བླ་མ་
དགོངས་པ 
་འདུས་པ་ལས་དཔའ་བོ་རྐྱང་སྒྲུབ་དང་གསལ་བྱེད་ཐུགས་ཀྱི་ནོར་བུའི་བསྙེན་སྒྲུབ་ཀྱི་ཡི་གེ་བདུད་རྩི་སྟོང་གི་ཟབ་བཅུད།
བླ་མ་ དགོངས་པ ་འདུས་པ་ལས། དཔའ་བོ་རྐྱང་སྒྲུབ་དང་གསལ་བྱེད་ཐུགས་ཀྱི་ནོར་བུའི་བསྙེན་སྒྲུབ་ཀྱི་ཡི་གེ་བདུད་རྩི་སྟོང་གི་ཟབ་བཅུད་ཅེས་བྱ་བ་བཞུགས་སོ། །
ན་མོ་གུ་རུ་དེ་བ་དྷཱ་ཀི་ནཱི་ཡཻ། བསམ་དགུ་འཇོ་པའི་ནོར་བུ་དཔག་བསམ་ལྟར། །གསོལ་བ་བཏབ་ན་དངོས་གྲུབ་གཉིས་སྩོལ་བ། ། དགོངས་པ ་ཀུན་འདུས་རྒྱལ་བའི་དཀྱིལ་འཁོར་པས། །ཚེ་རབས་ཀུན་ཏུ་འབྲལ་མེད་རྗེས་འཛིན་ཤོག །རྩ་བརྒྱུད་བླ་མས་སྨིན་གྲོལ་བྱིན་གྱིས་རློབས། །ཡི་དམ་ལྷ་ཡིས་མཆོག་ཐུན་གྲུབ་པ་དང་། །ཌཱ་ཀི་ཆོས་སྲུང་བཀའ་ཡི་གནང་བ་སྩོལ། །འབྲེལ་ཚད་དོན་དང་ལྡན་པར་མཛད་དུ་གསོལ་བ། །དེ་ལ་ཟབ་ཆོས་གང་གི་མཚན་ཐོས་ཙམ་གྱིས་སྐལ་ལྡན་སྤྲོ་བ་བསྐྱེད་ པ་དགོངས ་འདུས་དང་པོ། བཀའ་འདུས་བར་པར་གྲགས་པ། རྒྱལ་བ་པདྨ་འབྱུང་གནས་
དང་མངོན་སུམ་མཇལ་བ་ལྟ་བུའི་ཟབ་ཆོས་ཁྱད་པར་དུ་འཕགས་པ་འདི་ལ་རྒྱས་པར་སྤྲོས་ན་ཤིན་ཏུ་རྒྱ་ཆེ་ཡང་། ཉམས་ལེན་གྱི་དབང་དུ་བྱས་ན་བསྐྱེད་རྫོགས་གཉིས་ལ་ཐམས་ཅད་འདུ་སྟེ། དེ་ཡང་ཀུན་རྫོབ་ཨ་འཐས་ཀྱི་འཁྲུལ་ཞེན་གཅོད་པར་བྱེད་པ་བསྐྱེད་རིམ་བརྡའི་སྐོར་ལ་རྩ་བ་སྒྲུབ་པ་ཆེན་པོའི་སྒྲོམ་དྲུག །ཡན་ལག་གི་སྒྲུབ་ཕྲན་དྲུག །གུད་དུ་སྦས་པའི་བསྙེན་སྒྲུབ་ཚ་བ་དམར་ཐག །མཁའ་འགྲོའི་སྒྲུབ་སྐོར་བཅས་དང་། དོན་དམ་ཡེ་ཤེས་ཀྱི་དབྱིངས་སུ་སྐྱེལ་བར་བྱེད་པ་རྫོགས་རིམ་དོན་གྱི་སྐོར་ལ་དབང་རབ་ཀྱི་དོན་དུ་རྫོགས་ཆེན། དབང་འབྲིང་ལ་ཕྱག་ཆེན། དབང་པོ་ཐ་མར་
གཅོད་ཡུལ། ཆགས་ཅན་ལ་ལམ་འབྲས། ཐུན་མོང་དུ་གཅེས་པའི་ཧཱུྃ་ཆོས་འབྲུ་དགུ་ལ་སོགས་པ་མན་ངག་ཁ་འཐོར་གྱི་རིམ་པ་བཅས་ཟ་འོག་གི་རས་མའམ་ནོར་བུའི་ཕུང་པོ་བརྡལ་བ་ལྟ་བུ་དབང་པོ་དང་བསྟུན་པའི་བསྐྱེད་རྫོགས་ཀྱི་རིམ་པ་རྒྱས་བསྡུས་སོ་སོ་ནས་ཁ་ཚང་ལ་དོན་འབྲེལ་བར་བཞུགས་ཏེ། དེ་རྣམས་ཀྱང་བདུད་རྩི་དང་བམ་སྒྲུབ་སོགས་ཡན་ལག་གི་སྒྲུབ་ཕྲན་འགའ་ཞིག་བསྙེན་སྒྲུབ་ཆེན་མོ་སྔོན་སོང་གི་ལས་སུ་སྦྱར་བར་བྱ་བ་ཙམ་ཞིག་ལས། གཞན་རྣམས་གཅིག་ལ་གཅིག་ལྟོས་དགོས་པ་ཁོ་ན་མ་ཡིན་ཞིང་གདམས་པ་སྣ་རེ་ཉམས་སུ་བླང་ཡང་རང་རྐང་གི་ལམ་རེ་ཚང་ལ་རྫོགས་པའོ། །དེ་ལ་བསྐྱེད་རིམ་གྱི་བསྙེན་སྒྲུབ་ཐམས་ཅད་ཀྱི་རྩ་བ་ནི་ནོར་བུ་པད་ཕྲེང་ཡིན་ཀྱང་སྤྲོས་པ་རྒྱས་པས་བློ་གྲོས་དང་འབྱོར་པ་དམན་པས་མི་ལྕོགས་ལ། སྒྲུབ་རྒྱུན་མི་ཆད་ཅིང་། སློབ་དཔོན་གྱི་ལས་རུང་དང་། དགོངས་པ ་འདུས་བའི་བསྙེན་སྒྲུབ་ལ་འབྲེལ་འཇོག་ཙམ་ཡང་འདོད་པ་རང་འདྲའི་སྐལ་མཉམ་རྣམས་ཀྱིས་ཟབ་ཆོས་འདི་ཐོབ་ཕྱིན་ཆད་ནོར་བུ་བོར་ནས་མཆིང་བུ་མི་བཙལ་བར་འདི་ཙམ་ཞིག་ཅི་ནས་ལག་ཏུ་ལེན་པར་བྱ་སྟེ། དེ་ལ་ལག་ལེན་ཏུ་བྱ་བའི་ཟིན་བྲིས་དངོས། གལ་ཆེ་བའི་སྤྱི་དོན། །ཕན་ཡོན་ཅུང་ཟད་སྨོས་པ་སྟེ་གསུམ་མོ། །ཐོག་མར་ལག་ལེན་དངོས་ལའང་།
སྔོན་འགྲོ། དངོས་གཞི། རྗེས་ཀྱི་བྱ་བ་གསུམ། སྔོན་འགྲོ་ལ་སྤྱི་དང་ཁྱད་པར་གཉིས། སྤྱི་ལའང་གསུམ་སྟེ་ཕྱིའི་སྔོན་འགྲོ་གནས་མལ་ཟས་གོས་ཡོ་བྱད་འཚོ་སྨན་འབུད་ཤིང་ཡན་ཆད་ཉེ་བར་བསྡོགས་ཏེ་དངོས་གཞིའི་སྐབས་རྣམ་རྟོག་གི་སྦུན་ལང་དང་གཟེ་རེའི་རྒྱུ་རུ་མི་འགྲོ་བར་བྱ། ནང་གི་སྔོན་འགྲོ་སྒྲུབ་པ་ལ་བར་ཆད་མི་འབྱུང་བའི་ཕྱིར་དུ་ཕྱག་བསྐོར་བཀའ་བསྒྲགས་སཱཙྪ་ཆུ་གཏོར་ལམ་བཅོས་མདོས་གཏོར་ཉེས་སེལ་སོགས་མཆོད་སྦྱིན་དང་སྒྲིབ་སྦྱོང་ཚོགས་བསགས་ཀྱི་རིམ་པ་ཅི་ནུས་གཞུང་གསལ་ལྟར་འབད། གསང་བའི་སྔོན་འགྲོ་ཨོ་རྒྱན་ཆེན་པོའི་ཞལ་ནས། འདི་ནི་ཀུན་གྱི་ཡང་སྙིང་ཆོས་ཡིན་པས༔ ཌཱ་ཀིའི་འཁུ་ལྡོག་བདུད་ཀྱི་ཆོ་འཕྲུལ་དང་༔ བར་ཆད་འཇུག་སྒོ་བསམ་གྱིས་མི་ཁྱབ་པས༔ འདི་སྒྲུབ་འདི་འཆང་འདི་ཀློག་འདི་བྲི་བ༔ འདི་ལ་དབྱར་དམ་བྱེད་དང་སྤེལ་བའི་ཚེ༔ དངོས་དང་ཉམས་སྣང་རྨི་ལམ་ལ་སོགས་པ༔ སྤྲུལ་དང་ཡང་སྤྲུལ་དེར་སྤྲུལ་འབྱུང་བ་ནི༔ མི་དང་མི་མིན་དགྲ་དང་གཉེན་གྱི་ཚུལ༔ ཐེ་ཚོམ་འཁུ་འཕྲིགས་ཡ་ང་སློང་བ་དང་༔ སྙན་དང་མི་སྙན་འཚོལ་བར་སྒྲོགས་པ་དང་༔ ནད་དང་སྡུག་བསྔལ་རྐྱེན་གྱོད་རྒོད་པ་དང་༔ མཐུན་རྐྱེན་མི་འཛོམ་བཀྲེན་ཅིང་ཕོངས་པ་དང་༔ ཉོན་མོངས་འཁྲུག་ཅིང་གཟིར་
མང་བ་དང་༔ དགྲ་དང་ཆོམ་རྐུན་ཁ་སྨྲ་གླེང་གཞི་དང་༔ འདོད་ཡོན་བསླུ་བྲིད་དགའ་བྲོད་རྣམ་གཡེངས་དང་༔ ཉམས་ལེན་ཕྱི་ཤོལ་རིགས་གནས་ཁ་འབྱམས་དང་༔ ལེ་ལོ་བཏང་སྙོམས་འཚེར་བག་སྒྱིད་ལུག་དང་། དཔའ་ཞུམ་བརྩོན་འགྲུས་ལོག་མིན་འཕྱོ་བ་དང་། བློ་ཐག་མ་ཆོད་ཐེ་ཚོམ་ཡིད་གཉིས་ཏེ༔ འདི་ལ་འཇུག་ཚེ་བདུད་ཀྱི་ལུང་བསྟན་སོགས༔ རྐྱེན་གྱི་རྣམ་པ་བསམ་གྱིས་མི་ཁྱབ་པས༔ གང་ཡང་བར་ཆད་ཡིན་པར་ཤེས་པར་གྱིས༔ གཉེན་པོ་ཡངས་མེད་བརྩོན་འགྲུས་ལྕགས་ཀྱིས་བསྡམ༔ བླ་མ་ཡི་དམ་རྣམས་ལ་གསོལ་བ་ཐོབ༔ མཁའ་འགྲོ་ཆོས་སྐྱོང་སྐོང་གསོ་ཡང་ཡང་གྱིས༔ དེས་ནི་གནས་སྐབས་མཐར་ཐུག་དོན་ཆེན་འགྲུབ༔ ཅེས་གསུངས་པ་ལྟར་གྱི་བར་དུ་གཅོད་པ་ཅི་ཞིག་བྱུང་ཡང་སྤྲོ་བ་ལས་ཡིད་ཕྱིར་མི་ལྡོག་པའི་གོ་ཆའི་བརྩོན་འགྲུས་ལྷག་པར་བགོ་སྟེ། ཀུན་གོ་གཅིག་ཆོད་བཀའ་གཏེར་ཀུན་གྱི་ཡང་བཅུད་བསྐྱེད་རྫོགས་རྫོགས་པ་ཆེན་པོའི་མཐར་ཐུག་གསེར་ཆོས་ཟབ་མོ་འདི་ལྟ་བུ་དང་མཇལ་བ་ནི་རྨི་ལམ་ན་ནོར་བུ་རྙེད་པ་ལྟར་མི་སྲིད་སྲིད་པའི་ཆོས་ཅན་ཡིན་ཞིང་། །ཚེ་འདིའི་ནད་རྐྱེན་གྱི་འཚེ་བ། ལྟར་སྣང་གི་བྱ་སྤྱོད་བསྒྲུབ་དགོས་ལ་སོགས་པ་ནི་རྨི་ལམ་གྱི་རི་མོ་ལྟར་མྱུར་དུ་འཇིག་པའི་ཆོས། ཇི་ཙམ་ཞིག་འབད་དུ་
ཟིན་ཀྱང་གཏན་གྱི་བདེ་བ་ལ་ཕན་པའི་སྙིང་པོ་སྐྲའི་རྩེ་མོ་བརྒྱར་གཤག་པ་ཙམ་ཡང་མེད་པས། རིགས་འདུས་བླ་མའི་དཀྱིལ་འཁོར་ཆེན་པོ་འདི་ཉིད་མ་གྲུབ་ཀྱི་བར་དུ་འཆི་བ་སྲོག་ལ་བབ་ཀྱང་སྒྲུབ་པ་མཐར་སྐྱོལ་བ་མི་བྱེད་རེ་སྙམ་པའི་ཞེ་དམ་བརྟན་པོ་ཡང་དང་ཡང་དུ་བླང་ཏེ་འཁྲུལ་པའི་རྣམ་རྟོག་ལུ་གུ་རྒྱུད་ཆུ་གཉེར་ལྟ་བུ་རྦད་ཀྱིས་བཅད་དེ། དཀྱིལ་འཁོར་རྣམ་པ་གསུམ་ལ་གཞི་བཅའ། དགོངས་པ ་རྣམ་པ་གསུམ་གྱིས་སྲོག་བཟུང་། ཁྱེར་སོ་རྣམ་པ་གསུམ་གྱིས་འགག་བསྡམས་ནས་ཐ་མལ་གྱི་དབང་དུ་སྐད་ཅིག་ཀྱང་མ་ཤོར་བ་ལ་བསླབ་བོ། །གཞན་ཡང་ཞལ་གདམས་ལས༔ འདིར་འཇུག་སྤྲོ་རྣམས་ཚེ་རབས་གྲངས་མེད་ནས༔ བསོད་ནམས་ཚོགས་བསགས་ལས་དང་སྐལ་པར་ལྡན༔ ཞེས་དང་། འདི་མཐོང་ཐོས་རེག་འདི་དང་གང་འབྲེལ་བའི༔ སེམས་ཅན་རིགས་གྱུར་ལས་ཀྱི་མཐའ་སྟོངས་ཤིང་༔ སྣང་བ་མཐའ་ཡས་ཞིང་མཆོག་དམ་པ་རུ༔ འཁོད་པར་གྱུར་ན་ཉམས་སུ་ལེན་རྣམས་ནི༔ ཚེ་གཅིག་ལུས་གཅིག་གྲོལ་བར་སྨོས་ཅི་དགོས༔ ཞེས་སོགས་ཁྱད་པར་དུ་འཕགས་པའི་ཟབ་ཆོས་འདིའི་ཕན་ཡོན་བསམ་གྱིས་མི་ཁྱབ་པ་དཔལ་གྱི་མགུར་ནས་རྡོ་རྗེའི་གསུང་གིས་ཆེ་ཐང་དུ་གདམས་པ་ལ་བསམ་སྟེ་སྒྲུབ་པ་
ཉམས་ལེན་ལ་ཤིན་ཏུ་སྤྲོ་བའི་བློ་གཟེངས་བསྟོད་པ་དང་། རང་ཉིད་གྲགས་འདོད། གཞན་ལ་འགྲན་སེམས། ཉམས་མཚར་ཁ་ཆོས། བྱས་བྱས་བསྒྲུབས་བསྒྲུབས་ཀྱི་རྣམ་གྲངས་ཙམ་གྱི་བློ་ངན་སྔོན་དུ་འགྲོ་བས་འདི་ཉིད་བསྒྲུབས་ཀྱང་ཙནྡན་རིན་ཐང་གཞལ་དུ་མེད་པའི་སྡོང་པོ་སོལ་དུམ་དུ་བསྒྱུར་བ་ལྟར་སྒྲུབ་པའི་རྨད་འཆུག་ནས་འབད་པ་དོན་མེད་དུ་བཅོས་པ་ཡིན་པས། ནམ་མཁའི་མཐའ་ཁྱབ་ཀྱི་ཕ་མ་སེམས་ཅན་གསུང་རྡོ་རྗེ་པདྨའི་མགོན་པོའི་གོ་འཕང་ལ་འགོད་པའི་ཕྱིར་དུ་ཟབ་མོའི་ལམ་བཟང་འདི་ལ་འཇུག་པར་བགྱི་སྙམ་པའི་བྱང་ཆུབ་སེམས་བློས་ཐེག་མཐའ་ཀུན་ཏུ་ཟིན་པར་བྱའོ། །ཁྱད་པར་གྱི་སྔོན་འགྲོ་ལའང་གཉིས་ཏེ། དང་པོ། དམ་ཚིག་ཉམས་ཆགས་ཕྲ་རགས་སྦྱོང་ཞིང་། ངག་བྱིན་གྱིས་བརླབ་པའི་ཕྱིར་ཡི་གེ་བརྒྱ་པའི་སྒོམ་བཟླས་འདི་ཉིད་ཀྱི་སྐོང་ཆོག་མཆོད་ཕྲེང་ཆོས་སྤྱོད་སོགས་ལས་འབྱུང་བ། དེའང་རང་ཉིད་རྣལ་འབྱོར་གང་ལ་བགྱིད་པའི་ཐེག་པའི་རིམ་པ་དང་མཐུན་པ་གང་བདེའམ། སྤྱི་ཙམ་དུ་སྒྲུབ་ཐབས་འཕྲུལ་གྱི་དུམ་བུ་ལས་འབྱུང་བ་འདི་བཞིན་འདོན་བསྒོམ་བྱ་སྟེ། རང་ཉིད་ཐ་མལ་གནས་པ་ཡི༔སྤྱི་བོར་པདྨ་ཟླ་བའི་སྟེང་༔ ཧཱུྃ་ལས་སྐྱེས་པའི་རྡོ་རྗེ་སེམས༔ ཞལ་གཅིག་ཕྱག་
གཉིས་སྐུ་མདོག་དཀར༔ ཕྱག་གཡས་རྡོ་རྗེ་ཐུགས་ཀར་འཛིན༔ གཡོན་པས་དྲིལ་བུ་དཀུ་ལ་བརྟེན༔ ཞབས་གཉིས་སྐྱིལ་ཀྲུང་ཕྱེད་པའི་ཚུལ༔ ལོངས་སྤྱོད་རྫོགས་པའི་ཆ་ལུགས་གསལ༔ གནས་གསུམ་འབྲུ་གསུམ་ཡི་གེས་མཚན༔ ཨོཾཱ་ཨཱཿཧཱུྃ༔ དེ་ལས་འོད་འཕྲོས་ཡེ་ཤེས་པ༔ སྤྱན་དྲངས་ལྷ་དང་དབྱེར་མེད་གྱུར༔ རིགས་ལྔ་ལ་སོགས་སྤྱན་དྲངས་ལ༔ དབང་བསྐུར་རིགས་བདག་རྒྱ་ཡིས་གདབ༔ དེ་ཡི་ཐུགས་ཀར་ཧཱུྃ་ཡིག་ལ༔ ཨོཾཱ་བཛྲ་སཏྭ་ས་མ་ཡ༔ སོགས། ཤེལ་ལྟར་གཡས་སུ་བསྐོར་བ་ཡི༔ ཧཱུྃ་དང་ཡིག་བརྒྱ་བཅས་པ་ལས༔ འོད་ཟེར་བདུད་རྩིའི་རྒྱུན་བྱུང་ནས༔ རང་གི་ཚངས་པའི་བུ་གར་བབ༔ ཚེ་རབས་ལས་ཀྱི་སྡིག་སྒྲིབ་དང་༔ གནས་སྐབས་རྐྱེན་དང་བར་ཆད་རྣམས༔ མི་གཙང་རྣག་ཁྲག་འབུ་སྲིན་ཚུལ༔ གཤང་ལྕི་ལྟ་བུར་བུད་ནས་ཀྱང་༔ ལུས་ཉིད་ཤེལ་སྒོང་དྲི་མེད་ལྟར༔ གསལ་སྟོང་རྗེན་པར་གྱུར་ནས་ཀྱང་༔ ལུས་ངག་ཡིད་གསུམ་ཉེས་བྱས་དག༔ ཅེས་པའི་དམིགས་པ་རྩེ་གཅིག་པས་སྔར་བྱས་ཀྱི་སྡིག་པ་ལ་འགྱོད་ཅིང་ཕྱིན་ཆད་མི་བྱེད་པའི་སྡོམ་སེམས་དང་བཅས་ཡིག་བརྒྱ་དང་ཡན་སྙིང་ཅི་འགྲུབ་བཟླས་ལ་མཐར། རང་ལུས་འོད་དུ་ཞུ་ནས་
ཀྱང་༔ རྡོ་རྗེ་སེམས་དཔའི་ཐུགས་གར་ཐིམ༔ རྡོ་རྗེ་སེམས་དཔའ་ཡིག་འབྲུར་བཅས༔ དམིགས་མེད་འཇའ་ལྟར་ཡལ་བར་གྱུར༔ ཞེས་པ་སྟེ་ཐོག་མར་ཞག་ཤས་ཅི་འགྲུབ་ཐུན་བཅད་དུ་བྱ་ཞིང་། དངོས་གཞིའི་བསྙེན་སྒྲུབ་ཆེ་ཕྲ་གང་བྱེད་ཀྱང་ཐུན་བཞི་ཀའི་མགོར་ཉེར་གཅིག་རེ་བཟླ་བ་མ་ཆག་པར་བྱའོ། །གཉིས་པ་ཚོགས་ཁྱད་པར་ཅན་སྤེལ་བས་སྒྲུབ་པའི་འབྲས་བུ་མྱུར་དུ་འགྲུབ་པའི་ཕྱིར། མཎྜལ་གྱི་ཆོ་ག་ཚུལ་བདུན་ཡིད་བཞིན་ནོར་བུ་ལྟར་འབྱོར་ཚོགས་དང་བསྟུན་པའི་མཎྜལ་གྲངས་མང་འབུལ་ཞིང་དངོས་གཞི་ཐུན་པར་རྣམས་སུའང་ཚར་རེ་མ་ཆག་ན་དགོས་པ་ཆེན་པོ་ཡོད་དོ། །གཞན་ཡང་སྐབས་འདིར་སྐོང་ཚེག་རྒྱས་བསྡུས་གང་འགྲུབ་བམ། ཡང་ན་ཚོགས་ཀྱི་འཁོར་ལོ་རྒྱས་ པ། ཞི་བའི་སྦྱིན་སྲེག་རྣམས་ཀྱང་འགྲུབ་ན་གནད་དུ་ཆེ་སྟེ་གཞུང་གི་དགོངས ་པའོ།། ༈ །།དངོས་གཞི་ལའང་གསུམ་སྟེ། བར་ཆད་བསལ་བ་གོང་བསྙེན་གྱི་མན་ངག་བསྟན་པ། བསྐྱེད་རིམ་ཀུན་གྱི་བཅུད་དྲིལ་ཚ་བ་དམར་ཐག་བསྟན་པ། དེ་གཉིས་ཀའི་ཡན་ལག་གི་རྣལ་འབྱོར་བསྟན་པའོ། །དང་པོ་ནི། དཔའ་བོ་རྐྱང་སྒྲུབ་ཕྱི་ནང་གསང་གསུམ་གྱི་སྒྲུབ་པ་ནོར་བུའི་སྙིང་པོ་ལྟར་ཉམས་སུ་ལེན་པར་བྱ་སྟེ་དེ་ལའང་གསུམ།
བསྙེན་པ། སྒྲུབ་པ། ལས་སྦྱོར་རོ། །གསུམ་ཀའང་སྤྲོས་མེད་ཀུ་སུ་ལུ་པའི་ཉམས་ལེན་ཡིན་པས། དཀྱིལ་འཁོར་མཆོད་གཏོར་སོགས་སྤྲོས་བཅས་ཀྱི་བཅས་བཤམས་ནི་མི་དགོས་ཀྱང་། འབྱོར་ན་བྲིས་སྐུ་སོགས་རྟེན་བཀྲམ་པའི་མདུན་སྟེགས་ཀྱི་ཁར་མཎྜལ་ཚོམ་བུ་དགུ་པ་དང་བདག་བསྐྱེད་ཀྱི་མཆོད་གཏོར་དཔལ་གཏོར་དམར་པོ་གཙོ་འཁོར་དགུ་པ་རྒྱན་ལྡན་བཀོད་པའི་གཡས་གཡོན་ཏུ་སྨན་རཀ །མདུན་དུ་ཆུ་གཉིས་ཉེར་སྤྱོད་ཕྲེང་ཚར། བཀའ་སྲུང་གཏོར་འབུལ། བགེགས་གཏོར། ཚོགས་ཆད་བརྟན་སོགས་འདུ་བྱ། བསྙེན་སྒྲུབ་ལ་ཞུགས་ཀར་ཕྱི་ནང་གསང་ཁྲུས། །ཕྱི་གཡེན་ལ་དཀར་གཏོར་བསྔོ་ཞིང་མཚམས་ཐོ་འཇོག་པ་སོགས་སྤྱི་ལྟར་བྱས་ནའང་རུང་། མ་བྱས་ཀྱང་ཁྲུས་ནི་གོང་གསལ་སྔོན་འགྲོར་འཐུས་ལ་ཐོ་འཛུག་པ་སོགས་ནི་སྐབས་འདིར་ངེས་པར་དགོས་པའང་མ་ཡིན་ནོ། །སྤྱིར་འདི་ཉིད་ཀྱི་བསྙེན་སྒྲུབ་གང་ལ་འཇུག་ཀྱང་ར་བ་བཞིའི་ཚེས་བརྒྱད། བཅུ། བཅོ་ལྔ་གང་རུང་། གཟའ་སྐར་བཟང་བའི་སྔ་དྲོའི་ཆར་འཇུག་པར་བྱ་ཡི་ནམ་བདེ་ལ་འཇུག་མི་རུང་བར་གསུངས་པ་ལྟར། འོག་གི་ཐུགས་ནོར་སྒྲུབ་པ་དངོས་གཞིའི་སྐབས་སུ་ཅི་ནས་འགྲིགས་པ་གལ་ཆེ་ཞིང་། འདིར་ཡང་ཟླ་ཚེས་
ཐམས་ཅད་འགྲིགས་ན་ལེགས་ལ་མ་འགྲིགས་ནའང་ཚེས་གང་རུང་འགྲིགས་པར་བྱའོ། །བསྙེན་སྒྲུབ་ལས་གསུམ་དམིགས་གནད་ཀྱི་ཁྱད་པར་ཅུང་ཟད་ལས་བཅས་བཤམས་འདོན་འགྲིགས་སོགས་ནི་ལན་གཅིག་པོའི་དཀྱུས་དེ་ཀས་འཐུས་ཀྱི་དབྱེ་བ་སོ་སོར་མེད་དོ། །དེ་ལ་ཐོག་མར་བསྙེན་པའི་རིམ་པས་རང་བྱིན་གྱིས་བརླབ་པ་ནི། ཐུན་གྱི་ཐོག་མར་ཚིག་བདུན་གསོལ་འདེབས། མཎྜལ་ལས་འབྱུང་བའི་གསོལ་འདེབས་འབྲིང་པོ་དང་ཕུར་ཚུགས་གསོལ་འདེབས། ཉིན་དང་པོའི་ཐུན་མགོར་ལས་བྱང་མེ་ཏོག་ཕྲེང་བ་ལྟར་བགེགས་གཏོར་ཡང་བཏང་ཞིང་། ཕྱི་མ་རྣམས་སུ། ཧཱུྃ་ཧྲཱིཿ ཡེ་ཤེས་རོལ་པ་སོགས་མཚམས་གཅོད། ཚོགས་བསགས། སྐྱབས་སེམས། མཆོད་པ་བྱིན་རླབས། ཏིང་འཛིན་རྣམ་གསུམ། ཙིཏྟ་པདྨ་བཛྲ་ཧཱུྃ༔ ཡན་བཏང་མཚམས། བདག་ལུས་སྒྱུ་མའི་གྲོང་ཁྱེར་ཡང་༔ དབང་དང་བྱིན་གྱིས་བརླབ་པའི་དུས༔ བླ་མ་རྡོ་རྗེ་སེམས་དཔར་གསལ༔ ཞེས་པས། སྟོང་པའི་ངང་ལས་སྐད་ཅིག་གིས༔ པད་ཟླའི་སྟེང་དུ་རང་ཉིད་ནི༔ ཧཱུྃ་ལས་བསྐྱེད་པའི་རྡོ་རྗེ་སེམས༔ ཞལ་གཅིག་ཕྱག་གཉིས་སྐུ་མདོག་དཀར༔ ཕྱག་གཡས་རྡོ་རྗེ་།ཐུགས་ཀར་འཛིན༔ གཡོན་པས་དྲིལ་བུ་དགུ་ལ་བརྟེན༔ ཞབས་གཉིས་
