དཔལ་ཆེན་རྡོ་རྗེ་ཕུར་པའི་ཚེ་འགུགས་ཀྱི་ཕྲིན་ལས་དྭངས་མ་བཅུད་བསྡུས།
དཔལ་ཆེན་རྡོ་རྗེ་ཕུར་པའི་ཚེ་འགུགས་ཀྱི་ཕྲིན་ལས་དྭངས་མ་བཅུད་བསྡུས་ཞེས་བྱ་བ་བཞུགས་སོ། །
དབང་བཅུ་དབང་དུ་མཛད་པའི་དཔལ། །བླ་མ་བཛྲ་ཀུ་མཱ་རར། །བཏུད་ནས་ཚེ་ཡི་བཅུད་འགུགས་པ། །སྤྲོས་ལ་དགའ་བའི་འདོད་འཇོར་བྲི། །འདིའི་བཅའ་གཞི་སྒྲུབ་པའི་དལ་གྱི་ནུབ་ཕྱོགས་སུ་བུམ་པ་མགུལ་ཆིངས་དམར་པོ་ཁ་རྒྱན་དང་བཅས་པ། བདུད་རྩི་ཨ་མྲྀ་ཏས་བཀང་ཞིང་མར་གྱི་རིལ་བུ་མི་གྲངས་བླུགས་པ། འབྲུ་ཟན་སྤོད་སྦྱར་ཆང་གིས་སྤྲུས་པའི་ཚེ་འབྲང་མདའ་དར་ཚེ་རིལ་སོགས་སྤྱི་ལྟར་བཤམ། །བདག་གི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་དཔལ་ཆེན་གཙོ་འཁོར་ཚེའི་བདག་པོའི་ངོ་བོར་བཞུགས་པའི་ཐུགས་རྒྱུད་བསྐུལ་ཏེ་སྔགས་སྒྲ་དིར་དིར་སྒྲོག་ཅིང་འོད་ཟེར་དམར་པོ་ལྕགས་ཀྱུའི་དབྱིབས་ཅན་འཁོར་འདས་ཁྱབ་པར་འཕྲོས། རང་གི་བླ་ཚེ་འཁྱམས་པ་ཡར་བ་བརྐུས་པ་འཕྲོག་པ་ལ་སོགས་པ་ཐམས་ཅད་དང་། བརྟན་གཡོ་སྣོད་བཅུད་ཀྱི་དྭངས་མ། རྩ་གསུམ་རྒྱལ་བ་སྲས་དང་བཅས་པའི་ཚེའི་བྱིན་རླབས་ཐམས་ཅད་བསྡུས་ཏེ་བདག་དང་སྒྲུབ་རྫས་རྣམས་ལ་སིབ་སིབ་ཐིམ་པར་མོས་ལ་སྔགས་འདི་བཟླའོ། །ཨོཾ་བཛྲ་ཀཱི་ལི་ཀཱི་ལ་ཡ། ཛཿཧཱུྃ་བཾ་ཧོཿ
ཨཱ་ཡུ་ཛྙཱན་ཨཱརྴ་ཡ་ཛཿརུ་ལུ་རུ་ལུ་ཧཱུྃ་བྷྱོ་ཧཱུྃ༔ཨོཾ་ཨཱཿཧཱུྃཿབརྒྱ་སྟོང་ལ་སོགས་པའི་མཐར་མདའ་རར་གཡབ་ཅིང་འདི་སྐད་དོ། །ཧཱུྃ། དབུས་ནས་རང་བྱུང་གྲུབ་པའི་ལྷཿ དཔལ་ཆེན་རྡོ་རྗེ་ཁྲག་འཐུང་དང་༔ ཁྲོ་མོ་རྡོ་རྗེ་དབྱིངས་ཕྱུག་མཿ མཐིང་ནག་མི་འགྱུར་ནམ་མཁའི་མདོག༔ ཞལ་གཅིག་ཕྱག་གཉིས་ཁྲོ་བོའི་སྐུ༔ རྡོ་རྗེ་གདུག་པ་འདུལ་མཛོད་ཅིང་༔ བཻ་ཌཱུརྻ་ཡི་བུམ་པ་གཡོན༔ ནང་དུ་འཆི་མེད་བདུད་རྩིས་བཀང་༔ བཀྲ་ཤིས་དར་གྱི་མགུལ་བཅིངས་ཞིང་༔ དཔག་བསམ་ལྗོན་པས་ཁ་རྒྱན་ནས༔ སྟོང་དཔྱལ་བདེ་བའི་སྦྱོར་བ་ལས༔ བྱང་སེམས་མུ་ཏིག་ཁུ་འཕངས་འབེབས༔ རྡོ་རྗེ་ཁྲག་འཐུང་དཔག་མེད་ཀྱིས༔ སྟོང་གསུམ་སྟོང་གི་འཇིག་རྟེན་བཀང་༔ ཞལ་ནས་ཚེ་ཡི་སྔགས་བཟླས་ཤིང་༔ ལྷ་ཀླུ་གནོད་སྦྱིན་གཤིན་རྗེ་དང་༔ མཁའ་འགྲོའི་ལག་ནས་ཚེ་ཁུག་ཅིག༔ དྲོངས་ཤིག་དྲོངས་ཤིག་ཚེ་དྲོངས་ཤིག༔ ཚེ་བུམ་འདི་ལ་བྱིན་གྱིས་བརློབས༔ རིག་འཛིན་བསྒྲུབ་པའི་ཚེ་སྤེལ་
ཅིག༔ སྐུ་གསུང་ཐུགས་ཀྱི་ཚེའི་དངོས་གྲུབ་སྩོལ༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཧཱུྃ༔ ཕྱོགས་བཞིར་རང་བྱུང་གྲུབ་པའི་ལྷ༔ དཔལ་ཆེན་བདེ་གཤེགས་རིན་ཆེན་དང་༔ པདྨ་ལས་ཀྱི་ཁྲག་འཐུང་རྣམས༔ ཁྲོ་མོ་དབྱིངས་ཕྱུག་རིགས་བཞིར་འཁྲིལ༔ དཀར་སེར་དམར་ལྗང་ལས་བཞིའི་མདོག༔ གཡས་པས་རང་རྟགས་ཕྱག་རྒྱ་བསྣམས༔ རང་མདོག་ཚེ་ཡི་བུམ་པ་གཡོན༔ ནང་དུ་འཆི་མེད་བདུད་རྩིས་བཀང་༔ བཀྲ་ཤིས་དར་གྱིས་མགུལ་བཅིངས་ཤིང་༔ དཔག་བསམ་ལྗོན་པས་ཁ་བརྒྱན་ནས༔ སྟོང་དཔྱལ་བདེ་བའི་སྦྱོར་བ་ལས༔ བྱང་སེམས་མུ་ཏིག་ཁུ་འཕངས་འབེབས༔ རིགས་བཞི་ཁྲག་འཐུང་དཔག་མེད་ཀྱིས༔ མན་གོང་གིས་འགྲེས་སོ། །ཧཱུྃ༔ དབུས་ནས་རང་བྱུང་གྲུབ་པའི་ལྷ༔ དཔལ་ཆེན་རྡོ་རྗེ་གཞོན་ནུ་ནི༔ ཞལ་གསུམ་ཕྱག་དྲུག་ཞབས་བཞི་བསྒྲད༔ གར་དགུའི་རོལ་པས་མནན་མཛད་ཅིང་༔ འཁོར་ལོ་རྒྱས་འདེབས་ཡུམ་དང་འཁྲིལ༔ ཡབ་ཡུམ་གཉིས་མེད་སྦྱོར་བའི་སྒྲས༔ དུས་གསུམ་སངས་རྒྱས་རབ་མཆོད་ནས༔ བྱང་ཆུབ་སེམས་ཀྱི་ཐིག་ལེ་ཡིས༔ མུ་ཏིག་ཁུལ་འཕངས་དབབ་ཏུ་གསོལ༔ ཚེ་བུམ་འདི་ལ་བྱིན་གྱིས་རློབས༔ ཨོཾ་བཛྲ་ཀཱི་ལི་ཀཱི་ལ་ཡཿསརྦ་བིགྷ་ནཱན་བཾ་ཧཱུྃ་ཕཊཿཧཱུྃ༔ ཆོས་དབྱིངས་ནམ་མཁའི་དཀྱིལ་འཁོར་ནས༔ སྲས་མཆོག་རྡོ་རྗེ་ཕུར་པ་སྟེ༔ སངས་རྒྱས་ཀུན་གྱི་ཐུགས་ཀྱི་སྲས༔ ཁྲོ་
