བཅོམ་ལྡན་འདས་རྡོ་རྗེ་ཕུར་པའི་བསྐྱེད་རྫོགས་ཀྱི་ཁྲིད་ཡིག་ས་བོན་ཙམ་སྨོས་པ་རྡོ་རྗེའི་གསང་མཛོད།
བཅོམ་ལྡན་འདས་རྡོ་རྗེ་ཕུར་པའི་བསྐྱེད་རྫོགས་ཀྱི་ཁྲིད་ཡིག་ས་བོན་ཙམ་སྨོས་པ་རྡོ་རྗེའི་གསང་མཛོད་ཅེས་བྱ་བ་བཞུགས་སོ།། །།
བཅོམ་འདས་རྡོ་རྗེ་ཕུར་པའི་བསྐྱེད་རྫོགས་ཁྲིད་ཡིག་ས་བོན་ཙམ་སྨོས་པ་རྡོ་རྗེའི་གསང་མཛོད་ཅེས་བྱ་བ། ན་མོ་གུ་རུ་མ་ཧཱ་ཤྲི་ཡེ། རྒྱལ་བ་ཀུན་འདུས་རྡོ་རྗེ་ཐོད་ཕྲེང་རྩལ། །དབྱེར་མེད་འཁོར་ལོའི་དབང་ཕྱུག་།ཐུགས་རྗེའི་གར། །ཕྲིན་ལས་ཡོངས་རྫོགས་ཕྱག་རྒྱར་བསྒྱུར་དེ་ལ། །མི་ཕྱེད་དད་པས་འདུད་དོ་རྗེས་འཛིན་མཛོད། །རྒྱ་བོད་མཁས་གྲུབ་ཐུགས་ཀྱི་བརྣག་པ་སྟེ། །རྒྱུད་རྒྱལ་ལུང་གི་བླ་མ་མན་ངག་གི། །ངེས་དོན་རིག་མཆོག་འབུམ་སྡེ་རི་ཡང་སྙིང་འདི། །འཆད་ལ་རྩ་བ་གསུམ་གྱིས་གནང་བ་སྩོལ། །དུས་གསུམ་རྒྱལ་བ་ཐམས་ཅད་ཀྱི་ཐུགས་ཀྱི་བརྣག་པ། །རྒྱ་བོད་མཁས་གྲུབ་ཐམས་ཅད་ཀྱི་གཅེས་པའི་དབྱིག །བྱང་ཆུབ་སྒྲུབ་པ་ལ་མེད་དུ་མི་རུང་བའི་ཆ་རྐྱེན་ཕྲིན་ལས་ཀྱི་ལྷ་མཆོག་རྡོ་རྗེ་ཕུར་པའི་ཟབ་ཁྲིད་འཆད་པ་སྟེ་དེའང་སྤྱིར་རྡོ་རྗེ་ཕུར་པ་ལ་རྒྱུད་ཀྱི་བསྡུ་ཐབས་གཉིས།
བཤད་ཐབས་གསུམ། ཁོག་དོན་དྲུག །ཐེམས་སྦྱོར་བཅུ། །གནད་ཐོབ་བཅུ་གཉིས། གསང་ཐེམས་ཉེར་གཅིག་ལ་སོགས་པར་གསུངས་པ་རྣམས་ཧྲིལ་གྱིས་དྲིལ་ན། སྟོད་ལས་བྱང་ཆུབ་སྒྲུབ་པ་དང་། སྨད་ལས་དགྲ་བགེགས་བསྒྲལ་བའི་ལམ་གྱི་རིམ་པ་གཉིས་སུ་འདུ་བའི་ཕྱིར། ཕུར་བུའི་རྒྱུ་བཞིའི་གང་ཟག་རྣམ་པ་བཞི་མཐར་དབྱུང་ཞེས་པའི་དོན། ཕུར་བུ་ངན་སྔགས་གཙུག་ལག་གི་རྒྱུད་ལས། ཕུར་བུ་རྣམ་བཞིའི་དགོངས་པ་ཡིས། །གང་ཟག་རྣམ་བཞི་མཐར་དབྱུང་ངོ་། །རིག་པ་ཡེ་ཤེས་ཕུར་བུ་ནི། །ཆོས་ཀྱི་དབྱིངས་ཀྱི་ཀློང་དུ་གདབ། །ཐུགས་རྗེ་སྤྲུལ་པའི་ཕུར་བུ་ནི། ཁམས་གསུམ་སེམས་ཅན་ལ་གདབ་པའོ། །གསང་བ་བྱང་སེམས་ཕུར་པ་ནི། །ཡུམ་གྱི་མཁའ་ཀློང་ཡངས་པར་གདབ། །མཚན་མ་རྫས་ཀྱི་ཕུར་པ་ནི། །དགྲ་
དང་བགེགས་ལ་གདབ་པའོ། །ཞེས་གསུངས་སོ། །དེ་ལྟར་ཕུར་བུ་ཐལ་འབྱིན་གྱི་དགོངས་པ་རྣམ་པ་བཞི་ལས་སྔ་མ་གསུམ་དཀར་པོ་བྱང་ཆུབ་ལམ་གྱི་སྒྲོན་མེ་ཞེས་བྱ་བ་སྟོད་ལས་དང་། ཕྱི་མས་སྨད་ལས་སྒྲོལ་བའི་ལམ་རིམ་སྟོན་པ་ལས་འདི་སྐབས་སུ་བབས་པ་ནི། སྟོད་ལས་བྱང་ཆུབ་སྒྲུབ་པའི་ལམ་རིམ་སྟོན་པ་ཡིན་ཅིང་། དེའང་ཆུ་བོ་བཞི་འདུས་ཀྱི་སྒོ་ནས་བཤད་ཅིང་ཉམས་སུ་ལེན་དགོས་པ་ལས། སྨིན་བྱེད་དབང་གི་ཆུ་བོ་སྐུར་བྱེད་ངོ་སྤྲོད་དང་བཅས་པས་རྒྱུད་སྨིན་ཅིང་དཀྱུས་བཤད་གཞུང་གི་ཆུ་བོ་འགྲེལ་ཊཱིཀ་གཏོང་ཐུན་དང་བཅས་པས་གདམས་པའི་ཕུ་ཐག་བཅད་གྲུབ་པའི་དབང་དུ་བྱས་ཏེ། སྐབས་འདིར་གདམས་པ་ཉམས་ལེན་གྱི་ཆུ་བོ་ལག་ལེན་མངོན་རྟོགས་དང་བཅས་པ། མན་ངག་གནད་ཀྱི་ཆུ་བོ་དྲིས་ལེན་གེགས་སེལ་དང་བཅས་པ་ལྟོ་སྦྱར་བའི་སེམས་འཛིན་གྱི་སྙིང་པོ་ཙམ་ཞིག་འཆད་པ་ལ་སྤྱི་དོན་གསུམ། སྔོན་དུ་འགྲོ་བས་རྒྱུད་སྦྱོང་བ། དངོས་གཞི་ཉམས་སུ་ལེན་པ། རྗེས་ཀྱི་བྱ་བས་བསྒྲུབ་བྱ་མཐར་དབྱུང་བའོ། །དང་པོ་ནི། །ཐུན་མོང་བ་དལ་འབྱོར་རྙེད་དཀའ་ལ་ངེས་པ་རྙེད། འཆི་བ་མི་རྟག་པས་རྒྱུད་འཁུལ། ལས་འབྲས་བསླུ་མེད་ལ་ཡིད་ཆེས་སྐྱེས། འཁོར་བའི་ཉེས་དམིགས་ཀྱིས་ཞེན་ལོག་དང་ངེས་འབྱུང་སྐྱེས་པའི་གང་ཟག་གིས། ཐུན་མོང་མ་ཡིན་པ་ཐེག་པ་ཐམས་ཅད་ཀྱི་གཞི་མ་སྐྱབས་འགྲོ་སེམས་བསྐྱེད། སྡིག་སྒྲིབ་སྦྱོང་བྱེད་རྡོ་རྗེ་སེམས་དཔའི་བསྒོམ་བཟླས། ཚོགས་བསགས་མཎྜལ་གྱི་ཆོ་ག །བྱིན་རླབས་
མྱུར་དུ་འཇུག་བྱེད་བླ་མའི་རྣལ་འབྱོར་ནི་དཔལ་ཡང་དག་ལ་སོགས་པ་རིགས་མཐུན་གཞན་ནས་འབྱུང་བ་ལ་ཁ་བསྒྱུར་ཕྲན་བུས་བརྒྱན་ཏེ་གནད་དུ་སྨིན་པར་ཉམས་སུ་བླང་ངོ་། །གཉིས་པ་ལ་གཉིས། ལྟ་བས་ཐག་བཅད་པ། སྒོམ་པས་དྲོད་དང་ལྡན་པར་བྱ་བའོ། །དང་པོ་ནི། ནམ་མཁའ་ལྟ་བུའི་གང་ཟག་གིས་རིག་པ་ཡེ་ཤེས་ཀྱི་ཕུར་པ་ཡུལ་ཆོས་ཀྱི་དབྱིངས་ལ་གདབ་པ་སྟེ། རྒྱུད་ལས། །ལྟ་བ་རྟོག་བྲལ་མ་འཁྲུལ་བ། །རྡོ་རྗེ་གཞོན་ནུའི་དགོངས་པ་ཡིན། །ཅེས་པས་འདི་ལ་གསུམ། དོན་མ་ནོར་བའི་ལྟ་བ། རིག་པ་མ་བཅོས་པའི་ལྟ་བ། དབྱིངས་དྲང་པོའི་ལྟ་བའོ། །དང་པོ་ནི། གནས་པ་གཞིའི་རྡོ་རྗེ་གཞོན་ནུ་ཞེས་བྱ་ཞིང་། དེའང་རང་གི་སེམས་ཉིད་ཡིན་ཏེ་སེམས་དེ་རྒྱུས་མ་བསྐྱེད། རྐྱེན་གྱིས་མི་འཇིག །སངས་རྒྱས་སྒམ་སྟེ་མ་མཛད། སེམས་ཅན་སྒྲིན་ཏེ་མ་བཅོས། རང་འབྱུང་གི་ཡེ་ཤེས་ཆེན་པོ་ཡིན་པ་ལ་ཡིན་པར་ངོ་ཤེས་པའོ། །གཉིས་པ་ནི། བགྲོད་པ་ལམ་གྱི་རྡོ་རྗེ་གཞོན་ནུ་ཞེས་བྱ་སྟེ། དེ་ལྟར་འཁོར་འདས་ཆོས་སྐུ་ཉག་གཅིག་གི་རང་བཞིན་དུ་གནས་པ་དེ་མ་རྟོགས་པས་དངོས་མཚན་ཏུ་བཟུང་བ་རྣམས་ལ་དམིགས་མེད་སྙིང་རྗེ་མཁའ་ཁྱབ་ཏུ་སད་པའི་ཐབས་ཤེས་གཉིས་མེད་ལམ་དུ་ཁྱེར་བའོ། །གསུམ་པ་ནི། གྲུབ་པ་འབྲས་བུའི་རྡོ་རྗེ་གཞོན་ནུ་ཞེས་བྱ་སྟེ། ནམ་མཁའ་ལས་ཆོ་འཕྲུལ་བྱུང་ཡང་རང་ལས་བྱུང་ཞིང་རང་ལ་ཐིམ། ངོ་བོས་ཀུན་ལ་ཁྱབ་པ་ལྟར་ཆོས་ཉིད་ལས་རོལ་པ་བྱུང་། རོལ་པ་ཆོས་ཉིད་དུ་ཐིམ། ཆོས་ཉིད་ཀྱིས་ཀུན་ལ་
ཁྱད་པས་རང་སེམས་གློ་བུར་གྱི་དྲི་མ་དང་བྲལ་བ་ནི་དག་པ་གཉིས་ལྡན་ཆོས་ཀྱི་སྐུ་མངོན་དུ་གྱུར་པ་ཡིན་ཅིང་། དེའང་སྐུ་ལྔ་སེམས་ཀྱི་གཤིས་ལ་ཚང་སྟེ། སེམས་སྤྲོས་བྲལ་ཆོས་སྐུ། དེའི་རྒྱན་དང་རོལ་པ་གཟུགས་སྐུ་གཉིས། དེ་ལ་སྡུག་བསྔལ་མེད་པ་བདེ་བ་ཆེན་པོའི་སྐུ། དེ་རྣམས་དབྱེར་མི་ཕྱེད་པ་ངོ་བོ་ཉིད་ཀྱི་སྐུ། དེ་ལ་ཡེ་ཤེས་དགུའང་ཚང་སྟེ། ངོ་བོ་སྤྲོས་པ་བྲལ་བ་ཆོས་དབྱིངས་ཡེ་ཤེས། གསལ་ལ་རྟོག་པ་མེད་པས་མེ་ལོང་ལྟ་བུ་ཤེས་པ་སོ་སོར་གསལ་བས་སོར་རྟོག །ངོ་བོ་གཅིག་ཏུ་མཉམ་པས་མཉམ་ཉིད། ཐམས་ཅད་ལྷུན་གྲུབ་ཏུ་སྣང་བས་བྱ་གྲུབ། སྣང་ཚད་ཡེ་ཤེས་སུ་འདུག་པས་རྟོགས་པའི་ཡེ་ཤེས། རང་གི་རང་རིག་པས་རང་བྱུང་ཡེ་ཤེས་སྣང་རིག་ཟུང་འཇུག་ཏུ་ཐེབས་པས་རྒྱས་འདེབས་ཡེ་ཤེས། དེ་ཐམས་ཅད་དོན་ལ་ཐ་སྙད་དང་བྲལ་བས་བསམ་གྱིས་མི་ཁྱབ་པའི་ཡེ་ཤེས་ཏེ། མདོར་ན། །ངང་ཉིད་རྡོ་རྗེ་ཆོས་དབྱིངས་ལས། །འབར་བའི་ཁྲོ་བོ་མི་བཟད་པ། །ཞེས་པས་རིག་པའི་རྩལ་མ་འགགས་པར་སྣ་ཚོགས་སུ་ཤར་བའི་སྣང་བ་འདི་རྣམས་ཡེ་ཤེས་ཡིན་པས་རྟགས་ལྷའི་དཀྱིལ་འཁོར་དུ་རྫོགས། སྣང་བ་དེ་ཀའི་དུས་ནས་ངོ་བོས་སྟོང་པས་དོན་ཆོས་ཀྱི་དབྱིངས་སྤྲོས་པ་བྲལ་བར་གནས། དེ་གཉིས་དབྱེར་མེད་པའི་སྲས་བདེ་ཆེན་བྱང་ཆུབ་སེམས་ཀྱི་རང་བཞིན་ཏུ་གནས་པས་དབྱིངས་དང་ཡེ་ཤེས་དབྱེར་མེད་པའི་ལྟ་བ་ཞེས་བྱ་བ་དེ་ཉིད་རྟོགས་དོན་སྒོམ་པ་འོག་ནས་འཆད་པའི་རིམ་པས་ཉམས་སུ་
