་གྲུབ་ཀྱི་ངོ་བོ་དྲིལ་བུས་དབང་བསྐུར། ལག་གཡོན་ཏུ་གཏང་ལ། འདི་ནི་རྣལ་འབྱོར་མ་ཚོགས་ཀྱི། །ཤེས་རབ་དབྱངས་ཀྱི་རྗེས་འགྲོར་བཤད། །ཁྱོད་ཀྱིས་རྟག་ཏུ་བཅང་བར་གྱིས། །བྱང་ཆུབ་མཆོག་ཏུ་རྒྱལ་བས་བཞེད། །ཨོཾ་ཨ་དྷི་པ་ཏི་སྟཾྭ། ཨ་བྷི་ཥིཉྩ་མཱཾ། དཀྲོལ་ཅིང་དཀུ་གཡོན་པར་བརྟེན་དུ་གཞུག་ལ། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་ཅན་རྣམས་དམ་པའི་སྲིད་པ་བྱེད་པར་འགྱུར། །ཞེས་བརྗོད། དོན་གྲུབ་ཀྱིས་དབུར་བརྒྱན། བྱ་གྲུབ་ཡེ་ཤེས་ཀྱི་རང་བཞིན་རྟ་མཆོག་རོལ་པའི་ངོ་བོ་མཚོན་པར་བྱེད་པ་དྲིལ་ཊའི་དབང་ཐོབ་པར་མོས་པ་གྱིས་ཤིག །རྡོར་དྲིལ། ཨོཾ་ལས་འཁོར་ལོ་ཨོཾ་གྱིས་མཚན་པ་ལས་རྣམ་པར་སྣང་མཛད་འཁོར་ལོ་དང་དྲིལ་བུ་འཛིན་པར་བསྐྱེད། རྡོ་རྗེའི་སྐུ་ནི་དགའ་ཆེན་པོ། །ཐམས་ཅད་ཞི་བའི་མཆོག་ཉིད་གསལ། །རང་གི་ངང་གི་འོད་གསལ་མཆོག །རྡོ་རྗེའི་སྐུ་ལ་ཕྱག་འཚལ་བསྟོད། །ཅེས་དང་། དེ་ཞུ་བ་ལས་བྱུང་བའི་རྡོར་དྲིལ་དུ་གྱུར། རྣམ་པར་སྣང་མཛད་ཀྱི་ངོ་བོ་མིང་གི་དབང་བསྐུར། རྡོར་དྲིལ་སྤྱི་བོར་དཀྲོལ་ལ། ཨོཾ་གང་ཕྱིར་
ཆོས་རྣམས་རྣམ་དག་པར། །སངས་རྒྱས་ཡེ་ཤེས་རང་བཞིན་ཉིད། །དབང་པོའི་སྤྱོད་ལམ་གང་དང་གང་། །བདེ་མཆོག་སྒྱུ་མའི་དཀྱིལ་འཁོར་ཉིད། །ཨོཾ་དཔལ་ཧེ་རུ་ཀ་ཨ་བྷི་ཥིཉྩ་མི། བཛྲ་མཱ་མ་ཨ་བྷི་ཥེ་ཀ་ཏ། ཞེས་བརྗོད། རྣམ་སྣང་གིས་དབུར་བརྒྱན། ཆོས་དབྱིངས་ཡེ་ཤེས་ཀྱི་རང་བཞིན་དཔལ་རྣམ་སྣང་གི་ངོ་བོ་མཚོན་པར་བྱེད་པ་མིང་གི་དབང་ཐོབ་པར་མོས་པ་གྱིས་ཤིག །ཅེས་དང་། སངས་རྒྱས་ཐམས་ཅད་མཉམ་སྦྱོར་བའི། །ཡང་དག་སྒྲུབ་པ་གཅིག་པུ་ཉིད། །མཁའ་འགྲོ་སྒྱུ་མའི་ཚོགས་ཀྱིས་ཀྱང་། །རྒྱལ་མི་ཐེབས་ཤིང་མི་རྨོངས་ཏེ། །དེ་ལ་གནོད་པར་མི་འགྱུར་རོ། །ཞེས་རིག་པའི་དབང་ལྔའི་ཕན་ཡོན་བརྗོད། དེ་ནས་དམ་ཚིག་གི་མནའ་བསྒག་ཅིང་སྡོམ་པ་སྦྱིན་པ་འདི་ཉིད་སངས་རྒྱས་ཐམས་ཅད་ཀྱི་མགྲིན་གཅིག་གིས་གསུང་བར་མོས་ཤིག །སངས་རྒྱས་ཐམས་ཅད་མཉམ་སྦྱོར་བའི། །སྡོམ་པ་ཉམས་པར་ཁྱེད་བྱེད་ན། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་རྡོ་རྗེ་འཛིན། །ལྷ་རྣམས་དང་ནི་མི་དག་དང་། །དེ་བཞིན་རྣལ་འབྱོར་སྒྲུབ་པ་པོ། །དེ་དག་ལ་ནི་སྙིང་རིང་ནས། །སྙིང་ལ་ཁྲག་ཆེན་འཐུང་བ་ཞིག །སེམས་ཅན་ཁམས་ནི་མ་ལུས་དོན། །སྲིད་པ་ཤིན་ཏུ་དག་པའི་ཕྱིར། །མི་འགོག་ཆོས་ཉིད་སྦྱོར་བ་ཡིས། །རྟག་པ་ཉིད་དུ་བསྒྲུབ་པར་བྱ། །རང་གི་ངོ་བོ་ཡོངས་སྤངས་ཤིང་། །དཀའ་ཐུབ་ཀྱིས་ནི་གཟིར་
མི་བྱ། །ཅི་བདེ་བར་ནི་བདེ་བར་སྤྱན། །འདི་ནི་ཕྱི་དུས་སངས་རྒྱས་ཡིན། །རྣལ་འབྱོར་ལོངས་སྤྱོད་ཐམས་ཅད་པ། །ཅིས་ཀྱང་མི་འཇིགས་དགའ་བར་གྱིས། །སྡིག་མེད་སྟོབས་ཀྱིས་ཁྱེད་མ་འཇིགས། །དམ་ཚིག་འདའ་པར་དཀའ་པའོ། །ཞེས་བརྗོད་ཅིང་སྤྲོན་སྐུ་གསུང་ཐུགས་ཀྱི་དམ་ཚིག་རྣམ་གསུམ་རྒྱས་པར་བསྟན་ནོ། །བུམ་དབང་གི་ཡན་ལག་བདག་པོའི་དབང་ནི། །ཐོད་སྐུ་བསང་སྦྱང་། དབང་རྫས་དང་སློབ་མ་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་པདྨ་དང་ཉི་མའི་གདན་ལ་ཧཱུྃ་ལས་དཔལ་ཡང་དག་ཞལ་གསུམ་ཕྱག་དྲུག་པ་ཡུམ་ཀྲོ་དྷཱི་ཤྭ་རི་མ་དང་མཉམ་པར་སྦྱོར་བའི་གནས་གསུམ་ཨོཾ་ཨཱཿཧཱུྃ་གིས་མཚན་པ། ཡེ་ཤེས་པ་བཛྲས་མཱ་ཛཿ ཛཿཧཱུྃ་བྃ་ཧོཿ སངས་རྒྱས་ཀུན་གྱི་སྐུ་ཡི་དབང་། །ཕྱག་མཚན་རྡོ་རྗེ་ཀ་པཱ་ལ། །སྐུ་ཡི་དངོས་གྲུབ་ཐོབ་བྱེད་པ། །ཁྲག་འཐུང་ཡབ་ཡུམ་དབང་བསྐུར་རོ། །ཨོཾ་ཀ་པཱ་ལ་སིདྡྷི་ཧེ་རུ་ཀ་ཀ་པཱ་ལ་ཨ་བྷི་ཥིཉྩ་ཨོཾ། ཞེས་ཀ་པཱཾ་ལ་སྤྱི་བོར་བཞག །ཧེ་རུ་ཀ་ཡབ་ཡུམ་ཁྱེད་རང་རྣམས་ལ་ཐིམ། སྐུ་སྣང་ལ་རང་བཞིན་མེད་པར་ཆུ་ཟླ་ལྟ་བུར་ཤེས་པར་བྱའོ། །དེ་ལྟར་ན་སྐུ་ཡི་དངོས་གྲུབ་ཐོབ་སྟེ་སྐུའི་དབང་ངོ་། །དྲིལ་བུ་ཐོགས་ལ། སངས་རྒྱས་ཀུན་གྱི་གསུང་གི་དབང་། །ཤེས་རབ་གསུང་གི་སྒྲ་སྒྲོགས་པ། །མཁའ་འགྲོ་སྒྱུ་མའི་སྙིང་པོ་འདི། །གྲག་སྟོང་གསུང་གི་དངོས་གྲུབ་ཐོབ། །ཝཱ་ཀ་སིདྡྷི་ཨ་བྷི་ཥིཉྩ་ཨཱཿརུ་ལུ་བརྗོད། དྲིལ་བུ་གཏད་དེ་
གསུང་གྲག་སྟོང་སྐྱེ་བ་མེད་པར་ཤེས་པར་བྱའོ། །དེ་ལྟར་ན་གསུང་གི་དངོས་གྲུབ་ཐོབ་སྟེ་གསུང་གི་དབང་ངོ། །རྡོ་རྗེ་ཐོགས་ལ། །སངས་རྒྱས་ཀུན་གྱི་ཐུགས་ཀྱི་དབང་། །གཉིས་མེད་ཡེ་ཤེས་སྐྱེད་པ་བོ། །རྡོ་རྗེ་ལྟ་བུའི་ཏིང་འཛིན་ནི། །ཆོས་ཀྱི་རྒྱལ་པོར་དབང་བསྐུར་རོ། །ཙིཏྟ་སིདྡྷི་བཛྲ་ཨ་བྷི་ཥིཉྩ་ཧཱུྃ། ཞེས་རྡོ་རྗེ་གཏད་དེ། སེམས་མ་སྐྱེས་རྟོག་པ་དང་བྲལ་བས་བརྗོད་དུ་མེད་པ་ནམ་མཁའི་དཀྱིལ་ལྟར་བཞག་པར་བྱའོ། །དེ་ལྟར་ན་ཐུགས་ཀྱི་དངོས་གྲུབ་ཐོབ་སྟེ་སྐྱེ་བ་མེད་པའི་དོན་རྟོགས་ཐུགས་ཀྱི་དབང་ངོ་། །ཐབས་དང་ཤེས་རབ་གཉིས་མེད་པའི། །དམ་ཚིག་རྡོ་རྗེ་དྲིལ་བུ་འདི། །ཡོན་ཏན་ཕྲིན་ལས་བསྒྲུབ་པའི་ཕྱིར། །ཕྲིན་ལས་རྫོགས་བྱེད་དབང་བསྐུར་རོ། །ཨོཾ་བཛྲ་གྷཎྜེ་ཨ་བྷི་ཥིཉྩ་མཱཾ། ཞེས་རྡོ་རྗེ་དྲིལ་བུ་ཟུང་འཇུག་ཏུ་གཏད་ནས། ཐབས་དང་ཤེས་རབ་གཉིས་སུ་མེད་པའི་སྒོ་ནས་སེམས་ཅན་གྱི་དོན་བྱེད་པ་སྟེ་ཡོན་ཏན་ཕྲིན་ལས་ཀྱི་དབང་ངོ། །ཕྱག་མཚན་གཉིས་ལག་ཏུ་གཏད་ལ། ཧེ་རུ་ཀ་དཔལ་ཁ་ཊཾྭ་ག །རྣལ་འབྱོར་མ་ཡི་ཌཱ་མ་རུ། །དཔའ་བོ་ཆེན་པོས་བླང་བར་བགྱི། །ཁྱོད་ཀྱིས་ཀྱང་ནི་རྟག་ཏུ་གཟུང་། ཁ་ཊཱཾྭ་ཆོས་ཉིད་སྟོང་པ་ལས་སྒྲ་གྲག་སྟོང་ཤེས་པ་ཕྱག་མཚན་གྱི་དབང་ངོ་། །མར་མེས་དབང་བསྐུར་ལ། སྐྱེ་མེད་དབྱིངས་ལས་ཡེ་ཤེས་ཆེ། །སེམས་ཅན་མ་རིག་མུན་
