ཡང་དག་ཧེ་རུ་ཀ་འཁོན་ལུགས་ཟླ་གམ་དགུ་པའི་ཞི་བའི་སྦྱིན་སྲེག་ཉེས་པ་ཀུན་སྦྱོང་།
ཡང་དག་ཧེ་རུ་ཀ་འཁོན་ལུགས་ཟླ་གམ་དགུ་པའི་ཞི་བའི་སྦྱིན་སྲེག་ཉེས་པ་ཀུན་སྦྱོང་ཞེས་བྱ་བ་བཞུགས་སོ། །
ན་མོ་གུ་ར་བེ། །བདག་མེད་ཕྱོགས་བྲལ་དོན་དམ་མེས། །འཁྲུལ་སྣང་གདུག་པའི་ཚང་ཚིང་སྲེག། དཔལ་ལྡན་བླ་མ་ཧེ་རུ་ཀར། །བཏུད་ནས་སྲེག་བླུགས་བྱ་བར་འཆད། །འཁོན་སྟོན་འཇམ་དབྱངས་གོང་མ་རྣམས་ཀྱིས་ཕུར་པ་རྩ་བའི་དཀྱིལ་འཁོར་ཁོ་ན་ལ་བརྟེན་པའི་བསྙེན་པའི་ཁ་སྐོང་གི་ཚེ་དཀྱིལ་འཁོར་ལོངས་རྫོགས་ལ་སྲེག་བླུགས་འབུལ་བའི་ཕྱག་བཞེས་ཀྱིས་འདིར་ཡང་རིགས་འགྲེ་བར་མཛད་པས། ཡང་དག་ཟླ་གམ་གཅིག་མ་ལ་བརྟེན་པའི་བསྙེན་པའི་ཁ་སྐོང་དུ་བྱ་ཆོག་ཅིང་། ལྷ་དགུའི་བསྙེན་སྒྲུབ་ཀྱི་སྐབས་སུ་ཁྱེར་བདེ་བའི་སྲེག་བླུགས་ཀྱི་ལས་རིམ་འཆད་པ་ལ་གཉིས། ཡོ་བྱད་འདུ་བྱ་བ། ཆོ་ག་དངོས་བཤད་པའོ། །དང་པོ་ནི། །བསྙེན་སྒྲུབ་ཀྱི་སྐབས་སུ་གནས་དེ་ཉིད་དུ་བྱ་བ་ཡིན་ལ། དུས་གཞན་ཏུ་བྱེད་ན་སའི་ཆོ་ག་མདོར་བསྡུས་པས་ས་གཞི་དུལ་བར་བྱས་པ་ལ། །མེ་ཐབས་
ཐིག་ཆེན་བརྒྱད་བཏབ་པའི་སྟེང་དུ་ཁ་ཕྱེད་ཀྱིས་ཟླུམ་པོར་བསྐོར་བ་ཐབ་དངོས། །དེ་རྒྱབ་སོར་བཞི་ཁ་ཁྱེར། སོར་བཞི་མུ་རན། དེ་རྒྱབ་གྲུ་བཞིར་བཅད་པའི་གྲྭ་བཞིར་ཟླ་ཕྱེད་རྡོ་རྗེ་ནང་བསྟན་དང་། །སྟེགས་བུའི་དཔང་ཚད་དམ་མཛེས་ཆར་གྲུ་བཞིའི་རྒྱང་ཏུའང་ཆ་ག་སོར་བཞི་པ་བྱ། །ནང་སུམ་ཆ་ཟླུམ་པོར་བསྐོར་བའི་དབུས་སུ་ཟླ་གམ་སྒོ་གཅིག་པ་རང་ལ་བསྟན་པ་དང་། ཕྱོགས་མཚམས་བརྒྱད་དུ་ཟླ་གམ་སྒོ་གཅིག་པ་སྒོ་རྣམས་དབུས་ལ་བསྟན་པ་རེ་རེ་སྟེ་དགུ། ཁ་ཁྱེར་མུ་རན་གང་རུང་ལ་རྡོ་རྗེའི་ཕྲེང་བས་བསྐོར། ཐབ་ཀྱི་གཞི་དཀར་པོ་ལ་བཅད་ཚོན་རྣམས་དམར་སྐྱས་བྱ་ཞིང་ཚོན་སེལ་གཞན་མ་ཕོག་པ་གནད་ཆེ། །ལྷའི་གནས་རྣམས་སུ་མེ་ཏོག་གི་ཚོམ་བུའམ། །སོ་སོའི་སྐུ་མདོག་དང་བསྟུན་པའི་ཚོན་ཕུང་བྱ། རྒྱས་པར་དབུས་སུ་པད་ཉི་ལ་རྡོ་རྗེ་སྔོན་པོ། ཤར་དུ་ཞིང་དབྱུག་སོགས་ཕྱག་མཚན་སོ་སོར་བྲིས་ལ།
འོ་མ་ཅན་གྱི་ཤིང་ངམ། དེ་མེད་ན་སྲོག་ཆགས་མེད་པའི་ལྕི་བས་ཐབ་ཀྱི་ཁ་ཁྱེར་གྱི་སྟེང་ནས་ཟླུམ་པོར་བརྩིགས་པ་ལ་ནང་གི་ཤར་ལྷོའི་མཚམ། ཏིང་ལོ་ཆེ་བ་ཞིག་བཞག །མཐའ་བསྐོར་ཐམས་ཅད་བྱི་དོར་ལེགས་པར་བྱས་ལ་དྲི་བཟང་པོས་བྱུགས། དེའི་མདུན་ཏུ་རང་གི་སྟན་ནང་ཚང་ཅན་དཀར་པོ་བཏིང་། རང་གི་གཡོན་ཐབ་ཀྱི་གཡས་ནས་ཆུ་གཉིས་སྔོན་འགྲོའི་ཉེར་སྤྱོད་དང་གཏོར་མ་དཀར་ཟླུམ་གཉིས། རང་གི་གཡས་ཐབ་ཀྱི་གཡོན་ནས། བུད་ཤིང་རྒྱུ་ལས་བྱས་པའི་ཡམ་ཤིང་སོར་བཅུ་གཉིས་པ། མར་ཁུ། ཏིལ་ལམ་ཡུངས་དཀར། ཞོ་དང་སྦྱར་བའི་ཞལ་ཟས་མཆོག །སོ་བ། འབྲས། ནས། གྲོ། སྲན་མ། དཱུ་རྦ། ཀུ་ཤ་རྣམས་རིམ་པར་བཀོད། །མཆོད་སྲེག་གི་རྫས་དང་སྣོད་དང་སྟེགས་ཐམས་ཅད་ཁ་དོག་དཀར་པོ། །སྣོད་ཀྱི་དབྱིབས་ཟླུམ་པོ་བྱ། །གཞན་ཡང་ཀུ་ཤའི་ཆུན་པོ་བརྒྱད་དང་། རང་གི་མདུན་ཏུ་བསང་ཆུའི་སྣོད། །ཀུ་ཤའི་འཐོར་གཡབ། རྡོ་རྗེ་དྲིལ་བུ། ཌཱ་མ་རུ། འཐོར་ནས། ནང་གི་མཆོད་པ་རྣམས་བཤམས། །རྡོ་རྗེ་དྲིལ་བུའི་བར་དུ་དགངས་བཟར་བླུགས་གཟར་ཁ་སྦྱར་ལ་བཞག །རང་དང་ཐབ་ཀྱི་བར་དུ་མེ་ཡོལ་དཀར་ཞལ་གྱིས་བྱུགས་པ་བཞག །རྫས་ཐམས་ཅད་ལ་བདུད་རྩི་ལྔས་བྲན། ཕྱི་ཕྲེད་ཀྱི་དུས་སུ་སྒྲུབ་པ་པོ་ཁྲུས་བྱ། གོས་རྒྱན་དཀར་པོས་བརྒྱན་ལ་སྡིག་པ་དང་བར་ཆད་ཞི་བར་འདོད་པའི་བསམ་པས་ཁ་ཤར་དུ་བསྟན་ལ་སྐྱིལ་ཀྲུང་ངམ་པུས་འཁྱུང་བཅས་ཙོག་པུ་རྐང་པ་གཉིས་ཅུང་ཟད་བསྣོལ་བ་རིགས་བྱེད་འདོན་པ་ལྟ་བུའི་སྤྱོད་ལམ་གྱིས་འདུག་གོ། །གཉིས་པ་ནི། བདག་གི་རྣལ་འབྱོར་བཟླས་པ་གསོལ་
གདབ་ཀྱི་བར་སྔོན་ཏུ་སོང་ནས། སྲེག་བླུགས་དངོས་ལ་སྦྱོར་བ། དངོས་གཞི། རྗེས་གསུམ་མོ། །དང་པོ་ལ་མེ་བཙལ་ཞིང་སྒྲུབ་པ་ནི། སྐབས་འདིར་ཏིང་ངེ་འཛིན་གྱི་མེ་སྦར་ཤིང་ཤིན་ཏུ་འབར་བར་བསམས་ལ་དངོས་སུ་མི་སྦར། །འདི་ནས་བརྩམས་ལག་པ་གཉིས་པུས་མོ་ལས་ཕྱིར་མི་འདའ་ཞིང་རྡོར་དྲིལ་བཟུང་བ་དང་སྨྲ་བ་བཅད་པ་སོགས་སྤྱོད་ལམ་ངེས་པ་ཅན་ཏུ་བྱའོ། །བསང་ཆུ་སྒྲུབ་པ་ནི། འོག་གི་ལས་སྔགས་ཀྱིས་བསང་། སྭ་བྷཱ་བས་སྦྱང་། སྟོང་པའི་ངང་ལས་ཤཾ་ལས་བྱུང་བའི་དུང་ཕོར་མཚན་ཉིད་དང་ལྡན་པའི་ནང་དུ་ཧཱུྃ་ལས་བྱུང་བའི་བསང་ཆུ་དྭངས་ཤིང་ཐོགས་པ་མེད་པ་ཐབ་དང་ཡོ་བྱད་ཐམས་ཅད་ཀྱི་འབགས་པ་དང་མ་དག་པ་སེལ་བའི་ནུས་པ་དང་ལྡན་པར་གྱུར། ཨོཾ་བཛྲ་ཡཀྵ་བི།།།ནྟ་ཀྲི་ཏ་ཧཱུྃ་ཕཊ། ཉེར་གཅིག་ཙམ་བཟླས་ལ་ཐབ་དང་ཡོ་བྱད་རྣམས་ལ་འཐོར་ཏེ། སྔགས་དེ་ཉིད་དང་། སྭ་བྷཱ་བས་སྦྱང་། སྟོང་པའི་ངང་ལས་ཨ་ལས་བྱུང་བའི་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཧཱུྃ་ལས་ལྷ་རྫས་ཀྱི་མཆོད་ཡོན་ཞབས་བསིལ་མེ་ཏོག་བདུག་སྤོས་མར་མེ་དྲི་མཆོག་ཞལ་ཟས་རོལ་མོ་ལ་སོགས་པ་དྭངས་ཤིང་ཐོགས་པ་མེད་པ་དཔལ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་ཕུང་ལྟ་བུ་དང་། བསྲེགས་རྫས་རྣམས་ཀྱང་གཙང་ཞིང་ཡིད་དུ་འོང་བ་ཞི་བའི་ལས་སྒྲུབ་པའི་ནུས་དང་ལྡན་པར་གྱུར། ཨོཾ་བཛྲ་ཨཱ་ཧ་ར་ལི་ཧཱུྃ་ཕཊ།
