རྡོ་རྗེ་ཕུར་པའི་སྒྲུབ་སྐོར།
རྡོ་རྗེ་ཕུར་པའི་སྒྲུབ་སྐོར་བཞུགས་སོ།། །།མཁོན་ལུགས་ཀྱི་རྩ་བའི་ཡི་གེ།
ཨོཾ་སྭ་སྟི་སིདྡྷཾ། །བླ་མ་དང་དཔལ་རྡོ་རྗེ་གཞོན་ནུ་ལ་ཕྱག་འཚལ་ལོ། །ཕུར་པ་རྩ་བའི་རྒྱུད་ལས་དུམ་བུའི་རྒྱུད་འདི་ཕྱུང་ནས། ཨོ་རྒྱན་གྱི་སློབ་དཔོན་པདྨ་འབྱུང་གནས་ཀྱིས་མཛད་པའི་ཆོ་ག་འདི་ལ་དོན་གསུམ་སྟེ། རྒྱས་པ་དང་བསྡུས་པའོ། །དེ་ལ་ཡང་བསྙེན་པ་དང་། བསྙེན་སྒྲུབ་སྦྲགས་མ་གཉིས་ལས། བསྙེན་སྒྲུབ་སྦྲགས་མའི་ཚུལ་འདི་བརྗོད་པར་བྱ་སྟེ། དེ་ལ་གསུམ། སྔོན་འགྲོ་དང་དངོས་གཞི་དང་། རྗེས་ཀྱི་བྱ་བའོ། །དང་པོ་ལ་གསུམ། རྫས་བསོག་པ་དང་། མཚམས་བཅད་པ་དང་། བཤགས་པ་བྱ་ཞིང་བྱིན་གྱིས་བརླབས་པའོ། །དེ་ལ་དང་པོ་གནས་བརྒྱན་ཏེ། རྟེན་བཀྲམ་ལ་ཅི་འབྱོར་པའི་མཆོད་པ་དང་། གཏོར་མ་མདུན། རཀྟ་གཡས། ཕུད་གཡོན། བསྙེན་ཕུར་མདུན་རྗེའུ་ཆུང་དང་དྲིལ་བུ་གང་བདེར་བཤམ་མོ། །མཚམས་བཅད་པ་ནི། ཁྲོ་བོ་བཅུའི་སྔགས་ཀྱིས་སྲུང་འཁོར་བརྟན་པར་བསྒོམས་ལ་མཚམས་
རྒྱས་བསྡུས་གང་རུང་བ་བཅད་དོ། །གསུམ་པ་ནི་ཤེས་པའི་བཤགས་པ་དང་། མཆོད་པ་དང་། སྡིག་པ་བཤགས་པ་དང་། སྐྱབས་སུ་འགྲོ་བ། སེམས་བསྐྱེད་པ། དགེ་བའི་རྩ་བ་བསྔོ་བ། བྱིན་དབབ་པ་དང་། །རྫས་བྱིན་གྱིས་བརླབ་པ་ནི། གཏོར་མ་ཨོཾ་ལྔ་ལས་འདོད་ཡོན་ལྔར་བྱིན་གྱིས་བརླབ་བོ། །ཕུད་ཨོཾ་ཨཱཿཧཱུྃ་ཏྲཱཾ་ཧྲཱིཿཨཱ་ལས་ཤ་ལྔ་བདུད་རྩི་ལྔ་ལས་བྱུང་བའི་ཡེ་ཤེས་ཀྱི་བདུད་རྩི་དང་། རཀྟ་རཾ་ལས་དགྲ་བགེགས་བསྒྲལ་བའི་ཤ་ཁྲག་ལས་བྱུང་བའི་བདུད་རྩིར་བྱིན་གྱིས་བརླབ། རྔ་དང་དྲིལ་བུ་ལ་སོགས་པ་སྟོང་པ་ཉིད་ཀྱི་ངོ་བོ་བྱང་ཆུབ་ཀྱི་སེམས་སུ་བྱིན་གྱིས་བརླབ་བོ། །ཕུར་པ་རྡོ་རྗེ་གཞོན་ནུའི་ལུས་ལ་ཁྲོ་བོ་བཅུས་བརྒྱན་པར་བྱིན་གྱིས་བརླབས་པ་སྔོན་དུ་འགྲོ་བའོ། །དངོས་གཞི་ལ་གསུམ། ཏིང་ངེ་འཛིན་གསུམ། དཀྱིལ་འཁོར་གསུམ། མཆོད་པ་གསུམ་མོ། །དང་པོ་ལ་གསུམ་ལས། དང་པོ་རྡོ་
རྗེ་ཞེས་པས་སྟོང་པ་ཉིད་དུ་བསྒོམ་པ་ནི་དེ་བཞིན་ཉིད་ཀྱི་ཏིང་ངེ་འཛིན་ནོ། །ཁྲོས་པས་ཞེ་སྡང་གཅོད་ཀྱིས་སྙིང་རྗེ་ཆེན་པོར་བསྒོམ་པ་ཀུན་ཏུ་སྣང་བའི་ཏིང་ངེ་འཛིན་ཏོ། །ནམ་མཁའ་སྟོང་པ་ལ་ཧཱུྃ་བསྒོམ་པ་རྒྱུའི་ཏིང་ངེ་འཛིན་ནོ། །དཀྱིལ་འཁོར་གསུམ་ནི། དང་པོ་ནི་མཚོན་ཆེན་སྔོན་པོ་ཞེས་པས་ཧཱུྃ་དེ་ལས་འབྱུང་བ་རིམ་བརྩེགས་དང་བཅས་པའི་གཞལ་ཡས་ཁང་པ་བསྐྱེད་པ་བསྟན་ནོ། །ནམ་མཁའི་དཀྱིལ་དུ་ཐིག་ལེ་ཤར། །ཞེས་པ་ནས། རྒྱུ་ཡི་ཏིང་ངེ་འཛིན་ནི་ཧཱུྃ་དེ་གཞལ་ཡས་ཁང་གི་ནང་དུ་ལབ་པ་ལས་གཙོ་བོ་བསྐྱེད་པ་མན་ཆད་ཀྱིས་རྡོ་རྗེ་གཞོན་ནུ་རྩ་བའི་དཀྱིལ་འཁོར་སེམས་དཔའ་སུམ་བརྩེགས་སུ་བསྒོམ་པ་ནི། སྙིང་གི་སྒོ་རུ་ཤར་བ་དང་། ཞེས་པ་ལ་སོགས་པས་བསྟན་ཏེ། དམ་ཚིག་པ་བསྐྱེད་པའོ། །དེ་ནས་འགྲོ་བའི་རྒྱུད་སྦྱངས་ནས་ཡེ་ཤེས་སེམས་དཔའ་འགུག་པ་ནི། རྡོ་རྗེ་གཞོན་ནུའི་རིག་འཛིན་རྣམས། །ཞེས་པ་ལ་སོགས་པས་བསྟན་ནོ། །བརྟན་པའི་ཡན་ལག་ཏུ་དབང་བསྐུར་བ་ནི། །ཐབས་ཀྱི་སྤྱོད་པས་འགྲོ་བའི་དོན། །ཞེས་པ་ལ་སོགས་པས་བསྟན་ནོ། །དེ་ནས་གཉིས་པ་ཕྱོགས་བཅུ་ཁྲོ་བོའི་དཀྱིལ་འཁོར་ནི། །སྔགས་རེ་བརྗོད་པས་དྲག་པོའི་ལྷ་བརྫུས་སྐྱེས་སུ་བྱུང་སྟེ། ཨོཾ་བཛྲ་ཀྲོ་དྷ་ཧཱུྃ་ཀ་ར་ཞེས་པས་ཡབ། ཧཱུྃ་ཞེས་པས་ཡུམ་གརྫ་གརྫ་གཉིས་ཀྱིས་ཕྲ་མེན། ཧཱུྃ་ཕཊ་ཀྱིས་དེ་རྣམས་བསྐུལ་ཏེ། དེ་བཞིན་དུ་ཐམས་ཅད་བསྐྱེད་པར་བྱའོ། །ཁྲོ་བོའི་དཀྱིལ་འཁོར་རོ། །ཞར་ལ་དམ་ཅན་དང་བརྟན་མ་དང་ཆོས་སྐྱོང་རྣམས་སྤྲིན་འཐིབས་པ་ལྟར་བསྒོམ་མོ། །ཕུར་པ་རྫས་ཀྱི་དཀྱིལ་འཁོར་ནི་བྱིན་རླབས་བྱས་པའི་ཕུར་པ་ལག་
ཏུ་བླངས་ལ། །དེ་བཞིན་གཤེགས་པ་ཐམས་ཅད་ཀྱིས་དབང་དང་མཐུ་རྩལ་དང་བྱིན་གྱི་རླབས་ཀྱིས་དབང་བསྐུར་བར་བསམ་ཞིང་། མགོའི་ཕྱོགས་བཞི་སྤྱི་གཙུག་ལྔ་དང་། སྐུ་གསུང་ཐུགས་ཀྱི་གནས་སུ་གཏུགས་ཤིང་རྩ་སྔགས་བཟླས་པ་དང་། སྲིད་པའི་ཕུར་བུ་སྒྲུབ་པ་དང་། ཞེས་པ་ལ་སོགས་པ་བརྗོད་དེ། །དེ་ནི་དངོས་གཞི་དཀྱིལ་འཁོར་གསུམ་མོ། གསུམ་པ་མཆོད་པ་གསུམ་ནི། བདུད་རྩི་གཏོར་མ་རཀྟ་དང་དེ་ལ་དམིགས་ཏེ། དམ་ཚིག་ཆེན་པོའི་དུས་ལ་བབ། །ཅེས་པ་ལ་སོགས་པས་མདུན་དུ་བདག་འདྲ་བའི་ཡིད་ཀྱིས་དཀྱིལ་འཁོར་གཅིག་ཞལ་ཕྱེལ་བདག་བསྐྱེད་མདུན་བསྐྱེད་གཉིས་ཀ་ལ་བདུད་རྩིས་མཆོད་ལ་ཕོ་ཉ་བསྐུལ་བ་སྤྱིར་བསྟན་ནོ། །དེ་ནས་རཀྟའི་མཆོད་པ་ནི། བསྒྲལ་བའི་མཆོད་པ་ཡིན་ཏེ། བྱང་ཆུབ་མཆོག་ཏུ་སེམས་བསྐྱེད་ཅེས་པ་ལ་སོགས་པས་བསྐུལ་ཏེ་དགྲ་བགེགས་ཏིང་ངེ་འཛིན་གྱིས་བཀུག་ལ། ཨོཾ་ལཾ་ཧཱུྃ་ལཾ་ལ་སོགས་ཀྱིས་བཏབ་ལ་བསྒྲལ་ཏེ་རཀྟས་མཆོད། དངོས་གྲུབ་བར་ཆད་བྱེད་པའི་བགེགས། །ཞེས་པས་བསྐུལ། ཧཱུྃ་པ་ར་བིདྱ་ལ་སོགས་ཀྱིས་བསྒྲལ་བའི་ཤས་མཆོད། །ཕོ་ཉ་བྲན་དང་བཀའ་ཉན་ཞེས་པ་ལ་སོགས་ཀྱིས་བསྐུལ་ཏེ། ཧ་ན་ཧ་ན་བཛྲ་ལ་སོགས་ཀྱིས་བསྒྲལ་ལ། རྡོ་རྗེ་གསང་བའི་བཀའ་ལ་སོགས་པས་བསྐུལ། ཧཱུྃ་མ་མ་བ་ཤཱཾ་ལ་སོགས་པ་དང་། འོག་གི་སརྦ་ཨ་ན་ཡ་སོགས་སྦྲེལ་ཏེ་དེ་ལ་སོགས་པས་བསྒྲལ་ལ་ཀླད་པས་