པ་སེལ། །སེམས་ཉིད་འོད་གསལ་ཆོས་ཀྱི་དབྱིངས། །གསལ་བྱེད་མར་མེས་དབང་བསྐུར་རོ། །ཨོཾ་བཛྲ་ཨཱ་ལོ་ཀེ་ཛྙཱ་ན་ཨ་བྷི་ཥིཉྩ་མཱཾ། དབང་དེ་ཉིད་ཀྱི་སེམས་ཉིད་འོད་གསལ་ཆོས་ཀྱི་སྐུ་ཐོབ་པར་བྱེད་པ་སྟེ་མ་རིག་མུན་པ་སེལ་བར་བྱེད་པ་མར་མེའི་དབང་ངོ། །དེ་ལྟར་དབང་རྣམ་པ་དྲུག་གིས་ཀུན་གཞིའི་དྲི་མ་སེལ་ཞིར་མ་རིག་པ་ཉོན་མོངས་པའི་དྲི་མ་དྲུག་དག་ནས། རིག་པ་རིགས་དྲུག་གི་དབང་མཆོག་ཐོབ་པ་ཡིན་ནོ། །ཞེས་བརྗོད། གཉིས་པ་རྡོ་རྗེ་སློབ་དཔོན་གྱི་དབང་ནི། དེ་ནས་ཕྱིར་མི་ལྡོག་པ་རྡོ་རྗེ་སློབ་དཔོན་གྱི་དབང་བསྐུར་ཞུ་བའི་ཡོན་ཏུ་མཎྜལ་འབུལ། གསོལ་བ་འདེབས་པ་འདིའི་རྗེས་ཟློས། མགོན་ཁྱོད་ཐུགས་རྗེའི་བཀའ་དྲིན་གྱིས། །སློབ་དཔོན་དབང་བསྐུར་བདག་ལ་སྩོལ། །བདག་གཞན་དོན་དུ་བྱ་བ་རྣམས། །འགྲུབ་བྱེད་དབང་བསྐུར་བདག་ལ་སྩོལ། །ལན་གསུམ། དམ་ཚིག་གསུམ་སྦྱིན་པ་ནི། སློབ་མ་ཧཱུྃ་ལས་དཔལ་ཡང་དག་སྦྱོར་བ་ཡུམ་དང་བཅས་པའི་བསྐུར་བསམ། ཧཱུྃ་དང་ཨ་ལས་རྡོར་དྲིལ་རྡོར་སེམས་ཡབ་ཡུམ་ཞུ་པའི་རྡོ་རྗེ་དང་དྲིལ་བུར་གྱུར། སློབ་མའི་ལག་པ་གཡས་གཡོན་དུ་གཏད་ལ། རྡོ་རྗེ་དྲིལ་བུ་ཕྱག་རྒྱ་ཆེ། །ཟུངས་ཤིག་ཡང་དག་གཟུང་བར་བགྱི། །དེ་རིང་རྡོ་རྗེ་སློབ་དཔོན་ཆེ། །སློབ་མའི་ཚོགས་རྣམས་བསྡུ་བར་
མཛོད། །འདི་ཉིད་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ཕྱག་ན་བསྣམས། །རྟག་ཏུ་ཁྱོད་ཀྱིས་ཀྱང་བཟུང་སྟེ། །ཕྱག་ན་རྡོ་རྗེའི་བརྟུལ་ཞུགས་བརྟན། །ཨོཾ་མ་ཧཱ་བཛྲ་ཧཱུྃ། ཨོཾ་སརྦ་ཏ་ཐཱ་ག་ཏ་བཛྲ་སཏྭ་ས་མཱ་ཡ་ཏིཥྛ། དེ་ལྟར་རྡོ་རྗེ་གཏད་པ་ནི། སེམས་ཐབས་བདེ་བ་ཆེན་པོའི་ཡེ་ཤེས་སུ་བྱིན་གྱིས་བརླབས་པ་ནི་ཐུགས་ཀྱི་དམ་ཚིག་གོ། །འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅད། །བྱང་ཆུབ་མཆོག་ཏུ་རྒྱལ་བ་བཞེད། །ཨོཾ་བཛྲ་གྷ་ཎྜེ་ཨཱཿཨེ་ཥ་སྟཱཾ་དྷ་ར་ཡ་མི། ཧི་ཧི་ཧི་ཧི་ཧོཿདྲིལ་བུ་གཏར་པ་ནི། དག་ཤེས་རབ་སྟོང་པ་ཉིད་ཀྱི་སྒྲ་སྒྲོགས་པའི་གསུང་དབྱངས་ཡན་ལག་དྲུག་ཅུའི་དམ་ཚིག་ཏུ་བྱིན་གྱིས་བརླབས་པ་གསུང་གི་དམ་ཚིག་གོ། །ཡིད་ཀྱི་ལུས་ནི་བརྟན་པའི་ཕྱིར། །དམ་ཚིག་ཕྱག་རྒྱ་ཞེས་བྱར་བརྗོད། །ལུས་ཀུན་བརྟན་བྱེད་གང་ཞིག་ནི། །ཕྱག་རྒྱར་རབ་ཏུ་གྲགས་པ་ཡིན། །ཨོཾ་མ་ཧཱ་ཀཱ་ཡ་ཝཱ་ཀ་ཙིཏྟ་བཛྲ་ས་མ་ཡ་ཧཱུྃ། རང་ལྷ་སྐུར་གསལ་བ་ཕྱག་རྒྱ་ཆེན་པོའི་དམ་ཚིག་སྟེ་དམ་ཚིག་གསུམ་ཐོབ། ཡུམ་ཀྲོ་དྷཱི་ཤྭ་རཱི་མ་གཏད་པ་དང་མཉམ་པར་སྦྱར་བ་ལས་བདེ་བའི་ཡེ་ཤེས་མྱོང་བས་དོན་གྱི་བུམ་པའི་དབང་ཐོབ་པར་མོས་པ་གྱིས་ཤིག །བུམ་པས་དབང་བསྐུར་ལ། དབང་བསྐུར་རྡོ་རྗེ་ཆེན་
པོ་ནི། ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་བཛྲི་བྷ་བ་ཨ་བྷི་ཥིཉྩ་ཧཱུྃ། བུམ་ཆུ་འཐོང་ཞིང་སྦྱིན། དེ་ལྟར་དབང་བསྐུར་བས་ལུས་ཐམས་ཅད་བདུད་རྩིས་གང་། དྲི་མ་ཐམས་ཅད་དག །ཆུ་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན་པ་ལ་ལྷ་ཐམས་ཅད་ཀྱིས་ཁམས་གསུམ་ཆོས་ཀྱི་རྒྱལ་པོར་དབང་བསྐུར་ཞིང་དབང་ལྷ་རྣམས་ཀྱང་ཁྱེད་རང་ལ་ཐིམ་པར་མོས་ཤིག །སུ་པྲ་ཏིཥྛ་བཛྲ་ཞེས་བརྗོད་ཅིང་མེ་ཏོག་གི་ཆར་དབབ། རོལ་མོའི་སྒྲ་རྒྱ་ཆེར་བསྒྲག །གོང་ལྟར། ཨོཾ་བཛྲ་ཨཱ་ཧ་ར་སོགས་ཀྱིས་མཆོད་དོ། །དེའི་མཐའ་རྟེན་རྗེས་སུ་གནང་བ་སོགས་བྱ་བ་ལ། ཐོག་མར་ལས་སྒྲུབ་པའི་རྗེས་གནང་ནི། དེ་ལྟར་ཁྱེད་རང་རྣམས་རྡོ་རྗེ་སློབ་དཔོན་བདག་པོ་ཆེན་པོའི་གནས་ཐོབ་པའི་ཕྱིར། ཞི་སོགས་ཕྲིན་ལས་རྣམས་དང་། རལ་གྲི་ལ་སོགས་པ་ཐུན་མོང་དང་། ཕྱག་རྒྱ་ཆེན་པོ་མཆོག་གི་དངོས་གྲུབ་ཅི་དགའ་བ་བདེ་གླག་ཏུ་སྒྲུབ་པར་གྱིས་ཤིག །བདག་གཞན་དོན་བསྒྲུབ་ལས་ཀྱི་ཚོགས། །ཐུན་མོང་འབྲིང་པོ་མཆོག་གྱུར་པའི། །ཞི་རྒྱས་དབང་དྲག་དགུག་པ་དང་། །སྡང་གནོད་རེངས་པའི་ལས་ཀུན་དང་། །དབྱེ་རྨོངས་བསྐྲད་པའི་ཆོ་ག་རྣམས། །ཐོགས་པ་མེད་པར་སྒྲུབ་པར་གྱིས། །