བླངས་པས་འཁོར་བའི་རྩད་ཆོད་ནས་འབྲས་བུ་ཆོས་སྐུ་འཐོབ་པར་འགྱུར་ཏེ། །རྩ་རྒྱུད་རྡོ་རྗེ་ཁྲོས་པ་ལས། །རིག་པ་ཡེ་ཤེས་ཕུར་པ་དེ། །ལྷང་གིས་རྟོགས་ན་ཐེབས་པ་ཡིན། །འབྲས་བུ་ཆོས་སྐུ་སྐྱེ་མེད་འཐོབ། །མ་ཐེབས་མ་བཏབ་འཁོར་བར་འཁྱམས། །ཞེས་གསུངས་སོ། །གཉིས་པ་སྒོམ་པ་ལ། སྤྲོས་བཅས་བསྐྱེད་པའི་རིམ་པ་དང་། །སྤྲོས་མེད་རྫོགས་པའི་རིམ་པའོ། །དང་པོ་ནི། རི་བོ་ལྟ་བུའི་གང་ཟག་གིས་ཐུགས་རྗེ་སྤྲུལ་པའི་ཕུར་པ་ཡུལ་ཁམས་གསུམ་ལ་གདབ་པ་སྟེ། དེ་ལ་གསུམ། ཕྱི་བསྐྱེད་པའི་རིམ་པ། ནང་བསྐྱེད་པའི་རིམ་པ། །གསང་བ་བསྐྱེད་པའི་རིམ་པའོ། །དང་པོ་ཕྱི་བསྐྱེད་པའི་རིམ་པ་ལའང་གསུམ། ཐབས་བསྐྱེད་རིམ་བསྒོམ་པ། །ཤེས་རབ་རྫོགས་རིམ་གྱི་རྒྱས་གདབ་པ། །གཉིས་མེད་ཟུང་འཇུག་ལམ་དུ་ཁྱེར་བའོ། །དང་པོ་ནི། །སྒྲུབ་ཐབས་དང་སྦྲེལ་ན་སྔོན་འགྲོ་ལས་བདུན་དང་། ངེས་རྫོགས་ཀྱི་བསྐྱེད་རིམ་ལ་སྔོན་འགྲོ་རྣམ་བཞི་ཙམ་གསལ་བཏབ་ནས་བསྒོམ་དོན་དངོས་ལ་ལྔ། དཀྱིལ་འཁོར་རྣམ་པ་གསུམ་སྔོན་ཏུ་འགྲོ་བས་བསྐྱེད་རིམ་གྱི་གཞི་བཟུང་། སྲོག་ཡེ་ཤེས་སུ་དབང་བསྐུར། མཆོད་ཅིང་བསྙེན་པས་དངོས་གྲུབ་ཀྱི་བཅུད་བླང་། མཉམ་བཞག་གི་ཏིང་ངེ་འཛིན་དངོས་བཤད། རྗེས་སྤྱོད་ཛཔྲ་བཟླས་ཞར་བྱུང་དུ་སྨོས་པའོ། །དང་པོ་ལ་གསུམ། གཞིའི་ཏིང་ངེ་འཛིན་རྟེན་གཞལ་ཡས་ཁང་། བརྟེན་པ་ལྷ་བསྐྱེད་པའོ། །དང་པོ་ལ་གསུམ། དེ་བཞིན་ཉིད། ཀུན་ཏུ་སྣང་།
རྒྱུའི་ཏིང་ངེ་འཛིན་ནོ། །དང་པོ་ནི། བདེ་བའི་གདན་ལ་བསམ་གཏན་གྱི་སྤྱོད་ལམ་དང་ལྡན་པས་འཁོད་དེ། གང་དུ་ལྟ་བས་ཐག་བཅད་པའི་དབྱིངས་དང་ཡེ་ཤེས་དབྱེར་མེད་བདེ་བ་ཆེན་པོའི་ངང་དུ། ཅི་ལའང་མི་རྟོག །གང་དུའང་མི་འཛིན། ཅིར་ཡང་མི་དམིགས་པར་མཉམ་པར་བཞག །རྣམ་རྟོག་སྐྱེས་ན་རང་གྲོལ་འཛིན་མེད་དུ་ཁྱེར་ཏེ་མདོར་ན་ལས་དང་པོ་པས་སྟོང་ཉིད་ལ་སྒྲ་སྤྱི། ལས་གོམས་པ་པས་དོན་སྤྱི། ལས་སྨིན་པ་པས་དོན་རང་གི་མཚན་ཉིད་དུ་ཉམས་སུ་བླང་ངོ་། །གཉིས་པ་ནི། མཉམ་བཞག་དེ་ལ་གོམས་པ་ན། དམིགས་པའི་ཡུལ་དེ་ལྟར་མ་རྟོགས་པའི་མཁའ་ཁྱབ་ཀྱི་སེམས་ཅན་ལ། རྣམ་པ་ཚད་མེད་པའི་སྙིང་རྗེ་ཆེན་པོ་བསྐྱེད་པས་རྐྱེན་བྱས་ནས། རང་བྱུང་གཞོམ་མེད་ཀྱི་ཧཱུྃ་སྒྲ་བྲག་ཆ་ལྟ་བུར་སད་པ་དང་ལྷན་ཅིག །རང་གི་རིག་པ་ཁ་དོག་ལྔ་ལྡན་གྱི་འོད་གསལ་ལ་མ་འགགས་པར་སྣང་བར་བསྒོམ། གསུམ་པ་ནི། དེ་ལྟར་སྟོང་ཉིད་སྙིང་རྗེ་ཟུང་འཇུག་རྒྱུ་ཡི་ཡི་གེ་ཧཱུྃ་མཐིང་ཁ་འོད་ཟེར་རབ་ཏུ་འཕྲོ་བ་ཞིག་ནམ་མཁའ་ལ་ཐོལ་གྱིས་བྱུང་བར་མོས་ལ། ལས་དང་པོ་པ་དམིགས་པ་མི་བརྟན་པ་ཡིན་ན། ཚོན་གྱིས་བྲིས་པའི་ཧཱུྃ་ཡིག་སྔོན་པོ་མདུན་ཏུ་བཞག་ལ་སེམས་རྩེ་གཅིག་ཏུ་གཏད་དེ་ཡུལ་གསུམ་གྱད་དུ་གྱུར་གྱི་བར་བསྒོམ་མོ། །གཉིས་པ་རྟེན་གཞལ་ཡས་ཁང་བསྒོམ་པ་ལ་གསུམ། འོག་གཞི་འབྱུང་བ་རིམ་བརྩེགས། གཞལ་ཡས་ཁང་བསྒོམ་པ། གདན་བསྐྱེད་
པའོ། །དང་པོ་ནི། རྒྱུའི་ཧཱུྃ་ལས་ཨེ་ལ་སོགས་པའི་ས་བོན་རིམ་བཞིན་ཆད། འོད་ཟེར་སྤྲོ་བསྡུས་དོན་བྱས། ཚུར་འདུས་ཕྱི་ལྟར་ནམ་མཁའ་རླུང་ཆུ་རི་རབ་མེ་དཔུང་བཅས་པ། ནང་ལྟར་སེམས་དབུགས་ཁྲག་ཤ་དྲོད་ཀྱི་རང་བཞིན། གསང་བ་དུག་ལྔ། དེ་ཁོ་ན་ཉིད་སྐུ་ལྔ་དང་ཡེ་ཤེས་ལྔར་དག་པའི་ངོ་བོར་བསྒོམ། གཉིས་པ་ནི། རྒྱུའི་ཡི་གེ་ལས་བྷྲཱུྃ་ཆད། རི་རབ་ཀྱི་སྟེང་དུ་ཕྱི་རིན་ཆེན་སྣ་ལྔ། ནང་ཐོད་པ་སྐམ་རློན་ལས་བྱས་པའི་གཞལ་ཡས་ཁང་རྒྱ་ཁྱོན་ཚད་མེད་པ། དུར་ཁྲོད་འབར་བའི་རྒྱན་དང་བཀོད་པ་ཡོངས་སུ་རྫོགས་ཤིང་ཕྱི་རོལ་དུར་ཁྲོད་ཆེན་པོ་བརྒྱད། དེའི་ཕྱོགས་བཞིར་ཤར་ན་བྱ་ཀཾ་ཀ་སྒྲོག་པ། ལྷོར་ཁྱི་ཀྱི་ལིང་དུ་ཟུག་པ། ནུབ་ན་འདྲེ་མེ་འབར་བ། བྱང་ན་དུ་བ་ཐུལ་བ་སྟེ་དུར་ཁྲོད་ཀྱི་ཆས་བཞི་དང་སྲུང་བའི་འཁོར་ལོ་ལ་སོགས་པས་བསྐོར་བ་གསལ་གདབ། དེའང་། སྲིད་པ་རྡོ་རྗེ་ཕུར་པའི་ལྷ། ཞེས་པས་སྟོང་གསུམ་ཕུར་པའི་རང་བཞིན་ཏུ་གདོད་ནས་གྲུབ་པ་ཉིད་མོས་སྒོམ་གྱིས་ཁྱབ་པར་བྱ་སྟེ། རྒྱུད་ཁྲོ་བོ་རོལ་པ་ལས། དབལ་ནི་ངན་སོང་འཁོར་བའི་གནས་བཅུ་རྫོགས། །རྒྱ་མདུད་འོག་མ་འདོད་ཁམས་གནས་ཉི་ཤུ། །བཅུ་མ་གཞོག་སྨད་ལ་གཟུགས་ཁམས་གནས་བཅུ་བདུན། །སྟོད་ལ་གཟུགས་མེད་སྐྱེ་མཆེད་མུ་བཞིའི་ལྷ། །ཞེས་དང་། །རྒྱ་མདུད་བདེ་གཤེགས་གཞལ་ཡས་ཁང་། །དཀྱིལ་འཁོར་ཆེན་པོར་རང་བཞིན་གནས། །ཞེས་གསུངས་པས་སྟོང་གསུམ་ཕུར་
བུའི་རང་བཞིན་ཏུ་གསལ་བའི་རྒྱ་མདུད་གོང་མར་དཔལ་ཆེན་པོའི་གཞལ་ཡས་ཁང་གི་དབུས་སུ་གྲུ་གསུམ་མཐིང་ནག །དེ་རྒྱབ་འཁོར་ལོའམ་རྒྱ་མདུད་ལྡེགས་པས་མཚན་པ་དང་བཅས་པར་བསྒོམ། གསུམ་པ་ནི། དབུས་སུ་སོ་སོའི་ས་བོན་ལས་སྐྱེས་པའི་ཟླ་བ་ཉི་མའི་སྟེང་དུ་ཛཿཧཱུྃ་བྃ་ཧོཿཞེས་པས་སྤྲུལ་པའི་ལྷ་མོ་བཞིས་བཀུག་པའི་རུ་ཏྲ་ཕོ་ཁ་སྦུབ། མོ་གན་རྐྱལ། རྩིབས་རྣམས་སུ་ཕྱོགས་སྐྱོང་ཕོ་མོ། །སྒོ་བཞིར་དྲི་ཟ་གཤིན་རྗེ་ཀླུ་དབང་གནོད་སྦྱིན་རྣམས་དང་། མོས་པའི་གདན་རང་ལ་གནོད་པའི་དགྲ་བགེགས་ཀྱང་བཀུག་ལ་བཏིང་བར་མོས། །གསུམ་པ་བརྟེན་པ་ལྷ་བསྐྱེད་པ་ལ་གསུམ། །ཆོས་སྐུའི་ངོ་བོར་བདག་རྩ་བའི་དཀྱིལ་འཁོར། །ལོངས་སྐུའི་ངོ་བོ་ཕྱོགས་བཅུ་ཁྲོ་བོའི་དཀྱིལ་འཁོར། །སྤྲུལ་སྐུའི་ངོ་བོ་ཕུར་པ་རྫས་ཀྱི་དཀྱིལ་འཁོར་བསྐྱེད་པའོ། །དང་པོ་ལ་བཞི་ཚན་དྲུག་སྟེ། །དེའང་བསྐྱེད་རྒྱུའི་སེམས་དཔའ་བཞི་པོ་ནི། ཐོག་མར་མཚམས་ཀྱི་ལྷ་དཔའ་བོ་གཅིག་པ་དམ་ཚིག་སེམས་དཔའ། ཏིང་འཛིན་གསུམ་བསྒོམས་ནས་དཔལ་ཆེན་པོར་བསྐྱེད་པ་ཏིང་འཛིན་སེམས་དཔའ། ཡེ་ཤེས་པ་སྤྱན་འདྲེན་པ་ཡེ་ཤེས་སེམས་དཔའ་རང་དང་གཉིས་མེད་དུ་བསྲེ་བ་གཉིས་སུ་མེད་པའི་སེམས་དཔའ་སྟེ་ལུགས་འདིའི་བསྐྱེད་རིམ་བསྒོམ་ཕན་ཆད་དེ་བཞི་ཚང་དགོས་སོ། །བསྐྱེད་པའི་ཆ་ལུགས་བཞི་ནི། ཕུར་པ་གསང་རྒྱུད་ལས་གསུངས་པའི་རྡོ་རྗེ་གཞོན་ནུ་དབུ་སྟོང་ཕྱག་སྟོང་སྤྱན་བྱེ་བ་སྟོང་མངའ་བ་
དང་། ཕུར་པ་མྱང་འདས་ལས་གསུངས་པའི་ཕུར་པ་ཆེ་མཆོག་དབུ་དགུ་ཕྱག་བཅོ་བརྒྱད་པ་དང་། རྩ་རྒྱུད་རྡོ་རྗེ་ཁྲོས་པ་སོགས་རྒྱུད་ཕལ་ཆེར་ལས་གསུངས་པའི་དབུ་གསུམ་ཕྱག་དྲུག་པ་དང་། ཀཱི་ལ་ཡ་བཅུ་གཉིས་ཀྱི་ཏནྟྲ་ནས་འབྱུང་བའི་ཞལ་གཅིག་ཕྱག་གཉིས་པ་སྟེ། བློ་དང་སྦྱར་ནས་བསྒོམ་པ་ཡིན་ནོ། །བསྐྱེད་པའི་མཚན་ཉིད་བཞི་ནི། བདུད་དང་སྲིན་པོ་ཁྲོས་པ་ལྟ་བུ་མ་ཡིན་པར་ཐུགས་རྗེ་ཆེན་པོས་གདུལ་བྱ་འདུལ་བའི་ཐབས་སུ་བསྟན་པ་ཡིན་པས། བློ་ཡང་རབ་ཀྱིས་བྱམས་པ་དང་སྙིང་རྗེའི་ལྷར་བསྒོམ། བློ་རབ་དག་པ་དྲན་པས་ལྷར་བསྒོམ། བློ་འབྲིང་རྣམ་པ་ཙམ་དུ་ལྷར་བསྒོམ། བློ་ཐ་མས་ལྷའི་ང་རྒྱལ་ཙམ་དུ་བསྒོམ་པར་བྱ་སྟེ། སྔགས་པ་ལྷ་ལམ་པ་བྱ་བ་ང་རྒྱལ་ཙམ་གྱིས་ཀྱང་དོན་འགྲུབ་པ་ཡིན་གསུངས། བསྐྱེད་པའི་གནས་སྐབས་བཞི་ནི། ལས་དང་པོ་པས་ཤེས་པ། ལས་གོམས་པ་པས་བདག་ཉིད། ལས་སྨིན་པ་པས་ཕུང་པོ། ལས་མཐར་ཕྱིན་པས་ཡུལ་ཐམས་ཅད་ལྷར་བསྒོམ། བསྐྱེད་ཐབས་ཀྱི་ཆོ་ག་བཞི་ལས་བློ་ཡང་རབ་སྐད་ཅིག་དྲན་རྫོགས་སུ་བསྐྱེད་པ་ནི་རྣམ་པར་རྟོག་པས་བར་དུ་མ་ཆོད་པས་ཡེ་ཤེས་ཀྱི་ཚོགས་ཁོ་ན་སྟེ་བཟང་། བློ་རབ་ཀྱིས་སྟོང་ཉིད་སྙིང་རྗེའི་ངང་ནས་རྩ་སྔགས་བརྗོད་པས་ལྷ་སྐུར་ལྡངས་ཏེ་རྟོག་པ་ཉུང་བས་བསོད་ནམས་ཡེ་ཤེས་གཉིས་ཀ་ཡོད། བློ་འབྲིང་རྣམས་ཆོ་ག་གསུམ་གྱིས་ལྷར་ལྡངས་ཏེ། གསུང་ཡིག་འབྲུ་ཧཱུྃ།