བོའི་ཚུལ་སྟོན་གདུག་པ་འདུལ༔ སྟོང་གསུམ་སྟོང་གི་འཇིག་རྟེན་འདིར༔ སྤྲུལ་པ་གྲངས་མེད་ཁྲོ་ཚོགས་ཀྱི༔ དགྲ་བགེགས་གདུག་པ་དབྱིངས་སུ་སྒྲོལ༔ མཁའ་མཉམ་བདེ་ཆེན་རྒྱས་པར་གྱིས༔ བྱང་སེམས་ཐིག་ལེ་མི་ཤིག་དབུས༔ མུ་ཏིག་ཁུ་འཕངས་དབབ་ཏུ་གསོལ༔ ཚེ་བུམ་འདི་ལ་བྱིན་གྱིས་རློབས༔ ཨོཾ་བཛྲ་ཀཱི་ལི་ཀཱི་ལ་ཡཱ༔ སརྦ་བྷིགྷ་ནཱན་བཾ་ཧཱུྃ་ཕཊ༔ ཧཱུྃ༔ ཕྱོགས་བཅུར་རང་བྱུང་གྲུབ་པའི་ལྷ༔ ཡེ་ཤེས་ཁྲོ་བོ་ཆེན་པོ་བཅུ༔ ཡུམ་ཆེན་རྡོ་རྗེ་ཁྲོ་མོ་བཅུ༔ སྤྲུལ་པ་ཁྲ་ཐབས་ཚོགས་རྣམས་ཀྱང་༔ མཐིང་ནག་ཞལ་གཅིག་ཕྱག་གཉིས་ཏེ༔ བགེགས་ཆེན་འདུལ་ཞིང་ཁྲོ་ཚུལ་སྟོན༔ གཡས་ན་ལྕགས་ཀྱུ་ཕུར་བུ་བསྣམས༔ གཡོན་ན་བདུད་རྩིའི་བུམ་པ་བསྣམས༔ ཐུགས་ཀའི་ཉི་ཟླ་ཁ་སྦྱོར་ནས༔ ཚེ་འཛིན་ཐུགས་ཀྱི་དཔལ་བེའུ་ལས༔ བྱང་སེམས་ཐིག་ལེའི་ཁུ་འཕངས་འབེབས༔ ཁུག་ཅིག་ཁུག་ཅིག་ཚེ་ཁུག་ཅིག༔ དྲོངས་ཤིག་དྲོངས་ཤིག་ཚེ་དྲོངས་ཤིག༔ ཕྱོགས་བཅུའི་གནས་ནས་ཚེ་ཁུག་ཅིག༔ ཚེ་བུམ་འདི་ལ་བྱིན་གྱིས་རློབས༔ སྐུ་གསུང་ཐུགས་ཀྱི་དངོས་གྲུབ་སྩོལ༔ ཨོཾ་བཛྲ་ཀྲོ་ཏ་ཧཱུྃ་ཀ་ར་ཧཱུྃ༔ གརྫ་གརྫ་ཧཱུྃ་ཕཊ༔ ཨཱ་ཡུཛྙཱ་ན་ཛ༔ ཁྲོ་བཅུའི་སྔགས་འགྲེས་སྦྱར། བསྡུ་ན་ཀི་ལ་ཡའི་མཐར་ཨཱ་ཡུར་སོགས་སྦྱར་བས་མཐུས་སོ། ཧཱུྃ༔ ཤར་གྱི་ཕྱོགས་ནས་ཚེ་འགུག་མ༔ དཀར་མོ་ཞི་མཛད་པུ་ཤུད་མགོ༔ ལྕགས་ཀྱུ་ཚེ་
བུམ་ལག་ན་བསྣམས༔ ལོག་འདྲེན་འགུགས་མཛད་སྒོ་སྲུང་མ༔ ཁུག་ཅིག་ཁུག་ཅིག་ཚེ་ཁུག་ཅིག༔ དྲོངས་ཤིག་དྲོངས་ཤིག་ཚེ་དྲོངས་ཤིག༔ དྲི་ཟའི་ལག་ནས་ཚེ་ཁུག་ཅིག༔ ཚེ་ཡི་དངོས་གྲུབ་འདི་སྩོལ་ཅིག༔ ༔ཨོཾ་བཛྲ་ཀཱི་ལི་ཀཱི་ལ་ཡ༔ བྷིནྡྷ་ཡ་བིང་བིང་ཧཱུྃ་ཕཊ༔ ཨཱ་ཡུཛྙཱ་ན་ཛ༔ ཧཱུྃ༔ ལྷོ་ཡི་ཕྱོགས་ནས་ཚེ་འགུགས་མ༔ སེར་མོ་ཀངྐའི་མགོ་བོ་ཅན༔ ཕྱག་ན་ཞགས་པ་ཚེ་བུམ་བསྣམས༔ ཚེ་དང་ལོང་སྤྱོད་རྒྱས་མཛད་མ༔ ཁུག་ཅིག༴ དྲོངས་ཤིག༴ གྲུལ་བུམ་ལག་ནས་ཚེ༴ ཨོཾ་བཛྲ་ཀཱི་ལི་ཀཱི་ལ་ཡ༔ ནམ་སནྟ་ཧྲི༚་ཧྲི༚་ཧཱུྃ་ཕཊ༔ ཨཱ་ཡུཛྙཱ་ཛ༔ ཧཱུྃ༔ ནུབ་ཀྱི་ཕྱོགས་ནས་ཚེ་འགུགས་མ༔ དམར་སེར་སྲིན་བྱའི་མགོ་བོ་ཅན༔ ལྕགས་སྒྲོག་ཚེ་ཡི་བུམ་པ་བསྣམས༔ ལོག་འདྲེན་དབང་མཛད་སྒོ་སྲུང་མ༔ ཁུག་ཅིག༔ དྲོངས་ཤིག༴ ཀླུ་ཡི་ལག་ནས༴ ཨཱོཾ་བཛྲ་ཀཱི་ལི་ཀཱི་ལ་ཡ༔ སུ་རུ་སུ་རུ་པྲ་སུ་རུ་པྲ་སུ་རུ་ཧཱུྃ་ཕཊ༔ ཨཱ་ཡུཛྙཱ་ན་ཛ༔ ཧཱུྃ༔ བྱང་གི་ཕྱོགས་ནས་ཚེ་འགུགས་མ༔ ལྗང་གུ་ཁྲ་ཡི་མགོ་བོ་ཅན༔ དྲིལ་བུ་ཚེ་བུམ་ལག་ན་བསྣམས༔ ལོག་འདྲེན་སྒྲོལ་མཛོད་སྒོ་སྲུང་མ༔ ཁུག་ཅིག་ཁུག་ཅིག་ཚེ་ཁུག་ཅིག༔ དྲོངས་ཤིག་དྲངས་ཤིག་ཚེ་དྲོངས་ཤིག༔ གནོད་སྦྱིན་ལག་ནས་ཚེ་ཁུག་ཅིག༔ ཨོཾ་བཛྲ་ཀཱི་ལི་ཀཱི་ལ་ཡ༔ མཱ་ར་ཡ་མཱ་ར་ཡ་ཧཱུྃ་ཕཊ༔ ༔
ཨཱ་ཡུཿཨཱ་བེ་ཤ་ཡ་ཛ༔ ཞེས་བསྐུལ་ལ་སྔགས་འདིའང་ལན་ཇི་རིགས་བཟླའོ། །ཨོཾ་བཛྲ་ཀཱི་ལི་ཀཱི་ལ་ཡ་ཨོཾ་བྷྲཱུྃ་ཨཱཿབྷྲཱུྃ་ཧཱུྃ་བྷྲཱུྃ་སྭཱ་བྷྲཱུྃ་ཧཱ་བྷྲཱུྃ་ཛྙཱ་ན་ཨཱ་ཡུ་ཤེ་ཧཱུྃ་ཨཱཿ བརྒྱ་སྟོང་གང་འགྲུབ་མཐར་དངོས་གྲུབ་ལེན་པ་སོགས་དཀྱུས་ལྟར་བྱས་པས་ཚེའི་དབང་དང་དངོས་གྲུབ་ཐོབ་ནས་འཆི་མེད་རྡོ་རྗེའི་སྐུར་གྱུར་པ་མོས་ལ་ཤིས་བརྗོད་རྒྱ་ཆེར་བྱའོ། །ཚེ་དབང་སྒྲུབ་ཅིང་འགུགས་པའི་ལུང་། །རྒྱུད་ལས་གསུངས་པ་མཐའ་ཡས་ཀྱང་། །གྲུབ་པས་གནད་དུ་དྲིལ་བ་འདི། །རིང་འཚོར་འདོད་པས་བདུད་རྩིར་བསྟེན། །འགྲོ་ཀུན་འཆི་བདག་ལས་རྒྱལ་ཏེ། །འཆི་མེད་རྟག་པ་དམ་པའི་སྐུར། །ཡོངས་གྲུབ་རྡོ་རྗེ་སེམས་དཔའི་གནས། །བདེ་བླག་ཉིད་དུ་ཐོབ་གྱུར་ཅིག །ཅེས་པའང་ཕུར་དཀྱིལ་བདུད་འཇོམས་རོལ་པའི་ཆ་ལག་ཏུ། པདྨ་གར་དབང་བདེ་བའི་རྡོ་རྗེས་ཕུར་པ་ཐུགས་ཀྱི་ཉིད་ཁུ་ལས་ཁོལ་དུ་ཕྱུང་སྟེ་བསྡེབས་པ་གཞན་ལ་ཕན་པར་གྱུར་ཅིག། །།དགེ་ལེགས་འཕེལ།། །།