སྐྱིལ་ཀྲུང་ཕྱེད་པའི་ཚུལ༔ ལོངས་སྤྱོད་རྫོགས་པའི་ཆ་ལུགས་གསལ༔ དེ་ལྟར་བསྐྱེད་པའི་གནས་གསུམ་དུ༔ ཕྱི་ནང་གསང་བའི་ལྷ་དགུ་པོ༔ དམ་ཚིག་སེམས་དཔའི་ཚུལ་དུ་གསལ༔ ཞེས་པའི་བདག་བསྐྱེད་ལ་ལུས་དཀྱིལ་གསལ་གདབ་པ་ནི༔ རྐྱང་སྒྲུབ་རང་གཞུང་ལྟར་ཐོག་མར་གཤམ་ནས་གྱེན་རིམ་སོགས་བདག་དོན་སྒྲུབ་པའི་ལྷ་བསྐྱེད་ཀྱི་ཚུལ་ལྟར་འདོན་སྒོམ་བྱ་སྟེ། སྤྱི་བོའི་གཙུག་ཏུ་བསྒོམ་པ་ནི༔ སོགས་ནས། གནོན་པར་བསྐྱེད༔ ཨོཾཱ་ཨཱཿཧཱུྃ་བཛྲ་གུ་རུ་སོགས། གཡས་སུ་བུདྡྷ་ཐོད་ཕྲེང་རྩལ༔ སོགས་ནས། བག་ཕེབ་ལྷམ་མེར་གསལ། ཨོཾཱ་ཨཱཿཧཱུྃ་བུདྡྷ་སོགས། བཅོམ་ལྡན་མི་བསྐྱོད་སོགས་ནས། ཚུལ་དུ་བཞུགས༔ ཨོཾཱ་བཛྲ་སོགས། མགྲིན་པར་དབང་ཆེན་ཟླ་གམ་སྟེང་༔ སོགས་ནས། དཔེ་བྱད་ལྡན་པར་གསལ༔ ཨོཾཱ་ཨཱཿཧཱུྃ་ཧྲཱིཿ སོགས། རིག་འཛིན་ཆེན་པོ་སོགས་ནས། ལས་མཛད་སྟབས་ཀྱིས་བཞུགས༔ ཨོཾཱ་ཨཱཿཙརྻ་སོགས། བཅོམ་ལྡན་གུ་རུ་སོགས་ནས། ཆ་ལུགས་ཅན༔ ཨོཾཱ་ཨཿཧཱུྃ་སོགས། སངས་རྒྱས་ཐོད་པའི་དུམ་བུ་ནི༔ སྙིང་གི་དབུས་སུ་བསྐྱེད་པ་སྟེ༔ སོགས་ནས། སྟེང་དུ་འགྱིང་༔ ཨོཾ་བུདྡྷ་སོགས། རྟ་མགྲིན་དབང་ཆེན་
སོགས་ནས། སྐུ་ལ་རྫོགས༔ ཨོཾཱ་པདྨཱ་ནྟ་ཀྲྀ་ཏ་སོགས། བཅོམ་ལྡན་ལག་ན་རྡོ་རྗེའི་སོགས་ནས། ཡན་ལག་རགས་པར་བསྒོམ༔ ཨོཾ་བཛྲ་སོགས། དེ་ལྟར་བསྐྱེད་པ་ཐམས་ཅད་ཀྱང་༔ ཨ་འཐས་ཐེར་ཟུག་མ་ཡིན་པར༔ སྣང་སྟོང་སྒྱུ་མ་ལྟ་བུའི་ཚུལ༔ འཇའ་དང་འོད་ཕུང་ཚུལ་དུ་གསལ༔ གནས་གསུམ་འབྲུ་གསུམ་ཡི་གེས་མཚན༔ དེ་ལས་འོད་འཕྲོས་ཡེ་ཤེས་པ༔ སྤྱན་དྲངས་བདག་དང་དབྱེར་མེད་གྱུར༔ ཞེས་པས་བསྐྱེད་ནས། ལས་བྱང་མེ་ཕྲེང་ནས། ཧཱུྃ་ཧྲཱིཿ རང་བྱུང་ཐུགས་རྗེ་སོགས་སྤྱན་འདྲེན་པ་ནས་སྨན་རཀ་གཏོར་འབུལ་ཡན་མཐར་ཆགས་སུ་བཏང་། བསྟོད་པ་ནི་མངོན་རྟོགས་རིན་ཆེན་ཕྲེང་བ་ལས་འབྱུང་བའི། བདེ་ཆེན་རོལ་བའམ། བསྟོད་འབུལ་གཤམ་གྱི། དཀྱིལ་འཁོར་དགུ་རྫོགས་སམ། ལས་བྱང་ཚངས་སྒྲའི་རྗེས་ཆོག་སྐབས་ཀྱི། ཧཱུྃ་ཧྲཱིཿ འདུས་པ་ཡོངས་ཀྱི་སོགས་གང་ཡང་རུང་བས་བསྟོད་དོ། །དེ་ནས་སྤྲོ་ན་བརྒྱུད་པའི་གསོལ་འདེབས་དང་། ངག་དང་བགྲང་ཕྲེང་བྱིན་རླབས་ཆོས་སྤྱོད་ལམ་རིམ་འོད་ཀྱི་ཕྲེང་བ་ལས་འབྱུང་བ་ལྟར་སྔོན་དུ་འགྲོ་བས་བསྙེན་པ་ལ་འཇུག་པར་བྱ་སྟེ། བསྙེན་དམིགས་ནི་རྒྱས་པར་སྤྲོ་ན་པདྨ་བཛྲ་ལ་ཧྲཱིཿའོད་ལྔའི་མདངས་ལྡན། བུདྡྷ་ཐོད་ཕྲེང་ལ་ཨོཾཱ་དཀར་པོ། མི་བསྐྱོད་རྡོ་རྗེ་ལ་
ཏྲཱྃ་སེར་པོ་སོགས་དྲིལ་སྒྲུབ་ཡིད་བཞིན་ནོར་བུ་ལས་འབྱུང་བའི་སོ་སོའི་ས་བོན་ཐུགས་སོག་ཏུ་བཀོད་ཅིང་བསྡུ་ན་ཞི་བ་རྣམས་ཀྱི་ཐུགས་ཀར་ཟླ་བ་དང་། ཁྲོ་བོ་རྣམས་ཀྱི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧྲཱིཿཡི་མཐར་སོ་སོའི་མདོག་མཚུངས་ཀྱི་སྔགས་ཕྲེང་སྔགས་ངོ་ཕྱིར་བསྟན་སྐར་མའི་ཕྲེང་བ་ལྟར་བཀྲ་ལམ་མེར་གསལ་བ་ལ། མདུན་ཕྱོགས་ཡི་གེ་ཨོཾཱ་ནས་གཡས་སྐོར་དུ་ཀློག་པའི་ཚུལ་གྱིས་བཟླ་བ་སོགས་འཛབ་དགོངས་དམིགས་པའི་འཁྲུལ་འཁོར་གྱི་ཟླ་བ་སྐར་ཕྲེང་ དགོངས་པ ་ལྟར་དང་། སྐབས་སུ་ལུས་ལྷ་རྣམས་གསལ་ཡང་ཡང་གདབ༔ སྐབས་རེར་གཙོ་བོ་དགུ་པོ་དང་གཞན་ཡང་ལུས་ཀྱི་རྩ་རླུང་ཐིག་ལེ་བ་སྤུའི་བུ་ག་ཚུན་ཆད་རྩ་བ་གསུམ་གྱི་ལྷ་ཚོགས་ཏིལ་གོང་ཁ་ཕྱེས་པ་ལྟ་བུས་གང་བ་རྣམས་ཀྱིས་གྲགས་སྟོང་བྲག་ཆ་ལྟ་བུའི་བཟླས་པའི་སྒྲ་ཏི་རི་རི་སྒྲོགས་པ་ལ་སེམས་གཏད་དེ་མདོར་ན་ལུས་ལྷ། ངག་སྔགས། སེམས་དམིགས་པའི་འཕྲོ་འདུ་དང་དེའང་ཆོས་ཉིད་ཀྱི་ཀློང་ལས་མ་འདས་པའི་དཀྱིལ་འཁོར་རྣམ་ པ་གསུམ་ལྡན་གྱི་དགོངས ་པའི་གཟེར་བུ་ལ་འཁྲུལ་རྟོག་གིས་བར་མ་ཆོད་པར་བྱའོ། །བཟླ་ཚུལ་ནི། གཞུང་གི་ དགོངས་པ ་ལྟར་ན་ཉིན་ཞག་གཅིག་ལ་ཐུན་དྲུག་ཏུ་བཅད་པའི་ཉིན་ཐུན་གསུམ་ལ་ལྷ་བསྐྱེད་སྔགས་བཟླས་གཉིས་ཀ་
གཞན་དོན་གྱི་ལུགས་དང་། མཚན་ཐུན་གསུམ་པོར་བདག་དོན་དུ་བསྐྱེད་བཟླས་ཀྱི་ཚུལ་སོ་སོ་གསུངས་ཀྱང་སྒྲུབ་ཡུན་རིང་བ་དང་ནམ་ཟླ་དཔྱིད་སོས་ལྟ་བུར་དེ་ཙམ་མི་འཁྱོང་པས་བསྙེན་སྒྲུབ་ཀྱི་སྐབས་བདག་དོན་ལྟར་དང་། ལས་སྦྱོར་སྐབས་གཞན་དོན་ལྟར་བསྐྱེད་བཟླས་བྱས་ན་དོན་དང་མི་འགལ་ཞིང་སྟབས་བདེ་ལ། གཞུང་མཐུན་ཐུན་དྲུག་ནུས་ན་ནི་ཆེས་མཆོག་ཏུ་གྱུར་པས། དེའི་ཚེ་ཉིན་མཚན་གྱི་ཆར་བསྐྱེད་བཟླས་གཉིས་གའི་དམིགས་བསལ་ལུགས་རང་གཞུང་ལྟར་བྱ་སྟེ་བསྙེན་སྒྲུབ་ལས་གསུམ་ཀ་ལ་བདག་གཞན་གཉིས་དོན་བྱ་ཚུལ་ཁྱད་པར་མེད་དོ། །འདིར་ཉིན་ཞག་གཅིག་ལ་ཐུན་གསུམ་བྱ་བའི་དཔང་དུ་བཏང་སྟེ། ཐུན་དང་པོར་སྤྱི་གཙུག །གཉིས་པར་མགྲིན་པ། གསུམ་པར་སྙིང་གའི་ལྷ་སྔགས་གསུམ་པོར་གཙོ་བོར་བཟླ་ལ། གཞན་དྲུག་པོ་ཅུང་ཟད་རེ་བཟླ། གཙོ་བོ་ནི་གྲངས་ཚད་མ་རྫོགས་བར་དུ་ཐུན་གསུམ་ཀར་བུངས་བསྐྱེད་ལ་བཟླའོ། །བསྙེན་ཚད་ནི་རབ་དུས་བསྙེན་ཟླ་བ་གསུམ། གྲངས་བསྙེན་འབྲུ་འབུམ་ཁ་སྐོང་བཅས་དགོས་པར་གསུངས་ཤིང་། འབྲིང་གཙོ་བསྙེན་འབྲུ་འབུམ། འཁོར་བརྒྱད་པོ་འབུམ་ཚོ་བཞི་རེ་ཐམ་གཙོ་བོ་འབུམ་ཚོ་བཞི། འཁོར་རྣམས་འབུམ་ཕྲག་རེ་རེ་ཅི་ནས་ཐེམ་པར་བྱ། དེའང་གྲངས་དུས་ཇི་ཙམ་བཟླ་བ་དེ་ཉིད་
བསྙེན་སྒྲུབ་ལས་གསུམ་ཀ་ལ་ཆ་སྙོམས་པར་བགོ་ཞིང་། གསུམ་ཀའི་སྤྱི་སོ་ནས་གྲངས་དུས་གང་རུང་རྫོགས་པས་ཆོག་ལ། ཐུན་རེ་རེ་བཞིན་ཡང་ནང་གསེས་ཀྱི་སྔགས་གྲངས་ཆ་བགོ་བར་བྱའོ། །ཅིས་ཀྱང་འབྲེལ་འཇོག་བདུན་གསུམ་ཙམ་ལས་མ་ནུས་ཚེ་བསྙེན་སྒྲུབ་ལས་གསུམ་བདུན་ཕྲག་རེ་རེ་བྱ་ཞིང་འཁོར་བརྒྱད་པོ་ཇི་ཙམ་འོས་པ་དང་། གཙོ་བོ་ནི་འབུམ་ཕྲག་ཡར་བརྒལ་ཇི་འགྲུབ་བྱ་སྟེ། གཞུང་ལས། མཆོག་ཏུ་གཙོ་བོའི་བསྙེན་པ་ནི༔ཐེམ་པར་བྱེད་པ་གལ་ཆེའོ༔ཞེས་གསུངས་པས་སོ། །རྟགས་ཚད་ནི་གཞུང་དུ་གསལ་ལོ། །ཐུན་མཐར་དབྱངས་གསལ་ཡིག་བརྒྱ་རྟེན་སྙིང་ལན་གསུམ་གསུམ་བཟླས་པས་ཁ་བསྐང་། ལས་བྱང་ཆེན་མོ་ལྟར། ཧཱུྃ་ཧྲཱིཿཡེ་ཤེས་ལྷ་ཚོགས་སོགས་ཀྱིས་མཆོད་བསྟོད་བཟོད་གསོལ་བྱ། མེ་ཕྲེང་ལྟར། སྣོད་བཅུད་སྐྱེ་འགྲོ་སོགས་སམ། དཀྱུས་ལ། ཧཱུྃ་ཧཱུྃ་ཧཱུྃ་གིས་འོད་གསལ་དུ་ཞུགས། ཕཊ་ཕཊ་ཕཊ་ཀྱིས་ཐུན་མཚམས་སྒྱུ་མའི་ལྷ་སྐུར་ལྡང་། མེ་ཕྲེང་ལས། ཆོས་ཀྱི་དབྱིངས་ཀྱི་སོགས་དགེ་བསྔོ་གང་འཐད་བྱ། སླར་ཐུན་ལ་འཇུག་པའི་ཚེ་ན་བགེགས་གཏོར་མི་དགོས་ཤིང་གཞན་སྔ་མ་ཇི་ལྟ་བའོ། །ནུབ་རེ་བཞིན་བཀའ་སྲུང་གསུམ་པོའི་གཏོར་འབུལ་ཆག་
ཐབས་མེད་པས་གཏེར་གཞུང་ངམ་ཆགས་མེད་ཀྱིས་མཛད་པའི་བསྡུས་པ་ལྟར་བྱ། བསྙེན་སྒྲུབ་ལས་སྦྱོར་སོ་སོའི་དབུ་བཙུག་ པ་དང་མཇུག་བཞག་པའི་བར་མཚམས་དང་དུས་བཟང་རྣམས་སུ་འབྱོར་ན་ཚོགས་མཆོད་ཀྱང་བྱ་སྟེ། དགོངས ་ཐུན་གྲོལ་ནས་བསྡུ་ལྡང་མ་བྱས་པའི་གོང་དུ་བཀའ་སྲུང་གཏོར་འབུལ་གྲུབ་མཚམས་ལས་བྱང་མེ་ཕྲེང་གི་ཚོགས་བྱིན་རླབས་ནས་བསྡུ་རིམ་བསྔོ་སྨོན་ཡན་མཐར་ཆགས་སུ་བྱ་བ་ལས། ཚོགས་ཀྱི་བསྟབ་བའི་དབུར་འགུགས་གཞུག་བསྡུས་ཙམ་དང་། དྲག་སྔགས་མེ་ཕུང་མ་ཤམ་ཅན་བརྗོད་པས་བསྒྲལ་དམིགས་བྱེད་སྲོལ་ཡོད། །སྤྲོ་ན་འགུགས་བསྒྲལ་ལས་བྱང་ཆེན་མོ་ནས་ལེན། ལྷག་མའི་རྗེས་སུ་བསྙེན་པ་མི་དགོས། བསྐུལ་དང་དངོས་གྲུབ་ལེན་ཆོག་ཀྱང་གྲོལ་ཁ་བར་མི་བྱའོ། །དེས་མཚམས་ཇི་ཙམ་བྱེད་པའི་སུམ་ཆ་སོང་ནས་སྒྲུབ་པ་ལ་འཇུག་སྟེ་མཆོད་གཏོར་ཁ་གསོ། གཞན་སྔར་ལྟར་ལ། ཏིང་འཛིན་རྣམ་གསུམ་སོང་མཚམས་བདག་བསྐྱེད་ནི། གཞུང་ལས། སྒྲུབ་པ་སྤྱི་ཁྱབ་གང་ལ་ཡང་༔ ཡི་དམ་དཔའ་བོ་ཆེན་པོར་གསལ༔ ཞེས་པས་སྒྲུབ་ཐབས་ཐུགས་རྗེའི་ལྕགས་ཀྱུ་ལས་འདི་ལྟར་འཕྱུང་སྟེ། ཆོས་རྣམས་དམིགས་མེད་ངང་ཉིད་ལས༔ ཉི་ཟླ་པདྨ་རོ་སྟེང་དུ༔ བདག་ཉིད་
རྟ་མགྲིན་སྐུ་མདོག་དམར༔ ཞལ་གཅིག་ཕྱག་གཉིས་སྤྱི་བོའི་གཙུག༔ རྟ་མཆོག་དབང་སྐད་ཕྱོགས་བཅུར་སྒྲོགས༔ གཡས་གཡོན་གྲི་གུག་ཐོད་ཁྲག་བསྣམས༔ རུས་རྒྱན་རིན་ཆེན་དུར་ཁྲོད་ཆས༔ བརྐྱང་བསྐུམ་འགྱིང་བག་འདོར་སྟབས་ཚུལ༔ རབ་ཁྲོས་དུར་ཁྲོད་མེ་ཀློང་བཞུགས༔ དེ་ལྟར་བསྐྱེད་པའི་སོགས་མན་ཆད་བཟླས་དམིགས་བཅས་སྔ་མ་གཞིར་བཞག །སྔགས་ཕྲེང་དང་པོ་དལ་བུ། དེ་ནས་ཇེ་མགྱོགས་གཡས་སུ་བསྐོར། མཐར་སྔགས་ཕྲེང་ས་བོན་དང་བཅས་པ་ལས་འོད་ཟེར་སྤྲོ་བསྡུས་དོན་གཉིས་མཛད་ཅིང་། རྩ་བ་གསུམ་གྱི་བྱིན་རླབས་བསྡུ་བའི་དམིགས་པ་སྤྱི་ལྟར་བྱ། ཁྱད་པར་སྣང་བ་ལ་སྟོང་པའི་རྒྱས་ཐེབས་པས་གསལ་ལ་འཛིན་པ་མེད་པ་ནམ་མཁའི་འཇའ་ཚོན་ལྟ་བུ། སྟོང་པ་ལ་སྣང་བའི་རྒྱས་ཐེབས་པས་སྟོང་ལ་འགག་པ་མེད་པ་མེ་ལོང་གི་གཟུགས་བརྙན་ལྟ་བུ། གསལ་སྟོང་འཛིན་མེད་དུ་ཡེ་ནས་ལྷུན་གྱིས་གྲུབ་པས་མ་བསྒྲིབས་རང་གསལ་རྗེན་པ་ཆུ་ནང་གི་ཟླ་བ་ལྟ་བུ། མདོར་ན་ལུས་སྣང་སྟོང་། ངག་གྲགས་སྟོང་། ཡིད་རིག་སྟོང་ཟུང་འཇུག་གི་ དགོངས་པ ་རྣམ་པ་གསུམ་གྱིས་བསྐྱེད་རྫོགས་ཡ་བྲལ་རྟག་ཆད་ཀྱི་གོལ་སའི་མཐའ་སྤང་བར་བྱའོ། །དེ་ཡི་
སྒྲུབ་ཡུན་གྱི་སུམ་གཉིས་སོང་ན་ལས་སྦྱོར་ལ་འཇུག་སྟེ་མཆོད་གཏོར་ཁ་གསོ། སྔ་རྗེས་ཚོགས་མཆོད་སོགས་སྔར་ལྟར་ལ། བདག་བསྐྱེད་ཏིང་འཛིན་རྣམ་གསུམ་མཚམས། གཞུང་ལས། ཕྲིན་ལས་ལས་ལ་སྦྱར་བའི་ཚེ༔ མཁའ་འགྲོ་ཡུམ་ཆེན་ཕག་མོར་གསལ༔ ཞེས་པ་ལྟར་བྱེ་བྲག་སྒྲུབ་པ་འཁྲུལ་དུམ་ལས་འབྱུང་བ་ནི། སྟོང་པའི་ངང་ལས་རང་བྱུང་གི༔ ཆོས་འབྱུང་དམར་ནག་གྲུ་གསུམ་པ༔ གདེང་ཁ་གྱན་ལ་བསྟན་པ་ཡི༔ ཕྱི་རོལ་དུར་ཁྲོད་རབས་གཏམས༔ ནང་དུ་ཡེ་ཤེས་གཞལ་མེད་ཁང་༔ ཕྱི་ནང་གསལ་ཞིང་ཡངས་པའི་དབུས༔ ཉི་ཟླ་པདྨ་རོ་སྟེང་དུ༔ ཆུ་ནས་ཉ་འཕར་ལྟ་བུ་ཡི༔ མཁའ་འགྲོ་ཡོངས་འདུས་གཙོ་བོ་མཆོག༔ བདག་ཉིད་རྡོ་རྗེ་རྣལ་འབྱོར་མ༔ ཞལ་གཅིག་ཕྱག་གཉིས་མཐིང་ནག་མདོག༔ ཕྱག་གཡས་ཟངས་གྲི་ནམ་མཁར་ཕྱར༔ གཡོན་པས་ཐོད་ཁྲག་ཐུགས་ཀར་འཛིན༔ ཁྲོ་ཞལ་སྤྱན་གསུམ་སྡང་མིག་བསྒྲད༔ སྨིན་མཚམས་ཁྲོ་གཉེར་གྲུ་གསུམ་བསྡུས༔ དབུ་སྐྲ་དམར་སེར་གྱེན་དུ་འཁྱིལ༔ མཐུར་སིལ་སྐུ་སྟོད་ཁྱབ་པར་གཏིབས༔ སྤྱི་གཙུག་རྟོག་མེད་ཕག་ཞལ་འཕྱོ༔ གཞོན་ཚུལ་ནུ་མ་བྷ་ག་རྒྱས༔ རིན་ཆེན་དུར་ཁྲོད་རུས་པས་བརྒྱན༔
དཔའ་བོ་ཡབ་མཆོག་སྦས་པའི་ཚུལ༔ ཁ་ཊཱྭྃཾ་ག་ལ་འཁྱུང་མཛད་དེ༔ བདེ་མཉེན་གར་སྟབས་རོལ་པར་གནས༔ དབུ་ལ་སངས་རྒྱས་རིགས་ལྔས་མཚན༔ ཉམས་དང་གཟི་བརྗིད་ལྡན་པ་སྟེ༔ མེ་རླུང་འོད་ལྔ་འཁྲིགས་དབུས་གསལ༔ དེ་ལྟར་སོགས་ཚིག་རྐང་གསུམ་བརྗོད། ལུས་དཀྱིལ་གསལ་གདབ་ལུགས་གོང་དང་མི་མཚུངས་པས་འདི་ལྟར། བཅོམ་ལྡན་མི་བསྐྱོད་རྡོ་རྗེའི་སྐུ༔ ནས། སྙིང་གི་དབུས་སུ་བལྟ་བར་བྱ༔ སྔགས། བཅོམ་ལྡན་ལག་ན་རྡོ་རྗེའི་སྐུ༔ ནས། སྙིང་གི་གཡས་སུ་གསལ་བར་གྱུར༔ སྔགས། བཅོམ་ལྡན་གུ་རུ་དྲག་པོ་རྩལ༔ ནས། སྙིང་གི་གཡོན་དུ་གསལ་བར་གྱུར༔ སྔགས། མགྲིན་པར་བུངྡྷ་ཐོད་ཕྲེང་སོགས། སྔགས། མགྲིན་པའི་གཡས་སུ་བསྐྱེད་པ་ནི༔ རྟ་མགྲིན་དབང་ཆེན་སོགས། སྔགས། རིག་འཛིན་ཆེན་པོ་ཐོད་པ་སོགས། སྔགས། སྤྱི་བོའི་གཙུག་ཏུ་སོགས། སྔགས། སངས་རྒྱས་ཐོད་པའི་དུམ་བུ་ནི༔སྤྱི་བོའི་གཡས་སུ་བསྐྱེད་སོགས། སྔགས། སྤྱི་བོར་དབང་ཆེན་ཟླ་གམ་སོགས། སྔགས། དེ་ལྟར་བསྐྱེད་པ་མན་ཆད་སྔ་མ་ལྟར་རོ། །བཟླས་དམིགས་ཀྱང་བསྙེན་སྒྲུབ་ཀྱི་དམིགས་པ་ལ་གཞི་བཟུང་། །ཐོག་མར་
སོ་སོའི་བསྙེན་པ་བཞག་མཚམས་ཁྱུག་ཙམ་རེ་དང་། རྗེས་བསྙེན་སྒྲུབ་ཇི་ཙམ་སོང་བའི་བཅུ་ཆ་གཅིག་ལ་སྒེར་དམིགས་འདི་ལྟར་བྱ་སྟེ། བུདྡྷ་ཐོད་ཕྲེང་གི་ཐུགས་སྲོག་སྔགས་ཕྲེང་དང་བཅས་པ་ལས་འོད་ཟེར་དཀར་པོ་འཕྲོས། གཏི་མུག་གི་དུག་སྦྱོང་། རྒྱལ་བ་རྣམས་མཆོད། ཞི་བའི་དངོས་གྲུབ་བསྡུས། བདག་གཞན་སེམས་ཅན་ཐམས་ཅད་ཀྱི་སྡིག་སྒྲིབ་ནད་གདོན་འཇིགས་བརྒྱད་ལ་སོགས་པ་མུན་པ་ལ་ཉི་ཟེར་ཕོག་པ་ལྟར་སྐད་ཅིག་གིས་ཞི་བར་བསམ། དེས་རིགས་འགྲེ་སྟེ། མི་བསྐྱོད་རྡོ་རྗེ་ལས་འོད་ཟེར་སེར་པོས་ང་རྒྱལ་སྦྱོང་། འབྱོར་དྲུག་དང་ཉམས་རྟོགས་སོགས་རྒྱས་པའི་ལས་སྒྲུབ། པདྨ་དབང་ཆེན་ལས་འོད་ཟེར་དམར་པོས་འདོད་ཆགས་སྦྱོང་། མོས་བཞིས་སྣང་བ་དང་རང་སེམས་དབང་དུ་སྡུད་པའི་ལས་སྒྲུབ། རིག་འཛིན་ཐོད་རྩལ་འོད་ཟེར་ལྡང་གུས་ཕྲག་དོག་སྦྱོང་། དུག་ལྔ་དང་དགྲ་བགེགས་ཚར་གཅོད་པའི་ལས་སྒྲུབ། དྲག་པོ་མེ་ཕྲེང་འོད་ཟེར་དམར་ནག་གིས་སེར་སྣ་སྦྱོང་། རྒྱལ་བ་རྣམས་མཆོད། སྟོབས་བཅུའི་རྩལ་བསྡུས། རྒྱལ་པོ་དང་གཤིན་རྗེ་བརྟུལ་ཞིང་དབང་དུ་བསྡུས། སངས་རྒྱས་དཔའ་བོ་ལས་འོད་ཟེར་མཐིང་ནག་གིས་ཞེ་སྡང་སྦྱོང་ཞིང་མཆོད། རྫུ་འཕྲུལ་དང་མངོན་ཤེས་བསྡུས།
བདུད་དང་མ་མོ་བཏུལ། རྟ་མགྲིན་ལས་འོད་ཟེར་དམར་པོས་ལས་ཉོན་གྱི་སྒྲིབ་པ་སྦྱང་ཞིང་མཆོད། དབང་བཅུ་བསྡུས། ཀླུ་དང་བཙན་རིགས་བཏུལ། གསང་བདག་གི་འོད་ཟེར་མཐིང་གས་ཤེས་བྱའི་སྒྲིབ་པ་སྦྱོང་ཞིང་མཆོད། ཆགས་ཐོགས་པའི་ཡེ་ཤེས་བསྡུས། གཟའ་དང་ས་བདག་བཏུལ། གཙོ་བོ་པདྨ་བཛྲའི་འོད་ཟེར་ཁ་དོག་སྣ་ལྔ་བས་སྙོམས་འཇུག་གི་སྒྲིབ་པ་སྦྱོང་ཞིང་མཆོད། མཆོག་གི་དངོས་གྲུབ་བསྡུས། འགྲོ་བ་རིགས་དྲུག་གི་གནས་སྦྱོང་། གཟུགས་སྣང་ལྷ་སྐུ། །སྒྲ་གྲགས་སྔགས་བརྗོད། དྲན་རྟོག་ཐམས་ཅད་རྣམ་པར་མི་རྟོག་པའི་ཡེ་ཤེས་ལས་གདོད་ནས་མ་འདས་པའི་སྣང་སྲིད་གཞིར་རྫོགས་འཁོར་འདས་དབྱེར་མེད་ཀྱི་ཁྱེར་སོ་གསུམ་དུ་ལ་བཟླ་བར་བྱའོ། །བཟླ་ཚུལ་གོ་རིམ་ཐུན་དང་པོར་སྤྱི་གཙུག་སོགས་སྔར་དང་འདྲ་ཞིང་བྱ་བ་གཞན་ཡང་སྔར་ལྟར་རོ། །དེ་ནས་སོང་མཚམས་གྲོལ་རྒྱུའི་དེ་རིང་དགོངས་མོ་ནས་གཏོར་མཆོད་བཟང་དུ་བཤམ། སྤྱི་དྲིལ་ཆེ་འབྲིང་ཅུང་ཟད་རེ་བཟླ། གྲོལ་བའི་ནངས་མོར་ཆོ་གའི་བྱ་བ་སྔར་དང་འདྲ་བ་ལ། ཚོམ་བུའི་དཀྱིལ་འཁོར་དུའང་དཔལ་ཆེན་གཙོ་བོ་དགུ་སྐད་ཅིག་གིས་བསྐྱེད་ནས་སྤྱན་འདྲེན་མཆོད་བསྟོད་སོགས་བདག་མདུན་ཆབ་
གཅིག་བྱ། བསྙེན་བཟླས་ཉུང་ཙམ་དང་བཀའ་སྲུང་ཚོགས་འཁོར་རྒྱས་པ། བསྐུལ་ཆད་བརྟན་རྟ་བྲོ་བཅས་གྲུབ་ནས། མདུན་བསྐྱེད་གནས་ལྔ་ནས་སྤྲོས་པའི་འོད་ཟེར་རང་ལ་ཐིམ་པས་རྡོ་རྗེ་བཞིའི་དབྱིག་ཆེན་པོ་ཐོབ་པར་མོས་ལ། ཧཱུྃ་ཧྲཱིཿ བདེ་ཆེན་ཡངས་པ་སོགས་ཀྱིས་དངོས་གྲུབ་བསྐུལ་ཞིང་མཐར་སྤྱི་དྲིལ་འབྲིང་པོ་ལ་དངོས་གྲུབ་བསྡུ་བའི་སྔགས་བཏགས་པ་བརྒྱ་རྩ་ཙམ་བཟླས་ལ་ཚོམ་བུ་སྤྱི་བོར་བཞག །གཏོར་མ་དང་བདུད་རྩི་སོགས་མྱོང་། ཉེས་བཤགས་མཐར་ཡིག་བརྒྱ་ལན་གསུམ། མདུན་བསྐྱེད་ཡེ་ཤེས་པ་རྟེན་ལ་གཞུག །དམ་ཚིག་པ་རང་ལ་བསྡུ། བཀྲ་ཤིས་དང་བསྡུ་ལྡང་སོགས་སྔར་ལྟར་བྱས་པས་འགྲུབ་བོ། །དེ་ལྟར་བསྒྲུབས་པའི་ཕན་ཡོན་དང་དགོས་ཆེད་ནི་གཞུང་སྤྱི་དང་བྱེ་བྲག་ལས་གསལ་ཞིང་། སྒྲུབ་པ་གཞན་མི་ཐོན་ན་འདི་ཉིད་ཁོ་ནས་ཀྱང་བསྙེན་སྒྲུབ་ཀྱི་གོ་ཆོད་ལ་གནས་སྐབས་མཐར་ཐུག་གི་དོན་ཆེན་འགྲུབ་པའི་རྒྱུར་འགྱུར་རོ། །རེ་ཞིག་དེ་ཙམ་ལས་བསྙེན་སྒྲུབ་གཞན་མི་སྦྲེལ་ཞིང་། སྔར་ཐོ་འཛུག་སོགས་བྱས་པ་ཡོད་ན་སྐབས་འདིར་དཀྲོལ་ལ་ཞག་ཤས་གནས་སྲུང་སྤྱི་ལྟར་བྱ་བའི་ཚེ་སྒོ་གསུམ་ཐ་མལ་དུ་མི་བཏང་བར་རང་སེམས་ཀྱི་ངོ་བོ་སྐྱོང་ཞིང་། རྒྱུན་གྱི་རྣལ་
འབྱོར་རྐྱང་སྒྲུབ་ཀྱི་ལུས་དཀྱིལ་ཉིད་ཐུན་རེ་མ་ཆག་པར་བྱའོ།། ༈ །།གཉིས་པ་དངོས་གཞི་རྩ་བའི་ཐུགས་སྒྲུབ་གསལ་བྱེད་ཐུགས་ཀྱི་ནོར་བུའི་བསྙེན་སྒྲུབ་ལས་གསུམ་གྱི་རིམ་པ་ནི། ཟབ་བསྡུས་གསང་བའི་དཀར་ཆག་ལས། བསྙེན་པ་ཀུན་གྱི་ཡང་སྙིང་བསྡུས་པ་ནི༔ གསལ་བྱེད་ཐུགས་ཀྱི་ནོར་བུ་གནད་ཆེ་བས༔ ཡང་གསང་རྩ་བའི་ཐུགས་སྒྲུབ་སེམས་ལ་འཆང་༔ འདི་ལ་མོས་ཤིང་བརྩོན་འགྲུས་ལྡན་པར་ནི༔ བསྙེན་རྟགས་ཐོན་པར་སུས་འབད་དངོས་གྲུབ་འབྱུང་༔ དེ་ཕྱིར་ཡེངས་མེད་རྟག་ཏུ་འདི་ལ་འབད༔ ཅེས་རྩ་གསུམ་དྲིལ་སྒྲུབ་ཨོ་རྒྱན་སྲོག་ཕུར་ དགོངས་འདུས་མདོ་འཛིན་རྩ་བའི་མན་ངག་ཏུ་བསྔགས་པ ་འདི་ལའང་གསུམ་སྟེ། དང་པོ་བསྙེན་པ་ཚ་བ་དམར་ཐག་རིན་ཆེན་གཏེར་གྱི་བང་མཛོད་ནི། དཔའ་བོ་རྐྱང་སྒྲུབ་ཟིན་པའི་རྗེས་ཐོག་དེ་ཉིད་དུའམ། དུས་གཞན་ཏུའང་རུང་སྟེ་གོང་བཤད་དུས་ཚེས་གཟའ་སྐར་བཟང་བའི་སྔ་དྲོའི་ཆར་འཇུག་ཅིང་། སྔོན་འགྲོའི་བྱ་བ་རྣམས་ཀྱང་ཐོག་མ་ནས་འདི་ཉིད་ལ་འཇུག་པ་ཡིན་ན་ཇི་ལྟར་འོས་པ་བྱ་ཞིང་། ལྷག་པར་འདི་ཉིད་ཀྱི་བསྙེན་སྒྲུབ་སྒྲེལ་ཏེ་བྱ་བ་ཡིན་ན་འདིར་རྒྱས་པར་འགྲུབ་དགོས་ལ། རྐྱང་སྒྲུབ་ཀྱི་སྔོན་དུ་
སོང་ཟིན་ན་འདིར་ཟུར་དུ་མི་དགོས་སོ། །སྤྲོས་མེད་ཀྱི་བདག་བསྐྱེད་ཡིན་པས་མཆོད་གཏོར་བཤམས་བཀོད་ཀྱི་རིམ་པ་ཅིའང་མི་དགོས་ཀྱང་། དུས་གཉན་རྣམས་སུ་ཚོགས་སྐོང་དགོས་པ་དང་། རྒྱུན་གྱི་ཚོགས་བསགས་ཆེད་དུ་རྟེན་དང་མཆོད་གཏོར་དཔའ་བོ་རྐྱང་སྒྲུབ་སྐབས་ལྟར་བཤམ། ཐོག་མའི་ཐུན་འགོར། ཚིག་བདུན་གསོལ་འདེབས། མཎྜལ་གསོལ་འདེབས་བསྡུས་པ། ཕུར་ཚུགས་གསོལ་འདེབས། ལས་བྱང་མེ་ཕྲེང་ལྟར་བགེགས་གཏོར། མཚམས་གཅོད། ཡན་ལག་བདུན་པ། སྐྱབས་སེམས་བཅས་གྲུབ་ནས། གོང་དུ་བཤད་པའི་རྡོར་སེམས་སྒོམ་བཟླས་བྱ། ཡིག་བརྒྱ་ཉེར་གཅིག་ཙམ་རེ་བཟླ། རང་གཞུང་སྐད་ཅིག་དྲན་པའི་ཏིང་ངེ་འཛིན་གསལ། སོགས་ནས། ཧ་རི་ནི་ས་ཧཱུྃ༔ བཟླས་པ་དེ་ཉིད་བྱས་པ་ཙམ་གྱིས་ནས། ཁྲུགས་ཀྱིས་འདྲེས་པར་བསམ༔ བར་ངག་ཏུ་བརྗོད། མན་ཆད་དམིགས་པ་རྣམས་རིམ་ཅན་དུ་བསྒོམ་དགོས་པས་ཐོག་མ་ནས་འདོན་མི་དགོས། གཞུང་གསལ་གྱི་དམིགས་པ་རྣམས་ལ་ཡིད་རྩེ་གཅིག་པས་བསྙེན་པ་འབྲུ་ཉེར་གསུམ་པ་བཟླ། གྲོལ་སྐབས་དབྱངས་གསལ་ཡིག་བརྒྱ་རྟེན་སྙིང་ལན་གསུམ་གསུམ་དང་། གཞུང་གསལ་ལྟར་བདག་
བསྐྱེད་བསྡུ་ཞིང་བསྔོ་སྨོན་བྱ། བགེགས་གཏོར་ཉིན་དང་པོ་དེ་ལས་མི་དགོས། གཞན་ཐུན་ཐམས་ཅད་ལ་འདོན་ཚུལ་དེ་ཁོ་ན་ཉིད་དོ། །གནད་གདམས་ལས། བསྙེན་པ་གཏན་ལ་མ་ཕེབས་ཀྱི་བར་དུ་ལུས་ངག་ཡིད་ཀྱི་སྒྲིབ་པ་སྦྱོང་བ་དང་༔ རྒྱུ་བསོད་ནམས་ཀྱི་ཚོགས་བསག་པར་བྱ་བའི་ཆེད་དུ༔ ལུས་ཕྱག་དང་བསྐོར་བ་འཁྲུལ་འཁོར༔ངག་སྔགས་དང་བཟླས་བརྗོད་གསོལ་འདེབས༔ ཡིད་མ་ཡེངས་པའི་ངང་ནས༔ བླ་མ་ཡི་དམ་མཁའ་འགྲོའི་མངོན་རྟོགས་གསལ་གདབ་ཅིང་༔ དད་པ་མོས་གུས་ཀྱི་ཤུགས་བསྐྱེད༔ སྔཙྪ་གདབ་པ་དང་༔ གཏོར་མའི་ལས་རིམ་ལ་འབད༔ དེས་བསྙེན་པའི་བྱ་བ་མཐར་ཕྱིན་པར་འགྱུར་རོ༔ ཞེས་གསུངས་པ་ལྟར་ཐུན་མཚམས་རྣམས་སུ་ཧ་ཅང་མི་གཡེངས་ཤིང་ཚོགས་བསགས་སྒྲིབ་སྦྱོང་གི་སྟོབས་ཆེ་བའི་དགེ་སྦྱོར་ཅི་རིགས་དང་། ཁྱད་པར་ཡན་ལག་བདུན་པ་སྒོ་འབྱེད་འཕྲུལ་གྱི་ལྡེའུ་མིག་དང་། མཎྜལ་རང་གཞུང་ལྟར་ཡང་ཡང་འབུལ། ཚེས་བཅུ་སོགས་དུས་བཟང་རྣམས་སུ་ལས་བྱང་མེ་ཕྲེང་ལྟར་ཚོགས་སྐོང་བཏང་། མོས་པའི་གདུང་ཤུགས་ཆེན་པོས་གསོལ་བ་དྲག་ཏུ་གདབ། རྩ་བ་དང་ཡན་ལག་གི་དམ་ཚིག་སྤྱི་རྣམས་གཞིར་བཞག །
སྒྲུབ་པ་ཁྱད་པར་ཀྱི་དམ་ཚིག་ཉེར་ལྔ་པོ་དང་། ལྷག་པར་འདི་ཉིད་ལས་གསུངས་པའི་ཁྱད་པར་གྱི་དམ་ཚིག་བཅུ་དྲུག་པོ་སྲོག་ལྟར་བསྲུང་། འདིར་གྲངས་བསྙེན་གྱི་ངེས་པ་དམིགས་བསལ་མ་གསུངས་ཤིང་། དུས་བསྙེན་རབ་ཟླ་བ་གཅིག །འབྲིང་གཉིས། ཐ་མ་ཟླ་བ་གསུམ། ཡང་མཐས་ཀྱང་ཟླ་བ་བདུན་ལ་འགྲུབ་པར་གསུངས་ཤིང་། གྲུབ་པའི་རྟགས་ཐོག་མར་སྤྲོ་བ་བསྐྱེད་པའི་ལྟས། བར་དུ་སྐུ་གསུང་ཐུགས་རྟགས། མཐར་དངོས་གྲུབ་དང་གཏན་ལ་ཕེབ་པའི་མཚན་མ་བཅས་རབ་ལ་གཅིག་ཆར། འབྲིང་ལ་མ་ངེས་པ། ཐ་མ་ལ་རིམ་བཞིན། ཡང་མཐའ་ལའང་རྟགས་དྲུག་པོ་ལས་ཐོ་རེ་བ་མི་འབྱུང་མི་སྲིད་ཅིང་། མ་བྱུང་ན་རང་ཉིད་དམ་ཚིག་ལ་སྐྱོན་ཡོད་པའམ་སེམས་ཡེངས་པས་ལན་པའི་ཕྱིར་སྐྱོན་བཅོས་ནས་འབད་པར་བསྒྲུབ། གཞུང་གསལ་གྲུབ་པའི་རྟགས་ཚད་ལྡན་རྫོགས་ན་རབ། ཐ་ནའང་སྣ་རེ་ཙམ་བྱུང་ནས་སྒྲུབ་པ་ལ་འཇུག་པར་བྱ་ཞིང་། སྤྱིར་ནི་འདི་ཉིད་མཆོག་སྒྲུབ་ཀྱི་སྙིང་པོ་ཁོ་ན་ཡིན་པས་གྲངས་ལ་ཚད་བཟུང་མེད་པར་དུང་ཕྱུར་སོགས་ཇི་ཙམ་འགྲུབ་པར་བཟླ་བ་བྱ་བ་ཉིད་དོ། །སྐབས་འདིར་མཚམས་ཀྱི་བཅད་ཁྲིགས་ཧ་ཅང་དམ་པོ་མི་དགོས་ཀྱང་སྒྲུབ་པར་འཇུག་པ་ལ་བསྙེན་པའི་རྟགས་ཚད་རྫོགས་
དགོས། རྟགས་རྫོགས་པར་བྱེད་པ་ལ་དམ་ཚིག་ཐུབ་ཅིང་སེམས་མ་ཡེངས་པ་དང་ངག་བཟླས་གཞན་ཚིག་གིས་བར་མ་ཆོད་པ་དགོས་པས་ན་གང་ཟག་མཆོག་ལ་ཚད་བཟུང་མེད་ཅིང་། འབྲིང་དང་ཐ་མ་རྣམས་ཀྱིས་སོ་མཚམས་ཕྱེད་པ་ཞིག་བྱས་ན་བཟང་ངོ། །དེ་ལྟར་གྲུབ་ནས་བསྙེན་པའི་ཁ་སྐོང་དང་སྒྲུབ་པའི་བར་ཆད་སེལ་བའི་ཆེད་དུ་ཞི་བའི་སྦྱིན་སྲེག་བསྙེན་པའི་བཅུ་ཆའམ་ཅི་འགྲུབ་བྱ་སྟེ། དེའི་ཚུལ་ནི་བྱ་ཁྱུང་པ་ངག་དབང་པདྨའི་ཡིག་ཆའམ། དཀར་ཆེན་རབ་འབྱམས་པའི་གསུང་རྒྱུན་སོགས་ལས་ཤེས་པར་བྱ་ཞིང་། སྐབས་དེར་རྫས་སྔགས་ཀྱི་གོང་དུ་སྦྲེལ་དགོས་པའི་ལྷ་སྔགས་ནི་འདི་ཉིད་ཀྱི་བསྙེན་སྒྲུབ་ལས་གསུམ་སྔགས་སྐབས་སོ་སོ་དང་བསྟུན་ཏེ་སྦྲེལ་དགོས་པས་འདིར་ནི་བསྙེན་སྔགས་ཉིད་ལ་སྦྲེལ་ལོ། །གཉིས་པ་སྒྲུབ་པའང་སྤྱིར་ཚ་བ་དམར་ཐག་ཉིད་རྩ་བ་གསུམ་གྱི་རྩ་བའི་ཐུགས་སྒྲུབ་ཡིན་པས་དེ་ཉིད་རྟགས་རྫོགས་སུ་ཐེམས་ནས་རྩ་བའི་སྒྲུབ་ཆེན་དྲུག །སྒྲུབ་ཕྲན་དྲུག་སོགས་སྒྲུབ་པ་ལས་སྦྱོར་ཐམས་ཅད་ལ་རང་དབང་ཅན་དུ་གྱུར་པ་ཡིན་ལ། དེ་ཐམས་ཅད་ཀྱི་ཟབ་བསྡུས་བཅུད་དྲིལ་གྱི་སྒྲུབ་པ་ཁྱད་པར་དུ་བསྟན་པ་ནི། གསང་བའི་དཀར་ཆག་ལས། གསལ་བྱེད་ཐུགས་ཀྱི་ནོར་བུ་ཞེས་བྱ་བ༔ རྩ་བ་
གསུམ་གྱི་སྒྲུབ་པའི་ཡང་སྙིང་ཡིན༔ དེ་ལ་གཅེས་པའི་ཡིག་ཆུང་ལྷན་ཐབས་ནི༔ ལས་བྱང་མདོར་བསྡུས་མེ་ཏོག་ཕྲེང་མཛེས་ཏེ༔ ལྷ་མཆོད་བསྒྲུབ་སོགས་ལས་རྣམས་ཀུན་ལ་གཅེས༔ ལྷ་ཚོགས་དགྱེས་ཤིང་དངོས་གྲུབ་སྩོལ་བར་འགྱུར༔ ཞེས་གསུངས་པ་ལྟར་གུད་སྦས་གཅིག་བརྒྱུད་ཟབ་ཁྱད་མངོན་ཕྱུང་གསལ་བྱེད་ཐུགས་ཀྱི་ནོར་བུའི་སྒྲུབ་པ་བྱ་བ་ལའང་གསུམ་སྟེ། དང་པོ་སྟ་གོན་ཏུ་བྱ་བའི་རིམ་པ་སྒྲུབ་རྫས། རྟེན་རྫས། དངོས་གྲུབ་ཀྱི་རྫས་ལ་སོགས་པ་དང་། རྟེན་སྒྲུབ་མཆོད་གཏོར། ཁྱད་པར་གྱི་ཡོ་བྱད། རྒྱལ་ཐོ་སྒོ་བྱང་། དམ་སྲི་མནན་ཆས། ཐིག་སྐུད། རས་བྲིས་ཀྱི་དཀྱིལ་འཁོར་ལ་སོགས་པ་འོག་ཏུ་དགོས་པའི་ཡོ་བྱད་རྣམས་གཞུང་འདི་ཉིད་དང་གཞན་ནས་འབྱུང་བ་ལྟར་སྔ་ཚགས་སུ་ཚུད་པར་བྱ། བསྙེན་པ་གྲུབ་པའི་རྗེས་དེ་ཉིད་དུ་ཕྱི་མཚམས་མི་བཀྲོལ་བར་ནང་མཚམས་ཀློད་པའི་ཁོངས་སུ་སྔར་བཤད་ཁ་སྐོང་གི་བསྲེག་བླུགས་དང་། བཤགས་རྒྱུད། ཡིག་བརྒྱ་མཎྜལ་སོག་ཚོགས་བསོག །ཆབ་གཏོར། སྡེ་བརྒྱད་གསེར་སྐྱེམས་ཆ་གསུམ་སོགས་ཕྱི་གཡེན་སྐོང་ཞིང་ཕྲིན་ལས་བཅོལ། དམ་སྲི་མནན་ལིང་སྔར་བསྒྲུབས་པ་སོགས་མེད་ན་སྐབས་འདིར་པྲ་ཁྲིད་དང་དཔེའུ་རིས་ལྟར་ཚད་ལྡན་བྲིས་ལ་གདབ་
ལས་ཀྱི་ཆོག་ཁྲིགས་རྩེ་ལེ་རིན་པོ་ཆེས་མཛད་པ་ལྟར་རམ། རྡོ་རྗེ་ཕུར་པ་སོགས་རང་ཉིད་ཀྱིས་ཡི་དམ་གང་ལ་བགྱི་བའི་རྡོ་རྗེ་ཁྲོ་བོའི་ལས་གཞུང་བསྲང་སྟེ་འགུགས་བསྟིམ་བསྒྲལ་དམིགས་ནན་ཏན་བྱ། སྒྲུབ་གྲོགས་ཡོད་ན་བསམ་ལྷུན་བར་ཆད་ལམ་སེལ་ཉེས་པ་ཀུན་སེལ་མདོ་སྣ་སོགས་འདོན་བཅོལ། ཀ་ཆ་དང་ཡི་གེ་བཏང་ལེན་སོགས་དགོས་པ་ཡོད་ན་སྐབས་འདིར་གང་དགོས་རྫོགས་པར་བྱ་ཞིང་། དངོས་གཞིའི་སྐབས་དེ་དག་ཞུད་པར་འགྱུར་བའི་རྒྱུ་ཡིན་པས་ཤིན་ཏུ་སྤངས་ཏེ་མཚམས་དམ་དུ་བཅད་དགོས། གནམ་རྒྱན། ས་རྒྱན་སྐུ་གསུང་ཐུགས་རྟེན་སྤྱི་དང་བྱེ་བྲག་སོགས་བཀོད་པའི་ཁྱད་པར་རྣམས་ཀྱང་སྐབས་འདིར་བཤམ་སྟེ་རང་ཉིད་ནུབ་ཏུ་ཕྱོགས་པ་དང་དཀྱིལ་འཁོར་ཞལ་སྤྲོད་དུ་འགྲིག་པར་བྱའོ། །དངོས་གཞི་གོང་གསལ་གྱི་ཟླ་ཚེས་ཞིག་ལ་དབུ་བཙུགས་ཏེ། ཐོག་མར་ནངས་པར་སྔ་བར་དཀྱིལ་འཁོར་གང་ལ་བྱ་བའི་སྟེགས་བུ་དེར། མཎྜལ་དྲིའི་ཐིག་ལེ་ཚོམ་བུ་གཅིག་བཀོད་པའི་མདུན་ཏུ་ཟླུམ་གཏོར་གསུམ་དང་། མཆོད་པ་རྣམ་བདུན་ཕྲེང་ཚར། དཀར་བགེགས། ཡང་སྟེགས་གང་བ་དེར་མེཉྫིའི་ཁར་དུང་ཞལ་བཅུད་ལྡན་མདུན་ཨརྒྷཾ་སོགས་ཕྱི་མཆོད་བཤམ། རང་གི་གདན་གྱི་འོག་ཏུ་རྡོ་རྗེ་གཡུང་དྲུང་གི་རེ་ཁཱ་
དཀར་པོ། །སྟེང་དུ་མཐོང་གྲོལ་འཁོར་བ་སུན་འབྱིན་དང་ཀུན་ཐུབ་སྲུང་པའི་ཙཀྲ། རྒྱབ་ཏུ་རྫོགས་ཆེན་ཉམས་ལེན་རྒྱུན་ཁྱེར་སྐབས་ནས་འབྱུང་བའི་སྲུང་བའི་བྱང་བུ་གཟུག །སྤྲོ་ཞིང་ནུས་ན་གཏེར་ཁ་རིགས་མཐུན་གཞན་ནས་ཟབ་གནད་དུ་གདམས་ཤིང་འདི་ཉིད་ནས་ཀྱང་ཕྱོགས་མཚོན་གསུངས་པའི་འོག་ཏུ་བདུད་བཞིའི་མནན་པ་སྟེང་ཕུབ་སྐུ་གསུམ་ཙཀྲ་སོགས་གྲུབ་ན་ལེགས་པའི་ཡན་ལག་གོ། །མདུན་ཏུ་རྡོར་དྲིལ་ནང་མཆོད་གཡབ་དར་སོགས་མཁོ་བའི་ཡོ་བྱད་རྣམས་ཚོགས་ནས། གསོལ་འདེབས་རྣམ་གསུམ་སྔ་མའི་དཀྱུས་བཞིན་དང་། རྩེ་ལེའི་ཆོག་བསྒྲིགས་ལྟར་དུང་ཞལ་བསྐྱེད་བཟླས་མཆོད་བསྟོད་བཅས་བསྒྲུབ། མཆོད་ཕྲེང་ལྟར་ལྕེ་ལག་རྡོར་དྲིལ་མཆོད་པ་བྱིན་རླབས། མངོན་རྟོགས་རིན་ཆེན་ཕྲེང་བ་ལྟར་ཚོགས་ཞིང་གསལ་གདབ་ནས། ལས་བྱང་ཚངས་སྒྲ། མངོན་རྟོགས། མཆོད་ཕྲེང་བཅས་ཀྱི་ཚོགས་བསགས་དང་སྐྱབས་སེམས་ལན་གསུམ། ཚོགས་ཞིང་རང་ལ་བསྡུས་ཏེ་ཚད་མེད་བཞི་བསྒོམ། ཆོག་བསྒྲིགས་ལྟར་སྤྱན་རས་གཟིགས་ཀྱི་བདག་བསྐྱེད་བཏང་། བུམ་དབང་ཆེན་མོ་དང་པྲ་ཁྲིད་གབ་སྤྲད་པའི་ས་ཆོག་གཏོར་འབུལ་བཅས་བྱ། ཚོམ་བུ་གཏོར་མཆོད་གཤེགས། ལག་པ་གཡས་པའི་ཐལ་མོ་ས་ལ་བཞག་ནས་སྤྱི་