ཐུགས་ཕྱག་མཚན་རྡོ་རྗེ། དེ་ལས་སྐུ་ཡོངས་སུ་རྫོགས་པ་རྡོ་རྗེ་གཞོན་ནུར་གསལ་བར་བསྐྱེད་དོ། །བློ་ཐ་མ་རྣམས་ཀྱིས་བསྐྱེད་རྒྱུའི་ཆོས། གསུང་ཡིག་འབྲུ། ཐུགས་ཕྱག་མཚན། རྒྱུ་རྡོ་རྗེ་འཆང་གསུམ་ལ། བསྐྱེད་ཐབས་ཀྱི་ཆོས་བཅུ་དྲུག་གིས་བསྐྱེད་དེ། དེའང་གོང་དུ་གསལ་བཏབ་པའི་རྒྱུའི་ཡི་གེ་ཧཱུྃ་མཐིང་ནག་དེ། གཙོ་བོའི་གདན་ཐོག་ཏུ་བབས། དེ་ལས་འོད་ཟེར་སྤྲོས། དོན་གཉིས་མཛད། སླར་བསྡུས། བརྟེན་པར་འཁོད་པ་བཞི་བྱས་པས་རྡོ་རྗེ་རྩེ་དགུ་པར་སོང་། དེ་ལས་ཀྱང་སྤྲོ། མཛད། བསྡུ་བརྟན་བཞི་པོས་རྒྱུའི་རྡོ་རྗེ་སེམས་དཔའ་དཀར་པོའམ་རྡོ་རྗེ་ཧཱུྃ་གིས་མཚན་པའམ་དེ་ཞུ་བའི་ཐིག་ལེར་སོང་། དེ་ལས་སྤྲོ། མཛད། བསྡུ། བརྟན་བཞི་དང་རྩ་སྔགས་བརྗོད་པས་རྡོ་རྗེ་གཞོན་ནུ་ཡུམ་དང་བཅས་ཤིང་རྒྱན་ཕྱག་མཚན་ཡོངས་སུ་རྫོགས་པའི་སྐུར་གསལ་གདབ། དེ་ལས་ཀྱང་སྤྲོ་སོགས་བཞི་བྱས་པས་བསྐྱེད་པའི་ཡན་ལག་བཅུ་དྲུག་དང་ལྡན་པའི་བསྐྱེད་རིམ་མཚན་ཉིད་དང་ལྡན་པ་གྲུབ། །དེ་ལྟར་གཙོ་བོ་ཡབ་ཡུམ་རྫོགས་པ་དང་། བསྐྱེད་པའི་ལྷ་བཞི་གསལ་གདབ་དགོས་ཏེ། །དེའང་དང་པོ་སྲོག་གི་ལྷ་ནི། རང་གི་ཐུགས་ཙིཏྟ་རིན་པོ་ཆེ་ཟུར་བརྒྱད་པའི་ནང་དུ་ཡེ་ཤེས་སེམས་དཔའ་ཚོན་གང་བ་བརྫུས་སྐྱེས་སུ་བསམ། དེའི་ཐུགས་ཀར་ཉི་ཟླའི་དལ་སྲན་མའི་གའུ་ཙམ་གྱི་ལྟེ་བར་ཧཱུྃ་མཐིང་ཀ །མཐའ་སྐོར་དུ་ཀཱི་ལ་འབྲུ་དགུ་སྤུས་བྲིས་པ་ལྟ་བུས་བསྐོར་བ། དེའི་སྒོ་སྲུང་རྟ་མགྲིན་གསང་བའི་
ཡུམ་བཞི་དང་བཅས་པ་བསྒོམ། གཉིས་པ་སྐུ་གསུང་ཐུགས་ཀྱི་ལྷ་ནི། ཐིག་ལེའམ་ས་བོན་ལས། སྤྱི་བོར་བུདྡྷ། མགྲིན་པར་པདྨ། ཐུགས་ཀར་བཛྲ་གསུམ་མམ། བཀའ་མ་ལྟར་ན་ལྟེ་བར་རཏྞ། གསང་གནས་སུ་ཀརྨ་སྟེ་ཧེ་རུ་ཀ་ལྔ་ཡུམ་དང་བཅས་པ་དཀར་དམར་མཐིང་སེར་ལྗང་གུའི་ཁ་དོག་ཅན། རང་རྟགས་ཕྱག་མཚན་བཅས་བསྒོམ། གསུམ་པ་རྒྱན་གྱི་ལྷ་ནི། དབང་རྟགས་སུ་རིགས་ལྔ་ཆ་གཅིག་གིས་དབུ་བརྒྱན་པ་ཏེ་ས་ལུགས་སོགས་ལ་དཀྱིལ་འཁོར་གསུམ་ཆ་རེ་རེ་བཞིན་དབང་བསྐུར་སོགས་དགོས་པས་འདིར་འདོན་བསྒོམ་དུ་བྱ་ཞིང་། སྤྱི་ཙམ་དུ་དཀྱིལ་འཁོར་རྣམ་གསུམ་ཆབ་གཅིག་ཏུ་དབང་བསྐུར་བའི་དབང་དུ་བྱས་ནས་འོག་ཏུ་འཆད་དོ། །བཞི་པ་གོ་ཆའི་ལྷ་ནི། བ་སྤུ་བྱེ་བས་ཡར་ཁྲོ་ཆུང་རེ་རེ་བསྒོམ་སྟེ་ཁྲབ་གྱོན་པ་ལྟར་རོ། །གཉིས་པ་ནི། ས་ལུགས་ལྟར་ན་རྩིབས་སྦུབས་ཅན་ཁང་ཐབས་ཀྱི་ནང་དང་། གཞན་ལ་འཁོར་ལོ་རྩིབས་བརྒྱད་དམ་བཅུ་པ་གདན་ཐབས་ཀྱི་སྟེང་སོ་སོའི་གདན་ལ་བསྐྱེད་པ་སྟེ། དེའང་གཙོ་བོ་ཡབ་ཡུམ་གྱི་མཁའ་གསང་བྱིན་གྱིས་བརླབ། སྙོམས་འཇུག་མཛད་པའི་སྦྱོར་མཚམས་ནས་ཧཱུྃ་སྦྲེལ་མ་བཅུ། ཐིག་ལེ་དཀར་དམར་ཉི་ཤུ། ཛཿཧཱུྃ་བྃ་ཧོཿ བཞི་བཅས་སྤྲོས། འོད་ཟེར་སྤྲོ་བསྡུས་ཁྲོ་བོ་ཡབ་ཡུམ་བཅུ། ཁྲ་ཐབས་ཉི་ཤུ། ནང་སྒོར་སྒོ་མ་བཞི་བཅས་བསྐྱེད། དེའང་སྐྱེ་གནས་བཞི་སྦྱོང་བར་བྱེད་པའི་ཕྱིར་གཙོ་བོ་ཡབ་ཡུམ་བརྫུས་སྐྱེས་སམ། སྐྱེ་གནས་བཞི་ཀ་ཚང་བ།
ཁྲོ་བཅུ་ཡབ་ཡུམ་མངལ་སྐྱེས། ཁྲ་ཐབས་ཉི་ཤུ་སྒོང་སྐྱེས། ལུས་གྲུབ་ན་གྲིབ་མ་རང་བཞིན་གྱིས་འབྱུང་བའི་ཚུལ་དུ། ཕུར་སྲུང་བཅུ་གཉིས་ཕོ་བྲང་ཕྱི་མའི་ཁྲག་ཁྱམས་དང་། ཕྱི་ཡི་སྒོ་བཞིར་གིང་བཞི། ཕྱི་རོལ་གྱི་ཁྱམས་ལ་དབང་ཕྱུག་ཉེར་བརྒྱད་ལ་སོགས་པ་རྣམས་ནི་དྲོད་གཤེར་སྐྱེས་སུ་གྲུབ་པ་སྟེ། རེ་རེ་བཞིན་གསལ་བར་བསྒོམ་མོ། །གསུམ་པ་ལ་གཉིས། བསྙེན་ཕུར་དང་། སྲས་མཆོག་གོ། །དང་པོ་ནི། བྱུག་འདུག་བྲབ་གསུམ་སྔོན་དུ་འགྲོ་བས། སྟོང་པའི་ངང་ལས་གྲུ་གསུམ་མཐིང་ནག་འབར་བའི་དབུས་སུ་པད་ཉི་དགྲ་བགེགས་ཀྱི་གདན་ལ་རང་གི་ཐུགས་ཀ་ནས་ཧཱུྃ་སྤྲོས་པས་རྡོ་རྗེ་གཞོན་ནུ་ཡུམ་དང་བཅས་པ་བསྐྱེད། སྙིང་པོ་བཟླ། དེ་ཞུ་བ་ལས་བྱུང་བའི་ཕུར་བུར་གྱུར་པའི་རྩེ་མོར་དཔལ་ཆེན་པོ། །རྒྱ་མདུད་གོང་མར་ཁྲོ་བཅུ། ཆང་བཟུང་ལ་ཟ་གསོད། རྒྱ་མདུད་འོག་མར་སྒོམ། དཔལ་གསུམ་ལ་དམ་ཅན་རྣམས་ཀྱི་ཕོ་བྲང་དུ་གྱུར་པར་མོས་ལ་ཀཱི་ལ་ཡ་བཟླ་ཞིང་། དཀྱིལ་འཁོར་གསུམ་དང་ངོ་བོ་དབྱེར་མེད་དུ་མོས་ལ་ཐུགས་རྗེ་རྗེས་འཛིན་གྱི་སྐབས་མ་གཏོགས་བསྒྲལ་ལས་ལ་མི་འཇུག་གོ། །གཉིས་པ་ནི། སྲས་མཆོག་གི་གྲངས་ནི་བཀའ་གཏེར་སོ་སོ་ལས་མང་དུ་བཤད་པས་མཐའ་གཅིག་ཏུ་མ་ངེས་ཤིང་། གང་ལྟར་ཡང་ཆོས་གསུམ་གྱིས་སྐུ་གསུམ་གྱི་ཀློང་ནས་བསྐྱེད། འབྲུ་གསུམ་གྱིས་སྐུ་གསུང་ཐུགས་ཡེ་ཤེས་རྩེ་གཅིག་ཏུ་བྱིན་གྱིས་བརླབ། དགོས་པ་གསུམ་གྱི་ཕྱིར་ཆུ་སྲིན་རྣམ་གྲོལ་གྱི་ཕྱག་རྒྱས་བླང་། རྫས་གསུམ་
གྱིས་རིགས་ལྔས་དབང་བསྐུར། །སྔགས་གསུམ་གྱིས་སྐུ་གསུང་ཐུགས་བྱིན་གྱིས་བརླབ། སྔགས་རྫས་ཏིང་ངེ་འཛིན་གསུམ་དང་ལྡན་པས་བྱུག་བདུག་བྲབ་གསུམ་བྱས་ལ། གཞལ་ཡས་ཁང་། ལྷ། ཕྱག་མཚན་ཏེ་ཤེས་པ་གསུམ་ལྡན་གྱི་སྒོ་ནས་དགྲ་བགེགས་ཀྱི་སྙིང་དཀར་ནག་མཚམས་སུ་བཏབ་པར་མོས་ཏེ་ཨེའི་གདན་ལ་བཞུགས་སུ་གསོལ་ལོ། །གཉིས་པ་སྲོག་ལ་དབང་བསྐུར་བ་ནི། ཐོག་མར་རྒྱུད་ཀྱི་ཚིག་གིས་གསོལ་བ་བཏབ་པས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཁྲག་འཐུང་རིགས་ལྔའི་དཀྱིལ་འཁོར་གྱི་རྣམ་པར་སྤྱན་དྲངས། རྡོ་རྗེ་རིགས་ཀྱི་ཆུ་དབང་སོང་རིག་པའི་དབང་ལྔ་བསྐུར་བས་བུམ་དབང་། ཡབ་ཡུམ་སྦྱོར་བའི་བྱང་སེམས་རྒྱུན་གྱིས་ལུས་གང་བ་གསང་དབང་། ཐམས་ཅད་ཞུ་ནས་རང་ལ་ཐིམ་པས་ཤེས་དབང་། བདེ་སྟོང་གི་ཡེ་ཤེས་སྐྱེས་པ་བཞིར་བཅས་རྫོགས་ནས་བྱང་སེམས་རྒྱུན་ཡར་ལོག །དོན་གྲུབ་སོགས་རང་རིགས་གཙོ་བོར་གྱུར་པའི་རིགས་ལས་དབུ་བརྒྱན་པའི་དུས་གསུམ་སངས་རྒྱས་ཀྱིས་བདག་ལ་དབང་བསྐུར་བའོ། །ཐུགས་སྲོག་འོད་ཀྱིས་ཁམས་གསུམ་ལ་ཕོག་པས་འོད་དུ་ཞུ། རིགས་དྲུག་པོ་ཨ་ནྲྀ་སུ་ཏྲི་པྲེ་དུར་གྱུར། དེ་རྣམས་རཾ་ཡཾ་ཁཾ་གིས་བསྲེགས་སྦྱངས། བཀྲུས་པས་དཀྱིལ་འཁོར་གྱི་ལྷར་གྱུར་པ་ནི། ཁམས་གསུམ་ལ་དབང་བསྐུར་བའོ། །དེ་རྣམས་འོད་ཟེར་དང་བཅས་པ་ཚུར་འདུས་ཐུགས་ཀའི་རྟ་མགྲིན་ལ་ཐིམ་པས་བཀྲག་དང་ལྡན་པར་གྱུར་པ་ནི་བདག་གི་སྲོག་ལ་དབང་བསྐུར་བའོ། །
དེའི་རྐྱེན་གྱིས་རྟ་མགྲིན་སྦྱོར་བ་མཛད་པའི་བྱང་སེམས་ཡེ་ཤེས་སེམས་དཔའ་ལ་ཐིམ། འོད་དུ་འབར། དེའི་བཀྲག་མདངས་ཐམས་ཅད་ཐུགས་སྲོག་ཧཱུྃ་ལ་ཐིམ་པས་འོད་དུ་འབར་བར་བསམ་པ་ནི་ཡེ་ཤེས་སེམས་དཔས་སྲོག་ལ་དབང་བསྐུར་བའོ། །དེ་ལས་ཅིས་ཀྱང་མི་ཤིགས་པའི་ལྕགས་ཀྱི་སྲོག་པ་རྩ་གྲུབ། དབང་རྟགས་སུ་གནས་གསུམ་དུ་འགྲུ་གསུམ་ལས་རྣམ་སྣང་། འོད་དང་ག་མེད། མི་བསྐྱོད་པས་རྒྱས་གདབ་པར་བསྒོམ་མོ། །གསུམ་པ་མཆོད་ཅིང་བསྙེན་པ་ལ་སོགས་པ་ནི། དམ་ཚིག་པའི་ཐུགས་སྲོག་གི་འོད་ཟེར་གྱིས་གདོད་ནས་གྲུབ་པའི་རྡོ་རྗེ་ཕུར་བུའི་དཀྱིལ་འཁོར་མཁའ་ཁྱབ་ཏུ་བཞུགས་པ་རྣམས་གཟུགས་ཀྱི་སྐུར་བཞེངས་པར་མོས་ལ་སྙན་གསན་དབབ། ཡེ་ཤེས་པ་སྤྱན་དྲངས་ནས་དམ་ཚིག་པ་དང་གཉིས་སུ་མེད་པར་བཞུགས་སུ་གསོལ། ཕྱག་དང་སྨན་མཆོད་རཀྟ་ཚར་གསུམ། གཏོར་མ། སྦྱོར་སྒྲོལ་རྗེས་འབྲེལ་བཞི་བསྣོལ་ལ་སོགས་པ་དང་བསྟོད་པའི་གླུ་ཡི་མཆོད་པ་སོགས་གཤར་སྒོམ་དུ་བྱ། དེ་དག་ཐམས་ཅད་ཀྱང་། ཇི་སྐད་དུ། ཐུགས་དམ་གནད་སྐུལ་གསང་བ་སྔགས་ཀྱི་སྒོ། །དོན་དམ་གསལ་བྱེད་བརྗོད་པ་ཚིག་གི་སྒོ། །ཏིང་འཛིན་རྩེ་གཅིག་དམིགས་པ་གནད་ཀྱི་སྒོ། །མཚོན་པ་བརྡར་བཏགས་ཕྱག་རྒྱ་གར་གྱི་སྒོ། །ཞེས་གསང་སྔགས་ལུང་གི་སྒོ་བཞིའི་སྐྱ་བར་ནས་བཏོན་ཏེ་ཉམས་ལེན་དོན་ཐོག་ཏུ་འབེབས་པ་ཡིན་ནོ། །བཞི་པ་ཏིང་ངེ་འཛིན་དངོས་ལ་གསུམ། རྣམ་པ་གསལ་
