རྡོ་རྗེ་ཕུར་པའི་མངོན་སྤྱོད་ལས་ལ་ཉེ་བར་མཁོ་བའི་ཡིག་ཆུང་སྦས་པ་མིག་འབྱེད།
རྡོ་རྗེ་ཕུར་པའི་མངོན་སྤྱོད་ལས་ལ་ཉེ་བར་མཁོ་བའི་ཡིག་ཆུང་སྦས་པ་མིག་འབྱེད་ཅེས་བྱ་བ་བཞུགས་སོ། །
སྲིད་བཅུད་རྡོ་རྗེ་ཕུར་བུ་ཡིས། །ཐལ་འབྱིན་ཡེ་ཤེས་གཞོན་ནུའི་སྐུར། །བཏུད་ནས་དྲག་སྔགས་བརྣག་པའི་གཟེར། །བློ་དམན་བརྡ་འགྲོལ་ཅུང་ཟད་སྤེལ། །དེའང་རིག་
པ་མཆོག་གི་རྒྱུད་ཆེན་པོ་ལས་བྱུང་བ་རྩ་ཐུང་གི་དགོངས 
་འགྲེལ་བཀའ་གཏེར་གྱི་བབ་སོ་མཐའ་ཡས་ པ་རྣམས་ཀྱི་དགོངས ་དོན་བསྡུ་ན། རང་དོན་བྱང་ཆུབ་སྒྲུབ་པ། །གཞན་དོན་ཚོམ་བུ་ཚོགས་སྒྲུབ། གློ་བུར་ཅོག་རྡུང་རལ་གྲི་ཕྱུང་རྡེག་ཏུ་སྒྲུབ་པ་གསུམ་དུ་འདུ་ཞིང་། དེ་རེ་རེ་ལའང་བསྙེན་སྒྲུབ་ལས་སྦྱོར་གསུམ་གསུམ་ཡོད་པ་ལས། །འདིར་སྔ་འགྱུར་བཀའ་མའི་ནང་ཚན་ཕུར་པ་འཁོན་ལུགས་དང་འབྲེལ་བར་གློ་བུར་ཅོག་རྡུང་གི་ལས་སྒྲུབ་པ་སྐབས་སུ་བབས་པ་ན། །གཙོ་བོར་ཕུར་པ་གྲུབ་ན་གདབ་ལས་བྱ་ཞེས་པས་མངོན་སྤྱོད་ཀྱི་གཙོ་བོ་ནི། །
ཡང་འགྲེལ་སོ་དྲུག་དང་འབྲེལ་བར་གདབ་ལས་ཉིད་ཡིན་ལ། མནན་སྲེག་འཕང་གསུམ་ནི་བསྒྲལ་ལས་ཀྱི་མཐའ་སྡུད་ཡིན་པའི་ཕྱིར། །འདིར་ཡང་སྔགས་དམིགས་གདབ་ལས་རྣམས་དགོས་དོན་གྱི་གཙོ་བོ་དང་། འཕང་བའི་ལས་གཏོར་ཟློག་ནི་ཞར་བྱུང་ཡན་ལག་ཡིན་པ་གོ་བར་བྱས་ནས། གཏོར་སྒྲུབ་ཀྱི་ཉིན་སྔ་མ་རྣམས་སུ་བསྐྱེད་བཟླས་གཙོར་བཏོན་དགོས་ལ། དེའང་བཟླས་པའི་སྐབས་ཐོག་མར་འཛབ་ཁང་ཕྱེས་ནས་འགལ་མེ་ཚྭ་ཚྭ་བུང་བ་ཚང་ཞིག་སྟེ་ དགོངས་པ ་གསུམ་གཞུང་གསལ་སྦྱར་ནས་ཀཱི་ལ་ཡ་ཅི་ནུས་བཟླ་བ་ནི་འདིའི་ལུགས་ཀྱི་བསྙེན་པ་ཡིན། དེ་ནས་སྒྲུབ་པའི་དོད་དུ་སྲུང་ཟློག་བསད་གསུམ་གྱི་དམིགས་པ་ནི། །རང་གི་སྙིང་གར་ཡེ་ཤེས་སེམས་དཔའི་ཐུགས་ཀར་རྡོ་རྗེ་
རྩེ་ལྔ་པའི་ལྟེ་བར་རང་གི་སེམས་ཧཱུྃ་ཡིག་སྔོན་པོ་འོད་འབར་བའི་ཀླད་ཀོར་གྱི་ནང་དུ་བླ་མ་ཞལ་བཞུགས་པ་རྣམས་ཀྱི་མཚན་ཡིག་དང་པོ་ཐིག་ལེས་བརྒྱན་པ། མདུན་དུ་ཕ་མ། གཡས་སུ་བུ་དང་ཆུང་མ། གཡོན་དུ་སྤུན་ཟླ། རྒྱབ་ཏུ་འཁོར་གཡོག །འོག་ཏུ་ནོར་རྫས་རྣམས་ཡོད་པར་བསམས་ལ། རང་གི་སྙིང་ག་ནས་འོད་འཕྲོས་བསྲུང་བྱ་རྣམས་ཀྱི་ལུས་ངག་ཡིད་གསུམ་བཀུག་ནས་སྔར་གྱི་གནས་སུ་འཁོད། འོད་ཟེར་གྱིས་རང་དང་བསྲུང་བྱའི་ནད་གདོན་སྡིག་སྒྲིབ་ཐམས་ཅད་ཕྱིར་བཏོན་ནས་ལུས་ཐམས་ཅད་ལ་རྡོ་རྗེའི་གོ་ཆ་གྱོན་པར་བསམ་པ་ནི་ལུས་སྲུང་བ། རང་གི་ལྕེ་ཧཱུྃ་ལས་རྡོ་རྗེ་རྩེ་ལྔ་པ་ཧཱུྃ་གིས་མཚན་པའི་རྭ་རྣམས་ལ་ཀཱི་ལ་ཡའི་སྔགས་ཕྲེང་བཀོད་པ་ལས་འོད་ཟེར་འཕྲོས་པས། ངག་གི་ཉེས་སྐྱོན་དག་པར་བསམ་པ་ནི་ངག་སྲུང་བ། སྙིང་ཁའི་ཏིང་ངེ་འཛིན་སེམས་དཔའ་དེ། །རང་དང་རྡོ་རྗེ་གཞོན་ནུའི་ཐུགས་གཉིས་སུ་མེད་པར་བསམ་པ་ནི་ཡིད་སྲུང་བ་སྟེ་ཀཱི་ལ་ཡ་བཟླའོ། །སླར་ཡང་བསྙེན་དམིགས་སྐབས་ལྟར་བྱིན་རླབས་བསྡུ་བ་ཁྱད་པར་བ་སྦྱོར་ནས། །ཀཱི་ལ་ཡའི་གཤམ་དུ། ས་མ་ཡ་ཨཱ་བེ་ཤ་ཡ་སྟཾྭ། ཞེས་བཏགས་པ་དང་། ཀཱི་ལ་ཡ་འབྲུ་དགུའི་བཤམ་དུ། །མ་མ་ཀཱ་བ་ཙི་རཀྵ་རཀྵ། བཏགས་པ་ཅུང་ཟད་རེ་བཟླ་བ་ནི་ལུགས་གཞན་ལ་ཞིག་སྟེ་སྤྲོ་ན་བྱ། དེ་ནས་རང་གི་སྙིང་ག་ནས་འོད་ཟེར་འཕྲོས་པས་ཁྲོ་བོ་བཅུ། ཁྲ་ཐབས་
ཉི་ཤུ། སྒོ་མ་བཞི། དམ་ཅན་རྣམས་བསྐུལ་ཏེ་དེ་དག་ལས་སྤྲུལ་པ་ཡང་སྤྲུལ་དང་ཉིད་སྤྲུལ་གྲངས་མེད་པ་སྤྲོས། དགྲ་བགེགས་ཀྱི་ལུས་ངག་ཡིད་གསུམ་རྣམས་ཕྱེ་མར་བྱས་ཤིང་ཁྲོ་བོ་ཁྲ་ཐབས་སྒོ་མ་རྣམས་ཀྱང་ཞལ་ཕྱིར་གཟིགས་ཏེ། གནོད་པ་ཕྱིར་བཟློག་པའི་ལས་མཛད། འཁོར་ལོ་ཡང་གཡོན་དུ་འཁོར་བར་བསམ་པ་ཟློག་པའི་དམིགས་པའོ། །འཁོར་ལོའི་རྩིབས་བར་རྣམས་སུ་ཡཾ་ལས་རླུང་། རཾ་ལས་མེའི་སྟེང་དུ་བྱད་མ་ལུས་རིང་བ། སྐྲ་འཛིངས་པ་ཁ་ནས་ཁྲག་སྐྱུགས་པ། སྤྱིའུ་ཚུག་ཏུ་གནས་པ་རེ་བསམ། རང་གི་སྙིང་ཁ་ནས་ཕོ་ཉ་ལྕགས་ཀྱུ་དང་ཞགས་པ་ཐོགས་པ་མང་པོ་སྤྲོས་ནས། དགྲ་བགེགས་གང་ན་གནས་པའི་ཡུལ་ནས་གཟུགས་དང་རྣམ་ཤེས་རང་དབང་མེད་པར་བཀུག་ནས། རྩིབས་བར་གྱི་བྱད་མ་རྣམས་ལ་བསྟིམ། རང་དང་བསྲུང་བྱའི་ནད་གདོན་སྡིག་སྒྲིབ་ཐམས་ཅད་བྱད་མའི་ལུས་ཀྱི་བུ་ག་དགུ་ནས་ཐིམ་སྟེ་ཞུགས་པས་འཁོར་ལོའི་རྩིབས་གཡོན་དུ་མྱུར་དུ་འཁོར་བས་འོག་གི་རླུང་མེས་བསྐྱོད་ཅིང་། རྩིབས་རྣམས་རལ་གྲིའི་སོ་ལྟ་བུས་དགྲ་བགེགས་ཀྱི་ལུས་དུམ་བུ་དུམ་བུར་གཏུབ། ལྷག་མ་ཕོ་ཉས་ཟོས་བརླག་པར་བྱས་པར་བསམ་པ་ནི་བསད་པ་སྟེ་དེ་དག་གི་སྐབས་སུ། །མ་རཀྨོ་མ་རཀྨོ་སོགས་དང་། བྷཱ་ཡ་ནི་བཟླའོ། །འགུགས་འདྲེན་སྐབས། ཨེ་རཾ་སོགས་བརྗོད་པའི་ཚེ་ཡེ་ཤེས་ཀྱི་དཀྱིལ་
འཁོར་ལས་དཀྱིལ་འཁོར་གཉིས་པ་ཆད་བདག་གི་དཔུང་དང་གྲོགས་སུ་བྱོན། རང་དཔལ་ཆེན་ཡབ་ཡུམ་དུ་གསལ་བ་ཤིན་ཏུ་ཁྲོས་པ་སྤྱན་གསུམ་ནམ་མཁའ་ལ་བགྲད། ཞབས་ས་ལ་རྗེབ་ཅིང་བཞད་སྒྲ་དྲག་པོ་སྒྲོགས་པའི་ངང་ཚུལ་ཅན་གྱི་ཐུགས་ཀ་ནས་འོད་ཟེར་ནག་པོ་ཚ་ཞིང་རྩུབ་པ་བསྐལ་པའི་མེ་ལྟ་བུ་དཔག་ཏུ་མེད་པ་འཕྲོས། ཁྱམས་དང་འགྲུབ་ཁུང་གི་ཕྱིན་བཞུགས་པའི་ཕུར་སྲུང་དམ་ཅན་རྒྱ་མཚོའི་ཚོགས་ལ་ཕོག་པས་དེ་དག་ཐམས་ཅད་འཇིགས་ཤིང་སྐྲག་སྟེ་རང་དབང་མེད་པར་སྲོག་སྙིང་ཐམས་ཅད་བདག་ལ་ཕུལ། བདག་གིས་ཇི་ལྟར་བསྒོ་བ་བཞིན་ཉན་པར་བསམ། ཡང་འོད་ཟེར་དེས་སྲས་མཆོག་སྒོ་མ་ཁྲ་ཐབས་ཁྲོ་བཅུ་ཡབ་ཡུམ་དཔལ་ཆེན་ཡབ་ཡུམ་དང་བཅས་པ་ལ་ཕོག་པས་དེ་རྣམས་ཀྱི་ཐུགས་དམ་དང་ཐུགས་རྒྱུད་རང་དབང་མེད་པར་བསྐུལ་ཏེ་ཁྲོ་འཁྲུགས་རྔམས་པས་རང་རང་གི་ཐུགས་ཀ་ནས་རང་འདྲའི་སྤྲུལ་པ་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་ཐོ་བ་རལ་གྲི་ལ་སོགས་པ་མཚོན་ཆ་དཔག་ཏུ་མེད་པ་ཐོགས་པའི་ཕོ་ཉ་རླུང་གི་ཤུགས་ཅན་གཤིན་རྗེའི་སྐྱེས་བུ་ལྟ་བུ་དཔག་ཏུ་མེད་པ་སྤྲོས། དེ་དང་དུས་མཉམ་དུ་ཕུར་སྲུང་དམ་ཅན་རྒྱ་མཚོའི་ཚོགས་ཀྱིས་ཀྱང་རང་རང་གི་བཀའ་ཉན་དྲེགས་པ་སྡེ་བརྒྱད་ཀྱི་དམག་དཔུང་དང་བཅས་པ་ཆས་ཏེ་སྟོང་གསུམ་འཇིག་རྟེན་གྱི་ཁམས་གང་། དེ་དག་ན་གནས་པའི་བསྒྲལ་བའི་ཞིང་བཅུར་གྱུར་པའི་དགྲ་བགེགས་ཇི་སྙེད་མཆིས་
པ་དེ་ཐམས་ཅད་ཀྱི་སྙིང་ཁ་ནས་ལྕགས་ཀྱུས་བཀུག །མགྲིན་པ་ནས་ཞགས་པས་བཅིངས། མཚོན་ཆ་ལྷག་མ་རྣམས་ཀྱིས་རྒྱབ་ནས་དེད་དེ་ཁོ་རང་གི་ལས་ལས་གྲུབ་པའི་རླུང་དམར་གྱིས་རྒྱབ་ནས་ཕུལ། མུན་ནག་གིས་མདུན་བསུས་ཏེ། ཁོ་རང་གི་གཟུགས་བརྙན་གྱི་དྲུང་དུ་སླེབས་པ་དང་། དེ་ཉིད་ལ་འཇུག་འདོད་ཀྱི་བསམ་པ་དྲག་པོ་དང་ལྡན་པར་བསམ་སྟེ། སློབ་དཔོན་གྱིས་རྡོར་དྲིལ་ཧཱུྃ་མཛད་ཀྱི་ཕྱག་རྒྱས་བཟུང་ལ་འགུགས་གཞུག་གི་རོལ་འོག་ཏུ་སྔགས་བརྗོད་ཅིང་། ཕྱག་རྒྱ་དེ་ཉིད་དཔྲལ་བའི་དབྱིངས་ནས་གཡས་ཕྱོགས་སུ་བསྐོར་ཞིང་ལིངྒའི་སྟེང་དུ་ཕབ། དེ་བཞིན་དུ་གཡོན་དབུས་རྣམས་སུ་བསྐོར་ཞིང་ལིངྒའི་སྟེང་དུ་ཕབ་པའི་མཐར། རྡོ་རྗེ་སྙིང་ཁར་བཟུང་། དྲིལ་བུ་ལིངྒ་ལ་གཡས་བསྐོར་བྱ་ཞིང་དཀྲོལ། མཆོད་གཡོག་པས་གུ་གུལ་གྱི་དུད་པ་ཆེས་ཆེར་བྱ་ཞིང་ལིངྒ་ལ་བདུག་གོ། །དེ་ནས་ལྕགས་ཀྱུའི་ཕྱག་རྒྱ་བྱ་ཞིང་། ཨོཾ་བཛྲ་ཨངྐུ་ཤ་ཛཿཞེས་བརྗོད་པས་རྡོ་རྗེ་གནོད་སྦྱིན་མོ་ཤིན་ཏུ་ཁྲོས་པས་དགྲ་བགེགས་ཀྱི་སྙིང་ག་ནས་ལྕགས་ཀྱུས་བཟུང་སྟེ་ལིངྒའི་སྤྱི་བོར་ཁྲིད་པས། ཆུའི་ཁམས་ཉམས་པར་བྱས། ཞགས་པའི་ཕྱག་རྒྱ་བཅས་ལ། ཨོཾ་བཛྲ་པཱ་ཤ་ཧཱུྃ་ཞེས་བརྗོད་པས་རྡོ་རྗེ་འཇིགས་བྱེད་མ་རབ་ཏུ་ཁྲོས་པས་དགྲ་བགེགས་དེ་ལིངྒའི་སྤྱི་བོ་ནས་བསྟིམ་ཡན་ལག་ཐམས་ཅད་ཞགས་པ་ནག་པོས་དམ་དུ་བཅིངས་པས་སའི་ཁམས་ཉམས་པར་བྱས། ལྕགས་སྒྲོག་གི་ཕྱག་རྒྱ་བྱས་ལ། ཨོཾ་བཛྲ་སྥོ་ཊ་བཾ་ཞེས་བརྗོད་