ཨོཾ་བཛྲ་པུཥྤེ་ཧཱུྃ། དེ་བཞིན་ཏུ། དྷུ་པེ་ཨཱ་ལོ་ཀེ་གནྡྷེ་ནཻ་ཝི་དྱ་ཨོཾ་བཛྲ་ཤབྡ་ཧཱུྃ། ཨོཾ་བཛྲ་ཨུ་ད་པ་ལ་ཧཱུྃ། ཨོཾ་བཛྲ་བིཏྤུྤར་ཡ་ཧཱུྃ། ཞེས་མཆོད་རྫས་རྣམས་བྱིན་བརླབ། ཨོཾ་ཨཱ་ཧཱུྃ་སྭཱ་ཧཱ། ཡམ་ཤིང་། ཨོཾ་ཤྲཱི་སྭཱ་ཧཱ། མར། ཨོཾ་ཛྲི༚་སྭཱ་ཧཱ། འབྲུ། ཨོཾ་ཨོཾ་སྭཱ་ཧཱ། རྫས་ཐམས་ཅད་བཀྲུ། ཨོཾ་ཀུ་རུ་ཀུ་རུ་སྭཱ་ཧཱ། རྫས་ཐམས་ཅད་སྦྱང་། ཐབ་ལ་བསང་ཆུ་གཏོར་ནས་ལས་སྔགས་ཀྱིས་བསང་། །སྭ་བྷཱ་བས་སྦྱང་། སྟོང་པའི་ངང་ལས་པཾ་ལས་པདྨ་དང་རཾ་ལས་ཉི་མའི་སྟེང་དུ་ཧཱུྃ་ལས་བྱུང་བའི་ཞི་བའི་ཐབ་ཁུང་དཀར་པོ་ཟླུམ་པོ། རྒྱར་ཁྲུ་གང་། ཟབས་སུ་ཁྲུ་ཕྱེད་ཁ་ཁྱེར་དང་མུ་རན་ལ་རྡོ་རྗེས་མཚན་ཞིང་། ཕྱི་རོལ་སྟེགས་བུ་གྲུ་བཞིའི་གྲྭ་བཞིར་ཟླ་ཕྱེད་རྡོ་རྗེས་མཚན་པ། དྭངས་ཤིང་ཐོགས་པ་མེད་པ་བུད་ཤིང་བརྩིགས་པ་དང་བཅས་པར་གྱུར། ཞེས་མོས། གཉིས་པ་ལ་གཉིས་འཇིག་རྟེན་པའི་མེ་ལྷ་མཆོད་པ་དང་། འདས་པའི་མེ་ལྷ་མཆོད་པའོ། །དང་པོ་ནི། དེའི་དབུས་སུ་པདྨ་དང་ཉི་མའི་སྟེང་དུ་རཾ་ལས་བགྲང་ཕྲེང་རཾ་གྱིས་མཚན་པ་འོད་ཟེར་འཕྲོ་འདུས་གཅིག་ཏུ་གྱུར་པ་ལས་མེ་ལྷ་སྐུ་མདོག་དམར་པོ་འོད་ཟེར་དཀར་པོ་འཕྲོ་ཞིང་འདུ་བ། ར་སྐྱེས་ལ་ཞོན་པ། ཞལ་གཅིག་ཕྱག་གཉིས་གཡས་བགྲང་ཕྲེང་དང་། གཡོན་སྤྱི་བླུགས་འཛིན་པ། གསུས་ཁྱིམ་ཆེ་བ། རལ་པའི་ཐོར་ཚུགས་དང་།
སྨ་རའི་ཨག་ཚོམ་ཅན་དྲང་སྲོང་གིས་ཚོགས་ཀྱི་བསྐོར་བའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། རང་གི་སྙིང་ག་ནས་འོད་འཕྲོས་ཏེ་ཤར་ལྷོ་ནས་མེ་ལྷ་འཁོར་དང་བཅས་པ་ཨོཾ་བཛྲ་ས་མཱ་ཛ། ཞེས་དང་། ལག་པ་གཉིས་ཀྱི་མཐེ་བོང་གུང་མོའི་རྩ་བར་བཞག །མཛུབ་མོ་གུང་མོའི་རྒྱབ་ནས་བཀབ་པ་དབྱུག་གུ་རྩེ་གསུམ་པའི་ཕྱག་རྒྱ་རྣ་བའི་དྲུང་དུ་གཡབ་ཅིང་། ཨོཾ། ཚུར་བྱོན་ཚུར་བྱོན་འབྱུང་པོ་ཆེ། མེ་ལྷའི་རྒྱལ་པོ་དྲང་སྲོང་མཆོག །བསྲེག་བླུགས་ཞལ་ཟས་བཞེས་སླད་དུ། །འདི་ཉིད་དུ་ནི་གཤེགས་སུ་གསོལ། །གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་སྒྲུབ་པ་པོ། །ཐུགས་རྗེས་སེམས་ཅན་དོན་མཛད་པ། །འདི་ཉིད་དུ་ནི་གཤེགས་སུ་གསོལ། །ཨོཾ་ཨགྣ་ཡེ་མ་ཧཱ་ཏེ་ཛ་སརྦ་ཀརྨ་པྲ་པཱ་དྷ་ཀ་མ་ཧཱ་བྷུ་ཏ་དེ་ཝ་རི་ཥི་དྭི་ཛ་སཏྭ་མ་གྲྀ་ཧི་ཏཱྭ། །སརྦ་སཏཱྭརྛ་ཀྲྀ་ཏཱྭ་ཨཱ་ཧཱུྃ། ཏི་ཨསྨི་སནྣི་ཧི་ཏཱྭ་བྷ་ཝ། ཞེས་སྤྱན་དྲངས། པདྨ་ཀ་མ་ལཱ་ཡེ་སྟཾྭ། ཞེས་བཞུགས་སུ་གསོལ། ཨོཾ་ཨགྣ་ཡེ་ས་པཱ་རི་བཱ་ར་ཨརྒྷཾ་ནས། ཤབྡ་ཨཱ་ཧཱུྃ། གིས་མཆོད་དེ། རྡོ་རྗེ་རྩེ་ལྔའི་ཕྱག་རྒྱ་བཅས་ལ། ཨོཾ་བཛྲ་ཨ་ན་ལ་མ་ཧཱ་བྷུ་ཏ་ཛྭ་ལ་ཡ་སརྦ་དུཥྚཱ་ན་བྷ་སྨིན་ཀུ་རུ་ཧཱུྃ་ཕཊ། དྲྀ་ཤྱ་ཧོཿ ཛཿཧཱུྃ་བཾ་ཧོཿ ས་མ་ཡ་སྟྭཾཾ། ཞེས་དམ་ལ་བཞག །ཛཿཧཱུྃ་བཾ་ཧོཿ ཞེས་དམ་ཡེ་བསྲེ། སླར་ཡང་རང་གི་སྙིང་ག་ནས་འོད་འཕྲོས་དབང་གི་
ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿ དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་བར་སྩལ་དུ་གསོལ། ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུྃ། ཞེས་གསུངས་ཞིང་དབང་བསྐུར། སྐུ་གང་དྲི་མ་དག་ཆུ་ལྷག་མ་ཡར་ལུད་པ་ལས་རྣམ་པར་སྣང་མཛད་ཀྱི་དབུར་བརྒྱན། ཀུ་ཤའི་ཆུན་པོ་བརྒྱད་ལ་བསང་ཆུ་གཏོར་ནས། བསང་སྦྱང་། སྟོང་པའི་ངང་ལས་ཧཱུྃ་ལས་བྱུང་བའི་ཀུ་ཤ་སྔོ་ལྗང་རྩ་བ་དང་རྩེ་མོ་མ་ཉམས་པ་འབགས་པ་དང་མ་དག་པ་སེལ་བའི་ནུས་པ་དང་ལྡན་པར་གྱུར། ཨོཾ་ཀུ་ཤ་འདི་ནི་བཟང་ཞིང་དགེ། ས་ལས་སྐྱེས་པའི་སྙིང་པོ་མཆོག །དཀོན་མཆོག་གསུམ་གྱི་དག་བྱེད་དེ། ཚངས་པ་ཡི་ནི་དག་བྱེད་ཡིན། འདིས་བདག་ཅག་གི་བགེགས་དང་མི་མཐུན་པའི་ཕྱོགས་ཞི་ཞིང་ལས་ཀྱི་དངོས་གྲུབ་སྩལ་དུ་གསོལ། ཨོཾ་བཛྲ་སཏྭ་ཨཱཿ ཞེས་པས་ཀུ་ཤའི་རྩེ་མོ་གཡས་བསྐོར་དུ་ཐབ་ཀྱི་ཕྱོགས་མཚམས་བརྒྱད་དུ་བཀྲམ། རྡོ་ལྕགས་གཙུབས་པ་སོགས་ལས་བྱུང་བ་མ་ཡིན་པ་ཞི་བའི་རྒྱུ་ལས་བྱུང་བའི་མེ་སྦོར་བྱེད་ལས་སྔགས་ཀྱིས་བསང་། ཐབ་ལ་གཡས་སུ་ལན་གསུམ་བསྐོར་ཞིང་། ཨོཾ་བཛྲ་ཛྭ་ལ་རཾ། ཞེས་པས་ཐབས་ཀྱི་ནང་གི་ཏིང་ལོ་དང་བཅས་པའི་མེ་སྦར། སྔགས་དེ་དང་མར་དགང་བླུགས་གསུམ་ཕུལ་ལ་མེ་གསོ། །དེ་ནས། མེ་ལྷའི་ལྕེ་ཧཱུྃ་ལས་རྡོ་རྗེ་རྩེ་ལྔ་
པ་དང་། དགང་བླུགས་ཀྱི་ཁ་ལ་རཾ་གྱིས་མཚན་པ། ཨོཾ་ཨགྣ་ཡེ་སྭཱ་ཧཱ། ཨོཾ་ཨགྣེ་ཡེ་དཱི་བྱ་བི་ཤུངྡྷེ་མ་ཧཱ་ཤྲཱི་ཡེ་ཧ་བྱ་ཀ་བྱ་བ་ཧྞ་ཡ། བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་དམ་ཚིག་ཉམས་ཆགས་སྔགས་ཀྱི་ལྷག་ཆད་ཀྱི་ཉེས་པ་ཐམས་ཅད་ཤཱི༚ནྟ་ཀུ་རུ་ཡེ་སྭཱ་ཧཱ། ཞེས་ལན་གསུམ་གྱིས་བྱོན་ཟན་དབུལ། དགང་བླུགས་ཁ་སྦྱར་མ་ཐབ་ལ་ལན་གསུམ་བསྐོར་ཞིང་། ཨོཾ་ཨགྣི་ཡེ་ས་པ་རི་བཱ་ར་ཨརྒྷཾ་ཨཱཿཧཱུྃ། པ་དྱཾ་ནས་ ཤབྡའི་བར་གྱིས་མཆོད། ནང་མཆོད་མཐེབ་སྲིན་གྱིས་གཏོར་ལ། ཨོཾ་ཨགྣ་ཡེ་ས་པ་རི་བཱ་ར་ཨོཾ་ཨཱཿཧཱུྃ། །འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཌཱ་ཀིས་དབང་བསྐུར་བས། །ཤེས་རབ་མཆོག་གིས་ཉོན་མོང་ཐམས་ཅད་སྲེགས། །འཇིག་བྱེད་མེ་ལྷ་ཉིད་ལ་རྣམ་པར་འདུད། ཅེས་པས་བསྟོད། སྐབས་འདིར་མེའི་པྲ་བརྟག་པར་བཤད་ཅིང་། དེའང་ཁ་དོག་དཀར་ཞིང་སྣུམ་པ་སྒྲ་ཅུང་ཟད་དང་བཅས་པ་དུ་བ་ཆུང་བ་ཞི་བའི་ལས་ལ་དགེའོ། །དུ་བ་ཆེ་བ་མེ་སྟག་རབ་ཏུ་འཕྲོ་བ་ནི་བགེགས་དང་བཅས་པ་ཡིན་པས་ཧཱུྃ་ཞེས་བརྗོད་ཅིང་བསང་ཆུ་ཕྱོགས་ཀུན་ཏུ་འཐོར་རོ། །དེ་ནས་བསྲེག་རྫས་འབུལ་བ་ནི། ཐོག་མར་ཡམ་ཤིང་བྱང་ཆུབ་ཀྱི་ཤིང་དུ་མོས་ཏེ། ཨོཾ་བྷོ་དྷི་བྲྀཀྵཱ་ཡ་སྭཱ་ཧཱ། ཞེས་པ་བདུན་གྱིས་ཕུལ་བའི་མཐར། ཨོཾ་བྷོ་དྷི་པྲྀཀྵཱ་ཡ། བདག་གི་ཚེ་འཁོར་བ་ཐོག་མ་མེད་པ་ནས་
བསགས་པའི་སྡིག་པ་དང་སྒྲིབ་པ་བག་ཆགས་དང་བཅས་པ་ཐམས་ཅད་དང་། གསང་སྔགས་ཀྱི་ལྷག་ཆད་ལ་སོགས་པའི་ཉེས་པ་ཐམས་ཅད་ཤཱནྟི༚་ཀུ་རུ་སྭཱ་ཧཱ། ཞེས་བརྗོད། དེ་བཞིན་ཏུ་འོག་མ་རྣམས་ལའང་འགྲེས་ཏེ། ཨོཾ་ཨགྣ་ཡེ་སྭཱ་ཧཱ། མར་ཁུ་དང་། ཨོཾ་སརྦ་པཱ་པཾ་ད་ཧ་ན་བཛྲ་ཡ་སྭཱ་ཧཱ། ཏིལ་ལམ་ཡུངས་དཀར་དང་། ཨོཾ་སརྦ་སམྤ་དེ་སྭཱ་ཧཱ། ཟས་མཆོག་དང་། ཨོཾ་བཛྲ་བཱི་ཛཱ་ཡ་སྭཱ་ཧཱ། སོ་བ་དང་། ཨོཾ་བཛྲ་པུཥྚཱ་ཡ་སྭཱ་ཧཱ། འབྲས་དག །ཨོཾ་མ་ཧཱ་་བེ་གཱ་ཡ་སྭཱ་ཧཱ། ནས་དང་། ཨོཾ་བཛྲ་གྷསྨ་རྱེ་སྭཱ་ཧཱ། གྲོ་དང་། ཨོཾ་མ་ཧཱ་བ་ལ་ཡ་སྭཱ་ཧཱ། སྲན་མ་དང་། ཨོཾ་བཛྲ་ཨཱ་ཡུ་ཥེ་སྭཱ་ཧཱ། དཱུར་བ་དང་། ཨོཾ་ཨ་པྲ་ཏི་ཧ་ཏ་བཛྲ་ཡ་སྭཱ་ཧཱ། ཀུ་ཤ་རྣམས་ཕུལ་ལ། སྡེ་ཚན་རེ་རེའི་མཐར་གོང་ལྟར་གྱི་སྤེལ་ཚིག་སྦྱར། དེ་ནས་བསང་ཆུ་ནས་མེ་ནང་དུ་ཅུང་ཟད་བླུགས་ལ། ཨོཾ་པྲོཀྵ་ཾ་ཨཉྩ་མཱ་ནཾ་པྲ་ཏཱི་ཙྪ་སྭཱ་ཧཱ། ཞེས་པས་བསང་གཏོར་དང་ཞབས་བསིལ་ཕུལ། མར་བླུགས་གཟར་གང་ཐབ་ནང་དུ་བླུགས་ལ། ཨོཾ་བཛྲ་ཛྭ་ལ་རཾ། མེ་ལྷ་འབར་བའི་རྣམ་པར་གྱུར་པར་བསམ། གཉིས་པ་ནི། སླར་མེ་གསོ་བའི་ཕྱིར་བུད་ཤིང་བརྩིགས་པ་དང་། །མཆོད་པ་བསྲེག་རྫས་རྣམས་ཁ་ཅུང་ཟད་གསོས་ལ། བསང་སྦྱང་། མེའི་དབུས་སུ་བདག་གི་ཐུགས་ཀ་ནས་ཧཱུྃ་སྤྲོས། ཧཱུྃ་ལས་རཾ་ཨེ་ཡཾ་རཾ་བཾ་ཀི༚་རཾ་རྣམས་འོག་ཏུ་ཆད།