བ། ང་རྒྱལ་བརྟན་པ། རྣམ་དག་དྲན་པའོ། །དང་པོ་ནི། རྟེན་གཞལ་ཡས་ཁང་དུར་ཁྲོད་བརྒྱད་ལྷའི་གདན་འབྱུང་བ་རིམ་བརྩེགས་དང་བཅས་པ། བརྟེན་པ་ལྷ་ཚོགས་སྐུ་མདོག་ཕྱག་མཚན་དཔལ་གྱི་ཆས་བརྒྱད། དུར་ཁྲོད་ཀྱི་ཆས་དགུ། གར་གྱི་ཉམས་དགུ་དང་བཅས་པ་ཐམས་ཅད་ཀྱང་ཐོག་མར་ཞེན་ཡུལ། གཉིས་པ་ཡིད་ཡུལ། གསུམ་པ་སྣང་ཡུལ་ཏེ་ཡུལ་གསུམ་གྱད་དུ་མ་གྱུར་བར་དུ་རེས་ནང་ནས་ཕྱི། རེས་ཕྱི་ནས་ནང་། ཐོག་མར་ཕྲ་བ་རེ་རེ། དེ་ནས་རགས་པ་སྤྱི། མཐར་ཕྲ་རགས་གཅིག་ཅར་དུ་གསལ་མ་ཐེབས་ཀྱི་བར་དུ་བསྒོམ། དེའང་བློ་དམན་པས་ཐོག་མ་ནས་ཡིད་ཡུལ་གསལ་ཐེབས་དཀའ་ན་བྲིས་སྐུ་མཚན་ཉིད་དང་ལྡན་པ་བཀྲམ་ལ་ཡུན་རིང་བལྟ། དེ་ལ་གོམས་ནས་དེ་ཉིད་ཡིད་ཡུལ་དུ་འཆར་བ་ལ་བསླབ། བདེ་བླག་ཏུ་གྱུར་པ་དང་དེ་ཉིད་རང་ལ་བསྟིམས་ནས་གསལ་གདབ། གཉིས་པ་ནི། རང་གི་མིང་རུས་དངོས་མཚན་ཐ་མལ་དུ་འཛིན་པ་ཆེད་ཀྱིས་སྤངས་ནས། དཔལ་ཆེན་པོ་རྡོ་རྗེ་གཞོན་ནུའི་སྐུ་གསུང་ཐུགས་དངོས་ཡིན། དེ་ཡི་ཡོན་ཏན་མཛད་པ་ཕྲིན་ལས་དང་བཅས་པ་ཚང་ངོ་སྙམ་པའི་ང་རྒྱལ་ཤིན་ཏུ་བརྟན་པར་བྱ། གསུམ་པ་ནི། གཞལ་ཡས་ཁང་བྱང་ཕྱོགས་སོ་བདུན་ཏུ་དག་པ་དང་། དཀྱིལ་འཁོར་གྱི་ལྷ་ཚོགས་དབུ་གསུམ་རྣམ་ཐར་སྒོ་གསུམ། ཕྱག་ཕ་རོལ་ཕྱིན་དྲུག །ཞབས་རྫུ་འཕྲུལ་རྐང་བཞི་སོགས་སོ་སོའི་དག་དྲན་
རྒྱས་པ་གསང་རྒྱུད་དང་འགྲེལ་ཆེན་འབུམ་ནག་སོགས་ལས་ཤེས་པར་བྱ་ཞིང་། མདོར་ན་མཚན་གཞི་རང་སེམས་དེ་བཞིན་ཉིད་གཞིའི་རྡོ་རྗེ་གཞོན་ནུ་ཉིད། མཚོན་བྱ་འབྲས་བུ་དག་པ་གཉིས་ལྡན་གྱི་རྡོ་རྗེ་གཞོན་ནུའི་ཡོན་ཏན་གྱི་ཁྱད་པར་ཐམས་ཅད། མཚོན་བྱེད་ལམ་གྱི་རྡོ་རྗེ་གཞོན་ནུའི་སྐུ་མདོག་ཕྱག་མཚན་རྟགས་ཀྱི་ཁྱད་པར་དུ་ཤར་བར་ཐག་བཅད་དེ་བསྒོམ་མོ། །གསུམ་པ་འཛབ་བཟླས་ཀྱི་ཏིང་ངེ་འཛིན་ནི། མཉམ་བཞག་དས་སྐྱོན། བཀའ་མ་ལྟར་ན་ཛབ་ཁང་ཕྱེས་ཏེ། སྐུ་གསུང་ཐུགས་ཡོན་ཏན་ཕྲིན་ལས་ཀྱི་བཟླས་པ་རེ་རེ་ལ་ཕྱི་ནང་གསང་གསུམ་ལྟར་བཟླ་བ་དང་། འགལ་མེ་ཀླད་ཀོར། བུང་བ་ཚང་ཞིག །མགར་གྱི་ཚྭ་ཚྭ་ལྟར་བཟླ་བ་སོགས་སམ། སྐུ་ཕྱག་རྒྱ། གསུང་ཡི་གེ། ཐུགས་ཆོས་ཉིད་གསུམ། སྒྲུབ་པ་ལ་ཡོན་ཏན། ལས་སྦྱོར་ལ་ཕྲིན་ལས་ལ་དམིགས་པའི་བཟླ་ཚུལ་ལ་སོགས་པ་བཟླ་བྱའི་སྔགས་སྐབས་ཕྱེད་པ་བཀའ་གཏེར་སོ་སོའི་དགོངས་པ་བཞིན་སྦྱར་ནས། མཐར་གཞི་བསྟོད་དམ། །སྟོང་ཚིགས་ཀྱིས་མཆོད་པ་སོགས་ཀྱང་བྱའོ། །གཉིས་པ་རྫོགས་རིམ་གྱི་རྒྱས་གདབ་པ་ལ་བཞི། སྤྲོས་ཏེ་ཐིམ་པ། བསྡུས་ཏེ་ཞུ་བ། དེ་ཁོ་ན་ཉིད་དུ་གནས་པ། དུབ་པར་བལྟ་བའོ། །དང་པོ་ནི། །ཐུགས་སྲོག་ཧཱུྃ་ལས་འོད་ཟེར་འཕྲོས་རྡོ་རྗེ། ཡེ་ཤེས་སེམས་དཔའ། བདག་ཉིད་རྩ་བའི་དཀྱིལ་འཁོར། དཀྱིལ་འཁོར་གཉིས་སོགས་རིམ་
པར་གསལ། དེ་ལས་ཕྱིར་འཕྲོས་ཁམས་གསུམ་སེམས་ཅན་གསལ། སྒྲིབ་པ་སྦྱངས། རྒྱལ་བ་རྣམས་མཆོད་གདུག་པ་ཅན་ཚར་བཅད་པར་མོས། གཉིས་པ་ནི། འོད་ཟེར་ཀཱི་ལ་ཡའི་སྒྲ་དང་བཅས་ཚུར་འདུས། །སྣོད་ཀྱི་འཇིག་རྟེན་གཞལ་ཡས་ཁང་ལ་འདུས། །དེ་འོད་དུ་ཞུ་དཀྱིལ་འཁོར་གཉིས། བདག་རྩ་བ། ཡེ་ཤེས་སེམས་དཔའ། །ཏིང་འཛིན་སེམས་དཔའ་ཧཱུྃ་གི་བར་དུ་འདུས། །དེའང་ཞབས་ཀྱུ་ནས་ཐིག་ལེའི་བར་དང་། ཐིག་ལེ་ཇེ་ཕྲ་ནཱ་ད་ཤིན་ཏུ་ཕྲ་བ་ལ་ཡུན་རིང་དུ་སེམས་བཟུང་བའོ། །གསུམ་པ་ནི། ནཱ་དའང་སྟོང་ཉིད་དུ་ཡལ་ནས་དེ་ཁོ་ན་ཉིད་ལ་ཅི་གནས་སུ་བཞག །བཞི་པ་ནི། དེ་ལས་ལྡང་བར་འདོད་ན་སྣོད་བཅུད་དཀྱིལ་འཁོར་གསུམ་གྱི་རང་བཞིན་དུ་མོས་ལ་རང་ཉིད་རྡོ་རྗེ་གཞོན་ནུའི་ང་རྒྱལ་གྱི་སྤྱོད་ལམ་བཞི་སེམས་ཅན་གྱི་དོན་དུ་བྱའོ། །གསུམ་པ་དབྱེར་མེད་ཟུང་འཇུག་ཏུ་བསྒོམ་པ་ནི། སྣང་བ་ཐམས་ཅད་སྐུ་གསལ་སྟོང་དབྱེར་མེད་འོད་ཀྱི་རང་བཞིན། སྒྲ་གྲགས་ཐམས་ཅད་གསུང་གྲགས་སྟོང་དབྱེར་མེད་ཀཱི་ལ་ཡའི་རང་སྒྲ། དྲན་རྟོག་ཐམས་ཅད་ཐུགས་བདེ་སྟོང་དབྱེར་མེད་ཆོས་ཀྱི་སྐུའི་རང་བཞིན་ཏུ་ལམ་དུ་ཁྱེར་བ་ནི་མཉམ་བཞག་རྗེས་ཐོབ་ཀུན་ལ་གཅེས་ཏེ། རྒྱུད་ལས། ཆད་པ་མ་ཡིན་རིག་ཅིང་གསལ། །རྟག་པ་མ་ཡིན་ངོས་བཟུང་མེད། །སྣང་སྟོང་དབྱེར་མེད་གཏན་ལ་དབབ། །མ་བསྐྱེད་རྫོགས་པའི་ཚུལ་དུ་བསྒོམ། །
ཞེས་སོགས་གསུངས་སོ། །གཉིས་པ་ནང་བསྐྱེད་པའི་རིམ་པ་ནི། ཕྲ་མོའི་རྣལ་འབྱོར་རྩལ་བསྒོམ་པ་སྟེ། སྔོན་འགྲོ་སྤྱི་མཚུངས་དང་། ཏིང་ངེ་འཛིན་རྣམ་གསུམ་བསྒོམ། རང་ལུས་དཔལ་ཆེན་པོའི་སྟོང་ར་དར་སྔོན་གྱི་གུར་ཕུབ་པ་ལྟར་གསལ་བའི་ནང་དུ་རྩ་གསུམ་འཁོར་ལོ་ལྔ་གསལ་བཏབ་པའི། སྤྱི་བོར་བདེ་ཆེན་འཁོར་ལོའི་དབུས་སུ་བུདྡྷ་འདུས་པའི་སྲས་མཆོག་དཀར་པོ། །རྩ་འདབ་སོ་གཉིས་ན་ཁྲོ་བཅུ་དང་འདྲ། མགྲིན་པ་ལ་ལོངས་སྤྱོད་འཁོར་ལོའི་དབུས་སུ་པདྨ་འདུས་པའི་སྲས་མཆོག་དམར་པོ། །རྩ་འདབ་བཅུ་དྲུག་ལ་ཁྲོ་བཅུ་རང་འདྲ། སྙིང་ཁ་ཆོས་ཀྱི་འཁོར་ལོར་བཛྲ་འདུས་པའི་སྲས་མཆོག་མཐིང་ཀ །རྩ་འདབ་བརྒྱད་ལ་ཁྲོ་བཅུ་རང་འདྲ། ལྟེ་བ་སྤྲུལ་པའི་འཁོར་ལོར་རཏྣ་འདུས་པའི་སྲས་མཆོག་སེར་པོ། རྩ་འདབ་རེ་བཞིར་ཁྲོ་བཅུ་རང་འདྲ། གསང་གནས་བདེ་སྤྱོད་འཁོར་ལོའི་དབུས་སུ་ཀརྨ་འདུས་པའི་སྲས་མཆོག་ལྗང་གུ། རྩ་འདབ་བརྒྱ་ཉི་ཤུར་ཁྲོ་བཅུ་རང་འདྲ་སྟེ། སྲས་མཆོག་རིགས་ལྔའི་ཕྱག་གཡས་འཁོར་ལོ་པདྨ་རྡོ་རྗེ་རིན་ཆེན་སྣ་ཚོགས་རྡོ་རྗེ། གཡོན་དུང་ཁྲག་བསྣམས་ཤིང་ཁྲོ་བོའི་ཆས་ཐམས་ཅད་ཀྱིས་བརྒྱན་པ། ཁྲོ་བཅུ་རྣམས་འཁོར་ལོའི་རྩ་བའི་འདབ་མ་ལ་བཞུགས་པར་གསལ་བཏབ་སྟེ། འབྱུང་འཇུག་གནས་གསུམ་འབྲུ་གསུམ་མམ་རྩ་སྔགས་དང་སྦྱར་བའི་རྡོར་བཟླས་བྱས་ལ་མཐར་འོད་གསལ་དུ་བསྡུ་ཞིང་ཟུང་འཇུག་གི་སྐུར་ལྡང་ངོ་། །གསུམ་པ་གསང་བ་བསྐྱེད་པའི་
རིམ་པ་ནི། ལུགས་འདིའི་ཐིག་ལེ་རྣལ་འབྱོར་དུ་བརྡ་ཆད་བྱེད་པ་ཡིན་ཏེ། དེའང་རྟེན་དང་བརྟེན་པར་བཅས་པ་ཐམས་ཅད་རང་གི་སེམས་ཉིད་ཐིག་ལེ་ཆེན་པོ་གཅིག་གི་རང་བཞིན་ཏུ་རྫོགས་པར་ཤེས་ནས་ལམ་དུ་ཁྱེར་བ་སྟེ། གསང་རྒྱུད་ལས། གསང་བའི་གཞལ་ཡས་བསྟན་པ་ནི། །ཡེ་ནས་རང་བྱུང་དམ་པ་སྟེ། །སངས་རྒྱས་རོལ་མོ་དུ་མས་འཁྲིགས། །རྒྱན་དང་བླ་བྲེ་རང་བཞིན་གྲུབ། །སངས་རྒྱས་གཞལ་ཡས་དམ་པ་ཡིན། །དེ་ཡི་དབུས་ན་བཞུགས་པའི་ལྷ། །ཕྲ་ལ་དོད་པར་བརྟག་པར་བྱ། །དེ་ལ་ཡང་དང་ཡང་དུ་ནི། །ཕྲ་བའི་སེམས་ཀྱིས་བཟུང་གྱུར་ན། །མཇུག་ཏུ་དམིགས་པ་མེད་པར་འགྱུར། །ཅེས་བཤད་པས་ན། ཀུན་གཞིའི་རྣམ་ཤེས་དབུས་ཀྱི་ཕོ་བྲང་། སྒོ་ལྔའི་རྣམ་ཤེས་སྒོ་བཞི། ངོ་བོ་ཡེ་ཤེས་དབུས་ཀྱི་གཙོ་བོ། །སེམས་བྱུང་ལྔ་བཅུ་རྩ་གཅིག་འཁོར། །ཡེ་ཤེས་ལྔ་རྩིག་པ། འདོད་ཡོན་ལྔ་འདོད་ཡོན། མོས་གུས་རིན་ཆེ་ཕ་གུ། སྣང་བ་སྣ་ཚོགས་དྲྭ་བ་དྲྭ་ཕྱེད། ཚད་མེད་བཞི་རྟ་བབས། ཏིང་ངེ་འཛིན་མུ་མེད་པ་མུ་ཁྱུད་མུ་མེད་པ། དེ་ལྟར་ཤེས་པའི་ངང་ལ་མ་བཅོས་པར་བཞག་པའོ། །དེ་ལྟ་བུའི་བསྒོམ་པ་དེའང་སྟོང་ཉིད་ཀྱིས་ཁོག་དབུབ། བྱམས་སྙིང་རྗེས་གཞི་བཟུང་། རྣམ་པ་ལྷའི་དཀྱིལ་འཁོར་དུ་བསྒོམས་པས་སྣོད་བཅུད་ཐ་མལ་རང་རྒྱུད་པར་ཞེན་པ་དེ་ཉིད་རྟེན་དང་བརྟེན་པའི་དཀྱིལ་འཁོར་དུ་གྲོལ་བར་འགྱུར་ཏེ། རྩ་རྒྱུད་ལས། ཚད་མེད་སྙིང་རྗེའི་