པས་རྡོ་རྗེ་བདུད་རྩི་མ་རབ་ཏུ་ཁྲོས་པས་ལིངྒ་དགྲ་བགེགས་སུ་གསལ་བའི་རྐང་ལག་ལུས་པོ་ཐམས་ཅད་ལྕགས་སྒྲོག་གིས་དམ་དུ་བཅིངས་པས་བསྒྲལ་ལས་མ་བྱས་ཀྱི་བར་དུ་ལིངྒ་དང་རྣམ་ཤེས་སྐད་ཅིག་ཀྱང་འདུ་འབྲལ་མེད་པར་བྱས་ཏེ་མེའི་ཁམས་ཉམས་པར་བྱས། དྲིལ་བུའི་ཕྱག་རྒྱ་བཅའ་ཞིང་དྲིལ་བུ་དཀྲོལ་ལ། ཨོཾ་བཛྲ་གྷཎྜེ་ཧོཿཞེས་བརྗོད་པས་རྡོ་རྗེ་གསོད་བྱེད་མ་རབ་ཏུ་ཁྲོས་པས་ལིངྒ་དགྲ་བགེགས་སུ་གསལ་བའི་དབང་པོའི་གནས་ལྔར་དྲིལ་བུ་དྲག་ཏུ་དཀྲོལ་ཞིང་ཞབས་ཀྱིས་བརྫིས་པས་དགྲ་བགེགས་དེ་དྲན་མེད་དུ་བརྒྱལ་ཞིང་སེམས་དབང་མྱོས་པས་རླུང་གི་ཁམས་ཐམས་ཅད་ཉམས་པར་བྱས་པར་བསམ། ཉིན་ཐ་མར་དྲག་པོའི་ལས་ལ་སྦྱོར་བའི་ཚེ། གསུམ་པ་ལྷ་སྲུང་སྤྱན་དྲང་བའི་སྐབས་སུའང་འགུགས་གཞུག་གི་ཕྱག་རྒྱ་དེ་ཉིད་ལས་མཛུབ་མོ་གཉིས་རང་གི་སྙིང་ཁའི་ཐད་དུ་ཡང་ཡང་ནང་དུ་བཀུག །ཚེ་སྲོག་ཡེ་ཤེས་སུ་གྱུར་པའི་ དགོངས་པ ་ནི། རང་རྡོ་རྗེ་གཞོན་ནུར་གསལ་བའི་ཐུགས་ཀ་ནས་འོད་ཟེར་སྔོན་པོ་འཕྲོས་མདུན་གྱི་ལིངྒ་དགྲ་བགེགས་དངོས་སུ་གསལ་བའི་སྙིང་ཁར་ཕོག་པས་ཕུང་པོ་ལྔ། སྐྱེ་མཆེད་བཅུ་གཉིས། ཁམས་བཅོ་བརྒྱད་ཀྱི་ལྷ་དང་། གཞན་ཡང་འགོ་བའི་ལྷ་ལྔ་སོགས་སྲུང་སྐྱོབ་བྱེད་པའི་ལྷ་རྣམས་དང་། ཁ་རྗེ། དབང་ཐང་། ཀླུང་རྟ་ལ་སོགས་པའི་ལྷ་ཐམས་ཅད་དང་། གཞན་ཡང་དེའི་རྒྱུད་ལ་ཡོད་པའི་བླ་མ་རྣམས་ཀྱི་དབང་བསྐུར་གྱི་བྱིན་རླབས་དང་། ཡི་
དམ་གྱི་བཟླས་བསྒོམ། སྲུང་འཁོར། རྟེན་འབྲེལ་རྫས་ཀྱི་བྱིན་རླབས་ནུས་མཐུ་ཐམས་ཅད་དང་། ཚེ་དང་བསོད་ནམས་དཔལ་དང་འབྱོར་པ་འཁོར་དང་ལེགས་ཚོགས་ཀྱི་ཡོན་ཏན་ཐམས་ཅད་རྡོ་རྗེ་གཞོན་ནུའི་སྐུའི་རྣམ་པར་སྤྱན་དྲངས་ནས་རང་གི་སྙིང་ཁར་ཐིམ་པས་རང་གི་ཚེ་དང་བསོད་ནམས་དཔལ་འབྱོར་ཐམས་ཅད་རྒྱས། གཟི་བརྗིད་ནུས་པ་སྔར་བས་ཀྱང་ཆེས་ཆེར་ལྷག་པར་གྱུར། དགྲ་བགེགས་དེ་ཉིད་མེ་ཏོག་སད་ཀྱིས་ཁྱེར་བའམ། སྦྲང་བུ་ཉི་མས་ཚིག་པ་ལྟར་ནག་ཆོམ་ཆོམ་གྱུར་ཅིང་མགོན་སྐྱབས་ཐམས་ཅད་དང་བྲལ་བར་བསམ། དབང་གཟུག་སྐབས། སློབ་དཔོན་གྱིས་རྡོ་རྗེ་སྙིང་ཁའི་ཐད་ནས་སྡིགས་མཛུབ་ཕྱིར་ཕྱོགས་པས་གཟུང་དྲིལ་བུ་དཀུ་གཡོན་པར་འགྱིང་ཞིང་བཟུང་ལ། མདུན་གྱི་ནམ་མཁར་བླ་མ་ཡི་དམ་སངས་རྒྱས་བྱང་སེམས་ཆོས་སྐྱོང་སྲུང་མའི་ཚོགས་སྤྱི་དང་། ཁྱད་པར་རྡོ་རྗེ་གཞོན་ནུའི་ལྷ་ཚོགས་འཁོར་དང་བཅས་ པ་ལ་དབང་པོར་གསོལ་བས་དེ་དག་གིས་རང་ཉིད་བདེན་པར་དགོངས ་ཤིང་། དགྲ་བགེགས་དེ་ཉིད་ལ་རེ་ཞིག་ཐུགས་ལྷག་པར་ཁྲེལ་ཏེ་བསྒྲལ་བའི་ལས་མཛད་པ་ལ་ དགོངས་པ ་རྩེ་གཅིག་ཏུ་གཏད་པར་བསམ། ས་བཅད་དྲུག་པའི་སྐབས་འགྲེལ་པ་འབུམ་ནག་དང་བཀའ་མའི་ཡིག་ཆ་རྣམས་ལས། འདེབས་པའི་ཕུར་པ་དྲུག །རྫས་དང་སྔགས་དང་ཕྱག་རྒྱའི་གནད་དྲུག་སོགས་རྒྱས་པར་གསུངས་པ་གནད་དུ་ཆེའང་། ངན་སྔགས་ཉེ་བར་བསྙེན་པའི་སྐབས་ཆེད་དུ་མི་
རུང་ཞིང་གཏོར་ཟློག་དཀྱུས་མ་ཙམ་ལ་དེ་དག་ཇི་ལྟ་བ་བཞིན་གྲུབ་དཀའ་བས། རིག་འཛིན་གོང་མ་རྣམས་ཀྱི་ཕྱག་བཞེས་མདོར་བསྡུས་པ་དེ་ལ་དོན་གྱི་གནད་མ་ཚང་བ་མེད་པའི་ཕྱིར་རེ་ཞིག་མ་སྤྲོས་ལ། དངོས་གཞི་གདབ་ལས་དྲུག་གི་དང་པོ། །ཀུན་གཞི་རྩད་བཅད་དེ་བསྒྲལ་བའི་སྐབས། སྡུག་བསྔལ་ཉམས་སུ་མྱོང་བར་མཛོད། ཅེས་པའི་མཚམས་སུ། །ཀུན་གཞིའི་གནས་ལུགས་གསལ་གདབ་པ་ནི། ལིངྒ་དེ་དགྲ་བགེགས་དངོས་སུ་གསལ་བའི་སྙིང་ཁར་རྩ་བཞི་ནི། །ཆོས་ཉིད་རང་བྱུང་གི་རྩ། གཉིས་མེད་ཡེ་ཤེས་ཀྱི་རྩ། གློ་བུར་རྒྱུན་འཛིན་གྱི་རྩ། སྐྱོན་ཡོན་དབང་པོ་དྭངས་བྱེད་ཀྱི་རྩ་བཞི་བསྡོམས་པའི་དབུས་སུ། ཤའི་དྭངས་མ་བྱིའུ་ལེན་མའི་མགོ་ཙམ་གྱི་ནང་དུ་ཁྲག་གི་དྭངས་མ་མཚལ་ཅོག་ལ་ལྟ་བུ། དེའི་ནང་དུ་རྩའི་དྭངས་མ་དར་དཀར་གྱི་སྐུད་པ་ལྟ་བུས་དྲིལ་ནས་དབུགས་ཀྱི་དྭངས་མ་དྲོད་ཀྱི་རྣམ་པར་གནས་ཤིང་། དེའི་ནང་ན་འོད་ཀྱི་དྭངས་མ་ཉའི་མིག་ཙམ་གྱི་དབུས་སུ་ཚེའི་རྟེན་པ་རྒྱ་ལྟ་བུས་དྲིལ་ནས་རྣམ་པར་ཤེས་པ་ཨ་དཀར་པོའི་རྣམ་པར་གནས་པ་ནི་འཁོར་འདས་ཀུན་གཞིའོ། །དེ་ལྟར་བསམ་ནས་བདག་དཔལ་ཆེན་པོའི་ཕྱག་གཡས་ཀྱི་སོར་མོ་རྣམས་ཁྲག་འཐུང་རིགས་ལྔ། གཡོན་གྱི་སོར་མོ་རྣམས་དབྱིངས་ཕྱུག་ཡུམ་ལྔ། མཉམ་པར་སྦྱོར་བའི་བར་ནས་སྲས་མཆོག་སྤྲུལ་པ་སླར་ཡང་གསལ་བཏབ་སྟེ་གཙོ་བོའི་ཕུར་པ་ཀླད་ལ་བསྐོར་བས་སྐུའི་ལྷ་ཚོགས་འདུས་པར་བསམས་ལ། དེ་བཞིན་དུ་མགྲིན་པ་དང་
སྙིང་ཁར་བསྒྲིལ་པས། གསུང་དང་ཐུགས་ཀྱི་ལྷ་ཚོགས་ནམ་མཁའ་གང་བར་སྤྱན་དྲངས་པར་བསམ། དེ་ནས་ཁྲུས་ལུང་ལ་ཁམས་གསུམ་སེམས་ཅན་གྱི་ཁྲུས་ལུང་། བདག་རྣལ་འབྱོར་པའི་ཁྲུས་ལུང་། ལིངྒ་གཟས་བ་པོའི་ཁྲུས་ལུང་དང་གསུམ་ལས། དང་པོ་ནི་རང་གི་སྙིང་ཁར་ཨ་དཀར་པོ་བསམ་པ་ལས་འོད་ཟེར་འཕྲོས། མདུན་གྱི་ལྷ་ཚོགས་རྣམས་ལ་ཕོག་པས། དེ་དག་གི་ཐུགས་ཀ་ནས་ཨ་དཀར་པོ་བསམ་གྱིས་མི་ཁྱབ་པ་བྱུང་སྟེ། ཁམས་གསུམ་གྱི་སེམས་ཅན་ཐམས་ཅད་ལ་ཕོག་པས། དེ་རྣམས་ཀྱི་སྡིག་སྒྲིབ་སྦྱངས་ཏེ་འོད་ཟེར་དཀར་པོའི་རྣམ་པར་འདུས་ནས་རང་གི་སྙིང་གར་ཐིམ་པར་བསམ་མོ། །གཉིས་པ་བདག་གི་ཁྲུས་ལུང་ནི། སླར་ཡང་མདུན་གྱི་ལྷ་ཚོགས་རྣམས་ལས་ཨ་དཀར་པོ་གྲངས་མེད་པ་བྱུང་སྟེ། རང་གི་ལུས་གང་བས་ཉོན་མོངས་པ་དང་། ཤེས་བྱའི་སྒྲིབ་པ་བག་ཆགས་དང་བཅས་པ་དག་པར་བསམ་མོ། །གསུམ་པ་ལིངྒ་གཟས་པ་པོའི་ཁྲུས་ལུང་ནི་རང་གི་སྙིང་ཁ་ནས་འོད་ཟེར་འཕྲོས་ནས། རང་གི་ལག་ཏུ་ཐོགས་པའི་ཕུར་པ་དེའི་དབུའི་གཙུག་ནས་ཞུགས། ཕུར་པའི་རྩེ་མོར་ཨ་དཀར་པོ་ཅིག་ཏུ་གསལ་བ་ལས་ཨ་དཀར་པོ་འཕྲོས་པས་ལིངྒའི་ནང་གང་བས་ཁོའི་ལས་ངན་ཐམས་ཅད་བྱང་བར་བསམས་ལ་ཕུར་པ་མ་རེག་ཙམ་སྒྲིལ། །དེ་ནས་ཕུར་པ་སྙིང་དཀར་ནག་མཚམས་སུ་གདབ་པས། ཕུར་པའི་འོད་ཟེར་
གྱིས་ཁོའི་རྩ་བཞི་གུར་གྱི་ཚོན་ཐག་བཅད་པ་བཞིན་དུ་གཏུབ། ཤ་དང་ཁྲག་གི་དྭངས་མ་རྡོ་ཚན་ལ་ཁ་བ་བབས་པ་བཞིན་རྟོག་གིས་སྐམ། རྩའི་དྭངས་མ་རྣམས་རྩལ་མེ་བཅུད་པ་བཞིན་ཐུལ་གྱིས་བསྲེགས། དབུགས་དང་འོད་ཀྱི་དྭངས་མ་བྱེ་ཚན་ལ་ཆུ་བླུགས་པ་བཞིན་བཅོམ། ཚེའི་རྟེན་ལ་ཕུར་པའི་འོད་ཟེར་ཕོག་པས། སྦྲང་བུ་མེ་ནང་དུ་ཤོར་བ་བཞིན་ཆོམ་གྱིས། དར་ལ་མ་བཙུགས་པ་ཞེས་པའང་སྣང་། བསྲེགས་ཏེ་རྣམ་པར་ཤེས་པའི་ངོ་བོ་ཨ་དཀར་པོས་བཀྲག་དང་གཟི་བརྗིད་ཐམས་ཅད་ཕུར་པའི་རྩེའི་ཨེ་དེ་ལ་འདུས་པར་བསམ་ཞིང་། ཨོཾ་ལམ་སོགས་ཀྱི་སྔགས་བརྗོད། སླར་ཡང་ཕུར་པ་སྟོན་པ་ཕུར་མགོ་རང་གི་གནས་གསུམ་རེག་ལ། བོ་དྷི་ཙིཏྟ་ཨོཾ། བོ་དྷི་ཙིཏྟ་ཨཱཿ བོ་དྷི་ཙིཏྟ་ཧཱུྃ། ཞེས་བརྗོད་པས་ཁོའི་ཚེ་དང་བསོད་ནམས་བཀྲག་མདངས་ཐམས་ཅད་རང་ལ་ཐིམ་པས། རང་གི་ཚེ་དང་བསོད་ནམས་རྒྱས་པར་བསམ་པ་ནི་བདག་རྣལ་འབྱོར་པའི་ཚེ་ལུང་ངོ། །དེ་ནས་ཕུར་པ་སྒྲིལ་ཏེ་སྔར་ཤུལ་དུ་བཏབ་པས་ཁོའི་རྣམ་པར་ཤེས་པ་ཨ་དཀར་པོ་དེ་ཕུར་པའི་རྩེ་ལ་བླངས་ནས་ཕུར་རྩེ་ནམ་མཁའ་ལ་བསྟན་ཏེ་རང་གི་རླུང་བུས་པས། ཕུར་པའི་དབུས་ནས་ཞུགས་ཏེ་ཁོའི་རྣམ་པར་ཤེས་པ་བྱ་སྒྲོ་རླུང་གིས་བསྐྱོད་པ་བཞིན་སོང་ནས། འོག་མིན་དུ་རྒྱལ་བ་རིགས་ལྔ་སྦྱོར་བ་མཛད་པའི་བར་དུ་སོང་བས་སངས་རྒྱས་པར་བསམ་པ་ནི་ལིངྒའི་ཚེ་ལུང་ངོ། །ཉོན་མོངས་པ་སྐྱེ་བའི་སྒོ་ལྔ་བསྒྲལ་བའི་
