དཔལ་ཆེན་པོ་རྡོ་རྗེ་ཕུར་པའི་སྨད་ལས་དྲག་པོ་སྒྲོལ་བའི་རྗེས་སུ་གནང་བའི་ཡི་གེ་བདུད་བཞིའི་གཡུལ་འཇོམས།
དཔལ་ཆེན་པོ་རྡོ་རྗེ་ཕུར་པའི་སྨད་ལས་དྲག་པོ་སྒྲོལ་བའི་རྗེས་སུ་གནང་བའི་ཡི་གེ་བདུད་བཞིའི་གཡུལ་འཇོམས་ཞེས་བྱ་བ་བཞུགས་སོ། །
དཔལ་ཆེན་པོ་རྡོ་རྗེ་ཕུར་པའི་སྨད་ལས་དྲག་པོ་སྒྲོལ་བའི་རྗེས་སུ་གནང་བའི་ཡི་གེ་བདུད་བཞིའི་གཡུལ་འཇོམས་ཞེས་བྱ་བ། བླ་མ་དང་དཔལ་ཆེན་པོ་བདུད་བཞིའི་གཡུལ་ངོ་འཇོམས་པ་ལ་ཕྱག་འཚལ་ལོ། །སྟོང་ཉིད་གཟུགས་སུ་གྱུར་པའི་རྡོ་རྗེའི་ཐོག །དངོས་འཛིན་བདུད་སྡེའི་བྲག་རི་ཐལ་བར་འབྱིན། །ལ་ལར་སྒེག་དང་ཁ་ཅིག་ཞི་བ་ཡིས། །སྙིང་ལ་བདུད་རྩིའི་བཅུད་སྩོལ་དེ་ལ་འདུད། །དཔལ་ལྡན་འཁོན་བརྒྱུད་མཐུ་སྟོབས་རྡོ་རྗེའི་ཟིལ། །མ་བཟོད་དྲེགས་ལྡན་ལྷ་མིན་ས་འོག་ཏུ། །བསིལ་ལྡན་བདེ་བའི་ཐབས་སུ་ལེགས་བཅིངས་པ། །གང་འདི་གྲུབ་པའི་མཐུ་སྟེ་དེས་སྐྱོངས་ཤིག །ཟབ་གཉན་ཀུན་གྱིས་བགོད་པའི་ལམ་པོ་ཆེར། །མི་འགྲོ་
རང་བདེར་བགྲོད་འདི་མཁས་འདོད་མིན། །སྐལ་པས་ཉིན་བྱེད་ལས་སུ་མ་གྱུར་པ། །མཐོང་བའི་གོ་འབྱེད་སྒྲོན་མེ་བཏེགས་པ་བཞིན། །འདིར་བདུད་དང་དམ་སྲིའི་གཡུལ་ངོ་འཇོམས་པ་ལ་གཅིག་ཏུ་དཔའ་བའི་དཔལ་ཆེན་རྡོ་རྗེ་སྲིན་པོའི་སྨད་ལས་དགྲ་བགེགས་སྒྲོལ་བའི་རྗེས་སུ་གནང་བ་ལ་དོན་གསུམ། སྦྱོར་བ་དཀྱིལ་འཁོར་དང་ཡོ་བྱད་ཉེ་བར་བསྡོགས་པ། དངོས་གཞི་སྒྲུབ་ཅིང་རྗེས་གནང་བྱ་བ། རྗེས་ཀྱི་རིམ་པ་ཇི་ལྟར་བྱ་བའོ། །དང་པོ་ནི། གནས་ཁང་རྙིང་པར་དཀྱིལ་འཁོར་གྱིས་ཆོག་མི་དགོས་ཤིང་། ཐིག་ཚོན་བྱིན་རླབས་སོགས་ཀྱང་ཕྱག་སྲོལ་མི་འདུག་པས། ཡི་དམ་ཆོས་སྐྱོང་གི་རྟེན་བཀྲམ་པའི་མདུན་སྟེགས་བུ་ལ་ཨེ་ཁྲམ་ཉེར་གཅིག་གི་དཀྱིལ་འཁོར་འབྲི་སྟེ། དེའང་སྣ་ཚོགས་རྡོ་རྗེ་དང་པད་ར་སྤངས་པའི་གཞན་དྲག་པོའི་དཀྱིལ་འཁོར་སྤྱི་ལྟར་ལ། རྩིག་པའི་ནང་དུ་རྡོ་རྗེའི་གདུང་ཟླུམ་པོར་བསྐོར་བའི་ཤར་ནུབ་ཚངས་ཐིག་དབུས་བྱས་པའི་གཡས་གཡོན་ཆ་ལྔ་ལྔར་བགོས། ཤར་གྱི་ཚངས་ཐིག་ནས་ཆ་གཉིས་བོར་པའི་གསུམ་པའི་རྟགས་སྟེང་ཐིག་འདེབས་དེ་བཞིན་ཏུ་བསྐོར་ཏེ་ལན་ལྔར་འདེབས། ནུབ་ཀྱི་ཚངས་ཐིག་ནས་བཟུང་དེ་དང་འདྲ་བ་ལན་ལྔ་བཏབ་པས་གྲུབ་གསུམ་རྩེ་མོ་ཕྱི་བསྟན་བཅུ་དང་། ནང་བསྟན་བཅུ་འབྱུང་། ལྟེ་བའི་ཤར་གྱི་ཚངས་ཐིག་དང་། ལྷོ་ནུབ་ནུབ་བྱང་གི་རྒྱ་
མདུད་འཇོམ་གསུམ་པོ་ཐིག་གིས་སྦྲེལ་བས་གྲུ་གསུམ་གཅིག་སྟེ་བསྡམས་པས་ཉེར་གཅིག་པོ་ཐམས་ཅད་ཀྱི་ནང་མཐའ་ལ་ཆ་ཆུང་རེ་བཅད་པ་མུ་རན་ནོ། །ཆོས་འབྱུང་ནག་པོ། མུ་རན་དམར། དེ་རྒྱབ་མུ་ཁྱུད་ལ་རྡོ་རྗེའི་ཕྲེང་བ་ནག །གདུང་ཟླུམ་སྔོན་པོ་ལ་རྡོ་རྗེའི་ཕྲེང་བ་སེར་པོ། ཁོང་གསེང་དང་ལྷ་རྣམས་ཕྱོགས་མདོག །ཁྱམས་ཁྲག་མཚོ་སོགས་བྱ། དཀྱིལ་འཁོར་པའི་ཞལ་ངེས་པར་འཇིག་རྟེན་པའི་ལྷོ་ཕྱོགས་སུ་སྟོན་པར་བཞེད་དེ་མངོན་སྤྱོད་ཀྱི་ལས་མཐུན་དང་། འཕགས་ཡུལ་གྱི་གཤེད་སྐོར་བ་རྣམས་དང་། བདེ་མཆོག་མཁན་པོ་ཁ་གཅིག་གི་ཕྱག་སྲོལ་དུ་མངོན། །འོན་ཀྱང་རྗེ་བཙུན་གྱིས་འཇིགས་བྱེད་སྐབས་སུ་རྣམ་པ་ཀུན་ཏུ་གྲུ་གསུམ་གྱི་རྩེ་མོ་རང་ལ་སྟོན་ཏུ་མི་རུང་བས། དཀྱིལ་འཁོར་གྱི་ཞལ་འཇིག་རྟེན་པའི་ལྷོ་ཕྱོགས་སྟོན་ཅིང་རང་དང་དཀྱིལ་འཁོར་ཞལ་སྤྲོད་བྱེད་པའི་ཚེ། གྲུ་གསུམ་རྩེ་མོ་དཀྱིལ་འཁོར་ལྷོའི་རང་ལ་གཟུར་ནས་སྟོན་དགོས་པར་གསུངས། རྡུལ་ཚོན་མ་གྲུབ་ན་རལ་བྲིས་བཏིང་། གང་ལྟར་དཀྱིལ་འཁོར་གྲུབ་པ་དང་ཕུར་བུ་འགོད་དགོས་པས་འཛོམ་ན་ལྷ་ཕུར་བཞི་བཅུ། མ་འཛོམ་ན་གཙོ་བོ། ཁྲོ་བཅུ། སྒོམ་བཞི་བཅས་བཅོ་ལྔ་མེད་དུ་མི་རུང་བས་ནས་ཀྱི་སྣོད་དུ་གཟུག །རྡོ་རྗེ་སློབ་དཔོན་སོགས་བརྗོད་ཅིང་། བདག་ཉིད་སྐད་ཅིག་གིས་དཔལ་ཆེན་པོ་རྡོ་རྗེ་གཞོན་ནུའི་སྐུར་གྱུར། དཀྱིལ་ཆོག་སྔོན་འགྲོ་ལྔ་པ་ཕུར་པ་བྱིན་
གྱིས་རླབས་པའི་སྐབས་བཞིན་ཕུར་པ་བྱིན་རླབས་ཚང་བར་བྱ། ལྷ་གནས་རྣམས་སུ་གདན་བསྐྱེད་ལ་ཕུར་གདན་བཀོད། དབུས་ནས་རང་བྱུང་སོགས་ཀྱིས་ཕུར་བུ་རྣམས་རང་རང་གི་བཞུགས་གནས་མ་འཆོལ་བར་བཀོད་པའི་མཐར་སྒོས་མཆོད་སོ་སོའི་མདུན་དུ་མར་མེ། དེའི་གཡས་སུ་ཞལ་ཟས། གཡོན་ཏུ་བདུག་སྤོས་རྣམས་དང་། ཐམས་ཅད་ཀྱི་མཐར་སྤྱི་མཆོད་དཀྱིལ་འཁོར་གྱི་ཤར་ལྷོ་ནས་བརྩམ་པ་སྟེ། མཚམ་འཛིན་མེ་ཏོག །ཁྲག་གི་མཆོད་ཡོན་སོགས་དྲག་པོའི་མཆོད་པ་གཡོན་བསྐོར་དུ་བཤམ། འགྲུབ་ན་མདའ་དྲྭ་སོགས་རྒྱན་བཀོད་སྒྲུབ་མཆོད་ལྟར་བྱ། དཀྱིལ་འཁོར་གྱི་མདུན་རྒྱབ་བམ་ལོགས་གར་བདེར་དབང་གཏོར་སྒྲུབ་གཏོར་དང་མཚུངས། འབུལ་གཏོར་བཅུ་ཚར། སྨན་རཀ་གཉིས། དེ་དག་གི་མདུན་ཏུའང་ཆུ་གཉིས་ཉེར་སྤྱོད་རྣམས་བཤམ། རྗེས་གནང་དོན་བདུན་པོའི་ཆས་སོ་སོར་གོ་རིམ་མ་ནོར་བར་དོན་ཚན་རེ་རེ་སྦོམ་ནས་བཞག་སྟེ། སྤྲུལ་སྐུའི་རྗེས་གནང་སྐོར་གཅིག །དེ་བཞིན་ཏུ། སྐུ་ཆ་རྐྱེན་གྱི་རྗེས་གནང་། གསུང་བཟླས་པའི་རྗེས་གནང་ལ་རང་གི་བསྙེན་པ་བྱས་པའི་ཐོད་ཕྲེང་། །ཐུགས་ཡེ་ཤེས་སེམས་དཔའ། མཛད་པ་ཕྲིན་ལས་ལ་ཡང་འགྲེལ་སོ་དྲུག་ཆས་སོགས། དྲག་པོ་སྒྲོལ་བའི་རྗེས་གནང་ལ། དུག་གཏོར་སྟོད་ཟུར་གསུམ་ཐོག་མ་དེ་ལ་ལྟ་བུ། སྨད་ཟུར་གསུམ་ཁྲག་གིས་
བྱུགས་པ་དང་། ཡང་དམར་གཏོར་གཅིག་དངོས་སུ་བཤམ། གཞན་གཞུང་དུ་སྨོས་པའི་ལྷ་སྐུ་དང་རྫས་དབང་ཐམས་ཅད་ཙཀ་ལི་རྒྱབ་ཡིག་ཅན་ཁོ་ན་མཛད་པ་ཉིད་ཚན་ཏུ་བཅད་ནས་དཀྱིལ་འཁོར་དབུས་སུ་མཉྫིའི་ཁར་རིན་པོ་ཆེའི་སྣོད་འབྲུས་བཀང་བར་བཞག་པའི་ཕྱག་སྲོལ་ཡོད་དོ། །སློབ་དཔོན་མདུན་ཏུ་སྲས་མཆོག་རིགས་ལྔའི་ཕུར་པ། རྡོར་དྲིལ་སོགས་བཀོད། སྔོན་གཏོར། ཚོགས་ཀྱི་ཡོ་བྱད། བསྒྲལ་བའི་ལིངྒ་སོགས་ཀྱང་འཚོགས་པར་བྱའོ། །གཉིས་པ་དངོས་གཞི་ལ་གཉིས་ལས། དང་པོ་བདག་མདུན་སྒྲུབ་པ་ནི། སྔོན་འགྲོ་གཏོར་མ་བཏང་། གནས་ཡོ་བྱིན་རླབས་གཏོར་བཟློག་ཏུ་སྨོས་པ་ལྟར་བྱ། སྐྱབས་སེམས། ཡིག་བརྒྱ། ཚད་མེད་བསྒོམ་པ། མཚམས་གཅོད་ནས་བརྩམས་ཏེ། ཕུར་པ་རྫས་ཀྱི་དཀྱིལ་འཁོར་བསྐྱེད་བསྟིམ་རྒྱས་གདབ་གྲུབ་ཀྱི་བར་བཏང་ལ་བདག་བསྐྱེད་བསྒོམ། མདུན་བསྐྱེད་དཀྱིལ་འཁོར་ལ་རྡོ་རྗེའི་རྩེས་ནང་མཆོད་འཐོར་ལ། བསངས་སྦྱང་། སྭ་བྷཱ་བ། ཤུནྱ་ཏཱ། ཨོཾ་དྷརྨ་དྷཱ་ཏུ་སྭཱ་བྷཱ་བ་ཨཱཏྨ་ཀོ྅ཧཾ། ཧཱུྃ། རྡོ་རྗེ་ཁྲོས་པས་ཞེ་སྡང་གཅོད། སོགས་ནས། རང་སེམས་ཞེས་པ་རྣམས་དོར་ལ། གཞལ་ཡས་ཁང་གི་དབུས་སུ་གྲུ་གསུམ་མཐིང་ནག་འབར་བ། དེའི་ཕྱི་རོལ་དུ་དྲག་པོའི་རྒྱ་མདུད་གྲུ་གསུམ་བསྣོལ་མ་བཅུ་སྟེ་ཨེ་ཁྲམ་ཉེར་གཅིག་གིས་དབུས་དང་ཕྱོགས་བཅུར། པདྨ་
མཎྜལ་སོགས་ནས། །དབུས་སུ་ཤཾ་རུ་དྲ་སོགས། འགྱེལ་བའི་གདན་ཕྱོགས་བཅུར་བགེགས་རྣམས་ཀྱི་ངོ་བོ་ཕྱོགས་སྐྱོང་བཅུ་ཆུང་མར་བཅས་པ། ཕྱོགས་བཞིར་ཞི་རྐྱང་གི་གདན་རྣམས་གྲུབ་པར་གྱུར། ནམ་མཁར་གནས་པའི་ཧཱུྃ་ཡིག་ནས། །བདག་ཉིད་ཅེས་དོར། །ཐམས་ཅད་རྡོ་རྗེ་གཞོན་ནུས་གཏམས། ཨོཾ་དཱི་བྷྭ་ཙཀྲ་ནས། གཉིས་མེད་འཁྱུད། ཨོཾ་བཛྲ་ཀྲོ་དྷ་ཧཱུྃ་ཀ་ར་ནས། །རྔམ་རྔམ་འདྲ་བའོ། །གཞན་ཡང་དབང་ཕྱུག་མ་ཉི་ཤུ་རྩ་བརྒྱད་ལ་སོགས་པ་དཔལ་ཆེན་པོའི་དཀྱིལ་འཁོར་སོགས་ནས། གྲུབ་པར་གྱུར། རང་གི་ཐུགས་ཀའི་ཧཱུྃ་སོགས། སྲུང་མ་དང་བཅས་པའི་རྣམ་པར་ཨོཾ་བཛྲ་ས་མཱ་ཛཿ ཧཱུྃ། སྲིད་པའི་ཕུར་བུ་སོགས་ནས། གཉིས་སུ་མེད་པར་ཐིམ། ཧཱུྃ། སངས་རྒྱས་ཀུན་གྱི་སོགས་གཙོ་བོ་བསྐྱེད་པའི་སྐབས་ལྟར་ལ། ཀརྨ་ཀྲོ་དྷཱི་ཤྭ་རི་ཨཱཿ དབང་བསྐུར་བས་གཙོ་བོ་ལ་མི་བསྐྱོད་པ། འཁོར་རྣམས་ལ་གཙོ་བོ་ཉིད་ཀྱིས་དབུ་བརྒྱན་པར་གྱུར། དེ་ནས་བདག་མདུན་ཐུན་མོང་དུ་མཆོད་བསྟོད་བཟླས་པ་བྱ་བ་ནི། སླར་ཡང་མཆོད་པ་བྱིན་བརླབ་བྱ། སྨན་མཆོད་ནས་བཟླས་པ་དང་། གཞི་བསྟོད་ཀྱི་བར་བྱ་བ་ལས། རིག་འཛིན་བསྐུལ་སྐབས་འདིར་བསྐྱུར། དེ་ནས་ཡི་དམ་ཆོས་སྐྱོང་སྤྱི་དང་། ཁྱད་པར་དཀར་འདུད་ཕུར་སྲུང་རྣམས་ཀྱི་གཏོར་འབུལ་དང་། །ཚོགས་བྱིན་བརླབས་ནས། བར་པ་བཤགས་པ་ཡན་ཚང་བར་བྱའོ། །
གཉིས་པ་རྗེས་གནང་གི་ཆོ་ག་དངོས་ལ་སྔོན་འགྲོ། །དངོས་གཞི་གཉིས་ལས། དང་པོ་ནི། སྟོད་ལས་ཀྱི་དབང་བཞི་ཐོབ་པའི་སློབ་མ་རྣམས་སྒོར་ཁྲུས་བྱས་ཏེ་ནང་དུ་འོང་བ་དང་། སློབ་དཔོན་གྱིས་ཀཱི་ལ་ཡའི་དྲག་སྔགས་རོལ་མོ་དང་བཅས་པས་བགེགས་བསྐྲད། གུ་གུལ་བདུག། གྲལ་དུ་འཁོད་དེ་མེ་ཏོག་བཀྱེ་བསྡུ་བྱས་ལ། ནམ་མཁའ་དང་མཉམ་པའི་སེམས་ཅན་ཐམས་ཅད་བདུད་བཞི་ལས་རྣམ་པར་རྒྱལ་བ་ཁྲག་འཐུང་ཐམས་ཅད་ཀྱི་དབང་ཕྱུག་དཔལ་ཆེན་རྡོ་རྗེ་གཞོན་ནུའི་གོང་འཕང་ལ་འགོད་པར་བྱ། དེའི་ཆེད་དུ་དྲག་པོ་སྒྲོལ་བའི་རྗེས་གནང་ཟབ་མོ་གསན་ཅིང་ཕྲིན་ལས་ལ་འཇུག་པར་བྱའོ་སྙམ་པའི་བྱང་ཆུབ་ཏུ་ཐུགས་བསྐྱེད་པ་གསལ་བཏབ་ནས་གསན་པར་ཞུ། དེའང་ངེས་པའི་དོན་དུ་བཅོམ་ལྡན་འདས་རྡོ་རྗེ་སེམས་དཔའ་མ། རིག་འཛིན་རྒྱལ་པོ་རྡོ་རྗེ་ཆོས་སུ་གྲགས་པ་གང་ཉིད། གདུལ་བྱ་ཞི་བས་མི་འདུལ་བ་རྣམས་ཀྱི་གཉེན་པོར་དཔལ་ཆེན་ཀརྨ་ཧེ་རུ་ཀའི་སྐུར་བཞེངས་ཏེ། འོག་མིན་གསང་ཆེན་རོལ་པའི་དུར་ཁྲོད་ལ་སོགས་པར། འཇིགས་བྱེད་ཁྲོ་བོ་བཅུ་སོགས་ཡེ་ཤེས་རང་སྣང་གི་འཁོར་རྣམས་ལ་རྒྱུད་སྡེ་རྒྱ་མཚོ་ལྟ་བུ་གསུངས་ཤིང་། ཉིད་ལས་མི་གཞན་པའི་གསང་བའི་བདག་པོ་དང་མཁའ་འགྲོ་མ་རྣམས་ཀྱིས་བསྡུས་ཏེ་གཉེར་བ་ལས། དུས་ལ་བབ་པའི་ཚེ་ཨོ་རྒྱན་དང་། འཕགས་ཡུལ། འགྲོ་ལྡིང་།