ཕུར་པ་ནི། །བྱམས་དང་སྙིང་རྗེ་ཆེན་པོས་གདབ། །འབྲས་བུ་སྤྲུལ་པའི་སྐུ་ཡང་འཐོབ། །མ་ཐེབས་དུ་དྲ་སྲིན་པོར་གོལ། །ཞེས་གསུངས་སོ། །གཉིས་པ་སྤྲོས་མེད་རྫོགས་པའི་རིམ་པ་འཆད་པ་ལ་གཉིས། མཚན་བཅས་དང་། མཚན་མེད་དོ། །དང་པོ་ནི། བྱ་ཀ་ལནྟ་ཀ་ལྟ་བུའི་གང་ཟག་གིས་བྱང་ཆུབ་སེམས་ཀྱི་ཕུར་པ་ཡུམ་གྱི་མཁའ་ལ་གདབ་པ་སྟེ། དེ་ལ་གཉིས་སྟེང་སྒོ་འཁོར་ལོ་ལྔ་ལ་བརྟེན་ཏེ་བདེ་བ་རིམ་གྱིས་སྐྱེད་པ་དང་། འོག་སྒོ་ཁམས་གསུམ་རོལ་པ་ལ་བརྟེན་ནས་བདེ་བ་གཅིག་ཆར་དུ་སྐྱེད་པའོ། །དང་པོ་ལ་གསུམ། འཁོར་ལོའི་གནས་ཚུལ། གཏུམ་མོ་སྦར་བས་ཡེ་ཤེས་སྐྱེ་ཚུལ། དེ་ལ་གོམས་པར་བསླབ་པའོ། །དང་པོ་ལ་ལྔ་སྟེ། ཀླད་པ་སྐུ་ཡི་ཙཀྲ། མགྲིན་པ་གསུང་གི་ཙཀྲ། ཐུགས་ཀ་ཆོས་ཀྱི་ཙཀྲ། ལྟེ་བ་ཡོན་ཏན་གྱི་ཙཀྲ། མེ་རླུང་ཕྲིན་ལས་ཀྱི་ཙཀྲའོ། །དེའང་སྤྱི་བོར། །སངས་རྒྱས་ཀུན་གྱི་ཡེ་ཤེས་སྐུ། །ཞེས་པས། རྩ་འདབ་སུམ་ཅུ་རྩ་གཉིས་ཀྱི་དཀྱིལ་ན། འཁོར་ལོ་རྩིབས་བརྒྱད་དེའི་ལྟེ་བ་ན་ཡི་གེ་ཧཱུྃ་ཁ་ཐུར་དུ་བསྟན་པ་གནས། རྩིབས་བརྒྱད་ལ་ཀཱི་ལི་འབྲུ་བརྒྱད། རྩ་འདབ་སུམ་ཅུ་རྩ་གཉིས་ལ་སྒྲ་ཡིག་སུམ་ཅུ་རྩ་གཉིས་གདུགས་ཕུབ་པའི་ཚུལ་དུ་གནས་སོ། །མགྲིན་པ་ལ། །ངང་ཉིད་རྡོ་རྗེ་ཆོས་དབྱིངས་ལས། ཞེས་པས་རྩ་འདབ་བཅུ་དྲུག །དཀྱིལ་ན་པདྨ་འདབ་བརྒྱད། ལྟེ་བ་ན་ཨོཾ་དཀར་པོ་ཁ་གྱེན་དུ་བསྟན་པ། འདབ་བརྒྱད་ཀཱི་ལི་འབྲུ་བརྒྱད། རྩ་འདབ་
ལ་དབྱངས་ཡིག་བཅུ་དྲུག་གོ། །སྙིང་ཁ་ན། །སྐུ་ཡི་དབྱིག་ཏུ་བདག་སྐྱེད་ཅིག །ཅེས་པས་རྩ་འདབ་བརྒྱད་ཀྱི་སྟེང་ན་རིན་པོ་ཆེ་ཟུར་བརྒྱད་པ། ལྟེ་བ་ལ་ཧཱུྃ་མཐིང་ག་མགོ་ཐུར་ལ་བསྟན་པ། རཏྞ་ཟུར་བརྒྱད་ལ་ཀཱི་ལ་ཡ་འབྲུ་བརྒྱད། རྩ་འདབ་ལ་སྡེ་ཚན་དང་པོ་ཨ་ཀ་ཙ་ཊ་ཏ་པ་ཡ་ཤ་བརྒྱད་དོ། །ཙཀྲ་ཐམས་ཅད་ཀྱི་སྲོག་ཤིང་ཀུན་འདར་མ་ནས་བྱང་སེམས། གཡས་རོ་མ་ནས་དྲི་ཆུ། གཡོན་རྐྱང་མ་ནས་ཁྲག་འབབ་ཅིང་རྩ་དེ་གསུམ་ལྟེ་བ་ན་འདུས་པའོ། །ལྟེ་བའི་ཙཀྲ་དེ། འབར་བའི་ཁྲོ་བོ་མི་བཟད་པ། །ཞེས་པས་རྩ་འདབ་དྲུག་ཅུ་རྩ་བཞིའི་དཀྱིལ་ན་གྲུ་གསུམ་བརྒྱད། ལྟེ་བ་ལ་ཨོཾ་སེར་པོ་གྱེན་དུ་བསྟན་པ། གྲུ་གསུམ་ལ་ཀཱི་ལི་འབྲུ་བརྒྱད། རྩ་འདབ་ལ་སྒྲ་ཡིག་སུམ་ཅུ་རྩ་གཉིས་ཕྲག་གཉིས་སོ། །མེ་རླུང་ཕྲིན་ལས་ཙཀྲ་ནི། མཚོན་ཆེན་སྔོན་པོ་འབར་བ་ཡིས། །ཞེས་པས་གཤང་སྒོར་རླུང་གི་ཙཀྲ་ཁ་དོག་སྔོ་སྐྱ་དབྱིབས་ཟླ་གམ། དབུས་སུ་ཡཾ་སྔོ་སྐྱ། རྟགས་གཤང་སྒོ་གྲང་བའོ། །དེའི་སྟེང་ལྟེ་བའི་འོག་ན་མེའི་འཁོར་ལོ་ཁ་དོག་དམར་པོ་དབྱིབས་གྲུ་གསུམ་རཾ་དང་བཅས་པ་འབར་བའི་ཚུལ་དུ་གནས་ཤིང་། དེའི་རྟགས་དྲོད་ཆེའོ། །གཉིས་པ་གཏུམ་མོ་སྦར་བ་ནི། ནམ་མཁའི་དཀྱིལ་ནས་ཐིགས་པ་ཤར། །ཞེས་པས་སྤྱི་བོའི་ཧཾ་ཞུ་བས་ཐིག་ལེ་འབབ་བོ། །དེའང་འོག་སྒོ་བསྒུལ་བས་ཡཾ་ལས་རླུང་ལངས། རཾ་ལས་ཡེ་ཤེས་ཀྱི་མེ་འབར། དེས་ལྟེ་བའི་
ཙཀྲ་ཞུ། ཁམས་བདེ་བ་སྐྱེས། དེས་སྙིང་གའི་ཙཀྲ་ལ་ཕོག །དྭངས་མ་ལྔ་ཞུ། དེའི་འོད་ཀྱིས་མགྲིན་པ་ཞུ། དེ་ཀླད་པ་ལ་ཕོག །དེ་ཞུ་བྱང་སེམས་ཨ་ཝ་དྷཱུ་ཏི་ནས་བབ། ལྟེ་བའི་ཙཀྲ་གསོས། བདེ་བ་སྐྱེས་པ་ལས་མས་བརྟན་གྱི་དགའ་བཞི་འཆར་ཞིང་། དབབ་བཟུང་ཟློག་དགྲམ་གྱི་སྦྱོར་བས་ཡས་བརྟན་གྱི་དགའ་བཞི་འཆར་བ་ཡིན་ནོ། །གསུམ་པ་དེ་ལ་གོམས་པར་བྱ་བའི་ཚུལ་ནི། སྔོན་འགྲོ་སྤྱི་དང་། ཁྱད་པར་ཐུན་མོངས་མ་ཡིན་པའི་བླ་མའི་རྣལ་འབྱོར་སྔོན་ཏུ་སོང་ནས། བདེ་བའི་གདན་ལ་བསམ་གཏན་གྱི་ཆོས་ལྔ་དང་ལྡན་པས་འཁོད་པ་ལ་དཔལ་ཆེན་པོ་རྡོ་རྗེ་གཞོན་ནུའི་སྐུའི་སྟོང་ར་ཡུན་རིང་བསྒོམ་འབྱོངས་པ་དང་སྟོང་རའི་དབུས་སུ་རྩ་གསུམ་འཁོར་ལོ་ལྔ་དང་བཅས་པ་གསལ་གདབ་སྟེ་རྩ་ཡི་སྟོང་རལ་བསླབ། དེའང་དབྱངས་ནས་ཨོཾ་ཧཱུྃ་རྃ་ཡྃ་ཀཱི་ལི་དབྱང་གསལ་ལ་སོགས་པ་རྣམས་གསལ་བཏབ་ནས་ཐིག་ལེའི་སྟོང་ར་གསལ་བརྟན་གྱི་ཚད་མཐར་ཕྱིན་པར་བྱ་སྟེ་དེ་དག་གོང་དུ་གནས་ཚུལ་སྨོས་པའི་སྐབས་བཞིན་ནོ། །དེ་ནས་གཏུམ་མོ་མེ་སྦར་བའི་ཐོག་མར་རླུང་ཤིན་ཏུ་བྱང་བར་བྱ་སྟེ། དེའང་དང་པོ་རླུང་རོ་དགུ་ཕྲུགས་སུ་བསལ། རྔུབ་པ། དགང་བ། གཞིལ་བ། འཕངས་པ་སྟེ་སྦྱོར་བ་བཞི་ལྡན་གྱིས་བུམ་པ་ཅན་རབ་འབྲིང་ཐ་མ་གང་རུང་ཁེགས་པ་དང་། དེའང་གཡས་གཡོན་ཏུ་སྦོ་བའི་ལག་ལེན་སོགས་སྤྱི་ལྟར་བྱས་ལ་ལས་ཀྱི་རླུང་དྷཱུ་
ཏིར་གཞུག་གོ། །དེ་འབྱོངས་པ་ན་གཏུམ་མོ་རིམ་གྱིས་སྦར། ཐིག་ལེ་རིམ་གྱིས་བཞུ་བའི་འབར་འཛག་ལ་བསླབ། བཟུང་འདྲེན་བཀྲམ་པའི་འཁྲུལ་འཁོར། གེགས་སེལ་བོགས་འདོན་གྱི་སྦྱོར་བ་སོགས་ཐབས་ལམ་སྤྱིའི་ཉམས་ལེན་ལ་སྒོས་ཆོས་ཀྱིས་བརྒྱན་ཏེ་དགའ་བ་བཅུ་དྲུག་གི་ཡེ་ཤེས་མཐར་སོན་པར་བྱའོ། །གཉིས་པ་འོག་སྒོ་ལ་བཞི། བསྙེན་པ། ཉེ་བསྙེན། སྒྲུབ་པ། སྒྲུབ་པ་ཆེན་པོའོ། །དང་པོ་བསྙེན་པའི་ཡུལ་ནི། །ཞི་བ་ལ་དཀར་མོ་བོང་ཆུར་ཟླ་བའི་མདོག །རྒྱས་པ་ལ་བ་ལང་སེར་མོ་གྲུ་བཞི་མ། དབང་ལ་སྨུག་མོ་ཟླ་གམ་མཛེས་པའི་ཞལ། དྲག་པོ་ལ་ནག་མོ་གྲུ་གསུམ་ཧ་ར་མིག །དེའང་སྟོད་སྨད་བྱེད་པ། སྨད་རྒྱས་པ། བྷ་ག་རུབ་པ། ཆགས་པའི་མདངས་ཆེ་བ་བཙལ། རྒྱན་བཏགས་ལ་ཁྲུས་བྱས་ཆས་སུ་གཞུག །གཉིས་པ་ཉེ་བསྙེན་ལ། ཡབ་རྡོ་རྗེ་གཞོན་ནུར་བསྐྱེད། རིག་མ་འཁོར་ལོ་རྒྱས་འདེབས་སུ་བསྐྱེད། སྐྱེ་མཆེད་བྱིན་གྱིས་བརླབ། ཡབ་ཀྱི་མཁའ་མི་དམིགས་པ་ལས། ཨ་ལས་ཟླ་བའི་དཀྱིལ་འཁོར་བསྒོམ། ཧཱུྃ་ལས་རྡོ་རྗེ་རྩེ་དགུ་པར་བསྐྱེད། ཨོཾ་ལས་ནོར་བུ། ཕཊ་ཀྱིས་བུ་ག་བཀག་པའོ། །ཡང་ཡུམ་གྱི་མཁའ་མི་དམིགས་པ་ལས་ཉི་དཀྱིལ། ཨ་ལས་པདྨ་དམར་པོ་འདབ་མ་བཞི་པ། ཟེའུ་འབྲུ་ལ་ཨ་དམར་པོ་བསྒོམ། །གསུམ་པ་སྒྲུབ་པ་ནི། །དེ་ནས་ནུ་མ་ཉིད་པ་དང་།
མཆུ་འཇིབས་པ་བྱས་པས། རྡོ་རྗེ་པདྨ་སད་པ་དང་། རིག་མས་ས་མ་ཡ་ཧོ་ཞེས་བསྐུལ། ས་མ་ཡ་སྟྭཾ། ཞེས་གནང་བ། སླར་ཡང་ར་ཧོ་ཧཾ་གྱིས་བསྐུལ། རཱ་ག་ཡཱ་མིས་ལན་བཏབ་ནས། རྡོ་རྗེ་པདྨ་དལ་བུས་སྤྲད། ལྷའི་ང་རྒྱལ་དང་ལྡན་པས་སྔགས་ཟློས་ཀྱིན་བསྲུབ། བདེ་བ་རྒྱས་པ་དང་འཁོར་ལོ་བཞིར་རིམ་གྱིས་བཟློག་ཅིང་བཟུང་། འདོད་པ་ཆེས་ན་མི་ཐུབ་པས་ཕྲལ་ཀྱིན་བྱ། ཡང་བསྲུབ། བདེ་བ་རྒྱས་པ་དང་མིག་གྱེན་ལ་བཟློག །རྐང་ལག་གི་ཐེ་བོང་བསྐུམ། ངག་ཏུ་ཧིག་བརྗོད་ཅིང་རླུང་གསང་བ་ནས་ལྟེ་བའམ། སྙིང་ཁར་འཐེན། སེམས་སྤྱི་བོའི་ཧྃ་ལ་གཏད་དོ། །དེས་བདེ་བ་ཟག་པ་མེད་པ་རྒྱུད་ལ་སྐྱེ། དེ་ནས་དགྲམ་པ་ནི། ལུས་སྦྱང་འཐེམས་པར་བྱའོ། །བཞི་པ་སྒྲུབ་པ་ཆེན་པོ་ལ། དྲོད་ནི་འདར་བ་དང་དཀྲུགས་པ་ཀུ་ཅོའི་སྒྲ་འབྱིན་པའོ། །མཚན་མ་ནི་བདེ་བ་ཉམས་སུ་བསྟར་བའོ། །ཐིག་ལེ་མ་ཤོར་ན་ལུས་ལ་རྒས་རྒུད་མེད་པའོ། །ནད་ཀྱིས་མི་ཚུགས། ཁ་དོག་བཟང་། འོད་འབར། ཚེ་རིང་མཆོག་གི་འབྲས་བུ་སྐུ་གསུམ་འཐོབ་པར་འགྱུར་ཏེ། རྩ་རྒྱུད་ལས། ལྷག་པ་བྱང་སེམས་ཕུར་པ་དེ། །ཡུམ་གྱི་མཁའ་ཀློང་དག་པར་གདབ། །བདེ་བ་དངོས་མེད་ཐེབས་པའི་ཚད། །འབྲས་བུ་ལོངས་སྐུ་བདེ་ཆེན་ཐོབ། །མ་ཐེབས་འཁོར་བའི་འགྲམ་རྡོ་བྱེད། །ཅེས་གསུངས་སོ། །གཉིས་པ་མཚན་མེད་རྫོགས་རིམ་ལ་
གཉིས། །ཐུན་མོང་མ་ཡིན་པའི་སྔོན་འགྲོ་དང་། དངོས་གཞིའོ། །དང་པོ་ནི། འདི་ཉིད་ཀྱི་ཉམས་ལེན་སྒེར་ཐུབ་སྨར་འཇུས་སུ་བྱེད་ན། འཁོར་འདས་རུ་ཤན་དབྱེ་བ། ལུས་ངག་སེམས་སྦྱོང་རྣམས་རྫོགས་པ་ཆེན་པོ་གཞན་ལས་འབྱུང་བ་ལྟར་བྱ། ཁྲིད་གཞུང་གཞན་རྐང་ཚུགས་པའི་ཞར་ཆོས་ཙམ་ལ་དེ་དག་དམིགས་སུ་མི་དགོས་ཤིང་། གང་ལྟར་རྟོགས་པས་བདག་གྲོལ་བ་ཡེ་ཤེས་གོང་འཕོའི་རྩལ་སྦྱང་བྱ་བ་ནི། ལུས་གནད་བསམ་གཏན་གྱི་ཆོས་དང་ལྡན་པས། རང་ཉིད་རྡོ་རྗེ་གཞོན་ནུ་གསལ་སྟོང་སྣང་ལ་རང་བཞིན་མེད་པའི་ལུས་ཀྱི་རྩ་གསུམ་འཁོར་ལོ་བཞི་དང་བཅས་པའི་གཡས་པའི་ཆ་ཀཱ་ལིའི་རང་བཞིན། གཡོན་པའི་ཆ་ཨཱ་ལིའི་རང་བཞིན། སྤྱི་བོའི་འཁོར་ལོའི་ལྟེ་བར་སྦྱོང་བྱེད་ཀྱི་ཡི་གེ་ཨོཾཱ་དཀར་པོ། །དེའི་འོག་ཏུ་སྦྱང་བྱ་ཨ་དཀར་པོ། དེ་བཞིན་དུ་མགྲིན་པར་ཧཱུྃ་སྔོན་པོའི་འོག་ཏུ་ནྀྲ་ལྗང་གུ། སྙིང་གར་ཏྲཱྃ་སེར་པོའི་འོག་ཏུ་སུ་སེར་སྐྱ་ལྟེ་བར་ཧྲཱིཿདམར་པོའི་འོག་ཏུ་ཏཱི་མཐིང་ག །གསང་བར་ཁཾ་དཀར་སྔོའི་འོག་ཏུ་བྲེ་དམར་སྐྱ། །དབུ་མའི་མར་སྣེའི་རྡོ་རྗེའི་བུ་གར་ཧྃ་དཀར་པོའི་འོག་ཏུ་དུ་དུད་ཀ །ལྟེ་འོག་ཏུ་གཏུམ་མོའི་རང་བཞིན་ཨ་ཡིག་དམར་པོ། གཤང་སྒོར་རླུང་གི་དཀྱིལ་འཁོར། སྦྱོང་བྱེད་ཀྱི་ཡི་གེ་རྣམས་གསལ་ཞིང་འོད་འབར་བ། སྦྱང་བྱ་རྣམས་སོལ་དང་ལ་དུ་བ་ཕྱུར་བ་ལྟ་བུར་བསམས་ལ། རྩ་བརྒྱུད་བླ་མ་ལ་གསོལ་བ་བཏབ་པས་ས་བོན་དྲུག་གི་འོད་ཀྱིས་