རལ་གྲི་མིག་སྨན་ས་འོག་དང་། །ཐོགས་མེད་མི་འབྱིང་སྐས་འཛེག་དང་། །གསེར་འགྱུར་རིལ་བུ་ཉི་ཟླ་བཟུང་། །ཆར་དབབ་ལ་སོགས་ལས་ཀྱི་ཚོགས། །རྣམ་ཤེས་བསྒྲུབ་དང་ཡེ་ཤེས་བསྒྲུབ། །ཕྱག་རྒྱ་ཆེན་པོའི་དོན་བསྒྲུབ་དག །ཐམས་ཅད་བསྒྲུབ་ཅིང་འགྲེ་བ་ཡི། །དོན་ཉིད་ཡང་དག་སྦྱོར་བར་གྱིས། །རྒྱལ་བ་ཀུན་གྱི་གནས་འཇུག་ཅིང་། །སྐུ་གསུང་ཐུགས་མཆོག་ཡོན་ཏན་རྒྱན། །ཕྲིན་ལས་བདག་གཞན་གནས་སྦྱོར་བའི། །མཁའ་འགྲོ་སྒྱུ་མའི་དངོས་གྲུབ་སྒྲུབ། །ཞེས་བརྗོད། མིག་སྨན་མིག་ཐུར་རམ་རྡོ་རྗེས་བླངས་ལ་རུ་ལུ་བཟླ་ཞིང་། མིག་སྨན་གྱི་རྗེས་སུ་གནང་བས་མ་རིག་སྒྲིབ་པའི་ལིང་ཏོག་བསལ་བར་མོས་ཤིག །ཇི་ལྟར་མིག་མཁན་རྒྱལ་པོ་ཡིས། །མིག་ནད་ལིང་ཏོག་བསལ་བ་ལྟར། །བུ་ཁྱོད་ཀྱིས་ཀྱང་མི་ཤེས་པའི། །ལིང་ཏོག་རྒྱལ་བས་སེལ་བར་མཛོད། །ཨོཾ་བཛྲ་ནེ་ཏྲ་ཨ་པ་ཧ་ར་པ་ཊ་ལཾ་ཧྲི་སྲཾ། ཞེས་བརྗོད་མིག་ལ་བྱུགས་པའི་ཚུལ་བྱའོ། །མིག་ཕྱེ་ནས་གང་ལ་བལྟ་ན། ཆོས་རྣམས་ཀུན་རྫོབ་སྒྱུ་མ་ལྟ་བུར་སྣང་བ་ལ་རྗེས་སུ་སྤྱོད་ཅིག་པར་གོ་བར་གྱིས་ཤིག །མེ་ལོང་བསྟན་ཏེ། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་དྲི་མ་མེད། །གཟུང་འཛིན་རྣམ་བྲལ་བརྗོད་དུ་མེད། །རྒྱུ་དང་ལས་ལ་ཀུན་ཏུ་བྱུང་། །རང་བཞིན་མེད་ཅིང་བདག་
མེད་པ། །ཆོས་རྣམས་དེ་བཞིན་ཤེས་བྱས་ནས། །སེམས་ཅན་དོན་ནི་ཡང་དག་བྱོས། །དེ་ནས་སངས་རྒྱས་སྲས་སུ་སྐྱེ། །ཞེས་བརྗོད། དོན་དམ་པར་ཆོས་ཐམས་ཅད་ཡི་དམ་གྱི་ལྷར་གནས་པའི་མཚན་ཉིད་སྟོན་པ་གྲག་སྟོང་དྲིལ་བུའི་སྒྲ་ལ་བརྟེན་ནས། ཆོས་རྣམས་ཀུན་རྫོབ་སྒྱུ་མ་ལྟ་བུར་སྣང་བ་ལ་རྗེས་སུ་གནང་བ་ཡིན་ཏེ། དྲིལ་བུ་དབོལ་དུ་གཞུག་སྟེ། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དག་དང་མཉམ་སྦྱོར་བས། །ཀུན་མཆོག་མཉམ་པ་ཉིད་དུ་གསལ། །སླར་མེ་ལོང་བསྟན་ལ། སྔར་བྱིན་ཕབ་པའི་མྱོང་བ་དེ་དང་སངས་རྒྱས་རྣམས་ཀྱི་གསང་བ་གསུམ་སྣང་ལ་རང་བཞིན་མེད་པའི་ཚུལ་དུ་བཞུགས་པ་དཔེ་འདིས་མཚོན་པར་བྱོས་ཤིག །ཨོཾ། །རྡོ་རྗེ་སེམས་དཔའ་མེ་ལོང་བཞིན། །དག་ཅིང་གསལ་ལ་རྙོག་པ་མེད། །བུ་ཁྱོད་ཀྱི་ནི་སྙིང་ལ་ཞུགས། །རྡོ་རྗེ་སེམས་དཔའ་རང་བཞིན་གཙོ། །མདའ་གཞུ་ཐོགས་ལ། དེ་ཕྱིན་ཆད་རང་དོན་ཡིད་བྱེད་ཀྱི་སེམས་དང་བྲལ་བར་བྱ་དགོས་པའང་བརྡ་འདིས་མཚོན་པར་གྱིས། དེ་བཞིན་གཤེགས་པ་ཐམས་ཅད་ལ་རྗེས་སུ་ཆགས་པ་བྱོས་ཤིག །ཅེས་སྦྱིན་ནས། བདུད་བཞི་དང་ཉན་རང་ཡིད་བྱེད་ལ་དམིགས་ཏེ་ཕྱོགས་བཞི་དང་སྟེང་འོག་ཏུ་འཕེན་
པའི་ཚུལ་མཛོད་ཅིག །ཅེས་བསྒོ། སྤྱིར་ཆོས་བཤད་པ་དང་། བྱེ་བྲག་རིགས་ལྔའི་སྤྲུལ་བཤད་ཀྱི་རྗེས་གནང་ནི། དེ་ནས་ཆོས་ཀྱི་འཁོར་ལོ་སྐོར་ཞིག་པའི་བརྡར་བྱིན་གྱིས་བརླབས་པའི་འཁོར་ལོའི་སྟན་ལ་བཞག་ཅིང་། དུང་གི་སྒྲས་གདུལ་བྱ་བསྡུས་ཏེ་ཆོས་འདི་ཤོད་ཅིག་པའི་བརྡར་ལག་པ་གཡས་སུ་གླེགས་བམ་དང་གཡོན་དུ་དུང་སྦྱིན་པར་གོ་བར་མཛོད་ཅིག བྱས་ལ་དེ་དག་སྦྱིན་ཅིང་། ཨོཾ། །ཕ་རོལ་ཕྱིན་དྲུག་ལས་རྣམས་ཀྱིས། །སེམས་ཅན་དོན་ཀུན་མཉམ་སྦྱོར་ཞིང་། །འཁོར་བའི་རྒྱུན་གཅོད་མྱ་ངན་འདས། །ཆོས་ཀྱི་འཁོར་ལོ་ཆེན་པོ་སྐོར། །ཐེ་ཚོམ་རྟོགས་ཚོགས་གཅོད་མཛད་པའི། །ཆོས་ཀྱི་དུང་ནི་སྒྲ་བསྒྲགས་པས། །གསང་སྔགས་སྙིང་པོ་གསང་ཆེན་དོན། །སྣོད་ལྡན་ཀུན་ལ་རབ་ཏུ་ཤོད། །དེས་ནི་རྒྱལ་བ་ཐམས་ཅད་ལ། །ཕན་འདོགས་དྲིན་ལན་མཛད་པ་ཡིན། །མཁའ་འགྲོ་སྒྱུ་མའི་དཀྱིལ་འཁོར་གྱིས། །ཁྱོད་ལ་རྟག་ཏུ་བསྲུང་བར་མཛད། །ཅེས་བརྗོད། ཁྱེད་རང་རྣམས་གདུལ་བྱ་རིགས་སོ་སོ་ལ་དེ་དང་མཐུན་པའི་ཆོས་འཁོར་བསྐོར་བར་རྗེས་སུ་གནང་བར་མོས་ལ་མི་བསྐྱོད་པ་སོགས་རིགས་སོ་སོའི་ང་རྒྱལ་ལ་གནས་པར་ཞུ། རྡོ་རྗེ་སོགས་རིགས་ལྔའི་ཕྱག་མཚན་རིམ་བཞིན་གཏད་ལ། མདོར་ན་འཇིག་རྟེན་ཁམས་རྣམས་སུ། །སེམས་ཅན་
རྣམས་ཀྱི་དོན་གྱི་ཕྱིར། །ཇི་ལྟར་འདུལ་བ་སྣ་ཚོགས་སུ། །རྡོ་རྗེའི་འཁོར་ལོ་སྐོར་དུ་གསོལ། །དེ་བཞིན་དུ། རྡོ་རྗེའི་གནས་སུ། ཆོས་ཀྱི་རིན་ཆེན་པདྨ་རལ་གྲི་བཅུག །དེ་ནས་ལུང་བསྟན་ཅིང་དབུགས་དབྱུང་བ་ནི། །སློབ་དཔོན་མཆོག་གི་སྤྲུལ་པའི་སྐུར་གནས་གྱུར་པས་སངས་རྒྱས་རྣམས་དང་མགྲིན་གཅིག་པུར་ཁྱེད་རང་སངས་རྒྱས་སུ་ལུང་སྟོན་པར་མོས་ཤིག །བྱས་ལ་སློབ་དཔོན་ལངས་ཏེ་སྣམ་སྦྱར་བགོ། །ལག་གཡོན་པས་ཆོས་གོས་ཀྱི་གྲ་སེང་གེའི་རྣ་བ་ལྟར་བྱས་པ་བཟུང་ཞིང་། གཡོན་མཆོག་སྦྱིན་གྱི་ཕྱག་རྒྱ་སློབ་མའི་མགོ་བོར་བཞག་ལ། འདི་ལྟར་ང་ཡིས་ཁྱོད་ལུང་བསྟན། །རྡོ་རྗེ་དཔལ་ལྡན་གསང་བའི་བདག །དངོས་པོ་མཆོག་ཏུ་བསྒྲུབ་པའི་ཕྱིར། །སྲིད་པའི་ངན་འགྲོ་གནས་ལས་གྲོལ། །ཀྱེ་ཤྲཱི་ཧེ་རུ་ཀ་ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་སྟཾྭ་བྷུ་ར་བྷུ་ཝ་སྭ། དུས་གསུམ་གྱི་རྒྱལ་བ་རྣམས་ཀྱིས་ཕྱོགས་བཅུ་ནས་གསུང་དབྱངས་མཐུན་པའི་སྒྲ་སྐད་ཀྱིས་ལུང་སྟོན་པར་མཛད་དེ། ཀྱེ་རིགས་ཀྱི་བུ་ཁྱོད་ཀྱི་སྲིད་པ་མཐའ་མ་ནི་འདི་ཡིན་ཏེ་གསང་བ་བླ་ན་མེད་པའི་ཐེག་པ་ལ་ཞུགས་པས་ཕྱག་རྒྱ་ཆེན་པོ་དང་སྔགས་ཀྱི་མཐུས་རིགས་ཀྱི་དཀྱིལ་འཁོར་དུ་གནས་པར་འགྱུར་རོ། །ཞེས་གསུངས་པར་མོས་ཤིག །སླར་བཞུགས་ནས། ཁྱོད་ཀྱིས་ཆགས་པ་དང་མི་འབྲལ་བར་བྱ་སྟེ་དེ་དག་ནི་ལས་ལ་སྦྱར་བར་
བྱའོ། །འདོད་ཆགས་བྲལ་བ་ལྟ་བུའི་སྡིག །ཁམས་གསུམ་ན་ནི་གཞན་མེད་དེ། །དེ་བས་འདོད་ལ་ཆགས་བྲལ་བར། །ཁྱོད་ཀྱིས་ནམ་ཡང་བྱ་བ་མིན། །མ་ཧཱ་ས་མ་ཡ་ཧཱུྃ་ཕཊ། །དེ་རིང་དཀྱིལ་འཁོར་སློབ་དཔོན་དང་། །སྔགས་སོགས་རྒྱུད་རྣམས་འཛིན་པར་འགྱུར། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་ཀུན་གྱིས་མཐུན་པར་གསུངས། །སེམས་ཅན་ཀུན་ལ་རྗེས་བརྩེ་བ། །དཀྱིལ་འཁོར་ཆོ་ག་བཞིན་ཏུ་བྲིས། །རྩེ་གཅིག་ནན་ཏན་བསྐྱེད་ནས་ནི། །སྒྲུབ་པ་པོ་རྣམས་རྒྱུད་ལ་སྦྱོར། །དེ་ནས་དཀྱིལ་འཁོར་མཐོང་བའི་ཕན་ཡོན་བསྟན་ཅིང་དེ་ལས་གཟེངས་བསྟོད་པ་ནི་འདི་ལ་གསན་པས་ཁྱབ་སྟེ། མཆོག་ཏུ་གསང་བའི་དཀྱིལ་འཁོར་འདིར། །ཞུགས་ཤིང་མཐོང་བ་སོགས་པ་ཡིས། །སྡིག་པ་ཀུན་ལས་རྣམ་གྲོལ་ཞིང་། །ཁྱེད་རྣམས་རབ་ཏུ་དགེ་བར་གནས། །ཁམས་གསུམ་པ་ནི་རྒྱལ་སྲིད་ཆེ། །རྒྱལ་བའི་བདག་པོར་དབང་བསྐུར་ཞིང་། །བདུད་རྣམས་ཀུན་ལས་རྣམ་པར་རྒྱལ། །ཕོ་བྲང་མཆོག་ཏུ་ཞུགས་པ་ཡིན། །དབང་བསྐུར་རྗེས་ཐོགས་དབུགས་དབྱུང་བས། །སློབ་མ་ཡོན་ཏན་བདག་པོར་འགྱུར། །སློབ་དཔོན་བློ་གྲོས་དམ་ཚིག་ལྡན། །བརྟན་གཡོ་མཐའ་ཡས་རྣམ་པར་གྲོལ། །
ལམ་མཆོག་འཇུག་སྟོབས་དབུགས་ཕྱུང་སྟེ། །ངལ་བའི་གནས་ངན་ཀུན་སྤངས་སོ། །ཞེས་དང་། བདེ་ཆེན་ཐེག་པ་འདི་ལ་ནི། །ཕྱི་ནས་འཆི་བ་ཡོད་མེད་ཅིང་། །མཚུངས་མེད་ཐུབ་པར་མི་འགྱུར་ཏེ། །ཅིས་ཀྱང་མི་འཇིགས་དགའ་བར་གྱིས། །སྲིད་པ་ཤིན་ཏུ་དག་པས་ན། །སྲིད་པའི་སྡུག་བསྔལ་ལས་འདས་སོ། །འདི་ཡི་ཁྱེད་རྣམས་དུས་འདི་རུ། །སངས་རྒྱས་ཐོབ་པར་ཐེ་ཚོམ་མེད། །ཅེས་བརྗོད། དབང་བསྐུར་དེ་ལ་བརྟེན་པའི་ཁྱད་པར་གྱི་དམ་ཚིག་ཀྱང་འདི་ལྟ་སྟེ། རྡོ་རྗེ་བླ་མ་མི་སྤང་ཞིང་། །བྱང་ཆུབ་སེམས་ནི་ཡོངས་མི་སྤོང་། །རྡོ་རྗེ་ཞེས་བྱ་ཕྱག་རྒྱ་ཆེ། །གང་ཞིག་བསྐྱེད་པ་ཙམ་གྱིས་ནི། །སངས་རྒྱས་ཉིད་དུ་ཐེ་ཚོམ་མེད། །དམ་པའི་ཆོས་དག་མི་སྨད་ཅིང་། །མ་གུས་སྤང་ཞིང་དོར་མི་བྱ། །མི་ཤེས་སྣོད་མིན་རྨོངས་པ་ལ། །ནམ་ཡང་བསྟན་པར་མི་བྱའོ། །རྡོ་རྗེ་དྲིལ་བུ་མི་སྤང་སྟེ། །སློབ་དཔོན་དག་ལ་གུས་པར་གྱིས། །ཞེས་བརྗོད། དེ་ཁོ་ན་ཉིད་བསྟན་པ་ནི། དབང་དོན་གྱི་གཙོ་བོ་དཀྱིལ་འཁོར་དང་ལྷའི་དེ་ཁོ་ན་ཉིད་བསྟན་པར་བྱ་བ་ནི། ཞུགས་པའི་དཀྱིལ་འཁོར་འདི་རྣམས་བསྒོམས་པས་རབ་ཏུ་ཅི་ཞིག་མངོན་དུ་གྱུར་ཅེ་ན། ཧེ་རུ་ཀ་ག་ལྤོའི་རྒྱུད་ལས། གཞལ་ཡས་ཁང་ཆེན་
ཡེ་ཤེས་ཏེ། །འཁོར་འདས་མཉམ་པ་གྲུ་བཞི་པ། །སྒོ་བཞི་དྲན་པ་ཉེར་བཞག་བཞི། །རྣམ་ཐར་བརྒྱད་དང་རྟ་བབས་སོ། །རིན་ཆེན་སྒོ་སྟེ་ཐུགས་རྗེའི་དང་། །ཡང་དག་སྤོང་བཞི་ཏ་རོ་་དྲན་པ་ཉེར་བཞག་སྒོ་འཁྱུད་དང་། །རྫུ་འཕྲུལ་རྐང་བཞི་སྒོ་ཁྱམས་དང་། །བྲེང་བ་བྱང་ཆུབ་ཡན་ལག་བདུན། །འཕགས་ལམ་བརྒྱད་ཀྱི་ཀ་བས་མཛེས། །ལམ་གྱི་ཡེ་ཤེས་རྔ་ཡབ་དང་། །ཉོན་མོངས་ཚོགས་འཛོམས་མུ་ཏིག་ཕྲེང་། །དྲིལ་བུ་བ་དན་རླུང་བསྐྱོད་པ། །ཤེས་རབ་ཆོས་ཀྱི་སྒྲ་སྒྲོགས་དང་། །ཆེ་བའི་ཡོན་ཏན་འདུས་པའི་རྟགས། །བདུད་བཞི་འཇོམས་པའི་རྒྱལ་མཚན་དང་། །ཐོད་ཕྲེང་སྐུ་གསུམ་ཐོབ་པའི་རྟགས། །གཞལ་ཡས་ཁང་མཆོག་དམ་པའོ། །དེ་ལྟ་ནའང་ནང་གི་ལྷ་རྣམས་ནི་སྤང་བྱ་དང་ལམ་གྱི་ཆོས་གང་རྣམ་པར་དག་པའི་འབྲས་བུ་ཡིན་སྙམ་ན། དེའང་རྒྱུད་ལས། བཅུ་ལྡན་ཡེ་ཤེས་དཔལ་ལ་དགའ། །གཉིས་ལྡན་ཟག་མེད་ཡུམ་གྱི་སྐུ། །ཀུན་གཞི་རྣམ་དག་གཽ་རཱི་མ། །མི་ཤེས་རྣམ་དག་ཙཽ་རཱི་མ། །ཉོན་ཡིད་རྣམ་དག་པྲ་མོ་ཧཱ། །ལུས་ཤེས་རྣམ་དག་བཻཏྟ་ལཱི། །མིག་ཤེས་རྣམ་དག་པུཀྐ་སཱི། །རྣ་བའི་རྣམ་ཤེས་གྷ་སྨ་རཱི། །སྣ་ཤེས་རྣམ་དག་སྨེ་ཤ་ནྟི། །ལྕེ་ཤེས་རྣམ་དག་ཙཎྜ་ལཱི། །ཡེ་ཤེས་
བརྒྱད་ཀྱི་ངོ་བོར་རྫོགས། །སྣོད་བཅུད་ལྷ་དང་གཞལ་ཡས་ཁང་། །ཕུང་པོ་ལྔ་ལ་སོགས་པའི་ཆོས། །དེ་ནི་སྤང་བར་བྱ་བ་མིན། །ཐེག་པ་གསུམ་ནི་སྤང་བ་མིན། །ཀ་ཏི་ལི་བཞིན་ཡོངས་སུ་བཟུང་། །ཞེས་གསུངས་པ་ལྟར་ངེས་པར་གྱིས་ཤིག །དེ་ལྟར་ན་ཁྱེད་རྣམས་དཀྱིལ་འཁོར་བྲི་བསྒྲུབ་དབང་བསྐུར་ཕྲིན་ལས་ཐམས་ཅད་བསྒྲུབ་པ་ལ་སོགས་སློབ་དཔོན་གྱི་བྱ་བ་ཐམས་ཅད་ལ་དབང་བས་སློབ་དཔོན་གྱི་དབང་ཐོབ་བོ། །ཞེས་དང་། དེ་ལྟར་རྡུལ་ཚོན་ནམ་རས་བྲིས་ཀྱི་དཀྱིལ་འཁོར་དུ་བུམ་པའི་དབང་བསྐུར་བ་ཐོབ་པས་བསྐྱེད་པའི་རིམ་པ་བསྒོམ་པ་ལ་དབང་ཞིང་ལམ་ལྔ་ལས་སྦྱོར་ལམ་གྱི་རྟོགས་པ་སྐྱེ་བའི་མཐུ་དང་ལྡན་པར་བྱས། ལུས་ཀྱི་དྲི་མ་དག་སྟེ། སྤྲུལ་སྐུ་འགྲུབ་པའི་རྟེན་འབྲེལ་འགྲིག་གོ། །ཞེས་རྟོགས་པ་བསྐྱེད་དོ། །གཉིས་པ་གསང་དབང་ནི། བདེ་ཆེན་གསང་བའི་དབང་བསྐུར་ཞུ་པའི་ཡོན་ཏུ་མཎྜལ་འབུལ། གསོལ་བ་འདེབས་པ་འདིའི་རྗེས་ཟློས། དཔལ་ལྡན་མགོན་པོ་བདེ་བ་ཆེ། །བདེ་བ་ཆེན་པོའི་གནས་ལ་བཞུགས། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མའི་བདེ་མཆོག་མཛད། །བྱང་ཆུབ་སེམས་དཔའ་ཆེ་རྣམས་ཀྱི། །ཡང་དག་དོན་མཆོག་རྣམ་དག་པ། །ཇི་ལྟར་དེ་ཉིད་བདུད་རྩི་ཡི། །