དྲིལ་བསྡུས་པ་བརྒྱ་རྩ་ཙམ་བཟླ་བ་ཀུན་རྫོབ་དང་། ཤཱུ་ནྱ་ཏཱའི་སྔགས་བརྗོད་ཅིང་དོན་དྲན་པས་དོན་དམ་གྱི་སྦྱང་བ་ཙམ་བྱས། སླར་བྱིན་རླབས་ནས་བརྩམས་བཀའ་བསྒོ་བའི་བར་གྱིས་དཀར་བགེགས་བཏང་། དངོས་གྲུབ་བསྒྲུབ་ལ་སོགས་ཀྱིས་བསྐྲད་མཚམས་བཅད། ཐོ་དང་མཆོད་གཏོར་འདུ་བྱས་ལ་སྒྲུབ་ཁང་གི་ཕྱོགས་བཞིའམ་མི་བདེན་ཕྱི་སྒོར་ལས་བྱང་ཆེན་མོ་ལྟར་རྒྱལ་ཆེན་བཞིའི་ཐོ་འཛུག་དང་། འདི་ཉིད་ཀྱི་རང་གཞུང་ལྟར་ཕྲིན་ལས་བཅོལ། སྐབས་འདིར་དར་རས་དམར་པོ་གང་འཛོམ་ལས་བཟོས་པའི་རིགས་ཀྱི་ཅོད་པན་པདྨ་དམར་པོའི་དབྱིབས་ཅན་སྒྲུབ་ཁང་གི་ཡང་ཐོག་ཏུ་གཟུག །གསེར་སྐྱེམས་ཧོམ་བསྐྱེད་བཀུག་བསྒྲལ་སྔོན་དུ་འགྲོ་བས། སྒྲུབ་ཁོག་པྲ་ཁྲིང་ལྟར་སྒོ་དྲུང་དུ་དམ་སྲི་གཟིར་མནན་རྟ་བྲོ་བཅས་བྱ། ནང་སྒོའི་ཕྱིལ་གཤིན་རྗེ་གཤེད་དང་། ནང་ངོས་སུ་བདུད་རྩི་འཁྱིལ་བའི་སྐུ་དང་རྟེན་ཕུར་བཅས་བཀོད་ལ་པྲ་ཁྲིད་ལྟར་སྒོ་བྱང་གནས། །ས་ཚེག་ནས་འདིའི་བར་གྱི་འདོན་འགྲིགས་བྱ་ཁྱུང་ཆོག་བསྒྲིགས་ལྟར་རམ། ཁོ་བོས་བྱས་པའི་དབང་དང་སྒྲུབ་ཆེན་གྱི་ཟིན་ཆེ་ཆུང་རྣམས་ལྟར་དགོས་སོ། །སླར་ནང་དུ་ཞུས་ནས་མངོན་རྟོགས་ལྟར་སྲུང་འཁོར་རྒྱས་པ་བསྒོམ་ཞིང་སྔགས་དམིགས་ནན་ཏན་བྱ།
ཚངས་སྒྲ་ལས། ཧཱུྃ་ཧྲཱིཿ ས་བོན་ཧཱུྃ་ལས་སོགས་དང་། ཧཱུྃ་ཧྲཱིཿ ཁྲོ་རྒྱལ་དབང་ཆེན་སོགས་ནང་མཚམས་དང་གསང་མཚམས་བཅད། དེ་དག་གི་ཚེ་རྒྱལ་ཐེབས་ཀྱིས་སྤྱི་དྲིལ་ཆེ་འབྲིང་དང་ཁྲོ་བཅུའི་སྔགས་བཟླ་བཞིན་པས་ཆང་ལ་བདུད་རྩི་ཆོས་སྨན་དང་སིནྡྷཱུ་ར་བཏབ་པས་སྟེགས་བུ་གཡས་བསྐོར་དུ་བྱུགས་ཤིང་ཐིག་ཆེན་བརྒྱད་ཙམ་བཏབ་ནས་རས་བྲིས་བཏིང་། ཆག་ཆག་ཐིག་ཚོན་ཆོ་ག་གནམ་ཐིག་ས་ཐིག་སོགས་ཀྱི་སྤྲོས་པ་སྐབས་འདིར་བྱས་ཀྱང་རུང་ལ་བསྡུ་ན་འདི་ཙམ་གྱིས་ཆོག །གཞུང་གསལ་ལྟར་བརྟེན་སྒྲུབ་མཆོད་པའི་རྫས་རྣམས་བཀོད་ལེགས་བག་དྲོ་ཚུལ་མཐུན་བཤམ་ཞིང་། གཏོར་མ་ནི་སྒྲུབ་ཆེན་གྱི་སྐབས་ལྟར་ཚང་བར་དགོས་སོ། །ཁྱད་པར་དུ་སྨན་རཀ་གཏོར་གསུམ། ཆད་བརྟན་རྒྱུན་བཞག །རྒྱུན་གྱི་ཚོགས་དང་ལིངྒ་གཏོར་མཆོད། དཀྱིལ་འཁོར་གྱི་ནུབ་བྱང་དུ། ཉུ་ལེའི་ལིངྒ་དང་བྲུབ་ཁུང་། དེ་ཉིད་སྐྲོད་པའི་རྫས། ཐུན་རེ་རེ་བཞིན་མཆོད་པ་ཁ་གསོ་བའི་ཡོ་བྱད། དཀྱིལ་འཁོར་གྱི་ལྷོ་ནུབ་ཏུ་ལྷག་མ་བཙོན་འཛིན་གྱི་སྣོད་དམར་གཏོར་བཅས་མདོར་ན་འོག་ཏུ་དགོས་པ་ཐམས་ཅད་གྲབས་སུ་ཚུད་ནས། དཀྱིལ་འཁོར་ལ་སྒབ་སྐོར་རམ། དར་དཀར་དམར་མཐིང་གའི་ཡོལ་བ་རིམ་གསུམ་བཏང་ནས་སྒྲུབ་པ་གྲོལ་
གྱི་བར་དུ་ནང་གི་བཅས་རྣམས་སུས་ཀྱང་མི་མཐོང་བར་བྱ། རྟེན་རྣམས་ལ་གཟུངས་ཐག་གདགས་པའི་སྣེ་རྡོ་རྗེ་རྒྱལ་པོའི་ཕྱག་ཏུ་འཛིན་རུང་བར་བྱ།། ༈ །།གཉིས་པ་དངོས་གཞི་ནི། དེ་ལྟར་བཤམས་བཀོད་གྲུབ་ནས་ཉིན་དང་པོ་ཐུན་གཉིས། རྗེས་མ་རྣམས་སུ་ཐུན་བཞི་རེའི་དབང་དུ་བྱས་ཏེ། ཐོག་མར་ཕྱི་ཐུན་ལ། གསོལ་འདེབས། ལས་བྱང་མེ་ཏོག་ཕྲེང་མཛེས་ཀྱི། ཧཱུྃ་ཧྲཱིཿ ཡེ་ཤེས་རོལ་པ་སོགས། མཚམས་གཅད། རང་གཞུང་ལས། བདག་ཉིད་སྐད་ཅིག་གི་ནས། སྤུང་གིས་བྱོན་པར་གྱུར༔ ཡན་དང་། མེ་ཕྲེང་གི། ཀྱེ་ཀྱཻ་ཕྱོགས་བཅུའི་སྐྱབས་གནས་སོགས། སྐྱབས་སེམས་ལན་གསུམ། རྡོར་སེམས་སྒོམ་བཟླས། ལས་བྱང་ཆེན་མོའི་ཚོགས་ཞིང་སྐབས་ཀྱི། ཕྱོགས་བཅུ་དུས་བཞིར་སོགས་མཎྜལ། ཀྱེ་ཀྱེ་དུས་གསུམ་སངས་རྒྱས་སོགས་ཀྱིས་གསོལ་བ་གདབ་ཅིང་དབང་བླང་། པྲ་ཁྲིད་ལྟར། ཧཱུྃ་ཧྲཱིཿ བླ་མ་ཡི་དམ་སོགས་བརྡའ་སྒོ་ཕྱག་དམ་བཅའ་བྱིན་འབེབས་རྫོགས་པར་བྱ། ལས་བྱང་ཆུབ་པའི་ཕྱི་མཆོད་བྱིན་རླབས་མཚམས་སྨན་རཀྲ་གཏོར་གསུམ་རང་གཞུང་བདུད་རྩིའི་མཆོད་སྤྲིན་ལས། ཧཱུྃ་ལྷ་ཚོགས་མཆོད་པའི་སོགས་ནས། གཏོར་མ་བྱིན་རླབས་
རྫོགས་ཀྱི་བར་བཏང་ནས་སྨན་རཀྲ་གཏོར་གསུམ་བྱིན་རླབས་རྒྱས་པར་ཕྱག་ལེན་ལྟར་བྱ། དེ་ནས་རང་གཞུང་ལྟར། ཨོཾཱ་མ་ཧཱ་ཤཱུ་ནྱ་ཏཱ་སོགས་ནས། བདག་བསྐྱེད་བཟླས་པའི་བར་བཏང་ལ་ཐུན་བཞི་རེ་རེ་བཞིན་སྤྱི་དྲིལ་འབྲིང་པོ་སུམ་བརྒྱ་ཉེར་ལྔ་ཙམ་རེ་བཟླས་ཏེ་ཉིན་རེ་སྟོང་ཕྲག་ཙམ་རེ་འགྲོ་བར་བྱའོ། །དེ་ནས་མདུན་བསྐྱེད་ནི། ཨོཾཱ་སྭ་བྷཱ་ཝས་སྦྱངས། རང་གཞུང་ལྟར། རྫས་ཀྱི་དཀྱིལ་འཁོར་མི་དམིགས་པར་སྟོང་པར་སྦྱངས་བའི་ངང་ལས། བདེ་བར་གཤེགས་པ་ཐམས་ཅད་ཀྱི་ནས། འོད་ཟེར་དམར་པོ་རབ་ཏུ་འཁྲུགས་པའི་དབུས་སུ། གདན་པདྨ་འདབ་བཞི་སོགས་ནས། རྒྱན་ཆ་ལུགས་ལ་སོགས་པ་མ་འདྲེས་ཡོངས་རྫོགས་སུ་གསལ་བར་གྱུར༔ལས་བྱང་ལྟར། བྷྲཱུྃ༔ འབྱུང་བ་མེ་རླུང་སོགས་ནས། སྤྱན་འདྲེན་སྐབས་སྔོན་བསྐལ་མ་བཅས། ར་ཧོ་ཧཾ༔ཡན། སྒྲུབ་གཞུང་ལས། དེ་དག་རྣམས་ལའང་སོགས་ནས། བཞུགས་པར་བསྒོམ༔ བར། ལས་བྱང་ནས། ཨེ་མ་ཧོཿ ཆོས་སྐུ་ནམ་མཁའ་ནས། བསྟོད་པ་རྫོགས་ཀྱི་བར་བཏང་། མཎྜལ་ཆོ་ག་ལྟར་གསོལ་འདེབས་རྒྱས་ པ། ཕུར་ཚུགས་གསོལ་འདེབས། ཛབྲ་དགོངས ་ཚངས་པའི་ང་རོ་ལས། ཧཱུྃ་ཧྲཱིཿ བསྐུལ་ལོ་བསྐུལ་ལོ་ནས། འགྲུབ་པར་མཛད་དུ་གསོལ༔ བར། རང་
གཞུང་ལས། ལྕེ་ཟླ་གམ་དམར་པོ་སོགས་ཀྱི་དམིགས་གནད་དང་བཅས་སྒྲུབ་པའི་སྙིང་པོ་འབྲུ་བཞི་བཅུ་པ་ཉིད་གོང་བས་ཐོས་ཙམ་གྱིས་ཤུབ་བུར་རྩེ་གཅིག་ཏུ་བཟླ། ཐུན་མཐར་དབྱངས་གསལ་ཡིག་བརྒྱ་རྟེན་སྙིང་གསུམ་གསུམ། ལས་བྱང་ཆེན་མོ་ལྟར། ཧཱུྃ་ཧྲཱིཿཡེ་ཤེས་ལྷ་ཚོགས་སོགས་ཀྱིས་བསྙེན་པ་ཕུལ། ཕྱག་འཚལ་བརྒྱ་རྩ་ལས་འབྱུང་བ། ཨོཾཱ་ཨཱཿཧཱུྃཿ ཕྱོགས་བཅུའི་ཞིང་ཁམས་སོགས་ཀྱིས་མཆོད། སྨན་རཀྲ་གཏོར་གསུམ་རང་གཞུང་ལས། ཧཱུྃ་ཧྲཱིཿ རང་བྱུང་གདོད་ནས་སོགས་རྫོགས་ཀྱི་བར་མངོན་རྟོགས་དང་སྤྲད་ཚུལ་སྐོང་ཆོག་སྐབས་ལྟར་བྱས་ལ་ནང་མཆོད་ཕུལ། བསྟོད་འབུམ་ལྟར། དཀྱིལ་འཁོར་དགུ་རྫོགས་སོགས་ཀྱིས་བསྟོད། ཐུན་མཚམས་སུ་རྟ་ནག །ཤ་ཟ། བཙན་རྒོད་བཅས་ཀྱི་ལས་བྱང་གཏེར་གཞུང་ལྟར་རྒྱས་པར་བཏང་ཞིང་གཏོར་མ་འབུལ། བདག་བསྐྱེད། ཧཱུྃ་ཧཱུྃ་ཧཱུྃ་གིས་སྟོང་པར་བསྡུ། ཕཊ་ཕཊ་ཕཊ་ཀྱིས་ལྷ་སྐུར་ལྡང་། མདུན་བསྐྱེད་སྒྲུབ་བ་གྲོལ་གྱི་བར་མི་བསྡུ། །བསྔོ་སྨོན་སྤྱི་མཐུན་བྱའོ། །སྤྲོ་ན་མན་ངག་ལས་འབྱུང་བ་ལྟར་ཛབུ་བཅོལ་ནི། མདུན་བསྐྱེད་ལ་དམིགས་ཏེ། དཀྱིལ་འཁོར་ལྷ་ཚོགས་འཁོར་དང་བཅས་རྣམས་ཀྱིས། །རྣལ་འབྱོར་བདག་ཅག་ཐུན་མཚམས་
བྱ་ཡི་བར། །གྲགས་སྟོང་རྡོ་རྗེའི་སྔགས་སྒྲ་འུ་རུ་རུ། །བཟླ་བའི་ཕྲིན་ལས་གཡེལ་མེད་མཛད་དུ་གསོལ། །ཞེས་གསོལ་བ་བཏབ་པས་ཞལ་གྱིས་བཞེས་ཏེ་ཛབ་སྦྲ་དི་རི་རི་སྒྲོགས་པར་བསམ་མོ།། ༈ །།སྲོད་ཐུན་ལ་གསོལ་འདེབས། མཚམས་གཅོད་ནས་བཟུང་སྔར་དང་འདྲ་བ་ལས། སྨན་རཀྲ་གཏོར་གསུམ་བྱིན་རླབས་མེ་ཕྲེང་ལྟར་བྱ། མདུན་བསྐྱེད་བཟླས་པའི་གོང་དུ་ཕུར་ཚུགས་གསོལ་འདེབས། ཛབྲ་བསྐུལ་ཛབྲ་དགོངས་ཚངས་པའི་ང་རོ་ལྟར། ཧཱུྃ་ཧྲཱིཿ དབང་ཆེན་ཟླ་གམ་སོགས། དམིགས་པའི་འཁྲུལ་འཁོར་རང་གཞུང་ལྟར། རང་གཞན་ཕྱི་ནང་གི་སོགས། ཐུན་མགོར་འཛབ་དབྱངས་ཀྱི་རྣམ་པ་དང་བཅས་དཀྱིལ་འཁོར་ལ་བསྐོར་བ་བདུན་ལ་སོགས་པ་གང་ནུས་བྱ་ཞིང་། སླར་མལ་དུ་ཞུགས་ནས་སྐད་གསང་ཅུང་ཟད་མཐོ་བས་ཛཔྲ་བཟླ་ཞིང་བསྐོར་བའང་མོས་ པ་ཙམ་བྱའོ། །ཐུན་མཐར་བསྙེན་བསྟོད་ཛབ་དགོངས ་ལྟར་རྒྱས་པར་བྱ། ཕྱི་ནང་གསང་མཆོད་སྔགས་ཙམ་གྱིས་མཆོད། གཏེར་ཁ་རིགས་མཐུན་གཞན་ནས་འབྱུང་བའི། ཨོཾཱ་བླ་མ་ཡི་དམ་མཁའ་འགྲོའི་སོགས་དང་། ཨཱཿའདོད་ཆགས་རྣམ་དག་སོགས། སྨན་རཀྲ་ཤློ་ཀ་རེ་རེ་སྔགས་བཅས། འདི་ཉིད་ཀྱི་གཏོར་མའི་ལག་ལེན་དམར་ཁྲིད་ལས་
འབྱུང་བའི། སྣང་བ་ཆོས་སྐུའི་ནས། བཞེས་སུ་གསོལ༔ཡན་གྱིས་གཏོར་མ་འབུལ། སྨན་རཀྲ་གཏོར་གསུམ་བསྡུས་པ་དེ་དག་ཀྱང་མི་ཤེས་པའམ་དཔེ་མི་རྙེད་ན་སྔགས་ཙམ་གྱིས་མཆོད། ལས་བྱང་ཆེན་མོའི་རྗེས་ཆོག་སྐབས་ཀྱི། ཧཱུྃ་ཧྲཱིཿ འདུས་པ་ཡོངས་ཀྱི་གཙོ་སོགས་ཀྱིས་བསྟོད། དེ་ནས་ལས་བྱང་མེ་ཕྲེང་ལྟར་ཚོགས་དང་། ཆགས་མེད་རིན་པོ་ཆེས་མཛད་པའི་མདངས་སྐོང་བསྡུས་པ། བཀའ་སྲུང་གསུམ་པོ་སོ་སོའི་སྐོང་བ་རྒྱས་པ་སོགས་མཐར་ཆགས་སུ་བཏང་བ་ལས། ལྷག་མ་བཙོན་འཛིན་བྱ་དགོས་པས་སྔར་གྱི་གཟེད་ཞལ་དམར་གཏོར་ཅན་དུ་སྤུངས། མེ་ཕྲེང་བསྙེན་པ། བསྐུལ། དངོས་གྲུབ་ལེན་ཆོག །བསྡུ་རིམ་བཅས་མི་དགོས། བདག་བསྐྱེད་བསྡུ་ལྡངས་སྔར་ལྟར། བཀྲ་ཤིས་བསྔོ་སྨོན་བཅས་གྲུབ་ནས། ཉུ་ལེ་བསྐྲད་པའི་ཕྱིར་དུ། མཐོང་བརྒྱུད་ལྟར་ཆས་རྣམས་བཤམས་ལ། ཨེ་ཡཾ་ཛྭ་ལ་རཾ། བྲུབ་ཁུང་ཡངས་ཤིང་གཏིང་ཟབ་པའི་ནང་དུ་ཏྲི་ལས་དངོས་གྲུབ་ལ་བར་དུ་གཅོད་ཅིང་ལོག་པར་བལྟ་བའི་འབྱུང་པོ་ཉམས་ལེན་བདུད་ཀྱི་རིགས་སུ་གྱུར་པ་ཐམས་ཅད་རིད་ཅིང་ཉམ་ཐག་པའི་ལུས་ཅན་དུ་གྱུར། ན་མོ་རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་།
དཀོན་མཆོག་གསུམ་དང་ཡི་དམ་རྒྱུད་སྡེ་བཞི་ཡི་ལྷ་ཚོགས་མཁའ་འགྲོ་ཆོས་སྐྱོང་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། ཁྱད་པར་དུ་བླ་མ་ དགོངས་པ ་འདུས་པ་དཀྱིལ་འཁོར་ཚོམ་བུ་དགུའི་ལྷ་ཚོགས། རྟ་ནག་དྲེགས་པ། ཤ་ཟ་མ་མོ། བཙན་རྒོད་འབར་བ་སྤུན་བདུན་འཁོར་དང་བཅས་པའི་བཀའ་བདེན་པ་དང་། བདེན་པ་ཆེན་པོའི་མཐུས། སྒྲུབ་པ་དང་། སྒྲུབ་རྫས་དང་། སྒྲུབ་པ་པོ་རྣམས་ལ་བར་དུ་གཅོད་པའི་དམ་སྲི་ཉུ་ལེ་འཁོར་དང་བཅས་པ་གཟུགས་བརྙན་ལིངྒ་འདི་ལ་ཁུག་ཅིག །ཏྲི་ཡཾ་ཛཿ ཏྲི་བཛྲ་ཨཾ་ཀུ་ཤ་ཛཿ ཛཿཧཱུྃ་བྃ་ཧོཿ ཧཱུྃ་ཆོས་ཀྱི་དབྱིངས་ལས་རང་བྱུང་གྲུབ་པའི་ལྷ༔ ཁྲོ་བོ་རོལ་པའི་དུར་ཁྲོད་ཆེན་པོ་ནས༔ ཤིན་ཏུ་མི་བཟད་རབ་འཇིགས་སྐུར་སྟོན་པ༔ དཔལ་ཆེན་ཡོངས་རྫོགས་དྲག་པོའི་ཕྲིན་ལས་མཛོད༔ ཧཱུྃ་ང་ནི་པདྨ་ཧེ་རུ་ཀ༔ སྲས་དང་སྤྲུལ་པ་བྱེ་བ་འབུམ༔ བཀའ་སྡོད་རབ་འཇིགས་ཕོ་ཉར་བཅས༔ དབང་དྲག་ལྷ་ཚོགས་དུས་ལ་བབ༔ གཡས་ཀྱི་ཕྱག་ན་ཕུར་པ་འདྲིལ༔ གཡོན་གྱི་ཕྱག་ན་ལྕགས་ཀྱུ་བསྣམས༔ ལྕགས་ཀྱུས་ཟུང་ལ་ཕུར་བུས་ཐོབ༔ གནོད་བྱེད་དགྲ་བགེགས་རྡུལ་དུ་རློག༔ ཅེས་ཕུར་ཐུན་ཚོམ་བུར་བསྐུལ། སློབ་དཔོན་གྱིས་དྲག་སྔགས་སོ་ལྔ་ཕུར་བསྐོར་བཅས་གདག་
ཅིང་། ཊཱ་ཀིའམ། ལས་རྡོར་ཀྱིས་ཐུན་བྲབ། པྲ་ཁྲིད་ལྟར། ཧཱུྃཿ གནམ་ལྷའི་མ་མོ་སོགས་ཀྱིས་ཕོ་ཉ་ཀུན་ཐུབ་བསྐུལ་ཞིང་མཚན་དྲུག་དང་འབྲེལ་བའི་སྲགས་ལན་གསུམ་མམ་རེ་རེ་བཟླ། བྲུབ་ཁུང་ཁ་བཅད་ལ་སཱཙྪས་མནན། སྤོས་རོལ་གཡབ་དྲིལ་བཅས་ལས་བྱང་ཆེན་མོ་ལྟར། ཧཱུྃ་ཧྲཱིཿ དུས་གསུམ་རྒྱལ་སྲས་སོགས་ཀྱིས་བྱིན་དབབ་ལ་འཛབ་དབྱངས་ལན་ཁ་ཤས་བྱའོ།། ༈ །།ཉིན་གཉིས་པའི་ཐོར་ཐུན་ལ་གསོལ་འདེབས། ལས་བྱང་མེ་ཕྲེང་ལྟར་བགེགས་གཏོར། མཚམས་གཅོད་མན་ཆད། བཟླས་དམིགས་བསྐོར་བ་སོགས་སྔར་ཉིན་ དགོངས་ཐུན་ཇི་བཞིན་པ ་ལ། ནམ་ལངས་ཐུན་གྲོལ་སྐབས་བསྙེན་བསྟོད་ལས་བྱང་ཆེན་མོ་ལྟར། ཕྱི་ནང་གསང་མཆོད་སྨན་རཀ་སོགས་ དགོངས་ཐུན་ལྟར། བསྟོད་པ ་མངོན་རྟོགས་ཆེན་མོ་ལས་འབྱུང་བ། ཧཱུྃ་ཧྲཱིཿ བདེ་ཆེན་རོལ་ པ་སོགས་གྲུབ་ནས་ཉུ་ལེ་བསྐྲད་ཚུལ་དགོངས ་ཐུན་ལྟར་ལ། ཕོ་ཉ་སྒོས་བསྐུལ་གནམ་ལྷའི་ལྕམ་མོ་བསྒྱུར་ནས། ཧཱུྃ་ཧྲཱིཿ སྒྲུབ་པ་ལུང་གི་སོགས་བཏང་། ཉིན་གྱི་དུས་དྲུག་གི་ཉུ་ལེ་བསྐྲད་སྔགས་བཟླ༔ བྱིན་འབེབས། དུས་གསུམ་རྒྱལ་སྲས་སམ། རཏ་གླིང་ཐུགས་སྒྲུབ་ཀྱི། ཧཱུྃ་དཔལ་ལྡན་ནུབ་ཕྱོགས་
སོགས་བཏང་སྟེ། འདིའི་གཤམ་གྱི། འཆི་མེད་བདུད་རྩིའི་དངོས་གྲུབ་སྩོལ༔ ཅེས་པར། མཆོག་དང་། །ཐུན་མོང་དུ་བསྒྱུར་དགོས།། ༈ །།ཞོགས་ཐུན་ལ། གསོལ་འདེབས། མཚམས་གཅོད། སྐྱབས་སེམས་མཚམས། མངོན་རྟོགས་ལྟར་རྒྱུའི་ཧེ་རུ་ཀ་བསྐྱེད་བཟླས་སྔོན་དུ་འགྲོ་བའི་སྲུང་འཁོར་བཟླས་པ་བདུན་གསུམ་ཙམ་བཅས་བྱ། མཎྜལ་སོགས་སྔར་ལྟར་ལ། སྨན་རཀ་གཏོར་གསུམ་བྱིན་རླབས་ལས་བྱང་ཆེན་མོ་ལྟར་བྱ། མདུན་བསྐྱེད་བཟླས་དམིགས། ལྕེ་ཟླ་གམ་དམར་པོ་སོགས་དང་། བསྙེན་བསྟོད་ཐོར་ཐུན་ལྟར་དང་། ཕྱི་ནང་གསང་མཆོད་ཕྱག་འཚལ་ལྟར། སྨན་རཀ་གཏོར་གསུམ་ལས་བྱང་ཆེན་མོ་ལས། ཧཱུྃ་ཧྲཱིཿ བདུད་རྩི་བསྒྲུབ་པའི་སྣོད་སོགས་ཚང་བས་ཕུལ། བསྟོད་པའང་དེ་ཉིད་ལས། ཧཱུྃ་ཧྲཱིཿ ཆོས་ཀྱི་དབྱིངས་ལས་སོགས་ཀྱིས་བསྟོད་དོ།། ༈ །།དགོངས་ཐུན་སྔར་ཉིན་ཕྱི་ཐུན་ལྟར་ལ་སྨན་རཀ་གཏོར་གསུམ་རང་གཞུང་ལྟར་ལྕོག་དཀའ་བས་མེ་ཕྲེང་དཀྱུས་ཉིད་བཏང་། གཞན་ཁྱད་པར་མེད། སྲོད་ཐུན་ལའང་སྔ་མ་ཇི་ལྟ་བའོ། །འདིར་ཡང་སྒྲུབ་བའི་གྲངས་ཚད་དམིགས་བསལ་མ་གསུངས་ཤིང་། དུས་རབ་ཟླ་བ་གཅིག །འབྲིང་གཉིས། ཐ་མ་གསུམ་དང་། རྟགས་ཚད་ཀྱིས་གཏན་ལ་