བདག་གཞན་སེམས་ཅན་ཐམས་ཅད་རིགས་དྲུག་ཏུ་སྐྱེ་བའི་རྒྱུ་ཐམས་ཅད་བསྡུས་ནས་སྦྱང་བྱ་དྲུག་ལ་ཐིམ་པར་མོས། རླུང་བཟུང་བས་གཤང་སྒོའི་རླུང་གིས་ལྟེ་འོག་གི་ཨ་ཤད་བསྐུལ་མེ་ལྕེ་ཕྲ་ཞིང་རྣོ་བ་ཐུར་དུ་འཕྲོས། ཧྃ་ཡིག་བསྐུལ། དེ་ལས་བྱུང་བའི་འོད་ཀྱིས་དུ་ཡིག་དངོས་མེད་དུ་བསྲེགས། དྭངས་མ་ཧཾ་ལ་ཐིམ། སླར་ཡང་རླུང་བཟུང་བས་ཧཾ་ཡིག་སྐར་མདའ་ལྟ་བུར་ཐལ་གྱིས་འབར། གསང་གནས་འཁོར་ལོའི་ལྟེ་བར་ཁྃ་ཡིག་གི་སྟེང་ཐད་དུ་འདུག་པར་བསམ། ཡང་གཏུམ་མོའི་མེ་ཐུར་དུ་འབར་བས་ཁྃ་ཡིག་བསྐུལ། དེའི་འོད་ཀྱིས་པྲེ་བསྲེགས་པའི་དྭངས་མ་ཁཾ་ལ་ཐིམ། དེའང་ཧྃ་ལ་ཐིམ། ཧྃ་ལྟེ་བར་སྦར་བ་སོགས་སྔ་མས་རིགས་འགྲེ། ཡིད་གཏུམ་མོ་སྦར་བས་གྱེན་དུ་འབར། ལྟེ་བའི་ཧྲཱིཿབསྐུལ། ཏྲི་བསྲེགས། ཧྃ་ལ་ཐིམ། ཧྃ་སྙིང་ཁར་སྤར། དེ་བཞིན་དུ། གཏུམ་མོའི་མེས་ཏྲཱྃ་བསྐུལ། སུ་བསྲེགས། ཧྃ་ལ་ཐིམ། ཧྃ་མགྲིན་པར་སྤར། མེ་ལྕེས་མགྲིན་པའི་ཧཱུྃ་བསྐུལ། སུ་བསྲེགས། ཧྃ་ལ་ཐིམ། ཧྃ་སྤྱི་བོར་སྤར། མེ་འབར་བས་ཨོཾཱ་བསྐུལ། ཨ་ཡིག་བསྲེགས། ཨོཾཱ་དང་བཅས་ཧྃ་ལ་ཐིམ། དེ་ཉིད་བྱང་ཆུབ་ཀྱི་སེམས་མི་ཤིགས་པའི་ཐིག་ལེར་གྱུར་པར་མོས་ལ་མཉམ་པར་བཞག་གོ། །གཉིས་པ་ལ་གཉིས། ཀ་དག་ཁྲེགས་ཆོད། ལྷུན་གྲུབ་ཐོད་རྒལ་ལོ། །དང་པོ་ལ་གཉིས། སྒོམ་ཚུལ་སྤྱིར་བསྟན། མན་ངག་བྱེ་བྲག་ཏུ་བཤད་པའོ། །
དང་པོ་ལ་གསུམ། དབང་པོ་ཐ་མ་འབྲིང་པོ། །རབ་ཀྱི་བསྒོམ་ཚུལ་ལོ། །དང་པོ་ལ་གསུམ། ཞི་གནས་བཙལ། ལྷག་མཐོང་བསྐྱེད། ཟུང་འཇུག་བསྒོམ་པའོ། །དང་པོ་ཞི་གནས་བཙལ་བ་ལ་གསུམ། དང་པོ་རྣམ་རྟོག་གདུལ་བ་ནི། བླ་མའི་རྣལ་འབྱོར་སྔོན་ཏུ་སོང་ནས། ལུས་གནད་རྣམ་སྣང་ཆོས་བདུན་ལས། ལག་པ་གཉིས་པུས་མོར་བཀབ། མགྲིན་པ་ཅུང་ཟད་དགྱེས་ཏེ། རང་རྡོ་རྗེ་གཞོན་ནུར་ཝལ་གྱས་གསལ་བའི་ལུས་ནང་རྩ་གསུམ་གསལ་བཏབ་པའི་རོ་རྐྱང་གི་མར་སྣ་ནས་འོད་གསལ་གྱི་རླུང་དཀར་སྔོ་དམར་སེར་ལྗང་མཐིང་ཟབ་ཆེན་གྱི་སྐུད་པ་ལྔ་གཤིབས་ལྟ་བུ་ལངས། སྣ་སྒོ་ནས་སོར་བཅུ་དྲུག་ཙམ་གྱི་ནམ་མཁར་སོང་། རླུང་ཚུར་འཇུག་དུས་ནང་དུ་ཞུགས་པའི་ཁུག་པ་ལ་གཅིག་ནས་ལྔའི་བར་དུ་བགྲང་བ་ཚར་གཅིག་བྱས་ཏེ། བརྒྱ་སྟོང་ལ་སོགས་པ་བགྲངས་པས་རྣམ་རྟོག་རགས་པ་ཞི་བ་དང་། གཉིས་པ་སེམས་བཟུང་བ་ནི། རང་མདུན་ཏུ་རྡོར་སེམས་སམ་རྡོ་རྗེ་གཞོན་ནུའི་བྲིས་སྐུ་ཞིག་བཞག་པ་ལ་མིག་མི་འགུལ་ཞིང་སེམས་མ་ཡེངས་པར་བལྟ། རྟོག་པ་འཕྲོ་ན་དེ་མ་ཐག་རྦད་བཅད་དེ་དམིགས་རྟེན་ལ་ཆེ་རེ་བལྟ། སེམས་རྩེ་གཅིག་ཏུ་འདུག་ན་མིག་བཙུམས་ནས་དམིགས་རྟེན་གྱི་རྣམ་པ་ལམ་མེ་བ་ལ་སེམས་བཟུང་། མི་གནས་ཚེ་དམིགས་རྟེན་ལ་བལྟས་ཏེ་བསྒོམ། ཞར་བྱུང་སྒྲ་སོགས་ཚོགས་དྲུག་གི་ཡུལ་སྣང་གཞན་ལའང་ཐོག་མར་གང་ཚོར་དེ་
ཉིད་དམིགས་རྟེན་བྱས། དེ་ནས་དེ་ཡི་རྣམ་པ་མ་བོར་ཙམ་གྱི་ངང་ནང་དུ་བལྟས་ལ་སེམས་བཟུང་བ་སོགས་རེས་མོས་སུ་བསླབས་པས་སེམས་རྩེ་གཅིག་པའི་ཏིང་ངེ་འཛིན་སྐྱེས་ནས། གསུམ་པ་ཆོས་ལ་སྦྱོང་བ་ནི། །བདག་ཉིད་ལྟར་གསལ་བའི་ངང་ལ་མ་ཡེངས་པར་བཞག །སེམས་ཟིན་ནས་འོད་ཟེར་སྤྲོ་བསྡུ་དང་། ཚད་མེད་བཞིའི་ཏིང་ངེ་འཛིན་སོགས་བྱ་ཞིང་དེ་ལྟ་བུའི་སེམས་ས་ལེ་བ་དེ་ངོས་བཟུང་ཞིང་མ་ཡེངས་པར་བྱ་བ་སོགས་སྤེལ་བས་འགྲོ་གནས་མཉམ་པའི་སེམས་སྐྱེའོ། །གཉིས་པ་ལྷག་མཐོང་བསྐྱེད་པ་ལ་གཉིས། དང་པོ་ཕྱི་གཟུང་བ་ཡུལ་མེད་དུ་བཞག་པ་ནི། ཡུལ་སྣང་སྣ་ཚོགས་རྨི་ལམ་ལྟར་སྣང་ཡང་དཔྱད་ན་བདེན་པར་མ་གྲུབ་པས། ཡུལ་སྣང་དང་གཟུང་བའི་ཤེས་པ་བཅས་པར་གསལ་སྟོང་པའི་ངང་ལ་བྱམ་གྱིས་མཉམ་པར་བཞག་པས་གཟུང་བ་བདག་མེད་པར་རྟོགས་སོ། །གཉིས་པ་འཛིན་པ་རྩ་བྲལ་སྟོང་པར་བསྟན་པ་ནི། ཡུལ་དང་ཡུལ་ཅན་ཏུ་རྟོག་བྱེད་སེམས་འདི་ལ། འདས་མ་འོངས། དངོས་པོ་དངོས་མེད། བྱུང་གནས་འགྲོ་གསུམ། དབྱིབས་ཁ་དོག་ལ་སོགས་པར་བརྟགས་ཤིང་བཙལ་བས་གང་དུའང་མ་རྙེད་པའི་ཚེ། རྟེན་མེད་པའི་ཤེས་པ་འཛིན་མེད་དུ་ལྷོད་ཀྱིས་ཀློད་ལ་བཞག་པས་འཛིན་པ་སྟོང་ཉིད་དུ་རྟོགས་པར་བྱེད་དོ། །གསུམ་པ་ཟུང་འཇུག་ཏུ་བསྒོམ་པ་ནི། གང་སྣང་ལ་དཔྱད་ར་མེད་པར་རང་བབས་སུ་ཕྱ་ལེ། ཡིན་ལུགས་སུ་ཤིགས་སེ། རྗེས་མེད་དུ་སང་ངེ། རྒྱ་ཡན་ཏུ་
ཕྱ་ལེ། མཐའ་བྲལ་དུ་ཁྲོལ་ལེ་བཞག་པས་ཕྱི་ནང་བར་མེད་ནམ་མཁའ་ལྟ་བུའི་དགོངས་པ་འཆར་བ་དེའི་ཚེ་གནས་པས་ཞི་གནས། གསལ་བས་ལྷག་མཐོང་། དབྱེར་མེད་ཟུང་འཇུག་ཏུ་ལྷུན་གྱིས་གྲུབ་པའོ། །གཉིས་པ་དབང་པོ་འབྲིང་གི་སྒོམ་ཚུལ་ལ་གསུམ། སྟོང་པ་ནམ་མཁའ་ལྟ་བུ། གསལ་བ་མེ་ལོང་ལྟ་བུ། འཆང་བ་རྦ་རླབས་ལྟ་བུའི་བསྒོམ་ཚུལ་ལོ། །དང་པོ་ནི། བླ་མའི་རྣལ་འབྱོར་སྔོན་ཏུ་འགྲོ་བས། ལུས་གནད་ཆོས་བདུན་དང་དབང་པོ་རྣམས་མ་འགགས་རང་གསལ་དང་། གང་ལྟར་ཡང་སྣང་ཐོག་དེར་མི་བཞག་པར་སྟོང་པའི་སྟེང་ཕྱི་ནང་བར་མེད་ཧར་སངས་བུན་ནེར་ལྟ་སྟངས་གཅུན་ནས་བཞག་པས་ཐམས་ཅད་སྟོང་པ་བར་མེད་ནམ་མཁའ་ལྟ་བུར་རྟོགས་པར་འགྱུར་རོ། །གཉིས་པ་ནི། ལུས་གནད་དབང་གནད་དེ་ལྟར་ལ། སྟོང་ཐོག་ཏུ་མི་གཏད་པར་སྣང་བ་འཛིན་མེད་རང་གསལ་གྱི་ངང་ལ་ས་ལེར་བཞག་པས་སྣང་བ་འཛིན་མེད་དུ་རྟོགས་སོ། །གསུམ་པ་ནི། ལུས་གནད་སོགས་གོང་ལྟར་ལ། རིག་པའི་མདངས་ལས་འཕྲོ་འདུའི་རྟོག་པ་འཆར་བའི་ཚེ་གསལ་སྟོང་འཛིན་མེད་དུ་བཞག་པས་རྦ་རླབས་ཆུར་ཐིམ་པ་ལྟར་རྟེན་མེད་འཛིན་མེད་དུ་འགྲོལ་ལོ། །གསུམ་པ་དབང་རབ་ཀྱི་སྒོམ་པ་བར་མེད་ཆུ་བོའི་གཞུང་ལྟ་བུ་ནི། རིག་པ་ཆོས་སྐུ་རྗེན་པར་རྟོགས། འདུ་འཕྲོ་ཆོས་ཉིད་ཀྱི་རོལ་པར་ཤར་ཅིང་ནུབ་པས་སྤང་བླང་གོལ་སྒྲིབ་གང་ཡང་མེད་པ་རིན་པོ་ཆེ་གསེར་གླིང་ཕྱིན་པ་ལྟ་བུ་སྟེ། ཡང་ཤར་
རང་བྱུང་ཡེ་ཤེས་ཀུན་བཟང་གི་དགོངས་པ། ཅིར་སྣང་སྟོང་པའི་རང་གཟུགས་ཀུན་ཏུ་བཟང་མོའི་ཀློང་། ཡུལ་སེམས་གཉིས་མེད་རྫོགས་པ་ཆེན་པོའི་ངང་དུ་ཕྱམ་གདལ་བས་རྟོག་པ་བར་མེད་རིག་པ་རྗེན་པ་རང་བབ་ཁ་ཡན་ཏུ་བསྐྱངས་པས་གདོད་མའི་གྲོལ་ས་ལ་ཕྱིན་པར་འགྱུར་རོ། །གཉིས་པ་མན་ངག་ངེས་པའི་གནད་ནི། དབང་པོ་ཐ་མ་དང་འབྲིང་གི་སྒོམ་ཚུལ་གྱི་གྲོགས་དང་རྩལ་སྦྱོང་བསྟན་པ་སྟེ། དེས་དབང་རབ་ཀྱི་བསྒོམ་པ་ན་འཕོས་ཏེ་རང་སྣང་རིས་མེད་ཀྱི་དགོངས་པར་འབྱམས་ཀླས་པར་འགྱུར་རོ། །དེ་ལ་བཞི། ཞི་གནས། ལྷག་མཐོང་། ཟུང་འཇུག །ལ་བཟླ་བའོ། །དང་པོ་ནི། སྣང་བཅས་དང་སྣང་མེད་ཀྱི་ཡལ་ལ་སེམས་བཟུང་བ་གཉིས་ཀྱི། ཕྱི་ཡི་སྣང་བཅས་དཀྱུས་སུ་སོང་། ནང་གི་སྣང་བཅས་ནི། ཤེས་པ་ཧ་ཅང་འཕྲོ་ན། པདྨ་དཀར་པོའམ་རྡོ་རྗེ་རྒྱ་གྲམ་རྩ་བ་སྙིང་ལ་ཟུག་པ་ཞིག་གསེར་གྱི་ས་གཞིའི་བར་སོང་སྟེ་ལྷན་ནེ་གནས་པར་བསམ། སེམས་ཟིན་པ་དང་དེ་སྙིང་ཁར་བསྡུས་ལ་རྩེ་གཅིག་ཏུ་སེམས་བཟུང་། སྣང་མེད་ཀྱི་ཡུལ་ལ་སེམས་བཟུང་བ་ནི། གང་ཡང་ཡིད་ལ་མི་བྱེད་པའི་ངང་ལ་འཇོག་པ་སྟེ། ལྷ་ཡི་ཞལ་ཕྱག་ལྟ་བུ་ལ་སེམས་ཟིན་པས་རྟོག་པ་གཞན་དེར་ནུབ། དེ་ཉིད་ཀྱང་རྣམ་པ་མ་ངེས་པའི་ངང་དུ་འཇོག་པ་ལྟ་བུ་ལ་བསླབ། དེ་གོམས་ནས་འགྲོ་འདུག་སྨྲ་བརྗོད་དྲན་རྟོག་སོགས་ཅུང་ཟད་དང་བསྲེས་ནས་གོམས་སུ་བཅུག་པས་བོགས་ཐོན་པར་འགྱུར་