སོགས་ལྷ་དགུའི་སྒྲུབ་ཐབས་ལྷར་ལ། བྷྲཱུྃ་ཡིག་འོད་དུ་ཞུ་བ་ལས་ཁྲོ་བོ་རོལ་པའི་ཕོ་བྲང་ཆེན་པོ་གྲུ་བཞི་སྒོ་བཞི་ནས། མེ་དཔུང་འབར་བའོ། །ཧཱུྃ་ལས་ས་མ་ཨ་རྣམས་འོག་ཏུ་ཆད། སླར་ཡང་ཛཿཡིག་འོད་ཀྱིས་ལྕགས་ཀྱུས་ལྷ་ཆེན་ཕོ་མོ་བཀུག །པཾ་པདྨ་མཎྜ་ལ། མ་སཱུརྻ་མཎྜ་ལ། ཨ་ཙནྡྲ་མཎྜ་ལ། མ་ཧཱ་དེ་བ་ཛཿ ཨུ་མ་དེ་བཱི་ཛཿ མ་ཏྲཾ་ཛཿ དབུས་སུ་པདྨ་ཉི་ཟླ་དྲག་པོ་ཕོ་མོའི་གདན་ཕྱོགས་མཚམས་བརྒྱད་དུ་པདྨ་ཉི་མ་རོའི་གདན་རེ་རེ། གདན་དེ་རྣམས་ཀྱི་སྟེང་དུ་དབུས་སུ་ཧཱུྃ། ཕྱོགས་མཚམས་བརྒྱད་དུ་གྃ་ཙྃ་པྲྃ་བྃ་པྃ་གྷྃ་ཤྃ་ཙྃ། ས་བོན་དེ་རྣམས་ལས་འོད་འཕྲོས་འདུས་དོན་གཉིས་བྱས། ཡོངས་སུ་གྱུར་པ་ལས། དབུས་སུ་དཔལ་ཆེན་བཛྲ་ཧེ་རུ་ཀ་སྐུ་མདོག་མཐིང་ནག་སོགས་ནས། གཡས་བརྐྱང་གིས་ཡབ་ལ་སྦྱོར་བ། ཤར་དུ་གཽ་རཱི་སྔོན་མོ་སོགས་ས་བོན་དང་བསྐྱེད་སྔགས་དོར་བའི། ལུས་དང་ཡེ་ཤེས་ལ་རྡོ་རྗེ་སེམས་དཔའ་འོ། །དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། རང་གི་སྙིང་ག་ནས་འོད་འཕྲོས་པས་ཧེ་རུ་ཀ་ལྷ་དགུའི་དཀྱིལ་འཁོར་བཛྲ་ས་མཱ་ཛཿ སྤྱན་དྲངས་པ་ནི། དམིགས་མེད་མཁའ་ལྟར་དག་ཅིང་ཁྱབ་པ་ཡི། །ཆོས་སྐུ་ནམ་
མཁའ་ལྟ་བུར་དབྱེར་མེད་ཀྱང་། །ཐབས་དང་ཤེས་རབ་གཟུགས་བརྙན་སྐུར་སྟོན་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། ཞེས་དང་། །མ་ལུས་སེམས་ཅན་ཀུན་གྱི་མགོན་གྱུར་ཅིང་། ཞེས་སོགས་ཚིགས་བཅད་གཅིག་གི་མཐར། ཛཿཧཱུྃ་བྃ་ཧོ། །གཉིས་སུ་མེད་པར་ཐིམ། ཡང་འོད་འཕྲོས། དབང་གི་ལྷ་ཁྲོ་བོ་རིགས་ལྔ་བཛྲ་ས་མཱ་ཛཿ །ཐབས་ཀྱི་སྤྱོད་པས་འགྲོ་དོན་ཏུ། །བྱམས་དང་སྙིང་རྗེས་གང་འདུལ་བ། །སངས་རྒྱས་ཕྲིན་ལས་རྫོགས་པར་མཛོད། །དབང་དང་བྱིན་རླབས་འདིར་སྩོལ་ཅིག །ཅེས་གསོལ་བ་བཏབ་པས་དབང་གི་ལྷ་རྣམས་ཀྱིས་ཡེ་ཤེས་ཀྱི་ཆུས་སྤྱི་བོ་ནས་དབང་བསྐུར་བས་ལུས་ཐམས་ཅད་གང་། དྲི་མ་ཐམས་ཅད་དག །ཆུ་ལྷག་མ་ཡར་ལུད་པ་ལས་སྤྱི་བོར་ཧེ་རུ་ཀ་རིགས་ལྔ་ཡབ་ཡུམ་གྱི་དབུ་བརྒྱན་པར་བསམ་ཞིང་། ཨོཾ་བཛྲ་ཤྲཱི་ཧེ་རུ་ཀ་བཛྲ་ཀྲོ་དྷཱི་ཤྭ་རི་ཧཱུྃ། ཨོཾ་བུངྡྷ་ཤྲཱི་ཧེ་རུ་ཀ་བུངྡྷ་ཀྲོ་དྷི་ཤ་རི་ཨོཾ། ཨོཾ་རཏྣ་ཤྲཱི་ཧེ་རུ་ཀ་རཏྣ་ཀྲོ་དྷཱི་ཤྭ་རི་ཏྲཱཾ། ཨོཾ་པདྨ་ཤྲཱི་ཧེ་རུ་ཀ་པདྨ་ཀྲོ་དྷཱི་ཤྭ་རི་ཧྲཱིཿཨོཾ་ཀརྨ་ཤྲཱི་ཧེ་རུ་ཀ་ཀརྨ་ཀྲོ་དྷཱི་ཤྭ་རི་ཨཱཿཞེས་དབང་བསྐུར་ཞིང་རྒྱས་གདབ། དེ་ནས་བྱོན་ལན་འབུལ་བ་ནི། རུ་ལུ་ལན་གསུམ་གྱི་མཐར། ཨོཾ་ཨགྣེ་ཡེ་ཞེས་སོགས་སྤེལ་ཚིག་དང་བཅས་པ་གོང་མ་ལྷའི་སྐབས་བཞིན་ཕུལ། སླར་ཡང་མཆོད་རྫས་དང་བསྲེག་རྫས་རྣམས་གོང་བཞིན་བྱིན་རླབས་ལ།། །།