མཆོག་གི་དབང་ནི་བསྐུར་བ་བཞིན། །དེ་བཞིན་བདག་སོགས་འགྲོ་ཀུན་གྱི། །སྡུག་བསྔལ་རྣམས་ནི་སེལ་བར་མཛོད། །རྣལ་འབྱོར་བདུད་རྩི་དྲི་མེད་མཆོག །མ་རིག་རྟོག་པའི་རབ་རིབ་སེལ། །གང་གི་བྱང་ཆུབ་བླ་ན་མེད། །དེ་རིང་བདག་གིས་ཐོབ་པར་མཛོད། །ལན་གསུམ། བུ་ཁྱོད་ཇི་ལྟར་འདོད་པ་བཞིན། །རྒྱལ་བ་ཀུན་གྱི་བདེ་ཆེན་སྦྱིན། །ཏིང་འཛིན་སྦྱོར་སྔགས་གསལ་བ་ནི། །རང་གི་གནས་སུ་ལེགས་པར་བསྟོད། །ཅེས་གནང་བ་སྦྱིན། ཁྱེད་རང་རྣམས་ཀྱི་ཤེས་རབ་མ་ལང་ཚོ་དར་ལ་བབ་ཅིང་རྒྱན་གྱིས་བརྒྱན་པ་བླ་མ་ལ་ཕུལ་བར་མོས་ལ་ཁྱད་པར་གྱི་གསོལ་བ་འདེབས་པ་འདིའི་རྗེས་ཟློས། །ཁྱོད་ཞབས་པདྨོའི་བཀའ་དྲིན་གྱིས། །སངས་རྒྱས་ཀུན་གྱི་བྱང་ཆུབ་སེམས། །དོན་ཆེན་ཟབ་མོས་ཉོན་མོངས་འཇོམས། །དེ་རིང་བདག་ལ་དབབ་པར་མཛོད། །ཅེས་ཞུ། ལུས་ཀྱི་དཀྱིལ་འཁོར་ཆ་མཐོང་བའི་བརྡར་གདོང་གཡོགས་འཆིང་མཛོད། །ཨོཾ་ཨཱཿཧཱུྃ། གདོང་འཆིང་། བདུད་རྩི་འཐོར་ལ་བསྲུང་ངོ། །སློབ་དཔོན་དཔལ་ཡང་དག་ཏུ་གསལ་བའི་གསང་གནས་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ནོར་བུར་ཨོཾ་རྩེ་མོར་ཕཊ་དང་བཅས་པ། ཕྱག་རྒྱ་ཀྲོ་དྷཱི་ཤྭ་རཱི་མར་གསལ་བའི་མཁའ་ཨ་ལས་པདྨ་ཨས་མཚན་པ། ཨོཾ་
སརྦ་ཏ་ཐཱ་ག་ཏ་ཨ་ནུ་རཱ་ག་་བཛྲ་སྭ་བྷཱ་བ་ཨཱཏྨ་ཀོ྅་ཧཾ། ཡབ་ཡུམ་སྙོམས་པར་ཞུགས་པའི་དགའ་བའི་སྒྲས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས། ཞལ་དུ་ཞུགས། ཐུགས་རྗེས་སུ་ཆགས་པའི་མེས་འོད་དུ་ཞུ། ཡུམ་གྱི་མཁར་བབས་པས་མཐེབ་སྲིན་གྱིས་བཟུང་ནས་ཁྱེད་རང་རྣམས་ཀྱི་ལྕེ་ཐོག་ཏུ་བྱིན་པར་མོས་ཤིག །ཐོད་པའི་བདུད་རྩི་སྦྱིན། ཇི་ལྟར་རྒྱལ་བ་བདེ་གཤེགས་ཀྱིས། །རང་གི་སྲས་ཚོགས་དབང་བསྐུར་ཞིང་། །བྱང་ཆུབ་སེམས་བདེ་དག་པའི་ཆུས། །རྣམ་རྟོག་དྲི་མ་དག་པར་བྱ། །ཨོཾ་མ་ཧཱ་བོ་དྷི་ཙིཏྟ་ས་མ་ཡ་ཨ་བྷི་ཥིཉྩ་ཧཱུྃ། དེ་ལྟར་བྱིན་པའི་བྱང་ཆུབ་སེམས་ཀྱི་བདུད་རྩི་མྱང་ལ་བདེ་ཆེན་རྟོགས་པའི་ང་རྒྱལ་བཟུང་བ་འདིའི་རྗེས་ཟློས། ཨ་ཧོ་མ་ཧཱ་སུ་ཁ །ད་ནི་སངས་རྒྱས་ཀུན་དང་མཉམ། །བདག་ནི་བསོད་ནམས་སྐལ་པ་ཆེ། །ཡོན་ཏན་ཀུན་གྱིས་བདག་བརྒྱན་ཏེ། །ཡང་དག་སྦྱོར་བའི་བདག་ཉིད་དོ། །ཞེས་བརྗོད་ལ་བཏུད། དེས་ལུས་གང་པས་ངག་གི་ཉེས་པ་དག་ནས་གསུང་རྡོ་རྗེར་གྱུར། ལུས་དཀྱིལ་མཐོང་བས་གདོང་གཡོགས་བཀྲོལ། ཡུམ་གྱི་བྷ་ག་ནས་གསང་བའི་དབང་ཐོབ་པས་རང་བྱིན་གྱིས་བརླབ་པ་བསྒོམ་ལ་དབང་ཞིང་ལམ་ལྔ་ལས་མཐོང་བའི་ལམ་ས་དང་
པོའི་རྟོགས་པ་སྐྱེ་བའི་མཐུ་དང་ལྡན་པར་བྱས་ལ། དེས་དག་གི་དྲི་མ་དག་སྟེ་ལོངས་སྤྱོད་རྫོགས་པའི་སྐུ་འགྲུབ་པའི་རྟེན་འབྲེལ་འགྲིག་གོ། །ཞེས་རྟོགས་པ་བསྐྱེད། གསུམ་པ་ནི། ཤེས་རབ་ཡེ་ཤེས་ཀྱི་དབང་བསྐུར་ཞུ་བའི་ཡོན་ཏུ་མཎྜལ་འབུལ། གསོལ་བ་འདེབས་པ་འདིའི་རྗེས་ཟློས། ཀྱེ་ཀྱེ་མགོན་པོ་བདེ་བ་ཆེ། །རྡོ་རྗེ་སྦྱོར་ལས་ཡང་དག་བྱུང་། །ཕྱག་རྒྱ་མི་ཕྱེད་རབ་བསྒྲུབ་པ། །མངོན་སུམ་ཉམས་མྱོང་བསྐྱེད་པའི་ཕྱིར། །བདག་ཉིད་ཆེན་པོ་ཇི་ལྟ་བར། །གཙོ་བོས་བདག་ལ་བཀའ་དྲིན་མཛོད། །རྟོག་པའི་དྲི་མས་བསྒྲིབས་པ་རྣམས། །བྱང་ཆུབ་ཆུ་ཡིས་དག་པར་མཛོད། །ལན་གསུམ། མཚན་ཉིད་དང་ལྡན་པའི་ཕྱག་རྒྱ་ཀྲོ་དྷཱི་ཤྭ་རཱི་མ་གསལ་བ་ཁྱེད་རང་རྣམས་ལ་གཏད་པར་མོས་ཤིག །དགའ་བའི་གནས་ཆེན་ལྷ་མོ་འདི། །ལེགས་པར་ཟུངས་ཤིག་བློ་གྲོས་ཅན། །དགའ་བདེའི་མཆོད་པ་རབ་ཏུ་གྱིས། །ཐབས་གཞན་གྱིས་ནི་འཚང་མི་རྒྱ། །འགྲོ་བ་ཐམས་ཅད་འདི་ལས་བྱུང་། །དེ་བས་ཁྱོད་ཀྱི་འདི་ཉིད་དང་། །ནམ་ཡང་འབྲལ་བར་མི་བྱ་སྟེ། །འདི་ནི་སངས་རྒྱས་ཐམས་ཅད་ཀྱི། །རིག་མའི་བརྟུལ་ཞུགས་བླ་ན་མེད། །བླུན་པོ་གང་ཞིག་འདི་སྤོང་བ། །དེ་ལ་མཆོག་གི་དངོས་གྲུབ་མེད། །དེ་ལྟར་གཏད་པའི་རིག་མ་དེས་
གྲོགས་ལ་དགའ་བའི་འཛུམ་གྱིས་བལྟས་ཏེ། ཁྱོད་ཀྱིས་ནུས་སམ་རྡོ་རྗེ་ཅན། །དྲི་ཆེན་དྲི་ཆུའི་བཟའ་བཏུང་དང་། །རཀྟ་ག་བུར་མྱང་བ་དང་། །བུད་མེད་རྣམས་ལ་རྟག་གུས་དང་། །བྷ་གར་འོ་བྱེད་མི་རྟོག་པར། །སྨྲོས་ཤིག་གྲོགས་པོ་བདེ་བ་ཅན། །དྲིས་པའི་བཏབ་པར་མོས་ལ་འདིའི་རྗེས་ཟློས། །ཁུ་ཁྲག་ལ་སོགས་ཟ་བ་དང་། །བུད་མེད་རྣམས་ལ་རྟག་གུས་ཤིང་། །བྷ་གའི་པདྨར་འོ་བགྱིད་དོ། །དེ་ནས་རིག་མ་དེ་ལུས་གཅེར་བུར་ཕྱུང་མེ་ཏོག་ཕྲེང་བ་མགོ་ལ་བཅིངས། བྷ་ག་ཕྱག་གིས་བསྟན་ནས། རྨད་བྱུང་གསང་པའི་པདྨ་འདི། །ཐམས་ཅད་བདེ་བར་ཡང་དག་ལྡན། །རྟག་ཏུ་འདི་བཞིན་འདི་སྤྱོད་ན། །དེ་ཉིད་བདེ་ཆེན་འབྲལ་མི་འགྱུར། །ཆོས་དབྱིངས་འདི་ནི་རྣམ་པར་དག །སེམས་ཅན་ཐམས་ཅད་རྣམ་པར་གྲོལ། །བདེ་ཆེན་རྒྱལ་པོ་འདི་ཉིད་ནི། །དངོས་པོ་ཀུན་གྱི་རང་བྱུང་གནས། །ནང་གི་རྩ་ཡི་འཁོར་ལོ་ལ། །པདྨ་ལ་ཞུགས་རབ་ཏུ་རྒྱས། །བྷ་གའི་མཁའ་དབྱིངས་ནམ་མཁའི་དགྱིངས། །འབྱུང་བ་བཞི་པོ་རྒྱན་བཞིན་བཀོད། །ལྟེ་བའི་ཟེའུ་འབྲུ་གེ་སར་ཟླུམ། །པདྨ་འདབ་མ་རྣམ་པར་མཛེས། །དེ་ཡི་དབུས་སུ་གནས་པ་ནི། །དེ་ཉིད་བདུད་རྩི་
