དཔལ་ཆེན་རྡོ་རྗེ་གཞོན་ནུའི་སྨད་ལས་གཏོར་ཟློག་གི་ལག་ལེན་གསལ་བར་བཀོད་པ་རྡོ་རྗེ་གནམ་ལྕགས་འཁྲུལ་འཁོར།
དཔལ་ཆེན་རྡོ་རྗེ་གཞོན་ནུའི་སྨད་ལས་གཏོར་ཟློག་གི་ལག་ལེན་གསལ་བར་བཀོད་པ་རྡོ་རྗེ་གནམ་ལྕགས་འཁྲུལ་འཁོར་ཞེས་བྱ་བ་བཞུགས་སོ། །
དཔལ་ཆེན་རྡོ་རྗེ་གཞོན་ནུའི་སྨད་ལས་གཏོར་ཟློག་གི་ལག་ལེན་གསལ་བར་བཀོད་པ་རྡོ་རྗེ་གནམ་ལྕགས་འཁྲུལ་འཁོར་ཞེས་བྱ་བ། བླ་མ་དང་དཔལ་ཆེན་ཧེ་རུ་ཀ་ལ་ཕྱག་འཚལ་ལོ། །རྡོ་རྗེ་ཁྲོས་པའི་མཚོན་ཆེན་འབར་བས་ཞེ་སྡང་ཆོས་ཉིད་དབྱིངས་སུ་གཅོད། ཕུང་པོ་རྡོ་རྗེས་དབྱིག་གི་རབ་གཏམས་པ་སྲིད་པ་ཕུར་བུའི་འཁོར་ལོར་སྒྲུབ། དོན་དང་རྟགས་སུ་མཉམ་པར་སྦྱོར་ལས་སྲས་མཆོག་འབར་བའི་སྤྲིན་ཕུང་སྤྲོ། བདུད་བགེགས་དོན་སྙིང་ཐལ་བར་འབྱིན་མཛད་ཁྲག་འཐུང་ཚོགས་རྗེ་དེ་ལ་འདུད། བདུད་བཞིའི་དཔུང་བཅོམ་ཐོད་ཕྲེང་རྩལ་འཆང་གི། དགོངས་བརྒྱུད་མ་ཉམས་འཁོན་གྱི་རིག་པ་འཛིན། །གསེར་གྱི་ཕྲེང་བ་མཐུ་བྱིན་གཟི་འོད་ཅན། །དད་པས་ཡན་ལག་མཆོག་གི་རྒྱན་ཏུ་འཆིངས། །གསང་བདག་རྡོ་རྗེ་གཞོན་ནུ་བཤེས་གཉེན་ཚུལ། །སྒྲོལ་མགོན་ཞབས་དང་ཁྱབ་བདག་བླ་མ་ལ། །གུས་པས་འདུད་དོ་རྡོ་རྗེའི་ཡེ་ཤེས་ཀྱིས། །སྒོ་གསུམ་དཀྱིལ་འཁོར་གསུམ་དུ་བྱིན་བརླབས་མཛོད། །འཁྲུལ་བྲལ་རྗེ་བཙུན་ཆེན་པོའི་གསུང་རབ་ལ། །མདའ་ལ་མདེའུ་ཇི་བཞིན་གཏོར་ཟློག་གི། ལྷན་ཐབས་བསྟན་འགྲོའི་དོན་ཏུ་འབྲི་བ་ལས། །མཁའ་འགྲོ་ཆོས་སྐྱོང་བཀའ་ཡི་
གནང་བ་སྩོལ། །དེ་ལ་བདེ་བར་གཤེགས་པ་ཐམས་ཅད་ཀྱི་ཕྲིན་ལས་ཉེ་བར་བསྡུས་པ་དཔལ་ཆེན་པོ་རྡོ་རྗེ་གཞོན་ནུའི་སྒྲུབ་པའི་རིམ་པ་ལ་སྤྲོས་བཅས་དང་སྤྲོས་མེད་ཀྱི་ཚུལ་གཉིས། སྤྲོས་བཅས་ཀྱི་སྒྲུབ་ཚུལ་ལ་ཞེ་སྡང་ཅན་དགྲོལ་བ་ཕྱི་བསྐྱེད་རིམ། འདོད་ཆགས་ཅན་དགྲོལ་ཕྱིར་ནང་རྩ་རླུང་། གཏི་མུག་དགྲོལ་ཕྱིར་གསང་བ་ཐམས་ཤེས་དབྱེར་མེད་ལ་བརྟེན་པ་གསུམ། དང་པོ་ཕྱི་བསྐྱེད་རིམ་གྱི་སྒྲུབ་ཚུལ་ལའང་སྟོད་ལས་བྱང་ཆུབ་སྒྲུབ་པ་དང་། སྨད་ལས་དགྲ་བགེགས་བསྒྲལ་བ་གཉིས་སུ་ཡོད་ཅིང་། དེའང་རྒྱུད་ཀྱི་ཁོག་དོན་དྲུག་བསྡེབས་ཏེ་སྔ་མ་སྔོན་ཏུ་སོང་ནས་ཕྱི་མ་ལ་འཇུག་དགོས། དེ་ལྟར་ན་མནན་སྲེག་འཕང་གསུམ་ལས་ཀྱི་མཐའ་སྡུད་ཙམ་ཡིན་མོད། དགོས་པའི་དབང་གིས་ཨོ་རྒྱན་ཆེན་པོས། །ཚེ་གཅིག་བྱང་ཆུབ་བསྒྲུབ་པའི་བགེགས། །སྡང་བའི་དགྲ་དང་གནོད་པའི་གདོན། །ཕ་རོལ་རྦོད་གཏོང་ངན་པ་དང་། །མཐའ་དམག་དུས་འཁྲུགས་ངན་པ་སོགས། །ཕྱིར་ཟློག་མན་ངག་འདི་ཁོ་ན། །ཞེས་གསུངས་པ་ལྟར། དེང་སང་སྔགས་པ་རྣམས་གཏོར་ཟློག་གཙོ་བོར་བྱེད་པའི་ལུགས་སྲོལ་དང་མཐུན་པར་འཁོན་སྟོན་ཕྱི་མ་རྣམས་ཀྱིས་ཀྱང་ཕྱག་བཞེས་སུ་མཛད་པ་ལྟར་ན་དོན་གསུམ། སྦྱོར་བ། དངོས་
དངོས་གཞི། རྗེས་སོ། དང་པོ་ནི། སྒྲུབ་པ་པོ་ལྟ་བའི་གདེངས་དང་ལྡན་ཞིང་བསྙེན་སྒྲུབ་ལ་དྲོད་ཚོད་ཐོབ་པས་གཉན་ཞིང་རྩུབ་པ་སོགས་མངོན་སྤྱོད་རྗེས་སུ་འབྲེལ་བའི་གནས་སུ་ཟླ་བ་དང་ཚེས་ཀྱི་ཐེབ་ལྡོག་འགྲེལ་བ་འབུམ་ནག་ལས་བཤད་པ་ལྟར་འཛོམ་ན་མཆོག་མ་འཛོམ་ཡང་བདུད་ཉི་སོགས་དྲག་པོའི་ཉི་མ་དང་མགོ་ཕུར་འཛོམ་པའམ། ཟླ་བའི་སྨད་ལ་བྱ་དགོས་ཏེ། བླ་སྟོད་ཐམས་ཅད་ལྡོག་པ་ཡིན། །ཟླ་སྨད་ཐམས་ཅད་ཐེབས་པ་ཡིན། །ཞེས་དང་། ར་བ་བཞི་ལ་གདབ་ལས་ལྡོག །ཐ་ཆུང་བཞི་ལ་ལས་དག་བྱ། །ཞེས་སོགས་བཤད་པས་ཉི་ལྡོག་ལྟ་བུའི་དམིགས་བསལ་ཡིན་ནམ་གཏོགས་གང་བྱུང་མི་རུང་བ་གསལ། སྒྲུབ་པའི་རྫས་དང་ཡོ་བྱད་ཉེ་བར་བསྡོགས་པ་ནི། གནས་ཁང་དྲག་པོའི་ཡོ་བྱད་ཀྱིས་འཇིགས་སུ་རུང་བར་བརྒྱན་པའི་གུདདུ་ཡོད་ན་རྡོ་རྗེ་གཞོན་ནུའི་བྲིས་སྐུ་སོགས་རྟེན་བཀྲམ་པའི་མདུན་དུ་སྟེགས་བུའི་རྡུལ་ཚོན་གྱིས་ཆོས་འབྱུང་མཐིང་ནག་རྩེ་མོ་དཀྱིལ་འཁོར་གྱི་ལྷོར་བསྟན་པའི་དབུས་སུ་དྲག་པོ་མཚོན་ཆའི་འཁོར་ལོ་སྔོ་ནག་རྩིབས་བཅུ་པ། བར་མཚམས་ཕྱོགས་མདོག་གམ་མཐིང་ནག་བྱས་པ། དེའི་ལྟེ་བར་གྲུ་གསུམ་མཐིང་ནག་ཁ་ཁྱེར་ལ་རྡོ་རྗེས་མཚན་པའི་དབུས་སུ་རྡོ་རྗེ་སྔོན་པོ་རྭ་གདེངས་པ་བྲི། དེའི་སྟེང་དུ་ལྕགས་སྣོད་མཉྫུའི་ཁར་གཏོར་མ་ཟུར་གསུམ་ཁྲུ་གང་ལས་མི་ཆུང་བ་ལ། འཁོར་ཟུར་གསུམ་ཆུང་བ་བཅུས་ཀྱིས་བསྐོར། ཆོས་འབྱུང་ལྷོའི་རྩེ་མོ་ཤྭ་ན་མ། དེའི་གཡས་ངོས་སུ་བདུད་རྒྱལ་གྱི་གཏོར་མ་དར་ནག་བཙུག་པ། ནུབ་བྱང་གི་ཟུར་དུས་བདག་མ། བྱང་ཤར་གྱི་ཟུར་དུ་བདག་ཉིད་མ་སྟེ་ཐམས་ཅད་ཟུར་གསུམ་ཁྲག་གིས་བྱུགས་པ། གཙོ་འཁོར་ཐམས་ཅད་ལ་ཚེ་དང་ཡུངས་ཀར་གོང་བུ། སྐྱེར་
རྩང་ལ་སོགས་པས་བརྒྱན་པའི་མཐར་བྱང་ཤར་ནས་བརྩམས། མཚམས་འཛིན་གྱི་མེ་ཏོག །ཁྲག་གི་ཨརྒྷཾ་སོགས་ཆུ་གཉིས་ཉེར་སྤྱོད་འདོན་ཆ་དང་མཐུན་པར་བསྐོར་ཏེ་བཤམ། རྒྱབ་ཕྱོགས་ཀྱི་སྟེགས་བུ་ལ་མཉྫུ་ལྟ་བུ་ཅུང་མཐོ་བར་དཔལ་ཆེན་པོའི་མཆོད་གཏོར་སྟོད་ཟུར་གསུམ། སྨད་ཟླུམ་པོ་གཡས་གཡོན་ཏུ་རང་འདྲ་ཆུང་བ་གཉིས་རེ་སྟེ་གཙོ་འཁོར་ལྔ་པ། རྒྱན་སྤྲོས་གང་མཛེས་བྱས་པའི་གཡས་སུ་སྨན་དང་གཡོན་ཏུ་རཀྟའི་བཅུད་ལྡན་གྱི་ཐོད་སྣོད། དེའི་མདུན་གཡས་ནས་བརྩམས་ཏེ་རིམ་བཞིན་དུས་འཁོར། གུར་མགོན། རྣམ་སྲས། ཞལ་བཞི་པ། ཏྲཀྴད་དཀར་མོ་ཉི་ཟླ། བདུད་རྒྱལ། ཕུར་སུང་། མཁའ་འགྲོ་སྤྱི་གཏོར། གཞི་བདག་གཏོར་མ་བཅས་བཅུ་ཚར། ཀོར་གཏོར་སྤྲོ་ན་དེ་དག་གི་མདུན་ལ་སོགས་པ་གང་བདེར་བཀོད་པའི་མདུན་ཏུ་སྤྱི་མཆོད་ཆུ་གཉིས་ཉེར་སྤྱོད་ཕྲེང་ཚར་དུ་བཤམས། གསེར་སྐྱེམས་ཡུལ་བདག་འབྱུང་གཏོར་སྔོན་གཏོར་ཚོགས་ཀྱི་ཡོ་བྱད་སོགས་ཉེ་བར་མཁོ་བའི་ཆས་རྣམས་འདུ་བྱ། ཟློག་གཏོར་གྱི་མདུན་དུ་འབྲུབ་ཁུང་གྲུ་གསུམ་མཐིང་ནག་མེ་རི་འབར་བའི་ནང་དུ། བག་ཟན་ལ་ཚ་བ་གསུམ། གདབ་ཆད་པ་དང་ཕུང་ཤུལ་གྱིས་སོགས་བསྲེས་ཏེ་ར་ཐུག་ལུག་ཐུག་གི་ཆུས་སྦྲུས་པའི་ལིངྒ་སྐྱེ་མཆེད་དོད་པ་ཆེ་བ་གཅིག་ལ་ཆུང་བ་བཅུས་བསྐོར་བ་བཟོས་ཏེ་བཞག །དཀྱུས་སུ་མི་མཛད་ཀྱང་དོ་གལ་ཆེ་བར་བྱེད་ན་ལིངྒ་ཆེ་བའི་སྙིང་གར་བྲིས་པའི་ལིངྒ་ཚད་ལྡན་བཅུག་ན་ཟབ། ཤོག་བིང་ཡོད་ན་དེ་དང་མེད་ན་དར་དམར་པོའི་རས་མ་ཞིག་ཚོན་སྐུད་སྣ་ལྔའམ་སྔོན་དམ་བགྱིས་བསྡམས་ཏེ་སྙིང་གར་བཅུག །དེའི་སྣེ་མོ་སྙིང་ག་ནས་ཕྱིར་བཏོན་སྐེ་ལ་དཀྲིས་པའི་སྣེ་མོ་ཕུར་ཆུང་ཞིག་ལ་བཏགས། ཟློག་
གཏོར་གྱི་གཡས་ས་མདའ་ཟོར་སྐྱེར་པའི་མདེའུ་གྲུ་གསུམ་ལ་དུག་ཁྲག་གིས་ཧཱུྃ་བྷྱོ་ཕཊ་གསུམ་བྲིས་པ་དང་གཞུ་མཆོག་ལ་དར་སྔོན་དམར་གྱིས་བཅིངས་བ། དུར་ཁྲོད་ཀྱི་རྡོ་ནག་གྲུ་གསུམ་ལ་ཧཱུྃ་སོགས་བྲིས་པ། གཡོན་ཏུ་ལྕགས་སྣོད་དུ་སྐམ་ཐུན་ཡུངས་ཀར་ནག་ལྕགས་ཟངས་རྡོ་ཕྱེ་སྐེ་ཚེ་ཤང་ཚེ་སོགས་དང་། ཐོད་ངན་ཏུ་རྒྱུ་རློན་ཐུན་གྲི་ཁྲག་སོགས་ཁྲག་དང་དུག་སྣ་ཚོགས་སྦྱར་བ། རྭ་ཟོར་བྱེད་ན་གླང་གཡག་འོག་ཡོད་ཀྱི་རྭ་གཡས་དུག་ཁྲག་བླུགས་ཤིང་རོ་བ་ནག་པོས་ཁ་བཅད། ཚོན་སྐུད་ཀྱིས་བཅིངས་ལ་སྐྱེར་ཕུར་གཟེར་བ་རྣམས་བཞག །སྒྲུབ་པ་པོའི་མདུན་ཏུ་རྡོར་དྲིལ་ནང་མཆོད། ཌཱ་མ་རུ། བསྟེན་ཕུར། ཨེའི༔གདན་ལ་སྲས་མཆོག་ཕུར་བུ། ཡུངས་ཀར། གུ་གུལ་སོགས་གཞག །ཉིན་ཐ་མ་གདབ་ཁའི་སྐབས་སུ་མཁོ་བའི་ཆས་རྣམས་ཀྱང་ཚོགས་པར་བྱའོ། །གཉིས་པ་དངོས་གཞི་ལ་སྒྲུབ་པའི་སྔོན་འགྲོ་དང་། བསྐྱེད་བཟླས་ཏིང་ངེ་འཛིན་བསྒོམ་པ་དངོས་གཉིས་ལས། དང་པོ་ནི། དཀྱིལ་ཆོག་བདུད་འཇོམས་རོལ་པ་ལྟར་སྔོན་འགྲོ་གཏོར་མ་བཏང་ན་ལེགས་པའི་ཡན་ལག་ལས་ལྷག་སྐྱོན་ཏུ་མི་འགྱུར་ཞིང་ས་ལུགས་ཕྱག་ལེན་ཏུ་མི་འབྱུང་། གནས་དང་རྫས་བྱིན་གྱིས་བརླབ་པ་ནི། རྡོ་རྗེ་རྩེ་མོས་ནང་མཆོད་འཐོར་ལ། ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུྃ་ཚིནྡྷ་ཚིནྡྷ་ཧཱུྃ་ཕཊ། ཨོཾ་སྭཱ་བྷཱ་སོགས་ཤུདྡྷོ྅ཧཾ། སྟོང་པའི་ངང་ལས་གནས་ཁང་དྲག་པོའི་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ། ཨ་ལས་བནྡྷ་འབར་བའི་སྣོད་ཡངས་ཤིང་རྒྱ་ཆེ་བར་དགྲ་བགེགས་བསྒྲལ་བའི་ཁྲག་གི་ཨརྒྷཾ། དབང་པོ་ལྔའི་མེ་ཏོག །ཚིལ་ཚིན་གྱི་བདུག་སྤོས། ཞུན་ཆེན་གྱིས་སྒྲོན་མེ། མཁྲིས་པའི་དྲི་ཆབ། ཤ་རུས་ཞལ་ཟས། རྐང་གླིང་ཐོད་རྔ་ལ་སོགས་པ་མཆོད་པའི་སྤྲིན་ཕུང་བསམ་གྱིས་མི་ཁྱབ་པ་ཞིག་བླ་མ་དང་དཀྱིལ་འཁོར་གྱི་འཁོར་ལོ་