མཆོད་དེ། གདུག་ཅིང་སྡང་སེམས་ལྡན་པ་ཞེས་པ་ལ་སོགས་པ་དང་། རྡུངས་ཤིག་རྡོ་རྗེ་འབར་བའི་གཏུན། །ལ་སོགས་པས་བསྐུལ་ལ། ཁ་ཏཾ་ནས་ཕཊ་གསུམ་ཡན་ཆད་ཀྱིས་གཏུན་དུ་དགྲ་བགེགས་བརྡུངས་པས་བསྒྲལ་ལ། རུས་པའི་མཆོད་པས་མཆོད། རཀྟའི་མཆོད་པ་དེ་རྣམས་ཐམས་ཅད་ལ་དངོས་སུ་གཏོར་མའི་དཔལ་གྱི་སྟེང་དུ་རཀྟ་སྦྲེང་ཞིང་མཆོད་པར་བྱའོ། །ཤ་དང་ཀླད་པ་རུས་པའི་མཆོད་པ་ཡང་། དངོས་སུ་རཀྟ་སྦྲེངས་པས་རཀྟའི་མཆོད་པ་བྱའོ། །དོན་གྱིས་བསྒྲལ་བའི་མཆོད་པ་ཞེས་བྱའོ། །དེ་ནས་གཏོར་མ་འདོད་ཡོན་ལྔར་བྱིན་གྱིས་བརླབས་པས་དེས་མཆོད་ལ། ཨོཾ་བཛྲ་ཡཀྵ་ཀྲོ་དྷ་ཁ་ཁ་ཁཱ་ཧི་ཁཱ་ཧི། ཞེས་མཆོད། དེས་ལྷ་ཐམས་ཅད་དགྱེས་ནས་ཧ་ཧ་ཧ་ཞེས་གསུངས་པར་བསམ། ཧཱུྃ་ཧཱུྃ་ཧཱུྃ་ཞེས་གསུངས་ནས་བདག་ལ་བྱིན་གྱིས་རློབ་པར་བསམ། ཕཊ་ཕཊ་ཕཊ་ཅེས་པས་དགྲ་བགེགས་བསྒྲལ་བར་བསམ། དེ་ཆོས་ཉིད་དུ་གནས་སྤར་བར་བསམ་མོ། །ཆོས་ཉིད་ཀྱི་བདེན་པ་མན་ཆད་ནི་གདབ་པ་བསྐྱར་བའི་གཞུང་ངོ། །དེ་ནས་བསྟོད་པས་བསྟོད་ལ་བཟླས་པ་བྱ་སྟེ། བདག་དང་མདུན་ན་མོ་གཉིས་ཀའི་འོད་འཕྲོ་འདུ་དང་བཟླས་རོག་བྱེད་པ་ལྷ་དང་མཆོད་པ་དང་དགྲ་བགེགས་བསྒྲལ་བའི་ཏིང་ངེ་འཛིན་བྱའོ། །མཇུག་གི་ཆོས་གསུམ་ནི་གདབ་པ་དང་། ཚོགས་དང་ལས་འཇུག་གོ། །དང་པོ་གདབ་པ་ནི་ཤོག་བུ་ལ་ཁྲག་དང་དུག་གིས་དགྲ་བགེགས་ཀྱི་
ལིངྒ་རྒྱས་པར་བྲིས་ལ། དེ་ལ་དགུག་གཞུག་མང་དུ་བྱས་ལ་བྲུབ་ཁུང་དུ་བཅུག་ལ་ལག་པས་ཕུར་བུ་ཐོགས་ལ། དམ་ཚིག་ཆེན་པོའི་དུས་ལ་བབ། །མན་ཆད་བསྒྲལ་བའི་མཆོད་པ་བཞིན་བྱས་ཏེ། ཚིགས་བཅད་བརྗོད་པའི་དུས་སུ་ཕོ་ཉ་དགྱེ་ཞིང་དགུག་གཞུག་བྱ། སྔགས་བརྗོད་པའི་དུས་སུ་ཕུར་བུས་གདབ་སྟེ། ཁྲག་དང་ཤ་དང་ཀླད་པ་དང་རུས་པའི་མཆོད་པས་མཆོད་དེ། དེ་ནས་བག་ཟན་དང་དགྲའི་རྐང་རྗེས་ཀྱི་ས་ལ་སོགས་པ་ལས་བྱས་པའི་ལིངྒ་སྔར་བཞིན་གྱི་ཆོ་ག་བྱས་ལ་དུམ་བུར་གཏུབ་ལ་གཏོར་མ་ལ་འབུལ་ལོ། །དེས་ཀྱང་མ་སྒྲོལ་ལ་མ་རྟོགས་ན། །ཕུར་པ་ལག་ཏུ་བླངས་ལ་ཆོས་ཀྱི་བདེན་པའོ་མན་ཆད་བརྗོད་ཅིང་། ཀཱི་ལ་ཡ་ལན་ཉི་ཤུ་རྩ་གཅིག་བརྗོད་ཅིང་སྙིང་དཀར་ནག་གི་མཚམས་སུ་ཕུར་པ་བཏབ་པར་བསམ་ལ། ལིང་གའི་སྙིང་གར་ཕུར་བུ་གདབ་བོ། །རྣམ་ཤེས་མི་བསྐྱོད་པའི་ཞིང་དུ་སྐྱེ་བར་བསམ་མོ། །དེ་དག་གི་བྱིན་རླབས་ཀྱིས་བདག་ཚེ་ལ་དབང་བའི་རིག་འཛིན་དུ་གྱུར་པར་བསམ་མོ། །དེ་ནས་ཚོགས་ནི་ཡང་སྔ་མ་བཞིན་དུ་བྱས་ལ་དགྲ་བགེགས་བསྒྲལ་བའི་རོ་དེ་འདོད་ཡོན་ལྔར་སྦྲུལ་ལ་བྱིན་གྱིས་བརླབས་ཏེ། ཨོཾ་བཛྲ་ཡཀྵ་ཀྲོ་དྷ་ཁ་ཁ་ཁཱ་ཧི་ཁཱ་ཧི། ཞེས་པས་ལྷ་ལ་འབུལ། ཧ་ཧ་ཧ་ཞེས་པས་བཞད། ཧཱུྃ་ཧཱུྃ་ཧཱུྃ་གིས་བདག་ལ་དངོས་གྲུབ་སྩོལ། ཕཊ་ཕཊ་ཕཊ་ཀྱིས་དགྲ་བགེགས་བསྒྲལ་བ་ཆོས་ཉིད་དུ་གནས་པར་བསམས་