རོ། །གཉིས་པ་ལའང་སྣང་སྟོང་གཉིས་ཀྱི་སྣང་བ་ལ་བསླབ་པ་ནི། ཡུལ་གྱི་སྣང་བ་གང་སྣང་ཐམས་ཅད་སྒྱུ་མ་དང་རྨི་ལམ་དངོས་སུ་འདུག་སྙམ་དུ་གང་སྣང་བདེན་མེད་དུས་ལ་ལ་སྦྱང་། སྟོང་པ་ལ་སྦྱོང་བ་ནི། སྣང་དུས་ནས་སྟོང་སང་སང་རྗེས་མེད་དུ་བལྟ་ཞིང་ཡིད་ལ་མི་ཕྱེད་པ་ནམ་མཁའ་ལྟ་བུའི་ངང་ལ་རང་སངས་ཐུག་ཕྲད་དུ་བཞག །སྤྱོད་ལམ་ཐམས་ཅད་གསལ་སྟོང་འཛིན་མེད། སྣང་སྟོང་གཏད་ཡལ་དུ་བསྲེས་པས་བོགས་ཕྱིན་པར་འགྱུར་རོ། །གསུམ་པ་ནི། ལུས་གནད་བཅས་ལ། གང་ཤར་ལ་གདམ་ཁ་མི་ཕྱེད་པ་དེ་ཉིད་ཀྱི་འཆར་གཞིའི་རིག་པ་ལ་ཆེར་ཆེར་བལྟ་ཞིང་ཕར་མི་དཔྱད་པར་ཚུར་བཞག་ཅིང་། འཕྲོག་ནས་མཉམ་པའི་ངང་ལ་རྟག་ཏུ་གནས་པས། འགྱུ་བས་གནས་པ་ལ་མི་གནོད་པ། རིག་པ་སྟོང་གསལ་འཆར་བ་གསུམ་འདྲེས་ཀྱི་ངོ་བོ་སྐུ་གསུམ་རང་གསལ་གྱི་དགོངས་པ་ལ་སླེབས་པ་ཡིན་ནོ། །དེའི་བོགས་འདོན་ཏུ། ནམ་མཁའ་དྭངས་ཤིང་སྤྲིན་མེད་པའི་ཉི་མ་ལ་རྒྱབ་བསྟན་ཏེ། དཔེ་ཕྱིའི་ནམ་མཁའ་གཡའ་དག་པའི་མཐོངས་སུ་ལྟ་སྟངས་བཅུན་ནས་བལྟས་པས། ནང་ཤེས་པའི་ནམ་མཁའ་རྟོག་མེད་ཀྱིས་གོ་ཕྱེས་ནས། གསང་བ་འོད་གསལ་སྙིང་པོའི་ནམ་མཁའ་མཐའ་དབུས་ཐམས་ཅད་ལས་འདས་པའི་ཆོས་ཉིད་སྐད་ཅིག་ལ་འཆར་བར་འགྱུར་རོ། །ལྟེངས་ན་ཞི་ལྷག་སོ་སོར་རྩལ་སྦྱང་། བྱིང་ན་གསེང་། རྒོད་ན་དབབ། སྤྱོད་ལམ་ཀུན་དང་བསྲེ་བ་
རྩལ་སྦྱོང་གི་གནད་དོ། །བཞི་པ་ནི། དེ་ལྟར་སྒོམ་དུས་བཟང་རྟོག་ངན་རྟོག་ཉམས་ཀྱི་འཆར་སྒོ་ཐམས་ཅད་རྟེན་མེད་སྟོང་པ། ཆོས་ཟད་བློ་འདས་ཆེན་པོའི་ངང་ལ་བསྐྱལ། སྙེམས་དང་རེ་དོགས་ཀྱི་འཁྲི་བ་བཅད། གང་དུའང་མི་འཛིན། ཅི་ལའང་མི་རྟོག་པའི་ཚུལ་གྱིས་བྱར་མེད་གདོད་མའི་དབྱིངས་སུ་ལ་བཟླ་སྟེ། མདོར་ན་རང་ཐོག་ཏུ་ངོ་སྤྲད། གཅིག་ཐོག་ཏུ་ཐག་བཅད། གྲོལ་ཐོག་ཏུ་གདིང་བཅས་ཏེ་བློ་ཟད་ཆོས་ཟད་ཀྱི་དགོངས་པ་ལ་དབང་འབྱོར་བར་བྱའོ། །གཉིས་པ་ལྷུན་གྲུབ་ཐོད་རྒལ་ལ། ཁྲེགས་ཆོད་གཏན་ལ་ཕེབས་པའི་གང་ཟག་གིས། དང་པོ་ཆོས་ཉིད་མངོན་སུམ་ཉམས་སུ་ལེན་པའི་དུས། གཉིད་ངོམས་པར་བྱས་ལ་ཐོ་རངས་ལྡང་བ་དང་། སྐྱབས་སེམས་བླ་མའི་རྣལ་འབྱོར་སོགས་སྔོན་འགྲོ་སྔོན་དུ་བཏང་ནས། རང་རྡོ་རྗེ་གཞོན་ནུར་གསལ་གདབ། ལུས་གནད་དྲང་པོར་བསྲངས་པའི་སེམས་དཔའི་སྐྱིལ་ཀྲུང་ངམ། མེ་ཐབ་དྲུག་འཆིང་ལ་གཡོན་པའི་ཐེ་བོང་གུང་མོ་སྲིན་ལག་གསུམ་གཡས་པས་ཧ་ཅང་དམ་དྲགས་པ་མིན་པར་འཆིང་བར་བྱས་པའི་ངོས། འཇམ་རླུང་གཡས་གཡོན་དབུས་གསུམ་ནས་བུས་པས། ནད་གདོན་སྡིག་སྒྲིབ་ཐམས་ཅད་ཕྱིར་སངས་སངས་ཀྱིས་དོན་པར་བསམ། ཆུར་རྔུབས་པས་བླ་མ་ཡི་དམ་ཐམས་ཅད་ཀྱི་ཐུགས་རྗེའི་བྱིན་རླབས་འོད་ཟེར་གྱི་རྣམ་པར་རང་ལ་ཐིམ་པར་བསྒོམ། དེ་ནས་འོག་རླུང་ཅུང་ཟད་འཐེན་ཏེ་སྟེང་རླུང་མནན། མིག་གྱེན་དུ་ལོག་པར་བྱས་ནས་སྨིན་མཚམས་ཀྱི་ཐད་སོར་བཞི་
ཙམ་གྱི་ཐད་དུ་མིག་བལྟས་པས། ཐོག་མར་ཕྱི་དབྱིངས་ནམ་མཁའ་སྐྱ་ཝལ་གྱིས་འཆར། ནང་དབྱིངས་ནག་པོ་ལྷུང་བཟེད་ཁ་སྦུབ་པ་ལྟ་བུ་ཞིག་འཆར། །གསང་དབྱིངས་འོད་མཐིང་ཁ་ཞིག་འཆར་རོ། །ཡང་མིག་ནན་མིག་གཡོན་པའི་ཟུར་དུ་ཕབ་ལ་བལྟ། མིག་ལ་རང་གི་ཁ་ཆུ་སྲིན་མཛུབ་ཀྱིས་བྱུགས། ཡང་ཁ་ཆེས་ཀྱང་བྱུགས་གཡོན་ཟུར་དུ་ཐིག་ལེ་འོད་ལྔའི་དཀྱིལ་འཁོར་འཆར། བསྡུ་བའི་ཚེ་ཐིག་ལེ་མཛོད་སྤུར་བསྡུས་ལ། ཐིག་ལེ་མཐིང་ཁ་ཞིག་སྙིང་གི་དཀྱིལ་དུ་འབྲལ་མེད་དུ་བསྒོམ་པ་གནད་ཆེའོ། །མངོན་སུམ་གཏན་ལ་ཕེབས་པའི་རྟགས་སུ། དགོངས་མོ་གཉིད་ལ་འགྲོ་ཁ་དང་། ཞོགས་པ་གཉིད་སད་འཕྲལ་ལ་ཡང་ཐིག་ལེ་རྣམས་འགྲལ་མེད་དུ་འཆར་ཞིང་། དེ་ནས་ཐིག་ལེའི་དབུས་སུ་སྤྲུལ་སྐུའི་རྣམ་པའི་སྐུ་རྣམས་ཀྱང་དབུས་ནས་རིམ་བཞིན་སྐུ་སྐེད་ཡན་ཆད་དུ་སྣང་ལ་གཟུང་ཡུལ་དུ་མ་གྲུབ་པར་སྣང་། རེས་ཐིག་ལེ་གཅིག་གི་ནང་དུ་སྤྲུལ་སྐུ་བྱེ་བ་ས་ཡ་མ་འདྲེས་པར་སོ་སོར་འཆར། རེས་དེ་རྣམས་གཅིག་ཏུ་བསྡུས་ནས་འཆར། དེ་རྣམས་ནི་སྤྲུལ་སྐུའི་ཞིང་ཁམས་མཐོང་བ་ཡིན་ནོ། །དེ་ནས་ལོངས་སྐུའི་རྣམ་པ་འཆར་བ་ལ། སྤྲུལ་སྐུ་དེའི་དཔྲལ་བར་འཕྲད་ལ་རི་མོ་དོད་པ་དང་། དེ་ནས་ཤངས་དང་ཞལ་གྱི་བར་དུ་རི་མོ་དོད་པ་དང་། དེ་ནས་སྤྲུལ་སྐུ་དེ་རིམ་གྱིས་ཞི་ཁྲོའི་རྣམ་པར་སྤྲོ་བསྡུའི་ཚུལ་གོང་བཞིན་འཆར་བའོ། །དེ་རྣམས་ནི་ལོངས་སྐུའི་ཞིང་ཁམས་མཐོང་བའོ། །དེ་ནས་ཞི་ཁྲོ་དེ་རིམ་བཞིན་ཁྲོ་བོའི་སྐུ་
འཇིགས་ཤིང་སྐྱི་གཡའ་བ། ཆེ་བ་རི་རབ་ཙམ། ཆུང་བ་ཡུངས་འབྲུ་ཙམ་ལ་ཞལ་རས་འཇིགས་ཤིང་རྔམས་པ། སྟག་ཤམ་རྣམས་ལ་ཁྲག་གི་ཐིག་ལེ་དངོས་སུ་ཡོད་པའི་རྣམ་པར་འཆར་བའོ། །དེ་རྣམས་ནི་ཆོས་སྐུའི་ཞིང་ཁམས་མཐོང་བ་ཡིན་ནོ། །སྤྲུལ་སྐུའི་ཞལ་རས་མཐོང་ནས་འཇའ་ལུས་འགྲུབ་པར་ཐེ་ཚོམ་མེད་པའོ། །ཁྱད་པར་ལུ་གུ་རྒྱུད་འཆར་བ་དེའི་དཀྱིལ་དུ་བལྟ་བ་གནད་ཡིན་ཅིང་། མུན་ཁྲིད་དང་མུན་ཁང་བྱས་ཚེ་སུན་ཉམས་འོང་བས། གཱ་བའི་པགས་པ་མཉེན་དུལ་སོང་བའི་ཕྱི་གོས་ཆེན་ནག་པོས་བཏུམས་པའི་མཐའ་འདྲིལ་བྱས་ལ། མིག་ལ་གསེང་ཡོད་པའི་མིག་ར་བྱས་ཏེ་མིག་ལ་བཀབ་ནས་སྔར་བཞིན་ཉམས་ལེན་བྱས་ན་མཚན་སྣང་རྣམས་འཆར་ཞིང་། གལ་ཏེ་ལྟག་རྩ་ན་བ་དང་། དབུགས་སྟོད་དུ་འཚང་བ་སོགས་བྱུང་ན། ལྟ་སྟངས་ཅུང་ཟད་ཀློད་ལ་དབུགས་སོ་བར་དུ་དལ་བུས་བཏང་ཞིང་སེམས་རང་བབས་སུ་བཞག་པ་དང་། ཛཱ་ཏི་དང་མར་བསྲེས་ལ་ལྟག་རྩར་བྱུགས་པས་ཁད་ཀྱིས་སེལ་བར་འགྱུར་རོ། །མི་མང་པོ་ཡོད་པའི་སར་ཡང་རང་གི་ཉམས་ལེན་གྱི་དྲན་པ་མ་ཡེངས་པར་སྙིང་ཁའི་ཐིག་ལེ་མཐིང་ག་དེ་འབྲལ་མེད་དུ་བསྒོམ་ཞིང་། རྒྱུན་དུ་རིག་པ་མིག་གི་ནང་དུ་ཧྲི་གེ་དྲངས་ལ་བསྒོམས་པས། རིག་པ་གསལ་རིག་སྟོང་གསུམ་ནམ་མཁའ་དྭངས་པ་ལྟ་བུ་ལ་མདུན་གྱི་ནམ་མཁའ་ལ་ཐིག་ལེ་དབུས་མཐིང་ཀ་མཐའ་འཇའ་ཚོན་
སྣ་ལྔ་འཕྲོ་བ་དང་བཅས་པ་མཐོང་བ་ནི། ཆོས་སྐུ་ཐིག་ལེ་ཉག་གཅིག་མཐོང་བ་ཡིན་པས། འཇའ་ལུས་སུ་འགྲུབ་ཅིང་སེམས་སྐྱེ་མེད་ཀྱི་དོན་རྟོགས་པར་འགྱུར་རོ། །ཕུར་བུ་ཐལ་འབྱིན་གྱི་དགོངས་པ་བཞི་པ། ཙན་དན་ལྟ་བུའི་གང་ཟག་གིས་མཚན་མ་རྫས་ཀྱི་ཕུར་པ་དགྲ་བགེགས་ལ་འདེབས་པའི་སྒོམ་རིམ་ནི་གཞན་ཏུ་ཤེས་པར་བྱའོ། །སྤྱི་དོན་གསུམ་པ་རྗེས་ཀྱི་བྱ་བ་ལ་བཞི། སྤྱོད་པས་བོགས་དབྱུང་བ་དབང་གིས་གདིང་བཙལ་བ། དམ་ཚིག་གིས་དོན་ལས་མི་འདའ་བ། འབྲས་བུར་ལ་བཟླ་བའོ། །དང་པོ་ལ་གསུམ། རྒྱ་ཆུང་བ་དམན་པའི་སྤྱོད་པ། རྒྱ་ཆེ་བ་བསམ་གྱིས་མི་ཁྱབ་པའི་སྤྱོད་པ། ཁྱད་འཕགས་རྨད་དུ་བྱུང་བའི་སྤྱོད་པའོ། །དང་པོ་གཉིས་ནི་ཉན་ཐོས་བྱང་ཆུབ་སེམས་དཔའི་སྤྱོད་པའོ། །འདིར་ལག་ཏུ་བླང་བྱ་ཕྱི་མ་སྟེ། དེ་ལའང་གསུམ། གཉིས་མེད་ལྟ་བ། རླབས་ཆེན་ཐབས། གདུག་པ་འདུལ་བའི་སྤྱོད་པའོ། །དང་པོ་ནི། ཕུར་པ་མྱང་འདས་ཀྱི་རྒྱུད་ལས་གསུངས་པའི། །གཉིས་མེད་ལྟ་བ་གདིང་དུ་གྱུར། ཞེས་པ་ལ་སོགས་པ་དང་། གཉིས་པ་ནི། དུག་ལྔ་ལམ་དུ་ཁྱེར་བའི་ལྟ་སྤྱོད་རྣམས་དང་། གསུམ་པ། ཞིང་བཅུ་ཚར་གཅོད་པའི་སྤྱོད་པ་རྣམས་འདོར་དུ་མི་རུང་བས་སྲོག་ཏུ་བསྟེན་ཅིང་། མདོར་བསྡུ་ན། ཐབས་ཀྱིས་སྤྱོད་པའི་འགྲོ་དོན་ཏུ། །བྱམས་དང་སྙིང་རྗེས་གང་འདུལ་བ། །ཞེས་པས་ཕྱི་ནང་འབྱུང་བས་བསྡུས་