རྒྱལ་བ་སྲས་དང་བཅས་པའི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཨོཾ་བཛྲ་ཨ་ཧ་ར་ལི་ཧཱུྃ་ཕཊ། ཨོཾ་བཛྲ་པུཥྤེ་ཨཱཿཧཱུྃ། དེ་བཞིན་དུ། ཨོཾ་བཛྲ་ཤབྡ་ཨཱཿཧཱུྃ། བར་ཨོཾ་བཛྲ་ཨུད་ཕ་ལ་ཡ་ཧཱུྃ་ཕཊ། ཨོཾ་བཛྲ་བིཏྤུ་ར་ཡ་ཧཱུྃ་ཕཊ། ཅེས་བརྗོད་ལ་སྤྲོ་ན་རྔ་བྱིན་རླབས་བྱ། དེ་ནས་སྐྱབས་འགྲོ་བཞི་སྐོར་ཚིག་ལྷུག་མ་དང་། སངས་རྒྱས་ཆོས་དང་དགེ་འདུན་ལ། །རྟག་ཏུ་བདག་ནི་སྐྱབས་སུ་མཆི། །རྣལ་འབྱོར་སྔགས་བདག་ཧེ་རུ་ཀ །འཁོར་ལོར་བཞུགས་པའི་བདག་ཉིད་ཅན། །དེ་རྣམས་ལ་ཡང་སྐྱབས་སུ་མཆི། །དཀྱིལ་འཁོར་བདག་པོར་གྱུར་པ་ཡི། །བྱང་ཆུབ་སེམས་ཀྱི་དངོས་པོ་ནི། །ཁྱད་པར་དུ་ཡང་སློབ་དཔོན་ལ། །རྟག་ཏུ་བདག་ནི་སྐྱབས་སུ་མཆི། །ལན་ཉེར་གཅིག་གམ་བདུན་སོགས་བརྗོད། དེ་ནས། སེམས་ཅན་བདེ་དང་ལྡན་གྱུར་ཅིག་ནས་བྷཉྫ་ར་་ཧཱུྃ་ཕཊ། ཀྱིས་མཚམས་གཅོད་པའི་བར་བཏང་། བརྡ་སྒོ་ཕྱག་རྟགས་གདབ་པ་གསུམ་དབང་དང་སྒྲུབ་པའི་སྐབས་ལས་འདིར་མི་དགོས། དམ་བཅའ་བ། བླ་མ་ཡི་དམ་སོགས་ནས། བཤགས་པའི་སྐབས། ཡེ་ཤེས་སྐུ་མཆོག་ངེས་པར་སྦྱར་ཞིང་། བྱིན་འབེབས་ཀྱང་གྲུབ་ན་ཟུར་གསལ་རྒྱས་པའི་མཚམས་སུ། ཧཱུྃ། འཕགས་མཆོག་ཐུགས་རྗེའི་མན་ཆད་གཞུང་ལྟར་དང་། བྱིན་རླབ་རྣམས་རྫོགས་ཀྱི་བར་བཏང་། གཉིས་པ་ནི། བདག་དང་མདུན་བསྐྱེད་གཏོར་མའི་དཀྱིལ་འཁོར་དབྱེར་མེད་དུ་བསྒོམས་ལ། ཧཱུྃ། རྡོ་རྗེ་ཁྲོས་
པས་ཞེ་སྡང་གཅོད། ཅེས་ཏིང་ངེ་འཛིན་གསུམ་ནས། ཀེ༚་ལས་ཀེང་རུས་བརྩེགས་པའི་རི་རབ། ཅེས་པའི་བར་གཞུང་ལྟར་ལ། ཨེ་ཏྲི་ཀོ་ནཾ་ཛྭ་ལ་བཛྲ་པྲཱ་ཀཱ་ར་ནི་བརྟྟ་མཎྜལ། བྷྲཱུྃ་ད་ཤ་ཨ་ར་ཙཀྲ་མཎྜལ། རི་རབ་ཀྱི་སྟེང་དུ་གནམ་ལྕགས་ཀྱི་འཁོར་ལོ་རྩིབས་བཅུ་པ་ཁོག་པ་སྟོང་པ་ཡངས་ཤིང་རྒྱ་ཆེ་བ། མི་མངོན་པར་འཁོར་ཞིང་མེ་རབ་ཏུ་འབར་བས་བརྟན་ཅིང་བརྗིད་པ། རྩིབས་ཀྱི་རྩེ་མོ་རྣོ་དབལ་དང་ལྡན་པས་དགྲ་བགེགས། ས་ལུགས་གཞུང་དངོས་གསེར་མདོག་མཛད། མཚན། ཕྱེ་མར་བརླག་པ། དེའི་དབུས་སུ་གྲུ་གསུམ་མཐིང་ནག་མུ་ཁྱུད་ལ་རྡོ་རྗེའི་རྭ་བས་སྤྲས་པ། འཁོར་ལོའི་ཕྱི་རོལ་དུ་དུར་ཁྲོད་ཆེན་པོ་བརྒྱད་ལ་ཕྱོགས་སྐྱོང་ཞིང་སྐྱོང་ཤིང་མེ་ཆུ་བོ་ཀླུ་དང་མཆོད་རྟེན་གྲུབ་པའི་དབང་པོ་བརྒྱད་བརྒྱད་དང་ལྡན་ཞིང་མི་བཟད་པའི་བཀོད་པ་འཇིགས་སུ་རུང་བ་དང་བཅས་པ། གྲུ་གསུམ་གྱི་དབུས་སུ། པདྨ་མཎྜལ་ཧཱུྃ། སོགས་ནས། རང་སེམས་ཧཱུྃ་ཡིག་དེ་དབུས་ཀྱི་གདན་གྱི་སྟེང་དུ། ཞེས་དང་། ཕྱོགས་བཅུ་ཁྲོ་དཀྱིལ་སྐབས། འཁོར་ལོའི་རྩིབས་བཅུ་པོར་པད་ཉི་ལ་བཞག །ཅེས་བསྒྱུར། ཕྱག་ན་ཕུར་བུ་ཐོད་ཁྲག་འཛིན། ཞེས་པའི་མཚམས་སུ། འབར་བ་འཁོར་ལོའི་ཕྱི་རོལ་དུ། ཨོཾ་བཛྲ་ཀཱི་ལི་སོགས་ནས་གཞུང་མཐར་ཆགས་སུ་བཏང་སྟེ། འཛབ་ཁང་དབྱེ་བའི་སྐབས། རང་རང་ལས་ལ༴ ཚུར་བྱོན༴ །ཐུགས་རྗེས་བརྩེར་དགོངས་
དབང་དང་དངོས་གྲུབ་སྩོལ། ཞེས་བརྗོད་པའི་ཚེ། བདག་བསྐྱེད་ལས་བརྟེན་དང་བརྟེན་པར་བཅས་པའི་དཀྱིལ་འཁོར་པ་མར་མེ་གཅིག་ལས་གཏིས་ཆད་ཚུལ་དུ་འཕྲོས། མདུན་གྱི་གཏོར་མ་འདིར་དཀྱིལ་འཁོར་གྱི་གོ་སར་བདག་བསྐྱེད་དང་འདབ་འབྱར་ཙམ་དུ་བཞུགས་པར་མོས། ཧཱུྃ་བཛྲ་ཛྙཱ་ན་ཀཱི་ལི་ཀཱི་ལཱ་ཡ༔ ཞེས་བརྗོད་པས། རང་གི་སྙིང་ཁའི་ཡེ་ཤེས་སེམས་དཔའ་ལས་དེ་འདྲ་བ་ཡུལ་མེད་པ་གཅིག་མདུན་དུ་ཕྱེ་ནས་རང་ལ་ཞལ་ཕྱོགས་པར་བཞུགས། ཛྙཱ་ན་སཏྭ་ཨེ་ཏྲི་ཀོ་ནཱ་བི་བ་ནཱ༔ པཱཾ་པདྨ་མཎྜལ༔ མཱ་སུརྻ་མཎྜལ༔ ཨཱ་ཙཎྡྲ་མཎྜལཿ ཧཱུྃ་བཛྲ་ཀཱི་ལི་ཀཱི་ལ་ཡ་སརྦ་བིགྷྣན་བནྡྷ་ཧཱུྃ་ཕཊཿ ཅེས་བརྗོད་པས། རང་གི་སྙིང་ཁའི་གྲུ་གསུམ་མཐིང་ནག་གི་དབུས་སུ་པདྨ་ཉི་ཟླའི་གདན་ལ་ཡེ་ཤེས་སེམས་དཔའ་རང་འདྲ་བ་ཡུམ་མེད་པའི་ཐུགས་ཀར་ཉི་མའི་དཀྱིལ་འཁོར་ལ་རྡོ་རྗེ་ནས་འབྲས་ཙམ་གྱི་ལྟེ་བར་ཧཱུྃ་སྔོན་པོ་ཡུངས་འབྲུ་ཙམ་གྱི་མཐར། ཀཱི་ལ་ཡའི་སྔགས་ཁ་དོག་སྔོན་པོ་སྐྲ་ཤད་ཀྱིས་བྲིས་པ་ལྟ་བུ་གཡས་སྐོར་དུ་བསམས་ནས། བཅོམ་ལྡན་ཡབ་ཡུམ་སོགས་ཀྱིས་གསོལ་བ་བཏབ་ལ་ཀཱི་ལ་ཡ་བཟླས་པའི་ཚེ། རང་གི་སྙིང་གའི་ཏིང་ངེ་འཛིན་སེམས་དཔའ་ལས་སྔགས་ཕྲེང་ཁ་དོག་སྔོན་པོ་འོད་ཟེར་དམར་པོ་འཕྲོ་བ་ལྕགས་སྒྲོག་སྦྲེལ་བ་ལྟ་བུ་རྡོ་རྗེའི་དབུས་རྭ་ནས་བྱུང་། ཡེ་ཤེས་སེམས་དཔའ་དང་རང་གི་སྣ་བུག་གཡས་ནས་ཕྱིར་འཐོན། མདུན་གྱི་ཡེ་ཤེས་སེམས་དཔའི་སྣ་བུ་གཡོན་ནས་ཞུགས། དེའི་ཐུགས་ཀའི་ཧཱུྃ་ལ་ཐིམ། ཡང་དེ་ལས་སྔགས་ཕྲེང་བྱུང་། མདུན་གྱི་ཡེ་ཤེས་སེམས་དཔའི་ཤངས་བུག་གཡས་ནས་འཐོན།
རང་གི་སྣ་བུག་གཡོན་དང་ཡེ་ཤེས་སེམས་དཔའི་ཤངས་བུག་གཡོན་ན་བཞུགས། རྡོ་རྗེའི་དབུས་རྭ་ནས་སོང་། རང་གི་སྙིང་ཁའི་ཧཱུྃཿལ་ཐིམ་པར་བསམ་ཞིང་། སྔགས་ཕྲེང་ཕྱིར་འཕྲོ་བའི་དུས་དེ་ལས་རྡོ་རྗེ་གཞོན་ནུའི་སྐུ་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། བགེགས་དང་བར་ཆད་ཐམས་ཅད་ཞི་བར་བྱས། སེམས་ཅན་ཐམས་ཅད་ཡི་དམ་གྱི་ལྷར་གྱུར། སྔགས་ཕྲེང་ནང་དུ་འོང་དུས་སངས་རྒྱས་བྱང་སེམས་བླ་མ་ཡི་དམ་ཐམས་ཅད་ཀྱི་བྱིན་གྱིས་བརླབས། རྡོ་རྗེ་གཞོན་ནུའི་སྐུར་བྱས་ནས་རང་ལ་ཐིམ་པས་རྒྱུད་བྱིན་གྱིས་བརླབས། རང་གིས་ཀཱི་ལ་ཡ་བརྗོད་པའི་ཚེ་མདུན་གྱི་སྒྲུབ་པའི་དཀྱིལ་འཁོར། བླ་མ་ཡི་དམ་ནམ་མཁའ་གང་བར་བཞུགས་པ་རྣམས་དང་། སེམས་ཅན་ཐམས་ཅད་ཡི་དམ་གྱི་ལྷར་གྱུར་པ་རྣམས་ཀྱིས་བཟླས་པའི་གྲོགས་མཛད་པས་སྔགས་ཀྱི་སྒྲ་འབྲུག་ལྟར་གྲགས་པར་བསམ། བཟླས་འཕྲོ་འཇོག་པ་ན་ཡུམ་གྱི་སྔགས། ཨོཾ་དཱིཔྟ་ཙཀྲ་ཧ་ན་ཧ་ན་ཧཱུྃ་ཕཊ། ཅེས་དང་། ཁྲོ་བཅུའི་སྔགས། ཨོཾ་བཛྲ་ཀྲོ་དྷ་ཧཱུྃ་ཀ་ར་ཧཱུྃ་གརྫ་གརྫ་ཧཱུྃ། ཕཊ། ཨོཾ་བཛྲ་ཀྲོ་དྷ་བི་ཛ་ཡ་ཧཱུྃ་ཧ་ན་ཧ་ན་ཧཱུྃ་ཕཊ། ཨོཾ་བཛྲ་ཀྲོ་དྷ་ནི་ལ་དཎྜ་ཧཱུྃ་ད་ཧ་ད་ཧ་ཧཱུྃ་ཕཊ། ཨོཾ་བཛྲ་ཀྲོ་དྷ་ཡ་མཱནྟ་ཀ་ཧཱུྃ་པ་ཙ་པ་ཙ་ཧཱུྃ་ཕཊ། ཨོཾ་བཛྲ་ཀྲོ་དྷ་ཨཱརྻ་ཨ་ཙ་ལ་ཧཱུྃ་བྷནྡྷ་བྷནྡྷ་ཧཱུྃ་ཕཊ། ཨོཾ་བཛྲ་ཀྲོ་དྷ་ཧ་ཡ་གྷྲི་བ་ཧཱུྃ་ཧུ་ལུ་ཧུ་ལུ་ཧཱུྃ་ཕཊ། ཨོཾ་བཛྲ་ཀྲོ་དྷ་ཨ་པ་ར་ཛཱི་ཏ་ཧཱུྃ་ཏིཥྛ་ཏིཥྛ་ཧཱུྃ་ཕཊ། ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུྃ་ཚིནྡྷ་ཚིནྡྷ་ཧཱུྃ་ཕཊ། ཨོཾ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུྃ་བིནྡྷ་བིནྡྷ་ཧཱུྃ་
ཕཊ། ཨོཾ་བཛྲ་ཀྲོ་དྷ་མ་ཧཱ་བ་ལ་ཧཱུྃ་སྥོ་ཊ་སྥོ་ཊ་ཧཱུྃ་ཕཊ། ཅེས་དང་། སྒོ་མ་བཞིའི་སྔགས། ཨོཾ་བཛྲ་ཀཱི་ལི་ཀཱི་ལ་ཡ་བི་ད་ཡ་བི༚་བི༚་ཧཱུྃ་ཕཊ། ཨོཾ་བཛྲ་ཀི་ལི་ཀི་ལ་ཡ་ན་མ་ས་མནྟ་ཧྲི༚་ཧྲི༚་ཧཱུྃ་ཕཊ། ཨོཾ་བཛྲ་ཀཱི་ལི་ཀཱི་ལ་ཡ་སུ་རུ་སུ་རུ་པྲ་སུ་རུ་ཧཱུྃ་ཕཊ། ཨོཾ་བཛྲ་ཀཱི་ལི་ཀཱི་ལ་ཡ་མཱ་ར་ཡ་མཱ་ར་ཡ་ཧཱུྃ་ཕཊ། ཅེས་དང་། དམ་ཅན་ལ། མ་ཐ་མ་ཐ་བཛྲ། ཛྭ་ལ་ཛྭ་ལ་བཛྲ། སུ་རུ་སུ་རུ་བཛྲ། མུ་རུ་མུ་རུ་བཛྲ། ཧཱུྃ་མ་མ་ཝཱ་བྷྱཾ་ཀ་རི་ཧཱུྃ། མ་ཏ་ང་ཉ་ཀ་ར། ཨི་ནན་ད་དྷི། མ་མ་ཤཱི་གྷྲཾ་ཀརྨ་ཀ་ར་ཡེ། ཀ་ཏ་ང་ཀ་ཡེ། ཛ་ཡ་བི་ཛ་ཡེ། ཨ་ཛི་ཏེ། ཨ་པ་ར་ཛི་ཏི། མ་མ་ཤཱི་གྷྲཾ་ཀརྨ་ཀ་ར་ཡེ། མ་ར་སེ་ནཱི་པྲ་མརྡྷ་ན་ཧཱུྃ། ཞེས་པ་རྣམས་ཅི་རིགས་པ་བཟླས་པའི་མཐར། བཞི་སྙིང་གཅིག་དྲིལ་ནི། མ་རཀྨོ། ཡཀྨོ། ཀཱ་ལ་རུ་པ། སྙིང་རྩ་ལ་ཡམ་ཡམ། སྲོག་རྩ་ལ་ཡམ་ཡམ། སྙིང་ལ་ཁྲིལ་ཁྲིལ། སྲོག་ལ་ཆུམ་ཆུམ། ཙིཏྟ་སྲོག་ལ་ཏུཾ་ཏུཾ། ཐུཾ་རིལ་རིལ། སྙིང་ཁྲག་སྲོག་ལ་ཤན་ཤན། སྙིང་ཚག་ཚག །འུར་འུར། ཤིག་ཤིག །གུལ་གུལ། ཉག་ཉག །སོད་སོད། དྷ་ཏི་མ་མ་ཤྲཱི་གྷྲཾ། ཀརྨ་ཀ་ར་མ་ར་སེ་ན་པྲ་མཱརྡྷ་ནི་ཧཱུྃ་ཕཊ། ཅེས་དང་། ཨོཾ་བྷ་ཡ་ནཱ་ཤ་ནི། ཏྲ་ས་ནི། སརྦ་མཱ་ར་པྲ་ཏྱཾ་གི་ར། བི་ནཱ་ཤཱ་ཡ། ཡེ་ཀེ་ཙིཏྟ། དུཥྚཾ་སཏྭ་ས་ད་ཀི། མ་མ་བི་རཱུ་པ། ཀུྷནྟི་ཏ་ནི། སརྦ་མཱ་ར་ཏྱཱཾ་ཀ་རི་ི་པ་ཏ་ཏུ་ཧཱུྃ་ཕཊ་སྭཱ་ཧཱ།
ཞེས་པ་ཅི་ནུས་བཟླས་པའི་མཐར་ཐལ་མོ་སྦྱར་ལ། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ༴ ཆོས་ཀྱི་བཀའ༴ དགེ་འདུན༴བཅོམ་ལྡན་འདས་རྡོ་རྗེ་གཞོན་ནུ་ཡུམ་ཆེན་འཁོར་ལོ་རྒྱས་འདེབས། སྤྲུལ་པ་ཁྲོ་བཅུ་ཡབ་ཡུམ། ཁྲ་ཐབས་ཉི་ཤུ། སྒོ་མ་བཞི། སྲས་མཆོག་ཕུར་བུ་རིགས་ལྔ། དམ་ཅན་བཀའ་སྲུང་བཅུ་གཉིས་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱིས་བརླབས་ཀྱིས། བདག་ཅག་གི་དཔལ་ལྡན་བླ་མ་དམ་པ་རྣམས་དང་། བདག་ཅག་འཁོར་དང་བཅས་པ་རྣམས་ལ་སྡང་བའི་སེམས་དང་ལྡན་པ་རྣམས་དང་། གདུག་པའི་སེམས་དང་ལྡན་པ་རྣམས་དང་། དྲག་ཤུལ་གྱི་སེམས་དང་ལྡན་པ་རྣམས་དང་། བསམ་པ་དང་སྦྱོར་བ་ངན་པར་བྱེད་པའི་དགྲ་བགེགས་ཐམས་ཅད་ཀྱི་བསམ་སྦྱོར་ངན་པ་ཐམས་ཅད་ཞི་བར་གྱུར་ཅིག །གལ་ཏེ་ཞི་བར་མ་གྱུར་ན། དེའི་ཚེ་དེ་དག་ཐམས་ཅད་ཀྱི་ལུས་བཅིང་བར་བགྱིའོ། །ངག་བཅིང་བར་བགྱིའོ། །ཡིད་བཅིང་བར་བགྱིའོ། །མཐུ་བརླག་པར་གྱུར་ཅིག །རྫུ་འཕྲུལ་བརླག་པར་གྱུར་ཅིག །སྟོབས་བརླག་པར་གྱུར་ཅིག །དེས་བཟླས་པའི་སྔགས་ཀྱིས་དེ་ཉིད་བརླག་པར་གྱུར་ཅིག །དེས་སྒྲུབ་པའི་ལྷ་འདྲེས་དེ་
ཉིད་ཀྱི་ཤ་ཟ་བར་གྱུར་ཅིག །ཁྲོ་བོ་འབར་བའི་ཚོགས་རྣམས་ཀྱིས། །དགྲ་བགེགས་རྣམས་ནི་ཐམས་ཅད་ཀྱི། །ལུས་ངག་ཐལ་བ་རྡུལ་དུ་རློག །རྣམ་ཤེས་ཆོས་ཀྱི་དབྱིངས་སུ་སྒྲོལ། །ཨོཾ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་ཐར་རྡེབ་མཐར། བགྲང་ཕྲེང་ཐལ་སྦྱར་བར་ཁའི་ཐད་དུ་བཟུང་སྟེ། བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་སྒོ་ནས་བྱིན་གྱིས་བརླབ་ཏུ་གསོལ། མྱུར་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་དཔལ་ཆེན་རྡོ་རྗེ་གཞོན་ནུའི་གོ་འཕང་ཚེ་འདི་ཉིད་ལ་ཐོབ་པར་བྱིན་གྱིས་བརླབ་ཏུ་གསོལ། བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་བགེགས་དང་བར་དུ་གཅོད་པ་ཐམས་ཅད་ཉེ་བར་ཞི་བ་དང་། ཚེ་དང་བསོད་ནམས་དཔལ་དང་འབྱོར་པ་ཐམས་ཅད་འཕེལ་ཞིང་རྒྱས་ནས། བྱམས་པ་དང་སྙིང་རྗེ་བྱང་ཆུབ་ཀྱི་སེམས་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། མདུན་གྱི་ཡེ་ཤེས་སེམས་དཔའ་འོད་དུ་ཞུ་ནས་རང་ལ་ཐིམ་པས་རང་ཉིད་བཀྲག་མདངས་གཟི་བརྗིད་ནུས་མཐུ་ཕུན་སུམ་ཚོགས་པར་གྱུར། ལྷ་ཚོགས་འཁོར་བཅས་མ་ལུས་ཀུན། །སྔོན་གྱི་ཐུགས་དམ་རྗེས་དགོངས་ལ། །གདུག་པའི་དགྲ་བགེགས་བསྒྲལ་བ་དང་། །ཀཱི་ལ་ཡ་ཡི་དངོས་གྲུབ་སྩོལ། ཞེས་པའི་མཐར་བརྒྱུད་འདེབས་བྱ།
སྲུང་ཟློག་བསད་པའི་དམིགས་གནད་དང་གདབ་པའི་དམིགས་གནད་སྦྱོར་ཚུལ་གབ་ཡིག་ལས་ཤེས་པར་བྱའོ། །དེ་ནས་ས་ལུགས་དངོས་ལ་རིག་འཛིན་བསྐུལ་བ་མཛད་པ་ཡིན་ཀྱང་། རྗེ་བཙུན་གྱིས་བསྙེན་པའི་གོང་དུ་བསྟན་པས་དེ་ལྟ་ན་འདིར་མི་དགོས། དེ་ནས་རྒྱས་པར་སྤྲོ་ན་སྐོང་གསོའི་ཚོགས་ཁྲིད་ཕྲིན་ལས་རྣམ་རོལ་ལ་འཇུག་སྟེ། བདག་བསྐྱེད་མི་དགོས་པས་ཡི་དམ་གཏོར་འབུལ་ནས་རྒྱུན་བསྐུལ་ཡན་དང་། ལོངས་ཁྱབ་མེད་པ་སོགས་ལ་གཏོར་ཆོག་རྒྱུན་ཁྱེར་ཉིད་བྱ་ཞིང་། དེའི་སྐབས་སུ། དཔལ་ལྡན་མགོན་པོ་མཱ་ཧཱ་ཀཱ་ལཱ་ཡ། སོགས་དང་། ལས་ཀྱི་མགོན་པོ་ཕོ་ཉ་འཁོར་བཅས་རྣམས། སོགས་སྤྱི་བསྟབ་གཉིས་ཀ་བཞག །རྒྱས་བསྡུས་གང་བྱེད་ཀྱང་། སྡེ་དྲུག་སྲུང་མ། གུར་ལྕམ་དྲལ། རྣམ་སྲས། ཞལ་བཞི་པ། ཏྲཀྴ་བཅས་སོང་བའི་མཚམས་སུ། ཐུར་གསལ་དཀར་བདུད་ལྕམ་དྲལ། ཕུར་སྲུང་གཏོར་འབུལ། དེ་ནས་མཁའ་འགྲོ་སྤྱི་གཏོར། ཡུལ་གྲོང་འབྱུང་གཏོར་རྡོ་རྗེའི་གླུ་ཡན་བྱ། ཚོགས་རྫས་བསང་སྦྱང་བ་ནས། བར་པ་བཤགས་པ་ཡན་གྲུབ་པ་དང་། ལིངྒ་རྣམས་གུ་གུལ་གྱིས་བདུག་ལ་སློབ་དཔོན་གྱི་མདུན་ཏུ་བཞག །བསང་སྦྱང་། སྟོང་པའི་ངང་ལས་ཨེ་ལས་ལྕགས་བསྲེགས་ཀྱི་ཁང་སྦྲོམ་གྲུ་གསུམ་བང་རིམ་དགུ་པ། ཁ་ཁྱེར་དོག་ཅིང་གཏིང་ཟབ་པ། འོག་ན་འདོད་ཆགས་ཀྱི་ཁྲག་མཚོ་ཁོལ་བ། ལོགས་ལ་ཞེ་སྡང་གི་མེ་རླུང་འཚུབ་པ། སྟེང་ན་གཏི་མུག་གི་མུན་པ་གཏིབ་པ། མཚོན་ཆའི་ཆར་འབེབས་ཤིང་ནད་དང་དུག་
གི་རླངས་པ་འཕྱོ་བ། ཐ་ན་དང་ལྟས་ངན་གྱི་ཆོ་འཕྲུལ་སྣ་ཚོགས་མི་བཟད་པར་འཁྲུགས་པ། ལས་བྱེད་གཤིན་རྗེའི་དམག་ཚོགས་སེངྒེ་ལྟར་རྔམས་པ། སྟག་ལྟར་འཕྱོ་བ་སྲིན་པོ་ལྟར་ཁྲོས་པ། ཤ་ཟ་ལྟར་རྒྱུག་པ། རྒྱོབ་རྒྱོབ་དང་སོད་སོད་ཀྱི་སྒྲ་འབྲུག་ལྟར་སྒྲོགས་པས་གང་བ། སྲིད་པ་ལས་ཀྱི་བཙོན་ཁང་དྲག་པོ་དེའི་ནང་དུ་ནྀྲ་དུད་ཁ་ཡོངས་སུ་གྱུར་པ་ལས་དགྲ་བོ་དེ་ཉིད་ལུས་གཅེར་བུ་རིད་པ། མདོག་ནག་ཅིང་དྲན་པ་ཉམས་པ། མྱ་ངན་གྱི་ཕྱག་རྒྱ་ཅན། བུ་ག་དགུ་ནས་རྣག་ཁྲག་འཛག་པ། གནོད་བྱེད་ཐམས་ཅད་འདུས་པའི་ངོ་བོར་གྱུར། ཧོམ་བསྐྱེད་འདི་ཕྱག་བཞེས་དཀྱུས་སུ་མི་འབྱུང་ཡང་ཀུན་དགའ་བློ་གྲོས་ཞབས་ཀྱིས་དྲག་པོའི་སྦྱིན་སྲེག་སྐབས་སུ་གསུངས་པ་ལྟར་ངེས་པར་འབྲེལ་བར་བསམ་ནས་བྲིས་པའོ། །དེ་ནས་འགུགས་པའི་ཕྱག་རྒྱ་བྱས་ལ། ཨེ་རཾ་ཨེ་རཾ། ཛྭ་ལ་རཾ་ཛྭ་ལ་རཾ། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ༴ ཆོས་ཀྱི་བཀའ༴ དགེ་འདུན་གྱི༴ འཇམ་དཔལ་སྐུ༴ །པདྨ་གསུང་ཡང་དག་ཐུགས༴ བདུད་རྩི་ཡོན་ཏན༴ ཕྲིན་ལས་ཕུར་བུ༴ མ་མོ་རྦོད་གཏོང་༴ དམོད་པ་དྲག་སྔགས༴ འཇིག་རྟེན་མཆོད་བསྟོད༴ འདུས་པ་མདོ༴ སྒྱུ་འཕྲུལ་རྒྱན༴ འཆི་མེད་ཚེ༴ ལྷུན་
གྲུབ་རིག་འཛིན༴ སྙིང་པོ་ཕྱག་རྒྱ༴ གསང་སྔགས༴ རིག་སྔགས༴ གཟུངས་སྔགས་ཀྱི་ལྷ་ཚོགས་རྣམས་ཀྱི་བཀའ་བདེན་པ་དང་། བཀའ་སྡོད་ཆོས་སྐྱོང་མ་མོ་མཁའ་འགྲོ། དམ་ཅན་རྒྱ་མཚོ། རིག་འཛིན་རྣལ་འབྱོར། ཆོས་ཉིད་རྣམ་པར་དག་པའི་བཀའ་བདེན་པ་དང་། བདེན་པ་ཡང་དག་པ་དང་། བདེན་པ་ཆེན་པོའི་བྱིན་རླབས་ཀྱིས། སྤྱིར་བསྟན་པའི་སྤྱི་དགྲ། བླ་མའི་སྐུ་དགྲ། དམ་ཚིག་ཅན་གྱི་སྡང་དགྲ། སེམས་ཅན་ཡོངས་ལ་གནོད་ཅིང་འཚེ་བ་དང་ཁྱད་པར་དུ་ཡང་རྣལ་འབྱོར་པ་བདག་ཅག་དཔོན་སློབ་ཡོན་མཆོད་གྲོགས་མཆེད་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་དགྲ་བགེགས་ལོག་པར་འདྲེན་པའི་ཚོགས་ཐམས་ཅད། བཛྲ་ཨཾ་ཀུ་ཤ་ཛཿབཛྲ་པཱ་ཤ་ཧཱུྃ། བཛྲ་སྥོ་ཊ་བཾ། བཛྲ་ཨཱ་བེ་ཤ་ཡ་ཨཱཿ སརྦ་ཤ་ཏྲཱུྃ་ནཱ་ཤ་ཡ། ཛཾ་བྷ་ཡ། སྟཾ་བྷ་ཡ། མོ་ཧ་ཡ། བནྡྷ་ཡ། མཱ་རཱ་ཡ། ཞེས་འགུགས་གཞུག་ལན་གསུམ་བྱ། དགྲ་བགེགས་རྣམས་ཀྱི་སྟེང་དུ་སྣ་ཚོགས་རྡོ་རྗེ་དང་། རི་རབ་བརྗིད་པས་མནན་ཏེ་ཐར་པའི་སྐབས་མེད་པར་གྱུར། ཞེས་མོས་ལ་ལིངྒའི་རྐེ་ལ་བཏགས་པའི་ཕུར་པ་ཟློག་གཏོར་ལ་བཙུགས་ཏེ་བཞག་ལ། རང་གི་སྙིང་ཁ་ནས་འོད་འཕྲོས་པས་ཡི་དམ་ཆོས་སྐྱོང་རྣམས་ཀྱི་རྒྱུད་བསྐུལ་ནས། སོ་སོའི་ཐུགས་ཀ་ནས་ཀྱང་འོད་ཟེར་རབ་ཏུ་མང་པོ་འཕྲོས་ཏེ། གཏོར་མ་དང་ཐུན་རྫས་རྣམས་ལ་ཕོག་
པ་དང་། དགྲ་བགེགས་ཚར་གཅོད་པའི་ནུས་པ་དང་ལྡན་པར་བསམས་ལ། ཧཱུྃ་འཇམ་དཔལ་སྐུ་ཡི་ལྷ་ཚོགས་ཀྱིས། །ཟོར་ཆེན་རྫས་ཀྱི་མཐུ་བསྐྱེད་ལ། །དགྲ་བགེགས་སྲོག་ལ་མངའ་མཛོད་ཅིག །དེ་བཞིན་དུ་འོག་མ་རྣམས་ལའང་སྦྱར་ལ། །པདྨ་གསུང་གི་ལྷ་ཚོགས་ཀྱིས། །ཟོར༴ །དགྲ་བགེགས༴ །ཡང་དག་ཐུགས་ཀྱི་ལྷ་ཚོགས་ཀྱིས། །ཟོར༴ །དགྲ་བགེགས༴ །བདུད་རྩི་ཡོན་ཏན་ལྷ་ཚོགས་ཀྱིས༴ །ཟོར༴ །དགྲ་བགེགས༴ །འཕྲིན་ལས་ཕུར་བུའི་ལྷ་ཚོགས་ཀྱིས། །ཟོར༴ །དགྲ་བགེགས༴ །བཅོམ་ལྡན་རྡོ་རྗེ་གཞོན་ནུ་ཡིས། །ཟོར༴ །དགྲ་བགེགས༴ །ཡུམ་ཆེན་འཁོར་ལོ་རྒྱས་འདེབས་ཀྱིས། །ཟོར༴ །དགྲ༴ །འཇིགས་བྱེད་ཁྲོ་བོ་བཅུ་པོ་ཡིས། །ཟོར༴ །དགྲ༴ །རྡོ་རྗེ་ཁྲོ་མོ་བཅུ་རྣམས་ཀྱིས། །ཟོར༴ །དགྲ༴ །སྤྲུལ་པ་ཁྲ་ཐབས་ཉི་ཤུ་ཡིས། །ཟོར༴ །དགྲ༴ །ཡེ་ཤེས་སྒོ་མ་བཞི་པོ་ཡིས། །ཟོར༴ །དགྲ༴ །སྲས་མཆོག་ཕུར་བུ་རིགས་ལྔ་ཡིས། །ཟོར༴ །དགྲ༴ །དམ་ཅན་ཤྭ་ན་བཅུ་གཉིས་ཀྱིས། །ཟོར༴ །དགྲ༴ །བསེ་ཡི་སྐྱེས་བུ་མཆེད་བཞི་ཡིས། །ཟོར༴ །དགྲ༴ །ཆོས་སྐྱོང་སྲུང་མའི་ཚོགས་བཅས་ཀྱིས། །ཟོར༴ །དགྲ༴ །རིག་འཛིན་རྩལ་ཅན་འཁོར་བཅས་ཀྱིས། །ཟོར་ཆེན་རྫས་ལ་མཐུ་བསྐྱེད་ལ། །དགྲ་བགེགས་སྲོག་ལ་མངའ་མཛོད་ཅིག །བདག་
གི་གཏོར་ཟོར་གཉན་པོ་འདི། །རིག་འཛིན་བླ་མས་བྱིན་གྱིས་བརླབས། །ཡི་དམ་མཁའ་འགྲོས་ནུས་པ་བསྐྱེད། །དམ་ཅན་སྲུང་མས་དྲག་པོར་སྒྲུབ། །སྡང་བྱེད་དགྲ་ལ་འཕེན་པའི་ཟོར། །གནོད་བྱེད་བགེགས་ལ་འཕེན་པའི་ཟོར། །གདུག་ཅན་ཐལ་བར་བརླག་པའི་ཟོར། །དམ་ཉམས་རྩད་ནས་གཅོད་པའི་ཟོར། །དགྲ་བོའི་རིགས་བརྒྱུད་གཅོད་པའི་ཟོར། །སྡེ་བརྒྱད་དམག་དཔུང་བསྐྱེད་པའི་ཟོར། །ཟོར་ཆེན་སོགས། །དམ་ཅན་བཀའ་སྡོད་མཐུ་མ་ཆུང་། །ཕོ་ཉ་ལས་མཁན་རྩལ་མ་ཞན། བྷྱོཿབྷྱོཿསྡང་བའི་དགྲ་ལ་བྷྱོཿ བྷྱོཿབྷྱོཿགནོད་པའི་བགེགས་ལ་བྷྱོཿ ཞེས་བསྐུལ་ནས་གཙོ་བོའི་སྔགས་དང་ཁྲོ་བོ་བཅུ་སྒོ་མ་བཞི། དམ་ཅན་གཞི་སྙིང་གཅིག་ཏུ་དྲིལ་བའི་སྔགས་དང་། ཐུན་སྔགས་འདི་ཡང་བཟླས་ཏེ། སུ་མ་ཏྲི་ཀ་རཀྴ་བྷྱོཿཐིབ་ཐིབ་ཙཀྲ་བྷྱོཿ སྙིང་ཁ་རག་དུན་ཏྲི་བྷྱོཿརྦད་རྦད་ཏྲི་ན་ཤིག་ཤིག །སེ་ན་གཏུབས་གཏུབས། ཁ་རཀ་རྦད་རྦད་དུམ་བུ་བྷྱོཿ བཛྲ་ཙིཏྟ་རཀྴ་ཙ་ཏྲི་ཡ་མཱ་རཱ་ཡ་རྦད་བྷྱོ་ཟློག །གནོད་བྱེད་དགྲ་བགེགས་ཐམས་ཅད་མཱ་ར་ཡ་ཧཱུྃ་ཕཊ། ཅེས་པ་རྣམས་ཅི་ལྟར་ནུས་པ་བརྗོད། དེ་ནས་གཏོར་ཆོག་རྒྱས་པ་བྱས་ན། གཏོར་རྫོང་སྔོན་འགྲོ་ལ་བཤགས་ཆུང་མན་ཆད་མཐར་དབྱུང་། གཏོར་ཆོག་བསྡུས་པའི་སྔར་བསྒྱུར་བའི་སྤྱི་བསྟབ་གཉིས་དང་། སྲིད་ཞིའི་དཔལ་འབྱོར་སོགས་ཕྲིན་ལས་བཅོལ་བཀྲ་ཤིས་བཟོད་གསོལ་བསྔོ་སྨོན་བཅས་གྲུབ་མཚམས།
ལས་གཞུང་གི་དངོས་གྲུབ་བླང་བ་མན་ཆད་མཐར་ཆགས་སུ་བཏང་བ་ལས་ཉིན་སྔ་མ་རྣམས་སུ་དངོས་གྲུབ་བླང་བ་ཟུར་གསལ་བསྡུས་པ་དང་བཟོད་གསོལ་མཐར་མདུན་བསྐྱེད་ལ་དམིགས་ཏེ་བརྟན་བཞུགས་སྤྱི་མཐུན་བྱ། འཇིག་རྟེན་པའང་མི་གཤེགས་བདག་བསྐྱེད་དཀྱིལ་འཁོར་རྣམས་རང་ལ་བསྡུ། ཨོཾ་ཤྲཱི་བཛྲ་ཀུ་མ་རཱ་ཀྲོ་དྷ་རཀྴཱ་ཧཱུྃ་ཕཊ། ཅེས་བརྗོད་པས་རང་གཟི་བརྗིད་དང་ལྡན་པར་གྱུར། ཨོཾ་བཛྲ་ཀཱ་བ་ཙི་ཧཱུྃ་ཕཊ། ཅེས་ལུས་ལ་རྡོ་རྗེའི་གོ་གྱོན་པས་བར་ཆད་ཀྱིས་མི་ཚུགས་པར་བསམ། དེ་ནས་རང་བཞིན་སེམས་ཀྱི་ཆོས་ཉིད་ནི། མ་བཅོས་ལྷུག་པར་གནས་པའི་དོན། །རྟག་ཆད་ངོ་བོའི་མཐའ་སྤངས་ཤིང་། །བརྗོད་བྲལ་མུ་བཞི་ལས་འདས་པ། །རྩོལ་མེད་གནས་པའི་ཆོས་ཉིད་དེ། །ངོ་བོ་ཉིད་ཀྱིས་མཚོན་པའོ། །ཨོཾ་ཨ་ཀཱ་སོགས༴ །ཞེས་པས་ཆོས་ཐམས་ཅད་གདོད་མ་ནས་མ་སྐྱེས་པའི་དེ་ཁོ་ན་ཉིད། བདག་མེད་རྟོགས་པའི་ལྟ་བས་རྒྱས་གདབ། བསྔོ་སྨོ་དང་བཀྲ་ཤིས་རྣམས་ཀྱང་གཞུང་ལྟར་བྱ་སྟེ། དངོས་གཞི་ཞག་གྲངས་དུ་བྱེད་ཀྱང་དེ་ཁོ་ན་ལྟར་ཆད་ལྷག་མེད་པ་བྱའོ། །ཉིན་ཐ་མར་བསྒྲལ་མཆོད་ཀྱི་སྔགས་ཚན་དང་པོ་ཡན་སོང་ནས། དངོས་གྲུབ་བར་ཆད་བྱེད་པའི་བགེགས། ནས༴ །ལྷ་ཡང་རུང་སྟེ་བསྒྲལ་བར་བྱ། །ཞེས་པའི་བར་བཞག་ནས། ཁ་ཏྭ་ཁ་ཏཾྭ་སོགས་ལ་འཇུག་སྟེ་ཚོགས་བར་པ་བཤགས་པ་ཡན་ཉིན་སྔ་མ་རྣམས་དང་ཁྱད་པར་མེད། དེ་ནས་གསུམ་པ་རྫས་དྲག་པོའི་ལས་དངོས་བསྟན་པ་ལ་ཡང་གསུམ། སྔོན་འགྲོ་ཡང་འགྲེལ་སོ་དྲུག་བྱ་བ། དངོས་གཞི་གདབ་