ལ་ཚོགས་ལ་རོལ་ཏེ་ལྷག་མ་བསྡུས་ལ་ཁ་ཕྲུས་བཏབ་ལ། ཕུད་ཀྱི་གཏོར་མ་དང་བསྲེས་ནས་ལས་བྱེད་པའི་ཆོས་སྐྱོང་རྣམས་ལ་བྱིན་པར་བསམ། གོང་གི་བྲན་དང་བཀའ་ཉན་ཞེས་པའི་ཚིགས་བཅད་གཅིག་བརྗོད་པའི་སྐབས་ལ། ཨོཾ་ཨུཙྪིཥྚ་བ་ལི༚་ཏ་བྷཀྵ་སི་སྭཱ་ཧཱ། ཞེས་བརྗོད་པས་ཆས་ཐམས་ཅད་བདག་མེད་པར་བསྒོམ་མོ། །ལས་མཇུག་ནི་མནན་པ་དང་། སྦྱིན་སྲེག་བྱ། གཏོར་མ་ཟོར་དུ་འཕང་ངོ་། །མནན་པ་ནི་ལིང་གས་གཉན་པོ་ལ་སྦས་སོ། །རྡོ་རྗེ་མེ་དཔལ་ཞེས་པས་སྦྱིན་སྲེག་གི་ཏིང་ངེ་འཛིན་ཏེ། ལས་དང་མཐུན་པའི་ཐབ་ཏུ་རྡོ་རྗེ་གཞོན་ནུ་བསྐྱེད་ལ། ལས་སོ་སོའི་རྫས་སམ་དགྲ་བགེགས་ཞལ་དུ་ཕུལ་བར་བསམ་ཞིང་། ལིང་རོ་དང་ལྕགས་ཕྱེ་ཟངས་ཕྱེ་སྐེ་ཚེ་ཡུངས་ཀར་ཡུངས་དམར་ནག །མར་ནག་དང་ཁྲག་ལ་སོགས་པ་བསྙེན་སྔགས་ཀྱི་ཤམ་དུ་གནོད་བྱེད་མཱ་ར་ཡ་ཕཊ། ཅེས་པ་བཏགས་པའམ་ལས་སོ་སོའི་ཤམ་བུ་གདགས་ཤིང་བསམ་པ་དེས་དབུལ་ལོ། །འདོད་པའི་དོན་ལ་གསོལ་བ་གདབ། བཟོད་པར་གསོལ་ཏེ་ལྷ་མི་དམིགས་པར་བྱའོ། །གཏོར་མའི་ཟོར་ནི་སྒོ་དྲུང་དུ་ཁྱེར་ལ། བརྟན་མ་དགུག་པ་དང་ཟིལ་གྱིས་མནན། གཏོར་མ་སྦྱིན། ལས་གཞོལ། གཤེགས་སུ་གསོལ་བའི་ཏིང་ངེ་འཛིན་རྣམས་ཞེས་སོ། །དེ་ནས་དགྲ་བགེགས་ཀྱི་རྣམ་ཤེས་མར་མེ་འདྲ་བ་ལ། གཏོར་མ་དུག་ཐུན་ཕོག་པས་དགྲ་བགེགས་ཀྱི་རྣམ་ཤེས་མར་མེ་ལྟ་བུ་
བསད་ཅིང་བསྒྲལ་ལོ། །རླུང་ཕྱོགས་སུ་འགྲོ་བ་དང་བསྟུན་ལ་གཏོར་མ་འཕང་། ཟོར་ལམ་ན་དགྲ་བགེགས་གཞན་ཡོད་དུ་དོགས་ན་ལམ་ཕྱེ། བཟུང་ཅིག་ཅེས་བརྗོད་པར་བྱའོ། །བསྙེན་པ་རྐྱང་པ་བྱེད་ན་བཟླས་པ་ཡན་ཆད་ཀྱིས་གཏུབ། དུས་ཀྱི་ཚོགས་ལྟ་བུ་བྱེད་ན་གཞུང་བཞིན་དུ་རྫོགས་པར་བྱེད་དེ། འོན་ཀྱང་གདབ་དང་། མནན་པ་དང་། སྦྱིན་སྲེག་མི་བྱེད། སྤྲོས་པ་ལ་དགའ་ན་གདབ་པར་བྱ། མནན་བསྲེག་མི་བྱ། བསྙེན་པ་འབུམ་ཕྲག་བཅུ་དྲུག་སོང་ནས་མནན་བསྲེག་བྱའོ། །དཀྱིལ་འཁོར་བྲིས། སྒྲུབ་པ་བྱེད་པའི་ལུགས་འདི་མི་བརྗོད་དེ། ལས་འདི་ཉིད་ཀྱིས་འགྲུབ་ཅེས་གསུངས་སོ། །གཏོར་མ་བཏང་ནས་ཡར་ལོག་པ་དང་། ཆོས་བདག་མེད་པར་བསྒོམ་པ་དང་། སྔགས་བཟླས་པས་བསྲུང་། ནང་དུ་ཆང་ལ་སོགས་པ་ལོངས་སྤྱད། ལས་བཞིའི་བྲོ་དང་། གླུ་གར་དང་། བཀྲ་ཤིས་ཀྱི་ཚིག་མང་དུ་བརྗོད། ཤིན་ཏུ་བསྡུས་པའི་བསྙེན་སྒྲུབ་ཀྱི་ཡིག་ཆུང་འདི་ནི། བླ་མ་གོང་མ་རྣམས་ཀྱི་གསུང་དང་ཕྱག་ལེན་ཇི་ལྟར་མཛད་པ་ལྟར་དོན་བསྡུས་ཏེ། དགེ་བསྙེན་གྲགས་པ་རྒྱལ་མཚན་གྱིས་དཔལ་ས་སྐྱའི་དགོན་པར་བྲིས་པ་རྫོགས་སོ།། ༈ །།མཆོད་གཏོར་བསྡུས་པ་བཞུགས། བླ་མ་དང་དཔལ་རྡོ་རྗེ་གཞོན་ནུ་ལ་ཕྱག་འཚལ་ལོ། །རྡོ་རྗེ་ཕུར་པའི་མཆོད་གཏོར་བསྡུས་པ་བྱེད་པར་འདོད་པས། ཤ་ཁྲག་ཕུད་དང་བཅས་པའི་གཏོར་མ་དཔལ་དང་