ཕབ་བར་གསུངས་ཀྱང་དབང་པོའི་ཁྱད་པར་སོགས་ཀྱིས་དེ་ལ་ངེས་པ་མེད་པས་ཡུན་རིང་ན་མི་འཁྱོངས་ལ། ཐུུང་ན་བསྙེན་གྲངས་ཅུང་ཟད་ལས་མི་འགྲོ་བས་སྒྲུབ་པ་ཟླ་བ་གཅིག་ལྷག་ཙམ་བྱེད་པའི་དབང་དུ་བྱས་ཏེ་དེ་ལྟ་བུའི་ཚུལ་གྱིས་ཞག་གྲངས་བདུན་གསུམ་ཞོགས་ཐུན་ཞིག་ལ་ཚང་བའི། རྗེས་ཀྱི་བྱ་བ་ནི། དགོངས་ཐུན་སྲོད་ཐུན་གཉིས་ལ་བསྟོད་འབུམ་དང་ཅི་འབྱོར་བའི་ཚོགས་མཆོད་བཟང་དུ་བཤམ་སྟེ་ཚོགས་དང་མདངས་སྐོང་ཆེན་མོ་བཀའ་སྲུང་གསོལ་སྐོང་རྒྱས་པར་བཏང་། ཉུ་ལེ་བསྐྲད་པ་སོགས་དཀྱུས་བཞིན་བྱ། ཕྱིར་ནངས་ཐོར་ཐུན་སྔར་བཞིན་དང་། ཉིན་མོ་རྒྱས་པའི་བསྲེག་བླུགས་ཇི་ཙམ་འགྲུབ་པར་བྱ། སྲོད་ཐུན་ལ་ཚོགས་མཆོད་ཕུལ། ད་དུང་བསྲེག་བླུགས་ཉིན་ཁ་ཤས་འགྲུབ་ན་དེ་ལྟར་ལ། དེ་ཙམ་གྱིས་ཆོག་པར་བྱེད་ན་ཕྱིར་ནངས་ནས་ལས་སྦྱོར་ལ་འཇུག་པར་བྱའོ།། ༈ །།གསུམ་པ་ལས་ལ་སྦྱོར་བ་ལ་གཉིས་ཏེ། མཆོག་གི་ལས་སྦྱོར་ནི། སྒྲུབ་པ་ཁ་སྐོང་བཅས་གྲུབ་པའི་རྗེས་ཐོག་དེ་ཉིད་དུ་མཆོད་གཏོར་ཁ་གསོ། ཐོར་ཐུན་ལ་གསོལ་འདེབས་ནས་བརྩམས། བདག་བསྐྱེད་བཟླས་པ་ཡན་སྒྲུབ་པའི་དུས་དང་འདྲ། མདུན་བསྐྱེད། སྭ་བྷཱ་ཝས་སྦྱང་། རྫས་ཀྱི་དཀྱིལ་འཁོར་མི་དམིགས་པ་སྟོང་པར་སྦྱངས་པའི་
ངང་ལས། བདེ་བར་གཤེགས་པ་ཐམས་ཅད་ཀྱི་ཐུགས་རྗེའི་འོད་ཟེར་ལས་གྲུབ་པའི་གཞལ་ཡས་ཁང་ཕྱི་ནང་མེད་པར་གསལ་ཞིང་འོད་འབར་བ་གྲུ་བཞི་སྒོ་བཞི་རྟ་བབས་བང་རིམ་ཆར་ཁེབས་ནོར་བུ་དབང་གི་རྒྱལ་པོའི་ཏོག་དང་བཅས་པ་ཡངས་ཤིང་རྒྱ་ཆེ་བ། ཆོས་ཀྱི་དབྱིངས་དང་མཉམ་པའི་ནང་འོད་ཟེར་དམར་པོ་རབ་ཏུ་འཁྲུགས་པའི་དབུས་སུ་རྩ་བ་གསུམ་གྱི་དཀྱིལ་འཁོར་ཐོ་བརྩེགས་སུ་གསལ་བར་གྱུར། རིན་ཆེན་གའུའི་དཀྱིལ་འཁོར་དབུས། །པདྨ་ཉི་ཟླའི་གདན་སྟེང་དུ། །གུ་རུ་ཐོད་ཕྲེང་རིགས་ལྔའི་སྐུ། །རིགས་ཀྱི་ཁ་དོག་གཟི་བརྗིད་འབར། །ཕྱག་གཡས་རང་རྟགས་ཕྱག་མཚན་དང་། །གཡོན་པས་ཐོད་པ་བདུད་རྩིའི་སྟེང་། །བཅུད་ཀྱིས་གང་བའི་བུམ་པ་འཛིན། །སྐུ་ལ་ཟ་བེར་སྣམ་སྦྱར་དང་། །དབུ་ལ་ཤ་བའི་སྙན་ཞུ་གསོལ། །མཉན་ཞུ་དར་སྣ་མེ་ལོང་ལྔ། །རྒོད་ཀྱི་ཐེའུ་ཕྲན་རྣམས་ཀྱིས་སྤྲས། །སྙན་ཡོབ་གསེར་གྱི་འཁོར་ལོ་དང་། །ཕྱག་ཞབས་དུང་གི་གདུ་བུ་འཁྲོལ། །གཉིས་མེད་ཡུམ་མཆོག་སྦས་པའི་ཚུལ། །མཆན་ཁུང་གཡོན་དུ་ཁ་ཊྭཱྃ་ག །རྒྱན་རྫོགས་གྱེན་དུ་བསླང་བ་འཆང་། །སྐྱིལ་ཀྲུང་འགྱིང་པག་ཚུལ་གྱིས་བཞུགས། །དགྱེས་འཛུམ་འགྲོ་ལ་ཐུགས་རྗེས་གཟིགས། །བླ་མ་ཆོས་སྐུའི་དཀྱིལ་འཁོར་གསལ། །འཁོར་གྱི་བླ་མ་
རིག་འཛིན་ནི། །སྐུ་གསུམ་བླ་མ་བརྒྱུད་པ་དང་། །ཕྱོགས་དུས་རྒྱལ་བའི་ཚོགས་ཀྱིས་བསྐོར། །ཀུན་ཀྱང་ཆ་ལུགས་སྣ་ཚོགས་པ། །གཅིག་ཏུ་མ་ངེས་དུ་མའི་ཚུལ། །ཆར་སྤྲིན་འཐིབས་པ་ལྟ་བུར་གསལ། །རིན་ཆེན་མེ་ལོང་དཀྱིལ་འཁོར་དབུས། །ཉི་ཟླ་པདྨ་རོ་སྟེང་དུ། །རྟ་མགྲིན་དབང་ཆེན་སྐུ་མདོག་དམར། །ཞལ་གཅིག་ཕྱག་གཉིས་སྤྱི་བོའི་གཙུག །རྟ་མགོ་དབང་སྐད་ཕྱོགས་བཅུར་སྒྲོགས། །གཡས་གཡོན་གྲི་གུག་ཐོད་ཁྲག་བསྣམས། །རུས་རྒྱན་རིན་ཆེན་དུར་ཁྲོད་ཆས། །བརྐྱང་བསྐུམ་འགྱིང་བག་འདོར་སྟབས་ཚུལ། །ཕྱོགས་བཞིར་དཔའ་བོ་སྡེ་བཞི་པོ། །སྐུ་མདོག་རིགས་ཀྱི་ཁ་དོག་ལ། །རང་རྟགས་གྲི་གུག་ཐོད་ཁྲག་འཛིན། །རྒྱན་དང་ཆ་ལུགས་གཙོ་དང་མཐུན། །ཀུན་ཀྱང་དུར་ཁྲོད་མེ་ཀློང་བཞུགས། །ཡི་དམ་ལོངས་སྐུའི་དཀྱིལ་འཁོར་གསལ། །ཚོམ་བུ་དགུ་ཡི་ལྷ་ཚོགས་སོགས། །ཞི་ཁྲོ་རབ་འབྱམས་དཔག་མེད་བསྐོར། །བག་དྲོ་གཟི་བརྗིད་འོད་འབར་བཞུགས། །རིན་ཆེན་བུམ་པའི་དཀྱིལ་འཁོར་དབུས། །ཉི་ཟླ་པདྨ་རོ་སྟེང་དུ། །བཅོམ་ལྡན་རྡོ་རྗེ་རྣལ་འབྱོར་མ། །ཞལ་གཅིག་ཕྱག་གཉིས་མཐིང་ནག་མདོག །ཕྱག་གཡས་ཟངས་གྲི་ནམ་མཁར་ཕྱར། །གཡོན་པས་
ཐོད་ཁྲག་ཐུགས་ཀར་འཛིན། །ཁྲོ་ཞལ་སྤྱན་གསུམ་སྡང་མིག་བགྲད། །སྨིན་མཚམས་ཁྲོ་གཉེར་གྲུ་གསུམ་བསྡུས། །དབུ་སྐྲ་དམར་སེར་གྱེན་དུ་འཁྱིལ། །ཐུ་སིལ་སྐུ་སྟོད་ཁྱབ་པར་གཏིབས། །སྤྱི་གཙུག་རྟོག་མེད་ཕག་ཞལ་འཕྱོ། །གཞོན་ཚུལ་ནུ་མ་བྷ་ག་རྒྱས། །རིན་ཆེན་དུར་ཁྲོད་རུས་པས་བརྒྱན། །དཔའ་བོ་ཡབ་མཆོག་སྦས་པའི་ཚུལ། ཁ་ཊྭཱྃ་ག་ལ་འཁྱུད་མཛད་དེ། །བདེ་མཉེན་གར་སྟབས་རོལ་པས་གནས། །དབུ་ལ་སངས་རྒྱས་རིགས་ལྔས་མཚན། །ཉམས་དང་གཟི་བརྗིད་ལྡན་པ་ཡི། །ཕྱོགས་བཞིར་རིགས་འདུས་དྷཱ་ཀི་མ། །སྐུ་མདོག་རིགས་ཀྱི་ཁ་དོག་ལ། །ཕྱག་མཚན་ཕྱག་གཡས་རང་རྟགས་དང་། །གཡོན་པས་ཁྲག་བཀང་ཀ་པཱ་ལ། །རྒྱན་དང་ཆ་ལུགས་གཙོ་མོར་མཚུངས། །མེ་རླུང་འོད་ལྔ་འཁྲིགས་པའི་དབུས། །མཁའ་འགྲོ་སྤྲུལ་སྐུའི་དཀྱིལ་འཁོར་གསལ། །དཔའ་བོ་དཔའ་མོ་སྒོ་མཚམས་སོགས། །དྷཱ་ཀི་དམ་ཅན་སྲུང་མས་བསྐོར། །ཀུན་གྱི་གནས་གསུམ་འབྲུ་གསུམ་དང་། །ཐུགས་ཀའི་ཧྲཱིཿལས་འོད་ཟེར་འཕྲོས། །རྩ་བ་གསུམ་གྱི་ཐུགས་བརྒྱུད་བསྐུལ། །སྤྲིན་ཕུང་གཏིབས་བ་ལྟར་བྱོན་ནས། །དམ་ཚིག་པ་ལ་ཐིམ་པར་གྱུར། །ཞེས་ལྷ་བསྐྱེད་ནས་རྒྱས་པར་
སྤྲོ་ན་ལས་བྱང་ཆེན་མོ་ལྟར་བླ་མ་ཡི་དམ་མཁའ་འགྲོའི་སྤྱན་འདྲེན་བཏང་དགོས་ཀྱང་སྐབས་རེ་ཙམ་ལས་རྒྱུན་དུ་ལྕོག་དཀའ་བས། རྩ་སྒྲུབ་ནོར་བུ་པད་ཕྲེང་ལས་འབྱུང་བ་འདི་ལྟར། ཧཱུྃ་ཧྲཱིཿ ལྷོ་ནུབ་སྲིན་པོའི་ཕོ་བྲང་ནས༔ རིག་འཛིན་པདྨ་ཐོད་ཕྲེང་རྩལ༔ ཁྱོད་ལ་མོས་པས་བདག་གདུང་ཞིང་༔ དད་ པ་དང་ནི་དམ་ཚིག་གིས༔ མ་ཐོགས་མྱུར་དུ་སྤྱན་འདྲེན་གྱིས༔ ཐུགས་རྗེས་དགོངས ་ནས་གཤེགས་སུ་གསོལ༔ བླ་མའི་ཚོགས་དང་གཤེགས་སུ་གསོལ༔ ཡི་དམ་ཚོགས་དང་གཤེགས་སུ་གསོལ༔ མཁའ་འགྲོའི་ཚོགས་དང་གཤེགས་སུ་གསོལ༔ དཔའ་བོའི་ཚོགས་དང་གཤེགས་སུ་གསོལ༔ དཔའ་མོའི་ཚོགས་དང་གཤེགས་སུ་གསོལ༔ གིང་གི་ཚོགས་དང་གཤེགས་སུ་གསོལ༔ དམ་ཅན་ཚོགས་དང་གཤེགས་སུ་གསོལ༔ གཤེགས་ནས་གནས་འདིར་བཞུགས་སུ་གསོལ༔ བཞུགས་ནས་བྱིན་གྱིས་བརླབ་ཏུ་གསོལ༔ སྒྲུབ་མཆོག་བདག་ལ་དབང་ཞིག་སྐུར༔ གཞལ་ཡས་ཁང་ལ་བྱིན་ཕོབ་ལ༔ སྒྲུབ་རྫས་གཉན་ལ་ནུས་པ་བསྐྱེད༔ བདག་ཅག་མཆེད་དང་ལྕམ་དྲལ་རྣམས༔ ཁྱེད་ཀྱི་རྗེས་སུ་ད་ཞུགས་ན༔ ཕྲིན་ལས་རྣམ་བཞིའི་དངོས་གྲུབ་སྩོལ༔ ལུས་ལ་བདེ་བ་བསྐྱེད་དུ་གསོལ༔
ངག་ལ་ནུས་པ་སྦར་དུ་གསོལ༔ སེམས་ཀྱི་འདོད་དགུ་བསྒྲུབ་ཏུ་གསོལ༔ བདེ་ཆེན་ལམ་སྣ་དྲང་དུ་གསོལ༔ འགྲོ་རྣམས་བདེ་བ་བཀོད་དུ་གསོལ༔ ལོག་རྟོག་འཁྲུལ་པ་བཟློག་ཏུ་གསོལ༔ ཡང་དག་རྡོ་རྗེའི་དོན་རྟོགས་མཛོད༔ ཨོཾཱ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ༔ དྷེ་བ་དྷཱ་ཀི་ནཱིཿ ས་མ་ཡ་ཛཿཛཿ ཛཿཧཱུྃ་བྃ་ཧོཿ པདྨ་ཀ་མ་ལཱ་ཡ་སྟཾྭཿ བཛྲ་ཀུ་རུ་དྷེ་བ་དྷཱ་ཀི་ནཱིཿ སརྦ་སིངྡྷི་ཕ་ལ་སིངྡྷི་སིངྡྷིི་ཧོཿ ཞེས་པའི་མཚམས་སུ་མེ་ཕྲེང་གི་བཞུགས་གསོལ། དབང་བསྐུར་རྒྱས་གདབ། ཕྱག་འཚལ་མཆོད་པ་རྣམས་ཀྱི་བར་མཐར་ཆགས་སུ་བཏང་། བསྟོད་པ་མེ་ཕྲེང་དེ་བསྒྱུར་ལ་ལས་བྱང་ཆེན་མོའི་རྗེས་ཆོག་སྐབས་སུ་འབྱུང་བ། ཧཱུྃ་ཧྲཱིཿ སྐྱེ་མེད་རྣམ་དག་ནས། དམ་ཅན་ཚོགས་ལ་ཕྱག་འཚལ་བསྟོད༔ བར། ཛྲ་བ་བསྐུལ། ཧཱུྃ་ཧྲཱིཿ བསྐུལ་ལོ་བསྐུལ་ལོ་སོགས། བཟླས་དམིགས་རང་གཞུང་ལྟར། གའུ་མེ་ལོང་བུམ་པར་སོགས་ནས། དངོས་གྲུབ་དམ་པ་ཐོབ་པར་བསམ། བར། ཐུན་མོང་མ་ཡིན་པའི་བཟླས་པ་ཅི་འགྲུབ་མཐར་འདི་སོགས་ཐུན་བཞི་ཀར་ཐུན་གྲོལ་བ་དང་ཐུན་མཚམས་ཀྱི་བྱ་བ་སྔ་མ་སྒྲུབ་པའི་སྐབས་ཇི་ལྟ་བ་ལ་བསྟོད་པ་ནི་ཐུན་བཞི་ཀར་མཆོད་ཕྲེང་ལས་འབྱུང་བ། ཧཱུྃ་ཧྲཱིཿ བསྟོད་འོས་བསྔགས་པར་སོགས་
ནས། གུས་པས་བསྟོད༔ བར་བྱ། ཐུན་མཚམས་སུ་ཐུན་མོང་གི་འདུ་བས་མཆོག་གི་དངོས་གྲུབ་ལ་མི་སྒྲིབ་པའི་ཆེད་དུ་རྣམ་པར་མི་རྟོག་པའི་ངང་ནས་མཆོག་ལས་ཀྱི་བཟླས་པ་དེ་ཉིད་བརྒྱ་རྩ་རེ་འདྲེན། ཞོག་ ཐུན་འཛབ་བསྐུལ་ཚངས་པའི་ང་རོ་ལྟར། ཧཱུྃ་ཧྲཱིཿ ཆོས་དབྱིངས་མཐའ་དབུས་སོགས་ལེ་ཚན་གསུམ་དང་། ཕྱི་ཐུན་ལ་དབང་ཆེན་ཟླ་གམ་དང་། བསྙེན་བསྟོད་རྒྱས་པ། སྲོད་ཐུན་ལའང་དབང་ཆེན་ཟླ་གམ་གྱིས་བསྐུལ། གཞུང་ཐོར་ཐུན་ཁོ་ན་ལྷར་ལས་ཁྱད་པར་མེད་དོ། །དེ་ལྟར་མཆོག་གི་ལས་སྦྱོར་ཞག་གྲངས་བདུན་ཕྲག་གཅིག་ཚང་བའི་དགོངས་མོ་དབང་གི་དུས་ཞིག་ནས་མགོ་བརྩམ། ཞག་གྲངས་གསུམ་ལ་ཐུན་མོང་ལས་སྦྱོར་བྱ་སྟེ། གཞུང་ཚང་མ་སྔར་ལྟར་ལ། མདུན་བསྐྱེད་ཀྱི་བསྙེན་དམིགས་རང་གཞུང་ལྟར་མདུན་བསྐྱེད་བླ་མ་ཡི་དམ་སོགས་ནས། བཅུད་རྫས་ཆེན་པོར་གྱུར༔ བར་དང་། ཐུན་ལས་ཀྱི་བཟླས་པ་ཉིད་འདྲེན་ཞིང་། ཐུན་བར་དུ་མི་རྟོག་པའི་ངང་ནས་སྔགས་བཟླ་བ་དེ་མི་དགོས། རྫས་གཅིག་ལ་བརྟེན་པའི་དབང་གི་སྦྱིན་སྲེག་ཅི་འགྲུབ་རེ་བྱ། དེའི་ཚུལ་ནི་ཡིག་ཆ་ལོགས་སུ་ཡོད་པ་ལྟར་རམ། ཤིན་ཏུ་བསྡུ་ན། སྔར་ནས་བརྩིགས་ཐབ་ཁྱེར་བདེ་རྡོ་ལེབ་སྟེང་སོགས་བཟོས་
པ་འཛོམ་ན་རབ། མ་འཛོམ་ན། ས་སྟེགས་དྲི་ཆབ་ཀྱིས་བགོས་པར་འབྲུའི་ཚོམ་བུ་ལྔ་བཀོད་པའི་ཁར། ཤུག་པ་མཛོ་མོ་ཤིང་སེ་བ་སྟག་ཚེར་སོགས་ཟླ་གམ་དུ་བརྩིག། སྐད་ཅིག་གིས་མེ་ཐབ་དུ་མེ་ལོང་ལ་གཟུགས་བརྙན་ཤར་བའི་ཚུལ་གྱིས་རྩ་བ་གསུམ་གྱི་ལྷ་ཚོགས་གཉིས་པ་དབང་གི་ཆ་ལུགས་གསལ། མེ་ཏོག་དམར་པོ། སིནྡྷཱུ་ར། ཟས་སྨན་འབྲུ་སྣ། དར་ཟབ་རིན་ཆེན། མངར་གསུམ། ཆོས་སྨན་དང་ལྡན་པའི་མ་ད་ན་སོགས་མྱོས་བྱེད་ཀྱི་རྫས་རྣམས་བསངས་སྦྱངས། ཨ་ཀཱ་རོས་བྱིན་བརླབ། ལས་སྦྱོར་སྔགས་ཀྱིས་གྲངས་གང་རུང་ཕུལ། ཕྱི་ནང་གསང་བ་སྨན་རཀ་སོགས་སྔགས་ཙམ་གྱིས་མཆོད། ཕྱི་ནང་གཞན་གསུམ་སོགས་ཤློ་ཀས་བསྟོད། མེ་ཕྲེང་ལྟར་དངོས་གྲུབ་བསྐུལ། རླུང་འཁོར་ཕོ་ཉ་མྱུར་མགྱོགས་ཀྱི་ཤམ་བུའི་སྐབས་ནས་འབྱུང་བའི་དབང་གི་འདོད་གསོལ་བརྗོད་ཅིང་མེ་ཏོག་དམར་པོ་ཐབ་ཏུ་འབུལ། མཐར་ལྷ་ཚོགས་རྣམས་དཀྱིལ་འཁོར་བ་དང་དབྱེར་མེད་དུ་གྱུར་པར་མོས། སྐབས་འདིར་ཡང་གནད་གདམས་ཀྱི་བྱང་བུ་གྲུབ་ན་གལ་ཆེའོ། །དེ་ལྟར་ཞག་གསུམ་གྲུབ་མཚམས་ཐོར་ཐུན་དགོངས་ཐུན་སྔར་ལྟར་ལ་ཉིན་མོ་སྦྱིན་སྲེག་མེ་འོད་རབ་གསལ་ལྟར་དབང་གི་སྦྱིན་སྲེག་ཅི་འགྲུབ་བྱ། །སྐབས་འདིར་དམ་ཚིག་
ཉམས་ཆགས་སྐོང་ཞིང་དངོས་གྲུབ་ཀྱི་རྟེན་འབྲེལ་དུ་ཚོགས་ཀྱི་འཁོར་ལོ་རྒྱས་པར་དགོས་པས་སྐོང་ཆོག་ཆེན་མོ་ལྟར་གྲུབ་ན་ལེགས་ལ། མ་གྲུབ་ནའང་ཅི་ཙམ་འབྱོར་པའི་ཚོགས་རྫས་དཔུང་བསྐྱེད་ལ་ དགོངས་ ཐུན་སོགས་སུ་ཚོགས་དང་སྐོང་བ་རྒྱས་པར་བྱའོ། །གསུམ་པ ་ཡན་ལག་གི་རྣལ་འབྱོར་ནི་འོག་ཏུ་སྟོན་ནོ།། ༈ །།གསུམ་པ་རྗེས་ཀྱི་ལས་རིམ་ལ་དཀྱིལ་འཁོར་དང་འབྲེལ་བ་དང་། རྒྱུན་སྤྱོད་དང་འབྲེལ་བ་གཉིས་ལས། དང་པོ་ནི། གཟའ་སྐར་དུས་ཚེས་བཟང་བ་ཞིག་ལ་སྔར་ནས་བསྒྲིགས་པའི་ཐོར་ཐུན་ཉུ་ལེ་བསྐྲད་པ་ཡན་སྔ་མགྱོགས་སུ་གྲུབ་པར་བྱས། བཀའ་སྲུང་བསྡུས་ཙམ་བཏང་། ཕྲིན་ལས་བཞིའི་འབྲང་རྒྱས་སོགས་དངོས་གྲུབ་དང་ཚོགས་ཀྱི་རྫས་ཕྱག་ལེན་ལྟར་བཟང་དུ་བཤམ། ཚོགས་བྱིན་རླབས་ནས་བརྩམས་སྐོར་བསྡུས་ཡན་རྫོགས་པར་བྱ། ཚོགས་བསྒྲལ་སྐབས་ཉུ་ལེའི་ལིངྒ་མེར་བསྲེགས་པའི་ཐལ་བ་བཀའ་སྲུང་གཏོར་མར་བསྟབ། སླར་ལས་བྱང་ཆེ་ཆུང་གི། དངོས་གྲུབ་བསྒྲུབ་ལ་སོགས་དང་། །ཡེ་ཤེས་རོལ་པ་སོགས་ཀྱིས་དངོས་གྲུབ་ལ་བར་དུ་གཅོད་པ་བསྐྲད་ཅིང་མཚམས་གཅད། དུས་གསུམ་རྒྱལ་སྲས་སོགས་ཀྱིས་བྱིན་དབབ། སྒྲུབ་ཁོག་པྲ་ཁྲིད་ལྟར། ཧཱུྃ་ཧྲཱིཿརང་བྱུང་གདོད་ནས་སོགས།
བླ་མ་ཡི་དམ་མཁའ་འགྲོ་སྤྱི་བསྡུས་བཅས་ཚང་མའི་དངོས་གྲུབ་བསྐུལ། རྩ་གསུམ་བསྐུལ་སྔགས་ཉེར་གཅིག་རེ་ཙམ་དང་། སྤྱི་བསྡུས་དངོས་གྲུབ་བསྡུ་སྔགས་བརྒྱ་རྩ་ཙམ་བཟླ། བླ་མའི་སྐབས་སྒྲུབ་རྟེན་གའུ། ཡི་དམ་མེ་ལོང་། མཁའ་འགྲོའི་བུམ་པ། སྤྱི་བསྡུས་སྐབས་ཐོད་པ་བཅས་ཀྱི་དངོས་གྲུབ་བླང་ཞིང་བཅུད་མྱོང་ལ་སླར་བཞུགས། མེ་ཕྲེང་ལྟར། ཧཱུྃ་ཧྲཱིཿ བདེ་ཆེན་ཡངས་པ་སོགས་དང་། བརྡའི་འབུལ་ལེན་སྔོན་དུ་འགྲོ་བས་ཚོགས་དང་། དངོས་གྲུབ་ཀྱི་རྫས་གཞན་རྣམས་བཀྱེ། པྲ་ཁྲིད་ལྟར། ཧཱུྃ་ཧྲཱིཿ དུས་གསུམ་སངས་རྒྱས་ནས། ལྷུན་གྲུབ་ཤོག༔ བར་གྱི་བཀྲ་ཤིས་དང་སྨོན་ལམ་བྱ་ཞིང་རྫས་རོལ། ལྷག་ཆོག་སྐབས་ལྷག་མ་ཐམས་ཅད་ཕྱི་རོལ་གོམ་པ་བདུན་ཅུའི་སར་མེ་སྒྲོན་བཅས་བསྐྱལ། །བསྐུལ་དང་། ཆད་བརྟན། རྟ་བྲོ་ཡན་བྱ། འདི་སྐབས་བསྐུལ་བ་ལ་དམར་གཏོར་ཟུར་དུ་བཤམ། ཆད་བརྟན་རྒྱུན་བཞག་དང་བཀའ་སྲུང་རྟག་གཏོར་རྣམས་ཀྱང་མེ་རུ་བཅས་ཕུལ་པ་ཡིན་ནོ། །སླར་མཆོད་ཁ་གསོ། གཏང་རག་མཆོད་བསྟོད་ལས་བྱང་མེ་ཕྲེང་ལྟར་བྱིན་རླབས་སྔོན་དུ་འགྲོ་བས་ཕྱི་མཆོད་ནས་བསྟོད་པའི་བར་རྒྱས་པར་བྱ། ལོངས་ཡོད་ན་བསྟོད་འབུམ་བཏང་། ཡིག་བརྒྱ་མང་དུ་བཟླ་ཞིང་ཉེས་བཤགས་དང་། །