སྲིན་ཡུལ། གངས་ཅན་ལྗོངས་སོགས་མིའི་ཡུལ་རྣམས་སུ་ཆ་ཤས་ཙམ་སྣང་བའི་དོན་ཉམས་སུ་བླངས་པས་བདུད་བཞི་ལས་རྣམ་པར་རྒྱལ་ཏེ་ཕྱག་རྒྱ་ཆེན་པོ་མཆོག་གི་རིག་འཛིན་བརྙེས་པ། མཁའ་འགྲོ་མ་བདེ་བའི་འཁོར་ལོ། སློབ་དཔོན་པྲ་བྷ་ཧ་སྟི་ལ་སོགས་པ་བསམ་གྱིས་མི་ཁྱབ་པ་བྱུང་། ཁྱད་པར་སངས་རྒྱས་གཉིས་པ་པདྨ་ཐོད་ཕྲེང་། པ་ཆེན་བི་མ་ལ་མི་ཏྲ། བལ་པོ་ཤཱི་ལ་མཉྫུ་སྟེ་སློབ་དཔོན་རྣམ་པ་གསུམ་གྱིས་ཆོས་འདི་ལས་གྲུབ་པ་བརྙེད་པའི་ཚུལ་བསྟན་སྟེ། དགོངས་ཉམས་གཅིག་ཏུ་དྲིལ་བའི་བསྟན་བཅོས་འབུམ་ནག་ཅེས་བྱ་བ་མཛད། སློབ་དཔོན་སངས་རྒྱས་གཉིས་པ་བོད་ཡུལ་མུན་པའི་གླིང་དུ་དམ་པ་ཆོས་ཀྱི་སྒྲོན་མེ་སྦར་བ་ལ་ཕེབ་པའི་ཚེ། རྗེ་ཆོས་རྒྱལ་ཆེན་པོ། གྲོགས་མཁར་ཆེན་བཟའ། འབངས་ནམ་མཁའི་སྙིང་པོ། སངས་རྒྱས་ཡེ་ཤེས་རིན་ཆེན། རྡོ་རྗེ་བདུད་འཇོམས། ཀླུའི་དབང་པོ་སོགས་སྐལ་པ་དང་ལྡན་པ་མཐའ་ཡས་པ་རྣམས་ཀྱིས་གསོལ་བ་བཏབ་པའི་ངོར། རིག་པ་མཆོག་གི་རྒྱུད་སོགས་ལ་བརྟེན་ནས་རྡོ་རྗེ་ཕུར་པའི་སྒྲུབ་ཐབས་དང་མན་ངག་དཔག་ཏུ་མེད་པ་གནང་བས། དེ་དག་གི་བརྒྱུད་པའི་ཆུ་བོ་རེ་རེ་ལས་ཀྱང་བརྒྱུད་སྲོལ་དུ་མར་གྱེས་ཏེ། ནང་དུག་ལྔ། ཕྱི་དགྲ་བགེགས་ལ་ཕུར་པ་ཐེབས་པས་
མཆོག་དང་ཐུན་མོང་གི་དངོས་གྲུབ་གཅིག་ཆར་དུ་བརྙེས་པའི་རིག་འཛིན་རྩལ་འཆངས་ཆེན་པོའི་རྡུལ་ཙམ་བྱུང་། ད་ལྟའི་བར་དུའང་ལྷ་འདི་ལ་བརྟེན་ནས་ཡི་དམ་གྱི་ཞལ་གཟིགས་པ་ཆོས་ཉིད་ཀྱི་བདེན་པ་མཐོང་བ། ཕྲིན་ལས་རབ་འབྱམས་འགྲུབ་པར་བར་མ་ཆད་པ་ཞིག་གསར་རྙིང་སྤྱི་དང་། ལྷག་པར་རྗེ་བཙུན་ས་སྐྱ་པའི་གདུང་རིགས་རྣམས་ལས་བྱོན་ཏེ་སངས་རྒྱས་བསྟན་པའི་སྲོག་རྩ་བཟུང་། དེ་ལྟ་བུའི་ཟབ་ཅིང་རྒྱ་ཆེ་བའི་ལམ་གྱི་རིམ་པ་ཐམས་ཅད་བསྡུ་ན་ཕུར་བུ་རྣམ་བཞིའི་དགོངས་པར་འདུ་ཏེ། ནམ་མཁའ་ལྟ་བུའི་གང་ཟག་གིས་རིག་པ་ཡེ་ཤེས་ཀྱི་ཕུར་པ་ཆོས་ཀྱི་དབྱིངས་ལ་འདེབས། རི་བོ་ལྟ་བུའི་གང་ཟག་གིས་ཐུགས་རྗེ་སྤྲུལ་པའི་ཕུར་པ་ཁམས་གསུམ་གྱི་སེམས་ཅན་ལ་འདེབས། བྱ་ཀ་ལནྟ་ཀ་ལྟ་བུའི་གང་ཟག་གིས་བྱང་ཆུབ་སེམས་ཀྱི་ཕུར་པ་ཡུམ་གྱི་མཁའ་ལ་འདེབས། ཙནྡན་ལྟ་བུའི་གང་ཟག་གིས་མཚན་མ་རྫས་ཀྱི་ཕུར་པ་དགྲ་བགེགས་སྙིང་ལ་འདེབས་པའོ། །དེ་དག་ཉམས་སུ་ལེན་པའི་གདམས་ངག་མཐའ་ཡས་པ་རྣམས་ཀྱང་བསྡུ་ན། སྨིན་བྱེད་དབང་གི་ཆུ་བོ་སྐུར་བྱེད་ངོ་སྤྲོད་དང་བཅས་པ། དཀྱུས་བཤད་གཞུང་གི་ཆུ་བོ་འགྲེལ་ཊཱིཀ་གཏོང་ཐུན་དང་བཅས་པ། གདམས་པ་ཉམས་ལན་གྱི་ཆུ་བོ་ལག་ལེན་མངོན་རྟོགས་དང་བཅས་པ། མན་ངག་གནད་ཀྱི་ཆུ་བོ་དྲིས་ལེན་གེགས་
སེལ་དང་བཅས་པ་སྟེ་ཆུ་བོ་བཞིར་འདུ། དེའང་དྲི་ལན་སྟོད་ལས་བྱང་ཆུབ་སྒྲུབ་པ་དང་། སྨད་ལས་དགྲ་བགེགས་སྒྲོལ་བའི་ལམ་གཉིས་སུ་འདུ་བ་ལས། ཕུར་པ་དང་པོ་གསུམ་གྱི་སྨིན་བྱེད་སྟོད་ལས་ཀྱི་དབང་བཞི་ཡོངས་སུ་རྫོགས་པ་སྔོན་ཏུ་གསན་གྲུབ་ནས་རྡོ་རྗེ་ཕུར་པའི་ཕྲིན་ལས་ཀྱི་གཙོ་བོ་ཕུར་པ་མཁན་པོ་གདབ་ལས་ལ་བརྟེན་ནས་འཚང་རྒྱ་བ་ཞེས་མཚན་མ་རྫས་ཀྱི་ཕུར་པ་བརྣག་པའི་འབེམ་ལ་བརྡེག་ཅིང་། རྒྱུད་ཀྱི་གནད་ཐོབ་ཅུ་གཉིས་ཀྱི་སྒོ་ནས་མངོན་སྤྱོད་ཀྱི་ལས་མཐར་ཕྱིན་པར་བྱེད་པ་ལ་ཐོག་མར་དྲག་པོ་སྒྲོལ་བའི་རྗེས་སུ་གནང་བ་མ་ཐོབ་པར་ལས་ལ་འཇུག་ཏུ་མི་རུང་ཞིང་ཞུགས་ཀྱང་འབྲས་བུ་མི་འབྱུང་བས། འཁོན་སྟོན་རྡོ་རྗེ་འཛིན་པ་རྣམས་ཀྱི་བཀའ་སྲོལ་ལས་བྱོན་པའི་མངོན་སྤྱོད་ཀྱི་རྗེས་སུ་གནང་བསྒྲུབ་པ་སྟེ། དེ་ལ་སློབ་དཔོན་གྱིས་བགྱི་བར་འོས་པ་རྣམས་གྲུབ་ཟིན་པས། ཁྱོད་རང་རྣམས་ཀྱི་ངོ་སྐལ་དུ་བབ་པ་བླ་མ་དང་རྡོ་རྗེ་གཞོན་ནུ་གཉིས་སུ་མེད་པའི་སྤྱན་སྔར། རྗེས་གནང་ཟབ་མོ་ཞུ་བའི་ཡོན་ཏུ་མཎྜལ་འབུལ་འཚལ། དེ་ལྟར་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་ལན་གསུམ་གྱི་བར་དུ་མཛོད། སློབ་དཔོན་བདག་ལ་དགོངས་སུ་གསོལ། །སངས་རྒྱས་བསྟན་པ་སྲུང་བ་དང་། །སེམས་ཅན་ཀུན་ལ་ཕན་པའི་ཕྱིར། །ཧེ་རུ་ཀ་དཔལ་འཁོར་བཅས་ཀྱི། །མངོན་སྤྱོད་དྲག་པོའི་ཕྲིན་ལས་ཀྱིས། །
བདག་ལ་རྗེས་སུ་བཟུང་དུ་གསོལ། །དེ་ལྟར་གསོལ་བ་བཏབ་ནས། ཁྱོད་རང་རྣམས་ཀྱིས་རྒྱུད་དག་པར་བྱ་བའི་སླད་དུ་དམིགས་པ་འདི་བཞིན་དུ་མཛོད། མདུན་གྱི་ནམ་མཁར་བླ་མ་དང་རྡོ་རྗེ་གཞོན་ནུའི་ལྷ་ཚོགས་གཉིས་སུ་མེད་པ་ལ་སངས་རྒྱས་བྱང་སེམས། དཔའ་བོ་མཁའ་འགྲོའི་ཚོགས་ཀྱིས་བསྐོར་ནས་བཞུགས་པའི་སྤྱན་སྔར་ཁྱོད་རང་རྣམས་ཀྱིས་གཙོས་པའི་སེམས་ཅན་ཐམས་ཅད་སྐྱབས་སུ་འགྲོ་ཞིང་སྡིག་པ་བཤགས་པ་ལ་སོགས་པ་ཐུན་མོང་གི་དམ་ཚིག་དང་སྡོམ་པ་བཟུང་སྙམ་པས་འདིའི་རྗེས་ཟློས་ལན་གསུམ་གྱི་བར་དུ་མཛོད། སངས་རྒྱས་ཆོས་དང་དགེ་འདུན་ལ་སོགས་གཏོར་ཟློག་ལྟར། དེ་ལྟར་ཐུན་མོང་གི་སྡོམ་པ་བཟུང་ནས་ཐུན་མོང་མ་ཡིན་པ་རིག་ལྔ་སྤྱི་དང་བྱེ་བྲག་གིས་བསྡུས་པའི་དམ་ཚིག་དང་སྡོམ་པ་རྣམས་ཀྱང་བཟུང་སྙམ་པས་འདིའི་རྗེས་ཟློས་མཛོད། བདེ་གཤེགས་རྒྱལ་བ་འཁོར་དང་བཅས་པ་སོགས་ལན་གསུམ། དེ་དག་གི་སྒོ་ནས་དམ་ཚིག་དང་སྡོམ་པ་རྣམས་བཟུང་ནས། རྗེས་སུ་གནང་བ་བསྒྲུབ་པ་ལ། ཐོག་མར་སློབ་དཔོན་གྱིས་དབང་རྫས་ལྷར་བསྐྱེད་ཅིང་བྱིན་གྱིས་རློབ་པ་ནི། ཤུ་ནྱ་ཏཱ་སོགས། དབང་རྫས་རྣམས་སྐད་ཅིག་གིས་བཅོམ་ལྡན་འདས་རྡོ་རྗེ་གཞོན་ནུ་ལྷ་ལྔ་བཅུ་རྩ་གཅིག་ཏུ་གྱུར་པ་ནི། ཧཱུྃ་དབུས་སུ་དཔལ་ཆེན་ཁྲོ་བོའི་རྒྱལ། །དུས་མཐའི་སྤྲིན་ལྟར་སོགས་ནས། དབུས་ན་བཞུགས། །ཡུམ་ཆེན་འཁོར་ལོ་རྒྱས་འདེབས་སོགས།
གཉིས་མེད་འཁྱུད། །སྟེང་དུ་ཁྲོ་བོ་ཧཱུྃ་མཛོད་སྡེ། །སོགས་ནས། ཏཾ་ཏཾ་འདྲ་བ། གཞན་ཡང་དབང་ཕྱུག་མ་ཉི་ཤུ་རྩ་བརྒྱད་སོགས་དཔལ་ཆེན་པོའི་དཀྱིལ་འཁོར་ནས། གྲུབ་བར་གྱུར། གྱི་བར་བརྗོད་པ་ལས་བར་གྱི་བསྐྱེད་སྔགས་ཐམས་ཅད་དོར་རོ། །ཨོཾ་བཛྲ་ཀཱི་ལི་ཀཱི་ལ་ཡ་ས་པ་རི་ཝཱ་ར་བཛྲ་ས་མཱ་ཛ། ཛཿཧཱུྃ་་བཾ་ཧོཿ ལྷ་དེ་ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿཐུགས་ཀར་ཧཱུྃ། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་བཛྲ་སྭ་བྷཱ་ཝ་ཨཱརྨ་ཀོ྅ཧཾ། ཧཱུཾ་ཐབས་ཀྱི་སྤྱོད་པས་འགྲོ་དོན་སོགས་ནས། ཀརྨ་ཀྲོ་དྷཱི་ཤྭ་རི་ཨཱཿགཙོ་བོ་ལ་མི་བསྐྱོད་པ། འཁོར་རྣམས་ལ་གཙོ་བོ་ཉིད་ཀྱིས་དབུ་བརྒྱན་པར་གྱུར། གཙོ་འཁོར་ཡོངས་རྫོགས་ཀྱི་སྙིང་པོ་དང་། སུཾ་ཏྲི་ཀ་རཀྴ་བྷྱོཿ ཐིབ་ཐིབ་ཙ་ཀྲ་བྷྱོཿ སྙིང་ཁ་རག་དུན་ཏྲི་བྷྱོཿ ཧྲི་་ཤིག །སེ་ན་ཏུ་བ། །བ་རག་རྦད། དུཾ་བུ་བྷྱོཿབཛྲར་ཏྲི་རཀྵ་ཙ་ཏུ་རྨཱ་ར་ཡ་ཧཱུྃ། གནོད་བྱེད་དགྲ་སྒེགས་ཐམས་ཅད་མཱ་ར་ཡ་ཧཱུྃ་ཕཊ། ཅེས་སོགས་ཐུན་སྔགས་རྣམས་ཇི་ལྟར་རིགས་པ་བཟླས་ལ། དེ་ལྟར་སྔགས་ཀྱི་བྱིན་རླབས་སྟེ་གཟི་བརྗིད་བསྐྱེད་པ་ལ་བསྟེན་ནས། དབང་བསྐུར་བའི་ཚེ་ཁྱོད་རང་རྣམས་ཀྱི་སྤང་བྱ་དེ་དང་དེ་དག །ལྷ་དེ་དང་དེར་བྱིན་གྱིས་རློབས་པ་དང་། སྲུང་མ་རྣམས་ཀྱི་ཕྲིན་ལས་བཞི་བསྒྲུབ་པ་ཐུན་རྫས་རྣམས་སོ་སོར་མཐུ་བསྐྱེད་པའི་ནུས་པ་དང་ལྡན་པར་བྱིན་གྱི་རླབས་པའི་མོས་པ་མཛོད། དེ་ལྟར་དབང་རྫས་ལྷར་བསྐྱེད་ཅིང་བྱིན་གྱི་རླབས་པ་སོགས་སྔོན་འགྲོའི་ཆོས་སོང་ནས། །ད་
དངོས་གཞི་རྗེས་སུ་གནང་བ་ལ་དོན་ཚན་བདུན་ཏེ། དེ་ཡང་འབྲས་བུ་སྤྲུལ་སྐུའི་རྗེས་གནང་། སྐུའི་ཆ་རྐྱེན་གྱི་རྗེས་གནང་། གསུང་བཟླས་ཕྲེང་གི་རྗེས་གནང་། ཐུགས་ཡེ་ཤེས་སེམས་དཔའི་རྗེས་གནང་། མཛད་ཕྲིན་ལས་ཀྱི་རྗེས་གནང་། དྲག་པོ་སྒྲོལ་བའི་རྗེས་གནང་། རང་རྟགས་ཕྱག་རྒྱའི་རྗེས་གནང་རྣམས་སུ་ཡོད་པ་ལས། ཐོག་མར་ཁྱེད་རང་རྣམས་དམིགས་པ་འདི་བཞིན་ཏུ་མཛོད། སློབ་དཔོན་གྱིས་ཨོཾ་བཛྲ་ཀཱི་ལི་ཀཱི་ལ་ཡ་སརྦ་བི།།།བྷནྦྷ་ཧཱུྃ་ཕཊ། ཞེས་བརྗོད་པའི་རྐྱེན་གྱིས་ཁྱོད་རང་རྣམས་སྐད་ཅིག་ཙམ་གྱིས་བཅོམ་ལྡན་འདས་རྡོ་རྗེ་གཞོན་ནུ་སྐུ་མདོག་མཐིང་ནག་ཞལ་གསུམ་ཕྱག་དྲུག་པ་ཡུམ་འཁོར་ལོ་རྒྱས་འདེབས་མ་དང་མཉམ་པར་སྦྱོར་བའི་སྐུ་ཅན་དུ་གྱུར་པའི་མོས་པ་མཛོད། དེ་ལ་དང་པོ་འབྲས་བུ་སྤྲུལ་སྐུའི་རྗེས་གནང་གི་དོན་དེ་ཐོག་མར་གཙོ་བོ་ཡབ་ཡུམ་གྱི་སྐུ་སྤྱི་བོར་གཏུག་ཅིང་། དབང་བསྐུར་བའི་མོས་པ་མཛོད། གཙོ་བོ་ཡབ་ཡུམ་གྱི་ཙཀ་ལེ་ཐོགས་ཏེ། ཧཱུྃ། །དབུས་ཀྱི་ཁྲག་འཐུང་ཆེན་པོ་ནི། །དབུ་གསུམ་ཕྱག་དྲུག་ཞབས་བཞིར་བསྒྲད། །གཡས་དཀར་གཡོན་དམར་དབུས་མཐིང་ཞལ། །རྡོ་རྗེ་རྩེ་དགུ་རྩེ་ལྔ་དང་། །མེ་ཕུང་ཁ་ཊྭཱཾ་ཕུར་བུ་འདྲིལ། །སྐུ་སྟོད་གླང་ཆེན་ཀོ་རློན་གསོལ། །སྐུ་སྨད་སྟག་གི་ཤམ་ཐབས་ཅན། །ཞིང་ཆེན་གོས་ཟུང་གཡང་གཞི་གྱོན། །སྤྲུལ་ཆེན་རིག་བཞིའི་སྐུ་ལ་བརྒྱན། །ཐོད་པ་ཚར་གསུམ་སེ་རལ་ཁ། །ཐུགས་