བཅས་ལ་ཅི་འབྱོར་བཤམས་ལ་བདག་གི་རྣལ་འབྱོར་རྫོགས་པར་བསྒོམས་ཏེ། གཏོར་མ་ཨོཾ་ཨཱཿཧཱུྃ་ངམ། ཨོཾ་བ་ལི༚་ཏ་ཏེ་ཛོ་བ་ལི༚་ཏ་བ་ལ་ཏེ་གུ་ཧྱ་ས་མ་ཡེ་སྭཱ་ཧཱ། ཞེས་པ་དང་། ཨོཾ་ལྔ་ལས་འདོད་ཡོན་ལྔར་བྱིན་གྱིས་བརླབ་བོ། །ཨོཾ་ཨཱཿཧཱུྃ་ཏྲཱཾ་ཧྲཱིཿཨཱཿལས་བྱང་བའི་ཕུད་ཤ་ལྔ་བདུད་རྩི་ལྔ་ལས་བྱུང་བའི་ཡེ་ཤེས་ཀྱི་བདུད་རྩི་དང་རཀྟ་རཾ་ལས་དགྲ་བགེགས་བསྒྲལ་བའི་ཤ་ཁྲག་ཏུ་བྱིན་གྱིས་བརླབ་བོ། །དེ་ནས་མདུན་དུ་དབང་ཕྱུག་ཕོ་མོའི་སྟེང་དུ་ཧཱུྃ་ལས་རྡོ་རྗེ་རྩེ་ལྔ་པ་ཧཱུྃ་གིས་མཚན་པའི་མཐའ་མར་ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ། ཅེས་པའི་འོད་ཀྱི་འཕྲོ་འདུ་ལས་བྱུང་བའི་བཅོམ་ལྡན་འདས་རྡོ་རྗེ་གཞོན་ནུ་སྐུ་མདོག་སྔོན་པོ་ཞལ་གསུམ་ཕྱག་དྲུག་པ་གཡས་དཀར་གཡོན་དམར། གཡས་དང་པོ་རྡོ་རྗེ་རྩེ་དགུ་པ། བར་པ་རྡོ་རྗེ་རྩེ་ལྔ་པ། གཡོན་དང་པོ་མེ་དཔུང་། བར་པ་ཁ་ཊྭཱཾ་ག །འོག་མ་གཉིས་ཕུར་པ་འདྲིལ་བ། སྐུ་ཆེ་ཞིང་རགས་པ། མཆེ་བ་གཙིགས་ཤིང་སྤྱན་གསུམ་དམར་བ། དབུ་སྐྲ་གྱེན་དུ་བརྫེས་པ། གླང་པོ་ཆེའི་ཀོ་རློན་དང་། ཞིང་ཆེན་གྱི་གཡང་གཞི་གསོལ་བ། སྟག་གི་པགས་པའི་ཤམ་ཐབས་ཅན། སྦྲུལ་གྱིས་བརྒྱན་པ། ཐོད་པ་ཁྲག་འཛག་པས་དོ་ཤལ་བྱས་པ། སྐམ་པོ་ལྔ་ལྔས་དབུ་བརྒྱན་པ། རཀྟའི་ཐིག་ལེ་ཞག་གི་ཟོ་རིས་ཐལ་ཆེན་གྱི་ཚོམ་བུས་བརྒྱན་པ། ཞི་བའི་ཆ་ལུགས་རྫོགས་པའི་བརྡར་རིན་པོ་ཆེས་བརྒྱན་པའོ། །དེ་ནས་རང་གི་ཕུང་པོ་ཁམས་དང་སྐྱེ་མཆེད་དང་སྐྲ་དང་བ་སྤུའི་བུ་ག་ཐམས་ཅད་ཁྲོ་བོས་
གཏམས་པར་བསམ་མོ། །དང་འདྲ་བ་དེའི་ཐུགས་ཀར་ཉི་མའི་སྟེང་དུ་ཡེ་ཤེས་སེམས་དཔའ་རང་ལྟ་བུ་མཚོན་གང་བ་གཅིག་བསམ། དེའི་ཐུགས་ཀར་ཟླ་བ་ལ་ཧཱུྃ་ལས་རྡོ་རྗེ་ཡུངས་འབྲུ་ཙམ་གྱི་ལྟེ་བ་ལ་ཧཱུྃ་ཆུང་ངུ་གཅིག་བསམ་པ་ཏིང་ངེ་འཛིན་སེམས་དཔའོ། །དེ་ལ་ལྷ་ཐམས་ཅད་ཐིམ་པར་བསམས་ནས་དབང་བསྐུར། རིགས་ཀྱི་བདག་པོ་རྡོ་རྗེ་སེམས་དཔས་དབུར་བརྒྱན་པ་དེ་དཀྱིལ་འཁོར་ཐམས་ཅད་ཀྱི་བདག་ཉིད་དམ་ངོ་བོར་བསམ་པའི་ལྗགས་ལས་འོད་ཟེར་གྱི་སྦུ་གུས་གཏོར་མ་གསོལ་བར་བསམ་ཞིང་། དབུལ་བ་ནི། བླ་མེད་མཆོག་གི་མཆོད་པ་དམ་པར་སྦྱར་བ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོས། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །ཐུགས་དམ་བཞིན་དུ་ཅི་བདེར་བཞེས་སུ་གསོལ། །ཞེས་པས་འདོད་ཡོན་ལྔ་ཕུལ་ལ། ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་ཨི་དཾ་དྷཱུ་པཾ་པུཥྤཾ་དཱི་པཾ་གནྡྷཾ་བ་ལི༚་ཏ་པྲ་ཏིཙྪ་ཧོ་ཤྲི་བནྡྷ་ཁཱ་ཧི། ཞེས་པས་དབུལ་ཡང་ཨོཾ་བཛྲ་ཡཀྵ་ཀྲོ་དྷ་ཁ་ཁ་ཁཱ་ཧི་ཁཱ་ཧི། ཞེས་པས་ཀྱང་མཆོད་དེ་ལྷ་ཐམས་ཅད་དགྱེས་ནས་ཧ་ཧ་ཧ་ཞེས་གསུངས་པར་བསམ། ཧཱུྃ་ཧཱུྃ་ཧཱུྃ་ཞེས་གསུངས་ནས་བདག་ལ་བྱིན་གྱིས་བརླབས། ཕཊ་ཕཊ་ཕཊ་ཅེས་པས་དགྲ་བགེགས་ཐམས་ཅད་བསྒྲལ་བར་བསམས་ལ་ཆོས་ཀྱི་དབྱིངས་སུ་སངས་རྒྱས་པར་བསྒོམ་མོ། །དེ་ནས་སྦྱོར་སྒྲོལ་གྱི་མཆོད་པ་ནི། ཐོག་མར་བདག་ཉིད་རྟོག་བསྒོམ་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་
མེད་པར་བསྒྲལ་བར་བྱ། །ཞེས་པ་དང་། ཐབས་དང་ཤེས་རབ་བམ། །ཟག་པ་མེད་པའི་མཆོད་པ་ནི། །འཁྲིལ་བའི་མཆོད་ཆེན་མཉམ་སྦྱོར་བའི། །ཐབས་དང་ཤེས་རབ་གཉིས་མེད་པ། །པདྨོ་ལ་ནི་རྡོ་རྗེ་ཞུགས། །བདག་ཉིད་མཆོད་པས་མཉེས་པར་བྱའོ། །ས་མ་ཡ་ཧོཿས་མ་ཡ་སྟྭཾ། ར་གོ་ཡཾ་ཨ་ནུ་ར་ག་ཡ་མི། བོ་དྷི་ཙི་ཏ་ཞེས་པ་དང་། གཉིས་སུ་མེད་པའི་མཆོད་པ་དངོས་ནི། །མཉམ་པའི་སྒྲུབ་རྫས་ཆེན་པོ་དགོད། །བདག་དང་མཉམ་པའི་ཚོགས་ལ་འབུལ། །བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ནི་དཀྱིལ་འཁོར་ཐིམ། །ཨ་ལ་ལ་ཏེ་དཀྱིལ་འཁོར་ཐིམ། །ཞེས་པ་དང་། ཛཿཧཱུྃ་བྃ་ཧོཿཞེས་བརྗོད་ལ། །བྱང་སེམས་མཁའ་ནས་བླངས་ལྷ་ཐམས་ཅད་ཀྱི་ལྗགས་ལ་བཞག་པར་མོས་ཏེ། ཤྲཱི་ཧེ་རུ་ཀ་མ་ཧཱ་བཛྲ་ཨཱ་བེ་ཤ་ཡ། པྲ་བེ་ཤ་ཡ་པྲ་བེ་ཤ་ཡ། པྲ་ཏཱི་ཙྪ་ཧོཿ ཤྲཱི་བནྡྷ་ཁ་ཧི། དེ་ནས་རཀྟ་དབུལ་བ་ནི། །ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་འཁོར་བཅས་སྤྱན་དྲངས་ནས། །དུར་ཁྲོད་མཆོག་གི་གནས་འདི་རུ། །ཞིང་ཆེན་གསར་རྙིང་ཏི་རར་བཅས། །དམར་གྱི་ཨརྒྷཾ་རྒྱ་མཚོར་བསྐྱིལ། །མཁའ་འགྲོ་འབར་བའི་ཚོགས་བཅས་རྣམས། །མ་ལུས་གཤེགས་ནས་བསྣམས་སུ་གསོལ། །ཛཿཧཱུྃ་བཾ་ཧོཿ ཤྲཱི་ཧེ་རུ་ཀ་མ་ཧཱ་བཛྲ་ས་མ་ཡ་མུ་ཏྲ་ཁ་ཁ་ཁཱ་ཧི་ཁཱ་ཧི་ཧྲཱིཿ དེ་བི་ས་ཧཱུྃ་ཕཊ། ཅེས་པ་དང་། ཁམས་གསུམ་ཡོངས་སུ་བསྒྲལ་