བཀྲ་ཤིས་མེ་ཕྲེང་ལྟར་བརྗོད། བརྟན་བཞུགས་སྤྱི་མཚམས་རྗེས་ཡེ་དྷར་དང་། སུ་པྲ་ཏིཥྛ་ཅི་འགྲུབ་བཟླ། མདུན་བསྐྱེད་དམ་ཡེ་དབྱེར་མེད་གའུ་འི་རྟེན་དང་། དངོས་གྲུབ་ཀྱི་རྫས་རྣམས་ཐོད་པའི་རིལ་བུ་ལ་བསྟིམ་སྟེ་རང་གིས་བཅད་ལུགས་གཞུང་ལྟར་བྱ། བདག་བསྐྱེད་བསྡུ་ལྡང་མེ་ཕྲེང་ལྟར་དང་། བསྔོ་སྨོན་ནི་མཎྜལ་ཆོ་ག །མེ་ཕྲེང་། པྲ་ཁྲིད་སོགས་ལྟར་རྒྱས་བསྡུས་གང་འགྲུབ་བྱ། པྲ་ཁྲིད་ལྟར། ཨེ་མ་ཧོཿརང་བྱུང་རྣམ་དག་སོགས་ཀྱིས་གོ་བགོ། མཆོད་གཏོར་བཅས་ཕྱི་ནང་གི་རྒྱལ་ཐོ་སྒོ་བྱང་ཅོད་པན་བཅས་ལས་བྱང་ཆེན་མོ་དང་པྲ་ཁྲིད་ལྟར་བཀྲོལ། གནས་སྲུང་ཞིང་དགའ་སྟོན་གྱི་ཚེ་ཉེས་པ་ཀུན་སེལ་བྱིན་རླབས་ཀྱི་སྒྲོན་མེ་དང་། སྨོན་ལམ་བཀྲ་ཤིས་ཀྱི་སྒྲོན་མེས་མཐའ་རྒྱས་དགེ་ཞིང་ཤིས་པར་བྱའོ། །གཉིས་པ་རྒྱུན་སྤྱོད་རང་གཞུང་དུ་གསལ་བ་ལྟར་འདི་ཉིད་ཀྱི་བསྐྱེད་རྫོགས་གང་རུང་གི་རྣལ་འབྱོར་མི་ཆག་པ་དང་། དུས་བཞིའམ་ལོ་བསྟར་བཞིན་མཆོད་སྒྲུབ་ལ་བརྩོན་པ་དང་། ནངས་རེ་བཞིན་ལས་སྔགས་ཅི་འགྲུབ་བཟླ་བས་རིལ་བུ་ལ་ལོངས་སྤྱོད། རྒྱལ་པོ་ལྟ་བུའི་སྤྱོད་པས་སྣང་སེམས་རང་དབང་དུ་བྱེད་ཅིང་ལོངས་སྤྱོད་ཅི་བྱུང་མཆོད་སྦྱིན་ལ་བཏང་། རང་རིགས་ཀྱི་རྟགས་རྣམས་དང་མི་བྲལ་བར་བྱ།
གཞན་ཡང་དོན་བསྡུས་ཐུགས་ཀྱི་སྙིང་པོ་ལས། དེ་ཡི་ངང་ལས་རྒྱུན་ཁྱེར་ཆོས༔ རང་ལུས་པདྨ་འབྱུང་གནས་བསྒོམ༔ བསྐྱེད་རིམ་ཀུན་གྱི་སྙིང་པོ་ཡིན༔ འཕགས་པའི་ཚོགས་རྣམས་བཀུག་ཅིང་བསྟིམ༔ དབང་བསྐུར་ཀུན་གྱི་སྙིང་པོ་ཡིན༔ སེམས་ཉིད་སྤྲོས་བྲལ་ངང་ལ་བཞག༔ རྫོགས་རིམ་ཀུན་གྱི་སྙིང་པོ་ཡིན༔ གྲགས་སྟོང་སྙིང་པོ་ཧྲཱིཿ ཡིག་བཟླས༔ བཟླས་བརྗོད་གསང་སྔགས་སྙིང་པོ་ཡིན༔ རྒྱུ་ཡི་ཐིག་ལེ་འཛག་མེད་བསྲུངས༔ ཟུང་འཇུག་བསྒོམ་པའི་སྙིང་པོ་ཡིན༔ གནོད་འགྱོད་མེད་པའི་སྤྱོད་པ་སྤྱད༔ དམ་ཚིག་ཀུན་གྱི་སྙིང་པོ་ཡིན༔ ཞེས་གསུངས་པ་དང་རྟག་ཏུ་མ་བྲལ་བར་བྱའོ།། ༈ །།དེ་དག་ལ་ཐུན་མོང་དུ་དགོས་པའི་ཡན་ལག་གི་རྣལ་འབྱོར་བསྟན་པ་ལའང་རྩ་བ་ཡན་ལག །གཉིས་ལས་དང་པོ་ནི། དེ་ལྟར་སྒྲུབ་པའི་སྐབས་ལ་སོགས་པ་ཐམས་ཅད་དུའང་དམ་ཚིག་སྤྱི་དང་། ཁྱད་པར་རང་གཞུང་ཉིད་ནས་གསལ་བ་རྣམས་ལ་ཤིན་ཏུ་གཅེས་སྤྲས་བྱ། གཞན་ཡང་གནད་གདམས་ལས། སྒྲུབ་པ་གཏན་ལ་མ་ཕེབས་ཀྱི་བར་དུ༔ ལུས་སྐྱིལ་ཀྲུང་ལ་སོགས་འཁྲུལ་འཁོར་ལུས་གནད་དང་མ་བྲལ་བ༔ ངག་སྨྲ་བ་བཅད་དེ་བསྙེན་པ་བར་མ་ཆད་པ༔ ཡིད་དམིགས་པའི་ཏིང་ངེ་འཛིན་ལས་མ་གཡོས་པ༔ ཐུན་
མཚམས་ཀྱི་རྣལ་འབྱོར་དུའང་༔ བླ་མ་ཡི་དམ་མཁའ་འགྲོའི་ཚོགས་ལ་མཎྜལ་དང་༔ སྨན་རཀ་གཏོར་མཆོད་འབུལ་རྟིང་བསྟོད་པ་ལ་སོགས་བྱ་བ་དང་༔ ཚུལ་མ་ཡིན་པའི་འདུན་སྤྱོད་ཀྱི་དབང་དུ་མ་སོང་བར་བྱ༔ ཞེས་སོགས་གཞུང་སྤྱི་དང་བྱེ་བྲག་ནས་བསམ་གྱིས་མི་ཁྱབ་པ་གསུངས་ཤིང་གསང་སྔགས་ཀྱི་སྲོག་དམ་ཚིག་ཡིན་པས་གལ་ཡང་ཤིན་ཏུ་ཆེ་རུང་འདིར་ཡི་གེས་འཇིགས་བས་གཞུང་རྣམས་དང་། ལྷག་པར་ཡང་དཀར་ཆག་ལས། དེ་རྣམས་ཡོངས་ལ་གཅེས་པའི་རྒྱབ་རྫི་ནི༔ བདག་འདྲ་པདྨའི་ཞལ་གྱི་གདམས་པ་སྟེ༔ དོན་བསྡུས་ཐུགས་ཀྱི་ཕྲེང་བའི་མན་ངག་ནི༔ སེམས་ཀྱི་སྐྱོ་རོག་སྤྱོད་པའི་གལ་མདོ་ཡིན༔ ལྟ་བའི་ཞེ་ཕུག་སྒོམ་པའི་མེ་ལོང་མཆོག༔ སྤྱོད་པའི་ལག་ལེན་འབྲས་བུའི་གཏུག་པ་ཡིན༔ ཞེས་ཆེད་དུ་བསྔགས་པའི་ཞལ་གདམས་དམར་ཁྲིད་ཉིད་འབྲལ་མེད་ཀྱི་སློབ་དཔོན་ཏུ་བརྟེན་པ་གལ་ཆེའོ། །གཉིས་པ་ཡན་ལག་གི་རྣལ་འབྱོར་ལའང་དྲིལ་སྒྲུབ་ཡིད་བཞིན་ནོར་བུ་ལས་མཉམ་པར་མ་བཞག་པའི་རྣལ་འབྱོར་བཅུ་སོགས་སོ་སོ་ནས་མང་དུ་གསུངས་ཀྱང་། འདིར་སྐབས་སུ་བབ་པའི་རྣལ་འབྱོར་དྲུག་སྟེ། དང་པོ་ཉལ་བའི་རྣལ་འབྱོར་ལའང་སྒྲུབ་པ་པོ་གང་ལ་བརྩོན་པའི་རྣལ་འབྱོར་
གྱི་རིམ་པས་གཉིས་ཏེ་སྟོང་པ་དང་བདེ་བའོ། །དང་པོ་ནི། སྙིང་གའི་ས་བོན་གྱི་འོད་ཀྱིས་སྣོད་བཅུད་རང་ལུས་ཐུགས་སྲོག་ལ་རིམ་པར་བསྡུས་ཏེ་དེ་ཉིད་སྟོང་པའི་དབྱིངས་སུ་ཞུགས་པ་ལ་བློ་བཞག་ནས་སེང་གེའི་སྟབས་ཀྱིས་ཉལ་ལོ། །གཉིས་པ་ནི། གདན་གཞལ་ཡས་ཁང་སོགས་མི་བསྡུ་བར་འཁོར་རྣམས་གཙོ་བོའི་ ཐུགས་སྲོག་ཧྲཱིཿལ་བསྡུ། གཙོ་བོ་ཡབ་ཡུམ་སྙོམས་པར་ཞུགས། བདེ་བ་ཆེན་པོས་འོད་དུ་ཞུ། བྱང་ཆུབ་སེམས་ཀྱི་ཐིག་ལེར་གྱུར་པ་ལ་སེམས་བཟུང་ངོ་༔ གཉིས་པ་ལྡང་བའི་རྣལ་འབྱོར་ལའང་གཉིས་ཏེ་སྟོང་པའི་ངང་ལས་ལྡང་བ་ནི། གཉིད་སད་མ་ཐག་ཧྲཱིཿཞེས་བརྗོད་པས་རང་གི་རྣམ་ཤེས་འོད་གསལ་བའི་ངང་ལས་པདྨ་བཛྲ་རྩམ་གྱི་སྐུར་ལྡང་། ཐུགས་ཀའི་ཧྲཱིཿལས་འོད་འཕྲོས་ཤིང་ཧྲཱིཿཞེས་བརྗོད་པས་རྟེན་དང་བརྟེན་པར་བཅས་པའི་དཀྱིལ་འཁོར་སྣོད་བཅུད་དང་བཅས་པ་གསལ་ཞིང་། རང་དང་གཟུགས་ཀྱི་སྐུ་སྣོད་བཅུད་ཐམས་ཅད་ཕྲིན་ལས་འཇུག་པའི་ཡུལ་དུ་གསལ་བས་ལྡང་བའོ། །བདེ་བའི་ངང་ནས་ལྡང་བ་ནི། ངང་བཞིན་གྱི་ངང་ནས་སྐྱོད་བྱེད་ཀྱི་མཁའ་འགྲོ་ལྔ་བྱོན་ནས་བརྡས་བསྐུལ་ཞིང་། །འབྲས་བུའི་རྡོ་རྗེ་འཛིན་པའི་བཞེངས་པའི་ཚུལ་གྱིས་རྣལ་འབྱོར་པ་ལངས་ལ། ཐུགས་ཀའི་ས་བོན་ལས་འོད་འཕྲོས་པས་
སྣོད་གཞལ་ཡས་ཁང་དང་། བཅུད་ཀྱི་ལྷ་ཐམས་ཅད་སྔར་ལྟར་རྫོགས་པར་བལྟ། གཞན་ཡང་ལངས་མ་ཐག་པ་དེར་རླུང་རོ་ལན་གསུམ་མམ་དགུ་དབྱུང་། ཚེ་འཁོར་བ་ཐོག་མ་མེད་པ་ནས་བསགས་པའི་ལས་དང་ཉོན་མོངས་པའི་སྡིག་སྒྲིབ་ཉམས་ཆགས་འགལ་འཁྲུལ་ལ་སོགས་པའི་ཉེས་ཚོགས་ཐམས་ཅད༔ ཀཾ་ནག་པོ་ལས་བྱུང་བའི་སྡིག་པ་རྭ་ཅན་གྱི་རྣམ་པར་གྱུར་ནས༔ ཉོན་མོངས་པའི་རླུང་དང་བསྡོངས་ཏེ་སྣ་སྒོར་སང་སང་ཐོན༔ མདུན་དུ་ཡེ་ཤེས་ཀྱི་མེས་སྦྱངས་པར་མོས་ལ། ཨོཾཱ་ཨཱཿཧཱུྃ་ན་མོ་གུ་རུ་ཡ༔ བྷུངྡྷ་ཡ༔ དྷརྨཱ་ཡ༔ སཾ་གྷཱ་ཡ༔ མ་མ་ཀཱ་ཡ་ཝཱ་ཀྲ་ཙིཏྟ་སརྦ་ཀརྨ་པཱ་བཾ་ད་ཧ་ན་བི་ཤུདྡྷེ་སྭཱ་ཧཱ༔ ཞེས་གསུམ་ཡན་གང་འགྲུབ་བརྗོད། བཟླས་བརྗོད་ནུས་པ་སྟོབས་འབྱིན་ལྟར་ངག་བྱིན་རླབས་བྱ། ངག་ལ་དབང་བསྐུར། གཟུངས་སྔགས་ཀྱི་ཉེས་སེལ་སོགས་ཀྱང་ཐུན་པར་སོ་སོར་ནུས་ན་སྐབས་བབ་བྱ་སྟེ་ཞར་བྱུང་སྨོས་པའོ། །གསུམ་པ་ཁྲུས་ཀྱི་རྣལ་འབྱོར་ནི། ཆབ་ལྡན་གྱི་ཁྲུས་བུམ་དུ། རྣམ་འཇོམས་སྨེ་བརྩེགས་བདུད་རྩི་འཁྱིལ་བ་སོགས་བསྐྱེད་བཟླས་སྤྱི་དང་། ཁྱད་པར་ཨོ་རྒྱན་ལ་འཁོད་མཁའ་འགྲོ་སྡེ་བཞིས་བསྐོར་བ་ལས་བདུད་རྩིའི་རྒྱུན་བབ། མཐར་ལྷ་ཡང་འོད་དུ་ཞུ།
ཆུ་དང་དབྱེར་མེད་དུ་གྱུར་པར་མོས་ལ། སྤྱི་དྲིལ་འབྲིང་བའི་གཤམ་དུ། ཤུདྡྷེ་ཤུདྡྷེ་བི་ཤུདྡྷེ་སྭཱ་ཧཱ༔ བཏགས་པ་ཅི་འགྲུབ་བཟླ། རང་གི་སྙིང་གའི་ཧྲཱིཿལས་འོད་འཕྲོས་པས༔ རིགས་ལྔ་འཁོར་བཅས་སྤྱན་དྲངས༔ ཉེར་སྤྱོད་ལྔས་མཆོད། དེ་བཞིན་གཤེགས་པ་ཐམས་ཅད་ཀྱིས་ཨོ་ན་མཿསརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ༔ ཞེས་གསུང་ཞིང་ཡེ་ཤེས་ཀྱི་བདུད་རྩི་སྤྱི་བོར་བླུགས་པས་ཕྱི་ནང་གི་དྲི་མ་ཐམས་ཅད་དག་ནས༔ ཡེ་ཤེས་ཀྱི་བདུད་རྩིས་ལུས་མེར་གྱིས་གང་བར་བསམས་ལ་བཏུང་བ་དང་ཁྲུས་བྱ། གཞན་ཡང་ལག་པ་གཡོན་པར་མེ་ཏོག་གི་ཕྲེང་བ་ཐོགས་པ་སྤྱི་བོར་བཞག་ཅིང་། ཨོཾཱ་ཨཱཿཧཱུྃ་བཛྲ་གྷུ་རུ་དྷེ་ཝ་དྷཱ་ཀི་ནཱི་མ་ི་དྷཱ་རཱི་བཛྲཱི་མ་ཧཱ་པྲ་ཏི་སཱ་རེ་རཀྵ་རཀྵ་མཱཾ་ཧཱུྃ་ཧཱུྃ་ཕཊ་ཕཊ་སྭཱ་ཧཱ༔ ཞེས་ལན་བདུན་བཟླས་པས། མི་མཐུན་པའི་ཕྱོགས་ངན་པ་ཐམས་ཅད་ལས་བསྲུང་བར་འགྱུར་བའང་ཞར་སྨོས་སོ།། ༈ །།བཞི་པ་ཁ་ཟས་ཀྱི་རྣལ་འབྱོར་ནི། གུང་ཚིགས་སྐབས་འཚོ་བ་ཟས་ཀྱི་རྣལ་འབྱོར་བདུད་རྩིའི་ཐིགས་པ་ལྟར་བྱ་ཞིང་། རྒྱུན་དུ། བདག་ཉིད་ལྷའི་ང་རྒྱལ་དུ་གསལ་བས་ལག་པ་གཡས་དགང་གཟར༔ གཡོན་བླུགས་གཟར༔ ཁ་ཐབ་ཁུང་དུ་ལྟེ་བར་གཏུམ་མོའི་མེ་སྦར་ནས་
ལུས་ཐམས་ཅད་གང་༔ མེའི་ནང་དུ་བླ་མ་ཡི་དམ་མཁའ་འགྲོའི་ཚོགས་ཆོས་སྐྱོང་སྲུང་མ་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་གསལ་གདབ་ལ༔ མཆོད་པ་འབུལ་བའི་བསམ་པས་བཟའ་བཏུང་ཨོཾཱ་ཨཱཿཧཱུྃ་གིས་ཡེ་ཤེས་ཀྱི་བདུད་རྩིར་བྱིན་གྱིས་བརླབ༔ ཆགས་ཞེན་སྲེད་པ་དང་བྲལ་བས་ལོངས་སྤྱོད༔ ལྷག་མ་རྣམས་ཀྱང་ལྷག་མ་ལ་དབང་བའི་འབྱུང་པོ་རྣམས་ལ། ཨོཾཱ་ཨུཙྪིནྚ་བ་ལིནྟ་བྷཀྵ་སི་སྭཱ་ཧཱ༔ ཞེས་སོགས་སེ་གོལ་གྱི་སྒྲ་དང་བཅས་པས་སྦྱིན་པར་བྱའོ།། ༈ །།ལྔ་པ་སྤྱོད་ལམ་གྱི་རྣལ་འབྱོར་ནི། ཐུན་མཚམས་ཐམས་ཅད་དུ་སྣོད་གཞལ་ཡས་ཁང་། བཅུད་ཐམས་ཅད་ལྷ་དང་ལྷ་མོ། འོད་གསལ་གྱི་དཀྱིལ་འཁོར་ཆེན་པོར་གསལ་བའི་བདག་ཉིད་པདྨ་བཛྲ་རྩལ་གྱི་རྣམ་རོལ་དུ་ཤེས་པས་སྤྱོད་ཡུལ་གྱི་སྣང་བ་ཐམས་ཅད་ལ་སྒྱུ་མ་རྨི་ལམ་ལྟ་བུར་ཞེན་ཆགས་མེད་པར་ཆོས་ཉིད་ལ་ཆོས་ཉིད་སྤྱོད་པའམ། ཡང་ན་ཅི་བྱས་ཐམས་ཅད་བླ་མའི་རིམ་གྲོ་དང་སེམས་ཅན་གྱི་དོན་ལ་འཇུག་པའི་མོས་པ་བྱའོ།། ༈ །།དྲུག་པ་རྗེས་ཆགས་ཀྱི་རྣལ་འབྱོར་ལ་གཉིས་ཏེ་ཁྱད་པ་རབ་ནི་ཟབ་ལམ་པའི་སྤྱོད་ཡུལ་ལོ། །འདིར་ཐུན་མོངས་ཡིད་རིག་ལ་བརྟེན་ན་བསྟོད་པའི་
མཐའ་སོགས་སུ་བདག་ཉིད་པདྨ་བཛྲ་རྩལ་ཡབ་ཡུམ་དུ་གསལ་བ་ལྷའི་འདུ་ཤེས། མཁའ་གསང་བྱིན་རླབས་དང་། ཡབ་ཡུམ་གྱི་གནས་གསུམ་འབྲུ་གསུམ་གྱིས་བྱིན་གྱིས་བརླབ་པ་སྔགས་ཀྱི་འདུ་ཤེས། བདེ་བ་ཆེན་པོས་དེ་བཞིན་གཤེགས་པ་ཐམས་ཅད་མཆོད་སྙམ་པ་ཆོས་ཀྱི་འདུ་ཤེས་ཏེ། དེ་ལྟར་གསུམ་དང་ལྡན་པའི་ངང་ནས་ཆགས་པའི་བློ་དང་བྲལ་བས་སྙོམས་པར་འཇུག་པར་མོས་ཤིང་། །དེ་ལས་བྱུང་བའི་བདེ་བས་ལུས་ཐམས་ཅད་ཁྱབ་ཅིང་རྩ་ཁམས་དང་ལུས་དཀྱིལ་གྱི་དཔའ་བོ་མཁའ་འགྲོ་ཐམས་ཅད་མཉེས་ཤིང་ཚིམ། ངོ་བོ་སྟོང་པར་བསམས་པས་བདེ་སྟོང་ཟུང་འཇུག་གི་ཏིང་ངེ་འཛིན་བསྐྱེད་པར་བྱའོ། །གཞན་ཡང་ཚོགས་ཀྱི་འཁོར་ལོའི་སྐབས་སོགས་སུ། །རྒྱུད་ཉི་ཟླ་ཁ་སྦྱོར་ལས་གསུངས་པ་ཆོས་ཉིད་རྡོ་རྗེ་གསང་བའི་གླུ། །ཨེ་མ་ཀི་རི་ཀི་རཱི་སོགས་རྡོ་རྗེའི་སྒྲས་སྣ་དྲངས། བོད་ཀྱི་རང་སྐད་ཀྱི་ཚིག་དོན་སྤྲད་དེ་ལུས་རྣམ་འགྱུར། ངག་གླུ་དབྱངས། ཡིད་རིག་པ་ཁྱབ་བདལ་ཆེན་པོའི་ངང་ནས་བླང་བར་བྱའོ། །གལ་ཏེ་ཡོ་བྱད་དང་སྒྲུབ་གྲོགས་སོགས་ཤིན་ཏུ་འཛོམ་ན་སྒྲུབ་ཆེན་ཇི་ལྟ་བ་བྱ་སྟེ། བསྙེན་རྒྱུན་བཅས་ཞག་བདུན་ལ་སོགས་པར་འབད་ན་སྒྲུབ་པ་པོ་གཅིག་གིས་ལོ་བདུན་ཡེངས་མེད་དུ་འབད་པའི་འབྲས་བུ་ཞག་བདུན་ལ་
ཐོབ་པ་སོགས་ཕན་ཡོན་བསམ་གྱིས་མི་ཁྱབ་ཅིང་། དེ་ལྟ་ན་སྒྲུབ་ཆེན་གྱི་ལག་ལེན་སོགས་ལ་ཤེས་པར་བྱ་ཞིང་། འདིར་ནི་མཁོས་ཀྱིས་མི་ལྕོགས་པའི་དབང་དུ་བྱས་ཏེ་དཔའ་བོ་གཅིག་སྒྲུབ་ཉིད་བསྟན་པའོ། །འདིར་སྤྲོས་པ་བསྡུས་ཏེ་བཤད་པའི་སྒྲུབ་རྫས་དང་ཡིག་ཆ་ཙམ་ཡང་མི་འཛོམ་པ་དག་གིས་བསྙེན་སྒྲུབ་བཤོལ་ནི་མི་དགོས་ཏེ་གང་ཟག་མོས་པ་བརྟན་པོ་ཅན་གྱིས་ནི། བདེག་བསྐྱེད་ལུས་ལ་བརྟེན་ཅིང་། མདུན་བསྐྱེད་ཚོམ་བུ་དང་གཏོར་མ་ཙམ་ལ་བརྟེན་པ་ཙམ་གྱིས་ཀྱང་འགྲུབ་པ་གསང་སྔགས་རྙིང་མའི་ཁྱད་ཆོས་ཡིན་ཏེ། ལག་ཁྲིད་གབ་པ་མངོན་ཕྱུང་ལས། གཞི་ལ་ཐུན་མོངས་མ་ཡིན་པའི་དད་པ་འགྱུར་མེད་དང་༔ བརྩོན་འགྲུས་ཀྱི་ལྕག་འཆི་བ་མི་རྟག་རྒྱུད་ལ་བསྐྱེད་པ་དང་༔སྐྱིད་སྡུག་ལེགས་ཉེས་མཐོ་དམན་ཅི་བྱུང་ཡང་༔ ལྷ་མཆོག་ཐུགས་རྗེའི་བདག་ཉིད་ཁྱེད་རང་མཁྱེན༔ སྙམ་པའི་ཐག་ཆོད་ཏུ་རྦད་ཀྱིས་བཅད་པའི་དཔང་པོར༔ སྐུ་རྟེན་ཙཀ་ལི་ལ་སོགས་པ་འདུ་འབྲལ་མེད་པར་བཅད༔ རྫས་དེ་རྣམས་ཀྱིས་ཆོག་སྟེ༔ དེ་ལ་རྫས་མཆོག་དཀར་པོ་གསུམ་ལྡན་བྱ་བ་ཡིན༔ རང་བཞིན་གྱིས་ཤུགས་འབྱུང་དུ་བྱུང་ན༔ གཞུང་སོ་སོ་ནས་བཤད་པའི་སྒྲུབ་རྟེན་དཀྱིལ་འཁོར་མཆོད་
གཏོར་རྣམས་ཀྱང་ལེགས་པར་བཤམ༔ ཞེས་གསུངས་པ་ལྟར་དད་གུས། བརྩོན་འགྲུས། ཡི་དམ་གྱི་ལྷ་ལ་ཐུན་མོང་མིན་པའི་ཡིད་ཆེས་བཅས་གསུམ་པོ་དེ་དག་ནམ་དུའང་གལ་ཆེ་ཞིང་། འདི་བྱས་ན་དྲག་གམ། འདི་ལས་གཞན་ཞིག་དགའ་འམ་སྙམ་པ་ལྟ་བུའི་བློ་ཙབ་ཙུབ་གཏན་ནས་མི་བྱ་སྟེ། དེ་ཉིད་ལས། རྒྱལ་བ་གཅིག་བསྒྲུབས་ཐམས་ཅད་མ་བསྒྲུབས་འགྲུབ༔ དེ་ཕྱིར་སྤངས་ལེན་མེད་པར་གཅིག་ལ་འབད༔ སྤངས་ལེན་བློ་ཡིས་མང་ལོ་བརྩམ་འགྱུར་ཀྱང་༔ གཅིག་ཀྱང་མ་འགྲུབ་ཨ་ཐང་ཆད་པའི་རྒྱུ༔ ཞེས་གསུངས་སོ།། ༈ །།གཉིས་པ་སྤྱི་དོན་གོ་བྱའི་གནས་གལ་པོ་ཆེ་བསྟན་པ་ནི། ཨོ་རྒྱན་དུས་གསུམ་མཁྱེན་པའི་ཞལ་ནས། དུས་ཀྱི་ཐ་མལ་གསང་སྔགས་དམ་ཚིག་གིས་བསྒྲིབས་ནས་དོན་མི་གོ་བས་བྱིན་རླབས་འགྲིབ། གྲུབ་པ་ཐོབ་པ་ཉུང་། གསང་སྔགས་ཀྱི་ཆོས་ནུབ་ལ་ཉེ་བའི་དུས་ཞིག་འོང་བར་གསུངས་པ་དེང་སང་ཡིན་ཏེ་ཐམས་ཅད་སྔགས་ལ་ཞུགས་པར་རློམ་ཡང་བཟུང་བ་རྣམ་པ་ལྔས་བཅིངས་པ་ཁོ་ན་མང་། །དེས་ན་གོ་རྒྱུའི་དོན་དེ་གང་ཡིན་ན་གསང་སྔགས་ཞེས་པ་དེ་བསྐྱེད་རྫོགས་གཉིས་ཡིན་གྱི་གྱེར་མོ་བཤམ་བཀོད་ཛབྲ་བཟླས་སོགས་བསྐྱེད་རིམ་གྱི་ཡན་ལག་ཙམ་