པའི་སྣང་བ་ཐམས་ཅད་ཆེ་མཆོག་སྐུའི་དལ་དུ་གསལ། །སྒྲ་སྐད་ཀཱི་ལ་ཡ་ཆོས་ཉིད་རང་སྒྲར་ཤར། །དྲན་རྟོག་ཐམས་ཅད་ཡེ་ཤེས་ཀྱི་ངར་འོད་དུ་རང་གསལ་ཏེ། དེ་ལྟར་ཤེས་པས་མི་དགེ་བཅུ་སྐྱེ་བའི་ཡུལ་མེད། སྤྱོད་པ་ཐམས་ཅད་དགེ་བ་བཅུའི་ངང་དུ་སྤྱོད། སྣང་བ་ལྷར་ཤེས་པས་ཆགས་སྡང་དང་གཟུང་འཛིན་གྱི་ཡུལ་མེད། གྲགས་པ་སྔགས་སུ་ཤེས་པས་སྒྲ་སྙན་མི་སྙན་ལས་གྲོལ། དྲན་རྟོག་ཐམས་ཅད་ཡེ་ཤེས་སུ་གསལ་བས་རྣམ་ཤེས་ཚོགས་བརྒྱད་ཀྱི་རྟོག་པ་མི་འཁྲུགས་པར། ཡེ་ཤེས་མི་ཟད་པ་རྒྱན་གྱི་འཁོར་ལོར་གསལ་ཏེ། ཅི་བྱེད་ཐམས་ཅད་དེའི་ངང་ནས་མ་ཡེངས་པར་སྤྱོད་དོ། །དེ་ལྟར་མ་རྟོགས་པའི་སེམས་ཅན་ལ་སྙིང་རྗེ་བསྐྱེད་ཅིང་འཕྲོ་འདུས་གནས་པར་བྱ་བ་ནི་སྤྱོད་པས་ལྟ་སྒོམ་གྱི་བོགས་དབྱུང་བའོ། །གཉིས་པ་དབང་གིས་གདིང་བཙལ་བ་ནི། སངས་རྒྱས་ཕྲིན་ལས་རྫོགས་མཛད་ནས། །དབང་དང་བྱིན་རླབས་འདིར་སྩོལ་ཅིག །ཅེས་པས་དེ་ལྟར་གོང་གི་ལྟ་སྒོམ་སྤྱོད་པ་གསུམ་པོ་དེ། རང་གི་རྒྱུད་ཐོག་ཏུ་ཁེལ་བས་སངས་རྒྱས་ཐམས་ཅད་ཀྱི་ཕྲིན་ལས་དུས་གཅིག་ཏུ་རྫོགས་ཏེ། སྒོ་གསུམ་ཐམས་ཅད་ལྷ་ཡི་རང་བཞིན་ཏུ་གསལ་ཞིང་ཆོས་ཉིད་དུ་རྫོགས་ནས་གཉིས་སུ་མེད་པ་བདེ་བ་ཆེན་པོར་རྫོགས་པ་ནི་དབང་ཐམས་ཅད་ཀྱི་མཆོག་ཡིན་ནོ། །ཆོས་ཉིད་བདེ་བ་ཆེན་པོའི་དབང་ངོ་། །ཕྱི་ནས་བསྐུར་བའི་དབང་ནི་བསྐུས་པ་དང་འདྲའོ། །ཞེས་གསུངས་སོ། །
དེས་ན་ཕུར་པ་ཐལ་བ་བྱིན་གྱི་དགོངས་པ་རྣམ་བཞིས་བསྒྲུབ་པའི་འབྲས་བུ། རྟོགས་པ་ཆོས་ཉིད་ཀྱི་དབང་། རིག་པ་རྩལ་གྱི་དབང་། ཁམས་གསུམ་ཡོངས་སྒྲོལ་གྱི་དབང་། དྲག་པོ་ལས་ཀྱི་དབང་རྣམས་ཐོབ། དངོས་གྲུབ་ཆུང་ངུ་གྲུབ་པ་བརྒྱད། འབྲིང་པོ་རིག་འཛིན། མཆོག་སྐུ་གསུམ་རྣམས་འབད་མེད་ལྷུན་གྲུབ་ཏུ་རྫོགས་པར་འགྱུར་རོ། །གསུམ་པ་དམ་ཚིག་ལ་བཞི། ཐུན་མོངས་སྤྱི། སྒྲུབ་པ། ཁྱད་པར། སྤྱོད་པ་རྒྱུན། གལ་མདོ་ངེས་པའི་དམ་ཚིག་གོ། །དང་པོ་ལ་རྩ་བ་གསུམ་དང་ཡན་ལག །གཉིས་པ་ལ་ཁྱད་པར་གྱི་དམ་ཚིག་ཉི་ཤུ། །གསུམ་པ་ལ་རྒྱུན་གྱི་དམ་ཚིག་བཞི། བཞི་པ་ལ་རྩ་བ་གསུམ། ཡན་ལག་བཅུ་གཉིས་པོ་རྣམས་ཉམས་པའི་རྒྱུ་བཞིས་མ་གོས་པར་བསྲུང་ཞིང་། ཉམས་ན་ཕྱིར་འཆོས་པ་ལ་འབད་པས་རྒྱུད་རྣམ་པར་དག་ཅིང་བསྐྱེད་རྫོགས་ཀྱི་འབྲས་བུ་དུས་ལས་མི་ཡོལ་བར་སྨིན་པར་འགྱུར། མདོར་ན་འདི་ཉིད་ཀྱི་གྲུབ་པའི་མཐའ་སྙིང་རྗེས་བསྒྲལ་བའི་དམ་ཚིག་ནི། ཞེས་པས་གོང་ལྟར་རྟོགས་པ་དེ་སྙིང་རྗེའི་བློས་མཚམས་སྦྱར་ཏེ། འགྲོ་བ་ཐམས་ཅད་སངས་རྒྱས་ཀྱི་ས་ལ་བསྒྲལ་སྙམ་པར་སེམས་བསྐྱེད་དོ། །དེའང་ཞེ་སྡང་གིས་བསད་ཅིང་གཏི་མུག་གིས་མནན་པ་མ་ཡིན་ཏེ། ཕུང་པོ་ཐམས་ཅད་རྡོ་རྗེའི་སྐུར་གྱུར་ཏེ། རྣམ་པར་ཤེས་པ་ཐམས་ཅད་ཆོས་ཀྱི་དབྱིངས་སྤྲོས་པ་དང་བྲལ་བ།
རྡོ་རྗེ་ལྟར་འཕོ་འགྱུར་མེད་པར་བསྒོམ་མོ། །སྒོ་གསུམ་དེའི་དོན་ལས་མི་འདའ་བ་ནི་དམ་ཚིག་ཐམས་ཅད་ཀྱི་མཆོག་གོ། །ཞེས་གསུངས་སོ། །བཞི་པ་འབྲས་བུར་ལ་བཟླ་བ་ནི། སྲིད་པ་རྡོ་རྗེ་ཕུར་པའི་ལྷ། །ཡེ་ཤེས་ཁྲོ་བོ་གྲུབ་པར་མཛོད། །ཅེས་པས་སྣང་བ་ཐམས་ཅད་ལྷའི་དལ་དུ་ཡེ་ནས་རྫོགས་ནས་ཞིང་ཁམས་ཐམས་ཅད་ཡེ་ཤེས་སུ་དག་པའི་སྣང་བ་འཆར་ཏེ། ཆོས་ཐམས་ཅད་རང་བྱུང་གི་ཡེ་ཤེས་སུ་རང་གསལ་བ་དེ་ཀ་སྤྲུལ་པའི་སྐུ། གསལ་བའི་དུས་རང་ན་སྤྲོས་པ་དང་བྲལ་བས་ཆོས་ཀྱི་སྐུ། དེ་གཉིས་དབྱེར་མེད་པ་བདེ་བ་ཆེན་པོ་ལོངས་སྤྱོད་རྫོགས་པའི་སྐུ། དེ་གསུམ་ཡེ་ནས་མ་བཅོས་པའི་རང་བཞིན་ཏུ་བཞུགས་པས་ངོ་བོ་ཉིད་སྐུའོ། །དེ་སེམས་ཅན་ཐམས་ཅད་ཀྱི་རྒྱུད་ལ་འཕོ་འགྱུར་མེད་པར་གནས་པས་རྡོ་རྗེའི་སྐུའོ། །དེ་ཉིད་རྟོགས་པ་དང་གོམས་པ་ལས་མཐར་ཕྱིན་པས་འབྲས་བུ་ཞེས་བྱའོ། །སྔགས་ཕྱི་རྒྱུད་པའི་འབྲས་བུ་བཞིན་གཞན་ནས་རེ་བ་མ་ཡིན་ནོ། །ཞེས་རྡོ་རྗེའི་གསུང་ལས་འབྱུང་བ་དང་། གཞན་ཡང་། །དོན་འདིར་རྨོངས་ན་སྲིད་པའི་འཁོར་བར་འཁྱམས། །དགེ་དང་མི་དགེའི་དབང་འགྲོ་ཆུ་བོས་གཡེངས། །འདི་མེད་གཞན་གྱི་འབྲས་བུས་འཚང་མི་རྒྱ། །འདི་དོན་རྟོགས་ན་འཁོར་བའི་གསེབ་ལས་ཐར། །དགེ་དང་མི་དགེའི་ལས་ཀྱི་དབང་མི་འགྲོ། །མཐོང་བའི་ཆོས་ལ་མངོན་ཏུ་མ་གྱུར་ཀྱང་། །ཚེ་འདི་འདས་མ་ཐག་ཏུ་མངོན་ཏུ་འགྱུར། །ཞེས་
ཨོ་རྒྱན་གྱི་མཁན་པོ་བློ་ལྡན་མཆོག་སྲེད་ཀྱིས་གསུངས་པ་དང་། །ཡིད་གཉིས་ཐེ་ཚོམ་མེད་པར་མོས་བྱེད་ཅིང་། །སྒྲུབ་པ་སྣ་གཅིག་ཙམ་ཞིག་བྱས་གྱུར་ཀྱང་། །ཡིད་ལ་ཅི་འདོད་འགྲུབ་པར་མ་གྱུར་ན། །ཨོ་རྒྱན་བདག་གིས་ཕྱི་རབས་འགྲོ་བ་བསླུས། །ཞེས་པ་དོན་གསུང་རྡོ་རྗེའི་སྒྲ་ཆེན་ཡང་ནས་ཡང་དུ་བསྒྲགས་པ་ནི་མི་བསླུ་བའི་ཐ་ཚིག་གི་ངེས་པ་སྟེ། དབུལ་པོའི་ནོར་བཞིན་འཐོར་བ་སྡུད་པའི་དགོས་པར་མཛོད་ཅིག །བཀའ་ཡི་གཞུང་ཡིན་གཏེར་གྱི་མཛོད་འཛིན་ཉིད། །སྙན་བརྒྱུད་ཉིང་ཁུ་སྐལ་བཟང་ཐར་པའི་ལམ། །སྙིགས་ལ་མེད་ཐབས་མེད་པ་ཀཱི་ལ་ཡའི། །ཁྲིད་ཡིག་མདོར་བསྡུས་སྙིང་པོར་དྲིལ་ནས་འཆད། །ལམ་སྲོལ་འབྱེད་པོར་གྲགས་པའི་གཟི་བརྗིད་དང་། །མི་ལྡན་ཐེ་ཚོམ་མུན་པས་བློ་འཐུམས་ན། །བཀའ་གཏེར་སྣང་བའི་མཛོད་རྣམས་ཞལ་ཕྱེས་དང་། །ཡིད་ཆེས་པདྨོ་ཁོང་ནས་དགོད་པར་འགྱུར། །བྱིས་བློས་ནོངས་པ་དཀོན་མཆོག་རྩ་གསུམ་ལ། །སྙིང་ནས་བཤགས་སོ་དགེ་བས་འཁོར་འདས་ཀུན། །ཐལ་འབྱིན་དགོངས་པས་སྐུ་གསུམ་རོ་མཉམ་པ། །དཔལ་ཆེན་ཡོངས་རྫོགས་ཕྱག་རྒྱར་ཐེབས་གྱུར་ཅིག །ཅེས་པ་འདིའང་མི་འཕྲོག་པའི་མཁྱེན་པ་དང་། ཚད་མེད་པའི་ཐུགས་རྗེའི་བདག་ཉིད་རྗེ་བཙུན་འཇམ་པའི་རྡོ་རྗེའི་གསུང་ཟེར་བདུད་རྩིས་སྙིང་གི་པདྨོར་བྲན་པས་སྤྲོ་བའི་འདབ་མ་སད་པའི་ཚེ། །རྡ་ན་སཾ་སྐྲྀ་ཏའི་དགོངས་
པ། བློ་ལྡན་མཆོག་སྲེད་ཀྱི་ཞལ་ལུང་ཕུར་བུ་སྒྲ་བཞིའི་རྒྱས་བཤད་དང་། འགྲེལ་ཆེན་འབུམ་ནག་གི་དགོངས་དོན་རྩ་བར་བཟུང་། ཆོས་དབང་སྤུ་གྲིའི་རྫོང་འཕྲང་གི་གདམས་པ་དང་། སངས་གླིང་ཐུགས་ཀྱི་ཉིང་ཁུའི་རྟོགས་པས་བདག་གྲོལ་སོགས་ཨོ་རྒྱན་དུས་གསུམ་མཁྱེན་པའི་རྡོ་རྗེའི་གསུང་རྣམས་ཀྱིས་མཛེས་རྒྱན་ཏུ་བསྟར། གདོད་མའི་མགོན་པོ་ཀུན་མཁྱེན་རྡོ་རྗེ་གཟི་བརྗིད་ཀྱི་གསུང་རབ་ལས་འབྱུང་བའི་ཁྲེགས་ཆོད་ཀྱི་གདམས་པ་དང་། བསམ་གཏན་གླིང་པའི་ཡང་ཕུར་ཐུན་མོང་བའི་རྫོགས་རིམ་འཕྲང་མགོ་གཏེར་ཆེན་ཤེས་རབ་འོད་ཟེར་གྱི་གསུང་རྣམས་ལྟོ་སྦྱར་བས་གདམས་ངག་གི་སྙིང་བཙུད་དེ། བཀའ་གཏེར་སྤྱི་ལ་ཁྱབ་པའི་དབང་དུ་བྱས་ནས་དཔལ་ཆེན་པོ་པདྨ་དབང་ཆེན་སོགས་མཚན་ཉིད་དང་ལྡན་པའི་ཡོངས་འཛིན་རྣམས་ཀྱི་ཞབས་རྡུལ་ལ་སྤྱི་བོས་རེག་པའི་རྒྱལ་ཁམས་པ་པདྨ་གར་གྱི་དབང་ཕྱུག་ཕྲིན་ལས་འགྲོ་འདུལ་རྩལ་གྱིས། དཔལ་སྤུངས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་བྲིས་པ་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །དགེ་ལེགས་འཕེལ།། །།