སྐབས། ཁྲོ་བཅུའི་ཕུར་པས་མི་དགེ་བ་བཅུ་བཅོམ། ལུས་ཀྱི་རྟེན་བརྒྱད་དུར་ཁྲོད་ཆེན་པོ་བརྒྱད་དུ་གནས་གྱུར་པ་བསམ། ཚོགས་བརྒྱད་སྒྲོལ་སྐབས་ཁྲ་ཐབས་ཕུར་བུ་གདབ་པས་རྣམ་ཤེས་ཚོགས་བརྒྱད་ཞར་བྱུང་གཉིས་དང་བཅུ་པོ་དེ་ཧེ་རུ་ཀའི་གནས་བཅུར་གྱུར་པར་བསམ། སྒོ་མ་བཞིའི་ཕུར་པ་བཏབ་པས་ལུས་ཀྱི་མཚོ་བཞི་བཅོམ། ཁས་ཉེན་པོའི་ཡུལ་ཁས་དྲག་པོས་བཅོམ་ནས་བསྡད་དབང་མེད་པ་བཞིན། དགྲ་བགེགས་ཀྱི་ལུས་ཁྲོ་བོ་ཁྲོ་མོའི་གནས་སུ་གྱུར་པར་བསམ། དགེ་སྡིག་ཆ་མཉམ་སྐབས་གཟས་པོས་དགེ་བ་དང་སྡིག་པ་ཅི་བྱས་པ་ཐམས་ཅད་ཡུལ་འབྱུང་བར་བསྒོམ། ཐུན་གྱིས་བྲབ་པས་ཁྲོ་ཆུང་དང་མཚོན་ཆའི་ཆར་པས་བ་ལྕི་རློན་པ་སེར་བས་བྲབ་པ་བཞིན་ཐལ་བྱུང་དུ་སོང་བར་བསམ། གཏུན་རྡུང་སྐབས་མཚོན་བྱེད་གྲུ་སོགས། ཨེ་གྲུ་གསུམ་འབར་བར་དགྲ་བགེགས་རྣམས་བཀུག་སྟེ་གནས་པ་ལ། དཔྱི་མིག་རྡོ་རྗེ་ཐོ་བས་བརྡུངས་པས་མགར་གྱི་ཚྭ་ཚྭ་ལྟ་བུའི་མེ་དབལ་བྱུང་ནས་རྣམ་ཤེས་ཀྱི་དྲི་མ་བསྲེག །སྒོ་གསུམ་ཐལ་བར་བརླག་པར་བསམས་ལ་རྡུངས་ཤིག་རྡོ་རྗེ་སོགས་བརྗོད། མཚོན་བྱ་སྔགས་བརྗོད་པའི་ཚེ་ཁ་ཊཱྭཾཾ་དང་པོས་སྣང་སྲིད་ཐམས་ཅད་ཁྲོ་བོ་ཁྲོ་མོའི་རང་བཞིན་ཏུ་བསམ། ཁ་ཊཾྭཱ་གཉིས་པས་ཁྲོ་མོ་རྣམས་ཀྱི་བྷ་ག་གྲུ་གསུམ་ཆོས་ཀྱི་དབྱིངས་ཀྱི་གཏུན་ཁུང་དུ་བསྒྲལ་བྱ་གང་ཡིན་དེ་བསམ། །
ཁ་ཊཱཾྭ་གསུམ་པས་ཁོ་བོ་རྣམས་ཀྱི་རྡོ་རྗེ་རིག་པ་ཡེ་ཤེས་ཀྱི་ཐོ་བས་བརྡུངས་པས་ཤ་ཁྲག་གིས་ཁམས་གསུམ་གང་བ་ལ། ཧཱུྃ་གསུམ་གྱིས་དུག་གསུམ་བསྡུས། ཕཊ་གསུམ་གྱིས་དཀྱིལ་འཁོར་གསུམ་གྱི་བྲོ་བོའི་སྤྲུལ་པས་སྟོང་གསུམ་གང་། ཁ་ཁ་ཁཱ་ཧི་སོགས་ཀྱིས་ཤ་ཁྲག་དེ་རྣམས་དཀྱིལ་འཁོར་གསུམ་སྤྲུལ་པ་དང་བཅས་པས་གསོལ་ནས། དགྱེས་ཏེ་ཧ་ཧ་ཞེས་བཞད་པས་སྟོང་གསུམ་ཁྲོ་བོའི་གད་རྒྱངས་ཀྱིས་གང་། ཧཱུྃ་ཧཱུྃ་ཞེས་པས་ཆོས་ཉིད་ཀྱི་ངང་ལ་འོད་དུ་ལྟེམ་གྱིས་ཞུ། ཕཊ་ཕཊ་ཅེས་པས་དཀྱིལ་འཁོར་གསུམ་སྔར་ལས་ཀྱང་གཟི་བརྗིད་ཆེ་བར་གསལ་ལོ། །ཞབ་བསྟབས་བཻ་ཌཱུ་སྔོན་པོའི་སྐབས། ངོ་བོ་དགྲ་བགེགས་བསྒྲལ་བའི་ཤ་ཁྲག་རུས་པའི་རྒྱ་མཚོ། རྣམ་པ་ཕྱི་འདོད་ཡོན་ལྔ། ནང་བདུད་རྩི་ལྔ། གསང་བ་ལྷ་མོའི་མཆོད་པ་རྒྱ་ཆེ་ཞིང་གཏིང་ཟབ་པ་ཕུལ་བ་རྣམས་རོལ་ནས་མཉེས་ཏེ། ཧ་ཧ་ཞེས་བཞད། ཧཱུྃ་ཧཱུྃ་ཞེས་པས་བདག་ལ་མཆོག་ཐུན་མོང་སྤྱི་དང་། ཁྱད་པར་དྲག་པོ་མངོན་སྤྱོད་ཀྱི་དངོས་གྲུབ་བསྩལ། ཕཊ་ཕཊ་ཀྱིས་བསྒྲལ་བའི་རྣམ་ཤེས་ཆོས་ཉིད་ཀྱི་ངང་དུ་སྤར་བར་བསམ་པ་སྟེ་རེ་ཞིག་དེ་ཙམ་མོ། །སྤྱིར་གདབ་ཁའི་ལས་ཀྱི་མངོན་སྤྱོད་གཙོ་བོར་སྒྲུབ་པ་ལ། ལྟ་བ་ཆོས་ཉིད་ཀྱི་རྫོང་དང་ལྡན་པ། སྒོམ་པ་ཏིང་ངེ་འཛིན་གྱི་འཕྲང་ལས་ཐར་པ། སྤྱོད་པ་བྱང་ཆུབ་སེམས་ཀྱི་སྲོག་གནད་ཟིན་པས་དྲག་སྔགས་ལོག་པར་མི་གོལ་བ། གསལ་བ་