ནང་འབར་བའི་སྲོག་ཀྱང་བཞུགས། །དབུ་ལ་རྫོགས་པའི་སངས་རྒྱས་སྤྲུལ། །འཁོར་ལོ་རྒྱས་འདེབས་སྐུ་ལ་འཁྲིལ། །བསྐལ་པའི་མེ་རིའི་ཀློང་ན་བཞུགས། །ཐུགས་ཀྱི་སྤྲུལ་པ་ཕྱོགས་བཅུར་འགྱེད། །ཡབ་ཡུམ་རྫོགས་པ་ཉི་དབང་བྱིན་པས། །བགེགས་སོགས་དབང་དུ་སྡུད་པ་དང་། །ལྷ་སྐུ་བསྒོམ་པའི་དབང་ཐོབ་ཤོག །ཙཀླི་སྤྱི་བོར་བཞག་ལ། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བནྡྷ་ཧཱུྃ་ཕཊ། ཨོཾ་དིཔྟ་ཙཀྲ་ཧ་ན་ཧ་ན་ཧཱུྃ་ཕཊ། ཨ་བྷི་ཥིཉྩ་ཨཱཿཁྱེད་རྣམས་ལ་གཙོ་བོ་དཔལ་ཆེན་རྡོ་རྗེ་གཞོན་ནུ་ཡབ་ཡུམ་གྱི་དབང་བསྐུར་བས་ཀུན་གཞིའི་རྣམ་པར་ཤེས་པ་གནས་སུ་དག་ནས་ཡི་དམ་ལྷའི་དབང་ཐོབ་པར་གྱུར་ཅིག། དེ་ནས་ཧཱུྃ་མཛད་སོགས་ཁྲོ་བཅུའི་ཙ་ཀླི་རིམ་པ་བཞིན་ཐོགས་ཏེ་དབང་བསྐུར་ལ། ཁྲོ་བོ་ཆེན་པོ་ཧཱུྃ་ཀ་ར། །འདོད་ཆགས་རྣམ་པར་དག་པ་སྟེ། །དབུ་གསུམ་ཕྱག་དྲུག་གཤོག་པ་ཅན། །རྡོ་རྗེ་སྒྲ་འབྱིན་སྐུ་ལ་འཁྲིལ། །སྤྲུལ་པ་པག་དང་རྨིག་བུར་བཅས། །ཡབ་ཡུམ་སྤྲུལ་པའི་དབང་སྦྱིན་པས། །ཡེ་ཤེས་ཕ་རོལ་ཕྱིན་རྫོགས་ཏེ། །ཚངས་པ་འདུལ་བའི་དབང་ཐོབ་ཤོག །ཨོཾ་བཛྲ་ཀྲོ་དྷ་ཧཱུྃ་ཀ་ར་ཧཱུྃ། གརྫ་གརྫ་ཧཱུྃ་ཕཊ། ཨ་བྷི་ཥིཉྩ་ཨཱཿཧཱུྃ་མཛད་ཀྱི་དབང་བསྐུར་བས་ཡེ་ཤེས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ། འདོད་ཆགས་རྣམ་པར་དག་ནས་སྐྱེ་འཆི་ལ་དབང་བའི་དབང་ཐོབ་པར་གྱུར་ཅིག །ཁྲོ་བོ་ཆེན་པོ་རྣམ་པར་རྒྱལ། །ངག་འཁྱལ་རྣམ་པར་དག་པ་
པ་སྟེ། །དབུ་གསུམ་ཕྱག༴ རྡོ་རྗེ་སྒེག་མོ༴ སྤྲུལ་པ་སྟག་དང་བྱ་རྒོད་བཅས། །ཡབ་ཡུམ་སྤྲུལ་པའི་དབང་༴ སྦྱིན་པའི་ཕ་རོལ་ཕྱིན་རྫོགས་ཏེ། །བརྒྱ་བྱིན་འདུལ་བའི་དབང་༴ ཨོཾ་བཛྲ་ཀྲོ་དྷ་བི་ཛ་ཡ་ཧཱུྃ་ཧ་ན་ཧ་ན་ཧཱུྃ་ཕཊ། ཨ་བྷི་ཥིཉྩ་ཨཱཿརྣམ་པར་རྒྱལ་བའི་དབང་བསྐུར་བས་སོགས་འདི་མན་ཐམས་ཅད་འདྲ། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ། ངག་འཁྱལ་རྣམ་པར་དག་ནས་སེམས་ལ་དབང་བའི་དབང་ཐོབ་པར་གྱུར་ཅིག །ཁྲོ་བོ་ཆེན་པོ་དབྱུག་སྔོན་ཅན། །རྫུན་དུ་སྨྲ་བ་དག་པ་སྟེ། །དབུ་གསུམ༴ རྡོ་རྗེ་སྡེར་མོ༴ སྤྲུལ་པ་གཡག་དང་བྱ་རོག་བཅས། །ཡབ་ཡུམ་སྤྲུལ་པའི༴ བསམ་གཏན་ཕ་རོལ༴ མེ་ལྷ་འདུལ་བའི༴ ཨོཾ་བཛྲ་ཀྲོ་དྷ་ནཱི་ལ་དཎྜ་ཧཱུྃ་ད་ཧ་ད་ཧ་ཧཱུྃ་ཕཊ། ཨ་བྷི་ཥིཉྩ་ཨཱཿདབྱུག་སྔོན་ཅན་གྱི༴ བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ་རྫུན་དུ་སྨྲ་བ་རྣམ་པར་དག་ནས། ཡེ་ཤེས་ལ་དབང་བའི་དབང་ཐོབ་པར་གྱུར་ཅིག །ཁྲོ་བོ་ཆེན་པོ་གཤིན་རྗེ་གཤེད། །སྲོག་གཅོད༴ དབུ་གསུམ༴ རྡོ་རྗེ་དུར་ཁྲོད༴ སྤྲུལ་པ་ཤ་བ་འུག་པ་བཅས། །ཡབ་ཡུམ་སྤྲུལ༴ ཚུལ་ཁྲིམས༴ གཤིན་རྗེ་འདུལ༴ ཨོཾ་བཛྲ་ཀྲོ་དྷ་ཡ་མཱནྟ་ཀ་ཧཱུྃ་པ་ཙ་པ་ཙ་ཧཱུྃ་ཕཊ། ཨ་བྷི་ཥིཉྩ་ཨཱཿགཤིན་རྗེ་གཤེད༴ ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ། སྲོག་གཅོད་རྣམ་པར་དག་ནས་ཚེ་ལ་དབང་བའི་དབང་ཐོབ་པར་གྱུར་
ཅིག །ཁྲོ་བོ་ཆེན་པོ་མི་གཡོ་མགོན། །ལོག་རྟོག༴ དབུ་གསུམ་ཕྱག༴ རྡོ་རྗེ་གཏུན་ཁུང་༴ སྤྲུལ་པ་གཟིག་དང་ཁྭ་ཏ་བཅས། །ཡབ་ཡུམ་སྤྲུལ༴ བཟོད་པའི༴ བདེན་བྲལ༴ ཨོཾ་བཛྲ་ཀྲོ་དྷ་ཨཱརླ་ཨ་ཙ་ལ་ཧཱུྃ་བྷནྡྷ་བྷནྡྷ་ཧཱུྃ་ཕཊ། ཨ་བྷི་ཥིཉྩ་ཨཱཿ མི་གཡོ་བས༴ བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ། ལོག་པར་ལྟ་བ་རྣམ་པར་དག་ནས། སྐྱེ་བ་ལ་དབང་བའི་དབང་ཐོབ་པར་གྱུར་ཅིག །ཁྲོ་བོ་ཆེན་པོ་རྟ་མཆོག་དཔལ། ཕྲ་མ༴དབུ་གསུམ༴ རྡོ་རྗེ་གཏུམ་མོ༴ སྤྲུལ་པ་བྱི་ལ་པུ་ཤུད་བཅས། །ཡབ་ཡུམ༴ བརྩོན་འགྲུས༴ ཆུ་བདག༴ ཨོཾ་བཛྲ་ཀྲོ་དྷ་ཧྱ་གྲི་ཝ་ཧཱུྃ་ཧུ་ལུ་ཧུ་ལུ་ཧཱུྃ་ཕཊ། ཨ་བྷི་ཥིཉྩ་ཨཱཿ རྟ་མགྲིན༴ བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ། ཕྲ་མ་རྣམ་པར་དག་ནས་ཆོས་ལ་དབང་བའི་དབང་ཐོབ་པར༴ ཁྲོ་བོ་ཆེན་པོ་འདོད་པའི་རྒྱལ། །མ་བྱིན་ལེན༴ དབུ་གསུམ༴ རྡོ་རྗེ་མདའ་སྙེམས༴ སྤྲུལ་པ་སྤྱང་ཀི་ཁྲར་བཅས་པ། །ཡབ་ཡུམ༴ ཤེས་རབ༴ རླུང་ལྷ༴ ཨོཾ་བཛྲ་ཀྲོ་དྷ་ཨ་པ་ར་ཛི་ཏ་ཧཱུྃ་ཏིཥྛ་ཏིཥྛ་ཧཱུྃ་ཕཊ། ཨ་བྷི་ཥིཉྩ༴ འདོད་རྒྱལ་གྱི༴ ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ། མ་བྱིན་ལེན་རྣམ་པར་དག་ནས་ཡོ་བྱད་ལ་དབང་བའི་དབང་ཐོབ་པར༴ ཁྲོ་བོ་ཆེན་པོ་བདུད་རྩི་འཁྱིལ། །ཚིག་རྩུབ༴ དབུ་གསུམ༴ རྡོ་རྗེ་རླུང་འབྱིན༴ སྤྲུལ་པ་སེང་གེ་ཕ་ཝཾ་བཅས། །
ཡབ་ཡུམ༴ ཐབས་ཀྱི༴ གནོད་སྦྱིན༴ ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལཱི་ཧཱུྃ་ཚིནྡྷ་ཚིནྡྷ་ཧཱུྃ་ཕཊ། ཨ་བྷི་ཥིཉྩ་ཨཱཿ བདུད་རྩི་འཁྱིལ་པས༴ ཐབས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ། ཚིག་རྩུབ་རྣམ་པར་དག་ནས་རྫུ་འཕྲུལ་ལ་དབང་བའི་དབང་ཐོབ་པར་གྱུར༴ ཁྲོ་ཆེན་ཁམས་གསུམ་རྣམ་པར་རྒྱལ། །གནོད་སེམས༴ དབུ་གསུམ༴ རྡོ་རྗེ་གསོད་བྱེད༴ སྤྲུལ་པ་དྲེད་དང་སྲེ་མོང་བཅས། །ཡབ་ཡུམ༴ སྟོབས་ཀྱི༴ དབང་ལྡན༴ ཨོཾ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུྃ་བནྡྷ་བནྡྷ་ཧཱུྃ་ཕཊ། ཨ་བྷི་ཥིཉྩ༴ཁམས་གསུམ་རྣམ་པར་རྒྱལ༴ སྟོབས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ། གནོད་སེམས་རྣམ་པར་དག་ནས་མོས་པ་ལ་དབང་བའི་དབང་ཐོབ་བར༴ ཁྲོ་བོ་ཆེན་པོ་སྟོབས་པོ་ཆེ། །བརྣབ་སེམས༴ དབུ་གསུམ༴ རྡོ་རྗེ་སྐྱོད་མ༴ སྤྲུལ་པ་དོམ་དང་བྱི་བར་བཅས། །ཡབ་ཡུམ༴ སྨོན་ལམ༴ ས་བདག༴ ཨོཾ་བཛྲ་ཀྲོ་དྷ་མ་ཧཱ་བ་ལ་ཧཱུྃ་སྥོ་ཊ་སྥོ་ཊ་ཧཱུྃ་ཕཊ། ཨ་བྷི་ཥིཉྩ་ཨཱཿསྟོབས་པོ་ཆེས༴སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ། བརྣབ་སེམས་རྣམ་པར་དག་ནས་སྨོན་ལམ་ལ་དབང་བའི་དབང་ཐོབ་པར༴ དེ་ནས་སྒོ་མ་བཞིའི་ཙཀླི་རིམ་པར་ཐོགས་ལ། ཤར་སྒོ་པུ་ཤུད་མགོ་ཅན་ནི། །རྟག་ལྟ་གནས་སུ་དག་པ་སྟེ། །མདོག་དཀར་འཛིན་པའི་ལྕགས་ཀྱུ་བསྣམས། །བྱམས་པ་ཆེན་པོའི་དབང་ཐོབ་ཤོག །ཨོཾ་བཛྲ་ཡཀྵི་ི་
ཧཱུྃ་ཛཿ ཨ་བྷི་ཥིཉྩ༴ གནོད་སྦྱིན་མས༴ རྟག་པར་ལྟ་བ་གནས་སུ་དག་སྟེ་བྱམས་པ་ཆེན་པོའི་དབང་ཐོབ་པར་གྱུར༴ ལྷོ་སྒོར་བྱ་རོག་མགོ་ཅན་ནི། །ཆད་ལྟ་གནས་སུ༴ འདྲེན་བྱེད་སེར་མོ་ཞགས་པ་བསྣམས། །སྙིང་རྗེ་ཆེན་པོའི༴ ཨོཾ་བཛྲ་བྷཻ་ར་ཝེ་ཧཱུྃ་ཧཱུྃ། ཨ་བྷི་ཥིཉྩ༴ འཇིགས་བྱེད་མ༴ ཆང་ལྷ་གནས་སུ་དག་སྟེ། སྙིང་རྗེ་ཆེན་པོའི་དབང་ཐོབ་པར་གྱུར༴ ནུབ་སྒོར་སྲིན་བྱའི་མགོ་ཅན་ནི། །བདག་ཏུ་ལྟ་བ༴ སྡོམ་བྱེད་དམར་ནག་ལྕགས་སྒྲོག་བསྣམས། །དགའ་བ་ཆེན་པོའི༴ ཨོཾ་བཛྲ་ཨ་མྲྀ་ཏ་ཧཱུྃ་བྃ། ཨ་བྷི་ཥིཉྩ་ཨཱཿ སྡོམ་བྱེད་མས༴ བདག་ཏུ་ལྟ་བ་གནས་སུ་དག་སྟེ་དགའ་བ་ཆེན་པོའི་དབང་ཐོབ་པར་གྱུར༴ བྱང་སྒོར་ཁྲ་ཡི་མགོ་ཅན་ནི། །མཚན་མར་ལྟ་བ་དག་པ་སྟེ། །རླག་བྱེད་ལྗང་ནག་དྲིལ་བུ་བསྣམས། །བཏང་སྙོམས་ཆེན་པོའི་དབང་ཐོབ་ཤོག །ཨོཾ་བཛྲ་མཱ་ར་ི་ཧཱུྃ་ཧོཿ ཨ་བྷི་ཥིཉྩ་ཨཱཿ གསོད་བྱེད་མ༴ མཚན་མར་ལྟ་བ་གནས་སུ་དག་ནས་བཏང་སྙོམས་ཆེན་པོའི་དབང་ཐོབ་པར་གྱུར་ཅིག །བསེ་མོ་བཞི་དང་གནོད་སྦྱིན་བཞིའི་སྐུ་རིམ་གྱིས་ཕྱག་ཏུ་གཏད་པ་ལ་བསྟན་ནས་དབང་བསྐུར་བ་མོས་པ་མཛོད། ཙཀླི་ལག་ཏུ་གཏད་ལ། ཐུགས་དམ་དབང་གི་བསྒྲུབ་ལ་རྗེས་དགོངས་ལ། །ཨེ་ཧི་ཨེ་ཧི་དམ་ཅན་བསེ་མོ་བཞི། །དམ་ཉམས་སྒྲོལ་ཞིང་སྒྲུབ་ལ་དངོས་གྲུབ་སྩོལ། །
མངོན་སྤྱོད་དྲག་པོའི་ལས་ཀྱི་དབང་བསྐུར་རོ། །ཛ་ཡེ་བི་ཛ་ཡེ་ཨ་ཛི་ཏ་ཨ་པ་ར་ཛི་ཏེ་མ་ར་སེ་ན་པྲ་མརྡྷ་ནི་ཧཱུྃ་ཕཊ། ཨ་བྷི་ཥིཉྩ་ཨཱཿ བསེ་ལྕགས་དུང་གསུམ་བཀའ་ཡི་བྱ་ར་ཅན། །གནོད་སྦྱིན་ལྟོ་འཕྱེ་ཕྱག་བརྙན་ཕོ་ཉའི་ཚོགས། །ཐ་མའི་དུས་འདིར་བསྟན་པ་བསྲུང་མཛད་པའི། །མངོན་སྤྱོད་དྲག་པོའི་ལས་ཀྱི་དབང་བསྐུར་རོ། །ཧ་ས་ཡ་ར་ཧ་ས་ཡ་ར་ཧྲཱིཿདཎྜ་ཧཱུྃ་ཕཊ། ཨ་བེ་ཤ་ཡ་ཨ་བེ་ཤ་ཡ་ཧཱུྃ་ཕཊ། ཤྲཱི་ཀྲི༚་ཨ་ན་ཡ་ཧཱུྃ་ཕཊ། ཛྭ་ལ་པཱ་ཡ་ཛྭ་ལ་པཱ་ཡ་ཧཱུྃ་ཕཊ། ཏ་ཐཱ་ཡ་ཏ་ཐཱ་ཡ་ཧཱུྃ་ཕཊ། བི་ད་ཡ་བི་ད་ཡ་ཧཱུྃ་ཕཊ། ཨ་བྷི་ཥིཉྩ་ཨཱཿ དེ་རྣམས་ཀྱི་འབྲས་བུ་སྤྲུལ་སྐུའི་རྗེས་སུ་གནང་བ་སོང་ནས། དེ་ནས་གཉིས་པ་སྐུ་ཆ་རྐྱེན་གྱི་རྗེས་སུ་གནང་བའི་དང་པོ་སྐུའི་དབང་བསྐུར་བའི་དོན་དུ་དམིགས་པ་འདི་བཞིན་མཛོད། སློབ་དཔོན་གྱིས། ཨོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། གཞུང་ལས་འདིར་སློབ་མ་ལ་ལྷའི་ཁ་དོག་དང་མཐུན་པའི་ཆོས་གོས་བཀོན་པར་གསུངས་ཀྱང་ཕྱག་ལེན་ཁ་མི་མཛད། ཞེས་བརྗོད་པའི་རྐྱེན་གྱིས་ཁྱེད་རང་རྣམས་འདུག་གནས་དང་ཕུང་ཁམས་སྐྱེ་མཆེད་ཐམས་ཅད་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་ཨོཾ་བཛྲ་ཀཱི་ལི་ཀཱི་ལ་ལ་སརྦ་བིགྷྣཱན་བནྡྷ་ཧཱུྃ་ཕཊ། ཞེས་བརྗོད་པའི་རྐྱེན་གྱིས་ཆོས་ཀྱི་འབྱུང་གནས་གྲུ་གསུམ་མཐིང་ནག་ཡངས་ཤིང་རྒྱ་ཆེ་བ་ཁ་ཁྱེར་ལ་རྡོ་རྗེ་དང་། མེ་རི་འབར་བས་མཚན་པའི་ནང་དུ། པདྨ་ཉི་མ་