བའི་མཆོད་པ་ནི། །ཧཱུྃ་ང་ནི་ཟ་བྱེད་ཆེན་པོ་སྟེ། ཁམས་གསུམ་མ་ལུས་བསྒྲལ་བར་བྱ། །གདུལ་དཀའ་མ་ལུས་འདུལ་བའི་ཕྱིར། །ཤ་རུས་ལ་སོགས་བཟའ་བར་བྱ། །ང་ནི་ཁྲག་འཐུང་ཆེན་པོ་སྟེ། །དམར་ཆེན་པོ་ཡི་རྒྱ་མཚོར་བསྐྱིལ། །འཁོར་བའི་དྲ་བ་གཅད་པའི་ཕྱིར། །འཁོར་གྱི་ཕྲ་མེན་ཚོགས་རྣམས་ཀྱིས། །མ་ལུས་གཤེགས་ནས་བསྣམས་སུ་གསོལ། །ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་མཾ་ས་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་ཙིཏྟ་ཁཱ་ཧི། མ་ཧཱ་བ་སུ་ཏ་ཁཱ་ཧི། མ་ཧཱ་ཨ་མྲྀ་ཏ་ཁཱ་ཧི། ཞེས་པས་མཆོད་ལ། བསྟོད་པ་ནི། སྒེག་པ་དཔའ་བ་འཇིགས་སུ་རུང་བ་དང་། ཞེས་པ་ལ་སོགས་པས་བསྟོད་དོ། །དེ་ནས་དངོས་གྲུབ་བླངས། བར་ཆད་ཞི་བར་གསོལ་བ་གདབ། ཡེ་ཤེས་པ་དང་བཅས་པ་བདག་ལ་བསྡུས་ཏེ་བརྟན་པར་བྱའོ། །འདི་ལས་ཀྱང་བསྡུས་པ་བྱེད་ན། བདག་བསྐྱེད་བསྒོམས་ནས། གཏོར་མ་ཡི་གེ་གསུམ་གྱིས་བྱིན་གྱིས་བརླབས། མདུན་དུ་ཡང་སྔ་མ་ལྟར་བསྐྱེད་ནས། ལྷ་ཐམས་ཅད་ཀྱི་ངོ་བོར་བསམ་པ་ནས་བླ་མེད་མཆོག་ཚིག་རྣམས་དང་། ཆོས་ཉིད་དུ་སྤར་བའི་བར་དུའོ། །དེ་ནས་མཆོད་པ་རྣམས་དང་བསྟོད་པ་བྱའོ། །འདོད་པའི་དོན་ལ་གསོལ་བ་གདབ། དགེ་བའི་རྩ་བ་རྣམས་སངས་རྒྱས་སུ་བསྔོ། མདུན་བསྐྱེད་བདག་ལ་བསྡུ། བསྲུང་བར་བྱའོ། །རྗེ་བླ་མའི་གསུང་བཞིན་བྲིས་པ་རྫོགས་སོ། །བཟླས་པའི་ཚུལ་གསུམ་ལས་ཨོཾ་བཛྲ་ཀཱི་
ལི་ཀཱི་ལ་ཡ་ཧཱུྃ་ཕཊ། སྡིག་སྦྱོང་དུ་སྔགས་བཟླས་པའོ། །ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ། ཆོས་ཉིད་སྐྱེ་མེད་དུ་བཟླས་པའོ། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བི།།།ན་བཾ་ཧཱུྃ་ཕཊ། དགྲ་བགེགས་ཚར་བཅད་པར་བཟླས་པའོ། །རྒྱུན་གྱི་མན་ངག་ཇོ་མོའི་གདམས་ངག་རྫོགས་སོ། །སྙན་བརྒྱུད་ཡི་གེར་བྲིས་པ་རྡོ་རྗེ་ཕུར་པའི་སྦགས་ཕྲ་མེན་ཉིན་ཞག་གཅིག་གིས་བསྲུང་བ། ཞི་རྒྱས་དབང་མངོན་སྤྱོད་ཀྱི་བསྲུང་བ་ལ། རང་རྡོ་རྗེ་གཞོན་ནུར་གསལ་བའི་ཕུར་པ་ཨོཾ་ཨཱཿཧཱུྃ་གསུམ་དུ་བྱས་པས་ཕུར་པའི་སྐུ་གསུང་ཐུགས་ལ་ཐིམ་པས་ཕུར་པ་དེ་སྟོད་ཁྲོ་བོ་སྔོན་པོ་ཞལ་གཅིག་ཕྱག་གཉིས་པས་ཕུར་པ་འཛིན་པ་སྨད་ཕུར་པའི་དཔལ་དར་སྔོན་པོའི་ཤམ་ཐབས་ཅན་དུ་བསམ་མཆུ་བཙུགས་ལ་བཛྲ་ཀཱི་ལི་ཀཱི་ལ་ཡ་སརྦ་དུཥྚ་ན་ཧཱུྃ་ཕཊ་བརྒྱ་རྩ་བརྒྱད་བཟླས་སོ། །འགྲོ་ན་ལུས་ལ་བཅང་། ཉལ་ན་སྔས་སུ་གཟུག་པར་བྱའོ། །རྦོད་གཏོང་དང་དགྲ་བགེགས་ལ་སོགས་པའི་སྦྱོར་བ་ངན་པ་བྱེད་པ་མི་ཚུགས་སོ། །སློབ་དཔོན་པདྨས་རྣལ་འབྱོར་པའི་བར་ཆད་བསྲུང་བའི་དོན་དུ་མཛད་པ་རྫོགས་སོ། །རྡོ་རྗེ་ཕུར་པ་གདོན་དྲག་པོ་འདུལ་བྱེད་ཅེས་ཀྱང་བྱ། གཟས་པ་པོ་ཁ་འཆིང་བ་ཞེས་ཀྱང་བྱ། བཟླས་པ་ཁྲི་བྱས་ན་འགྲུབ་པར་འགྱུར། ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་གནོད་བྱེད་སརྦ་བིགྷྣཱན་བཛྲ་ཨཾ་ཀུ་ཤ་ཛཿཛཿཨ་བརྟ་ཡ། དྷ་རོ་ཨ་ཛྙིད་བཛྲ་ཨ་སེ་ཥ་ཨོཾ་བཛྲ་ཨ་སེ་ཥ་ཧཱུྃ་ཨ། སྙིང་ཁྲག་ཀུ་ལུ་ནན། བཾ་ཙིཏྟ་གནོད་