པའི་ལས་བྱས་ནས་ལིང་རོ་འབུལ་བ། ཟློག་པ་ཟོར་གྱི་ལས་བསྟན་པའོ། །དང་པོ་ལ་དྲུག །གསེར་སྐྱེམས་གཏོང་བ། ཕུར་ཁ་བསྒྱུར་བ། ལྷ་སྲུང་སྤྱན་དྲངས་ཤིང་དགུག་གཞུག་པ། གསལ་བ་གསུམ་དང་གདེངས་གསུམ་གསལ་བཏབ་སྟེ་ང་རྒྱལ་བསྐྱེད་པ། མཉེས་པའི་དཔང་གཟུག་པ། རྫས་དམོད་མོ་ཏིང་འཛིན་སོགས་དྲུག་བྱའོ། །དང་པོ་ནི། ཞིང་ལྤགས་ཀྱི་ཁར་སྔར་གྱི་འགྲུབ་ཁུང་ལིངྒ་བཅས་བཞག །རང་གི་གཡས་སུ་གུ་གུལ། ཡུངས་དཀར་ནག་སྔོ་དམར་གྱི་ཞགས་པ། དུག་ཁྲག་སྦྱར་བའི་ཐུན། ལྕགས་ཟངས་རྡོ་ཕྱེ་རྣམས་དང་། གཡོན་དུ་གདབ་ཕུར་ཆེ་ཆུང་བཅུ་བདུན། རལ་གྲི། ཐོ་བ། དེ་དག་ལ་ངར་བསྐྱེད་པའི་སྨན་ཕུད་དང་རཀྟ་རྣམས་བཞག །སྒྲུབ་པ་པོ་ཧེ་རུ་ཀའི་ཆས་སུ་ཞུགས་ལ། ཐོག་མར་ཕྱག་ལེན་ལྟར་རིག་འཛིན་རྣམས་བསྐུལ་ཏེ། ཧཱུྃ། །མ་གཡེལ་མ་འཕངས་རིག་འཛིན་ཚོགས། ཞེས་སོགས་ལས་གཞུང་ལྟར་གྱེར། དེ་ནས་གསེར་སྐྱེམས་འབྲུ་གསུམ་གྱིས་བྱིན་གྱིས་བརླབས་ལ། ཧཱུྃ་རྒྱལ་བ་དགོངས་པའི་བརྒྱུད་པ་དང་། །རིག་འཛིན་རིག་པའི་བརྒྱུད་པ་དང་། །སྙན་ནས་བསྙན་བརྒྱུད་བླ་མ་མཆོད། །བཞི་གཉིས་ཞི་བའི་ལྷ་ཚོགས་དང་། །ལྔ་བཅུ་རྩ་བརྒྱད་ཁྲོ་བོའི་ཚོགས། །མ་ལུས་ཕུད་ཀྱིས་མཉེས་གྱུར་ནས། །མི་མངོན་དབྱིངས་ནས་ཐུགས་རྗེ་ཡིས། །ཉེར་དགོངས་བྱིན་རླབས་དཔལ་བསྐྱེད་ལ། །གདུག་པའི་དགྲ་བགེགས་བསྒྲལ་བ་ལ། །ཕྱི་ནང་བར་ཆད་མི་འབྱུང་ཞིང་། །གྲུབ་གཉིས་འཕེལ་བར་མཛད་
མཛད་དུ་གསོལ། །འཇམ་དཔལ་སྐུ་ཡི་ལྷ་ཚོགས་དང་། །པདྨ་གསུང་གི་ལྷ་ཚོགས་དང་། །ཡང་དག་ཐུགས་ཀྱི་ལྷ་ཚོགས་དང་། །བདུད་རྩི་ཡོན་ཏན༴ །འཕྲིན་ལས་ཕུར་བུའི༴ །མ་མོ་རྦོད་གཏོང་༴ །དམོད་པ་དྲག་སྔགས༴ །འཇིག་རྟེན་མཆོད་བསྟོད་ལྷ་ཚོགས་དང་། །རྡོ་རྗེ་ཚེ་ཡི་ལྷ་ཚོགས་དང་། །མདོ་དང་སྒྱུ་འཕྲུལ་ལྷ་ཚོགས་རྣམས། །མི་མངོན་དབྱིངས་ནས་ཐུགས་རྗེ་ཡིས། སོགས་དང་། །བཅོམ་ལྡན་རྡོ་རྗེ་གཞོན་ནུ་དང་། །ཡུམ་ཆེན་འཁོར་ལོ་རྒྱས་འདེབས་མ། །འཇིགས་བྱེད་ཁྲོ་བཅུ་ཡབ་ཡུམ་དང་། །སྤྲུལ་པའི་ཁྲ་ཐབས་ཉི་ཤུ་དང་། །ཡེ་ཤེས་སྒོ་མ་བཞི་པོ་དང་། །སྲས་མཆོག་ཕུར་བུའི་ལྷ་ཚོགས་རྣམས། །མི་མངོན་དབྱིངས་ནས་ཐུགས་རྗེ་ཡིས། སོགས་དང་། །དམ་ཅན་བཀའ་སྲུང་བཅུ་གཉིས་དང་། །གིང་ཆེན་དགེ་བསྙེན་འཁོར་བཅས་མཆོད། །ཕྱི་ནང་མཁའ་འགྲོ་འཁོར་བཅས་དང་། །དབང་ཕྱུག་ཉི་ཤུ་རྩ་བརྒྱད་མཆོད། །ཕོ་ཉ་ཕྲ་མེན་འབར་མ་དང་། །མ་བདུན་སྲིང་བཞི་ལ་སོགས་མཆོད། །བདུད་འདུལ་ནག་མོ་མཆེད་བཞི་དང་། །དཔལ་ལྡན་རེ་མ་ཏི་ལ་སོགས། །མདོར་ན་སུམ་བརྒྱ་དྲུག་ཅུ་རྣམས། །གསེར་སྐྱེམས་གཙང་མ་འདི་བཞེས་ལ། །གདུག་པའི་དགྲ་བགེགས་སོགས་འདྲ། །བསྟན་པ་སྲུང་མཛད་ཀུན་གྱི་གཙོ། །
དཔལ་ལྡན་ནག་པོ་ལྕམ་དྲལ་དང་། །ཞིང་སྐྱོང་དབང་ཕྱུག་གདོང་བཞི་སོགས། །ཆོས་སྐྱོང་སྲུང་མའི་ཚོགས་བཅས་ཀུན། །གསེར་སྐྱེམས་གཙང་མ་འདི༴ །གདུག་པའི་དགྲ་བགེགས་སོགས༴ །ཕྱོགས་བཅུའི་འཇིག་རྟེན་སྐྱོང་རྣམས་དང་། །གནས་བདག་ཀུན་དང་ཡུལ་བདག་ཀུན། །གསེར་སྐྱེམས་གཙང་མས་ཚིམས་བྱས་ནས། །གདུག་པའི་དགྲ་བགེགས་བསྒྲལ་བ་ལ། །བྱེར་དང་འཁུ་ལྡོག་མ་མཛད་པར། །སྟོང་གྲོགས་གཉེན་པོ་ཅི་ནུས་མཛོད། །ས་ཡི་ཕྱོགས་ནི་འདི་ཉིད་ན། །སའམ་མཁའ་ལ་འཁོད་པ་ཡི། །ལྷ་ཀླུ་གནོད་སྦྱིན་དྲི་ཟ་དང་། །འབྱུང་པོ་མང་པོ་གང་འཁོད་པ། །ཐམས་ཅད་ཕུད་ཀྱིས་ཚིམས་བྱས་ནས། །གདུག་པའི་དགྲ་བགེགས་བསྒྲལ་བ་ལ། །རུ་ང་ཕྲག་དོག་མ་མཛད་པར། །སྟོང་གྲོགས་གཉེན་པོ་ཅི་ནུས་མཛོད། །ལྷ་ཡི་ཕྱག་རྒྱ་མི་བཟོད་ཅིང་། །བྱེར་དང་འཁུ་ལྡོག་བྱེད་པ་རྣམས། །གསེར་སྐྱེམས་གཙང་མས་ཚིམས་བྱས་ནས། །ཅི་བདེ་བར་ནི་གཞན་དུ་དེངས། ཞེས་གསེར་སྐྱེམས་རྒྱས་པ་བྱ། དེ་ཙམ་ལོངས་ཁྱབ་མེད་པའམ་མི་སྤྲོ་ན་བསྡུས་པ་ནི། །བླ་མ་རིག་འཛིན་ཚོགས་བཅས་མཆོད། །ཡི་དམ་ཞི་ཁྲོ་རབ་འབྱམས་མཆོད། །ཁྱད་པར་ཕུར་པའི་ལྷ་ཚོགས་མཆོད། །མི་མངོན་དབྱིངས་ནས་ཐུགས་རྗེ་ཡིས། །སོགས༴ །སློབ་དཔོན་པདྨ་འབྱུང་གནས་ཀྱིས། །སྤྱན་སྔར་ཁས་བླངས་དམ་བཅས་ནས། །ཕུར་པའི་སྲུང་
མར་ཞལ་བཞེས་པའི། །དམ་ཅན་རྒྱ་མཚོ་ཕུད་ཀྱིས་མཆོད། །གདུག་པའི་དགྲ་བགེགས་བསྒྲལ་བ་ལ། །ཕྱི་ནང་༴ །གྲུབ་གཉིས༴ །བསྟན་པ་སྲུང་མཛད་ཀུན་གྱི་གཙོ། མན་གོང་བཞིན། གཉིས་པ་ཕུར་ཁ་སྒྱུར་བ་ནི། དབྱངས་རོལ་བཅས། དོ་ནུབ་ཀྱི་ཕུར་ཁ་གཉེན་པོ་འདི། །སྟེང་གི་ལྷ་ལ་མི་སྟོན་ནོ། །ལྷ་གཤེགས་གངས་དཀར་རྩེ་ལ་གཤེགས། །ཕུར་ལམ་གཉེན་པོ་ད་ཕྱེས་ཤིག །དོ་ནུབ༴ །བར་གྱི་བཙན་ལ་མི་སྟོན་ནོ། །བཙན་གཤེགས་བྲག་དམར་ལོགས་ལ་གཤེགས། །ཕུར་ལམ༴ །དོ་ནུབ༴ །འོག་གི་ཀླུ་ལ་མི༴ །ཀླུ་གཤེགས་རྒྱ་མཚོའི་གཏིང་ལ་གཤེགས། །ཕུར་ལམ༴ །དོ་ནུབ༴ །ཡས་ཀྱི་བདུད་གཡོས་གཅིག་ལ་སྟོན། །མས་ཀྱི་སྲི་ལངས་གཅིག་ལ་སྟོན། །ཕ་ཚན་རྒྱ་འདྲེ་ཅན་ལ་སྟོན། །མ་བུའི་བྱུར་འདྲེ་ཅན་ལ་སྟོན། །ཡུལ་མིའི་གདོང་འདྲེ་ཅན་ལ་སྟོན། །སྡང་དགྲ་གནོད་པའི་བགེགས་ལ་སྟོན། །ཕུང་སྲིའི་སྙིང་གི་དཀྱིལ་དུ་སྟོན། །བྱུར་སྲིའི་ཀླད་པའི་དཀྱིལ་དུ་སྟོན། །ཉམས་པའི་སྙིང་གི་དཀྱིལ་དུ་སྟོན། །རྨི་ལམ་ངན་སྡིག་བྱེད་ལ་སྟོན། །གསུམ་པ་ལྷ་སྲུང་སྤྱན་དྲངས་ཤིང་དགུག་གཞུག་བྱ་བ་ནི། འདོད་རྒྱལ་གྱི་ཕྱག་རྒྱ་བཅས་ལ། གོང་སྨོས་ཧོམ་སྐྱེད་དང་འགུགས་གཞུག་ལན་གསུམ་གྱི་མཐར། །འདོད་རྒྱལ་གྱི་ཕྱག་རྒྱ་ལས་མཛུབ་མོ་དགུག་པའི་གདེངས་ཀ་བྱས་ལ། པཉྩ་སྐནྡྷ་
དེ་ཝ་ཨཱ་ཀརྵ་ཡ་ཛཿ དྷཱ་ཏུ་ཨཥྚ་ད་ཤ་དེ་བ་ཨཱ་ཀརྵ་ཡ་ཛཿ དེ་ཧ་ད་ཤ་ཡ་ཏེ་ནན་དེ་ཝ་ཨཱ་ཀརྵ་ཡ་ཛཿ སརྦ་དེ་བ་རཀྵ་ཨ་ཀརྵ་ཡ་ཛཿ ཞེས་བརྗོད་ཅིང་ཚེ་སྲོག་ཡེ་ཤེས་སུ་གྱུར་པའི་དམིགས་པ་སྤྲད། དེ་ནས་རྔ་རོལ་འདུར་དབྱངས་བཅས། ཧཱུྃ་བཅོམ་ལྡན་དཔལ་ཆེན་ཧེ་རུ་ཀ །སྤྲུལ་པ་ཡང་སྤྲུལ་བཀའ་སྡོད་དང་། །ཕོ་ཉ་དམ་ཅན་རྒྱ་མཚོའི་ཚོགས། །འདིར་གཤེགས་བཞུགས་ཤིང་བྱིན་ཕོབ་ལ། །དམ་སྲི་གདུག་པའི་དགྲ་དང་བགེགས། །རྒྱལ་བའི་བཀའ་ལས་འདའ་བྱེད་ཅིང་། །རྣལ་འབྱོར་སྐུ་ལ་བསྔོ་བ་རྣམས། །རྒྱལ་བས་བསྒྲལ་བར་གསུངས་པའི་ཕྱིར། །གནས་པའི་ཡུལ་ནས་ཡུད་ཙམ་གྱིས། །རྟེན་དང་ཕྲོལ་ལ་ཁྲིད་ལ་ཤོག །རྒྱབ་དང་ཕྲོལ་ལ་ཁྲིད་ལ་ཤོག །ས་གཞི་ཡན་ཆོད་ཐོབ་ལ་ཤོག །བདུན་བརྒྱུད་ཚུན་ཆད་ཁུག་ལ་ཤོག །མ་ཐོགས་མྱུར་དུ་ཁུག་ལ་ཤོག །ཨོཾ་བཛྲ་ཨཾ་ཀུ་ཤ་ཛཿཛཿ བཞི་པ་གསལ་བ་གསུམ་དང་གདེང་གསུམ་གསལ་གདབ་ཅིང་ང་རྒྱལ་བསྐྱེད་པ་ནི། ཧཱུྃ་ང་ནི་རྡོ་རྗེ་གཞོན་ནུ་ཡིན། །ཐུགས་ནང་འབར་བའི་སྲོག་ཀྱང་བཞུགས། །ཚིགས་བརྒྱད་སྤྱི་བོ་རྐང་མཐིལ་རྣམས། །ཁྲོ་བོ་ཁྲོ་མོའི་བདག་ཉིད་ཅན། །ཕུང་པོ་ཁམས་དང་སྐྱེ་གཉེན་པོ་ལྷའི་གདེངས། །མཆེད་རང་ཉིད་རྡོ་རྗེ་གཞོན་ནུར་གསལ་བ། དང་། །ཉི་ཁྲི་ཆིག་སྟོང་སྐྲ་ཚོགས་དང་། །བྱེ་བ་ཁྲག་ཁྲིག་བ་སྤུའི་ཚོགས། །ཁྲོ་རྒྱལ་རང་འདྲས་
གཏམས་པར་གྱུར། །ཁྲོ་བོ་ཁྲོ་མོ་ཕྲ་མེན་དང་། །སྒོ་མ་སྲས་མཆོག་ཕུར་བུའི་ཚོགས། །དམ་ཅན་རྒྱ་མཚོའི་ཚོགས་བཅས་རྣམས། །དཔལ་དང་གཟི་བརྗིད་འབར་བར་བཞུགས། །སྣང་ཞིང་སྲིད་པའི་ཆོས་རྣམས་ཀུན། །མ་ལུས་ཁྲོ་རྒྱལ་ཉིད་ཀྱི་དང་། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣན་བནྡྷ་ཧཱུྃ་ཕཊ། །དཱིཔྟ་ཙཀྲ་ཕུར་པའི་ལྷ། །མཐིང་ནག་གཅེར་བུ་རལ་པ་ཅན། །སྐུ་སྟོད་ཁྲོ་བོ་ཆེན་རྟོགས་པ་ལྟ་བའི་གདེང་། པོ་ལ། །དབུ་གསུམ་ཕྱག་ཀྱང་དྲུག་པ་སྟེ། མགོ་གནོན་སྔགས་ཀྱི་གདེང་། དབུ་ལ་རིགས་ ཕུར་པ་སྲས་མཆོག་ཏུ་གསལ་བ། ལྔའི་སངས་རྒྱས་རྫོགས། །ལྟེ་བ་མན་ཆད་སྐུ་ཡི་ཆ། །ཨུཏྤལ་སྔོན་པོའི་འདབ་མ་འདྲ། །འབར་བའི་འཕྲེང་བ་འཁྲིགས་པའི་འོད། །ལྕགས་ཀྱི་ཕུར་བུ་ཟུར་གསུམ་པ། །དྲག་པོར་གྱུར་པའི་ཕུར་པ་སྟེ། །བཏབ་ན་ལྷ་ཡང་བརླག་འགྱུར་ན། །གནོད་བྱེད་བགེགས་ལ་སྨོས་ཅི་དགོས། །ལིངྒ་བསྒྲལ་ཡུལ་གཟས་པ་པོ། །ཤིན་ཏུ་རིང་ཅིང་ཡན་ལག་ཕྲ། །མི་སྡུག་བཞིན་ཅན་ཚར་བཅད་ཕྱིར། །མངོན་སུམ་ཉིད་དུ་གསལ་བར་གྱུར། །ལྔ་པ་ཉེས་པའི་དཔང་གཟུག་པ་ནི། ཧཱུྃ་བྷྱོཿབརྒྱུད་གསུམ་བླ་མ་རིག་འཛིན་ཚོགས། །ཡི་དམ་ཞི་ཁྲོ་རབ་འབྱམས་དང་། །ཁྱད་པར་ཕུར་པའི་ལྷ་ཚོགས་རྣམས། །བདག་ལ་དགོངས་པར་མཛད་དུ་གསོལ། །གདུག་ཅིང་གཏུམ་པའི་