ཟླ་བ་དབང་ཕྱུག་ཕོ་མོ་བསྣོལ་བའི་གདན་གྱི་སྟེང་དུ། ཁྱེད་རང་རྣམས་སྐད་ཅིག་ཙམ་གྱིས་རྡོ་རྗེ་གཞོན་ནུ་སྐུ་མདོག་མཐིང་ནག་ཞལ་གསུམ་ཕྱག་དྲུག་པ། ཞལ་གཡས་དཀར། གཡོན་དམར། དབུས་མཐིང་ག །ཕྱག་དྲུག་གིས་གཡས་དང་པོ་གཉིས་ཀྱི་རྡོ་རྗེ་རྩེ་དགུ་པ་དང་རྩེ་ལྔ་པ། གཡོན་དང་པོ་གཉིས་ཀྱི་མེ་དཔུང་འབར་བ་དང་རྩེ་གསུམ་བསྣམས་པ། ཐ་མ་གཉིས་ཀྱི་རི་རབ་ཀྱི་ཕུར་བུ་འདྲིལ་ཞིང་དུར་ཁྲོད་ཀྱི་ཆས་བརྒྱད་ཀྱིས་བརྒྱན་པའི་པང་ན་ཡུམ་འཁོར་ལོ་རྒྱས་འདེབས་མ་སྔོན་མོ། ཞལ་གཅིག་ཕྱག་གཉིས་གཡས་འཁོར་ལོ། གཡོན་ཐོད་ཁྲག་རུས་པའི་རྒྱན་གྱིས་བརྒྱན་པ་དང་མཉམ་པར་སྦྱོར་བའི་སྐུ་ཅན་རེ་རེ་གསལ་ལམ་སྟེ་བྱུང་བའི་མོས་པ་མཛོད། དེ་ལ་སློབ་དཔོན་གྱིས་གཙོ་བོ་ཡབ་ཡུམ་གྱི་སྐུ་གནས་གསུམ་དུ་གཏུགས་པ་ལ་བརྟེན་ནས་སྐུའི་དབང་བསྐུར་བའི་མོས་པ་མཛོད། གཙོ་བོའི་སྐུ་ཙག་གཏད་ལ། ཕུང་པོ་མ་སྤངས་ངོ་བོ་ཉིད། །གསང་བའི་སྙིང་པོ་བརྗོད་ལས་འདས། །ཡཀྵ་མེ་དབལ་སྐུར་བསྒོམ་སྟེ། །ལྷ་ཡི་རྣལ་འབྱོར་ངེས་པར་གནས། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བནྡྷ་ཧཱུྃ་ཕཊ། ཀཱ་ཡ་ཝཱཀ་ཙིཏྟ་ཨ་བྷི་ཥིཉྩ་ཨཱཿསྒོ་གསུམ་རྣམ་པར་དག་པ་ལྷ་བསྒོམ་པའི་དབང་བསྐུར་བས་ལྷའི་སྐུ་གསུང་ཐུགས་ཀྱི་དབང་ཐོབ་པར་གྱུར་ཅིག །རལ་པའམ་སྐྲ་ཚབ་བཀོན་ལ། རང་བཞིན་མི་འགྱུར་ཆོས་དབྱིངས་དག་པ་ཡི། །
མཐིང་ནག་རལ་པའི་ཅོད་པན་དབང་བསྐུར་བས། །འཁོར་བ་རྟག་ཆད་གཉིས་ཀྱི་མཐའ་བསལ་ཏེ། །མ་གཡོས་དབུ་མ་ཆེན་པོའི་དོན་རྟོགས་ཤོག །ཀྲིཥྞ་ཛ་ཊ་མུ་ཀུ་ཊ་ཨ་བྷི་ཥིཉྩ། ཆོས་ཉིད་རྟོགས་པ་རལ་པའི་ཅོད་པན་གྱི་དབང་བསྐུར་བས་འཁོར་བ་རྟག་ཆད་གཉིས་ཀྱི་མཐའ་བསལ་ཏེ་མ་གཡོས་དབུ་མ་ཆེན་པོའི་དོན་རྟོགས་པར་གྱུར་ཅིག །དབུ་རྒྱན་བཅིངས་ལ། ཧཱུྃ། སྲིད་པ་གསུམ་ལ་དབང་བསྒྱུར་ཞིང་། །བྱང་ཆུབ་སེམས་ནི་མངོན་དུ་རྟགས། ཁམས་གསུམ་ཡེ་ཤེས་བསྐྱེད་པའི་ཕྱིར། །དབུ་ལ་རིགས་ལྔའི་དབང་བསྐུར་རོ། །ཧཱུྃ་ཨོཾ་སྭཱ་ཨོཾཱཿཧཱ། ཨ་བྷི་ཥིཉྩ་ཨཱཿཡེ་ཤེས་ལྔ་ཡོངས་སུ་གྲུབ་པ་དབུ་རྒྱན་གྱི་དབང་བསྐུར་བས་ཡེ་ཤེས་ལྔའི་དབང་ཐོབ་པར་གྱུར་ཅིག །ཕྱག་མཚན་དྲུག་གཏད་ལ། ཕ་རོལ་ཕྱིན་པ་དྲུག་གི་རྟགས། །ཡེ་ཤེས་དྲུག་གི་རང་བཞིན་པ། །ཕྱག་མཚན་དྲུག་གི་དབང་བསྐུར་བས། །རྒྱུད་དྲུག་གནས་སུ་སྒྲོལ་བར་ཤོག །ན་པ་བཛྲ། པཉྩ་བཛྲ། བཛྲ་ཨ་ན་ལ། བཛྲ་ཏྲི་ཤུ་ལ། བཛྲ་ཀི་ལ་ཡ། ཨ་བྷི་ཥིཉྩ་ཨཱཿརྒྱུ་མཚན་ལྷུན་གྱིས་གྲུབ་པ་ཕྱག་མཚན་དྲུག་གི་དབང་བསྐུར་བས། ཕ་རོལ་ཏུ་ཕྱིན་པ་དྲུག་རྫོགས་པའི་དབང་ཐོབ་པར་གྱུར་ཅིག །ཐོད་པ་ཚར་གསུམ་གཏད་ལ། སྐམ་པོ་ཆོས་སྐུ་རང་རིད་ལོངས་སྐུ་ལ། །རློན་པ་སྤྲུལ་པའི་སྐུ་ཡི་རང་བཞིན་ཏེ། །ཐོད་པ་ཚར་གསུམ་ཕྲེང་བའི་དབང་བསྐུར་བས། །རྒྱལ་བའི་སྐུ་གསུམ་རྒྱན་
གྱིས་མཛེས་པར་ཤོག །ཏྲི་མཱ་ལཀ་པཱ་ལ་ཨ་བྷི་ཥིཉྩ། སྐུ་གསུམ་ལྷུན་གྱིས་གྲུབ་པ་ཐོད་པ་ཚར་གསུམ་གྱི་དབང་བསྐུར་བས། དུས་གསུམ་གྱི་འགྲོ་བའི་དོན་བྱེད་པར་གྱུར་ཅིག །སྦྲུལ་རིགས་བཞིའི་ཆུན་པོ་གཏད་ནས། །ཞེ་སྡང་ཆེན་པོའི་རང་བཞིན་རྣམ་དག་པ། །མཉེན་ལྕུགས་འཁྲིལ་བ་སྤྲུལ་གྱི་ཆུན་པོ་འདིས། །ཀླུ་རྒྱལ་རིགས་བཞི་དབང་དུ་བསྡུས་ནས་ཀྱང་། །ཕྲིན་ལས་རྣམ་བཞིས་གདུག་པ་ཞི་བར་ཤོག །ཀཱུ་ལ་ཙ་ཏུ་སརྦ་ཨ་བྷི་ཥིཉྩ། ཞེ་སྡང་རྣམ་པར་དག་པ་སྤྲུལ་གྱི་ཆུན་པོས་དབང་བསྐུར་བས། ཀླུ་རིགས་བཞི་དབང་དུ་བསྡུས་ནས་ཕྲིན་ལས་བཞིས་འགྲོ་བའི་དོན་བྱེད་པར་གྱུར་ཅིག །འགོ་བའི་གོས་གསུམ་གཏད་ལ། གླང་ཆེན་ཀོ་རློན་སྟོབས་བཅུའི་བརྗིད་དང་ལྡན། །ཚུལ་ཁྲིམས་གཡང་བཞི་ཐབས་ལ་མཁས་པ་དང་། །སྟག་ལྤགས་ཤམ་ཐབས་དཔལ་འབར་ལྡན་པ་ཡི། །ན་བཟའ་གསུམ་གྱི་དབང་མཆོག་འདི་བསྐུར་རོ། །ག་ཛ་ཙརྨ། མ་ནུ་ཥེ་ཙརྨ། བྱ་གྷྲ་ཙརྨ། ཨ་བྷི་ཥིཉྩ། དུག་གསུམ་གནས་སུ་དག་པ་ན་བཟའ་གསུམ་གྱི་དབང་བསྐུར་བས། དུག་གསུམ་བཅོམ་ནས་སྐུ་གསུམ་ཐོབ་པར་གྱུར་ཅིག །ཁྱུང་གཤོག་གཏད་ལ། ཁམས་གསུམ་ཟིལ་གནོན་རྡོ་རྗེའི་གཤོག་པ་འདི། །སྲིད་གསུམ་འདེགས་བྱེད་རླུང་གི་རང་བཞིན་ཏེ། །གཡས་པ་ཐབས་ལ་གཡོན་པ་ཤེས་རབ་ཡིན། །རྡོ་རྗེ་གཤོག་པའི་དབང་མཆོག་ཐོབ་པར་
ཤོག །བཛྲ་པཀྵི་ཏི་ཨ་བྷི་ཥིཉྩ། ཁམས་གསུམ་ཟིལ་གྱིས་གནོན་པའི་རྡོ་རྗེའི་གཤོག་པའི་དབང་བསྐུར་བས། དབྱིངས་དང་ཡེ་ཤེས་ཟུང་འཇུག་གི་དབང་ཐོབ་པར༴མེ་དཔུང་གཏད་ལ། ཁྱེད་རང་རྣམས་རྡོ་རྗེ་གཞོན་ནུར་གསལ་བ་དེ་ཉིད་ཀྱི་ཕྱོགས་ཐམས་ཅད་དུ་ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་མོས་པ་མཛོད། རྡོ་རྗེ་མེ་ཡི་ཀློང་ན་བཞུགས། །འབར་བ་ཐུགས་ཀྱི་རང་བཞིན་དང་། །ཁྲོ་བོ་འཁྱིལ་བའི་རྡོ་རྗེ་དང་། །གདུང་བ་དབྱིངས་ཀྱི་རང་བཞིན་ཏེ། །འཁྲུགས་པ་ཟད་པའི་ཕྲིན་ལས་དང་། །འཁྱིལ་བ་གཉིས་སུ་མེད་པའི་དོན། །རྣམ་རྟོག་མ་ལུས་སྲེག་བྱེད་པའི། །རྡོ་རྗེ་མེ་ཡི་དབང་ཐོབ་ཤོག །བཛྲ་ཨགྣེ་ཛྭ་ལ་ཨ་བྷི་ཥིཉྩ། རྣམ་རྟོག་སྲེག་པར་བྱེད་པ་བསྐལ་པའི་མེ་ཕུང་གི་དབང་བསྐུར་བས་ཉོན་མོངས་པའི་བག་ཆགས་བསྲེགས་ནུས་པའི་དབང་ཐོབ་པར༴ མཚན་མ་གསུམ་གཏད་ལ། ཞག་གི་ཟོ་རིས་དོན་དམ་བཙུད་ཀྱི་བརྒྱན། །རཀྟའི་ཐིག་ལེས་ཐུགས་རྗེ་ཆགས་པའི་རྟགས། །ཐལ་ཆེན་ཚོམ་བུའི་མཚན་མ་སྤྲོས་དང་བྲལ། །མཚན་མ་གསུམ་གྱི་དོན་དམ་རྟོགས་པར་ཤོག །བསྱ་ཨངྒུ་ལི་ཏི་ཏ། རཀྟ་ཏི་ལ་ཀཾ། མ་ཧཱ་བྷ་སྨིན་མུ་དྲ་ཨ་བྷི་ཥིཉྩ། དོན་དམ་སྤྲོས་བྲལ་མཚོན་པར་བྱེད་པའི་མཚན་མ་གསུམ་གྱི་དབང་བསྐུར་བས། དོན་དམ་རྣམ་པ་གསུམ་མཛེས་པའི་དབང་ཐོབ༴ཁྲོ་བོ་རིགས་ལྔའི་སྐུ་ཙཀ་གཏད་ལ། ཡེ་ཤེས་གཅིག་
ལས་མ་གསོས་ཀྱང་། །འདུལ་བྱེད་སོ་སོར་བསྟན་པ་གི། །སྤྲུལ་པའི་ཁྲོ་བོའི་དབང་བསྐུར་བས། །བཀའ་ཡི་འགྲོ་དོན་བྱེད་པར་ཤོག །བཛྲ་ཀརྨ་ཀ་ར་སྱ་པཉྩ་གྡུ་ལ་ཀྲོ་དྷ། ཨ་བྷི་ཤིཉྩ་ཨཿ འདུལ་བྱེད་བཀའ་ཉན་སྤྲུལ་པའི་དབང་བསྐུར་བས། །གདུལ་བྱའི་བསམ་པ་དང་མཐུན་པར་སེམས་ཅན་གྱི་དོན་བྱེད་པའི་དབང་ཐོབ་པར༴ གསུམ་པ་གསུང་བཟླས་ཕྲེང་གི་རྗེས་སུ་གནང་བ་ལ་རང་གི་བསྙན་པ་བྱེད་པའི་ཕྲེང་བ་ལག་ཏུ་གཏད་ལ། བསྒྲུབ་པའི་ཡེ་ཤེས་ཚོན་གང་བ། །གསང་བའི་སྔགས་ཀྱི་རབ་བསྐྱེད་ལ། །དུས་དང་རྒྱུན་ལ་བཟླ་བྱ་ཡི། །འཛབ་བསྙེན་ཕྲེང་བའི་དབང་བསྐུར་རོ། །བཛྲ་མཱ་ལ་ཨ་བྷི་ཥིཉྩ། བཟླས་བརྗོད་བྱ་བ་ཕྲེང་བའི་དབང་བསྐུར་བས། ཕྱི་ནང་གི་སྔགས་མ་ལུས་པ་འགྲུབ་པའི་དབང་ཐོབ་པར༴ བཟླས་པའི་ལུང་སྦྱིན་པའི་དོན་ཏུ་དམིགས་པ་འདི་བཞིན་དུ་མཛོད། སློབ་དཔོན་དང་ཁྱེད་རང་རྣམས་ཀྱི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་རྡོ་རྗེ་སྔོན་པོ་ནས་འབྲས་ཙམ་གྱི་ལྟེ་བར་ཉི་མའི་སྟེང་དུ་ཧཱུྃ་ཡུངས་འབྲུ་ཙམ་གྱི་མཐར། །ཀཱི་ལ་ཡ་སྐྲ་ཤད་ཀྱིས་བྲིས་པ་ལྟ་བུས་བསྐོར་ནས་ཡོད་པའི་མོས་པ་མཛད་ནས། སློབ་དཔོན་ལ་གུས་འདུད་དྲག་པོ་དུང་བ་བྱས་པས། སློབ་དཔོན་གྱིས་ཐུགས་ཀའི་ཧཱུྃ་ཡིག་དང་བཅས་པ་ལས། སྔགས་ཕྲེང་མར་མེ་གཅིག་ལས་གཉིས་ཆད་ཀྱི་ཚུལ་དུ་བྱུང་། སློབ་དཔོན་གྱི་ཞལ་ནས་
ཐོན། ཁྱེད་རང་རྣམས་ཀྱི་ཞལ་དུ་ཞུགས། སྙིང་གའི་ཧཱུྃ་ཡིག་སྔགས་ཕྲེང་དང་བཅས་པ་ལ། དང་པོས་ཐིམ། གཉིས་པས་བྱིན་གྱིས་བརླབས། གསུམ་པས་བརྟན་པར་བྱས་པའི་མོས་པ་མཛད་ནས། སྔགས་འདིའི་རྗེས་ཟློས་ལན་གསུམ་བར་དུ་མཛོད། ཀཱི་ལ་ཡ་གསུམ། དེ་ནས་ཁྱེད་རང་རྣམས་སློབ་དཔོན་ལ་མེ་ཏོག་འཐོར་བཞིན་པ་དང་བཅས་པས་འདིའི་རྗེས་ཟློས་མཛོད། བཅོམ་ལྡན་བདག་ལ་སོགས། སློབ་དཔོན་གྱིས་མེ་ཏོག་བྱིན་བརླབ་ནས། བཅོམ་ལྡན་འདི་ལ་སོགས་སྤྱི་ལྟར་བྱ། དེ་ནས་བཞི་པ་ཐུགས་ཡེ་ཤེས་སེམས་དཔའི་དབང་གི་དོན་དུ་དམིགས་པ་འདི་བཞིན་དུ་མཛོད། ཁྱེད་རང་རྣམས་བཅོམ་ལྡན་འདས་རྡོ་རྗེ་གཞོན་ནུའི་སྐུར་ལམ་སྟེ་གསལ་བའི་སྙིང་གར་གཞལ་ཡས་ཁང་ཟླུམ་པོ་སྒོ་གཅིག་པ་སྒོ་སྲུང་རྟ་མགྲིན་ཡབ་ཡུམ་གྱི་བྱས་པའི་དབུས་སུ་ཉི་མའི་དཀྱིལ་འཁོར་གྱི་སྟེང་དུ་ཡེ་ཤེས་སེམས་དཔའ་རང་གི་བསྒོམ་པ་དང་འདྲ་བའི་རྡོ་རྗེ་གཞོན་ནུ་ཡུམ་མེད་ཚོན་གང་བ་རེ་ཡོད་པར་མོས་མཛོད། ཡེ་ཤེས་སེམས་དཔའི་ཙཀླི་སྙིང་གར་བཞག་ལ། ཨེ་མ་ང་ནི་རང་བྱུང་སྟེ། །དཔལ་ཆེན་རྡོ་རྗེ་གཞོན་ནུའི་སྐུ། །འཁོར་བ་ཡོངས་སུ་སྦྱོང་བའི་ཕྱིར། །ཡེ་ཤེས་སེམས་དཔས་དབང་བསྐུར་རོ། །ཛྙཱ་ན་སཏྭ་ཨ་བྷི་ཥིཉྩ། འཁོར་བ་རང་བཞིན་མེད་པར་སྦྱོར་བ་ལ་ཡེ་ཤེས་སེམས་དཔའི་དབང་བསྐུར་བས། དམིགས་མེད་ཐུགས་རྗེའི་ཡེ་ཤེས་ཀྱི་འགྲོ་བའི་དོན་བྱེད་པའི་
དབང་ཐོབ་པར་གྱུར་ཅིག །དེས་ཐུགས་ཡེ་ཤེས་སེམས་དཔའི་རྗེས་སུ་གནང་བ་གྲུབ་པ་ཡིན་ནོ། །སྐབས་འདིར་གུང་སེང་མཛད། ལས་རྡོར་གྱིས་གདབ་ལས་ཀྱི་ཆས་རྡུལ་ཚོན་ནམ་ཆུ་ཚོན་གྱིས་རས་ལ་ཆོས་འབྱུང་གྲུ་གསུམ་གྱི་དབུས་སུ་དགྲ་བགེགས་གཉིས་ཀྱི་ས་བོན་ནྲྀ་ཏྲི་བྲིས་པའི་སྟེང་དུ་ལིངྒ་ཆེ་བ་ཅིག་སླང་འམ། ལྕགས་སྣོད་དུ་བཅུག་པ་བཞག །སློབ་དཔོན་གྱི་གཡས་ཕྱོགས་སུ་གུ་གུལ། ཡུངས་ཀར་ནག་སོགས་བསྲེས་པའི་ཐུན། སྔོ་དམར་གྱི་ཞགས་པ། དུག་ཁྲག་སྦྱར་བའི་ཐུན། ལྕགས་ཟངས་རྡོ་ཕྱེ་བསྲེས་པའི་ཐུན་རྣམས་དང་། གཡོན་གྱི་ཕྱོགས་སུ་གདབ་ཕུར་བཅུ་བདུན། རལ་གྲི། ཐོ་བ། དེ་དག་ལ་ངར་སྐྱེད་པའི་སྨན་ཕུད་དང་རཀྟ་ཅུང་ཟད་རེ། རྡོ་རྗེ་དྲིལ་བུ་རྣམས་བཤམ་མོ། །ལྔ་པ་མཛད་པ་ཕྲིན་ལས་ཀྱི་རྗེས་གནང་ནི། ཐོག་མར་སློབ་དཔོན་གྱི་གོང་དུ་མགོན་ན་སྐྲ་ཚབ་དང་ཐང་ཐེབ་གྱོན་ལ། ཀཱི་ལ་བརྗོད་ཅིང་། །སློབ་མ་རྣམས་ལ་ཆབ་བཏང་ནས་འཚོགས། ཕུར་པ་རྫས་ཀྱི་དཀྱིལ་འཁོར་བསྐྱེད་པ་ནི། ཕུར་པ་རྣམས་ལ་གུ་གུལ་བདུག །ཡུངས་ཀར་གྱིས་བྲབ་ལ། རང་རྟགས་ཕྱག་རྒྱའི་ཕུར་པ་དང་། གདབ་ཕུར་བཅུ་བདུན་ལ་དམིགས་ཏེ། ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལཱི་ཧཱུྃ་ཚིནྡྷ་ཚིནྡྷ་ཧཱུྃ་ཕཊ། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་རཀྵ་རཀྵ། ཕུར་པ་རྣམས་སྟོད་ཁྲོ་བོ་ཁྲོ་མོ་སྨད་ཕུར་བུ་ལ་དབལ་གྱི་རྣམ་པ་ཅན་དུ་གྱུར། ཀཱི་ལ་ཡ་དང་། ཁྲོ་བོ་བཅུའི་སྔགས། སྒོ་མ་བཞིའི་སྔགས་རྣམས་ཚར་གཅིག་བརྗོད་པས་བྱིན་གྱིས་བརླབས། དེ་ནས་སྲས་མཆོག་རྣམས་ལ་དམིགས་ཏེ་དཀྱིལ་ཆོག་གི། ཨེ་སྥ་ར་་ཕཊ། ནས། ཀརྨ་ཀྲོ་དྷཱི་ཤྭ་རི་ཨཱཿའི་བར་དང་། གྲུབ་ན་མཆོད་བསྟོད་བསྡུས་པ་ཙམ་བྱེད། ཕུར་པ་དེ་ཐམས་ཅད་ཀྱི་ཐུགས་ཀར་མ་ལས་ཉི་མའི་དཀྱིལ་འཁོར་གྱི་སྟེང་དུ། རྟ་མགྲིན་ཡབ་ཡུམ། དེའི་ཐུགས་ཀར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་རང་འདྲའི་ཡེ་ཤེས་