བྱེད་སོགས་མཱ་ར་ཡ་ཧཱུྃ་རྦད། ཁ་ཁ་ཧ་ཧ་ཧཱུྃ་ཧཱུྃ་ཕཊ། སྔས་སུ་གྲུ་གསུམ་མཐོ་གང་བ་བྱས་ལ་གནོད་པའི་མིང་བྱང་བཅུག་ལ་ཁྲག་དང་ཡུངས་ཀར་གྱི་ཐུན་བྱ། ཕུར་པ་བརྡེག །རྡོ་རྗེ་ཕུར་པའི་ལྷ་ཚོགས་ལ་བཅོལ་བསྐུལ་བྱ། ཞག་བདུན་གྱིས་གདོན་དྲག་པོ་རྣམས་འཇོམས། ཚེར་མ་ཅན་གྱི་མེ་ལ་བསྲེག །ཐལ་བ་གནོད་པའི་ཕྱོགས་སུ་འཕངས་ལམ་དུ་མནན་པ་བྱ། ཕུར་པའི་གདོན་འདུལ་རྫོགས་སོ། །ན་མོ་གུ་རུ། རྡོ་རྗེ་གཞོན་ནུ་རྒྱན་གྱི་གདམས་ངག་སངས་རྒྱས་ལག་བཅངས་ཀྱི་དགོངས་པ། སྤྱི་གཙུག་ཏུ་ཧཱུྃ་སྔོན་པོ་གཅིག་བསམ། འོད་ཟེར་འཕྲོས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། དུས་གསུམ་གྱི་སངས་རྒྱས་ཐམས་ཅད་མཆོད། ཚུར་འདུས་རང་གི་སྡིག་སྒྲིབ་སྦྱངས་།།།པར་བསམ་དེ་བཞིན་ཉིད་ཀྱི་ཏིང་ངེ་འཛིན་ཆུའི་ཟླ་བ་ལྟར་གསལ་ལ་རང་བཞིན་མེད་པ་ཀུན་ཏུ་སྣང་བའི་ཏིང་ངེ་འཛིན། ཧཱུྃ་སྔོན་པོ་རྒྱུའི་ཏིང་ངེ་འཛིན་དེ་གྱུར་པ་ལས་རྡོ་རྗེ་གཞོན་ནུ་ཞལ་གསུམ་ཕྱག་དྲུག་པ་ཞབས་བཞི་པ་དུར་ཁྲོད་ཀྱི་ཆས་བརྒྱད་ཀྱིས་བརྒྱན་པར་བསྒོམ། དེའི་ཐུགས་ཀར་ཡེ་ཤེས་སེམས་དཔའ་ཚོན་གང་བ་བདག་འདྲ་བ་གཅིག་བསྒོམ། དེའི་ཐུགས་ཀར་རྡོ་རྗེ་རྩེ་དགུ་པ་གཅིག་བསྒོམ། དེའི་ལྟེ་བར་ཉི་མའི་དཀྱིལ་འཁོར་སྲན་མ་ཕྱེད་བཀས་པ་ཙམ་གཅིག་བསྒོམ། དེ་ལ་ཧཱུྃ་སྤུ་ཤད་ལྟ་བུ་བསམས་ལ། ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ། །ཅེས་པས་འབྲུ་དགུ་གསེར་གྱི་བ་ཐག་ལྟ་
བུས་བསྐོར་བ་ལ། སྔགས་ཀྱི་འོད་ཟེར་ཏིང་ངེ་འཛིན་སེམས་དཔའ་གསལ། དེས་ཡེ་ཤེས་སེམས་དཔའ་གསལ། དེས་དམ་ཚིག་སེམས་དཔའ་གསལ། དེས་སྡིག་པ་ཐམས་ཅད་དག་པར་བསམ་ཞིང་བཟླས། སྟོང་ལ་སོགས་པ་ཅི་ནུས་བཟླས་སོ། །ཚུར་འདུས་བདག་ལ་ཐིམ། །བདག་ཡེ་ཤེས་སེམས་དཔའ་ལ་ཐིམ། དེ་ཏིང་ངེ་འཛིན་སེམས་དཔའ་ལ་ཐིམ། དེ་ཧཱུྃ་ལ། དེ་ཧ་ལ། དེ་མགོ་ལ། དེ་ཟླ་ཚེས་ལ། དེ་ཐིག་ལེ་ལ། དེ་ནཱ་ད་ལ། དེ་སྟོང་པ་འོད་གསལ་ཅིར་ཡང་མ་གྲུབ་པ་ལ་སེམས་བཞག་ལ་བསྒོམ་བཟླས་བྱས་པས་སྡིག་པ་ཐམས་ཅད་བྱང་བར་ཆད་གདོན་ཞི་ཞིང་ནད་དང་རིམས་ཐམས་ཅད་རྐྱེན་གློ་བུར་ཀུན་བཟློག་གོ། །ཚེ་འདི་ལ་རིག་འཛིན་གྱི་གྲལ་དུ་འགྲོ། ཕྱི་མ་རྡོ་རྗེ་གཞོན་ནུར་བདག་འགྱུར་རོ། །སློབ་དཔོན་པདྨས་མཁར་ཆེན་བཟའ་མཚོ་རྒྱལ་ལ་འབྲལ་ཁར་གདམས་པའོ། །སྣོད་དང་མི་ལྡན་པ་ལ་མི་སྦྱིན་ནོ། །རྫོགས་སོ། །