དགྲ་བགེགས་འདི། །དཔལ་ལྡན་བླ་མའི་སྐུ་དགྲ་སྟེ། །སངས་རྒྱས་བསྟན་པའི་སྤྱི་དགྲ་ཡིན། །དམ་ཚིག་ཅན་གྱི་སྡང་དགྲ་ལགས། །སེམས་ཅན་ཡོངས་ལ་འཚེ་བར་བྱས། །མཚམས་མེད་ལྔ་དང་ཉེ་བ་བསགས། །ཉམས་པ་བདུན་དང་ཞིང་བཅུ་ཚང་། །འདིས་ནི་སངས་རྒྱས་དཔའ་བོ་དང་། །རྡོ་རྗེ་སེམས་དཔའ་བཀྲོངས་པ་སྟེ། །འདི་དེ་སྡིག་པ་ཆེན་པོ་ཅན། །མནར་མེད་འགྲོ་བའི་བདག་ཉིད་ཡིན། །བདག་གིས་སྙིང་རྗེ་ཆེར་བསྐྱེད་ནས། །འཇིག་རྟེན་རྟེན་འབྲེལ་ནོར་རྫས་དང་། །འདུས་བྱས་ཟས་ཀྱི་ལོངས་སྤྱོད་བྱིན། །སྣ་ཚོགས་ཐབས་ཀྱིས་བྲིད་བྱས་ནས། །ལས་ངན་འདི་ལས་ཟློག་ཅིག་ཅེས། །ཡང་ཡང་གསོལ་ཡང་ལྡོག་མ་ཉན། །དེས་ན་གདུག་པའི་དགྲ་བགེགས་འདི། །རེ་ཞིག་ཐུགས་ཀྱིས་བཏང་བར་འཚལ། །བདག་གིས་མཉེས་མ་ཡོ་ཞིང་། །མཐུ་དང་རྫུ་འཕྲུལ་སྟོབས་ལྡན་པས། །དེ་ལྟར་ལགས་པར་གཟུང་དུ་གསོལ། །ཆོས་སྐྱོང་སྲུང་མའི་ཚོགས་རྣམས་དང་། །དམ་ཅན་རྒྱ་མཚོ་འཁོར་དང་བཅས། །སྣང་སྲིད་ལྷ་སྲིན་སྡེ་བརྒྱད་དང་། །ཕྱོགས་སྐྱོང་གཞི་བདག་བདག་ལ་དགོངས། །གདུག་ཅིང་གཏུམ་པའི་དགྲ་བགེགས་འདི། །བླ་མའི་སྐུ་ལ་འཁུ་འཁུ་བ། །རྒྱལ་བའི་བཀའ་ལ་འགོམས་འགོམས་པ། །རྣལ་འབྱོར་སྐུ་ལ་དོ་བསྔོ་བ། །བདག་
ཀྱང་འཕགས་པ་རབ་མཆོད་ཅིང་། །གཞན་དོན་ཅི་ནུས་བགྱིད་བསམ་པས། །དགྲ་བགེགས་འདི་ཡིས་མ་སྟེར་རོ། །སྤྲོས་བྲལ་རང་བཞིན་དག་པའི་ཀློང་། །དབྱིངས་ཀྱི་ཐིག་ལེར་སྒོམ་སྙམ་པས། །བར་ཆད་རྐྱེན་འདིས་མ་སྟེར་རོ། །བདག་གིས་ཅུང་ཟད་མ་ཉེས་ཤིང་། །རྣམ་པ་ཀུན་ཏུ་མ་ཡོ་བས། །དེ་ལྟར་མཁྱེན་པར་མཛད་ནས་ཀྱང་། །མཐུ་སྟོབས་བསྐྱེད་པའི་ཆོ་ག་མཛོད། །ལྷ་དང་གཉིས་སུ་མེད་པར་སྒོམས། །དགྲ་བགེགས་སྒྲོལ་བའི་གྲོགས་མཛོད་ཅིག །དྲུག་པ་རྫས་དམོད་མོ་ཏིང་ངེ་འཛིན་སོགས་དྲུག་བྱ་བ་ལ། །ལྷ་དང་ཕྲལ་བ། གཟུགས་ལ་དབབ་པ། བྱད་དུ་གཞུག་པ། སྨྱོ་རུ་གཞུག་པ། རྡུལ་དུ་རློག་པ། ཞལ་དུ་བསྟབ་པའོ། །དེ་རེ་རེ་ལའང་དྲུག་དྲུག་སྟེ། བསག་པར་བྱ་བའི་རྫས་དྲུག་བསམ་པ་མཐར་ཕྱིན་པའི་དམོད་མོ་དྲུག །དམིགས་པ་གཞན་དུ་མི་འགྱུར་བའི་ཏིང་ངེ་འཛིན་དྲུག །བསྐྱེད་པར་བྱ་བའི་ལྷ་དྲུག །སྦས་པའི་འཕྱོང་དྲུག །གབ་པའི་སྔགས་དྲུག་རྣམས་ལས། དང་པོ་ནི། རྫས་གུ་གུལ། གཉིས་པ་དམོད་མོ་ནི། །ན་མོ་བཅོམ་ལྡན་རྡོ་རྗེ་གཞོན་ནུ་དང་། །ཡུམ་ཆེན་འཁོར་ལོ་རྒྱས་འདེབས་མ། །ཡེ་ཤེས་སྤྲུལ་པའི་ཁྲོ་བོ་བཅུ། །རྡོ་རྗེ་དབྱིངས་ཀྱི་ཁྲོ་མོ་བཅུ། །ཐབས་ཀྱི་རང་བཞིན་མཆེ་བ་ཅན། །ཤེས་རབ་རང་བཞིན་གཤོག་པ་ཅན། །བདག་ཉིད་ཤྭ་ན་ས་བདག་སོགས། །ཕུར་པའི་ལྷ་ཚོགས་འཁོར་བཅས་ཀྱིས། །གདུག་ཅིང་གཏུམ་པའི་དགྲ་བགེགས་འདི། །
ཆོས་ཀྱི་སྲུང་མ་དང་ཕྲོལ་ཞིག །བོན་གྱི་ལྷ་དང་ད་ཕྲོལ་ཞིག །སྐྱེ་བོའི་དགྲ་ལྷ་དང་ཕྲོལ་ཞིག །ཕོ་ལྷ་ཡུལ་ལྷ་སྲོག་ལྷ་དང་། །བསྐྱེད་པའི་ལྷ་བཞི་འགྲོ་བ་ཡི། །ལྷ་དང་དབང་ཐང་ལྷ་དྲུག་དང་། །སྐྱོབས་པའི་ལྷ་ཀུན་དང་ཕྲོལ་ཅིག །བརྟེན་པའི་ས་དང་གནས་པའི་ཡུལ། །ཀུན་དང་མྱུར་བ་ཉིད་དུ་ཕྲོལ། གསུམ་པ་དམིགས་པ་གཞན་དུ་མི་འགྱུར་བའི་ཏིང་ངེ་འཛིན་ནི། །རབ་ཟླ་བྱེད་པའི་བཙོན་བཞིན་གྱུར། །བཞི་པ་སྐྱེད་པར་བྱེད་པའི་ལྷ་ནི་སྒོམ། སྲས་མཆོག་ལ་སོགས་པ་རྣམས་ཀྱིས་གུ་གུལ་གྱིས་བདུག་པར་བསམ་མོ། །ལྔ་པ་སྦས་པའི་འཕྱོང་ནི། ཛཿ །དམ་ཚིག་ཆེན་པོའི་དུས་ལ་བབ། །སྤྲུལ་པ་ཆེན་པོའི་དུས་ལ་བབ། །ཕྱག་བརྙན་ཆེན་པོའི་དུས་ལ་བབ། །ཤྭ་ན་མུ་ཁའི་དུས་ལ་བབ། །བདག་ཉིད་ཆེན་པོའི་དུས་ལ་བབ། །ས་བདག་ཆེན་པོའི་དུས་ལ་བབ། །བསྒྲལ་བར་བྱ་བའི་དུས་ལ་བབ། །རྡོ་རྗེ་གསང་བའི་བཀའ་ལས་ནི། །སྡིག་ཅན་གང་ཞིག་འདའ་བྱེད་ན། །སྟོབས་ཆེན་ཁྲོ་བོ་ཆེན་པོ་ཡིས། །ཀླད་པ་ཚལ་པ་བརྒྱ་རུ་ཁོས། །ཉོན་ཅིག་བགེགས་དང་ལོག་འདྲེན་རྣམས། །ང་ཡི་བཀའ་ལས་འདའ་མ་བྱེད། །གདུག་ཅིང་གཏུམ་པའི་དགྲ་བགེགས་འདི། །བསྡིགས་ཤིག་གྲོགས་དང་དབྱེ་བར་གྱིས། །དྲུག་པ་གབ་པའི་སྔགས་ནི། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ མོ་ཧཾ་གྷ་ཏ་ཡ་གནོད་བྱེད་དགྲ་བགེགས་ཧ་ས་ཡ་
ར་ཧ་ས་ཡ་ར། །ཤྲཱཾ་གྷྲཾ་ཀཱ་ར་ཡ་མ་ར་སེ་ན་པྲ་མ་རྡ་ནི། སརྦ་བིགྷྣན་བནྡྷ་ཧཱུྃ་ཕཊ། གཉིས་པ་གཟུགས་ལ་དབབ་པ་ལ་དྲུག་གི། དང་པོ་རྫས་ཡུངས་ཀར། གཉིས་པ་དམོད་ནི། །ཁྲོ་རྒྱལ་ཡབ་ཡུམ་འཁོར་བཅས་ཀྱིས། །དགྲ་འདི་ཕོབ་ཅིག་གཟུགས་ལ་ཕོབ། །རི་མོ་ལ་ཕོབ་ལིངྒ་དང་། །གཉིས་སུ་མེད་པ་ཉིད་དུ་གྱིས། །གསུམ་པ་ཏིང་ངེ་འཛིན་ནི། །བྱེ་མར་ཆར་ཕབ་བཞིན་དུ་གྱུར། །བཞི་པ་བསྐྱེད་པར་བྱ་བའི་ལྷ་ནི། །སྲས་མཆོག་སོགས་ཀྱིས་ཐུན་ཐོགས་པར་བསམ་མོ། །ལྔ་པ་བསྐུལ་ཚིག་ནི། དམ་ཚིག་ཆེན་པོའི༴ ནས༴ །གདུག་ཅིང་གཏུམ་པའི་དགྲ་བགེགས་འདི། །ཕོབ་ཅིག་རྣམ་པར་གཟིར་བར་གྱིས། དྲུག་པ་གབ་པའི་སྔགས་ནི། མོ་ཧཾ་གྷ་ཏ་ཡ་ཡན་དང་། ཤཱི་གྷྲཾ་ཀཱ་ར་ཡ་མན་གོང་དང་འདྲ་བ་ལས། །གནོད་བྱེད་དགྲ་བགེགས་ཨཱ་བེ་ཤ་ཡ་ཨ་བེ་ཤ་ཡ། ཞེས་གཞུག །གསུམ་པ་བྱད་དུ་གཞུག་པ་ལ། དང་པོ་རྫས་སྔོན་དམར་གྱི་ཞགས་པ། གཉིས་པ་ནི། །ཁྲོ་རྒྱལ་ཡབ་ཡུམ་འཁོར་བཅས་ཀྱིས། །དགྲ་འདི་ཟུང་ཞིག་རབ་ཆིངས་ཤིག །ལུས་དང་ཡན་ལག་ཀུན་སྡོམས་ཤིག །གྲུ་གུ་བཞིན་དུ་རབ་སྒོངས་ཤིག །གསུམ་པ་ནི། །ལྕགས་ཀྱིས་བཅིངས་པའི་བཙོན་བཞིན་གྱུར། བཞི་པ་ནི་སྲས་མཆོག་སོགས་ཞགས་པ་ཐོགས་པར་བསྒོམ། ལྔ་པ་ནི། །དམ་ཚིག་ཆེན་པོའི་དུས་ལ་བབ། ནས། །གདུག་ཅིང་གཏུམ་པའི་དགྲ་བགེགས་འདི། །ཟུང་ཞིག་
ཆིངས་ཤིག་རྣམ་པར་སྡོམས། དྲུག་པ་ནི། །གནོད་བྱེད་དགྲ་བགེགས་ཤི་ཀྲི་ཨཱ་ན་ཡ་སོགས༴ བཞི་པ་སྨྱོ་རུ་གཞུག་པ་ལ། དང་པོ་རྫས་གཏོར་མ། དུག་ཐུན་ཞེས་པའང་སྣང་། གཉིས་པ་ནི། །ཁྲོ་རྒྱལ་ཡབ་ཡུམ་འཁོར་བཅས་ཀྱིས། །དགྲ་འདི་སྨྱོ་ཆུག་མྱོས་སུ་ཆུག །གསུམ་པ་ནི། །དབང་མེད་སྨྲ་ཞིང་ལབ་པར་གྱུར། བཞི་པ་ནི་སྲས་མཆོག་སོགས་དུག་ཐུན་ཐོགས་པར་བསྒོམ། ལྔ་པ་ནི། དམ་ཚིག་ཆེན་པོའི་ ནས་ །གདུག་ཅིང་གཏུམ་པའི་དགྲ་བགེགས་འདི། །རིང་ནས་ཁུག་ལ་སྨྲ་རུ་ཆུག །དྲུག་པ་ནི། །གནོད་བྱེད་དགྲ་བགེགས་ཛྭ་ལ་པ་ཡ་ཛྭ་ལ་པ་ཡ། སོགས། ལྔ་པ་རྡུལ་དུ་བརླག་པ་ལ། དང་པོ་ནི་ལྕགས་ཟངས་རྡོ་ཕྱེ། གཉིས་པ། །ཁྲོ་རྒྱལ་ཡབ་ཡུམ་འཁོར་བཅས་ཀྱིས། །དགྲ་འདི་མེད་བརླག་ཕུང་པར་གྱིས། གསུམ་པ་ནི། །ཐལ་བའི་རྡུལ་བཞིན་བརླགས་པར་མཛོད། བཞི་པ་ནི། སྲས་མཆོག་སོགས་ལྕགས་ཟངས་རྡོ་ཕྱེའི་ཐུན་ཐོགས་པར་བསྒོམ་པའོ། །ལྔ་པ་ནི། དམ་ཚིག་ཆེན་པོ་སོགས༴ །གདུག་ཅིང་གཏུམ་པའི་དགྲ་བགེགས་འདི། །ལུས་སེམས་རྡུལ་ཕྲན་བཞིན་དུ་རློག །དྲུག་པ་ནི། །གནོད་བྱེད་དགྲ་བགེགས་ཏ་ཐཱ་ཡ་ཏ་ཐ་ཡ་སོགས། དྲུག་པ་ཞལ་དུ་བསྟབ་པ་ནི། རྫས་ལིང་རོ། །གཉིས་པ་ནི། །ཁྲོ་རྒྱལ་ཡབ་ཡུམ་འཁོར་བཅས་ཀྱིས། །དགྲ་འདི་བཞེས་རོལ་ཞལ་དུ་གསོལ། གསུམ་པ་ནི། །དགྲ་བགེགས་ཞལ་དུ་བསྟབ་པར་གྱུར། བཞི་པ་ནི།
སྲས་མཆོག་སོགས་ལིང་རོ་ཐོགས་པར་བསམ། ལྔ་པ་ནི། དམ་ཚིག་ཆེན་པོའི་དུས༴ ནས༴ །ང་ཡི་བཀའ་ལས་འདའ་མ་བྱེད། །གདུག་ཅིང་གཏུམ་པའི་དགྲ་བགེགས་འདི། །བཛྲ་ཡཀྵ་ཀྲོ་དྷ་ཁཱ་ཧི། དྲུག་པ་ནི། ཨོཾ་བཛྲ་ཀཱི་ལི་ཀཱི་ལ་ཡ། ཛཿཧཱུྃ་བཾ་ཧོཿ མོ་ཧཾ་གྷ་ཏ་ཡ་གནོད་བྱེད་དགྲ་བགེགས་བི་ད་ཡ་བི་ད་ཡ། ཤཱི་གྷྲཾ་ཀཱ་ར་ཡ་མ་ར་སེ་ན་པྲ་མརྡྷ་ནི་སརྦ་བིགྷྣན་བནྡྷ་ཧཱུྃ་ཕཊ། ཅེས་བྱའོ། །གཉིས་པ་དངོས་གཞི་གདབ་པའི་ལས་བསྟན་པ་ལ་དྲུག །ཀུན་གཞི་རྩད་བཅད་དེ་བསྒྲལ་བ། ཉོན་མོངས་པ་སྐྱེ་བའི་སྒོ་ལྔ་དག་པར་བསྒྲལ་བ། རྣམ་ཤེས་ཚོགས་བརྒྱད་དག་པར་བསྒྲལ་བ། །མ་བདུད་ཀྱི་དམོད་མོས་བསྒྲལ་བ། །དགེ་སྡིག་ཆ་སྙོམས་ཏེ་བསྒྲལ་བ། །གཏུན་དུ་བརྡུངས་ཏེ་བསྒྲལ་བའོ། །དང་པོ་ནི་དགུག་གཞུག་ལན་གཅིག་བྱས་ལ། ཛཿ །དམ་ཚིག་ཆེན་པོའི་དུས་ལ་བབ། །སྤྲུལ་པ་ཆེན་པོའི་དུས་ལ་བབ། །ཕྱག་བརྙན་ཆེན་པོའི་དུས་ལ་བབ། །ཤྭ་ན་མུ་ཁའི་དུས་ལ་བབ། །བདག་ཉིད་ཆེན་མོའི་དུས་ལ་བབ། །ས་བདག་ཆེན་པོའི་དུས་ལ་བབ། །བསྒྲལ་བར་བྱ་བའི་དུས་ལ་བབ། །ཁྱོད་ཀྱི་ཕྲིན་ལས་དུས་ལ་བབ། །མཐུ་རྩལ་འབྱུང་བའི་དུས་ལ་བབ། །བྱང་ཆུབ་མཆོག་ཏུ་སེམས་བསྐྱེད་ཅིང་། །དུས་གསུམ་རྒྱལ་བའི་གདུང་འཚོབ་པ། །རིག་འཛིན་བདག་ཅག་རྣམས་ལ་ནི། །གནོད་ཅིང་གདུག་པའི་དགྲ་དང་བགེགས། །བདུད་དང་བར་དུ་གཅོད་པ་རྣམས། །