སེམས་དཔའ་རྡོ་རྗེ་གཞོན་ནུ་ཡུམ་མེད་པ་ཚོན་གང་བ། །དེའི་ཐུགས་ཀར་རྡོ་རྗེ་དཔལ་བེའུ་ནས་འབྲས་ཙམ་གྱིས་ལྟེ་བར་ཉི་མ་ལ་གནས་པའི་ཏིང་ངེ་འཛིན་སེམས་དཔའ་ཧཱུྃ་ཡུངས་འབྲུ་ཙམ་གྱི་མཐར། ཀཱི་ལ་ཡ་སྐྲ་ཤད་ཀྱིས་བྲིས་པ་ལྟ་བུས་བསྐོར་ནས་སེམས་དཔའ་སུམ་བརྩེགས་སུ་ཡོད་པའི་མོས་པ་མཛོད། །ཕུར་པ་དེ་དག་གི་སྤྱི་བོར་ཨོཾ། སྐེད་པར་ཧྲཱིཿརྩེ་མོར་ཕཊ་དང་བཅས་པ་ལ། ཕུར་པ་རྣམས་ཀྱི་སྐུ་གསུང་ཐུགས་བྱིན་གྱིས་བརླབས་ནས། སླར་ཡང་དམིགས་པ་འདི་བཞིན་དུ་མ་ཡེངས་པར་མཛོད་ཅིག །སློབ་དཔོན་ལ་གུས་འདུད་དྲག་པོ་དུང་བ་ཞིག་བྱས་པས། སློབ་དཔོན་གཙོ་བོ་ཡབ་ཡུམ་སྙོམས་པར་ཞུགས་པའི་དགའ་བའི་སྒྲས་ཕྱོགས་བཅུའི་དེ་བཞིན་གཤེགས་པ་ཐམས་ཅད་སྤྱན་དྲངས། ཡབ་ཀྱི་ཞལ་དུ་ཞུགས། ཐུགས་ཀར་རྗེས་སུ་ཆགས་པའི་མེའི་འོད་དུ་ཞུ། སྐུའི་དབྱིབས་བརྒྱུད། །རྡོ་རྗེའི་ལམ་ནས་བྱང་སེམས་ཡུམ་གྱི་མཁར་བབ་པ། སླར་ཡབ་ཀྱི་རྡོ་རྗེའི་ལམ་དུ་ཞུགས་ནས། །ཐུགས་ཀར་བྱོན་ཏེ་ཧཱུྃ་དུ་གྱུར། དེ་ལས་འཐོན་ཏེ། ཐུགས་ཡེ་ཤེས་ཀྱི་ཕུར་བུ་རྣམས་ལ་ཐུགས་ཀྱི་དབང་བསྐུར་ཏེ། ཕུར་བུ་རྣམས་ཀྱི་ཐུགས་ཀའི་ཏིང་ངེ་འཛིན་སེམས་དཔའ་ཧཱུྃ་ལ་ཐིམ། ཡང་ཧཱུྃ་ཞེས་བརྗོད་པས། ཕུར་བུ་རྣམས་ཀྱི་ཐུགས་ཀ་ནས་ཧཱུྃ་བྱུང་སྟེ་ཕྱོགས་བཅུའི་ཁྲོ་བོའི་ཐུགས་ཀར་ཐིམ་པས། དགོས་པའི་རོས་ཚིམ་པ་ལ་བརྟེན་ནས་ཐུགས་དམ་བསྐུལ། ཡང་ཧཱུྃ་ཞེས་བརྗོད་པས་ཕྱོགས་བཅུའི་ཁྲོ་བོའི་ཐུགས་ཀ་ནས་ཧཱུྃ་བྱུང་། དུས་གསུམ་སངས་རྒྱས་ཐམས་ཅད་ཀྱི་ཐུགས་ཀར་ཐིམ་པས་དགེས་པའི་རོས་ཚིམ་པ་ལ་བརྟེན་ནས་ཐུག་དམ་བསྐྱལ། ཡང་ཧཱུྃ་ཞེས་བརྗོད་པས། དུས་གསུམ་སངས་རྒྱས་ཐམས་ཅད་ཀྱི་ཐུགས་ཀ་ནས་ཧཱུྃ་བྱུང་སྟེ།
ཁྱེད་རང་རྣམས་དང་ཁམས་གསུམ་གྱི་སེམས་ཅན་ལ་ཕོག་པས། སེམས་ཅན་ཐམས་ཅད་ཀྱི་སྒྲིབ་པ་བག་ཆགས་དང་བཅས་པ་ཐམས་ཅད་སྦྱངས། ཁྱེད་རང་རྣམས་དང་སེམས་ཅན་གྱི་སེམས་དེ་ཉིད་དེ་བཞིན་གཤེགས་པའི་ཐུགས་སུ་བྱིན་གྱིས་བརླབས་པར་མོས་པ་མཛོད། སླར་ཡང་ཧཱུྃ་དེ་རྣམས་ཚུར་འདུས་ནས་སློབ་དཔོན་གྱི་ཐུགས་ཀར་ཐིམ་པས། སློབ་དཔོན་སྐུ་མདོག་མཐིང་ག་ལས། དུད་ཁར་གྱུར་པ་དང་། དཀྱིལ་འཁོར་གྱི་ལྷ་ཚོགས་ཐམས་ཅད་ཀྱང་། སྐུ་མདོག་དུད་ཁའི་རྣམ་པ་ཅན་དུ་གྱུར་པའི་མོས་པ་མཛོད། །ཡང་ཧཱུྃ་དེ་ཉིད་སློབ་དཔོན་གྱི་ཐུགས་ཀ་ནས་འཐོན། ལྗགས་སྟེང་དུ་བྱུང་ནས་ཕུར་པ་རྣམས་ཀྱི་ལྗགས་ལ་ཐིམ་པས། གསུང་གི་དབང་བསྐུར། ཡང་ཧཱུྃ་ཞེས་བརྗོད་པས་ཕུར་པ་རྣམས་ཀྱི་ལྗགས་སྟེང་ནས་ཧཱུྃ་བྱུང་སྟེ། ཕྱོགས་བཅུའི་ཁྲོ་བོའི་ལྗགས་སྟེང་དུ་ཐིམ་པས་དགྱེས་པའི་རོས་ཚིམ་པ་ལ་བརྟེན་ནས་ཐུགས་དམ་བསྐུལ། ཡང་ཧཱུྃ་ཞེས་བརྗོད་པས་ཕྱོགས་བཅུའི་ཁྲོ་བོའི་ལྗགས་སྟེང་ནས་ཧཱུྃ་བྱུང་། དུས་གསུམ་གྱི་སངས་རྒྱས་ཐམས་ཅད་ཀྱི་ལྗགས་སུ་ཐིམ། དགེས་པའི་རོས་ཚིམས་པ་ལ་བརྟེན་ནས་ཐུགས་དམ་བསྐུལ། ཡང་ཧཱུྃ་ཞེས་བརྗོད་པས། དུས་གསུམ་སངས་རྒྱས་ཐམས་ཅད་ཀྱི་ལྗགས་སྟེང་ནས་ཧཱུྃ་བྱུང་། ཁྱེད་རང་རྣམས་དང་ཁམས་གསུམ་གྱི་སེམས་ཅན་ཐམས་ཅད་ལ་ཕོག་པས་ངག་གི་སྒྲིབ་པ་བག་ཆགས་དང་བཅས་པ་ཐམས་
ཅད་སྦྱངས། ཁྱེད་རང་རྣམས་དང་སེམས་ཅན་ཐམས་ཅད་ཀྱི་ངག་དེ་བཞིན་གཤེགས་པའི་གསུང་དུ་བྱིན་གྱིས་བརླབས་པར་མོས་པ་མཛོད། སླར་ཧཱུྃ་དེ་རྣམས་ཚུར་འདུས་ནས། སློབ་དཔོན་གྱི་ལྗགས་སྟེང་དུ་ཐིམ་པས་སློབ་དཔོན་དང་དཀྱིལ་འཁོར་གྱི་ལྷ་ཚོགས་ཐམས་ཅད་སྐུ་མདོག་དུད་ཁ་ལས་སྨུག་ནག་ཏུ་གྱུར་པའི་མོས་པ་མཛོད། ཡང་ཧཱུྃ་དེ་ཉིད་སློབ་དཔོན་གྱི་རྩ་དབུ་མ་ནས་སོང་། སྣ་བུག་གཡས་ནས་ཐོན། སྣ་རྩར་གཡས་པ་དེ་ཉིད། སླར། དབུགས་དང་འགྲོགས་ཏེ་སྣ་བུག་གཡོན་ནས་ཞུགས། ཀླད་རྒྱས་སུ་བྱུང་བ་སྤྱི་བོར་ནས་ཐོན་ཏེ་ཕུར་པ་རྣམས་ཀྱི་སྤྱི་བོར་ཐིམ་པས། སྐུའི་དབང་བསྐུར། ཡང་ཧཱུྃ་ཞེས་བརྗོད་པས་ཕུར་པ་རྣམས་ཀྱི་སྤྱི་བོ་ནས་ཧཱུྃ་ཐོན། ཕྱོགས་བཅུའི་ཁྲོ་བོའི་སྤྱི་བོ་ནས་ཐིམ་པས། དགེས་པའི་རོས་ཚིམས་པ་ལ་བརྟེན་ནས་ཐུགས་དམ་བསྐུལ། ཡང་ཧཱུྃ་ཞེས་བརྗོད་པས་ཁྲོ་བོ་བཅུའི་སྤྱི་བོ་ནས་ཧཱུྃ་བྱུང་། །དུས་གསུམ་སངས་རྒྱས་ཐམས་ཅད་ཀྱི་སྤྱི་བོར་ཐིམ་པས། །དགྱེས་པའི་རོས་ཚིམས་པ་ལ་བརྟེན་ནས་ཐུགས་དམ་བསྐུལ། ཡང་ཧཱུྃ་ཞེས་བརྗོད་པས། དུས་གསུམ་སངས་རྒྱས་ཐམས་ཅད་ཀྱི་སྤྱི་བོ་ནས་ཧཱུྃ་བྱུང་སྟེ། ཁྱེད་རང་རྣམས་དང་ཁམས་གསུམ་གྱི་སེམས་ཅན་ཐམས་ཅད་ལ་ཕོག་པས། ལུས་ཀྱི་སྒྲིབ་པ་བག་ཆགས་དང་བཅས་པ་ཐམས་ཅད་སྦྱངས། ཁྱེད་རང་རྣམས་དང་སེམས་ཅན་ཐམས་ཅད་
ཀྱི་ལུས་དེ་བཞིན་གཤེགས་པའི་སྐུར་བྱིན་གྱིས་བརླབས་པའི་མོས་པ་མཛོད། སླར་ཡང་ཧཱུྃ་དེ་རྣམས་ཚུར་འདུས་ནས་སློབ་དཔོན་གྱི་སྤྱི་བོར་ཐིམ་པས་སློབ་དཔོན་ལྷ་དང་བཅས་པ་ཐམས་ཅད་སྐུ་མདོག་སྨུག་ནག་ལས་ལེ་བརྒན་ཏུ་གྱུར་ཏེ། བྱི་རུའི་སྡོང་པོ་ཕྱིས་པའམ་མེ་དཔུང་འབར་བ་ལྟར་དམར་ལམ་སྟེ་སོང་བའི་མོས་པ་མཛོད། ད་གདབ་པའི་ལས་བྱ་བ་ལ། ཐོག་མར་སློབ་དཔོན་གྱིས་དཀྱིལ་འཁོར་ལྷ་ཚོགས་དམ་ཅན་སྲུང་མ་དང་བཅས་པ་ཐམས་ཅད་དྲག་པོའི་ལས་མཛད་པར་བསྐུལ་བའི་མོས་པ་མཛད་པར་ཞུ། ཞེས་བརྗོད། སློབ་དཔོན་རྡོར་དྲིལ་འཛིན། རྡ་རོལ་བཅས། ཧཱུྃ། །དྲག་པོའི་རྒྱ་མདུད་ཨེ་ཁྲམ་ཉེར་གཅིག་དབུས། །གྲུ་གསུམ་མཐིང་ནག་འབར་བའི་དཀྱིལ་འཁོར་ནས། །ཁྲོ་བོའི་རྒྱལ་པོ་ཁྲག་འཐུང་ཧེ་རུ་ཀ །ཐུགས་དམ་དུས་ལ་བབ་བོ་དབྱིངས་ལས་བཞེངས། །མ་རུངས་འདུལ་ཕྱིར་དྲག་པོའི་སྐུར་བསྟན་ནས། །སྔགས་འཆང་རིག་འཛིན་སྒྲུབ་བོ་བདག་ཅག་ལ། །སྐུ་གསུང་ཐུགས་ཀྱི་བྱིན་རླབས་དཔལ་བསྐྱེད་ནས། །དམ་ཉམས་དགྲ་བགེགས་སྒྲོལ་བའི་ལས་མཛོད་ཅིག །ཧཱུྃ་ཡབ་གཅིག་དཔལ་ཆེན་རྡོ་རྗེ་གཞོན་ནུ་དང་། །དཔལ་གྱི་ཡུམ་ཆེན་འཁོར་ལོ་རྒྱས་འདེབས་མ། །ཡབ་ཡུམ་ཐབས་དང་ཤེས་རབ་རོལ་པ་ལས། །ཕྱོགས་བཅུ་ཁྲོ་བོའི་ཚོགས་རྣམས་སྤྲུལ་པ་ནི། །སྟེང་ཕྱོགས་འཁོར་ལོ་འབར་བའི་རྩིབ་དབུས་ནས། །
ཧཱུྃ་མཛད་སྒྲ་འབྱིན་ཕག་དང་རྨིག་བུའི་མགོ། །འཁོར་བཅས་ཁྱེད་ཀྱི་ཐུགས་དམ་དུས་ལ་བབ། །དམ་ཉམས་དགྲ་བགེགས་སྒྲོལ་བའི་ལས་མཛོད་ཅིག །དེ་བཞིན་དུ་ཤེས་པར་བྱས་ཏེ། །ཤར་ཕྱོགས་འཁོར་ལོ༴ །རྣམ་རྒྱལ་སྒེག་མོ་སྟག་དང་བྱ་རྒོད་མགོ། །འཁོར་བཅས་ཁྱེད་ཀྱི་ཐུགས༴ དམ་ཉམས་དགྲ་བགེགས༴ །མེ་མཚམས་འཁོར་ལོ། དབྱུག་སྔོན་སྡེར་མོ་གཡག་དང་བྱ་རོག་མགོ། །འཁོར་བཅས༴ དམ༴ ལྷོ་ཕྱོགས་འཁོར་ལོ༴ །གཤིན་རྗེ་དུར་ཁྲོད་ཤ་བ་འུག་པའི་མགོ། །འཁོར་བཅས༴ དམ་ཉམས༴ །ལྷོ་ནུབ༴ །མི་གཡོ་གཏུན་ཁུང་གཟིག་དང་ཁ་ཏའི་མགོ། །འཁོར༴ །དམ་ཉམས༴ །ནུབ་ཕྱོགས༴ །རྟ་མགྲིན་གཏུམ་མོ་བྱི་ལ་པུ་ཤུད་མགོ། །འཁོར་བཅས༴ །དམ་ཉམས༴ །ནུབ་བྱང་༴ །གཞན་གྱིས་མི་ཐུབ་མདའ་སྙེམས་སྤྱང་ཁྲའི་མགོ། །འཁོར་བཅས༴ །དམ་ཉམས༴ །བྱང་ཕྱོགས༴ །འཁྱིལ་པ་རླུང་འབྱིན་སེང་གེ་ཕ་ཝཾ་མགོ། །འཁོར་བཅས༴ །དམ་ཉམས༴ །བྱང་ཤར༴ །ཁམས་གསུམ་གསོད་མ་དྲེད་དང་སྲེ་མོང་མགོ། །འཁོར་བཅས༴ །དམ་ཉམས༴ །འོག་ཕྱོགས་འཁོར་ལོ་འབར༴ །སྟོབས་ཆེན་རིག་བྱེད་དོམ་དང་བྱི་བའི་མགོ། །འཁོར་བཅས་ཁྱེད༴ །དམ་ཉམས༴ །དགུག་གཞུག་བཅིངས་མཉེས་ལས་ལ་དབང་བྱེད་ཅིང་། །གནོད་སྦྱིན་འཇིགས་མ་བདུད་རྩི་གསོད་བྱེད་མ། །འཁོར་བཅས༴ །དམ་ཉམས༴ །ལས་བཞི་ཕྲིན་ལས་མ་ལུས་སྒྲུབ་མཛད་
པའི། །ཕུར་པ་སྲས་ཀྱི་ལྷ་ཚོགས་འཁོར་དང་བཅས། །འཁོར་བཅས༴ །དམ་ཉམས༴ །གདུག་པ་འདུལ་བའི་ཕོ་ཉར་ཁས་བླངས་པ། །དྲེགས་པ་དབང་ཕྱུག་ཉི་ཤུ་རྩ་བརྒྱད་པོ། །འཁོར་བཅས༴ དམ་ཉམས༴ །ཕུར་པའི་སྲུང་མར་ཞལ་བཞེས་དམ་ཉམས་སྒྲོལ། །དྲག་གཏུམ་མི་བཟད་དམ་ཅན་བཅུ་གཉིས་སོ། །འཁོར་བཅས༴ །དམ་ཉམས༴ །སངས་རྒྱས་བསྟན་བསྲུང་བར་ཞལ་བཞེས་པ། །ཆོས་སྐྱོང་མགོན་པོ་ལྕམ་དྲལ་ལྷ་ཚོགས་ཀུན། །འཁོར་བཅས་ཁྱེད༴ །དམ་ཉམས་དགྲ་བགེགས༴ །ཕྱོགས་སྐྱོང་བཅུ་དང་གཟའ་དང་རྒྱུ་སྐར་དང་། །ལྟ་སྲིན་སྡེ་བརྒྱད་དྲེགས་པ་ཕོ་མོའི་ཚོགས། །འཁོར་བཅས་ཁྱེད་ཀྱི་ཐུགས་དམ་དུས་ལ་བབ། །དམ་ཉམས་དགྲ་བགེགས་སྒོལ་བའི་ལས་མཛོད་ཅིག །ཅེས་པས་བསྐུལ། དེ་ནས་སྔོན་འགྲོ་ཡང་འགྲེལ་སོ་དྲུག་གི་དང་པོ་གསེར་སྐྱེམས་དཀྱིལ་ཆོག་གི་བདུད་རྩི་ལྟར་བྱིན་བརླབས་ལ། བླ་མ་རིག་འཛིན་ཚོགས་བཅས་མཆོད། སོགས་གསེར་སྐྱེམས་བསྡུས་པ་གཏོར་ཟློག་ལྟར་བཏོན་ལ་ཕྱོགས་བཅུར་འཐོར། དཀྱིལ་ཆོག་ལྟར། ཧཱུྃ་མ་གཡེལ་མ་འཕངས་སོགས་ཀྱིས་རིག་འཛིན་བསྐུལ་གདབ་ཕུར་ཐོགས་ལ། དོ་ནུབ་ཀྱི་ཕུར་ཁ་སོགས་ཕུར་ཁ་བསྒྱུར་བ་གཏོར་ཟློག་ལྟར་བྱ། །དེ་ནས་སློབ་དཔོན་རྡོ་དྲིལ་ཐོགས་ལ་འདོད་རྒྱལ་གྱི་ཕྱག་རྒྱ་བཅས་ལ་ལིངྒ་ལ་འགུགས་འདྲེན་དྲག་པོ་ལན་གསུམ་བྱས་ལ། འོ་མདུན་གྱི་ལིངྒ་འདི་ཉིད་དགྲ་བགེགས་དངོས་སུ་གྱུར་པའི་མོས་པ་མཛོད། དེ་ནས་སློབ་དཔོན་