སྒེག་ཕྲེང་སོགས་ཕྱི་ནང་གསང་གསུམ་གཏོར་མ་རཀྟ་བསྟོད་པའི་བར་ཟླ་གམ་གཅིག་པའི་སྒྲུབ་ཐབས་ལྟར་ཚང་བར་བྱ། དེ་ནས་ཡམ་ཤིང་ནས་ཀུ་ཤའི་བར་བསྲེག་རྫས་འབུལ་བའི་གོ་རིམ་དང་སྤེལ་ཚིག་གོང་ལྟར་ལ། སྔགས་རུ་ལུ་འབའཞིག་གིས་འབུལ། བསྙེན་པ་ཁ་གསོའི་སྐབས་སུ་ཏིལ་ལམ་ཡུངས་དཀར་གང་རུང་ལ་གྲངས་འཛིན་པ་སྟེ། ཆོ་ག་གཅིག་ལ་འབུལ་ཚན་བཅུ་གཅིག་ཡོད་པའི་བཅུ་ལ་རུ་ལུ་སྟོང་ཕྲག་རེ་བཟླས་པས་ཁྲི་ཚང་བར་འགྱུར་རོ། །སྐབས་སྐབས་སུ་མེ་གསོ་བའི་ཕྱིར་ཡམ་ཤིང་དང་མར་ཇི་ལྟར་རིགས་པ་འབུལ། བསྲེག་རྫས་གཞན་རྣམས་བརྒྱ་རྩ་རེ་འབུལ་དགོས་པར་དུས་གཅིག་ལ་ཕུལ་ན་མེ་མི་འབར་བའི་སྐྱོན་ཡོང་བས་སྐབས་སུ་གང་བབ་རེ་འབུལ། མཐར་མར་གྱིས་གང་བའི་སྦྱིན་སྲེག་ལན་བདུན་སྤེལ་ཚིག་བཅས་གོང་ལྟར་བྱ། དེ་ནས་ཕྱི་མཆོད། ནང་མཆོད། བསྟོད་པའི་མཆོད་པ་བཅས་མདོར་བསྡུས་ཙམ་དང་། །དཀར་བདུད་ཀྱི་གཏོར་འབུལ། ཚོགས་མཆོད་སྤྲོ་ན་བྱིན་རླབས་ནས་བརྟན་སྐྱོང་གི་བར་སྒྲུབ་ཐབས་ཆུང་བ་ལྟར་བྱ། ཡེ་ཤེས་ལྔ་ལྡན་སོགས་ཀྱིས་དངོས་གྲུབ་བླང་། ཡིག་བརྒྱ་ལན་གསུམ་དང་། མ་འབྱོར་བ་དང་སོགས་ཀྱིས་བཟོད་པར་གསོལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། སོགས་ཀྱིས་ཐབ་ཀྱི་ཡེ་ཤེས་པ་གཤེགས། དམ་ཚིག་པ་རང་ལ་གཉིས་སུ་མེད་པར་ཐིམ། ལག་པ་གཡོན་པའི་མཐེབ་སྲིན་གྱིས་ཐལ་བ་བླང་ལ་དཔྲལ་བར་རིག་གོ། །གསུམ་པ་རྗེས་ཀྱི་ལས་རིམ་ནི། །ཐབ་ཁུང་དུ་མར་བླུགས་གཟར་དང་དགང་གཟར་ལ་རེག་པ་དང་བཅས་པས་
བླུགས་ལ། ཨོཾ་བཛྲ་ཛྭ་ལ་རཾ། ཞེས་བརྗོད་ལ། མེ་ལྷ་ཞལ་གཅིག་ཕྱག་གཉིས་དྭངས་ཤིང་ཐོགས་པ་མེད་པའི་སྐུ་ཅན་དུ་གྱུར་པར་བསམ། དེ་ནས་བསྲེག་རྫས་ལྷག་མ་རྣམས་སོ་སོའི་སྤེལ་ཚིག་དང་བཅས་པ་བདུན་རེ་དབུལ། སླར་ཡང་མར་གྱིས་གང་བའི་སྦྱིན་སྲེག་ལན་བདུན་ཕུལ་ལ། མཆོད་བསྟོད་གོང་བཞིན་བྱ། མེ་ལྷའི་གཏོར་མ་བསང་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ཨོཾ་ཨགྣ་ཡེ་ས་པཱ་རི་བཱ་ར་ཨ་ཀ་རོ་བཏགས་པ་ལན་གསུམ་གྱིས་ཕུལ། སྔགས་དེའི་གཤམ་དུ་ཨརྒྷཾ་སོགས་བཏགས་པས་ཕྱི་མཆོད། འབྲུ་གསུམ་བཏགས་པས་ནང་མཆོད་འབུལ། །འཇིག་རྟེན་དབང་ཕྱུག་སོགས་ཀྱིས་མཐར། །ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་པོ་ཡོངས་སུ་བསྐྱབ་པའི་ཕྱིར། །ཐུགས་རྗེའི་དབང་གི་སྐུར་སྟོན་པ། །རིགས་སྔགས་གྲུབ་པའི་དྲང་སྲོང་ཚུལ། །ཉོན་མོངས་སྲེག་པའི་ཤེས་རབ་འོད། །བསྐལ་པའི་མེ་ལྟར་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱིས་སྤྲུལ་པའི་ཐེག་པ་ཆིབས། །རིག་སྔགས་གསུང་གི་བགྲང་ཕྲེང་འཛིན། །བདུད་རྩིའི་བཅུད་