ཁྲོ་བོ་ཆེན་པོའི་བྱིན་རླབས་ཀྱིས། །ཡུད་ཙམ་གྱིས་ནི་འདིར་བཀུག་ནས། །མངོན་སྤྱོད་ཚུལ་བཞིན་བསྒྲལ་བ་དང་། །ལུས་ངག་རྡུལ་དུ་བརླགས་ནས་ཀྱང་། །སྡུག་བསྔལ་ཉམས་སུ་མྱོང་བར་མཛོད། ཅེས་བསྐུལ་ལ། ཀུན་གཞིའི་གནས་ལུགས་གསལ་གདབ་པ། རྡོ་རྗེ་གསུམ་སྤྱན་དྲང་པ། ཁྲུས་ལུང་གསུམ། ཚེ་ལུང་གཉིས་ཀྱི་དགོངས་པ་དང་ལྡན་པས་ལིངྒ་ལ་ཕུར་པ་བསྒྲིལ་ཞིང་བཏབ་སྟེ། ཨོཾ་ལཾ་ཧཱུྃ་ལཾ་སྟྭཱཾ་བྷ་ནཾ་མོ་ཧཾ་གྷ་ཏ་ཡ། བྷ་ག་ཝན་ཧྲཱི་ཥྚི་བི་ཀྲིརྟ་ཤྲི་བཛྲ་ཧཱུྃ་ཀ་ར་ཧཱུྃ་ཧཱུྃ་ཕཊ་ཕཊ། བཛྲ་ཀཱི་ལི་ཀཱི་ལི་ཡ་ཛཿཧཱུྃ་བཾ་ཧོཿསརྦ་བིགྷྣན་བཛྲ་ཀཱི་ལི་ཀཱི་ལ་ཡ་ཧཱུྃ་ཧཱུྃ་ཕཊ་ཕཊ་བཛྲ་ཧཱུྃ་ཀ་ར་ཧཱུྃ་ཨ། ཞེས་བརྗོད། ཕུར་པ་བྱུང་། ཕུར་ཁུང་ལ་ཐུན་གྱིས་བྲབས། ཕུར་པ་ལ་སྨན་རཀ་བྱུགས་ཏེ་ངར་བསྐྱེད་པར་བསམས་ལ། སླར་ཡང་སྙིང་ཁར་བཅུགས་ནས་བཞག་གོ། །གཉིས་པ་ནི། །དངོས་གྲུབ་བར་ཆད་བྱེད་པའི་བགེགས། །གདུག་ཅིང་སྡང་སེམས་ལྡན་པ་རྣམས། །ཟུང་ཞིག་སྡོམས་ཤིག་རྣམ་པར་ཆིངས། །བཏོགས་ཤིག་གྲོགས་དང་བྲལ་བར་གྱིས། །རིངས་པར་ཁུག་ལ་སྨྲ་རུ་ཆུག །ཕོབ་ཅིག་རྣམ་པར་གཟིར་བར་གྱིས། །ང་ཡི་དབང་དུ་གྱུར་ནས་ནི། །བསྒོ་བའི་ལས་རྣམས་ཉན་པར་གྱིས། །ཧཱུྃ་བར་པིདྱཾ་ཚིནྡྷ་ཚིནྡྷ་ཧཱུྃ་ཕཊ། བྷིནྡྷ་བྷིནྡྷ་ཧཱུྃ་ཕཊ། གྲྀ་ཧྞ་གྲྀ་ཧྞ་ཧཱུྃ་ཕཊ། ཧ་ན་ཧ་ན་ཧཱུྃ་ཕཊ། བྷནྡྷ་བྷནྡྷ་ཧཱུྃ་ཕཊ། ཏཱ་ཌ་ཡ་ཏཱ་ཌ་ཡ་ཧཱུྃ་ཕཊ། ཧ་ས་ཡ་ར་ཧ་ས་ཡ་ར་ཧྲཱི་དཎྜ་ཧཱུྃ་ཕཊ། །ཤཱི་གྷྲཾཨ་ན་ཡ་ཧཱུྃ་ཕཊ། ཛ་ལ་པཱ་ཡ་ཛ་ལ།
པ་ཡ་ཧཱུྃ་ཕཊ། ཨཱ་བེ་ཤ་ཡ་ཨ་བེ་ཤ་ཡ་ཧཱུྃ་ཕཊ། བི་དྷ་ཡ་བི་དྷ་ཡ་ཧཱུྃ་ཕཊ། ཅེས་བརྗོད་ཅིང་། ཧཱུྃ་མཛད་ཀྱི་ཕུར་པ་རང་གི་ལག་པ་གཡས་དང་། རྣམ་རྒྱལ་གྱི་ཕུར་པ་གཡོན་དུ་ཐོགས་ལ། ཧཱུྃ་མཛད་ལིངྒའི་སྤྱི་བོ་དང་། རྣམ་རྒྱལ་དཔུང་པ་གཡས་ལ་བཏག །དེ་བཞིན་དུ་དབྱུག་སྔོན་ཅན་ལག་པ་གཡོན་དང་། གཤིན་རྗེ་གཤེད་དཔུང་པ་གཡོན། མི་གཡོ་པུས་གཡས། རྟ་མགྲིན་ཁ །གཞན་གྱིས་མི་ཐུབ་པུས་མོ་གཡོན། འཁྱིལ་པ་གསང་གནས། །འཇིག་རྟེན་གསུམ་རྒྱལ་ཕྲག་པ་གཡས། །སྟོབས་པོ་ཆེ་རྐང་པའི་བོལ་གོང་གཉིས་བསྣོལ་མཚམས་སུ་བཏབ། དེ་རྣམས་བཏོན་ཤུལ་ཐུན་གྱིས་བྲབ། ངར་བསྐྱེད། ལྔར་ཤུལ་དུ་འདེབས་པ་སོགས་རིམ་བཞིན་བྱའོ། །གསུམ་པ་ནི། ཁྲ་ཐབས་ཀྱི་ཕུར་པ་བཟུང་ལ། ཛཿ བྲན་དང་བཀའ་ཉན་ཕོ་ཉའི་ཚོགས། །ཁྱོད་ཀྱི་དམ་ཚིག་དུས་ལ་བབ། །སྔོན་ཆད་ཇི་ལྟར་དམ་བཅས་པའི། །མངོན་སྤྱོད་ཕྲིན་ལས་མྱུར་དུ་མཛོད། ཧ་ན་ཧ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། མ་ཐ་མ་ཐ་བཛྲ། ཛྭ་ལ་ཛྭ་ལ་བཛྲ། སུ་རུ་སུ་རུ་བཛྲ། མུ་རུ་མུ་རུ་བཛྲ། ཀ་ཏཾ་ཀ་ཊ་ཡེ་ཛ་ཡེ་བི་ཛ་ཡེ། ཨ་ཛི་ཏེ་ས་པ་ར་ཛི་ཏེ། མཱ་ར་སྱ་ན། པྲ་མཱརྡྷ་ནི་ཧཱུྃ་ཕཊ། ཅེས་བརྗོད་ཅིང་། ཁྲ་ཐབས་རྣམས་ཁྲོ་བོ་བཅུའི་གཡས་གཡོན་དུ་བཏབ། ཐུན་གྱིས་བྲབ་བ་སོགས་བྱས་ལ་མཐར་ཧཱུྃ་མཛད་ཀྱི་གཡས་གཡོན་དུ་བཙུགས་ལ་བཞག་དེ་ནས་སྒོ་མ་བཞིའི་ཕུར་པ་སྙིང་ཁའི་ཕྱོགས་བཞིར་བཙུགས། ཐུན་གྱིས་བྲབ་པ་སོགས་བྱའོ། །བཞི་པ་ནི། རལ་གྲི་ཐོགས་ལ། །རྡོ་རྗེ་གསང་བའི་བཀའ་ལས་ནི། །སྡིག་ཅན་གང་ཞིག་འདའ་བྱེད་པ། །སྟོབས་ཆེན་ཁྲོ་བོ་ཆེན་པོ་ཡིས། །ཀླད་
པ་ཚལ་པ་རྒྱ་རུ་ཁོས། །ཉོན་ཅིག་བགེགས་དང་ལོག་འདྲེན་རྣམས། །ང་ཡི་བཀའ་ལས་འདའ་མ་བྱེད། །མ་མ་ཝ་ཤཾ་ཀུ་རུ་མ་ཏ་ང་ཉ་ཀ་ར་ཨི་ནན་ད་དྷི་མ་མ་ཀརྨ་ཤཱི་གྷྲཾ་ཀ་ར་ཡེ། ཞེས་བརྗོད་ཅིང་དང་པོ་མགོ་བཅད་དེ་ནས་ལག་པ་གཡས་གཡོན། རྐང་པ་གཡས་གཡོན་རྣམས་གཏུབ་བོ། །ལྔ་པ་ནི། ཡུངས་དཀར་ནག་ལྕགས་ཕྱེ་རྡོ་ཕྱེ་ལ་སོགས་པ་བསྲེས་པའི་ཐུན་རྫས་རྣམས་བཟུང་སྟེ། གདུག་ཅིང་སྡང་སེམས་ལྡན་པ་ཡི། །ལྷའམ་འོན་ཏེ་བདུད་ཀྱང་རུང་། །ངལ་བར་ཆད་བྱེད་པའི་བགེགས། །མཐུ་དང་རྫུ་འཕྲུལ་མེད་པར་བྱོས། །སརྦ་ཨཱ་ན་ཡ་ཧཱུྃ་ཕཊ། ཏཱ་ཌ་ཡ་ཏཱ་ཌ་ཡ་ཧཱུྃ་ཕཊ། ཅེས་ཐུན་གྱིས་བྲབ་བོ། །དྲུག་པ་ནི། རྡོ་རྗེ་ཐོ་བ་ཐོགས་ལ། །རྡུངས་ཤིག་རྡོ་རྗེ་འབར་བའི་གཏུན། །བཀའ་ལས་འདའ་བྱེད་སྡིག་ཅན་རྣམས། །རྡོ་རྗེ་མེ་དབལ་སྙིང་བསྲེགས་ནས། །ལུས་ངག་རྡུལ་ཕྲན་བཞིན་དུ་རློགས། །ཁྲོ་མོ་འབར་བའི་གཏུན་ཁུང་དུ། །རྡོ་རྗེ་ཐོ་བས་བརྡུངས་བྱས་ནས། །ལྷ་ཡང་རུང་སྟེ་བསྒྲལ་བར་བྱའོ། །ཁ་ཏྭཾ་ཁ་ཏྭཾ་ཁ་ཏྭཾ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་བཛྲ་ཡཀྴ་ཀོར་དྷ་ཁ་ཁ་ཁཱ་ཧི་ཁཱ་ཧི། ཧ་ཧ་ཧཱུྃ་ཧཱུྃ་ཕཊ་ཕཊ། ཅེས་བརྗོད་ལ་ཐོ་བས་རྡུང་ཚུལ་དང་། སླར་ཡང་རལ་གྲིས་སྙིང་ཁ་ནས་ལུས་དྲང་པོར་གཤག་དུམ་བུར་གཏུབ། དགྲ་བསགས་མི་བསྐྱོད་པའི་ཞིང་དུ་བསྐྱལ་བར་བསམ་མོ། །ལིང་རོ་འདུལ་བ་ནི། །ལིང་གའི་དུམ་བུ་བྷནྡྷ་ར་བཅུག་ལ། བསྟབས་པའི་ཚུལ་བྱ། འདོད་ཡོན་ལྔར་བསམས་ཤིང་། །བཻ་ཌཱུར་སྔོན་པོའི་རིན་ཆེན་རི་རབ་ལ། །ཉི་མ་སྟོང་གི་གཟི་བརྗིད་བསྡུས་པ་ལྟར། །སེམས་དཔའ་སྔོན་པོ་འོད་ཀྱི་དཀྱིལ་འཁོར་
ནས། །དཔལ་ལྡན་གཟི་བརྗིད་འབར་ལ་ཕྱག་འཚལ་ལོ། །འོད་ཕུང་སྟུག་པོ་སྤྲིན་ལྟར་གཏིབས་པ་ཡིས། །འཇིགས་བྱེད་རྔམ་སྟབས་བརྐྱང་བསྐུམ་ཚུལ་དུ་བཞུགས། །ཟ་བྱེད་བསྐལ་པའི་མེ་དཔུང་འབར་བ་ཡིས། །གདུག་པ་ཐམས་ཅད་རྡོ་རྗེའི་ཞལ་དུ་བསྟབ། །མི་བཟད་མཆེ་བ་གཙིགས་པའི་ཞལ་གདངས་ཤིང་། ཁམས་སུམ་ཟ་བར་བྱེད་པའི་སྐན་སྒྲ་ཅན། །ཉི་ཟླ་འབར་བའི་སྤྱན་གྱི་སྡང་མིག་གིས། །བགེགས་དཔུང་སྲེག་པར་མཛད་ལ་ཕྱག་འཚལ་ལོ། །སྤྲུལ་པའི་ཁྲོ་བཅུ་ཡབ་ཡུམ་ཞལ་དུ་བསྟབ། །ཡང་སྤྲུལ་མཆེ་གཤོག་ཉི་ཤུའི་ཞལ་དུ་བསྟབ། །ཡེ་ཤེས་སྒོ་མ་བཞི་ཡི་ཞལ་དུ་བསྟབ། །སྲས་མཆོག་ཕུར་བུའི་ལྷ་ཚོགས་ཞལ་དུ་བསྟབ། །ཁྱད་པར་ཆོས་སྐྱོང་སྲུང་མའི་ཞལ་དུ་བསྟབ། །དམ་ཅན་བཀའ་སྲུང་བཅུ་གཉིས་ཞལ་དུ་བསྟབ། །གིང་ཆེན་དགེ་བསྙེན་རྣམས་ཀྱི་ཞལ་དུ་བསྟབ། །རྡོ་རྗེ་རིན་ཆེན་ཚོགས་ཀྱི་ཞལ་དུ་བསྟབ། །ཕྱི་ནང་མཁའ་འགྲོའི་ཚོགས་ཀྱི་ཞལ་དུ་བསྟབ། །དབང་ཕྱུག་ཉི་ཤུ་རྩ་བརྒྱད་ཞལ་དུ་བསྟབ། །དཔལ་ལྡན་རེ་བ་ཏི་ཡི་ཞལ་དུ་བསྟབ། །བདུད་འདུལ་ནག་མོ་མཆེད་བཞིའི་ཞལ་དུ་བསྟབ། ཅེས་དང་། །འདོད་ཆགས་རཀྟའི་རྒྱ་མཚོ་ཁྱི་ལི་ལི། །ཞེ་སྡང་རུས་པའི་ཕུང་པོ་ཁྲོ་ལོ་ལོ། །གཏི་མུག་ཤ་ཡི་རི་བོ་ཐིབས་སེ་ཐིབ། །དུག་གསུམ་བསྒྲལ་བའི་མཆོད་པ་བླ་ན་མེད། །བླ་མེད་མཆོད་པ་དམ་པ་འདི་བཞེས་ལ། །ལྷ་ཚོགས་སྐུ་
གསུང་ཐུགས་ཀྱི་དངོས་གྲུབ་སྩོལ། ཞེས་དང་། །ཕྱི་ནང་གསང་བའི་མཆོད་པ་རྒྱ་མཚོའི་ཚོགས། །དྭངས་བའི་སེམས་ཀྱིས་འབུལ་ལོ་བཞེས་སུ་གསོལ། །ཤ་ཁྲག་རུས་སོགས་མ་ལུས་མཆོད་རྫས་འདི། །ལྷ་ཚོགས་འཁོར་བཅས་དགེས་ཤིང་བསྣམས་སུ་གསོལ། ཞེས་བརྗོད་ལ་ལིང་རོ་གཏོར་མར་འབུལ། སྦྱིན་སྲེག་དང་མནན་པ་བྱེད་ན། ལིངྒའི་ཁོག་སྟོད་གཏོར་མར་འབུལ། ཁོག་སྨད་སྦྱིན་སྲེག་བྱ་ཞིང་། མགོ་ལ་མནན་པ་བྱ། དེ་ནས་རྣལ་འབྱོར་པ་རྣམས་ཚོགས་ལ་ལོངས་སྤྱད་ཅིང་། ལྷག་མའི་གཏོར་མ་བྱིན་གྱིས་བརླབས་ནས། ཕྱི་རོལ་དུ་དོར་བ་ཡན་ལས་གཞུང་ལྟར་བྱ། ཕྱག་ལེན་ལ་ལྷག་མ་རྒྱས་པ། ལོངས་ཁྱབ་དབེན་པའི་སྐབས་ལྷག་མ་བསྡུས་པ་ཟུར་གསལ་ལྟར་སྦྱར་ཡང་རུང་ངོ། །འདི་ས་ལོ་ཆེན་པོས་འཕང་བའི་ལས་ཚར་རྗེས་སུ་བཤད་ཀྱང་ད་ལྟའི་ཕྱག་ལན་དང་བསྟུན་པའོ། །དེ་ནས་གསུམ་པ་རྗེས་ཟློག་པ་ཟོར་གྱི་ལས་བསྟན་པ་ནི། ཟོར་གཏོར་རྣམས་ལྷར་གསལ་བའི་ཡེ་ཤེས་པ་རྣམས་ནམ་མཁར་བཞུགས་ནས། བདག་གི་དྲག་པོའི་ལས་ཀྱི་གྲོགས་མཛད། དམ་ཚིག་པ་རྣམས་འོད་དུ་ཞུ་ནས་དུག་དང་མཚོན་ཆ་དང་། མེ་དཔུང་དུ་གྱུར་པར་བསམ། གཙོ་བོའི་སྔགས་ནས་ཐུན་སྔགས་ཀྱི་བར་གོང་བཞིན་བརྗོད་ལ། རྔམས་བརྗིད་དང་ལྡན་པའི་དབྱངས་རོལ་དང་བཅས་ཏེ་འདི་སྐད་དོ། ཧཱུྃ་འཁོར་ལོ་རྩིབས་བཅུ་རབ་ཏུ་འབར་བའི་དབུས། །གྲུ་གསུམ་མཐིང་ནག་འབར་བའི་དཀྱིལ་འཁོར་ནས། །ཁྲོ་བོའི་རྒྱལ་པོ་ཁྲག་འཐུང་ཧེ་རུ་ཀ །ཐུགས་དམ་དུས་ལ་བབ་བོ་དབྱིངས་ནས་བཞེངས། །མ་རུངས་འདུལ་ཕྱིར་དྲག་པོའི་སྐུར་བསྟན་ནས། །སྔགས་འཆང་རིག་འཛིན་སྒྲུབ་བོ་བདག་ཅག་ལ། །སྐུ་གསུང་ཐུགས་ཀྱི་བྱིན་བརླབས་དཔལ་
བསྐྱེད་ནས། །སྡང་དགྲ་གནོད་པའི་བགེགས་རྣམས་བཟློག་པ་དང་། །རྐྱེན་ངན་བར་ཆད་ཞི་བར་བྱིན་གྱིས་རློབས། །ཧཱུྃ་ཡབ་གཅིག་དཔལ་ཆེན་རྡོ་རྗེ་གཞོན་ནུ་དང་། །དཔལ་གྱི་ཡུམ་ཆེན་འཁོར་ལོ་རྒྱས་འདེབས་མ། །ཡབ་ཡུམ་ཐབས་དང་ཤེས་རབ་རོལ་པ་ལས། །ཕྱོགས་བཅུའི་ཁྲོ་བོའི་ཚོགས་རྣམས་སྤྲོས་པ་ནི། །སྟེང་ཕྱོགས་འཁོར་ལོ་འབར་བའི་རྩིབས་དབུས་ན། །ཧཱུྃ་མཛད་སྒྲ་འབྱིན་ཕག་དང་སྨིག་བུའི་མགོ །འཁོར་བཅས་ཁྱེད་ཀྱི་ཐུགས་དམ་དུས་ལ་བབ། །གཟའ་དང་རྒྱུ་སྐར་གནོད་པ་ཐམས་ཅད་བཟློག །ཟློག་གོ་དམར་ཆེན་གཏོར་མ་འདི་ཡིས་བཟློག །སྒྱུར་རོ་ལྟས་ངན་ཆོ་འཕྲུལ་ཐམས་ཅད་བསྒྱུར། །ཟློག་བསྒྱུར་བཅོལ་བའི་ཕྲིན་ལས་གྲུབ་པར་མཛོད། །ཤར་ཕྱོགས་འཁོར་ལོ་འབར༴ །རྣམ་རྒྱལ་སྒེག་མོ་སྟག་དང་བྱ་རྒོད་མགོ །འཁོར་བཅས༴ །ཤར་ཕྱོགས་དྲི་ཟའི་གནོད་པ་ཐམས་ཅད་བཟློག །བཟློག་གོ་དམར་ཆེན༴ །སྒྱུར་རོ་ལྟས༴ །ཟློག་བསྒྱུར༴ །མེ་མཚམས་འཁོར་ལོ༴ །དབྱུག་སྔོན་སྡེར་མོ་གཡག་དང་བྱ་རོག་མགོ། །འཁོར་བཅས༴ །མེ་མཚམས༴ །མེ་ལྷའི༴ །ཟློག་གོ༴ །བསྒྱུར་རོ༴ །ཟློག་སྒྱུར༴ །ལྷོ་ཕྱོགས་འཁོར་ལོ༴ །གཤིན་རྗེ་དུར་ཁྲོད་ཤ་བ་འུག་པའི་མགོ། །འཁོར་བཅས༴ །ལྷོ་ཕྱོགས་གཤིན་རྗེའི༴ །ཟློག་གོ །སྒྱུར་རོ༴ །ཟློག་སྒྱུར༴ །ལྷོ་ནུབ་འཁོར་ལོ༴ །མི་གཡོ་གཏུན་ཁུང་གཟིག་དང་ཁྭ་ཏའི་མག།ོ །འཁོར་བཅས༴