གྱིས་ཚེ་སྲོག་ཡེ་ཤེས་སུ་བསྒྱུར་བའི་ཕྱིར་དམིགས་པ་འདི་བཞིན་དུ་མཛད་པར་ཞུ། ཀཱི་ལ་ཡའི་རྗེས་སུ། པཉྩ་སྐནྡྷཾ་སོགས་དང་། ཛཿཧཱུྃ་བྃ་ཧོཿ ཞེས་བརྗོད་པས་སློབ་དཔོན་རྡོ་རྗེ་གཞོན་ནུར་གསལ་བའི་ཐུགས་ཀ་ནས། །རྡོ་རྗེ་གཞོན་ནུའི་སྐུ་དཔག་ཏུ་མེད་པ་བྱུང་སྟེ། དགྲ་བགེགས་གང་དུ་གནས་པའི་ས་དང་། ཁྱད་པར་མདུན་གྱི་ལིངྒ་དགྲ་བགེགས་དངོས་སུ་གསལ་བའི་སྙིང་ཁར་ཕོག་པས་ཁོ་ལ་སྲུང་སྐྱོབ་བྱེད་པའི་ཕུང་ཁམས་སྐྱ་མཆེད་ཀྱི་ལྷ་དང་སྲུང་མ་འཁོར་དང་བཅས་པ་ཐམས་ཅད་རྡོ་རྗེ་གཞོན་ནུའི་རྣམ་པར་བྱུང་ནས། སློབ་དཔོན་གྱི་སྙིང་གར་ཐིམ་པས། དགྲ་བགེགས་དེ་སྲུང་སྐྱོབ་དང་བྲལ་ནས་འདར་ཁྲིལ་ཁྲིལ་གནས་ཤིང་། སློབ་དཔོན་ཉིད་གཟི་བརྗིད་ནུས་མཐུ་ཕུན་སུམ་ཚོགས་པ་དང་ལྡན་པ་ཡིན་སྙམ་དུ་མོས་པ་མཛོད། ལྟ་སྲུང་སྤྱན་དྲངས་པ་རོལ་མོ་བཅས། ཧཱུྃ། བཅོམ་ལྡན་དཔལ་ཆེན་སོགས་བརྗོད། དེ་ནས་གསལ་བ་གསུམ་དང་གདིང་གསུམ་གསལ་གདབ་ཅིང་ང་རྒྱལ་བསྐྱེད་པ་ནི། སློབ་དཔོན་རང་ཉིད་ཡི་དམ་གྱི་ལྷར་གསལ་བ། ཕུར་པ་སྲས་མཆོག་ཏུ་གསལ་བ། ལིངྒ་ག་ཟས་པ་བོར་གསལ་བ། གདིང་གསུམ་ནི། གཉེན་པོ་ལྷའི་གདིང་། མགོ་གནོན་སྔགས་ཀྱི་གདིང་ཆོས་ཉིད་རྟོགས་པ་ལྟ་བའི་གདིང་དང་ལྡན་པ་ཞིག་དགོས་པ་ཡིན་པས། དོན་རྣམས་ཐུགས་ལ་འཇོག་པར་ཞུ། རོལ་མོ་བཅས། ཧཱུྃ། །ང་ནི་རྡོ་རྗེ་གཞོན་ནུ་ཡིན། །སོགས་ཚང་བ་དང་། མ་ཉེས་པའི་དབང་གཟུག །བརྒྱུད་
གསུམ་བླ་མ་ནས། །དགྲ་བགེགས་སྒྲོལ་བའི་གྲོགས་མཛོད་ཅིག །བར་བརྗོད། དེ་ནས་ཡང་འགྲེལ་སོ་དྲུག་གི་རྫས་དམོད་མོ་ཏིང་ངེ་འཛིན་སོགས་དྲུག་དྲུག་བྱ་བ་ལ། དོན་ཚན་དྲུག་ཏེ། ལྷ་དང་ཕྲལ་བ། གཟུགས་ལ་དབབ་པ། བྱད་དུ་གཞུག་པ། སྨྱོ་རུ་གཞུག་པ། རྡུལ་དུ་རློག་པ། ཞལ་དུ་བསྟབ་པའོ། །དེ་རེ་རེ་ལའང་དྲུག་དྲུག་སྟེ། བསད་པར་བྱ་བའི་རྫས་དྲུག །བསམ་པ་མཐར་ཕྱིན་པའི་དམོད་མོ་དྲུག །དམིགས་པ་གཞན་དུ་མི་འགྱུར་བའི་ཏིང་ངེ་འཛིན་དྲུག །སྐྱེད་པར་བྱ་བའི་ལྷ་དྲུག །སྦས་པའི་འཕྱོང་དྲུག །གབ་པའི་སྔགས་དྲུག་སྟེ་སུམ་ཅུ་རྩ་དྲུག་གི་སྒོ་ནས་ངན་སྔགས་ཀྱི་རྒྱལ་པོ་དྲུག་གི་ཕྲིན་ལས་རྫོགས་པར་བཏང་དགོས་པས་གཞན་ཏུ་མ་ཡེངས་པར་སོ་སོའི་དོན་རྣམས་ཐུགས་ལ་ངེས་པར་ཞུ། རྒྱས་པར་སྤྲོ་ན། དྲུག་ཚན་རེ་རེ་བཞིན་བརྡ་སྤྲད། མི་ནུས་ན། བཞི་པ་བསྐྱེད་པར་བྱ་བའི་ལྷ་ནི་ཐམས་ཅད་ལ་དཀྱུས་སུ་བཏོན་དགོས་སོ། །ཕྱག་ལེན་མ་འཁྲུལ་བ་དང་དབྱངས་རོལ་བཅས། ན་མོ་བཅོམ་ལྡན་རྡོ་རྗེ་གཞོན་ནུ་དང་། །སོགས་ནས། བིགྷྣཱན་བནྡྷ་ཧཱུྃ་ཕཊ་ཀྱི་བར་མཐར་ཆགས་སུ་བཏང་། དེ་ལྟར་སྔོན་འགྲོ་ཡང་འགྲེལ་སོ་དྲུག་སོང་ནས། དངོས་གཞི་གདབ་པའི་ལས་ལ་བརྟེན་པ་དྲུག་ནི། །ཀུན་གཞི་རྩད་བཅད་དེ་བསྒྲལ་བ་ཉོན་མོངས་པ་སྐྱེ་བའི་སྒོ་ལྔ་དག་པར་བསྒྲལ་བ། རྣམ་ཤེས་ཚོགས་བརྒྱད་དག་པར་བསྒྲལ་བ། མ་བདུད་དམོད་མོས་བསྒྲལ་བ།
དགེ་སྡིག་ཆ་སྙོམས་ཏེ་བསྒྲལ་བ། གཏུན་ཏུ་བརྡུངས་ཏེ་བསྒྲལ་བའོ། །དེ་ལྟར་དོན་ཚན་དྲུག་ཉམས་སུ་ལེན་པ་ལ། ཐོག་མར་འགུགས་གཞུག་ལན་གཅིག་བྱས་ནས། གདབ་པའི་ལས་བྱ་དགོས། དེ་ལ་ཀུན་གཞིའི་གནས་ལུགས་མ་ཤེས་ན་བཏབ་པ་ལ་དོན་མེད་ཅེས་འབྱུང་བ་ནི། དམིགས་པ་གསལ་བ་གནད་དུ་ཆེ་བ་ཡིན་པས། ཐོག་མར་སློབ་དཔོན་གྱི་དམིགས་པ་གསལ་འདེབས་པ་འདི་ལ་ཐུགས་མ་ཡེངས་པར་གཏོད་པར་ཞུ། དེ་ལ་ཀུན་གཞིའི་གནས་ལུགས་གསལ་གདབ་པ་ནི། ལིངྒ་འདི་ཉིད་དགྲ་བགེགས་དངོས་སུ་གསལ་བའི་སྙིང་གར་རྩ་བཞི་ཡོད་པ། དེ་ཡང་ཆོས་ཉིད་རང་བྱུང་གི་རྩ་གཉིས་མེད་ཡེ་ཤེས་ཀྱི་རྩ། གློ་བུར་རྒྱུད་འཛིན་གྱི་རྩ། སྐྱོན་ཡོན་དབང་པོ་དྭངས་བྱེད་ཀྱི་རྩ་བཞི་འདོམས་པའི་དབུས་སུ་ཤའི་དྭངས་མ་བྱེའུ་ལེན་པའི་མགོ་ཙམ། དེའི་ནང་དུ་ཁྲག་གི་དྭངས་མ་མཚལ་ལྕོགས་ལམ་སྟེ་རྒྱ་མཚལ་མ་བརྟུལ་བ་ལྟ་བུ་དམར་ནག་གི་རྣམ་པ་ལ་འོད་ཁྲམ་ཁྲམ་ཡོད་པ། དེའི་ནང་དུ་རྩའི་དྭངས་མ་དར་དཀར་གྱི་སྐུད་པ་ལྟ་བུས་དྲིལ་ནས། དབུགས་ཀྱི་དྭངས་མ་གསེར་ས་འོག་ན་ཡོད་པའི་དྲོད་ཙམ། དེའི་ནང་དུ་འོད་ཀྱི་དྭངས་མ་ཉའི་མིག་ཙམ་གྱི་དབུས་སུ། ཚེའི་རྟེན་སྡོམ་གྱི་རྒྱ་ལྟ་བུས་དྲིལ་ནས་རྣམ་པར་ཤེས་པའི་ངོ་བོ་ཨ་ཐུང་དཀར་པོའི་རྣམ་པར་གནས་པ་ནི་འཁོར་འདས་ཀུན་གྱི་གཞི་ཡིན་ལ། དེ་ལྟར་བསམས་ནས་
གཙོ་བོའི་ཕུར་པ་དཔྲལ་བར་བསྒྲིལ་བས་འཇམ་དཔལ་སྐུའི་ལྷ་ཚོགས་འདུས་པར་བསམ། མགྲིན་པར་བསྒྲིལ་བས་པདྨ་གསུང་གི་ལྷ་ཚོགས་འདུས་པར་བསམ། སྙིང་གར་བསྒྲིལ་བས་ཡང་དག་ཐུགས་ཀྱི་ལྷ་ཚོགས་ནམ་མཁའ་གང་བར་སྤྱན་དྲངས་པར་བསམ་མོ། །དེ་ནས་གསང་སྔགས་ལ་རྣམ་པ་ལམ་དུ་བྱེད་པ་ཡིན་པས། དེ་ལྟ་བུའི་ཀུན་གཞི་དེ་ཉིད་ཨའི་རྣམ་པར་ངོས་འཛིན་པར་བྱས་ལ། དེའི་རྗེས་སུ་ཚེ་ལུང་ཁྲུས་ལུང་གི་དགོངས་པ་མ་ཤེས་ན་ངན་སྔགས་དང་ཁྱད་པར་མེད། གནས་སྦར་བའི་ཆོག་མ་ཤེས་ན་གཤན་པ་དང་ཁྱད་མེད། ཅེས་འབྱུང་བ་ལྟར། དེ་ལ་ཁྲུས་ལུང་གསུམ་ནི། ཁམས་གསུམ་སེམས་ཅན་གྱི་ཁྲུས་ལུང་། བདག་རྣལ་འབྱོར་པའི་ཁྲུས་ལུང་། ལིངྒ་གཟས་པ་པོའི་ཁྲུས་ལུང་དང་གསུམ་ཡིན། ཚེ་ལུང་ལ་གཉིས་ཏེ་བདག་རྣལ་འབྱོར་པའི་ཚེ་ལུང་། ལིངྒ་གཟས་པ་པོའི་ཚེ་ལུང་སྟེ་མདོར་ན་དེ་ཐམས་ཅད་དགོངས་པ་རྣམ་པ་གསུམ་དང་ལྡན་དགོས་ཏེ་དེའང་ཨ་དཀར་བྱ་དཀར་གྱི་དགོངས་པ། གདུང་བ་ལུ་གུ་བརྒྱུད་ཀྱི་དགོངས་པ། ཐུགས་རྗེ་འབྲལ་ཐག་གི་དགོངས་པ་སྟེ། དེ་གསུམ་དང་ལྡན་པའི་སྒོ་ནས་ཉམས་སུ་བླངས་པས་བརྟེན་ནས། རང་གཞན་གཉིས་ཀ་འཁོར་བ་ལས་བསྒྲལ་ནུས་པའི་ཕུར་པས་སྐྱོན་གསུམ་སྤངས་ཏེ། ཕུར་པ་འདེབས་པའི་ཐོག་མར་སློབ་དཔོན་རང་ཉིད་རྡོ་རྗེ་གཞོན་ནུར་
ལམ་སྟེ་གསལ་བའི་སྙིང་གར་ཨ་དཀར་པོ་ཞིག་བསམ། དེ་ལས་ཀྱང་ཨ་དཀར་པོ་བྱ་དཀར་པོ་གདང་ལ་བསྒྲིགས་པ་ལྟ་བུ་དཔག་ཏུ་མེད་པ་འཕྲོས། མདུན་གྱི་སྐུ་གསུང་ཐུགས་ཀྱི་ལྷ་ཚོགས་རྣམས་ལ་ཕོག་པས། དེ་དག་གི་ཐུགས་ཀ་ནས་ཨ་དཀར་པོ་བྱ་དཀར་པོ་གདང་ལ་བསྒྲིགས་པ་ལྟ་བུ་མང་པོ་བྱུང་སྟེ་ཁམས་གསུམ་གྱི་སེམས་ཅན་ཐམས་ཅད་ལ་ཕོག་པས། དེ་ཐམས་ཅད་ཀྱི་སྡིག་སྒྲིབ་སྦྱངས་ནས་ཚུར་འདུས་རང་གི་སྙིང་གར་ཐིམ་པར་བསམ་པ་ནི། ཁམས་གསུམ་སེམས་ཅན་གྱི་ཁྲུས་ལུང་ཡིན་ལ་དེ་ནས་བདག་རྣལ་འབྱོར་པའི་ཁྲུས་ལུང་གི་དོན་ཏུ་སླར་ཡང་མདུན་གྱི་ལྷ་ཚོགས་རྣམས་ཀྱི་ཐུགས་ཀ་ནས། སྔགས་བཞིན་ཨ་དཀར་པོ་བྱ་དཀར་པོ་གདང་ལ་བསྒྲིགས་པ་ལྟ་བུ་བསམ་གྱིས་མི་ཁྱབ་པ་བྱུང་སྟེ། སློབ་དཔོན་གྱི་སྙིང་ཁར་ཐིམ་པས་ལུས་ཀྱི་ནང་ཐམས་ཅད་ཨ་དཀར་པོས་གང་བ་ལ་བསྟན་ནས། ཉོན་མོངས་པ་དང་ཤེས་བྱའི་སྒྲིབ་པ་བག་ཆགས་དང་བཅས་པ་ཐམས་ཅད་སྦྱོང་བར་བསམ་པ་བདག་རྣལ་འབྱོར་པའི་ཁྲུས་ལུང་། དེ་ནས་ལིངྒ་གཟས་པ་པོའི་ཁྲུས་ལུང་ནི། ཡང་སློབ་དཔོན་གྱི་སྙིང་ག་ནས་འོད་ཟེར་དཀར་པོ་འཕྲོས་ནས། ལག་ཏུ་ཐོགས་པའི་ཕུར་བའི་སྤྱི་གཙུག་ནས་ཞུགས། ཕུར་བུའི་རྩེ་མོར་ཨ་དཀར་པོ་ཞིག་ཏུ་གྱུར་པ་དེ་ལས་ཀྱང་ཨ་དཀར་པོ་བྱ་དཀར་པོ་གདང་ལ་བསྒྲིག་པ་ལྟ་བུ་མང་པོ་འཕྲོས་ཏེ། ལིངྒའི་ལུས་ཀྱི་ནང་གང་བས།
ཁོའི་ལས་ངན་ཐམས་ཅད་སྦྱང་བར་བསམ་པ་གཟས་པ་པོའི་ཁྲུས་ལུང་སྟེ། ཁྲུས་ལུང་གསུམ་ནི་ཨ་དཀར་བྱ་དཀར་གྱི་དགོངས་པ་ཡིན་ལ། དེ་ནས་སློབ་དཔོན་གྱིས་ཕུར་པ་སྲས་མཆོག་ཏུ་གསལ་བ་དེ་ཉིད། དྲོད་ཐོན་ཙམ་བསྒྲིལ་ཏེ། ཁོ་ལ་ཕན་སེམས་ཀྱི་སྒོ་ནས་ལིངྒ་དགྲ་བགེགས་སུ་གསལ་བའི་སྙིང་དཀར་ནག་གི་མཚམས་སུ་བཏབ་པས་ཕུར་བུའི་འོད་ཟེར་གྱིས་སྙིང་གའི་རྩ་བཞི་པོ་དེ་གུར་གྱི་ཆོན་ཐག་བཅད་པ་བཞིན་ཏུ་གཏུབ། ཤ་དང་ཁྲག་གི་དྭངས་མ་ཡང་རྡོ་ཚན་ལ་ཁ་བ་བབས་པ་བཞིན་ཏོག་གིས་སྐམ། རྩའི་དྭངས་མ་རྣམས་དར་་ལྕེ་ལ་མེ་བཅུག་པ་བཞིན་གཞོབ་ཐུལ་གྱིས་བསྲེགས། དབུགས་དང་དྲོད་ཀྱི་དྭངས་མ་གཉིས་ཀྱང་བྱེ་ཚན་ལ་ཆུ་བླུགས་པ་བཞིན་བཅོམ་ནས། ཚེའི་རྟེན་སྡོམ་གྱི་རྒྱ་ལྟ་བུས་དྲིལ་བདེ་ལ་ཕུར་པའི་འོད་ཟེར་ཕོག་པས། སྦྲང་བུ་མེ་ནང་དུ་སོང་བ་བཞིན་ཆོམ་གྱིས་བསྲེགས་ཏེ་རྣམ་པར་ཤེས་པའི་ངོ་བོ་ཨ་དཀར་པོའི་བཀྲག་མདངས་གཟི་བརྗིད་ཐམས་ཅད་ཕུར་བུའི་ཨ་དཀར་པོ་དེ་ལ་འདུས་པར་བསམས་ནས། ཨོཾ་ལམ་སོགས་ཀྱི་སྔགས་བརྗོད་ཅིང་། སླར་ཕུར་པ་བཏོན་ནས་ཕུར་མགོ་རང་གི་དཔྲལ་བ་སོགས་གནས་གསུམ་དུ་རེག་ཅིང་བོ་དྷི་ཙིཏྟ་ཨོཾ་སོགས་བརྗོད་པས་ཕུར་པའི་ཨ་དེ་ཡར་ཞུགས་ཏེ་དབུའི་གཙུག་ནས་ཐོན། རང་ལ་ཐིམ་པས་ཁོའི་ཚེ་དང་བསོད་ནམས་བཀྲག་མདངས་ཐམས་ཅད་རང་ལ་ཐིམ་པ་ལ་བརྟེན་ནས། སློབ་དཔོན་རང་གི་ཚེ་དང་བསོད་ནམས་ཐམས་