ལས་དངོས་གཞི་མིན། །དེའང་དབང་རབ་བསྐྱེད་རྫོགས་ཟུང་འཇུག །དབང་འབྲིང་རྫོགས་རིམ། དབང་པོ་ཐ་མར་བསྐྱེད་རིམ་གསུངས་པ་ལས། འདིར་བསྐྱེད་རིམ་གཙོ་བོར་བཏོན་པའི་སྐབས་ཡིན་ཞིང་དེའང་ལས་དང་པོ་ཚོགས་ལམ་པས་མོས་སྤྱོད་ཀྱི་ལྷ་སྐུ་རྟོག་བརྟགས་ཀྱི་རྣལ་འབྱོར་ལ་བསླབ་པ་ཙམ་ལས། རླུང་སེམས་ཀྱི་ལྷ་སྐུ་མ་དག་པའི་སྒྱུ་ལུས་སུ་ལྡང་བར་ནུས་ཀྱི་བར་དུ་ཟུང་འཇུག་མཚན་ཉིད་པ་འོང་བར་མ་གསུངས་པས་འདིར་བསྐྱེད་རིམ་རང་མཚན་པ་ལ་རྫོགས་རིམ་གྱི་རྒྱས་འདེབས་ནས་བསྒོམ་པ་ཡིན། གཞུང་ནས་ཇི་སྐད་གསུངས་པའི་ཆོ་གའི་གོ་རིམ་དང་དམིགས་པའི་རིམ་པ་ནོར་འཁྲུལ་མེད་པར་ཤེས་ཤིང་གསལ་ཐེབས་ན། །སྦྱང་བྱ་འཁོར་བའི་སྐྱེ་འཆི་དང་རྣམ་པ་མཐུན་པས་དེ་དག་སྦྱོང་ཞིང་དག །སྦྱངས་འབྲས་མྱང་འདས་དང་བཞུགས་ཚུལ་མཐུན་པས་སྐུ་གསུམ་གྱི་ས་བོན་གསོས་འདེབས་ཏེ་འབྲས་བུ་གཞི་ལ་རྫོགས། ཡེ་ཤེས་ཁྱད་པར་ཅན་སྐྱེ་བའི་གཞི་འདིང་བས་རྫོགས་རིམ་གྱི་སྨིན་བྱེད་དུ་འགྲོ་སྟེ་ལས་དང་པོ་པ་ལ་ཐབས་མཁས་ཁྱད་པར་ཅན་ཡིན་ནོ། །དེའང་ཐེག་ཆེན་ཐུན་མོང་པའི་བསམ་སྦྱོར་ཚད་ལྡན་རྒྱུད་ལ་མ་སྐྱེས་ན་སྔགས་ཀྱི་སྒོར་གཏན་ནས་འཇུག་མི་རུང་
ཞིང་། ཞུགས་སུ་ཟིན་ཀྱང་རུ་དྲ་སྲིན་པོ་ཡི་དྭགས་ཆེན་པོ་སོགས་ཀྱི་རྒྱུ་སྔགས་ལོག་ཏུ་འགྲོ་བས། ཐོག་མར་ནམ་མཁའི་མཐའ་ཁྱབ་ཀྱི་སེམས་ཅན་ཐམས་ཅད་ཟུང་འཇུག་གི་གོ་འཕང་ལ་བཀོད་འདོད་གྱི་བྱང་ཆུབ་སེམས་བློ་བཅོས་མ་མ་ཡིན་པས་ཟིན་པ། བར་དུ་བསྒོམ་སྒྲུབ་ཅི་བྱེད་དང་དོན་ཡིད་བྱེད་དང་གཏན་ནས་མ་འདྲེས་པ། ཐ་མར་དགེ་རྩ་ཐམས་ཅད་ནུས་ན་འཁོར་གསུམ་ཡོངས་དག་གི་བསྔོ་བ། མི་ནུས་ན་རྒྱལ་བ་ཐས་བཅས་ཀྱི་མཛད་པའི་རྗེས་སུ་སློབ་པར་བསྔོ་བ་བཅས་རིམ་གཉིས་གང་ལའང་མེད་དུ་མི་རུང་བའི་གལ་པོ་ཆེ་ཡིན། ད་ལྟ་འགའ་ཞིག་ནི་འདོན་བཟླས་ཀྱི་གྲངས་ཁོ་ན་ལ་གསང་སྔགས་ཉམས་སུ་ལེན་བར་རློམ་ནས་བསྒོམ་དོན་ཆེད་དུ་མི་གཡེར་བ་དང་། འགའ་ཞིག་གིས་ཅུང་ཟད་བསྒོམ་པར་རློམ་ནས་ཡིད་ཡུལ་དུ་གསལ་ཙམ་པའི་བསྐྱེད་རིམ་དང་། གསལ་རིག་ཟུང་འཇུག་ཉིད་མ་བཅོས་པར་བཞག་པས་ཆོག་པའི་གོ་མྱོང་ཙམ་ལ་རྫོགས་རིམ་དུ་གདིང་བཅས་ནས་སྤྲོས་བཅས་ཀྱི་རིམ་པ་ཁྱད་དུ་གསོད་པ་དང་། ཤིན་ཏུ་མ་གོ་བ་ཁ་ཅིག་བཤམ་བཀོད་དང་དབྱངས་རོལ་ཙམ་ལ་ཡིད་ཀྱི་གཏད་སོ་འཆའ་བ་སོགས་ཡོ་ག་རྣམ་གསུམ་གྱི་བསྟན་པ་འཇིག་པའི་སྔ་ལྟས་གདོད་མའི་མགོན་པོས་ལུང་བསྟན་པ་ཇི་སྙེད་དར་སྲོལ་ཆེ་བ། སྤྱིར་རྒྱལ་བ་རྡོ་རྗེ་
འཆད་ཐབས་མཁས་ཤིང་གདུལ་བྱའི་རྒྱུད་ཚོད་ཐམས་ཅད་མཁྱེན་པས་གང་འདུལ་གྱི་མཛད་པ་སྒོ་ཐམས་ཅད་ནས་ཐར་པར་དཀྲི་བའི་ཕྱིར་སོ་སོའི་དེ་ཡང་ངོ་མཚར་བ་ཡིན་མོད་ཀྱི། དེ་ཙམ་ལ་སྔགས་སུ་རློམ་ན་ར་གན་གསེར་དུ་བཟུང་བ་དང་མཚུངས་པས་གསང་སྔགས་ཉམས་སུ་ལེན་འདོད་ན་སྤྲོས་བཅས་པས་བསྐྱེད་རིམ་དང་། སྤྲོས་མེད་པས་རྫོགས་རིམ་ཁོ་ན་ལ་ནན་ཏན་བྱེད་དགོས། ཆོ་གའི་འགྲིགས་དང་སྔགས་བཟླ་བ་སོགས་སྒྲུབ་པ་ཆེན་པོའི་སྐབས་མ་གཏོགས་གཞན་ཏུ་དབང་པོས་གང་ལྕོག་རེས་ཆོག་གི་དེ་ཁོ་ན་གཙོ་བོར་བྱ་མི་དགོས། དཔེར་ན་འཕགས་ཡུལ་གྱི་གྲུབ་ཆེན་རྣམས་ཀྱིས་བསྐྱེད་རྫོགས་ཀྱི་མན་ངག་སྣ་རེ་ལ་སེམས་འཛིན་ལོ་གྲངས་སུ་མཛད་པས་རྒྱུད་ནས་བཤད་ཚོད་ཀྱི་ཡོན་ཏན་སྐྱེས་ཤིང་གྲུབ་པ་ཐོབ། རང་རེ་བོད་ཀྱི་ཡུལ་དུ་རྒྱུད་སྡེ་བཞིའི་བསྙེན་སྒྲུབ་ཐེམས་ལ་ཁད་དང་དུང་ཕྱུར་ཁ་གྲངས་མང་པོ་བཟླས་ཀྱང་དག་གི་བདེན་པ་ཚད་ལྡན་ཞིག་འགྲུབ་པའི་ངེས་ཏིག་མེད་པ་འདི་གསང་སྔགས་ཀྱི་དོན་མགོ་བའི་རྟགས་ཡིན། རྒྱ་བོད་གཉིས་སུ་སྔགས་ཀྱི་བྱིན་རླབས་ལ་ཉེ་རིང་ཁྱད་པར་མེད། དེས་ན་སྐབས་འདིར་ཡང་རང་གཞུང་ནས་གསུངས་པའི་བསྐྱེད་རིམ་ལ་ནན་ཏན་བྱེད་པ་གལ་ཆེ། དེའང་སྦྱང་གཞི་བདེ་གཤེགས་
སྙིང་པོ་ཡོན་ཏན་ཀུན་ཚང་གི་སངས་རྒྱས་དེ་ཉིད། སྦྱང་བྱ་གཟུང་འཛིན་འཁྲུལ་པ་གློ་བུར་བ་སྤྲིན་ལྟ་བུས་བསྒྲིབས་པ་ལ། སྦྱོང་བྱེད་གཞི་འབྲས་དང་རྣམ་པ་མཐུན་པའི་སྔགས་ཀྱི་ཐབས་མཁས་ཁྱད་པར་ཅན་བསྒོམས་པས། སྦྱང་འབྲས་གཞི་ས་བཞུགས་པའི་རང་བཞིན་རྣམ་དག་མངོན་ཏུ་གྱུར་པའི་གོ་དོན་ཆགས་པ་ཞིག་གིས་ཁྱད་པར་བཞི་ལྡན་གྱི་བསྐྱེད་རིམ་གསལ་དག་བརྟན་གསུམ་གྱི་ཚད་རིམ་པར་མཐར་ཕྱིན་པ་ནི་ངེས་རྫོགས་ཀྱི་བསྐྱེད་རིམ་མཚན་ཉིད་པ་སྟེ་ད་ལྟ་ནི་སྲིད་པ་ཙམ་མོ། །སྟན་ཐོག་གཅིག་ཏུ་སྦྱོར་དངོས་རྗེས་ཀྱི་ཆོ་ག་ཆ་ཚང་ཉམས་སུ་ལེན་ཏེ་སོ་སོའི་སྐབས་སུ་བབ་པའི་ཏིང་འཛིན་མོས་པ་ལ་མ་བྱེད་ཁྱུག་ཙམ་རེ་ལས་གསལ་སྣང་རིམ་ཅན་དུ་བསྒྲུབ་མི་ནུས་པ་ནི་མོས་སྒོམ་གྱི་བསྐྱེད་རིམ་རྗེས་མཐུན་པ་སྟེ་དེང་སང་འདི་ཉིད་མང་ངོ། །དེ་ལྟ་བུའི་ཚེ་ནའང་ཐོག་མར་གསལ་སྣང་མ་ཐེབས་ཀྱི་བར་དུ་ཆོས་འདིའི་རང་ལུགས་ཐུན་མོང་མ་ཡིན་པ་བསླབ་པའི་གནས་དྲུག་གིས་བསྐྱེད་རིམ་གཙོར་བཏོན། ཡིད་ཡུལ་སོགས་སུ་གསལ་བའམ་ངལ་དུབ་ཏུ་གྱུར་ན་བསྙེན་སྒྲུབ་ཡན་ལག་བཞི་ལྡན་གྱི་བཟླས་པ་ལ་འཇུག །ཐུན་མཚམས་སུ་དམ་ཚིག་གི་གནས་དྲུག་ལ་བསླབ་པ་སྟེ་གསུམ་མོ། །དེ་དག་མདོ་ཙམ་བརྗོད་ན། བསྐྱེད་
རིམ་ལམ་དུ་བྱེད་པའི་བསླབ་པའི་གནས་དྲུག་གི་དང་པོ་ལྷ་ལ་སེམས་བཟུང་བ་ལའང་གསུམ་སྟེ་ཐ་མལ་གྱི་འཁྲུལ་སྣང་གཅོད་པའི་ཕྱིར་རྣམ་པ་གསལ་བ་སྟེ་དེའང་བློ་རབ་ཀྱིས་གཅིག་ཆར་ཆུ་ཟླ་དང་འཇའ་ཚོན་ལྟར་སྣང་ལ་དེར་འཛིན་མེད་པ། བློ་དམན་ན་ཐོག་མར་ཡོངས་རྫོགས་ཝལ་ཙམ་དང་། སླར་རིམ་གྱིས་དབུ་དང་ཕྱག་ཞབས་སོགས་རེ་རེ་ནས་གསལ་འདེབས་ལ་སེམས་བཟུང་སྟེ། དེའང་ཐོག་མར་རྟག་པའི་སྐུ་ལྡེར་སོ་ལྟ་བུ་བསྒོམ། རིམ་པར་སྣང་ལ་མ་གྲུབ་པར་བསླབ་པ་དང་གཅིག །དེས་སྐྱོན་རྟག་པར་ལྟ་བའི་ཞེན་འཛིན་དགག་པའི་ཕྱིར་རྣམ་དག་དྲན་པ་སྟེ་ནུས་ན་མངོན་རྟོགས་ཆེན་མོ་སོགས་ནས་འབྱུང་བ་ལྟར་རེ་རེ་བཞིན་ཡིད་ལ་བྱ། ཐམས་ཅད་མི་ནུས་ན་མདོར་བསྡུས་ཙམ་མམ། ཡང་ན་དག་དྲན་རྗེས་མཐུན་ནི། སངས་རྒྱས་ཐམས་ཅད་ནི་ཆོས་ཀྱི་སྐུ་ཉག་གཅིག་ཡིན། ཆོས་སྐུ་ལ་ཞལ་ཕྱག་སོགས་མཚན་མ་རྡུལ་ཙམ་མེད་ཀྱང་བསམ་གྱིས་མི་ཁྱབ་པའི་ཡོན་ཏན་རྣམས་ཞལ་ཕྱག་རྒྱན་ཆའི་རྣམ་པར་ཤར་བས་ལྷུན་གྱིས་གྲུབ་པའི་ཕྲིན་ལས་ལ་དབང་བསྒྱུར་བ་ཡིན། རང་རྒྱུད་དངོས་པོར་གྲུབ་པ་རྡུལ་ཙམ་ཡང་མེད་སྙམ་དུ་བསྒོམ་པ་དང་གཉིས། ཐ་མལ་གྱི་བདག་འཛིན་དགག་པའི་ཕྱིར་ང་རྒྱལ་བརྟན་
པ་སྟེ། ལྷ་གསལ་རུང་མ་གསལ་རུང་དཀྱིལ་འཁོར་ཐམས་ཅད་ཀྱི་ཁྱབ་བདག་པདྨ་བཛྲ་རྩལ་ངའོ་སྙམ་པའི་ལྷའི་ང་རྒྱལ་ལ་རྟག་ཏུ་གནས་པ་ཤིན་ཏུ་གལ་ཆེ། མི་གསལ་བཞིན་ཏུ་འཁྲུལ་རྟོག་ལ་འཁྲུལ་རྟོག་གི་ལྷན་པ་འདེབས་པ་ལས་དོན་གྱི་གནད་དུ་འདི་ཟབ་པས་ནན་ཏན་བྱ་བ་བཅས་གསུམ་མོ། །དེ་དག་གིས་སེམས་ཀྱི་གླང་པོ་དྲན་ཤེས་ཀྱི་ཀ་བ་ལ་བཏགས་པའི་སྒོམ་པ་གོམས་པའི་ཉམས་ལྔ་ལས་ཐོག་མར་གཡོ་བའི་ཉམས་འགྱུ་རྟོག་ལང་ལོང་རི་གཟར་གྱི་འབབ་ཆུ་ལྟ་བུ། ཅུང་ཟད་གོམས་ཕན་ཐོབ་པའི་ཉམས་དམིགས་པ་ལ་སེམས་ཅུང་ཟད་གནས་པ་ཆུ་བྲན་ལ་བུ་འཆར་རོ། །གཉིས་པ་འགྱུར་བའི་སྐྱོན་ངོས་བཟུང་བ་ལ་སྤྱི་དང་ཁྱད་པར་གཉིས། སྤྱིའི་སྐྱོན་བདུན་ཏེ་བརྗེད་ངས་ལེ་ལོ་མི་གསལ་གྱི་དོགས་པ་བྱིང་རྒོད་ཧ་ཅང་རྩོལ་བའམ་མི་རྩོལ་བ་སྟེ་དེ་དག་ལ་དྲན་པ་སོགས་སོ་སོའི་གཉེན་པོ་བརྟེན། ཁྱད་པར་གྱི་སྐྱོན་བཅུ་གཉིས་ཏེ། རབ་རིབ། མོག་མོག །གྲིབ་མ་ཅན་ཏེ་ཁ་དོག་གི་སྐྱོན་གསུམ། སྐུའི་ཚད། ཆ་ལུགས། དབྱིབས། གྲངས། བཞུགས་ཚུལ་འགྱུར་བའི་སྐྱོན་ལྔ། ཁ་དོག་དང་དབྱིབས་འབའ་ཞིག་སྣང་བ། རིམ་པར་ནུབ་པ། རྣམ་འགྱུར་མ་རྫོགས་པ་སྟེ་
ཉམས་ཀྱི་སྐྱོན་བཞི་བཅས་བཅོས་ནས་སོ་སོའི་གཉེན་པོ་བརྟེན་ཚུལ་ཞལ་གདམས་དམར་ཁྲིད་ཉིད་ལས་གསལ་ལོ། །གསུམ་པ་ལྷ་དབྲལ་བ་ནི། སྐྱོན་དེ་དག་བྱུང་བའམ་ལྷག་པར་བསྒོམ་པས་སྐྱོ་ན་མི་རྟོག་པ་དང་སྤེལ་གྱིན་བསྒོམ། བཞི་པ་ལྷ་ལམ་དུ་སློང་བ་ནི། ལྷ་དེས་སྤྱོད་ལམ་སྣ་ཚོགས་སྟོན་པ་དང་ནམ་མཁའ་དང་རྒྱ་མཚོའི་གཏིང་སོགས་གནས་དང་། ཆེ་ཆུང་ངེས་མེད་དུ་བསྒོམ། ཅི་འདོད་བསྒྱུར་དུ་གཏུབ་ན་གོམས་པའི་ཉམས་ཆུ་ཆེན་དལ་འབབ་ལྟ་བུ་ཞེས་བྱའོ། །ལྔ་པ་ལྷ་བསྲེ་བ་ནི། ལྷར་སྣང་དང་རང་སེམས་དབྱེར་མེད་དུ་བསྲེས་ཏེ་བསྒོམ་བྱའི་ལྷ་དང་སྒོམ་བྱེད་ཀྱི་ཤེས་པ་དུམ་བུ་རིས་ཆད་དུ་མི་བཟུང་བར་དུ་མ་རོ་གཅིག་བུ་རམ་གྱི་གཟུགས་བརྙན། ཡུལ་ཤེས་གཉིས་མེད་ཆུ་དང་འཁྱག་རོམ། སྣང་སེམས་དབྱེར་མེད་རྨི་ལམ་གྱི་གྲོང་ཁྱེར་ལྟར་ཐག་བཅད་པས། རིག་སྟོང་གི་ངོ་བོ་ལ་འཕོ་འགྱུར་མེད་བཞིན་ཏུ་གསལ་མདངས་ལྷའི་དཀྱིལ་འཁོར་སྒྱུ་མ་ཙམ་དུ་སྣང་ལ་དེར་འཛིན་མ་ཞུགས་པ་འཁོར་འདས་དབྱེར་མེད་ཀྱི་བསྐྱེད་མེད་ཀྱི་བསྐྱེད་རིམ་བྱང་ཆུབ་སྒྲུབ་བའི་ཉེ་ལམ་ཐུན་མོངས་མ་ཡིན་པ་དེ་མངོན་དུ་གྱུར་ནས། བརྟན་པའི་ཉམས་འཁྲུལ་རྟོག་གིས་བར་དུ་མི་ཆོད་པ་རྒྱ་མཚོ་ཆེན་པོ་ལྟ་
བུ་འཆར། ད་དུང་བསྒོམས་པས་ས་ལེ། སང་ངེ། ལྷག་གེ། ལྷང་ངེ་བ་སྟེ་གསལ་བའི་ཚད་བཞི། མི་གཡོ། མི་འགྱུར། མངོན་པར་མི་འགྱུར། ཅིར་ཡང་བསྒྱུར་དུ་བཏུབ་པ་སྟེ་བརྟན་པའི་ཚད་བཞི་གྱད་དུ་གྱུར་ནས་མཐར་ཕྱིན་པའི་ཉམས་རི་རབ་ལྟ་བུ་སྣང་བ་ལྷའི་དཀྱིལ་འཁོར་དུ་ཤར་བའོ། །དྲུག་པ་ལྷ་དོན་དང་སྦྱར་བ་ནི། ཕུང་ཁམས་སྐྱེ་མཆེད་ཡེ་གདོད་མ་ནས་ལྷའི་སྐུ་དང་ཡེ་ཤེས་སུ་ཤར་བ་ཡིན་པ་ལ་ཡིན་པར་ཐོག་མར་གོ་བ་དང་བར་དུ་ངེས་ཤེས་བསྐྱེད་པས་མཐར་སྣང་བ་ལྷ། གྲགས་པ་སྔགས། དྲན་རྟོག་ཡེ་ཤེས་སུ་བཅོས་བསྒྱུར་མེད་པར་འཆར་བ་སྣང་སྲིད་གཞིར་བཞེངས་ཀྱི་བསྐྱེད་རིམ་ལམ་དུ་ལོངས་པར་དགོས་ཏེ། མཁས་གྲུབ་ཆེན་པོ་སྣ་ཚོགས་རང་གྲོལ་གྱི་ཞལ་ནས། ཡི་དམ་བསྐྱེད་རིམ་བསྒོམ་པ་མང་ལགས་ཀྱང་། །བསྐྱེད་རིམ་གོ་དོན་ཤེས་པ་ཉུང་བར་གདའ། །སྣོད་བཅུད་བཟོད་ནས་དག་པའི་ལྷ་སྔགས་སུ། །ཡིན་ཚུལ་ཇི་བཞིན་ཤེས་པ་མེད་ཐབས་མེད། །ཅེས་གསུངས་སོ།། ༈ །།གཉིས་པ་བཟླས་པ་ལ་འཇུག་པ་ནའང་། གསུང་རྒྱུད་ལས། གནད་ཀྱིས་ཟིན་པའི་ཏིང་འཛིན་དང་༔ ནོར་འཁྲུལ་མེད་ཅིང་སེལ་མ་ཞུགས༔ སྔགས་དང་བཅས་ནས་ལྷ་བསྒྲུབས་པས༔ དོན་
འབྲས་བླ་མེད་མཆོག་ལ་རེག༔ སྔགས་ནོར་སྒྲ་ཚིག་མ་དག་པས༔ ལྷག་ཆད་སེལ་ཞུགས་ལོག་པར་ལྟུང་༔ ཞེས་དང་། ཨོ་རྒྱན་ཆེན་པོས། མ་ཡེངས་ཏིང་འཛིན་ལྡན་པས་བཟླ༔ གཞན་ཏུ་ཡེངས་བར་གྱུར་ན་ནི༔ བསྐལ་པར་བཟླས་ཀྱང་འབྲས་མི་འབྱིན༔ ཞེས་གསུངས་པ་ལྟར་གཙོ་བོ་ཏིང་ངེ་འཛིན་ལ་སེམས་རྩེ་གཅིག་ཏུ་གནས་པའི་ངང་སྔགས་སྒྲ་ཆེ་ཆུང་རིང་ཐུང་མྱུར་བུལ། སྔགས་འབྲུ་ལ་ཆད་ལྷག་དང་ཀློག་པའི་སྒྲ་གདངས་ནོར་བ་སོགས་ཀྱི་སྐྱོན་སྤང་ཞིང་། མི་ཚིག་གི་བར་དུ་ཆོད་པ་སོགས་སེལ་མ་ཞུགས་པ་དང་། རྫུན་དང་ངག་འཁྱལ་སྨེ་ཅན་གྱི་ཟས་སོགས་ངག་གི་ནུས་པ་ཉམས་པའི་རྒྱུ་སྤང་ཞིང་ལན་ཚྭ་སོགས་སྤངས་མི་ནུས་ནའང་གཉེན་པོའི་བྱིན་རླབས་མན་ངག་ལས་འབྱུང་བ་ལྟར་བྱའི་འཁོར་འདས་དབྱེར་མེད་གྱི་རྟོགས་པ་ལྷོངས་སུ་མ་གྱུར་བཞིན་ཏུ་ཐབས་ཁྱད་པར་ཅན་གྱི་རྒྱུ་འབྲས་ཁྱད་དུ་གསོད་པ་ནམ་ཡང་མི་བྱ་བར་གཞུང་འདི་ཉིད་ཀྱི་མན་ངག་རྣམས་དང་འབྲི་གུང་ཆོས་གྲགས་ཀྱིས་མཛད་པའི་བསྙེན་སྒྲུབ་སྤྱི་ལ་གཅེས་པའི་ཡི་གེ་སོགས་ལ་ཞིབ་མོར་རྟོག་ཅིང་ལག་ཏུ་ལེན་པ་གལ་ཆེའོ། །འདིར་ནི་ཡི་གེས་འཇིགས་པས་མ་སྤྲོས་ལ་སྐབས་སུ་མཁོ་བ་བགྲང་ཕྲེང་བྱིན་རླབས་ཕྲེང་བའི་དེ་ཉིད་
ལས་གསུངས་པ་འདི་ལྟར་བྱ་སྟེ། དེའང་ཕྲེང་བའི་རྒྱུ་དེ་ཉིད་ལས་མང་དུ་གསུངས་ཀྱང་། བོ་དྷི་ཙེ་ནི་ཀུན་ལ་ཤིས༔ཞེས་དང་། རྡོ་རྗེ་རྩེ་མོ་ལས། བོ་དྷི་ཙེ་ཡིས་གྲངས་མེད་འགྱུར། །ཞེས་གསུངས་པ་ལྟར་བོ་དྷི་ ཙེའི་ཕྲེང་བ་ཕྲེང་ཐག་གསུམ་ལྔ་དགུ་བསྒྲིལ་གང་རིགས་མདོ་འཛིན་གསུམ་བརྩེགས་ཅན། གཞན་གྱིས་ལོངས་མ་སྤྱད་པ་བ་བྱུང་རྣམ་ལྔས་བགྲུས་ཤིང་དྲི་བཟང་གིས་བྱུགས་པ་དེ་ཉིད། གཞུང་ལས། བདག་ཉིད་ལྷ་ཡི་ང་རྒྱལ་གྱིས༔ ཕྲེང་བ་ལག་པ་གཡོན་དུ་བསྐྱིལ༔ མདོ་འཛིན་སྟེང་དུ་ཡོད་པར་བྱ༔ ཞེས་པ་ལྟར་བྱས་ལ། ལག་པ་གཡས་པའི་མཐིལ་དུ་ཉི་མ་ལ་ཧཱུྃ༔ གཡོན་པའི་མཐིལ་དུ་ཟླ་བ་ལ་ཨཱས་མཚན་པར་གྱུར༔ ཨོཾཱ་སྭ་བྷཱ་ཝས་སྦྱངས། སྟོང་ལས་པདྨ་ཉི་ཟླའི་སྟེང་། །མདོ་འཛིན་གཙོ་བོ་ཡབ་ཡུམ་ལ། །ཕྲེང་བ་འཁོར་གྱི་རྣམ་པས་བསྐོར། །གནས་གསུམ་འབྲུ་གསུམ་མཚན་པ་ལས། །འོད་འཕྲོས་ཡེ་ཤེས་སྤྱན་དྲངས་ཐིམ། །ཛཿཧཱུྃ་བྃ་ཧོཿགཉིས་མེད་གྱུར། །ཨརྒྷཾ་སོགས་ཀྱིས་མཆོད། དུས་གསུམ་བདེ་གཤེགས་རྒྱལ་བ་ཐམས་ཅད་ཀྱི༔སོགས་ཤློ་ཀས་བསྟོད། རྩ་བ་གསུམ་གྱི་ལྷ་ཚོགས་ཐམས་ཅད་བཟླ་བྱའི་ཡིག་འབྲུའི་རྣམ་པར་ཆར་ལྟར་