ལྷོ་ནུབ་སྲིན་པོའི༴ །ཟློག་གོ །སྒྱུར་རོ༴ །ཟློག་སྒྱུར༴ །ནུབ་ཕྱོགས་འཁོར་ལོ༴ །རྟ་མགྲིན་གཏུམ་མོ་བྱི་ལ་པུ་ཤུད་མགོ། །འཁོར་བཅས༴ །ནུབ་ཕྱོགས་ཆུ་ལྷའི༴ །ཟློག་གོ༴ །བསྒྱུར་རོ༴ །བཟློག་སྒྱུར༴ །ནུབ་བྱང་འཁོར་ལོ༴ །གཞན་གྱིས་མི་ཐུབ་མདའ་སྙེམས་སྤྱང་ཁྲའི་མགོ། །འཁོར་བཅས༴ །ནུབ་བྱང་རླུང་ལྷའི་གདོན་ཚོགས༴ །ཟློག་གོ༴ །བསྒྱུར་རོ༴ །ཟློག་སྒྱུར༴ །བྱང་ཕྱོགས༴ །འཁྱིལ་པ་སྒྲ་མཛད་སེངྒེ་ཕ་ཝང་མགོ། །འཁོར་བཅས༴ །བྱང་ཕྱོགས༴ །གནོད་སྦྱིན༴ །ཟློག་གོ༴ །སྒྱུར་རོ། ཟློག་སྒྱུར༴ །བྱང་ཤར་འཁོར་ལོ༴ །ཁམས་གསུམ་གསོད་མ་དྲེད་དང་སྤྲེ་མང་མགོ། །འཁོར་བཅས༴ །བྱང་ཤར་བགེགས་བདག་གནོད་པ༴ །ཟློག་གོ༴ །བསྒྱུར་རོ༴ །ཟློག་སྒྱུར༴ །འོག་ཕྱོགས་འཁོར་ལོ༴ །སྟོབས་ཆེན་རིགས་བྱེད་དོམ་དང་བྱི་བའི་མགོ། །འཁོར་བཅས༴ །འོག་ཕྱོགས༴ །ས་བདག༴ །ཟློག་གོ །བསྒྱུར་རོ༴ །ཟློག་སྒྱུར༴ །ལས་བཞིའི་ཕྲིན་ལས་མ་ལུས་སྒྲུབ་མཛད་པ། །ཕུར་པ་སྲས་ཀྱི་ལྷ་ཚོགས་འཁོར་དང་བཅས། །འཁོར་བཅས༴ །དགྲ་བགེགས༴ །ཟློག་གོ༴ །སྒྱུར་རོ༴ །ཟློག་སྒྱུར༴ །གདུག་པ་འདུལ་བའི་ཕོ་ཉར་ཁས་བླངས་པའི། །དྲེགས་པ་དབང་ཕྱུག་ཉི་ཤུ་རྩ་བརྒྱད་མ། །འཁོར་བཅས༴ །དགྲ་བགེགས༴ །ཟློག་གོ༴ །སྒྱུར་རོ༴ །ཟློག་སྒྱུར༴ །ཕུར་པའི་སྲུང་མར་ཞལ་བཞེས་དམ་ཉམས་སྒྲོལ། །དྲག་
གཏུམ་མི་བཟད་དམ་ཅན་བཅུ་གཉིས་པོ། །འཁོར་བཅས༴ །དགྲ་བགེགས༴ །བཟློག་གོ༴ །སྒྱུར་རོ༴ །ཟློག་སྒྱུར༴ །སངས་རྒྱས་བསྟན་པ་སྲུང་བར་ཞལ་བཞེས་པ། །ཆོས་སྐྱོང་མགོན་པོ་ལྕམ་དྲལ་ལྷ་ཚོགས་ཀུན། །འཁོར་བཅས༴ །དགྲ་བགེགས༴ །བཟློག་གོ༴ །སྒྱུར་རོ༴ །ཟློག་སྒྱུར༴ །ཕྱོགས་སྐྱོང་བཅུ་དང་གཟའ་དང་རྒྱུ་སྐར་དང་། །ལྷ་སྲིན་སྡེ་བརྒྱད་དྲེགས་པ་ཕོ་མོའི་ཚོགས། །འཁོར་བཅས་ཁྱེད་ཀྱི་ཐུགས་དམ་དུས་ལ་བབ། །དགྲ་བགེགས་གནོད་པ་ཐམས་ཅད་བཟློག་ཏུ་གསོལ། །ཟློག་གོ་དམར་ཆེན་གཏོར་མ་འདི་ཡིས་ཟློག །སྒྱུར་རོ་ལྟས་ངན་ཆོ་འཕྲུལ་ཐམས་ཅད་སྒྱུར། །ཟློག་བསྒྱུར་བཅོལ་པའི་ཕྲིན་ལས་གྲུབ་པར་མཛོད། ཧཱུྃ་ །དི་རིང་རྣལ་འབྱོར་བདག་ཅག་འཁོར་བཅས་ཀྱི། །ལུས་ཀྱི་ན་ཚ་ཐམས་ཅད་གཏོར་མས་ཟློག །སེམས་ཀྱི་སྡུག་བསྔལ་ཐམས་ཅད་གཏོར་མས་ཟློག །ནད་རིམས་བཞི་བརྒྱ་རྩ་བཞི་གཏོར་མས༴ །བགེགས་རིགས་སྟོང་ཕྲག་བརྒྱད་ཅུ༴ །གདོན་རིགས་སུམ་བརྒྱ་དྲུག་ཅུ༴ །གློ་བུར་ཡེ་འགྲོགས་ཐམས་ཅད༴ །རྨི་ལམ་མཚན་ངན་ཐམས་ཅད༴ །ལྟས་ངན་ཕྱོགས་ངན་ཐམས་ཅད༴ །དུས་སྦྱོར་ངན་པ༴ །གཟའ་སྐར་ངན་པ༴ །ཡས་ཀྱི་བདུད་གཡོས༴ །མས་ཀྱི་སྲི་ལོངས༴ །ཕ་ཚན་རྒྱ་འདྲེ༴ །མ་བུའི་བྱུར་འདྲེ༴ །ཡུལ་མིའི་གདོང་འདྲེ༴ །ལོ་སྐག་ཟླ་སྐག༴ །ཞག་སྐག་གཟའ་སྐག༴
རྒྱལ་པོའི་ཆད་པ༴ །འབངས་ཀྱི་བསམ་སྦྱོར་ངན་པ༴ །གཡས་ཀྱི་ཕོ་བརྒྱ་གྲི་བརྡར༴ །གཡོན་གྱི་མོ་བརྒྱ་དུག་སྦྱོར༴ །ཁ་འཇམ་སེམས་སྡུག་ཐམས་ཅད༴ །སྐྱེ་བོའི་ཡག་ཐམས་ཅད༴ །བུད་མེད་དམོད་མོ་ཐམས་ཅད༴ །ཁ་སྨྲས་གླེང་བཞི་ཐམས་ཅད༴ །དགྲ་ངོ་དམར་ངོ་༴ །མི་ཁ་དུག་ཆུ༴ །སྔ་དགྲ་དར་བ༴ །ཕྱི་དགྲ་སེམས་པ༴ །ད་དགྲ་བརྩམས་པ༴ །གཟུགས་ཅན་དགྲ་ཡིས་གནོད་པ༴ །གཟུགས་མེད་བགེགས་ཀྱིས་གནོད་པ༴ །སྟེང་ཕྱོགས་གཟའ་ཡི་གནོད༴ །འོག་ཕྱོགས་ཀླུ་ཡི༴ །བར་གདོན་བདུད་བཙན༴ །རྒྱལ་འགོང་ཐེའུ་རང་༴ །མ་མོ་དམ་སྲིའི༴ །ཕ་རོལ་རྦོད་གཏོང་༴ །ཆོས་ཀྱི་ཆོས་ཟོར༴ །སྔགས་ཀྱི་སྔགས་ཟོར༴ །བོན་གྱི་བོན་ཟོར༴ །ཞང་ཞུང་གཙོ་ཟོར༴ །སུམ་པའི་གླང་ཟོར༴ །མུ་སྟེགས་ངན་སྔགས༴ །ཕུར་པའི་དབལ་ཁ༴ ། །ཁྲག་ཟོར་གཏོར་ཟོར༴ །ཡུངས་ཟོར་མདའ་ཟོར་འཕེན་པ༴ །རྡོ་ཟོར་ཚེ་ཟོར་འའཕེན༴ །གཤིན་རྗེས་ཁྲོམ་ཁ་བཏབ་པ༴ །མ་མོའི་བྱོལ་ཁ༴ །རྒྱལ་པོའི་ཐོག་བརྫིས་ཐམས་ཅད༴ །བཙན་གྱི་ཤྭོ་རྡེའུ་འགྲེམ་པ༴ །བདུད་ཀྱི་ཞགས་པ་འཕེན་པ༴ །ཀླུ་ཡི་བྱང་ཁ་ཟུག་པ༴ །གནོད་སྦྱིན་མདངས་འཕྲོག་ཐམས་ཅད༴ །ཐེའུ་རང་ཚེ་ལ་རྐུ་བ༴ །ནད་ཀྱི་རྐྱལ་པ་ཁ་ཤོར༴ །མཚོན་གྱི་གྲུ་གུ་བརྐྱངས་པ༴ །མི་མཐུན་རྐྱེན་ངན་ཐམས་
ཅད༴ །ནམ་མཁར་བྱ་རྒོད་སྡེར་འཛིངས༴ །ས་སྟེང་གཡག་པོ་རུ་འཛིངས༴ །ཆུ་ནང་ཉ་མོ་རྔ་འཛིང་༴ །ཕུ་རུ་ཤ་བ་རུ་འཛིང་༴ །སྲོད་ལ་སྲིན་བྱ་རྒོད་པ༴ །ནམ་གུང་སྒོ་ཁྱི་ངུ་བ༴ །ཐོ་རངས་འུག་པ་དགོད་པ༴ །ལ་ཁར་གླ་བ་མཆེ་འཛིངས༴ །ཕྱུགས་ལ་ལྟས་ངན་སྐྱེས་པ༴ །སྲམ་ལ་འུག་པ་ཞོན་པ༴ །སྲིན་མོ་བུ་ལ་ཞོན་པ༴ །སྤྱང་ཁར་གླ་རོ་ཁྱེར་བ༴ །སྲེ་མོང་བྱི་རོ་ཁྱེར་བ༴ །བདུད་དང་བཙན་གྱི་ཆོ་འཕྲུལ༴ །རྒྱལ་པོ་དམུ་ཡི་ཆོ་འཕྲུལ༴ །མ་མོ་ཀླུ་ཡི༴ །གཤིན་རྗེ་གནོད་སྦྱིན༴ །འགོང་པོ་ཐེའུ་རང་༴ །གྲི་བོ་གྲི་མོའི་གནོད༴ །ལྟས་ངན་རིགས་གྱུར་ཐམས་ཅད༴ །མདོར་ན་དམར་ཆེན་གཏོར་མ་འདི་ཡི་མཐུས། །ངན་པ་བཟློག་ལ་རྩུབ་མོ་ཐམས་ཅད་བསྒྱུར། །ཐམས་ཅད་སྡང་བའི་དགྲ་ལ་བཟློག་ཅིང་བསྒྱུར། །ཐམས་ཅད་གནོད་པའི་བགེགས་ཀྱི་སྟེང་དུ་བྷྱོཿ །གཏོར་མ་འདི་ཡིས་མི་བཟློག་གང་ཡང་མེད། །གཏོར་མ་འདི་ཡིས་མི་བསྒྱུར་གང་ཡང་མེད། །གཏོར་མ་འདི་ཡིས་ཐམས་ཅད་མི་ཟློག་ཏུ། །བླ་མ་ཡི་དམ་བདེན་པའི་བྱིན་རླབས་དང་། །དམ་ཅན་སྲུང་མས་མཐུ་རྩལ་བྱིན་གྱིས་རློབས། །རྣལ་འབྱོར་བདག་གི་ཏིང་འཛིན་བྱིན་གྱིས་རློབས། །དེ་ཕྱིར་བདག་ཅག་དཔོན་སློབ་འཁོར་བཅས་ལ། །མི་མཐུན་རྐྱེན་ངན་བར་ཆད་ཐམས་ཅད་ཀུན། །སྡང་བའི་
དགྲ་དང་གནོད་པའི་བགེགས་ལ་བྷྱོཿ ཞེས་ཚར་གཅིག་གམ་གསུམ་སྐབས་དང་བསྟུན་ཏེ་བརྗོད། དེ་ནས། ཧཱུྃ་ འཇམ་དཔལ་སྐུ་ཡི་ལྷ་ཚོགས་ཀྱིས། །ཟོར་ཆེན་རྫས་ཀྱི་མཐུ་བསྐྱེད་ལ། །དགྲ་བགེགས་སྲོག་ལ་མངའ་མཛོད་ཅིག །སོགས་གོང་བཞིན་བྱས་ལ། །གཏོར་མ་རྣམས་ཕངས་ཏེ་སྔོན་ལ་བདུད་རྒྱལ། དེ་ནས་ཤྭ་ན་མ། ས་བདག་མ། བདག་ཉིད་མ། གཙོ་བོའི་གཏོར་མ་རྣམས་ཕྱིར་ཅུང་ཟད་བསྣུར་ལ། གནས་དེ་ཉིད་དུའམ་གཞན་གང་བདེ་བར་བདུད་རྒྱལ་གྱི་བསྐུལ་བ་བྱ་བ་ནི། ཧཱུྃ་ དམ་ཚིག་ཆེན་པོའི་དུས་ལ་བབ། །སྲོག་གི་གཤེད་དུ་བསྐུལ་བ་ནི། །བདུད་རྒྱལ་ཐོད་པའི་ཕྲེང་བ་ཅན། །སྐུ་ནི་མཐིང་ནག་ཆེན་པོ་ལ། །ཆིབས་སུ་བདུད་རྟ་ནག་པོ་ཆིབས། །ལག་ན་ལྕགས་མདུང་ནག་པོ་ཐོགས། །གཡོན་པ་ཐོད་པའི་ཕྲེང་བ་འཛིན། །ཐོད་པ་སྐམ་པོས་དབུ་ལ་བརྒྱན། །མི་ལྤགས་རློན་པ་སྐུ་ལ་གསོལ། །སྦྲུལ་དང་རྒྱུ་མས་སྐུ་ལ་བརྒྱན། །ཁྲག་དང་ཞག་གི་ཐིག་ལེ་ཅན། །མཆེ་བ་གཙིགས་ཤིང་གསུམ་པ་ཆེ། །ཙིཏྟ་སྲོག་ལ་ལོངས་སྤྱོད་པ། །ཁྱོད་ནི་སྲོག་བདག་ཆེན་པོ་སྟེ། །སྲིང་གཅིག་རྡོ་རྗེ་རེ་མ་ཏེ། །མིང་སྲིང་གཉིས་ཀྱིས་དམ་བཅས་པ། །དམ་བཅས་བཞིན་དུ་ཕྲིན་ལས་མཛོད། །སྔོན་ཚེ་དཔལ་ཆེན་ཧེ་རུ་ཀས། །དབང་རྟགས་ཐོད་པ་བྱིན་ནས་ནི། །བཀའ་སྩལ་དམ་ཚིག་ཆོག་པའི་ཚེ། །དེ་ཚེ་ཁས་བླངས་དམ་བཅས་ནས། །སྒྲུབ་མཆོག་སྐྱོང་བར་ཞལ་བཞེས་
ཤིང་། །དགྲ་བགེགས་སྒྲོལ་བར་དམ་བཅས་པ། །དམ་ཉམས་སྒྲོལ་བའི་དུས་ལ་བབ། །ཁྱོད་ནི་སྲོག་བདག་ཆེན་པོ་སྟེ། །དགྲ་བགེགས་སྲོག་ལ་མངའ་ཐང་མཛོད། །སྲོག་དབུགས་ལོངས་ཤིག་ས་མ་ཡཿ །ཁྱོད་ཀྱི་ཟས་སྐལ་ཤ་ཡིན་ཏེ། །དགྲ་བོའི་ཤ་ལ་ཧབ་ཀྱིས་ཟོ། །དམ་ཉམས་ཤལ་ཁ་རཾ་ཁཱ་ཧི། །ཁྱོད་ཀྱི་འཐུང་སྐལ་ཁྲག་ཡིན་ཏེ། །དགྲ་བོའི་སྙིང་ཁྲག་ཧུབ་ཀྱིས་བཏུངས། །བཏུངས་ཤིག་ཁྲག་འཐུང་ཐོད་འཕྲེང་ཅན། །ཁྱོད་ནི་དམག་དཔོན་ཆེན་པོ་སྟེ། །ས་གཞི་ཐམས་ཅད་དམག་གིས་ཁོངས། །དགྲ་བའི་ཡུལ་དུ་དམག་དྲོངས་ལ། །དམག་སྣ་དྲོངས་ཤིག་ཐོད་ཕྲེང་ཅན། །གཉན་པོ་བདུད་ཀྱི་ལས་ཡིན་གྱིས། །དམག་གཞུག་ཐུལ་ཅིག་ཐོད་འཕྲེང་ཅན། །གོ་མཚོན་རྡོར་ཅིག་ཐོད་འཕྲེང་ཅན། །དགྲ་བའི་ཡུལ་དུ་དམག་དྲོངས་ལ། །དམ་ཉམས་དགྲ་བོའི་བླ་མཁར་ཤིག །ཁྱོད་ཀྱི་ཐུགས་དམ་དུས་ལ་བབ། །དུས་ལ་བབ་པོ་ས་མ་ཡ། །བཅོལ་པའི་ཕྲིན་ལས་གྲུབ་པར་མཛོད། །ཅེས་པའི་བསྐུལ་རྒྱས་བར་བྱས་ནས། གཏོར་མ་རྣམས་རིམ་གྱིས་ཁྱེར་ལ། ཡང་ཇི་ལྟར་འོས་པའི་སར་བསྐུལ་ཆུང་བ་འདི་བྱ། ཧཱུྃ་ །དཔལ་ཆེན་བཀའ་སྡོད་མཐུ་བོ་ཆེ། །བདུད་མགོན་ནག་པོ་ལས་ལ་བཞེངས། །བཟློག་པའི་དམག་སྣ་ད་མཛོད་ཅིག །སྡེ་བརྒྱད་ཡོངས་ཀྱི་དམག་དཔོན་མཛོད། །བདུད་