ཅད་རྒྱས་སྟེ་ཚེ་ལ་དབང་བའི་རིག་འཛིན་དུ་གྱུར་པ་བསམ་པ་ནི་བདག་རྣལ་འབྱོར་པའི་ཚེ་ལུང་ཡིན་ཏེ། ཕུར་པ་མཁན་པོ་གདབ་ལས་ལ་བརྟེན་ནས་ཚེ་བསྲིངས་ཞེས་སོ། །དེ་ནས་ཕུར་པ་དེ་སྔར་ཤུལ་དུ་བཏབ་ནས། ཁོའི་རྣམ་པར་ཤེས་པའི་ངོ་བོ་ཨ་དཀར་པོ་དེ་ཕུར་པའི་རྩེ་ལ་བླངས་ནས། ཕུར་རྩེ་ནམ་མཁའ་ལ་བསྟན་ཅིང་དེའི་དུས་སུ་རང་གི་རླུང་བུས་པའམ། ཕཊ་ཅེས་བརྗོད་པས་ཁོའི་རྣམ་པར་ཤེས་པའི་ངོ་བོ་ཨ་དཀར་པོ་དེ་ཉིད་བྱ་སྒྲོ་རླུང་གི་བསྐྱོད་པ་བཞིན་ཏུ་རྒྱངས་ཏེ་སོང་ནས་འོག་མིན་དུ་རྒྱལ་བ་རིགས་ལྔ་ཡབ་ཡུམ་སྦྱོར་བ་མཛད་པའི་སྦྱོར་མཚམས་སུ་བསྐྱལ་བས་སངས་རྒྱས་པར་བསམས་ནི། ལིངྒ་ག་ཟས་པ་པོའི་ཚེ་ལུང་སྟེ་དེས་ན་རྒྱུ་སྙིང་རྗེ་ཆེན་པོས་ཀུན་ནས་བསླངས་ཏེ། གནས་སྦར་བའི་ཆོ་ག་དེ་ལྟ་བུ་བྱས་པ་ལ་བརྟེན་ནས་སངས་རྒྱས་པ་ཡིན་པས་ཁོ་དང་གདབ་ལས་མཁན་པོ་གཉིས་དཔོན་སློབ་ཀྱི་འབྲེལ་ཆུག་པ་ན་གདུང་བ་ལུ་གུ་རྒྱུད་དང་། ཐུགས་རྗེ་འབྲེལ་ཐག་གི་དགོངས་པ་སྟེ། དེ་ལྟ་བུའི་དགོངས་པ་རྣམ་གསུམ་གྱི་དོན་དེ་རྣམས་ཐུགས་ལ་འཇོག་སྟེ་དམིགས་པ་ལ་རྩེ་གཅིག་ཏུ་ཐུགས་གཏོད་པར་ཞུ། འགུགས་བཞུག་ལན་གཅིག་བྱས། ཛཿ དམ་ཚིག་ཆེན་པོའི་དུས་སོགས་ཕུར་གདབ་རྣམས་དང་། རལ་གྲི། ཐུན། ཐོ་བས་བརྡུང་བ་ཡན་དང་། ལིང་རོ་སློབ་དཔོན་གྱིས་ཐོགས་ལ། ཞས་བསྟབ་བསྡུས་པ། ཕྱི་ནང་གསང་བའི་སོགས་བརྗོད། ལྷ་ཚོགས་རྣམས་ལ་ཕུལ་ཏེ་དགྱེས་པས་བཞེས་པར་བསམས་ལ།
མཐར་ལིང་རོ་མཆོད་གཡོག་པས་གཏོར་མ་ལ་འབུལ། བསྒྲལ་ཆས་རྣམས་བསྡུའོ། །དེ་ནས་ཕྲིན་ལས་ཕུར་བུའི་དབང་ནི། སྲས་མཆོག་གཙོ་ཕུར་གཏད་ལ། །བདག་དང་ལག་པའི་མཆོག་རྣམས་ཀྱི། །རབ་ཏུ་གསོར་ཏེ་བསྒྲིལ་བྱས་ནས། །བྱིན་གྱིས་རློབ་པའི་དབང་བསྐུར་བས། །གཉིས་མེད་རྒྱལ་པོར་བྱིན་རློབས་ཤིག །ཨོཾ་བཛྲ་ཀཱི་ལི་ཀཱི་ལ་ཡ་བཛྲ་ཨ་བྷི་ཥིཉྩ་ཨཱཿཆོས་ཀུན་གཉིས་མེད་ཆེན་པོར་བྱིན་གྱིས་རློབ་པར་བྱེད་པ་ཕུར་བུ་དབང་བསྐུར་བས། སྣོད་བཅུད་ཕུར་བུའི་རང་བཞིན་ཏུ་གཏོགས་པའི་དབང་ཐོབ་པར་གྱུར་ཅིག །གུ་གུལ་ཡུངས་ཀར་རཀྟའི་ཙཀླི་རིམ་པར་གཏད་ལ། གུ་གུལ་སྦྱར་བའི་རྫས་མཆོག་དམ་པ་འདིས། །ཀཱི་ལ་ཡ་ཡི་གཟི་མདངས་རབ་བསྐྱེད་ནས། །སྐུ་ནི་མཚན་དང་དཔེ་བྱད་ལྡན་གྱུར་ཏེ། །འགྲོ་བའི་དོན་ལ་མཐུ་དང་ལྡན་གྱུར་ཅིག །གུ་གུལ་བྷུ་བ་ཨ་བྷི་ཥིཉྩ། །རྫས་མཆོག་དམ་པ་གུ་གུལ་གྱི་དབང་བསྐུར་བས། །ཕུར་པ་གཟི་བརྗིད་བསྐྱེད་ནུས་པའི་དབང་ཐོབ་པར་གྱུར་ཅིག །ཡུངས་ཀར་རྒྱལ་པོའི་རྫས་མཆོག་འདིས། །བདེ་གཤེགས་རྣམས་ཀྱི་སྲས་ཀྱི་མཆོག །ཐུགས་དམ་ཆེན་པོ་བསྐུལ་ནས་ཀྱང་། །འཁོར་བའི་དོན་དམ་བྱེད་པར་ཤོག །བཛྲ་ཕརྵ་ཨ་བྷི་ཥིཉྩ། །སས་མཆོག་ཐུགས་དམ་བསྐུལ་བ་ཡུངས་ཀར་རྒྱལ་པོའི་དབང་བསྐུར་བས་འགྲོ་བའི་དོན་ལ་ཐུགས་དམ་བསྐུལ་བའི་དབང་ཐོབ་པར་གྱུར་ཅིག །རཀྟའི་རྒྱ་མཚོ་ཆགས་པའི་བདག་ཉིད་འདིས། །
འགྲོ་བའི་དོན་ལ་ཐུགས་དམ་རབ་བསྩལ་ཞིང་། །ཕྱོགས་བཅུའི་འཇིག་རྟེན་རབ་འབྱམས་མ་ལུས་ཀུན། །ཐུགས་རྗེ་ཆགས་པས་འགྲོ་དོན་བྱེད་པར་ཤོག །མ་ཧཱ་རཀྟ་ཨ་བྷི་ཥིཉྩ། ཕུར་བུ་སེམས་ཅན་གྱི་དོན་ལ་ཆགས་པ་བསྐྱེད་པ་རཀྟའི་དབང་བསྐུར་བས། འགྲོ་བའི་དོན་བྱེད་པ་ལ་རྗེས་སུ་ཆགས་པའི་དབང་ཐོབ་པར་གྱུར་ཅིག །ཅོད་པན་གཏད་ལ། །ཐུགས་རྗེ་ཆགས་པའི་ཅོད་པ་འདི། །ཐབས་དང་ཤེས་རབ་རྟགས་ཡིན་ཏེ། །གཟུང་འཛིན་མཐའ་གཉིས་རྣམ་སྤངས་ནས། །དབྱིངས་དང་ཡེ་ཤེས་མཚོན་པར་ཤོག །པ་ཊ་ཨ་ཝ་ལ་མྦ་ཨ་བྷི་ཥིཉྩ། ཐུགས་རྗེ་ཆེན་པོའི་རྟག་ཆད་ཀྱི་མཐའ་བསལ་བའི་དར་གྱི་ཅོད་པན་གྱི་དབང་བསྐུར་བས། ཤེས་བྱ་ཀུན་ལ་ཐོགས་པ་མེད་པ་དང་། ཐུགས་རྗེས་འགྲོ་བའི་དོན་ལ་མཐུ་ཐོགས་པ་མེད་པའི་དབང་ཐོབ་པར་གྱུར་ཅིག །ཕྱི་ནང་གསང་གསུམ་གྱི་མཆོད་པའི་དབང་ནི། མེ་ཏོག་ཐོད་པ་ཆོས་འབྱུང་རྣམས་ཕྱོགས་གཅིག་ཏུ་བྲིས་པའི་ཙཀླི་གཏད་ལ། ཕྱི་ནང་གསང་བའི་མཆོད་རྫས་འདི། །དུས་གསུམ་སངས་རྒྱས་མཉེས་བྱེད་ཅིང་། །འགྲོ་བའི་དོན་དུ་ཐུགས་བསྐུལ་ནས། །མཆོད་སྦྱིན་སྟོབས་ཀྱི་དབང་ཐོབ་ཤོག །མ་ཧཱ་པཱུ་ཛ་ཨ་བྷི་ཥིཉྩ། ཕྱི་ནང་གསང་གསུམ་གྱི་མཆོད་པའི་རྫས་ཀྱི་དབང་བསྐུར་བས། བདེ་བར་གཤེགས་པ་ཡོངས་སུ་མཉེས་པར་བྱེད་པའི་དབང་ཐོབ་པར་གྱུར་ཅིག །དེ་ནས་དྲུག་པ་དྲག་པོ་སྒྲོལ་བའི་རྗེས་སུ་གནང་བ་ལ་བཅུ་བཞི་ལས། སྔགས་ཕུར་
འགུགས་པའི་དབང་ནི། ཤར་གྱི་སྲས་མཆོག་གཏད་ལ། །དབྱིངས་དང་ཡེ་ཤེས་དོན་དམ་ཕོ་ཉ་སྟེ། །ཐབས་དང་ཤེས་རབ་རྟགས་ཀྱི་ཕོ་ཉ་ཡིན། །འཁོར་བའི་གནས་ནས་དགྲ་བགེགས་འགུགས་པའི་ཕྱིར། །སྔགས་དང་ཕོ་ཉ་ཕུར་བུ་འདི་ནི་བཟུང་། །དུ་ཏ་ཀི༚་ཀ་རི་ཀ་ལ་ཨ་བྷི་ཥིཉྩ། །འགུགས་འདྲེན་སྔགས་པ་ཕུར་བུའི་དབང་བསྐུར་བས། །དགྲ་བགེགས་གནས་ནས་འགུགས་པའི་དབང་ཐོབ་པར་གྱུར་ཅིག །སྡིག་པའི་ཕུར་བུའི་དབང་ནི། ལྷོའི་སྲས་མཆོག་གཏད་ལ། །རིན་ཆེན་རྒྱལ་པོའི་ཕུར་པ་འདི་བྱིན་པས། །དམིགས་པའི་མཐུ་དང་རྩལ་བྱེད་ལྷ་ལ་སོགས། །གནས་སུ་བསྐྲད་ཅིང་རྫུ་འཕྲུལ་ཕྲོགས་ནས་ནི། །རང་ཉིད་ཚེ་དང་དབང་ཐང་རྒྱས་པར་ཤོག །རཏྣ་རཱ་ཛ་ཀཱི་ལ་ཡ་ཨ་བྷི་ཥིཉྩ། །རིན་ཆེན་རྒྱལ་པོའི་སྡིགས་པའི་ཕུར་བུའི་དབང་བསྐུར་བས། དགྲ་བགེགས་ཀྱི་མཐུ་དང་རྫུ་འཕྲུལ་ཕྲོགས་ནས། ཚེ་དང་བསོད་ནམས་རྒྱས་པའི་དབང་ཐོབ་པར་གྱུར་ཅིག །ཕྱག་རྒྱ་བཞི་ལྡན་ཕུར་པའི་དབང་ནི། ནུབ་ཀྱི་སྲས་མཆོག་གཏད་ལ། ཕྱག་རྒྱ་བཞི་ལྡན་ཕུར་པ་འདིས། །དགུག་དང་གཞུག་དང་བཅིང་བ་དང་། །ཐམས་ཅད་དབང་དུ་བསྡུ་བའི་ཕྱིར། །དགྲ་བགེགས་ལིངྒར་འདེབས་པར་ཤོག །ཨ་ཀརྵ་ཡ་ཨ་བེ་ཤ་ཡ་བནྡྷ་ཝཾ་ཤཱཾ་ཀཱི་ལ་ཡ་ཨ་བྷི་ཥིཉྩ། །ཕྱག་རྒྱ་བཞི་ལྡན་ཕུར་པའི་དབང་བསྐུར་བས་དབྱིངས་དང་ཡེ་ཤེས་ཀྱི་ལིངྒ་ལ་ཡིད་ཀྱི་ཡེ་ཤེས་པ་ཕབ་སྟེ། དབྱིངས་དང་ཡེ་
ཤེས་ཀྱི་དོན་རྟོགས་པར་གྱུར་ཅིག །དྲག་པོ་གདབ་ཕུར་གྱི་དབང་ནི། བྱང་གི་སྲས་མཆོག་གཏད་ལ། རྡོ་རྗེ་གདབ་ཕུར་འདི་བྱིན་པས། །དབྱིངས་དང་ཡེ་ཤེས་རོ་མཉམ་ཞིང་། །གདབ་བྱའི་ལིངྒ་ཤེས་རབ་ལ། །ཐབས་མཆོག་ཕུར་པ་ཐོབ་པར་ཤོག །རུ་དྲ་ཀཱི་ལ་ཡ་ཨ་བྷི། དྲག་པོ་གདབ་ཕུར་གྱི་དབང་བསྐུར་བས། །ཕྲིན་ལས་དྲག་པོས་དགྲ་བགེགས་སྒྲོལ་བའི་དབང་ཐོབ་པར་གྱུར་ཅིག །དུག་གཏོར་དམར་ནག་གཏད་ལ། དབང་མཆོག་དུག་གི་གཏོར་མ་འདི་བྱིན་པས། །གནོད་བྱེད་མ་ལུས་རབ་ཏུ་མྱོས་པ་དང་། །བག་ཆགས་སྦྱངས་ཤིང་དགེ་སྡིག་མཐོང་བ་དང་། །རྨོངས་རེངས་དྲན་པ་ཉམས་པ་ཐོབ་པར་ཤོག །པི་ཥ་བ་ལིནྟ་ཨཱ་བྷི༴ དུག་གི་གཏོར་མས་དབང་བསྐུར་བས་དགྲ་བགེགས་མྱོས་ཤིང་རྨུག་པར་བྱེད་པའི་དབང་ཐོབ་པར་གྱུར་ཅིག །མཚོན་ཆ་ལྔ་གཏད་ལ། །འཇོམས་པའི་རྡོ་རྗེ་གཅོད་པའི་འཁོར་ལོ་དང་། །གཏུབ་པའི་རལ་གྲི་བརྡུང་བའི་དབྱུག་ཏོ་དང་། །མནན་པའི་རྒྱ་གྲམ་བརྒྱབ་པའི་མཚོན་ཆ་ཡིས། །མ་རིག་ལས་ཀྱི་འཆིང་བ་གྲོལ་གྱུར་ཅིག །བཛྲ་ཙཀྲ་ཁ་རྒ་མུངྒ་ར་བི་ཤྭ་བཛྲ་ཨུ་དྷ་ཨ། མ་རིག་པའི་འཆིང་བ་བྲལ་བ་རྡོ་རྗེའི་མཚོན་ཆ་ལྔས་དབང་བསྐུར་བས། །ཡེ་ཤེས་ཀྱི་མཚོན་ཆས་མ་རིག་པའི་འཆིངས་བ་བྲལ་བའི་དབང་ཐོབ་པར་གྱུར་ཅིག །ཐུན་རྫས་གཏད་ལ། ཁྲོ་མོ་འབར་བའི་གཏུན་ཁུང་དུ། །རྡོ་རྗེ་འབར་བའི་ཁྲོ་ཚོགས་ཀྱིས། །འཁོར་བའི་བག་ཆགས་སྦྱང་བའི་ཕྱིར། །མཚན་མའི་དངོས་པོ་ཞི་གྱུར་ཅིག །བཛྲ་པྲ་ཧ་ར་ཨ༴ བག་ཆགས་ཀྱི་ཕུང་པོ་གཞིག་
པའི་ཕྱིར། རྡོ་རྗེ་ཐུན་གྱི་དབང་བསྐུར་བས། མཁའ་དབྱིངས་སྤྲོས་པ་དང་བྲལ་བར་བག་ཆགས་ཐམས་ཅད་ཞི་བའི་དབང་ཐོབ་བར་གྱུར་ཅིག །ཤ་ཁྲག་རུས་པའི་གཟུགས་གཏད་ལ། །རྡོ་རྗེ་སྲིན་པོའི་ཞལ་གདངས་པས། །ཤ་རུས་ཁྲག་གི་མཆོད་པ་ཡིས། །དུག་གསུམ་རྩད་ནས་དག་གྱུར་ཏེ། །རྒྱལ་བའི་སྐུ་གསུམ་ཐོབ་པར་ཤོག །མཱཾ་ས་རུ་དྷི་ར་ཨསྠི་པཱུ་ཛ་ཨ་བྷི་ཥིཉྩ། ཤ་རུས་ཁྲག་གི་མཆོད་པའི་དབང་བསྐུར་བས་དུག་གསུམ་གནས་སུ་དག་པར་གྱུར་ནས་སྐུ་གསུམ་མངོན་དུ་འགྱུར་བའི་དབང་ཐོབ་པར་གྱུར་ཅིག །དྲག་པོའི་གཏོར་མ་གཏད་ལ། །དྲག་པོའི་མཆོད་གཏོར་འདི་བྱིན་པས། །དམ་ཅན་རྣམས་ཀྱི་ཐུགས་བསྐུལ་ཞིང་། །གདུག་ཅིང་སྡང་སེམས་ལྡན་པ་རྣམས། །ལུས་ངག་རྡུལ་དུ་བརླག་གྱུར་ཅིག །རུ་ཏྲ་ཨཀྵེ་ས་བ་ལིངྟ་ཨ་བྷི་ཥིཉྩ། ལས་མཐའ་བཏུལ་བ་དྲག་པོའི་ཟོར་གྱི་དབང་བསྐུར་བས། །དམ་ཅན་རྣམས་ཀྱི་ཐུགས་རྒྱུད་བསྐུལ་ཞིང་། གདུག་པ་ཅན་ཐལ་བར་བརླག་པའི་དབང་ཐོབ་པར་གྱུར་ཅིག །མེ་ཧོམ་འབར་བ་གཏད་ལ། ཀློང་ཡངས་འཁྱིལ་བའི་ཧོམ་ཁུང་དུ། །འཕྲོ་འདུ་འབར་བའི་མེ་འབར་ཏེ། །ཡང་དག་མེ་ཡི་སྦྱོར་བ་ཡིས། །ལྷ་རྣམས་མ་ལུས་མཉེས་བྱེད་ཤོག །ཨགྣེ་ཧོ་མ་ཨ་བྷི་ཥིཉྩ། སྲེག་བྱེད་སྦྱིན་སྲེག་མེའི་དབང་བསྐུར་བས་ལྷ་རྣམས་མཉེས་ཤིང་ལས་རྣམས་མྱུར་དུ་འགྲུབ་པའི་དབང་ཐོབ་པར་གྱུར་ཅིག །
