རྡོ་རྗེ་ཕུར་པ་འཁོན་ལུགས་ཀྱི་བརྒྱུད་པའི་གསོལ་འདེབས་བཻ་ཌཱུརྱའི་ཕྲེང་མཛེས།
རྡོ་རྗེ་ཕུར་པ་འཁོན་ལུགས་ཀྱི་བརྒྱུད་པའི་གསོལ་འདེབས་བཻ་ཌཱུརྱའི་ཕྲེང་མཛེས་ཞེས་བྱ་བ་བཞུགས་སོ།། ༈ །།ཁྱབ་བདག་གདོད་མའི་མགོན་པོ་ཀུན་ཏུ་བཟང་། །དཀྱིལ་འཁོར་རྒྱ་མཚོའི་གསང་འཛིན་རྡོ་རྗེ་སེམས། །རྒྱལ་ཀུན་སྤྱི་གཟུགས་པདྨ་ཐོད་ཕྲེང་ལ། །གསོལ་བ་འདེབས་སོ་དབང་དང་དངོས་གྲུབ་སྩོལ། །ཀླུ་དབང་སྲུང་བ་རྡོ་རྗེ་རིན་ཆེན་དང་། །ཤེས་རབ་ཡོན་ཏན་ཚུལ་ཁྲིམས་རྒྱལ་པོའི་ཞབས། །རྡོ་རྗེ་གཙུག་ཏོར་དགེ་སྐྱབས་དགེ་མཐོང་ལ། །གསོལ་བ་འདེབས་སོ་དབང་དང་དངོས་གྲུབ་སྩོལ། །ཤཱཀ་བློ་ཤེས་རབ་ཚུལ་ཁྲིམས་དཀོན་མཆོག་རྒྱལ། །ས་ཆེན་ཀུན་སྙིང་རྗེ་བཙུན་བསོད་ནམས་རྩེ། །གྲགས་པ་རྒྱལ་མཚན་ས་སྐྱ་པ་ཆེན་ལ། །གསོལ་བ་འདེབས་སོ་དབང་དང་དངོས་གྲུབ་སྩོལ། །ཆོས་རྒྱལ་འཕགས་པ་འོད་ལྡན་ཀུན་རྡོར་ཞབས། །ལེགས་པའི་བློ་གྲོས་ཀུན་བསོད་རིན་རྒྱལ་མཚན། །དཔལ་ལྡན་བླ་མ་བླ་ཆེན་ཀུན་རྒྱལ་ལ། །གསོལ་བ་འདེབས་སོ་དབང་དང་དངོས་གྲུབ་སྩོལ། །ཐེག་ཆེན་ཆོས་རྗེ་ནམ་རྒྱལ་རྒྱ་གར་བ། །ས་ལོ་འཇམ་རྡོར་སྔགས་འཆང་ཀུན་རིན་རྗེ། །བསོད་ནམས་དབང་པོ་གྲགས་པ་བློ་གྲོས་ལ། །གསོལ་བ་འདེབས་སོ་དབང་དང་དངོས་གྲུབ་སྩོལ། །ཀུན་དགའ་བསོད་ནམས་པུཎྱེ་ཤྭ་ར་དང་། །ཀུན་དགའ་བཀྲ་ཤིས་བསོད་ནམས་རིན་ཆེན་ཞབས། །ཀུན་དགའ་བློ་གྲོས་དཔལ་ལྡན་ཆོས་སྐྱོང་ལ། །གསོལ་
བ་འདེབས་སོ་དབང་དང་དངོས་གྲུབ་སྩོལ། །ཀུན་དགའ་རིན་ཆེན་འཇམ་དབྱངས་མཁྱེན་བརྩེའི་དབང་། །སྨིན་གྲོལ་མཛོད་འཛིན་རྩ་བའི་བླ་མ་སྟེ། །སྟོད་ལས་མཆོག་སྒྲུབ་དབང་བཞིའི་བརྒྱུད་པ་ལ། །གསོལ་བ་འདེབས་སོ་དབང་དང་དངོས་གྲུབ་སྩོལ། །ཡོངས་རྫོགས་བསྟན་འཛིན་བསོད་ནམས་རྒྱལ་མཚན་ཞབས། །ཤེས་རབ་རྡོ་རྗེ་ཐུགས་རྗེ་ཤེས་རབ་དང་། །དྷརྨཱ་ཀཱིརྟི་ནམ་མཁའི་སྙིང་པོ་ལ། །གསོལ་བ་འདེབས་སོ་མངོན་སྤྱོད་མཐར་ཕྱིན་ཤོག །ཤེས་རབ་རྒྱལ་མཚན་ཀུན་དགའ་བསོད་ནམས་མཆོག །ངག་དབང་ཆོས་གྲགས་སྔགས་འཆང་ཆེན་པོ་དང་། །བསོད་ནམས་དབང་པོ་ཀུན་དགའ་དོན་གྲུབ་ལ། །གསོལ་བ་འདེབས་སོ་མངོན་སྤྱོད་མཐར་ཕྱིན་ཤོག །ཀུན་བསོད་བསོད་ནམས་དབང་ཕྱུག་ཀུན་བཀྲས་རྗེ། །ཀུན་མཆོག་རྒྱལ་པོ་བསོད་ནམས་རིན་ཆེན་སོགས། །སྨད་ལས་དྲག་པོ་སྒྲོལ་དབང་བརྒྱུད་པ་ལ། །གསོལ་བ་འདེབས་སོ་མངོན་སྤྱོད་མཐར་ཕྱིན་ཤོག །དཔལ་ལྡན་ཚུལ་ཁྲིམས་ངོར་ཆེན་ཡབ་སྲས་དང་། །མ་ཏི་པ་ཆེན་རྡོ་རྗེ་གདན་པ་སོགས། །དབང་ལུང་སྲོལ་འཛིན་ངོ་མཚར་བརྒྱུད་པ་ལ། །གསོལ་བ་འདེབས་སོ་ཕྲིན་ལས་ལྷུན་གྲུབ་ཤོག །རྣམ་གསུམ་བརྒྱུད་པའི་ཆུ་བོ་མ་ལུས་པ། །གཅིག་བསྡུས་གསང་བའི་རྒྱ་མཚོ་རིན་ཆེན་མཛོད། །སྒྲོལ་བའི་མགོན་པོ་བརྒྱུད་པར་བཅས་པ་ལ། །
གསོལ་བ་འདེབས་སོ་བདུད་ལས་རྣམ་རྒྱལ་ཤོག །རྣམ་གསུམ་ཏིང་ངེ་འཛིན་ལ་ལེགས་གནས་ནས། །དཀྱིལ་འཁོར་གསུམ་བསྒོམ་མཆོད་པ་གསུམ་གྱིས་མཆོད། །དྲི་མ་གསུམ་སྦྱང་སྐུ་གསུམ་མངོན་གྱུར་ཏེ། །མཆོག་སྒྲུབ་ལམ་ནས་དོན་གཉིས་མཐར་ཕྱིན་ཤོག །རྫོང་འཕྲང་སྲོག་གི་གནས་ལ་བྱང་ཆུབ་ཅིང་། །གསལ་བ་གསུམ་དང་གདེངས་གསུམ་གོམས་པ་ཡིས། །མཚན་མའི་དགྲ་བགེགས་བདག་ཏུ་འཛིན་བཅས་པ། །ཐལ་འབྱིན་དགོངས་པས་མངོན་སྤྱོད་མཐར་ཕྱིན་ཤོག །རྩ་བརྒྱུད་བླ་མས་རྟག་ཏུ་བྱིན་རློབ་ཅིང་། །ལྷག་པའི་ལྷ་ཡིས་གྲུབ་གཉིས་མྱུར་དུ་སྩལ། །མཁའ་འགྲོ་དམ་ཅན་ཕྲིན་ལས་སྒྲུབ་མཛད་ནས། །ཀཱི་ལ་ཡ་ཡི་དངོས་གྲུབ་མྱུར་ཐོབ་ཤོག །ཅེས་པ་འདིའང་ཀཱི་ལ་ཡ་ཡི་ལྷ་དགོངས་ལ་མོས་པ་ལམ་དུ་བྱེད་པ་པདྨ་གར་དབང་བདེ་བའི་རྡོ་རྗེས། རྗེ་བཙུན་སྒྲོལ་བའི་མགོན་པོས་བདུད་བཞི་མཐའ་དག་བཅོམ་ནས་འོད་གསལ་མཁའ་ཁྱབ་ལ་མངོན་བྱང་ཆུབ་པའི་དུས་ཆེན་དབོ་ཟླའི་དམར་ཕྱོགས་ཀྱི་རྒྱལ་བ་གསུམ་པར་དཔལ་སྤུངས་ཡང་ཁྲོད་དུ་བྲིས་པ་དགེ་ལེགས་འཕེལ།། །།