བདེ་ཆེན་གཟུགས། །བྷཉྫ་མོཀྵ་ཧོཿཞེས་གསུངས་ཤིང་རིག་མའི་ལག་པ་གཡོན་སློབ་མའི་ལག་པ་གཡས་པར་གཏད་པར་སྒོམས་ཤིག །ཤེས་རབ་དམ་པ་འདི་ཡིས་ནི། །ཁྱོད་ཀྱི་ཡེ་ཤེས་སྐྱེད་བྱེད་པ། །འདི་དང་ཁྱོད་གཉིས་རྟག་ཏུ་ཡང་། །དད་པས་རྟག་ཏུ་འགྲོགས་པར་གྱིས། །འདི་ལ་རྟག་ཏུ་རོལ་མོ་གྱིས། །ཞེས་བརྗོད། དེ་ནི་ཤེས་རབ་ཡེ་ཤེས་ཀྱི་དབང་བསྐུར་བ་ཞེས་བརྗོད་དེ། བསྒོམ་ལམ་ས་བཅུའི་རྟོགས་པ་སྐྱེ་བའི་མཐུ་དང་ལྡན་པར་བྱས་པ་ཡིན་ནོ། །ཞེས་པ་རྣམས་སྔོན་ཏུ་འགྲོ་བའོ། །དངོས་གཞི་ནི། བྷ་གའི་དཀྱིལ་འཁོར་མ་མཐོང་བའི་བརྡར་གདོང་གཡོགས་འཆིང་། ཨོཾ་ཨཱཿཧཱུྃ། བདུད་རྩི་འཐོར་ལ་བསྲུང་། ཁྱེད་རང་རྣམས་དཔལ་ཡང་དག་སྦྱོར་བར་གསལ་བའི་གསང་གནས་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ནོར་བུར་ཨོཾ། ཕྱག་རྒྱ་ཀྲོ་དྷཱི་ཤྭ་རཱི་མར་གསལ་བའི་མཁའ་ཨ་ལས་པདྨ་ཨས་མཚན་པ། ཡབ་ཀྱི་རྡོ་རྗེ་ནོར་བུའི་རྩ་བར་རྩ་གསུམ་འདུས་པའི་རྩ་གཡས་ལ་ཨོཾ་དཀར་པོ། རྩ་གཡོན་ལ་ཨཱཿདམར་པོ། དབུས་སུ་ཧཱུྃ་མཐིང་ག །རྩི་མོར་ཕཊ་ཡིག་སེར་པོས་མཚན་པར་གསལ་ཐོབ་ལ། འཁྱུད་པ་དང་ཙུམྦ་དང་། གསང་གནས་སྦྱར་བས་འདོད་ཆགས་ཆེན་པོའི་
མེས་དྲོད་སྐྱེས་ཏེ་དྭངས་མ་བཞུ། གསང་གནས་མཉམ་པར་སྦྱར་བས་ཁམས་དྭངས་མ་ཐམས་ཅད་སྤྱི་བོ་ནས་རིམ་བཞིན་འཁོར་ལོ་བཞིར་བརྒྱུད་དེ་རྡོ་རྗེའི་རྩ་བར་ཕྱིན་པས་དགའ་བ། དབུས་སུ་ཕྱིན་པས་མཆོག་དགའ་བ། རྩ་གསུམ་འདོམས་པའི་དབུས་སུ་བྱོན་བས་ཁྱད་དགའ་བ། ནོར་བུའི་རྩེ་མོར་བྱོན་ཏེ་སྟེང་འོག་གི་རླུང་ཁ་སྦྱར་བས་མི་གཡོ་བར་གྱུར་ནས་བདེ་སྟོང་གི་ཡེ་ཤེས་སྐྱེས་པ་ལ་ལྷན་སྐྱེས་དེ་ཆེར་འཕེལ་བས་བྱང་སེམས་རྒྱས་ཏེ་ལྟེ་སྙིང་མགྲིན་སྤྱིར་ཕྱིན་ཏེ་བརྟན་པས། མས་བརྟན་གྱི་དགའ་བ་བཞི་སྐྱེས་པར་མོས་ལ་རང་ངོ་ངོས་བཟུང་པར་ཞུ། རྡོ་རྗེ་སྙིང་པོ་མཁའ་འདྲ་ཞིང་། །རྡུལ་བྲལ་ཐར་པ་ཞི་བའི་མཆོག །རང་གི་རང་བཞིན་དེ་ཉིད་དོ། །ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་མཐོང་བ་ཡིན་པས་གདོང་གཡོགས་བཀྲོལ། དེ་ལྟར་ཕྱག་རྒྱ་གཏད་དེ་བདེ་སྟོང་གི་ཡེ་ཤེས་སྐྱེས་པས་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ། ལམ་དཀྱིལ་འཁོར་འཁོར་ལོ་བསྒོམ་པ་ལ་དབང་། ལམ་ལྔ་ལས་རྒྱུའི་ཐེག་པའི་མཐར་ཕྱིན་ལམ་ཀུན་ཏུ་འོད་ཀྱི་རྟོག་པ་སྐྱེ་བའི་མཐུ་དང་ལྡན་པར་བྱས། དེས་ཡིད་ཀྱི་དྲི་མ་དག་སྟེ་ཆོས་སྐུ་འགྲུབ་
པའི་རྟེན་འབྲེལ་འགྲིག་གོ། །ཞེས་རྟོགས་པ་བརྗོད། བཞི་པ་ནི། ཚིག་དབང་རིན་པོ་ཆེ་ཞུ་བའི་ཡོན་ཏུ་མཎྜལ་འབུལ། གསོལ་བ་འདེབས་པ་འདིའི་རྗེས་ཟློས། ཁྱོད་ཞབས་པདྨོའི་བཀའ་དྲིན་གྱིས། །གཙོ་བོ་དབང་བསྐུར་རྣམ་གསུམ་ཐོབ། །དེ་རིང་རིན་ཆེན་བཞི་པ་ཡང་། །གཙོ་བོས་བདག་ལ་བཀའ་དྲིན་སྐྱོབས། །ལན་གསུམ། ཡེ་ཤེས་ཀྱི་དཀྱིལ་འཁོར་མ་མཐོང་བའི་བརྡར་གདོང་གཡོགས་འཆིང་། འབྲུ་གསུམ་བདུད་རྩིས་བསྲུངས་ལ། རྣལ་འབྱོར་བདེ་བ་ཐམས་ཅད་ཀྱི། །དབང་བསྐུར་བདེ་ཆེན་ལས་བྱུང་བ། །རིན་ཆེན་ཚོགས་རྣམས་ཐམས་ཅད་ཀྱིས། །རབ་ཏུ་མྱོས་པར་དབང་བསྐུར་འགྱུར། །ཇི་ལྟར་སྣང་བ་ཐམས་ཅད་ཀུན། །སྐད་ཅིག་གཅིག་ལ་དམིགས་མེད་པ། །བརྗོད་པའི་ཐ་སྙད་ཀུན་དང་བྲལ། །རང་བྱུང་ཡེ་ཤེས་ཞེས་བརྗོད་དོ། །ཞེས་པའི་རང་བྱུང་གི་ཡེ་ཤེས་གསལ་ལ་མི་རྟོག་པ་ཆོས་ཐམས་ཅད་ཀྱི་དེ་ཁོ་ན་ཉིད་རྟོག་པའི་ཏིང་ངེ་འཛིན་བཞི་པ་སྟེ་དེ་ལ་ཡུན་རིང་དུ་གོ་མས་པས་བརྟན་པའི་ནང་རྟགས་ལུས་འགུལ་བསྐྱོད། ངག་དབུགས་འགྱུ་བ་སེམས་ལ་བདེ་སྡུག་གང་གིས་ཀྱང་ཉོན་མི་མོངས་ཤིང་བདེ་བ་ཆེན་པོའི་ཡེ་ཤེས་ལས་མི་འགྱུར་བ་དང་། ཕྱི་རྟགས་སྣང་བ་ཐམས་ཅད་སྒྱུ་མ་ལྟ་བུར་ཤེས་ཤིང་མཚན་
འཛིན་དང་བྲལ་བ་འབྱུང་བས། དེ་ལ་འབད་དེ་གོམས་པར་གྱིས་ཤིག །ཅེས་བརྗོད། དངོས་གཞི་ཁྱེད་རང་རྣམས་ལུས་གནད་རྣམ་སྣང་ཆོས་བདུན་དང་ལྡན་པས་སྔར་གྱི་བདེ་སྟོང་གི་ཡེ་ཤེས་དྲན་པར་མཛོད་ལ། དེའི་ངང་ལ་མཉམ་པར་ཞོག་ཅིག །ཅེས་བརྗོད་ལ་མཉམ་པར་འཛེག་ཏུ་བཅུག །དེ་ལས་མི་རྟོག་པའི་ཡེ་ཤེས་སྐྱེས་པས་ན་ཁྱོད་ཀྱིས་བཞི་པའི་ཡེ་ཤེས་ཉམས་སུ་མྱོང་བས་དོན་དམ་བྱང་ཆུབ་སེམས་ཀྱི་དཀྱིལ་འཁོར་མཐོང་བ་ཡིན་པས་གདོང་གཡོགས་བཀྲོལ་མཛོད། ཁྱེད་རྣམས་ཀྱི་དབང་བཞི་པ་ཚིག་དབང་རིན་པོ་ཆེ་ཐོབ་པས་ལམ་རང་བྱུང་གི་ཡེ་ཤེས་ཕྱག་རྒྱ་ཆེན་པོ་བསྒོམ་ལ་དབང་ཞིང་ལམ་ལྔ་ལས། འབྲས་བུའི་ཐེག་པའི་མཐར་ཕྱིན་ལམ་བཅུ་གསུམ་རྡོ་རྗེ་འཛིན་པའི་ཐེག་པའི་རྟོགས་པ་སྐྱེ་བའི་མཐུ་དང་ལྡན་པར་བྱས་ལ། དེས་ལུས་ངག་ཡིད་གསུམ་གྱི་དྲི་མ་བག་ཆགས་དང་བཅས་པ་ཐམས་ཅད་དག་སྟེ་ངོ་བོ་ཉིད་སྐུ་འགྲུབ་པའི་རྟེན་འབྲེལ་འགྲིག་གོ། །ཞེས་བརྗོད་དོ། །གསུམ་པ་རྗེས་དམ་ཚིག་བསྒྲག་པ་སོགས་ནི། དེ་ལྟར་དཔལ་ཆེན་ཡང་དག་ཟླ་གམ་དགུ་པའི་དཀྱིལ་འཁོར་དུ་དབང་བཞི་མཐའ་རྟེན་དང་བཅས་པ་ལེགས་པར་བསྐུར་གྲུབ་ནས་དབང་སྲོག་དམ་ཚིག་གི་རིམ་པ་རྣམས་སྲོག་བཞིན་ཏུ་བསྲུང་དགོས་པས་བསྲུང་བྱ་