རི་རབ་ཕུར་བུ་གཏད་ལ། །རི་རབ་ཕུར་བུའི་དབང་བྱིན་པས། །གདུག་པའི་སེམས་ཅན་བསྐལ་པར་ཡང་། །གང་ལ་གཏད་པའི་སྲུང་མ་ཡིས། །ཐར་མེད་འཆིང་བའི་དབང་ཐོབ་ཤོག །སརྦ་བིགྷྣཱན་ཤཱ་ཏྲུན་ཡ་ཀྲན་ཀཱི་ལ་ཡ་ཨ་བྷི་ཥིཉྩ། ལས་མཐར་བྱེད་པ་རི་རབ་ཕུར་བུའི་དབང་བསྐུར་བས། དགྲ་བགེགས་བསྐལ་པའི་མཐར་ཐུག་པར་གནན་ནུས་པའི་དབང་ཐོབ་པར་གྱུར་ཅིག །རྫུ་འཕྲུལ་སྣ་ཚོགས་ཀྱི་དབང་ནི། །རིགས་ལྔའི་ཕྱག་མཚན་བྲིས་པའི་ཙཀླི་གཏད་ལ། རིགས་ལྔའི་ཕྱག་རྒྱ་འདི་བྱིན་པས། །དུག་ལྔའི་རིགས་ཅན་སེམས་ཅན་རྣམས། །སྤྲུལ་པའི་རྫུ་འཕྲུལ་སྣ་ཚོགས་ཀྱི། །བསམ་པ་ཇི་བཞིན་འདུལ་བར་ཤོག །པཉྩུ་ཀཱུ་ལ་རྀད་དྷི་ནིརྨ་་ཨ་བྷི་ཥིཉྩ། །རྫུ་འཕྲུལ་སྣ་ཚོགས་སྤྲུལ་པའི་དབང་བསྐུར་བས། རིགས་ལྔའི་སྤྲུལ་པ་སྣ་ཚོགས་ཀྱི་དབང་ཐོབ་པར་གྱུར་ཅིག །དེ་ཡན་གྱི་དྲག་པོ་སྒྲོལ་བའི་དབང་བསྐུར་བ་རྣམས་སོང་ནས། ད་བདུན་པ་རང་རྟགས་ཕྱག་རྒྱའི་དབང་བསྐུར་བ་ལ། ཐོག་མར་གཙོ་བོའི་ཕུར་པ་འདི་ཉིད་ཁྱེད་རང་རྣམས་ཀྱི་ཕྱག་ཏུ་གཏད་པ་ལ་བརྟེན་ནས་དབང་བསྐུར་བའི་མོས་པ་མཛོད། ཨོཾ་བཛྲ་ཀཱི་ལི་ཀཱི་ལ་ཡ་མ་ཐྱཏྲིཥྚ་བི་ན་ཨ་བྷི་ཥིཉྩ། རྣམ་ཤེས་ཚོགས་བརྒྱད་རྣམ་པར་དག་པ་རྡོ་རྗེ་གཞོན་ནུའི་ཕྱག་རྒྱ་ཕུར་པའི་དབང་བསྐུར་བས། ལོག་ལྟ་རྩད་ནས་བཅད་དེ་ཕྱིན་ཅི་ལོག་གི་ཚོགས་འདུལ་བའི་དབང་ཐོབ་པར་གྱུར་ཅིག །དེ་ནས་ཧཱུྃ་
མཛད་ཕུར་པ་གཏད་ལ། ཨོཾ་བཛྲ་ཧཱུྃ་ཀ་ར་བྲ་ཧྨ་བི་ན་ཡ་ཨ་བྷི་ཥིཉྩ། འདོད་ལོག་རྣམ་པར་དག་པ་ཁྲོ་བོ་ཧཱུྃ་མཛད་ཀྱི་རི་རབ་ཕུར་བུའི་དབང་བསྐུར་བས། འདོད་ལོག་རྩད་ནས་བཅད་ནས། ཚངས་པ་འདུལ་བའི་དབང་ཐོབ་པར་གྱུར་ཅིག །རྣམ་རྒྱལ་གྱི་ཕུར་པ་གཏད་ལ། ཨོཾ་བཛྲ་བི་ཛ་ཡ་ཨིནྡྲ་བི་ན་ཡ་ཨ་བྷི་ཥིཉྩ། ངག་འཁྱལ་རྣམ་པར་དག་པ་ཁྲོ་བོ་རྣམ་རྒྱལ་གྱི་ཕུར་བུའི་དབང་བསྐུར་བས་ངག་འཁྱལ་རྩད་ནས་བཅད་དེ་བརྒྱ་བྱིན་འདུལ་བའི་དབང་ཐོབ་པར་གྱུར་ཅིག །དབྱུག་སྔོན་ཅན་གྱི་ཕུར་པ་གཏད་ལ། ཨོཾ་བཛྲ་ནཱི་ལ་དཎྜ་ཨགྣི་བི་ན་ཡ་ཨ་བྷི་ཥིཉྩ། རྫུན་དུ་སྨྲ་བ་རྣམ་པར་དག་པ་ཁྲོ་བོ་དབྱུག་སྔོན་ཅན་གྱི་ཕུར་བུའི་དབང་བསྐུར་བས། རྫུན་དུ་སྨྲ་བ་རྩད་ནས་བཅད་དེ་མེ་ལྷ་འདུལ་བའི་དབང་ཐོབ་པར་གྱུར་ཅིག །གཤིན་རྗེའི་གཤེད་ཀྱི་ཕུར་པ་གཏད་ལ། ཨོཾ་བཛྲ་ཡ་མཱནྟ་ཀྲྀ་ཏ་ཡ་མ་བི་ན་ཡ་ཨ་བྷི་ཥིཉྩ། སྲོག་གཅོད་རྣམ་པར་དག་ཁྲོ་བོ་གཤིན་རྗེ་གཤེད་ཀྱི་དབང་བསྐུར་བས། སྲོག་གཅོད་རྩད་ནས་བཅད་དེ། གཤིན་རྗེ་འདུལ་བའི་དབང་ཐོབ་པར་གྱུར་ཅིག། མི་གཡོ་བའི་ཕུར་བུ་གཏད་ལ། ཨོཾ་བཛྲ་ཨཱརྱ་ཨ་ཙ་ལ་རཀྵ་ས་བི་ན་ཡ་ཨ་བྷི་ཥིཉྩ། ལོག་ལྟ་རྣམ་པར་དག་པ་ཁྲོ་བོ་མི་གཡོ་བའི་ཕུར་བུའི་དབང་བསྐུར་བས། ལོག་ལྟ་རྩད་ནས་བཅད་དེ། སྲིན་པོ་འདུལ་བའི་དབང་ཐོབ་པར་གྱུར་ཅིག །རྟ་མགྲིན་གྱི་ཕུར་པ་གཏད་ལ། ཨོཾ་བཛྲ་ཧ་ཡ་གྲྀ་ཝ་ཝ་རུ་་བི་ན་ཡ་ཨ་བྷི་ཥིཉྩ། ཕྲ་མ་རྣམ་པར་དག་
པ་ཁྲོ་བོ་རྟ་མགྲིན་གྱི་ཕུར་བུའི་དབང་བསྐུར་བས། ཕྲ་མ་རྩད་ནས་བཅད་དེ། ཆུ་ལྷ་འདུལ་བའི་དབང་ཐོབ་པར་གྱུར་ཅིག །འདོད་རྒྱལ་གྱི་ཕུར་པ་གཏད་ལ། ཨོཾ་བཛྲ་ཊཱཀྐི་རཱ་ཛ་བཱ་ཡུ་བི་ན་ཡ་ཨ་བྷི་ཥིཉྩ། མ་བྱིན་ལེན་པ་རྣམ་པར་དག་པ་ཁྲོ་བོ་འདོད་རྒྱལ་གྱི་ཕུར་བུའི་དབང་བསྐུར་བས་མ་བྱིན་ལེན་རྩད་ནས་བཅད་དེ། རླུང་ལྷ་འདུལ་བའི་དབང་ཐོབ་པར་གྱུར་ཅིག །བདུད་རྩི་འཁྱིལ་བའི་ཕུར་པ་གཏད་ལ། ཨོཾ་བཛྲ་ཨ་མྲྀ་ཏ་ཀུཎྜ་ལི་ཡཀྵ་བི་ན་ཡ་ཨ་བྷི་ཥིཉྩ། ཚིག་རྩུབ་རྣམ་པར་དག་པ་ཁྲོ་བོ་བདུད་རྩི་འཁྱིལ་བའི་ཕུར་བུའི་དབང་བསྐུར་བས། ཚིག་རྩུབ་རྩད་ནས་བཅད་དེ། །གནོད་སྦྱིན་འདུལ་བའི་དབང་ཐོབ་པར་གྱུར་ཅིག །ཁམས་སུམ་རྣམ་རྒྱལ་ཕུར་པ་གཏད་ལ། ཨོཾ་བཛྲ་ཏྲཻ་ལོ་ཀྱ་བི་ཛ་ཡ་མི་ཤྭ་ར་བི་ན་ཡ་ཨ་བྷི་ཥིཉྩ། གནོད་སེམས་རྣམ་པར་དག་པ་ཁྲོ་བོ་ཁམས་གསུམ་རྣམ་རྒྱལ་གྱི་ཕུར་བུའི་དབང་བསྐུར་བས། གནོད་སེམས་རྩད་ནས་བཅད་དེ། དབང་ཕྱུག་འདུལ་བའི་དབང་ཐོབ་པར་གྱུར་ཅིག །སྟོབས་ཆེན་གྱི་ཕུར་པ་གཏད་ལ། ཨོཾ་བཛྲ་མ་ཧཱ་བ་ལ་བྷཱུ་མི་པ་ཏི་བི་ན་ཡ་ཨ་བྷི་ཥིཉྩ། བརྣབ་སེམས་རྣམ་པར་དག་པ་ཁྲོ་བོ་སྟོབས་པོ་ཆེའི་ཕུར་བུའི་དབང་བསྐུར་བས། བརྣབ་སེམས་རྩད་ནས་བཅད་དེ། ས་བདག་འདུལ་བའི་དབང་ཐོབ་པར་གྱུར་ཅིག །ཤར་ཕྱོགས་ཀྱི་སྒོ་མའི་ཕུར་པ་གཏད་ལ། ཨོཾ་བཛྲ་ཡཀྵི་ི་ཤ་ཤྭ་ཏོ་དྲིཥྚ་བི་ན་ཡ་ཨ་བྷི་ཥིཉྩ། བྱམས་པ་རྣམ་པར་དག་པ་གནོད་སྦྱིན་མའི་ཕུར་བུའི་དབང་
བསྐུར་བས། །རྟག་པར་ལྟ་བ་རྩད་ནས་བཅད་དེ། རྟག་ལྟ་འདུལ་བའི་དབང་ཐོབ་པར་གྱུར་ཅིག །ལྷོ་ཕྱོགས་སྒོ་མའི་ཕུར་པ་གཏད་ལ། ཨོཾ་བཛྲ་བྷེ་ར་ཝཙྪ་ད་དྲྀཥྚ་བི་ན་ཡ་ཨ་བྷི་ཥིཉྩ། སྙིང་རྗེ་རྣམ་པར་དག་པ་འཇིགས་བྱེད་མའི་ཕུར་བུའི་དབང་བསྐུར་བས། ཆད་ལྟ་རྩད་ནས་བཅད་དེ། ཆད་ལྟ་འདུལ་བའི་དབང་ཐོབ་པར་གྱུར་ཅིག །ནུབ་ཀྱི་སྒོ་མའི་ཕུར་པ་གཏད་ལ། ཨོཾ་བཛྲ་ཨ་མྲྀ་ཏ་ཨཱཏྨ་ནཾ་དྲྀཥྚ་བི་ན་ཡ་ཨ་བྷི་ཥིཉྩ། དགའ་བ་རྣམ་པར་དག་པ་བདུད་རྩི་མའི་ཕུར་བུའི་དབང་བསྐུར་བས། བདག་ཏུ་ལྟ་བ་རྩད་ནས་བཅད་དེ། བདག་ལྟ་འདུལ་བའི་དབང་ཐོབ་པར་གྱུར་ཅིག །བྱང་ཕྱོགས་ཀྱི་སྒོ་མའི་ཕུར་པ་གཏད་ལ། ཨོཾ་བཛྲ་མ་ར་ི་མིརྡྷ་ཏིདྲྀཥྚ་བི་ན་ཡ་ཨ་བྷི་ཥིཉྩ། བཏང་སྙོམས་རྣམ་པར་དག་པར་གསོད་བྱེད་མའི་ཕུར་བུའི་དབང་བསྐུར་བས། མཚན་མར་ལྟ་བ་རྩད་ནས་གཅད་དེ། །མཚན་འཛིན་འདུལ་བའི་དབང་ཐོབ་པར་གྱུར་ཅིག །དེ་ནས་མེ་ཏོག་འཐོར་ལ་དྲིལ་བསིལ་བཅས་དཀྱིལ་ཆོག་ལྟར་བཀྲ་ཤིས་རྒྱས་པར་བརྗོད། དེས་རང་རྟགས་ཕྱག་རྒྱའི་རྗེས་གནང་སོང་ཞིང་། དོན་ཚན་བདུན་པོས་དྲག་པོ་སྒྲོལ་བའི་རྗེས་སུ་གནང་བ་རྫོགས་པར་གྲུབ་པ་ཡིན་ལ། དེའི་མཐའ་བརྟེན་ཕྲིན་ལས་གཏོར་མའི་དབང་བསྐུར་བའི་དོན་དུ། གཏོར་མ་འདི་ཉིད་དུར་ཁྲོད་ཆེན་པོའི་ཀློང་དཀྱིལ་ཡེ་ཤེས་ཀྱི་མེ་འབར་བའི་དབུས་སུ་པདྨ་ཉི་མ་ཟླ་བ། དབང་ཕྱུག་ཕོ་མོ་བསྣོལ་བའི་
སྟེང་དུ་བཅོམ་ལྡན་འདས་རྡོ་རྗེ་གཞོན་ནུ་སྐུ་མདོག་མཐིང་ནག་ཞལ་གསུམ་ཕྱག་དྲུག་པ་ཡུམ་འཁོར་ལོ་རྒྱས་འདེབས་མ་དང་མཉམ་པར་སྦྱོར་བའི་སྐུ་དངོས་ཡིན་སྙམ་དུ་མོས་པ་མཛོད། དེ་ནས་སློབ་དཔོན་གྱི་ཁྱེད་རང་རྣམས་ཀྱི་དབུ་ཐོག་ཏུ་གཞག་པ་ལ་བརྟེན་ནས་དབང་བསྐུར་བའི་མོས་པ་མཛོད་ཅིག །ཅེས་བྱས་ལ། ཀཱི་ལ་ཡ་བརྗོད་ཅིང་ཕུར་པའི་གཙོ་གཏོར་མགོ་ཐོག་ཏུ་བཞག་པ་དང་གཞན་རྣམས་ཀྱི་རོལ་ཆེན་བྱེད་ཚར་བ་དང་། དེ་ལྟར་ན་གཏོར་མ་རྡོ་རྗེ་གཞོན་ནུར་གསལ་བ་དེ་ཉིད་ཁྱེད་རང་རྣམས་ཀྱི་སྤྱི་བོ་ནས་ཐིམ་པས་རྒྱུད་བྱིན་གྱིས་རློབ་པའི་མོས་པ་མཛོད། འོ་དེ་རྣམས་ཀྱི་སྒོ་ནས་རྗེས་སུ་གནང་བ་ལེགས་པར་གསན་པ་ཡིན་པས་དེ་དག་གི་གནས་སྐབས་སུ་ཞལ་གྱིས་བཞེས་པའི་དམ་ཚིག་དང་སྡོམ་པ་ལ་སྲུང་སྡོམ་ཚུལ་བཞིན་ཏུ་བགྱིའོ་སྙམ་པས་འདིའི་རྗེས་ཟློས་མཛོད། གཙོ་བོས་སོགས། རྗེས་གནང་ཟབ་མོ་ཐོབ་པའི་གཏང་རག་གི་ཡོན་ཏུ་མཎྜལ་ཕུལ་བ་ཞུ། དེ་ལྟར་མཎྜལ་ཕུལ་ནས་ལུས་ལོངས་སྤྱོད་ཐམས་ཅད་བླ་མ་ལ་ཡོན་ཏུ་འབུལ་ཞིང་ཆ་ཤས་ཀྱི་སྒོ་ནས་ལོངས་སྤྱོད་དུ་གསོལ་སྙམ་པས་འདིའི་རྗེས་ཟློས་མཛོད། དེང་ནས་སོགས་སྤྱི་ལྟར་བྱེད། དེ་རྣམས་ཀྱི་སྒོ་ནས་བཅོམ་ལྡན་འདས་རྡོ་རྗེ་ཕུར་པའི་སྨད་ལས་དྲག་པོ་སྒྲོལ་བའི་རྗེས་སུ་གནང་བ་ལེགས་པར་གསན་པ་ཡིན་པས། རང་གཞན་གྱི་དོན་རྒྱ་ཆེན་པོ་མཛད་པར་ཞུ། བསོད་ནམས་འདི་ཡིས་སོགས་བརྗོད་ཅིང་སློབ་མ་རྣམས་རང་གནས་
སུ་བཏང་ངོ་། །གསུམ་པ་རྗེས་ཀྱི་ཆོ་ག་ནི། ཆོས་སྐྱོང་སྐོང་བ་སྤྱི་བསྟབ་སོགས་གཏོར་ཆོག་དཀྱུས་ལྟར་ཚང་བར་བྱ། ཚོགས་ལ་རོལ། ལྷག་ཆོག་བཏང་། བརྟན་མ་བསྐྱང་། རྟ་བྲོ་བརྡུང་། ཕྱི་མཆོད་ཁ་གསོས་ལ་མཆོད་པ་བྱིན་རླབས་བྱ། ཕྱི་མཆོད་ནང་མཆོད་བསྟོད་པ་མདོར་བསྡུས་མཐར། ཡེ་ཤེས་ལྔ་ལྡན་སོགས་ཀྱིས་དངོས་གྲུབ་བླང་། ཡི་གེ་བརྒྱ་པས་ལྷག་ཆད་ཁ་བསྐང་། ནོངས་པ་བཟོད་གསོལ། རས་བྲིས་དང་རྟེན་ཡོད་ན་བརྟན་བཞུགས་བྱ། རྡུལ་ཚོན་གྱི་དཀྱིལ་འཁོར་དང་། གཏོར་མགྲོན་སོགས་རྟེན་མེད་པ་རྣམས་གཤེགས་སུ་གསོལ། དམ་ཚིག་པ་རང་ལ་བསྡུ། སློབ་དཔོན་གྱིས་གཙོ་ཕུར་ནས་རིམ་གྱིས་བྱིན་རླབས་ཞུས་ཏེ་བསྡུས། ཨ་ཀཱ་རོས་རྡུལ་ཚོན་བསྡུ། བདག་བསྐྱེད་ཀྱི་དཀྱིལ་འཁོར་པ་རང་ལ་བསྡུ་ཞིང་གོ་བགོ་བསྔོ་སྨོན་བཀྲ་ཤིས་བཅས་དཀྱུས་ལྟར་རྒྱས་པར་བྱས་པས་ལེགས་པར་གྲུབ་བོ། །ཕུར་པ་མཁན་པོས་གདབ་ལས་བྱ་བ་ལ། །མེད་དུ་མི་རུང་རྗེས་གནང་ཁྱད་པར་ཅན། །གྲུབ་བརྙེས་བར་མ་ཆད་པར་རྗེས་གནང་བས། །བྱིན་རླབས་གཟི་བརྗིད་འབར་འདི་ཚོལ་བར་རིགས། འཁྲུལ་བྲལ་གོང་མའི་གསུང་རབ་ལ། །བརྟེན་ཏེ་རྨོངས་བློའི་འདོད་འཇོར་བྱས། །ཉེས་ཀུན་རྩ་གསུམ་དམ་ཅན་ལ། །བཟོད་པར་གསོལ་གྱིས་ཚངས་པར་སྩོལ། །དགྲ་བགེགས་དུག་ལྔ་བདག་འཛིན་བཅས། །ཕུར་བུ་རྣམ་བཞིས་འདེབས་པ་ལ། །རྡོ་རྗེ་སྲིན་པོའི་སྟོབས་བཅུའི་རྩལ། །ཡོངས་རྫོགས་བདུད་ལས་རྣམ་རྒྱལ་ཤོག །ཅེས་པ་འདིའང་དད་དམ་ལྷག་བསམ་གསེར་བཟང་ལྟར་མི་འགྱུར་བ་ཛཾ་ཐང་བླ་མ་ལྔ་སྡེས་ཡང་ཡང་བསྐུལ་བའི་ངོར་རྗེ་བཙུན་ཆེན་པོའི་གསུང་རབ་ཀྱི་ཞབས་ཏོག །དཔལ་ལྡན་ཇོ་ནང་པའི་བསྟན་པ་རྒྱས་པའི་ཆེད་དུ་དམིགས་ཏེ། རྡོ་རྗེ་ཧེ་རུ་ཀ་དང་དབྱེར་མ་མཆིས་པ་ཀརྨ་སི་ཏུས་རྗེས་སུ་བཟུང་ཞིང་། འཇམ་དབྱངས་གྲུབ་པའི་དཔའ་བོའི་གསུང་གི་བཅུད་འཛིན་པ། པདྨ་གར་དབང་བདེ་བའི་རྡོ་རྗེས་འཇམ་པའི་དབྱངས་སྔགས་འཆང་ཆེན་པོའི་གསུང་བཞིན་དཔལ་སྤུངས་ཡང་ཁྲོད་དུ་བཀོད་པ། སྙིང་པོའི་བསྟན་པ་ཕྱོགས་བརྒྱར་རྒྱས་པའི་རྒྱུར་གྱུར་ཅིག །དགེའོ། །