གསུམ་དང་ལྡན་པས་ལོག་རྒྱུགས་འབྱམས་གསུམ་གྱི་རྐྱེན་མི་འབྱུང་བ། ཚེ་ལུང་ཁྲུས་ལུང་གི་ དགོངས་པ ་ཟབ་མོ་ཡང་ངན་སྔགས་དང་ཁྱད་པར་ཕྱེད་པ་ཞིག་དགོས་ཀྱི། དེ་དག་དང་མི་ལྡན་པར་ཞེ་སྡང་ཙམ་གྱི་སྒོ་ནས་ཟློག་བསད་ལ་བརྩོན་པ་ནི་ཤན་པས་མི་གསོད་པ་ལས་ཀྱང་ལོད་ཅིང་། དགོངས་པ ་ཚད་དུ་འཁྱོལ་ན་སྔགས་པ་ཧོམ་ཁུང་ཁ་ནས་འཚང་རྒྱ་བའི་ཐབས་མཁས་ཀྱི་ཉེ་ལམ་ཡང་དག་པ་ཡིན་ནོ། །ཞལ་བྱུང་ལིངྒའི་བཅས་ནི། དུར་ཁྲོད་ཀྱི་འཇག་མའམ་ཡུགས་སྐྲའམ་རོ་རས་ཀྱི་སྐུད་པས་བསྡམས་པའི་རུས་ཤིང་ལ། དགྲ་ལ་ཁང་སའམ་དྲི་མ་དྲུག་གང་རྙེད་གྲོག་མཁར་གྱི་ས་དང་བསྲེས་པ་དུག་ཆུས་བརྫིས་པའི་འདམ་དང་། འདྲེ་ལ་གནས་རྟེན་གྱིས་ལུག་ཐུག་གི་ཆུས་བརྫིས་པའི་འདམ་སྟེ། སྔར་གྱི་རུས་ཤིང་ལ་ཁྱད་པར་གྱི་འདམ་གྱིས་འདག་པ་བྱུགས་ནས་དགྲ་གཟུགས་ཇི་ལྟ་བ་དང་། འདྲེ་ལ་རྨི་ལམ་དུ་གང་བྱུང་གི་གཟུགས་ཁྲུ་གང་བ་གཅིག་བྱས་ལ། དེའི་སྙིང་གར་དགྲ་འདྲེའི་མིང་བྱང་བྲིས་པ་ལྟེ་བ། ཚོན་སྐུད་ཀྱིས་བཅིངས་ནས་འཇུག་པར་བྱ་སྟེ། མིང་བྱང་ནི། བྲི་གཞི་དགྲར་རོ་རས་དང་། འདྲེར་དུག་ཤོག་ལ་དུག་ཁྲག་ཐལ་ཆེན་རྣམས་དང་སྦྱར་བའི་སྣག་ཚ་དང་། མཚོན་གྲིར་བསད་པའི་མི་རྐང་གི་རུས་པའི་སྨྱུ་གུས་ལིངྒའི་གཟུགས་བྲིས་པའི་སྙིང་གར་ནྲྀྀཿའམ་ཏྲིའི་མཐར་མིང་དང་། དཔྲལ་བར་རུས། བརླར་བླ་དྲགས། སྤྱི་བོར། སྙིང་ག །ཡན་
ལག་བཞི། ལྕེ། དཔྲལ་བ། འདོམས་རྣམས་སུ་ལྷ་དང་དཔྲལ་བ་ནས་སྟོབ་པའི་བར་གྱིས་གདབ་པའི་སྔགས་དྲུག་པོ་དང་། ལིང་གའི་ཐ་མ་བཞི་སྙིང་གཅིག་ཏུ་དྲིལ་བའི་སྔགས་ཀྱིས་བར་མེད་དུ་འཁོར་བ་ཁྲིའོ། །རྐྱེན་ཟློག་ཙམ་ལ་ནི་གཏོར་ཟློག་གཞུང་དུ་བཤད་པའི་བག་ཕྱེའི་ཉ་བོ་ཙམ་ལས་མི་དགོས་ཤིང་། བསྟན་པའི་དོན་ལྟ་བུར་ངན་སྔགས་ཉེ་བར་བསྙེན་ན་འགྲེལ་པ་འབུམ་ནག་སོགས་ལས་བཤད་པ་ཚད་ལྡན་ཏུ་བཙལ་དགོས་ཀྱང་། འདིར་ནི་ལག་ལེན་བདེ་བའི་དབང་གིས་རོག་ལུགས་ལྟར་བཤད་པའོ། །སྔགས་ཀྱི་ཟབ་གནད་ལྡེའུ་མིག་བཞིན། །གསང་མཛོད་འབྱེད་ལ་མེད་མི་རུང་། །འོན་ཀྱང་བློ་ངན་རང་འདོད་ཅན། །འཇུག་པ་དགག་ཕྱིར་གུད་དུ་སྦས། །བྱང་ཆུབ་སེམས་ལྡན་བསྟན་འཛིན་ལ། །དགྲ་བགེགས་ཆོམ་ལ་འབེབས་པའི་མཚོན། །འདི་སྦྱིན་དགེ་བས་གསང་སྔགས་ལ། །སྒྲ་བཞིན་སྤྱོད་པའི་ནུས་ཐོབ་ཤོག །ཅེས་པའང་གཏོར་ཟློག་གནམ་ལྕགས་འཕྲུལ་འཁོར་གྱི་སྦས་པ་གསལ་བྱེད་དུ། །པདྨ་གར་དབང་བདེ་བའི་རྡོ་རྗེས་དཔལ་སྤུངས་ཡང་ཁྲོད་དུ་བྲིས་པ་དགེ་ལེགས་འཕེལ།། །།