ངོ་ཤེས་པའི་སླད་དུ་ཐོག་མར་ཁྱད་པར་གྱི་དམ་ཚིག་བསྒྲགས་པ་འདི་ལ་སྙན་གཏོད་འཚལ། ཁྱོད་ཀྱིས་སྲོག་ཆགས་གསད་པར་བྱ། །མ་བྱིན་པ་ཡང་བླང་བར་བྱ། །འདོད་པས་ལོག་པར་གཡེམ་པར་བྱ། །རྫུན་གྱི་ཚིག་ཀྱང་སྨྲ་བར་འགྱུར། །རྡོ་རྗེ་བླ་མ་བྱང་ཆུབ་སེམས། །སྲོག་གི་ཕྱིར་ཡང་མི་གཏང་ཞིང་། །དྲན་པ་གསལ་བས་གཟུང་བྱས་ནས། །ལྷག་པའི་ལྷ་བཞིན་རིན་ཆེན་ཏོག །སྤྱི་ཡི་དམ་ཚིག་བསྒྲགས་པའང་འདི་ལ་གསན་པར་ཞུ། གང་ཕྱིར་རྡོ་རྗེ་འཛིན་པ་ཡིས། །དངོས་གྲུབ་སློབ་དཔོན་རྗེས་འབྲང་གསུངས། །དེ་བས་དེ་ལ་བརྙས་པ་ནི། །རྩ་བའི་ལྟུང་བ་དང་པོར་བཤད། །བདེ་གཤེགས་བཀའ་ལས་འདས་པ་ནི། །ལྟུང་བ་གཉིས་པ་ཡིན་པར་བཤད། །རྡོ་རྗེ་སྤུན་ལ་ཁྲོས་པ་ནི། །ཉེས་པར་བརྗོད་པ་གསུམ་པ་ཡིན། །སེམས་ཅན་རྣམས་ལ་བྱམས་པ་སྤོང་། །བཞི་པ་ཡིན་པར་རྒྱལ་བས་གསུངས། །ཆོས་ཀྱི་རྩ་བ་བྱང་ཆུབ་སེམས། །དེ་སྤོང་པ་ནི་ལྔ་པ་ཡིན། །རང་ངམ་གཞན་གྱི་གྲུབ་པའི་མཐའ། །ཆོས་ལ་སྨོད་པ་དྲུག་པ་ཡིན། །ཡོངས་སུ་མ་སྨིན་སེམས་ཅན་ལ། །གསང་བ་སྒྲོག་པ་བདུན་པ་ཡིན། །ཕུང་པོ་སངས་རྒྱས་ལྔ་བདག་ཉིད། །དེ་ལ་བརྙས་
བྱེད་བརྒྱད་པ་ཡིན། །རང་བཞིན་དག་པའི་ཆོས་རྣམས་ལ། །སོམ་ཉི་ཟ་བ་དགུ་པ་ཡིན། །གདུག་ལ་རྟག་ཏུ་བྱམས་ལྡན་པ། །བྱེད་པ་དེ་ནི་བཅུ་པར་འདོད། །མིང་སོགས་བྲལ་བའི་ཆོས་རྣམས་ལ། །དེ་རྟོག་པ་དེ་བཅུ་གཅིག་པ། །སེམས་ཅན་དད་དང་ལྡན་པ་ལ། །སེམས་སུན་འབྱིན་པ་བཅུ་གཉིས་པ། །དམ་ཚིག་ལས་ནི་ཇི་བཞིན་རྙེད། །མི་བསྟེན་པ་དེ་བཅུ་གསུམ་པ། །ཤེས་རབ་རང་བཞིན་བུད་མེད་ལ། །སྨོད་པར་བྱེད་པ་བཅུ་བཞི་པ། །སྔགས་པས་དེ་དག་སྤངས་ན་ནི། །དངོས་གྲུབ་མྱུར་དུ་འཐོབ་པར་འགྱུར། །གཞན་དུ་དམ་ཚིག་ལས་ཉམས་ན། །ཉམས་པ་བདུད་ཀྱིས་གཟུང་བར་འགྱུར། །དེ་བས་སྡུག་བསྔལ་མྱོང་འགྱུར་ཏེ། །མཐུར་དུ་བལྟས་ཏེ་དམྱལ་བར་འགྲོ། །དེ་བས་ང་རྒྱལ་ཀུན་བཅོམ་སྟེ། །བདག་ཉིད་མ་འཁྲུལ་ཤེས་པར་བྱ། །མཉམ་པར་གཞག་པའི་བླ་མ་ལ། །ཅི་འབྱོར་པ་ཡིས་མཆོད་པར་བྱ། །གསུམ་ལ་སྐྱབས་འགྲོ་ནས་བརྩམས་ཏེ། །བྱང་ཆུབ་སེམས་སོགས་སྡོམ་པ་ནི། །གལ་ཏེ་བདག་ལ་ཕན་འདོད་ན། །སྔགས་པས་འབད་དེ་གཟུང་བར་བྱ། །དམ་ཚིག་དང་ནི་མི་ལྡན་པའི། །རིག་མ་བསྟེན་པར་དགའ་བ་དང་། །ཚོགས་ཀྱི་འཁོར་ལོར་རྩོད་པ་
དང་། །གསང་བའི་ཆོས་ནི་སྟོན་པ་དང་། །སེམས་ཅན་དད་དང་ལྡན་པ་ལ། །དམ་ཆོས་གཞན་དུ་སྟོན་པ་དང་། །ཉན་ཐོས་དག་ཏུ་རློམ་བྱེད་པའི། །ནང་དུ་ཞག་བདུན་འདས་པ་དང་། །སྦྱོར་བ་ངེས་པར་མ་བྱས་པར། །སྐལ་མིན་གསང་བ་སྟོན་པ་དང་། །གང་ཞིག་ཕྱག་རྒྱ་མི་མཁས་ལ། །ལུས་ཀྱི་ཕྱག་རྒྱ་སྟོན་པ་དང་། །བསྙེན་སོགས་དག་པར་མ་བྱས་པར། །དཀྱིལ་འཁོར་ལས་ལ་འཇུག་པ་དང་། །སྡོམ་པ་གཉིས་ཀྱི་བཅས་པ་ལ། །དགོས་པ་མེད་པར་འདའ་བ་རྣམས། ཁ་ན་མ་ཐོ་བཅས་གྱུར་ཏེ། །སྔགས་པ་དེ་ཡི་དམ་ཚིག་ཟད། །ཟད་པས་འགྲུབ་པར་མི་འགྱུར་ཞིང་། །བདུད་དང་སྡུག་བསྔལ་མང་དུ་འཕེལ། །ཉིན་དང་མཚན་མོ་དུས་དྲུག་ཏུ། །ཉིན་རེ་བཞིན་ཡང་བཟླས་པར་བྱ། །གལ་ཏེ་ཉམས་གྱུར་རྣལ་འབྱོར་པ། ཁ་ན་མ་ཐོ་སྦོམ་པོར་འགྱུར། །ཞེས་གསུངས་ཏེ། དེ་དག་ཚུལ་བཞིན་ཏུ་བསྲུང་བར་བགྱིའོ་སྙམ་པས་འདིའི་རྗེས་ཟློས། གཙོ་བོས་ཇི་ལྟར་སོགས་ལན་གསུམ། དབང་བཞི་རྫོགས་པར་ཐོབ་པའི་གཏོང་རག་ཏུ་མཎྜལ་འབུལ། སླར་ཡང་ལུས་ལོངས་སྤྱོད་འབུལ་བའི་བློས། དེ་ང་ནས་བརྩམས་ཏེ་བདག་བྲན་དུ། །ཁྱོད་ལ་བདག་ནི་འབུལ་ལགས་ན། །ཁྱོད་ཀྱིས་སློབ་མར་
བཟུང་བ་དང་། །བདག་གི་ལུས་ཀྱང་བཞེས་སུ་གསོལ། །ཅེས་བརྗོད། སློབ་དཔོན་ཀྱིས་ཀྱང་། སློབ་མ་དམ་པ་དམ་ཚིག་ཆེ། །ཁྱོད་ཀྱིས་འབྱོར་ཚོགས་ཤིན་ཏུ་བཟང་། །དད་མོས་ཆེ་བས་དངོས་གྲུབ་ཐོབ། །དད་མོས་མེད་པས་མི་འགྲུབ་པོ། །ཞེས་བསྒོ། དགེ་བསྔོ་བརྗོད་ལ་སློབ་མནམས་ཀྱིས་སོ། །གསུམ་པ་དེ་དག་གི་རྗེས་ཀྱི་བྱ་བ་ནི། དབང་གི་རྗེས་བྱ་གོང་དུ་སོང་། ཆོ་གའི་རྗེས་ཀྱི་བྱ་བ་ནི། རས་བྲིས་ལ་བརྟེན་པའི་དབང་རྐྱང་ཙམ་གྱི་སྐབས་ཚོགས་ལ་རོལ་ཞིང་ལྷག་མའི་ཆོ་ག་ནས་བརྩམ། རས་བྲིས་ལ་བརྟན་བཞུགས་ཟིན་ནས་དཀྱིལ་འཁོར་བསྡུ། ཕུར་བུ་དབྱུང་ཞིང་། བཀྲ་ཤིས་ཀྱི་བར་མཐར་དབྱུང་བས་རྫོགས་པར་གྲུབ་པ་ཡིན་ལ། སྒྲུབ་མཆོད་ལྟ་བུའི་སྐབས་སུ། དངོས་གྲུབ་སྦྱིན་སྲེག་ལྷག་ཆོག་དང་། །བརྟན་སྐྱོང་མཆོད་གཏོར་ཐོ་འགྲོལ་ཞིང་། །མར་མེ་གཏོང་རག་བཟོད་པར་གསོལ། །དལ་བསྡུ་ཕུར་དབྱུང་ལུས་སྲུང་དང་། །སྨོན་ཤིས་བསྡམས་པས་བཅུ་གསུམ་མོ། །དེ་ལ་དང་པོ་ནི། དངོས་གྲུབ་ཀྱི་རྫས་བཀོད་ལ་སྒྲུབ་ཐབས་ལྟར་ཧཱུྃ་ཡེ་ཤེས་ལྷ་དང་སོགས་ཀྱིས་བླང་ངོ། །གཉིས་པ་ཕུར་དཀྱིལ་རྟོགས་པར་སླ་བའི་སྦྱིན་བསྲེག་ཉིད་ཁ་བསྒྱུར། གསུམ་པ་བཞི་པ་ནི་སྒྲུབ་ཐབས་ལྟར་ལ། ལྔ་པ་ཕྱི་རོལ་པའི་སྐབས་ལྟར་ཕྱོགས་སྐྱོང་ལ་གཏོར་མ་འབུལ། དྲུག་པ་ནི། སོ་སོར་མཆོད་གཏོར་བཤམས་པ་བྱིན་རླབས། མཆོད་པ་དང་གཏོར་མ་སྟ་གོན་སྐབས་ལྟར་སྔགས་ཀྱིས་འབུལ། བསྟོད་པའི་ཚིག །རྫུ་འཕྲུལ་ཆེ་ལ་སྟོབས་ཀྱང་ཆེ། །ཞེས་པའི་མཐར། སྒྲུབ་པའི་བར་ཆད་བསྲུངས་པ་ཡི། །སྔར་བཅོལ་ལེགས་པའི་