བབས་ནས་ཕྲེང་བ་ལ་ཐིམ་པར་མོས་ལ། རྩ་སྔགས་དང་། ཨོཾཱ་རུ་ཙི་པྲ་མཏྟན་ཡེར་རྣམ་ི་དྷ་ར་ཛྙཱ་ན་དེ་བ་ཨ་བྷི་ཥིཉྩ་ཧཱུྃ་སྭཱ་ཧཱ༔ ཞེས་བརྒྱ་རྩ་བཟླས། ལྷ་རྣམས་འོད་ཞུ་ཕྲེང་བར་གྱུར། །ཆོས་དབྱིངས་ཀུན་ཁྱབ་རྩ་གསུམ་ལྷ། །གདོད་ནས་ཕྲེང་བའི་ངོ་བོར་ཤར། །ཐབས་ཤེས་སོར་མོའི་སྦྱོར་བ་ཡིས། །བགྲད་བ་ཙམ་གྱིས་མཆོག་ཐུན་དངོས། །ཐོགས་མེད་འགྲུབ་པའི་མཐུ་ཅན་གྱུར། །ཞེས་མོས་ལ་སླར་རྩ་སྔགས་མཐར་དབྱངས་གསལ་རྟེན་སྙིང་བཏགས་པ་གང་འགྲུབ་མེ་ཏོག་ལ་སྔགས་ཏེ་གཏོར་ཞིང་ཤིས་པ་བརྗོད། བཟླས་པའི་ཐོག་མར་ཡང་འབྲུ་གསུམ་བརྒྱ་རྩ་བརྒྱད། དབྱངས་གསལ་རྟེན་སྙིང་། ཕྲེང་བ་བྱིན་རླབས་སྔགས་གོང་གསལ་དེའམ། ཨོཾཱ་ཨཱཿཧཱུྃ་རཏྣ་མཱ་ལེ་རུ་ཙིར་མ་ི་པྲ་བ་ཏྟ་ཡ་ཧཱུྃ་ཕཊ༔ ཅེས་ཆོས་སྤྱོད་ལས་འབྱུང་བ་ཉིད་ཉེར་གཅིག་ལ་སོགས་པ་བཟླས་ནས་ལས་ལ་སྦྱར་བར་གསུངས་ཏེ་དེང་སང་རྙིང་ཕྱོགས་ཀྱི་ལག་ལེན་ཏུའང་སྣང་ངོ་། །བགྲང་ཚུལ་སོགས་ཞིབ་མོར་ཕྲེང་བའི་དེ་ཉིད་ལས་གསལ་ལོ། །ཆགས་མེད་ཞབས་ཀྱིས་ཐུགས་སྲོག་སྐབས་ཡི་གེའི་མདུན་རྒྱབ་ཁྱད་པར་མཛད་འདུག་ཅིང་དེ་ལྟར་ཡང་ལེགས་མོད། ཁ་ཅིག་གིས་
རྒྱ་གར་གྱི་ཡིག་གཟུགས་བསྒོམ་དགོས་སམ་སྙམ་པ་སོགས་རྣམ་རྟོག་ལ་མཐའ་མེད་ཕྱིར་འདིར་ཡང་དོགས་པ་ཇི་སྙེད་ཅིག་སྐྱེ་བར་སྣང་བས་འདི་ལྟར་ཡང་གོ་བ་གལ་ཆེ་སྟེ། སྤྱིར་རྒྱལ་བའི་བཀའ་ཐེག་པ་ཆེན་པོ་ནི་ཚེག་ལ་མི་རྟོན་དོན་ལ་རྟོན་པ་འབའ་ཞིག་ཡིན། སྒོས་སུ་གསུང་རྡོ་རྗེ་ལ་ཚིག་དང་ཡི་གེ་མེད་ཀྱང་རྣམ་པ་གང་འདུལ་དུ་ཤར། ཁྱད་པར་སངས་རྒྱས་ཀྱི་ཐུགས་རྗེ་ནི་མོས་པ་ཁོ་ནའི་རྗེས་སུ་འཇུག །ལྷག་པར་གསང་སྔགས་ནི་མོས་པས་འགྲུབ་ཀྱི་རྟོག་དཔྱོད་ཀྱིས་མི་འགྲུབ། གསང་སྔགས་ཀྱི་གེགས་སུ་ཐེ་ཚོམ་ཁོ་ན་ཆེ་བས་ཡིད་ཆེས་ཀྱི་མོས་པ་རྩེ་གཅིག་ཡོད་ཕྱིན་ཆད་ཡི་གེའི་གཟུགས་བོད་ཡིག་བློ་ལ་གང་བདེར་བསྒོམ་ཆོག་ཅིང་སྔགས་སྒྲ་རང་ཇི་བཞིན་པ་བོད་ཀྱི་ལྕེས་མི་འགྱུར། སྒྲ་ལེགས་པར་མ་བྱང་ན་གཅོད་མཚམས་སོགས་ཀྱང་ནོར་བ་ཁོ་ན་མང་སྟབས་དཔྱད་པ་མི་བྱ་བར་སྔགས་ཀློག་ཅུང་ཟད་རེ་མ་དག་ཀྱང་དེ་ཙམ་མི་ལྟོ་བས་ཐེ་ཚོམ་མེད་པའི་ངེས་ཤེས་ཉིད་གཙོ་ཆེའོ། །གཞན་ཡང་གསུང་རྒྱུད་ལས། བྲེ་མོ་དང་འདྲེས་བཟླས་པ་ལ༔ ནུས་རྟགས་ཡུན་ཏུ་འགྱང་བར་འགྱུར༔ གཉིད་རྨུགས་འདྲེས་པའི་བཟླས་པ་ནི༔ བགེགས་ཀྱི་བར་ཆད་འཇུག་པའི་རྒྱུ༔ ལོ་འདོད་བསམ་བའི་བཟླས་པ་ནི༔
བྱང་ཆུབ་ལམ་དུ་འགྲོ་མི་སྲིད༔ ཅེས་ཁྱད་པར་གྱི་སྐྱོན་གསུམ་རྟག་ཏུ་སྤང་། ལམ་གྱི་འཆུག་སོ་མེད་པ་ཡི༔ བཟླས་པ་ཡིད་བཞིན་ནོར་བུ་ཡིན༔ ཞེས་སོགས་དང་། ངག་གི་དབང་ཕྱུག་གྲགས་པས་ཀྱང་། འཇིག་རྟེན་ན་ནི་དངོས་གཞན་གང་། །སྔགས་ཀྱིས་མི་འགྲུབ་དེ་ཡོད་མིན། །ཡང་དག་དད་པས་འབད་པ་ལ། །སྔགས་རྣམས་ཡིད་བཞིན་ནོར་བུར་མཚུངས། །ཞེས་སོགས་ཕན་ཡོན་རྒྱ་ཆེན་པོ་ཡིད་ལ་བཞག་ནས་བཟླས་པ་ལ་སྐྱོ་དུབ་མེད་པ་དང་། རྒྱུད་ལས། སྔགས་ཀྱི་ནུས་རྟགས་ཐོན་པ་ཡི༔ རྟགས་དང་མཚན་མ་ཅི་བྱུང་ཡང་༔ ཤིན་ཏུ་གསང་བར་བྱེད་པ་ནི༔ དམ་ཚིག་ཡིན་ཕྱིར་ཐུབ་པར་བསྲུང་༔ ཞེས་གསུངས་པས་རྟགས་ངན་པ་དང་མི་འདོད་པ་ལོག་དགུ་བྱུང་ཡང་ལས་སློང་དུ་ཤེས་པས་དཔའ་མ་ཞུམ་པ་དང་། བཟང་རྟགས་བཏུད་ནས་བྱུང་ཡང་སྒྲུབ་པ་ལ་ཞུགས་པའི་དྲོད་ཚད་ཙམ་ཡིན་གྱི་སྒྲུབ་པ་གཏན་ལ་ཕེབ་པའི་རྟགས་མེད་རྟགས་ཀྱི་རྒྱལ་པོ་མ་ཡིན་པས་རློམ་སེམས་དང་འཛིན་ཞེན་མི་བྱ་བར་ལྟོས་མེད་དུ་བསྐྱུར་ནས་ཤིན་ཏུ་གསང་བ་བསྲུང་སྟེ་མི་བསྒྲགས་པ་གནད་ཆེའོ། །གསུམ་པ་དམ་ཚིག་གི་གནས་དྲུག་ལ་བསླབ་པ་ནི། མན་ངག་སྟོན་པའི་བླ་མ་ལ་དད་གུས་
གདུང་བ་མི་འགྲེལ་བ་དང་། ཏིང་ངེ་འཛིན་གྱི་མཐུན་ཕྱོགས་རྣམས་བསྒྲུབ་པ་དང་། མི་མཐུན་ཕྱོགས་འདོར་བ་དང་། སྤྱོད་ལམ་ཀུན་ཏུ་ཏིང་ངེ་འཛིན་མི་འདོར་བ་དང་། ཡི་དམ་གྱི་ལྷ་སྤང་ལེན་གྱི་བསམ་པས་མི་བསྒོམ་པར་ངོ་བོ་དབྱེར་མེད་དུ་ཤེས་པས་རྩ་བའི་ཡི་དམ་མི་སྤངས་པ་དང་། ལྟ་སྒོམ་སྤྱོད་པ་ལྷ་སྔགས་སོགས་སྣོད་མིན་ལ་གསང་བར་བྱའོ། །གཞན་ཡང་གསང་བ་ཡོངས་རྫོགས་འདུས་པའི་རྒྱུད་ལས་བསྐྱེད་རིམ་སྤྱིའི་ཆིངས་སུ་སྲོག་སྡོམ་གཟེར་བཞིས་གདབ་པར་གསུངས་ཏེ། དེའང་སྐུ་ཕྱག་རྒྱའི་གསལ་སྣང་གིས་ཡུལ་གསུམ་གྱད་དུ་གྱུར་པ་ཏིང་འཛིན་དམིགས་པའི་གཟེར། གསུང་ཐུགས་སྲོག་སྔགས་འཁོར་ལ་སེམས་རྩེ་གཅིག་ཏུ་གཏད་པ་སྙིང་པོ་སྔགས་ཀྱི་གཟེར། ཐུགས་སྟོང་གསལ་འགག་པ་མེད་པའི་ཆོས་ཉིད་རང་སེམས་དང་གཉིས་སུ་མེད་པ་དེ་ཉིད་ལྷའི་རྣམ་པར་ཤར་བ་ལས་བསྒྲུབ་བྱའི་ལྷ་རྟག་རྟག་པོ་གུད་ན་མེད་པར་ཤེས་པ་ དགོངས་པ ་མི་འགྱུར་བའི་གཟེར། ཕྲིན་ལས་རྣམ་བཞི་སོགས་དམིགས་པའི་བསྒྱུར་ཁ་གང་ལ་གང་དགོས་སུ་སྒྱུར་བ་འཕྲོ་འདུ་སྣ་ཚོགས་པའི་གཟེར་བཞིའི་མན་ངག་གནད་ཐོག་ཏུ་ཁེལ་ན་སྐུ་དངོས་སུ་མཐོང་། ངག་ལ་བདེན་པ་འགྲུབ། ཆོས་ཉིད་ལ་རང་དབང་ཐོབ་སྟེ་
གསང་བ་གསུམ་གྱི་སྲོག་འཕྲོག །རིག་པའི་རྩལ་འབྱང་། ཕྲིན་ལས་རང་དབང་བསྒྱུར་བར་གསུངས་སོ། །ཁྱད་པར་ལྟ་ དགོངས་ཀྱི་གཟེར་ནི་ཤིན་ཏུ་གཅེས་ཏེ། རྩ་རྒྱུད་པད་སྡོང་བརྩེགས་པ ་ལས། དེ་ཉིད་ལྡན་པའི་རྣལ་འབྱོར་གྱིས༔ དུར་ཁྲོད་འདྲེ་ངན་བསྒྲུབས་གྱུར་ཀྱང་༔ མཆོག་དང་ཐུན་མོང་འབྲས་བུ་གང་༔ ཅི་འདོད་རང་བྱུང་ལྷུན་གྲུབ་འབྱུང་༔ དེ་ཉིད་མ་རྟོགས་ཨ་འཐས་བློས༔ ཡེ་ཤེས་སེམས་དཔའ་བསྒྲུབས་གྱུར་ཀྱང་༔ གནས་སྐབས་ལྡན་འབྲས་ཕྲའུ་ལས༔ ཡང་དག་འབྲས་བུ་སྲིད་མཐའ་ཙམ༔ ཞེས་གསུངས་པས་བསྐྱེད་རིམ་ཙམ་དུ་མ་ཟད་འཁོར་འདས་ཀྱི་སྣང་ཆ་ཐམས་ཅད་རྟོག་པས་བརྟགས་པ་ཁོ་ན་ཡིན། དེའང་ཉི་མ་དང་འོད་ཆུ་དང་བརླན་བཞིན་རིག་པའི་རང་རྩལ་ལས་གཞན་ཏུ་གྲུབ་པ་རྡུལ་ཙམ་མེད། རང་རིག་ཐིག་ལེ་ཉག་གཅིག་གི་ངང་དུ་ཆོས་ཐམས་ཅད་ཡེ་རྫོགས་ཆེན་པོར་གྲུབ་པས་སླར་སྟོང་པས་རྒྱས་འདེབས་མི་དགོས། རིག་པའི་ངོ་བོ་ཡང་སྐྱེ་འགག་གནས་གསུམ་གྱི་མཐའ་ཐམས་ཅད་དང་བྲལ་བས་ཅི་ཡང་མ་ཡིན་ལ་ཅིར་ཡང་འཆར་བ། ཤར་བ་ཙམ་ནས་དངོས་པོ་མཚན་མར་མ་གྲུབ་ཀྱང་ཀུན་རྫོབ་ཏུ་སྣང་ལ་དོན་བྱེད་ནུས་པས་མ་བསྐྱེད་ལྷུན་རྫོགས་ཀྱི་དཀྱིལ་འཁོར།
ཟང་ཐལ་གྱི་ཡེ་ཤེས་རང་གནས་ལ་ནམ་ཡང་འཕོ་འགྱུར་མེད་པས་འཛིན་མེད་ཅོག་གཞག་གི་ཆོས་སྐུ། འདི་ལྟར་སྣང་བའི་ཆོས་ཐམས་ཅད་བསྐྱེད་རྫོགས་ཟུང་འཇུག་འབའ་ཞིག་ལས་མི་འདའ་བ་གཤིས་ལུགས་ཀྱི་སྣང་སྟོང་ཟུང་འཇུག་ལ་རིག་ཐོག་ཏུ་མྱོང་བ་ཐོན་ནས་གནད་གཅིག་ཤེས་པས་འཁོར་འདས་ཀུན་གྱི་སྟོང་སྲོག་ཐོབ་པ་ཉིད་བསྐྱེད་རྫོགས་གང་གི་ཡང་སྙིང་པོ་སྟེ། མཁས་གྲུབ་ཀྱི་རྒྱལ་པོ་རྩེ་ལེ་བས། སྣང་གྲགས་གསལ་ཆའི་གདངས་ཀུན་བསྐྱེད་རིམ་སྟེ། །ཨ་འཐས་འཛིན་ཞེན་སྤངས་པ་རྫོགས་རིམ་ཉིད། །ཡེ་ནས་དབྱེར་མེད་ཡིན་ལ་ཡིན་བཞིན་ཀློང་། །བསྐྱེད་རྫོགས་ཟུང་འཇུག་ཉམས་ལེན་ཡེངས་མེད་འབུང་། །ཞེས་ཐེག་མཆོག་རྒྱལ་པོ་ལྟ་བ་སྤྱི་འབྱམས་གདེང་དུ་གྱུར་པའི་རྩལ་སྣང་རང་བཞིན་ཡོངས་གྲུབ་ཀྱི་ལྷའི་ཕྱག་རྒྱར་ཤར་བའི་རྡོ་རྗེའི་གསུངས་འདི་ལྟ་བུའི་གནད་གསལ་མ་རྟོགས་ན་ནམ་དུའང་བསྐྱེད་རྫོགས་ལ་མཚན་རྟོག་གི་གོལ་ས་ཆོད་པའི་དུས་མེད་པས་རབ་རྟོགས་པ། འབྲིང་ཉམས་མྱོང་། ཐ་ན་གོ་བ་ཕྱིན་ཅི་མ་ལོག་བས་ངེས་ཤེས་རྙེད་པ་ཙམ་ཅི་ནས་གལ་ཆེའོ། །དེ་ལྟར་བསྐྱེད་རྫོགས་ཚད་ལྡན་ལ་སྨིན་སློབ་བྱེད་ན་ཐོག་མར་ ཐུན་ཚད་ཀྱང་། གྲོལ་ཐིག་ དགོངས་པ ་རང་གྲོལ་ལས། ཐུན་གཅིག་ལྷ་ལ་
སེམས་གཏད་བསྒོམ༔ ཐུན་གཅིག་གསང་སྔགས་བཟླས་པ་བྱ༔ ཐུན་གཅིག་རླུང་དང་འགྲོ་འོང་བསྟུན༔ ཐུན་གཅིག་མངོན་སུམ་གནད་ལ་དབབ༔ ཅེས་གསུངས་པ་ལྟར་བྱ་ཞིང་གཞན་ཡང་སྒྲུབ་ཚུལ་རྣམ་པ་དྲུག་དང་བྱིན་རླབས་རྣམ་པ་ལྔ་ཡི་ཐེམ་པར་ལས་མི་འདའ་བར་བྱ་སྟེ་དེ་དག་རྒྱུད་དང་མན་ངག་ལས་ཤེས་སོ། །བསྐྱེད་རིམ་དང་འབྲེལ་བའི་བསྙེན་སྒྲུབ་འདི་ཙམ་དང་ཧཱུྃ་ཆོས་འབྲུ་དགུ་པ་ཙམ་སྔོན་ཏུ་སོང་ནས་སྤྲོས་བཅས་དེ་ཙམ་གྱིས་ཆོག་ཤེས་པར་བྱས་ཏེ་ཐེག་པ་དགུའི་ཡང་བཅུད་ཨོ་རྒྱན་ཆེན་པོའི་ཟབ་ཁྱད་ཡིད་དཔྱོད་ཀྱི་ལམ་དུ་མ་ལུས་པ་མཐོང་བ་དང་ཐོས་པས་གྲོལ་བ་རྫོགས་ཆེན་གསེར་གྱི་ཡང་ཞུན་ལ་ཡི་དམ་གྱི་སྙིང་པོར་འཆའ་སྟེ་འཁྲུགས་སྡེབ་ཀྱི་ཕྱག་བཞེས་གྲུབ་དབང་རྒོད་ཕུག་པ་ཆེན་པོའི་གསུང་གི་གསང་བ་ལྟར་བྱའོ།། ༈ །།རྩ་བའི་ས་བཅད་གསུམ་པ་ཕན་ཡོན་མདོར་བསྡུས་སུ་སྨོས་པ་ལའང་གསུམ་སྟེ། སྤྱིར་གསང་སྔགས་ཀྱི་རིམ་གཉིས་མོས་སློབ་ཙམ་བྱས་པས་ཀྱང་ཕན་ཡོན་དཔག་ཏུ་མེད་པ་ཐོབ་པ་གསར་རྙིང་གི་རྒྱུད་སྡེ་ཀུན་ནས་མགྲིན་གཅིག་ཏུ་གསུངས་ལ། འདི་ཉིད་ལས་ཀྱང་། གསང་སྔགས་ཐེག་ཆེན་སྙིང་པོའི་དོན་རྣམས་དང་༔གང་འབྲེལ་ཐམས་ཅད་སངས་རྒྱས་ཐོབ་པའི་ཕྱིར༔འདི་
གྲོལ་འདི་མ་གྲོལ་གྱི་རྣམ་དབྱེ་བྲལ༔ཞེས་གསུངས་པ་དང་། ཁྱད་པར་བསྐྱེད་རིམ་མཐར་ཕྱིན་པས་རབ་ཕྱིའི་སྣང་བ་ཞིང་ཁམས། ནང་ཕུང་ཁམས་ལྷ་སྐུ། །གསང་བ་ཚོགས་བརྒྱད་ཡེ་ཤེས་སུ་གནས་འགྱུར་ཏེ་རིག་འཛིན་རྣམ་པ་བཞིའི་གོ་འཕང་མཐར་ཕྱིན་ནས་གདོད་མའི་མགོན་པོའི་ས་ལ་གནས་པར་འགྱུར་ཞིང་། འབྲིང་བརྩོན་འགྲུས་དང་བསྟུན་པའི་རིག་འཛིན་གྱི་གོ་འཕང་ཉམས་འོག་ཏུ་ཆུད་ལ། ཐ་མས་སྐྱེ་བ་འདི་ལ་མངོན་ཏུ་མ་གྱུར་པས་ལུས་ཐ་མལ་ལྟར་སྣང་ཡང་སེམས་ལྷའི་སྐུར་རྣམ་པར་སྨིན་པས་རྣམ་སྨིན་རིག་འཛིན་ཚེ་འདིར་ཐོབ་ཅིང་ལུས་རྒྱ་གྲོལ་བ་དང་དུས་མཚུངས་ཕྱག་རྒྱ་ཆེན་པོའི་རིག་འཛིན་གྱི་ས་ལ་གནས་པ་སཱཙྪ་བརྐོས་ཕོར་ནས་ཕྱུང་བ་བཞིན་ནོ། །དེ་ལྟར་ཡང་ཐུགས་གཏེར་ཆེན་པོ་གྲོལ་བའི་ཐིག་ལེ་ལས། བསྐྱེད་རྫོགས་ཟུང་འཇུག་ལམ་དུ་ཁྱེར༔ བསྐྱེད་རྫོགས་གོམས་པ་སངས་རྒྱས་ཡིན༔ སྒྱུ་ལུས་བརྟན་པར་གྱུར་ནས་ནི༔ བར་དོར་ཡི་དམ་བཞད་ཅིང་འབྱོན༔ འདི་ལ་ཐེ་ཚོམ་ཅུང་ཟད་མེད༔ ཅེས་སོ། །ཡང་མཐར་གྱུར་པའང་དམ་ཚིག་མ་ཉམས་ལ་མོས་པ་བརྟན་པོས་བསྒྲུབས་ན་བར་དོར་ཡི་དམ་ལྷས་རྗེས་སུ་བཟུང་ནས་གྲོལ་བར་གསུངས་ཏེ། སྐུ་རྒྱུད་ལས། ཡང་མཐའ་བར་དོ་ཉིད་དུ་ཡང་༔
རང་སྣང་ཡེ་ཤེས་ལྷ་དང་འཕྲད༔རང་ངོ་ཤེས་ནས་རྣམ་པར་གྲོལ༔ཞེས་སོ། །ལྷག་པར་ཡང་གསེར་ཆོས་འདི་ཉིད་ཡོ་ག་རྣམ་གསུམ་གྱི་སྙིང་པོའི་ཡང་བཅུད་དཀོན་ལ་རིན་ཐང་མེད་པའི་བཀའ་གཙིགས་ཀྱི་ངེས་པ་དང་། འབྲེལ་བ་ཐོགས་པའི་ཕན་ཡོན་བསམ་གྱིས་མི་ཁྱབ་པ་ཡང་ཡང་ནན་ཏན་དུ་གསུངས་པ་གཞུང་ལས་གསལ་ཞིང་། །མདོར་བསྡུས་ཤན་འབྱེད་རྣམ་གྲངས་ཀྱི་སྐོར་ལས། སྙིགས་མ་ལྔ་བདོའི་དུས་སུ༔ བཀའ་མ་རྣམས་ཚོང་དུས་ཀྱི་འོ་མ་བཞིན་བསླད་ནས་འཆལ་ཞིང་གཏེར་མ་རྣམས་བདུད་ཀྱི་སྤྲུལ་པ་དང་ཡང་སྤྲུལ་རྣམས་ཀྱིས་དཀྲུགས་ནས་འཆོལ་བར་འགྱུར་ཏེ༔ ལ་ལ་བསྲེ་བསླད་དང་འཕྲི་བསྣན༔ མཆན་ཏིག་གིས་འབོག་འཆོལ་དུ་འགྱུར༔ ལ་ལས་དབང་ཟ༔ ཚོད་ཡོད༔ ལུད་མེད༔ བབ་ཆོལ་དུ་སྤྱད་པས་འཚལ༔ ལ་ལ་ད་མིན་ང་འདྲའི་གང་ཟག་གིས་ངའི་གསོབ་ཏུ་ཞུགས་ནས་འདྲ་མིན་གྱི་རིགས་མང་པོས་རྒྱལ་ཁམས་བཀང་ནས༔ དེ་ལྟར་འཆོལ་བ་སྣ་ཚོགས་འབྱུང་ཞིང་བྱིན་རླབས་ཆུ་རྒྱུན་ཆད་དེ་འབད་པ་དོན་མེད་དུ་འགྱུར་བས༔ དེའི་དུས་སུ་ཆོས་འདི་གང་གིས་འཕྲད་པ་དང་ཉམས་སུ་བླངས་བའི་སྐྱེས་བུ་ཐམས་ཅད་རབ་ཚེ་གཅིག་ལུས་གཅིག་གིས་བྱང་ཆུབ༔ འབྲིང་
ལུས་རྒྱ་གྲོལ་བ་དང་ལམ་སྣ་ཟིན་པ་དུས་མཚུངས་པར་འགྱུར༔ ཐ་མ་ཡང་ངན་སོང་གསུམ་གྱི་སྐྱེ་སྒོ་ཆོད་པར་འགྱུར་རོ༔ ཞེས་དང་། གཞན་ཡང་། སྨོན་ལམ་གང་ཐེབས་འདི་འཕྲད་དོན་དང་ལྡན༔ འདི་མཐོང་ཐོས་རེག་ལས་ཅན་སྐལ་ཚོགས་བསགས༔ མི་ནུབ་རྒྱལ་བའི་བསྟན་པ་བཟུང་བྱེད་ན༔ མོས་བྱེད་སྒྲུབ་རྣམས་སངས་རྒྱས་སྨོས་ཅི་དགོས༔ཞེས་བསླུ་མེད་རྡོ་རྗེའི་གསུང་ལ་ཡིད་ཆེས་པས་དལ་འབྱོར་དོན་ཡོད་པར་བྱའོ། །ཀུན་གྱིས་སྤྱི་བོར་བཀུར་བའི་གསེར་ཆོས་ལ། །བདག་འདྲས་ལྷན་པ་གདབ་པ་ངལ་བའི་རྒྱུ། །འོན་ཀྱང་སྐལ་མཉམ་དག་གིས་རྟོགས་དཀའ་ཞིང་། །ཡིག་ཆ་འགའ་ཡང་རང་འདོད་ལམ་དུ་འཁྱོགས། །དེས་ན་རང་གཞུང་ཟད་སོར་བཞག་པའི་ཟིན། །འདི་བྲིས་ཉེས་མཆིས་རྩ་གསུམ་སྤྱན་སྔར་བཤགས། །དགེ་བས་ཆོས་འདིའི་སྒྲུབ་བརྒྱུད་དར་ཞིང་རྒྱས། །བདེ་བ་ཆེན་པོ་པདྨའི་དཔལ་འགྲུབ་ཤོག །ཅེས་པའང་ཉམས་བཞེས་འདོད་པ་ཁ་ཅིག་ལ་མཁོ་བའི་རྒྱུར་འགྱུར་སྲིད་པས་ཟབ་ཆོས་འདིའི་ཞབས་ཏོག་ཏུ་དམིགས་ནས་བྲི་བར་འདུན་པའི་ཐོག །སྙིང་པོའི་བསྟན་པའི་དཔལ་གྱུར་ཟླ་བཟང་མཆོག་སྤྲུལ་རིན་པོ་ཆེའི་བཀའ་བསྩལ་ལྷུར་བླང་སྟེ། ལུང་འདྲེན་རྒྱས་བཤད་སོགས་ཀྱི་
སྤྲོས་པ་སྤངས་ནས་ལག་ལེན་ཁྱེར་བདེ་བར་ཏཱའི་སི་ཏུ་པདྨ་དབང་ཆེན་ཞབས་ཀྱིས་རྗེས་སུ་བཟུང་བའི་རྩིས་མེད་ཀྱི་རྣལ་འབྱོར་པ་པདྨ་གར་གྱི་དབང་ཕྱུག་རྩལ་གྱིས་དཔལ་སྤུངས་ཡང་ཁྲོད་ཀུན་བཟང་བདེ་ཆེན་གླིང་དུ་བྲིས་པ་བསྟན་འགྲོར་ཕན་པ་རྒྱ་ཆེན་འབྱུང་བར་གྱུར་ཅིག །དགེ་ལེགས་འཕེལ།། །།སརྦ་མངྒ་ལཾ།། །།