རྒྱལ་ཐོད་པའི་འཕྲེང་བ་ཅན། །དམ་ཅན་སྲུང་མའི་དམག་སྣ་དྲངས། །གཡས་ན་དྲེགས་པ་ཕོ་རྒྱུད་ཚོགས། །དམག་ལ་ཆོས་ཤིག་དགྲ་ལ་བྷྱོཿ །གཡོན་ན་དྲེགས་པ་མོ་རྒྱུད་ཚོགས། །དམག་ལ་ཆོས་ཤིག་དགྲ་ལ་བྷྱོཿ །ལྷ་སྲིན་སྡེ་བརྒྱད་དྲེགས་པའི་ཚོགས། །དམག་ལ་ཆོས་ཤིག་དགྲ་ལ་བྷྱོཿ །ང་ནི་ཁྲག་འཐུང་ཧེ་རུ་ཀཿ །ཐམས་ཅད་ང་ཡི་བཀའ་ལ་ཉོན། །ཆོས་ཤིག་བཟློག་པའི་དམག་ལ་ཆོས། །དམག་དཔུང་བསྐྱེད་ལ་རུ་མཚོན་ཕྱོར། །རྣལ་འབྱོར་བདག་ཅག་འཁོར་བཅས་ཀྱི། །ངན་པ་བཟློག་ལ་རྩུབ་མོ་བསྒྱུར། །མི་མཐུན་གདོན་བགེགས་བར་ཆད་རྣམས། །ཐམས་ཅད་སྡང་བའི་དགྲ་ལ་བྷྱོཿ །ཟློག་གོ་བསྒྱུར་རོ་ཐོད་ཕྲེང་རྩལ། །དུས་ལ་བབ་པོ་ས་མ་ཡ། །དུས་ལ་བབ་བོ་མཐུ་མ་ཆུང་། །བཅོལ་པའི་ཕྲིན་ལས་གྲུབ་པར་མཛོད། དེ་ནས་ཇི་ལྟར་འོས་པའི་སར། བདག་ཤྭ་ས་གསུམ་གྱི་བསྐུལ་བྱ་སྟེ། བྷྱོཿ བདག་ཉིད་ཆེན་མོའི་དུས་ལ་བབ། །ཆེ་ཞེས་དཔལ་ལྡན་རེ་མ་ཏི། །ཆེ་ཞེས་དཔལ་ལྡན་རེ་མ་ཏྲ། །ཆེ་ཞེས་དཔལ་ལྡན་རེ་མ་ཛཿ །ཆེ་ཞེས་དཔལ་ལྡན་རེ་མ་ཛུ། །བདག་ཉིད་ཆེན་མོ་མཆེད་བཞི་ཡང་། །སྔོན་ཚེ་འདས་དུས་བསྐལ་པ་ལ། །ཁྲག་འཐུང་རྡོ་རྗེ་གཞོན་ནུ་ཡིས། །དྲེགས་པ་རུ་ཏྲ་བཏུལ་བའི་ཚེ། །སྲོག་སྙིང་ཕུལ་ཞིང་དམ་ལ་བཏགས། །བར་དུ་
པདྨ་འབྱུང་གནས་ཀྱིས། །ཡང་ལེ་ཤོད་ཀྱི་བྲག་ཕུག་ཏུ། །དམ་ལ་བཏགས་ཤིང་ལས་གཉེར་གཏད། །ཁས་བླངས་དམ་བཅས་ཇི་བཞིན་དུ། །ད་ལྟ་རྣལ་འབྱོར་བདག་གིས་བསྐུལ། །རྒྱན་གྱི་གཏོར་མ་འདི་བཞེས་ལ། །གཏད་དོ་གཉེར་རོ་དམ་ཅན་མ། །བཅོལ་པའི་ཕྲིན་ལས་གྲུབ་པར་མཛོད། བྷྱོཿ ཤྭ་ན་མུ་ཁའི་དུས་ལ་བབ། །ལྕགས་ཀྱི་སྤྱད་མོ་མགོ་དགུ་ལ། །མི་མོ་སྤྱང་ཀའི་གདོང་ཅན་ཞོན། །གསེར་གྱི་འཕར་བ་ལྕེ་བརྒྱད་མ། །མི་མོ་འཕར་བའི་གདོང་ཅན་ཞོན། །ཟངས་ཀྱི་ཝ་མོ་རྐང་གསུམ་ལ། །མི་མོ་ཝ་ཡི་གདོང་ཅན་ཞོན། །གཡུ་ཡི་ཁྱི་མོ་རལ་ཅན་ལ། །མི་མོ་ཁྱི་ཡི་གདོང་ཅན་ཞོན། །དམ་ཅན་ཤྭ་ན་མུ་ཁ་བཞི། །སྔོན་ཚེ་འདས་དུས་བསྐལ་པ་ལ། །དཔལ་ཆེན་རྡོ་རྗེ་གཞོན་ནུ་ཡིས། །དྲེགས་པ་རུ་ཏྲཱ་བཏུལ་བའི་ཚེ། །སྲོག་སྙིང་ཕུལ་ཞིང་དམ་ལ་བཏགས། །བར་དུ་པདྨ་འབྱུང་གནས་ཀྱིས། །གཡའ་རི་གོང་གི་བྲག་ཕུག་ཏུ། །དམ་ལ་བཏགས་ཤིང་ལས་གཉེར་གཏད། །ཁས་བླངས་དམ་བཅས་ཇི་བཞིན་དུ། །ད་ལྟ་རྣལ་འབྱོར་བདག་གིས་བསྐུལ། །རྒྱན་གྱི་གཏོར་མ་འདི་བཞེས་ལ། །གཏད་དོ་གཉེར་རོ་དམ་ཅན་མ། །བཅོལ་བའི་ཕྲིན་ལས་གྲུབ་པར་མཛོད། བྷྱོཿ ས་བདག་ཆེན་མོའི་དུས་ལ་
བབ། །སྤྱི་བྱིན་རྡོ་རྗེ་མཐུ་མོ་ཆེ། །ཡ་བྱིན་རྡོ་རྗེ་རྩལ་མོ་ཆེ། །བསྲེ་བྱིན་རྡོ་རྗེ་རྫུ་འཕྲུལ་ཆེ། །ཕག་བྱིན་རྡོ་རྗེ་སྟོབས་མོ་ཆེ། །དམ་ཅན་བསེ་ཡི་ལྷ་མོ་བཞི། །སྔོན་ཚེ་འདས་དུས་བསྐལ་པ་ལ། །དཔལ་ཆེན་རྡོ་རྗེ་གཞོན་ནུ་ཡིས། །དྲེགས་པ་རཱུ་ཏྲ་བཏུལ་བའི་ཚེ། །སྲོག་སྙིང་ཕུལ་ཞིང་དམ་ལ་བཏགས། །བར་དུ་པདྨ་འབྱུང་གནས་ཀྱིས། །རྒྱ་གར་དུར་ཁྲོད་སོ་ས་དང་། །ཆུ་མིག་བྱང་ཆུབ་རིས་སུ་ཡང་། །དམ་ལ་བཏགས་ཤིང་ལས་གཉེར་གཏད། །ཁས་བླངས་དམ་བཅས་ཇི་བཞིན་དུ། །ད་ལྟ་རྣལ་འབྱོར་བདག་གིས་བསྐུལ། །རྒྱན་གྱི་གཏོར་མ་འདི་བཞེས་ལ། །གཏད་དོ་གཉེར་རོ་དམ་ཅན་མ། །རང་འཁོར་བསྲུང་བའི་གཉེར་མཛོད་ཅིག །བསྐུལ་ལོ་རྦད་དོ་མཐུ་མ་ཆུང་། །གང་ལ་དམིགས་པ་རྡུལ་དུ་རློགས། །འཆོལ་ལོ་འཕྲིན་ལས་ལས་ལ་འཆོལ། །བཅོལ་བའི་ཕྲིན་ལས་གྲུབ་པར་མཛོད། ཅེས་བསྐུལ་ལ་གཏོར་མ་འབངས་སར་ཕྱིན་ལ། གོང་སྨོས་གསེར་སྐྱེམས་བསྡུས་པའོ། །རྗེ་བཙུན་རིན་པོ་ཆེས་མཛད་པའི་གསེར་སྐྱེམས་སྤྱི་འགྲོ་ཁ་བསྒྱུར་ལ་བཏང་། ཧཱུྃ་ །བརྒྱུད་གསུམ་བླ་མ་རིག་འཛིན་ཚོགས། སོགས་དཔང་གཟུག །དོ་ནུབ་ཕུར་ཁ་ཞེས་བར་ཟོར་དུ་བསྒྱུར་ལ། །ངོ་ནུབ་ཟོར་ཁ་གཉན་པོ་འདི། །སྟེང་གི་ལྷ་ལ་མི་ཟོར་རོ། །ལྷ་གཤེགས་གངས་དཀར་རྩེ་ལ་གཤེགས། །ཟོར་ལམ་གཉེན་པོ་ད་ཕྱེས་ཤིག སོགས་གོང་ཕུར་ཁ་སྟོན་
པ་འདོན་པ་བསྒྱུར་ལ་ཟོར་ལམ་དབྱེ། དེ་ནས། ཧཱུྃ་ འཇམ་དཔལ་སྐུ་ཡི་ལྷ་ཚོགས་ཀྱིས། །དོ་ནུབ་ཟོར་གྱི་ལས་མཛོད་ཅིག དེ་བཞིན་དུ། །པདྨ་གསུང་གི་ལྷ་ཚོགས་ཀྱིས། །དོ་ནུབ་ཟོར༴ །ཡང་དག་ཐུགས་ཀྱི་ལྷ་ཚོགས༴ །དོ་ནུབ་ཟོར༴ །བདུད་རྩི་ཡོན་ཏན་ལྷ༴ །དོ་ནུབ་ཟོར༴ །ཕུར་པ་ཕྲིན་ལས་ལྷ༴ །དོ་ནུབ་ཟོར༴ །བཅོམ་ལྡན་རྡོ་རྗེ་གཞོན་ནུ་ཡིས། །དོ་ནུབ་ཟོར༴ །ཡུམ་ཆེན་འཁོར་ལོ་རྒྱས་འདེབས་ཀྱིས། །དོ་ནུབ་ཟོར༴ །འཇིགས་བྱེད་ཁྲོ་བོ་བཅུ་ཡིས་ནི། །དོ་ནུབ་ཟོར༴ །རྡོ་རྗེ་ཁྲོ་མོ་བཅུ་པོ་ཡིས། །དོ་ནུབ་ཟོར༴ །སྤྲུལ་པའི་ཁྲ་ཐབས་ཉི་ཤུ་ཡིས། །དོ་ནུབ་ཟོར༴ །ཕུར་བུ་སྲས་ཀྱི་ལྷ་ཚོགས་ཀྱིས། །དོ་ནུབ༴ །ཡེ་ཤེས་སྒོ་མ་བཞི་པོ་ཡིས། །དོ་ནུབ་ཟོར༴ །དམ་ཅན་ཤྭ་ན་བཅུ་གཉིས་ཀྱིས། །དོ་ནུབ༴ །བསེ་ཡི་སྐྱེས་བུ་མཆེད་བཞི་ཡིས། །དོ་ནུབ༴ །ཆོས་སྐྱོང་སྲུང་མའི་ཚོགས་རྣམས་ཀྱིས། །དོ་ནུབ༴ །རིག་འཛིན་རྩལ་ཅན་འཁོར་བཅས་ཀྱིས། །དོ་ནུབ་ཟོར་གྱི་ལས་མཛོད་ཅིག །བདག་གི་གཏོར་ཟོར་གཉན་པོ་འདི། །རིག་འཛིན་བླ་མས་བྱིན་གྱིས་རློབས། སོགས་གོང་དུ་སྨོས་པས་ཟོར་བསྐུལ། གཏོར་མ་སོགས་དྲུག་ཐུན་དུ་བསམ། དགྲ་བོའི་རྣམ་པར་ཤེས་པ་མར་མེ་ལྟ་བུ་ལ་ཕོག་པས། ཐུམ་ཐུམ་བསད་ཅིང་བསྒྲལ་བར་བསམས་ལ། ཀཱི་ལ་ཡ་དང་། ཁྲོ་བཅུའི་སྔགས་
སོགས་དང་། བསྒྲལ་མཆོད་ཀྱི་སྔགས་རྣམས་བརྗོད་ཅིང་། དང་པོ་མདའ་ཟོར། དེ་ནས་བདུད་རྒྱལ། ཤྭ་ན་མ། ས་བདག་མ། བདག་ཉིད་མ་རྣམས་ཀྱིས་གཏོར་མ་རྣམས་རིམ་པས་འཕངས་ལ། དེ་ནས་ཁྲོ་བཅུ་གཙོ་གཏོར་དང་བཅས་པ། དེ་ནས་རྭ་ཟོར། དེ་ནས་རྡོ་ཟོར་འཕེན་ནོ། །དེ་ནས་ཡར་ལོག་ལ་སྒོ་དྲུང་དུ་གཏོར་སྣོད་ཁ་སྦུབ་པའི་མཐར། སྒྲུབ་པ་པོ་རྣམས་ལག་པ་གཡོན་སྟེང་དུ་བསྣོལ་ནས། གཡས་གཡོན་གྱི་སྲིན་ལག་སྦྲེལ་ལ། ཧཱུྃ་ དང་པོ་ཞེ་སྡང་ཉིད་ལས་བྱུང་། །བར་དུ་ཞེ་སྡང་ཉིད་ཀྱིས་འཁོར། །ཐ་མར་ཞེ་སྡང་ཉིད་ཀྱིས་འདུལ། །ཞེ་སྡང་རྡོ་རྗེ་འཁོར་བཅས་ཀྱིས། །ལྕགས་སམ་ནག་པོའི་ཤིང་དག་ལ། །མགོ་བོ་རྒྱ་མདུད་རྩེ་ཟུར་གསུམ། །ལོགས་ལ་དྲག་པོའི་ལྷ་བསྒོམས་ཏེ། །ཁོག་སྟོང་བྱང་ཆུབ་སེམས་ལུང་བསྟན། །རྩེ་མོ་ཟུར་གསུམ་བཏབ་པ་ཡིས། །ཐམས་ཅད་མ་ལུས་བརླག་པར་འགྱུར། །བརླག་པར་མ་གྱུར་གང་ཡང་མེད། །དྲག་པོའི་ལྷ་ལ་ཕྱག་འཚལ་ལོ། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་ཤ་ཏྲུཾ་བིགྷྣན་མཱ་ར་ཡ་ཧཱུྃ་ཧཱུྃ་ཕཊ། དེ་ནས་ནང་དུ་ལོག་སྟེ་གཏོར་ཆོག་གི་སྤྱི་བསྟབས་སོགས་བྱས་ལ་གཏོར་མ་ཁང་སྟེང་དུ་ཕུལ། དེ་ནས་ལས་གཞུང་ལྟར། ཧོཿ བོད་ཁམས་སྐྱོང་བའི་བརྟན་མ་སོགས་ཀྱིས་བརྟན་མ་བསྐྱང་། དངོས་གྲུབ་བླང་བ་ནས་ཤིས་བརྗོད་ཀྱི་བར་རྒྱས་པར་བྱ་བ་ལས། རྟེན་ཡོད་ན་བརྟན་བཞུགས་དང་། མེད་ན་དཀྱིལ་འཁོར་གྱི་འཁོར་ལོ་རང་ལ་བསྡུ། འཇིག་རྟེན་གཤེགས་ཤིང་བདག་བསྐྱེད་བསྡུ་ལྡང་སོགས་ལས་གཞུང་དང་གོང་སྨོས་
ལས་ཤེས་པར་བྱའོ། །ཕྱག་རྒྱ་རིག་པའི་རྡོ་རྗེ་རྩེ་བརྒྱ་པ། །དྲན་པ་ཙམ་གྱིས་མི་བཟད་བདུད་ཀྱི་སྡེ། །སྲོག་གི་མངལ་རྒྱ་གཅིག་ཆར་དྲལ་མཛད་པ། །བདེ་གཤེགས་ཕྲིན་ལས་སྟོབས་འདུས་དཔལ་ཆེན་པོའི། །གཏོར་ཟློག་གསལ་བར་བཤད་ལ་ཉེས་པའི་དྲི། །སྐུ་གསུམ་ཐུགས་རྗེའི་ཆབ་ཀྱིས་སྦྱོང་མཛད་ནས། །འོད་གསལ་རྡོ་རྗེ་ཐེག་པའི་བསྟན་སྤྱི་དང་། །ཁྱད་པར་ཆོས་ཀྱི་རྒྱལ་པོ་ཇོ་ནང་པའི། །བསྟན་ལ་འཚེ་བྱེད་གཟུགས་ཅན་གཟུགས་མེད་ཚོགས། །མིང་གི་ལྷག་མར་བྱས་ཏེ་བཤད་སྒྲུབ་ཀྱི། །བསྟན་དང་བསྟན་འཛིན་ཀུན་ཁྱབ་པའི། །དགེ་ལེགས་སྣང་བ་རབ་ཏུ་འབར་གྱུར་ཅིག །ཅེས་པའང་། རྗེ་བཙུན་ཐམས་ཅད་མཁྱེན་པའི་དཀྱིལ་ཆོག་གི་ཡན་ལག་ཏུ་ཉེ་བར་མཁོའི་གཏོར་ཟློག་སོགས་བསྙེན་སྒྲུབ་ལས་གསུམ་གྱི་ཡིག་ཆ་ཆ་ཚང་བ་ཞིག་དགོས་ཞེས་དཔལ་ལྡན་འཛི་ཐང་གི་གདན་ས་ཆེན་པོ་ནས་སྒྲུབ་བླ་མ་ཀརྨ་མཆོག་གསལ་སོགས་ལྔ་སྡེས་བཀྲ་ཤིས་པའི་རྟེན་དང་བཅས་དོན་གཉེར་ཆེན་པོས་བསྐུལ་ངོར། དཔལ་ལྡན་ཇོ་ནང་པའི་བསྟན་དང་དེ་ཡིས་གདུལ་བར་བྱ་བ་རྣམས་བདུད་ཀྱི་གཡུལ་ལས་རྣམ་པར་རྒྱལ་ཞིང་དགེ་ལེགས་ཀྱི་དཔལ་ཡོན་དབྱར་མཚོ་ལྟར་འཕེལ་བའི་དོན་ལ་ཆེད་དུ་དམིགས་ཏེ། རྡོ་རྗེ་ཕུར་པའི་རྒྱུད་ལུང་མན་ངག་བཀའ་གཏེར་གྱི་བཀའ་སྲོལ་དུ་མ་ཐོས་ཤིང་སྦོབས་པ་ཅུང་ཟད་ཐོབ་པ། བྱམས་མགོན་ཏཱའི་སི་ཏུའི་བཀའ་འབངས་པདྨ་གར་གྱི་དབང་ཕྱུག་རྩལ་ལམ། མིང་གཞན་བློ་གྲོས་མཐའ་ཡས་ཀྱིས་པདྨ་སཾ་བྷའི་རྒྱ་གཞུང་གཉགས་ལོ་ཡེ་ཤེས་གཞོན་ནུས་བསྒྱུར་བའི་འཕྱོང་ཆེན་རྩ་འགྲེལ། འབྲེལ་པ་འབུམ་ནག་སོགས་ཀྱི་དགོངས་པ་བདག་ཆེན་རྒྱ་གར་བ་དང་། ས་ལོ་ཆེན་པོའི་གསུང་ཚོགས་གཞིར་བཞག །ཀུན་གཟིགས་མཁྱེན་བརྩེའི་དབང་པོའི་ཞལ་ལུང་ལ་རང་རྟོག་གིས་མ་བསླད་
པར་དཔལ་སྤུངས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་སྦྱར་བ་བསྟན་འགྲོ་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །དགེ་ལེགས་འཕེལ།། །།