གཏང་རག་ཏུ། །མཆོད་སྦྱིན་གཏོར་མ་འདི་སྣོམས་ལ། །ཞེས་པ་ནས། དངོས་གྲུབ་མ་ལུས་སྩལ་དུ་གསོལ། །གྱི་བར་བརྗོད། མ་འབྱོར་པ་སོགས་ཀྱིས། བཟོད་པར་གསོལ། ཨོཾ་བཛྲ་མུཿས་ཡེ་ཤེས་པ་རང་བཞིན་གྱི་གནས་སུ་གཤེགས་པར་བསམ་ཞིང་ཙཀ་ལི་ཡོད་ན་བརྟན་བཞུགས་བྱས་ལ་ཐོ་བསྡུ་བ་ཕྱོགས་བཞི་ཀར་འགྲེའོ། །བདུན་པ་ནི། །དཔོན་སློབ་རྣམས་ཀྱིས་མར་མེ་ཐོགས་ལ་དཀྱིལ་འཁོར་གྱི་མཐའ་བསྐོར་ཏེ། ཧཱུྃ། དུར་ཁྲོད་གསང་བ་མཆོག་གི་དཀྱིལ་འཁོར་དུ། །འཕྲུལ་ཞལ་ཡིད་བཞིན་བྷནྡྷའི་རྫས་མཆོག་དང་། །མ་རིག་མུན་སེལ་མེ་མར་དགུ་པ་དང་། །ཟླ་གམ་དགུ་པ་གསང་བའི་གནས་འདི་རུ། །ངན་སོང་འཁོར་བ་རྣམས་ཀྱང་བསྒྲལ་ལགས་ལ། །དུས་གསུམ་རྒྱལ་བ་རྣམས་ཀྱང་མཆོད་ལགས་ལ། །དཔལ་ཆེན་ཧེ་རུ་ཀ་ཡང་བསྒྲུབ་ལགས་ལ། །མ་སྲིང་རྒྱ་མཚོ་རྣམས་ཀྱང་བསྒྲུབ་ལགས་ལ། དངོས་གྲུབ་དབྱིངས་མཆོག་རྣམས་ཀྱང་བླངས་ལགས་ལ། །མི་གནས་ཡེ་ཤེས་ཐུགས་ཀྱང་བསྒྲུབ་ལགས་ཀྱིས། །དང་པོ་གནས་དང་ཆོས་ཀྱི་དབྱིངས་སུ་གཤེགས། །མི་གནས་ཡེ་ཤེས་ཐུགས་ཀྱི་དཀྱིལ་འཁོར་དུ། །འགྱུར་བ་མེད་པ་ལྷུན་གྱིས་གྲུབ་པ་དང་། །རབ་འབྱམས་རྒྱལ་བའི་བཀའ་ལ་དབང་ཐོབ་ནས། །འགྲོ་བ་ཡོངས་ཀྱི་དཔལ་དུ་འགྱུར་པར་ཤོག །
འདི་ལྟ་བུ་ཡི་མན་ངག་ལུང་སྟོན་པའི། །བཀའ་དྲིན་ཆེ་བའི་དགེ་བའི་བཤེས་གཉེན་དང་། །སྲོག་གི་ལུ་གུ་རྒྱུད་ཀྱིས་འབྲེལ་པ་རྣམས། །འོག་མིན་ལྷུན་གྱིས་གྲུབ་པའི་གནས་མཆོག་ཏུ། །དུས་གསུམ་འདུ་འབྲལ་མེད་པར་འགྲོགས་པ་དང་། །གསང་བ་ཆེན་པོ་ཐུགས་ཀྱི་དཀྱིལ་འཁོར་དུ། །བླ་མེད་སྐུ་གསུང་ཐུགས་སུ་འགྲུབ་པར་ཤོག །ཅེས་སྨོན་ལམ་གདབ། བརྒྱད་པ་ནི་སྒྲུབ་ཐབས་ལྟར་མཆོད་པ་བྱིན་རླབས་དང་། མཆོད་བསྟོད་རྒྱས་བསྡུས་ཅི་འགྲུབ་བྱ། དགུ་པའང་སྒྲུབ་ཐབས་ལྟར་ལ། བཅུ་པ་རྡུལ་ཚོན་ཡིན་ན་གཤེགས་གསོལ་སྤྱི་ལྟར་བྱས་ཏེ་ཡེ་ཤེས་པ་དཀྱིལ་འཁོར་ནས་གཤེགས་ལ། སླར་ཐོང་སྐུ་སོགས་རྟེན་ལ་དམིགས་ཏེ་བརྟན་བཞུགས་བྱ། ཛཿཧཱུྃ་བྃ་ཧོཿ དམ་ཚིག་པ་རང་ལ་ཐིམ་པར་བསམ། སརྦ་ས་མ་ཡ་སོགས་ཀྱིས་གཏོར་མགྲོན་གྱི་དམ་ཅན་རྣམས་གཤེགས་པར་བསམ། རང་གཙོ་བོའི་ང་རྒྱལ་གྱིས་ལྷའི་མཚན་མ་དང་གདན་རྣམས་བསྡུ། དེ་ནས་ཚངས་ཐིག་ནས་བརྩམས་ཏེ་ལྟེ་བའི་བར་གྱི་རྡུལ་ཚོན་བསུབ་ཅིང་ཨ་ཀཱ་རོ་བཟླས་པས་དཀྱིལ་འཁོར་བསྡུས་ཏེ་རྡུལ་ཚོན་ཆུ་ཀླུང་དུ་བསྐྱལ། བཅུ་གཅིག་པ་ནི། ཧཱུྃ་མཛད་ཀྱི་ཕྱག་རྒྱ་དང་། སུམྦྷས་ཕུར་བུ་ཐམས་ཅད་བཏོན་ལ། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷི་ལོ་ཙ་ནེ་སརྦ་ཨ་ནྲ་སཱ་དྷ་ནི་སྭཱ་ཧཱ། ཞེས་བརྒྱ་རྩ་བརྒྱད་བཟླས་པའི་འོ་མས་ཕུར་བུ་བགེགས་ཀྱི་གཟུགས་བརྙན་ཡོད་ན་བཀྲུ། བུ་ག་ཡང་བཀང་ལ་མཉམ་པོར་བྱ། བཅུ་
གཉིས་པའང་ལས་བྱང་ལྟར་བྱས་ལ། སྒྲུབ་གྲོགས་མང་དུ་ཡོད་ན་ཕན་ཚུན་ནོངས་པ་བཤགས་པའི་སླད་དུ་ཡེ་ཤེས་སྐུ་མཆོག་ཚར་གཅིག་བརྗོད་དོ། །བཅུ་གསུམ་པ་སྨོན་ལམ་དང་ཤིས་བརྗོད་སྒྲུབ་ཐབས་ལྟར་རམ། མདོ་རྒྱུད་ནས་གསུངས་པའི་བྱིན་རླབས་ཅན། རྒྱས་བསྡུས་སྐབས་བྱེད་པར་བརྗོད་པས་མཐའ་རྒྱས་སུ་བྱའོ། །རྒྱུད་དོན་མཁའ་མཐར་ཆོད་པའི་བློ་མཐུ་དང་། །མན་ངག་གྲུབ་པའི་གདིང་ཆེན་ལྡན་མིན་ཀྱང་། །མོས་པ་ཁོ་ནས་ཚུལ་འདི་སྦྱར་བ་ལ། །ནོངས་པ་གང་མཆིས་རྡོ་རྗེ་ཅན་ལ་བཤགས། །ལུགས་འདིའི་རྩ་བ་ཙམ་ལས་མངོན་རྟོགས་རིམ། །མན་ངག་ལ་ལྟོས་དེ་ཡང་ཞིར་མནལ་བས། །ཕུར་པས་རྒྱས་བཀའ་ཁུངས་དང་བསྟུན་པ་ཡི། །ཧཱུྃ་མཛད་ཞལ་ལུང་ཉིད་ལས་དབང་པོར་བཅོལ། །རྒྱས་དྲགས་ལག་ཏུ་ལེན་པའི་སྐྱེ་བོ་དཀོན། །བསྡུས་ཀྱང་རང་བཟོར་མཐོང་ནས་ཕལ་ཆེར་བཀྱོན། །འབྲིང་པོའང་བློ་གྲོས་ཕུར་ཁུང་ཐུག་པ་ཡིས། །མཁས་རྣམས་མགུ་བསྐྱེད་པའི་ལེགས་བཤད་དབེན། །གཉིས་སྣང་འཁྲུལ་འཁོར་བདེ་བ་ཆེན་པོའི་དབྱིངས། རུ་ལུ་འབྲུ་བརྒྱད་དགོངས་པར་ལ་ཟློས་ཏེ། །སངས་རྒྱས་ཀུན་དང་མཉམ་པར་སྦྱོར་བ་ཡི། །མཁའ་འགྲོ་སྒྱུ་མ་བདེ་མཆོག་བདེ་ཐོབ་ཤོག །ཅེས་པའང་དཀྱིལ་འཁོར་ཀུན་གྱི་ཁྱབ་བདག་འཇམ་མགོན་ཐམས་ཅད་མཁྱེན་པ་མཁྱེན་བརྩེའི་དབང་པོའི་ཞལ་སྔ་ནས་ཟབ་ཆོས་འདིའི་སྨིན་གྲོལ་གྱི་བདུད་རྩི་སྐལ་པ་བཟང་པོའི་དབྱིད་དུ་བསྩལ་བའི་ཚེབཀའ་ལུང་གི་རྗེས་སུ་གནང་བ་སྙིང་གི་དཔལ་པེའུར་བཅངས་ཏེ། པདྨའི་རྗེས་འཇུག་པདྨ་གར་དབང་བློ་གྲོས་མཐའ་ཡས་པའི་སྡེས་རང་མཉམ་ལ་ཕན་པའི་བསམ་པས་ཉུང་གསལ་གཙོ་བོར་བཏོན། མཁོན་ལུགས་དང་སོ་ལུག་གི་ཡིག་ཆ་སྔ་མ་ཕན་ཚུན་དོན་གྱི་འགལ་བའི་བརྗོད་པ་བདེ་བ་རྣམས་ལྟོ་སྦྱར་ཏེ་དཔལ་སྤུངས་ཡང་ཁྲོད་ཙཱ་འདྲ་རིན་ཆེན་བྲག་ཧེ་རུ་ཀའི་འདུ་ཡང་དུ་སྦྱར་བ་དགེ་ལེགས་འཕེལ།