ལྡན་གུནྡྷེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་བས་བསྟོད་དེ་ཕྱག་ཀྱང་འཚལ། །ཞེས་བསྟོད། །དྲང་སྲོང་ཆེན་པོ་འཁོར་བཅས་རྣམས། །མཆོད་སྦྱིན་གཏོར་མ་འདི་བསྣམས་ལ། །རྣལ་འབྱོར་བདག་ཅག་འཁོར་བཅས་ལ། ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་པའི་བར་གྱིས་འདོད་དོན་གསོལ་ལ་གཤེགས་སུ་གསོལ་བ་ནི། ཨོཾ་པྲོཀྵ་ཾ་ཨཉྩ་མཱ་ནཾ་པཱ་དྱཾ་པྲ་ཏིཙྪ་སྭཱ་ཧཱ། བསང་གཏོར་དང་ཞབས་བསིལ་ཕུལ། བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱི་བསྒྲུབས་ཀྱིས་གཤེགས། །ཇི་བཞིན་དུས་སུ་སླར་གཤེགས་ཏེ། །བདག་གི་དངོས་གྲུབ་ཐམས་ཅད་སྒྲུབས། ཨོཾ་ཨགྣ་ཡེ་ཡ་ཧི་གཙྪ། ཞེས་དང་། དབྱུག་གུ་རྩེ་གསུམ་པའི་ཕྱག་རྒྱ་ཕྱིར་བསྐྱེད། མེ་ལྷ་རང་བཞིན་གྱི་གནས་སུ་གཤེགས། །དམ་ཚིག་པ་རང་ལ་ཐིམ་པར་བསམ། །སླར་ཡང་ཡི་གེ་བརྒྱ་པ་ལན་གསུམ་གྱིས་ལྷག་ཆད་ཁ་བསྐང་། གོ་ཆ་བགོ་བ་དང་བསྔོ་བ་སྨོན་ལམ་བས་ཤིས་རྣམས་སྒྲུབ་ཐབས་བཞིན་བྱ། མེ་རང་བཞིན་གྱིས་ཡལ་བ་དང་ཐལ་བ་རྣམས་ལེགས་པར་བསྡུས་ལ་རྒྱུན་འབབས་ཀྱི་ཆུ་བོར་བླུགས་པར་བྱའོ། །འདི་ནི་བསྙེན་པ་རི་ཁ་སྐོང་གཙོ་བོར་བསྙན་གྱི་སྒྲུབ་པའི་དཀྱིལ་
འཁོར་དང་འབྲེལ་བའི་ཚེ་གཞལ་ཡས་ཁང་གདན་བཅས་བསྐྱེད་ནས། དཀྱིལ་འཁོར་ལས་ཡེ་ཤེས་པའི་ཚུལ་དུ་ཚོམ་བུ་སྤྱན་འདྲེན་གྱི་ཚིགས་གིས་དྲངས་ལ། ལྷ་རྣམས་བཞུགས་སུ་གསོལ་ཞིང་གསལ་གདབ་སྟེ་མཆོད་པ་དང་། རྗེས་ཡེ་ཤེས་པ་ཚོམ་བུ་དང་དབྱེར་མེད་དཀྱིལ་འཁོར་ལྟར་གཤེགས་པ་སོགས་ཁྱད་ཆོས་བྱེ་བྲག་པ་རྣམས་སྤྱི་དང་འདྲའོ། །ལས་ཀྱི་མེ་སྲོག་ཡམ་ཤིང་མར་གྱིས་གསོས། །དེ་ལས་ཡེ་ཤེས་དཀྱིལ་འཁོར་བསྲེག་རྫས་ཀྱི། །དྭངས་མས་བཅུད་བརྟན་དེེས་ཀྱང་རྣལ་འབྱོར་གྱི། །ཐར་པའི་སྲོག་རྩ་བདུད་རྩིས་རྒྱས་གྱུར་ཅིག །ཅེས་པའང་འཇམ་མགོན་ཀུན་དགའ་བློ་གྲོས་ཀྱིས་མཛད་པའི་ཡིག་ཆའི་དགོངས་དོན་སོར་བཞག །གསར་དུ་སྦྱར་པའི་སྒྲུབ་དཀྱིལ་ཆེ་ཆུང་རྣམས་དང་འབྲེལ་བར་བློ་གྲོས་མཐའ་ཡས་ཀྱིས་དཔལ་སྤུངས་ཡང་ཁྲོད་ཆོས་ཀྱི་ཕོ་བྲང་དུ་བསྡེབས་པ་དགེ་ལེགས་འཕེལ། །