ལིང་ཁྲུས་ནོར་བུ་ཆུ་དྭངས།
ལིང་ཁྲུས་ནོར་བུ་ཆུ་དྭངས་བཞུགས་སོ། །ན་མོ་གུ་རུ་ཀརྨ་ཧེ་རུ་ཀཱ་ཡ། མནན་སྲེག་འཕང་བའི་སྦྱོར་བ་ལ་ཞུགས་པའི་ལིངྒ་གང་ཡིན་ཀྱང་རུང་སྟེ། རང་ལ་སོགས་པའི་ཁ་རླངས་དྲི་མ་སོང་བར་དོགས་ནས་ལིང་ཁྲུས་ཚད་ལྡན་བྱ་དགོས་ཤིང་། དེ་ལ་གསར་མ་འགའ་ཞིག་གི་ཕྱག་སྲོལ་དུ། རྣམ་འཇོམས་ཀྱིས་བསྒྲུབས་པའི་བུམ་ཆུས་ལིངྒའི་གཟུགས་བརྙན་མེ་ལོང་དུ་ཤར་བ་ལ། ས་འདི་དུག་གི་སོགས་དང་། ཨ་བྷི་ཥེ་ཀ་ཏེའི་སྔགས་བརྗོད་ཅིང་བཀྲུ་བ་ཡིན། རྙིང་མའི་མན་ངག་འདྲ་མིན་འགའ་ཞིག་མཆིས་ཀྱང་། རྒྱུན་གྱི་ལག་ལེན་གྱི་གཙོ་བོ་གཉིས་ཏེ། དེ་ལ་སྤྱི་ཙམ་དུ་འབྱུང་བཞིས་སྦྱོང་བ་ལ། དང་པོ་རང་གྲིབ་སྦྱོང་བ་ནི། །རང་ཉིད་ཐ་མལ་གསལ་བ་ཡི༔ སྤྱི་མགྲིན་སྙིང་ཁའི་གནས་གསུམ་དུ༔ རྡོ་རྗེ་སེམས་དཔའ་དཀར་དམར་མཐིང་༔ གསལ་བའི་སྐུ་ལས་བདུད་རྩིའི་རྒྱུན༔ བབས་པས་སྒོ་གསུམ་སྒྲིབ་དག་གྱུར༔ ཡིག་བརྒྱ་བཟླས། སླར་ཡང་གནས་གསུམ་རྡོར་སེམས་ཀྱི༔ སྐུ་ལས་འོད་ཟེར་ཡར་འཕྲོས་པས༔ རབ་འབྱམས་ཞིང་གི་རྒྱལ་བ་མཆོད༔ ཐུགས་རྗེའི་བྱིན་རླབས་ཚུར་འདུས་པས༔ བདག་གི་གནས་གསུམ་ཐིམ་པ་ཡིས༔ ཉམས་ཆག་ཉེས་ལྟུང་དྲི་མ་སྦྱངས༔ ཕ་རོལ་བྱད་མའི་བསམ་ངན་གྱིས༔ གནོད་བྱེད་ཉེས་ཚོགས་ཐམས་ཅད་སྦྱངས༔ ཡིག་བརྒྱའི་ཤམ་བུར། ཨེ་ཧོཿཤུདྡྷེ་ཤུདྡྷེ། བཾ་ཧོཿཤུདྡྷེ་ཤུདྡྷེ། རཾ་ཧོཿཤུདྡྷེ་ཤུདྡྷེ། ལཾ་ཧོཿཤུདྡྷེ་ཤུདྡྷེ། ཨ་ཧཾ་རཾ། ཨ་ནེ་
རཾ། བི་ན་ཤུདྡྷེ་སྭཱ་ཧཱ། ཨ་ཨ་ཨ་སྭཱ་ཧཱ། ཞེས་པ་བདུན་ནམ་ཉེར་གཅིག་བཟླས། སྨན་སྤོས་ཆུར་བཏབ་བཏུང་ཞིང་བྱུགས། ཉེས་ཚོགས་ཐམས་ཅད་དག་པར་བསམ། དེ་ནས་ལིངྒིིའི་དྲི་མ་སྦྱོང་བ་ནི། བྱེ་མ་གཤེར་ལྡན་གྱིས་ཕྱི་ནང་ལེགས་པར་འཕུར་ཞིང་། སྲིད་པ་བྱེ་མའམ་ཞིང་ས་གཙང་མས་བསྐོར་ཞིང་། ལཾ་ཧོཿཤུད་དྷེ་ཤུད་དྷེ་ཡེ་སྭཱ་ཧཱ། ཆུ་མིག་ལྐུགས་པའམ་ཕུག་རྡུགས་ཀྱི་ཆུས་འཐོར་ཞིང་། བྃ་ཧོཿཤུད་དྷེ་ཤུད་དྷེ་ཡེ་སྭཱ་ཧཱ། བྲ་རྐང་ངམ་ཤིང་ཚེ་ཟད་ཀྱིས་མེས་སྐོར་ཞིང་། །རཾ་ཧོཿཤུད་དྷེ་ཤུད་དྷེ་ཡེ་སྭཱ་ཧཱ། ཕོ་རོག་དང་འུག་སྒྲོས་རླུང་གཡབ་ཅིང་། །ཡཾ་ཧོ་ཤུད་དྷེ་ཤུད་དྷེ་ཡེ་སྭཱ་ཧཱ། ཞེས་གསུམ་གསུམ་དང་། གོང་གི་རང་སྒྲིབ་སྦྱངས་པའི་སྔགས་བརྒྱ་རྩ་གཅིག་བཟླས་རྗེས། ཨེ་ཧོཿཤུད་དྷེ་ཤུད་དྷེ། ཡཾ་ཧོཿ༴ བཾ་ཧོཿ༴ཁཾ་ཧོཿ༴ རཾ་ཧོཿཤུད་དྷེ་ཤུད་དྷེ། ཞེས་ཉེར་གཅིག་རེ་དང་། ཨ་ན་རཾ་ བི་ན་རཾ་ཤུད་དྷེ་ཤུད་དྷེ་ཨ་ཨ་ཨ་སྭཱ་ཧཱ། ཞེས་སྔགས་རེ་རེའི་མཇུག་ཏུ་ལིངྒ་བར་སྣང་ལ་གཡབ་ཅིང་། རྣལ་འབྱོར་པ་བདག་ཅག་འཁོར་དང་བཅས་པ་ཐམས་ཅད་ཀྱི་ལུས་ཀྱི་དྲི་མས་མ་གོས། ངག་གི་དྲི་མས་མ་གོས། ཡིད་ཀྱི་དྲི་མས་མ་གོས། ལུས་ངག་ཡིད་གསུམ་གྱི་དྲི་མས་མ་གོས་སོ། །ཨེ་ཧོཿཤུད་དྷེ་ཤུད་དྷེ། ཡཾ་ཧོཿ༴ བཾ༴ ཁཾ༴ རཾ༴ ཨེ་ན་རཾ་བི་ན༴ དབུགས་ཐེང་གཅིག་ལ་ཨ་རྐྱང་ཉེར་གཅིག་བརྗོད་པས་ཐམས་ཅད་སྟོང་པར་བལྟའོ། །ཁྱད་པར་གཤེད་སྐོར་བ་སོགས་ཀྱི་ཕྱག་བཞེས་ལྟར་ན། མདུན་ཏུ་ཆུ་གཙང་སྡེར་
གང་བཞག །སྟོང་པའི་ངང་ལས། ཆུའི་སྟེང་དུ་པཾ་ལས་པདྨ་དང་རཾ་ལས་ཉི་མ་ཨ་ལས་ཟླ་བའི་དཀྱིལ་འཁོར། དེ་ཡི་སྟེང་དུ་བཾ་ལས་ལྷ་མོ་དཀར་མོ༔ ཞལ་གཅིག་ཕྱག་གཉིས་མ༔ གཡས་མཆོག་སྦྱིན་དང་གཡོན་པས་པདྨ་དམར་པོ་བསྣམས་པ༔ ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ༔ སྐུ་ལ་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པར་བསམ་མོ༔ རང་ཉིད་ཡི་དམ་ལྷའི་ཐུགས་ཀ་ནས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས་དམ་ཚིག་པ་ལ་གཉིས་སུ་མེད་པར་ཐིམ༔ བཛྲ་ས་མཱ་ཛཿཛ༔ ཛཿཧཱུྃ་བཾ་ཧོཿ ལྷ་མོའི་མཆོག་སྦྱིན་གྱི་མཐིལ་ནས་བདུད་རྩིའི་རྒྱུན་བབ། ལིངྒ་ལ་ཁྲུས་བྱས་པས་རང་གི་ཁ་རླངས་དང་དྲི་མ་ལ་སོགས་པ་ཐམས་ཅད་སང་གིས་དག་པར་བསམ། ལིངྒ་མེ་ལོང་དུ་ཤར་བ་ལ་ཕུད་སྐྱོགས་ལྟ་བུ་ཆུ་ཕྱར་བས་ཁྲུས་བྱེད་ཅིང་། ཧཱུྃ། མ་མ་ཀ་བྱ་ཡེ་འཆང་བ་པོ་ཧཱུྃ་མ་མ་ཀ་བྱ་ཡེ་སྭཱ་ཧཱ༔ ཞེས་བརྒྱའམ་ཉེར་གཅིག་བརྗོད། ལྷ་མོ་མི་དམིགས་པར་གཤེགས། ཆུ་ཕྱིར་ཕོ། །ལིངྒ་ལ་ཡི་དམ་རང་གཞུང་ལྟར་འགུགས་གཞུག་ལན་གསུམ་བྱ། ཡང་ཆུ་གཙང་སྡེར་གང་བཤམས། སྟོང་པའི་ངང་ལས་སོགས་ལྷ་མོ་གོང་ལྟར་བསྐྱེད། ལྷ་མོའི་མཆོག་སྦྱིན་གྱི་ཕྱག་རྒྱའི་མཐིལ་ནས་ཡེ་ཤེས་ཀྱི་ཆུ་བྱུང་། དགྲ་བོའི་ཁ་རྗེ་དབང་ཐང་དང་། ཚེ་དང་ལོངས་སྤྱོད་བཀྲག་དང་གཟི་མདངས་ཐམས་ཅད་ཆུ་ཡི་ནང་དུ་བཀྲུས་
པར་བསམ། འབྲུ་གསུམ་བརྗོད་ལ་ཁྲུས་སྔར་བཞིན་བྱས། མཐར། ལྷ་མོ་འོད་དུ་ཞུ་ནས་ཆུར་འདྲེས་པར་གྱུར། ཆུ་དེ་འཐུང་། བདག་ཚེ་དང་བསོད་ནམས་བཀྲག་མདངས་དང་ལྡན་པར་གྱུར། ལྷག་མ་གནས་ཁང་ལ་གཏོར་ཏེ། གནས་ཁང་བྱིན་རླབས་གཟི་བརྗིད་ཕུན་སུམ་ཚོགས་པ་དང་ལྡན་པར་གྱུར། ཞེས་མོས། དེ་ནས་ལིངྒ་སྐྱེར་རྐམ་ལྟ་བུར་བཅིར་ལ་རླུང་ཁར་གཡུག་པ་དང་རྫས་ངན་དུད་པས་བདུག་པ་སོགས་བྱས་ལ། ཡ་མ་རཱ་ཙ་རླུང་ལིང་སོང་༔ མ་ཆགས་སོང་སོང་༔ ཀུ་ཏ་ཡ་ཧཱུྃ༔ དགྲ་བོའི་ལྷ་རྣམས་སྲན་ཕུང་ལ་རྡོ་ཕོག་པ་ལྟར་བྱེར་བས་སྐྱབས་རྟེན་དང་བྲལ་ནས། འབྲུག་ཐང་ལ་ལྷུང་བ་ལྟར་གྱུར་པར་མོས་ལ་སླར་རང་གི་དྲི་མ་མ་ཤོར་བར་བལྟེབས་ཆག་སོགས་བྱའོ། །ཞེས་པའང་གྲོང་སྔགས་པ་རྣམས་ལ་ཕན་པའི་སེམས་ཀྱིས་པདྨ་གར་དབང་གིས་བསྡེབས་པ་དགེ་ལེགས་འཕེལ། །